بدات كوثر تتحل عويناتها لقات الحال صبح و الجناح منور بأشعة الشمس..تكعدات من فوق الفراش لقات راسها باقي فجناح الملك ماشي جناحها..ناضت من تما مابانش ليها اثرو يالاه بدات تتمشا تخرج من تما حتى سمعات خطواتو خارج من شي قنت تما عندو فالجناح...
شاه عاقد حجبانو: فين غادية؟!
كوثر ضارت و خنزرات فيه: نرجع لجناحي!
شاه: فطري هو الأول!
كوثر: والااا خلينييي
حرك يدو و هي تهز فالهوا حتى جلسها فالكرسي: مانعاودش هضرتي!
شاه طلع فيها حاجبو و هو يفرقع اصبعو حتى اختفت و ولات فحمام جناحها...
كوثر بدهشة: لا غادية و تنزيد نتأكد من مرضك!!
قادات مسائلها و خرجات لقات تاني ملابس داخلية و فستان جديد كان لونو فالرمادي محطوطين فوق الناموسية..بدلات حوايجها بيهم و خلات شعرها مطلوق و هو يوقف عليها رثوك مربع يديه...
كوثر: عرفتك شغتقول
رثوك: اهم حاجة انه مارجعش علقك
كوثر: وا قلت ليك غير يرجع يديرها وا عييت منووو
رثوك: تنظن حاولي غير تكوني هادئة و قريبة منو غيدوز كلشي بيخير
كوثر: اششمن هادئة ولا قريبة منووو السييد تيتعصب بأبسط حاااجة
رثوك: راك حتى نتي ماساهلاش تتنساي راسك بلي تتعاملي مع ملك و هادشي تيعصب الملوك كونما كنتي مهمة عندو كون من شحال هادي ودعتي
كوثر: ماراشقاش لياا نهضر علييه يييخ قالك فطوور ما فطوور باقي عندو الوجه لي يفطر معايا بيه!
رثوك: كوثر..انا تنصحك باش تخرجي بأقل الأضرار نعطيك مثال يخليك تحكمي فأعصابك قدامو..تخييليه متلا هو باباك كيف تتخافي منو و تتحتارميه طبقي نفس الحاجة مع الملك
كوثر خرجات فيه عينيها: كيفاش كيفاش عاااود اش قلتي؟؟دااك الملك المريض نحطو فبلاصة فخااامة سموو الأمير بيجااد لي هو بابا وا سير عاود لرااسك ا رثوك!!
رثوك ماعرف مايقول ليها حيت عارف راسها اقصح من الحجرة و هادي صفة وارثاها من باها...
رثوك: ولكن واحد الحاجة كان عندك ديما فضول تعرفي شكون هو مول العينين الخضرين الغامقين و كانو مواصفاتو لاطال ما ديال نوعك المفضل فالرجال
كوثر خرجات فيه عينيها بتوتر: اش تتقول!!!!(بتلعثم) د د د اك الملك الظالم مستحيل نكون معاه!
رثوك: واخا و كون كان نفس الشخص ولكن ماشي ملك مشعوذ عادي اولا بشري صادفتيه واش غادي تقبلي بيه؟
كوثر بخجل تتهرب من الجواب: شتتقول نتا!! هادااك اصلا باغيني على قبل واجبو و صافيي سوا كان ملك ولا لا غادي غير يمرضني فحياتي بعصبيتو
رثوك: الملك ماكانتش شخصيتو هكا ابدا الضروف لي بدلاتو و تنظن الى قدرتي تنسيه فداك الواجب و ولا معجب بيك غادي يحرر روح الجدة ديالك
كوثر بارتباك: اويلييي على نسيه و يولي معجب بيا!!!(تزنكو حنيكاتها و تتهرب عينيها منو)
رثوك: ماماك راه نسات باباك فزمانو على قدو و بقا معاها فهاد العصر حيت عشقها كوني بحالها و خدمي عقلك كوني معاه على طبيعتك اكيد غيحبك نتي غير تتبغي تباني انك ماضعيفاش قدامو هو راه عارفك كيف دايرة غير ديري مبادرة
كوثر من كترة ماتاتيق فرثوك دوخها بهاد الهضرة ويلي على تخليه معجب بيها؟!!زعمة الى تقربات منو و توددات ليه غادي يحرر روح جدتها العزيزة؟و غيقول ليها على الواجب لي مبرزط بيه الوقت؟بينما رثوك باغي غير يخفف من الأضرار لي غينتجو من بعد و يخلي الملك على الاقل غير يشفق عليها شوية و مايعاودش نفس الحالة لي حطها فيها اول مرة(فاش علقها)...
فجأة طاحت فكرة مفاجئة فراسها خلات عينيها يجمدو و رموشها يوقفو..ضارت عند رثوك شاداه فكتافو: غنمشي نشوفو دابا!
رثوك باستغراب: مامتييقش بلي قنعتك بهاد السرعة!
كوثر: شاه خصو يبغيني اناا انا الواحدة و الوحيدة فحياتو!!!
رثوك بدهشة حط يديه على جبهتها: كوثر؟؟(تيحرك فيها)كوثر واش بيخير؟؟؟
كوثر رمشات عينيها بشكل مفاجئ و شدات فراسها باستغراب: مهم انا غنمشي داباا
ضورات راسها فالجناح بالزربة حتى هزات الكتاب فوق البيرو و خرجات قاصدة جناح الملك مخلية رثوك مستغرب من التغيير المفاجئ و الغير الطبيعي لي طاح عليها...
وصلات كوثر لقدام الجناح و بدات تدق عليه عرفها هي و هو يفرقع اصابعو حتى ولات قدامو مبدلة حوايجها و معنقة كتابها..كانت تتبتاسم ليه و هادشي بحد داتو كافي يخليه يستغرب حيت غير البارح و هاد الصباح كانت ساعرة عليه...
كوثر قربات منو تتلحن الهضرة بصوتها الرقيق و تبسم ليه: اش بان ليك ا فخامتك نفطرو فالحديقة الملكية اليوم
هز فيها حاجبو متعجب لا هادشي بزاف واش هادي عندها انفصام الشخصية ولا شنو: كيفاش؟
كوثر مييلات راسها: الى بغيتي بالطبع ا جلالتك
شاه بلع ريقو شنو هاد الضرافة كاملها حاسها ناوية على خزيت مستحيل ابدا هادي تودد ليه بدون هدف ولكن كيف العادة غيتبعها فتصرفاتها و هبالها فالأخير هو الرابح هو الرابح..عييط شاه للخدم حتى هزو الطاولة المجهزة بالفطور باش يجهزو وحيدة خرى فالحديقة الملكية و غبر من تما هو و كوثر حتى ولاو فيها...
كوثر بانت ليها الجليسة الملكية د الملك تما و هي تسبقو جلسات: شكرا حيت درتي ليا خاطري
شاه مصغر فيها عينيه بالشوفة ديال نتبعو الكذاب حتال باب الدار غير هو بلاصة الكذاب خاص نقولو الحمق حيت غتحمقو مافيهاش..جلس حداها بكل فخامة و الخدم تيحطو و يستفو فلي تشهات الخاطر تحت انضار كوثر لي مراقبة يديهم حتى سالاو عاد شافت فالملك لقاتو تيشوف فيها...
شاه هز كاسو د الشاي: اش واقع ليك؟
كوثر: احمم غير كنت معصبة شوية لبارح تنظن مكاين لاش نبقا معصبة و نزيد نتعصب بقات غير 4ايام اصلا و نمشي فحالي
شاه دار فيها واحد الشوفة ديال واش من نيتك ولاهيلا قالت ليك تمشي فحالها: وقاحتك و قلة احترامك ليا عمرني نشوفهم مزال غير متتزيدي تجني على راسك معايا و صافي!
كوثر رمشات فيه عويناتها: ولكن حاول حتى نتا غير تفهمني ماشي تحس بيا غير فهمني راني وحيدة هنا متنعرف حد و خاطفني راه عادي نكون معاك هكاك
شاه عاد غيرشف من الشاي و هو يحبس تيشوف فهاد الملامح الجميلة لي تتزيد تزياان بهدوئها هكا هو داير نوعو المفضل بحال كوثر ولكن الفيغسيون الهادئة منها ماشي المسعورة...
كوثر فخاطرها:(واقيلة بدا المفعول من دابا كيف قال رثوك)
شاه: حافظي على هاد الهدوء (شاف فالطاولة) واش مغتفطريش؟
كوثر حطات الكتاب على جنب و كحزات لعندو مزال شوية لي بقا ليها و تلصق معاه مخلياه غير حاضي معاها حيت بانت ليه ماشي على طبيعتها ابدا..الإبريق تحرك حتى كب ليها الحليب و بدات ترشف منو و عينيها على الملك تتفكر كيفاش كانت تتودد مها لباها قدامهم و كيفاش داك الجبل كاملوو تيذوب فقط من طرف ديك المرأة الرقيقة بلطفها و عفويتها..هاجر قشابتها واسعة و كانت متتهزش اغلبية هضرة بيجاد على محمل الجد حيت عارفة خصايل الأمراء لي فيه و لي واخا يعيش 100 عام فالقرن 21 مغيتحييدوش منو اما بنتها كوثر تتعامل مع ملك و لحسن حظها كاينين صفات مشتركة بينو و بين باها بيجاد و غتحاول تستغل هادشي لصالحها كلشي فسبيل قدوتها و مثلها الأعلى فهاد الحياة لي هي جدتها الباتول..كملو داك الفطور فواحد الجو غريب..الملك حاس بشي حاجة فشكل ضايرة و هي تتنبر كيفاش تخليه خاضع بالطريقة الأنثوية ماشي بالغوات و السعرة...
