حيدت التيشورط عليا طويتها بالادب وحطيتها وجلست قاديت شعري حتى كنشوف واحد الباب ديال الحديد قد السخط كبير عندو صوار عالين تحل ودخلنا كان الضلام والنخل ولابيسين فواحد الجهة قداش بحال شي قصبة من دوك قصبات مراكش اللي فالخرجة دايرينهم اوتيلات .. دنيا اخرى لداخل والوسوعية والسقيل ماستقبلنا حتى واحد من غير واحد حل الباب شار لينا بيدو سلم وحط الطموبيل ونزلت مسخسخة مهدودة كلي مكمشة كنمشي بزز ..دار عندي من بعد مت البس تيشورط ديالو وقالي
خاصك شي دفعة من اللور ؟
جاني سخفانة ماعندي جواب ومضهشرة حتى لباب واحد الدخلة ماهي دار ولا اوتيل ولا شنو داكشي تمات واحد المرى جايا كتجري دايخة بالنعاس لابسة واحد البيجامة بلدية والزيف على راسها كتهضر حشمانة قالت لينا على السلامة .. مرحبا مرحبا السي زايد .مرحبا
دخلنا لداخل كانت دار كبيرة والتواسع قديمة شوية فيها الزليج بلدي وفيها جوج دروج من اليمين ليسر كيتلاقاو لفوق جامعهم كولواار داير والوسط خاوي والترية فلسقف مدلية .. غادي قدامي حيد الكاسكيطة وانا كنشوف كانو شي جلسات فالالوان بالبوفات ديال الجلد وطبلة بلدية وشي فوطويات ديال الجلد والتلفازة قداها قداش .. قلت ليه فين حنا ودار عندي كلن كيبان فيه عيا وعينيه حومر زير عليهن بيدو وقالي بعفوية وهوا كيشر لديك المرى . حنا فالفيرما .. سيري غتديك للبيت نعسي تا للصباح
كان مسخسخ ماقدرش يزيد يهضر وكيزير على عينيه ولا يمكن سكر . ضرب ديك القرعة اللي كان هاز كلها بقا فيها غير شوية بان ليا كيقلب غير فين يحط راسو .. مشا طلع مع الدروج وانا هازة عيني داروفداك الكولوار ودخل لواحد البيت سد عليه ومن تما ماعاودش شتو .. حتى انا طلعات معايا ديك المرى لواحد البيت ودخلات معايا كتوريني للحمام وكفاش نتصرف ومشات بحالها سدات الباب وبقيت انا كندور فالبيت كان بلدي والناموسية بلحديد كحلة ومتول والفراش جديد .. عندو بالكون وديكورات بلديين والهدوء مكنسمع حتى شي حس من غير نفسي كطلع وتعهبط ... لحت الغطا ولحت الجلابة بقيت بديباردور وسليب وماجايباش معايا الحوايج .. يالاه تخشيت سمعت الدقان ونضت لويت عليا ليزار قلت شكون جاوباتني ديك المرى وحليت الباب طليت لقيتها جتيبة بلاطو صغير فيه الماء والكاس حطاتو ليا ومشات .. شربت رويت العطش وطحت نعست مافقتش حتى سمعت واحد الصوت كيدير الضجيج .. صدعني فراسي تقب ليا سفق ودني وعصبني كتر من الساعة اللي كتفيقني الصباح .. هي بعدا كنزل عليها نسكتها اما هوا ماعندي كي ندير وماعرفتوش حتى شنو هوا .. مكيمكنش على صوت كيطلق هاد الحيوان ماعرفتو من اشمن صنف .. فقت كان الضوء زادح البيت والهوا كيشهي تتنفسو و النقاااا .. الله على البادية والهدوء احسن بالف درجة من ضوضاء المدينة . طليت من البالكون نشوف شكون هاد النكاف ولا نكافة اللي فيقاتني وانا نتفاجئء .. حليت فمي وقلت واااااو واو وااو وااااو ... منضر مكنتش متخيلة فراسي غنصادفو ... كنطل على واحد الواحة بحال داكشي ديال علاء الدين وسيندباد .. واحد لابيسين بعدا قدامي لونو اخضر واااعر كبير مدورين بيه الكراسا بحال شي اوتيل ... والتواسع من الجناب على حد فين شافت عيني فالواجهة اللي كنطل عليها و مو موراه واحد الارض كبيرة واسعة خاوية فيها غير الشجر صغير وبير كيبات ليا صغير وواحد تيران ديال تينيس فيه الرملة .. ومن مور هادشي كامل فاصل بيناتهم واحد الصور صغير حادر كيبين واحد الاسطبل قدو قداااش فيه ساحة الوسط وفيه واحد الراجل جار خيل كحل كيبري والبيوت دايرين بيه والتواسع والاراضي غادية على حد الشوف .. شفت على ليمن وليسير بان ليا شجروالزيتون والخضرة والاراضي مقسمين تبارك الله الخيرات ديال مولانا و شادين مور الدار دايرين الاراضي بالخضرة وبالذرة وكانت واحد ثدام الباب واحد الشجرة ديال اللوز مشاء الله قدها قداش مضللة
منقدرش نوصف نقاء الجو فهاد المنطقة... باينة منطقة ماشي ساحلية حيت انا عندي الحساسية وكدوز عليا فمدينتي وديما نيفي احمر وكنعطس .. هاد الجو الغزال سرح ليا نيفي وخلاني نسستنشق الهواء الحقيقي النضيف .. غير ليلية وحدة دوزتها هنا ونعست معطلة وتسخسيخ الطريق كانت كافية باش نوض مهلوكة وفيا السخفة ومبنجة .. لاكن لا .. فقت فقمة النشاط وعيني محلولين وبصحة جيدة .. ماعرفتش الهوا اللي كنتفسو فالمدينة واش فيه البنج ... عينينا طايحين وسخفانين ومنونخين .. جو البادية والطبيعة بحال السيروم وفيتامين سي .. ماعرفتش شخال الساعة لاكن الشمس باردة ماشي ساطعة بزاف .. ..قلت تقدر تكون ديك التسعود ديال الصباح .. جيت نشوف شكون اللي فيقني وماخلانيش نشبع نعاس لقيت واحد سيدي طاوس ناشر ريشو غادي جاي لتحت كيدور .. فينما يترعد بريشو كيبدا يطلقو داك الصوت الغريب .. اول مرة نعرف صوت الطاوس قوي ومجهد .. ولايني راك جعواق السي !.. ولاكن ماعليكش .. غزال عجبتيني . رجعت بداك اللحاف ملوي عليا مشيت طليت على تيليفوني لقيتو طافي شابع راحة وحطيتو يتشارجا .. دخلت غسل وجهي بالماء وشللت فمي حيت ماهزيت معايا حتى حاجة من الدار .. طلقت شعري واخا مامصاوبش بغيتو يتنفس وضرني فراسي مجموع تقل عليا .. ماشي حرش .. ولاكن قوي بزاف وكيزيد يتنفخ مكنرتاح حتى كنبهطو . ماعلينا كان باقي شاد فيه شوية ديال برودة الماء وبات ملوي صبح مهدن .. يمكن الجو والمني.. كن صبحت فالدار كن فقت بحال السبع وشعري مشوك . لبست جلابتي الكحلة وبلغتي وحليت الباب طليت .. السكااااااات .. دبانة مكتزنزنش فالدار ... طليت لوسط لقيت واحد القط قدو قداش مزغب متكي مع راسو دايرة واحد النعسة ياسلام على ضهرو .. سعداتو مهني .. ياكل ويشرب وينعس وعايش فهاد البلاصة ممتع مع راسو .
هبطت لتحت كنسرح عيني وعاد بانت ليا الدار مزيان ... الله شحال زوينة ... سراجمها طوال وكبار بالزاج الملون .. داكشي بلدي .. والنقش فالسقف والراجم ديال الخشب بلديين .. بحال شي رياض لاكن داكشي خفيف ضريف ... واحد الصالة فواحد القنت فراشها احمر غزالة وطلامطها عادين لاكن كلشي على البساطة ... مينكنش شحال حبييت هاد البلاصة .. كل تفاصلها زوينين والالوان الثراتية غالبة عليها .. زربية ديال الخيط فديك الصالة والترية نحاسية ... واخا نوصف حتى نشبع كل ركن فيها مانعطيهش حقو . بقيت كندور وانا لابسة ديك الجلابة وشعري مطلوق حسيت براسي بطلة فشي فيلم ثراتي قديم ... ياريث كن عشت فديك الوقت ... ماكرهتش وبشدة كن عشت فدار بحال هادي ولباسي بدلي .. عمرني فضلت البلدي على الرومي حتى شفت هاد البلاصة وتغرمت بالتقاليد ديالنا وثراتنا اللي كيشوفو النصارة شي حاجة فشكل .. شي حاجة بحال افلام علاء الدين وسندباد ... الالوان والبلدي والجلسات ديالنا لا يعلى عليها .. حيث ماعندهمش هما فثراتهم هادشي كيبان ليهم مختالف بحال شي كوكب اخر لامثيل له .
وانا كندور بوحدي فاركان الدار ولا فيلا و لا رياض ولا شنو نسميها ماعرفتش .. ضرباتني ريحة لنيفي ديال المسمن هزاتني فالسماء .. ماشي اي مسمن .. مسمن نيييت وتبعت الريحة خرجت فواحد الكةزينة نصها الكبير عريان فالهواء الطلق .. مجهزة على حقها وطريقها لاكن فيها فران ديال الثراب مربع بحال ديال البيزات فواحد الحيط على الهوا وديك المرا كطيب فيه المسمن !!! كفاش؟؟ المسمن فالفران كي دارت ليه !! .. ضارت شافت فيا وكانت لابسة واحد القفطان بلدي قديم ودايرة واحد لاستيك طويل داير مع ضهرها جامع ليها كما يديها وطابلية على كرشها وشادة راسها كطيب .. تبارك الله عليها كتشم ريحة الحداكة كتنبع منها .. شافت فيا وقالت لي واش بغيتي تفطري هضرتها تقيلة بلدية وشحال زوينة بحال الى غالبة عليها الشلحة مسكينة .. قلت ليها غير جيت شميت ريحة المسمن وقربت لداك الفران لقيتها دايرة مقلة تما فوق العواد وكطيب .. وقفت مربعة يدي حداها كنتجمع ..سولتها على سميتها قالت ليا خديجة .. اسم على مسمى هاد المرى .. دخل واحد الولد صغير كيجري هاز واحد الجرارة كيجرها وجرات عليه وبدات تحلف فيه بالشلحة عرفتو ولدها .. الشلحة ديالها ماشي شلحة ديال سوس وبعيدة عليها .. ماجاتنيش غريبة فهمتها شنو قالت ليه .. قالت ليه هانا غادي نقتلك على دوك الحوايج اللي لبست بيك جداد قدام الناس وكتوسخهم غير جري والله تجيني مطبع حتى نقطع عليك داك قطيب الزيتون .
جاتني الضحكة بقيت كنشوف فيها مابغيتش نحرجها ونقول ليها فهمتك صافي درت راسي مكنفهمش وهرب الولد مشا كيجري وقالت لي اجي تفطري راني حطيت ليكم لفطور . سولتها واش زايد فاق قالت ليا كانت مشافتوش وكانت فلكوزينة ماعرفاتش واش خرج ولا باقي فالبيت .
تبعتها لفين غادية وهزيت معاها واحد الطبق صغير فيه المسمن وهزات هيا الحرشة وشي حوايج اخرين وتبتها خرجاتني من واحد الباب لقيت راسي فديك البلاصة اللي كنت كنطل عليها ولابيسين لهيه مقابل معاينا .. كانو جلسات بالقصب و المغطيين بالخشب داكشي غزال حدا الباب وطبلة ديال السيما لاسقة مع الارض مزلجة بزليج الفسيفساء لقيتها عامرة .. ها اتاي ها القهوة والزبدة بلدية وحطات ديك الحرشة بالسمن والزبدة بلدية .. دارت ليها واحد القشرة الوسط وحطات ديك زبيدة وسط ديك الحرشة المضورة ودورات الطبلة بكل ما هوا بلدي .. زيتون عسل خبز سخون ديال التراب مسمن بغرير بيض مصلوق البيض بالخليع وحطات واحد السوبيرة فيها الحسوة بيضاء وايلان وبزاف ديال الحوايج تقول رمضان والضياف جالسين .. وعاد السفوف ديال الزرع والعشوب داكشي كنحطوه عندنا حتى حنا فالبلاد عرفتو بلا منختاج نسولها على شنو هوا وبقيت كنشوف فيها كتحداك حتى وقف علينا زايد سمعتو قال ليها بالشلحة كيضحك معاها .. والو اخديجة قصرتي معانا .. جبت ليك المرى ومادرتيش منها هادشي كيف والو
الله وأكبر على شوية نهز يدي فالسما ونوقف نقول حااضرة ... حساب ليه مافهمتوش اش قال وديجا قلت ليه انا شلحة من الاطلس ولاكن عمرني توقعت يكون هوا نيت شلح ... صافي عاد عرفت ديك النفخة وديك النفس منين جابها .. لاكن ماكتبانش عليه نهائيا تقول ولد كازا ولهجتو لا علاقة ليها بالشلوح .. ولاكن صدمني السيد بقيت كنشوف ودرت راسي مكنفهمش وخديجة تزنكات حناكها رجعو بحال مطيشة وحمرا ومشات بغات تصاوب شي حاجة وماخلاهاش قاليها تجلسي مابغاتش كضحك وحشمانة بقل ليها شوية تولي تقطر .. دخلات فجنابها وهوا شاد فيها وجلسها معانا فالطبلة والسيدة كتعصر بوحدها مسكينة وكتبان على وجهها حشمانة .. تلفت شاف فيا عاض على شنايفو ورشقني لعنقي من اللور وشدني من رقبتي قالي صباح الخير . صبح راشقة ليه مقزب حدايا فواحد الشورط ولابس تيشورط ومدوش هوا اللي جات معاه ماشي انا اللي جايا فالجلابة وبقيت فالجلابة وغنبقا فيها تا نرجع فضيحة .
