أنا وبعدي الطوفان الجزء 20 والأخير

ماعرفتش شنو واقع بغيت نعرف لاكن عضامي كيضروني وضهري كيحرقني بالنعاس عليه ... كنحس براسي طايبة وراسي تقيل عليا وبوحدي فالبيت . سولت الممرضة قلت ليها واش ماكاين معايا حتى واحد من عائلتي قالت ليا كاينة ماماك كتجي عندك كل يوم

قلت ليها عفاك هزي بيا شوية البياص ماقادراش نبقا ناعسة.

هزات ليا ضهري وخرجات خلاني بوحدي غير انا وكرشي ، تحركو فيا احاسيس غريبة وحطيت يدي عللى كرشي كأنني فحلم .. حمدت الله وشكرتو حيت نجيت من ديك التهلكة بلا اضرار لاكن فين هوا جاد ... شنو وقع ليه ... عنداك تكون طرات ليه شي حاجة . ولا مريض .. بقيت كنتسنا حتى جا الطبيب عندي ابتسم ليا قالي على سلامتك قلت ليه شنو وقع ليا

قالي مابقيتيش عاقلة؟

قلت ليه عاقلة على قرطاسة دخلات فيا ماعرفتش اشمن بلاصة كاع

قالي مغتحسيش بيها دابا صافي برات ... جاتك فالضلوع من اللور لحسن الحظ ماجاتش جهة القلب .. لاكن دابا كولشي فات راه دازت عليها 3 شهور

حركت يدي ماحسيت بوالو وقالي صافي برات بلا متهزي ليها الهم ...كنا كنتسناو تفيقي حيت طول الوقت كنتي كتهدي .. كنتي مخدرة بتأثير الصدمة والضربة

قلت بغيت نشوف راجلي فين هوا قالي دابا يجي .. ماتخافيش راه متبع الحالة ديالك نتي والبيبي

طمنت ورتاحيت وجلست النهار كامل من بعد ما فقت وجابو ليا الماكلة... حسيت بواحد الجوع غريب وكليت حتى شبعت وفلعشية دخلات ماما كانت لابسة واحد سوفيت طويلة بسروالها وسبرديلا ودايرة الدرة غير شافتني جات كتجري عنقاتني كتبكي وانا نبكي حتى بردنا الشوق والخلعة وجلسات حدايا قلت ليها فين جاد قالت ليا راه فالدار

قلت ليها علاش ماجاش

بقات ساكتة وانا كنشوف فيها قلت ليها شنو اللي وقع فهاد الوقت كامل

قالت ابنتي راه كنت فالدار مابيا ماعليا داك الصباح ديال العرس كنتاسفط مع الناس كيمشيو حتى دخل عليا كيجري مشا نيشان للبيت قلبو كامل كيسول سعاد على شي صندوق ما صندوق مشا هوا وياها تبعتو كنجري لقيتو واحل مع واحد الصندوق ديال الحديد مابغاش يتحل وضربو بالقطااس فالساقطة جبد منو شي فلوس خلعني وعمر كولشي فواحد الصاك ومشا حتى عيط ليا قالب جمع حوايجك غنسافرو راه شيما مريضة وهزيت حوايجي داني عبد الله لسبيطار لقيتك فواحد الحالة لحمك كولو مشرط والكسوة الييضا كلها دم بقينا تما شحال مخلوعين حتى درتي لاباس شوية وجبناك فواحد الطيارة فيها غير انا ونتي وراجلك .. سولني قالي منين جابت دوك الفلوس كاملين قلت ليه اولدي مانعرف وحشمت منو قالي واش بنتك عندها طون دالفلوس ماعرفتيش منين جابتهم؟ الفيلا والطموبيل وغيركتشتت

قبت ليها منين جاب البقية

قالت ليا اشمن باقية

عرفتها معارفة والو .. قلت يمكن كمل لفلوس من عندو ولاكن اللي كنت خايفة منو هوا يتعطل ونبقا تما يشروطوني حيت فلوسو كولشي فالبنك وباش يخرجهم ولا يدوزهم لحساب اخر خصو الوقت والبنكة غتعطل عليه لاكن كما كان الحال نحمد الله اللي تفكيت واخا دوك ولاد الحرام حقدو عليا واخا خداو الفلوس بغاو ينتقمو مني على داك الحبس اللي تحبسو خمس سنين ... حساب ليا صافي تطوات القضية وستحليتها مافكرتش باللي خمس سنين دغيا كدوز وغيرجعو يقلبو عليا وكملتها وجملتها تشهرت باش نسهل عليهم يلقاوني . الحمد لله خرجت من داك الكابوس واخا نفسيتي تأزمات لاكن فاش حسيت بالبيبي كيتحرك فكرشي تهندنت وطمأنت .. سولت ماما قلت ليها شنو عندي .قالت ليا عندك ولد

ابتسمت تلقائيا وفرحت حيت اخيرا غادي نولي ام ويتحقق الحلم ديالي .. واخا قالي الطبيب راه كانت حالتك خطيرة لاكن تجاوزتي المحنة رتاحيت وبقا ليا جاد ماعرفتش كفاش غيكون حالو من جيهتي .. شنو مادرت مغانردش ليه ولو شوية من داكشي اللي دار .. ورطتو معايا وهوا بعيد على المشاكيل وكنت راسمة ليه واحد الصورة عليا فشكل فلاخير يحصلني متورطة مع مافيا والاسوء انني شفارة وسارقة فلوس .. ماعنديش الوجه باش نشوف فيه ومارضيتهاش لراسي ماعرفتش كفاش مهز فيه العين

مارضيتهاش راسي وبديت نقول من عاوتاني الى كان كيبغيني غادي يسامحني . مابقيتش مرتو وصافي ولاكن دابا رجعت ام ولدو .. واعدني عمرو يتخلا عليا وكيبغيني اكثر من ايو حاجة اخرى .. مكنضنش يسمح فيا .. يمكن غضبان مني وصافي

جلست كل نهار كنتسناه يجي ... كل نهار نسول عليه ماما ... يوميا حتى قالي الطبيب على سلامتك يمكن ليك تغادري المصحة وجمعنا الحوايج انا وماما .. حسيت براسي تقيلة وتزاديت فالوزن ورجليا تنفخو . تبدل عليا راسي وحتى وجهي تبدل تنفخ تقول كبرت عشر سنين اخرى مابقيتش كنبان صغيرة بان عليا العيا فهاد المرضة وحتى ملامح وجهي تبدلو .. ماحملتش راسي وزاد الكلف طلع ليا على حناكي شوية وفوق نيفي كرهت وجهي.. كان البرد فسويسرا قالت ليا ماما لبسي مزيان جابت ليا واحد الجاكيطة طويلة شوية .. جمعت شعري ودرت الشال لويتو عليا وشفت فالمرايا زدت كرهت راسي عاد وليت كنبان شارفة ديال بصح ..شوية ديك الزعورية والشعر بينو ليا وجهي مضوي .. خفت قلت مع راسي واش غيبقا وجهي هاكا !

جراتني ماما هبطت كنتمشا بزز حتى للتحت لقيت واحد البي ام واقفة حدا الباب شفت فيها بان ليا جاد لداخل جالس داير القب لابس كابيتشو ف الازرق كيشوف قدامو ماشافش فينا ونزل طلع داك الشنطة فالكوفر وانا متبعاه بعيني .. خبط داك الكوفر وطلع لقدام قلع زاد بينا ماهضر مانطق ماهز عينو فمرايا حتى يشوف فيا

الطريق كلها وحنا ساكتين غادين غير فالطبيعة والخضورية والجبال مناضر ردات فيا الروح والخضورية ديال الطبيعة ناصعة ومبهجة .. بداو كيبانو لين شي ديور وسط ديك الطبيعة مفرقين من الخشب وحداهم الشجر حتى وصلنا لوحدة من دوك الديور اللي كانو مستفين فديك الغابة الخضا البراقة .. وطلع الطموبيل دخلها مع واحد الباب واسع ديال العود حطها قدام واحد الدار مصنوعة من الشخب والقرمود سقفها مثلت وضايرو بيها الشجر وواحد الصورو قصير من الاعواد ديال الاشجار على شكل مسطيل كانت قدامها حدا الباب واحد الطبلة ديال الخشب كبيرة على برا فازكة باالشتا وواحد الطياشة فالجنب والكلاب متكيين .. كانت الشميشة ساطعة لاكن الجو بارد والهوا بارد ونقي فتح ليا صدري .. دخلنا جيت مقابلة مع واحد الشوميني كبير على راسو واحد الراس ديال حيوان عندو لكرون ومضورين بيه التصاور والاعواد فالجنب .. كانت الارضية خشيبة والزربية والحيوط من احجار وخشب كانت زوينة بزاف وعندها دروج فالجناب من الخشب كيطلعو لفوق .. حط داك الصاك وهضر اخيرا قال لماما ديها لداك البيت اللي لهيه وجراتني من يدي دخلاتني لواحد البيت غير تما كان متوسط فيه نافدة صغيرة وبلاكار وناموسية عليها فراش سخون ومتولة قلت ليها واش هنا كينعس هوا

قالت ليا لا كينعس فواحد البيت كاين لفوق ..قلت ليها ونتي ؟ قالت ليا فهاد البيت اللي حداك . فهمت انه فرق فراشو معايا واخا ضرني خاطري وتأزمت ماعندي علاش لومو اللوم كامل عليا انا ومانقدر نتفوه بحتى كلمة .