كوثر شافت فيه: اش بان ليك نقرا معاك هاد الكتاب و غتكون بمثابة دليلي و تشرح ليا الحوايج لي مافهمتهومش؟
شاه بقا ساكت شحال و هو يعطيها الموافقة براسو..قربات منو اكتر حتى هز حاجبو باستغراب و هي تجبد الكتاب حلاتو...
كوثر: احمم السحرة و المشعوذين هاد التعريف البسيط قلتيه ليا لبارح اصلا و فهمتو
شاه: الكتاب عبارة على قصص ماشي غير معلومات
كوثر لمعو عينيها: اوووه تنحماق على القصص(بدات تقلب فالصفحات) هادي القصة الاولى امم(تتقرا فوق السطور) قصة حب بين مشعوذ و بشرية(بإعجاب)اووه واش المشعوذين تيميلو للبشر هادشي مشوق
شاه: علاه كيفاش وليتي نصف مشعوذة نتي و امك؟ راه باينة دخلو البشر فسلالتكم و تزاوجو مع مشعوذيها
شاه: ماعرفتش شنو المثير فالبشر مجرد كائنات ضعيفة روتينية
كوثر: حتى انا وليت تنفكر هكا فاش وليت مشعوذة كاملة تلقائيا ولكن تيبقا بابا و خويا بشر مايمكنش نقص منهم(تفكرات شي حاجة)ااه تنبغي ديما نسولك ولكن حيت مع حنا ديما سمن على عسل(عقد حجبانو) احم عمرني تفكرت نسولك
شاه: تفضلي...
كوثر: واش ماعندكش قرين؟ بحال رثوكي انا ماعندكش؟
شاه شاف فيها بواش من نيتك: شنو هو القرين بالنسبة للمشعوذين؟
كوثر: هو الخادم لي تيعاونا فالشعوذة ديالنا
شاه: ركزي ليا على "تيعاونا" و ضوريها فراسك بصفتي ملك
كوثر تتفكر: اااه يعني الى عندك قرين بحالا تيبيين ضعفك يعني ك ملك؟ غير مثال ماقصدتهاش
شاه: الملوك المشعوذين الوحيدين لي ماعندهمش قرين و هادي ميزة من الميزات لي تتمييزهم على باقي المشعوذين هادشي تيعني انهم اقوياء و عندهم قوة كافية مامحتاجين لا لقرين لا لغيرو
كوثر: واش غير الملوك اما العائلة الملكية الأخرى؟
شاه: غير الملوك و أولياء العهد فقط لي ماعندهمش البقية مثل الأميرات و الأمراء الغير متوجين تيكون عندهم
كوثر: هادشي مثير للإهتمام!...
كوثر قلبات الصفحات حتى وقفات فقصة بعنوان المشعوذ و الساحرة...
كوثر باستغراب: متنظنش غتكون هادي علاقة ناجحة
شاه: الحب متيعرفش معنى المستحيل
كوثر رمشات فيه عويناتها هاكاوا واش طلعتي يا سي الملك رومانسي: ماتوقعتش جواب بحال هدا منك
شاه سكت تيشوف فالكتاب...
كوثر حساتو بحالا تيفكر فديك ختنا لي فالتابوت من كترة ما باينة اهميتها عندو: واش فكرتك فشي واحد؟
شاه ماجاوبهاش..سدات كوثر الكتاب حطاتو على جنب و حطات يديها على يدو بهدوء: حاسة بيك هاز حمل ثقيل على كتافك
شاه هز فيها عينيه لقاها تتشوف فيه باهتمام و تتسنا فجوابو..بقا ساهي فعويناتها و بدون شعور شد فيديها لي كانت غير حاطاها على يدو و اليد الثانية حطها على خدها تيتأمل فهاد الجمال لي كان مراقبو تيتفتح و يزهر بحال شي وردة من صغرها الى هاد اللحظة لي هي جالسة قدامو..زاد قرب منها حتى حط نيفو على نيفها و هي تسد عينيهاا براحة الغريب في الأمر انه لمساتو ليها و هاد القرب جاها عاادي ماحساتش ابدا انه شخص غريب تيقيس فيها لأول مرة فحياتها بل كانت مرتاحة معاه..حط شفاهو فوق شفاهها منتزع اول قبلة فحياتها منها و هي مستسلمة ليه..ماقادرش يكبح احاسيسو لي طول الوقت و هو تينكرها و يكتمهاا مايمكنش يضييع هاد الهدوء لي نزل عليها و لي عاد مازاد تيجذبو ليها..حط يدو على خصرها مقربها منو اكتر حتى جلسها على ركبتو و هي تحط يديها على صدرو تتحس بشفاهها تيتجرو و تيتعتصرو بشغف مخلط بتعطش ليهم و لحلاوتهم..بجوجهوم مرفوعين من هاد العالم مامسوقينش لشي انضار مسلطة عليهم من ورا الحيط كانت جارية من الجواري مبلوكية تتشوف الملك كيفاش تيبووس فالبنت الجديدة لي دايرة ضجة فالقصر و بسرعة غبرات من تما تخبر الجواري لخرين بلي شافتو...
حطات كوثر يديها على عنقو تلقائيا هاد الحركة العفوية زادت من إثارتو حتى امتص شفاهها بقوة و هي تبعد منو تترجع انفاسها المنتظمة كان قاطع عليها الأكسيجين اما هو باقي مامستوعبش ابدااا لي دارو..هزات فيه كوثر راسها بابتسامة تعب و هي تقرب منو حتى حطات راسها على صدرو معنقاه: توحشتك بزاف(سدات عينيها براحة)
شاه هنا بدات تتجيب ليه التمام عمرو حس بهاد الضعف فحياتو كاملها جات هاد المشعوذة خربقات ليه الاحاسيس كاملين...
كوثر معنقاه بحب: شاه...
شاه مصدوم فيها راه مايمكنش هاد البنت غتخرج ليه العقل قبل هاد 4 ايام لي جاية السييد غيذوب فبلاصتو بهاد اللمسات و الحركات و زادت كملاتها بسميتوو لي سمعها اول مرة من فمها...
و بينما الآنسة كوثر لاصقة فالملك كان رثوك فالبالكون تيشوف فيهم بصدمة: لا مايمكنش كوثر تقمصات الدور نيييت! و الملك(مامصدقش) الملك عاجبو الحال! كان عندي الحق!
اما الملك كان عايش فحلم فييقات هاد المشعوذة كاع الأحاسيس الدفينة بحال شي قفولا تحلو و هي الساروت ديالهم...
حط يدو على شعرها تيداعبو و هي بين يديه مرتاحة هادي ماشي هي كوثر لي تيعرف ابدا قدما هادشي غريب عليه بزاف قدما ماقادرش ينكر ابدا انه بغاها تبقا معاه هاكا للأبد...
ايوا فالجناح د الجواري نايضة الحيحة مكاين غير واااش بصاااح لا مايمكنش مامتييقاتش لي قالتو الجارية...
الجارية: تنقسم بحياتي الى بصاااح ا البنااات الملك وااقيلة لقا المتوجة تكوون ملكتوو
بقااو تما لااا و حنااا و كداا الغيرة و الحسد و شي مامصدقش ابدا حتى خرجات ليساء من غرفتها هازة راسها للسما لقات الروينة و هي تسول وحدة منهم و قالت ليها حكا ما حكا الملك تيبغي البنت الجديدة و شابعين بوسان فالحديقة الملكية...
ليساء خرجات عينيها بصدمة ماقالت لا كلمة لا جوج خرجات تتجري من تما بلا عقل تأكد واش بصاااح ملكها مع ديييك المعوجة...
الجواري شافو فبعض و هوما يطلقوها بضحكة فاش شافوها كيف خارجة بلا عقل واخا المخييرة فيهم باغية تكون بلاصة كوثر الا انه كلهم ماعندهومش مع ليساء داكشي علاش باغيينها فيها نيت واخا البنت لي اختار الملك ماشي منهم..بقات تجري ليساء بأنفاسها المتقطعة حتى وصلات للحديقة و هي تلمحهم..كانت حاطة راسها على صدرو فوق ركابيه و هو تيلعب فشعرهاا..تبلوكاات من المنضر و رجليها فشلو عليها الدموع دغيا تجمعو فعينيهاا و هي تتشوف الملك لي حاطها غير ديكور فحياتو بعد هاد 5 سنين كاملة عيواض يحس بيهاا جاب البديل فرمشة عيين..حطات يديها على فمها تتبكي في صمت حتى حسات بواحد الجرا بعداتها من تما كانت بهار...
بهار مخنزرة: واش بععقلك!!!جلالته غيكون حس بوجوودك و نتي واقفة تتسترقي النظر عليه هو و الآنسة!!
بهار:اشمن شمتة؟؟؟واش ملكنا لي طلبك؟؟؟ياك نتي و باك لي بززتو عليه راسكم!!
