الله على راحة ... حسيت براسي كنت ضايعة وماعارفاش اشنو بغييت ولا فين نرتاح وماكنتش عارفة باللي خاصني على الاقل نصلي واخا انا مسلمة غير بالسمية ومعتارفة بالدين ديالي لاكن كنت كندير شي افعال زادو غرقوني بالهموم وزادو غرقوني فمصاىب اخرى وغير غادية وماعارفاش شنو كندير وتايهة ومخايفة من حد وحياتي مجلوطة ماعندها اساس ولا نضام ولا طريق تشدها . لاكن من بعد دوك جوج ركعات اوطوماتيكمو حسيت براسي بنادم ولقيت نفسي والهدوء اللي كنت كنقلب عليه ورتاح قلبي والضيق اللي كان فصدري انزاح والحمد لله عرفت شنو بغيت وشنو خاصني ندير وشنو ماخاصنيش ندير واخا الدنيا كتغويني ومزالة باغة نطلق الشعر وباغا نعيش الحياة لاكن قلت على الاقل منفرطش فالصلاة حيت لقيت راحتي فيها ورجعت الى جلست غير شوية مور توقيت الاذان كنتشوش وكنحس بشيوحد كينخزني ومكنهدا ونرتاح حتى نصلي .. فالاول جاتني صعيبة ماولفتش كنت كنجمعها ويبقا عقلي مشطون وقلبي مقبوط حتى كنصلي ومن بعد شوية بشوية رجعات عندي غذاء مهم لروحي الى ماصليتش منقدرش ننعس ومقدرتش نرتاح وبقيت على حالي شهر كامل زدت تعلقت بالصلاة اكثر رجعات شي حاجة مهمة عندي ابدا واش نقدر نخليها ومجرد التفكير انني شي نهار نقطع كيخليني نحس بتأنيب الضمير ونتخنق . كانت آنا ديما كتشوفني كنصلي وكتسولني علاش كنصلي شنو كنلقا فيها كل شوية نايضة نسجد .. قلت ليها من نهار بديت الصلاة تبدلات معاها حياتي وليتي مرتاحة وحتى الموت مابقيتش كنخاف منها ومابقيتش كنضرب حساب لحتى حاجة وبديت كنعاود ليها على احساسي ليوم غدا ليوم غدا وديما كتفرج فيا حتى لواحد النهار قلت ليها اجي جربي معايا ورحبات بالفكرة وسولتها واش نقية ومن بعد وريتها كفاش كنتوضا تبعاتني خطوة بخطوة وقلت ليها ماتحزقش حيت الحزاق كيخسر الوضوء والنضافة الخاصة بالصلاة وفسرت ليها شوية من داكشي اللي كنعرف واخا حتى انا مكنعرفش بزاف فالدين غير شي شوية ولبستها بحالي وقلت ليها تبعي شنو كندير باحساس يكون تايق بإن الله كاين وبإن الله هوا اللي غيرسل لينا واحد الراحة وواحد الطمئنية فاش نساليو الصلاة وديري النية وبقيت كنشرح ليها على قد عقلها باش تفهمني وصلات معايا وقالت ليا فالاخير باللي جاها واحد الاحساس غريب ولحمها شوك وقلت ليها تبعي احساسك ، ومن تما فين ما نجي نصلي كنجرها معايا حسيت بيها تقدر دير شي حاجة من بعد وبمجرد التفكير ديال انني نقدر نخليها تسلم كنتبورش وكنحس بواحد الاحساس غريب . رجعت كنبحث فالدين على قبل باش نشرح ليها ونفسر ليها شكون هوا الرسول وشكون هوا الله وكانت مكتآمن بحتى واحد ملحدة اصلا وقلت ليها انا كنت بحالك واخا ماشي ملحدة لاكن كنعرف الله والرسول (ص) وماكنتش كاع متبعة الدين مكتفكرش بمرة فيه عير الصيام اللي كنصوم وبلا صلاة وشي مرات كنقول واش فعلا كاين الله ولا اسطورة وصدقناها وقلت ليها باللي كنت فواحد الهاوية وماعارفاش راسي ووصلاة بيا الدرجة حتى وليت نشك حيت تماديت وغرقت وكنزيد نغرق لاكن من بعد ما رجعت للطريق وتبت عرفت راسي شكون وعرفت راسي علاش وقع ليا هادشي كامل وشنو اللي خلاني نمشي فديك الطريق بلا متوقف لولا هاد السقطة اللي سقطت وعطيت وعد لنفسي عمرني نتمادى مرة اخرى وحتى السحور عمرني ندمت عليه حتى فقت من القلبة وندمت اشد الندم حيت ربي كيغفر كولشي الا الشرك بالله وكندير مجهود ونطلب الله فالدعاء ديما باش يغفر ليا . بقيت على آنيتا كندخل ليها احساس المسلم ونقلب على باش نجاوبها على اسئلتها وبغات تعرف شنو اللي خلاني نتيق ان الله كاين . خصصت ليها حصة وطلبت تيليفونها فواحد البيكنيك ودخلت كنقلب على المعجزات اللي كاينين فالقرآن وشي حوايج مذكورين عاد كيفاش اكتشفهم العلم والاعجاز وبديت نوريها دقة دقة شي حوايج اللي انا اصلا ماكنتش عارفاهم كن ما اسىلتها اللي خلاوني نبحث . دوزنا واحد المدة كنهضرو على هادشي ورجعات كتبغي تصلي معايا ودرت مجهد كبير باشز قدرت نوصل ليها العبر والتفسيرات اللي ماعندي بيهم حتى دراية ونضل نبحث باش نوريها ونفقه راسي حتى انا حتى لواحد النهار كنا فبيكنيك قالت ليا شيماء .. انا بغيت نسلم ..بحالك ونصلي ونقرا قرآن ونصوم .. رتاحيت وعجبني دينكم بغيت نعرف الله اكثر ونعرف الرسول واش تقدري تعاونيني؟
فاجآتني حسيت بقلبي تحل وصدري انشرح ميمكنش على احساس جاتني البكية ودرت يديا على نيفي وفمي كنشوف فيها وعيني مغرغين قلت ليها مقادراش نتيق ... آنيتا بغيتي تسلمي؟!!!
قالت ليا اه بغيت نسلم نتي كنتي مريضة بفضل الصلاة وليتي مزيانة احسن من الدوايات يعني دينك صحيح ومية فالمية صادق ماشي مشكوك فيه
بلا منشعر عنقتها كنبكي ونضحك قلت ليها دااابا غنمشيو نقلبو على الجامع .. غادي يكونو هنا المسلمين وعندهم مساجد ضاروري .
مابغيتش نضيع الوقت ماحد مزالين مخشعين انا وياها نضنا ديك الساعة خلينا البيكنيك وهزينا سلتنا مشينا كنقلبو ونسولو حتى لقيتا واحد الجامع صغيور بحال شي محل فالدخلة ديالو ومتيسع شوية من لداخل ودخلنا قلبنا على الامام ، اول حاجة عطاها لينا هي كسوات طوال وحجاب تغطينا فيه وعطا لآنيثا قرآن مطرجم للفرنسية وبدا كيهضر معانا ويشرح لينا وفرح لآنيتا وقالي الحسنة اللي غادي تاخدي فصاحبتك كبيرة بزاااف وكنتمنى متفرقيش معاها حتى تشبت بدين الاسلام اكثر ولكي في ذلك اجر ان شاء الله .قلت ليه صافي مغاديشز نتفرق عليها وبدا يعطيها معلومات ويرشدها حتى شافها اقتنعت مزيان ونطقها الشهادة وانا يدي على فمي كنشوف باغا نبكي .. نطقاتها وقالينا كاينين اخوات لتحت نزلو عندهم ورحب بيها فالدين ونزلت انا كنعنقها كل شوية عمرني فرحت شي فرحة بحال هادي فحياتي .. غير دخلنا لمسجد النسا كامو ربعة ديال النساء جالسين من مختلف الجنسيات رحبو بينا بالحليب والتمر وفرحو ماقداتهم فرحة وجلسنا معاهم زادو حببونا فالدين وتأكدت انني كنت نسلمة غير بسمية وصافي اما انا بحالي بحال آنيتا التختلاف هوا انها معتارفة باللي مكاين حتى الاه وانا مسلمة بالفطرة ومعتارفة بالله وبالرسول لاكن لا اطبق من ذلك شيءا من غير الصيام فقط
الاخوات كان ليهم تأثير كبير عليا وعلى انيثا وسولونا واش كنصومو واش كنصدقو واش محجبات .. هضرت انا قلت ليهم صدقت ولاكن ماشي بزاف والصوم كنصوم وانا مسلمة لاكن بلا افعال .. هادشي شحال هادي طبعا .
