ناااري باش حسيت .. ... نااااااري ياربي تصبرني مانبغيها لحتى واحد ... عمرني ضنيت غادي ندبح الى زعما تزوج شي مرة كنقول عادي حتى جربت وسمعت وتصدمت حسسييييييت بيها .. كل دقة كتجيني كنقول هادي صعب من اللي قبل منها .. تشويييت فكبدتي وريتي وكلوتي وقلبي وصبرني ياربي صربنييي ..وتحرقت على مي وعلى عمرها وشبابها ونيتها حتى وليت مقول غير كانت ميز ماتسوا ماتصلاح ولا هاد الكوية اللي تكويت فكبدتي عليها بحال الى انا اللي ولدتها وربتيها ماشي هي . ماحسيتش براسي حتى وقالت ليا الدم عنداك الدم ..
كنت فديك اللحضة اللي غبت كنتألم عاطياخا تعابير اخرى وابتسامة خلفها مية صفحة وصفحة كحلة .. لقيت راسي مزيرة على واحد الموس بلا منشعر وطلقت منو بالزربة والدم كيسيل .. شافت فيها بواحد الشوفة فشكل تخلعات وقلت ليها .. كتجيني واحد الحالة ديال الاعصاب بعد المرات كتشنج ليا هاد اليد .. سمحي ليا
دغيا تلفت الموضوع ولفات ليا واحد السربيتة على يدي وقالت لبا وخاصك تمشي طبيب على هاد لكخيز
قلت ليها راه متبعة عليها .. صافي فاتتني غير جلسي
شربت الماء وسناني كيتقرقبو وصورة مي وهي كضحك بين عينيا وعندها واحد الوشمة بين حجبانها بحال المثلت وعينيها نوازيت بحالي ودايرة العكسة ديالنا ديال الاطلس.. شفتها وهي كتبكي فلحضات ضعفها .. شفتها وهي كضرب تمارة مسكينة وزوينة فوجهها كتفتن ولاكن كلاها لحم ورماها عضم وجهها تبهق وبلا منهضر شعرها اللي رجعو فيه جوج زغبات والجلدة كتبان .
حطيت الكاس وكتمت داك البركان وابتسمت وفمي مشنج قلت ليها مزيان ... تستعمل شي حاجة نقية احسن من داكشي السواقي .. وتحافض على رجلها حيت بيني وبينك اختي مافيهم تيقة.. غير كيديرو لفلوس كتبان ليهم يبدلو المرى
ضحكات وقالت ليا واييه والله ماكدبتي .. ولاكن ميقدرش يبدل ختي هوا اصلا مزوج وعندو ولادو كبار ...
حليت عيني : بصاااح ... واش ماتت ليه مرتو
قالت لا راه مرتو غا حمقة .. واحد العروبية
طلعات معايا موس حافي بديك الهضرة رعداتني وصبرت وقلت ليها و اولادو زعما بغاو ليه ..حيت قلتي ليا كبار
قلت ليها ولاكن اصاحبتي ختك خصها ترد بالها راه عندو الورث غادي يدخلو معاها طول وعرض
قالت ليا : لاااا لا ماعندهم مايصورو .. حنا ساهلين ليهم .. اصلا شوفي ولدو غا واحد الشمكار مكيسحاش وواحد بنتو مزوجة كترعد من راجلها غا بوحدها ووحدة اخرى ماتقدرش تهز الراس اصلا حصلها مع صاحبها فبيت النعاس وهربات وتا الى جات وحلات فمها غنعطي لمها لعصا تكمش .. ختي راه خااايبة اااه شنو يحساب ليك .. خايبة
كمدت ديك الهضرة وقلت ليها : وادير بعدا غير شي حاجة تحت منها .. انا راه عندي جمعية الى بغات شي حاجة قانونية نعاونها .. انا مع العيالات فهادشي كنعاونوهم وبغيناهم ينخارطو معانا قد ما كترو قد ما الجمعية كتزيد تكبر
غمزاتني وقربات قالت ليا دابا هي بغات الفيرمة ولا القهوى فهمتي وكادب عليها قاليها القهوى ماشي ديالي غا كاريها وحنا عايقين بيه كيهرب باش مايدير ليها والو
قلت ليها والفريما ؟ يكتبها ليها !
قالت ليا لااا عندو مشكل فيها حيت مامكملش ليها الفلوس .. البنكة ماعطاتوش ماقبلوش ليه ومول الفيرمة اللي باع ليه دار معاه الوعد بالبيع .. حتى يكمل ليه الفلوس ووتقو داكشي .. ماعندو كي يدير يكتبها ليها هي اصلا ماشي فسميتو دابا عندو غير الورقة ديال الوعد بالبيع والتواصل اللي كيخلص باش فاش يساليها يتكاتب .. دابا الفيرما ماشغلناش فيها اصلا ماشي شي حاجة غا صور وضاير بالدار وواحد لابيسين عادي لا شجر لا ربيع لاربيع شراها رخيصة واخا مالقاش باش يكمل
قالت ليا راه مكنشقاش ابنتي واش ضهري باقي مريض ونشقا بيه . قلت ليها ماعرفت منين نشدك ... مرة كيضرك مرة بريتي .. المهم تصبحي على خير انل مشيت بحالي
رجعت بحالي مريضة بداكشي اللي سمعت مطعونة ومفقوصة جلست فبيتي بكيت حتى شبعت وتفكرت ايامنا وحنا صغار واخا با قبيح كنت كنشوفو نعم الاب واخا مافيه مايتشاف حيت كلمة با كتلخص كولشي.. تفكرت الجو العائلي سوا زوين او خايب .. تفكرت الاعياد وتفكرت مي وهي كتغدينا فطبلة وحدة وتشقا علينا وتسهر على مرضنا ... ماعرفتش كفاش نشرح ليها وكفاش نفسر ليها هادشي... عقلها ماشيوبحاب عقلي وجيلها ماشيهوا جيلي وصعيب نبغيو نفس الحاجة ونتفاهمو عليها .. بحال والو تقبل الوضع واخا تزوج حيت الطلاق عندها وعند العائلة شي حاجة اللي خايبة فوق الوصف .. يعني تصبر وتموت صابرة ومطلقش .. مجرد كلمة الطلاق كتخلعها اما الى سمعات شيووحدة الطلقات كتبقا تعاير فيها وتعيب فيها واخا تكون مضلومة حيت الطلاق عندها بحال شي حاجة من الكبائر !
حرت وبكيت علىوالوضع وماعرفتش شنو ندير وكفاش نحررها .. مابقيتش باغاها تبقا معاه حتى دقيقة ومنقدرش نخليها ليه ابدا .
نعست عيانة نرتاح وصبحت على المحامي لغيت ديك الوكالة وخدات ليا من جهدي ومن وقتي وطلع وهبط شحال .. رجعت للقهوى مرة اخرى صورتها من الطموبيل من برا من كاع الاتجاهات ودخلت جلست صورتها بالتخبية من كل طبقة وشربت واحد الكاس دالقهوة ومشيت وهادشي كله درتو الجمعة الصباح حيت قالت ليا سميرة مكيكونوش وصورت على خاطري ورجعت بحالي حطيت الصور فأفيتو للبيع ومشيت للفيلا راجعة حتى كيوقف عليا هشام من جديد خلعني قلت ليه شنو كاين ..شنو باغي
جبد تيليفون ديك الساعة بالزربة خدا نمرتي وقالي انا غنتسناك دابا سيفطيه قبل منمشي
جاب ليا الضحكة خاف نقولبو وسيفطتو ليه ديك الساعة قالي واش بصح هوا هادا غير نمشي
قلت ليه مكنكدبش عليك .. ديك شيماء الله عرفتي النهار الاول مشات والحمد لله عفا عليا الله ورجعت للطريق
هبط راسو حشم مني وقالي شكرا اختي شيماء ومشا طلع فطموبيل ودخلت درت ابيل فيديو مع مريم بحال ديما لاكن مابغيتش نقول ليها جاي عندك خليها حتى تفاجأ بيه وعلى الله تسامحو
فيين هوا داك المنفخ المعنطز اللي كيدوز عاز خنافرو تا هوا كتر من با ... رجع يجري ويرغب هه .. اودي لهلا يسلط الحب على شي واحد .. مهما كان طاغي كيولي يبوس ريوس ويطيح كواريه .. عند بالي عند غير انا اللي شرشمني الحب هه.. صدق مشرشم حتى هشام ومفيقو مع الخمسة يجري للمطار .. زعما شغنقو!.. واها تكون كتموت ومريض كتشهد .. كيجي الحب يديروفيك واحد الجهد .. وواحد الحماس رهيب كيردك خفيف خف من رزق باش تبقا غير مدرم . . اما واحد جاد يعلم الله فين راه وشنو كيدير ... واخا كنبغي نساه كنلقا راسي كنفكر بلا منشعر ونقول مع راسي شنو جالس كيدير دابا؟ كفاش يكون تقبلموت صاحبو ؟ كفاش دايرة ضروفو ؟ داز الوقت على لكسيدة واش يكون رد صحتو كليا ولا مزال .
