كانت ليلة حنينة ودافية مليئة بالمشاعر والاحاسيس نعست على صدرو احلى نعسة ماحلمت لا احلام لا حتى حاجة .. ما أحلى النوم على صدر الحبيب بلخصوص فاش كضربك الفيقة فالليل تبغي تقلب وكتلقا راسك حداه .. داك الاحساس بحال جغمة ديال الماء فنصاص ليل كترجع تنعس مرتاح .
العرس كيقرب والكومبة كتقرب .. حددنا موعده انا وجاد من بعد الكومبة فاش يكون الفرح فرحين .. حددنا التاريخ وقلت لماما تعرض المدعووين وعطيتها فقط المقربين .. اما ريحة الشحمة فالشاقور قلت ليها حتى تعرضيهم بوحدك .. دابا غنعرض على عمومي وعماتي وخوالي وخوالاتي واولادهم ورسلت ليهم دعوات مكتوبة لتحت ممنوع الاطفال منعا كليا ... واخا عزاز عليا الاطفال لاكن باسلين وماشي ديال لعراسات ولول يكونو ولادي وعارفاهم غيحمقوني منديهمش باش منخصر للناس العرس.. حنا مقيوم علينا العرس بالملاين وزبابل غتحط فيه مطرطق بروتوكول .. وماشي ديالي بوحدي باش ندير مابغيت .. مادام ختاريت نتزوج ببوكسور قدو قداش فخاصني نقبل بالوضع ديالو حيت هوا اللي مشهور ماشي انا وهوا اللي صورتو فالواجهة ومنبغي حتى حاجة تحشمو وات تحشمني
قالت ليا ماما لا وحشومة واش غيسمحو فولادهم وبقات كتشكي وجيتها من اللخر .. قلت ليها اللي ماعندوش كي يدير ليهم يبقا معاهم .. ديك البسالة والطيران راني عارفاها والمشكل والديهم كيرخيو ليهم .. كنشوفهم فالعراسات ديالنا عاطيينها للجرا والسيباق ولا يمشيو يجلسو فالبرزة ! .. زيد على هادشي ياربي تسمح ليا مكيهتموش بمضهر اولادهم وانا فهاد الحالة ماعندي ماندير ليهم جهد الله غلاب .. انا ختاريت نتزوج بواحد من غير الطبقة ديالي فماعندي كي ندير ! نشوه راسيوقدام الناس يقولو عليا العروسة اللي خدا همجية لا هي لا عائلتها !.. ويبقاو عليا اش هاد نيفو اش هاد المستوى ... حنا دراوش بسطاء ولاكن راه المضهر كيلعب دور بلا منبقا نكدب على راسي حيت فاش غنسمع شي كلمة عليا ولا على عاىلتي مغاديش نرضا واخا نكون من طوب والثقة فالنفس حاليا كيجيبها المهضر فقط بالنسبة ليا وخصوصا قدام عاىلة بحال عاىلة جاد .. قبل مانحط ليزانفيت سمعت ماما كتعرض كيحساب ليها غندير لعرس فالبلاد .. اللي قاليها عندي الضياف كتقول ليه ماشي مشكل الخير موجود ! ااتي فين هوا الخير امي واش تكافيت حتى معاهم بقا ليا غاضيافهم ... وعندنا قاعدة خايبة اللي عندو شي ضيف كيجيبو معاه واللي عندها شي ختها ضيفة كتجيبها معاها وحاجة اخرى ماينة فشي وحدين فينا فاش كتعرضيهم كيبداو يعرضو على شكون يمشي معاهم للعرس !. قلت لماما حبسي عليا هادشي هادا حيت غتخرج مني مزاينة غير ديال الحوايج باش حتى واحد فعاىلتي مايحس براسو عندة نقص واخا غادي يضهشرو حيت عمرهم حضرو عرس فيه فنانين ولا رياضيين وخصوصا جاد عطاني سميات ديال من ذهب معروفين عالميا ديال صحابو غيجيو لعرسو فهادي فحد داتها صدمة يقابلو لاعب كورة ولا شي واحد مشهور اما حتى الوسط الفني ماعندوش معاه كاع ومو اللي عارضة على شي اسماء لامعة من الفنانين والصحفيات المعروفين .. الناس واصلين ماشي غير ماديا .. حتى ثقافيا واصلين ونجي انا نعفط على خرية قدامهم نخليهم كيضحكو عليا !
قطعت لياس لماما وباش نتهنا من ناحية عائلتي حيت فيهم شي وحدين كيبغيو يبانو بالذهب وكيديرو الفولار ويدليو السناسل بلعرام من الفوق .. نسقت مع واحد المنسقة باش تكلف ليا بعائلتي ودرت ليهم شغل السواعدة والعزلة ... هاد العزلة والسواعدة حتى هي عندي معاها قصة بوحدها تفكرتها حيت نفس سيستيم عندير ليهم نهار العرس . المهم خديت غونديفو معاها هي تكلف ليا بوكولشي حيت ميمكنش انا نتكلف بكولشي .. مشيت عندها للمقر استقبلاتني انا وبشرى اللي فين ما مشيت جاراها معايا وقلت ليها عندي العرس وقلت ليها فلان فلاني ووصيتها يبقا الموضوع بيناتنا ميخرجش للصحافة واخا فاجآتني وقالت ليا راه خرج ولاكن انا فالاول ماصدقتش حيت البوز كلنا عارفينو .. حتى لدابا عاد صدقت . قلت ليها انشوفوشنو كتبو ودخلات وراتني ديك الحيحة اللي فالسوشل ميديا .. تصويرتي انا وياه خارجين من اوتيل شاد ليا فيدي كنا بجوج دايرين نضاصر وحداها صزرة مصغرة مزومين لينا على خواتمنا وكاتبين مبروك الزواج البطل جاد الهواري . كاين اللي واخدها بسخرية كاتب عزائنا واحد البنات طار فرمشت عين البطل ديالنا
صفحة اخرى حاطة الصورة والعنوان كاتبة مال هاد الابطال والكوايرية ديالنا غير كيبانو كيطيرو للزواج بالخف مافمتش!