ليساء: ولكن ماشي بهاد الطريقة اهئ اهئ هادي جات غير البارح اش داير معاهاا للعلن فالحديقة حتى ولاو على طرف كل لسان الجوااري اما الخدم غتكون وصلاتهم هوما اللولين فين غنحط وجهي انا مفضلتو!!!
بهار عقدات حجبانها: يعني هادشي تيبيين انه مافيك حتى شي فائدة حيت كون كانت فيك كون ولدتي ليه ماشي غير ولي عهد وااحد تولدي ليه 5 فهاد 5 سنين كاملها لي دازت بينماا الآنسة شرفاتنا غير هاد الايام شوفيها كيفاش مخلياه بين يديها!
ليساء نفاجرات عليها بالسم: وارااااه ماااشي لخاطري واااش كرهت نولد ليييه وااش كرهتو يهتم بيااا واراااه عمرو قاااصني اهئ اهئ
بهار حطات يديها على فمها مامصدقاش اش تتسمعو: لهاد الدرجة!!!
ليساء تتبكي: و اكتررر اهئ طوول دوك الجمعات لي كنت تنمشي عندو كنت تنبقا غير جالسة فالطااولة عمروو قرب مني ولا لمسنيي ولا حتى دواا معايااا دايرنيي غير للبروطوكوول فاش بابا قدمني ليه على قبل المنصب
بهار نوضاتها من الأرض تتحاول تستوعب الأمر واش لهاد الدرجة الملك طول هاد السنين الطويلة عاايش مع شبح برااعة و ماقادرش يكون مع امرأة خرى من بعدها؟ ولكن علاش كوثر ااه؟؟!علاش هي بالضبط؟!!
ليساء: اهئ غنمووت غنموووت اهئ
بهار جراتها من تما: تهدني و مسحي دمووعك هادشي مانقدروش نتصرفو فيه ابدا الملك هكا داير و خصك تقبلي قراراتو
بهار بصرامة: سمعيني مزيان ا ليساء بعد هادشي لي شفتيه و لي ولينا عارفينو من الأحسن تنساي كونك مفضلة الملك و كملي عيشك مع بقية الجواري ولا طلبي من جلالته يرجعك لعند عائلتك
ليساء خرجات فيها عينيها: مايمكنش!! غنبقااا هنااا!!!
بهار: على راحتك
طلقات منها و كملات طريقها تشوف اعمال اخرى فالقصر اما السم كون كان بناادم لي فيها مامهنيهاش رجعات تطل على دوك العشاق بجوج كيف باقي مكالميين و بعينيها لي تيتقطرو بالسم تتقسم بلي مغتخلييش كوثر ابدااا تربح بيه هي لي خصها تكون بلاصتها هي لي صبرات 5 سنين على الدل و التجاهل ديالو ليها رغم كاع المجهود لي بدلاتو باش غير يشوف فيها تجي هادي فالدقيقة اللخرى تديه؟ لا لا غتندمها غير بلاتي!!...
هزات كوثر راسها من فوق صدر الملك و شافت فيه بابتسامة: ماعرفتش علاش تنحس بلي تنعرفك من شحال هادي هاد الاحساس تيخليني نسا كاع لي دوزتيه عليا
شاه حتى هو ماعارفش ابدا كيفاش حتى الأمور تشقلبات لهاد البعد غير بقربها منو فقط: مهم دابا عندي مايدار(ناض) فاش يوصل وقت الغذاء بغيت نتغداو بجوج
كوثر ناضت هازة الكتاب: واخا على راحتك
انصرف الملك من تما اما هي مشات لجناحها تخبر رثوك بآخر المستجدات...
فالجناح..كان رثوك تيتسنا فيها حتى دخلات فرحانة...
رثوك صغر فيها عينيه: شنو سر هاد الفرحة كاملها و نتي من نهار حطيتي رجليك هنا و معصبة
كوثر جلسات حداه تتلعب بخصلات شعرها: بصراحة كان عندك الحق الملك صدق ضريف
رثوك: راه شفت كلشي التمثيل كان متقن حتى وصلتو للبوسان
كوثر خرجات فيه عينيها بخجل: كنتي تتشوف فينا!! (بتلعثم) ه هاداك مكانش تمثيل حسييت بداكشي من القلب
رثوك باستغراب: كوثر فيقي ياك بغيتي ترجعي عند عائلتك مالكي دابا تتميلي للملك؟هادشي راه بدا تيخلع!
رثوك تيشوف فيها بحالا اصلا عندها شي اختيار من غير هدا علاه اصلا شنو لي منوض الحرب بينها و بين الملك من الديبار غير انه راسها قاصح و باغية ترجع بعدما هرم من اجل وصول لحظة استعدادها لخضوع طقوس مراحل القمر...
رثوك: رتاحي احسن حيت بديتي تتأثري بالملك بزااف و بلا ماتعيقي
كوثر تكات فوق الناموسية بتنهيدة: امتى يسالي هادشي كاملو
رثوك: تنتمنى يسالي على الأقل بأحسن طريقة(و أخفها ألم)...
فقصر عائلة الفارسي..كانت وجدان جالسة مع هاجر الراس فالراس فالطاولة لي كان محطوط فوقها الخريطة..كتاب تعاويذ وجدان الخاص و بعض الكتب القديمة و المخطوطات...
وجدان: كيفما تتشوفي ا خالتي هنا(تتوريها فصفحة واحد الكتاب)هادو مراحل القمر الثمانية..نهار عيد ميلاد كوثر بدات المرحلة الأولى لي سميتها القمر الجديد و المرحلة الموالية ليها غتم بعد 4 ايام من دابا و اسمها هلال الصبح...
هاجر: و شنو الفرق بين المرحلة الاولى و الثانية؟
وجدان: كل مرحلة مختلفة على الاخرى و تتكمل الاخرى سوا بالطقوس ولا الغاية من كل وحدة فيهم..المرحلة الاولى باختصار طقوسها تيتمو باش يتم اعادة تعيين و تحديد النوايا..المرحلة الثانية تيتمو باش يتم تعزيز النفس و الأفكار الجديدة ولكن جميع المراحل عندهم تأثير اجابي على سحرة القمر و تتزيد تعطيهم قوة و سحر كبييير
هاجر: و واش بنتي غتخضع لطقس المرحلة الثانية كيفما خضعات للأولى؟
وجدان تتفكر: كوثر نهار سولتها كيفاش عرفات للطقس رغم انها مشعوذة ماشي ساحرة و ماشي اي ساحرة بل ساحرة قمر! قالت انها ماعارفاش و بلي غير جاها فبالها و صافي حسيت بيها صادقة فكلامها
هاجر فكرها هادشي فاش كانت الباتول من شحال هادي تتعاونها و كيفاش نسجات القدر بطريقتها: زعمة تكون دارت داكشي بتحكم شي واحد؟؟
وجدان: ديجا فكرت هاكا و جا فبالي فقط داك ملك المشعوذين لي غيقدر يدير هادشي
هاجر: ولكن هو شغيستافد من بنتي و من هاد مراحل القمر؟؟
وجدان: قريت فكتب قديمة بلي الملوك المشعوذين تيقدرو يستعملو ماشي غير الشعوذة بل حتى انواع السحر ولكن هادشي ماشي شائع نادر الحدوث ديالو حيت تيعتزو بشعوذتهم و بالنسبة ليهم سحر من غير السحر الأسود ماشي من أساليبهم
هاجر تنهدات: بنتي مسكينة ماعرفتها شتدير تما داباا واخا قالت انها بيخير ولكن قلبي مامهنينيش
وجدان شداتها فيديها تتهدنها: ماتخافيش كلشي غيكون هو هاداك انا هناا و فاش توصل ليلة هلال الصبح غنشدو الطريق انا و سالار نقلبو عليها(شافت فالخريطة)لحسن الحظ لقيت كتاب تيترجم لغة المشعوذين فقبو كوثر
هاجر: و شنو غاديري فاش لقيتيه؟
وجدان: تقدري تحلي كتاب تعاويذها الخاص؟ ممكن نستافدو من شي تعويذة قديمة من تعاويذ جدتكم
هاجر: ماعرفتش فين غتكون حطاتو حتى نطلع لجناحها و نجربو
وجدان: واخا غدا غنرجع مرة خرى و نشوفو هادشي دابا خصني نمشي نطل على المسرح و واليديا...
بعد وقت الغداء..جمعو الخدم طاولة غداء الملك لي كان طول الوقت هادئ تيشوف فتغيير كوثر المفاجئ اما هي جالسة قدامو تتبنن بالتحلية لي ختمو بيها غدائهم..كانت تحلية فزلافة ذهبية مصنوعة من الأرز الأبيض..حليب اللوز و منسمة بسيرو د اللوز مع رشة من رقائقو الذهبية...
كوثر ساهية تتاكل: ممممم بنينة تحليتي المفضلة
شاه هز حاجبو باستغراب: ك كيفاش تحليتك المفضلة؟؟
كوثر هزات فيه راسها متوقفة عن الأكل باستغراب: شنو؟ زعمة عجباتني بزاف
شاه حدر عينيه تيتفكر الشخص الوحيد لي كان تيدير هاد الحالة فقط على قبل تحلية الأرز...