اما انيثا عرفوها يالاه سلمات وبداو يعضرو معانا هداونا كسوات طوال والحجاب معاه لاكن مابغيتش نديرو متسخيتش بشعري مزال باغا نطلقو ونفرح بيه ونلبس .. اما انيثا فاقتنعت فاش قالو ليها ديري الحجاب وتصدمت فاش قبلات بصدر رحب وبغات تبع الدين على حقو وطريقو .. تراجعت على فكرتي وبقيت كنشوف قلت شووف هيا اللي كانت ملحدة وفاش قررات تسلم ماهمها لا شعر طلقو لا والو بلعكس كتسول على اللفة كيفاش تبقا دير ليها ماشي بحالي قنعت بالصلاة وصافي .. جاني تأنيب الضمير عاوتاني .. قلت مع راسي الحجاب غيخنقني ولباسو مكنحملوش وغادي يجيني فشكل وبقيت كنفكر هاكا حتى سولاتني وحدة من الاخوات علاش مابغيتش الحجاب وقلت ليها مامرتاحاش مزال ما اقتنعت .. حاولات تفسر باللي الحجاب ماشي باش نخنقو راسنا وانما نسترو راسنا ونبدا بالسترة شوية بالشوية ونستر شعري ونتبع الستيل اللي بغيت المهم نستر راسي ونغطي شعري وصدري وبقيت مترددة فالاول لاكن فاش شفت انيتا اقتنعت مية فالمية لقات راحتها ونعلت الشيطان واخا فالاول جاني صعيب مابقيت عرفت مانلبس وانا كنموت على الشراوط وتلفت ودخت مالقيتش فيه راحتي وفين ما تبان ليا انيتا غادية جايا فالمصحة لابساه كنتعصب ويأنبني ضميري ونعاود نديرو ... بقيت على ديك الحال واحد المدة كنحاول نتعلم ليه ونولفو حتى عندي الطبيب قالي راه حالتك تحسنات تقدري تاخدي تيليفونك وعطاه ليا شديتو طرت بالفرحة ... شحال بيني وبينو توحشتو بزاف وشعلتو اول حاجة درتها عيطت لماما هصرت معاها بالفرحة وتصدمات فاش سمعات صوتي ديك الساعة بدات تبكي فتيليفون قلت ليها انا قريبة نجي راني فررنسا وبديت نسول على احوالهم واحوالها قالت ليا توشحتك انا مسامحة ليك ابنتي غير اجي .. قلت ليها علاش شنو درت؟
نسيت شنو درت وعلاش قالت ليا مسامحاني مسكينة حساب ليها هربت حيت وقع اللي وقع فالماضي لاكن انا ماهربتش انا تغربت باش نتعالج حيت مكان عندي حتى خيار .. اللهم نصبر عام وشوية ولا نضيع حياتي كلها . توحشتها وبغيت نشوفها وقررت نرجع فأقرب وقت خاصني غير ورقة كتبت باللي قادرة نكمل حياتي عادي بلا ادوية وقطعت معاها ودخلت نشوف فتيليفون وانا لاسقة حدا الشارجور هوا كيتشارجا وانا حداه لقيت مساجات كتار وبقيت طالعة هابطة ها بشرى ها فاتن ها سعاد وحتى بديعة خلات ليا مسج ومن بين دوك المسجات كان مسج جاد شفت التاريخ ديال داز عليه عام وربع شهور .. ضرب قلبي واحد الضربة قوية بردو رجليا حسيت بالصهد فاش شفتو وبغيت ندخل نقراه وخفت .. خفت وترددت بقيت كنشوف واش نقراه ولالا مابغيتش نحس بشي احساس خايب ولا ندوق طعمه مرة اخرى
بغيت نقراه لاكن خفت نتجرح وانا ماقادة على جرح وماعرفتش كيفاش غيكون تأثير المسج عليا . بغيت نخرج من المصحة وانا مرتاحة .. ونرجع لبلادي وانا مرتاحة ... تفاديت المسج ديالو وشفت مسج بشرى كتسول عليا ومخلوعة وكتسول علاش بعت المحلات وبعت كولشي ..وفين غبرت وفين مشيت .. كنقرا المسج ديالها وكنفكر فمسج جاد بغيت نقراه .. عيت نصبر وحليتو لقيتو طويل وقبل منقراه تراجعت . علاش غنقراه ؟ شنو النتيجة ؟ نتجرح ؟ نمرض ؟ نرجع نعاني بسبب الحب؟ يجيني تأنيب الضمير؟ هادو هما النتائج ديال المسج وصافي داز عليه وقت طويل صافي علاش نقراه شنو غنستافد؟ مو رافضة علاقتي وخوه كذلك وبا حصلني معاه والعقد مادرناهش والشوهة تشوهت وكولشي تشتت وكولشي مشا وغبرت وتقطعات اخباري فمرة ..شنو غنستافد الى قريتو؟ .. صافي خليني هاكا احسن ليا نكمل حياتي حتى يحن مولانا .
خرجت من المساجات وبغيت فقط نعرف احوال العالم ودخلت لحسابي واول حاجة طليت عليها هي حساب جاد بغيت نعرف الجديد ديالو ونشوف وجهه وصافي براكة عليا ... طلع ليا بوسط فيه الفوز بمقابلة جديدة لعبها مع شي واحد مشهور والحساب ديال ضرب جوج دالميلون ونص وتصاورو فلاصال كيتريني وكيلعب البوكس وبعد المرات مع خوه مصورين وختو عايش عادي .. بقيت هابطة كنشوف اللي قبل عام ولقيتو مصور البراسي اللي كنت هديتو فواحد السلة ديال المهملات مع شي اغراض اخرى وكتب تحتها بلونكلي مافهمتش الكلمة وعيطت لآنيتا قلت ليها شنو مكتوب هنا قالت ليا مكتوب لا شيء يستحق .. " وماكملش الجملة .. بقا فيا الحال قداش وشحال حزنت ومن بعدها شفت تصويرة الفوز ديالو بديك المقابلة كان غيكون فرح بزاف بيها واكيد وصلاتو للعالمية مدام لعب مؤخرا مع بطل عالمي وربح فيها ... مزيان الله يزيدو انسان يستاحق التشجيع .. خدم على راسو وكيخدم نيت ماشي كيتفلا وطموحه كبير بستاحق يوصل للعالمية . فرحت ليه بقدر ما حزنت على وقع وتألت بزاف لدرجة بكيت وخرجت من الحساب بقيت شحال ساهيةةمن النافدة حتى رتاحيت وصليت واحد جوج ركعات وهزيت تيليفون صورت ركابيا والسجادة قدامي بوسطيتها وكتبت عليها بالفرونسي ..نموت .. ونحيا من جديد . كان اول بوسط من بعد عام والزيادة غادي نطل بيه على الناس اللي تابعوني واللي عرفوني ... لحتو ومن موراه بشي نص ساعة رجعت نقرا التعاليق والمساجات لقيت الناس مسيفطين ليا بوسطات فالخاص دخلت لقيت بعض الصفحات هزو الصورة اللي كان لاح جاد وعبر عليها هادي عام وكتبو عليها التاريخ اللي تلتحت فيه ولسقو حداها الصورة ديال الجديدة اللي حطيت وكتبو عليها بعد غيبة طويلة .. باينة دازت من ازمة نفسية مسكينة وباينة تفارقو
تهديت فحياتي وعييت وهاد الصفحات ولا بغاو يعياو .. طليت على متابعة جاد اللي كان داير ليا لقيتو حيدها وبقا فيا الحال بزاف وجمعت حسابي رديتو بريفي غير اللي عندي اللي يشوفو تصاوري ارشيفيت الحساب وحيدت كاع تصاوري منهم وقررت نجمع كل تصويرة ديالي كنت عريانة فيها .. حتى جاد نساني والصورة اللي ديالي انا وياه فالباطو حيدها يعني بصحيح العبارة تفارقنا ويعلم الله كفاش عايش حياتو .. كما قال هوا وعمرني نسا هضرتو .. من بعد كتولي المناعة قوية لاكن انا نفسيتي تدمرات ليا ماسلكتش طريق القوة باش تقوى ليا مناعتي وهادشي اللي خلاني نبقا ندور من مصحة لمصحة . تجرحت بزاف فاش لقيتو لغا ليا المتابعة يعني خرجني من حياتو بلا حتى مايعرف لا ضروفي ولا شنو كيدوز عليا .. ديما كنحكمو على الانسان بلا منعرفو الضروف ديالو . جاتني الخنقة بغيت نخرج وقلت لآنيتا نخرجو نمشيو للمول كالغي لا فيي باش نشريو لبيسات نلبسهم ديال الحجاب واخا ماعارفاش شنو نشري وكفاش نسق داكشي . بقيت غير كنقلب فالانستا على ستيلات الحجاب باش نتعلم وباج تلوحني لباج حتى طحت واحد الباج زوينة بزااف فيها ستيل عربي وحتى انا طلع ليا الدجين فراسي وداكشي لاخر بغيت نبدل شكلي .. بغيت نبان محترمة وانيقة وكلاص وتبعت واحد الكويتية لباس عليها مصممة وكتلبس ملابس رائعة زوينة بزاف والتنسيق عندها زوين وتأنسبيريت منها وعندها بحال لاطاي ديالي وخرجت مشيت للمول بقينا كندورو كتاشفت ان حوايج المحجبات غالين بزاف واخا ماشي دايرينهم للمحجبات حاطينهم عادين كل واحد كفاش يلبسهم لاكن طالعين فالثمن بالنسبة اللي بغا شي حاجة زوينة
لقيت واحد الكسيوة غزالة كتحمق توبها بحال التليجة ديالنا ورطبا فلكحل يديدات واسعين شوية ومجموعين من الكمان بوحد الشريط رقيق وناعمة فيها دونتيل من جهة الصدر واكثر شيء عجبني هوا التوب .. رائع والقصة زوينة جاتني فنة وشريتها وبقيت لابساها وحتى انيتا خلصت ليها وحدة بحالها بيضاء وخدينا شيلان كما اللي كيتصورو بيهم البنات رطبين وباردين ودرت نفس اللفة لويت غير لوية وحدة على عنقي ولحتو اللور بين ليا الضورة دوجهي جات فيا واحد البرائة رهيبة وعيوني بانو كبار بزاف وجيت بريئة لواحد الدرجة مكتخيلش تبدل عليا وجهي واخا الشال كحل بان النور عليا والبيوضة والسر طاح عليا بلا مكياج بلا بوالو جيت زوينة بزاااف عجبني راسي تصدمت .هبطت لجهة المكياج درت قلم كحل فعيني بينهم ليا والبياض ديال عينيا بحال الحليب لون عيني زاد برق اكثر ودرت كلوز غير خفيف وماسكارا وزيرت الشال شوية مادرتو مرخوف مشيت على حسب الموضة حتى انا وحبييييت الشكل ديالي وخصوصا البرائة والنور اللي عمرهم طاحو عليا تقول يالاه خلاقيت . حتى انيتا دارت بحالي جينا فشكل بقيتا كنضحو وشريت شوية دالمكياج وواحد الريحة اخرى وخرجنا كملنا الشوبيك ديالنا ولابسين نفس الكسوت انا وياه فالابيض والكحل . جلسنا نتغداو نرتاحو وبدلنا الصندال باش جينا قادينا اللبسة وقلت لواحد يصورني انا وياها وتقاربنا حدا الطبلة هي تكات عليها ودارت يدها على خدها وانا حليت يدي تقاديت وميلت راسي جيهتها شوية ابتسمت وخدا لينا صورة جات ناصعة والالوان باينة جينا فنات وحناكي حومر من عند الله .. قربتها شوية وقطعتها من الجناب وحطيتها فحسابي من بعد ما مسحت كاع التصاور .. جيت فيها كلاص بزاف وبعقلي ونقية نقا من صفاوة الكوك وغير حطيتها طرطقات بليجيم وليكومونتير عراام تبرهت بدوك الناس وكملات وجملات هزوها وقطعوني بوحدي نشروني كتبو عليا احدث صورة لحبيبة جاد الهواري السابقة . درت يدي على جبهتي ماخلاوني نعيش كي الناس ما غادي نعيش كي الناس ديك حبيبة جاد الهواري غتبقا طول حياتي لاسقاني واخا نولد مع شي واخد اخر يحطو تصاوري يقولو اولاد حبيبة جاد الهواري السابقة .. فشلوني بقيت كنقرا ليكومونتير والمتابعات كيجيوني ويتعرمو عليا بالعرام .. كولشي كيقول جات زوينة جات فنة .. ويشكروني وعجبني الحال بزاف و دخلت باش نقبل الدعوات اللي جاوني لقيت انفيتاسيون ديال جاد مسيفطها ليا وانا نتصدم