قلت لماما بغيت ندوش ونغسل باش نرتاح وجبدات ليا حوايجي .. كانت الدار سخونة حيت الشوميني شاعل والكليما فين ما مشيت واخا جات وسط الطبيعة والجو مبرد على برا لاكن الدار مريحة وحتى لحمام زوين عحبني كامل من الحجر ستيل جبلي والبانوي مدور وكبير من خشب داكشي زوين وسخون الفوار كيخرج منو .. دخلت تحممت مزيان كان طايب وحكات ليا حتى طبت وشللت وخلاتني واقفة قدام المرايا دورت ضهري شفت فديك الضربة كتبان صغيرة لاكن الاثار باقي قضهري . مسحت المرايا من الضباب مزيان وقربت وجههي بديت نحك مابغاش داك الكلف يتحيد .. قالت ليا ماما راه غيمشي ملي تولدي قلت ليها على الله حيت راني شفت العيالات بقا ليهم مامشاش وخفت يبقا . قالت ليا دابا حيد وبدات تبرد عليا .. مسحت بالفوطة ولبست حوايجي كانت بيحامة سخونة دافيا بالسنسلة من القدام وسرولها سخون ... نشفت شعري بغيت جمعتو بقراصة خرجت جلست على واحد الفوطوي بقيت كنشوف فالدار ونشرب القهوى سخونة حتى هبط مع دوك الدروج كيدردب هاز جاكيط فيديو ووقفت قلت ليه جااد

هز صبعو ليا وقالي تا نجي .. غنجي وغنهضرو

رجعت جلست بقيت متبعة ليه العين خرج ركب وزاد وبقيت انا كنحسب دقات قلبي وكنتسنا يرجع ونتلف فديم الدار .. طلعت لفوق كان بيت واحد اللي تما ديالو مسدود مابغاش يتحل وخا بغيت نحلو .. رجعت هبطت كنتنهد ددخلت لواحد لكوزيتة تما كانت مجهزة زوينة وماما كطيب ليا مناكل قلت ليها تشهيت الرفيسة وبدات تصاوب المسمن تما وجبدت الدجاج كنعاونها فصمت وحسيت بيها حتى مقلقة مني مكتهضرش معايا بحال الاول وحتى انا حشمت نبقا نبلبل وطيبت معاها الغدا وانا ساكتة

حطينا لغدا كليت غير انا وماما وخلينا ليه حقو حتى سمعت طموبيل دخلت والباب كيبقا محلول كنشوفو كولشي من لداخل حتى الطريق والطبيعة كتبان .. دخل داير القب على راسو قالت ليه ماما واش نحط ليك تتعشا قاليها شكرا تعشيت وشار ليا بيدو قالي اجي نهضر معاك

حسيت بقلبي زدح دار بووم و نضت قلت الله يسمعني خبار الخير ومشيت دخلت انا وياه لواحد البيت وجلست وجر واحد الكرسي قدامي ماشفت فيه لا ارتباك لا توثر لا حتى حاجة . حيد داك الجاكيطة بقا بواحد تريكو كحل وجلس شاف فيا مزيان وحتى بقيت كنشوف فيه .. شحال ماحققت فوجهه . حط صبعو على الطبلة قالي غنهضرو دابا باش مايعاودش الموضوع يتجبد مرة اخرى . ومانسمع لا تفسير لا شرح ... باقا عندك شي حاجة مخباياها؟

دورت وجههي حشمت وقلت ليه لا

قالي واخا .. المهم الاللة اللي نطولوه نقصروه .. غتبقاي فهاد الدار حتى تولدي وينساك العالم ... وهادوك اللي ضربوك كيحساب ليهم قتلوك وسالات القصة ... اشنو بينك وبينهم اشنو علاقتك بيهم مافهمتش

قاطعتو قلت ليه مابيني وبينهم حتى حاجة وداكشي اللي وقع قديم قبل منعرفك اجاد هادشي مكاين علاش تحاسبني عليه

ضحك قالي شكون حاسبك؟ نتي وااعرة نتي زعما ... راه والله ماعرفت مانقول... كتهضري على الحساب بحال الى انا اللي مزوج بيك الكلب ديالك ياك .. هانيا يعيطو ليا يقولو ليا جيب فلوس مرتك ديناها ومتورطة معانا ونمشي ندي الفلوس بحال الحمار ونهزك من الموت ونعرض حياتي للخطر على قبلك ... نرزي واليديا فيا ونولي مجرم .. كن قتلت فيهم شي واحد كن راني متورط ومورط عاىلتي كلها بسببك ... لالا ماعنديش علاش نحاسبك نتي ماعليك حساب ..

خرح فيا عينيه وقالي نتي ماعليك والو درويشة انا اللي حمار .. جريني من ودني ضحكي عليا ونتيق .. قولي ليا سكت نسكت ... قولي ليا هضر نهضر ... نتي الاللة هي الملكة شيماء ! اللي كتعرف الصح من الغلط ... سارقة مافيا ويعلم الله شنو بينك وبينهم وانا اللي حمار نجي نحل ليك مشاكل وتجي نتي تقولي ليا سكت ماتعرفش ... ولا ماعندكش الحق .. ولا داكشي قديم ... مالي هوا قديم خليه قديم اش جابو للحاضر ديالنا انا وياك ... باقب عندك الوجه باش تهضري

غرغرو عيني ق سمعني انا غنعاود ليك كولشي

تكا قالي هضري هانا كنسمع

بديت نعاود ليه من الاول حتى للخر وقالي مزيان .. حتى زايد عارف ..

بدا كيضحك على راسو وناض وقف حط يديه وجبهتو على واحد الحيط شحال وانا كبرر ليه مابغيت نخبي حتى حاجة .. حطيت ليه كولشي وتهنيت باش متبقا حتى حاجة تابعاني .. هز راسو كيضحك وقال .. جاد الحمار ... والله تا حمار .. مي نستاهل حيت انا اللي دخلتك شريكة فحياتي شركت معاك كولشي .. انا نتي شركتي معايا غير داكشي اللي بغيتي وعطيتيني غير داكشي اللي بغيتي وكتربيني على يدك وانا بحال البغل حال فمي ونبكي عليك ونمرض وجاي كنجري باغي نربط حياتي بيك .. ونتي .... اش غنقول ليك ... بقا فيا داك البيبي اللي فكرشك تمينت كن مات وكنتمنا من قلبي يموت قبل مايتزاد .. اللهم بكا نهار ولا بكا عمر كامل

بقيت ساكتة حانية راسي ونضت وقفت قلت ليه لا ماشي هاكاك والله ماحسبتك هاكا

قالي وشنو ؟؟ مالي ماجيتيش صارحتيني وقلتي ليا انا ها شنو وقع ليا فالماضي ... على الاقل نعرف واخا ماعنديش علاش نحاسبك .. مي راه حياتنا هادي انا ونتي ... شوفي اشيماء ... دابا سمعتك هاد ليسطوار ديالك ومن ليوم .. مابغايش نسمع صوتك .. مادوريش بيا ...غتولدي غنفكو هاد الحريرة

بقا فيا الحال قلت ليه شنو دنب هاد البيبي اللي كدعي عليه شنو دار ليك انا غنزو الى مابغيتيش ماقلتش ليك هزو ومادعيش عليه