كوثر: تنقول ديما مع راسي كيفاش قدرتي تعيش بوحدك هاد السنين كاملها و حتى من القرين لي يونسك ماعندكش
شاه: فاش تيكون عندك هدف محدد فهاد الحياة متتحسش بالوقت امتى تيدوز باش يوصل نهارو
كوثر كملاتها و حطات الزلافة: بغيت وحدة خرى ولا عرفتي شنو لا لا الروز تيغلض غنغلاض
شاه جات صورة جسمها المتناسق لا إراديا فدماغو: من الأحسن بلاش...
كوثر بابتسامة: قول ليا عندك الأحصنة ياك؟
شاه: اكيد
كوثر: تنحماق عليهم علمني بابا..(تتفكرو بشك)اه بابا كيفاش نتعامل معاهم و نركبهم
شاه: غدا نديك تشوفيهم فالعشية
كوثر بفرحة: اووه شكرا بزاااف
شاه بقا تيشوف فالفرحة الباينة من عويناتهاا..خربقاتو
ديال بصاح و حيات فيه شي مشاعر كان عايشهم مع وحدة خرى..فيقات احاسيس دفينة خلف ستار الماضي و ولا تيعيشهم معاها فالحاضر لدرجة ولا حااير بزاااف واش يعطي فرصة لراسو و يحط شكوكو على جنب و يعيش اللحظة ولا يكمل على مخطط واجد سنين هادي...
فالليل...
كانت كوثر تتمشا بين ممرات المكتبة و بعينيها تتقلب على كتب يعاونوها تزيد تعرف على مملكة كينتاريا و على حياة المشعوذين هنايا حتى وقف عليها الملك...
كوثر حطات يدها على قلبها: ا ااه نتا هدا
شاه جامع يديه موراه: لقيتي شي حاجة؟
كوثر: مالقيتش الصراحة كلشي زوين و صعيب نختار اش بان ليك تختار ليا نتا؟
شاه تقدم لواحد الرف و دوز عليه يديه حتى وقف مخرج واحد الكتاب و قدمو ليها: شوفي هدا
شداتو من عندو و قرات العنوان: طقوس سحر القمر؟علاش؟
شاه: عندك ارتباط غير عادي بالقمر غادي يعاونك الكتاب تعرفي على ذاتك اكتر
كوثر شافت فيه باستغراب: ولكن انا مشعوذة ماشي ساحرة
شاه: بغيتي اختياري؟
كوثر: اكييد
شاه: اذن قبلي بيه!
ضمات الكتاب لصدرها باقة مستغربة منو: فكرتيني غير فواحد الساحرة و الصدفة هنا انها ساحرة قمر
شاه: الى ساليتي راه وقت العشاء هادي
كوثر: ااه ساليت غنتعشا دغيا و نعس عيانة بزاف
شاه مد يدو للقدام باش تسبق و تبعها باش يمشيو يتعشاو...
فلغد ليه...
بعد الفطور الملكي هبطات كوثر مع الملك تيتمشاو فالحديقة الملكية..الجو كان معتدل و زويين و ريح خفيفة تداعب فشعر كوثر و جلايل فستانها الأزرق مجرورين فوق الربيع الأخضر...
كوثر: بقات 3 ايام دابا لداك الواجب ياك؟
شاه: زربانة تعرفيه؟
كوثر: اكيد راه الفضول غيقتلنيي
شاه شاف قدامو تيتمشاا بديك المشية الملكية ديالوو و يديه مورا ضهرو: علاش نتي متعلقة بوحدة عمركي حتى تلاقيتي بيها؟ماشي من زمنك و جدة بعيدة عليك بمئات السنين!
كوثر: بصراحة ماعرفتش ولكن تنحس انه كاينة صلة متينة بيني و بينها خصوصا انه كتاب تعاويذها الخاص تمرر ليا و ولا ديالي و انها هي السبب حتى واليديا تجمعو و حتى بفضلها انا مشعوذة كاملة بالنسبة ليا مانحتاجش وجودها المادي فحياتي و انما فقط المعنوي ولو بشكل وهمي
شاه: و الى طلعات هاد المثل الأعلى بالنسبة ليك ماشي كيف تظني انها دايرة؟
كوثر: مابغيتش نفكر فهادشي ابدا
شاه شاف قدامو و بقا ساكت هو الوحيد لي عارف كلشي..هو الوحيد لي عارف اسرار و خبايا قادرة تزعزع عقل هاد المشعوذة الصغير من بلاصتو...
فواحد الكافي فوسط المدينة كان سالار جالس مع وجدان فلاطيراس لي ريزيرفاها و كانت خاوية غير ليهم هوماا...
وجدان مبتسمة: احسن حاجة درتيهاا باش ندويو على خاطرنا
سالار: هاد كوثر غتحمقنا قبل الوقت بهاد الاختفاء ديالها
وجدان جبدات كتاب تعاويذها: 3 ايام لي بقات لليوم المنتظر قلت لخالتي هاجر تقلب على كتاب تعاويذ كوثر واقيلة مزال مالقاتو
سالار: ماقالت ليا والو خليتها عيانة شوية قوة التفكير عياها
وجدان: حاجة عاديية الواليدين يكون عليهم هاد الضغط بعدا موسيو الفارسي تايق فيا بلي غنرجع ليه بنتو واخا انا ساحرة
سالار: شوفي ا وجدان الواليد عندو عقدة من المشعوذين فقط اما كائنات خرى راه ماعندوش مشكل معاهم بالعكس السحرة متشاركين معاه فكره المشعوذين
وجدان شدات فلاباي و بقات ضورها فكاس د العصير: بصراحة هاد التجربة خلاتني نزيد نتقرب من كوثر واخا غير من بعيد و حتى منك نتا...
سالار بتاسم: انا وياك ديما قراب من بعضنا ا وجدان
وجدان بتاسمات بخجل: متشوقة للسفر معاك فهاد المغامرة الجديدة
سالار: و حتى اناا...
نرجعو لمملكة كينتاريا و بالضبط فالحديقة الملكية..كانت كوثر جالسة بوحدها تتقرا فالكتاب لي عطاها الملك البارح بينما هاد الأخير خلاها و مشا يشوف أمور تتخص المملكة حتى تتوقف عليها ليساء من حيث لا تدري...
كوثر طلعات راسها لقات العقرب الأصفر كون كان بنادم واقفة مضركة عليها الشمس: اش بغيتي؟؟
ليساء بابتسامة شر: شفتك ماقاداك فرحة باللمة د الملك راك غالطة و بزاف الى تصحاب ليك غيتوجك ملكتو على عرش كينتاريا
كوثر عقدات حجبانها: و بصفتك شكون تتخرجي هاد الهضرة الكبيرة على بحالك؟!
ليساء هزات حجبانها بالسم تترقصهم و تتأكد ليها: ايه المملكة كلها عارفاها شكون و حتى وحدة مغاتاخد بلاصتها فقلب و عقل جلالته واخا دازو مئات السنين
كوثر ناضت حاطة الكتاب: شكون هي بالضبط؟؟؟
ليساء ربعات يديها: براعة هي زوجة الملك الميتة و لي اكيد وحدة بحالك مغتزعزعش مكانتها عندو!...
كوثر بصدمة: كيفاش؟؟؟!!!ز زوجتو؟!!
ليساء شداتها الضحكة من ملامحها المصدومة: هههه و علاه اش تصحابليك بلي الملك زير نساء باش يعاشر ليك كاع دوك الجواري؟..(زييرات على يديها)كلناا كنا تنتمناو ناخدو بلاصتها ولكن حتى وحدة ماقداتش ابدا!!رغم موتهاا بسنوااات طويلة بقا شبحهاا مخيم و تيضوور فالقصر و ذكراهاا مابغاتش تنساا لجلالته!
كوثر حسات بغصة فقلبها: ماظنيتش ابدا انها تكون زوجة كاع...
ليساء: ههه راه قلت ليك تتحلمي بزاف ممكن الملك عجبو جسدك(هبطاتها و طلعاتها بعينيها)باينة غير فهاد الفساتين لي مزييرة فيهم حالتك و اكيد كأي رجل غينجاذب لمفاتن امرأة باش يدوز معاها ليلتو من بعد غيلوحك حيت عمرو غيشوف فوحدة من غير مراتو!
كوثر هزات يديها حتال السما و عطاتها للحنك بقوووة حتى تهزات ليساء و تلاحت فالأرض شادة حنكها الحممممر..كوثر تحنات شاداها من كتافها: وووحدةةةة رخيييصة بحاااالك تجرأ تقووول عليا انااا بنت بيجااااد غيلووحني الملك اااا؟؟؟(تتمخض فيها)دويييي!!!واش ماعرفتيييش معااامن تدوي؟؟؟؟انااا الأميييرة كوووثر نشريييك نتييي و قبيييلتك من جذرهاااا و نبيييعكم فسوووق العبيييد ياااا العبييييد!!!تجي تقولي عليا انا شياااطة اااا؟؟؟
ليساء بدات تفتف و تدخل و تخرج فالهضرة: طلقييي منييي ضريتيييني!!!غنقووول لجلالته شنو درتي ليااا!!
