الزنبقة الفضية الجزء السادس

سراج: سي معتصم عفاك تهدن الاعصاب مامزيونينش لصحتك 

معتصم:(كيرجف) اقسم بالله انقتلو و اندمو على كل حاجا دارها فبنتي 

حنان: خاص نتلاقاوه دابا فالخرجة دلمدينة نعطيوه الجوهرة و ناخدو كوهينور 

معتصم:(ناض و شاف ف موحى) طلع الجوهرة للطوموبيل و قولهم اوجدو طائرة متاجهة لروسيا اناخد بنتي و نخويو لبلاد 

موحى: امرك اسيدي

حنان: يالاه نمشيو 

سراج:(شدها من يدها) ماتمشييش احنان 

حنان:(طرطقات فيه عينيها) سراااج حاجا وحدة اديرها على قبلي هي تاخد حفيظة و شاكمة لداري 

سراج: و نتي ؟ 

حنان:(ابتاسمات ليه) غادي نجيب كوهينور و نجي 

سراج:(استسلم للامر الواقع) واخا تهلاي فراسك و انا انبقا فلقصر حتى تجيو 

اتاجهات كل من حنان و موحى و معتصم لطوموبيل ركبو و ساق موحى فاتجاه الخرجة د لمدينة و تبعوهم فرقة من ليكارد و كلهم متوترين و خايفين من المجهول الزنبقة نشر فيهم الرعب غير بشوية بشوية و خلاهم اضربولو الف حساب لكن بالرغم من هادشي كانت مؤامرة كتحاك و الطرفين بجوج ماصافياش النية ديالهم وصلو للمكان المعلوم و خرجو من طوموبيل مقابلين مع طوموبيل ديال الزنبقة جالس فوقها و ليكارد ضايرين بيه و عاد خرجو ليكاردكور ديال معتصم كيترقبو اي هجوم نقز الزنبقة من فوق الطوموبيل ديالو و بقا كيتكسل 

الزنبقة: بكثرة ماتعطلتو جاني الملل (غادي فاتجاه معتصم) ولكن غير كنتفكر بلي هبطت ليك راسك كنحس بالفرحة 

معتصم:(كيخنزر) فييين هي بنتيييي ؟ 

الزنبقة: فين هي الجوهرة؟ 

معتصم:(عطا اشارة لموحى لي خرج واحد الصندوق صغير من لكوفر و عطاه لمعتصم) الجوهرة كاينة هنا 

الزنبقة:(كيشوف فالصندوق و شوية شاف ف حنان ) حلي الصندوق 

حنان: (كتشوف فالصندوق و شداتو من عند معتصم حطاتو فالارض و بدات كتحلو بشوية حتى حلاتو و ضغطات على واحد الزر و خرجات الجوهرة كتبري حيت ضاربة فيها اشعة الشمس) هاهي الجوهرة 

الزنبقة:(خداها بلمح البصر و زير عليها بالقبضة ديدو و هو كيشوف فمعتصم) الكوهينور رجعات للمكان الاصلي ديالها 

حنان: فين هي كوهينور 

الزنبقة:(شاف فيها ) سيري مع رجالي غادي يوصلوك لبلاصة لي كاينة فيها حيت مكنتيقش فهادو(كيشوف فمعتصم و موحى) 

معتصم:(حط يدو على كتف حنان ) سيري ابنتي عنقي كوهينور و جيبيها للقصر 

حنان:(كتشوف ف معتصم و فالزنبقة) واخا (مشات حنان كتجري ركبات فالطوموبيل و انطالق بيها أحد رجال الزنبقة للمستودع المهجور ) 

اما الزنبقة من بعد ما خدا الجوهرة اتاجه لطوموبيل ديالو و مشا بحالو و ايضا معتصم انطالق فاتجاه قصرو انتسنا تماك كوهينور باش استاقلو الطائرة ديالهم و يخويو لبلاد ...كان الزنبقة فرحان حيت و اخيرا وصلات الجوهرة فيديه بقا شادها كيشوف فيها حتى لاحظ بلي كاين ثقب فيها و تبدلو ملامح ديالو للتساؤل 

الزنبقة: وقف الطوموبيييل 

السائق وقف الطوموبيل و خرج الزنبقة من الطوموبيل حط الجوهرة فوق واحد الحجرة و كيضور عليها 

الزنبقة: عطيني مطرقة (وجه كلامو للسائق لي عطاه المطرقة شدها الزنبقة و هو يطلعها حتى لفوق و هو يضرب الجوهرة حتى تشتتات و طلع راسو الفوق زأر بغضب) بغييتييي تلعب امعتصم عاطينييييي جوهرة مزيفة كتشبه للكوهينور ولكن مااااشي عليااااا قسماااا برب الكعبة حتى نصفيهالك هاد نهار (ركب فطوموبيل ) سير للقصر ديال المعتصم و علم ليكارد اتبعوني 

السائق : حاضر (هاد الخطة لي دار معتصم اترجع عليه بالندامة خاصة ان الزنبقة الى تعصب مكيبقاش هامو حتى واحد ايحرق المدينة بلي فيها و هو دابا متاجه لعند معتصم و ايخلي دار بوه فهاد الاثناء لي كان الزنبقة متاجه للقصر عند معتصم كانت حنان وصلات للمستودع و دخلات كتجري شافت غير ظلام قبالتها عاد شافت كوهينور سخفانة و هي جالسة فالكرسي مشات كتجري عندها كتفيقها ) 

حنان: كوهيينوور (كطبطب على حناكها ) 

كوهينور:(بدأت كتحل عينيها شوية بشوية عاد توضحات ليها الصورة ديال حنان) حناان 

حنان: جيت نعتقك ما تخافيش انا معاك 

كوهينور: اهئ اهئ حناااان خرجيني من نهنا غادي يقتلني 

حنان: ششش ماكاين لي يقيسك (فكاتها من القيود لي كانو مكبلينها و كتحاول تنوضها ) 

كوهينور: فيين هوو بابا علاش ماجاش 

حنان:(تنهدات ) بلاتي نخرجو من هنا و انعاودلك كولشي

كوهينور:(عنقاتها) سمحيييلي على كوولشي اهئ اهئ 

حنان:(بادلاتها العناق) صافي مكاين مشكل غير يالاه نخرجو منهنا (خرجو بطلاتنا من المستودع و حنان لمحات الراجل لي كان وصلهاا للمستودع عطات إشارة لكوهينور بيدها باش تلتازم الصمت و هي تهز واحد العصا حديدية و جات بشوية من مورا الراجل و ضرباتو للراس حتى طاح) دابا تهنينا (شافت فكوهينور) تقدري تسوقي 

كوهينور: اه 

حنان: طلعي للطوموبيل خاص نمشيو لداري 

كوهينور: كييفااش راه خاص نمشيو للقصر 

حنان: (ركبات فطوموبيل و ركبات كوهينور حداها كتسوق) الزنبقة كان حاط شرط باش اطلق سراحك هو ياخد الجوهرة و لكن باباك خرق هاد الاتفاق و عطاه جوهرة مزيفة و قبل مايكتاشف الزنبقة هادشي خاص نحميك و نخليك عندي فالدار 

كوهينور: الزنبقة ماغادي يتهنا حتى ياخد الجوهرة و هادشي كيعني بلي حياتي مازال فخطر اهئ اهئ غادي يقتلني احنان 

حنان: كان على باباك اعطيه الجوهرة 

كوهينور: بابا كيفكر غير فراسو مافكر فيا حتى شوي اهئ اهئ 

حنان: دابا خلينا من هاد الهضرة خاص تبقاي عندي حتى يجي باباك ياخدك مابغيتش نديك للقصر خفت عليك 

كوهينور: وااخااا (ساقت كوهينور فاتجاه دار حنان وصلو و هبطو دخلو لقاو شاكمة و حفيظة ) 

حفيظة: على سلامتك 

شاكمة: آنسة كوهينور الحمد لله على سلامتك 

كوهينور:(ابتاسمات ليهم ابتسامة خافتة) شكرااا 

حنان: جلسي ترتاحي انا انوجد ليك الماكلة باينة فيك جوع 

كوهينور: بزاااف و خاص ندوش 

حنان: طلعي لبيتي دوشي 

كوهينور: اوكي (طلعات كوهينور للبيت كدوش) 

حفيظة: كون غير ماتت 

حنان:(خنزرات فختها ) سكتيييي دابا تسمعك 

حفيظة: خليها تسمع اصلا موتها حسن من حياتها 

شاكمة:(شد حفيظة من يدها ) زيدي نخرجو للجردة قبل ماتجيك شي تصرفيقة 

حنان: اللهم صبري (مشات للكوزينة كتقاد الماكلة لكوهينور ) 

اما فالقصر ديال معتصم كان واقف حدا الطائرة كيتسنى بنتو و سراج حداه حتى كيسمعو اطلاق النار. و كيشوف معتصم ليكارد ديالو كيموتو واحد بواحد 

معتصم: ااااشهاااادشييييي وااااقع 

الكارد: سيدي الزنبقة وصل للقصر و راه كيتقاتل مع ليكارد حتى لدابا بزاف لي ماتو منا و قليل لي مات فليكارد ديالو 

موحى: أمكن اكتاشف الخطة 

معتصم: تفوووو على زهر 

سراج: خصك تمشي داااباااا قبل مايوصلو الزنبقة لعندك 

معتصم: مايمكنش ليا نمشي بلا كوووهينوور 

سراج: اذن انا انحاول نعطلووو (مشا سراج كيجري و هو شاد المسدس فيدو و كيتخبع من الرصاص شوية جبد تيليفونو و عيط لحنان) 

حنان: الو 

سراج: حنااان فييينك نتي و كوهينوور 

حنان: (كتسمع اطلاق النار ) حنا فدار شنووو وااقع 

سراج: الزنبقة هجم على لقصر و هاد المرة غادي يقتل كوولشي 

حنان: تفووو اذن اكتاشف الخطة فيين معتصم ياكما تآذى 

سراج: راه كيتسنى بنتو باش يمشيو جيبيهالو 

حنان: لااا غادي يقتلها الزنبقة 

سراج: مانخافش عليك احنان عارفك بلي قادرة تحميها و توصليها ليه ..(قطع) 

الزنبقة بقا كيشوف ليكارد ديال معتصم كيموتو واحد بواحد و هو كيقلب على معتصم و معصب نييت اما حنان فطلعات لبيتها و بدلات حوايجها لبسات اللباس القديم ديالها و رجعات لهيئة راجل ماكانش كيحساب ليها اترجع فشكل ديال الزوبير ولكن شاءت الأقدار باش تردها للماضي تفكرات حنان و دارت الشعر المستعار و اللحية و ليلونتي و ملابس سوداء و خرجات كوهينور لابسة فبينوار 

كوهينور:(كتشوف فيها ) حنان؟؟ علاش رجعتي لبستي هاكا 

حنان: الزنبقة عرف الحقيقة و راه فقصركم كيقتل فعباد الله و ناوي يقتل باباك 

كوهينور: لاااااا اهئ اهئ باااابااا 

حنان: لبسي حوايجك انمشيو للقصر خاص نوصلك باش تمشي مع باباك لروسيا 

كوهينور:(مسحات دموعها ) واخااا (خدات بعض الملابس من خزانة حنان لبساتهم و هبطو بسرعة خداو طوموبيل و تاجهو للقصر لقاو الدنيا مرونة خرجات حنان و شدات كوهينور مخبعاها من موراها حتى وصلو للباب الخلفي ديال لقصر) 

حنان: كوهينور دخلي و سيري من طريق ديال الكوزينة حتى توصلي لباب الجردة اتلقاي باباك كيتسناك مع الطائرة و ردي بالك من راسك 

كوهينور: و نتي ؟؟ 

حنان: انا غادي نمنع الزنبقة من أنه يوصل ليكم 

كوهينور: (عنقاتها ) شكرا بزااف عمرني نسا خيرك باااي (مشات كوهينور كتسلت ) 

اما الزنبقة فكان خرج للجردة و تلقالو سراج 

سراج: فين باغي تمشي 

الزنبقة: تجمعتو الكلاب 

سراج:(ابتاسم) ماشي ذنبنا الى كنتي نتا ضبع 

الزنبقة: وصل الأجل ديالك و غادي تمووت 

سراج: ماتبقاش فيك فيروز مسكينة اتبقا تبكي على الموت دخوها و نتا مكتبغيش تشوف دموعها 

الزنبقة: ماتجبدهاااليييش حيت كلكم ماتسواوش و كلكم كتستاهلو الموت 

سراج: ماتنكرش بلي راك كتبغيها هههه 

الزنبقة: كيما كتبغي نتا حنان ؟؟ ههه 

سراج: (خنزر فيه) حنااان خط أحمر تقرب ليها نحيك 

الزنبقة: يا سلام شحال حلوة و طايتها كتحمق و شنايفها روطب و جمالها أخاذ هاححح تيقني الى قلتلك بلي قربت ليها ؟ ههههههه 

سراج:(انقض عليه بالبونية ) بعد منهاااااا 

الزنبقة ردلو الكروشية حتى هو و بداو كيضاربو بطريقة شرسة و كل واحد فيهم كيبغي ابين راسو بلي قوي و مكيتهزمش كانت حنان ايضا خرجات للصالة شافت ليكارد ديال الزنبقة و مشات فاتجاههم بدات كتقاتل معاهم و كضربهم بقوة حتى كيسخفو كانت حاسة بلي الجرح ديالها كينزف و لكن ماداتهاش فيه الاهم عندها هو توصل كوهينور عند باها هاد الاخيرة لي كانت كتسلت باش توصل للجردة ولكن قبل ماتوصل للجردة رجعات جوج خطوات لور و شافت جيهت الباب السري و قررات دخل تاخد الجوهرة دارت البصمة ديالها و دخلات بسرعة خدات الكوهينور و حطاتها فجيب دسروالها و خرجات رجعات كتسلت باش توصل للجردة ...كان الزنبقة مازال كيدابز مع سراج حتى جبد المسدس ووجهو ليه 

الزنبقة: طلعتيليا فكري و اللهم تموت 

سراج: (وجهو عامر بالدم و سنانو حتى هوما و كيضحك) صافي عييتي بغيتي تقتلني 

الزنبقة: بدلت الرأي ديالي (ضربو بالقرطاسة جيهت رجلو حتى طاح ) 

سراج:(غوت و طاح شاد فرجلو لي مصابة ) 

الزنبقة: و دابا غادي تموت فوسط هاد لقصر د زب (جبد الزنبقة قنبلة و حطها بعيد شوية على سراج ) بقاتلها ساعة عاد اتنفاجر (دارليه التحية ) سلم ليا على ابليس 

سراج: يووووسااااف غاااادي تندم (بقا سراج كيغوت تماك بوحدو و هو عاجز عن الحركة و كيتألم اما الزنبقة كان غادي فاتجاه الصالة حتى كيشوف رجالو طايحين قدامو و كيشوف فحنان لي كتنهج و ضربات كاع هادوك لي طايحين) 

الزنبقة: شكون نتا ؟ 

حنان:(ضارت عندو و بدلات صوتها ) لي غادي يقتلك 

الزنبقة: انا عاقل عليك شفتك داك نهار فلقصر 

حنان: (ابتاسمات) انا الزوبير الحارس الشخصي ديال كوهينور 

الزنبقة: قوي مع راساتك راه صعييب شيواحد اهزم رجالي (كيصفق) تستاهل نصفق عليك ولكن الى كنتي نتا هنا هادشي كيعني بلي كوهينور هنا 

