شهوة ملاكم الجزء 23

جميلة مشات عوالا على خزيت حتى كتوقف مصدومة ممتيقاش شنو كتشوف ..

---

عمر : دخلو نهار كبير هدا (كيعيط ) الوليدة وااا الوليدة ..

سمعاتو جميلة جات كطير تشوف شنو واقع وقفات جامدة بلاصتها .. غير لحقات حبيبة طار عمر كيبوس راسها

عمر (بضحكة) : واليدة زغرتي زغرتي

حبيبة :شواقع اولدي و شكون هادو (كطلع و تهبط فيهوم خاطرها هرب غير من اشكالهوم ..

كانت بنت تكون فعمرها ديك 30 عام مطراسية الحجبان بعكر حمر مفرقع كطرطق المسكة و حداها مها مرا غليضة قالت لبنتها مكتعرفيش كوب كاغسو و شعر حمر ... غير تشوف فيهوم تعرفهوم من صحاب الحال .. شوفة فيهوم كتخلي خاطرك يهرب

عمر :المدام المستقبلية

كريمة (طرطقات عينيها) :شنوو هيا

جميلة (ضربات ففخادها) : اويلي

حبيبة ( خنزرات فولدها) : عمر شهادشي كتقول

عمر (كيضحك) : اييه امي جبت لي غادي تقابلك و تهلى فيك و فيا و تربيلي ولدي ... كريمة مقابلة غير مها و جموع و ضوران .. ياك ديما كانت تغوت عليك و مكتعاملكش مزيان

كريمة الهضرة تسرطات ليها .. واش منيتو عوال يديرها منيتو جايب عليها الضرة ..

الراجل واخا يكون شمكار مافيه ميتشاف .. واخا يكون جلدة خانزة متحملوش المرا يجيب عليها مرا خرا .. كتحس بؤنوثتها تهانت.. باش حسن منها ديك المرا باش بدلها ...

كريمة متزوجاتش عمر حيت كتبغيه لا دارو غير باش تسمى مزوجة .. باش يقولو راها مرت فلان .. كانت عارفاه مايسوا ما يصلاح قالت هادي الفرصة فين تكون هي الكل فالكل طغات و متقاتش ربي .. تبعات طريق مها .. متعاملاتش بطيبة قلبها .. دخلات مجهدة محترمات لا كبير لا صغير خرجات فيهوم طول و عرض .. و نهار تهدات و عيات جاب لي يتبورض عليها ..

عمر مفكرش يتزوج حيت باغي يستمتع او باغي يعيش الحياة او يبدل ... كان باغي يفقص كريمة و يرد ليها صرف كان باغي يبان راجل و سيد الرجال ..

بقات واقفة كتشوف مقدراتش تهضر لسانها تسرط ...

حبيبة : عمر واش غير اجي و تزوج مقديتي بوحدة جايب وحدة خرا (كطلع و تهبط فيهوم)

جميلة :اولد حبيبة واش باغيني نشتف عليك هنا ... كيفاش باغي تزوج على بنتي ..

دوات مامات البنت حتى زعزعاتهوم : شنااااهواااا الى سميتك مرا قربي ليه تابربي حتى نشلضك هنا ..

جميلة تكمشات بقات غير كتمتم مقدراتش حتى تهضر دارت كتشوف فبنتها... لقات الدموع تجمعو فيعينيها

جميلة : شفتي ضسارتك فين وصلاتنا قولي شيحاجة

كريمة (ببكاء ) : شنو بقا ميتقال .. خليتيلي منقول.. هادشي كامل بسبابك .. هادو دنوب اشراق كيخرجو فيا .. بقيتي عليا متعامليش خرجي عينك .. ديري فعلي بقيتي تعمريلي راسي حتى وليت نسخة منك ..

ها نتائج خودي على قلبك ... عيت فيك خليني نعيش حياتي خليني نربي ولدي و نعيش هانيا و نتي كان كل همك نسيطر كان كل همك نكون انا هي راجل ديال دار

(شافت فعمر كتشهق) حلال عليك اولد حبيبة و الله منلومك.. لوم راسي لي سمحت فقرايتي لي تبعت هضرت جميلة لي من نهار جيت لهنا و انا منكدها عليكوم ... لانتا كنتي راجل لا انا كنت مرا ..

جميلة : ياك ابنت الحرام و ليت انا لي منسواش وليت انا لي خرجت عليك .. كون ما انا كون حبيبة رضاتك جفاف بحال لي دارت مع لي قبلك ..

كريمة : شنو نفع يلاه وريني واش هادي عيشة .. ها حنا تبورضنا يلاه قوليلي شنو ستافدنا علاش مخليتينش انا نتصرف فحياتي علاش نكدتيها عليا حتى وليت نسخة عليك علااااش..

جميلة : تستاهلي لي جرالك كون كنتي تطبقي هضرتي كاع متوصلي لهادشي ..

طلعات كريمة لفوق بلا متجاوبها .. غير دخلات لبيت بالها ولدها ناعس شافت حوايجو موسخين وجهو كلو شكلاط.. ضفارو هوما تالين ممقطعينش.. طاحت حداه كتبكي ..

كريمة : شنو هاد الحالة يا ربي ولدي و مقابلتوش ولدي و سمحت فيه

طلعات كلسات حداه هزاتو لعندها حتى فاق مخلوع بقات كتبوس فيه و تبكي حتى خاف و بقا كيبكي معاها

كريمة (كتبكي و تشهق ) : سمحلي اولدي سمحلي حيت مكنت الام لي تستاهل سمحلي حيت هملتك سمحلي اولدي سمحلي ...

لتحت الجو مكهرب ..حبيبة واخا معندهاش مع كريمة.. كانت عارفا مها لي كتحرشها واخا كانت سليطة اللسان و شحال من مرة تناكرو الا نهار مرضات قابلاتها و راعات ليها .. و كتبقا مامات حفيدها كتعزها و متبغيش ليها ضرر .. و كيف ما كان الحال اللهم كريمة و لا هاد الاشكال ..

دخلهم عمر لصالون مخلي جميلة غادي طرطق و عمر غير كيفرنس متقولش هدا لي عاد خرج من الحبس و حط كفالة صحيحة بلا فلوس المحامي .. كالس يضور و يرحب ..

---

عند كريمة الفوق هزات ولدها بدلات ليه.. دازت جمعات شي حوايج ديالها و دولدها.. هزات دهب ديالها و شي فلوس كانو عندها .. هزات وراقها و وراق ولدها .. جمعات اي حاجة ممكن تحتاجها .. هبطات مهبطة حوايجها وولدها .. موقفات غير حدا صالون فين كالسين ..

جميلة غير قشعاتها طرطقات فيها عينيها كون لقات تاكلها.. حطات كريمة لحوايج و دازت جيهت حبيبة لي كانت فالكروسة كالسا ..

كريمة (بدموع) حنات لعندها مور محطات ولدها ..

كريمة (كتبكي) : سمحيلي على اي حاجة درتها و لا قلتها .. سمحيلي حيت مكنتش بنت الاصل .. سمحيلي حيت شحال من مرة سبيتك و محتارمتكش سمحيلي حيت نقصت منك (كتشهق ) عارفا راسي منسواش عارفا راسي نستاهل اي حاجة كتوقع معاي.. لكن بغيتك تعرفي كنتي عزيزة عليا واخا مكناش كنتفاهمو و كل وحدة باغا تسيطر و تكون هي الري و شوار ..

هزات يد حبيبة باستها و ناضت غادية بحالها

شداتها حبيبة من يدها: متمشيش هادي راها دارك متحرمينيش من حفيدي

شافت فيها كريمة كتبكي: مبقاتلي بلاصة هنا .. و حفيدك كوني هانيا عمري نحرمك منو غير نستاقر مرحبا بيك فاي وقت

عمر (مصدوم فيها عمرو توقعها ممكن بسهولة تهد) : كريمة

دارت شافت فيه : مبروك عليك واخا كنت نتمنى ليك محسن .. كون راجل و تهلى فمك ..

جات هازا ولدها خارجة كتمسح دموعها

حبيبة (دموع فعينيها) : متخليهاش تمشي عمر دير شي حاجة

عمر واقف مصدوم فيها ..

جميلة (ناضت تابعاها) اديك بنت الحرام فين غادا

شدها عمر من يديها دوا بعصبية اول مرة يغوت عليها : تبتي اللرض

جا خارج تابعها لقاها واقفا كتسنى طاكسي

عمر : فين غادي تمشي

كريمة : ارض الله واسعة و عريضة

عمر : عاجباك هاد الحالة

كريمة : ربي كيخلصنا لا نت كنتي راجل لا انا كنت بنت الناس.. بقا فيا غير ولدي جا فالوسط

عمر : عيت فيك ا كريمة ديها فدارك و فولدك بقيتي تابعا مك ها فين خرجتنا

كريمة : منبقاوش كنضحكو على بعضياتنا مكنكرش مي خرجات عليا لكن كون لقيتك راجل ديال زمان كاع منوصلو لهادشي

عمر : فينما ندخل نلقاكوم مشادين فينما ندخل صداعكوم كيتسمع راه عييت من الحانوت مبقيتش كنعمرو و ليت غير دايع فزناقي

كريمة : هاد الهضرة فات عليها الوقت و لي عطا الله عطاه ولدك بغيتي تشوفو مغنحرمكش منو

عمر :مفات والو حتى دابا بغيتي ترجعي دار دارك بشرط مك بتيقار منحملهاش نهار كامل عندنا و غير توسوس و تحرشك بلا منهضرو على الفقها لي تقيل ضور فيهوم

كريمة : ولد حبيبة سير الله يسهل عليك انا مبقاتلي عيشة معاك ملي وصلنا لضرة و دخل لدارك بحال دوك الاشكال مبقات عشرة كون غير بدلتيني بشي بنت نقية ميبقاش فيا الحال

عمر ( تنهد ) يلاه جا يجاوب قاطعو لعياط

عبيبقة: خويا عمر الله يحفضك دخل عيط عليهوم نمشيو

عمر : واخا راه خليتهوم مع الوليدة فدار

عبيقة : اودي لهلا يخطيك العشير نعوضهاليك ساعة الخير .. قولهوم يلحقو عليا لقهوة

عمر : صافي كون هاني

كمشات كريمة حواجبها كتحاول تستوعب علاش كيهضرو .. و شنو جمع بين عبيقة و عمر .. حيت عبيقة معروف فدرب اكبر شمكار..