كوثر شداتها من فكها و خرجات فيها عينيها: انا لي غنقولها براسي لجلالتك يتصحاب ليك خايفة منك ولا منوو!!!(زييرات على وجهها حتى غرسات فيه ضفارها و داتها و جابتها)السمااحة هاد المرة ماعندهااا باش تنفعك انااا لي غنخرجك من هااد القصر بيااا و بلاا بيك اليوووم(دفعاتها حتى تكركبات فالأرض)
ليساء ناضت وجهها مقمووش و شي قميشات طلقو دمهم و شعرها منتوف: مغنخليييكش تقوولي ليه والووو!!!(جراتها من ذراعها)
كوثر جرات ذراعها منها و عطاتها بتصرفيقة للحنك لاخور: غبري من قدااامي!!!
عطاتها بالضهر و بدات تزرب فخطاويها تمشي تقول للملك على لي دارتو هاد اللحسة...
اما كوثر بقات غادية فالممرات حتى وصلات للجناح الملكي و دقات فبابو..الملك فالداخل كان تيشوف اوضاع المملكة الإقتصادي مكونسونطري مع وراقو حتى حس بالهالة ديالها عرفها هي لي تدق و سمح ليها بالدخول..دخلات كوثر عليه و الباب تسد موراها من تلقاء نفسو غير شافتو و هوما يبداو الدموع تيتكونو فعويناتها..هز الملك راسو فيها لقاها تتبكي و هو ينوض بدهشة: مالكي؟؟؟
كوثر: دييك لي علقتها داك النهار جات عندي و قالت ليا بلي الملك غير تيستغل فيك و باغي غير جسدك يقضي فيه غاراضو(بعدات منو تتشوف فيه بعينيها المدمعين) بغات تجبد المشاكل بيناتنا اهئ و انا عارفة بلي مايمكنش نتا تستغلني اكيد
شاه عقد حجبانو بغضب كيفاش تجرآت ليساء تقول بحال هاد الكلام عليه و عليها!!!...
شاه حس بتأنيب الضمير و هو تيشوف فدموعها و كيفاش محكوورة زاائد الكلام لي تقاال عليه ابدااا ماخصوش يتقال على ملك بمكانتو هو لي عمروو قااص شي وحدة من بعد مرتو الميتة احتراماا لذكراهاا تجي بنت أثير لي شفق غير على كبر سن باهاا و قبل بيها مفضلة عندوو باش يكون عندو سبب يرفع من منصبو فالمملكة تقول على كوثر بحال هاد الكلام الرخيص!!!
شاه علا صوتو حتى زعزع الحيوط: بهاااااااااااااار!
بهار لي كانت تضور على الخادمات لي تينشرو فالأغطية خرجاات عينيها بخوف فاش سمعات نداء الملك فودنيها و بسرعة البرق ولات عند رجليه...
بهار حادرة راسها: اوامرك جلالتك
شاه: غتسيفطي الرسول دابا يجيب النبيل أثير فينما كان!!!!
بهار بتلعثم: ول ولكن ا جلالتك سيادة الوزير فزيارة لقبيلة....
شاه قاطعها بصرامة: داباااااا يكووون عندييي واخااا يكون فالعااالم الاااخر!!!!
غبراات بهار من تما خارجة تتجري لا واقعة نيت شي حاجة خطيييرة مادام الملك معصب لهاد الدرجة!!!...
شافت فيه كوثر بتعابير المسكينة و شدات فيديه: اصعب حاجة هي شي واحد كاعما عارفك و تيقول عليك كلام بحال هاكا...
شاه قرب منها حتى مسح ليها دموعها و شد ليها فوجهها حتى باسها فراسها: رتاحي دابا كلشي غيكون تحت السيطرة
كوثر عنقاتو مخشية فحضنو تتبتاسم ب شر بعدما وصلات لمرادها:(شاه ديالي بوحدي و اي وحدة تجرأ تنقص مني غنمحيها من هاد الوجود...)
بعد مدة قليييلة ولا أثير فقاعة العرش و الملك جالس فكرسي عرشو بملامح متتبشرش بالخير ابدا...
أثير حادر راسو: طلبتي حضوري جلالتك...
فنفس الوقت كانت ليساء سادة عليها فغرفتها جالسة فالأرض و حدا رجليها مكونات كتيرة تتخلطهم فواحد القدر اسود...
ليساء زربانة: اناا غنورييك تخرجي عليا يا البرهوشة!
بقات تتخلط تما حتى توحد لون المكونات عاطيين سائل أزرق..هزات مغرفة خشبية حتى غرفاتو فواحد القريعة و تخلصات من كلشي جمعات المكان و نقاتو بحالا مادارت حتى حاجة و ناضت من تما مخبية القريعة..خرجات من الغرفة بالزربة دايزة بين الجواري لي مزال ماساقو خبار الموصيبة لي دارت و مشات بين الممرات قبل ماتوقف عليها بهار حيت الى مشات حتى شافتها داكشي لي ناوية تديرو غيتخرب..بقات غادية تتلفت موراها حتى وقفات قدام جناح كوثر لي مكايناش فيه و بالزربة جبدات القريعة خواتها كاملها فالبوانيي و الباب و فالعتبة ترش مائو الأزرق عليهم و فالبلاصة تبخر مامخلي حتى لون أو اثر كأنها مارشات والو..جمعات القرعة بابتسامة شر و غبرات من تما ترجع لغرفتها...
ليساء بابتسامة سم: واخا يوقع ليا لي يوقع دابااا مغتهنايش مني بلا ماتدفعي الثمن!...
نرجعو لعند أثير و الملك لي عاود ليه داكشي لي دارت بنتو بالتفاصيل و كيفاش هانتو و هانت كوثر...
أثير حنا راسو حشماااان من لي قالتو بنتو و ماراضيش ابدااا بفعلتها: تنطلب منك العفوو جلالتك و تسمح لبنتييي
شاه علا صوتو حتى تهز أثير من بلاصتو بالخوف: اشمن سمااااحة!!!؟شكون هييي باااش تجرأ تقوول كلاام بحال هاداك!!!
أثير قرب منو راكع على رجليه تيطلبو ماشي حيت بقات فيه ليساء ماتنساوش لي دكرناه قبل على علاقة المشعوذين بولادهوم و انما على سمعتو و المنصب ديالو لي يالاه ماوصل ليه و داباا فاش خرباتها عليه بتصرفها و مابقاتش مفضلتو غادي يفقد كلشي و يرجع فقط نبيل عادي ماشي نبيل ولا وزير أول...
شاه بغضب: القراار ديالي اتخدتووو و العقوووبة معروووفة لأي واحد تجرأ يهين الملك بل يقول عليه حوايج مكاينينش!!!
أثير بقا ليه شوية و يبكي: تنترجاااك ا جلالتك شوف من حاالي هادوو هوما ولاد اليووم متيوزنوش كلامهم
شاه هز يدو تيعلن على انتهاء الحوار: مانعاودش كلامي!!!!
ناض أثير من الأرض بقلة حيلة و انصارف من القاعة مكسوور الأجنحة كون يلقا ليساء فهاد اللحظة غيفضي معاها بيديه بسبب تهورها و فمها لي متتجمعوش ولكن حتى عقوبة الملك تستاهلها باش تكون عبرة لأي واحد غيحل فمو ولا حتى يفكر فيها...
فنفس الوقت كانت بهار جاية ليها هي و جوج حراس و معاهم كوثر و رثوك..كانت جالسة بين الجواري كأنها مادارت حتى حاجة حتى وقفو عليها...
بهار هزات فيها حاجبها: تهزي يالاه!
كوثر حداها تتخنزر و رثوك حتى هو داير فيها شي شوفات...
ليساء ناضت: لفين؟!
بهار: للجحيم! (حركات راسها للحراس)ديو عليا هادي!
الحراس شدوها من يديها بجوج قدام الجواري المستغربين و لي تيوشوشو لبعضياتهم ب اش واقع و مالهم شادين ليساء هاكا...
ليساء تتجر يديها منهم: ماتشدوونيش عارفة نتمشا!
كوثر: كون كنتي عارفة تمشاي كاعما يجروك رجليك لعندي!
ليساء خنزرات فيها: باقي غتشووفي غير بلاتي واخاا تقتلووني لي غيوووقع غيوقع
بهار دوات غير بعينيها مع الحراس و هوما يجروها من تما خرجوها من القصر غاديين بيها فعربة خاصة بالمذنبين باش تلقا عقابها امام الملأ فوسط ساحة المملكة فين تيتجمع الكبير و الصغير و تكون عبرة للكل!...
كوثر دارت واحد مولاتي الدورة على الجواري بعينيها تتخنزر ماحاملاش تشوفهم و هي تجر بهار من تما و رثوك تابعهم: قولي ليا...
بهار: تفضلي انسة
كوثر: هاد الجواري حتى وحدة فيهم عمرها دخلات عند شاه ياكي؟؟و ديك لحساء حتى هي واش بيناتهم شي حاجة من قبل؟
بهار شافت حولها و هي تديها خارج الجناح فواحد الجليسة تما: لا ا انسة حتى من ليساء لي كانت مفضلتو عمرو قاسها
كوثر بتاسمات براحة: كنت عارفااه ماشي من هاد النووع و هاد الجوااري غير بروطوكول ملكي
بهار حنحنات: احم سمحي ليا نسولك ا انسة عارفة غنتجاوز الحدود ولكن بغيت نعرف شنو هو الملك بالنسبة ليك؟
كوثر بقات ساكتة لدقائق تتفكر و ضور هاد السؤال فدماغها بالفعل شكون هو الملك شاه اليامن الثالث بالنسبة ليها؟؟المختطف لي بعدها على عائلتها بسبب واجب لحد الآن ماعارفاهش؟ ولا حبيب بدا يبيين اهتمامو بيها؟؟...