حنان: ماغاديش نخليك توصل ليها هي غادي تمشي مع باها 

الزنبقة: اوا حاول تمنعني الى سميتك راجل (مشا من حداها بكل هدوء و واثق من راسو) 

حنان:(تنهدات و شداتو من يدو لواتها ليه ) ماغادي تمشي حتى لبلاصة 

الزنبقة:(دفعها و عطاها بكروشية لوجها) قود عليا حسن ليك 

حنان: واخا (هزات رجليها لفوق و عطاتهالو لكمارتو حتى طاح ) 

الزنبقة: اوا صااااف ولينا حتى لبراهش ندابزو معاهم (هز الكرسي و فرشخو عليها) و ضربها بركلة لحجرها حتى تحنات و زاد عطاها ركلة لوجهها طاحت كتبزق الدم ) دابا ماعرفتش واش نقتلك ولا نخليك حي 

حنان: هههه (كضحك بألم) داكشي لي كنت كنفكر فيه واش نخليك حي ولا نقتلك 

الزنبقة:(شدها من يدها لواها ليها ) فين هو معتصم 

حنان:(كتوجع) فكرك ها واحد لزيرو

الزنبقة:(كيزيد ازير عليها) توادع مع يدك (كيزيد ازير عليها) 

حنان:(كتوجع بزااف حتى ضرباتو برجلها لركبو و طلقها و تلوات عليه و طيحاتو فالارض رجع هو لتحت و هي فوقو و كتعطيه بالبونيات بطريقة وحشية و هو رجع رماها و رجع هو لفوق و هي لتحت و كيضربها كذلك حتى جاو ليكارد ديال الزنبقة و شدو حنان و بداو كيضربوها) 

الزنبقة: غادي نخليك دابا مع رجالي انا مامساليش ليك (كيهضر مع رجالو) منين تربيوه مزيان قتلوه 

رجالو: امرك اسيدي 

حنان: (بقات كتشوف راسها فوسطهم و أكيد غادي يديرو فيها مابغاو بقات كتشوف الزنبقة غادي مرة اخرى جيهت الجردة و هي تستسلم و عيطاتلو بصوتها ) يوسف 

الزنبقة:(وقف منين سمع صوتها و ضار كيشوف فيها ) 

حنان: (حيدات اللحية خلات خدودها يبانو و حيدات شعر المستعار و تطلق شعرها البني الطويل على ثنايا جسمها و حيدات ليلونتي وحدة بوحدة ليكارد تصدمو و أكيد الزنبقة ماشي اقل منهم البنت لي كان معجب بيها شوية ولا معجب بيها كثر دخلات لحياتو بلا الاذن ديالو و خربقاتها ليه و خلات فيه الرغبة باش ازيد اعرف عليها كثر و كثر ) 

الزنبقة: هههههههههه و هادشي بزااف (كيمشي فاتجاهها حتى تقابل معاها) كنت عارف بلي من موراك شي حاجا ولكن باش تكوني كتنكري بصفة ولد و كتقاتلي مع رجال عمرني ظنيتها 

حنان: (ابتسامة جانبية) خصك تقتلني دابا حيت ماغاديش نخليك توصل للجردة 

الزنبقة:(هز يدو و دوز الابهام ديالو جنب الفم ديال حنان و مسح الدم ) اي حاجا كتكون غامضة هي ديال الزنبقة(غمزها ) خرجو نتوما (موجه الهضرة لليكارد و خرجو و هو شد حنان من شعرها جرها و رماها قدامو حتى طاحت ) شكون نتي 

حنان: (كتشوف فيه و الشعر مخربق ليها و مليوح على عينيها) الحارسة الشخصية ديال كوهينور 

الزنبقة: فخبارك بلي ليكارد كيموتو باش احميو سيادهم؟ 

…. كانت كوهينور مازال كتسلت وصلات للجردة و فرحات حيت مابقالها و تمشي عند باها حتى لمحات سراج مصاب و كيتوجع مشات كتجري عندو 

كوهينور: سراااج ماالك شنو وقع ليك 

سراج:(كيتوجع) كوهينوور سيري باباك كيتسناك مورا دار هربي قبل مايوصلو الزنبقة 

كوهينور: لا راه حنان اتوقفو خاصني تعاونك 

سراج: الزنبقة دار قنبلة فأي لحظة اتنفاجر 

كوهينور: قنبلة ؟؟؟ فيينهاااا (كتقلب بعينيها حتى لقاتها و مشات عندها) بقاتلها 30 دقيقة و اتنفاجر (رجعات عند سراج كتحاول تهزو حتى تكعد ) غادي نوصلك مع أحد ليكارد ديالي (بقات غادية معاه حتى لمحات أحد رجالها و عيطاتلو و جا دغيا عندها ) 

الكارد: آنسة كوهينور هنااا خطر علييك و حنا راه كنحاولو نخليو الزنبقة و رجالو بعاد 

كوهينور: شووف خود سراج للطوموبيل أو وصلو لدارو انا انرجع بحالي 

الكارد : امرك 

سراج: حنااان باااقااا لداخل هي ماعارفاش بلي كاينة قنبلة 

كوهينور: سييير نتا ماتخااافش على حنان

ركب سراج فطوموبيل و مشات كوهينور كتجري على جهدها حتى شافت حنان بالهيئة الحقيقية ديالها و الزنبقة قدامها و من جهة كتشوف الطائرة ديال باها واقفة و لكن هوما ماشافوهاش و خصها تختار معامن اتمشي واش باها و لا حنان لي خاص تقوليها على القنبلة و تعتقها فجيهة أخرى وصلو رجال الزنبقة حدا الطائرة و بداو اطلاق النار 

موحى: سيدي (كيحميه ) ركب فالطااائرة خاصك تمشي 

معتصم: و كوهينووور 

موحى: حنان ماغاديش تسمح فيها اتبقا معاااهاااا 

معتصم سلم آمرو لله و ركب الطائرة مع موحى و نطالقو بدأ اقلاع الطائرة حتى علات فسماء و قدرات كوهينور تشوفها و عنيها كيسيلو بدموع و كتبكي بحرقة حسات بحال الى باها تخلى عليها و ماقدرش اتسناها حتى شوي مسحات دموعها و دخلات للقصر بشوية حتى وصلات للصالة كتسمع الهضرة د الزنبقة و حنان 

حنان: عارفة بلي كيموتو 

الزنبقة: انا معجب بالشجاعة لي فيك و القوة و الجمال و كولشي فيك ولكن كنت وصيتك من قبل يا اما تعطي تيساع لهاد المشاكل و اما تموتي (حط المسدس على راسها ) 

حنان:(غمضات عينيها ) المووت حسن ليا 

كوهينور:(شهقات و حطات يدها على فمها و دموعها كيطيحو مرة أخرى و بلا ماتحس غوتات و خرجات عندو) ماااتقتلهااااش عفاااك اهئ اهئ اقتلني انا ياك انا لي بغيتيني اذن قتلني 

الزنبقة كيشوف فيها و حنان حلات عينيها بصدمة و ضارت عندها و ناضت كتجري وقفات قدامها كتحاول تحميها من الزنبقة 

حنان: علاااش رجعتيييي علاااش مامشيتيش مع باباك وااااش حماااقيتي 

كوهينور: اهئ اهئ بابا مشا بحالو 

حنان:(كتهضر مع الزنبقة ) الى بغيتيها خصك تقتلني انا اللولة 

الزنبقة:(كيشوف فالساعة ديالو) للأسف لي بغيتو هرب من لبلاد 

كوهينور:(كتهضر مع حنان بشوية ) راه داير قنبلة فلقصر فأي لحظة اطرطق 

حنان:(كتشوف فالزنبقة بصدمة) شنو دابا 

الزنبقة: انجلسو هنا حتى تنفاجر القنبلة و الليرحمكم بقات 5 دقايق (ضار بغا يخرج ) 

كوهينور: صبر الكوهينور انا عارفة بلاصتها و بابا ماعندو باش يفيدك 

الزنبقة : (ضار عندها) الدليل؟ 

كوهينور: خرجنا منهنا و نقولك فين كاينة 

حنان: كووهينوور اش كتقولي 

كوهينور: شنو قلتي ؟ 

الزنبقة:(تنهد ) تحركو قدامي ولكن (رافع السبابة ديدو فاتجاهها) الى كنتي كتكدبي غادي نقتلك 

كوهينور:( كتبلع ريقها) اوكي 

خرجو ابطالنا بسرعة من لقصر و آمر الزنبقة رجالو يخويو من لقصر ركب كوهينور لقدام مع شيفور و شد حنان زدحها لور و ركب حداها و نطالقات طوموبيل … 

حنان: فين انمشيو 

الزنبقة:(ضار عندها) ماشي شغلك 

حنان:(ضورات وجهها جيهت السرجم و معصبة حتى تحط ثلج على ركبتها) 

الزنبقة: حطيه على وجهك باش مايزراقلكش 

حنان: (رماتو ) ماشي شغلك 

الزنبقة:(جبدها عندو حتى حكمها ) هضرتي مكنعاودهاش جوج دلمرات و مكاينش لي كيرد عليا لهضرة 

حنان:(كانت قريبة ليه و كتشوف عينيه و قلبها كيضرب بزااف ) بعد مني 

الزنبقة:(زاد قرب منها و كيهضر بشوية ) ماعرفتش علاش باغي نمص شنايفك و نشبع منهم 

حنان: (حمارت) واش حماقيتي بعد منيي 

الزنبقة:(بعد منها و كيشوف فيها كيفاش تزنكات بقا كيضحك بوحدو شوية سمعو الانفجار لي فالقصر 

كوهينور: (بقاو كيطيحو ليها دموع و مغمضة عينيها لقصر لي تربات فيه و كبرات فيه و عاشت فيه طفولتها هاهو كيتضمر و ايرجع مجرد حطام ) ...

وصلو ابطالنا لدار الزنبقة الفضية لي كانت كلها سوداء و فيها واحد الغموض عجيب هبطو ليكارد و الزنبقة شاد حنان من يدها خرجها بنثرة اما كوهينور خرجات بوحدها رجليها ماهازينهاش أثر الصدمة مازال مأثر عليها و عينيها مابغاوش انشوفو من دموع عطا الزنبقة إشارة لأحد ليكارد و مشا عند كوهينور شدها من يديها مدخلها للداخل للدار و دخلو كاملهم الزنبقة كان كيجر فحنان و هي ماقاوماتوش عرفها بلي عيات و عرقات و من ملامحها باينة عيانة دخلو لوسط الدار شوية شافو امرأة فالاربعينات تحلفو عليها باقا بنت العشرين عندها قوام رائع و شعر بني طويل و عينان سوداء و باينة من الملامح ديالها حنينة و عاقلة و رزينة …

الزنبقة:(طلق من حنان و مشا عندها عنقها ) توحشتك بزااف 

حورية: خمس سنين ماشي ساهلة 

الزنبقة: نتي اول وحدة عيطت ليها فاش رجعت 

حورية: و انا فرحانة لهادشي واخا حسيت بالذنب حيت ماقدرتش نكون معاك فداك المشكل 

الزنبقة: ماتقوليش هاكا خيرك مانساهش و نتي لي صدقتي فيهم كاملهم 

حورية:(لاحظات كوهينور و حنان ) جبتي بنت عمك لهنا ؟ و هاديك شكون ؟ 

الزنبقة:هههه (مشا وقف حدا حنان) بنت غامضة 

حورية: (ابتاسمات) و كل شيء غامض هو ديال الزنبقة 

حنان:(بدأت كتحس بالدوخة و شدات فدراع الزنبقة) 

الزنبقة:(بقا كيشوف فيدها لي شاداه و بغا ينزها و هي دفعو) 

حنان: بعددد منييييي ماتقيسنيييش 

الزنبقة:(كيزير على يديه و يرجع اطلقهم و هاد الحركة كيديرها غير الى تعصب ) حورية خودي كوهينور للفوق و تهلاي فيها مسكينة ليوم خسرات باها و خسرات حتى قصرها 

كوهينور:(مازال كتشوف فالارض حتى جراتها حورية للفوق ) 

الزنبقة: اما نتي احنان خاصنا نهضرو ولكن قبل مانهضرو خاص تداواي 

حنان: تقود لا؟ 

الزنبقة:(جمعها معاها بتصرفيقة) تصلحي فمك لا ؟؟؟ مكنصحكش تعاندي معايا رااااني نقتلك 

حنان:(رداتلو تصرفيقة و هي مخنزرة فيه و كتنهج) ياكما كيحسابليك انا من داك نوع دلبنات لي اتحكر عليهم راك غالط ايوسف انااا طووول عمري كنتقاتل مع رجال فالكاريان انا ماشي بنت لفشوش 

الزنبقة: (شدها من شعرها مقربها ليه) معمر بنت لمرا هزاااات عليا يدها نتي اول وحدة واخا هاكا ماقادرش نعاقبك حيت نتي من داك نوع لي مكيخاف اخسر حتى حاجا نتي بحالي 

حنان: (ابتاسمات) لقيتيني مهلوكة اما نفرشخك هنا 

الزنبقة: تداواي بعدا عاد نشوفو شكون افرشخ لاخر يالاه تحركي قدامي 

حنان: ماغادي نمشي معاك لحتى بلاصة 

الزنبقة:(غوت حتى زلزل الارض) وااااااش ضاااااروووووري خاااااصني نهددكم عااااد تبداو تسمعو لهضرة تفووو (كيهضر مع الكارد) دخل نتا هادوك 

دخل الكارد الشاكمة و حفيظة و هوما كيتنترو و مشات حفيظة كتجري عند ختها عنقاتها 

حنان:(مصدومة حيت طاحلها على نقطة الضعف ديالها) اااش كدييرووو هنااا 

حفيظة: اهئ اهئ جاو هاد رجال خداونا خفت بزاااف احنااان 

حنان: (ضارت كتشوف ف الزنبقة) ختي و محمد ما عندهم حتى علاقة بهادشي طلقهم 

الزنبقة: ماغاديش نآذيهم ايجلسو هنا حتى هوما ولكن الى ماسمعتيش هضرتي غادي نآذيهم 

حنان: مناش مصنوع نتا؟ كنت غالطة فيك 

الزنبقة:(جرها عندو) ماااااادويييييش ماتسمعييينييييش هضرتك حيت نتي اكثر وحدة صدماتني يالاه تحركي قدامي 

جرها الزنبقة و هي كضور كتشوف فختها لي شادينها ليكارد هي و شاكمة مطلعينهم للبيوت ...ماقدراتش تنتر من يوسف حيت خافت على ختها و شاكمة ...طلع بيها لبيتو دخلها و سد الباب و مشا للدوش جاب علبة الإسعافات الأولية و جبد حنان جلسها على النموسية قبالتو 

الزنبقة:(هز قطن و بدا كيديرو على الجروح لي على وجهها) ياكما قسحتك 

حنان: انداوي راسي غير خرج بحالك 

الزنبقة: انا ضربتك و انا لي خاص نداويك 

حنان: كدير هادشي مع كولشي ولا غير أنا 

الزنبقة: غير نتي حيت نتي لي كنآذيها بلا منقصد 

حنان:(طلعات يدها لجيهت القناع لي داير بغات تحيدو) خاصني نشوف حتى انا الكدمات لي فوجهك 