بقا كيضحك بالفقصة قالي ماكرهتش مايجيش يلقا ام بحالك هازاه فيديها ... مابغيتوش يجي يعيش العذاب ولا يسمع شي حاجة عليك تعيشو مريض طول حياتو ... وحدة سايط ليا الريح فمخها تربي ليا ولدي اللي من لحمي ودمي .. المهم سمعي اخر هضرة ومانعاودوش نرجعو لهاد الورقة... حاليا ماحدك حاملة هانتي معايا حتى تولدي ... من بعد غنطلقو ونتي خودي قرارك ... ولدي مغاديش نخليه ليك .. بغيتي تعيشي معاه فين عايش مرحبا ... مابغيتيش غتحطيه وتمشي بحالك ومن هنا لتما مابقات حتى حاجة كتجمعنا

ناض بغا يخرج شديت قلت ليه كفاش كتقول ليا نمشي ونخلي ولدي شنو كتقول اجاد ؟ فين الوعود والعهد اللي عطيتني

قالي داك العهد صادق .. كيتعطا للناس الصادقين ماشي المجرمين .. البيبي بيك ولا بلا بيك غيتربا حسن منك .. نتي محتاجة تربي راسك هوا الاول عاد اجي ربي ليا ولدي

وقفت ليه فالباب قلت ليه جاد فكر مزيان ... فكر فشنو كتقول راه هاد الهضرة منقدرش نتقبلها ... حنا كنبغيو بعضياتنا ووو مغنقدرش نسمح فولدي

ضرب الحيط اللي حدايا معصب وقالي سكتييي .. سكتي اشمن حب اشمن تخربيق ... سالينا مع داك الحزاق كامل وغنبقا معاك هنا فوق نفسي تا تولدي ... وسمعي مزيياااااان .. لحد الساعة راني معاك ولد الناس ... خليني ولد الناس وماتهوريش ... ولا يقول ليك راسك نهرب ... راه نخربو الدنيا على هاد الولد ونسيفطك للحبس نتي ودوك المافيا .. خلي هاد البركان ناعس متنبشيش فيه وماتجبديهش حسن ليا وليك ولهاد البيبي .. وسالينا الهضرة .. بغيتي تبقاي معاه مرحبا .. مابغيتيش الله يعاونك

خرج بقيت بوحدي كنبكي فداك البيت .. جات عندي ماما مسكينة فشيت عليها خلقي حيت سمعات غواتنا منين ومنين .. عاودت ليها كولشي باش تعرف شنو وقع عاودت ليها من نهار خديت الفلوس لدابا بقات مصدومة فيا ضربات فخادها قالت ليا عا الحرااام ... ها الحرام والشرك بالله ... من نهار دتي الفلوس ونتي اللور لور ابنتي ... ماشفتيش النهار الزوين .. ولاكن مايبقا فيك لا حال لا والو .. حتى واحد مادار ليك شي حاجة كولشي درتيه بيديك .. ماغليك غير تصبري حتى يدير الله تاويل ديال الخير

. قلت ليها دابا غير راه معصب وصافي ... هاكا دار ليا واحد المرة وندم .. غيبرد يندم

شدات راسها قالت ليا ااابنتي يهديك الله ... يهديك الله شنو اللي غادي يندمو؟ اش دار باش يندم فيقي من القلبة راه كضحكي على راسك نتي دايرة الزبلة وكايحساب ليك هوا اللي غالط .. واش كاين شي راجل غيتيق فالمرى الى سمع عليها هادشي .. التقة يا بنتي هي كولشي وضيعتيها خرجتي عللى راسك ماعليك غير بالصبر

مرضت مابغيتش نسمع كلمة دماما مشيت توضيت صليت وبقيت فديك الدار مأزمة حتى بديت نبرد تدريجيا اما هوا مابقاش كيعمر فالدار كيجي غير يبات وصافي .

واحد الليلة كنت ناعسة وتقلت كنحس بجنبي غيطرطق بغيت نتحرك ماقدرتش وبقيت نغوت على مي جات كتجري عندي قلت ليها الوجع فجنبي قتلني . كنتقطع بغيت نموت .. مشات كتجري عندو البيت هبطاتو كيجري دخل قالي مالكي شنو وقع

قلت ليه كنموت جنبي غيتفركع ..والبيبي كيكمل عليا كيضربني لديك البلاصة حاسة شي حاجة غططرطق

قال لماما لبسيها نديها لسبيطار دغيا ولبساتني واحد المونطو فوق البيجامة ورجع هوا بسورفيت داير عليه جاكيط كيعاوني نوقف ماقدرتش وهزني وانا شادة فكرشي داني للطموبيل حطني وركبات حدايا ماما مشا كيطير بيا للسبيطار دخلوني وهوا معايا شافو ليا كرشي قالو ليا عندك القلون العصبي وتنفخ ليك .. قلت ليهم فخاطري راني عارفاه عندي ماشي عاد غنعرف .. بقاو معايا تما خرجو ليا الدوا قالو ليا حاولي متعصبيش ونقصي من عصير الليمون ونعسي على جنب ماشي عليه وعطاوني واحد الابرة كالمات ليا داك الوجع وكيوصيو ويعاودو باش منتعصبش ولا نتفقص وهوا كيسمع .. شد ليا فيدي حتى لعند ماما وخرجنا رجعت فطموبيل ناعسة على كتف ماما حتى للدار وقاليها نعسي حداها حسن ماتخليهاش بوحدها وهزات حوايجها جات عندي البيت مسكينة ورجعت كنعس انا وياها فالبيت كتعطيني نشري بالليل كتعاوني الى بغيت نتقلب .. وليت كنحس بالنفس كتقطع فيا والطبيب نصحني بالحركة والمشية بزاف ..رجعت كنخرج نتمشا انا وياها يوميا فديك الطبيعة كنطلعو حتى للفوق الراس دواحد الجبل ونطلو من تما كيبان لينا كولشي لتحت والبقر والطبيعة والناس فالمنطاق كيطلعو من واح البلاصة بعيدة .. الطنطاظ فالالوان واحد المنضر زوين بزااف

على قبل البيبي ... على قبل كل حركة كيديرها فكرشي حاولت نخفف على راسي شوية باش نأديش ولدي اللي كنتسنا نحضنو على احر من الجمر خديت هدنة مقابلة صلاتي وماكلتي وحتى جاد بان ليا تهدن مابقاش كيطلع ويهبط معصب ولا مقلق .. حتى شي مرات كنلقاه جالس حدا الشوميني وتيليفون فيدو .. ارتاحيت شوية قلت الحمد لله بدا يبرد وحتى الهضرة مابقاش كيهضر معصب ولا يطلب الحاجة معصب لاكن باقي ساد بيتو وهادشي اللي ماعجبنيش .. حاولت نتقرب منو شوية على الله نرجع المياه لمجاريها ومشيت عندو كان حدا الشوميني جالس وجلست حداه بقيت ساكتة شحاال وهو يقول ليا وعينيه فتيليفون .. خاصك شي حاجة اشيماء؟

ابتسمت وقلت ليه لا .. ماخصني والو .. غير بغيت نقول ليك .. راه خاصنا نوجدو لحوايج للبيبي

قالي واخا دابا نشوف.. كتبي ليا داكشي اللي خاص غنجيبو

قلت ليه ماكرهتش نخرج انا وياك . الى بغيتي زعما ونختارو داكشي على خاطرنا

هز راسو بعفوية قالي A ? اااه .. واخا شوفي مع ماماك وسيرو خودو داكشي

بقيت ساكتة قلت ليه واخا

جبد واحد الكارط من جيبو قالي خلي هادا عندك غادي تحتاجيه

شديتها وسكت نضت من حداه خليتو مابغيتش نبسل عليه ومشيت عند ماما قلت ليها نخرجو ليوم .. نيت نتساراو شوية ونتقداو داكشي اللي خاصنا

مشيت لبست حوايجي انا وماما وسبرديلة وخرجت تلاقيتو نازل مع الدروج حيت الكولوار اللي كيدي لبيتي جا حنب الدروج وهزيت راسي قالي يالاه نوصلكم ..