بهار لاحظات سهوها و سكوتها و هي تقلب الموضوع: المهم انسة انا غنمشي دابا نشوف الطباخين فين وصلو فالغداء
مشات و خلاتها مع رثوك لي قرب منها: كوثر؟ علاش تبلوكيتي هاكا؟
كوثر حطات يديها على راسها: ماعرفتش السؤال جاني صعب مهم غنمشي لجناحي دابا نرتاح شوية بينما وصل وقت الغذاء
مشات من تما لجناحها..حلات الباب و دخلات بشكل عاادي حتى تلاحت فوق الناموسية ماراداش البال لداكشي لي تخطاتو و لي كان من صنع ليساء...
وصلات وقت الغذاء...
كانت كوثر جالسة فالطاولة مع الملك تياكلو...
كوثر هزات فيه راسها: انا فرحانة حيت قدرت نشوف العدل ديالك بعينيا لازمها تعاقب اشد العقاب!
شاه شاف فيها: غتكون خدات دابا لي تتستحق!
فنفس الوقت فساحة المملكة كانت ليساء معلقة مع واحد اللوح خشبي مربوطة معاه من يديها و رجليها..كانت سخفانة و مستنزفة القوة جسمها مضروب و حوايجها مقطعين و فمها فيه شوية د الدم..حولها مجموعين الناس لي شهدو على عقابها و قدامها كان مشعوذ من القصر الملكي المكلف بعقابها و فيديه هاز علبة زجاجية عامرة بالماء و فداك الماء كان لسان منتزع و لي هو لسان ليساء لي حييدوه ليها بتعويذة ماشي بالقطع هادي هي عقوبة لي تيقول على الملك أو الناس حوايج ماكاينينش و يتاهمهم بيهم تيتحرم من داك اللسان باش نطق مدى الحياة!..انصرف المشعوذ من تما بعدما كمل عملو مخلي ليساء عبرة للكل و الناس حاطين يديهم على فامهم خايفين مايمكنش ابداا يجبدو حس الملك حتى الى بغاو بعد هادشي لي شافووه هادشي الى بغاو يبقا عندهم شي لسان..جاو رجال ديال أثير حتى هبطوها من تما بعدما سالا العقاب فاقدة للوعي و داوها معاهم غيغبر لبوها الأثر دابا بعدما مرمدات وجهو فالتراب و خرجات عليه مع الملك...
فالعشية..الملك وفا بكلمتو و دا كوثر لعند أحصنتو الكثيرة من النوعية الملكية فقط..ختارت ليها و ختار ليه و مشاو فجولة راكبينهم فداخل الغابة...
كوثر: من بين افضل الحوايج عندي هي نكون راكبة حصان تنحس بالحرية
شاه بقا تيشوف كيف العادة فقط..قليل فاش تيقدر يفكر فشي جواب مناسب لكلامها حيت لدابا مزال ماستوعب التغيير المفاجئ لي بدل شخصيتها المتمردة!...
هبط شاه بخفة من الحصان و وقف حداها تيتمنضر فالمكان: ماقلتيش من قبل بلي غتجلسي باش يقادو الخدم لينا الجليسة!
كوثر: ماكنتش عوالة على هادشي جا على غفلة حيت عجباتني البلاصة
شاه: تفضلي
جلسات كوثر فوق العشب الأخضر الكثيف و جلس حداها الملك بعدم راحة حيت عمرو جلس بهاد الطريقة ولكن فنفس الوقت باغي يدير ليها خاطرها...
كوثر جبدات الكتاب لي كان قتارحو عليها و بدات تقرا فيه: أساس سحر القمر هي دورة القمر أو كيف تيقولو ليها الأغلبية مراحل القمر..عددها ثمانية و كل وحدة و دورها و طقوسها الخاصة بيها باش تحقق الغاية منها و توصل لحوايج معينة..المرحلة الاولى القمر الجديد..المرحلة الثانية هلال الصبح(حطات صبعها باستغراب على هاد المرحلة)هاد المرحلة موعدها بعد 3 ايام..نفس المدة لي بقات للواجب لي قلتي ليا!(هزات فيه راسها) واش هادي صدفة؟؟حيت مايمكنش تكونها!
شاه عرفها ماشي غبية باش ماتلاحظش هادشي الى مشات حتى قرات على سحر القمر بالعكس هو لي قدم ليها الكتاب و بغا على الأقل تستنتج لراسها شي حوايج من غير ماهو يقولهم ليها...
شاه: الواجب مرتبط بسحر القمر
كوثر هزات حاجبها باستغراب: ولكن علاش سحر القمر؟؟انا مشعوذة و حتى نتا مشعوذ اش دخل السحر فهادشي؟!
شاه مابغاش يجاوب على هادشي حيت ولو هو جزء بسيط بزااف من مخططو الا انها تقدر تكتاشف قبل الوقت المناسب شي حاجة: اهم حاجة تعرفي على المراحل فقط الباقي خليه لوقتو المناسب
كوثر تكات فوق العشب و شعرها متناثر فوقو سادة عينيها: سحر القمر..الواجب..روح الجدة الباتول المقيدة..براعة..الجثة لي فالتابوث..الطقوس..اختطافي فعيد ميلادي العشرين بالضبط..انا ماشي مكلخة ا شاه و انما تنتسنا فالأحجية تجمع قطعها كلها
شاه هاد الساعة مابغا يفكر فحتى واجب ولا حتى حااجة هاد الأيام لي دوزات معاه خلاوه مخربق ديال بصاح لدرجة ولا يميل ليها و يحس معاها بحوايج كان تيحسهم مع زوجتو! تكا حداها و جرها حتى تحط راسها على صدرو و سد عينيه باغي يحس فقط بيها ماباغي يسمع والو..سدات كوثر عينيها براحة من قربو هاد الراحة لي تتنزل عليها فاش تتشوفو ولا تتقرب ليه بشكل غرييب و مفاجئ...
كوثر فخاطرها: (يا ريت كون كنتي شخص عادي كانت الأمور غتكون احسن...)
فنفس الوقت فمكان بعيييد بزاااف فوسط صحراااء قاااحلة مافيهااش حس شي كائن حي حتى من النباتات متتنبتش ابداا فأرضهاا المميتة..و فوسط من هاد الصحراء كان برج مظلم عااالي..ظلاموو دااامس و ليلووو اسود..تسمعو قهقات عالية شريرة فأرجائو جايين من قااعة وااسعة فيه..كانت لعجوووز طوييل القاامة و اللحية كلها بيضاء بالشيب و قدامو قدر حديدي كبير أسود عامر بالماء تيشوف من انعكاسو الملك شاه كيف متكي فوق الربيع و كوثر بين احضانو...
العجوز بعيوونو الحادة الشريرة و صوتو الخشن المرعب نطق: و اخيراا وصلات اللعبة للمرحلة لي كنت تنتسناا فيها سنين هادي هههه الملك شاه اليامن الثالث..ملك ملوك المشعوذين (كمش عينيه بإهتمام) غنشوفو واش غتختار الروح ولا الجسد..حبك ولا عذابك هههه...
فالليل...
كانت هاجر واقفة فالبالكون ديال غرفتها تتشوف فالفرااغ..ساهية و عقلها مهزووز تتفكر غير فبنتها لي قربات تكمل سيمانة باش مختفية و لدابا مزال مالقاو حتى خيط يوصلهم ليها حتى من الخريطة ماعندها حتى فائدة مادامها ماشي ديال أرض الواقع بل خريطة مشفرة لازمها تفك..حسات بأيادي ضوروها من خصرها و أنفاس ضاربة فعنقها دارت غير بشوية عارفاه غير من ريحتو..كان بيجاد معنقها عارفها قداش مهمومة و هو كذلك غير متيبيينش بحالها...
بيجاد: دخلي ترتاحي كاين شوية د البرد عليك
هاجر هبطات حجبانها بحزن: ماغنرتاح حتى تكون بنتنا معانا بنتنا لي عمرها بعدات قد هاكا علينا
بيجاد ضورها لعندو حتى باس فراسها بشكل مطول و عنقها: غترجع اكيد انا حاس بهادشي...
فنفس الوقت فمملكة كينتاريا و بالضبط فجناح الملك..بعد العشاء جمعو الخدم الطاولة و انصرفو مخليينهم بوحدهم...
كوثر ناضت تتمشا فالجناح و هو تابعها بعينيه حتى مشات للبالكون جلسات فوق الفوتويات لي محطوطين فيه..ناض شاه تبعها و جلس حداها كان القمر على شكل هلال خفيف مزال ماكتامل شكلو وسط من السماء المظلمة...