عنوان اخر كاتبة اللي عينها على جاد الهواري دير نضاصر
ضربت طلة على التعاليق وهي وبشرى كيهضرو بغيت نعرف اراء الناس شحال هادي مادخلت ليهم . لقيت واحد كاتب الله يكمل عليه بلخير ويرزقنا شي بنت الناس بحالها
وحدة قالت ليهم تزوج بصاحبتو اصلا كانت باينة حيت كترصدو لكامرة غير معاها واخا تفارقو رجعو هاد المرة بجدية ولو ماكانش كيبغيها مغيفكرش يتزوج والبنات كيطيحو عليه بحال الشتا
قالت وحدة المجامر هادو
رد عليها واحد قاليها فسوتك ياك اختي ؟
نوضوها سبان بجوج .. علام بوحدو هاد السوشل ميديا .. وحدة قالت ليها انا كانت عيني عليه الصراحة
وحدة قالت انا كنحلم نتلاقا بيه غير مرة راه كنحماق عليه البنات عفاكم عاونوني نوصل ليه
واحد كتب .. العلاقة اللي بيناتهم زوينة عا من تصاور كتحس بيهم مرتاحين لبعضياتهم . وحدة قالت ليهم انا مابقاش كيبان ليا شي واحد اخر من غير جاد الهواري وليت كنحلم بيهم هاد الخبر مرضني فحياتي
بقيت غير كنشوف ونقرا تفكرت المراهقة ديالي فاش كنتزعط فشي ممثل ونبقا نعلق فتصاورو ونكتب عليه فالكارط بوسطال .. قلت هادو مراهقات هما اللي كيكونو هاكا واغلب السوشل ميديا مراهقات اي حاجة كتأثر عليهم .. رديت ليها التيليفون وقلت ليها بغيتك تتكلفي ليا بلافامي كلها .. حنا كولشي عندنا داير الحجاب بدون استثناء .. بغيت تشوفي مع شي وحدة كتكري تكاشط .. بكون ثمن مناسب ويكون داكشي فالمستوى اللي يليق بالعرس ديالي ، ديري معاهم الخاطر وتلبسيهم وتشوفي شي واحد اللي يدير ليهم مكياج و تقادي ليهم الى بغاو يقادو وكاين بنات العائلة اللي بغات تصاوب الشعر ولا شنو بغات المهم نتي اللي عليك تكلفي بيهم حسب رغبتهم وفنغس الوقت يكون داكشي فالمستوى وتوريهم كفاش يتصرفو شنو اللي ماخصهمش يديروه .. خدمتك هادي بلا منحتاج نوريك .. اما الرجال بلاش حيت منقدرش نفرض عليهم شي حاجة يقدرو يغصبو ويمشيو لاكن وصي العيالات ديالهم يتكلفو برجالهم .. كما كان الحال الفرق كيبان فالعيالات كثر من الرجال الرجال شنو ما لبسو كيجيو عاديين .
رصيت معاها ووصيتها ومشيت انا وبشرى كنتجمعو وخايفة نتحشم قلت ليها راه عائلتي لا علاقة بعائلتو وفرق شااسع حنا بلدييين بزاف واخا فينا اللي رومية ولاكن راه كتجي تقادها كتعورها مكتعرفش وكتقول راني كنعرف .
قالت ليا بشرى يحسن عوانك راني هازة معاك الهم .
لحسن حضي ان بشرى حتى هي من الاطلس لاكن ماشي من نفس القبيلة وحتى هي عندها الطاسلة فااجبل والشلحة ديالنا وحدة غير هي قرات وكبرات فالمدينة بحالي وانفتحت على الدنيا بكري وكتسافر فبزاف للخارج وجمعاتنا الصدفة انا وياها وتفاهمنا حيت من بلاد وحدة حتى فاش كنهضر على شي حاجة كتعرفني علاياش كنهضر وعارفة التقاليد وداكشي لاخر مكنحتاج علد نبدا نشرح ليها
جري وجاري وطلع وهبط ماكدبش اللي قال عرس ليلة تدبيرو عام حيت واخا الفلوس واجدة لاكن خاص تيساع الخاطر ولو يكونو الفلوس واجدة . بالنسبة للمصاريف ديالو فداكشي اللي متعلق بيا بحال هاد المنسقة والخوايج وداكشي لاخر تكلفت بيه راسي اما التريتور والاوتيل تكلف بيه جاد من جهة المصاريف يعني هوا اللي هز العرس باللي فيه ..
تطلقات اغنية فطمويل داتني الغربة داتني .وسكت بقيت كنتسنط ليها ونخمم ... الكومبة وصلات وجاد جمع حوايجو وجمعت حتى انا حوايجي ودار معانا هشام نتلاقاو فهولندا ومشينا حنى ولكروب وتزادت بنت جديدة مع الكروب هي اللي كتقاد اوراق الطيارة والاوتيل وتتكلف بكولشي وكتجمع حتى ماطيريال الكومبة باش يلعب .. زعرة وكبيرة سبورتيف تعرفت عليها غير السلام فاش تلاقينا فالمطار وسولت جاد قالي هاشنو كدير وبحالها بحال الفريق اللي كيسافر معاه . وصلنا هولندا مشينا للاوتيل رتاحينا وكان لاصال فداك لاوتيل كان كيهبط بوحدو يتريني فيه هوا والفريق ديالو كيرجع عندي مفصل كنبدا نماسي ليه عضامو يوميا .. حتى الماكلة اللي كياكل ناقصة ملح وناقصة سكار وكياكل شي اطباق منقدرش نبلعهم بلا ليصوص وبلا توابل .. حتى العواصر اللي كيجيبو لينا فاش كنكونو كنتعشاو كاملين انا وياه والكروب كانو كيحطو ليه القرعة ولا الكاس كبير كل مرة ولونو مرة اخضر مرة حمر مرة صفر مخلط والحق يتقال .. الفريق ديالو احسن فريق كيتهلاو فيه مزيان من جهة الماكلة واخا ينسا رادين معاه البال وهشام حاضي الكبيرة والصغيرة كيتحط داك الكاس كيبقا يشرب منو حتى كيخويه كنقول ليه فين كيمشي هاد العصير كل مرة تهبط على كاس كيقول ليا كيمشي فواحد لبلاصة وااعرة
نهار الكومبة بايت سهران كنقول ليه نعس غتفيق بكري دير تسخينات كيقول ليا لا راه غنفيق وبايت مقصر معايا كيضرب فالحلوى .
نضنا الصباح اول حاجة درتها صليت وكنطلب الله يربح . لبست واحد كابيتشو كحل مستل واسع وهابط شوية خفيف كان شوية البرد وسروالو حتى هوا كحل وسبرديلة ودرت شالي فالكحل ونزلت لحقت عليهم كانو فطموبيل كحلة كبيرة حدا باب الاوتيل ركبت حدا جاد كان خوه كيدير شي حركات وكيقول ليه ماديرش هادي دير بحال لا غادي ضرب بديك الرجل وضرب بلخرى ماتعطيهاش الجهد بزاف . قلت ليه واش كضرك قالب لا .. والا واها صرو مغيبغيش يقول وشفتو كيتمشا عادي مكيعرج بيها ما والو .. دخلنا لواحد البلاصة كبيرة بحال شي تيران دخلنا بالطموبيل حتى للداخل ونزلنا دخلنا لواحد القاعة كبيرة غير حنا الل فيها .. واحد الجو زوين لاكن الدنيا خاوية كنا غير حنا وجلست كنشوف فدوك البلاكارات والفوطويات كبار والطبلة بحال شي صال رومية حطينا الحوايج وجلسنا حنى دخلات واحد البنت كاورية جايبة شي اوراق سلمات علينا وحطات لينا الاوراق هزهم جاد طل ووقع ومشات قالت ليه شكرا خرجات وقلت ليه ديالاش هاد الاوراق قالث غا ديال الحضور .. زعما تبت الحضور ديالك راك هنا وراك جيتي
قلت ليه واش دابا غتلعب قالي لا حتى للثمنية .. عاد غيبداو
كانت واحد التلفازة مشعولة قدها قداش قالي تفرجي شوفي القاعة والناس ..