الزنبقة:(بعد وجهو من حدا يدها و رجع كيشوف فيها ) وجهي ماكايشوفو حتى واحد احنان بلا ماتحاولي 

حنان: لهاد الدرجة بوكوص بزاف و خفتي نسخف بكثرة الجمال ديالك 

الزنبقة: هي نتي من النوع لي غير كيشوف زين كيسخف 

حنان: انا من نوع لي مكيحملش رجال اصلا 

الزنبقة: اش هاد التناقض مكتبغيهمش و كتشبهي بيهم 

حنان: دنيا مكترحمش و الى بغيتي تعيش خاص تكون ذيب 

الزنبقة: مقسحة و قبيحة مع راسك 

حنان: و ماعنديش لقلب 

الزنبقة: علاش كنحس بيك نتي الدوا 

حنان: (سكتات و بقات كتشوف فالارض ) ممكن تخرج بغيت نحيد حوايجي 

الزنبقة: (ناض حتى شداتو حنان من يدو) شنو 

حنان: ختي و محمد فينهم؟ 

الزنبقة: قلتلك ماغاديش نآذيهم 

حنان: مكنتيقش فيك شحال من مرة واعدتيني و ماوفيتيش بوعدك 

الزنبقة: أمكن نسيتي بلي قلتلك مكنآذيش ناس الأبرياء اوا هنينا (خرج الزنبقة من الغرفة و سد عليها بالساروت اما هي ناضت حيدات حوايجها و بقات كداوي الجروح لي فصحتها و كتفكر فالزنبقة )

فايت يوسي كيكو وصل اوسمان بالكار و قبل مايهبط فالمحطة خدا نفس عميق و رجليه بداو كيرجفو فأكيد راه سنوات ماتلاقا مع عائلتو و زيد عليها مدابز معاهم و هو مامتأكدش من ردة الفعل ديالهم و خايف ولكن وكل آمرو لله و هبط من الكار كيشوف فجنابو كولشي مبدل و هو غادي فطريق لي كتدي لدارهم الناس كيشوفو فيه و معجبين من الرجوع ديالو كان غادي حاني راسو و قلبو كيضرب حتى كيسم لكلاكسون ديال تراكتور و ضار كيشوف و هو يتصدم منين شاف ولد عمو صغير و لكن فرح بزاف حيت تلاقا بيه وولد عمو ماشي اقل منو هبط عندو و عنقو 

لْحْسَنْ: اوسمااااان(عنقو و هو فرحان) اد لباس غورش مايدا تعاواد كولشي بيخير 

اوسمان: كولشي بيخير لحمد لله ماني مالين الدار اد لباس 

لحسن : كولشي بيخير اوما(اوما هي خويا) شحال هادي ماتشاوفنا 

اوسمان: قالولي تزوجتي مبرووك بعدا 

لحسن: الليبارك فيييك تزواجت ب رابحة وولدات ليا بنت دابا عندها ربع سنين سميتها زهرة 

اوسمان : مبروك اخويانو 

لحسن:(كيجرو) يالاه نركبو نمشيو لتادارت (الدار) 

اوسمان: واخا (ركبو فتراكتور و نطالقو ) كيداير ابا لباس عليه 

لحسن:(تنهد) عمي مبارك من نهار مشيتي و هو ماعاجبو حال و مكيبغي يهضر مع حد 

اوسمان: مازال مقلق عليا 

لحسن: ماتخافش اخويانو ايشوفك و ايصفاو لخواطر و ترجع الفرحة لي مشات حتى خالتي ايطو(الوليدة د اوسمان) مانشفوش عينيها من دموع 

اوسمان: موحال اسمحولي 

لحسن: راه اخويا تقليقة كااينة ولكن المسامحة حتى هي كاينة و يكون خير 

اوسمان: فين سعيد و مراتو فاطنة لباس عليهم و بنتو هنية بيخير عليهم 

لحسن: اودي اخويا سعيد ولد عمنا تعماولو عينيه باغي يحكم باش ما كان و مراتو فاطنة كتزيد تحرشو و تسمملو راسو و هي دابا حاملة و كتبقا تقول فدار راها اتولد الولد و نتا عارف اخويا فعائلتنا حتى واحد فينا مازال ماولد الولد لي يهز سميتنا كولنا ولدنا غير لبنات ولكن واخا هكك بناتنا فيهم الخلوق و ترابي و بنتهم هنية تبارك الله عليها ماخرجاتش ليهم كاع ظرافات و قلبها ماعامرش بالحسد 

اوسمان: شحال فعمرها 

لحسن: فعمرها 16 عام 

اوسمان: كبرات 

لحسن: اوا اخويا راك غبرتي بزااف 

اوسمان : و ختي مايا و ماماك و جداتي لباس عليهم 

لحسن : ختك مايا كبرات حتى هي و لخطاب كيجيو واحد صباح واحد عشية و هي ماعجبها حد اما ماما رآه كيما خليتيها منين مات الواليد الليرحمو مسلمة امرها لله اما جداتنا باقا صغيرة و ديما ضحك و النشاط هههه الحمد لله منين باقي عمي مبارك حي هو لي هاز اومورنا الليطول لينا فعمرو 

اوسمان: امييين 

لحسن:(وقف التراكتور) اوا هاحنا وصلنا لدار الكبيرة 

اوسمان:(بقا كيشوف فدار لي تربا و كبر فيها و عينيه كيبريو و عاطيين بريق ديال الحزن و قلبو كيضرب حيت من مور داك الباب كاينة عائلتو و مازال خايف من ردة الفعل ديالهم ) 

لحسن: اوسمان يالاه ندخلو و مولاها ربي 

اوسمان هبط من تراكتور و رجليه كيرجفو حل بيديه الباب لي كان حلو نهار خرج فمرة و هو مكسور و خايف بزاف احساس صعيب دفع الباب على جهدو حتى تحل و دخل هو و لحسن و كانت رابحة هي و فاطنة كيطرزو و يقادو لمنسج حتى طلعات فاطنة راسها و هي كرشها واصلة لفمها غير شافت اوسمان و هي تشهق 

فاطنة:(عيطات ) خالتييييي ايطوووو اوووسمااان رجع 

رابحة:(هي ماكتعرفش اوسمان حيت فاش تزوجات بلحسن كان اوسمان خارج من الدار غير كيعاودولها عليه بقات كتشوف فيه و ناضت عند راجلها ) سلام 

لحسن: هادي رابحة اخويا 

اوسمان:(ابتاسم ليها ) سلام 

فاطنة:(ناضت بكرشها و جات لعندو) اهلا خويا اوسمان (سلمات عليه) 

اوسمان: فاطنة لباس عليك الليفك وحايلك بيخير و على خير 

فاطنة:(بينها و بين راسها ماحاملاهش و كارهاه و كطلع فيه و تهبط) امييين 

مايا:(خرجات من الكوزينة كتجري منين سمعات لغوات د فاطنة و منين شافت خوها بقات كتبكي و مشات كتجري عندو ) اوسمااااان اهئ اهئ (عنقاتو) خووويااااا اهئ اهئ خوووويااااا 

اوسمان: (معنقهاااا و مزير عليها مابغاش أطلقها ) مايا لباااس عليييك. 

مايا: لااا اهئ اهئ مشيتي كيفاش انكون بيخير 

اوسمان:(مسحلها دموعها ) صافي ماتبكيش هاني جييت 

مايا: إماااااا اوسماااان جااااا 

ايطو خرجات هي و لكبيرة جدات اوسمان 

ايطو:(بقات كتبكي) ممي اهئ اهئ ولدي 

اوسمان:(مشا كيجري عندها هبط عند رجليها كيبوسهم و هي تحنات عندو كتبوس راسو) سمحيلي ا يما سمحيلي (خانوه دموعو و بقا كيبكي و هو كيبوسلها راسها و يديها و رجليها) 

ايطو: شويتيني اولدي اهئ اهئ حرمتيني منك اهئ اهئ 

اوسمان:هاني رجعت ايما و هاد المرة ماعندي فين نمشي انبقا معاك ديمااااا 

لكبيرة: ولدي اوسمان اجي عند ناناك اولدي حتى انا توحشتك 

اوسمان:(مشا عندها باسلها راسها و يديها ) لباس عليك انانا كيبقاولك ركابيك مازال كيضروك 

لكبيرة: لا اولدي منين شفتك برييت و انا مازال نجري و ندردك 

اوسمان: الليطولنا فعمرك 

لحسن: اوا باراكا من لبكا دابا وقت لفرح (ضار كيهضر مع مرتو) راااابحة حطي لغدا 

فاطنة: لغدا مايتحط حتى يجي عمي مبارك و سعيد 

لحسن: واخا انجلسو حتى يجيو 

جلس اوسمان مع عائلتو و هو فرحان حيت وأخيرا رجع عندهم و كيهضر معاهم و يشبع منهم حتى خرجو جوج ببنيتات كانو زهرة و هنية بقاو كيشوفو من بعيد 

مايا : هنية زهرة اجيو 

جاو لبنات و هوما حشمانين زهرة و هنية بجوجهم بنات زوينات بزاف عندهم شعر زعر و عوينات زورق و كيشبهو لمايا غير مايا عندها شعر قهوي 

اوسمان: هنية كبرتي ههه 

هنية: (باستلو يدو ) عمي اوسمان الحمد لله على سلامتك 

زهرة:(بغات تقلد هنية) عمي سوسمان حمد الله على سلامتك (كتعكلها الهضرة ) 

اوسمان: هههه قطيطة لباس عليك 

زهرة: حمد لله 

ايطو: ولدي نوجدلك لحمام و بيتك ترتاح فيه 

اوسمان: لا ايما انتسنا الوليد اجي حتى نهضر معاه

بقا اوسمان كيهضر مع عائلتو و كيعاود ليهم و هوما كيسولوه و كيحاولو يعرفو اخبارو و مامتيقينش بلي راه حداهم و كيشوفو فيه ماهي الا دقائق دخل مبارك هو و سعيد و كولشي وقف كيشوف فيه 

مبارك: (كيهضر مع سعيد) لهضرة كانت بصح ماكانوش كيكدبو 

سعيد: (كيشوف فاوسمان و مشا عندو سلم عليه سلام ناقص) على سلامتك 

اوسمان:( حس بداك السلام الناقص واخا هكك مابغاش يبين راه تقلق ) الليسلمك 

مبارك: ايطو قولي لولدك اخرج منهنا 

اوسمان: إبا بغيت نهضر معاك 

مبارك: انا ماعندي ولد و ماشي باك 

إيطو: مبارك هضر معاه عفاك راه عندو مايقولك 

مبارك: فاش كيهضرو الرجال لعيالات كيسكتو 

اوسمان: اوا خلينا نهضرو راجل مع راجل 

فاطنة:(كتهضر مع راجلها بشوية) هادا لاش رجع

سعيد: ماااعرفتش ولكن موحال عمي يسمحلو راه ماشي ساهلة راه سخط عليه 

فاطنة: الى سمحليه هزنا الما 

سعيد:(خنزر فيها) سكتينا 

مبارك: ماعندي فاش نهضر معاك 

لكبيرة: مبارك هضر مع ولدك 

مبارك: يما ماتدخليش 

لكبيرة:(وقفات) مايدا تيني (اش قلتي ) منتدخلش احتارمني و سمع هضرتي 

مبارك:(تنهد) تبعني نتااا 

طلع مبارك للفوق و اوسمان تابعو حتى دخلو لواحد لبيت فيه البيرو ديال مبارك

مبارك: (عاطيه بظهر) علاش رجعتي 

اوسمان: منكدبش عليك كون ماحتاجيتكش ماكنتش انرجع انا خسرت خدمتي و كاع داكشي لي عندي و جيت 

مبارك: كون ماخسرتيش هادشي ماكنتيش اتجي ؟ 

اوسمان: نتا لي جريتي عليا و سخطتي عليا و انا كنت باغي غير نقرا و نخدم ماغلطتش نتا لي كنتي كتشوف لقرايا حرام 

مبارك: (ضار عندو) كنتي عكازي لي كنتكا عليه و كنرفع راسي حيت نتا ولدي ولكن طيحتي بيا قدام لقبايل لوخرا كولشي كيقول ايت اشهبون هرب عليهم ولدهم 

اوسمان: ماكنتش باغي لحكام و ماكنتش باغي نولي لمير ديال هاد المنطقة كان الحلم ديالي نخدم و نخرج من هاد المشاكيل

مبارك: اوا سير خرج عليا من نهنا مكنعرفكش 

اوسمان: رجعت حيت باغيك تسمحلي على كولشي و تخليني نعيش معاكم و فوسطكم و اي حاجا طلبتيها مني انديرها 

مبارك: و ماغاديش تفكر مرة اخرى تخرج من كيكو ؟ 

اوسمان: الى سمحتيلي عمرني نخرج و انبقا هنا 

مبارك:(عنقو و هو مبتاسم ) مرحبا بيك اولدي فدارك 

اوسمان:(حتى هو فرحان و بادلو العناق ) شكرااا 

خرجو هو وياه من لبيت كيضحكو و كولشي وقف كيشوف فيهم 

مبارك: ايطو وجدي لزردة ولدي اوسمان رجع و ايبقا معانا بغيت كولشي يعرف بلي ولدي رجع و غدا انديرو زردة كبيييرة و نعرضو على كووولشي 

ايطو: يويويويويويووووووي (زغرتات يدو و الفرحة كبرات لحسن و رابحة فرحو بزاف و حتى لبنات فرحو اما فاطنة و سعيد كانو ايقتلو راسهم بالفقصة ولكن ما عندهم مايقولو ماكايناش كلمة كتعلى على مبارك فايت يوسي كولها مشاو لبيتهم نفقوصين) 

لحسن: شفتي كيفاش تفقسو 

رابحة: الليهديهم و صاف 

ايطو: مايا عيطي لعيالات الجيران اجيو اعاونونا 

مايا: هههه واخا ايما 

كملات الفرحة برجوع اوسمان لدارو و كيوجدو لزردة كبيييرة ماكاينش بحالها و هو واخا كيضحك ولكن قلبو مافرحانش بزاف خصوصا فاش كيتفكر انه مظلوم و كيتفكر كوهينور كيحس بالخنقة ولكن حالف بحلوفو حتى يرد دقتو حيت الراجل عمرو كينسا دقتو و عمرو كينسى المرأة لي كواتو فقلبو ...