كريمة (باستغراب): شواقع مفهمتش

تنهد عمر : دوزت يوماين فالحبس بحال عذاب لكن قدرت نفكر فحياتي راجعت نفسي .. عرفت راسي مقصر مع راسي و معاكوم ..مكنتش راجل ... ماشي هادي هي لعيشة لي تمنيت ..

(تنهد) منكدبش عليك ندمت لي ضيعت اشراق من يديا و فاش شفتها مع راجلها و فين عايشا عرفت ربي عوضها .. فاش جيت كنراجع حياتنا لقيت اغلب مشاكل كانو بسباب مك .. كلشي كدخل فيه و كتحكم فيه .. وسوساتلك و خرجات عليك .. كون جيت باش ندوي معاك بلعقل مكنتيش غتسمعي مكنتيش غتستوعبي ..

خدمت معاك القوالب باش تفيقي

كريمة : كيفاش زعما

عمر : هادوك من طرف عبيقة .. كان منوض شي صداع و كانو معاه .. طلب مني نجيبهوم علاما يسالي

كريمة (طرطقات عينها) : هي دابا ضحكتي عليا

عمر : كنت باغيك تفيقي حيت مكيقهر لمرا غير مرا بحالها.. راه بصح هادي ماشي عيشة ا كريمة .. كنتي باغا تعيشي هانيا بلا صداع دار مفتوحة ليك بلحق مك منقبلهاش تبقا .. كنتي باغا ترجعي كيف كنتي هاد المرة كنقولك غا سيري ابنت الناس و براتك توصلك .. القرار ديالك

زاد عمر غادي راجع لدار حتى وقفاتو بهضرتها..

كريمة : موافقة مي بشرط

عمر (دار شاف فيها ) :اما هو

كريمة : نحلو الكراج و تخليني ندير فيه مشروع مبغيتش نبقا مقابلة غير طياب و الكوزينة

عمر : مدام تقابلي ولدك و دارك و متهمليهومش معنديش مشكل..

---

عند ايمان لبسات هي و جنى جاو بحال ام و بنتها .. ركبو لجنى شعر مستعار.. مع شوية ميك اب خاص بالاطفال .. غير سالاو خرجو لقاو لبنات و عصام واقفين .. مروة هازة كاميرا كتفيلمي..

دازو مع الكولوار خارجين لجردة غير وصلو و هوما المفرقعات بداو و طلقات اغنية على الام ..

ايمان ضحكات على جنى لي قفزات.. جاو داخلين كتشوف فديكور لي كان كلو على عيد الام مع دخلو و هوما يستاقرو عينيها على معتز لي غير شافتو جنى طلقات من يد ايمان مشات كتجري عندو شي لي خلا ايمان تستغرب اولا من وجودو و تانيا من جنى لي طلقات منها و مشات لعندو ..

زادت دخلات كانت الجردة كلها مزينة بالنفاخات الوليداات مع امهاتهوم كلشي فرحان كيضحك .. قربات لعندهوم كضحك

ايمان : غير شفتيه نسيتيني صافي هادي هي مامي ايمان

جنى تخبات فمعتز كضحك..

عصام :هزك الما ابنتي ا ايمان صافي مشات طير ليك بالراجل

مروة : جبتي الشريكة

معتز(كيضحك) : بعدولي من بنتي

كلمة بنتي بقات كتعاود فودنها واش سمعات مزيان و لا غير جاب ليها ..

يلاه جات تاكد من معتز و تفهم شنو هاد تغيير قاطعتهوم المديرة لي دخلات مع كيك كبير فيه عيد ميلاد سعيد جنى و عيد ام سعيد يا احلى ايمان

كلشي بدا كيصفق و تطلقات اغنية عيد ميلاد .. جر معتز ايمان من خصرها.. قبل راسها ..

ايمان مبقات فاهمة والو.. اسئلة كثيرة كدور فبالها .. واش اليوم عيد ميلاد جنى و كيفاش جنى كتبان متعلقة بيه .. و كيفاش حتى معتز كيقولها بنتي ..

مقدراتش تبقا ساكتا .. قتلها الفضول ..

ايمان : معتز شنو واقع ياك قلتي مغاديش تجي و دابا لقيتك هنا مبقيت فاهمة والو .. قلتو غيكونو لابسين بحال بحال بالي غير حنا .. راه مبقيت فهمت والو ..

معتز (بابتسامة ) : جنى جا الوقت لي تعطي الماماك كادو ديالها ياك ابنتي

جنى (بضحكة ) : اه ا بابا

كلمة بنتي و بابا خلاو ايمان توسع عينيها من صدمة .. ممتيقاش شنو كتسمع...

عند اشراق واقفين حدا مروة لي كتصور الاجواء

سارة : واش دايرين ليها مفاجأة

اشراق : بحالي بحالك

مروة : اه اه عرفتو ايمان غطير بالفرحة

اشراق :ياكما غيتزوجو دابا

مروة : لا لا معتز خلا زواج حتى يخطبها من واليديها يدوز كلشي مقاد ..

اشراق: و شنو المفاجاة

مروة : هانتي شوفي ..

علات راسها اشراق شافت فجنى مدات ليها المديرة دوصي لي بدورها عطاتو لايمان

جنى : حيت اليوم عيد الام ختارينا باش يكون عيد ميلادي

ايمان (حنات لعند جنى بستها) : غير وجودك فحياتي راه عيد

مدات ليها ضوسي كتشوف فيها ببرائة كتنفد غير ديكشي لي تقال ليها اما حتى هي مفهماش شنو تما ..

شداتو من عندها ايمان و وقفات .. غير حلاتو و قرات اول ورقة تغرغرو دموع فعينيها ممتيقاش شنو كتشوف .. حسات بمعتز واقف حداها بديك الفرحة دارت معنقاااه

ايمان (ببكاء ): نت اروع راجل متصورش شحال كنبغيك

مديرة الميتم : مدام ايمان مبروك عليكم

ايمان بعدات على معتز دارت لعندها

ايمان: شكرا بزاف متصوروش شحال فرحت(شافت فمعتز ) كنت خايفة انو متوافقش كنت خايفة انو تخليني نختار بينك و بين جنى او انو متقبلهاش

معتز : (باس راسها ) كان خاصني شوية دالوقت و صاف

مديرة الميتم : مسيو غسان عندي ليك خبر زوين.. وافقو على طلب ديالك (مداتليه ورقة)

ايمان : اشمن طلب

مديرة الميتم : غتقدري تاخدي معاك جنى من اليوم .. بشرط انو ممنوع تسافرو و لا تخرجو برات لبلاد و غير تكملو الوراق لي ناقصين بحكم انو دافعين طلب بزوج بيكوم كازواج كيولي عندكوم كامل حق التصرف..

ايمان (بفرحة ) : كيفاش واش ممكن جنى تمشي معانا

مديرة :تماما و فوقت الحصص انا شخصيا غادي نجي باش نكتب التقرير ديالي

ايمان بفرحة هبطات حضنات جنى : اخيرا غنتجمعو بجوج

معتز : بغيتي تقولي ب 3 ياك

ضحكات ايمان :اه

جاو البنات كيباركو الايمان و معتز .. كملو الاحتفال ديالهوم طفاو الشمع غير سلاو .. خداو الادن من طبيبة جنى عطاتهوم النضام الغدائي و بعض الادوية و لي فيطامين اي حاجة ممكن يحتاجوها ..

جنى الفرحة مسيعاهاش اخيرا غتقدر تكتاشف العالم .. كانت من الميتم لطبيب اليوم ربي حط فطريقها عائلة لي غتوعضها على الحنان لي فتاقداتو..

---

عند اشراق غير تغداو طلبات من عصام يوصلها لدار كوثر بحكم ايمان و معتز غيخرجو يدوزو وقت مجموعين بيناتهوم و مروة غتمشي لعند دارهوم ..

اشراق: مروة الى كنتي غادي تقلقي نعيط لاديب يجي موراي

مروة : لا لا علاش غنتقلق اصحبتي بلعكس معندك لاش تعيطيليه ها هو عصام يوصلك

اشراق : واخا صاف يلاه بحرا نمشيو ..

ركبو لبنات مع عصام ... وصل مروة عاد شدو طريق لرباط بالضبط لدار اشراق ..

مع وصلو نزلات اشراق هي وسارة .. غير دخلو لعمارة تلاقاو مع سيف هابط ..

اشراق: سيف صافا

سيف (شاد فخاطرو كيشوف فسارة صحابليه شي صاحبتها كيدوي فوق الخاطر ) :الحمدالله

اشراق : كنتي عند كوثر .. واش راها الفوق حيت صونيت مكتجاوبش

سيف (باستهزاء) : صباح الخير عاد تفكرتيها دابا .. اه حقا مبروك زواج

اشراق( محملاتش طريقة باش دوا معاها ) : عمرني نسيتها باش عاد نتفكرها

قاطعها : عليها سيدة مرمية فمصحة نفسية و نتي اخر من يعلم

اشراق كلمة مصحة نفسية كتعاود .. مقدراش تستوعب الهضرة لي قال

اشراق (مصدومة) : عاود شنو قلتي ...فينها كوثر ..