بقيت كنشوف فديك الانفيت صبعي كيمشي ليها كل شوية ومترددة كنقول علاش حتى حيد ليا لانفيت هاد المدة كلها ودابا جا سيفطها ليا .. واش بغا مني شي حاجة ولا فضول منه بغا غير يشوف تصاوري ويعرف اخباري وفين انا وفين وصلت ؟ ممكن ! واكيد شاف التصويرة اللي نشرو اما كن ماشافهاش مغاديش يرجع يسيفط انفيت .. لا والزوينة كاع المتابعين كايطاكيوه فالتعاليق على الصورة اللي حطيت ضحكوني ماعرفتش واش هما اللي جابو بالطاك ولا هوا شاف الصورة وزعما راني سادة حسابي مكنضنش يكون جا بالطاك ، خليتو حتى نفكر ورجعت عاوتاني خفت يتنادم معاه الحال يحيدها المهم مقبلها ندير راسي قبلت كولشي والسلام وبركت عليها قبلتها وبغيت نعرف واش كيتابعني ولالا هزيت تيليفوني صورت المنضر ديال المول قدامي وكنت دايرة رجل على رجل والكسوة كحلة هابطة وصندالة ورجلي كيبانو شوية وكندوح بيها بشوية ونصور ببطئ وبهدوء وتأني ولحت السطوري شافو هوا الاول من دوك اللوالا عرفتو كيتابعني وجلست شوية قلت لآنيتا صوريني غير جنب بفيدو قصير فيه جوج حركات من بعد ماخرجنا لبرا وصوراتني جنب مابغيتش نحرق وجهي كل مرة بالتصاور بغيت نبقا ديسكخي بنادم تبقا عندو رغبة باش يشوفك. حطيتو بلا ميبان فيه وجههي بان شوية من حكي بالزربة ولحتو حتى هوا ودخلت عندو نشوف شكون شافو طلع ليا هوا ودرت واحد الضحكة ماعرفتش علاش .. حسيت بواحد المتعة غريبة فهادشي وواحد الضو كيضرب فصدري وعجبني الحال يتابعني واخا هادشي طريقو مسدود لاكن لقيت المتعة فيه وكملوها وجملوها صحاب الحسنات سكريناوه من بين المتابعين ونشروه كتبو عليه جاد الهواري رد المتابعة لحبيبته السابقة
حسيت بواحد السعادة والنشاط من بعد ما كان واحد الملل فحياتي كنحس براسي نتعشت . رجعت للمصحة فرحانة عجبني الحال ولقيت راحتي فالحجاب و اللباس طويل وزادني انوثة اكثر وكثر شيء طاح علياوواحد السر من عند رب العالمين كوعمرو طاح عليا فحياتي .. جبت معايا هادايا للناس الاي تما معايا وحتى الاطباء والممرضات اللي عندي معاهم قرابة .. مجرد هية رمزية حيت مابقا ليا والو ونخرج وبديت كنستعد باش نرجع لبلادي ونشوف عائلتي وحبابي ونعق ميمتي اللي محروقة عليا . جهزت الحقائب ديالي كنتسنى غير فوقاش يقولو ليا خرجي ومقادراش نوصف فرحتي حيت رجعت من حافة الجنون واستعدت صحتي وعقلي واخا ماشي مية فالمية حيت كيبقاو عندنا اثار وذكريات كتبقا مأثرة لينا على النفسية لاكن الحمد لله حال احسن من حال .
وصل موعد الخروج ديالي ودعيت الله تكون اخر مرة ندخل فيها مصحة او نشرب شي دوا دالمجانين ؟ احتفلو بيا وصاوبو ليا كيك قطعتو خرجت من تما كنعنق المرضى اللي غنخلي ورايا وخديت اراقمهم باش نبقا ديما على تواصل معاهم ورغبت انيتا باش تاخد اجازة نهبطها معايا للمغرب ونعرفها على بلادي ونساريها .
ودعت المصحة اخيرا بصحة جيدة ومشيت لاوتيل نرتاح فيه وديت معايا انيتا .. بالمناسبة . رجع اسمها مريم ومابقاش انيتة وعجبها اسم مريم بزااف . كنت محتاجة نتقدا بزاف ديال لحوايج من باريس داكشي علاش قررت نزيد واحد الاسبوع نسالي المشتريات ديالي فيه وفكل يوم كنخرج انا و مريم كناخد شي حاجة حيت ماعنديش ملابس المحجبات ولا حتى حاجة وكان ضروري من الشوبينغ ومنسيت نضافتي الشخصية حتى هي خديت ليها ما يلزم وسولت مريم على شي عيادة طبيبة ديال الاسنان زوينة وداتني عند دكتور فحص ليا سناني وحيد ليا واحد السوسة ودار ليا تبييض الاسنان رجعات ابتسامتي ناصعة البياض وشفت دكتور على قبل وجهي دار ليا علاج البيو ديرما باش يتجددو خلايا الكولاجين من جديد وطمني قالي بشرتك مزيانة ماعندك حتى مشاكل من غير الارهاق والتعب ومن بعد اسبوع والزيادة حيت زدت جلست على قبل وجهي كان خاصو الوقت باش يتقشر وتتحيد ديك الطبقة المحروقة وتبان طبقة اخرى رطبة وجديدة .. ضرب ليا ابر النضارة باش يختفي التعب والارهاق وبقا شوية منو دارو ليا فأصابعي ويدي ورضيت على النتيجة عجباتني وتجهزت باش نرجع وحطيت الشنط ديالي حتى كنتفاجئ وانا فالطاكسي فطريقي لمطار شاغل دو كول انا ومريم برقم تاصل بيا ومانتابهتش وماعرفتش ديالمن .. كأنه مألوف هاد الرقم سبق ليا وشفتو لاكن ماعقلتش مزيان . صونيت عليه نشوف شكون قلت الو بونجوغ ..
رد عليا صوت ماغريبش عليا قالي سيماء صافا
حليت عيني على كبرهم شكيت واش هوا ولا ماشي و قلت ليه وي شكون معايا
قالي: معاك زايد اشيماء
تصدمت .. لالا ماشي غير تصدمت تخلعت كاع حسيت بقلبي دار بووم قلت ياكما شي موصيبة علاش معيط ليا شنو بغا مني؟ مانساش اخر مرة هددني نبعد منو وغوت عليا ومانساش شحال بيك عليه وبسببه وبسبب داك الحب المريض مشيت نشرب ومشيت نكمي وضيعت حياتي وضاعت سنين من عمري هباءا منثورا .. وبسببه وليت نسحر وليت ندير فالكبائر ودليت راسي ومرضت صحتي و كنت غنتاحر .. وعمرني نسا داكشي اللي دار والضحك اللي ضحك عليا والسوسة اللي ساسني واخا حتى انا عندي فيد هادشي وخاصني نلوم راسي قبل منلومو هوا لاكن نسيت وبديت حياة جديدة علاش رجع كيتاصل ؟ تزوج وعايش حياتو وشفتو بعيني شنو اللي خلاه يعيط ليا؟
قلت ليه وانا مصدومة زايد ؟!...
قالي بنفس التقة فالنفس نفس الطريقة فالهضرة باقي كما هوا ماتبدلش
قلت ليه واخا وقطعت مافهمتش شنو باغي يقول ياكما على الفلوس ولا داك الشي اللي لقاني بيه النهار الاول؟ تخلعت جاني واحد الخوف وتشطنت وتسوست ماعرفتش اشمن موضوع هادا وعلاش بغاني فيه .. غتكون شي حاجة قانونية مافيهاش شك
وصلت للمطار درنا الاجرئات صافي غادي نركبو فالخطوط الملكية المغربية وماحجزتش بزنس كلاص حجزت فالعادي بحال الناس اصلا مكاين لاش . طلعنا كنت لابسة واحد لكومبين لون ترابي توبو براد وزوين باليدين بحال القميجة وسروالو هابط طويل مع رجليا درت ليه واحد لاسانتيوغ حفيفة ورقيقة قهوية وشاا خفيف رطب درت ليه نفس الشدة اللي كندير كندورو على عنقي ونلوحو اللور وكيجي راسي مجموع ووجهي مدور ومابقيتش كنحط مكياج من غير ماسكارا وكحل ونمشط حواجبيوواىةفيهم شي فراغ نعمرو ونحط كلوز فيه شلون خفيف اما بشرتي فوليت كنخاف عليها ومع الترطيب والعلاج النستمر حصلت على النضارة ومابقيتش مهتمة للمكياج درت صبيبيط بلا مقمق شي شوية من القدام عندو حديدة دوغي وصاكي وبديت كنقاب على نمرتي انا ومريم لقينا راسنا جينا مفرقين انا وياها هي جلسات اللور وانا جيت لقدام .. دخلت حدا الزاج شديت بلاصتي والركاب كيطلعو ويشدو بلاصيهم حتى وقفات حدايا واحد البنت كتحط الشنطة ديالها لفوق ودخلات جلسات حدايا غير هزيت راسي فيها تفاجأت كانت زينب وحتى هي تفاجآت واضطريت نبتاسم واحد الابتسامة خفيفة ودورت وجههي وحتى هي ردات ليا الابتسامة وجلسات حدايا كان نمرتها حدايا بقيت كنشوف هاد لهاد الصدفة اللي جمعاتني بيها فالطيارة عمرني نويتها ! وعاد معيط ليا راجلها غير الصباح !
سكت وشديت تيليفوني وقلعنا فالسما وحدة مكتهضر مع لخرى حتى جابو لينا ماجلات ديال الروايح بقينا كنشوفو واختارينا انا وياها نفس الريحة وفاش طلبناها لقينا بقات عندهم وحدة فسطوك وقالت لينا المضيفة غير وحدة اللي بقات وقلت ليها صافي ماشي مشكل تاخدها هي . هضرات زينب حتى هي قالت ليا لا ماعليش صافي دابا نزل فالمطار وناخدها .