كان سعيد هو و فاطنة فبيتهم كيتناقشو و ماعاجبهم حال 

سعيد: علاااش رجع ضربلي كولشي فالخوا 

فاطنة:(جالسة و شادة فكرشها ) و عمي سمحلو دغيا 

سعيد : بطبيعة الحال ايسمحلو راه ولدو هاداك 

فاطنة: واماخصوش انسا كيفاش وقفتي معاه و نتا لي كنتي دراعو نهار ماكانش اوسمان 

سعيد: فوقاش اتجي مرت عمي (ام لحسن) هي لي غادي تخرجو منهنا 

فاطنة: مكنظنش راه منين مات راجلها الليرحمو و هي دايرة بحال شي هبيلة 

سعيد: مازال ماجات من ايت حمزة 

فاطنة: باقا عند حبابها دابا تجي غدا (شداتلو فيدو و جلساتو حداها) شوف نقولك واخا جا اوسمان و لكن ماغادي يدي منا حتى حاجا انا راني حاملة بولد و غير غادي يتزاد حنا لي انحكمو 

سعيد: من فمك لربي عرفتي افاطنة و تولدي ليا ولد انعمرك باللويز 

فاطنة: ههه الليخليك ليا 

مبارك: (كيعيط لسعيد من لتحت) سعييييد سعييييد 

فاطنة: نووض عمي كيعيطلك 

سعيد:(ناض كيجري و هبط عندو) نعام اعمي 

مبارك: عيط لقبايل ايت حمزة و ايت حسان و ايت بويلول و ايت لميس و عبد المولى 

سعيد: واخا اعمي و ايت عمر و عبيد؟ 

مبارك: (خنزر فيه) هادوك أعداءنا و ماغااااديييش يحضرو معانا فهاد الفرحة 

اوسمان:(سمع هضرت باه و جا عندو) و انا بغيتهم احضرو ايبا حيت بغيتهم اشوفو بلي رجعت و يضربو لحساب لراسهم 

مبارك: واخا اولدي كيما بغيتي (ضار عند سعيد) اوا سير اش باقي كتسنى 

سعيد: واخا (مشا) 

كانت مايا كتسنط على لهضرة د باها و اوسمان و هي تهز شالها و بدأت كتسلت حتى خرجات من دار و مشات كتجري ماوقفاتش حتى وصلات للواد و جلسات تماك كتنهج و كتنفس ماحساتش حتى تكا على فخادها 

عمر: مال الحوبينو مقلق 

مايا:(دفعاتو) نووض دابا يشوفنا شيواحد 

عمر: ماكاين لي يشوفنا اصلا الواد مامنحق حتى واحد ادخلو من غير ايت عمر و عبيد و (غمزها) نتي 

مايا: وليت خايفة بزاف اعمر الى عرفو عائلتي بلي كنبغيو بعضياتنا راه مشينا فيها 

عمر:(شدلها فيديها) مايا انا وياك عاماين و حنا بجوج و كنقولك نجي نخطبك مكاتبغيش 

مايا: واش منيتك ولا كضحك عليا نسيتي بلي قبيلتنا و قبيلتكم معاديين و خوك لكبير قتل عمي (اب لحسن) 

عمر: و شنووو ذنبي انااا علاش كنتعاقب على شيحاجا مادرتهاش 

مايا: خويا اوسمان رجع 

عمر: اذن كاين حل نقولوهالو و هو ايتوسط لينا حيت هو جا من لمدينة و عارف هادشي 

مايا: غير كيبانلك خويا واخا مشا للمدينة عقليتو باقا مرتابطة بأصلو و غدا دايرين ليه الزردة و سمعت بلي ايعرضوكم 

عمر: هي انشوف حبيبتي فدارهم ههه 

مايا: (حطات يديها على حنكو) عمر لكمتريخ بزاف (كنبغيك بزاف) و عطيتك شرافي و اغلى ماعندي و مابغيتش يفرقونا 

عمر: يالاه نهربو نخليو من مورانا كاع هاد المشاكيل 

مايا: منقدرش غادي يقتلونا 

عمر:(رجع تكا على فخدها) اوا يحلها ربي (تنهد) الله معانا و عارفنا كنبغيو بعضياتنا و هو ايسهل لينا طريق 

مايا : امييين اوا خصني نمشي قبل مايحسو بلي ماكايناش انا فدار و فاطنة كتشوف غير منين تشدني و ديرلي المشاكيل 

عمر: سيري نيشان لدار عنداك نشوفك واقفة 

مايا : واخا 

ناضت مايا دايرة سبنية و مشات كتجري حتى وصلات لدارها و حلات لباب و بدأت كتسلت 

فاطنة: فيين كنتي 

مايا: كنت مسخرة للحانوت 

فاطنة: لحانوت مع لمغرب نسيتي راسك شكون و بنتمن و لا يمكن سبتي بزاااف 

رابحة: فاطنة خلي عليك البنت راه قالتلك تسخرات 

فاطنة: ماشي شغلك نتي هادي راه سابت دابا تجيب لينا شي فضيحة لدار 

مايا: (خلاتها كتغوت تماك و مشات دخلات للكوزينة لقات مها و جداتها كيقادو لكاطو و عيالات جيران كيقادو معاهم و جلسات كتعاونهم) 

فكازا و بضبط فالدار ديال الزنبقة كان متوجه لعند كوهينور دفع الباب و دخل لبيت لي كانت فيها مع حورية هاد الاخيرة بقات جالسة معاها كتواسيها حتى لمحات الزنبقة 

الزنبقة: حورية ممكن تخرجي بغيت نهضر مع كوهينور 

حورية: واخا (خرجات) 

الزنبقة:(كيشوف ف كوهينور) هاد لوجه مايستاهلش اكون مقلق 

كوهينور: كولشي بالفضل ديالك شكرا 

الزنبقة: ههههه هادا غير شوية من بزاف 

كوهينور: شنو باقي مازال مادرتيش حرمتيني من بابا و لقصر لي تربيت فيه شنو مازال باغي دير 

الزنبقة: والو صافي العذاب سالا عطيني الكوهينور و سيري بحالك

كوهينور: (ضحكات باحر من الجمر ) هههههه الكوهينور تضمرات مع لقصر 

الزنبقة: كيفاش ؟؟

كوهينور: الكوهينور كانت فالقصر و لكن نتا فجرتيه و فجرتي معاه الجوهرة 

الزنبقة:(شدها من شعرها و زدحها مع الارض) نتييييي قلتييييلي عاااارفة فييين كااااينة الكوووهينووور كنتي كتكدبي 

كوهينور:(ناضت كترجف) اه كدبت باش تخرجنا من تماك و الكوهينور تضمرات 

الزنبقة:(جمعها معاها بتصرفيقة) علااااااش كتبغيو ضمرو ليااااا حياااتي فالاول باباك و دابا نتي 

كوهينور: (شادة حنكها) باباااا مادارلك وااالووو نتااا كداااب نتا كطيح عليه الباطل 

الزنبقة: (جعر و بدا كيضمر كولشي لي فلبيت و معصب) هاداك لي كنطييييح عليييه البااااااطل كنت كنحسبو باااا حيت هو لي حليت عليييه عيني ولكن طلععع شمااااتاااا قتل عائلتي و ضمر ليا حيااااتي و قلب عليا عشيري و طلقني من مرتي 

كوهينور: باااباااا مكيديرش شيحاجا بحال هاااكاااا نتا كتكدب اهئ اهئ 

الزنبقة:(جمعها معاها بتصرفيقة مرة أخرى و بدا كيعطيها فركل و كيضربها ضرب خااايب حتى سال ليها دم من نيفها ) كنكدددب يااااااك (زدحها مع الحيط حتى تقابلات معاه كتشوف فيه و دموعها تخلطو مع الدم و حيد الماسك لي كان داااير حتى بأن وجهوووو اما هي غوتات من قبح المنظر لي شافت كان وجه يوسف مشوه كولو و منظرو خايب مايقدرش الواحد ابقا اشوف فيه و مشا عندها شدها من شعرها و كيطلع ليها وجهها باش تشووف فيه) شفتييييي باااااك اش داااار كان مخطط بااااش اقتلني و قطع لفران ديال طوموبيلتي كنت رااااااكبهاااا انااااا و فيرووووز و درنا كسيييدة كلفااااتني حيااااتي تشوهت فوجهي و مراااتي منين فاقت مابقاتش باغااا تكمل معايا حيت تشوهت عرفتي شناهي اخونك صاحبك حيت لقا همزة عند واحد آخر لي هو باك و سراج هو لي عطا الكوهينور لباك عرفتي شناهي تعيشي مع تشوه و حتى واحد مايقدر اشوووف فييك عشت خمس سنييين و انا غااابر و ماقاااادرش نخرج عند ناس خمس سنييين و انا غابر فهاد الماسك و قلبي كيبكي دم حيت مابين ليلة و نهار خسرت كولشي 

كوهينور: عفاااااااك صااااااافي اهئ اهئ بااااراااااكا 

الزنبقة: لاااااا شوووووفيييي (غارس صبعانو فالفك ديالها باش تشوف فيه ) شووووفي شنووو دااااار الوحش ديال البااااك و عذريني على الكره دياااااالي (رماها فالارض) 

كوهينور: (طاحت فالارض كتبكي ) و شنووو ذنبي انااا اهئ اهئ ماكنت عارفة واالو علاااااش كتعاااقبني 

الزنبقة: نتييييي بنتوووو و مازاااال اتعاقبي كثر و عرفتي شنو حيت ماخديتش الكوهينور و مادام تضمرات فالقصر انا ماغاديش نقتلك لا (لبس القناع ديالو ) 

كوهينور: شنووو بغييتييي دييير اهئ اهئ 

الزنبقة: غادي نعيشك فلمرااااار غااااادي نردك لعبة فيدي و عبدة عندي و غادي نوري لداك زاااامل دباااك كيييفاااش كيكوووون اللعب (خنزر فيها و عينيه نقطة ددم) غادي نتزوج بيك اكوهينوور و اتعيشي بحال المدلوولة ابنت القحبة 

كوهينور:(طلعات راسها فيه بصدمة و هي مهلوكةبلعصاا) لااااالاااا ميمكنش ماااااغاااادييييش نتزووووج بييييك اهئ اهئ لاااااا عفاااااك ماديرش فيا هااااادشي مابغييييتش 

الزنبقة: ههههههههههه و نزيدك عرسنا غدا فصباح امراتي زوييينة (مشا خرج و سد الباب) 

كوهينور:(تبعاتو و لكن سد عليها لباب و بقات كتزدح فيه ) خرجنيييييي من نهناااااا اهئ اهئ مابغييتكش بعد منيييي مانتزوجش بيييك اهئ اهئ عتقوووووني حنااااااااان اهئ اهئ باااااباااااا فييييينكم (طاحت للأرض) عفاااااكم عتقووووني منوووو 

كانت حنااان فبيتها سمعات لغوات ديال كوهينور و جمعات الوقفة بغات تحل الباب ولكن مسدووود و بقات كدفع فييه 

حنان: يووووووسف حل الباااااب (كدفعو برجلييها) 

حورية:(كانت دايزة من حدا الباب ديال حنان و هي تحل ليها ) 

حنان: (دفعاتها و بقات كضور راسها فدار بحال الحمقة كتحاول تسمع الصوت ديال كوهينور لي تقطع) 

حورية: فييين بااااغاااا تمشي 

حنان؛ فييين هي كوووهييينووور سمعتهااااا كتغوت ياااااكماااا درتووو ليها شيحاجا اللياخد فيييكم الحق 

حورية: اجي معايا هي كاينة فداك البيت(نعتات ليها) 

حنان: (مشات كتجري حتى وصلات عندها و كدفع الباب و كدق ) كوهينووور 

كوهينور: (سمعاتها و زادت فالوتيرة دلبكا) حناااان اهئ اهئ عتقييني 

حورية: اطط نحل ليك لباب (جبدات سوارت و حلات ليها ) 

حنان:(دخلات عند كوهينور لقاتها فالارض و دم فوجهها) كوهينووور 

كوهينور:(عنقاتها) عتقيني عفاااااك اهئ اهئ مابغيييتش نتزوج بيييه غاااادي نقتل راسي 

حنان:(كتحاول تنوضها ) نوضي اجي معايا(وصلاتها لنموسية و نعساتها و تكات حداها ) ماااالك

كوهينور:(كتشهق و كتبكي) غاااادي يتزوج بياااا بغااا يعذبني اهئ اهئ غدا كاين كاين العرس فصباح اهئ اهئ مابغيييتش نتزوجووو احنان اهئ اهئ كون تشوفي وجهو مشوه كاااملووو غادي نموووت الى قربلي انتاحر 

حنان:(حنان مصدومة مامتيقاش بلي الزنبقة غادي يتزوج كوهينور بقات كدوز يدها على شعر كوهينور و كتواسيها) كنواعدك ماغاديش تزوجي بيه تيقي بيا اندير اي حاجا و ماغاديش نخليك ليه ماتخافييش 

كوهينور: اهئ اهئ غادي نموووت 

حنان: صااافي شش غير تيقي بيا صااافي (بقات حنان كدوز يدها على رأس كوهينور حتى حسات بيها نعسات و تسلتات من حداها خارجة مع لباب و حورية كانت حدا لباب ) 

حورية: فين اتمشي 

حنان: بغيت يوسف 

حورية: غادي تلقايه فجردة 

حنان:(هبطات مع دروج حتى كتشوف باب ديال جردة خرجات و لقات يوسف جالس فكرسي ديالو و كيشوف فشيوراق) نتا ماغاديش تزوج بيها 

الزنبقة:(ناض عندها و قف قدامها) قودي لبيتك حيت راااااني معصب بزااااف و ماتخلينيش نغلط فيييك 

حنان:(حمرات فيه و علات صوووتها) وااااش فجهدك دييير كااااع ضربني كيما ضربتيها انا غادي نضرب على راسي اماهي مسكينة لقيتيها ضعيفة و حاط يدك عليييهااااا 

الزنبقة: مازاااال مااااشاااافت وااااالو 

حنان: واش بصح اتزوج بيييهاااا؟؟؟ 

الزنبقة: اه و منبعد 

حنان: (بقات كتشوف فيه بحزن) لهاد الدرجة الحقد عماك 

الزنبقة:(شدها من كتافها كيحرك فيها) نتي ماشااايفاااااش النااار لي شااااعلة فقلبي 

حنان:(نترات يدها منو ) ماغاااااديييش نخليييك تزوج بييهاااا 

الزنبقة: اوا منعيني الى قدرتي 

حنان: واخا هاحنا انشوفو 

الزنبقة: العرس كاين غدا صباح وقتك بدا دابا 

حنان:(مشات نص طريق خلاتو ماجاوباتوش و هي ضور عندو ) بغيت نشوف ختي 

الزنبقة: سيري عند حووورية توريك فين كاااينة 

مشات حنان ساخطة على الوضع اتاجهات عند حورية وراتها فين كاينة ختها و شاكمة و مشات حلات عليهم الباب 

حفيظة:(عنقات ختها ) ختي 

حنان: نتي بيخييير 

حفيظة: اه بيخير 

شاكمة: (عنق حنان) ياكما تآذيتي 

حنان: لا انا بيخير ماتخافوش 

حفيظة: شنو واقع هنا احنان 

حنان: (كتحك راسها ) الزنبقة منين مالقاش الجوهرة قرر اتزوج كوهينور باش اعذبها 

حفيظة: شنااااهو ااااا

حنان: بطبيييعة الحال انا ماغاديش نخلي هاد زواج يكمل 

حفيظة: و شنو فجهدك ديري و حنا بحال بوبيات وسط دارو 

حنان: خاص نهربوها احفيظة 

حفيظة: نهربوها ؟ 

حنان: اه خاص نصيفطوها لشي بلاصة مايلقاوهاش 

حفيظة: امممم خاصني نهضر فتيليفون نشوف واش انجح هاد لبلان ولالا 

شاكمة: اشمن بلان 

حفيظة: انصيفطو كوهينور لبلاصة بعيدة و انا عارفة شخص لي كاين فبلاصة بعيدة (ابتسامة ماكرة) 

حنان: متأكدة بلي بلاصة آمنة 

حفيظة: وي على حسااااابي 

حنان: اوك انا انقلب على شي تيليفون 

حورية:(مبتاسمة) مامحتاجينش تقلبو هاكي تيليفوني (مبتاسمة) 

حنان: وعلاش انتيق فيك 

حورية: هواتف الأرضية مراقبين و الى عرف الزنبقة بلي باغيين تهربو كوهينور غادي يصفيها ليكم اذن هاكي تيليفوني مامراقبش 

حنان: علاش كتعاونينا و نتا فصف الزنبقة 

حورية: حيت نهار كنشوفو غادي فالغلط انحاول نعاونو ولكن نتي عارفة بلي تهريب كوهينور ايكلفك حياتك 

حنان: مستاعدة ندير اي حاجا باش نعتقها انا واااعدتها 

حورية:(رماتلها تيليفون ) اذن هاك 

حنان:(شداتو عطاتو لحفيظة) هاكي 

حفيظة:(خرجات البالكون باش تلقا راحتها فالهضرة) ...