هي كانت ساهية فالقمر و شاه ساهي فيها هي..كلامها و شكل القمر هاد الليلة عاد ما تيزيد يأكد اقتراب الليلة الثانية المنتظرة بشكل قريب و جدي! الليلة لي غيضحي بكلشي باش يرجع قطعة منو افتقدهاا ولكن علاش بدا يحس بالتردد؟؟واش بسبب ولفو ليها عن طريق مراقبتها فجميع مراحل حياتها؟ولا كيفاش ولات تتفكرو ببراعة بشكل غير عادي؟...
كوثر ضارت شافت فيه بابتسامة: "واش شفتي القمر اليوم؟"
شاه لي كان ساهي غارق فتفكيرو غير سمع العبارة لي قالت و هو يتصدم: كيفاش؟؟
كوثر حطات يديها على فمها تتبتاسم: فهمتي قصدي...
شاه بدهشة: اكييد فااهم!!(شدها من كتافها) منين عرفتي هاد العبارة؟؟الكتاب لي عطيتك مافيهش هادشي!
كوثر تتشوف فعينيه بإعجاب: جات فدماغي و قلتها..واش ماعجباتكش؟
شاه شاف على جنب تيستوعب الأمر: القضية هي كيفاش مشعوذة غتعرف هادشي؟
كوثر هزات كتافها: انا تابعة غير احاسيسي و صافي
الغريب فهادشي ماشي الجملة لي قالت بل المعنى ورا كلماتها.."واش شفتي القمر اليوم؟" عبارة تيقولوها فقط سحرة القمر هوما فقط لي عارفينها و امتى تتقال فاش تيبغي الساحر أو الساحرة د القمر يغازل شي واحد و مستحيل بالطبع تعرف حاجة خاصة بحال هادي فمجتمع السحرة و أنواعهم المختلفة من غير سحرة القمر ماحساك عند مشعوذة!...
كوثر قربات منو تتشوف فعينيه بواحد الإعجاب كبير: من ديما كانو تيعجبوني بزاف عينيك الخضرين..واخا فيهم واحد الظلام ولكن بالنسبة ليا عاد مازادهم جاذبية خاصة
شاه ساكت مايمكنش ليه يسمع هاد الكلام لي تيفكرو فشخص اخور و قدامو وحدة خرى لي تتنطق بيه...
كوثر حطات يديها على يدو: شاه..علاش دوك الجواري كاملين؟
رثوك بدهشة: كوثر! نتي ماشي كوثر انا مامتييقش بلي كوثر تخرج هاد الكلام من فمها!!(تبخر من قدامها مخليها)
كوثر عاقدة حجبانها: نتا لي بقيتي ليا فالحساب!...
فلغد ليه..يوماين لي بقات على وصول ليلة هلال الصبح...
بعد وقت الفطور جات وجدان لقصر عائلة الفارسي تشوف بقية الأمور مع هاجر اما بيجاد و سالار مشاو للخدمة...
كانو جالسات فنفس الطاولة و فوقها عرمة د الكتب و اشياء خاصة بالشعوذة و السحر...
وجدان: ممكن تحلي كتاب تعاويذ كوثر دابا؟
هاجر جبداتو بعدما لقاتو فجناحها..غير حطات يديها فوق منو تحلات عين الكتاب الخضراء حتى تحققات من شكون هدا لي قاصو من غير مالكة الكتاب حتى تيلقا أمها و لي بنفسها من سلالة الجدة الباتول..تسدات عين الكتاب و حسات بيه هاجر ترخف يعني سمح بفتحو و صفحاتو تحلو...
وجدان: بعداا تحل واخا نتي غير امها
هاجر: عندي ارتباط مع الجدة قبل كوثر اصلا تنظن كونما هي لي لقاتو و قاستو الأولى كان غيكون ديالي
وجدان: متنظنش ا خالتي حيت الكتاب تيختار مالكو بعناية ماشي بالأسبقية غيكون مورث لكوثر من البداية
هاجر تنهدات تتضور فصفحاتو: و دابا اش غنديرو؟
وجدان جبدات الكتاب د ترجمة لغة المشعوذين لي لقات فقبو كوثر: غادي تكتبي التعويذة لي غنلقاو فيه خاصة بطقوس القمر ولا شي حاجة حيت هادشي لي تيربطني انا و كوثر مع بعض هو فاش كملنا الطقس الأول مع بعضياتنا
بقات تدوز هاجر فالصفحات و الكتبة غادية و تتقلب قدام عينيها من لغة المشعوذين الى اللغة العربية..تعاويذ مورا تعاويذ ولكن حتى وحدة فيهم مامتعلقاش بالقمر...
الخادمة: سمحي ليا ا لالة على المقاطعة ولكن واحد من الحراس لقا هاد الصندوق عند الباب
هاجر باستغراب: واخا غير حطيه هنا و شكرا
حطات الصندوق و انصارفات مخلياهم تيشوفو فيه باستغراب...
وجدان: تيبان فيه قديم و ماشي من صنع أيادي بشرية
هاجر: باش عرفتي؟
وجدان: النقوش ديالو سحرية
قربات اصابعها منو حتى حلاتو لقات فيه بلورة شفافة و فجزئها السفلي مزوقة بقطعة من معدن سحري نادر منقوش و وسط منو جوهرة ملونة...
وجدان بذهول: اول مرة نشوف بلورة بهاد الشكل يمكن عندها ميزة خاصة و نادرة ماشي بلورة عادية بحال لي تنستعملهم فالطقوس!
هاجر بانت ليها وريقة صغيرة حداها ملفوفة و هي تجبدها قراتها: "ضعي البلورة فوق الخريطة و سوف تكشف الحقيقة"
هاجر هزات راسها: حطيها فوق الخريطة نشوفو اش غيوقع
حطات وجدان البلورة فوق الخريطة فجأة بدااو تيلمعوو بجووج حتى اختفت البلورة متبخرة فالهوااء و الخريطة تبدلاات ولات من الرسوومات لي هاجر هي الوحيدة لي تتشوفهم لخريطة قادرة حتى وجدان تقراهاا...
وجدان بدهشة: ولااات تتباان ليا الخرييطة كيفما هي حتى اناا!!
هاجر: و اخيرااا مغنبقااش هازة بوحدي هااد الحمل اووف(حاطة يديها على قلبها)
وجدان هزاتها تتقراها و عينيها غاديين و تيوساعو: صااافي صااافيي (حطاتها و جبداات كتاب تماا تتقلب فصفحاتو حتى وقفات فصفحة مرسومة فيها خريطة و طابقاتهم مع بعض) شووفي ا خاااالتي الخريطة بحاال هادي تمامااا غير هوما فسنة 1600
هاجر باهتمام: غنلقااوها داباا يااكي؟؟؟
وجدان: اكيييد و مع قوة سحري لي غتزاد بعد غدا فالليل غتكون الطريق مرسومة قدامنا
هاجر ناضت فرحانة حتى عنقات وجدان: ماتصوريش قدااش فرحتينييي شكراا بزاف على وقفتك معاناا و شغالك لي خليتيهم على قبل نلقاو كوثر
وجدان مبتسمة: مابيناتناش ا خالتي ممكن من بعد عودة كوثر نكونو انا وياها صحابات ههه
هاجر غرغرو عينيها بدموع الفرحة هادي هي الأم وليداتها هوما كلشي فحيااتها و فاش مشاات كوثر بحالا مشاا طرف من داتهاا...
فنفس الوقت هاد العناق الحار داز تحت انضار اعين شريرة لي كانت طول الوقت مراقبة الوضع...
العجوز بضحكة مرعبة: هههه ماشي من العدل تغلب كفة الملك ضروري نعادلوها مع كفة العائلة...
اما عند كوثر داز صباحها عادي هاد المرة مافاقتش بكري و ماقدراتش تفطر مع الملك داكشي علاش سيفطو ليها الفطور لجناحها..ناضت حتى قادات حالتها و جلسات تتاكل بوحدها تما رثوك من البارح غابر و هي مامسوقاش ليه..كملات الأكل و هي تخرج تضور شوية فالقصر حتى تيبانو ليها الجواري تيخرجو وحدة مورا لوخرا كل وحدة لابسة رداء و لايحة قبو على راسها و فجنبهم صف د الخدم كل خادمة هازة صندوق مجموعين فيه اغراض و ملابس كل جارية و على راسهم بهار لي واقفة على الشغل تيدوزو صفوفا مقاادين قدام عينيهاا و فالخارج د القصر تيتسناوهم عرباات لي غيرجعوهم لديورهم..وقفات كوثر على بهار تتبركك بعينيها: اش واقع هنا؟
بهار: جلالته آمر بإخلاء جناح الجواري و إرجاع كل جارية لعند عائلتها
كوثر بتاسمات بلا ماتحس و حسات بفرحة كبيرة فداخلها: بصااح؟؟و علاش؟؟؟
بهار: هادشي تيديرو الملك العازب فحالة وحدة(هزات فيها عينيها) الى لقا المتوجة لي غتكون ملكتو...
كوثر ضمات يديها: احسن حااجة دارهاا نخليك دابااا
مشات من تما بخطوات سريعة بغات تمشي عندوو مخلية بهار غير تتشوف فيها...
بهار بتمعن: الانسة تبدلات على قبل...
كان شاه تيقرا فواحد المخطوطة حتى سمع الدقان فالباب..عرفها كوثر و هو يخليها تدخل...