سيف (تنهد .. كيهضر و يضغط على سنانو ) : كوثر راه فمصحة كتعالج

سارة (بلا شعور ) : واش صبيطار دلحماق...

---

الشوفة لي دار فيها سيف خلاتها تقفز بلا هواها

سيف (بعصبية شدها من يدها ) : سميتها مصحة نفسية و ناس جاهلين و الاميين بحالك مكيفهموش لهادشي .. فخليك بعيدة و شدي فمك حسن ليك

اشراق ( طلعلها زعاف ) : طلق منها ا سيف خليني محتارماك...راه ختي هادي معامن كدوي

تنترات منو سارة

سيف(بعصبية) : تحتارم بعدا راسها ... و تعرف شنو كتخرج من فمها

اشراق كتحاول باش متعصبش .. جات تدوي سارة وقفاتها اشراق

اشراق: فينها كوثر و شنو وصلها لتما

سيف (تنهد) : كوثر حالتها تأزمات بالاخص مور زواجك او بالاصح مور معطيتيها بضهر و نسيتيها

اشراق ( بعصبية ) :شنو كتخربقو انا منسيت حد و الدليل هاني كنقلب راه هي لي مكانتش كتجاوب ..

(كتحاول تبرد باغا تفهم شنو واقع ) سيف راك فاهم كلشي غلط.. . فاش تسمع مني غادي تعضرني دابا الله يخليك شرحلي شنو واقع...

سيف : ماشي بلاصة الهضرة .. لقيتوني غادي لعندها الى كانت كتهمك واحد شوية يلاه تمشي تفهمي شنو واقع ..

اشراق(شافت فساعة ) : مغنديش على هضرتك دابا حيت باينا شحال كتعزها مي رد البال لهضرتك كوثر راها ختي ماشي صحبتي

سيف : فاش تشوفي حالتها غتفهمي هضرتي ..

اشراق : واخا يلاه نمشيو

خرجو ركبو مع سيف حيت عصام غير وصلهوم و مشا ..

طول طريق و اشراق كتفكر واش بصح قصرات فحقها واش لهاد درجة غفلات عليها.. واش بصح هملاتها.. شنو لي غيخلي كوثر توصل لهاد الحالة .. و كيفاش حتى وصلاتليها..

قلبها ضارها.. كتفكر ايامهوم من اول نهار تلقاو لاخر نهار .. عمرها توقعات او حسات انو كوثر كتعاني من شي مشكل نفسي .. كانت عارفاها متأثر بهروب كمال و كمل عليها زواج عصام لكن متوقعاتش توصل بيها درجة دخل مصحة نفسية ..

محساتش بالوقت حتى وصلو .. نزل سيف تبعينو ..

سارة (بهمس) : شكون هاد لخرا ملي شفناه و هو كيتهز علينا

اشراق : دوي بشوية .. معرفة قديمة و على مبالي مزعوط فكوثر

سارة : يتزعط و لا يكلس و حنا مالنا .. محملتوش شحال تقيل على خاطر

اشراق : شوفي و سكتي .. نشوفو هاد لحريرة فين غتخرج

سارة : كون صحابلي كاع منجي معك كون بقيت مع مروة ..

اشراق : سارة هنينا ..

دخلو لحقو على سيف لقاوه كيكمل الاجرائات ..

اشراق : سيف الله يخليك شرح ليا شنو كاين

سيف : من الافضل طبيبة ديالها تشرح ليك غتفهمي كتر

اشراق : واخا فينها .. يلاه نمشيو عندها دابا نيت

طلعو لفوق موقفو غير حدا بيرو ديالها .. استقبلاتهوم عرفها سيف على اشراق ..

طبيبة : بون ندخلو فصلب الموضوع .. صباح دويت مع كوثر نفسيتها محطمة بلا قياس فاقدا الثقة فمرة لا فراسها لا فالحياة .. كتشوف راسها بوحدها فهاد دنيا ..كتعيش اضطراب فالاحاسيس و المشاعر .. عندها نقص فالحنان و كتحس بالخدلان.. لي فهمت من سيف انو تزوجتي بلا حضورها شي لي زاد ازم الوضع

اشراق : راه كلشي جا على غفلة و مدرت لا عرس لا والو كان غير مفاجاة لينا حنا نيت

طبيبة : و لو كوثر عقلها ميقدرش يتقبل هاد الهضرة .. حسب التشخيص الاولي هي كتعاني من كتئاب و الى متعالجاتش ممكن تحاول تنتاحر ..

اشراق ( حلات عينيها بصدمة) : واش لهاد درجة وصلات حالتها و علاش مارضيتش انا البال

سيف ( باستهزاء ) : حتى تكوني بعدا عاطياها وقت عاد ترضي البال لحالتها

اشراق (بحدة ) : عيقتي جمع راسك اصلا مزال نتحاسبو كيفاش جايبها لهنا بلا متشاور و شكون سمحليك اصلا

سيف (بعصبية وقف كيغوت): ياكما غنتسنى ناخد منك الادن كون كانت كتهمك مغاديش تخليها و تمشي تعيشي الحياة

اشراق: كون عرفتي الضروف لي عشت كاع متحل فمك زايدون شكون تكون كاع باش كتحل فمك و تحاسبني ياكما راجلها و مفراسيش متنساش راسك راك والو مكتربطك بيها حتى علاقة .. جمع راسك حسن ليك

سيف ( مرضاش ناض كيغوت مكرهش يتلاح عليها ) : انا لي حمار حسبتك بنادم و جايبك معاي اما نخليك متعرفيش فين كاينا

طبيبة (بحدة ) :سيف خرج برا دابا

( دار مصدوم كيشوف فيها ) دابا متبقاش هنا ..

سيف : منيتك كتجري عليا

طبيبة ؛ سيف متخلينيش نتصرف شي تصرف ما هواش باليا نتا براسك نفسيتك تاترات بهادشي ..

خرج سيف متجاهل هضرتها لاتخ الباب موراه .. كره اشراق و طريقة هضرتها .. ندم لي جابها معاه..

طبيبة ( تنهدات) : فبحال هاد ضروف خاص تكونو يد فيد ماشي تصعبو الامور .. بجوج بيكوم كوثر كتهمكوم و كل واحد و طريقة باش كيبغيها و يعزها..

اشراق:مشكل كيحاسبني على شيحاجة هو براسو معرفهاش

طبيبة : ممكن تشرحيلي علاقتك بكوثر

اشراق : بشرط تخليني نشوفها

طبيبة : حاليا مانعين عليها زيارة

اشراق : مكيهمنيش قانونيا مكانش عليكوم تشدوها بحكم سيف مكيجيها والو و انا متاكدة مغاديش تكون جات بخاطرها .. فيا تخليني نشوفها يا غنخرجها فمرة

طبيبة : ماشي بهاد طريقة غادي تعاونيها

اشراق : كوثر ممريضاش انا عارفا صحبتي شنو بيها

طبيبة : راكي مشفتيش الحالة لي وصلات ليها

اشراق : هي الى اجلتي الهضرة و ديتيني لعندها دابا

فغرفة بيضا كيتسمع غوات بعيد .. غوات اللي كيعبر على الالم النفسي كتر من الجسدي .. واقفا كضور فبلاصتها ..ممتيقاش راسها شنو كتعيش .. كتحرك و تبكي بهستيرية ..حاسة براسها وسط دوامة..و لا متاهة معارفة منين تخرج.... مرة كدق فالباب مرة كتحاول تحلها ..شوية تسها في الفراغ..و يغيب وعيها عن الواقع اللي هي فيه....غير يرجع ليها وعيها و شعورها..كتصرف بعدوانية مع نفسها.....

باغا تخرج حاسة بالخنقة .. مكرهاتش تحل الباب و تبقا تجري متوقفش كاع .. كضور بحال شي حمقة ..وتخربق في شعرها..و تكرز على سنانها..بكثرة الاعصاب اللي شدوها...وحدة في حالتها اكيد الحماق يكون مصيرها..لكن كوثر..حالة خاصة شي حاجة كتحس بيها واقفة معاها..

الضو لي شاعل غير كيزيد من عصبيتها و توترها.. حاسة بالخنقة.. ريحة الطبيب كدخل بحال سم مع نيفها .. راسها غيتشق عليها.. لدرجة كتحس براسها منمل و اصوات كتيرة كيتعاودو فودنيها .. كتسمع بحال زفير و تصفار.. شي لي مخليها مكرهاتش ضرب راسها مع الحيط باش يخفاف الالم ..كل مرة شادة وذنيها و دموعها شاقين طريق وسط وجها..الوجه اللي كان ديما مبتاسم..اليوم لا اليوم الحزن الكآبة طاغية عليه...باغا تفرغ داكشي اللي كتحس بيه..لكن..ما عندها مدير و هي وسط غرفة..كلها بياض...كتحس بيهم كيعاقبوها على شي حاجة مدارتهاش..

رجعات بلاصتها تكات على وضعية جنين كتحاول تغمض عينيها .. حتى قفزها الباب لي كيتحل ... غير علات راسها اول حاجة جات عينيها عليها هي اشراق ..

---

عند اشراق غير خرجو جات تابعة طبيبة .. قلبها كيضرب خايفة من المواجهة.. خايفة تشوف كوثر فشي حالة متماش .. عقلها كيجيب ليها اسوء السيناريوهات.. كتفكر كيفاش غيكون رد فعل كوثر واش غتبغي تشوفها واش غدي تلومها واش غادي تعطيها فرصة تهضر و تشرح ليها .. قلبها ضارها خايفة الى تكون بصح هي السباب فهادشي لي وصلاتو ليه صحبتها.. خايفة الى تكون خسراتها .. مفاقت من سهوتها غير على صوت سيف لي كان موراهم ..