قلت ليه صباح الخير وانا كنشرب القهوى وشد ليا عنقي داني وجابني وطبطب على حنكي وجلس كيشرب القهوى وقال لخديجة قربي داك الطاجين دالخليع قرباتو ليه وهوا يشد فيها عاوتاني حتى بدات تحمار قاليهت بالشلحة تقاداو ليك اخديجة مشات لحداكة ...بقات كضحك وسولها على راجلها وهي كتهضر من نيتها قالت ليه مشا للسوق وقاليها هادي ماشي دقة السوق .. هادي شي مرا تما مشا عندها وخلاك هنا قاليك غادي لسسوق ... لا والو هزك الماء اخديجة مابقاش عاجبو للمسمن ديالك ... كديري فيه الملحة وهوا فيه السكر .. مسسكينة رجعات حمرا كضحك من عينيها وقالت ليه على نيتها ايوا غير خليه ربي يحسابو
كمل عليها زايد وانا دايرة راسي زي الاطرش في الزفة وقال ليها كتزيدي الملحة فالخبز اخديجة مابقيتيش كتهلاي فعمر .. اش هادشي هادا .. لا ولاكن واخا يدور السوق حتى يعيا مايلقاش بحال خديجة وكسكسو خديجة والطاجين دخديجة
رجعات بالموس وجلسات كتشرب قهوتها حتى جا ولدها مكرفس شد الفران حداه وتخبا فمو حشمان كيطل علينا مشاعراتش براسها حتى قالت بالشلحة معصبة والله حتى نسلخ والديك على هاد الفضيحة بهدلتي الحوايج جداد والله فيك لابقات .
شدو زايد قاليه جلس جلس اعمي تفطر تجلس
قالت ليه لا فطر خليه يمشي ينقز
قاليها اودي خلي الولد يجلس يفطر غتسلخيه على الحوايج جداد وسخهم .. مابقا فيك اللي يصبن قلت ليك عمر راه مشا دار المرا فالسوق كتعرف تصبن
قالت ليه على نيتها اوالله ما يلقا بحالي غير خليه
رد القهوى من فمو كيضحك حتى شالا وقال ليها دابا بيني وبينك واش تقبلي عمر يجيب المرى الثانية...
عقدات حجبانها وعينيها حشمانين قالت ليه والله مانجلس عندو حتى دقيقة
رد عليها : هي قاابلة يجيب الثانية اخديجة .. انا بعدا ماعنديش مشكل يجيبها لهنا الشرع عطا ربعة .. وتحرمي عمر مسكين الى بغا يفوج ويتزوج .. ماشي حشومة عليك
ولات حمرا مزنكة وقالت ليه: لاااالا مندير ليك بو المشكيل الله يكمل عليك بلخير
شد فيها وقال : لا درتي ليا مشكل دابا مع المرا يالاه .. غنرجع للدار تقولي الحاجة مالك معاها نقول ليها خديجة مجبد البلا ... واهاهيا دابا قلبات وجهها وفكي ليا عاد الحريرة
خديجة : انا راني مادرت ليك المشاكيل هاني كنقول
هز راسو كيضحك ويموت عليها بالضحك قاليها : ااااودي يا خديجة لهلا يعطيك ما يضرك .. عمر مسكين كن كوراه شوطاتو الشمس كيقلب ليك على البيجامة ونتي كتجمعي فالدنوب وتشكي فيه .. حشوومة عليك خرجتي للعيب خرجتييييي للعيب
دوز داك الفطور كامل شاد فخديجة وانا كنتسنط ونفطر ماقاداني فرحة سمعت الحوار تحلات ليا وتيقت ولاكن تصدمت فزايد بزاف .. غير بدل البلاصة بدا التقشاب والضحك وبان ليا مولف يقشب معاها حيت كتزنك وتحشم وهوا عاد مكيزيد يتقنها حيت نية وعندها شي هضور كيضحكو داكشي علاش كيعجبو يشد فيها . ماهضرتش بقيت كنسمع حتى بان ليا شي واحد جا على الخيل كان راجل كبير شوية لحيتو بيضاء وشعره حتى هوا عندو الكرش شوية .. راحل ستيني لاكن باين عليه الخير كان لابس سروال توني وتيشورط بيضاء وسبرديلة وداير نضاضر ديال الشمس وطريبيشة مدورة .. شافو زايد وابتسم بدا كيمسح يديه باش يسلم ونزل داك الراجل من فوق الخيل وجا كيردد
اهلا اهلا اهلا .. انهار كبير هادا
وقف زايد سلم عليه بالاحضان وشاف فيها وقفت مديت ليه يدي قالي سافا بنتي مزيان احوالك مزيانة .. قلت ليه الحمد شكرا . وقالي زايد .. عمي يحي قلت ليه متشرفين وجلست فصمت مأدبة اما خديجة ناضت وجدات ليه فين يجلس وجلس حدا زايد اللي عرض عليه يفطر معانا وقاليه فطرت وقال لخديجة تخوي ليه شي كاس دالقهوى كحلة عطاتو ليه وحط يدو على ركبة دزايد كيتساولو علة الاحوال والضروف وقال ليه عمو شفت الطموبيل ديالك داخلة لبارح قلت زايد هادا اللي جا .. ايوا على سلامتك اللي تفكرتي البلاد وجيتي غير نشوفو مابغينا منك والو اصاحبي
بداو كيتجمعو بيناتهم ويضحكو انا خديجة مشات للكوزينة كتبان ليا كتجري من جهة لجهة مكتساليش وعمو كيهضر على العائلة وعلى شي شخصيات جداد واحوال الخدمة والفيرما والمحصولات وشي اتقافات دازت من قبل ومشاكيل مع ناس اخرين .. هضرة كنجيب هضرة وماهضرت ما نطقت والهضرة مكتشاليش .. ناض عمو يمشي شدو زايد يجلس مابغاش قاليه جيت نشوفك ودوزو تغداو معانا مرحبا بيكم .. تردد زايد فالاول وشاف فيها مجرد شوفة وعمو كيأكد عليه قالي والو غادي تجي غنديروه على حسابك .. حط زايد يدو على كتف عمو رحب بالعراضة ومشا ركب على الخيل كيدور بيه ومشا
مشا كلشي وانفردنا غير انا وياه جالسين .. دار عندي قاش ليا فشعري وقال
السوالف الاللة .. والقصة.. شنو بان ليك نمشيو نتغداو عند عمي
تقرصت حسيت بنغزة ماشي هي هادي ونضت ماعجبنيش الحال وقالي فين غادية قلت ليه وباينة على وجههي نافضة غنمشي نجيب تيليفوني .. مشيت طلعت للبيت هزيت تيليفوني وخرجت يالاه جيت نهبط مع الباب لمحت باب بيتو وقالي راسي شوفي كي داير وشنو عندو تما .. جاني لفضول وشفت هاكا وهاكا مابات ليا حتى واحد ومشيت بالزربة حليت الباب ودخلت سديتو ورايا وسرحت عيني مان بيت عادي بحال اللي تعست فيه مزايدش عليه بزاف .. لاكن قشغت تيليفونو كيشارجا ومشيت ليه نيشان هزيتو وانا نفرح وجاني واحد الحماس بحال الى هزاتني شي موجة كبيرة فاش فاش مالقيت لا كود لا شيما ودخلت نيشان نقلب .. فر2ة فين نعرف هاد اسرار الدولة ونعرف شنو ميدور ليه فهاد التيليفون اللي عمرو خلاني نقلبو ولا نشوف فيه . دخلت ليزابيل نيشان كنشوف النوامر طلعات ليا وحدة هي اللولة بسمية ليليا صونات عليه جوج مرات غير شي جوج دقايق دابا .. شكون هاد ليليا هادي عاود ؟ تكون زعما ديك ليهودية اللي قالت ليا عليها فدوى ؟ بقيت كنقلب لقيت ليزابيل ديالها كتار وشي نماري اخرين ماعرفتش ديالمن مامكتوباش فيهم السمية . مشيت للواتساب كنقلب لقيت المحادثة ديلو هوا وديك ليليا كلها فرونسي قريت شوية شي فهمتو شي مافهمتوش وجاني الفضول نعرف شكون هادي .. مشيت طليت على التصاور مالقيت حتى صورة ليه هوا .. شفت تصاور اللي كيترسلو من الواتساب وشكون مسيفطهم بانت ليا ديك ليليا مسيفطا شي تصاور مصورة مع دري صغير .. شعرها كحل طالقاه ولابسة قميجة ودجين فشي بلاد على برا ومسيفطة ليه تصاور اشكال وانواع ديال الدري الصغير .. دخلني الشك علاش هادي كتسيفط ليه هادشي شكون هي وعاطيها وقت كيهضر معاها فالواتساب .. لقيت تصاور بسمية نادين حتى شعرها كحل لابسة واحد الكوستيم عبارة عن فيست كحلة وميني حد الركبة وقميجة بيضاء دايرة بادج فصدرها وواقفة كتقدم شي حاجة بحال الى راها فشي مؤثمر ولا منعرف فين .. شاشة كبيرة وراها والمنصة والميكروفونات تابثين قدامها وكتهضر ..
جاني لفضول نعرف شكون هاد البنات وجاتني الغيرة منهم تشوطت ماعرفتش شنو كيديرو عندو هنا . حطيت تيليفون بلاصتو وخرجت من البيت قبل ميحصلني تما شي واحد .. هبطت لتحت مالقيتوش بلاصتو وسولت عليه خديجة قالت ليا مشا لشي بلاصة تما ومشيت كندور ونكتاشف فنفس الوقت حتى وصلت لاسطبل لقيتو مع واحد الخدام تما وراكب فوق واحد الخيل كحل تبارك الله صحيح ومطراسي .. كيدور بيه غير تما ويقلبو واش مزيان ويطبطب عليه وعلى عنقو .. وقفت حداهم بعيدة كنشوف عجبني العود تبارك الله كيبان عن قرب همة وشان وكبير وعالي ماشي بحال التصاور والافلام كيبان عادي .. عندو واحد الهبة سبحان الله العضيم ربانية .. شار ليا زايد بيدو قالي اجي وقربت خايفة بغيت نقيس فالعود .. قالي واش عمرك ركبتي على العود قلت ليه من اللي كنت صغيرة وصافي .. عمرها جابتها الصدفة .. نزل وقالي اجي نركبك قلت ليه لا وقربت همست ليه فودنو باش ميسمعش داك الخدام وقلت ليه راه مالابسات من تحت الجلابة .. ضحك وقالي نجلسك جنب ومتخافيش .. خفت فالاول وانا تقيلة واخا ماشي شيوغلض ولاكن بخيري لاطاي ديال كايلي هه.. هزني وانا مخلوعة وهوا كيدفع فيا حتى خرجو عروق يديه وجلسني فوق الخيل وطلع بالزربة وانا لاسقة بيدي خايفة نزلق وشد اللجام بيا وضربو برجلو زاد بينا .. حسابني غيمشي غير تما ساعة خرجني كيدورني فدوك الاراضي الخضراء الواسعة بشوية .. حنيت لاحضانو وانفاسه تمنيت كن رجع الزمان اللور وماوقعوش دوك المشاكيل اللي هزو علاقتنا ... حسيت براسي كننتاعش وكنكبر ونترعرع وانا بين يديه والدنيا كلها ديالي والسعادة كلها سعادتي بوحدي مانتقاسمها مع حتى واحد . بدا كيوريني فدوك الاراضي اللي ديالهم واللي ديال عمو واللي ديال ولاد عمو وحدين اخرين وقالي غنديك لواحد البلاصة زوينة وهبطني مع واحد الطريق لواحد البراج كبير فيه الما وسط ديك الطبيعة والخضورية ووقف العود بديت كنشوف الطبيعة والمنضر بدا كيوريني منين جاي البراج وحتى لفين كيمتدد وهزيت راسي كنشوف حتى حسيت بواحد البوسة فعنقي ماكنتش متوقعاها
تزنكت ماعرفتش نقول ليه غير زيد بوسنس توحشتك ولا نقول ليه علاش بستيني ونحمضها .. دوزتها مكمدة ماهضرتش وشاف فالساعة قالي نمشيو عند عمي غيكون كيتسنتنا ورجعنا فوق داك العود كنهضرو على الطبيعة ولخضورية حتى للفيرمة ودخل العود حتى لفين فطرنا ونزل هزني هبطت وقالي يالاه نطلعو نشوفو ليك شي حاجة تلبسيها باش نمشيو . طلعت معاه للبيوت لفوق حل واحد البلاكار كانو فيه شي حوايج قلال مطويين وشي كساوي بلدين عادين معلقين قلت مع راسي يمكن يكونو حوايج خواتاتو وفعلا قالي ديال نادين ختو وانا نتفكر ديك نادين اللي كانت واقفة كتلقي الكلمة .. عندها الدوق ولاكن شوية قدام يمكن بقاو هنا ودازت الموضة ديالهم .