خرجت انا وماما هي ركبات اللور وانا ركبت حداه ماقالي والو ..سولتو واش ترونسبور مكيوصلش لهاد البلاصة قالي كيوصل .. مي الىوبغيتو شي حاجة قولوها ليا

ابتسمت وحركت ليه راسي وغاديين وتيليفون كيصوني ليه كل شوية .. هزو المرة اللولة شاف المتصل ودارو فجيبو كنسمعو كيفيبري .. حسيت بالصهد قلت شكون كيعيط ليه ؟؟ علاش مابغاوش يجاوب ياكما كيعرف شي وحدة؟ تبدل ليا اللون مابقاتش راشقة ليا على الحوايج ورجعت نعلت الشيطان قلت غتكون مو وصافي نبدل التفكير وصافي .. مابقا عندي لا تيليغون لا والو هوا اللي كيهبط ليا تيليفونو نهضر معاها فاش كتصوني ونعطيه ليه فاش كنسالي الهضرة ومتبعة معايا الحمل كتسولني عليه وعلى صحتي وكتقولي علاش مادرتيش تيليفون كنقول ليها بغيت نهرب منو ومن سوشل ميديا فهاد المرحلة وصافي باش مانخليها تخس بوالو .

نزلنا فواحد الشارع قالي انا غنمشي حتى تساليو وعيطي ليا راه ماماك عندها صولد باش نرجع نديكم

دخلنا مع واحد الشارع كبير بحال كيلي فيه الحواج وليمارك والمحلات ديال الاطفال .. لقيت السعادة وانا كندور ونشوف ونتقدا حوايج الاطفال .. شحال حمقوني ماكرهتش نشريهم كاملين ونديهم معايا .. شحال صغيورين وزوينين بقيت كندور انا وماما ودخلت لواحد الماركة قلت ليهم مشكل وجهي عطاوني كام كاملة فيها مقشر ومرطب وغاسول وكولشي خديتها راسي وخديت ليا حتى انا داكشي اللي خاصني وواحد الريحة بحال اللي كانت عندي وشي لبيسات ديال الحوامل نبقا نلبسهم فالدار وحتى فاش نولد

تقديت وعيطت ليه جا عندنا حل الكوفر حطينا فيه داكشي وطلعت قلت ليه عندهم حوايج فنين هنايا كيحمقو

قالي واش خديتي داكشي اللي خصك

قلت ليه اه ولاكن باقي خاصني شحال من حاجة وسكت مشينا ساكتين حتى للدار حسيت بيه كيهضر عادي قلت علاش مانهضرش معاه يمكن يكون كيتسنا نطلبو السماحة . خليت حتى وصلنا للدار وحتى كنت غنطلع عندو وانا نتراجع ماقدرتش قلت خليني حتى نفكر مزيان ونشوف واش بصح تهدن ومستاعد يسمع ليا ولالا . دازت واحد الثلت ايام مهدنة وقررت نهضر معاها .. تسنيتو حتى رجع سمعتو طلع لبيتو وطلعت عندو دقيت ماسمعنيش يمكن وانا نحل الباب بشوية طليت بان ليا البيت خاوي واول مرة نشوف بيتو ماحسابش ليا فيه حمام لداخل حتى سمعتو كيدوش وجاني الفضول ودخلت كنشوف فالسقف كان مثلت من الخشب وزوين وفالراس ناموسية فراشها ابيض والبلاكار مقابل معاها ومرايا كبيرة واقفة فالحيط ديال الحجر وزربية فالارض .. لقيت حوايجو محطوطين فالقنت بعشوائية ومشيت ليهم بغيت نعرف فيت كان ونحيد الشك ديال الوسوساس هزيت الجاكيط ديال لكوير قلبتها مالقيت والو فجيابها وقبب ليه سروالو حتى هوا مافيهم والو بقا غير تريكو محطوط كحل مافيه منقلب ..يالاه جيت دور جاب الله بحال الى شفت شي حاجة وقلبي ضرب بالجهد ضرت وهزيت تريكو كنشوف فيه بانت ليا واحد الشعرة زعرا عليه ومع كحل جات واضحة هزيتها مخرجة عيني انا كنهز فيدي وهي تابعاني حتى لاحد .. زغبة طوييييلة شديتها من راسها طلقتها بقيت كنشوف فيها .. كانت رطبة وطويلة قدها قداش بقيت كنشوف فيها ونقول شنو كدير هنا على حوايجو !! منين جات وديالمن هاد الزغبة .. قربت تريكو لنيقي شميتو طلعات معايا واحد الريحة طيحات لما فالركابي .. ريحة ديال البنات وزوينة كتحمق ... اختيار صائب فالروايح وانا كنعرف فيهم مزيان مزيان غير شميتها تخلعت وحطيت تريكو بالزربة بقيت كتفتف جاني الفضول نعرف شكون هادي وشنو هادشي ياكما كيخوني ! شكون مولات هاد الزغبة وشنو كدير هنا .

سمعت الماء سكت وكمشت ديك الزغبة فيدي خرجت كنجري سديت الباب وهبطت مشيت لبيتي حسيت برجليا خواو ليا .. طلقت ديك الزغبة على طولها بقيت كنشوف فيها وكنطرد الافكار من راسي كنقول لالا ميقدرش .. كيبغيني ميقدرش يدير هادشي .. يقدر بغا يققصنيولا يعاقبنس ويخلينس نغير .. وواحد الراس كيقول ليا منين غيجيب الشعرة باينة طاحت لشي وحدة من الجدر .. اويلي ينتف شي مرى باش يخليني نغير

حبست راسي فالبيت كنخمم ونعاود ... دخلوني الشكوك بزاف جاني الوسواس وعمر راسي .. حتافضت بديك الشعرة كنشوف فيها كل يوم .. كل ساعة .. كل دقيقة .. وكنشوف تصرفات جاد ماكيبينو ليا حتى حاجة حيت النهار كامل وهوا غابر كيجي كيسد عليه ولا يجلس فشوميني ... لاكن شوية لاحضتو رجع كيجلس فالدار بزاف مابقاش كيخرج ... يقدرو يدوز النهار كامل .. يا اما يلعب فالالعاب الاكترونية وشي مرات كيبقا جالس قدام التلفازة كيلعب كينسا راسو .. ولا يخرج يجري حتى كيرجع شحفان .. ولا يمشي يتريني كيجي بالصاك عامر بحوايج لاصال اولا يخرج لواحد الجردة حدا الدار يشمر على دراعو ويجلس يحفر فيها ويزرع كيدخل حالتو يدوش ويطيح ينعس ... لاكن كلامو قليل ومابغيت نبين ليه حتى حاجة .. كنتسنا الفرصة فين ندخل لبيتو لاكن كيخرج ويسدو ماعندي كي ندير ... كنمشي للماكينة ديال الصابون فاش كيدخل فيها حوايجو ونبقا نقلب ونفلي فيهم ونردهم مكنلقا حتى حاجة ... مافهمتش واش كان كيعرف شي وحدة وتفارقو ؟ واش تراجع على قرارو بغا يقربني اكثر ... اما انا وليت غير جالسة وشي مرة كنخرج مع دوك الكلاب نطلق رجلي ونرجع .. الجو زوين والطبيعة زوينة وحتى جلوس جاد فالدار مريحني وشفت جاد واحد اخر كيعتامد على راسو .. كيمشي لواحد الكتاب فلكوزينة ويجرب حضو فالطياب ... مرة نشمو ريحة الحراق ونلقاو المقالي مشوطين مرة نطلو نلقاو الماكلة باقا خضرة ... كل مرة وحال وحاضيين معاه لايشعل فينا البوطة لاكن ديما كنمشيو نقلبو من موراه كنلقاو زير البوطات كاملين اللي كيخدمو بالغاز ولا كيحيد البيز للبوطا اللي كيخدمو بالضو ، الايام كدوز وانا كل شوية نمشي مع ماما نشري شي حاجة وكنبغي نقاد حالتي ونجلس قدامو ونجدد العلاقة انا وياه .. لاكن هضرتو معايا عادية كما كيهضر معايا كيهضر مع ماما .