كانت التلفازة كتنقل اخبار القاعة الكبيرة اللي فيها الحلبة كانت كلها مضوية اضواء عكس المقابلة كتكون مضلمة .. كانو الناس قلال عاد كيدخلو وشي جالس مجمع شي واقف .. قالب ديك البلاصة اللي لهيه ديال المغاربة .. مكيجمعوش بنادم مع بعضياتهم باش متشبكش بيناتهم مدابزة
قاليا مغاديش يخسر راه غيربح ولاكن مغيلعبش من بعد شحاال حتى تبرا رجلو مزيان .. اللهم قلنا نبيعو الزمر ورجلو مابقا ليها والو راه غادة وكتبرى بلا ميهلكها ... ولكاغييغ ديالو راه غتبقا هي هي ماشي من خسارة وحدة كطيح ... يسمح ليهم فيه وياخد مليار كاش فالطبلة ويرجع بحالو يتعالج على خاطرو ويعرس مع راسو ومن بعد ندفعو الدوموند باش تنضم كومبة العام الجاي ويلعب مع هادا ويكون اليز مرتاح مع راسو ويفدي هاد الماتش
قلت ليه ويبغي لاخر يلعب
قالي بزز منو يلعب شوفي اختي شيماء هاد الرياضة كلها بلانات .. هادو اللي كينضمو عاد البطولات هادشي اللي باغيين .. الفلوس وصافي ودابا بنادم مراهن بالملتين صحيحة على جاد معارفينش رجلو واش عيانة ... الى باع الماتش غدخل فلوس صحيحة وغيقبلو دوموند المرة الثانية حيت مغادي يراهنو عليه وديك الساعة غيربح وغتعاود دخل فلوس صحيحة الى خسر لاخر .. فهمتي ... اما احسن يخسر ويمشيو برجلو معطوبة ولا ريال لا والو ولا يخسر ويمشي بمليار ونص ديال السنتيم فجيبو يجدد بيها النفسية ويرجع يلعب .. احسن مايضرب رجلو ويجلس عام اخر تا يبرا ودوز عليه شحال من كومبة
جاني كلام هشام منطقي .. الى ربح جاد وخرج على رجلو مغيلعبش من بعد وغيجلس وهوا مابقا ليه والو ويبرا .. بقيت ساكتة وهوا كيشوف قدامو فيدو قرعة دالماء وهشام كيهضر معاه ويطلبو ميتسرعش .. بقا العشية كلها كيفكر وهشام غادي جاي عليه حتى لاخر لحضة رسلو ليه من الادارة القرار النهائي ديالو وناض قاليه يالاه ونضت حتى انا مشيت معاه . دخلنا لواحد القاعة فيها شي ناس كبار وكلاص دايرين اجتماع على واحد الطبلة طويلة .. شافوه دخل تصدمو ومشا جلس ماشافش فيهم وماهضرش كاع مد ليه هشام الورقة وانا جالسة حداه شدها وقفها قراها ووقع عليها بالخف وتم تم دوزو ليه الفلوس للكونط ديالو نيشان وعطاوه ورقة فيها باللي داز القد والقد لحسابو وناض خرجنا من الادارة رجعنا لاصال
لاح ديك الكاسكيطة وتكا على واحد الفطوي وجلست حداه كنلعب ليه فشعرو قلت ليه واش مقلق؟
قالي عادي هادشي كيوقع
قلت ليه لمصلحتك .. تبع مصلاحتك هي اللولة
قالي صاافي دابا ماشي مشكل.. مرة اخرى ان شاء الله
قلت ليه نتا مغاديش تخرج خاسر .. راك بعتي ليهم الماتش صافي يعني كنتي تقدر تربح ولاكن غضحي برجلك وبعام كامل . احسن حل هوا هادا
بقا ساكت قالي غنعس شوية تا توصل لوقيتة وحط الراية كانت مطوية حداه على وجهه ونعس بقيت جالسة جاني الجوع قلت لهشام راه فيا الجوع تشهيت شي حاجة حارة .. قالي واخا انا غنجيب ليا شي حاجة ومشا هوا وديك البنت خرجو وبقيت جالسة تا داتني عيني كنسمع الهضرة وصافي .. فقت لقيت فمي محلول وراسي متكي اللور وفيا العطش والجوع .. لقيت الماكلة قدامي محطوطة مغطية بباي اليمينيوم وشفت جهة جاد لقيتو تقلب عطاني ضهرو والراية على راسو ناس وداير مخدة بين رجليه .. صورتو فديك الوضعية بحال شي واحد لاح الهم من موراه وضربها بنعسة .. حليت داك البابي ضرباتني سخونية الماكلة كتشهي وحداها طاسة ديال الحار ضربتها كلها .. انا اصلا عزيز عليا الحار نقدر ناكلو حتى مع الحلوى دلكريم وهانية .. بقيت هاك بالاك حتى بدا فمي يشطح بالحر وتبعت ليه جغمة ديال الماء ورجعت اللور تكيت تا صدقت ناعسة . حسيت بشي حاجة كتهرني فنيفي وحليت عيني لقات جاد قدامي شاد طرف الراية فيها الهدب صفر وكيهرني بيها باش نفيق .. قالي نوضي يالاه تفرجي فراجلك كيخسر . شفت هاكا وهاكا قلت ليه صافي جات نوبتك
قالي صافي وصلات ونضت وقفت كانت ديك البنت كتجبد القفازات والحوايج اللي غيدخل بيهم حطاتهم ليه .. قاليها جاد تديني نجلس حيت غيخرج ومغاديش نخرج معاه انا ونضت يالاه جيت نخرج جرني عنقني وباسني وخرجت كنضحك دوزاتني من واحد البلاصة فالكواليس حتى خرجنا فالحبلة نيشان كان واحد الصدع وواحد الهرج رهيب .. تشوك ليا لحمي شفت داك الحشد من الناس تخلعت قلت باز لجاد اللي كيدخل وسط داك القوم وكولشي كيشوف فيه .. بغيت نعرف احساسو وهوا داخل امام اعين الجميع والكل كيغوت .. انا دخلت غير سالتة وتخلهت هزيت عيني جاتني الرهبة .. داتني لدوك الصفوف الاولى ديال المغاربة دخلت بيناتهم فالصف الثالت في اي بي والناس ووقفين كيتسناو ويغوتو .. اول مرة نعيش هاد الاحساس فحياتي فين يبان شي عرس ولا شي عمارية وسط هاد الكم الهائل من الناس ، وصلت لبلاصتي بين الناس شافتني واحد المرى كتحمق بالزين ولابسة سبور قالت ليا بفرونسي واش زوجة جاد الهواري.. تصدمت فيها قلت ليها اه وهي تفرح قالت ليا انا خالتو وعنقاتني كتسلم عليا فرحت حتى انا وجرات راجلها قالت ليه فلانة وسلم عليا ولقيت العائلة كلها تما شي لفوق شي لتحت جيت وسط منهم بقاو كيطلو عليا ويشيرو ليا ويضحكو .. كان فيهم الرجال والعيالات والدراري والبنات وتما صحابو وعرام ديال بشار لقيت راسي وسطهم فرحات بيا خالتو وجلست حداها بقيت كنشوف حتى علنو على دخول جاد الهواري وطلقو ليه النشيد وتم داخل كيتهز لابس شورط كحل بوحدو فيه درابو ديال المغرل صغير فالجنب وعلى عنقو الراية اللي كان مغطي بيها والقفازات فيديه ومعاه الفريق ديالو كل واحظ قداش ، كانت واحد الشاشة كيدوز فيها الوزن والطول والسن وهوا داخل وبقيت كنقرا ونقول تبارك الله حتى سالا النشيد وتهز الجمهور واحد الهزة وكيعيطو ويغوتو .. تبورشت والناس كتهز يدعا فالسما وتشجع وعائلتو كلها واقفين كيغوتو .. درت يدي على فمي فاش شفتو دخل للحلبة كيوجد يبدا ورجلو مدورة بالباندة مزيان .. تهز قلبي خايفة ليه على رجلو خفت تتقاس الة تقاست غادي يسخط حيت كولشي دايرو على قبل رجلو ماتقاسش وداك الخصم تا هوا داخل شانت ولد الحرام كيهز يدو فالسما ويقول ليهم انا اللي غنربح وكيشنت حيت عارف راسو غربح .. شافو جاد وجمع واحد الدفلة لاحها ليه جيهتو .. كانو غايضاربو قبل ما تبدا المقابلة وفكهم هشام والمدرب لاخر ...ستافزني داك الحمار وكيستافز جاد حيت بعنا ليه الماتش عارف راسو رابح الكلب .. شفت فالشاشة كتبين كلشي عن قرب بان ليا جاد كيتحلف عليه وهشام كيشد ليه وجهه ويوصيه غير بيناتهم وخشا ليه واحد اللعيبة فمو ديال كتحمي السنان وزيد ليه على القفازات وناض تقابل مع داك الكلب وجه لوجه بقا كيدير في شوفتت من فوق نيفو ولاخر كيشوف ويضحك .. يالاه عطا الحكم الانطلاقة عطا جاد الجهد بقا غادي وكيعطيه قلت ناري ميمتي صافي مشات الوثيقة فخبر كان غادي يخلص غرامة فيه طون ديال الفلوس .