خديت واحد سورفيت عادية بيضاء مافيها حتى زواق لبستها مع ديك البلغة جيت مابياش ..عادية جاو معايا ونزلت عندو لقيتو لابس سورفيت عبارة على تيشورط كحلة و سروال سبور ديال الدراري وسبرديلة ديالو وشاد الخيل هوا واحد الخدام .. قالي تقدري تركبي عليه بوحدك قلت قلت ليه اه الى مكانش غيجري بيا .. قال ليا هادا راخ ولد هادا .. يعني الخيل اللي غنركب عليه انا ولد هاداك الكحل اللي ركبنا عليه قبيلا وماباينش ولدو كيبانو بحال بحال .. مهليين فيهم ومنقيينهم حسن من ولادهم .. عاونني حتى ركبت وطلع هوا فوق الخيل ديالو وتمينا غاديين بيهم حتى خرجنت للطريق.. ماشي طريق غير بقوة ما كيدوزو الطموبيلات والناس تطراسات . كان الربيع فالجناب والشجر وداك العود اللي راكبة عليه انا حلف ميزيد جلس كيرعا تما وزايد قدامي كيقول ليا ضربيه برجلك وانا خايفة نصربو يهزني يلوحني .. بقا غادي بيا فين عاجبو يرعى حتى رجع عندي زايد كيجري بالعود ضربو كينوض فيه عاد تحرك ومشينا كنتجمعو ونضحكو حتى لباب واحد الفيرما ودخلنا كانت فريما لا تقل جمالا على اللي كنا فيها .. حتى هي ززينة وعندها جماليتها الخاصة .. مشينا بالخيل حتى لداخل كاع واستقبلنا عمو فالباب رحب بينا وفرح بينا وانا حشمت ماعرفت ما نقدم ولا ما نوخر.. مد ليا يدو شديت فيه دخلني معاه واستقبلاتنا مرات عمو كانت مأدبة و متولة كتهضر بالكرام وسلمات عليا وجلسنا فواحد الصالون بلدي غزال وجلسو معانا كنتجمعو لاكن كانو كيهضرو بالعربية يمكن باش منتنواش انا حتى قالت ليه واحد اللحضة مرات عمو وهي كضحك معته بالشلحة .. واقيلا صافي نويتي
هبط راسو ضحك وشاف فيا بنص عين وقال ليها ايلا كتاب نشاء الله
حشمت ماعرفت اشمن ردة فعل ندير.. شافت فيا مرات عمو كترحب بيا وسولاتني منين انا قلت ليها من خنيفرة .. قالت ليا واش شلحة ياك .. قلت ليها اه .. وقالت لزايد ايوا راه شحلة بنت البلاد .. حرك ليها راسو وقاليها كتفهم واقيلا ..شاف فيها وقالي كتفمينا شنو كنقولو راه بحال بحال كيتشابهو
مابغيتش نكدب وحركت راسيي قلت ليه اه ولاكن مكنعرفش نهضر بيها مزيان لساني تقيل .. قالت ليا مرات عمو حتى هوا دابا يحساب ليك كيطير فيها ! حتى هوا بزز باش كيخرجها شداتو ديك كازا مابقاش كاع كيشوف العائلة والحاجة مكتفهم فيها والو كملات الباهية
فهمت ان مو ماشي شلحة باه اللي شلح يعني تقدر ماتتقبلنيش ولا تبغي ليه عربية ماعرفتش ردة فعلها كفاش غتكون... الى كانو عاملوها عائلة راجلها مزيان وحسنو ليها مكنضنش ترفضني ولاكن الى كانو عاملوها خايب مغتحملينش وتاخد عليا حتى انا نضرة خايبة واخا يكونو كاملين عاملوها مزيان الا وحدة علملاتها خايب غتجمع كلشي فكفة .
الصراحة عنو ومرات عمو مزيانين مافيهم مايتعاب ومعقولين حتى ديك الهضرة من تحت لتحت ماعندهمش .. كيهضرو نيشان ويوضحو الامور .. تهلاو فينا وحطو لينا لغدا مبررع وكل شوية ترحب بيا مرت عمو وهوا وعنو مجمعين .. جلسنا انا وياهل كنتجمعو بغات تتعرف عليا وهضرة كتجيب هضرة فالحوار العفوي قلت ليها عندي بارافارماسي وهافين ساكنة وهاشحال فعمري وحتى هي قالت ليا عندها جوج بنيات وربعة ديال الولاد كلهم فالخارج البنات مزوجين والاولاد حتى هما واحد فيهن اللي يالاه تخرج هوا الصغير كاع وبقا تما وبدينا كنهضرو على الثقافات ديالنا مالقيناش فرق كبير بيناتنا الصراحة .. داتنا الهضرة وعجبتها حتى قاليا زايد يالاه نمشيو ونضنا خرجنا للخيل كان الغروب ديك الساعة .. مشيت جهة العود ركبني وزاد بيا وهوا يالاه جا يركب سمعت مرتو عمو قالت ليه ديتي الزين وبقا كيضحك طلع على الخيل لحق عليا وخرجنا كنتمشاو فداك الغروب والجو زويين واحد الجو لامثيل له بحال شي لوحة فنية
وصلنا الفيرما وقالي اجي نجلسو هنا شوية فديك البلاصة اللي فطرنا فيها .. جابت لينا خديجة براد ديال اتاي وحطات لينا طبسيل ديال الكرموس كيشهي وشبكة فيها الكركاع واللوز وشعلو الاضواء فالفيرما وفين جالسة انا وياه وعم الصمت ... جا الوقت فين نضرو ونصفيو الحسابات ديالنا ... شعل واحد الكارو يتمزك ليا ولكلامي وتلفت عندي بجدية قالي
- شيماء ياشيماء .. باقا هازة فقلبك عليا؟
ضحكت بسخرية وقلت ليه انا ماهازا فقلبي حتى حاجة من جيهتك
قالي الى ماهزة حتى حاجة من جيهتي غنوضحو هاد العلاقة اللي بيني وبينك .. سمعتيني شنو قلت لمرت عمي فهمتيني
بقيت ساكتة مالقيت منقول ووجهت ليه نفس الؤال قالي: انا كنشوف راسي مقتانع ... ومخلي العلاقة غادية حتى نشوف فين غتميل .. الى مالت جهة الزواج انا ماعندي حتى مشكل
رما ليا الكرة وشديتو منها باش نجرو يتزوج حيت الى بقيت تابعة العلاقة وتوازنها غادي تسيفطني للسبيطار ومندير والو قولت ليه
- انا عيت من هادشي .. مابقاش عندي الخاطر للصدع والمشاكيل وتخربيق وكنفضل نستاقر احسن ما نبقا كنتمايل من جهة لجهة ... ونتا كتشوف وكتعرفني مزيان الى كنتي باغي تزوج راه غنبان ليك واش ديال الزواج ولالا
ضحك ضحكة خفيفة وشد ليا فيدي قالي: كن ماكنتيش كتبان ليا ديال الزواج .. وبنت الناس مغنجبدش معاك هاد الهضرة ... شوفي راسك واش مقتانعة بيا .. ماشي كصاحب ولا حبيب .. لا .. كزوج يعني واش تقدري تكملي معايا حياتك وديري معايا وليدات
بقيت شاكتة حشمت نقول ليه اه مقتانعة ستين الف مرة وقالي
- فكري مزيان .. باقي عندك الوقت فين تفكري وهاحنا بجوج حتى نشوفو فين غتوصل بينا هاد العلاقة
كنت غنقول ليه اه ونحسم الامر ونخرج بنتيجة ولاكن فاش خلا ليا الوقت نفكر سكت مابغيتش نبين ليه راني مزروبة ومحروقة كنتسنى الفرصة .. بغيت نبين ليه باللي خلعني الموضوع وماكنتش كنتناه وخاصني وقت نفكر فيه وداكشي اللي وقع .. بصراحة كنت كنتسناه يتحنا على رجليه ويعطيني الخاتم يقول ليا تزوجي بيا ونعنقو ونتبواسو وداكشي لاخر... جاتني هضرتو صارمة بزاف ولاكن من نطاق المعقول ماقال حتى كلمة ديال العيب . كنت باغا نقبل ديك الساعة وفرحت .. سد الموضوع ومابغيتوش يسدو لاكن ميمنكش ليا نجبدو معاه وفنفس الوقت بغيت ندير العز راسي قلت ليه فيا النعاس غادي نطلع ننعس وطلعت شديت تيليفوني وسديت عليا كنفكر ونخمم .. بديت كندور لقيت الناس كيشكرو فواحد الكتاب ديال تحدي النفس ودخلت لقوقلةقلبت عليه طلع ليا بديت نقراه وماحدي كنقرا وانا كنكتاشف شي حوايج فيا وكنزيد نقرا .. بقيت شاداه ورقة تسيفطني لورقة حتى صبح الحال و لقيت راسي باقا كنقرا .. نعست واحد الساعتاين و فقت حيت خاصنا نرجعو بحالنا وكملت القرايا فطموبيل حدا زايد اللي سولني شنو كنقرا وخلاني مابغاش يقاطعني .