تنهدت ودخلت لحسابي لقيتو باقي داير ليا بلوك .. مشيت نتفقد الجديد فحسابو من الحساب الوهمي لقيتو باقي كما هوا كيتحطو غير تصاور البطولة وسطوريات الرياضة. قلت مع راسي نتفقد حساب صاحبتو هي كتحط لجديد للناس بزاف ومع دابا طايحة مع جاد الهواري .. ماهازاهاش الارض وعاد مغادي تزاد فيها النفخة والعياقة اكثر .هه طبعا ماهي صاحبت جاد الهواري بطل الملاكمة ! بسيف ما تطلع للسما وتشنت وتنفخ وتحط للناس يشوفوها وتبان واعرة
غير دخلت اول صورة طلعات ليا ديال يدها مصورة الخاتم ديال الدياموند والناس كيباركو ليها وفرحانين بيها .. شفت ديك الصورة وانا نوقف بلت منشعر بقيت كنشوف وغرغرو عيني بلا مانحس حسيت بسكين ختارق شرايين قبل .. تفكرت راسي فاش تزوج زايد وسمعت الخبر وتطعنت ديك الطعنة وفقدت وعي وبديت ندبز .. نفس الشعور او اكثر حيت مافرغتش .. فقط جلست بقيت غير كنشوف ويدي على فمي ونيفي .. حطيت راسي بكيت وقلبي كيجرني باش نعيط ليه ونهضر معاه لاكن لحت تيليفون وخرجت للبالكون بكيت حتى شبعت وتعصرت حتى عييت .. ماعندي مانقضي .. جاد مشاا ..صافي مشاا حتى قبل كاع منشوف الصورة .. هادي فقط بينات المخفي وصافي .. وماعنديش علاش نعيط ونبكي ونغوت حتى واحد مغيسمعني وغير غيزيدو يقمعوني .. مالقيتش كفاش نكبل ونتحكم فنفسي من غير الصلاة .. مشيت توضيت كنبكي وصوتي تجرح وبديت نصلي بلا انقطاع حتى عييت .. صليت صلاة استخارة حتى صبح الحال كنطلب الله يفتح طريقي ويفرج كربتي .. ريحاتني الصلاة شوية حسيت بهدنة واخا قلبي مجروح لاكن لحضة غياب العقل تجاوزتها ونعست .. غير حطيت راسي نسيت كولشي ونعست اليوم كامل والحمد لله بلاصة ما ندوزو فايقة والجرح جديد كيضرني دوزتو ناعسة مهنية فمخي
ماجات لا بزين لا بفلوس ولا حتى حاجة... الى لعب معاك الزهر راه غتكون اسعد انسان فالدنيا .. لاكن ميمكنش يكون عندك كولشي .. الزين والفلوس والحب .. ضاروري مغيكون عندك نقص فشي حاجة فيهم .. وانا عطاااني الله الزين الحمد لله وعطاني الفلوس لاكن الزهر والو مع الرجال لاكن دابا غنقطع يدي منهم فمرة حيت عرفتي زهري كي داير وغنجمع ونطوي .. عمرني نذكر الرجال على فمي ولا ندخل فشي علاقة واخا نبقا بايرة . صافي عييت مابقاش عندي الجهد تهديت .
حيدت الانستا وديزانستاليتو فمرة باش مطلع ليا حتى حاجة تمرضني ونعيش حياتي طبيعية كما كنت من قبل ونتهنا من دخل خرج وطل كل شوية . حيدت كولشيز خليت الواتساب بوحدو اللي كنخدم بيه ورتاحيت من البوسطات ، كيكفي ما كنعاني مع عاىلتي ماعندي فين تزيد شي نقطة اخرى وكنحاول نتعايش واخت راه صعيب لاكن مابيدي مندير .. بداو الناس يعيطو على قبل القهوى ويسولو الثمن وكاين اللي بغا يشوف كنعطيه العنوان وكنقول ليه باللي عندي مشكل مع الجيرون تما من الاحسن ماتقوليهش غنشري حتى تشري وجري عليه وكنهني مخي حتى عيط ليا واحد الشاري بغا يشري وديتو ليها شافها من برا ودخل بقيت كنتسنا بعيدة قلت ليه تما عمي عندي معاه مشاكيل وحشمت نجري عليه ماقلتش ليه غنبيع حتى تشري و الى بغيتي خرجو خرجو . عجبو البروجي تافقنا صافي مشينا تبايعنا وتشارينا ماتعطلتش .. دوز ليا رزقي فالكونط ومشا منو للقهوى ماتليتش عرفت شنو طرا تما اللي متأكدة منو ان بابا غادي يطيح ليه النص وفعلا طاح ليه النص وجا كيغوت عليا فالفيلا ماخلاهش العساس يدخل وماكنتش انا .. مابغيتش نفركع رمانة الزواج على قبل ماما لاكن السيد جهل عليها وصعر عليها مالقا فين يخوي غضبو ومالقيت كي ندير نحدهم ليه كيجيني حتى لماما وكنطيح .. فكرت وقلت نجرب واحد الطريق الى صدقات ومشيت قلبت على خويا لقيتو فراس الدرب وقفت عليه بالطموبيل وبقا كيشوف فيا وفيدو واحد الجوان .. شيرت ليه جا عندي حتى كان غيسبني وقلت ليه بلا ماتسب .. طلع خاصني نهضر معاك ضاروري
بغا يتعكس وقلت ليه طلع ماغادي تخسر والو وحاولت نطلعو وطلع لاح داك الجوان وديتو لواحد البلاصة خاوية غير انا وياه فطموبيل باش حتى الى غوت مايشوفنا حتى واحد .. قالي علاش جبتيني لهنا شنو باغا .. قلت ليه جبتك حيت نتا الراجل ديال الدار.. انا وسهام غير وليات ... نتا الراجل ومك محتاجة ليك ا عصام .. واش مشبعتيش من البلية ؟ هاا؟ واش كتشوف مك مكرفصة وبلاصت ما تهزها زايدها بهمك ؟
عصبني وقلت ليه شفرت واحد الباليزة قد هاكا ديال الفلوس بقيتي على خاطرك
دور راسو وقالي وانوووضي من الطنز
قلت ليع نوض نتا دابا وقاد معايا الشغل
وقف زطم على داك الكارو وقالي شنو باغا دابا طلقيني .. داك الواليد الى تلاقيتو غندبح مو
قلت ليه مادبحو ما يدبحك وقف غير حدا ماما تصدا ليه ماشي تبدا تفتف .. خرج فيه عينيك كما كتخرجهم فيا دابا ... خرجها من الدار واجي نتا وياها للفيلا وخليو ليه ديك الخربة غا شوف كي دير ليا بكي وشكي عليها باش تخرج .. انا مرضاتني فصحتي لاسقة فيه
قلت ليه غابشوية على مي راه باقا مريضة ماتزيدش تفقصها .. انا غنتسناك تعيط ليا صافي
لحت ليه واحد 200 درهم باش مايقولش ليا ماعنديش باش نعيط ماعنديش بان نقضي وديتو للدار كنقريه ونوريه ونشحن ليه راسو تا كَيدتو الكيدار مزيان حسستو بالرجولة رجع كيتنفخ حدايا وحطيتو حدا الدار يالاه نزل وانا نقشع با جاي عندي كيشير بيدو قالي اجي لهنا .. اجي اجي وانا مكسيري علقت خليتو مع عصام تعرا عليه فالشارع شوهو وبا من النوع اللي مكيرضاش يشوهو شي واحد خاصووهوا يشوهك ويبان واعر .