واحد النهار فالصباح نضت من السبعة للطواليط وشفتو خارج لابس حوايج السبور وغادي ماعرفتوش واش غادي يجري ولا غادي لاصال .. طلعت كنتسلت للبيت نشوف واش خلاه محلول لقيتو محلول ودخلت بالزربة سديت الباب مورايا .. يالاه غنبدا البحث و خايفة نلقا شي حاجة حتى كنسمع الباب تسورت من برا وانا نكرم عرفتو نسا الباب محلول و رجع شدو وبقيت انا لداخل حاصلة لاكن لقيت فرصة فين نبحث ونقلب واخا سد عليا هانيا المهم نشوف شنو واقع

بديت بالبلاكار هوا الاول حليتو فليتو بقيت كنقلب ليه حوايجو شرويطة بشرويطة و درت يدي على الرفوف كنشوف وطلعت على واحد الكرسي كنقلب واحد اللحضة طاحت واحد القميجة فبلو مارين فالارض وخرج من ها داكشي ماعرفت شو وهبطت حليتها لقيت فيها وردة وديك الوردة دابلة وقديمة وطلقات الريحة فديك القميجة ... حسيت بقلبي غيسكت وبقيت كنشوف فيها بغيت نفرسها وكنقول شنو كديرو هنا منين جاتو وعلاش مخبيها هنا ... كنت غنرفسها ورجعت درت عقلي مابغيتش يعيق بيا حتى نتأكد مزيان او لا نشوف بعيني .. رديتها بلاصتها وخفيت ادلة البحث وسديت البلاكار مشيت للدوك لمجورة اللي حدا راسو حليت المجر لثيت الخاتم ديال الزواج مرمي تما .. هزيتو كنشوف فيه وغرغرو عيني بقا فيا الحال قداش علاش حيديو من يدو و رديتو بلاصتو ومشيت للجهة الاخرى حليت المجر كنقلب لقيت واحد الورقة متوسطة الحجم فاش حليتها لقيتها رسالة مكتوبة باليد وجلست كنقرا داكشي متكوب فيها بالفرونسي كنبغيك ما كنبغيك ونتا اول انسان فحياتي ومعاك عاد كنحس براسي حية وعرفت معنى السعادة .. مابقيتش كنتصور حياتي بلا بيك والى كانت غتكون بلا بيك انا كنتمنى الموت قبل مانخسرك و وحياتي وروحي فداك نتا جاد ، ماعرفتش كفاش غنقدر نقرا وانا بعيدة عليك .. تمنيت كن مشيتي معايا لكندا اكيد كنت غنجي انا اللولة ونجيب اللولة وناخد الماستر ديالي بفضل وجودك معايا .. لاكن الصروف مكتسمحش انا فاول عطلة ولا فراغ غنجي كنجري باش نشوفك كنبغيك .

استريلا .

تجمدت فبلاصتي وتصمرت فاش قريت الرسالة .. بقيت كنشوف فديك الورقة السيدة خطها متقون والزوينة راشة الرسالة بنفس ااريحة اللي شميت فيه .. زدت تأكدت انها هي ومولات الزغبة نفس الشخص حيت نفس الريحة اللي شميت فالتريكو اول مرة ... كنت غنكمش الرسالة ورجعت حطيتها وبديت كنقلب فالبيت وندور بان ليا واحد نونوس محطوط قديم تما وهزيتو كنشوف فيه وقلت مع راسي تا هاد نونوس مايكون غير ديالها حيت هوا بشلاغمو مغاديش يمشي يشري نونوس راسو .. جلست شادة راسي وكنفكر وتفكرت كلامو فاش قاليا من هنا لتما مابقات حتى حاجة كتجمعنا .. اذا بدا علاقة جديدة ومع هاد استريلا هادي وانا لاحني للزبل .. ولاكن كولشي درتو راسي وانا سبب مشاكيلي ونتحمل عواقب هادشي اللي درت بلا منبقا ملوم فالناس ونبرئ راسي حيت كنت تنا وياه فعلاقة حب فوق السلك عايشين السعادة حتى خرجت بمونتيف قد السخط وليت انا اللي برهوشة وخطيرة ومافيا تيقة... كان باغي وحدة بعقلها لاكن فالاخير طلعت اكبر كدابة وشفارة من لفوق ومتورطة مع المافيا .

جلست كنلوم راسي حتى سمعت الحس فالدروج ونضت تخبيت ورا واحد الخزانة ديال الكتب وسكت .. حل الباب دخل لاح الكاسك اللي على عنقو وحيد تيشورط لاحها حتى بدا تيليفون كيصوني وهزو جاوبها ودار مكبر الصوت حطو كما كيدير ديما ومشا كيجبد كيجبد حوايجو من البلاكار وكيهضر .. سمعت صوتها قلبي دار بوم بدات كتهضر معاه قاليها شنو كديري كي غادية مع القرايا

قالت ليه صافا راني قلت ليك كن كنتي معايا كن راني طوب

قالها الى لقيت شي وقت غنجي عندك

واحد اللحضة صدماتني قالت ليه شيماء والبيبي مزيانين ؟

شهل كارو جلس كيحل سبرديلة وقال ليها صافا ... مابقا والو قربات تولد

قالت ليه اممم ... مزيان . يعني مغاديش نشوفك حيت ماعندكش الوقت

قاليها راني قلت ما بقا والو هاد السوجي هضرنا فيه من قبل صافي

قالت ليه نتا مكتعاودش كولشي اجاد كتعاود غير داكشي اللي بغيتي

قاليها داكشي اللي خاصك تعرفيه قلتو ليك شنو؟

قالت ليه ماعرفتش .. عندي احساس مغاديش طلقو .. كنحس براسي واقفة على الماء اجااد .. ماعرفتش .. مهم احساسي فشكل ومابغيتش نتصدم

تنهد وهز تيليفون حيد الصوت قاليها راه مكنتفلاوش فهادشي اش عندير معاك الى ماكنتش اصلا غادي نطلق ... صافي هضرت معاك قبل ماتمشي وعرفتي الضروف دابا من هنا لتما يحن الله ... ديها فقرايتك ماتبقايش معمرة راسك بتخربيق

كنسمع ويدي على فمي حابسة النفس حتى قطع لاح تيليفون ودخل للدوش وخرجت بزربة هبطت لبيتي سديت عليا ونفاجرت تما عرفتو دار نهاية لعلاقتنا وماعندوش فكرة نرجهو وكنت كنتأمل على الخوا الخاوي وهوا عارف اشنو باغي . كرهتو لواحد الدرجة مكتصورش رجعت كنحس اتجاهه بواحد الحقد وجاني منها الحسد والغيرة وعارفاه مزوج ومرتو غتولد وكتسناه يطلق كن شديتها كن مصيت دمها اللفعة الاخرى .. كمدتها فقلبي وسكت مابقيتش باغا نجبد معاه الموضوع حيت كنت غادي نهضر انا وياه ونتودد ليه لاكن ديك المكالمة بدلات كولشي وديك الدخلة ديالي للبيت خلات عيني يشوفو مزيان وحليتهم على الحقيقة حيت كنت كنتوهم ونقول غنرجعو .. مهما كانت المشاكل غنرجعو وكنتفكر الوعود ديالو واللحضات الزوينة اللي بيناتنا كولشي تضرب فالزيرو وحتى باش نواجهه مكاينش باش .. شنو نقول ليه؟ انا مرتك كتخوني؟ شنو ؟ غيقول ليا شكون قالك اصلا مرتك وعلى اشمن خيانة كتهضري وانا قلت سالينا مابقات بيني حتى حاجة .. مجرد ورقة جامعاني انا وياه وقريبا غتقطع .. لاكن اللي عمرو مايتقطع ولا يتلاح للتوش هوا ولدنا اللي جامعنا وغيخلينا ديما قراب لبعض وماعليا انا غير نصبر .. حتى نولد ونشوف واش غادي يتبدل ليه الرأي مللي يشوف ولدو ولالا

كمدتها فقلبي وسطرتها وخليت الايام غادية وانا كنشوف جاد صباح وعشية وحتى الهضرة مابقيتش كنهضر معاه حتى لواحد للنهار كنت متكية انا وماما كنهضرو على الولادة شوية وانا نحس لواحد النغزة قوية فقزت من بلاصتي وقالت ليا ماما ايوا لاواه لاواه قليل ماعطيتيني نتي فالركول .