كملت الكتاب كله ولقيت رسالة فالاخير وضحات ليا الامور واكتشفت انه انا .. ماشي انا ... والاختيار الصح ماشي هوا اللي كيكون تحت التخذير وانا تحت مخدر الحب فماعنديش الحق مختار او نقرر لان عيوني مغمضة .. والانسان السليم المعافا من هاد التخذير يمكن ليه يقرر فحسانو ويختار حيت غيحسن الاختيار .. هاد الكتاب جاني فوقتو ركبو فيا واحد الخوف رهيب وخلاني نفكر مليون مرة فعرض زايد اللي كنت غادي نعكيه رأيي فالبلاصة .. صدقت كنفكر ونعاود .. خلاوني اسطر الكتاب ورسائله نفكر .. فواش هاد الشخص مناسب ليا .. مناسب لشخصيتي ومناسب لشيماء الحقيقية اللي ماشي هي هادي .. شيماء اللي غتفيق من بعد من هاد البنج المسيطر عليها .. واش هوا غيتفاهم مع شيماء المستقبلية ولا غادي يفشل هاد الزواج من بعد ما تتزوح شيماء المبنجة وتعيش وتوصل للمبتغا ديالها وتمل وتحل عينيها .. واش تقدر تكمل معاه كشخص وتصبر لشخصيته .. بعيدا على قوة الزين والكارزيما .. واش تقدر شيماء تتأقلم مع هاد الشخصية اللي هي شخصية قوية ... واش تقدر تتنازل .. ولا غادي ترفع حتى هي شخصيتهل ودخل معاه فصراع ما لا نهاية والاطفال حاضرين . مانفكرش فحبي انا ... منفكرش فشنو بغيت فقط ... نفكر فداكشي اللي بغيت واش مناسب ليا كشخصية حساسة ولالا .. فكرت مزيان ودوزت اسبوع كامل غير ديال التفكير لقيت انني منقدرش ... منقدرش نبكي حياتي كلها ونصبر .. تكفيني شخصية نص نص وانسان يبغيني ولاكن بالقياس باش ميدرش ليا حياتي عذاب بداك الحب .. يكفيني شخص نفرض معاه شخصيتي حتى انا ويتنازل شوية ونتنازل شوية ونكملو علاقتنا ونزيدو لقدام .. ماشي مهم نكون كنبغيه .. المهم نكون مرتاحة معاه ماشي مريضة بالشك والغيرة وكل حرف كنديروليه تأويل وديما خايفة يتقلق مني ولا من شي حاجة ماعاجباتوش .. ديما رادة البال لهادشي مع زايد .. عايشة فالخوف وهادشي حيت ماشي انا هي شيماء الحقيقية .. انا فقط اسيرة الحب وروبو كيتحكم فيا الحب ومشاعري وضعيفة . ومتأكدة انه غيجي نهار تموت فيه هاد الشخصية الوهمية مع الوقت والولف وتفيق شيماء اللي مكيهدها حتى واحد .. شيماء اللي فاش كتبغي توصل لشي حاجة كتوصل ليها .. شيماء اللي مكتخافش ومكيهدهاش ريح وكتقول اراسي ياراسي .. شيماء اللي قدرات تاخد تروة تقتل فسبيل شرفها وسبيل رغباتها . هادي هي انا الحقيقية واللي فتاقدت لراسي وبعدت عليه من نهار عرفت زايد .. واخا كنت عارفة غادي يوقع هادشي من اول يوم شفتو حيت هاداك هوا فراس احلامي .. لاكن جا الوقت نتخلا عليه ومنتخلاش على نفسي .. يا اما نضحي بيه والوقت كفيل بعلاج الجورح وعذاب الحب . او نتخلا على نفسي ونبقا اسيرة مدا الحياة او نخرب حياتي واولادي من بعد ما تفيق شيماء الحقيقية وتقلب الامور سفاها على علاها بدون ماترحم ويكونو الاطفال هم الضحايا
صعيب عليا هاد القرار ومارحمتش راسي فيه .. اصعب قرار ممكن ناخدو فحياتي كلها لاكن قدامي جوج طرقان واحد فيها النار فالاول والثاني فالاخير .. وفضلت النار اللي فالاول .. اللهم نتحرق ونوض من بعد ولا نعيش العسل ونفيق فاخر ايامي نتحرق . قررت نحط جاوبي على ورق وبدات النار تلتاهم فيا فور ما بديت نكتب كلماتي .. كان جزء فيا فخور بيا وبشنو كندير وكنعزز راسي والباقي كيتحرق بحال شي دفتار ديال الذكريات . حاولت نوصل ليه الرد فكلمات بساط وجمل قليلة .. وخير الكلام ما قل ودل .. بينت ليه انني ماكنتش كنفكر فهاد القرار لاكن لقيت هوا الانسب ليا .. حسب ما عشت ومادوزت والكواليس اللي ماشفتيش والحالات اللي مريت بيها خلاوني نعطي هاد النتيجة وبكل قوايا العقلية كنقول ليك باللي نتا ولد الناس .. وحتى انا بنت الناس .. لاكن طرقاننا مختالفين ومنقدرش نقبل عرض الزواج .. غتكون هاد الرسالة هي الاخيرة بيني وبينك وكنتمنا من موراها تعيش حياتك بلا ماتحاول تقرب ليا .. باش هاكا نقدر حتى انا نعيش حياتي ونبدا من جديد. وماتوقلش انني كنت كندوز الوقت .. لا ..كنت كنتسنا فهاد النهار بفارغ الصبر .. لاكن فاش جا جاب معاها هاد النتيجة ومقتانعة بيها .. كنشوف الفراق هوا الحل الانسب ليا وليك وكنتمتى فراقنا ميكونش بحال لقائنا الاول .. كنتمتى نبقا ذكرى زوينة دازت فحياتك واخا اللي مرينا منو صعيب وماشي ساهل يتنسا .. كنقول ليك بالتوفيق فحياتك العملية وفحياتك الشخصية وشكرا على كل لحضة عشتها معاك سواء كانت زوينة او خايبة حيت مادازت حتى خلات موراها دروس كثيرة علماتني كفاش نسير حياتي فالدنيا . شيماء.
طويت ديك الرسالة بقطرات من دموعي وخبيتها فصاكي باش نعطيها ليه .. دازت عليا الليلة كحلة لاطن تعودت نعيش هاد الكآبة والحزن .. لاكن الافضل ليا وليه .. حطيت على قلبي حجرة وفقت الصباح لبست حوايجي وماعنديش الكانة .. كنت دايرة معاه نتلاقاو لاكن ماراهش على علم بالرد ديالي .. بقيت نقاوم كأنيي فالبحر .. يد كتهز الرسالة ويد كتحطها وتشهيت نقطعها ونلوحها فالزبل ونمشي نعنقو وننلاسقو الى الابد .. لاكن هاد مجرد وهم والحقيقة صعيبة .. هزيت ورقة اخرى قطعتها بنفس الطريقة باش نبرد وخرجت تلاقيت معاه فالمقهى ديالنا وجلست وانا دايرة فبالي انها اخر جلسة ليا معاه .. حاولت منبقاش نشوف فيه بزاف باش منضعفش واخا كان كيهضر معايا عادي وكنشوف بعيني البنات حاطين عليه .. ومبرردة كنقول ليهم فخاطري نتوما حاطين عليه ماكرهتوش يعطيكم وقت .. وانا بيدي غادي نسمح فيه ونهي هاد العلاقة فمرة .. خليتو حتى ولف الجلسة ولاحض سكاتي وتغيير مزاجي وانا نجبد الورقة كانت مطوية مديتها ليه فوق الطبلة وقلت ليه هنا غادي يكون جوابي على موضوع الزواج .. ولاكن ماتحلوش حتى نمشي عفاك ..استغرب بغا يسولني علاياش كنهضر لاكن هزيت صاكي بهدوء وقفت .. لاحضت ملامح وجهه تبدلو وحس بشي حاجة وفتح الورقة كيقرا واستغليت الفرصة غاردت المكان خليتو ومشيت بالزربة حابسة الدمعة حتى خرجت من القهوة وبديت نتنخصص وحليت باب طموبيلتي وهزيت راسي لاخر مرة كان جالس لفوق والزاج فاصل بيني وبينو ..لقيت اخر نضرة عليه وعيني حومر كان حط الورقة قدامو وتكا على الكرسي اللور كيشوف فيها فسهوة عميقة .. دور وجهه بتتاقل جهة سيارتي لاكن بسرعة دورت وجههي وركبت خرجت الطموبيل وهزيت عيني شفت فيه كان داير فيا نضرة عميقة ماعرفتش كفاش نفسرها وشديت طريقي كنبكي .. البكا ماعندو مايدير ليا ... بكست من قبل حتى عييت وغنبقا نبكي حتى نشبع ومزال غنشوف الويل ونتعذب ونبات بلا نعاس .. لاكن كما كان الحال رجعت كبريائي هاد المرة اللي تداس ومرتاحة من هاد الجهة وحتى انوثتي رجعتها وكياني وكل شي فيا كان تكسر ووصلت بسبيه للموت رجعته وهادشي اللي ساعدني باش نزيد نصبر ونحاول نوقف على رجلي .. زرت الدكتورة ديالي حكيت ليها على كلشي طرا شجعاتني وعجبها الحال حيت انا قدرت ندير هادشي كله ماشي حيت تفارقت .. ولاكن حيت قوية ومكانتش منوقعة مني ندير هاد الخطوة كما انا ماكنتش متوقعاها من راسي .. لاكن على الاقل رافعة راسي هاد المرة ... ضعيفة من جهة الحب لاكن قوية كإمرأة حرة .. حسيت بشيماء رجعات من جديد وهاد المرة مكنتوهمش .. هاد المرة رجعت حييت ورجع ليا الغرور ديالي ورجعات شخصيتي اللي تستمتع بملذات الحياة كما كانت مشتاقة من قبل . ماجاني حتى اتصال ولا رسالة منو وكنت متوقعاها واصبح هادشي عادي بالنسبة ليا .. ماشي شي حاجة اللي غريبة .. بديت فقط كنحاول ننسا .. كنحاول نخرج من هاد الحالة ديال الاكتآب اللي انا فيها ونخرج راسي براسي .. دخلت لاصال وتعرفت على ناس جداد لاكن خليت العلاقة سطحية ... كان ضاروري شي واحد فحياتي يخرجني من هاد الجو اما بوحدي عايشة فالقوقعة ديالي صعيب نخرج منها .. لاصال كان كيجمع غير الناس النقيين وكان ثمنه غالي .. وانا مادخلتش باش نتريني .. وانما نبدل الجو ونتعرف على الناس ونمط العيش ديالهم وتعرفت على بشرى .. بشرى اربعينية عندها قصة مأثرة حكاتها ليا خلاتني ننسا قصتي ودعماتني قصتها باش نخرج من الحالة المزرية اللي انا فيها حيت شفتها هي كفاش عايشية ومهلية فراسها ابدا واش تعطيها اربعين سنة ... عاد هي تعرضات للنصب وحبيبها كلا ليها رزقها وخلاها كتخلص الكريديات فالبنكة وقبل منو تزوجات و زوجها طلع ماشي راجل وكانت كتبغيه بزاف واكتشفت الحقيقة ومرضات وطلقات وقبل متخرج من ازمة دخلات فوحدة اخرى وكانت ضحية النصب ديال واحد جنتلمان فالصورة دياله .. لاكن من بعد المعانات بدات من الزيرو ومكان عندها لا دار لا والو غير كارية و مديرة فشركة وكتخلص مزيان لاكن اللي مرات منو ماخلاها دير والو ومن بعد ماسالات الكريدي اللي هزات باش تعاون داك النصاب اللي هرب بيهم عاد بدات حياتها معطلة وخدات دار زوينة وطموبيل وبدات كتخرج مع صحابها ورجعات للحياة .. ماعاودتش ليها شنو طرا ليا اكتافيت بقصتها وخديت منها كل ماهوا اجابي وكنتسنى نوبتي حتى انا باش نحل عيني ونستنشق الحرية كما هي استنشقاتها من جديد .. عرفاتني على انس و سليم هادو كبار فالسن كل واحد ووضيفته وبعقلهم بعيدا على التبرهيش الخاوي اللي كنت فيه وكانو كيديرو الكولف فبوزنيقة كانو دائما كيديوني معاهم باش نبدل الجو وكيعرضو عليا وكنخرج على الله وعسى نحيا من جديد
الوقت غادي وحياتي شاغلاها باش منفكرش فزايد او حتى نطق سميتو على فمي .. شغلت راسي اكثر من القياس حتى مابقيتش كنخلي لراسي فرصة نفكر فيها الا بالليل فاش كنحط راسي على المخدة كيرجع معايا الحنين وكنبكي .. عاونني باش ننساه حتى هوا وماعاودش سول فيا وكان هادشي مهم ليا بزاف وفادني .. صافي خرجت الذكريات من تيليفوني والبلايص اللي عارفاهم كيكون فيهم مابقيتش كنمشي ليهم .. دازت عليا ايام صعبة بزااف فالاول كنت كنهار ونشرب الدوا .. لاكن مع الوقت ولات عندي رغبة قوية باش نتفاداه .. مابقاش عندي الجهد نقلب عليه .. او نمشي لمكان هوا كيجلس فيه .. وليت انا كنتهرب باش منقابلوش وندير مجهود حيت فعلا الجهد تقادا وفشلت وصحتي تهدات فهاد الطريق .
داز عام ونص والحمد اخيرا رجعت لحياتي الطبيعية ... رجعات شيماء اللي كانت من قبل كتعشق الحياة .. واخا بقاو ذكرايات فبالي وكيجيني لبالي مرة مرة لاكن مكنتجرحش.. عادي ورجعت كنبتاسم فاش كنتفكر شي ذكرى او شي حاجة قديمة ونقول ايام دازت كانت مضلمة بزاف وكنت عايشة فداك الضلام ومرتاحة .. شحال من بنت كنعرفها كانت كتحب بجنون وفاش كتنسا كيرجع يبان ليها صاحبها كي الجفاف حيت كانت معمية.. لاكن انا لا ... شفت زايد كراجل حقيقي .. وشخصية صعيبة لاي وحدة تصبر عليها .. وانا متقبلة الوضع حاليا ورجعت كنفكر ليه هوا مع وحدة اخرى ونقول صعيب بزاف يكمل مع شي وحدة .. وصعيب على اي وحدة دير الخطوة اللي درت انا . وليت كنقول على الله يتبدل وميعدبش معاه هاد بنت الناس اللي غتعيش معاه .. على الله
تنهدت حيت رجعات بيا الذاكرة للور وتفكرت الماضي ومكنتماش نرجع لداك الماضي ابدا ولا ديك الضلومات اللي كنت عايشة فيها .. رجعت كنلبس احسن لباس .. كنمشي لاحسن بلايص .. كناكل تحسن حاجة .. بدلت الدار وشريت فأحسن موقع فيلا زوينة كما كنت كنتمى .. فتحت بارا وحدا اخرى بنفس الحجم وناجحة فالبزنس ديالي ومكملة فيه الحمد لله . بديت حياة اخرى .. حياة زوينة وبقات ذكرى زايد مرسخة عندي ميمكنش تمسح حيت حبيت من قلبي .. حبيت وصعيب ننسا اللي بغيت .. لاكن قادرة نعيش بلت معانات وبكل اريحية .. وزايد خلا طابع زوين .. مابلغش عليا وبفضلو انا عايشة احسن عيشة . عرفاتني بشرى على شاب الماني ماشي مغريبي .. عندو حقو من الزين وحروفو غربية وضريف ... خرجت معاه الخرجة الاولى عرفت راسي غنتفاهم معاه حيت كيعطيني الحق نعبر ونختار .. وحتى انا مابقيتش ديك الشخصية العبيطة .. بلعكس قوية كنفرض عليه الوجود ديالي وكيحسسني انني ملكة فوق هاد الارض ومكيبغيش يخسر ليا خاطري وهادشي اللي كنت باغا .. باغا واحد نعيش معاه مرتاحة ومن بعد يجي الحب .. و فيوغي كيفهمني وكنحس بالاعجاب من جيهته وكنلقا راحتي معاه وحاسة انه تقدر تكون بيناتنا شي حاجة حيت هوا الشخص المناسب ليا وعقليتو تفاهمات مع عقليتي واهم حاجة انه عندو رغبة يسلم من بعد ما نبهته لهاد النقطة وشرطتها عليه
لقيت راسو انه مايصلاح ليا غير كاوري وضربت على المغريبي اللي بحالي بحاله بصفة نهائية ...كنتحاور انا وفيوغي بالفرونسي شوية لاكن كنتفاهمو هادي اهم حاجة ... عجبني الحال وشفت ان الحياة الزوجية خصها العقل يخطط ليها .. وانا لقيت الانسان اللي نكمل معاه والعقلية مختالفة.. الصرامة والعناد ماصالحينش ليا حيت المسألة ماشي مسألة يوم او شهر .. بل حياة كلها لابد يجي النهار فين نكره ديك الشخصية اللي كنت باغا .