بعدت وتاصلت بسهام قلتي ليها ها شنو هاشنو كانت صدمة كبير ليها بدات كتبكي وبقيت عليها تا هي بتحراش مزيان قالت ليا انا دابا غادية عندك ماما قلت ليها سيري عندها ماتخليهاش بوحدها وقولي ليا شنو كيوقع راه داك الكيدار دعصام اول مرة يدير شي حاجة زوينة فحياتو نتي خليك حدا ماما ماتفرقيش عليها لا توقع ليها شي حاجة وقولي ليها راه تزوج بالهداوة انا مقدرتش نقولها ليها خاطرني ضرني .. قوليها ليها نتي
ساليت مع سهام وهي تعيط مريم .. تنهدت ماشي وقتها ماعندي خاطر نهضر لاكن جاوبتها لقيتها فرحانة كضحك كتعاود ليا على سيربرايز اللي دار ليها هشام وصدماتني قالت ليا غنجي للمغرب .. قات ليها عاد مشيتي كفاش غتجي قالت ليا غنجي نتزوجو راه طلب يدي ومابغيناش نطولو بزاف . باركت ليها وفرحت وبقات ساكتة شحال وقالت ليا شكرا بزاف اشيماء .. واخا قلت ليك ماتعطيهش العنوان قلتها فوق خاطري وكنت مريضة كنتشوط .. طلب مني السماحة وسامحتو
قلت ليها حتى انا مابقيتشز هازة من جيهتو بردت والمسامحة .. انا همي كافيني دابا
قالت ليا نالكي شنو وقاع قلت ليها راكي عارفة مشاكل مي وبا وخوتي راني فالحرب معاهم وبديت كنعاود ليها ونشكي حتى تفشيت وقطعت معاها دوزت النهار غير فتيليفون وتعياط ماسكتش با يعيط ونقطع عليه سهام تعيط عصام كل شوية يصوني .. تروبلات عندهم ومابغيتش نبان لبابا ومابغيتش نشوف ماما فشيو حالة خايبة .. كمدتها وبقيت جالسة غير فطموبيل حتى عيطات سهام قالت ليا شوفي اجي ديز ماما راه ساقت الخبار حالتها حالة وبا غادي جاي كينفخ الشمتة ديال القهوى خرجات فيه بغات تقتلو ماتسوقش كاع لماما وهي بقا فيها الحال جمعات رزمتها بغات تخرج
ديك الساعة مشيت نجري كنشوف غير من بعيد وقربت للحومة كان الليل والناس خارجين داخلين كنتسنا ماما تخرج .. شافني بابا جا عندي وطلعت الزاج خفت يضربني ولا يدير ليا شي حاجة .. السيد كيترعد ويشطح بالفقصة الهضرة مابقاتش كتخرج من فمو مقادة وكيرجف وتشوهنا فالحومة كولشي ساق الخبار تزوج على ماما وكيعيبو علينا كولشي كيقول هادشي اللي درتو ليه حرام هادا شرع الله ربي عطاه الحق حرام توقفو قدام شرع الله ..واحد الراجل كبير جا كيقول غير نزلي ابنتي نزلي نهضرو معاك مابغيتش ننزل وهوا كيشير ليا بيدو ويتفتف قالي هادي هي راس الحية السلكوطة .. هادي هي اللفعة اللي دارت هادشي كله
داك الراجل قالي حرام هادشي اللي كديري لباك ابنتي غتحاسبي عليه غدا قدام الله راه باك هاادا
عصبني هبطت الزاج شوية وشفت مي جايا كتجر الصندالة مهبطة راسها وشادة فسهام كتبكي .. حسيت بيها حست اللي دوزت خلاني نعرف داك الاحساس .. قلت لداك الراجل حساب ليه غير كبير غادي نخليه يبقا يحاسب فيا .. ضرت فيه قلت ليه دخل سوق راسك ماشي شغلك
كانت هادي اول مرة نطرطق عيني قدام با وهوا كيغوت كيقول ليا مامزوجش شكون قاليك انا مزوج .. والله مامزوج
هز راسو كيسوط قالي ياك !!... السلكوطة ... عاد حصلتك مع الصاحب فبيت النعاس هاا .. لقيتو فوق منك ال****
ويلي ويلي ويلي على شوهة بغا يطعني ويسممني بقا يهضر وعينيه حومر فيا .. هادا هوا النرجيسي الخانز النكير والتسميم والمعيور والى قتضا الحال يضرب ..بدا يشوه فيا والناس كيقولو لا حولة ولا قوة الا بالله بغا يطعني ودورت وجهي غطينو خليتو كيغوت وجر مي من يدها قاليها والله وطلعتي فهاد الطنوبيل لا كنتي ليا مرى
تخلعات وكتبكي وتسوط نفسها كتقطع تلفات خفتها ترجع وبقات واقفة ماعرفات طلع ولا ماطلعش تا جا خويا هاز ليها الصاك دالحوايج قاليها طلعي .. يالاه صافي سالينا
دفعها طلعها والناس كيشوفو قاليها با طلعتي ... واسيري .. سيري يامحجوبة يا بنت حمو راكي مطلقة بالثلات والربااع والخماس ويالاه.