سيف : حاولي متعصبيهاش و رضي البال لهضرتك ..

دارت خنزرات فيه كون كان الوضع مختالف مغترددش تعطيه جوابو..

تحل الباب و تحلو عينين اشراق بصدمة معاه .. ممتيقاش شنو كتشوف ميمكنش تكون هادي صحبتها لي خلات قبل متسافر يستحيل تكون هادي كوثر

شعرها كلو مشنتف.. عينيها داخلين و باين عليهوم حالة لبكا.. تحت عينيها كحالو.. بلا الفاصمة لي فيدها.. باين فيها الضعف لدرجة عضام وجها برزو.. اشراق مقدراتش تصدق عينيها ..

محساتش بدموعها امتى هبطو .. كتفكر كوثر و ضحكتها و طرائفها.. كتفكر فاش كانت كتكون كاعية و كوثر كتحاول تخفف عليها و تضحكها و تعاود ليها نكات .. كتفكر فاش كانت كتعيب حليمة و نهار كيخدمو فشي عرس تبقا تعيب فالبنات لي كيشطحو.. لحضات و دكرايات دازو قدام عينيها بحال بارح .. كتشوف كانو كيتقاتلو باش يخلصو لكرا و ياكلو و كانو عايشين هانيين و ناشطين .. مبقاتش قادرا توقف فبلاصتها زادت كتلوح رجلها و هي كترجف ...

اشراق (كترجف) : كوثر ..

فلتات شهقة لكوثر قبل مترجع تكمش فبلاصتها على وضعية جنين .. كتحاول تمالك نفسها على الاقل حداها متبينش ضعفها واخا مكرهاتش تغوت و تعاتبها لكن جهد معندهاش .. فضلات تبكي فصمت رافضا تهضر..

تقدمات اشراق لعندها كلسات حداها هزات يدها كدوز على شعر كوثر و دموعها كيهبطو.. حاسة براسها كتحلم و كتمنى لو تفيق من هاد الكابوس لي كتعيشو..

بقات شحال ساكتا حتى وحدة فيهوم مهضرات كيتسمع غير صوت شهقات ديال كوثر لي شوية بشوية كيتزاد صوتهوم.. تنهدات اشراق مور مقررات تهضر و تكسر ديك السكون ... خاص ضروري تشرح لكوثر و تحيد سوء تفاهم لي واقع ..

دارت شافت فيهوم بالها سيف و سارة واقفين حدا الباب و طبيبة كلسات فجنب الفوطوي هازا مدكرة فيدها

اشراق (كتمسح دموعها) : كوثر انااا جيت عندك مبغيتيش دوي معاي ..

(كوثر لا رد )

اشراق(تنهدات) : عمري نسيتك و عمري نساك .. كتبقاي ختي لي ولداتهالي دنيا ... مبغيتكش تشكي و لو شوية فمعزتك .. مبغيتكش تقولي هادي نساتني و بدلاتني... عارفا راسي تشغلت عليك عارفاك واخدا فخاطرك مني.. لكن كون تعرفي شنو داز عليا غتقدري ضروفي..

ديك ليلة شهدتي على شنو وقع حسيت براسي مخنوقة قلت علاقتي انا و اديب مستحيل ترجع فكرت نهرب ديك الوقت واخا مكرهتش نهرب من راسي تما فين سيفطيني غسان على اساس خدمة ..

(بقات اشراق كتعاود ليها من نهار مشات لداخلة حتى لنهار لتزوجو فيه و رجع عمر و باها .. بقات مرة تبكي مرة كتعاود .. )

اشراق : واخا هادشي كامل متصوريش قداش بقات بلاصتك .. منكرش واخا كنت فرحانة كانت فرحتي ناقصا حيت مكنتيش .. راه انا و الله ما هملتك و الله مسمحت فيك الضروف كانت أقوى مني

بقات كوثر كتبكي مقدراتش تقبل هضرتها..بقات ساكتة لدرجة اشراق فقدات الامل انو ممكن كوثر تهضر .. حتى سمعاتها نطقات..

كوثر (كتشهق) :

شحال صعيبة تحسي براسك بوحدك حتى واحد مامعاك .. نتي على الاقل ديما كتلقاي لي مساندك كتلقاي ناس كيبغيوك.. انا عكسك كاع ناس كيتخلاو عليا .. عتابرتك عائلتي حطيت املي فيك قلت اشراق مستحيل تفوتني اشراق يوقع لي وقع مدوزنيش..

جات تهضر اشراق قاطعتها كوثر(كدوي مرفوعة) : فالوقت لي حتاجيتك ملقيتكش.. شحال من مرة شكيت عليك شحال من مرة طلبت منك نهضرو كنتي ديما كتقولي كنزيد فيه لدرجة

وليت مكنقدرش نعبر و نقول شنو ضارني ولا عندي واحد الفراغ كبيير فداخل ديالي .. الجسد ديالي حاضر ولكن عقلي باغي يموت قلبي باغي يوقف ، أنا ماشي قوية كيفما كنتي كتشوفيني .. أنا ضعيفة و بزاف ..

حسيت بيك بعدتي عليا لدرجة مبقيناش كيف كنا .. تسنيت يجي نهار لي راسك تراجعي راسك واخا هكاك عمري تشكيت ..مرضت و كرهت حياتي.. بكترت ماكنت كنبغيك و ليقتك بعدتي بكترت موليت كنغير منك .. وليت كنقارن راسي بيك .. كنشوفك عايشا و زدتي القدام و انا كرجع اللور ..

(سيف كمش عينو بغضب عرف كوثر غادي تزبلها ديال بصح كان باغي يتدخل لكن طبيبة منعاتو )

كوثر (ضحكات ) : فراسك حتى من راجلك تمنيتو يكون ليلي (ضحكات باستهزاء ) ديك ليلة لي دابزتو كنت معاه .. كان كيشرب و يغني تمنيت لو لقيت لي يدير عليا ديك الحالة .. لي يبغيني بديك طريقة.. فديك اللحظة كوني متأكدة كون قرب مني مكنتش غنقاوم كنت غنعيش اللحظة .. و مكنتش غندم عليها ..

اشراق صدمة كانت واضحة عليها لدرجة عينيها تغرغرو بدموع يستحيل صحبتها كوثر تكون هكا.. بحالي هزيتي بنت و حطيتي بنت .. كاع لي سمعو ديك الهضرة بقاو مصدومين من غير طبيبة لي كتسمع بهدوء و كتقيد الملاحظات ديالها ..

كلشي كيساين رد فعل اشراق .. كلشي كيتوقع الاسوء .. غير من يدها لي مزيرة عليها .. قبل كانت كدوز يدها على شعر كوثر بحنية و اقل رد فعل كان ممكن يكون هو تحبس لكن اشراق محبساتش.. كملات كأن شيء لم يكن .. بحالي ديك الهضرة مأثراتش فيها و لو طلو على داخل ديالها كان مجرد حطام .. قلبها تعصر .. كون كان وضع اخر كان غيكون رد فعل مختالف ..

كتافات تبقا ساكة شحال كتحاول ترتب افكارها .. كتحاول ترتب الحروف و الجمل قبل متنطق بيهوم .. حيت اي كلمة ممكن ترجع بندامة شي لي خلى التوثر يزيد و حتى كوثر لحضة ندمات لي خرجات ديك الهضرة من فمها .. حتى قاطعتها اشراق لي جراتها من كتفها باش دور لعندها .. كوثر حولات تمتانع معندهاش الجرئة الكافية لي تشوف فعينين اشراق .. يمكن حيت كانت عاطياها بضهر قدرات تعبر على شنو فبالها لكن وجه لوجه معندهاش ديك الجرأة و الشجاعة .. واخا هكاك بقات اشراق مصرة باش دور كوثر لعندها ..

غير تقابلو العينين خدمات لغة المشاعر ... و لو كاع ديكشي لي وقع و لو شنو ما و قع و لو كاع الاغلاط كيبقى انو داخل ديال كل و حدة فيهوم نقي خالي من الخبث ..

شهقات كوثر هوما الوحيدين لي كانو كيتسمعو فالغرفة .. و لو هضرو ديك الدموع كانو غيعبرو على شحال من حاجة مكانت قادرة تقولها كوثر او تشرحها..

اشراق مور تردد كبير خدات نفس كتحاول تغلب على الغيرة ديالها و تحضر عقلها .. كتحاول تصرف بعقلانية و تطرد ديك الهضرة من بالها و خا هي فالداخل ديالها شعلات نار قوية كتاكل فيها ..

استقرو يدين اشراق على وجه كوثر .. بكل حنية كانت كتمسح ليها دموعها

اشراق ( بحنية ) : و لو تقولي لي قلتي و لو ديري لي درتي انا فاهماك .. منقدرش نحاسب حيت اي وحدة كانت بلاصتك ممكن تفكر بنفس تفكير

كوثر (مصدومة من رد فعل اشراق ) : انا راه كنقولك شفت فراجلك فاديب شوفا ناقصة.. انا تمنيتو ليلي

اشراق ( بهدوء ) :بلعكس نتي متمنيتيش اديب نتي تمنيتي شخصية بحالو او بالاصح تمنيتي راجل لي يبغيك و يحس بيك راجل لي يكون فجنبك و يحن عليك .. (تنهدات)نتي ا كوثر ماشي خايبة او كتمناي الشر لشخص خور نتي فقط ملقيتيش لي يعطيك الحب و الحنان ملقيتيش الشخص لي يعوضك على كاع ديكشي لي عشتيه .. كون مكنتش عاشرتك و عرفتك مزيان ممكن نشك انو بصح كتكرهيني لكن نتي داخل ديالك نقي .. الضغوطات لي خلاوك تكون هكا ..