حفيظة:(خرجات البالكون باش تلقا راحتها فالهضرة) الو 

اوسمان:(كان جالس حدا باه و مو كيهضر معاهم حتى جاه اتصال من عند رقم ماعرفوش و جمع الوقفة مشا بعيد باش اهضر ) الو 

حفيظة: اوسمان لباس عليك 

اوسمان: حفيظة؟ اهلا كولشي بيخير 

حفيظة: الحمد لله شوف عندي ليك واحد الخبر 

اوسمان: شنو كاين 

حفيظة: غادي نصيفط عندك كوهينور 

اوسمان:(سمع سميتها و زير على القبضة د يدو) كيفاش 

حفيظة: انعاودلك كولشي (عاوداتلو حفيظة كولشي من الاول حتى لتالي و ماخبات عليه حتى حاجا ) 

اوسمان: الى جات عندي غادي نقتلها 

حفيظة: الدنيا كتقتل بالضحك ا اوسمان حيت كوهينور خسرات كولشي و ليام كتاخد الحق للمظلوم و هاهي اتجي حتى لبين يدك 

اوسمان: (ابتاسم) صيفطيها غدا فالكار قوليلو كيكو و ايجيبها حتى لهنا 

حفيظة: واخا 

اوسمان؛ شكرا بزاف 

حفيظة؛ العفو هادا واجب و حنا أصدقاء (قطعات و خرجات عندهم ) صافي ريكلت الأمور (عطات تيليفون لحورية ) 

حنان: ولكن شنو انديرو دابا كيفاش انخرجوها من دار قدام ليكارد و مايحصلناش يوسف 

حورية: خلي هادشي عليا انا انوصي واحد من رجال اخرج حفيظة و كوهينور من دار بلا مايعيق حد 

حنان: شكرا بزاف 

حورية: كندير هادشي كاملو على قبل يوسف حيت استاهل جزء من السعادة لي محروم منها و مانبغيش اغرق راسو 

حنان: (ابتاسمات ليها و ضارت عند حفيظة و شاكمة ) يالاه. تصبحو على خير غدا انبداو الخطة (خرجات حنان هي و حورية رجعات كل وحدة فيهم لبيتها و بقات حفيظة و شاكمة فنفس البيت) 

حفيظة: انا انعس فالنموسية و نتا نعس فالارض 

شاكمة: و الله لا كانت ليك انعس انا فالنموسية و نتي من شي فالارض 

حفيظة: واش نتا حمق انا بنت و نتا ولد 

شاكمة: كتجيو حتى لحاجا لمعقولة عاد كتحيدو المساواة 

حفيظة: والاااا المساواة فيها و فيها 

شاكمة: (تكا فالنموسية ) حتى انا مامحركش من نهنا اوا موتي 

حفيظة:(تكات حتى هي ) حتى انا ماغاديش نوض يالاه 

شاكمة: على خاطرك عنداك غير تشخري 

حفيظة: بزاف عليك نتا لي كتشخر (عطاتو بالظهر و هاهي الى لحظات امتالكها النعاس و مشات فسبات عميق ضارت و حطات يديها على صدر الشاكمة اما هو حل عينيه بشوية كيشوف فيدها و ضور راسو عندها و مبتاسم و قلبو كيضرب) 

شاكمة: كنبغيك بزاف احفيظة و نقدر ندير اي حاجا على قبلك حيت قلبتي ملكتيه نتي و سلبتي عقلي انا انحاول ندير اي حاجا و انتزوجو انا وياك و نعيشو فدار وحدة انبقا نحيد من راسي و نعطيك حيت انكونو واحد و لموس لي ايدوز ايذبحنا بجوج عمرني نخليك كنواعدك(شبك الشاكمة يدو مع يدها و باسها ليها و هو فرحان حيت ناعسة جنبو و قلبو ايقفز بالحب ولكن القدر ديما كتكون عندو هضرة أخرى و ديما كيفاجأنا بأحداث أخرى عكس داكشي لي خططنا كان ايضا فهد متكي فوق النموسية ديالو و كيتفرج فتصاور حفيظة و علامات الحزن متملكينو عيا مايتسنا فيها و عيا مايحاول اوصل ليها ولكن والو مابغاتش تجي عندو و هو بدأ كيأس شوية صونا على المنتج ديالو) الو 

المنتج: الو واش لقيتي روبي 

فهد: مالقيتهاش و موحال واش انلقاها 

المنتج: ماتقووولش هاكا زيد قلب 

فهد: ماعندي مانقلب عيي بتقلاب و هي مابغاتش تبان 

المنتج: اوووف شنو ادير دابا 

فهد: غدا انرجع لأمريكا راه قطعت تيكي مع 7 

المنتج: ولكن..

فهد: مكاين ما والكن تصبح على خير (قطع فهد و رما تيليفونو و هو ساخط على الوضعية بغا يلقاااها و بغا ياخدها معاه حتى قال بلي تحل الباب لي ايوصل ليها من خلالو و رجع فقد الامل و لكن هو ماعارفش بلي حفيظة عارفة كاع المعلومات عليه و عارفة دارو و فين كاين ولكن ماقدراتش تمشي عندو حيت الوقت مكتسمحش ليها )...

أصبحنا و أصبح الملك لله

كانت الحركة فدار ديال الزنبقة كولشي خدام كيقادو الزينة ديال العرس و المأكولات و التجهيزات كاملها حاضرة و كل واحد داير خدمتو ...كان الزنبقة كيعطي الأوامر باش ماتنقص حتى شيحاجا حتى جات عندو حورية 

حورية: اش كدير ايوسف باش منيتك باغي تتزوج 

الزنبقة: علاه مامنحقيش نتزوج

حورية: من حقك ولكن ماشي بهاد الطريقة 

الزنبقة: (كيهضر باستهزاء) بغيت ندير ولادي و نعيش مع مراتي 

حورية: باراكا من هاد الضحك نتا اصلا باغي تزوج بيها على قبل ترد الصرف لمعتصم ماديرش هاكا اتندم

الزنبقة: ماغاديش ندم 

حورية: (كتشوف ف الدار و التجهيزات) ولاش هاد التجهيزات كاملها ؟؟ و حتى واحد ما يكون حاضر 

الزنبقة: شكون قالك حتى واحد ماحاضر انا عرضت على كاع المافيوزيين و الناس لي كنعرف فالاخير هادا عرسي خص كولشي يحضر 

حورية: لا زدتي فيه 

الزنبقة: (كيشوف ف ساعتو) منهنا ل ثلاثة د سوايع كولشي ايكون حاضر سيري وجدي راسك و وجدي معاك حنان و ختها باش احضرو حتى هوما و هاكي (عطاها فستان زفاف فالاسود ) عطي هادا لكوهينور 

حورية: واش كاينة شي عروسة كتلبس لكحل راحنا فاهمين بلي حياتك كاملها رديتيها بالاسود دارك ، طوموبيلتك، الاثاث و كل حاجا كحلة حاطها فدارك و لكن العروس تلبس فستان اسود هادي ميمكنش 

الزنبقة: راني ماغاديش نحطها فالمزاد العلني رآه غادي تزوج بالزنبقة و هادشي كيعني بلي حياتها اتكون كولها كحلة و اتعيش فالجحيم 

حورية:(خدات الفستان و توجهات لبيت ديال كوهينور حلات الباب لقات معاها حنان كتواسي فيها ) صباح الخير 

كوهينور:(كتبكي ) منين بغا يجي لخير اهئ اهئ 

حورية:(علقات الفستان) 

حنان: شنو هادا 

حورية: فستان العرس 

حنان: انا لي كنعرف الكسوة كوكون بيضا 

حورية: ماعندنا مانديرو هادشي لي بغا الزنبقة 

كوهينور: انا مابغيت لبس لا كسوة بيضا لا كسوة كحلة اهئ اهئ مابغييييتش نتزوج 

حنان: نتي ماغااااديش تزوجي اكوهينور حنا غادي نهربوك 

حورية: ماشي دابا خلي حتى يبداو ادخلو الناس و عاد نبداو الخطة 

كوهينور:(مسحات دموعها ) فيين بغيتو تهربوني 

حنان: انا واعدتك بلي انحميك و مانخلي حتى شيحاجا تقرب ليك لذلك غادي نخرجك منهنا و نصيفطك لبلاصة بعيدة 

كوهينور: فين كاينة هاد البلاصة واش عند بابا ؟؟ 

حنان: لا ماشي باباك منقدروش نصيفطوك لتماك حيت كيما عارفة لقصر تضمر و كاع وراقك تحرقو 

كوهينور: اذن فين؟ 

حفيظة: (واقفة فلباب بدرع باش لقات البيت) اوووف شحااال فيك ديال سوالات ماشي شغلك المهم انهربوك 

كوهينور: (عنقات حنان ) شكرااا بزاااف عمرني نسا خيرك 

حنان: ماتقوليش هاكا خيرك سابق 

كوهينور: ولكن راه الى عرف الزنبقة بهادشي غادي يقتلكم 

حنان: ماتخافيش علينا اندير اي حاجا باش مايوصلش ليك 

حفيظة: نتي متأكدة بلي باغا تهربي؟ 

كوهينور: اه علاه 

حفيظة: غير سولت نخاف متعجبكش لبلاصة لي انصيفطوك ليها 

كوهينور: مكيهمش المهم عندي هو منتزوجش بالزنبقة و اي بلاصة معنديش مشكل 

حفيظة: اوك 

حورية: انمشي نخرج نشوف التجهيزات باش مايحسش يوسف بلي كنخططو بشيحاجا 

حفيظة: و انا انمشي نفيق شاكمة راه شخيرو وصل للموزنبيق 

خرجات حورية و حفيظة و ناضت كوهينور سدات الباب و رجعات تقابلات مع حنان

خرجات حورية و حفيظة و ناضت كوهينور سدات الباب و رجعات تقابلات مع حنان 

كوهينور: ديك الحاجا لي كنت مفتاخرة بيها و كنحس بلي بوحدي لي مالكاها جاني من موراها غير المشاكيل و دابا مابقيتش بغيتها كاع 

حنان: شنو كتقصدي 

كوهينور: (جبدات من جيبها الجوهرة) ماقدرتش نفرط فيها و خرجتها من المخبأ ديالها 

حنان: (مصدومة) اذن علاش ماعطيتيهاش ليوسف ماكانش ايوقع كاع هادشي 

كوهينور: نتي غالطة احنان واخا كنت انعطيهالو ماكانش ايخلينا فالتيقار حيت حالف حتى يضمرني و يضمر بابا و كل واحد آذاه كان ايستخدم الكوهينور كسلاح باش اخلينا عبيد عندو 

حنان: و دابا شنو غادي ديري بيها 

كوهينور:(هزات يد حنان و حطاتلها الجوهرة فيدها) هادي من حقك نتي ولات ديالك ديري فيها لي بغيتي مابقيتش باغاها 

حنان: لا منقدرش 

كوهينور: كنتيق فيك غير شديها عندك 

حنان: نخاف نضيعها 

كوهينور: مكيهمش الاهم هو تحمي راسك بيها 

حنان: (عنقاتها) ماتخافيش عليا ماغادي يوقعلي والو 

كوهينور: مانخافش على الزوبير ههه اما حنان الغزالة نخاف عليها 

حنان: هه الزوبير ديما مع حنان ماتخافيش 

كوهينور: اكون خير قوليلي كيفاش اتهربوني 

حنان: غادي تاخدك حفيظة لشي بلاصة و اتهربك 

كوهينور: نتي ماعارفاش فين 

حنان: لا ماعارفاش هي بوحدها ليعارفة و دابا انتسناو الإشارة ديال حورية باش تخرجو بجوج 

كوهينور: اوك 

...كانت حفيظة كتسركل فالدار و كتشوف التجهيزات و داكشي زوين و مضخم حتى دخلات للكوزينة لقات طباخين كيوجدو الماكلة و الحلويات اشكال و أنواع هزات الحلوة و بقات كتاكل شوية و هي تشوف الزنبقة قدامها و هي تخبع الحلوة موراها 

الزنبقة: عجباتك الحلوة 

حفيظة:(فمها عامر) زوينة زوينة 

الزنبقة: غير كولي ماتخافيش مني 

حفيظة:انا اصلا جيت ناخد كأس دلماء باش نفيق الشاكمة 

الزنبقة: علاش؟ 

حفيظة: كتسولني علاش بغيت كأس دالماء ولا علاش بغيت نفيق الشاكمة

الزنبقة: بجوج 

حفيظة: حيت نعاسو ثقيل و هاكا باش افيق و زيد عليها تعطل فنعاس 

الزنبقة: اااه او وجدو راسكم راه ناس بداو كيجيو 

حفيظة: ممكن نسولك 

الزنبقة: وي 

حفيظة: منين اتزوج اتخلينا نمشيو بحالنا 

الزنبقة: فين باغيين تمشيو 

حفيظة: ماعرفتش ولكن غالبا عند سراج 

الزنبقة: سراج ؟ 

حفيظة: ااه ههه كيبغي ختي بزااف و يمكن بغا يتزوج بيها و انا كنتمنى ليهم كل خير 

الزنبقة: (مشا عمر كأس دالماء و حطولها بالزعاف فوق البوطاجي حتى قفزات) هاهو الكأس سيري فيقي شاكمة (خرج) 

حفيظة: مال هادا تعصب اش قلت كاع اوووف (هزات الكاس و مشات للبيت كتسلت حتى وقفات قبالت الشاكمة و خوات عليه الكأس ناض مفزوع) 

شاكمة: اش وااااقع اش كااااين فييين انا اش هادشي 

حفيظة: ههههههههههههههههه طرت والله حتى طرت (تمرغات كضحك و دموعها نازلين بالضحك) 

شاكمة: تفووو بسااااالة هادي (كيمسح وجهو) 

حفيظة: شفتي كيدرتي ههههههههههههه واااااااالعااادااااو ههههههههههههه 

شاكمة:(ناض مشا لطواليط و هو معصب ) تبرهيش دوالو 

حفيظة: (كدق عليه فالباب د طواليط) خرج راه بغيت نقولك شيحاجااا 

شاكمة: (خرج عندها ) شنو 

حفيظة:(كتهضر بصوت منخافض) ليوم غادي نهرب كوهينور 

شاكمة: انمشي معاكم ماغاديش نخليك بوحدك 

حفيظة: ششش ماعندك فين تمشي بقا مع حنان هنا نخاف توقع ليها شيحاجا و انا انرجع دغيا اوك 