الله على راحااااا..هزيت يدي لفوق على راسي اما عصام وسهام تصدمو ومي ضربات فخادها وبا تقلا فسمو وقلانا معاه . قلعت ماشفت ورايا هزيت مي وخوتي وزدت خلفة للفيلا ماعرفتش كي درت وصلت .. لين ليلة ونهار كانت مي مزوجة مرتاحة عاجبها الحال ماجايبة للدنيا خبار حتى كتصدم اللولة بالزواج ولا ماعرفت خيانة ولا يمكن جايب شي وحدة مسكنها وكيمشي عندها والثانية بالطلاق . اصعب ما يمكن يهرس المرا .. لاكن انا حاولت نهزيت عليها الدقة قدر الامكان وماخليتش ليها فين تحزن ولا تمرض وحتى تيليفونات ديال العائلة قطعتهم عليها باش متسمعش شي كلمة تجرحها وتاصلت بخالي فالجبل قلت ليه مي مريضة وحالتها حالة بغيت نسيفطها دير عمرة واش تمشي معاها انا نتكلف بالمصاريف وكلشي .. فرح ماقداتو فرحة وجمع حوياجو جا عندي لكازا وبديت نوجد لمي حوايج العمرة ومع دابا كولشي كاين فاليوتوب وكلشي ساهل كيوريك شنو ديري وشنو تدي معاك . تقديت ليها كوولشي من الالف للياء ماخليت ليها حتى حاجة ناقصة وقطعت ليها للبيي والاوتيل وسيفطتها واخا مريضة واخا ماقادراش لاكن قلت اللهم تمشي لتما وحتى الى كتاب عليها الموت تموت فداك المقام ولا تبقا هنا كتشوا ومريضة . اما خويا غير جا عندي للفيلا تركن رجع يضرب الف حساب وحساب .. وحتى رجليه كيغسلهم هما اللولين قبل ماينشرهم ليا فالفيلا وتسعاد نهار ومطال تابعاه تنقي من وراه قهرها كل نهاى تجي عندي تقولي خوك هدني اختي هضري معاه .. راه قهرني الصباح طيح الطفية كلها على الزربية ما مسحتها حتى طاحو كتافي .. ويدخل يغسل رجليه يدوز ليا على الارض كلها يزعلكها ونمشي نمسح من وراه .. عييت واحق الله حتا عييت
كنت جالسة دييك الساعة فالبالكون كنشرب قهوة الصباح قلت ليها صافي دابا نهضر معاه فاش يفيق قوليه يجي عندي لهنا ... انا غنهنيك منو
مشات فيقاتو من النعاس باش تتهنا جا عندي مضهشر قالي شنو باغا علاش مسيفطا ليا سعاد فارعة لينا *** على الصباح
لبست عليا واحد الفوقية وهبطت لقيتو كيفطر لابس سبرديلتو وطالع ليا على زربية حيحت عليه على الصباح جمع رجليه مالقا فين يحطهم وناض دار بناقص من الفطور قلت ليه زيد ابنادم زيد ناري على بشار
خرجت عند عبد الله قلت ليه ديه للمقاطعة دخل معاه راه مكلخ وكيحساب ليه واعر سولهم على الاوراق اللي خصو يدير وسير معاه راه غيطلع الباسبور
قالي عبد الله راه كيبغي يسوق الطموبيل وكيبدا يغوت عليها فالطريق
قلت ليه راه ماشي ساهلة تمشي .. نتا دابا مدمن مخضرات عندم حل واحد .. غدخل للمصحة هنا كنعرفها غندخل ليها على قبل لعلاج والطبيب تما كنعرفه مزيان غيعمر ليك الورقة فين تمشي تعالج فمصحة ففرنسا وغنجيك ساهلة تمشي لتما .. ديك الساعة بغيتي تعالج تعالج مابغيتيش قوليهم بغيت نخرج نرجع بحالي وغادي يخليوك وتمشي وبقا تما ديك الساعة
قالي وااابلان تا هادا بقينا هنا !
عصبني قلت ليه مالك بغيتي طير!! .. بغيتي صباح تكون تما مفيك مع راسك!.. غا تستاويل مالك كطير حمد الله اللي غندير معاك هاد لوجيست اما نخليك بوك كدور هنا هادشي اللي يصلاح ليك !
قالي مزروب واصافي فكينا دينا لهاد الصحة ليوم ماعندي منتسنا
قلت ليه غادوز عليك شوية المسخوط .. خصك تصبر شوية هنا على الاقل سيمانة حيت المصحة هنا ماشي بحال لهيه .. هنا غيقطعو عليك الماء وضو
قلت ليه اهاه مللي قلتيها بفمك مرحبا . عيطت لداك الطبيب اللي كنعرف مسكين كنجيب ليه غا البروصيات بحالي قلت ليه واحد الحالة مجلجة غنجيبها تعالج تما قالي جيبيه وديتو للدار جمع حوايجو طرقت ليه مسامرو دخلت مو للمصحة .. امم حساب ليه دخول للحمام بحال خروجو واصلا هادا هوا الحل مع الادمان والله لا عقلو عليه غيشدوه يعصروه تما وكيحساب ليه غيمشي لفرنسا يقولليهم نخرج يفتحو لباب دغيا! .. مافراسوش راني حشيت ليه القالب غنسيفطو تما والله عمرو يقطع الشانطي تا يبرا واخا طير ولا ينزل ميطلقوه .. بحال الحبسوفالامن والحراسة وهوا كيحلم عند بالو كولشي ساهل ماهل كيتسنا يمشي لفرنسا يدور ونبقا انا نصرف عليه من هنا ! داكشي نيت اللي بقا
زربت عليه خشيتو فالمصحة ورجعت بحالي .. الله على راحة فكينا الجرة بالحيلة مع داك مسخوط الواليدين وتهنيت وتهنا عبد الله وتهنات سعاد وحتى لفراش تهنا من ريحتو وطواليت تهنات من ريحة خراه .
تقهرت جري عليا نجري عليك مكاين غا لكعيط مكنجلسش .. كل شويةةخارج ليا مشكل من الجنب وطلع وهبط راسي غيتفركع بالمشاكيل والمطارق باااز والله تا باااز كنتعجب لراسي حيت حتى واحد مكيتعجب ليا ويحس بيا ويقول باز لديك البنت من هادي لهادي وغير المشاكيل الصحاح اللي كيهدو بنادم . بغيت غا نتهنا نرتاح كي ناس نعيش واحد الهدنة .. تفو الفلوس قد ماهما كيحلو ليك المشاكيل كيديرو ليك المشاكيل .. ماحد الله كيغنيك والمشاكيل كتنزل عليك .. لا اللي عندو مهني ولا اللي مكحط مهني كلها وهمو وكلها ومشاكيلو .. وعاد دابا جايا نوبة مريم اللي قالت ليا غادي تزوج وغادي تجي للمغرب مع هشام وماباغاش نشوفو كيفكرني فخوه وانا كنعمر وقتي باش نساه ونعيش حياتي كما هوا عايش .. ماعرفتهاش واش غادي تجلس عندي ولا غيستاضفوها عندهم مزال ماعرفتش شنو غادير وماهضرتش معاها فالتفاصيل مزيان قلت خليها حتى تجي ونشوف شنو غيوقع
تاصلت بخالي نسولو على ميز قاليا راه بيخير عجبها الحال تما .. قلت ليه الى خصاها شي حاجة نسيفط ليها وخليها ترتاح مكاين ماحسن من داك المقام يخفف عليها وينسيها الهم وينسيها البشار . ماشي ساهلة تعيشيو مع واحد عمرك كامل ويلوحك فاللخر غير ضد فولادك بحال شي جرتيلة ماقال راها مرتيز عندي معاها عشرة ماقال راه دوزات معايا المرة والمرار حيت شي حلاوة ماداقتها معاه .. ماقال درويشة حرام ندير فيها ونديروفيها ! واااالو ماعقلش عليها باش يحرقنا ويشوطنا زعما . ولاكن خليه كل واحد كيتجازا على فعله انا غير ميجيش يفرع ليا راسي ويبقا يتعرض ليا هادشي اللي بغيت !
كنت جالسة كنتفرج فديك الصكعة ديال ماريو تشوي رجعت نكمل المسلسل من بعد ما قطعتو مدة وتاهيا كتعصبني وزيد عليها داك البطاطا ديال البطل عندو غير اشعر اشعر هوا غيكشعر انه مذنب واخا ماشي مذنب وتابع بهلة كتر مني .. حب هادا ولا جدام تفووو كيشدك كيبهللك واخا تكون سلطان ! تكون دكي فكلشي الا الحب كترجع فيه اغبا من الغباء بنفسه وكتولي تتصرف بلا ريكلاج بحال ديك المونيكة دعاشورة اللي كيدورو ليها البطونة وتبقا غادية كتشطح يا دخل فحيط يا طيح من شي طبلة يا تبقا تفيبري بلاصتها .. هاكا كيردرك الحب .. بلية واشمن بلية تا كتقول نسيت وفاش كتجلس بوحدك كينوض ليك الضمير الى كنتي ضالم وكينوضو ليك المشاعر يبداو يضاربو وكتمرض .
قالت ليا راه بنت راجل ختي ديك سلكوطة اللي كنت قلت ليك عليها ..قلت ليها امم مالها؟!