بقينا اناوياه لا خوديها نتي لا خوديها نتي حتى خداتها وضحكات ليا قالت ليا ميغسي وحلاتها رشات فيدها ورشات ليا وبدينا نهضرو على الروايح انا وياها عادي مدتم جالسين وحدة حدا وحدة ميمكنش نبقاو ساكتين 3 دساعات كلها ! . المهم تفكرت الماضي وقلت ليها بهدوء وابتسامة زينب انا عارفة راسيودرت معاك لافوت وودابا كنطلب منك السماحة عرفتي علاش .. حيت حتى انا منبغيش اللي يدير ليا هاكاك
هبطات راسها كانت لابسة تيشورط كحلة وشعرها كحل طالقاه ودايرة نضاضر الشوف مربعين قالت ليا لاالا ماشيغي ماعندك علاش طلبي السماحة ... صاااافي انا وداك السيد سالينا كل واحد شد طريقو
صدماتني بقيت كنشوف فيها قلت ليها علاش كنتو مزيانين
دورات راسها وقالت بواحد الضحكة . يلقااا احبيبة يلقاااا كاااين اللي تقبل عليه وتموت عليه موجوودين ... تشوف الفيلا والفلوس والسيد فحل غيعجبها الحال وتبعدبو ماشي غير تبغيه وتمشيو حاينة الراس وتجي حانية الراس يقول ليها شا شا را را .. اما انا والله لا كانت ليه .. يمشي يخرا حشاك لا هوا لا ديك الفحولة ديالك ولا حتى فلوسو ... كيبغي يصرف عليك ويهزك باش ديما يخليك تحت يدو وتبقاي كتقدمي ليه الولاء طول حياتك حيت هازك وفاش يقول شي كلمة خايبة ولا يتعصب ولا يضور فيك قدام الناس تعذريه وماتظيش عليه تخليه يغوت وتقولي غير اه نعام سيدي والمشكل فاش كيتعصب واخا تكوني وسط عرس يخرج فيك قدام كولشي مكيعقلش .
ضحكت وقلت ليها هادشي دابا اللي كتقولي راه عندك فيه الحق وبزااف غادي يعجبهم الحال ويقولو هادا هوا الراجل معامن نعيش وتربط راسها بيه تبقا معاه عند بالها مسكينة هاديك هي السعادة وتولد ليه وتربي ليه حتى تموت بلا متعرف السعادة الحقيقية
هزات يديها وقالت ليا : شوفي .. ديك الفحولة كلنا كنبغيوها ماكرهناهاش ولاكن يكون فحل ويتعاشر .. ماشي فحل وضوري تقولي تفوو .. الراجل اختي هوا اللي يخرجك يمدحك قدام الناس يعطيك قيمة يتهلا فيك .. يحزرك ... ااو عمررو حزرني الى غضبت كنغضب حتى نشبع ونتفش ! والى ماعجباتوش شي حاجة واخا قدام كيزعف ويدور لا فيا لا فيها عندو زايد ناقص تقلقي ولا جلسي وكيعجبو لحال هوا تكبري بيه قدام الناس .. وكيزيدو ليه خواتاتو خويا خويا ويحلوها ليه ومو حشات ليا الهضرة قالت ليا راه ولدي كانت كتحماق عليه وحدة كتبكي عليه بالدموع وتفتاخر بيه مو
قالت ليا ماعرفتش علامن واش نتي ولا شي وحدة اخرى ولاكن راه مرضاتني حتى هي كضرب من لتحت لتحت .. انا كنت ديك الساعة كنقرا وكتقولي خاصك تغيبي باش تمشي لاعرس ولا باش نمشيو عند شي واحد حشومة وحقا الصواب القراية مغتهربش!... كيقضيو عليا فاش كيشوفو قرايتي لا شيء وماعندها حتى اهمية زعما غير زايدة كي قريتي كي ماقريتيش الاهم هوا راجلك عندو وهازك وهوا خدمتو اهم من قرايتي زعما وانا عندي خوتي هبطو لطنجة يقراو وكنصرف عليهم وعلى مي وبا ..شكون غيقري ليا خوتي هوا ؟؟ شكون غيسفر على مي وبا هوا؟ بيان سيوغ مغاديش يسفر عليهم واش هوا مزوج بيا ولا مزوج بيهم وحتى الى جا يسرف ولا قلت ليه محتاجة شي حاجة ماشي كيخليهم ليا ولا يدوزهم ليا فلكونط لا كيعجبو الحال يبدا يحسب فيهم اوراق ويمد ليا وانا كنكره داكشي وفاش تناقشنا علة الخدمة مابغيتش نجلس ومابغيتش نولد ديك الساعة حيت يالاه ترصيت قلت زعما غيرونسخن بلاصتي بعدا و فاللخر ضربني صافي هاديك هي اللخرة قلت ليه واخا طيح الروح مانبقاش معاك يمرض اللي بغا يمرضي مي غتبكي شوية وتسكت ..دابا الحمد بيخير كنتيري صالير صحيح وانا مهنية كنجبدو وراسي مرفوع .. مي وبا بغاو يرجعو للجبل كيرتاحو تما وخوتي جبتهم لكازا كيقراو وكنلقاهم مطيبين الماكلة مصبنين ليا الحوايج والحمد لله احسن بالف درجة من ديك العيشة اللي كنت عايشة معاه تحت الحكرة والدل
سكت بقيت غير كنشوف قلت ليها الله يسهل عليك فحياتك احسن حاجة درتي ماخليتيش خوتك يضيعو وهزيتيهم بقرايتهم بكولشي ليهم ربي عمره يخيبك غير كملي مع خوتك حتى يوصلو
قالت ليا لالا الى جا شي واحد اللي نتفاهم معاه وخدام مزيام علاش لا .. نتزوج ونعيش حياتي معاه غير ميدخلش ليا ويحسب ليا شمو خرجت شنو دخلت ولا يقول ليا ماتصرفيش على خوتك
قلت ليها راه كاينين ولاد الناس غير حنا فاش كنطيحو مكنقدروش نهزو الراس ونشوفو .. هاديك هي اصعب مرحلة حيت يقدر نصادفو ولد الناس ومنشوفوهش حتى نفيقو لقاو راسنا فاتنا شحال
ضحكات وقالت ليا شفت تصاورك مع جاد الهواري
تنهدت وقلت ليها مربعة يدي زيديني عليك .. حتى حنا سالينا عام والصرف
قالت ليا داكشي اللي لاحضت حيت شفت واحد البوسط كيقولو حبيبته السابقة
بقينا كنهضرو على مواضيع الزواج والرجال وعجباتني زينب انشانة طموحة ماحاطش راجل هوا طموحها وكطمح لما اكثر .. تولي مسؤولة او مديرة وتكون عندها مكانة وعجباتني شخصيتها قوية بزاف حيت لو ماكانتش قوية مكانتش تقدر تفارق مع جاد وكانت غتبقا معاه باسم الحب حيت داك الانسان كير ليه الجدب المغناطيسي الى بقيتي معاه معدبة والى فكرتي تفارقي معاه عذاب اكبير كيرجع هوا محور حياتك .
وصلنا للمغرب نضنا تمينت ليها حياة جديدة وزوينة وحتى هي كذلك ونزلنا تجمعت بمريم وشميت هوا المغرب والبلاد تنفست بعمق وقلت ليها مرحبا بيك فالمغرب ودخلنا للمطار كنسمع الدارجة والناس كيهضرو بقيت كنشوف فيهم ونضحك توحشت دارجتنا هادي شحال ما سمعتها . خرجنا الشنط ديالنا وخرجنا خديت طاكسي مشينا لاوتيل حطينا اغراضنا شدينا غرفة مشروكة انا وياها وخليتهت تسناني ماعطيتش الراحة لراسي حيت متحمسة بزاف نشوف اهلي وحبابي . تاصلت بالعساس ماعقلش عليا قلت ليه انا فلانة واش باقي كتعس فالفيلا قالي مابقيتش راني خدام فواحد الفيلا اخرى قلت ليه شكون ساكن فالفيلا قالي واحد المحامي قلت ليه غادي تتاصل بيه باش يوجد راسو يخرج من الفيلا انا باغا نرجع ليها . قالي صافي راه كاينة فيلا اخرى غنشوف واش تعجبو وتافقت انا وياه وتاصلت بسعاد لقيتها لقات خدمة لاكن قبل مانقول ليها واش ترجعي قاليت ليا واخا لقيت الخدمة نرجع عندك انا ماكرهتش من غدا نرجع عندك
قلت ليها ايوا صافي وبيدت كنضحك قلت ليها راه جبت ليك معايا شي حاجة حتى تجي نعطيها ليك قالت ليا بحماس انا غنهضر معاهم ليوم يعطيوني حسابي وغنجمع حوايجي
ضحكاتني سعاد باقا كما هي ولاكن الحمد لله الاوضاع بدات كتحسن وربي سخر ليا فكولشي .. دغيا خرج ليا الكراي من داري ومشات ليها سعاد ضور بيها وحتى العساس عاود عيط ليا قالي واش تبغي نرجع نخدم عندك واخا خدام نطلقها ونرجع قلت ليه مرحبا منلقاش حسن منك وقالي غنطلق هاد الشهر و نجي . عجبني الحال عرفت راسي كنت مزيانة معاهم فضلوني على الناس اللي خدامين عندهم وهادشي فرحني بزاف .
قررت نمشي لدارنا ونزور مي ونشوفها توحشتها وغادي تصدم فاش تشوفني بالحجاب متشوقة نشوف الفرحة فعينيها . قلت لمريم غادي نمشيو لدارنا ولبسنا حوايجنا لبست كسوة طويلة بلاسانتيوغ كلاص وصندالة و درت الحجاب بحال ديما وهزيت صاكي شدينا طاكسي انا ومريم حتى جاها الحجاب زوين بززاف كنوريها الحوايج وكتلبس معايا وكنوريها تنسق وديجا هي زويونة وقدي فالسن عينيها زورق وشعرها احمر من عند الله فيها واحد الزين فشكل وشوية دالنمش على نيفها وفنة وزاد الحجاب زينها اكثر .. انا من طبعي كنعشق الزين كنعشق الحياة كنبغث نعي ونلبس الحاجة الزوينة وكيعجبني نكون زوينة ومضهري زوين لاكن دابا زينت مضهري الداخل والخارجي مابقاش غير الجمال الخاريجي والمضهر الجداب بل كنحس بقلبي صفا وكنحس بالحب واخا مفتاقداه حاسة بالحب فقلبي ونفسيتي مرتاحة على اللي قبل .. كنت كندير مجهود باش نبان انيقة وكنخلي السلوك ديالي وهملت المبادئ والاخلاق والدين .. لاكن دابا شكل اخر .. تنقيت وتنضفت وصفيت من كل ماهوا سيء وحتى اخلاقي تحسنو وليت كنهضرز باحترام وبأدب والسلوك ديال تحسن كنعرف لحلال من الحرام والزوين من الخايب وصنعت فنفسي مبادئ واخا ماكبرتش عليهم درتهم لراسي نمشي عليهم ومانفوتش الحدود ديالي باش ميجيش شي نهار ندم على شي حاجة خايبة درتها .