كوثر (بصدمة) : واش عارفة راسك شنو كتقولي

اشراق (بابتسامة ) : عارفة مزيان شنو كنقول ممكن نكون بعدت عليك بسباب الخدمة و الضغوطات لي مريت منها لكن يستحيل نغلط فيك .. كتبقاي ختي و صحبتي كتبقاي احلى حاجة وقعاتلي و عمري ندمت حيت عرفتك او حطيت تقتي فيك

كوثر (كتبكي ) : انا .. انا راه سبيتك و ضنيت فيك سوء انا راه مخليته مقلت فيك

قاطعتها (اشراق) : مبغيتش نعرف شنو قلتي حيت متاكدة انو فديك اللحظة مقصدتيهاش بصح و عاد كنتي معصبة (شدات وجه كوثر بين يديها ) الماضي نسايه لي تقال تقال و لي دار دار .. مجيتش باش نحاسبك و تحاسبيني .. بلعكس جيت باش نشرحليك شنو وقع .. مبغيتكش تاخدي فكرة غالطة .. مبغيتش علاقتنا ضيع ..

كوثر (دموع كيهبطو و كتشهق ): لي ضرني كتر هوما لي هضرو معاي كون غير نتي لي دويتي معاي كون غير نتي لي صفتيلي تصاور او على الاقل تعيطي تعلميني علاش دخلتي طرف تالت بيناتنا .. متخيليش باش حسيت فاش وصلوني بلي تزوجتي بلا بيا .. مقدرتش نتقبلها

اشراق : فديك الوضع و انا و مكنتش متيقة .. كلفت ايمان باش تصفطليك كلشي حيت عرفت راسي غادي نتشغل .. بالاخص كنا كنصونيو مكتجاوبيش

كوثر : كنت مريضة كنت محتاجاك متوقعتكش تسافري بلا متعلميني حسيت بلي مبقيتش كنعنيليك مبقيتش كنهمك

اشراق (جراتها حضناتها عندها) : عمرك تقولي بحال هاد الهضرة كون مكنتيش كتعنيلي كانو بزاف ديال لحوايج غيتبدلو

قاطعتهوم طبيبة : كنضن من الاحسن تخليو كوثر ترتاح ..

هزات اشراق راسها بتعب باستها فراسها : رتاحي دابا واخا ..

(جات اشراق نايضا و شدات ليها فيدها)

كوثر : سمحيلي

اشراق ( بابتسامة ) :معندي علاش نسمحليك مدرتي والو نتي لي سمحيلي

دازت غادة بحالها حتى وقفاتها

كوثر : كنواعدك غنتعالج .. عارفا راسي مريضة و مبقيتش كنقدر نوزن الامور

اشراق :نتي ممريضاش خاصك غير تغلبي على ضغوطات الحياة و تقوي راسك

كوثر : غترجعي عندي ياك

اشراق : اكيد غنكون هنا

خرجات اشراق كتحاول تبقا تابثا.. مجرد مفاتت لباب كاع ديك قناع البرودة لي كانت لابساه ختفى .. كانها كانت حاطة قطعة جليد على قلبها و بكترت العافية لي شاعلة فيه خلاتو يدوب ..

وقفات مع الحيط حاطة يدها على فمها كتحاول تكتم شهقات ديالها .. اصعب موقف ممكن تعيشو .. دابا تاكدات بلي صحبتها بصح خاصها علاج نفسي ...

طارت عندها سارة معارفة لانو تقول و لا شنو دير .. مصدومة من شي لي سمعاتو و لي تقال لدرجة مستغربة من ختها و البرود لي كانت عليه ..

---

عند سيف غير خرجت اشراق دخل عند كوثر .. مور مشاف طبيبة عطاتها جرعة مهدئ باش تنعس و ترتاح

سيف ( باس راسها ) : كيف بقيتي شوية

كوثر : ضلمتها ياك .. هي كاع متقلقات مني كيف درت انا ..

سيف (بحب ) : رتاحي دابا كلشي غيتقاد واخا

كوثر : بقا معايا متخلينيش بوحدي .. كنخاف بزاف .. كنولي نسمع بزاف ديال الاصوات .. و تصفار فودني

سيف : انا معاك متخافيش مكاين والو

غمضات عينيها كوثر بفعل الدوا لي خدات .. غير نعسات خرج سيف لقا طبيبة مع اشراق لي كان واضح عليها انو بصح ضراتها هضرت كوثر ..

طبيبة (شافت سيف خرج ) : ممكن تجيو معايا خاص ندوي معاكوم بجوج الى سمحتو

وقفات اشراق مور معوناتها سارة .. غير وصلو لبيرو دخلو كلسو كيتسناو الطبيبة تهضر ..

الطبيبة : اولا احسن حاجة وقعات هي هاد المواجهة لي كانت بحال جلسة نفسية قدرت نحدد نقط الخلل لي عند كوثر و لي اكيد مع الجلسات جاين غنقدرو نخدمو عليهوم

(شافت فاشراق ) منكدبش عليك صدمتيني برد الفعل ديالك كنت خايفة منو ليزيد يازم الوضع .. واخا انا متاكدة انو ديك الهضرة طلبات منك مجهود كبير ... لي بغيت نشرحليك حالة كوثر مختالفة على الحالات العادية لي كنسمعو بيها ..

كوثر خدات افكار و معايير دخلاتهوم لعقلها الباطني و خزناتهوم .. انتقال من حالة لأخرى مقدراتش تستوعبها.. حياتها كانت محصورة بين طبقة معينة .. كتخدم باش تاكل .. عمرها توقعات انو غتعيش كتر من هكا او يجي نهار و تبدل حياتها .. نتي كنتي ديك الخيط لي خرجها من ديك القوقعة قدرتي تخليها تكتاشف عالم خور ناس خرين من طبقات اجتماعية خرى .. انفاتحات على عالم تاني فواحد الوقت وجيز .. دخلو ناس جداد لحياتكم..

كوثر عقلها رجع خزن الحياة الجديدة السفر لي اوطيل الغالين ماكلة دو لوكس .. فنفس الوقت بان عصام .. الراجل المناسب من الطبقة لي كتحلم بيها.. تما تشبتات باوهام .. بالنسبة ليها كان الخيط لي غيخليها تضمن البقاء فديك النيفو.. على حساب مفهمت من سيف موراها مباشرة رحلتو و قررتو تستاقرو فرباط ..حياة جديدة خدمة جديدة و اكيد ناس جداد معارفينش بالماضي ديالها و متقبلينها كيف هي .. و اهم حاجة بقا احتكاكها ببنات من طبقة عاليا ..

و هنا فين بدات نقطة التحول لي خلات كوثر تزيد ثبت فكرة تغير .. و بدا كيتكون عندها الخوف من الرجوع لنقطة 0 ... فنفس الوقت نتي عشتي أحداث كثيرة فم

ففترة زمنية وجيزة .. قدرتي تخدمي فشركة كبيرة ... قدرتي تسافري لدولة خرى كتاشفتي عالم الموضى .. بلا متحسي بهضرتك مع كوثر قدرتي تخليها تعيش و تنتاقل لعالم ديالك .. خليتيها بلا شعور تبغي تعيش نفس ديكشي لي عشتيه .. تمنى لو كانت هي اشراق و هي لي حققاات دكشي لي حققتيه..

اشراق : لكن هادشي راه حسد ماشي حيت صحبتي او ختي وصلات لشي حاجة خاص حتى انا نوصل ليها

طبيبة : لا هي محسداتكش بلعكس كوثر ماشي خايبة او كتكرهك هي مكرهاتش لو قدات تعيش معاك ديكشي لي نتي عشتيه .. تمنات لو كانت حاضرة و تلاقات بدود ناس لي نتي شفتيهوم و تلاقيتيهوم ..

اشراق : ادن هنا فاش سافرت انا لداخلة و ممشاتش هي بداو المشاكل عندها

طبيبة : تقريبا حيت كوثر ولفات فين ما مشيتي كتمشي هي و عاد لي ازم الوضع انو باقي البنات مشاو .. الى جينا المشكل الحقيق راه ماشي زواجك بضبط لا راه حيت نتوما قدرتو تعيشو شي حوايج هي مقدراتش تعيشهوم ..

اشراق (باستغراب ) : ولكن هي راه كتلومني حيت تزوجت و محضراتش لدابا باقي متقبلاتهاش

طبيبة ( بابتسامة) : خافت الى زواجك يكون سبب رجوعها لنقطة صفر

اشراق (باستغراب ) : يعني خافت الى نتخلى عليها

طبيبة : كوثر متاكدة فالداخل ديالها يستحيل تخليها او تبدليها لكن عقلها الباطني خزن فكرة انو بزواجك نتي هي حياتها غتبدل و تخربق و احتمال كبير ترجع لحياتها لقديمة

اشراق : يعني فاش دوات على اديب ( غمضات عينيها بعصبية ) و بلي لو جاتها الفرصة مكانتش غادي تردد كانت كتعنيها نيت

طبيبة : مع الاسف اه حيت بالنسبة ليها لو كان ديك الشخص شكون ما كان غيخليها تحافظ على العيشة جديدة و ميخليهاش ترجع لحياتها لقديمة فكوني متأكدة غادي تشبت بيه .. و دير اي حاجة ..

سيف : لكن علاش متشبتاتش بيا انا

طبيبة : سؤال زوين ..بكل بساطة كوثر مشافتش فيك ديك الشخص لي ممكن يخليها تعيش ديكشي لي كتمناه .. على العموم مزال غنقدرو نحلل شخصيتها و نفهمها كثر مع الجلسات الجاية

اشراق : واش نقدر نعاون بشي حاجة

طبيبة : اكيد لا نتي لا سيف ضروري تحضرو فبعض الجلسات حيت على مابلي معاكوم كتقدر تهضر و تعبر عكس معايا انا مزال متقبلاتش انو هي مريضة و خاصها تعالج

اشراق :و بالنسبة اكتئاب لي كتعانيه

طبيبة : الى تعالجت من العقدة لي كتعاني منها كوني متأكدة حتى الكتئاب غيمشي و حب الحياة غدي يتولد من جديد عندها..