قالت ليا راه بنت الحرام رجعات و دات القهوى باعتها
قلت ليها ياك قلتي كاريها ولا مانعرف ديالو
قالت ليا ولاا اختي راه كان يحسابنا ديالو و كادب علينا ولاكن هي فالحقيقة ما ديالو ما كاريها ديال بنتو كانت دارت ليه البروجي ولاكن بسميتها هي ودابا دارت ليه الصابونة هزاتو وطلقاتو
حيدت تيليفون على ودني ضحكت وقلت ليها ايوا وشنو وقع؟؟
قالت ليا مشكيلة دابا راه ولا كيجي عند ختي وقاليها خرجتي عليا نتي السبب وكدا رد ليها اللومة وضربها هرسها من يدها الكلب لاخر ..
قلت ليها تمشي ديكلاري بيه ! السيبة فالبلاد !
قالت ليا راه دابا كاين مشكل اخر
قلت ليها شمن مشكل!
قالت ليا راه ماقدراتش ديكلاري حيت دابا هي وياه ماشي مزوجين
قالت ليا دابا هي ماقدراتش ديكلاري حيت فيها فساد وروينة وجرا عليها من الدار .. وتاهي قلت ليها صبري نهضر ليك مع السيدة تعاوننا تقول لينا شنو نديرو ولاكن ماصبراتش مشات شخشات ليه الطموبيل كلها ماخلات ليه فيها مايصلح وزادت طرطقات ليها البنوات ولاحت تحتها بوطة صغيرة فركعاتها راه كانت غتشعل العافية فالفيرما جاب الله كيحطها بعيدة ماحدها لا رملة لا والو غا الخلا والارض .. عاااد اختي جاو البومبية طفاو العافية .. واروييينة وقعات نتاقمات منو حيت خرجها جرا عليها وهي عام ونص وهي معاه ماعقلش عليها فاللخر وقاليها سحرتي ليا ودرتي ليا وسبا فيها كولشي وهي والله اختي ماسحرات ليه هوا راسو مشا عندها تا واحد مادفعو !
قلت ليها دابا من اللخر شنو بغيتيني ندير ليك؟
قالت ليا اختي مابغاتش ضيع حقها بغينا زعما توقفي معاها فالجمعية ديري ليها شي تعدو ولا استغلال المهم باش تنتاقم
ضحكاتني قلت ليها لا احبيبة حنا سدينا الجمعية قولي لختك تشوف ليها شي تقبة اخرى تيري منها الفلوس وضربي على هاد النمرة وماتعاوديش تعيطي فيها ولا غادي ندمك نتي وختك . يالاه وصلي ليها الهضرة قولي ليها بنت راجلك وصاحبك كتسلم عليك .
سديت ليها فوجهها ولحت تيليي حدايا نوريها السلكوطة ومي انا تقول عليها هبيلة ومكلخة . كيشوفو بنادم درويش كيحكروه وقد ما بقا ساكت كيزيدو يديروه تحت السباط !
تهنيت من شرهم ومن شر با خليه منو ليهم يالاه يتلهاو مع بعضياتهم واللي سميتها مرا تجيور بساحتي الى مانصفيها ليها وماعندها متصور مني قطعت الاوراق وساليت شحال هادي. من طبعي واللي كنكره فراسي هوا الانتقام ..منقدرش نعس مرتاحة وانا مشموتة .. يا اما نرد حقي ولاندير شي حاجة فراسي .
تفرغت لحياتي وعاد رتاحيت من جهة مي مسكينة وعطيت لراسي هدنة .. الله على راحة عمرني حسيت بيها .. كان مسمار كيضرني من جهة مي وزيد حتى خويا تهنيييت وتسنطت لعضامي واحد شوية وعقلي مع مريم قالت جايا فطريق قلت ليها واش غتجي عندي ولا علاياش تافقتو قالت ليا غادي نكريو اباختومو احسن حيت تافقنا نديرو كولشي وجمعنا الاوراق باش نديرو العقد ونديرو العرس .
فرحات قالت ليا يالاه كنت غنقولها ليك راه الضياف صعاب خاصهم الطياب وجميع الدار وشحال من حاجة
قلت ليها وصافي دابا عيطي ليها تفكك راني عارفة تمارة ديال الضياف . انا غدا غنمشي للمطار الصباح نجيبهم خاص الفطور يكون جاهز وكولشي مقاد
وصيت سعاد ووقفت على النقا بيدي وسعاد عارفاني فيا الوسواس ديال النقا كيمرضني كنكره الفتات يبقا فشي بلاصة ولاشي ركنة فيها الغبرة ولا الرتيلة كنتعصب وديك المرة اللي جابت عصبني شغلها شفت غير الطبلة كفاش كتمسحها تفقصت قلت لسعاد عاودي ديك الطبلة فاش كنهبط راسي شوية نشوف جنب كنلقا الخطوط ديال المسيح باقين ولا تحط شي حاجة فشي بلاصة وتنساها وكنكره نلقا شي مقبط ولا ستيلو ولا شي مقص دفار كيدور فدار ولا محطوط فشي بلاصة اولا ندخل للكوزينة نلقا لافابو فازك مامسوحش ولا روبيني فيه القطاري ديال الماء فدوش كنسخط قلت هادي الى دخلات لبيت النعاس ديالي يعلم الله اش دير غدي طوي ليا لحوايج طويان الكرشة والسراول ديروليهم طويان المسارن وتخلي ليا الزاج مخطط ولا شي حاجة نشوفها نتعصب. قلت لسعاد علميها كفاش تشقا ووريها شنو دير وبيتي بلا مدخل ليه دخلي ليه غير نتيا بوحدك باش بلا منبقا نعيط ونسول على الحاجة فين محطوطة ومشيت شفت البيوت ديال النعاس كفاش منضمين وحطيت فيهم العطور ديال البيت شريتهم جداد والفوطات وكاع اللي يحتاجو ودخلت للكوزينة بالليل حليت الثلاجة لقيت سعاد ستفات السلعة فيها وفالبلاكار وجبدت واحد الدفتر وستيلو قلت ليها شنو تحط فالفطور وتسيفط العساس يجيب الخبز سخون والحرشة والمسمن حيت غيبغي فطور بلدي ووريتها كولشي ومشيت نعس حققت الساعة على السبعة حيت غيوصلو مع الثمنية ويالاه نكون تما .
الصباح فيقاتني الساعة وفقت لقيت سعاد فايقة وديك السيدة عاد متغسل وجهها .. عاودت ليها نفس السيناريو تقولو للسيدة وشربت واحد الكاس دالقهوة ومشيت للمطار بقيت واقفة كنتسنا حتى شفت شي نصارا جايين قلت يمكن هما حتى بانو ليا مزيان وعرفتهم حيت سبق ليا مشيت عندهم زرتهم فاش بغات تجي معايا مريم وكانت مها جايا شعرها احمر لابسة كسوة موحدة فوق الركبة وشعرها كاري وحداها كاوري ابيض بلق شعرو شايب شوية لابس شوورط حد الركبة وصندالة بالسماطي وتيشورط وشي بنت اخرى لابسة واحد السروال فضفاض ورقيقة معاه واحد البودي بالسماطي داك اللباس ديال الكور غيرو كيرونو ويلبسو لاكن واليديها لا متولين مقادين عادي .. تأكدت فاش شفت مريم موراهم بالحجاب لابسة كسوة طويلة فيها الصدايف لقدام وسبرديلة وفرحانة شادة فيد هشام وجاين كيضحكو . دافعين الشنط .. غير شافتني جات كتجري عندي عنقتها وبقيتا نتباوسو اما هشام مد ليا يدو وحنا راسو قالي ختي شيماء صافا اختي لاباس .. الله يحفضك اختي شكرا
سلمت عليه عادي كيايحتارم مكيهزش العين وسلمت على عائلتها رحبت بيهم واصلا كيعرفوني .. واحد الشوية جا خوها كيجري هاز شكارة كان كبير وزعر وابيض بزااف بلق بحال باه عينيه زورق .. داك الزين ديال النصارا وشعرو رطب كيهرب فين ما قلبو .. مديت ليه يدي رحبت بيه حيت عمرني شفتو مباشرة شفتو غير فالتصاور كانت كتوريني عائلتها وماكانش تما فاش مشيت شفتهم ديك المرة . ضريفة وكيهضر ويضحك نية هاد الناس غير كيشوفو ويضحكو فرحانين بحال مريم وحتا هما كيعيطو ليها مريم . خرجنا لبرا كان جا شي واحد بطموبيل من عاىلة هشام باش يديه وركب معاه خوها وركبو لخرين معايا اللور ومشينا للفيلا تبعاتنا طموبيلت هشام وصلو خوها نزل معانا وودعاتو مشا فرحان ودخلنا حنا للفيلا كنرحب بيهم ودخل ليهم عبد الله شنط هوا وخو مريم كانت سميتو فخونصي وجلسو وسط الدار يرتاحو وبدينا نتجمعو ونهضرو ونضحكو ومريم حدايا كنعنق فيها ونعاود توحشتها بزااف وبارك ليها فرحت من قلبي حيت فرحانة تزوج بهشام وبدات الفرونسي كتشاير عندي فالفيلا تقطع حس العربية
نضت قلت ليهم خودو راحتكم وقلت لمريم نتي بلا منعرض عليك كتعرفث بلاصتك فين جات ههه طلعي للبيت الى بغيتي و وريهم الحمامات الى بغاو ومشيت للكوزينة نشوف شنو كيدرو لقيتهم وجدو كولشي كيتسناو نقوليهم حطو . طليت على داكشي لقيت المسمن دواور وانا نقول ليطو قطعيه واش هما غيعرفو يقطعو شي مسمن !