كوثر دخلات بابتسامة مزيينة شفاهها و عيوونها لامعة بالفرحة: شااه...
شاه طلع فيها راسو لقاها غطير بالفرحة: مالكي؟
كوثر وقفات عليه مييلة راسها بحال شي طفلة: خرجتي الجواري من القصر باش نبقاو غير انا وياك ياك؟...
شاه هز فيها عينيه ماعرفش باش يجاوب القضية انه طول هاد السنوات ماكانش مسوق ابدا لوجودهم تمايا من غير ليساء لي كانت لاصقة فيه و تتجي عندو كل جمعة حسب العادات(واخا متيديرو والو) ولكن هضرة كوثر البارح بحالا فييقاتو و قرر يلغي هاد العادة لي مامنها حتاشي فائدة مادام هو مامحتاجش لحتى وحدة برانية و اصلا عندو ملكتو المتربعة على عرش قلبو سنين هادي و بدون انقطااع...
كوثر: بقات يوماين للوااجب!
شاه: اه..عارف...
كوثر: اليوم بغيت نبقا فجناحي شحال هادي مامارست شعوذتي
شاه: على راحتك
استأذنات منو و مشات لجناحها...
شاه تنهد مدوز يديه بين خصلات شعرو: شهادشي تيوقع ليا!...
فوقت الغداء كانو مجموعين العائلة و معاهم وجدان لي ولات فرد منهم من كترة ماتقربات من الواليدين اما سالار اصلا صديقها و تيتشاوفو من قبل...
بيجاد: لي تنفكر فيه انا هو شكون هدا لي سيفط الصندوق بلا حتاشي اثر
وجدان: عندي احساس تيقول ممكن يكون الرجل نفسو لي عطانا الخريطة
هاجر: حتى انا هادشي لي حسيت بيه
بيجاد: بغيت غير نعرف شكون هاد الرجل..المساعدة جوج مرات فابور راه الشك بعينيه!
سالار: حتى واحد فينا ماعندو شي تخمين ولكن لي كاملين متأكدين منو انه ماشي رجل عادي ابدااا
وجدان: هو ماشي ساحر و عندي شك انه مشعوذ و ماشي اي مشعوذ غيكون من درجة عالية حيت خريطة و بلورة بحال هادوك معدات نادرة و خطيرة
بيجاد عقد حجبانو: واش هاد المشعوذين تابعيني حتى فهاد القرن! متيموتوش!
هاجر تفكرات تاني الموصيبة لي والد قالت لكاع المشعوذين سكتو و هو مافراسو مايتعاود...
سالار نفس الشيء جا فبالو واخا متيفهمش فالسحر و الشعوذة ولكن راه كوثر باينة فيها متمرسة من الطيارة من كترة ادمانها بداكشي...
وجدان: يوماين و غنرجعو ليكم انا و سالار كوثر (شافت فيه بابتسامة)ياك؟
سالار رد الابتسامة: اكييد!...
هاد الليلة دازت بشكل عااادي و صااامت كوثر نهار كاملو و هي تشعوذ فداك الجنااح و الملك تيحاول يتجنبها حيت تتخربق ليه التركيز بقربها منو و تتلفو على لي مخطط ليه بقا ساد عليه حتى هو فجناحو مقابل اعمال مملكتو كأي ملك حتى وصلات وقيتة العشاء..تعشاو و لأول مرة كل واحد بوحدو و نعسو...
فلغد ليه..يوم واحد فقط لي بقا على ليلة هلال الصبح...
فاقت كوثر عيانة شوية تتحس بصحتها مدكدكة عليها ولكن رغم هادشي جمعات الجهد و ناضت قادات حالتها كيف العادة و خرجات تشوف الملك لي ولا حاجة عندهاا ضرووورية و هو كذلك ولفها فحيااتو بعدما كان مولفها كلوحة فنية تيتمنضر فيها داخل بلورتو السحرية..جلسو فطاولة الفطور تيفطرو فجو صامت حتى كملات كوثر ماكلتها و شافت فيه...
كوثر: الليلة هي الليلة الموعودة ياك؟
شاه حادر عينيه: اه...
كوثر: و اخيرا وصل النهار لي غنعرف فيه هاد الواجب لي قلتي تخلقت على قبلو
شاه: غنخلي الأمور تدوز دغيا...
كوثر: تنتمنى...
ناض شاه من بلاصتو حتى مشا حل مجر البيرو ديالو و جبد علبة مزوقة بالأحجار الكريمة و حطها ليها فوق الطاولة قدامها...
كوثر: شنو هادشي؟
شاه: حليها...
حلات كوثر العلبة لقات قلادة القمر...
كوثر هزات راسها فيه باستغراب: بحال شكل هاد القلادة تديرو وجدان فعنقها..زعمة ساحرة القمر لي تنعرف!
شاه: هادي قطعة عزيزة على قلبي..بغيتك تلبسيها بمناسبة هلال الصبح
كوثر هزاتها تتقيص فيها بأصابعها: واخا تلبسها ليا؟
شاه قرب منها و هي ترجع شعرها على جنب..لبسها ليها و بلا شعور باسها فوق شعرها تيستنشق ريحتو الجميلة و هي تسد عينيها براحة و قلبها تيخفق..حطات يديها على عنقها تتقيص فالقلادة بابتسامة و هي تحس بيه بعد منها...
شاه: قبل منتصف الليل تكوني عندي
كوثر: يعني مغتشوفنيش حتال الليل؟
شاه عطاها بضهرو: اه خصني نوجد شحال من حاجة..جميع التحضيرات غيوصلوك بقاي فجناحك...
فالعشية و الظلام مابقا ليه والو و يطيح..كانت وجدان لابسة و موجدة حقيبتها و معداتهاا نفس الشيء مع سالار واجد...
هاجر عنقاتهم بجوج: تنتمنى كلشي يصدق كيفما بغينا
سالار باس راسها: كوني هانية غنرجعو ديك الموصيبة
بيجاد بثقة: و انا عارف بلي مربي راجل و أمير الأمراء!(شاف فوجدان) و بجنبو سندو
وجدان بتاسمات بخجل: مغنخييبش ظنك ا موسيو
تسالموو و توادعوو و طلعو فالطونوبيل شادين الطريق...
وجدان: فين غنمشيو دابا و منتصف الليل باقي ليه شوية
سالار: نجلسو فشي بلاصة بينما وصل
وجدان: واخا...
اما كوثر كانت جالسة قدام المرايا لابسة فستان الأميرات فالأحمر بلا سماطي مزوق بأحجار الياقوت و فيديها قفازات بيضين طالعين..شعرها مجموع و فوق راسها تاج مرصع بالياقوت كلهم اشياء وصلوها من الملك استعدادا لهاد المناسبة..كانت تتشوف فإنعكاسها بواحد الحزن فعينيهاا و بيديها تتقيص قلادة القمر لي لبسها ليها الملك هاد الصباح..ناضت من تما فاش شافت الساعة قربات..خرجات من الجناح تتشوف فالممرات كأنها غتشوفهم للمرة الأخيرة فحياتها..بقات غادية حتى وقفات قدام قاعة كبيرة هي لي قال ليها الملك يتلاقاو فيها..دفعات بابها الكبير و هي تدخل بان ليها واقف عاطي بضهرو تيشوف فالحيط لي كانو مغروسين فيه سلاسل..سمع حسها و هو يضور بشوية لقا الأميرة المشعوذة بحلتها لي كانت على ذوقو..حلة ملكية تليق بيها..كوثر عينيها غرغرو فاش شافت عند رجليه ثابوت براعة نفس اللقطة تتعاود بحال اول مرة...
شاه حدر راسو: تنظن مانحتاجوش للسلاسل هاد المرة؟
كوثر بداو تيهبطو دموعها: واش صافي؟؟
شاه: براعة هي مرتي..البنت الوحيدة لي كنت مستعد نوحد أمم على قدهم و على قبلها فقط...
فنفس الوقت كان رثوك مسند مع باب القاعة على برا ساد عينيه بآسى...
رثوك: الحقيقة المرة..الوداع ا كوثر...
شاه: براعة ماتت نهار عرسنا..ماتت مقتولة..ماقدرتش ابدا ندفنها ولا نرضا بالقدر..و بصفتي ملك قادر نوصل للمستحيل ولكن للأسف القدرة على إحياء الموتى ماشي بالساهلة كيف تيعتاقد الواحد..كانت موجودة طريقة وحدة فقط ولكن شروطها كانو صعاب يتوفرو..حتال واحد النهار جاتني الفرصة برجليها حتال بين يديا...
كوثر تتبكي: اهئ و شروطها متوفرين فياا اناا ياك؟؟؟؟
شاه: اه...
كوثر: و شنوو هومااا و علاااش؟؟؟؟فيين جدة فهااادشي كاملوووو؟؟؟جدة لي مادارت ليك والووو و مقييد روحها!!!
شاه هز حاجبو: جداك هي لي باعتك ليا! جداك هي لي باعت ليا روح حفيدتها باش نرجع انا مرتي!(جبد قلادة الساعة الرملية الحمراء لي فعنقو)و هدا هو العقد الدموي لي توقع بيني و بينها باش نضمن روحك ليا!...
مشعوذة الملك الجزء الثالث
محتوى القصة
التنقل بين الأجزاء