خرجات اشراق و سارة من عند طبيبة مور مخلات ليها رقمها.. يلاه جاو خارجين سمعات سيف كيعيط ليها .. تنهدات و دارت عندو

سيف : اشراق واحد دقيقة

اشراق : وي نسيتي شي حاجة مقلتيهاش

سيف (ملقا ميقول) : بصراحة بغيت غير نعتادر منك .. عارف راسي غلطت فحقك لكن راه هاد الايام لي فاتت متصوريش حالتها كيف كانت

اشراق (بود) : كوثر محضوضة حيت لقات راجل بحالك .. كنتمنى تبرا و تعرف قيمتك

زادت مخلياه مصدوم فيها توقعها غتقمعو و ترد ليه صرف .. دابا عاد فهم علاش كوثر متشبتة باشراق و كتبغيها..

---

فجيها خرى فصبيطار حكومي ريحة الخنز كضربك من الباب .. حاشا واش تقول صبيطار .. مجرد مكدخل ليه كتمرض.. كلشي كيغوت كلشي مريض و طبيب والو .. الفرملية كتبورض حاسبة راسها هي مولات شي .. من سيكيريتي تبغي غير تسولو يبقا يفهم عليك و يتهز و يتحط ..

فغرفة لي ياحصرا الانعاش.. حيوطها مقشرين .. باب مفورية.. ناعس كيتسمعو غير صوت الة دقات القلب لي كتبين انو باقي عايش.. على برا واقف بوليسي لي كيبين انو لي لداخل ماشي شخص عادي بل واحد محبوس حاطين لي حاضيه ..

دخل اديب هو و المحامي دفعو طلب النقل لمصحة .. غير كملو الاجرائات خرجو على برا كارهين الوضع ..

اديب : دين مهم مكيسواوش كي الكلاب حتى كيشوفو الفلوس عاد كيتحركو

المحامي : معندنا منديرو هادي هي البلاد قواو فيها كروش لحرام

اديب: اودي الله يقطع لبوهوم جدر غير zواا مل ميدخلوش فقبرهوم..

المحامي: كياكلها غير المسكين هو لي كتجي فيه دقة

قاطعهوم طيل داديب كيصوني

اديب : وي معتز شنو تما

معتز : صافي راه مع 5 تكون هنا

اديب : بغات تجي بعدا

معتز : اه راه معكساتش بالعكس دغيا وافقات

اديب : صافي غير يجيبها علمني قبل

معتز : كون هاني

اديب : شنو درتي فلبلان لاخر

معتز : ندوي مع كنزة الى بغات راه مزيان غدا و لا بعدو نمشيو .. مبغاتش نمشيو غير حنا و نشوف لوليد يمشي

اديب : محمد ميقول والو بلعكس غيفرح

معتز :واغير صواب و صاف اما انا مشغليش فلحزاق كامل .. مهم نخليك دابا منبعد و نهضرو ..

عند اشراق غير خرجات اول حاجة دارت ختارت اقرب قهوة .. بغات غير تكلس ترتب افكارها حاسة براسها مخربقة ..

سارة : مالكي

اشراق : راكي سمعتي بودنيك و شفتي كلشي على عينيك .. حتى كنقول حياتي تقادات و كتعوار من شي جيها..

سارة (ببرود) : نساي نساي عيشي حياتك و لوحي مور ضهرك الى بقيتي مركزة مع هادشي غدا غنشدوليك حتى نتي شي شومبغ تما

اشراق : باز و الله مكتحشمي

سارة (بتردد كدوي ببرائة ) : اشراق اجي نقولك

اشراق (عايقا بيها باغا طلب شي حاجة ): غا قولي شنو تما

سارة (كضور فعينيها) : ياك حنا فرباط شنو بالك نمشيو عند غسان

اشراق (ضحكات من قلبها) :ياك اختي توحشتيه بغيتي تشوفيه

سارة (بارتباك) : لا لا قصدت زعما طاطا غفران

اشراق (عايقا بيها ) : طاطا غفران وانا نعيق ( كضحك) واصوني على طاطاك تجي تدينا

سارة (كضحك ) : واباز يا ختي تقولي نتي معندكش نمرتو

اشراق(كطنز) : اغير صوني ختك معندهاش صولد نتي بعدا عندك لابونمو

سارة (كضحك ) : واباز يا ختي

صونات سارة لغسان .. غير عرف بلي راهوم فرباط سمح فكلشي و جا لعندهوم ..

غسان (دخل لعندهوم ) : و انا كنقول كيفاش رباط منورة هي نتوما هنا

اشراق : سبحان الله شحال و انا هنا و خدمت معاك عمرك قلتيهالي

غسان (عاق بيها شادة بيه ) :مالي حمق (دار كيشوف حداهوم ) فينو زوجك المصون

اشراق (كضحك) : زوجي خليتو فكازا كون عرفني كالسا معاك كون دوزني فمبتسمون رغم الاعاقة

غسان (كيضحك): ميقول والو ندوزو فوجه سارة

اشراق : وراه الاخت لي قاتلك توحشات طاطاها غفران

سارة ( حشماتها): واباز مالي كدبت راه ولفتها

غسان : حتى هي من نهار مشيتي قالك دار خوات خليتي بلاصتك

اشراق : مساكن بقيتو فيا كتقطعو فالقلب

سارة (خنزرات فيها ) : اشراق والله مكتحشمي

غسان : نوضو نوضو ندوزو على غفران نمشيو نتغداو باش حتى الى عيط صعصع ديالك ميقول والو

اشراق (.كضحك) :هايهاي سي غسان و لا كيفهم فصواب

ناضو لبنات ركبو تعمدات اشراق تكلس لور خلات سارة كلسات القدام موقفو غير حدا دار غسان لقاو غفران فالباب كان علمها غسان توجد راسها لكن مقالهاش بلي البنات معاه .. غير شافت سارة طارت كتبوسها و ترحب بيها .. كان واضح شحال فرحات بشوفتها .. ركبات غفران حدى اشراق عيات فيها سارة باش تركب القدام لكن امتانعات بحجة كدوخ و مكترتاحش...

شدو طريق لريستو جنب البحر .. غفران الفرحة باينة على وجها .. كتشوف ولدها راشقاليه .. غير وصلو دخلو ناضت اشراق بعدات عليهوم مشات كتعيط لاديب .. بقا شحال كيصوني عاد جاوب

اديب : افين المدام طوالو رجليك

اشراق (.كضحك) :كون غير معلمتكش نقولو

اديب : غير ضاحك معاك .. شنو الاوضاع

اشراق : حتى نرجع و نعاودليك بغيت غير نعلمك راحنا مع غسان و ماماه

اديب (كيضحك) : مشيتو تخطبو السيد مقدراتش تصبر ختك

اشراق (ضحكها) : باليا هاد جوج غيسبقو معتز و ايمان

اديب : الله يجيب لينا فين ناكلو بسطيلة

اشراق(كضحك) : و فين نشطحو

اديب : على امدام دارك محروقة باش متشطحيش فيها

اشراق (كضحك ) : نشطح نشطح ..خليني نرجع عندهوم حشومة خليتهوم بوحدهوم

اديب: و انا محشوماش عليك خليتيني مقطوع و محروم

اشراق : الوداد لاعبة معندي مندير ليك

اديب : منحوس انا نهار درنا لحلال عاد بان ليها تشرف

اشراق :سير سير الله يمسخك

اديب: غير نوصل لكازا نصونيليك خلي طيل حداك

اشراق : اه صاف كون هاني

قطعات اشراق مع اديب.. رجعات عندهوم لقاتهوم مجمعين .. تغداو و هبطو لبحر .. دوزو لعشية كاملة ضحك فتالي دخلو لقهوة عائلية على لبحر ..

غفران : سيف شنو بالك تدي سارة تهبطو لبحر و خليني نهضر انا و اشراق على خاطرنا

غسان : على زعما الى بقينا حنا مغتدويوش على خاطركوم

اشراق (كضحك) : بغات تهنا من صداعك نهار كامل كدوي خليها ترتاح شوية و دي معاك سارة حتى هي قبح منك مكتسكتش

سارة (طرطقات فيها عينيها ) :ياك ا إشراق

جا نايض غسان عرف بلي باغيين يصدروه جاتو من الجنة و الناس يبقا هو و سارة راس فالراس..

---

عند اديب غير سالا شغالو صوناليه

معتز : فينك واش فدار

اديب : واه راه كنساينك

معتز : شوية و يوصلو عندك شنو درتي مع لبنات

اديب : غيجيبهوم غسان لقيتيني عاد سيفطت ليه ميساج مساليتش باش نمشي مراهوم

معتز : كنتمنى يتقبلو الموضوع يعلم الله كيف غادي تكون رد فعلهوم

اديب : ضروري خاص يتواجهو لحد ساعة باقي مقتليها على باها.. كنتسنى بعدا الوقت مناسب

معتز : ان شاء الله يتقاد كلشي اشراق قلبها بيض دغيا غادي تسامح

اديب : ولو اشراق تنسا سارة الجرح عندها باقي جديد مكنضنش تقبل الموضوع ببساطة

معتز : نت درتي لي عليك ..مهم رد البال مع طيل راه عطيتو نمرتك غير يوصلو عندك دابا يصونيليك

اديب : صافي واخا الله يخرج طرح على خير ...

عند غسان غير تحرك هو و سارة وصلو ميساج من اديب .. شي لي خلاه يسها و ميردش على سارة ..