الناس عاجبهم الحال عاىلتو كيغوتو ويقولو ليه زيد زيد وانا العكس ديالهم يدي على فمي غنطيح بالخلعة كنشوف النقط طالعين كيجريو عندو و والحكم كل شوية كيوقف القتال وانا حاضية الشاشة وتعابير جاد اللي كيعبرو على الفقصة والغدايد وعلى الشنعة بديك القتلة اللي عطاه خلا ليه فمو كيشرش بالدم وخوه شادو كيهضر معاه .. هشام عقلو بغا يخرج الدفال كيخرج مع الهضرة بغا ياكل جنابو ولاخر مكيدير حتى ردة فعل جالس وكيشوف هنا ولهيه خرج لسانو عض شنايفو كينهج وشاف فداك الخصم .. حل هشام فمو خشا ليه ديك اللعيبة عاود وشحف بالهضرة وناض للشوط الثاني وقف ومزال داك الحمار كيستفزه .. بدات الانطلاقة كنشوف ديك الرجل كتمشي وتجي قلت عنداك يمشي يتعصب ويهزها يضرب بيها .. بقيت بوحدي اللي شادة قلبي وواقفة غنسخف اما الباقي كولشي كيغوت ويشجع من قلبو .. رصداتني الكامرة اللي كتصور شفت وجههي فالشاشة وبقات حاطة عليا كل شوية شدني والناس وعائلتو كيدورو يشوفو فيا .. جيت فيها بحال شي مصدومة واقفة مبندة وعيني خارجين بالخلعة .. داز داك الشوط الثاني على خير لاكن داك الخصم كلا قتلة كنشوف الاعادة ديال الهجمات بالعرض البيطيء .. فمو كيمشي ويجي بالدق واللكمة كدخل ليه فالجنب كيبان ليا العضم مشا وجا تحت الجلدة .. اما هشام غيتسطا مابقا ليا منقول عليه . دخلو الشوط الثالت وكنتسنا جاد يطيح ولا يدير اس طاح باش تسالي المقابلة ويسالي هاد الثوتر والخرجان العقل الخصم جمع راسو رجع كيوقف مقاد مابقاش كيستافزو شاف القضية حامضة قال هادا صافي مابقاش عاقل على الوثيقة وحتى انا قلت صافي انطفح الكيل عند جاد ناوي يخرج علينا .. كلا داك الخصم قتلة ديال الكلاب حتى مابقاش قادر يوقف رجع كيوقف بزز وشحال من مرة كيبدا الحكم العد العكسي وكيرجع يوقف فدقيقة تسعين .. مابقيتش قادرة نشوف فهشام حيت الوضع ديالو كيزيد يأزمني وقلبي غيسكت ومكنرتاح حتى كتسالي الجولة . جاد طلعو ليه النقط لحد الان هوا اللي رابح شفتو فالشاشة عن قرب جالس كيهضر معاه هشام وباس ليه راسو وانا نزل من تما مشيت كنجري قبل مايبدا طلعت موراه شديت فدوك الخيوط مخلوعة وجريتو من كتفو خبشتو دار عندي ودليت راسي شفت فيه قلت ليه عفاك ماتنساش الوتيقة .. عفاك راه تابعنا عرس انا ونتا متخليش الغضب يسيطر عليك وانتبه لرجلك صافي حبس هادشي .. وبقيت كنرغبو وهشام كيشوف فيا .. كنهضر ونلهت ورداتني ديك البنت اللور حيت كتبدا المقابلة ووقفت حدا الحبلة شادة يديا على صدري حسيت بيه فاش وقف تقصح فرجلو لاكن ماشي هرس ولا شي حاجة وبقيت كنعيط بسميتو باش يهدا ... هادي اخر جولة خاصو يتنازل مايخليش حتى تنتاهي الجولة حيت هوا اللي رابح .. بدات القتال وانا شادة فواحد الحديدة كنشوف قالي الامن بعدي لهيه ماديتهاش فيه بقيت واقفة وخلاني تما شديت راسي فاش بدا كيشوف فالخصم ديالو ويهضر معاه قاليه زعما مافيدكش طالع غير بالبيع والشرا حسابني بطل علامي ونتا غير واجهة . فقصني طرطق ليا مرارتي بقيت كنغوت حيت جيت قريبة سمعتو وقريت فمو واخا الهرج والصدع والحيوح . مدات ليا ديك البت الما شديت القرعة وماشربتش بدا القتال عاود بنفس الشكل شفت هشام حدايا رجل اللور وشد راسو تقا جهدو والدائرة ديال فمو رجعات بيضا وجا عندو واحد هضر معاه قاليه ماشي هاشي علاش تافقنا مالقا هشام باش يجاوبو .. حنا قلنا بما ان الماتش مبيوع فماكاين لاش يضيع الوقت من الجولة الاولى يخسر ونمشي بحالنا. ساعا كولشي تقلب وصلنا للجولة الرابعة اللي غتحسم شكون الخاسر وشكون الرابح و تجرجرنا هاد التجرجير كامل والحماس ناض فالجمهور رونوها .. وجاد باقي كيضرب شفت داك الخصم تهد مابقاش ليه الجهد حوالو ليه عينيه رجع كامل زرق من وجهه وكيوقف بزز قلت صافي كولشي ضاع والوقت كيتذكر فالبوق بقات خمسة دقايق يسالي كولشي حتى لاخر دقيقة هز داك الخصم يدو بغا يحمي راسو وعطاه جاد فرصة ماضربش حيت كانت باينة لو بغا يضرب يجيبو كاو كانت قدامو فرصة لجاد وماضربش جات فيه دقة فراسو وطاح قلت هادي هي الضربة ديال التنازل وبقيت كنطل من حدا الحلبة الحكم كيعد وانا كنعد معاه حتى جات من النهاية نيشان .. خسر بالضربة القاضية .. اشمن قاضية نقولو قاضية وصافي وتقلب الجو بقا الجمهور مصدوم جاتو الساكتة متوقعوهاش والجمهور لاخر ناض كيغوت وداك المدلول اللي فاز بدا ينقز واللي معاه كينقزو .. وقف جاد مشافش جيهتو كاع لاكن كيعرج شوية برجلو ماوقفش حدا الحكم بقا كيشوف بنص عين فداك الحمار اللي ربح ودفل جنب وتعلن فوز داك خونا عاد رجع فيا النفس حسيت بالاكسيجين كان مقطوع ليا ومشا هشام عندو جرو وطلعو ليه حيد داكشي من فمو ومشا مازاد تما حتى دقيقة دخل ومعاه الطبقة كلها ومشيت كنجري مع ديك البنت باش نتعرض ليه من الجهة الاخرى