اتصالي بفيوغي مستمر وحسيت بيه تعلق بيا وكيبغيني فعلا .. فاش كيكونو عينيك محلولين كتعرفي شكون كيبغيك بصح من اللي كيضحك عليك وفيوغي تبان عليه مثيم .. وانا طبعا ماتعرفتش عليه باش نشرشمو ولا نقمعو حيت كيبغيني .. لا.. ولكن باش نكمل حياتي مع اللي باغيني وندير وليداتي حتى انا وهادشي تافقت عليه انا وفيوغي وتافقنا باش يجي نديرو خطبة .. ماوصلت لهاد النقطة حتى تأكدت انني غنعيش معاه حرة وعقليتو غربية غنتزوجو وغنبقا عادي بحال الى مامزوجاش مغيحرمش عليا صحابي والخروج وداكشي اللي كنبغي .. يكفي نكون انا وياه بجوج هادا هوا الاهم .
وجدت لاستقبال فيوغي حيت غيجي يطلبني من دارنا وعلمتهم وقلت لبابا انه غيسلم ومستعد عن اقتناع .. هادي حسنة ناخدها فيه وندخلو ديني وفرحانة بيها .. بدينا التوجاد وجا هوا وعائلته ووصيتو باش يلسبو مستور على قبل بابا حيت هما عندهم عادي تجي مو بالميني ولا ختو .. جهزت نهار خطوبتي ودرتها كبيرة عرضت فيها على كاع حبابي وصحابي وركب ليا الخاتم وشربنا الحليب والتمر وداز النهار زوين كلشي كيقول ليا تواتيتو مع بعضياتكم حيت بجوجنا زعرين وجينا مع بعضياتنا .. ماماه عجبها الحال وختو تفاهمات مع ختي ودازت الخطبة كما كنت باغا فالفيلا وبديت كندرس حياتي انا وفيوغي بالقاعدة .. كيسمع ليا وكنسمع ليه ومابغيناش نطولو الخطبة حيت مكاين لاش .. عطينا لراسنا مهلة نجمعو فيها وريقاتنا انا وياه ونتزوجو ويجي هوا يدير لبروجي ديالو هنا ونعيشو انا وياه هنا حدا البزنس ديالي ونبنيو حياتنا هنا حيت البروجي دياله يقدر يدرو فأي بلاصة ويصدر ماعندوش اشكال فهاد النقطة وهنا غيتقدام عليه بثمن اقل وينجح ليه اكثر
بديت نجمع الاوراق تقول غنمشي لكوكب اخر .. طلع وهبط وهبط وطلع يكرهوك فالزواج من اجنبي ومايجي منو .. كانت خاصاني واحد الورقة من الكوميسارية وقلت لبابا يمشي هوا يجيبها باش مانصطادمش بزايد ومشا ورجع قالي خاص المعنية بالامر هي اللي تمشي وماحملتش نمشي لتما ... كان فيوغي رجع لألمانيا يوجد وراقه وانا فقت واحد الصباح كان عندي خاص غير بالاوراق من بلاصة لبلاصة وسبقت الكوميسارية هي اللولة .. ومشيت لابسة كلاص بحال ديما حيت فهاد البلاد كيهمهم المضاهر وهادي حاجة معروفة . طلقت شعري وتريحت ومشيت حتى للباب وبقيت فطموبيل تاصلت بفدوى هي عارفة شنو كاين وفين وصلت وحضرات للخطبة ديالي .. قلت ليها هاشنو بغيت ها شنو خاصني قالت ليا اجي عندي للبيرو انا اللي كنصايب دوك الاوراق هنا ومشيت طلعت بالزربة حاذرة راسي حتى للبيرو عندها ودخلت جلست بلا منهضر على حتى واحد من غير شغلي اللي جيت عليه .. قالت ليا باللي غادي يسولوك شوية على شكون هادا اللي غتزوجي بيه وشنو كيدير وفين خدام مهم ماتخلعيش .. قلت ليها واش زايد نيت اللي غيسولني قالت ليا لا ماشي هوا هوا بعيد على هادشي .. غيسولوك البوليس عادي وناضت معايا هازة دوك الاوراق فيدها قالت ليا اجي معايا ومشينا دخلنا لواحد البيرو فالجهة ديال زايد ودخلنا لقيناه هوا نيت تما كيقرا واحد المحضر واقف والبوليسي لاخر جالس فالبيرو .. غير شفتهم حشمت ورجعت خرجت وحتى فدوى تصدمات وكانت ديجا دخلات عطات لداك البوليسي الاوراق كيقراهم قاليها واش زواج باجنبي وقالت ليه اه هاهي برا ندلها وانا كنسمع حتى خرجات عندي قالت ليا دخلني .. غرقت فحوايجي .. عام ونص ماشفتو وجيت دابا باش نتلاقا بيه مشكيلة .. دخلت وحسيت بالارتباك حسيت بقلبي ضرب وقالي البوليسي تفضلي .. هبطت عيني وكان زايد حدايا .. باقي كما هوا نفس الوقفة والشخصية والهبة ومتكي على صبعانو كيشوف فداك الملف .. قبل منجلس عز عينو فيا بعفوية وكان غيرجع يشوف فالملف وعاود حل عينيه فيا حسيت بيه تصدم وداك البوليسي كيسولني قالي هاد السيد اللي غتزوجي نتي وياه اشمن بلاد
قبل مانجاوب سد زايد داك الملف قاليه من بعد نشوفو هادشي الله يعاون وخرج بقيت جالسة دخت قدام داك البوليسي اللي كيسول .. مابغيتش نتصادف معاه ولا نشوفو وخصوصا فهاد الوقت اللي انا كنجمع فيه اوراقي باش ندير داري واولادي .. كانو اسئلة بسيطة جاوبت عليهم وهما دايرين خدمتهم ورد الاوراق لفدوى خرجت انا رجعنا للبيرو عطاتني كاس ديال الماء شربتو قلت ليها مانويييتهاش ... مابغيتش كاع يشوفني ولا نشوفو ووقع العكس .. قالت ليا دابا صافي اصلا عادي ياك نسيتيه صافي .. بقيت كنسوط رتاحيت من ديك الصدمة وقالت ليا باقي خاصك تخرجي شي اوراق اخرين جيبيهم قالتهم ليا وخرجت شفت يمين يسار مالقيت حتى واحد يصدمني ومشيت بالزربة هبطت كنجري طلعت فطموبيلتي وخرجت من تما
كنت غادية فالطريق حتى عيطات ليا فدوى قالت ليا راه مشيت عندو للبيرو باش نعطيه واحد التقرير من مور ما مشيتي لقيتو جالس شاد راسو ومحني على واحد الكاس فيه دوليبران كتشكش وشاف فيا قالي شنو كاين ؟ عطي داك الدوسي لفلان واش غير انا اللي هنا . قلت ليه راه نتا خاصك وخاصك قالي من بعد مامساليش دايا وخرجت خليتو ومن مورايا غير بشوية خرج ماعاودش رجع .. بقيت ساكتة وقلت ليها شغلو هاداك مابغيت نسمع عليه حتى اخبار وقطعت معاها كملت طريقي حيت انا دابا وحدة مخطوبة وقريبة نتزوج ماخصنيش كاع نفكر فيه .. كملت طريقي لخدمتي وعندي بزاف ديال الاشغال مابقيت صاحبة مشروع واحد ولاو عندي جوج مشاريع كبار كنسيرهم انا وخاصني وثف عليهم .. لاكن مهما نتهرب ونكر رأية زايد اثرات عليا نوعا ما خلاتني نحن وخلاتني نفكر فيهم اليوم كله . وجدت الاوراق اللي طلبات فدوى ومشيت باش نديهم ومع الدخلة تصادفت معاه فالباب خارج داز حدايا بديك الكاسكيطة وداك الستيل ديالو وانا نهبط راسي كنحك ودني قلت ليه السلام .. قالي عليكم السلام وكل واحد مشا بحالو بحال الغرباء .. بحال الى عمرنا تصادفنا ولا هضرنا ولا تعارفنا وبقا فيا الحال اللي ماهضرناش واخا نسولو غير على احوال بعضياتنا ماشي هاكا تقول ماعمرو شافني .. وكنت باغا نوقف معاه ونهضر معاه عادي حيت ماشي كرهته .. انا فقط رجعت حياتي وصحتي ونفسي اللي ضاعو مني وتعالجت من داك الحب المريض او كما كنسميه انا السرطان . لاكن مللي ماوقفش حتى انا ماوقفتش ودخلت عنظ فدوى سلمت عليها وجلست عطيتها الاوراق .. هضرة كتجيب هضرة وكتهضر ليا على زايد بزاف حسيت بيها مابغاتناش نتفارقو وماكرهتاش نرجعو لاكن تمشي الرياح بما لا تشتهي السفن .. قالت ليا باللي صاحبتو اللولة ليهودية رجعات وكتودد ليه وعيطات لمو كتسول فيها لاكن قال لمو نساي شي حاجة كانت بيني وبينها ومكاينش معاها مستقبل غير هني راسك . وقالتها لماما وهي فرحانة حيت خافت ترجع دور بيه ولاكن فاش قاليها ديك الهضرة ارتاحت
ماسولتش اكثر .. عير فدوى كتهضر وصافي عرفتها علاياش كدور وشنو باغا مني لاكن مافتحتش ليها داك الباب وماطرحت عليها حتى سؤال.. حدها قالت ليا غادي يوجدو ليك الاوراق نعيط ليك وصافي نضت خرجت بحالي سرحت عيني وطلعت مشيت لشغالي .. ايامي ولات واضحة وفيوغي كل مرة يسولني فين وصلت فداكشي اللي واقفة عليه .. هوا وجد وراقه ومزالة انا باش نجمعو الاوراق نبداو فطلع وهبط وحدا اخرى . عييت تسخست كرهت الاوارق ومايجي منهم .. عيطات ليا فدوى باش نمشي للكوميسارية عاوتاني سخسخاتني تسخسيخة ديال الكلاب .. لقيت باللي ورقة اخرى خاصة ومللي جلست وهي زايد زايد زايد زايد حتى قلت ليها عفاك ماتبقايش تجبديه ليا .. انا غير نسالي هاد الحريرة نبدل شهادة السكنة على ديك الكميسارية اللي حدايا لهيه . بقات كضحك وشحال فيها ديالةالضحك .. جات مع وقت خروجها نيشان ونزلنا خرجنا باش نشربو انا وياها شي قهوة وفاش خرجنا كان زايد برا كيكمي وهي خاشية يدها فيدي عاد بان ليها تهضر معاه وتسولو على الخدمة وجراتني معاها بزز وقفاتني قدامو .. مشافش فيا وبقيت كنبرق فعيني تحرجت .. اما هي قالت ليا تسنايني هنا نمشي نجيب شي حاجة من البيرو نسيتها ومشات خلاتني واقفة وابتسمت ليه كنحك فودني قلت ليه سلام زايد لباس عليك
رد عليا باشارة من راسو قالي الحمد لله .. الله يكمل بلخير
بلعت ريقي قلت ليه امينالعقبة ليك حتىى نتا
قالي وهوا كيمي ويشوف فجهة اخرى .. امين شكرا اختي
ختي هه!... من حقك ولاكن تصدمت فاش قالي ختي .. واخا دازت عام ونص وحسيت براسي تبدلت على كيف كنت .. حسيت براسي ترزنت وماشي شيماء اللي كانت من قبل هي ديال دابا .. واخا مزال كنحس بشي نغزات من جهته بحال الجرح فاش كيبرا منبداو نقشرو فيه ونحفرو هاكاك حسيت . لاكن ابتسمت وسولتو من باب الصواب على ماماه و عمو ومرات عمو والناس اللي عرفت فطريقه .. اكتفا يحرك ليا راسو بالايجاب فقط وكيبخ الدخان وسكت وبقيت ساكتة كنتسنا فدوى اللي مشات وجلسات متبعاتش كاع تبان .. واحد الشوية قالي علاش مابدلتيش شهادة السكنة مزال دايرة القديمة . قلت ليه ماعنديش الوقت دابا كنصاوب الوراق اللي خاصني على شهادة السكنة ديال دارنا