شاكمة: ردي لبال لراسك (حط يدو على يدها ) و منين ترجعي عندي ليك مفاجأة 

حفيظة:( مبتاسمة )شنو هي 

شاكمة:(مبتاسم ) الى قلتها ليك ماغاديش تبقا مفاجأة 

حفيظة؛ اوك ههه انمشي عند لبنات 

شاكمة: اوكي…

….كان سراج كيتمشى على عكاز منبعد ماحيد الرصاصة لي تصاب بيها فرجلو و مشا جلس فالطبلة باش اتغدا و فيروز حداه 

فيروز: مالك مقلق 

سراج: و باش عرفتيني مقلق 

فيروز: قلتلك انا اكثر وحدة كتعرفك 

سراج: عقلي مشوش حنان و كوهينور بقاو فالقصر والقصر تضمر دابا وماعرفتهمش واش باقيين حيين او نن 

فيروز: و نتا مالك فيهم ديها فراسك و فرجلك راه كان ايقتلك 

سراج: مكيهمنيش كون غير قتلني حسن من هاد الشكل لي عيشني فيه من هادشي كاملو كتهمني غير حنان 

فيروز: حنان حنان حنان طيبتيني بيها اسراج تقول غير هي لي بنت 

سراج: كنبغيها بزااف وليت مرييض بيييها و ماقادرشش نعس و لا نفكر بشيوحدة اخرى من غيرها 

فيروز: (قلبات عينيها ) اوووف 

الخدامة:(جات و هي هازة بطاقة فيدها ) مدام فيروز سيدي سراج هاد البطاقة وصلات و هي ليكم 

فيروز: (شداتها) شكرا أمكن ليك تمشي (حلاتها كتقرا و هي مصدومة) الزنبقة عارضنا لعرسو مع كوهينور 

سراج: كييفاااش؟ (طيرلها الدعوة من يدها) علاش بغا يتزوج بيهااا؟ 

فيروز:(كتاكل) الجانب الايجابي فهاد الشي هو ماماتش و حتى حنان اتكون معاها اذن رتاح 

سراج: خاص نمشيو العرس منهنا ساعة 

فيروز: منيتك انا ماغادي نمشي لحتى بلاصة ماعرفتي فخ و بغا يقتلنا 

سراج؛ لا الزنبقة مكيديرش بحال هاكا بانليا الأمر جدي بزاف و حنا خاص نحضرو 

فيروز: علاش بغيتي تحضر 

سراج: باش الى كانت حنان بصح تماك غادي نخرجها 

فيروز: سير بوحدك

سراج: تحركي قدامي اصلا الزنبقة عرضنا غير حيت بغا يوريك بلي نساك و يقدر اتزوج من موراك 

فيروز: اوووف(ناضت ) هاني انمشي نوجد راسي منهنا ربع ساعة نكونو واجدين (طلعات فيروز لبيتها لبسات لبيسة برتقالية و خلات شعرها مطلوق اما سراج فلبس طقم بني و معصبو داك العكاز و لكن ماعندو مايدير هبطو بجوج بيهم ركبو فالطوموبيل و تاجهو للعنوان) ...

وصل سراج و ختو لدار ديال الزنبقة و هو ما متاجهين للجردة كيشوفو الناس حاضرين كاملهم و الدار مزينة بطريقة رائعة و تريتور كيعطيو المشروبات و خدات فيروز كأس و سراج حتى هو 

فيروز: إذن بصح يوسف كيتزوج 

سراج:( كيقلب بعينيه على حنان) مكيهمنيش 

الزنبقة: (كان موراه كيشوف فيه) كتقلب على حنان 

سراج: (دار عندو مبتاسم) ماتفاجأتيش حيت انا باقي حي 

الزنبقة: اصلا القط عندو سبعة درواح مكيموتش دغيا 

سراج: فين هي حنان 

الزنبقة: رولاكس هاهي غادي تهبط مع عروستي(كيشوف ف فيروز) 

فيروز: (كترمقو بنظرات وابتسامات ) اممم جيتي زوين ولكن ماشي بحال نهار تزوجنا 

الزنبقة: راكي عارفة علاش كنت زوين كثر ديك ساعة 

فيروز : يوسف انا ..

الزنبقة:(قاطعها) العدول وصل انا انمشي نجلس حتى تجي كوهينور 

مشا يوسف و هو كاره راسو و مكيحملش اشوف فعينين فيروز حيت كاع المشاعر كيرجعو ليه مينكرش بلي كان كيبغيها و كيحماق عليها خداها و هي بنت 18 و شافها و هي كتكبر قدامو و كتفتح بحال الوردة ولكن للأسف مادارتش بحق العشرة و تربيتو ماشداتش فيها و غدراتو و بقات الكية ديالها فقلبو بحال الندبة لي مكتبراش ..مشا جلس فالكرسي و قدامو طبلة و فجنبو لعدول اما شهود فكانت حورية 

العدول : خاصنا شاهد آخر 

الزنبقة:(تنهد) هادا نهار زوين عندي و مبغيتش اشهدلي اي واحد 

حورية:(لابسة فستان احمر مزير و طالقة شعرها) ولكن انا بوحدي ماكافياش 

الزنبقة:(كيشوف فالحضور حتى شاف الشاكمة) هييه شاكمة 

شاكمة:(كان لابس قميجة بيضة و سروال كحل عطاتهم ليه حورية) انا ؟ 

الزنبقة: كاين شي واحد آخر سميتو الشاكمة من غيرك 

شاكمة: لا 

الزنبقة: اوا تجي 

شاكمة:(مشا عندو وقف) شنو 

الزنبقة: جلس حدا حورية غادي تشهدلي 

شاكمة: ماهازش لاكارط ناسيونال 

الزنبقة: اووووف (مزير على القبضة ديدو) 

سراج:(جا عندو بعكازو) انا عندي لاكارط و راك عارف كنهزها ديما معايا 

الزنبقة: بغيتي تشهدلي 

سراج:(جلس حدا حورية) بطبيعة الحال انشهد لأعز صديق عندي و فرحان 

الزنبقة: اوكي (شاف عند لعدول) الشهود كاينين بقات العروسة (كيشوف فحورية) حورية سيري جيبيها 

حورية: واخا (ناضت حورية بسرعة كدوز من حدا الحضور و كتبتاسم ليهم حتى وصلات للداخل و مشات لبيتها بسرعة هزات جوج لبسات ديال النقاب و توجهات لعند كوهينور حلات لباب و لقات حفيظة و حنان و كوهينور جالسين ) نوضو ماعندناش الوقت (رماتلهم النقاب ) لبسو هادا 

حفيظة: اوكي (لبسات حفيظة النقاب و لبسات أيضا كوهينور كيبانو غير عينيهم ) شنو دابا 

حورية: زيدو طوموبيل كتسناكم 

كوهينور: خفت احصلونا 

حورية: إلى سرعنا ماكاين لي يحصلنا سربيييو راه لعدول وصل و الزنبقة كيتسنااااا

كوهينور: واخا واخا (ضارت عند حنان عنقاتها ) بااااي تهلاي فراسك 

حفيظة:(عنقات حتى هي ختها ) انرجع عندك دغيا أختي 

حنان:(باست كوهينور فراسها) الليسهل عليك (باست حفيظة حتى هي) سيري و ما تخافيش انا انتسناك (طاحتلها دمعة) و إلى جيتي و مالقيتينيش سيري مع شاكمة 

حفيظة: (طاحولها دموع ) شنو كتقولي احنان ماااانقدرش نبعد منك 

حنان: انا معاك ديما وصلي كوهينور و رجعي دغيا 

حفيظة: واخا أختي 

حورية : (شافت ف حنان ) شنو اديري نتي 

حنان: انشوف منين نخرج انا و شاكمة و انبقا قريبة من دار باش الى رجعات حفيظة اتلقاني 

حورية: اوكي وا يالاااااه تابعوني (خرجات حورية ببطء كتشوف واش الأوضاع مزيانة باش اخرجو من البيت ضربات طليلة و عاد عطاتهم إشارة باش اتبعوها بقاو كيتسلتو حتى وصلو لتحت و خرجات معاهم حتى لبرا ولكن وقفهم الكارد) 

الكارد: سمحيلي ميمكنش نخليك تخرجي (كيشوف ف حفيظة و كوهينور بالنقاب ) شكون هادو 

حورية: هادو لبنات لي كانو مكلفين بالحلوة سالاو المهمة ديالهم و خصهم امشيو 

الكارد: الزنبقة قالينا حتى واحد ما يخرج من نهنا حتى يتسالا العرس 

حورية: الى شافك الزنبقة كتهضر معايا بهاد الطريقة و مامخلينيش ندير خدمتي غادي يعاقبك 

الكارد:(كيتفتف) ولكن 

حورية: مكاين ما والكن بالاك من قدامي (دفعاتو حورية و خرجو لبنات من موراها حتى وصلو لطوموبيل عند الراجل لي تافقات معاه حورية) خودهم للمحطة 

الراجل: واخا الآلة 

كوهينور:(شدات فيد حورية و هضرات بشوية) شكرا بزاف 

حورية: في امان الله (ابتاسمات و ركبو لبنات فطوموبيل متاجهين للمحطة اما هي رجعات للجردة جلسات فبلاصتها ) 

....

الزنبقة: فينها؟ 

حورية: خليتها كتلبس 

الزنبقة: واااش هااادااا كاااملو تعطال فاللباس 

حورية: نتا عااارفها اصلا ماباغاش تتزوج بيك اذن هنينا بدرع باش قنعتها 

الزنبقة: اوكي نتسناو ماعليناش 

سراج: هههههههههه 

الزنبقة:(تعصب ) لاااااش كضحك نتا لاش 

سراج: ههههههه كنضحك حيت مابغاتش تتزوج بيك و اصلا حتى وحدة ماغادي تبغي تتزوج بيك 

الزنبقة:(ناض وقف جبد سلاح عندو و شداتو حورية) 

حورية: يوسف صافي بلا ماشاكيل (كتخنزر فسراج) لي برهوش ايبقا ديما برهوش 

سراج: صافي ايوسف ماتقلقش دابا الى قتلتيني ماتلقاش لي يشهدلك فالتالي راه مكاين حتى شيواحد هاز معاه كارط ناسيونال بحالي ههههههه 

الزنبقة:(رجع جلس و مخنزر و كاره الوضعية و هو يغوت ) هااااااادي لاااااش تعطلااااااش سييييري شوووووفييييها احوووورية 

كولشي سكت و سقل و بداو كيشوفو فالزنبقة صوتو الخشن لي فاش كيغوت كيولي بحال زئير الأسد خلاهم يسكتو و ينتابهو ليه و كيتساءلو علاش تعطلات العروسة 

حورية: ششش صافي هاهي اتجي 

عند حفيظة و كوهينور وصلو للمحطة بسرعة و خرجو من الطوموبيل حتى كيعيط ليهم الراجل 

الراجل : صبرو ماتنساوش لافاليز 

حفيظة: اشمن فاليز 

الراجل: عطاتها ليكم مدام حورية (خرجها من الكوفر و عطاها ليهم ) هاني انتسناك هنا ابنتي باش نردك 

حفيظة:(هزاتها ) شكرا (كتهضر مع كوهينور) حورية جمعاتلك لافاليز 

كوهينور: الليكثر خيرها (كتشوف ف جنابها و فالناس و وفالكيران جاها هاد الجو غريب عمرها جرباتو حيت ديما كان عندها سائق خاص و سيارة خاصة بالطبع بنت عاشت حياتها كاملها و هي مفششة و الخدم كيديرولها لي بغاو اكيد غادي تعجب من هاد المنظر ) 

حفيظة: اطط نمشي نقطعلك الورقة ديال الكار (عطاتها لافاليز ) شدي هادي (مشات حفيظة و قطعات الورقة من لفلوس لي عطاتها حورية و رجعات عند كوهينور ) الكار ديالك غادي يقلع دابا زيدي نمشيو دغيا (مشاو للكار و عطاو لافاليز تحط فالكوفر و طلعات كوهينور و رجعات دغيا عند حفيظة عنقاتها ) سمحيلي على كولشي و شكرا 

حفيظة: ماعرفتش واش اتعجبك لبلاصة لي اتمشي ليها ولكن تأكدي بلي اتعلمي بزاف د لحاجات تهلاي فرااااسك 

كوهينور : شكرا بززااااف 

طلعات كوهينور للكار و شدات بلاصتها حدا السرجم و شوية قلع الكار و انطالق اتجاه ايت يوسي اما حفيظة فرجعات لطوموبيل و ركبات باش يردها الراجل لعند دار د الزنبقة لي تقلب رأسا على عقب بداو الناس كيهضرو و كيعلقو على تعطال ديال العروسة و يوسف متحكم فراسو ولكن على شوية غادي ينفاجر و كااااره راسو لأقصى درجة و من هاد الموقف لي تحط فيه شوية ناض وقف 

حورية: فين باغي تمشي 

الزنبقة:انمشي نجيبها (تحرك الزنبقة بضع خطوات حتى كيوقف فالمنتصف مصدوم من داكشي لي كيشوف قدامو و فالحقيقة كولشي مصدوم و كيشوفو فيها لابسة فستان اسود كيبين صدرها و مزير على الخصر ديالها و طالقة شعرها البني الطويل الطايح على كتافها و كتشوف فيه بملامح مكسورة و ايضا قوية و هو كيحاول اشوف فعينيها الخضرين من مورا الفوال الاسود الشفاف و كيراقب حركاتها لي كان باين عليهم الخوف و يديها لي شابكاهم بجوج و كتفركهم ) 

حنان:(هضرات بصوت مرتافع حتى سمعها كولشي ) كوهينور هربات مابغاتش تتزوج بيك 

الزنبقة : كيفاااااش هربااااات (مشا من حداها باغي يلحقها و هي تشدو من دراعو) 

حنان: انا لي هربتها قلتلك ماغاديش تتزوج بيها و انا وفيت بوعدي 

الزنبقة:(شدها من عنقها مزير عليها و مقرب ليها حتى فمها قريب من فمو تحت الماسك و هو معصب و ايطرطق ) علاااااش كنحاول كل مرة مانآذيييكش و كتخرجي قدااامي و كضيعي كاع داكشي لي كندييير 

حنان:(تخنقات ) هاني قدامك قتل قتلني 

الزنبقة: كون بغيت نقتلك كون قتلتك النهاااار فااااااش حطيت على راسك الفردي و لكن لااااا مادرتهاش حيت فايت ليا واعدتك بلي نتي تحت حمايتي (طلق منها) 

حنان: (كترد النفس) حتى انا آذيتك كيما داااارو هوووما و خصك تعاقبني (كتشوف فيه) تزوج بيا انا 

الزنبقة:(مطرطق فيها عينيه ) اش كتقوولي 

حنان: كنتي قلتي ليا ختاري يا اما تكوني عدوتي ولا صديقتي و انا ختاريت نكون مراتك دابا 

الزنبقة:(شدها من دراعها و مزير عليها و كيهضر معاها غير بشوية ) ديك ليلة نسايها احنان كانت لحظة بستك فيها و تسالات 

حنان: و علاش ماقدرتيييش تنساها نتا فين الفرق دابا الى تزوجتي كوهينور و لا تزوجتي بيا 