تمشت للقاعة فين كنت جالسين بقيت واقفة كنتسناه حتى دخل وموراه هشام مشيت عنقو عنقتو لاكن تعامل ببرودة مافهمتش مالو شفت فهشام دار صبعو على فموو قالي بالاشارة ماتقولي والو صافي خليه ساكت .. سكت ماهضرتش وجلست ماعرفت شنو واقع كنشوف فجاد كيتحرك قدامي بملامح غاضبة .. واحد اللحضة جلس وشد راسو بقا شحال هاكاك وحتى هشام ماهضرش قال ليهم صافي جمعو نمشيو وبداو يجمعو خرج كولشي بقيت غير انا وجاد وهشام واقف مابغاش يقوليه يالاه تا ناض دخل فواحد السورفيت وخرج من تما تصادفنا مع داك الخاصم يالاه جاي فرحان احتافل مع راسو فالحبلة تا شبع .. شاف جاد وهوا يبدا يشطح ويدير شي حركات كيستاافزو ووجهه كامل جامج عينو مابقاتش كتبان واللي معاه فرحانين .. تعصب منو جاد ودار ليه فاك يو وتم غادي ولاخر كيسبو من اللور ويعايرو .. ضار عندو جاد وقاليه باقي نتلاقاو وديك الساعة ن**** صافي اولد **** ؟
رد عليه لاخر كيسب وهشام واقف قدام جاد كيقول للمدرب ديال لاخر يشد الكلب ديالو عندو ولا غيكبتوها تما .. تدخل الامن بسرعة وتم جاد غادي ولاخر كيسب من اللور .. تلفت عندو جاد وشد فحجرو دار ليه واحد الحركة وزاد فحالو حيد لهشام يدو على كتفو قاليه ما تحطش عليها يدك نتا
قاليه هشام واخا وسكت قاليا بعينيه غير سكتي ومشينا طلعنا للطموبيل جلست انا وهشام مقابلين معاه وهوا كيزفر وكيشوف قدامو وحنا فالطريق قاليه بفرونسي انا ولد **** الى تبعت
هشام شاف جمب ماجاوبوش وجاد كينكر بوحدو قاليه انا حساب ليا داخل على كومبة صحيحة غنلعب مع واحد معروف على اساس راه بطل غنعطي لي عندي ويعطي لي عندو ... فاللخر يطلع كارطونة ونبيع ليه الماتش من لفوق وكنت قاادر نربح الكومبة... قالك واعر بقيتو علينا واعر واعر دوختونا قلنا رجلنا مريضة غتاكل لعصى .. زدت ساهمت انا فالكاغييغ ديالو الفاشلة خليتو يبان على ضهري
حطيت داك الفرشيطة كحزت ديك الطبلة مابغيتش نجاوبو بغيت غير نعس نتسنط لعضامي ومشيت للجخة الاخرى سكت وعطيتو بضهري ماهضرتش .. دخل دوش وخرج لبس واحد الشورط وجلس حدايا حسيت بالناموسية هبطات وقبلت وجهي شفت فيه لقيتو عاطيني بضهرو جالس كيشوف فتيليفون اللي كل دقيقة يصوني ليه وكيقطع
دورت وجههي للحيط درت يدي على ليزار باش مغطية ساكتة سمعتو كيهضر مع باه ومعصب قالي ماخسرتش بعت الماتش وماحسابش ليا الخصم فنيان كنشوفو كيلعب قلت راه واعر خفت يعطيني شي دقة لرجلي ودرت بناقص وكولشي سبب هشام واخر مرة نعول عليه وبقا كيغوت الحوار داز بالفرونسي كامل شوية هضر مع مو ودار لهوت باغلوغ حطو فوق الطبلة ماتسوقش ليا نسمع ولا مانسمعش وكيهضر معاها كنسمعها كترطب معاه مكاين غا حبيبة كبيدة حياتي والفرونسي كتجي معاها ديك الهضرة والعبارات ماشي بحال الدارجة حيت حنا شعب مامولف يسمع الكلام الزوين واللي جا بهاد الدارجة وشكل يماها ماحطش فيها الكلام الزوينن اللي نتداولوه ونسمعوه واصلا ما لغة ما والو اللغة الحقيقية هي العربية الفصحى وهي اللي كيجيو معاها الكلمات الرومنسية .
بقات عليها بالحنان والكلام الزوين ويا حبيب ديالي متعصبش راسك خوك باغي ليك غير الخير .. البطل راك بطل ماحيدهاش ليك حتى واحد اللي بغا يبغي ولا كره يكره غتبقا بطل وراك عطيتيه وداك الفوز ديالو باطل نتا اللي فزتي ونتا البطل وماتفقصش ليا راسك وتهدن عفاك اولدي تكالما اكبيدة ديالي على قبلي وماتخلينيش مقلقة مانخلينيش نعس وبالي معاك .. عفاك الحبيب وبقات كتهضر وهوا كيتحرك كيجاوبها من بعيد .. وقالت ليه دوز ليا شيماء عفاك اولدي الله يرضي عليك .