قالي مزيان الله يعاون . قلت ليه كي داير مع الخدمة قالي السربيس هوا السربيس عمرو يتبدل . كيهضر وكاره الخدمة وبحال الى عايش فالملل قلت ليه نفس الخدمة كتسخف قالي كحل الراس اللي كيسخف اما الخدمة مادرات والو . بقيت ساكتة شوية وقلت ليه كحل الراس هوا هادا .. شخبار ماماك لاباس عليها . قالي الحمد لله .. واقف حدايا ومكيشوفش جيهتي وهضرة تجبد هضرة فحوار عادي ختى قلت ليه الانسان ماحدو كيكبر وهوا كيدير عقلو . ضحك بسخرية وقالي الانسان ماحدو كيكبر وهوا كيهتر وكيسحابو كيديروعقلو .. ماعرفتش علامن كيهضر واش عليا .. قلت ليه لا بلعكس كيدير عقلو .. قالي كيبان ليك ..يالاه نخليك تهلاي فراسك . شار ليا بصبعانو حدا راسو من بعد ما كمل داك الكارو ومشا ركب فطموبيلتو داز من حدايا ومشا وطلعت حتى انا فطموبيلتي كنتسنا فدوى ونصوني ليها عاد هبطات وتعصبت عليها قلت ليها راني عايقة بيك عارفاك شنو بغيتي توصلي وماغادي تستافدي والو
مشيت انا فدوى نشربو قهوى وندماتني .. انا مابغاش نسمع سميتو وهي كتهضر ليا عليه قلت ليها الى بقيتي هاكا غير غتكرهني فيه وهي تسكت شربنا داك الكاس دالقطران وقلت ليها الى غتبقاي تدي وتجيبي فيا للكوميسارية على قبل زايد باش نتلاقاه غادي تخسر علاقتنا انا وياك .. فاش يوجدو الاوراق جيبيهم معاك انا مغاديش نبقا نرجع للكوميسارية وسديت الموضوع ورجعت لحياتي الطبيعية .. ديك العشية تناقشت انا وفيوغي وكنت على سبة طالع ليا الدم بقينا ومني منك قلت ليه بناقص من هاد الزواج .. كان موضوع بسيط مايحتاجش ديك العصبية لاكن انا اصلا كنت معصبة فلحضة غضب قلت ليه ديك الهضرة وماكنتش كنقصد بيها نتفارقو زعما فخطرة. طفيت تيليفون وماطليتش عليه بمرة وفاش شعلتو لقيت شي سطوريات فالواتساب ديال فيوغي .. بغا يفقصني بيهم زعما باش نغير ولا مانعرف اش قاليه راسو وكنت ناوية نهضر معاه نقول ليه راه فلحضة غضب قلت ليك ديك الهضرة لاكن تعصبت فاش شفت واحد السطوري مع صحابو ومعاهم وحدة كانت معاه وقل ليه من قبل بعد منها مكاين لا امي لا زمر.. ولاكن هوا بلعاني جالس حداها وكيصور .. اللي شافو كبير بعقلو وبرهوش فمخو مافهمتش هاد الفعايل ديال الزبل زادوني عصبوني وانا نتعصب بصح وبلوكيتو ومابغاتش تسرط ليا .. يالاه سبب تافه وصلنا لهادشي وانا كنجمع فالاوراق ونتسخسخ . شافني بلوكيتو وعيط ليا كيهضر معايا زعما وفاش قلت ليه علىسطوريات قالي غير بغيت نعصب ... كنت معصبة وزاد عصبني بهاد الهضرة وقلت ليه اها نتا هاكا ديال نخليها تغير عليا وداك الخرا كامل .. ايوا جنيتي على راسك دابا وا شد مايفقصك . قلت ليه سالينا .. داك التبرهيش حنا عندنا فالمغرب كنديروه فسطاش لعام ماشي فاش كنجيو نتزوجو .. كمل الباقي اللي خاص حساب ليه غادي يشفع ليه وقالي انا غنخلي ديني على ودك ونسلم على ودك !! لا صافي جا يكحلها عماها .. اذا الى دابزنا يرجع لدينو وها المعقول بدا يبان .. ومزيان اللي تناقشنا حست عمرنا تناقشنا وقلت ليه عرفتي شنو ... كنت ندوز ليك اي حاجة الا تقول ليا نسلم على ودك وانا كنت كنحسابك مقتانع مي دابا لا صافي ماتصلاح ليا مانصلاح ليك انا غادي نحبس هنا وسديت عليه بلوكيتو حتى عيط ليا بابا قالي راه عيط ليه كيقول ليه تخاصمنا وانا نقول لبابا شنو وقع وقالي لا صافي الله يعاونو وسديت عليه كاع الجهات .. مابقاش فيا الحال وحتى الخاتم خليتو فصبعي عادي مزينة بيه .. اما قبل كنعقل فاش كنا تخاصمنا انا وزايد كان داك الخاتم ديالو كيضرني ماقدرتش نخليه فصبعي ونشوف فيه . مي دايا عادي واخا بقا فيا الحال على هادشي اللي وقع والخطبة والروينة كلها لاكن ماشي مشكل ماكتابش وسديت الموضوع عادي جدا قلت دابا غادي نركز على البزنس ديالي حيت والو الزهر مع الرجال .. مابقاتش فالزين بقات فالزهر .. كيتبعوك عشرين باغيين الدار وعشرين باغيين تعاونيهم على المستقبل وواحد مزنزن بحال فيوغي باغي يتزوج وكيدير الفعايل .. اما اللي نيت رجال وديال الصح ماع مكيتبعو هادوك ولا يحسسوك حتى واش كاينة
ديك الليلة اللي فضيت فيها مع فيوغي طرات واحد الفاجعة هزات المدينة كلها .. تخطف واحد الولد صغير من باب دارهم وغبر ودارت ضجة فجميع مواقع التواصل الاجتماعي .. كلشي كيهضر عليه والصحافة خرجات وعائلته غتسطا والناس تعاطفو معاه . عيطت لفدوى مكتجاوبنيش نهضر معاها على هاد الاختطاف .. صونيت حتى عييت عاد جاوباتني قالت ليا الدنيا مقلوبة عندهم وجاهم امر من لفوق ناضو تحركو حيت القضية وصلات للرأي العام وعطاوهم وقت وجيز يلقاو فيه الولد والمختطفين وماعندهمش الوقت ومكينعسوش لا بالليل لا بالنهار خدامين فالتحقيق والتحريات ربعة وعشرين ساعة على ربعة وعشرين .. بقينا كنهضرو على هاد الموضوع وبقا فيا داك الدري وقلت ليها لغي داك الاوراق مابقا زواج ولا زمر صافي حبسي داكشي وجيبيهم ليا مللي دوز هاد الفاجعة وقطعت معاها كملت حياتي عادي ومشيت لاصال ورجعت لصحابي .. بشرى كتحاول تقنعي نرجع مع فيوغي وسديت ليها الموضوع فمرة ومبرزطها كل شوية يعيط ليها لاكن جمعت وطويت معاها وجلسنا كنهضرو على داك الوليد مسكين اللي خطفوه بقا فينا قداش وأزمنا وبقينا ندعيو على الله يلقاوه .. دازت واحد الثلات ايام و فين ما ندخل تيليفون طلع ليا صورة داك الولد حتى لواحد اللحضة بداو كيطلعو ليا احداث جديدة عليه والناس كيقولو لقاوه والتصاور كيطلعو .. شفت واحد الصورة مخرجينو من واحد الكراج كيخلع هوا وجوج ولاد صغار اخرين تخلعت .. هادي مافيا ماشي انسان عادي .. وصلتي مسج فالواتساب من عند بشرى قالت ليا لقاو داك الولد مسكين واش شفتي الفيديو اللحضة اللي شدوهم .قلت ليها لا وسيفطاتو ليا دخلت ليه بان ليا التصوير من شي بلاصة عالية مخبعة بين الحديد وبعيدة ودايرين الزوم .. هادا شي واحد من الناس كان كيصور من دارو ديك المداهمة ديال داك الديبو اللي جا عاطي وجهه لواحد تيرا خاوية كتخلع .. بان ليا الامن كيحوم جهة داك الديبو ودخلو شي وحدين سيفيل وشي وحدين باللباس الرسمي هاجمو الكراج لاكن هرب ليهم واحد من ديك المافيا فيدو السلاح وجار داك الوليد الصغير كيهددهم يبعدو . فديك اللحضة تخطفت بان ليا واحد جاه من الجنب بشوية كان داير كاسكيطة كحلة ولابس تيشورط ودجين غفلو طواه والسيد اللي كيصور كيزومي مزيان ويقول برافو برافو .. بانت ليا ديك الفورمة بحال ديال زايد وفاش قرب اكثر بان ليا وجهه وحطيت يدي على فمي حسيت بواحد الفخر ماعرفتش علاش ... واكثر من هادشي هرب الدري والشرطة منيشة عليه بالفردي باش يحط السلاح وكان زايد دخل معاه فديك المعمعة اللي دازت فرمشت عين بحركة احترافية جر الولد مشا كيجري ودخل فصراع مع هادك مكاملش دقيقة ضربو هزو فالسما بواحد النص تا طار وطاح عليه وشدوه مينطوه . انا كنتفرج وهي تكنب ليا بشرى مسج قالت ليا شوفي هاداك اللي هزو فالسما واش شفتيه
قلت ليها شفتو مالي عورة .. بقيت كنضحك عجبني الحال ودخلت لمواقع كنتفرج حيدو غير ديك اللقطة ديال زايد اللي جر فيها الولد وضرب داك مسخوط الواليدين وجلسو ينشرو فيها مكاينش الصفحة اللي مانشراش داك المقطع واراك للتحرش .. وجهه مكانش باين مزيان لاكن فورمتو كانت واضحة تزعطو فيها وماهي غير شي ساعات حتى لاحو واحد تصويرة ديالو واضحة واقف جنب لابس قميجة بيضاء والشعر كيبري كيشوف فتيليفون .. صورة جاتو واعرة بدات كطلع وتهبط وتبارطاجا حتى وصلاتني عاوتاني من عند بشرى قالت ليا شوفي هاداك اللي عتق الولد هاهوا . طلعت ليا في وخليتها براكة التحرش اللي كيتحرشو بيه الصحفات وحدة قالت ليهم قولو لهادا ضاروري يجي يعتقني راني من اللي شفتو وانا خاطفة راسي فالبيت . وحدة اخرى كاتبة .. هاد الشهر برعاية مول الكاسكيطة ... وخدة اخرى قالت ليهم كاع البنات ولاو باغينو بوليسي .. الحاصول شبع تحرش ضاروري مغيكون كيوصلو داكشي .. بديت طالعة نازلة كنقرا التعاليق فالصفحات حتى لقيت وحدة كاتبة بالفرونسي خويا البطل ربي يحفضك من عينين الناس . داك التعليق جمع عرام ديال ليجيم والتعاليق كيسولوها واش خوك اختي . واش بصح .. وكيشكرو فيه حتى مولات الصفحة قالت ليها تبارك الله عليه اختي واش مزوج
الله اش دخول الصحة وحاطين ليها على داك السؤال 500 لايك باش تجاوبها خنو لاكن ماجاوبات حتى واحد حتى قالت ليهم وحدة راه طايح مع شي بنت ثلات سنين كيتفارقو ويعاودو يرجعو ومفارقين دابا ولاكن دابا يرجعو هادا هوا حالهم . ملي جيت نشوف شكون هاد فاعلة خير كنلقاها فدوى وسكرنيت التعليق وسيفطتو ليها قلت ليها تبارك الله على فدوى حساب ليك ماعرفتكش . بقات كضحك قالت ليا مالي اختي كدبت ... فراسك راه عطاوه شهادة تقديرية على داك العمل البطولي والى تعاود بحال هادا مرة اخرى و تسجلات ليه الاصابة غياخد عليها وسام قلت .ليها يستاهل .. قالت ليا راه كيحتارمو اللي بحال هادو كيسبقوهم هما اللولين فكلشي حيت الامن محتاج بحال هاد النوع قلت ليها تبارك الله عندنا فالبلاد بحالو الله يخليهم لينا .. قالت ليا ايوا هي لا جمعتي نوضة راه تشهر دابا كولشي رجع كيعرفو .. دابا تجرو ليك شي وحدة . ماجاوبتها وبقيت غير كنقرا طالعة نازلة كنقرا اراء الناس .. بعض المشاهير حاطين داك المقطع فالسطوريات كاتبين ليه برافو هاد السيد يستاهل وسام ماشي اللي كتعطي قزيبتها تشطح وتغني كتسنى تحضى بالاحترام .