ها كيفاش كيتحط المسمن للضياف اجي نوريك
شديت مقص ديال الطبخ فصلت بيه دوك الروندات متلثات وقاديت داك الشي وقلت ليهم يدخلوه وحطينا الفطور وكولشي .. نوعت ليهم ..درت ليهم البارد والسخون اللي بغا شي حاجة ياكلها وجلست حتى انا كنقطر معاهم ونتجمعو قالو ليا دراك زوينة رتاحينا عندك .. مي ماشي حيت دارك كبيرة ولاكن حيت نتي عزيزة .. بقيت كنضحك قلت ليه مرحبا بيكم وسولني فخونصي شنو هوا داكشي قلت ليه هاداك بغرير بلاتي نوريك كي دير ليه ونضت درت العسل على واحد البغريرة حطيتها ليه فطبسيلو وحطيت لباه حتى هوا بغا وبقيت كنشوف شنو بغاو واللي ماعرفش شي حاجة كنصاوبها ليه وقالو ليا فطور عندكم فالمغرب بحال لانيفيغسيغ .. بقيت كنضحك حيت هما كيحطو جوج حاجات يا اما عصير وشي حاجة معاه يا اما قهوى وشي حاجة اخرى و قلت ليهم لا حنا كنبغيو نبدلو ونوعو ضاروري هادشي التقيل فالفطور ولا فكاسكروط . المهم بقينا نهضرو على العادات والتقافات والجموع على هادشي مكيساليش تشاركنا فالهضرة كلنا حتى سالاو الفطور وقلت ليهم رتاحو اللي بغا يخرج برا يجلس يخرج واللي بغا يطلع يرتاح يطلع
قالي باها بغيت نرتاح شوية وطلعتو لبيتو وريتو بلاصتو وختها حتى هي مشات نعسات وبقات غير مها وخوها وهي كيدورو فالفيلا وخرجو للجردة كيكتاشفو الدار
انفردت انا و مريم فبيت النعاس بغيت نعرف الجديد عليها بدات تعاود ليا على السوربرايز اللي دار ليها .. هي كتعاود وانا كنحس بالنقص .. ماعرفتش علاش قد ما عاودات ليا داكشي الزوين كيضرني الحال .. ااه فرحت ليها وبغيت ليها الخير ولاكن قلبي كيضرني فيا البكية ماقدرتش نضحك .. خصوصا فاش مشا لدارهم وهضر مع باها باش يتزوج بيها ... كيفاش غنطرجم احساسي ومشاعري مافهمتش . قلت ليها واش هضرتي مع ماماه شنو قالت ليك شنو قلتي ليها راه ماماه ضريفة بزاف
قالت ليا لا ماماه ماتت مسكينة كان فيها كونسيغ وماتت
تصدمت قلت ليها كفاش؟ واش ماشي خو جاد ؟
قالت ليا خوه ولاكن مامات جات بوحدها ومامات هشام بوحدها .. باباه تزوج من بعد ما ماتت ليه مراتو الاولى اللي ولد معاها جوج اولاد ومن بعد تزوج المرى الثانية وولد معاها جاد وميساء
قلت ليها عليييها !!. حيت مامات جاد كتبان صغيرة قلت كفاش ولادها كبار وهي مزالة صغيرة !
قالت ليا باباه فاش كبرو شوية ولادو عاود تزوج بمامات جاد سليمة .. قالي هشام باللي كانت ضريفة وفاش جات عندهم كانو كبار شوية كيعرفو كولشي لاكن جداتهم هي اللي رباتهم وكيقولو ليها ماما اما جاد وميساء بوحدهم ماماهم ولداتهم فبلجيكا .. وحتى هي كانت عايشة تما من قبل وتعرف عليها باباهم تما مي هما خوت .. قالي شهام مكاينش فرق وبلعكس فاش كان جاد صغير كانو هما كيحضيوه ويتبعوه يعني كيحسو براسهم مسؤولين عليه داكشي علاش هشام كيدير جهدو باش حتى حاجة ماتشوش على جاد ويحقق الحلم ديالو وينجح .. حيت الى نجح هوا حتى هما غينجحو والحلم حلمهم كاملين كلهم كانو كيتسناو يرجع بطل عالمي .. سوا ماماه ولا باباه ولا خوتو .. كاملين كيدعموه نفسيا باش ينجح .. وقالي هشام هادشي علاش تصرف معاك داك التصرف والسيدة اللي هضرات معاك هي جداتو يعني ماماه اللي رباتو فهمتي دابا .. وندم على داكشي اللي دار قالي ماكنتش كنعرف شيماء قالي شافك فشي سيتوياسيون مازويناش خاف على جاد يتأثر وينسا داكشي اللي خدمو عليه سنوات . ماعرفتش اشمن سيتيوياسيون شافك فيها .. هادشي اللي كاين
تنهدت وقلت ليها راني عاودت ليك كفاش كنت .. الشراب والكارو وهوا اول مرة يعرفني شافني هاكاك صافي كرهني ..مي دابا حياة جديدة وكولشي تبدلو واللي وقع وقع ووو..وو
كنت كنضحك ونهضر حتى دخلات ليا البكية فالهضرة ماقدرتش نكبح مشاعري حيت كولشي تحطم وتدمر وماكتابش .. هبجت راسي كنبكي ويدي على نيفي ماباغاش نبكي باغا نسا كولشي . عنقاتني قالت ليا علاش كتبكي نتي زوينة وقدامك الحياة تستاهلي ما احسن وعنقاتني قلت ليها مكنبغيش نهضر على جاد ومكنبغيش نسمع عليه شي خبار كما كان .. بغيت نساه .. الى بقيتي هاكا مغنقدرش ننسا
قلت ليها الاللة بقاي غير مواضبة على صلاتك وعلى دينك هاداك هوا الجميل
عنقتها وقلت ليها يالاه نهبطو نشوفو شنو كيدرو فلكوزينة .. نزلنا كن لابسة بيجامة عادية سروال و الفوقاني ديالو باليدين ماطويلش بزاف ولاوية على راسي شال .. لقيت خوها جالس متكي فالجردة شاد تيليفون كيتفرج فشي ماتش ومها وختها حداه كيشربو اتاي ويتأملو الطبيعة ودخلت للكةزينة كنت وصيتهم يصاوبو الدجاج محمر بالدغميرة وفاش يساليو يعيطو ليا .. لقيتهم يالاه طيبوه والشلاضة محطوطة مزال تستفات .. اول مرة يجي عندي شي ضيف للدار ماموالفينش بالضياف وسعاد ويطو مكيعرفوش لداك تخربيق بريستيج قلت ليهم نتوما غير طيبو انا غنجي نقاد داكشي باش يعرفو ياكلو منو وجبدنا طبسيل مستطيل طويل فرشتو بالخص وستفت فيه دوك الدجاجات محمرين معمرين بالفيغميسيل وزوقتو من لفوق برقائق اللوز محمر لقيتهم حاطين ليا كولشي واجد وحطيت فجنابهم شي حامضات فيهم