حسيت بسليب فزك وقلت ليها لالا شي حاجة يمكن طرطقات السقية ونضت وقفة حيدت السليب بالزربة شفت الماء كيهبط كيشرش رجليا خواو بالخلعة وناضت ماما كتجري تلفتا قالت ليا والو ماتخلعي والو غير السقية طرطقات وغادي تولدي ان شاء .. شدي فراسك . وجلستني على لكرسي طلعات كتجري عند جاد هبط معاها كيلبس الجاكيطة فالدروج شافني كنترعد قاليا واش شدك الوجع قلت ليه لا غير السقية طرطقات . قالت ليه ماما راه الباليزة واجدة محطوطة جمعنا فيها كولشي من قبل سير ديها للطموبيل . مشا بالزربة هزها خرجها وكان الليل تكون شي طناش بحال هاكاك .. لبساتني ماما بينوار وقلت ليها عطيني نسرح شعري دغيا قبل منمشي ومشطتو وجمعتو وخرجت معاهم طلعت عادي مافيا لا وجع لا والو داني سبيطار ودخلوني كيقلبوني ويوزنوني وقالو ليا دخلي لواحد البيت تكاي فيه باقي الوالدة ماتحلات . دخلت لواحد البيت عطاوه ليا انا وجاد وماما وجلست وجاتني الممرضة وراتني شي حركات نديرهم وبقيت كنطلع ونهبط وندير الرياضة وجاد وماما شادين ليا فيدي .. بقيت هاكاك شوية بدا الوجع يدور بيا تدريجيا وكل شوية نتقلب فالبياص ديالي .. دوزت واحد 3ودالساعات كان الوجع فيا طالع نازل حتى بان ليا الضو والنهار كيطلع من السرجم والوجع كيجهاد عليا . تما جاو عندي بدلو ليا حوايجي لبسوني واحد اللعيبة خفيفة ودارو ليا السيروم فيدي وبديت نين بالوجع وماما كدلك ليا ضهري وانا جالسة على واحد الكرة كبيرة وجاد قدامي كيشوف فيا وساكت .. طلع الحريق بزاف حسيت بالسخفة وجاو عندي ضربو ليا واحد الابرة فضهري حسيت بالبرودة والرحمة نزلات عليا ونعست فالبياص ديالي واحد النعسة طويلة وكرشي عريانة ملسقين فيها شي سناطات وحدايا واحد لاباراي .. فيقاتني واحد الزحمة من النعاس حليت عيني لقيت الطبيبة والفريق اللي معاها قدامي قالت ليا غتولدي وتقلبت على ضهري كنحس بالزحمات متابعين وكنتعصر بوحدي .. درت لقيت جاد واقف حدايا شدي ليا فيدي وانا كنتعصر ونغوت وماما عند راسي كتبكي والطبيبة كتقول ليا دفعي .

بقيت كندفع ونتعصر كنسمع جاد كيقول غير صبري مابقا ليك والو وانا كندفع ماقدرتش فاللخر جرحاتني ببمقص حسيت بديك الجرحة فاش بديت ندفع وكتقول ليا راه الراس كيبان ها شعرو قدامي وانا نزحم بكل ما اوتيت من قوة وهما يخرجوه هزوه قدامي شفتو شعرو كحل وعينيه مسدودين بقيت كنضحك بالفرحة وحطاتو ليا على صدري وانا كنبكي ونبوس يدو وعنقتو وهوا كيحرك فمو .. وهما كيبركو ليا فكرشي ماحسيت بوالو من بعد تلعيت معاه .. شفت فجاد وهوا كيشوف فيه فرحان ودوز صبعو على شعرو وشد ليه فيدو منبعد هزوه داوه وشاف فيا جاد قالي على سلامتك وابتسم ليا .. قلت ليه شكرا وخرج تبعو بقيت انا وماما كتبوس ليا راسي .. خيطو ديك الضربة ووبنجوني مابقيتش كنحس بحتى حاجة كولشي تهز سببحان الله وقدرت نجلس عادي واخا كرشي حسيت بيها خاوية كنتهرب ليا جمعتها بواحد البانضة ولبست حوايج جداد نقيين من الحوايج اللي شريت ورطبين ونضفو ليا البياص جلسوني على واحد الفوطوي فشلانة كنحس بعيني تقال وطلعوني لواحد البيت اخر فيه ناموسية صغيرة طلعت عليها وركبو ليا السيروم فيدي ونعست غطاتني ماما وقالت ليا غير نعسي راه دابا داوه يشوفو صحتو واش مزيان واش بيخير ويجيبوه .

نعست بحال الى عمرني نعست فحياتي حتى حليت عيني راسي كنسمع الهضرة حدايا وتلفت لقيت جاد جالس فاتح القميجة ومنعسو على لحمو وهوا لابس الازرق ويديه مخبين فليكات بيضين وطريبيش ازرق بحال ارنب وماما حدايا شادة فيدي .. قلت ليهم عطيوني ولدي وقاليها جاد عفاك اجي هزيه عطيه ليها وجابتو ليا شديتو فيدي وانا جالسة وكنشوف فوجهه .. نسيت هموم الدنيا كلها وبستو فراسو ودموعي نازلين وعنقتو كنشم ريحتو وتلفت شفت فجاد لقيتو كيشوف فينا ويتأمل وقلت ليه بلفونسي باش ماما ماتفهمش .. واش غادي تاخدي ليا ولدي

هبط عينو شاف فالارض سكت وعاودت نفس سؤال وقلت ليه جاوبني واش غادي تاخد ليا ولدي

حرك ليا غير راسو بالنفي وقلت ليه واعدني عمرك تاخدو مني

وقف وقالي صافي دابا راني هضرت معاك .

قلت ليه لا بغيت وعد

قالي ماشي وقت الهضرة دابا .. من بعد ونهضرو

سكت حتى انا و شفت فولدي درت ليه واحد التعنيقة كبيرة ماسخيتش نحطو حتى جات عندي الممرضة قالت ليا عطيه يرضع .. وديري ليه السكاتة باش يولف وحطات ليا السكاتة جديدة .قاطعها جاد قاليها تاكل شي حاجة بعدا راه ماكلاتش وعاد والدة

قالت ليا واش مزال ماكليتي والو دقلت ليها لا باقي ولاكن نرضع ماشي مشكل وفضلت نعطي لولدي ياكل واخا نموت بالجوع وجبدت بزولتي بقات ماما كتعصرها حتى خرج الماء ووراوني كي ندير نرضع ودرتها ليه ففمو شدها كيجبد مسكين ماعرفتو واش كيرضع ولالا حيت ماحسيت بوالو حتى دخلو ليا الماكلة فيها داكشي صحي شميت ريحت الشربة وحداها الخضرة مصلوقة وكاس ديال الشوفان مع الحليب قالو ليا كيدير لحليب مزيان وخاصك تاكلي باش ترضعي حيت ولدك ماعندو ماياكل الى مارضعش منك . شفت فيه كان ناعس مسكين قالت ليا ماما اريه وكولي وهزاتو يالاه بغات تحطو قاليها جاد عطيه ليا نشدو ومشات حطاتو ليه على صدرو وهي متكي على الكنبة وشاد يدو كيشوف فيها ويتأمل وعلى وجهه واحد الابتسامة زوينة .. بديت كناكل كان فيا واحد الجوع رهيب وكنشوف فجاد وهوا داير ابيل فيدو لماماه وعاىلتو وكيهضرو فرحانين ودوزهم ليا هضرت معاهم .. باركو ليا وكانو غيطيرو فالفرحة شفت مو كتبكي متأثرة قالت ليا ماكرهتش كن كنت معاكم وانا كنجاملها مالقيت منقول ليها وعلاقتي مهزوزة ونهايتها وصلات

كملت ديك الماكلة وحطيت يدي على صدري قلت ليهم تشهيت بيتزا .. قالت ليا ماما عاد كليتي . قلت ليها باقي فيا الجوع .. بقيت كنهضر معاها ووجاد خارج وتيليفون كيصوني فيدو ضرني قلبي عرفتو خرج يهضر مع ديك خيتي لاكن كمدتها وتقلبت نداوي جروحي بريحة ولدي ونعست حداه كنشوف فيه وهوا ناعس حتى لواحد الشوية رجع وهاز فيدو كارطونة ديال بيتزا صدمني قالي هاكي ها البيتزا وعطاها ليا شديتها وبقيت غير كنشوف فيه مخرجة عيني .. حطها ليا ومشا عند ولدو قالت ليه ماما اذن ليه وها كفاش دير ه كفاش واذن ليه فودنو وانا شادة ديك البيتزا كناكل وساهية فيه فين ما نتفكر علاقتنا كنسد عيني ونتنهد

تمنيت كن ولدت فضروف حسن من هادي ولاكن الغالب الله ماشي كاع داكشي اللي كنبغيو كنلقاوه ووكلت امري لله هوا يعيني فهاد المحنة ديالي ويغفرلي ويفك كربتي .. الحمد لله كولشي مشاكيلي تحلو وبقات غير علاقتي مع جاد تمنيت من ربي يصلح احوالنا فديك الوقيتة اللي كنت كنولد فيها ونتوجع .. كانت على لساني دعوة وحدة هي ربي يجمع شملنا مايفرقناش ويبعد علينا ولاد الحرام وكنت كنرددها طول الوقت بيني وبين نفسي حتى ولدت ولدي بيخير وعلى خير .