طيبوني ديك التصويرة غير كدور ميكون غير شي واحد فصحابو اللي لاحها ويقدر مايعجبوش الحال .
خليت امري لله عيت مابغيتش نفكر بزاف والحنين كيجرني ليه وانا كنتهرب .. خرجت مع انس وسليم وبشرى باش نبدلو الجو صدقو جابدين ليا الموضوع قالك هادوك عصابة كيخطفو الدراري الصغار وفرتكوهم دابا وعتقو دوك الوليدات .. قاليهم انس ولاكن شفتو داك خيينا اللي داير بوم .. واعر الحق يتقال ماعندك ماتسالو .. باش دير داك الشي اللي دار داك خونا خاصك تكون واعر ومكتخافش تموت .
هما كيهضرو وانا ساكتة طعنوني كنتسناهم يبدلو الموضوع والو ونضت قلت ليهم غنمشي للحمام وخرجت لواحد الجردة وقفت ساهية...ماحسيتش براسي حتى هزيت تيليفون وكتبت نمرتو .. باقا على طرف لساني ولاكن ماعرفتش واش تكون مزالو عندو ولا بدلها .. دوزتها وهي تصوني بقيت كنتسنا يرد وقلبي كيضرب وجاوبني .. الطريقة باش جاوبني عرفتو عرفني ماسول شكون ولا والو .. قلت ليه لباس عليك كي بقيتو من مور ديك الفاجعة .. قالي الحمد لله شكرا .. قلت ليه تبارك الله عليك شرفتي بالامن وبالبلاد .. قالي شكرا وبقيت ساكتة ماعرفتش باش نجاوبو وشنو نقوليه ... قلت ليه يمكن راك مشغول بلا منشدك .. تهلا فراسك ... والى عندك شي وقت بغيت نهضر معاك .. هادا في حالة ما عيطتي وكنتي باغي .
قالي تهلاي فراسك نشاء الله وقطع
جمعت النفس وطلقتو ماعرفتش .. لقيت راسي كنقول ليه هاكا ... وشنو غنقول ليه اصلا .. ولاكن مكنضنش يعيط ليا غير هضرت وصافي وحسيت بيه ماعندوش رغبة يهضر معايا .. ماشي مشكل من حقو واخا غيبقا فيا الحال بزاف الى ماصوناش .. ومغاديش نصوني ليه طبعا مرة اخرى .
رجعت للخدمة والروتين ... بديت كنراقب تيليفون مرة مرة نشوف واش صونا حتى دازت اربع ايام وقلت صافي ماغاديش يعيط حتى تفاجأت باتصال ديالو غير فيبا وقطع .. وقفت ابتسمت وعاود رجعت جلست قلت يمكن غلط فالنمرة ... لاكن تعاود الاتصال وبديت كنضحك بوحدي .. مادام اتصال كما قلت ليه الا وحتى هوا كيفكر فشي حاجة .. فتحت الخط رديت عليه قلت ليه كي داير لاباس عليك .. قالي ببرودة الحمد ونتي ... قلت مزيان ... الى عندك وقت نقدرو نجلسو ونهضرو .. تنهد وقالي لعشية فالكافي فلان فلانية وقلت ليه اوكي وقطعت معاه .. سمحت فالخدمة ومشيت للصالون عاودت كلشي من الاول ورجعت للدار بدلت حوايجي لبست دجين وطالون وقميجة كيجيوني زوينين وتريحت وماكيت وهزيت صاكي مشيت للكافي كنقرقب وشعري بوكلي منفوخ لقيتو جالس عاطي وجهه للزاج لاكن ماعيط ما حتى حاجة .. مشيت سلمت عليه من يدي وجلست قدامو حشمانة ماعرفتش شنو غادي يطرا ... دور لكرسي لجيهتي وجا النادل طلبت قهوة نكمد بيها وبقيت ساكتة وهوا كيسوف جهة الزاج .. عم الصمت كيتسناني نهضر حتى وقفو علينا واحد جوج بنات زعما كبارات ماشي صغار وقالت ليه وحدة سلام .. بوليسي ديال قضية الاختطاف ياك
شاف فيها مستغرب وانا معلقة عيني فيهم غير كنشوف وقالت ليه الصراحة تبارك الله عليه عمل بطولي ما عمل بطولي بقات كتشكر فيه قالي ليها شكرا وانا مربعة يدي كنشوف وكيشوفو فيا .. قالت ليه واخا ناخد معاك صورة الى كان ممكن .. بحال الى انا مكايناش ماقالت ليا حتى سمحي لينا .. لاكن زمطها قاليها سمحي ليا اختي مكنتصورش . تصدمات وانا نقلب وجههي وقالت ليه زعما علاش واش غيشكل ليك مشكل .. قاليها بالادب انا ماشي فنان ولا عندي فانز .. ماكنتصورش عادي توسابلومو
ابتسمت وقالت ليه سمح ليا وانا نستغل الفرصة بالضحك قلت ليه وانا تقدر تصور معايا وهزيت تيليفون بلعاني نشوف شنو نقول وكحزت جيهته كنضحك خديت صورة واخا مشافش فيها وبقا مستغرب مافهم والو لاكن جبتها من باب الضحك باش نفتح معاه الموضوع
كانت مجرد تجربة باش معرف واش يخليني نصور ولا حاسبني برانية ويقول ليا .. وحتى الى قال ليا عادي مكاين حتى مشكل غادي نهضر معاه بطريقة اخرى .. لاكن فاش سكت وخديت صورة عرفت باللي انا ماشي اي بنت عادية وغنعرف كفاش نتواصل معاه .
سديت تيليفون واشف فيا ببرود واستغراب قالي لشنو باغا توصلي ؟؟ جيني من اللخر بلا هاد الحموضة
دورت وجههي وقلت ليه : حموضة هه... انا غنجيك من اللخر ازايد .. انا ونتا مادوزناش قليل عارفها .. ويمكن باقي عندك تساؤلات باغي تعرف شي جوايج
شاف فيا بجدية وقال : ماعندي حتى حاجة وماباغي نعرف عليك حتى حاجة ... الى جيتي كتقلبي على خلا دار بوك مرحبا ..
قاطعتو : وعلاش قبلتي نجلسو ونهضرو مللي ماعندك ما دير بهضرتي ماتقلبش تلاقاني من الاول وعندك الاعذار ختار اللي عجبك ولاكن نتا قبلتي تلاقاني وتسمع ليا ودابا ماخليتينش نهضر .. ولاكن عادي تسمع ومن بعد ضبر راسك .. انا مزالة عند كلمتي ماتراجعتش فيها وماشي حيت عيطت ليك باش نهضرو راني ندمانة .. لااا حيت نتا عمرك تبدل وانا ختاريت طريقي حيت مانقدرش نعيش مع واحد يديرنيز تحت رجلو .. وحتى وحدة مغادي تقبل على هادشي واخا تكون كتموت عليك ولو تزوجو نتا وياها يا اما غاظي تقتل ليها الشخصية يا اما غادي تفارق معاك من بعد ما تضبر .. مكتنازلش ... مكتفاهمش .. هادا طبعك وطبعك خايب وبغيت نقول ليك هاد الهضرة باش تعرف علاش هربت انا وعلاش هربات اللولة حيت نتا صعيب فالعشرة والحياة تنازلات ازايد .. (خفضت صوتي وعييت ) سمع ازايد ... انا ماشي رفضت نتزوج بيك غير هاكاك .. ولاكن صعيب نعيش معاك ... فاش وصلات المسألة للزواج والولاد لقيت راسي منقدرش .. واخا نكون كنبغيك .. واخا نكون كنحماق عليك راه نفسي اولا ليا من كولشي .. اللا مبالات و البرود والغضيب ديالك و النفخة راه مانقدرش عليها سمح ليا والى كانت شي وحدة قابلة على هادشي الله يكمل عليها لاكن انا لا .
شاف فيها بابتسامة باردة وقال : ساليتي ؟ ... واحسن اختاريتي تعيشي بعيد .. وهاديك اللي هضرتي عليها دابا قلتي عليها مشات وخلاتني .. هادي عندها الجرأة عليك وواعرة عليك جات فاص قالتها . وقلت ليها انا الى كان هاكا احسن كل واحد فينا يشد طريقو واختارت تمشي بحالها وفكيناها هاكا .. اما نتي لا .. نتي وحدة مريضة فراسها ماعارفاش اشنو باغا ... المصاحبة كانت عاجباك ماكنتش كنبان ليك غول .. حتى جينا نديرو معاك المعقول عاد بانو ليك العيوب وبديتي تفلسفي ..
رديت عليه وقلت ليه واش عاارف شنو هوا الزواج ؟؟؟ عارف ولالا ... الزواج ماشي هوا نتفارقو ونرجعو ونبقا كنلعبو بحال اللي كنديرو .. الزواج مسؤولية وانا حاليا ماهزاهاش .. وباش نهزها خاصني نضرب ليها الف حساب وحساب .. كيهكوني الوليدات اكثر من راسي ... انا حاليا ماعندي ولاد نقدر نختار حياتي فكل مرة ونطيح ونوض ولاكن من بعد فاش ندير وليدات غنضحي براسي على قبل ولادي وباش يعيشو بين واليديهم اللي كانو غيكونو انا ونتا انا خاصني نصبر عليك وعلى عقليتك وانا منقدرش
قاطعتو قلت ليك نرجعو؟ ماقلتش ليك نرجعو وانتا اول واحد جبتي العيب معايا نسيتي ولا نفكرك...
قالي مانسيتش ولاكن انا ماشي بحالك ... كنت طايح معاك من القلب نتي درتي بلان خايب وجايا كتهضري ... جات من عندك دابا لا الوااااعرة هي حتى جبدت معاك المعقول وكذا عاد نتي تسيفتي .. هانيا والله تا هانيا الدنيا تجارب اشيماء . دابا جيتي هضرتي وسمعتك .. من حقك ختاريتي طريقك
قاطعتو : سديت ديك الطريق وفسخت الخطوبة
رد بسخرية : فسخيها عقديها شغلك هاداك مكيعنيش الى فسختيها غنرجعو كي كنا ... الامور وضاحت وقلتي اللي عندك ... وانا هوا انا ميمنكش نتبدل ماشي نتي اللي غتبدليني .. وحاجة اخرى .. لهلا يجيب هادي اللي متقلبش عليا الى كانت غا بحالك وبحال هاديك اللي دازت قبل منكم .. بلاااش بناقص نعيش هاكا حسن ليا من العشرة معاكم . تهلاي فراسك ... وماتبقايش معمرة راسك بيا انا خرجتك من هنا (حط و على راسو ) شغل البراهش ماعندنا منديرو بيه ودابا السلام عليكم اختي
مشا وبقيت واقفة كنشوف فالطبلة .. مابقاش فيا الحال قد ما رتاحيت مللي وصلت ليه الهضرة ومتأكدة غيبرد ويكون كلام اخر .. وليت كنعرف زايد مزيان ... فلحضة غضب كيقول هضرة ومن بعد كيتهدن ويقول هضرة اخرى .. رجعت بحالي للدار كنفكر فشنو دوزت وحسيت بالجراح كتنوض من جديد ... احيانا كنتأثرو بشي حوايج يالاه كتاشفناهم و كنمشيو مع ثيارهم حتى كندمو من بعد .. هاكا حسيت .. حسيت بالندم كياكل فيا على اللي وقع وعلى شنو درت .. لاكن بصح شخصيته صعيبة عليا نصبر عليها وهوا مامستاعدش يتبدل على قبلي .. اذا شنو المعمول ؟ الطريق مسدود والحل مكاينش .. هاد المرة واخا تأزمت ماشي بحال من قبل .. قادرة نخدم وقادرة ندير شي من حاجة وكنقول مزال غيجي نهار يعيط حيت هادا هوا طبعو وهادا هوا حالنا .. رجعت لصحابي كندوز معاهم الوقت والدنيا غادية وملهية مع شغالاتي اللي واخدين ليا وقتي كامل .. حتى فدوى مابقيتش معاها على اتصال بزاف حيت مكنساليش .. نهار على نهار حتى دازت اربع شهور طايرة وكل مرة نسول فدوى على زايد كتقولي كتشوفو غير فالخدمة ومها واخا كتزور مو ماعندهم حتى جديد .
- مكيعرفهاش .. وحتى هي مكتعرفوش .. ولاكن من بلادهم شلحة غير بنت لعروبية مسكينة باها ومها على قد الحال فالجبل .. ولاكن ...