العريسة وشديت جوج طباسل غارقين حطيت فيهم دغميرة معاها الكبدة والزيتون حطيت فيها مغارف صغار وجريت واحد الجزج طباسل ستفت فيهم السلطة المغربية منوعة وقلت ليهم يحطو كولشي فدقة حيت غيهزو ويحطو فطباسلهم ماشي بحالنا وكل واحد شنو غيبغي ياكل وحطينا ليهم الغدا غير نزل فوق الطبلة قالو واااو هادشي زوين .. عجبهم الشكل ورحبت بيهم بقيت كنسول كل واحد شنو يبغي نقطع ليه كاسن اللي بغا الصدر كاين اللي بغا فخد .. وقفت قطعت ليهم وحطيت ليهم فطباسل مع الفراشط والموس وقلت ليهم هادي سميتها الدغميرة ... بقاو كينطقوها ورايا بززز حسيت براسي بحال شيومعلمة مضورة بيها التلاميد كنشوف فكل واحد وهوا كينطقها ونصح ليها ونحرك لساني باش ينطقها مزيان حتى نطقوها كاملين وقلت ليهم كتمشي مع الدجاج محمر .. رددو معايا ديك دجاج محمر بقيت نوقف لساني نوريهم حتى نطقوها كيعاودو فيها بيناتهم واحد كيقول لاخر ..جاججمهمر
شبعت ضحك معاهم تغداو وعجبهم الغدا كلاو كولشي حتى حاجة مابقات اما انا تكهمت ماقديتش ناكل حيت تحمست بزاف وفرحت بزاف وهاكا كيوقع ليا كتسد ليا الشهية بقيت مقابلاهم حتى سالاو ونزلنا الديسير كلاو حتى شبعو والعواصر وهزينا كولشي يالاه نوصلو كاسكروط فالوقت .. اناري الضياف شحال صعاب وجبة مور وجبة مكاينش الراحة عمرني عرفت الضياف صعاب وخاصك تكوني واقفة على شغلك لاكن السعادة والفرحة معاهم كيعمرو الدار ويبدلو الجو مكتسخاش بيهم واخا يكونو فيهم تمارة .
وليت ندور ويقول ليها باها داامييرة .. زعما دغميرة ... وندوز من حداه نصحح ليه ونبان ليه عاوتاني يقول جاج مهمرر .. وقلت ليه فلعشية نوريك السفة .. قالي صافا .. قلت ليه لا السفا ..تلفت فخونصي قالي صافا؟؟ شنو كتعني ؟ قلت ليه لا السفااا كتعني الماكلة غنديروها فلعشية كتجي حلوة .. قال اااه اوكي سافا؟ قلت ليه سفااا قالي باه سيفا ؟ اوييلي فشلوني بالضحك باغين يتعلمو وكنقول ليهم الحاجة كيبدا يرددوها النهار كامل بيناتهم وواحد يصحح لاخر زعما كيقتلوني بالضحك . حطيت ليهم السفة فالليل باش ينعسو خفاف وقلت ليهم هي هادي وعطيتهم درس عليها وعاوتاني الموت ديال الضحك حتى طاح الضلام كانت تلفازة شاعلة وجبت ليهم باش يدوزو لعشية كانت التلفازة فيها موسيقى وكول مع راسهم هما اللي عايشين السعادة .. كان باها جاي وبدا يشطح داك الشطيح ديالهم بشوية عليه وجر مرتو من يدها ناضت بدا يشطح هوا وياها بشوية داك الشطيح المأدب ويضورها ويعنقها كيتأمل وعايسومع الموسيقى .. حطيت ليهم الماء عجبني الجو بقيت كنضحك ونسفق بيدي انا بنتهم الثانية متكية مكتشوفش فيهم شادة تيليفون وجا فخونصي كيسفق ويشطح من لهيه مد ليا يدو بواحد الحركة مأدبة وحنا راسو كيضحك باش نشطح معاه .. حشمت ماعرفت منقول بقيت كنضحك ومديت ليه يدي واخا مكنعرف لداك النوع ديال الرقص بقيت غير كنمشي ونجي ويضورني فبلاصتي واحد الشوية ورجعت اللور كنسفق وجلس حدا رجلين ختو بقاو الابوين كيشطحو حتى عياو وسهرو واحد الشوية وطلع كولشيو ينعس وطلعت عند مريم دقيت كانت كتهضر فتيلي .. جيت نرجع بحالي قالت ليا دخلي دخلت وقطعات قالت ليا هشام قالي نديرو عشا برا نجمعو ليفامي يتعرفو على بعضهم غدا ..
قلت ليها اه مزيان باش يتعارفو قبل العرس احسن حاجة غيديروها .
عجباتني فكرة التعارف وشي عشا على برا لاكن الصباح تبدل الرأي وجات عندي مريم للكوزينة قالت ليا راه مابقيناش غنتعشاو على برا عرضو علينا للدار قالي باش هاكا ناخدو راحتنا اكثر .. من بعد ونديرو شي عشا
قلت ليها الصراحة عندو الحق حيت اول لقاء من الاحسن يكون بيناتكم ماشي قدام الناس . مزيان اللي عرضوكم للدار ..
قالت ليا انا غنمشي عند ماما نقولها ليها ومشات تكلفت بالغدا وحطينا ليهم اللحم بالبرقوق والمشماس بطريقة حضارية يقدرو ياكلو مرتاحين وتعمدت نحط ليهم الشهيوات المغربية باش يتعرفو على الطبخ المغربي و تغدينا وسط الضحك والنشاط علمتهم ينطقو اللحم بالبرقوق بلكشيفة وخلات ليهم ديك البرقوق فالفم كل واحد كفاش خرجها وانا كنسخف بالضحك .. دازت العشية بيناتنا دازت زوينة بزاف غير الضحك والنشاط مكاينش النعاس ومكاينش الملل دغيا نساجمنا كاملين وكنتجمعو ونهضرو بلا حواجز قلت ليهم غنساريكم كازا غتعجبكم بزاف ودوزناها جموع رجعو كيدخلو معايا للكوزينة .. كل مرة نلقا واحد حدايا فاش كنكون كنقاد داكشي وكيبغيو يكتاشفو كولشي ويدوقو ورتاحيت لضيافتهم ماحسيتش بيهم كاع متقلين عليا
فلعشية بداو كيوجدو يمشيو للعراضة وكنت مع مريم واقفة كنختارو شنو تلبس حتى قالت ليا صافي انا غادي نلبس راسيو عارفة كي ندير غير لبسي نتي
كانت يدي فالبااكار فاش سمعتها وحبست درت واحد الابتسامة وتلفت قلت ليها انا مغنمشيش للعشا
هزات عينيها فيها قالت ليا مغتمشيش ! وعلاش؟
ابتسمت وقلت ليها هادا عشا عائلي خاص تكون فيه العائلة بوحدها ويتافقو على بزاف ديال الحوايج
بقات كتشوف فيا مطولا وجات شدات ليا فيدي قالت ليا ونتي وحدة من لافاني علاش كتقولي هاكا!!!