الزنبقة: انااااا كنت انتزوج بيها غييير بااااش نتاااقم و ضيعتي لياااا كووولشييييي (نترها) 

حنان: هادا كان واجبي انني نحميها 

الزنبقة:(تنهد و رجع شاف فيها ) بصح باغا تزوجي بيا ؟ 

حنان: ندير اي حاجا باش ماتقربش لكوهينور و معتصم 

الزنبقة: الى كان كيحساب ليك اتنقديها مني هاكا انتي غالطة 

حنان:(جبدات من واحد صاك صغيور فالاسود ملفوف على الخصر ديالها الجوهرة و مداتها ليه ) هادي لي كنتي بغيتي 

الزنبقة:(كيشوف فيها و فالجوهرة ) الكوهينور 

حنان: عطاتهالي كوهينور قبل ماتمشي و قالتلي ندير بيها لي بغيت 

الزنبقة: و علاش كتعطيهالي 

حنان: معرفتش ولكن كنظن بلي الى بقات عندك راه مزيان (حطاتهالو فيدو و هي ماقادراش تشوف فعينيه ) و نسا هادشي لي قلت نسا بلي جيت بهاد الكسوة و قلت هاد الهضرة ولكن عفاك بعد على كوهينور 

سراج: (كل كلمة كانت كتقولها حنان كانت لاصقة فالمسامع ديالو و مصدوم و قلبو مجروح كيفاش قدرات دير فيه هاكا و هو عتارف ليها بالحب ديالو لدرجة ان عينيه ولاو حومر و عمرو بدموع كانت كتشوف فيه ختو فيروز و هي حزينة من حالة خوها فجأة هز عكازو و اتاجه لعند حنان وقف بينها و بين يوسف ) حنان ماديريييش هاكا واش نتي حمقة باغا تزوجي بيه هو مايستاهلكش احنااان ماتقدريش تشوفي فوجهو ماتقدريش تجلسي معاه حتى ختي خلاتو حيت راه ماتقدرش تعيش مع واحد مشوه كاااملووو 

حنان: شنو كتقول اسراج الى كنتي نتا و ختك ماتسواوش و كولشي عندكم بالمظاهر انا ماشي بحالكم انا كنعرف يوسف مزيان قلبو كبير واخا كيتعصب 

سراج:(غوت عليها ) نتيييييي مكتعرفييييهش مزييااااان هاداااا احقر واااحد ممكن تشوووفيييه فحياااااتك (رجع تهدن) حنان عفااااك سمعيني انا كنبغيك والله حتى كنحماق عليك ندير اي حاجا على قبلك الى بغيتي نتزوجو دابا ماعنديش مشكل 

حنان:(عينيها عمرو بدموع) مكنبغييييكش اسرااااج و عمرني فكرت فيك اصلا 

الزنبقة:(كان كيسمع الهضرة ديال سراج و قلبو كيضرو حيت كيقول فيه هضرة خايفة ولكن غير كيسمع كيفاش حنان كدافع عليه بحال الى كتعرفو سنين طويلة كيتهدن ) 

سراج: انااااا انصبر معااااك كووولشي بالخااااطر انبقا صااابر حتى يحن قلبك و تبغيني 

الزنبقة:(دفع سراج و شد حنان من يديها جبدها عندو محاوط الخصر ديالها ) الى تزوجتي بيا نساي الفكرة ديال الطلاق نهائيا 

حنان:(طاحولها دموع مع ابتسامة خفيفة) قابلة 

الزنبقة: سميتك الى لسقات مع سميتي اتجيبليك غير المشاكيل 

حنان: قابلة 

الزنبقة: انا مشوه احنان و مازوينش اضيعي حياتك معايا 

حنان: قابلة 

الزنبقة:(عنقها ) حتى انا قابل بيك مراتي على سنة الله و رسوله (شدها من يدها و زاد بيها عند لعدول و جلسها ) تقدر تعدل دابا 

العدول: قلتيلي العروسة ماعندهاش كارط ناسيونال 

الزنبقة: انا انصيفطهاليك من بعد خلي بلاصتها خاوية 

العدول: حاضر وقعو هنا 

الزنبقة:(وقع و هو كيشوف فحنان و اول مرة يحس براسو مرغوب منبعد الحادثة لي وقعات ليه ) 

حنان:(وقعات حتى هي و قلبها ايخرج من بلاصتو ولات مزوجة من راجل عمرها حلمات بيه و لا توقعات اتزوج بيه ) 

العدول: فين شهود 

حورية: انا (وقعات و هي فرحانة ) مبرووووك عليييكم 

الزنبقة: سراااااج اجي وقع بقيتي غير نتا و كيما عارف نتا الوحيد لي هاز كارط ناسيونال و مانلقاش بحالك (كيستفز فيه) 

سراج:(كان واقف بلاصتو مصدوم و مجروح و ضرب الدورة لعندهم بلا ما يشوف فحتى واحد فيهم ووقع و نفسو اتخرج ) 

الزنبقة:(لبس الخاتم لحنان و حتى هي لبساتو الخاتم) مبروك عليك مدام موقاديري و دابا خاص نمشيو من نهنا 

حنان: فين انمشيو 

الزنبقة: انا مكنسكنش هنا كنجي غير مرة مرة فاش كنكون مقلق 

حنان: اه

الزنبقة: حورية سيرو لطوموبيل دااابااا 

حنان: لااا مايمكنش نمشي حفيظة اتجي دابا و ماتلقانيش 

الزنبقة: حناااان نتي وليتي ديالي بووووحدي 

حنان: يوووسف ختي ماعندها حتى بلاصة تمشي ليها 

الزنبقة: حووورية ديها لطوموبيل 

حورية:(كتجر حنان ) زيدي احنان قبل مايتعصب 

حنان: حووورية رااااه ختي هاديييك 

حورية: ماااتخااافيش الزنبقة مكيديرش شيحاجا بلا ميخطط ليها (خداتها حورية لطوموبيل و حنان كتبكي خافت على ختها بزاف اما الزنبقة بقا مع الحضور ) 

الزنبقة: الحفلة سالات شكرا على حضوركم (كيشوف ف سراج) شفتي شحال خايبة تشهد على زواج البنت لي كتبغي هههههه 

سراج:(شدو من الكول معصب ) بلا متحلم بيها لياااام جايين و انجيبها عندي 

الزنبقة: (دفعو) هادشي الى قدرتي تشوفها ههههه (ضار و هو يشوف ف شاكمة مسمر كيشوف فيهم و مشا عندو ) تمشي معانا 

شاكمة: مايمكنش ليا نمشي انتسنا حفيظة 

الزنبقة: حنان كتيق فيك و غادي نتعدب باش نتعامل معاها و خاصني نتا 

شاكمة: و حفيظة؟

الزنبقة:(غوت عليه ) تحرك ولا اتخرج منهنا و نتا ميت

كان غادي الزنبقة من موراه الشاكمة و رجالو حتى كيسمع صوت حنين كيعيطلو و هو يوقف و ضار عندها 

فيروز:(جات قبالتو) يوسف 

الزنبقة: شنو بغيتي 

فيروز: تزوجتي بهاد البساطة بلا متفكر فيا 

الزنبقة: اش كتقولي افيروز 

فيروز: كيما سمعتي (كدير دموع التماسيح) ماسولتيش راسك علاش حتى لدابا انا باقي متزوجتش 

الزنبقة:(ضار بغا يمشي ) مابغيتش نعرف 

فيروز:(شداتو) حيت كنبغييك اه كنبغيك بزاف و نتا دابا ضمرتي كولشي 

الزنبقة: واش نتي واعية بشنو كتقولي اه ولا هادي خطة جديدة 

فيروز: ماكاينة حتى خطة اهئ اهئ سراج جبرني نخليك و نسمح فيك وجبرني نقولك ديك الهضرة اهئ اهئ انا مكنتش باغا نتفارق معاك انا كنت كنبغيك ايوسف لي دوزنا ماشي قليل 

الزنبقة: عفاك افيروز باراكا 

فيروز:(عنقاتو و كتهضرلو فوذنو بشوية) فكر فهضرتي مزيان و اتعرف بلي بصح كنبغيك و كاع هادشي درتو على قبلك 

الزنبقة:(بعدها عليه ببطء و هو كيشوف فيها ضعيف قدامها و ما قادر حتى يكدبها نعل الشيطان و توجه لعند الشاكمة هاد الأخير لي كان كيخنزر فيه ) مالنا

الشاكمة : راك مزوج دابا بحنان ماتنساش راسك انا مانبغيش لي يتفلا عليها 

الزنبقة: راه هي لي وقفاتني 

الشاكمة: و نتا عاجبك الحال 

الزنبقة:(تنهد ) زييد تحرك 

الشاكمة: انا خااايف على حفيظة 

الزنبقة: اوووف طلعتولي فكري بهاد حفيظة حفيظة 

الشاكمة: و شنووو نخليوها هنا 

الزنبقة: صافي رجالي ايجيبوها منين تجي لهنا يالاه تقود قدامي 

مشا الزنبقة و شاكمة من موراه ركبو فطوموبيل لاحقين حنان و حورية و هو كيفكر فالهضرة لي قالت ليه فيروز و شيحاجا تحركات فيه مشاعر حيات مرة أخرى ولكن كينفض هاد الأفكار غير كيتفكر بلي ولا مزوج بحنان لي اصلا ماعارفش كيفاش اتعامل معاها ...و كيفاش ايتعايش معاها و فقلبو وحدة أخرى لي هي فيروز هاد الاخيرة لي كانت دايرة ابتسامة شريرة و كتمسح دموعها و ضارت بغات تمشي 

سراج:(كان سامع حديثها هي و الزنبقة و ملاميحو مزال فيهم الحزن ) منيتك 

فيروز: الحرب بدأت اسراج 

سراج: اش كتقصدي 

فيروز : خاص نرجعو الكوهينور لعندنا حيت ديك الجوهرة خطر علينا و هي عند الزنبقة 

سراج: شنو بغيتي ديري 

فيروز: ههه غادي نخربق حياة حنان و يوسف و غادي ندخل بيناتهم و هادشي ساهل عليا مدام يوسف باقي كيبغيني (حطات يديها على كتف سراج) حنان غادي ترجع ليك تيق بيا 

سراج: لفعة مع راسك 

فيروز: اللفعة مازال مابينات انيابها (كتشوف فيه مطلعة حاجب و مهبطة لاخر مع ابتسامة ) اللعبة بدات و اراك للفراجة 

سراج: يالاه نمشيو الدار خوات و كولشي مشا بحالو 

فيروز: اوكي 

خرج كل من سراج و فيروز من دار الزنبقة متوجهين لطوموبيل حتى كيلمح سراج من بعيد حفيظة هبطات من طوموبيل محيدة نقاب من على وجهها و لابسة غير جلابة و قبل ماتقرب للدار ديال الزنبقة و يشوفوها رجالو مشا فاتجاهها 

فيروز: سراج فين غادي 

سراج: (دارلها إشارة بيدو تتسناه و مشا تاجه عند حفيظة كيعرج و هو كيشوف ف جنابو حتى وصل عندها ) حفيظة فين كنتي؟ 

حفيظة: انا ؟ انا اه كنت غير هنا سخراتني حنان و رجعت 

سراج: حنان سخراتك هههه لعجب 

حفيظة: علاش كضحك و شنو كدير نتا هنا 

سراج: جيت معروض للعرس ديال الزنبقة 

حفيظة: كنظن العرس تلغا 

سراج: لا العرس داز بيخير و على خير 

حفيظة: اش كتقول كوهينور هربات (سدات فمها بيديها) 

سراج: اه كوهينور هربات و هو تزوج بحنان 

حفيظة:(تصدمات) شنو كتقول ؟؟ نتا كضحك عليا ياك 

سراج: مكنضحكش عليك يوسف و حنان تزوجو و مشاو خلاوك حتى من شاكمة مشا معاهم 

حفيظة: لا لا ميمكنش حنان متسمحش فيااااا 

سراج: سمحااات فييك فالاخير شحال قدها ماتصبر عليك حياتها كاملها و هي هازالك الهم من حقها تعيش حياتها 

حفيظة: (مصدومة كيطيحولها دموع) هي واعداتني عمرها تخليني 

سراج: حنان خلاتنا بجوج و سمحات فينا بجوج 

حفيظة:(بقات كترجع بالخطوات اللور و هي مصدومة و شادة فقلبها كيضرها كيفاش ختها لكبيرة خلاتها و سمحات فيها و هوما لي عمرهم سمحو فبعضياتهم هضرة سراج طاحت عليها بحال الصاعقة ...قلبات الدورة و مشات كتجري و هي ماعارفاش فين فقط كتجري للمجهول ...طاحت الشتا و الرعد و البرق زينو السماء و صوتهم كيهز الأرض التفت سراج لعند طوموبيلتو و هو مخنزر ركب فطوموبيلتو حدا فيروز و كينشف راسو من شتا ) 

فيروز: شنو قلتي ليها 

سراج: قلت ليها الصراحة و دابا خليهم كولهم اذوقو العذاب 

فيروز:(ابتاسمات و كسيرات بالطوموبيل اتجاه دارها )

كانت حنان باقا فطوموبيل حداها حورية كتواسي فيها و هي كتبكي و السماء ايضا كتبكي ...بقات كتشوف قطرات المطر كيهبطو على الزاج و قلبها كيضرها و بالها ماهانيش

حنان:(كتهضر بنبرة الم) الشتا كطيييح اعلم الله حفيظة فينها 

حورية: حنان ماتخافيش الزنبقة غادي اجيبها حتى لعندك

حنان:(كتمسح دموعها) و الى ماجابهاش و الى وقعات ليها شيحاجا 

حورية: تيقي فيه 

حنان: مكنتيييقش فيييه و ماباغاش نتيق فيه 

حورية: و لاش عرضتي عليه الزواج من الأساس ؟

حنان:(بقات ساكتا هي براسها ماعارفاش الجواب و هي تبدل الموضوع) فين انمشيو دابا 

حورية: لدار الزنبقة 

حنان: واش بعيدة؟ 

حورية: (ابتاسمات ) وصلنا ليها 

حنان:( لاحظات بلي الشتا تقطعات فاش دخلو لواحد النفق مظلم حلات حنان السرجم كتشوف و معجبة من ليكارد شادين بلايصهم مكيتحركوش ...بقات مركزة حتى كيبان ليها باب حديدي تحل و دخلو فيه عاد بدا كيظهر نور الشمس كأنه مكانتش كطيح الشتا ابدا ..أشعة الشمس مزينة الحديقة المملوءة بورود سوداااء ناذرة و ايضا عباد الشمس بقات مبهوطة حتى من الثماثيل لي كانت على شكل انسان و كيخويو من فمهم الماء باش اسقيو الجردة و زيد عليها كتوسطهم نافورة ماء كبيييييرة مزينينها لآلئ المحار و كتبري و ايضا أشجار فواكه متعددة و اشجار للزينة حسات براسها فجنة هاد الجمال عمرها شافتو و لا سمعات بيه ...وقفات الطوموبيل و نزلات حورية منها اما حنان جا عندها شيفور حل ليها الباب بكل جنتلمانية و حاني راسو كيتسناها تهبط ...بقات كتشوف فيه و هي تنزل فرمشة عين سلباتها جمالية الفيلا لي كتشوف فيها بالرغم من انها كانت كلها مطلية بطلاء اسود الا انها زوييينة بزاااف حتى انها حسن من قصر معتصم …) يا سبحان الله هادشي وااااعر 