دوزت نهاري الاول تقريبا كامل ناعسة ويدي على ولدي كنوض نرضعو وننعس وباتت ماعايا ماما الليل كامل شافتني مانعست ماشفتو كيبكي ليا فكل مرة نحطو وباغي نخلي ليه البزولة ففمو .. كانت هي اللي كتبدل وتعاوني وقبل ميمشي جاد جاب ليا الماكلة سخونة مغلفة وطاسات فيهم الشربة ديال الدجاج وديسير قالي هادو الى جاك الجوع بالليل وبغيتي تاكلي والى خصاتك شي حاجة عيطي ليا واخا يكون الليل وعطاني تيلفون جديد قالي خليه معاك باش تعيطي ليا ومشا . دوزت الليل كنصور ولدي وناكل ماحسيتش بالعيا بقيت سهرانة وماما ناعسة ونضت عطاني ربي واحد القوة قدرت نتحرك واخا عضامي محلولين و بدلت لولدي ليكوش بالفرحات عليا مابغيتش نفيق ماما وقابلتو راسي وخا بزز باش كنجلس دوك الغرزات قتلوني واخا قالت ليا الطبيبة راه غير جوج غرزات حيت كنت غتشركي والبيبي تبارك وافيه فيه ربعة كيلو ونص مابغاش يخرج ليهم لاكن حسيتهم بيهم ضروني من بعد وعذبوني .

الصباح جا عندي جاد لقاني ناعسة فقت على صوتو لقيتهم واجدين باش نخرج سمعتو كيقول لماما غير خليها تا تفيق ... دوزات العذاب فالولادة

تنهدات ماما قالت ليه واش غير اجي وولد اولدي راه مكنشوفوهم حتى كنشوفو الويل لكحل

شفت فيهم لقيتو هاز واحد الكونة فيدو عندها يدين جابها جديدة حيت انا ماشريتهاش ونسيتها .. قاليها حطيه هنا وحطاتو وغطاتو مزيان وجاد كيطل عليه ويضحك اما انا لبست غير واحد الجاكيط مع داك سروال البيجامة ديال وبانطوفتي ودرت الشال عليا وخرجت معاهم كنتمشا بشوية كنحس بداتي كلها كتزدح وجاد قدامنا هاز الكونة فرحان فيه وكل شوية يدور عندنا حتى وصلنا للطموبيل ومشينا للدار لقيت راحتي تما اكثر والجوع دار فيا خبلة وحالة وليت ياغا غير ناكل وصافي ماما مقابلة غير الطياب والحق يتقال حتى جاد كان كيطحن ليا كاس كبير ديال الشوفان والحليب صباح وعشية وهوا اللي كيعرف يصاوبو وكيجيبو حتى لعندي للفراش انا غير جالسة وساكتة كنهضر معاه وفحدود لاكن خايفة يدخل عليا ويفتح معايا موضوع الطلاق ماقدراش نسمع هاد الموضوع ونفسيتي مأزمة لولا ولدي الحبيب اللي كينور ليا نهار فاش كنصبح عليه يعلم الله شنو كان يوقع ليا بقوة الصبر اللي صابرة .

ودزت اسبوع الاول ديال النفاس وماما مسكينة كتصاوب المساخن وتعطيني وانا كناكل وخايفة تعطي مني ريحة خايبة .. رجعت كل صباح كنشلل لحمي بالماء والصابون وشعري كنغسلو بوحدو ونقلبو قدامي .. وكل ليلة فاش كنكون ناعسة وبياص ولدي حدايا كيجي جاد فنصاص اللي كيطل عليه وكندير راسي ماحاساش بيه حيت اصلا رجع نعاسي خفيف وحاضية ولدي لا طيح عليه الكاشة تخنقو .. كيجي وكنشوفو بين رموشي كيحط صبعو حدا نيف البيبي ويشوف واش كيتنفس واش حي ويغطيه ويمشي ورجع كيديرها كل ليلة حتى لواحد الليلة كنت ناعسة كنحلم بشي كوابيس وحليت عيني لقيتو قدامي تخلعت قلت ليه شكون نتا ؟ قالي والو غير جيت نشوف واش جود ناعس ولالا

قلت ليه سكتي ليا قلبي قالي واش بغيتي تشربي ومشا جاب ليا الماء شربت وبقيت كنشوف فيه قلت ليه تكا حداه ال بغيتي وكحزت درت ليه بلاصة بقا كيرمش وجلس قالي صافي غير نعسي

قلت ليا مامزيانش تبقا حاضيه هاكا وهوا يتكا حدايا قالي مكيتحركش

قلت ليه ناعس غير سكت غتفيقو

قالي شوفيه واش كيتنفس

قلت ليه وا نعل الشيطان راه غير ناعس مالك موسوس

قالي غير بغيت نتاكد

يالاه كملها بدا جود كيبكي قلت ليه فاق

قالي انا نهزو وناض هزو فيديو بشوية قلت ليه عنداك تفلعصو راه صغيور

قالي لالا غير بشوية وتكيت بقيت كنشوف فيه وضحك شاف فيا قالي كيضحك

ضحكني قلت ليه كيضحكو راه عادي ..

سكتنا بقيت كنتفرج فيه وهوا كيدور بيه فالبيت حتى نعس وقالي هاكي حطيه ونضت حطيتو ومشيت ناكل حسيت بالجوع ورجعت لقيتو ناعس فوق الناموسية ونعست حداه بقيت كنقرب ليه شوية بشوية حتى حطيت راسي على صدرو وانا نحس بيه هز يدو عنقني بيها

جاتني البكية بديت كنبكي ونتنخصص هبطو دوع حارة قلت ليه جاد ... وتقطع فيا الصوت دوز يدو على كتفي قالي صافي .. الله يسامح

ماصدقتش حسيت بقلبي دار بوم وعنقتو كنبكي قلت ليه سمح ليا بزاف ندمت .. ندمت وماقدرتش نسامح راسي وبديت كنترعد بالبكا وجرني عنقني قالي صافي الله ينعل الشيطان وباسني فجبهتي وهبط راسو لفمي باسني ودخل صباعنو فشعري عنقني واحد التعنيقة حتى حسيت بضلوعي تجمعو وقالي غتواعديني .. عمرك مغتخبي عليا شي حاجة

حلفت ليه قلت ليه وحياة الكبدة اللي مشاركين انا ونتا عمرني نخبي عليك شي حاجة وعمرني نكدب عليك

عنقني ونعست اريح نعسة حسيت بالعذاب اللي كنت عايشة من قبل ما نتصالحو وغمضت عيني حتى صبح الحال فيقني ولدي بالبكا وهزيت راسي على صدرو ونضت فرحانة هزيت ولدي رضعتو ورديتو فالنعاس ورجعت نعست حدا جاد حتى صبح الحال جات ماما بحال العادة باش تهز ولدي تبدل ليه واخا كنكون ناعسة وحسيت بيها حلات الباب غير شافت جاد ناعس حدايا حشمات وخرجات ونضت عندها بالزربة عنقتها قلت ليها راه تصالحنا والدعوة اللي دعيت وانا كنولد تقبلات ليا .. قالت ليا هنية عليك ابنتي جمعتي شملك هنية عليك

وحليت عينيا وسراجم الدار على اجمل نهار واخر سطور نحكي فيهم قصتي .. قصتي اللي عشت وتعلمت فيها دروس كثيرة وماحدي فالحياة وكل عثرة كنقزها كتخلي ليا عبرة . صبحنا كولنا مجموعين على طبلة الفطور ضاحكين ومرتاحين لبعضياتنا ونقول سبحان من يصبحها فشان ويمسيها فشان ماشي بحال من قبل كنا كناكلو مفرقين . كان ولدي جود حدايا فالكونة انا وباباه .. وانا اللي ختاريت ليهم اسم جود حيت نعمة جاد عليا بيها الله ولو لا اسم باه ا لا سميتو جاد .. لاكن لقيت انسب اسم ليه هوا جود .. هوا الوردة اللي زينات ليا حياتي ونوراتها ليا . الحمد لله دائما وابدا نساني كل ما مريت بيه بفضله ورزقه اللي رزقني بيه هاد الوليد . كنت كنتماه من قلبي وضاف الملحة على حياتي وخلاني ندير عقلي ونعرف نتصرف قبل مانتهور .. ونزيد نصبر ونعض فالصبر . طلعت لبيت جاد اللي لفوق بغيت ندخل ليه واخا ماكنتش عندي رغبة حيت اللي شفت فيه اخر مرة وسمعت قطع قلبي طراف .. لاكن قادوني رجليا لداك البيت وفيه توضحات كل الامور .. غير دخلت تبعني جاد ورد الباب لقاني واقفة لوسط غير كنشوف .. ضرت عندو شفت فيه وابتسم قالي علاش طلعتي لهنا ؟

قلت ليه شفت شي حوايج فيه ماقدروش يتنساو ليا ..