قاليها وهوا واقفةكيعمر الكاس راه كتسمعك
حليت عيني تلفت بزربة قلت ليها نعام وجلست متكية قريبة من تيليفون قالت ليا عفاك احبيبة هضري نتي وياه راه غير معصب دابا وحاولي تكامليه سلتوبلي ماتخليهش يدير شي حاجة يندم عليها سولتوبلي حبيبة هوا محتاج دابا ليك محتاج للدعم النفسي راه اخسارة ماشي ساهلة لا عليه ولا علينا حتى حنا .. عرفتي عيني باقيين طايبين بالبكا فاش شفتو خسر ماحسابش ليا باع الماتش ووقع معاه هادشي كله ... سيلتوبلي حبيبة انا تايقة فيك وقفي جنبو خليه ينقز هادشي حتى يرجع بلا ميتأزم ونتأزمو حتى حنا معاه
قلت ليها غير تهناي كولشي مزيان وبقيت كنهضر وهوا فالبالكون كيكمي ويطل ويسمع فيها حتى قطعات وتقلبت لجيهتي خليتو يغضب ولا يجلس مالي انا شنو درت ليه يمسح فيا رجليه .. مالقا فيمن يشد غير فيا ومحيد ليا العرس .. بناقص منو لاهوا لا عرسه يخخ تفو ندمت حتى تزوجت انا كاع كن بقيت سيليباتير حسن ليا ولا هاد العياقة الخاوية يبقا يتنفخ عليا .. حنا شفنا مصلاحتو وهوا كيتهز الله يعطيه موصيبة تفو
نعست وكنت على سبة باغا غير نعس مابقيتش عقلت عليه واش نعس ولا منعسش ووليت غير كنهز كتفي بوحدي بلا ميهضرني شي واحد . ضربها بغبرة مابانش خلاني فالشومبر بوحدي جالسة قنطت بغيت غير نخرج ندور شوية .. كنصوني عليه ماكيجاوبش وكملات عليا بشرى سيفطات ليا الاخبار ديالو فالواتساب قالت ليا شفتي الصحافة شنو كتبو؟ دخلت نشوف لقيت كيهضرو عليا ويتنمرو ماخلاو ماقالو . ها منحوسة ها من نهار شافها ماشاف الربح ها التعاليق كيهضرو على اللقطة اللي مشيت عندو فيها شبعو فيا تنمر قالو عليا شي هضرة حشومة تتقال او تقراها العائلة زعما خويت ليه الركابي وكليت ليه رزقو وفشيت ليه مانعرف شنو وبقاو يهضرو يهضرو مرضوني ماقدرت نتجاوز ديك الهضرة تفقصت بقيت كنبكي وجاني انهيار رجع لقاني منهارة بالبكا غير دخل قلت ليه غنرجع للمغرب وكمل عليا قاليا ماشي دابا قلت ليه ردني ولا نرجع راسي قالس ماتصعرينيش دابا ومامساليش ليك .. عصبني قلت ليه بناقص من هاد والزواج ولا زبل ندمت على هاد الزواج غنرجع فحالي مابقيتش باغاك لا نتا ولا عائلتك كولها عطيني تيساع كرهتك نتا والشهرة ديالك
حسيت بالضلم حيت كولشي تمسح فيا ومن خوفي عليه جبتها فراسي اما ان ندخل سوق راسي هوا اللي غيضيع كن غلب عمرو يرجع يلعب تما عقوبة ليه على الاتفاق اللي خان .. جبت ديك الباليزة خلاني كنعمر فيها وخرج مشا زدح الباب بالجهد وبقيت بوحدي جلست كنبكي حتى شبعت وسمحت فدوك الحوايج هاكاك ولبست حوايجي حسيت براسي بغيت نطج . نزلت خرجت شديت طاكسي سولتو على شي حي ديال العرب يديني ليه ندرق فيه كمارتي ومشيت لواحد الحي فيها محلات وسوق ديال العرب نزلت كتنخصص وندور بوحدي حتى لقيت واحد المطعم دخلت ليه كان مغربي وجلست قلت ليهم بغيت كسكسو وحطوه ليا لاكن ماشي بحال كسكسو ديالنا ديال المغرب وعطاني معاه اتاي طحت فيه عمية لقمة مور لقمة ومصيت ديك الفلفلة الحارة حتى مسحتو وتكيت كنشرب اتاي سخفت وتيليفوني كيصوني .. طليت لقيت تسعود ديال ليزابيل ديال جاد وحطيت تيلي حدايا خليتو كيصوني كل دقيقة .. اصلا طلع ليا فراسي مابغيتش نرجع كاع داك لوتيل جاب ليا الغمة وهوا كيجيب ليا الطاقة السلبية فاش كيبدل يدور حدايا كيطير ليا الراحة والكانة بغيت غير نتسنط لعضامي .. خليتو صونا حتى فركع التيليفون ودخلت لكوكل بغيت شي حاجة نفوج بيها على قلبي ودرت قصص رومنسية متعة وطلعات ليا واحد الرواية قلت نبداها الى عجباتني نكمل ماعجباتنيش نبدل .. بغيت غير نخرج من المحيط اللي انا فيه والجو والواقع ديالي نعيش شي حاجة زوينة تبدل ليا الجو الكئيب ديالي وبديت نقرا من البدية جاتني مشوقة ماحسيتش براسي حتى قريت شي عشرين صفة وهي فيها كدا وخمسين صفحة ماحسيتش بالوقت ودرت مود افيون باش ميقاطعني حتى واحد وخرجت من العالم ديالي لواحد العالم اخر زوين بزاف ديال واحد الامير هندي تعلق بواحد الاميرة بنت شي سلطان وهي فسن صغير وخطبها مدة ست سنوات على بيدمن تكبر لاكن تزوج فديك الفترة لدواعي سياسية وعاود تزوج مرة اخرى لدواعي سياسية وبقات ديك البنت اللي كيبغي حتى كبرات ورفضات تتزوج بيه واخا كتبغيه وتموت عليه رفضات وبغات تلغي الخطوبة حيت تزوج وماقبلاتش ليه داك الزواج يكون على حب ولا على وثيقة فقط المهم هوا انها مابغاتش وبدا الصراع .. كان داك الجزء الاول طويل فيه احداث كثيرة نسيت راسي فين انا وشنو المشاكل اللي عندي حتى هزيت عيني لقيت الضلام فالزنقة والضوء شعل وانا نهبط عيني فالساعة لقيتها تسعود ونضت دغيا خرجت ركبت فطاكسي وجبدت واحد الصفحة من ديك القصة المشوقة كنقراها حتى قالي نزلي راه وصلتي
زرعات فيا ديك القصة الهدنة وعجباتني الطريقة باش تصرفات البطلة والكالم .. خلاتني نهدن واخا يوقع اللي وقع حتى حاجة مكتستاهل ننهار عليها ولا نبكي عليها ولا حتى نرفع صوتي عليها بحال شي مصعورة .. نتعصب .. نبكي .. نهضر .. لاكن فهدوء بلا ضجيج وبلا ضوضواء بلا هزات ارضية .