قالت ليا ديما .. ايوا القهوى بعيدة وباك كيجي معطل ويصبح تما على الصباح ..
لويت ديك الضغمة فمي ودورت عيني قلت ليها كيجي معطل ... والقهوى بعيدة . امم صافي قلت با مية فالمية دخلوه الفلوس لقا مي حيط قصير خبز ربي فطبقو معارفة حتى زفتة ويعلم الله شنو كيطبخ .. قلت ليها واش تزاد عليه شي حاجة واش شرا شي حاجة
قالت ليا مسكينة وهي كتغدا : ايوا طنوبيل راه دارها وصافي هادشي اللي دار ... ا مدخلش ليه شاااي ابنتي جات بعيدة غير كيتكرفص فيها وصافي المصاريف ديالها كتار وحتى واحد مكايجي عندو
حسيت بشي حاجة ماشي هي هاديك هادشي اللي كيدير با لمي مسكينة مايبغيه لا ربي ولا عبده . قلت ليها يالاه تمشي معايا ترتاحي شوية قالت ليا بلاتي نقولها لباك قلت ليها لا بلا متقوليها ليه . ضربات فخادها وقالت ليا ويلي نمشي بلا منقولها ليه يجي مايلقانيش داكشي اللي بقا .
قلت ليها ماتقوليش ليه راني جيت كاع دابا نقولها ليه راسي .. اصلا راه مغيحملش يشوفني من داكشي اللي كان وقع .
قالت ليا : ايوا صافي بلا متفكرينا فداكشي اللي داز .. صافي نساوه . دابا عطينيه المحل راه غيكون برد
قلت ليها لا بلعكس غيكون حاقد عليا حيت مادرتوش فسميتو
قالت ليا علاه نتي مادرتيش ليه المحل فسميتو بيع وشرا
قلت ليها لا حيت البروجي كان مزال ماتبنا وكان خاصني اجرائات باش نخلص لكريدي وعاد تحطو البنكة فسميتي عاد الى بغيت نكتبو ليه وانا هادشي مكانش عندي ليه الوقت كنت مريضة وخاصني نمشي ضاروري وخليت الوكالة غير عند واحد المحامي عطاها ليه وصافي .
قلت ليها انا كنت غنعطيه ليه باش نكفر على داكشي اللي درت معاه ولاكن داكشي فيه الاوراق خصو الوقت والمصحة اللي كنت فيها ماخلاتش ليا الوقت فين نزيد نتعطل .. عطاوني غير شهر يالاه بعت فيه داكشي ديالي وريكلت المسائل وبقات البنكة عطاتني موعد باش يقادو ليا الضوسي وانا غنتعطل خليتو ومشيت .
المهم جبدت الف درهم درتها ليها فيديها وصيتها ماتمدش ليه يديها الى بغات شي حاجة تقولها ليا انا نعطيها ليها . دوزت معاها ديك العشية جمعت ليها الدار وسقيت وغسلت المواعن و قلت ليها تبدل ديك الحالة ودوش وتلبس شي حاجة نقية ماتخليش راسها هاكاك غتزيد غير تمرض بالهم والغم
خرجت من عند ماما وقلبي كيضرني عليها عقلي كامل معاها وماعرفت شنو ندير ليها مابغيتش نشوفها هاكاك كتبان كبر من عمرها وانا شفت الناس معايا فالخمسينات كي داايرين وماكرهتش ماما تكون حتى هي بحالهم .. مسكينة شعرها كامل طاح تشوك وقراعت ولات غير الجلدة شادة شي زغيبات وماعاشت ماشافت حياتها كلها دوزاتها معدبة عمرها حسات براسها مرى وتستاحق حتى هي الاخترام والقيمة والمعاملة الزوينة .
مشيت للاوتيل انا ومريم وهي براسها قالت ليا ماماك مسكينة واش مريضة!.. تعجبات فالوضع اللي شافتها فيه وحسابها مريضة وهي الحمد لله مافيها حتى مرض الله يحفضها وينجسها ليا ولاكن كتبان عليها فالقهرة ويديها طايبين ورجليها اكثر .
تشوشت عليها بزاف مابقيتش قادرة نفكر فحتى حاجة اخرى من غيرها . رجعت فطاكسي انا ومريم لداري اخيرا بان ليا الزاج اللي ضاير بالفيلا كيبري والشارع فيه الماء والباب الخارجي نقي والدنيا مشطبة من برا .. دخلت ضرباتني ريحة التراب والشجيرات اللي فالدخلة فازكين والدنيا نقية يالاع تسقات وطلعنا مع الدروج لقيت سعاد فلباب شافتني تصدمات فيا .. شفت الصدمة فعينيها وضحكت وسلمت عليها كانت دايرة فواطة ومسحات فيها يديها بالزربة وجرات الشنط قلت ليها هادي مريم صاحبتي وبدات ترحب بيها قلت لمريم حاولي تعلمي الدرجة مع سعاد حيت راه مكتسكتش من الهضرة ودخلتا كنضحكو لقيت نضرة .. توحشت داري بزاف واخا فيها ذكريات مؤلمة لاكن توحشتها وتوحشت الوانها وركانها .. قالت ليا مريم واو دارك زوينة ماحسابش ليا عندك دار كبيرة وزوينة قلت ليها واكثر حاجة مريحة بزاف غترتاحي فيها .. مشيت ضربت دورة شفت الدنيا كيفاش دايرة والجردة باين هادا اللي سكن فيها هاد المدة كلها نقي ماكرفسش الدار باقا كما هي واخا خاصها بعض الاصلاحات كلفت بيهم العساس فاش جا وطلعت حوايجي اللي سديت عليهم فلاكاف وبديت نستفهم وخرجت وتحد الصندوق كنت جمعت فيه مجوهراتي حليتها ولقيت هادايا جاد اللي كان هداني وابتسمت بقيت كنشوف فيهم وحطيتهم فعلب خاصة وستفت كولشي .
من بعد الراحة قررت نبدل فراش داري حيت ستعمله واحد اخر من غيري وانا فيا وسواس النقا والفراش وخرجت انا ومريم اول حاجة كريت طموبيل حيت اللي كانت عندي بعتها وخاصني نستف حياتي من الاول واخا كيقول ليا راسي هاد الفلوس حرام حيت سرقتهم لاكن انا ماشي ملاك وماقدرتش نردهم وماعندي لمن نردهم والى رجعو للبوليس غادي يتقاسموهم بيناتهم .. اللي عليا هوا نكتر من الصدقة بزاف اللي لقيتو محتاج نعاونو وحتى انا وحدة منهم محتاجة ونعاون بيهم راسي .. ناكل ونوكل باش نرتاح شوية من هاد الناحية ونفسي مطاوعاتنيش نسمح فيهم واخا تبدلت على اللي كنت لاكن ماشي لدرجة نولي ملاك خالية من العيوب وانا اصلا بشر خلقني الله بنفس لوامة ونفس امارة بالسوء ونفس مطمئنة ! .. كاين ناس مزيانين وصافين لاكن ماشي مية بالمية مثاليين ! الكمال لله عز وجل وانا فهاد النقطة بالضبط ماتبدلش وانما كنحاول نصلح شي حوايج درتهم ونكفر على ذنبي
دازت عليا مع فراش الدار تمحنت بالمعقول كل مرة غادية نشوف شنو يجي وشنو ميجيش وحتى الصباحة ديال الدار بدلناها ودرت ديكرادي ديال الكوراي بارد فالفراش مع الباج فتحت اللون فالاول كان طابع فشكل والموطارد غالب دابا درت مابين الزهري فاتح والسومو بارد والباج ودوغي وفرشت وساليت جات الدار فنة وبيتي بدلتو كامل باتاتو كله وجمعت الاثات اللي كان عندي القديم قسمتو على سعاد والعساس وجات ختي خدات منو حتى هوا داكشي اللي بغات وفرقتو وبديت بالوان جداد وكبرت مرايا دبيتي ديال المكياج من لفوق للتحت ووسط المرايا جات الطبيلة مستطيلة لاسقة بلا رجلين المهم ديكور رائع جا وقررت نبدا حياة جديد مشيت دزت على ماما واحد الصباح خرجتها فتحت ليها كونط وحطيت ليها فيه واحد البركة ووريتها كفاش تخرج الفلوس من الكيشي وعلمتها بدات كطبق داكشي قدامي .. قلت في حالة ما كنت مسافرة ولا بعيدة وحتاجت شي حاجة نحطها ليها تما وتخرجها وحتى هي عجبها الحال . احيااني شكون هادا اللي ميعجبوهش الفلوس اناري . طلعتها حدايا فالطموبيل نردها للدار وقلت ليها وجدي راسك غنديك ندوز ليك على ضهرك مغتبقايش ساكتة عليه حتى توقع ليك شي حاجة واخر مرة تخملي ولا دوري بالكواش
فرحات فاش قلت ليها ندوز ليك على ضهرك قالت ليا راه عييت فباك كنقوليه ديني دوز ليا ضهري كيضرني كيقول معندك والو غير فيك الوسواس وكيبقا عليا ليوم غدا ليوم غدا .. ولاهبلا ابنتي الى كيضرني كنحس بيه كيضرني من الوسط
طليت على دوك الاوراق نشوف حالته وجبدات ليا لاكارط ديالها باش نتيق واخا ماشكيتش فيها حيت حالة الولد يرثى لهاد ومخيطين ليه راسو بخياطة كحلة بحال التلامط ومشوهين ليو راسو ومديكلالي من الجنب خاصو يتعالج فاقرب وقت وباقي غير لحيمة كيخرج لسانو شوية ويردو وهي كتعنقو وتبوسو .. عطيت لمريم طلات على الاوراق زادت شرحات ليا الوضع قالت ليا حالتو خطيرة خصو علاج
سولت مو قلت ليها شحال طلبو ليكم قالت ليا كل واحد شحال كيطلب مرة خمسة دالمليون مرة ستة مرة سبعة وماعندنا لا راميد لا لاسنس لا والو راجلي غير سرباي وانا كنت خدامة فواحد المخبزة ودابا جلست من الخدمة وعييت نطلب ونرغب فالناس حطيت تصويرة ولدي فالفايس حتى واحد ماتسوق ليا
بقيت كنشوف ونفكر باش غنعاونها وكفاش والوقت مابقاش داك الوليد كيعاني ماعندو فين يزيد يصبر.. القهوى والغدا ملحوق نسبقو بالولد الاول ويدير الله خير . قلت لمريم يالاه نمشي وديتها معايا ركبتها اللور وعينيها معلقين كنشوف الامل كيرجع ليها . تاصلت بالطبيب اللي كان رسلني لفرنسا هصرت معاه فرح ليا وقلت ليه رجعت ولاكن الى كتعرف شي طبيب مزيان ولا كلينيك مزيان هنا عندي واحد الحالة ديال واحد الوليد خصو يتعالج فأقرب وقت .