سارة : وا غسان ياك لاباس

غسان:لا والو غير اديب قالي انا لي نوصلكوم حيت هو باقي معطل

سارة : اه

غسان(بابتسامة) :ايوا كيفاش بلانك كنصوني مكتجاوبيش

سارة : كنخاف اشراق تسمعني

غسان(كيطنز) : وهاهي سمعاتك كاع شغايوقع

سارة :هاء كتبقا تشد فيا

غسان : شدي فيها حتى نتي (بجدية ) سارة سمعي غنجيك من تالي ديكشي ديال تصاحيب و المراهقة معنديش معاه .. منكدبش عليك نهار شفتك عجبتيني و فاش كلستي معانا زدت تعجبت بشخصيتك كتر بلا عاد الوليدة كل مرة كتشكرك مهم مغنطولش كتر فالهضرة ..

بالنسبة ليلي جا الوقت لي ندير داري .. راكي شفتي كلشي على عينيك ...كنت باغي ندوي مع اشراق لكن فضلت نهضر معاك نتي اللولة

سارة (صدمها ) : غسان انا

قاطعها : نتي ممفروضش عليك توافقي فكري مزيان و رضي عليا

سارة : و لكن حنا باقي مكنعرفوش بعضياتنا مزيان ... و زيد انا مزال باغا نقرا و ندير شحال من حاجة

غسان : كوني متأكدة انو مغنوقفش فطريقك بالعكس غادي نساندك ونكون معاك خطوة خطوة ... اما بخصوص نتعارفو قدامنا الحياة كاملة باش نتعارفو فيها ..

---

عند اشراق و غفران غير مشاو دخلات غفران فالموضوع نيشان

غفران : اشراق كنضن جا الوقت لي نهضر فيه معاك بكل صراحة.. الى بقيت معولة على غسان غنموت و هو باقي ميدوي

اشراق : وي ياك لاباس

غفران : منكدبش عليك من اول نهار جات سارة و عرفتها وخا فمرة قصيرة تمنيتها لولدي.. غدي تقولي ختك باقا صغيرة و ماشي قد زواج .. ومزال باغاها تحقق احلامها .. انا معاك لكن عمر زواج كان عائق باش البنت تكمل قرايتها و تزيد لقدام بلعكس ممكن يكون دافع و تلقا السند و لي شجعها..

اشراق : انا معنديش مشكل بالعكس غسان الله يعمرها دار و الى سارة وقفات معندي حتى اعتراض

غفران :كنتمنى توافق غنكون مرتاحة على ولدي

اشراق :سارة غتكون محضوضة حيت عندها عكوزة بحالك .. مكرهتش كون حتا انا لقيت لي تعاملني بحالك

غفران :علاش واش عكوزتك مموافقاش عليك و لا كيفاش

اشراق : كتكرهني كره اعمى و سبب لحد الان معرفتوش

غفران :مدرتيش محاولة و دويتي معاها

اشراق :لا ابدا اصلا هي مكتعطيكش مجال انو تقربي منها و لا دوي معاها

غفران : كاينين شي امهات الله يهديهوم و صاف كينساو بلي حتى هوما واحد الوقت كانو بحالكوم على العموم الله يتاويكم الخير

اشراق : بيني و بينك غير تبقا بعيدا عليا كرهت لعكايزات و ميجي منهوم (طلعات معاها شنو قالت بدات كضحك) مقصدتكش نتي

غفران (كضحك) : خودي راحتك ابنتي

عند غسان بقاو ساكتين كيتمشاو فالبحر و الهوا كيضرب فيهوم .. عارف سارة كتفكر غير من السهو لي سهاات .. خلاها على خاطرها عاطيها مساحة خاصة باش تفكر ..

غسان كان غادي كيرتب افكارو و كيوجد نفسيتو لكاع الاحتمالات و خا غتكون صعيبة عليه يترفض للمرة تانية حتى سمع سارة هضرات

سارة : انا موافقة

وقف جامد فبلاصتو ممتيقش شنو سمع كان متوقع الامر غادي ياخد منها و قت طويل او على الاقل حتى تشاور اشراق .. دار لعندها باغي يتاكد بلي ماشي شادة فيه

غسان : كيفاش

سارة (بابتسامة ) : انا موافقا على العرض ديالك

غسان بدا كيضحك حتى دخل ليها الشك فراسها

سارة : مالك

غسان (باغي يشد فيها ) : صباح الخير دابا عاد مجاوبا

سارة : مفهمتش

غسان(كيطنز) : العرض غير موجود حاليا المرجو المحاولة لاحقا

سارة عرفاتو كيطنز عليها و باغي يشد فيها طارت عليه باغا تريشو من شعرو كضرب و ضحك

سارة (كضحك):اجي اجي لهنا نوريك المحاولة لاحقا شنو هي

بقا غادي كيجري و هي تابعاه لي يشوفهم يقول هادو يلاه مراهقين صغار .. فغفلة وقف غسان شي لي خلا سارة دخل فيه حتى اختل توازن ديالها.. معرفاتش كيفاش و لا ايمتى حتى حسات بشفايفو كيلتاهمو شفايفها فقبلة حنين خلات التبوريشة طلع من صبعها صغير ..

كانت اول قبلة ليها .. قبلة بريئة لي بيها عبر غسان على شنو كيحس بيه .. فصل غسان القبلة و هو حاس بيها كترجف بين يديه حاسة باحساس جديد عليها .. خوف حشمة كاع مشاعر تخلطو ..

شد غسان وجها بين يديه كيدوي بحب و صوت مهموس : كنواعد مغتندميش .. (باسها فراسها قبلة خفيفة لي حاملة بزاف ديال معاني .. قبلة الجبين كدل على الاحترام و المودة )

علا راسو فيها شافها متوترة و تالفا معارفة شنو دير ..

غسان (بابتسامة) : يلاه نمشيو و هاد المرة فاش نصونيليك جاوبي

ضحكات سارة : غسان عندي طلب

غسان :بدينا من دابا

سارة ( كضحك) : متقوليهوم والو دابا واخا خلي حتى ندوي مع اشراق

غسان : واخا خودي راحتك..

تحركو راجعين لعند اشراق .. علمها غسان بلي هو لي غيوصلهوم .. اصرات غفران تمشي معاهوم باش حتى حد ميحل فمو عليهوم حيت كان مشا الحال ..

طول طريق و اشراق شادة فغسان كيضحكو مرة مرة كتشد حتى فسارة لي غير رجعات و هي ساكتا شي لي خلا اشراق تشك انو واقعة شي حاجة لكن اجلات الموضوع حتى يوصلو..

---

عند معتز دوزو نهار ب 3 مجموعين مخلاو مشراو لجنى اي حاجة ممكن تحتاجها ..

ايمان : غدا خاص نمشي لدارنا كنتمنى يتقبلو موضوع جنى

معتز : مكنضنش غيرفضو اصلا الموضوع خاص بينا حنا

ايمان : واخا هكاك عندي تخوف انهم ميتقبلوهاش بالاخص مفاتحتهومش فالموضوع قبل

معتز : ان شاء الله غيكون غير الخير مديريش فبالك ..

ايمان : شفتك جبتينا لدارك من الاحسن نمشيو لعند عصام

معتز :ملي رجعنا و سيد مبقا فراحتو مع مرتو من الاحسن بقاو هنا و عاد و جدت بيت لجنى مبغيتيش تشوفيه

ايمان (بفرحة ) :بصح امتى و علاش مفراسيش

خطف معتز قبلة من شنايفها: ماشي كلشي خاصك تعرفيه (شاف لور فجنى ناعسة ) عيات اليوم

ايمان : ضروري راه كتحارب مرض على قدو كيمتص الطاقة ديالها ماشفتيش تمشينا غير شوية و عيات

معتز : دابا تبرا.. اصلا حالتها بدات كتحسن

ايمان :كنتمنى تقدر تجاوز الامر و تغلب على المرض

معتز نزل هز جنى طالعين لدارو :كلشي غيولي مزيان ..

---

عند اركان و محمد دوزو نهار كامل فالاجرائات باش قدرو يخرجو كلثوم و داوها لدار جديدة لي خدا محمد كانت فيلا صغيرة بجريدة كلها ورود .. كطل على البحر ..

عيط لاركان لممرضة خاصة باش تبقا معاها عاد محمد غينتاقل لعندهوم ...

اركان : واش متاكد من هادشي لي كدير راه ..نت ممفروضش عليك ..

محمد : اول مرة كنكون متاكد من شيحاجة كنديرها

يلاه جا يجاوبو قاطعهوم طيل اركان كان كيصوني ..اعتذر من محمد و مشا يجاوب

اركان : مالنا غير كتعيطي

اروى : درتي معايا غادي تجي شفتك كاع ماجيت

اركان : مساليتش واش غتبقاي غير كتصوني و تعاودي

اروى ؛ عندي كومبا شهر جاي مكرهتكش تحضر

اركان : اروى متحمقينيش فاش نسالي غادي نجي

اروى :اركان مفهمتش علاش تبدلتي معاي ياك كاع لي بغيتيه درتو قلتي تنازلي لاديب و نسايه درتها علاش لدابة باقي واخد مني موقف

اركان : متنسايش كون مهددتكش بتسجيل ديال الابيل لي كنتي كتعاودي فيه شنو ناوية ديري مكنتيش غادي تنازلي

اروى : اركان نت عارفني مزيان كنحاول نبدل من راسي و نساه و واعدتيني غادي تعاوني معرفتش علاش دابا هاملني

اركان (بحدة ) :اروى عندي شي حوايج اهم نسالي و نهضرو

قطع مخليها كتغلي فبلاصتها محساتش حتى دموعها هبطو .. كتشوف راسها ديما هي لي كتفرض راسها على ناس .. بقات شحال ساهية ندمات على نهار لي رجعات فيه لمغريب كانت حياتها مقادة و رجعات تخربقات ..