تنهدت وقلت ليها لا منقدرش نمشي عير خليني على خاطري .. نتي كتحسبيني من لافاني ولاكن عما ماعارفينش العلاقة اللي بيني وبينك كي دايرة .. كنبان صديقة وصافي من الاحسن بلا منمشي
حاولات تقنعني لاكن ماقدراتش وحسيت بيها تبدلات وكترمش وتلبس ساهية لاكن ماعندي مندير هادشي اللي خصو يكون . عاونتها لبسات لبسة موديغن زوينة وقاديت ليها الحجاب مزيان جان فنة كتحمق وجلست على طرف الناموسية قلت ليها عبد الله غيوصلكم حتى لتما ويرجع يجيبكم قالت ليا
هشام غيجي عندنا يدينا ويردنا قلت ليها ماشي مشكل وبقيت كنشوف فيها كتقاد راسها حتى جا هشام عيط ليها هبطو كاملين خرجو جاب ليهم طموبيل كبيرة فيها اللور جوج دخلات ديال الكراسا وبقيت كنطل من واحد البالكون حتى ركبو .. قلت هاهما غيمشيو شوية نزلات مريم قلت يمكن نسات شي حاجة وطلعات عندي قلت ليها واش نسيتي شي حاجة ؟ قالت ليا هشام قالي تمشي حتى شيماء
قلت ليها لا قوليه مابغاتش!
قالت ليا لا واالو قالي تمشي حتى هي وحدة من لافامي وحتى بابا وماما كولشي سول عليك قالي علاش مابغاتش تمشي
بقات كضحك ودخلنا كانت فيلا بحال ديالي فالحجم اصلا عبار الفيلات واحد .. كانو الاضواء شاعلين والموسيقى فالفيلا هادئة تقول غاديين نخطبو .. استقبلاتنا سليمة بواحد لكسوة سامبل حد الركبة وصباطها والشعر .. لاكلااص كتسالي معايا هاد السيدة اية فالجمال والرقي .. الجمال فالتعامل واللباقة والاناقة والكلام .. تبارك الله عليها .. دخلنا سلمنا كانت مرة اخرى كبيرة شوية واقفة كتبان ضريفة حتى هي وكان باه .. انا كنسلم على مو وكترحب وهوا يبان ليا جاد نازل مع واحد الدروج كيجمع كمام القميجة بلا عكاز بلا والو
غير شفتو شداتني الشقيقة فعيني وقع ليا سيركوي فالمشاعر بقا حنكي على مو نسيت راسي ورجعت رمشت . شفت فيه من تحت الدف جاي دار واحد الابتسامة وشافني بقا كيشوووف وبدات ديك الابتسامة كتهبط شوية بشوية حتى جا قدامو بابات مريم وشاف فيه رد ديك الابتسامة سلم عليه وسلم ورحب بيه و بدا يسلم على اللي كيدخلو بقيت انا اللخرة حسيت بالسخونية وقلبي غيخرج ودايرة واحد الابتسامة ماعرفتها ابتسامة ولا تشنج عضلي فكي تكوانسا ولقيت راسي واقفة حدا فخونصي ماعرفتش نزيد ندخل ولا نهرب نخرج ولاشنو ندير توثرت وبقيت داخلة موراهم بشوية وفخونصي مورايا حتى وصلت لعندو ماقدرتش نهز فيه عيني كاع مديت غير دي قاصني فيها بيدو حسيت بالشلل فركابيا ومازيرش على يدي سلم عليا بشوية وجمعت يدي كانو مشاعري بحال الامواج كيتسابقو ودقات قلبي كتتراقص.. لمسة مكاملاش فيها ثانية تألفات فيها قصة . زدت لداخل خرجونا للجردة كان الجو زوين مريح وكانت تما جلسة والاضواء منضر راائع والشجر حديقتهم فنة .. وكنت محتاجة لديك تلجلسة يضربني البرد ونتهوا . جلسنا على واحد الفوطويات زوينين مريحين فوق واحد الارض خشبية وجيت فالقنت ديال الفوطوي وحدايا واحدايا واحد اخرى ..جيت بين مريم وفخونصي جلسنا وهزيت عيني جات ميساء سلمات علينا كضحك ومشات جلسات قدامنا وجلس الجميع شي مقابل مع شي الا جاد اللي ماخرجش عندنا واخا دورت وجهي لور كان الزاج ورايا كيبين الفيلا من لداخل بانو ليا واحد جوج خدامات كيمشيو ويجيو صافي
قلبت وجهي عند فخونصي كيهضر معايا قالي الجو دالمغرب مريح
ابتسمت وقلت ليه عندنا المناخ مخلط فكل مدينة والمناخ ديالها
قالي هادا الجو دالبحر لا؟ حسيت بحال الى جو البحر
ضحكت وقلت ليه اه بصح جو البحر حيت حدانا البحر ......
وبديت نهضر انا وياه ومريم حدايا كتهضر مع سليمة جلسات حداه وبدا الحوار والضحك والتلقائية فكل شيء... مابانش ليا جاد بقيت كل شوية نضور ماشفتوش طولنا الحديث شحال وقالو لينا اجيو لطاولة العشا ونضنا كانو خرجوها يمكن غير لتما كانت طويلة مضورة بالكراسة ولاضواء مضوين عليها منضر خيالي كيجيب الراحة والهدوء نضت مع الكل كل واحد خدا المقعد ديالو بعشوائية بلا ميختار وجيت هاد المرة بين سليمة وفخونصي حيت لقا راحتو فالهضرة معايا كنجاوبو على كلشي رجع كيتونس بيا . وجا فالراس بابات مريم والراس اللي من الجهة لاخرى قريب ليا جلس بابات جاد بيني وبينو سليمة فالزاوية .. وقدامنا مريم وهشام والبقية كل واحد فين جلس بقا كرسي خاوي جا جاد غير شفته حولت عينيه لجهة اخرى ابتسم وجلس حدا باه فداك الكرسي وعراو على العشا مان داكشي كيشهي شي اطباق مامفهومينش ولاكن بنين داكشي باين طبخ ديال شي تريتور واعر . ماهزيتش عيني فجاد بمرة وقالي فخونصيوغير بينو وبيني واش حتى هادا طبخ مغربي
حرك ليهم راسو بتأكيد قاليهم بطل عالمي مشاء الله .. وبدا يعد ليهم الاسماء اللي اعب معاه وفاز بالمقابلة انا هوا كياكل ويضحك ليهم حتى جات عيني فعينو وانا نهبط عيني بزربة وجلسو يهضرو ماتوقعوش يكون ملاكم كبير وقالو ليه فاش غنرجعو الدار غنطلبو من شيماء دير لينا مقابلة من المقابلات ديالك نتفرجو .. برافو عليك
ابتسمت ليهم وحركت راسي و تلفت عند فخونصي بعفوية شاف فيا وشار ليا لجبهتي قلت ليه شنو ؟ قال واش عادي يبان شعر ؟ حيت مريم كديرز الفولار مكتبغيش يبان شعرها
قلت ليها شعري!
كنمضغ وكنهضر قالي اه شعرك وهز صبعو دخل ليا الزغبة قلت ليه شكرا قالي هادا واجب وضحكت معاه مابغيتش نشوف نهائيا فجاد باش مانرتابكش وحاولت قدر الامكان حتى تعشيت وسالينا نضنا رجعنا بلاصتنا كان بات مريم وكيهضر مع جاد ومشينا رجعنا بلاصتنا درت رجل على رجل وجلست وهاد المرة جيت حدا باه وهوا كيهضر مع بات مريم عطاه وقت وجلس معا مقابل معيا وانا ساكتة حاطة يد على يد كنشوف .. بداو يشكروني ويمدحوني قالو ليهم عندكم البغرير زوين .. دجاج محمر .. لحم بالبرقوق
بديت كنضحك وكانت سليمة على يدي ليمن ليسر جالسة قالت ليا درتي ليهم شهويات
أنا وبعدي الطوفان الجزء 14
محتوى القصة
التنقل بين الأجزاء