وحيت كنتيق فيه بزاف وعاوني بزاف مشيت للكلينيك اللي عطاني وسمية الطبيب وقالي غادي نتاصل بيه نعلمو باش يعرفك وقطعت معاه شفت فالمرة فالمرايا قلت ليها غادي يبرا نشاء الله غير كوني هانيا
بدات تبكي وتمسح وشادة ولدها فيدها وكدعي معايا وتنخصص حتى وصلنا للكلينيك دخلات كتجري بيه ماصدقاتش لقات اللي يعاونها . استقبلني واحد الدكتور كبير فالسن خبرة وخدا الضوسي ديال الولد من يدي في حين هزو داك الوليد ديك الساعة دخلوه وبقات مو كتمشي وتجي برا محروقة عليه ومشيت للبيرو مع الطبيب شرح ليا شنو عندو وقلت ليه يدير جهدو وصافي والمصاريف كلها انا نخلصها للكلينيك المهم يعتقو الولد وخرجت من عندو خليتو غيتكلف بنفسه بديك الحالة وبديت نقلبو على مو باش نمشي بحالي وحطيت ليهم شيك تما دفعة اولى للكلينيك وخرجت لقيت مو كتهضر فتيليفون وتقول لراجلها بواحد اللهفة راني فواحد الكلينيك راه لقيت اللي يعاوننا اجي دغيا عندي راه جبت وسيم للكلينيك وكتحلف ليه مكتكدب وكتبكي بالفرحة وتقول ليه والله مكنضحك اغي وتشوف انا فالباب راه دخلوه يداويوه
قلت ليها بقاي مع ولدك الصاريف غتولاهم وبقات كتبكي وتشكر فيا وخليتها ومشيت بحالي انا ومريم طايح عليا الضيم .. شوف دابا على حياة كي دايرة .. السيدة مقصحة ماديا مشات تولد كي الناس فسبيطار الدولة ماعندهاش باش تخلص فاللخر كيطيحو ليا الدري ويكملو عليها وعلة الفقر اللي هي فيه .. قلة الشيء من جهة وترابي ومصاريفه من جهة وعاد المرض من جهة الله يحسن العوان وصافي .. واخا شكيت فيها فالاول قلت كفاش هادي عندها انسطا وكونيكسيون و ماعندهاش باش تعالج ! ولاكن فاش شفت المصاريف ضحكت على غبائي .. واش عشرة درهم كونيكسيون هي ستة دالملاين دالعلاج ! .. واخا تكون خدامة هي وراجلها مايجيو فين يجمعوها حتى يكون الدري مشا !.. والانستا هاداك ثقافة وصافي لا علاقة لداكشي بالفقر الفقر مكيفقركشومت المواقع .. اغلب المتابعين مساكن بسطاء ومافحالهمش اما اللي لباس عليهم ماعندهمش الوقت يتابعو شي واحد .
بقيت كنهضر انا ومريم ورجعنا بحالنا لقيت عبد الله العساس رجع للفيلا وخدام بلا ميقول ليا رجعت ولا يتفاهم على الثمن .. المهم لقيتو كيرش الجردة وقفت لقيت السلام بفمي سولت عليه وعلى احواله واحوال ولادو وخليتو يكمل شغلو ودخلت بحالي حيدت عليا الشال فخفخت شعري وطلقتو وتكيت على الكنبة فيا الجوع قلت لسعاد توجد لينا شي حاجة وتنهدت قلت لمريم راه كانو عندو بروجيات وها كفاش كفاش وبعت كولشي فاش مرضت ودابا بغيت ندير شي بروجي نستثمر فيه وماعندي حتى فكرة .. ماعرفتش شنو ندير ومابغيتش نرجع للبارا فيها مشاكل بزاف والحسبات وبغيت نبدل .. بغيت شي حاجة اللي نرتاح فيها ومافيهاش المشاكيل بزاف ولاكن مطاحت ليا حتى فكرة فراسي ومابغيتش نزرب .. بقينا كنهضرو عطاتني اقتراحات لاكن ماعجبونيش داكشي اللي كتقتارح قلت ليها المغرب بووحدو داكشي اللي كيتمشا فيه وينجح غيقتلك غير بالضحك اما هادشي اللي كتقولي مغاديش ينجح هنا .. بقينا مجمعين وتفكر السطوريات ديالي دخلت غير نطل لقيت جاد شاف السطوري ودار لايك للصورة اللي حطيت فالطموبيل جالسة بحال شي فاشيونيستا محجة مأدبة وجيت كلاص فيها
ابتسمت لا اراديا وسهيت خليت مريم كتهضر بوحدها وسرحت بخيالي حسيت بقلبي كيضرب .. مامكلتش السهوة ديالي صونا تيليفون جاوبت بعفوية ماعرفتش شكون وماحققتش فالنمرة فإذا به زايد وانا نتضايق من الاتصال ديالو .. قلت ليه سلام وعليكم سلام لباس بيخير الاحوال وداك الحوار الاول وقالي واش رجعتي للمغرب ؟
قطعت وتبرزطت .. كنت باغا نمشي غدا للقهوى نشوف شنو كاين وكيفاش داير هاد البروجي اللي حطيت فيه رزقي وماشفتوش
المهم صبحت الصباح ناعسة واول حاجة درتها من بعد ماصليت صلاتي وخلعني لقاء زايد خفت تكون شي حاجة خايبة ماقادراش نتحمل وعيت من المشاكيل .. طلبت الله تخرج هاد الخرجة على خير والله يحفضني من شي مشكل حيت زايد مغيجيش ويعيط ليا الا وعندو شي خبار خايبة والى باقا فيه ذرة من الايمان مغاديش يسيقني للمشاكيل هادشي الى كان ولد الناس كما الاول ماشي بحال اللي تعامل معايا فاللخر .
دوزت الصباح فالفيلا غير انا ومريم وسعاد طوينا فيه الحوايج وتشهيت الرفيسة قلت لسعاد ديرها لينا على حقها وطريقها بالبيض دالسمان واللوز والدجاج بلدي وحطاتها لينا فلغدا فقصرية قلت ليها تحط لعبد الله وتجي تتغدا معانا حيت اصلا غير حنا بثلاتة اشنو فيها الى تغدات معانا .. اييه عرفتها خدامة .. ولاكن لا علاقة ليها للخدمة بالانسانية .. هي كدير عملها وهازة الدار وانا مولاتها ونعطيها اجر وصافي انسان بحالي بحالها .. كنكره داك النوع اللي كيحسب الخدامة خدامة من جميع الجهات .. هي فقط كدير خدمتها ولا علاقة للتعامل بعملها هي بلعكس خصها تتحتارم حيت كتقوم بعملها باحترام .
ماعلينا ضربنا ديك القصرية وتكينا سخفنا .. مريم ضربات فيها حتى حوالت عجباتها وتكات على المساخن بالمعليقة حتى داخت وتكات نعسات وحلات فمها .. اما انا تابعني موعد خالعني وماباغاش نمشي ليه ومامرتاحاش لهاد المشية بمرة
لبست سروال ابيض طويل القصة رائعة شوية جاني مجموع من لفوق وواسع من لتحت واحد الشوية ولبست معاه قميجتو فالابيض نيت هابطة واحد الشوية مغطية ليا المسائل وزايدة فالطول من اللور عندها الجياب فالصدر وواسعة المهم ستيل زوين عجني وبالصدايف توبها رطب وكمام خليت ليهم الصدايف محلولين ودرت شال كما موالفة نديرو بطريقتي الخاصة كنجمعو على راسي وعنقي مزيان ونرميه اللور كامل .. درت اكسسواراتي فيدي وخاتم كن شريتو زوين مربع كبير ونضاراتي الشمسية وواقي الشمس ومكياجي العادي وتعطرت من كل الجهات وهزيت صاكي البني ولبست صندالة بلا خفيفة وخرجت مشيت فسيارتي اكدت عليه فالمسج نتلاقاو فأوتيل احسن حيت وجههي مألوف خفت يصورني شي واحد ويحطني .. على الاقل لاوتيل مكيدخلش ليه اي كان ومشيت لداك الاوتيل دخلت واتاجهت للكافي ديالو وسرحت عيني بكل ثقة فالفنس وانا خاليا من جميع المشاعر والاخاسيس اللي كنت حاملة فالماضي .. اجمل احساس هوا فاش تقابلي اللي كنتي كتبغي ودلي راسك قدامو ونتي خاليا من كل المشاعر ... جايا نقابل الاكس ديالي وقلبي مع الاكس ديالي الثاني .. غريب امري .. ولاكن الدنيا دوارة وهادي هي قاعدة الحب . نهار تنساي وتبداي من جديد .. كيرجع الحبيب ويطلب بقايلم وهاد القاعدة تعلمتها من نفسي .. فاش مشيت وخليتو .. رجعت باكية ندمانة فاش تزوج .. ولاكن فاش كنتفكر اشنو درت على قلبه والنيفو والقيمة اللي طيحت قدامو كنبغي نعاقب راسي واخا العقاب اللي شفتو اكبر عقاب ممكن يشوفوه البشر .. مرض ماشي بحال الامراض .. تلقا راحتك فجميع الامراض وتلقا مسكنات وحلول .. الى الجنون والامراض النفسية .. كتبقاي تموت كل نهار الف مرة وكيتسبب ليه فامراض عضوية كثيرة .. والحمد لله على كل حال .. لو مادزت من ديك التجربة عمرني كنت معرف قيمة الحياة والطريقة باش خاصني نعيشها .. وعمرني كنت نعرف قيمة نفسي ، وفعلا تعلمت دروس وتشحنت اكثر من واحد عندو ستين سنة . فهمت بزاف ديال الامور وبزاف ديال الحوايج وتعلمت نصبر ونتحكم فراسي عكس من قبل .