قالي شنو اللي شفتي هنا ؟

بقيت ساكتة مطولا ومشيت للبلاكار بغيت نجبد ديك الوردة اللي لقيت لاكن مالقيتهاش تما وهبطت يدي .. قالي داكشي اللي كتقلبي عليه مشا .. مابقاش

قلت ليه كفاش مشا .. وكفاش مابقاش؟

جرني من يدي وجلس على واحد الكرسي وجلسني على رجلو وقالي فالازمة اللي دوزنا من بعد المشكل اللي وقع ... تعرفت على واحد البنت وكنت ناوي نبدا صفحة جديدة .. ولاكن من بعد جمعت وطويت .. ولقيت راحتي معاك نتي وولدي . واخا كاع داكشي اللي جاني منك مزال كنلقا راحتي عندك ..

بقيت ساكتة وقلت ليه شكون هاد البنت ؟ وفين تعرفتي عليها؟

قالي هاد البنت عايشة فكندا وجات هنا كونجي وبالصدفة تلاقيتها . هي اللي عطاتني ديك الوردة وبقات تما من نهار جينا لهنا حتى دبلات ... ومادام دخلتي لهنا غتكوني قريتي الرسالة حتى هي ...

قلت ليه انا بان ليا كنتي كتبغيها

قالي الحب بوحدو ماكافيش ... باش تعيش حياتك مع واحد الانسان وتختارو يكون معاك وتبني معاه اسرة .. خاصو بزاف ديال الشروط .. والحب مكيجيش غير هاكاك خصوصا الى كان الانسان مزال كيحب وماقدرش ينسا

قلت ليه شنو درتي معاها ؟

قالي والو ... قاصح حسن من كداب وصافي سالينا قبل كاع مانبداو

تنهدت وقلت ليه واش هي نصرانية ؟ يهودية؟

قالي نصرانيا من الاب والام .. دابا مكاين علاش تبقاي تسولي صافي نزوة ودازت

بقيت ساكتة شحال وشفت فيه قلت ليه كنتي باغي تكمل معاها ؟

قالي بلا متسوليني .. حيت اللي فات مات ونبداو من جديد احسن .

بتسمت وعنقتو وحتى هوا بادلني نفس العناق وشد ليا وجهي قالي داكشي اللي داز علينا ماشي ساهل .. ولاكن غادي نساوه ونكملو حياتنا

غرغرو عيني بالدموع وبست ليه يدو اللي كانت على حنكي وباس ليا جبهتي وقررنا نساو كولشي .. اي حاجة خايبة عشناها نطفيها ونشعلو شمع حياتنا من جديد بيناتنا ولد وكنبغيو بعضياتنا واخا حاولنا نتفارقو رجع القدر وجمعنا .. وتعطاتنا فرصة جديدة تمسكنا بيها باش يمشي القارب ديالنا و حطينا ولدنا بين عينينا وكل حاجة فسبيل راحة ولدنا ندوزوها ، وحتى فسبيل راحتنا مع بعضياتنا .. تشبت بالحبل اللي مد ليا ونضت نبدا حياة جديدة .. وهزيت ولدي وماما ومشينا لبلجيكا حيت تما فين قررنا نعيشو ... هاديك البلاد هي فين كبر وترعر وختارها باش نكملو حياتنا ومع ولدنا وفيها شرينا السكنة ديالنا وخليت ماما معايا حيت حتى هي ولفات ولدي بزاف وماقدراتش تفرق عليه .. واللي زادني فرحة هوا اتصال عصام بينا نهار السبوع اللي درنا لجود مع العائلة والاحباب .. كان اسعد نهار فحياتي هوا فاش تاصل وقالي عفا الله اختي عمرني نسا خيرك .. وراني لقيت واحد الخدمة هنا مابقيتش غنرجع للمغرب . قلت ليه هاداك هوا النهار لكبير وراك خرجتي من حبس حاول ماترجعش ليه .. ضحك وقالي بلا ماتوصي يتيم على بكا .. وصي اللي عمرو جرب ويالاه دار الخطوة الاولى .. ديك الخطوة هي اللي خرجات عليا وعلى شحال من واحد بحالي .. كتبدا ضحك حتى كتخلص ثمنها غالي ..ولاكن فيك البركة نعمة الاخت واخا عمرنا تفاهمنا . ضحكت وقالي دوزي ليا الوالدة وعطيتو ماما وانا فالبيت لابسة حوايجي وملبسة ولدي باش نهبطو للعاىلة .. خليت ماما كتبكي ومسحت دموعي وشفت فولدي وهزيتو بين يدي

دخل جاد كانت باينة على وجهه الفرحة .. شافني هازة جود وجا عندي قالي اري عليك وباسني فحنكي وعطيتو ولدي هزو ونزل بيه وانا شادة لماما فيدي مهبطاها معايا عند العائلة . كولشي تعرض ليه واولهم سليمة عطاه ليها هزاتو فيدها والدموع كيطيحو حجر .. اما بابا مسكين غير وقف كيشوف حيت حتى هوا حضر وجابو لينا جاد وخلا ماماه حتى شبعات منو وعطاه لباب اذن ليه فودنو وفرح بيه وفرحت حتى انا تبورش ليا لحمي . بقات علاقتو مع ماما الاحترام ونقولو رجعو خوت حيت العلاقة ديال الناس لكبار ماشي بحال ديال الصغار كتبقا ديك الحساسية .. اما بابا وماما كبرو وكل واحد لقا راحتو فالوضع اللي هوا فيه ورتاحينا من المشاكيل والهموم اما انا .. فكانت بقات ليا شي بركة كنت بغيت نردها لجاد حيت خلص النص ديال داكشي اللي عطا من عندي لاكن حلف مايشد الريال وقالي حنا مابيناتناش الفلوس .. اللي بيناتنا اكبر من هاد الفلوس وتهنيت بقات الفيلا بعتها وعطيت لختي باش تنقد راسها من الذل الى بغات .. مالقتش ليها طلقي .. بغيتها تبني حياتها كما دايرة شحال من وحدة خدامة ومزوجة .. وعطيت لبابا واحد النصيب يبدا بيه من جديد وكسبت عائلتي وتهنا بالي وجلست كرست وقتي وحياتي فتربية ولدي واولادي اللي غيجيو فالطريق ولقيت راحتي وهنايا وحتى جاد خفاني فمرة من الوجود . من السوشل ميديا من الهضرة من التابعة .. من اي حدث ممكن ليفت ليا الانتباه ويوجه ليا الاضواء .. وانا براسي تهنيت من المشاكيل وعايشة حياتي طبيعية بحال اي بنادم عادي .. كنسافر .. كنخرج متبعة البطولات ديال جاد المتكررة ومعاوناه فالخفاء فالماركة ديالو ديال السبور اللي دار ومرتاحة ورجعات ليا الطمئنينة اللي كنت فتاقدت هادي شحال .. وحتى وجهي تنور وبانت عليه الراحة وقطعت صلتي بكاع البشر اللي كنت منعرف من غير بشرى اللي ماشفت منها حتى عيب ومريم .. وطبعا درت صحاب جداد فبيئة جديدة وهما غنوضع اخر كلمة ونشارك قصتي اللي لطالما كنت كنفكر باش نشاركها مع الناس

النهاية ❤ 

‎