حورية: مرحبا بيك فدارك 

حنان: فين حنا عاد من قبيلا شوية كانت كطيح الشتا 

حورية: (ابتاسمات) حنا فمنطقة الزنبقة الفضية الشتا و الريح و الشمش كولشي كيكون على حساب شنو بغا الزنبقة 

حنان: و فين هو 

حورية: راه جاي فطريق هو و شاكمة 

حنان: كييييفاااااش هو و شااااكمة؟ اش كيدير الشاكمة معاه انا وصيتو ابقا تماك حتى تجي عندو حفييظة 

حورية: انا ماعارفة والو احنان 

حنان: اهئ اهئ (حطات يديها على وجهها كتبكي ) الى وقعاتلها شيحاجا انقتل راسي 

حورية:(حطات يدها على كتافها) عفاك احنان ماديريش فراسك هاد الحالة كولشي ايكون مزيان 

حنان:(دفعاتها) حتىىىىى حاااااجااااا مامزياااااان اهئ اهئ هااادشي كولو لي وقع كااان غلطة اهئ اهئ انا غلطت ماكانش عليااااا نتزوج بيه انااااا سباب انا سمحت فالامانة لي خلاو ليا ماما و بابا (كتقطع فلاغوب ) بغيييت نرجع منييين جيييت اهئ اهئ (طاحت فالارض) 

حورية:(كتشد ليها يديها) حنااااان خلي بعدا غير حتى يوصل يوووسف و نعرفو فين كاينة ختك 

حنان: اهئ اهئ غااااادي يعااااقبني حيت ماخليتوش اتزوج بكوهينور اهئ اهئ 

حورية: ماغاديش اعاقبك هو راه خدا جوهرة عمرو يحلم بيها لي هي نتي (ضماتها عندها ) صافي يالاه ندخلو (كتنوضها) 

ناضت حنان و حورية شادة فيها حتى دخلو للدار كانو الخدم كولهم من الصين واقفين قدام الباب و حناو راسهم دارو التحية كما العادات الصينية و دازت حورية من حداهم و كتجر حنان لي كتبكي و مهلوكة حتى وصلاتها للبيت ديال الزنبقة غير فتحات الباب خرجات الريحة ديال المسك هاد الريحة كيحماق عليها يوسف و كيحطها فالدار كاملها ...دخلاتها للداخل و نعساتها فوق النموسية و مشات جابت ليها كينا د رأس و ماء و عطاتها شرباتهم و هي شادالها يدها 

حورية: وااصااافي باراكا من لبكا 

حنان: اهئ اهئ ياك ختي غادي ترجع عندي 

حورية: اه غادي ترجع كنأكد ليك هادشي (كدوز يدها على رأس حنان حتى غمضات عينيها و نعسات) رتاحي 

ناضت حورية و خرجات من البيت مخلية حنان ترتاح حتى كتلمح الزنبقة و الشاكمة داخلين مع الباب و مشات عندو بسرعة 

حورية: فييين كنتي ايوووسف 

الزنبقة:(عطا إشارة للخدامة جات عندو و هو يهضر ليها بالصينية) خودي الضيف لبيتو وجديلو الحمام و حوايجو 

الخدامة: حاضر 

الزنبقة: سير لبيتك الخدامة اتمشي معاك (كيهضر مع شاكمة ) 

شاكمة: واخا …(مشا) 

الزنبقة: شنو مالك فين هي حنان 

حورية: حنان راه فبيتك من قبيلة و هي كتبكي بغات ختها راه اتسطا 

الزنبقة:(تنهد) انا وصيت رجال اجيبوها لهنا منين تجي لدار

حورية: صوني ليهم راه من قبيييلة خرجات من دار باش توصل كوهينور للمحطة 

الزنبقة:(خنزر فيها) فيروز ماتقوليش ليا نتي لي عاونتيهم (تنهد) بطبيعة الحال نتي و شكون من غيرك لي ايستر عليهم و يعاونهم

حورية: اه اه انا لي عاونتهم مايمكنش ليا نشوفك كدير خطأ بحال هادا و نجلس مربعة يدي و كنتفرج 

الزنبقة: اذن نتي لي قلتي لحنان تلبس الكسوة و تجي تزوج بيا؟ 

حورية: لا انا كنت ناوية نهربهم كلهم و لكن حنان منها لراسها دارت هادشي 

الزنبقة: واش نتي معايا ولا ضدي 

حورية: بطبيعة الحال انا معاك ايوسف ولكن راه كنتي كتغرق راسك براسك كون تزوجتي بكوهينور كنتي غير اتعذبها و تعذب راسك 

الزنبقة: و شكون قالك ماغاديش ندير نفس الحاجا لحنان 

حورية: ابدا مايمكنش حيت البنت مادارتلك والو بالعكس جات عطاتك الجوهرة و تزوجات بيك 

الزنبقة: انااااا مااازااال اصلا مافهمتش علاش دارت هاكا 

حورية: تقدر تكون كتبغيك 

الزنبقة: هههههههههههههه كضحكي عليا احورية واش منيتك اتبغي واحد عمرها شافتو 

حورية: شي مرات مكنحتاجوش نشوفو شيواحد باش نبغيوه راه نقدرو نبغيوه غير من الافعال ديالو 

الزنبقة: شنو اندير معاها دابا ماعارفش كيفاش نتصرف معاها 

حورية: عاملها مزيان هي ماعندها علاقة بهادشي 

الزنبقة: (جبد تيليفون ديالو صونا على رجالو لي خلاهم فديك دار باش اجيبو حفيظة) لقيتوها 

...سيدي راه ماجات حتى بنت لهنا منين مشيتو 

الزنبقة: وااااش كضحك عليااااا خليييتكم تماااك بااااش تجيييبووهاا كيفاااش ماجاااتش

...من صباح و حنا هنا ماجاتش

الزنبقة: اللينعل طواااسلمكم اولااااد القحااااب معول على شماااايت و زواااامل بلااااا ماترجعو عندي الى كنتو باغيين تعيشو (قطع) 

حورية: شنو وااااقع؟ 

الزنبقة: ماجاتش كاع عندهم 

حورية: اوييلي شنوووو انقووولوو لحنان دابا 

الزنبقة: وا تمشي تشوووف فين صافطات ختهااا 

حورية: يوووسف ماتعاقبهااش على شيحاجا انا سبابها خصك تلقا ختها راها اتحماق 

الزنبقة: اوووف(خلاها تماك و مشا للجردة بغا يبرد راسو حيت معصب بزاااف و الى بقا فدار ايزيد اتعصب مشا للاسطبل خدا الخيل ديالو لي رباه و هو باقي صغير غير شافو و بدا كيجري فالاسطبل بالفرحة حيت شحال هادي ماجا عندو ركبلو السرج و شدو كيمسح على شعرو) حتى انا توحشتك بزااف شنو بانلك نمشيو نضربو شي ضورة شمش بدات كتغرب و هادا هو الجو لي كيعجبني (ركب يوسف على الخيل ديالو و نطالق بيه كيجري حتى بعد على الدار عاد بدا كيمشيو بشوية و هو كيفكر فحياتو لي مخربقة و فحنان مامتيقش بلي تزوج صافي ولا مسؤول عليها و خصو يحميها من اي حاجا و لكن كيبتاسم غير كيتفكر كيفاش كانت متنكرة بصيفة راجل و كضارب معاه...جمالها الاخاذ و قوة شخصيتها عجبوووه بزاااف و هو كيحماق على المرأة القوية ...ولكن سرعان ماتلاشات ابتسامتو غير تفكر كلام فيروز و قلبو ضرب ماعارفش شنو يدير تخربق و كيتمنى يلقا لحل لراسو حيت بزااف هادشي لي راه فيه ...طاح الظلام و رجع الزنبقة للاسطبل حط الفرس ديالو و عطاه ياكل و خرج مشا للفيلا دخل لبيتو لقا حنان ناعسة و فطرف عينيها دموع مشا للدوش حيد حوايجو و تخشى تحت الرشاشة دوش و خرج لابس بينوار و كينشف شعرو حتى وقف قدام المراية كيشوف فوجهو لي مشوه و عينيه فيهم الحزن و حرك النظر ديالو فاتجاه حنان كيشوف فيها و يعاود اشوف فوجهو ) شكون انا حتى نستاهل وحدة آية في الجمال بحالك كيفاش انقدر نعيش معاك و نبغيك و انا ما قادر نبغي حتى راسي غادي نظلمك معايا غادي غير تعذبي و نتي تستاهلي ماحسن(نطق يوسف بهاد الكلام جراء قلبو المجروح مشا لدريسينغ جبد بودي فالابيض عندو القب و سروال كيطما فالاسود و جبد قناع دارو على وجهو و مشا جلس جنب حنان كيشوف فيها طلع يدو و بدا كيدوز صباعو على حنكها و كيشوف وجهها لي بلا نقطة ماكياج بالعكس طبيعي و فيه نذوب من الضرب لي كانت كتاكل ابتاسم و هو مازال كيحرك يدو على حنكها حتى شبع الشوفة فيها و ناض بغا يمشي و هي تشدو من يدو و بقات كتحل عينيها شوية بشوية ) 

حنان: ختي فينها 

الزنبقة: (ماعرفش باش اجاوبها و هو يكدب عليها) دابا يجيبوها ماتخافيش 

حنان:(تكعدات و شادة فراسها كيضرها و كتشوف فيه بعيون حزن) انا خايفة عليها 

الزنبقة: هاد لعينين من ديما كنشوف فيهم القوة مانبغيش نشوف فيهم الضعف

حنان:(هبطات راسها) ولكن…

الزنبقة:(طلعلها راسها بصباعو و كيشوف فيها ) مراتي كنعرفها ديما قوية و ماعاشش لي يكسرها صافي ؟ 

حنان: (حركات راسها بالموافقة) 

الزنبقة:(كيشوف فثوب الزفاف و كيهزو فيديه) علاش قطعتيه 

حنان: (ارتابكات) كنت معصبة و قطعتو 

الزنبقة: مكانش خاصك تقطعيه راه نتي اول عروسة كتلبس فستان كحل ههه 

حنان:(ابتاسمات) اه 

الزنبقة: نوضي دوشي انا انعطيك شيحاجا من حوايجي حتى لغدا و نوصيهم اجيبولك لحوايج

حنان: واخا (ناضت كتعكل فالفستان حتى وصلات للدوش و دخلات سدات الباب و حيداتو بانو المفاتن ديالها و دخلات تحت الرشاشة رادة عليها الخامية و جلسات كتغسل شعرها بالشامبوان اما الزنبقة مشا جاب ليها قميجة ديالو فالاسود و دخل عندها للدوش علقها ليها فالعلاقة و هو كيشوف الظل ديالها مور الخامية و كولشي باين صدرها واقف و كبير و ليهونش و خصر نحيييف هبط راسو بسرعة و خرج من الدوش زادح الباب و هي قفزات فبلاصتها شللات صحتها و لوات عليها فوطة و نشفات راسها بسرعة شافت القميجة معلقة و بدات كتشوف كيفاش اتلبسها بلا دوبياس حشمات ولكن ماعندها مادير لبسات القميجة و خرجات كتنشف شعرها و لقاتو واقف قدامها كيشوف فيها و كيطلع فيها و يهبط) 

الزنبقة: حنان خصك تعرفي شيحاجا 

حنان: شنو 

الزنبقة:(جلس فالناموسية) اجي جلسي حدايا 

حنان:(مشات جلسات حداه و هي كتسمع ليه) كنسمع

الزنبقة: انا...انا (تنهد) منقدرش نقيسك ولا نقرب ليك 

حنان: مفهمتش 

الزنبقة: صحيح حنا مزوجيش ولكن انا منقدرش نكون راجلك بصح 

حنان: ااااه هههههه 

الزنبقة: علاش كضحكي قلت شيحاجا كضحك 

حنان: لا ههه غير راه انا مامستاعداش اصلا و ماعارفاش شنو هو زواج كاع 

الزنبقة: شوفي كاع الحقوق ديالك غادي نديرهم ليك من غير نعاس منقدرش 

حنان: علاش 

الزنبقة:(خنزر فيها) 

حنان: لا زعما قصدت واش كاين شي سبب (كتعض لسانها) 

الزنبقة:(هبط راسو) غادي تكرهي راسك الى نعست معاك 

حنان: (فهمات ولكن بغات طول معاه فالهضرة) واش لهاد الدرجة كنبان ليك زوينة 

الزنبقة: بطبيعة الحال نتي زوينة بزاااف و ماشي بحالي 

حنان:(ابتاسمات و حطات يديها على يديه) سمعني ايوسف انا حسبني غير عشيرك ههه حيت بيني و بين الانوثة غير الخير و الإحسان انا راه مرجلة على شيوحدين و ماغاديش تلقا معايا المشكل ماغادي نطلب منك حتى حاجا و مابغيت حتى حاجا حيت راه حياتي كاملها و انا عايشة بحال الولد تصروفاتي و هضرتي و طريقة لباسي و تفكيري بحال دراري داكشي علاش عذرني

الزنبقة: ريحتيني دابا هههه اعشيري 

حنان: و حاجا اخرى انا مكنهتمش بالمظاهر انا بسيطة بزاف ماغاديش تلقا معايا المشكل

الزنبقة: انا تايق بلي انرتاح معاك 

حنان: (ابتاسمات) شكرا 

الزنبقة: علاش 

حنان: حيت قبلتي تزوج بيا كون ماقبلتيش ماكنتش عارفة شنو اندير 

الزنبقة: حتى كون ماتزوجتش بيك ماكنتش انخليك حيت فيك شيحاجا مختالفة بزاف نتي حسن حتى من الكوهينور براسها و كنت قلتهالك شحال هادي اي حاجا غامضة هي من نصيب ديال الزنبقة 

حنان: (توردو حناكها و هبطات عينيها فالارض) 

الزنبقة: (بغا زييد ازنكها ) و حاجتي خصني نخبعها دابا 

حنان:علاش 

الزنبقة: باش ماياخدكش ليا سراج ههه السيد كيحماق عليك 

حنان: بقا فيا واخا هكك 

الزنبقة: ابقا فيك راسك ابب هاداك انا لي عارفو عندو لبنات بحال اللعب 

حنان: ماشي شغلي فيه 

الزنبقة: و كنشكرك حتى انا حيت كنتي كدافعي عليا قدامو هه حسيت براسي 

حنان: قلت غير لي كاين 

الزنبقة: (وقف ) انمشي نعس انا عييت ليوم بزاف 

حنان:(وقفات) فين اتمشي هادي راه بيتك انا لي خاص نمشي 

الزنبقة: لا غير رتاحي انا غدا نقل حوايجي لبيت لوخرا كاينة غير حداك نيت 

حنان: واخا 

الزنبقة: تصبحي على خير 

حنان: و نتا بالف خير 

مشا يوسف لبيت لي حدا حنان و نعس منبعد ما حيد الماسك و حس براسو مرتاح حيت حنان تفهماتو و حتى هي كانت مرتاحة حيت ماكانتش قادرة على هاد الخطوة و نعسات و هي كتفكر ف حفيظة و كتمنى غير فوقاش تجي عندها ..

يتبع...