تنهدات خارجة بقرار لي غيغير حياتها و يخليها ترتاح و تبعد على ضغوطات.. حيدات نيم قسماتها على جوج .. هزات بيسي ديالها كتقلب مقررا تبدل المدينة و تبدا حياة جديدة فبلاصة جديدة ... باغا تبعد على كلشي

عند اشراق غير وصلو لقاو اديب كيساين فالباب

اديب : تباركالله تباركالله كون غير زدتو تعطلتو جيتو بكري

غسان (كيضحك) :مرتك سباب كنقولها يلاه كتقولك لا خليني نضور

اشراق (كضحك) : ياك اولد الهم باغي تشريهالي

غسان:سي اديب امانتك هاهيا دوزو بخير

اديب : لا لا (غمزو) يلاه طلعو مجاتش توصلون حتى لهنا و ترجعو رتاحو بعدا

غسان : غير بلاش كنضن معندها معنى

اديب :لا لا بلعكس غير يلاه نيت ماماك ترتاح مع طريق غتكون عيات

اشراق :اه يلاه طلعو تعشاو معانا

غسان(كيضحك) :ديك الماكلة كاملة لي كليتي و باقي باغا تعشاي (شاف فاديب )حسن عوانك اخويا غدوز ليك فالمزانية

اديب (كيضحك) : بحالي علمك الله شوية و نعلن الإفلاس

اشراق : باز باز تلاقيتو زيدو زيدو طلعو ..

زادت اشراق و غفران فاللول معاهوم سارة و بقا اديب و غسان

غسان : شنو لبلان مفهمت والو

اديب : ماماهوم راها لفوق

غسان(خرج عينيه ) : الله يرحمك ا اديب

اديب :زيد زيد الله يخرج طرح على خير

---

عند اشراق طالعة كضحك .. حلات الباب داخلة كترحب بغفران و تعاود فرحات حيت غيكملو السهرة مجموعين و مدام اديب خلا غسان يجيبهم الا و الخواطر بداو يصفاو و مبقاش عندو شي حساسية فاتجاهو..

مع جات داخلة لصالة و هي تصدم ممتيقاش شنو كتشوف اكيد كتحلم .. مفيقها غير غوات سارة

سارة : شنو كديري هنا مكفاكش ديكشي لي درتيه فيا كيفاش حتى عطاك خاطرك تبعيني لهنا

نزهة : بنتي انا

سارة (كتبكي) : شنو نتي شنو شنو مزال عندك لوجه تقولي بنتي ..

اشراق (دارت شافت فاديب ) شنو هادشي كدب عليا و متقوليش نت لي جبتيها

اديب : اشراق تهدني

اشراق (دموع فعينيها ) :شنو غنتهدن معامن تشاورتي علاش جبتيها..

نزهة (كتبكي ) :بنتي انا

سارة (كتغوت) : باشمن حق كتقولي بنتي.. انا مبنت حد

تكهرب الجو .. شي لي خلا تدخلات غسان يتدخل حيت معجبوش الحال سارة تغوت على ماها

غسان ( بحدة ) :سارة ماشي هكا كنهضرو كلسي و نقصي من صوتك

سارة ( جعرها كتر ) : واش عارف هاد المرا لي قدامك شنو دوزات عليا واش عارف شنو دارت فيا

غسان ( بحدة ) : و لو كتبقا مك ماشي هكا كنهضرو

غفران شافت ولدها تعصب من ناحية فاهمة سارة حيت عودات ليها و عارفاها مجروحة من مها بزاف و من ناحية خرى عارفة الامور الى بقات هكا غادي دزيد تازم..

وقفات وسط غسان و سارة بعداتو عليها و جرات سارة لعندها كلسو

غفران : سارة بنتي كلسي نهضرو الغوات معندو باش ينفع

سارة (كتشهق) : دابا عاد كتقول بنتي فين كانت فاش كنا محتاجينها فين كانت فاش كنا كنرغبوها و نطلبوها ترحمنا فين كانت فاش كتشوف لبراني محامي علينا

(شافت جيهت إشراق ) نهار طلقات مخلات مقالت فيها مخلات مسبات من ضرب ضرباتها حدى باب المحكمة

اشراق (كلسات كتبكي حاسة بالجهد معندهاش لي بداتو مع كوثر غتكملو دابا ) : سارة باراكا

اديب كيشوف إشراق ساكتا لدرجة خلعاتو كان كيتوقع الامور غتمشي فمنحى اخر .. ساعة باليه هادشي غير غيأزم الوضع كثر

نزهة (كتبكي ): عارفا راسي منستاهلش نكون ام .. عارفا راسي معطيتكومش الحنان مكنتش فجنبكوم نهار حتاجيتوني مكنتش.. نهار كان خاصني نوقف معاكوم موقفتش.. لكن كان همي نشوفكوم فرحانين و مرتاحين كنت بغيتكوم تكونو بديوركوم ميتشفاوش فيكوم العديان..

سارة (بعصبية) : مكاينش فحياتنا شي عدو قدكوم كون غير مولدتوناش و لا هاد حالة

غسان(بعصبية): سارة باراكا عيقتي

نزهة(كتبكي) : خليها خليها تهضر نستاهل انا لي مكنتش ام مزيانة .. بيدي ضيعت بناتي من يدي .. بيدي حررت عيشتهوم لكن ربي لي عالم شحال كنت كنبغيكوم.. نهار هربات اشراق و حرارت لعيشة مع باكوم كنت كنحاول نحميك منو .. مكنت بغيتو يزوجك و تعيشي نفس دكشي لي عاشت اشراق .. مكنتش بغيتك تزوجي و ترجعي مطلقة .. كنت نفضل تهربي على يزوجك .. عمري مبغيت ليكم ديك العيشة كنت ديما تنزيد عليكم باش طجو وتهربو .. كنت عارفة محدكم حدى باكم عمركم تتهناو عمركم تشوفو نهار الزوين..

ديما كنت تنبين ليكم غي الوجه الخايب باش مضحيوش براسكم على قبلي وتقولو نتحملو على قبل منا.. كنت ديما تنبغي نوصلكم بلي معندكم علامن تحطو الراس باش تعولو على راسكم والحمد لله داكشي للي بغيت وصلتلو واخا خلصتو غالي.. خسرتكوم لكن نتوما ربحتو حياتكوم ...

سارة : اشمن حياة ربحنا اشمن حياة كنا كنتمناو الموت و لا ديك العيشة

نزهة : الى كان هادشي تيضركم مرة فانا الف مرة كل دمعة كانت كتنزل من عينيكم كانت بحال خنجر كدخل فقلبي وخا هكاك تنقصح قلبي ونكمل عليكم وتنقول معليش هادشي كولو باش تهربو من هاد العيشا دالويل ..

سارة : ماشي مبرر ماشي عدر هادا باش نتكدي علينا حياتنا و فتالي تقولي حقا كنت باغاكوم تهربو راه غير كتخربقي .. علاش نهار ضربتي اشراق و تعاونتو عليها حتى هو لمصلحتها

نزهة : بغيتها تمشي و تكرهنا .. متحنش و ترجع بغيتها تعرف انو معندهاش علامن تعول تمشي تعيش حياتها .. مبغيتهاش تعاود نفس الغلط ديالي انا مي كانت حنينة فيا.. كنت فينما نشكي من باكوم كتقولي صبري .. كنت ديما تنقول منقهرش ميمتي عليا. كون مكانت هي للي واقفة فضهري كون راني هربت ݣاع قبل منولدكم ولاكن واش دامت لي نهار ماتت.. لا ديك ساعة عاد ندمت على النهار اللي صبرت فيه وكان فات الفوت كنتو تولدتو مكنتش نقدر نهزكوم ونهرب وباش نسمح فيكم الموت اهون لي..واخا كنت كنشوفكوم نتوما سبب المعانات لي كنت كنعيش .. كرهت اسي حيت ولدت لبنات و لو كان بيدي مكنتش غنولدكوم وخا هكاك تقبلتكوم و بغيتكوم من كل قلبي

سارة (كطنز) :لا باين الحب الله يا ودي

غسان (بحدة ): سارة عيقتي

سارة (وقفات كتغوت) :شنو سارة شنو نت اخر واحد يحس بشنو كنحس نت ماماك متوزنهاش بدهب عطاتك الحب و الحنان عطاتك عائلة عوضاتك على كلشي انا شنو عطاتني شنو و لو كاع هادشي لي قالت مأثرش فيا و لو شوية حيت القطة و كتحن فولادها .دبا عاد طفات عليها شمعة عاد تفكرات بناتها

غسان عصباتو سارة كيف ما كان الحال كتبقا ماها

يلاه جا يتدخل و هي تهضر غفران

غسان :من الاحسن خرج نت و سارة بدلو ساعة بخرا

نزهة : مكاين لا غير بقاو انا لي غنمشي اصلا انا جيت نشوفكم غي باش نحيد عليا دنب انكم تكرههو مكم بغيتكوم غير تفهمو للي كاين اما انا عارفة راسي معنديش بلاصة فوسطكم..

اديب :اشراق مغتقولي والو مغتهضريش

اشراق:شنو بقالي منقول انا عيت و الله ديرو لي عجبكم ...انا بعدت باش نرتاح (شافت فنزهة ) كتبقاي ماما و على راسي و عيني لكن منقدرش نافقك و نقولك سمحتليك و نبداو صفحة جديدة .. عانيت بزاف بسبابكوم ولحد ساعة باقي الجرح مبرا و مكنضنش لي تهرس غيتصلح شي نهار

غفران: علاش كنقولو هكا بلعكس ماماكوم هاهي قدامكوم جا الوقت لي تعوضو لي فات جا الوقت لي تشبعو من بعضياتكوم .. فكرو مزيان غيجي نهار لي تمناو تشوفوها متلقاوهاش...

يتبع...