طلعت الغرفة ديالي ودخلت لقيت باقا كما هي ومشيت بدلت حوايجي بحال العادة جبدت سوميج باج من داك الستيل اللي خدات ليا ماماه وجمعت ديك الروينة ديال الحوايج اللي خليت ومشيت تخشيت بلاصتي كانت تلفازة شاعلة وانا متكية كنقرا فديك القصة ونضحك بوحدي ونلعب فشعري .. داك الامير رجع ملك ولا ماعرفت سلطان المهم حكم حيت باه مات وديك البطلة الزوينة زوجها ليه باها بزز منها وخا رفضات وداها غرقها هدايا وكادويات حرم النعاس مع لخرين رجع مقابلها غير هي وبدات تولد ليه كل سنة ماكترتاحش مكيجي فين يدور العام حتى كتحمل وتحط ليه وكانت خارجة سوق السياسة داياها فشغلها والطرز ديالها .. ماشي بحالي انا كنخشي قنوفتي حتى تطلعت لبنادم فراسو . . كنت كنقرا حتى سمعت الباب تحل ورجعت للواقع شفت جاد دخل غير شافني خرج فيا عينيه وجا عندي حيط ليا تيليفون شدو قسمو فالنص بيديه قدام عيني بقيت غير كنشوف فيه قلت ليه علاش هاد العصبية؟ ...شنو بغيتي
ردو ليا وقالي هادا الى ماكنتيش غتجاوبي فيه ماعندك ماديري بيه
شد ليا فكي قالي النفس غتولي طلعيها بخباري ومكاينش لخروج برا بلا شواري سمعتي
لاح ليا فكي للجنب بقيت ساكتة كنشوف مابغيتش نهضر حيت كيقلب على جواب باش يفش خلقو فيا .. وماحدي ساكتة وهوا كيغلي كنحس بيه باغي يطرطق الزاج بيديه وكنسمع نفسو من بلاصتي طالعة نازلة . مابقاش فيا تيليفون قد مابقات فيا القصة باغا نكملها وتبليت بيها ماقدرتش نتهنا حتى نكملها . دورت وجهي للجنب سديت عيني خليتو فايق بقا شحال عاد تكا حدايا نعس على ضهرو . السكات والسقيل حتى دبانة مكتزنزن خليتو حتى نعس وطليت عليه على وجهه بان ليا ناعس ونضت كنتسلت محنية باش منعطيش خيالي و مديت يدي خديت ليه تيلفونو وهربت للبالكون جلست ودخلت حيت عارفة لكود ديالو ديجا حلو قدامي شحال من مرة ومشيت للقصة تكيت وبديت نقرا
بقيت كنقرا حتى طلع النهار عيني تنفخو بالبكا مسكينة ديك البطلة ماتت بعد نفاسها الرابع عشر لاكن الزوجات اخرين ماولدات ليه حتى وحدة وتأزم البطل ومن شدة حبه ليها مابغاش يدفنها وكيخليها ناعسة حداه وكيغسل ليها ويمشط ليها ومع الوقت بدات تعطي منها الريحة مجهدة ومع ذلك ماقدرش يدفنها كيفضل يشم ديك الريحة على انه يدفنها ولا يحرقها حيت هما نوغمالمو كيحرقو وبسيف باش سمح لجثمانها يخرج من البيت باش يتحرق ومابغاش يحضر للحرق نعس بلاصتها كيبكي حتى خرجات روحو فنفس من شدة القهر على موتها وفراقها ومات فنهار اللي خرجات من ديك الغرفة وسالات القصة أزماتني بكيت حتى تفش ليا قلبي وحيدتها وماقدرتش ننعس بسبب تأثيرها على نفسيتي قلت مايمكنش نبقا هاكا خاصني نحيد التأثير ديالها عليا بأي شكل وبديت نقلب على رواية اخرى بديتها بديت نقرا ونعيش معاها حتى بدا التأثير ديال ديك اللولة كيمشي وتعلقت بالرواية الثانية بزاااف لاكن بداو عيني كيتسدو شفت الساعة لقيتها الثمنية وحيدت كوكل فمرة ونضت رديت تيليفون بلاصتو ومشيت بلاصتي كان جاد ناعسة واكل ليا حقي من البلاصة وطالق يديه على مخدتي .. حيدت ليه يدو بشوية ونعست طحت دودة فديت سهير الليلة كامل حتى شبعت نعاس مزيان مزيان ونضت لقيتها الثمينة ديال العشية ! .. اناري فين مشا النهار؟ مشا ليا النهار كاع ماشتو تا كي داير ! فقت لقيت راسي بوحدي فالبيت ونضت دوشت باش يخفافو عليا عضامي وبدلت ديك السوميج مابغيتش لبست وحدة اخرى وشعلت التلفازة بقيت دور من هنا دور من لهيه .. تقلب ليا النعاس .. وليت كناكل بالليل اكثر وطلبت الماكلة بالزايد باش تبقا ليا حيت جاني الجوع بالليل ومالقيت ماناكل . ماشفت كمارة جاد كاع ومابغيتش نشوفو كينشر ليا الطاقة السلبية حسن ليا نيقا بوحدي .. جاتني اللولة بغيت نقرا القصة وماعنديش تيليفون بقيت كنشوف فالساعة ونتسنا حتى رجع شاف فيا ودور عينيه ماهضرش معايا وحتى انا ماههضرتش معاه بقيت كناكل ونتفرج .. ضربات طناش ديال الليل تكا بلاصتو ومامشيتش حداه بقيت كنتفرج فتلفازة فوق واحد الكنبة والسكات ... عصر حتى للوحدة ديال الليل عاد حط تيليفون طفا الضو اللي جيهتو و نعس ونضت طفيت تلفازة دخلت بلاصتي درت راسي نعست حتى تأكدت منو ناعس ومشيت سلت خديت تيليفون وبقيت نقرا فبلاصتي مانضتش ومتبعة مع القصة بكل جوارحي كانو فيها احداث مشوقة ومثيرة وطويلة وكنبغي نقرا بشوية ونرجع نعاود نقرا الحدث اللي كيعجبني مرة وجوج وثلاتة .. حسيت بيدو طلعات مع كرشي وانا نخبي تيلي تحت المخدة حسابني فاق .. لاكن غير حركة ل رادية خليتو ماحركتوش وكملت القراية انا عاطياه بضهري حتى صبح الحال وشرقات الشمس وبداو عيني كيتلسقو ونضت رديت ليه تيليفون بلاصتو ونعست نعسة ديال اهل الكهف من جديد حتى للثمنية فالوقت اللي كنفيق فيه وقبل انحل عيني حسيت بشي يد تحطات على جبهتي وعاود تحطات على حنكي وصدري وتهزات وانا ندور جنبي بقيت شوية وحليت عيني فقت لقيتو واقف قدامي باغي يخرج .. ماهضرتوش وبقيت ساكتة بانت ليا غير الماكلة ناكل وخليتو حتى مشا ومشيت طلبت الماكلة وتعاود نفس السيستيم درت لراسي شي حاجة نتلها فيها حتى دخل معطل ماهضر معايا ماهضرت معاه بقيت سهرانة وهوا فتيليفون نعس قبل مني وقصرت انا مع القصة مخبية تحت اللحاف ونعست مع العشرة ديال الصباح هاد المرة ماسخيتش بالاحداث ورديت ليه تيليفونو ونعست حتى لديك التسعود .. فقت مضهشرة مالقيت حتا واحد وحيدت لغطا نوض وانا نلقا حدايا تيليفون بواطة جديدة ديال تيليفون جديد مسدودة وهزيتها حليتها لقيت فيها تيليفون كبير اخر ماخرج فالسوق مع الكيت والكارط ديالي اللي كانت فتيليفون لاخر وخليتو محطوط ماقصتوش فاش تهرش وكاع ليزاكسيوار ديالو معاه شديتو ضحكت وفرحت واحد الفرحة درت فيه لاكارط وشعلتو بالزربة كنكتاشفو ومشيت نيشان طلقت الويفي من الاوتيل ودخلت للقصة كنجري وانا فبلاصتي طلبت الماكلة جابوها ليها حطيت ديك العجلة فاش جابو الماكلة جنبي حدا النموسية ورديت شعري للجنب كناكل ونقرا
بقيت كنقرا ماحسيتش بالوقت ونسيت ماصليت اصلا مجموعة عليت الصلاة ديال نهار كامل .. نضت كنجري توضيت لبست واحد العباية طويلة والشال مشيت طلقت سجادتي كنصلي داكشي اللي جمعت كامل .. دخل لقاني مزالة كنصلي ومشا للدوش دوش خرج لقاني ساليت الصلاة وجمعت حوايجي بقيت بديك السوميج برونز اللي شافني بيها النهار الاول ومشيت موراه حكيت سناني ومشطت شعري بحال ديما ورشيت ريحتي اللي مولفة ندير قبل منعس وتكيت حداه مابغيتش يعرفني كنبات سهرانة ونصبح ناعسة حيت حساب ليه مريضة وقلب ليا السخانة لبارح واش طالعة فاش كنت ناعسة وحسيت بيدو .