سرحت عيني لقيتو جالس جهة واحد الزاجة كبيرة داير رجل على رجل ولابس قميجة .. ماحرك فيا حنى احساس بلعكس حسيت باثار الجراح ديالي والاوجاع تحركو .. مشيت رافعة راسي باغا هاد المقابلة تسالي بأسرع وقت ممكن ووقفت عليه شفت فيه باقي كما هوا ماتبدل فيه والو نفس الكايزيما ونفس الشخصية اللي ودعت هادي زمان بالبكا والدموع وألام كثيرة ... وقف عندي شاف فيها بواحد النضرة غريبة ماعرفتش كفاش نفسرها .. يمكن انباهر بيا ولا حيت شافني من بعد وقت طويل .. بقيت كنشوف فيه وكنشم ريحته ذكراتني فبزاف ديال الذكرايات حسيت فيهم بشيماء القديمة وماداز عليها وبقات فيا وحزنت عليها بزاف .. حزنت على نفسي وشفقت عليها لواحد الدرجة كبيرة حيت بسبب حب هاد الانسان اللي قدامي تعذبات اكبر عذاب عاد ماتت
مد ليا يدو سلم عليا وحيدت يدي .. ماجاني حتى احساس .. جاني سلامو بارد عادي بحال اي واحد .. حيدت النضاضر شفت فيه كانو ناض فيه الشيب شوية .. شفت شكلو من زاوية اخرى بالطريقة الصحيحة بلا غشاوة على عيني وبلا تأثرات ناض فيه شوبة دالشيب مع اللون كحل وابيض بان فشكل . الشكل جذاب ايه وزين ومن بعد ؟ غنديرو حلقة فودني نتزين بيها ! .جلست درت رجل على رجل بلا منضحك وجلس هوا بقا كيشوف فيا بابتسامة ويطلع ويهبط ..
سولني على احوالي ورديت الحمد لله وماسولتوش خليتو سول وكنشوووووف فيه .. واش هادا هوا .. هوا اللي كنت غنتاحر على قبله وفقدت عقلي على قبله !. بقيت كنشوف فيه كأنني اول مرة نشوفو ماشي بحال من قبل .. نصرة الحب مختالفة وتقدر ماتشوفش بيها العيوب ديال لانسان الداخلية والخارجية .
قالي : مكنضحكش .. وغنجيك من اللخر .. انا اصلا مانسيتكش واخا تزوجت .. مارعفتش اصلا علاش تزوجت كانت نزوة ولا منعرف ليها كاع
ضحكت حتى بان بياض سنانين حيت فعلا ضحكني وبقيت كنشوف فيه ونضحك ..مشا الخجل ومشا كولشي كنت كنحشم حيت كنحب دابا رجع زايد ناقص حتى ردود افعالي مكنهزش ليهم الهم . قلت ليها بواحد الكياتة وبردوة دم كنضحك .
اييه مزيان ... تزوج من حقك وعيش النزوة ولا شنو سميتها كاع .. وخوووود راحتك .. وفاش تسالي رجع ليا انا ... واش غنبقا انا نتسناك ! ... ماعندي مايدار حتى تسالي على خاطرك ونجلس نبقا نعد وقتاش تسالي هاد الغيمة الوردية اللي عشتي فيها !.. انا منجربش النزواة غير نتا اللي تجرب !
بقا ساكت كيشوف فيا مطولا وتنهد و قالي عندك الحق تقولي اللي بغيتي .. ولاكن ماتنسايش .. ره كنا واحد الوقت نوينا نتزوجو ونتي اللي خويتي ... وضرتي تا عيتي وعشتي النزوة ديالك مع داك الطالياني ولا ماعرفت منين جبتيه .. حتى فقتي عاد رجعتي ...اولالا
دورت راسي كنضحك ووقفت هزيت صاكي وانا نتسيف عليه خرجت فيه عيني وهوا جالس وقلت ليه وهاكا جاوبتيني وقلتي ليا واش حساب ليك الزين هوا كلشي وعندك خرية فراسك وماعارفاش اشنو باغا وتسيفتي عليا قدام الناس ودابا غنقول ليك نفس الهضرة سمعتي .. ماشي غير نتا اللي راجل وواخا تبقا بوحدك فهاد الدنيا مغاديش نرجع معاك حيت اصلا ماعنديش علاش نرجع مع واحد مكنبغيه مكنحملوش اصلا وطويت صفحتو وبديت صفحة احسن منها ونسيتو لا هوا لا ماضيه لا حياتو كلها وخرجتو من راسي .. وجاي دابا كتقول ليا نطويو ؟ اش غنطويو ؟ طوي نتا ونساني عليك وخرجني من بالك راه عمرها غتكون وشوف ليك شي شيماء وحدة اخرى تبكي عليك وشبع فيها سبان ومرمدها .. اما انا ماشي من سهمك وفضيت مع هادشي ماتبقاش تعيط ليا وتصدعني راه عندي حياتي ..وشوف حياتك حتى نتا وبعد مني فهمتيني . اه ونزيدك .. ماكنت غنجاوبك بهاد الطريقة حيت اصلا ماشاعلاش من جيتك لاكن باش نفكرك فنهار شوهتيني فالقهوة وهضرتي معايا بهمجية وزدتي ومن موراها تزوجتي .. نفس البلان تكرر وحس دابا باش حسيت باش تعلم تعامل الناس كما كتبغيهم يعاملوك . بسلامة عليك
فشيت خلقي وضرت بغيت نمشي وناض شدني من يدي شاف فيها مزيان وقالي مساليناش الهضرة
قلت ليه انا ساليتها الى بديتي تهددني بالفلوس غنفضحك ... سنين ونتا ساكت وعارف وراك مشارك معايا وقسمتهم انا وياك ... شنو بغيتي اخر ؟ مكتخلعنيش ازايد نسا ديك شيماء الحمقة اللي تبعاتك بالدموع وردعتيها وقلتي ليها غنوريك وجهه اخر . واخا سيدي هاهيا مشات بحاليها شنو بغيتي منها اخر؟
قالي بغضب ومزير على يديا : قلت ليك نزوة ...غزت عليك فاش رجعتي ورديتي الصرف وتعادلنا .. واخا تا لهنا مزيان.. اما باش تقولي غنفضحك ولا منفضحكش عمرني فكرت نفضحك وعمرها تكون .. شيماء... حنا مادوزناش قليل وماشي براهش .. بلاصتك فقلبي كبيرة وعمرني مغنآديك ..تفكري داكشي اللي دوزنا ..
قاطعتو وفشلت حطيت يدي على يدو باش نبعدها وقلت ليه هادشي مص ليا طاقتي ومابقاش عندي ليه الجهد ازايد .. عفاك خليك عزيز .. انا مكنكرهكش وفنفس الوقت مكنكن ليك حتى احساس .. بغيت راحة بالي والله يعاونك ويوفقك .. نسا شي حاجة سميتها نرجعو عمرنا مغادي نرجعو حيت كولشي مات .. خليني عفاك نمشيو ..
كنضهر وعييت مابقيتش كنقدر على الصدع وفعلا طاقتي تمصات وتنهد قالبة وههي حتى شفت جاد داخل ومعاه خوه بحال ديما وشي واحد اخر .. كان لابس دجينز ازرق وقميجة بلو مارين وشعرو كيشعل ولحيتو مقادة مربيها جانو فنة وحاط النضاضر .. شفته قلبي طاح فالارض وقبل منحقق فيه ولا نشوف خوه عرفتو من مشيتو ودوك الحركات ديالو التقيلة مع الرياضة ديما مقطع فيه اللحم حتا خداه طبع .. كان داخل وكيوشف فالارض بعفوية وشاف فسروالو واحد اللحضة ووقف وكمل المشية وماجيت فين نبعد حتى ضار شاف جنب بعفوية ورجع راسو جيهتي بسرعة وحيد النضاضر جات عيني فعينو شفت ليه فعينيه كانت نضرة وحدة اخرى عمرني شفتها فعينيه .. نضرة فيها شرارة وصدمة وبلا منزيد نوصف حيت نفس النضرة كانت عندي فاش شفت زايد وزينب اول وحسيت بيه عرفتو شنو كيحس وحتى انا تدبحت ونعلت حضي .. اما هوا دغيا قلب وجهه ورد النضاضر ومشا بقيت مصدومة .. زيد هاد الصدفة على صدفة الطيارة وشنو هاد الزهر واش كاينة شيوحكمة فهادشي؟.. وليت كنآمن بالصدف والاقدار والحكم اللي ممكن تكون فيها وكنقول دائما مل حاجة كتوقع ليا من لخير حيت ديما من بعد العذاب كنلقا حوايج زوينين كنعرف الخير اللي جايني من وراهم .. لاكن هاد المرة خفت يكون لهاد الصدفة خير لصالح جاد ماشي ليا ويكرهني يكون سبب فين يحقد عليا اكثر ويرجع احساسه من جيهتي بحال احساسي اتجاه زايد
تدبحت من جديد ودفعت زايد خليتو كيعيط ومشيت كنجري طلعت للطبقة الثانية مابغيتش نعد جاد .. مابغيتش نآديه مدار ليا والو كان ديما زوين وحنين معايا عمرني شفت منو شي عيب حرام عليا نجازيه بهاد الطريقة .. يكفي الغبرة اللي غبرت وخليتو هاديك كافية واخا كنت مضطرة وعندي ضروفي الخاصة .. لاكن باش يشوفني من بعد هاد المدة كلها مع شخص اخر بلا منسولوبلا منشرح لا . طلعت للطبقة الثانية كنقلب لقيت غير خوه وواحد اخر جالسين وهوا مكاينش .. بقيت كنقلب بعيني حتى بان ليا خارج من جيهة الحمامات وبلا منحس مشيت عندو لداك لكولوار كان كيمسح وجهه وشديت ليه دراعه بغيت نهضر لاكن قبل منتكلم هز يدو لفوق وضار قالي بواحد الطريقة
طلقي .طلقي .. طلقي ...حيدي يدك
بغا يمشي وقت قدامو ثلت ليه جاد سمع ليا ... معاتمشيش حتى تسمعني ..