فيها الفارة باغا نكمل القصة ماقدرتش نصبر شديت تيليفون اللي جا ليا بديت كنقرا وعاطياه بضهري
حتى شفتو طفا الضوء اللي حداه وانا نطفي تيليفون درت راسي نعست على بديمن ينعس ونوض نسهر . دازن واحد نص ساعة قلت غيكون نعس وانا نعس بيدو على جبهتي كيشوف واش سخونة وحطها على حنكي وانا نتحرك درت راسي مريضة كنموت بديت مرة مرة نين .. ناض حط يدو على حنكي كيفقني قالي شيماء واش كضرك شي حاجة ؟
كنقول ليه غيير لا وهوا متكي عليا خنقني قلت ليه بغيت غير ننعس خليني نعس وصافي ودفعتو بنفور تقلبت على جنبي وطلعت الغطا على راسي بقيت كنقرا نقرا حتى صبح الحال ودرت تيليفون تحت المخدة نعست .. حتى شد فيا النعاس مزيام حسيت بحلاوتو وماقدرتس نفرط عاد عاد جا عندي كيفقني ويحركني بديت كنين ماقدرتش نهضر تبنجت بالنعاس .. قالي نوضي نخرجو .. ياله تخرجي شوية
فضلت النعاس على المشية لهاواي ماشي غير على لخروج .. مابغيتش وماقدرتش نحل عيني دخل ديو ورا ضهري جلسني بزز ماقدرتش كنهضر بزز قلت ليه مابغيتش بغيت نعس وهوا كيفقني حط ليا لكاس حدا فمي باش نشرب ونفرت دورت وجههي كنميل ونتلسق على المخاد والفراش وعاد مكنزيد نتخشا وندلي رجلي ونعنق المخاد .. كنسمع غير صوتو حدا ودني بدا كيلعب ليا فشعري مانشدش كاع اشنو كيقول كنسمع غي ديك نوضي .. يالاه تخرجي صافي هادي هي اللي بقات ليا فبالي .. بقا كيضهر معايا ويوشوش ليا فودني شوية باسني فكتفي كنت هازاه حدا عنكي معنقة واحد المخدة قالي غنديك لواحد لبلاصة زوينة غتعجبك
ماديتهاش فهضرتو هوا كيهضر ويلعب ليا فعنقي ويبعد الشعر على وجهي وانا ستحليتها كنرجع فالنعس .. مع واحد البوسة عطاها ليا جمب حدا شفافي غطست فالنعاس مابقيت لا كنسمع لا والو
كنت غرقت فالنعاس حتى حسيت ببوسة فعنقي وتبعوها عرام دالبوسات متابعين دورت وجهي كنحس براسي تقيلة واخا يجروني من رجلي منوضش ... كنت كنتنفس عاددي حتى تكاتني اللحية فنيفي ونفسو سخونة خنقاتني دورت وجهي لاكن رجعت حسيت بنفس ااحساس باسني ففني غيرو بشوية . ماعرفت راسي واش كنحلم ولا بصح عجباتني البوسة حليت معاها فمي ومقادراش نتجاوب كنحس بشفايفي كيتحركو ويتجرو ولسانو كياعبوو وسط شفايفي ووكنتحرك من بلاصتي كنتدفع حتى جيت على ضهري وبديت نحس بالبوسة كتبهط كحنس بالهر فجميع مناطق جسمي والغريزة شعلات وعيني ملاسقين مقدرت حتى نشوف الضو وكنين وكل مرة كنحس بشي بلاصة فجسمي تحركات .. استحليتها وانا ناعسة نص نعسة كيحرك ليا يدي ويرجليا حتى بديت نستحلم ولا منعرف شنو كيوقع ليا عجبني الحال كنت مخصوصة نيت ، فاش بدا المعقول حليت عيني عرفت راسي مكنحلمش لاكن سي طروطار مشيت ماعندي فين نرجع ومنقدرش نرجع كملت وعيني كيتلسقو بقا عليها فرونسي كنبغيك مكنبغيك نتي حياتيي ومني عمري وكيعبر ليا بكل جوارحو وانا تقول حداايا شيو حد كيوسوس ليا كيقول ماتنساي شنو دار ليك ويبدا يحسهم ليها ماخلانيش نحس بيدك الهضرة لاكن مادقرتش نتراجع على الممارسة وانا النار شعلات فيا رجع عندي عزيز وحبيب وغالي عنقتو حتى بردت وساليت وانا ندور وجهي رجعت فالنعاس مافقت حتى وصل الوقت ديالي اللي مولفة نفيق حسيت بيه باغي يعاود نفس العملية وانا ناعسة لاكن ثمرت عليه نضت خليتو لبست بينواري مشيت كندوش د قالي حلي ندخل درت نفسي ماسمعتوش كملت الدوش ولبست بينواري وفوطتي على راسيو وحليت الباب لقيتو قدامي لسقني مع اقرب حيط قالي علاش مابغيتيش تحلي
قلبت عليه الفيستة قلت ليه انا مريضة وماحسيتيش بيا جاي عندي وانا فاضعق حالاتي ومغيبة مترحمتينيش همك هوا ترضي نفسك انا مكنهمكش زايدة ناقصة ... مابقيتش فيك زعما شفتيني ماقادراش نحرك يدي ورجلي استغليتي الفرصة .. ماقلتيش لا راها انسان .. راه لحم ودم ... براكة ديك الشيء اللي درت معاها مانزيش نتمادا مافكرتيش فيا ... حبستيني هنا والوقت اللي ترشق ليك تجي الوقت اللي مترشقش ليك ماتجيش .. ولاكن خود راحتك هادشي مغيطولش بزاف ... زيد استغل الوضع والفرص ماحد كولشي قدامك .
خليت ديك الهضرة وزدت خليتو كيحك فلحيتو وساكت كيشوف قدامو ومشيت نصلي قبل مايجاوب.. درت عليا العبابة بزربة وكبرت كنصلي حتى قالي وهوا داخل يدوش غطي شعرك ارابعة العدوية مشا سد الباب درت يدي على راسي لقيت الفولار مكاينش ! وييلي الله يستر.. تلفت وقطعت الصلاة هزيت الشال لويتو عليا وعاودت الصلاة ياربي تسمح ليا كنتفكر راسي بديت نصلي بلا فولار كتجيني الضحكة وسط الصلاة ونعل الشيطان .
كملت صلاتي كانت تسعود ديال الليل جلست عاوتاني نفس الروتين شديت تيليفون كنقرا لسقت عليه حتى خرج شاف فيا وجا عندي جلس قدامي داير الفوطة على عنقو وملوي عليه وحدة اخرى على نصو .. تلفني وهوا كيشوف فيا ماقدرتش نركز مع احداث القصة وقالي لبسي عليك نخرجو شوية
قلت ليه مافيا اللي يخرج غير سير خرج
قالي نوضي نخرجو ونهضرو شوية برا
هزيت حاجبي وكنقرا القصة قلت ليه يبدو ان الوقت قد حان
أنا وبعدي الطوفان الجزء 18
محتوى القصة
التنقل بين الأجزاء