انفجار ... وقع انفجار فالكافي وفقلبي .. ماهزيتش راسي ونزلت مع الدروج يدي على نيفي كنبكي وصلت لبرا لقيت زايد مزال واقف ماشفتش فيه ومهبطة راسي كنبكي بوحدي وصلت حتى للطموبيل وجا عندي بغا يهضر معايا دفعتو من يديه مابغيتوش يقيسني وطلعت خرجت من ديك الكافي نيشان ماعرفتش كي درت حتى وصلت للدار . ودخلت كنجري كنت مزالة على وضوء ومحطمة طحت على السجادة بالصلاة والبكا ماحسيتش براسي كنحس براسي كيزدح بيقيت نصلي ونوض ونعاود بلا منشعر حتى بديت نعيا ماقدرتش وكملت جالسة شوية بديت نسجد ونبقا ساجدة شحال حتى داتني عيني نعست وتمنيت كن مانعستش .. تمنيت كن مت بلاصة منعس . فوقاش نعست ماعرفتش وشحال نعست ماعرفتش .. حليت عيني كن مزالة على السجادة ومغطية بليزار .. هزيت راسي لقيت حسيت بنفسي تقبطات لواحد الدرجة مكتصورش .. نضت ديك الساعة توضيت ورجعت للسجادة حدي كنقول الله واكبر كيتهز كلشي بحاا الى مكاين حتى مشكل .. غير كنسلم فالبلاصة كيرجع ليا داكشي يضغطني ويضغط على نفسي .. ونرجع عاود للصلاة وكنرتاح .. عييت ورجلي ضروني وليت كنصلي جالسة ومرتاحة كنسا كلشي .. الله على دوا شحال فعال بحال شي سطل دالماء بارد .. صليت شي مية استخارة كندعي فيها الله يبعدو عليا وميعدبنيش الى ماكناش مكتابين لبعض . والى كنا مكتابيت يهز عذابه عليا ويجمعني بيه فأقرب وقت .. بقيت على الدعاء والصلاة حتى تهدنت وكانت فهاد الوقت كله كطيل عليا مريم وتلقاني كنبكي فصلاتي .. مالقيت حتى ملجأ من حر هاد الحب اللي خفتو يقتلني ولا توقع ليا شي حاجة اكفس من عير الصلاة .. نقداتني من عذاب محقق. اسبوع وانا على نفس الحال الماكلة مكدوزش ليا ومريم حاضية معايا كتعطيني ناكل بزز وكنت يا اما نعس او نصلي وحدة فجوج مكاينش نبقا جالسة غير هاكاك او نخرج . عتاكفت فالبيت ولقيت راحتي وقربات مني مريم سولاتني مالي وعلاش انا وصلت لديك الحال وجلسات حدايا لقيتها باغا تسمع ليا وبديت نحكي ونعاود ليها على قصتي بزايد ونحكي ليها على قصتي بجاد وكفاش حتى تعرفت عليه وحقظ خوه عليا هوا ومو والاسباب كلها اللي خلاوني نتعالج فمصحة . تصدمات لاكن انا كنت كنهضر وساهية وهي كتلعب ليا فشعري فالبالكون باللي فوق واحد الكنبة . قلت ليها عرفتي كن تعرفي شحال كنبغي جاد ... وشحال عزيز عليا غادي تعجبي ... انا كنتمنا يعيش حياتو احسن ويكون فرحان واخا ميعيشهاش معايا .. المهم مايتعدبش حيت مايستاهلش ... بلحق عمرني نسمح لخوه .. عذبني كمل عليا اللي بقا
تنهدات قالت ليا الله ياخد الحق ... والله غادي يبين فيهم العلامة
قلت ليها انا صليت صلاة استخارة .. الى كان مكتاب لينا نرجعو مغاديش يطول هادشي .. والى مامكتابش لينا نرجعو طلبت من الله يقويني ويصبرني ويسيني فيه كما نسيت زايد ويصفي قلبي وصدري من كاع الاثار .
ابتسمت وقلت بلاتي نوريه ليك وفتحت الانستا بغيت نوريه ليها لاكن صفحتو مكطلعش .. عيت نقلب مابغاش طلع ليا بمرة قلت ياكما بلوكاني !.. وانا كنقلب طالعة نازلة بانت ليا واحد الباج قدامي ديال النشاهير واخبارهم لايحة تصويرة جديدة ديالو بحال العادة على غفلة وحداه بنت كتبان زوينة وشعرها زعر حتى هي شوية وانيقة وغزالة باقا شابة جالسة حداه وداير يدو مور ضهرها فحوار سري هي وياه وكضحك فرحانة .
درت واحد الابتسامة باهتة وحطيت تيليفون على صدري غمضت عيني وقلت لمريم بانت نتيجة صلاة الاستخارة... ياااااربي تصبرني
تشويت وكمدتها وكن غنوري الصورة لمريم فاللخر قلت ليها مايحتاجش امريم .. صافي غير دعي معايا ربي يصبرني حتى ننسا
تأسفات لحالي وبكيت عليها شوية وعاونت بصلاتي تدريجيا حتى بديت نولف والحمد لله خففات عليا الصلاة على الاقل مادخلتش فاكتآب لاكن مقصحة بزاف كأي انسان عادي كيحب وكيتقصح واخا يضحك معالم بيه عير الله . فضلت نخرج ونشم الهوا ونتفنس نعاون راسي وندير مجهود حيت جوج صدمات متابعين بزاف عليا وعلى طاقتي .. لاكن اللي كيكون مع الله حتى الله كيكون معاه وكنت كنحس بواحد الطاقة كتجيني ماعرفتش منين باش نقدرونوقف ونكمل ولو الآم والجرح والعذاب اللي كنحس بيه الا وحاسة الل كاثن شي انبوب كنستمد منو القوة وكيكالمي الاوجاع ويخففهم . كأي انثى كتحب كتبغي تبقا متابعة اخبار اللي كتبغي ولو تكون باغا تنساه وكدير مجهود لاكن بينها وبين راسها كدير عندها رغبة تعرف الجديد وتشوف وجهه وتعرف اخباره .. وانا ماكرهتش جاد .. بلعكس خلا ذكرى زوينة فقلبي فمكاين لاش نكره وجهه او نشوفو.. عكسي انا خليت ذكرى خايبة فقلبو كره يشوف وجههي وبلوكاني ، لاكن فضولي خلاني نفتح حساب اخر بسمية اخرى ودخلت عندو لحسابو مالقيت حتى صورة جديدة .. والو وحتى سطوريات غير لاصال وصافي وكيصور دوك المعدات ولا يمكن عندو اللي مكلف ليه بالحساب حيت الحساب كبير وممسيروش هوا بنفسه واخا فاتحه عنده عاطي للي كيسير ليه الحساب وهادشي كان قالو ليا وقالي غيديرو وكنضن دارو . بين دوك ليجيم والتعاليق طلعات ليا ديك البنت حاطة ليه قلب ودخلت عندها نشوف شكون هي وكي دايرة عن قرب .. لقيتها حاطة تصاورها هي وياه عندها وتجرحت اكثرو وبقا فيا الحال بزاف وكانت زعرا وبيضاء وزوينة ماشي خايبة وباينة من بنت شي عائلة مرموقة وحتى لباسها عندو قيمة .. دخلت كنقرا التعاليق كاين اللي كيشكرها ويطاكيها سميتها كاميليا بن جلون باينة من دوك الجلونيين العايقين والشبعانين بخ .. لقيت الناس كيطاكيو جاد ماعجبهمش الحال علاش تصاحب هوا وياها وبزاف دالناس مطاكينو كيقول ليه بدلتي الزين بخانز رجلين .. البنات كيقول ليه اللولة احسن مادرتي فيها مايصلاح قالو ليه الدراري اللولة احسن اخاي جاد الهواري ودارت الحجاب مالك اش باغي ؟
قالت ليه وحدة واش كاين شي واحد كيخلي الزين والحشمة والوقار ويجي للعرا كولشي كيتفرج فيه .
حسسوني بالتقة فالنفس ورجعت ليدك الصورة اللي كانو حطو عليه لقيتهم كيطاكيوني ويضحكو كاتبين ليا اجي ؤاه كيخونك .. راه خرجو رجليه شواري جري . واحد كتب ليه واحد فرق كبيير بين النية وقلة النية باينة من الوجه اخاي جاد غير رجع الى لقيتي فين ترجع . كتب ليه واحد انا بعدا تكون عندي بحال ديك البنت اللي كان معاها والله منضيعها .. باينة عليها نقية ومربية وتحجبات وداخلة سوق راسها ماشي بحال هاد كيلو داللحم العياقة والنفخة .
تفرجت وشفت وتكهمت وخرجت نشم الهوى انا وبشرى ومريم ونيت فرصة نعرفهم على بعضياتهم . بدلت نمرتي فخطرة خديت غير النوامر المهمين سيفطت ليهم مسجت عطيتهم نمرتي وتهنيت مابقاش كاه تيليفوني كيصوني . مشينا لغيسطو فاوتيل كنمشيو ليه ديما بغينا نتغداو وجلسنا فبلاصة معزولة على بنادم .. ناضت مريم للحمام وفاش رجعات شفتها كضحك سولناها مالكي قالت لينا باللي شي واحد شافها وهي نازلة وعجباتو وبغا يهضر معاها . ضحكنا ولاكن جلستها حيت هي نية بزاف ماشيوعقلية درجاوية خفت يضحك عليها شي واحد ويكدب عليها ويمرضها بحالي وقلت ليها وياك تيقي راه هنا كيكدبو بزاف .. المهم التقة حيديها .
واخا خفت عليها لاكن ماركرهتش تزوج هنا باشو مترجعش لفرنسا وتبقا معايا مانقدرش نبقا بوحدي بلا بيها ولفتها وكن كان خويا مربي وولد الناس وفيه الطايلة كن زوجتها ليه لاكن مايسواش مانبغيهاش ليه ابدا
أنا وبعدي الطوفان الجزء 12
محتوى القصة
التنقل بين الأجزاء