هزيت عيني فيها وقلبي غيسكت قلت ليها شنو ولاكن
قالت ليا : كتقرا عند خالها بناي فطنجة ... وجابت سبعطاش ونص فالباك ودارت مدرسة ديال المهندسين ... مايبقاش فيك الحال اشيماء الزواج قسمة ونصيب .. والمزوجين فالسما وهوا اصلا مكيعرفهاش غير بالصدفة يمكن كان مشا لبلاد وهي عطلة تما و طلع هوا وعمو للجبل يمكن وشافها .. فاش سول عليها قالو ليه راه واليديها هاشنو هاشنو وهي كتقرا عند خالها فطنجة ووالديها عندهم امل فيها زعما تخرجهم من ديك العيشة وتمارة
كل نهاركيزيد فيه العرس يقرب كنزيد نمرض وفدوى كتسول فيا كل نهار وكنمثل عليها ونقول ليها عادي ماعندي والو وانا ربي اللي عالم بيا . وصل النهار دلعرس وكانت فدوى غادية مع امها وقالت ليا غيديرو فالفيلا عند مو اللي كبيرة ولبسات ووجدات راسها ومشات تحضر وبقيت انا ديك الليلة كلها كنتشوط ونبكي .. ماقدرتش نجلس وبغيت نمشي نشوف ونشوف هادي اللي تزوج وخرجت فنصاص الليل مشيت للفيلا عند مو تفكرت اول يوم جينا ليها بجوج وخدينا كسكسو من عندها .. لقيت الدنيا مخلطة و الاضواء والروينة والهايلالا ونزلت دخلت غادية وكنسمع الجوق كيقول اا زنوبة .. اا لمرضية هاكا يكونو بنات الرجال المحضية .. تطعنت والدمعة فعيني حاصلة ووقفت فالباب قدام الناس لداخل شفتها فالعمارية هازينها ... ماعرفتش شنو نقول عليها حيت كانت حاطة مكياج .. لاكن وجهها كيبان صغير وحروفها كوحل شوية عندها حفرة دالزين وعينيها ماعرفتش واش ليلونتي ولا خوضر من عند لله وعاجبها الحال كضحك مصاوبين ليها الشعر مطلوق والتاج والتكشيطة وكيغنيو عليه هوا دا زين ما دا زين .. بقيت كنشوف فالعروسة باينة عليها بنت الجبل .. داك النوع كيكون كيحشم و نسلهم فشكل كيكون الشعر كحل والعينين ملونين .. زوينة وكتفتن وهادشي اللي طعني اكثر خلا مرارتي تفركع وكملات فاش شفتو واقف حدا البرزة كيهضر ويضحك مع شبان بحالو حتى نزلو ليه العروسة شد ليها فيدها جلسها وجلس حداها بالكوستيم والكرافاطة عريس ديال بصح .. كنت كنشوف راسي فبلاصة ديك البنت ... كنت غنكون تما و لاكن درتها بيدي
جاني انهيار عصبي وخرجت من تما ماقدرتش نبقا واقفة وطلعت فالطموبيل سايكة حتى لقيت راسي حدا باب الفيلا ديالو وقفة وكنشوف فيها وحالتي يعلم بيها غير الله ... ماتوقعتش الزواج يكون ماتوقعتوش بمرة ... بقيت تما حتى بدا النهار كيطلع وبانت ليا طموبيلتو جايا حسيت بالارض لاحتني فالهواء عرفت العرس سالا وجات لعروسة لدارها اللي مفروض تكون داري انا وهاداك راجلي انا ... فرنشة عين مشات ليا كلشي وماقدتش نصدق . حلو ليه باب الفيلا دخل بالطموبيل وانا جالسة ... ماعرفتش راسي شنو كندير... مابقيتش كنفكر ... مابقبتش متحكمة فراسي حتى لقيت راسي تبعت الطموبيل ديك الساعة دخلت موراها وكان يالاه نزل لابس غير قميجة بيضاء وراخف الكرافاطة وطايح عليه سر العرسان .. ايه علاش لا الليلة ليلتو مع العروسة يطيح عليهم السر بجوج الله اودي .. شافني وقفت قدامو وتصدم كما انا مصدومة وكنبكي وبحال شي حمقة هجمت عليه كنغوت علاش علاش علاش ... فين هي العشرة فين هوا الحب فين هوا داكشي اللي دوزنا علاش درتي بحال هاكا ... بقيت كنغوت ونزلات هي من الطموبيل مخلوعة بالتكشيطة والطالون الا التاج مادايرهاش وملبسينها داكشي موديغن جايبين ليها احسن مصممة اللي شافها ميقولش عليها بنت الجبل .. تعصبت فاش شفتها هاجمتها وبقات فبلاصتها وشدني من يدي طرطق فيا عينيه قالي هييييه ... حدك تما .. شاف فيها شاروليها باسو وقاليها دخلي لداخل حتى نجي
مشات وكدور تشوف فينا وجنوني غيقلوني ويقتلوها ويقتلوه حتى هوا .. ناضت فيا العافية اما هي مشات هازة تكشيطتها ومعاوناها الخدامة وانا برا كنطيح ونوض وزايد شادني ماخلانيش نتبعها وكنعيط ليها تجي لاكن ماجاتش بقات غير كطل من لداخل كاع وقلت ليها اجي نعاود ليك شنو دوزت انا وياه باش تعرفي باللي تزوج بيك باش ينساني سمعتي .. باش ينساني حيت ماقدرش ينساني وكيبغيني انااا وثلاتة سنين وانا وياه سمعتي
.جرني من يديا بالجهد والدم غيطوش ليه من عينيه قاليا غتسكتي ولا غنهرس ليك هاد الفم .. دفعتو وقلت ليه عرسو ... هرسووو ليوم نفضحك .. خليها تسمع وتعرف باش ماتفرحش بزااف ... خليها .. تعرف باللي ...
قبل منكمل الهضرة هز يدو حتى للسما كان غيعطيها ليا لوجهي ورجع شدها وجمعها بونية وخرجني برا للشارع وسد الباب قالي علاياش كتقلبي ؟ عندم شي مشكل فكيه معايا اش دارت ليك البنت تنكدي عليها ؟ كانت معاك ؟ قالت ليك ها شنو ديري وشنو ماديريش؟ شنو باغا بالضبط وااااش باغا نلبق ليك بروصي نسيفطك بعشر سسنين للحبس باش مانبقاش كل مرة نتصدا ليك .. اش بينك وبينها حتى قلتي ليها ديك الهضرة ؟
قالي بغضب: نتي مريضة ... واش مكتفعميش... راك نتي اللي مشيتي وتخطبتي وكطلعي الاوراق وكنتي غادة فداكشي ديالك ... عاد بان ليك زايد . صافي سالينا ونتي قررتي .. بلا متجي ديري لينا الشوهة هنا وتنكدي على بنت الناس معارفة والو وماجاتش جرات عليك وشدات بلاصتك ...
وهوا كيهضر هزيت عيني فااسما كنسوط بانت ليا من الزاج دالفيلا واقفة جنب مع الخشب من لداخل وكطل علينا بتخبية ماعرفتهاش واش خايفة منو ولا شنو لاكن فاش شافتني شفتها هربات مابقات تما وقلت ليه بسخرية .. لقيت اللي تناسبك ... تصبر عليك وتحني ليك الراس واللي قلتي هي اللي كاينة يا دك
صعرت بالغوات تما وماخلانيش ندحل للفيلا وبدا يهضر معايا بالهداوة عرفتو باغي يصدرني .. ماقدرتش نستحمل طجيت من كتافي ومشيت طلعت طموبيلتي رجعت لداري داعرفتش كفاش وقع ليا حتى وصلت للدار ماحسيتش بالطريق ودخلت كنترعد عيطت لفدوى قلت ليها تجي عندي للدار ماقدراتش تجي حيت رجعات لدارها عند راجلها وقالت ليا نوجد الفطور ونجمع الدار ونجي .. كنت محتاجة شي واحد معايا وعيطت لبشرى خلعتها بصوتي وكان الفجر ديك الساعة ناضت بزز منها جات عندي طحت عليها بالبكا حتى سخفت .. درت كنازة وبديت نهترس فالهضرة فهمات مني شنو كنقصد وخوات عليا الماء وبديت كنطيح والنوض بحال شي حولي مدبوح .. تمنيت نموت ومانبقاش كنتنفض .. حسيت بالشمتة وشمت راسي بيدي وكرهت راسي كرهتو لاقصى درجة ماعرفتش كفاش ننتاقم من نفسي ومن راسي والطيران والفهامة ديالي .. كان يحسابني غادي يرجع واحتمال الزواج بعدتو وعمرني فكرت فيه و قلت يمكن يتصاحب هادي مافيها ششد ولاكن زايد اللي كنعرف يتزوج .. هادشي ماقدرتش نصدقو .. بقيت هاكا حتى وصلات فدوى كتجري مع الغدا بداو يصبروني تقول مات ليا ولدي .. صبروني على الفراق والاوجاع والعذاب ونعست واحد عشرة دقايق وفقت لقيتها كتجمع هي وبشرى عند راسي وكتعاود ليها شنو اللي وقع وعلامن كنهضر . غير فقت استرجعت عقلي قلت لفدوى ياك كنت كنحلم مكاين لا زواج لا والو غير كنحلم ... بقات ساكتة وكيشوفو فبعضياتهم وبدينا عاوتاني المعنات وكنبحث فدوى ... مابغاتش تعضر وتزيد تمرضني ولاكن انا كنبحث بغيت نعرف كولشي وشديت واحد المخدة معنقاها وناعسة ساهية ..قلت ليها شكون حسن واش انا ولا هي وهي تدخل بشرية بنفاد الصبر قالت ليا راه مابقاتش فالزين . الزين فالدفلة وحااااار مرر .. راه تعجبيه فالوجه وميكملش معاك حتى دقيقة من بعد بقات فالعقل وشنو فيه وبنادم واش تابت ولا مزنزن ماتقارنيش راسك بيها حيت نتي بوحدك وهي بوحدها ماعرفناها حنى كي دايرة
جبدات فدوى تيليفون قالت ليها انا نوريها ليك راه كنت معاهم ونضت جلست بغيت نشوف وهي تبعدو فدوى قالت ليا اش غتشوفي ... ماعندك ماتشوفي صافي سالا الفيلم ماضيعيش راسك على قبلو كما مشا بنا حياتو بني حياتك حتى نتي .
فدوى : لا راه عندها العام اللخر فالهندسة كتقرا فطنجة
بشرى : شحال فعمرها دابا : تكون عندها ديك 24 ... حيت قالك باها ماكنش عندو الحالة المدنية.. عايشين غير فالجبل راكي عارفة حياة الجبل ... مادخلاتش بكري للمدرسة وباها حتى صاوب الحالة المدنية عاد دخلها تقرا وبالكشايف والمدرسة بعيدة فاش وصلات السادس جلسات عام فالدار ماعندها كي دير الاعدادية ماتماش وباها قالبها جلسي براكة .. قالك مها اللي وقفات معاها بغاتها تقرا دارت عليها المستحيل باش سيفطها عند خالها لطنجة غير بناي مسكين كتقرا عندو وفاش جابت المعدل فالباك قالو ليهم الناس مضيعوهاش خليوها تكمل وعاونوها غير الناس ودارت الهندسة دابا كتقرا قربات تسالي بقا ليها هاد العام .. وباها عاد رجع كيقول ليها قراي .. اامي اختي ماعارف والو حتى وصلات البنت .. قالك كطحن القرايا طحين ماعاونوها بمىاجعة ولا والو راسها كتقاتل مابغاتش ترجع للجبل المنقد ديالها هي لقرايا
يشرى : الله يكون فالعوان ... هاديك دابا ماجايبة للدنيا خبار .. واش دخلات بعدا ؟
فدوى : اللي سمعت هاد الصباح قالت ليا ماما دابزو وقع بيناتهم شي مشكل قالت ليه مابغاتش هاد الزواج .. قالك نوضوها مشات امها عاى حساب الفطور لقاتها فالبيت كتبكي وهوا خرج ... ااه نسيت قالك شرطات عليه تكمل قرايتها وتخدم .. ااايه وقاليها كملي وغيبقا هوا هنا وهي فطنجة غيكري ليها تما ويصرف عليها حتى تسالي وتجي عندو
طعنوني بديك الهضرة ونضت درت راسي ماسمعت والو ومشيت للطواليط وهوما تابعيني ختيفين عليا ندير شي حاجة فراسي .. بغيت نسد عليا لباب لقيتهم واقفين قالو خراي ولا بولي غير خلي الباب محلول .. مابغيتش وسدتيو عليا وجبدت تيليفوني صونيت عليه .. بقيت كنصوني حتى جاوبني بواحد صوت خلعني قالي مالك عدو ربك نتي واش باغا ندبح مك ولا شنو علاش كتقلبي ؟؟ شنو باغا بالضبط غتكرهيني فالنهار اللي عرفتك فيه شنو باااغا شنووو
قلت ليه بالهداوة وكنتنخصص غير سمع ليا وصافي مابغيت منك والو .قاطعني قالي ماباغايش نسمع .. ماتعيطيش ليا ولا غنوريك شي وجه ميعجبكش .. صافي سالينا هي سالينا تقبليها ودويت معاك بشوية دابا غادي ن***د معاك السوايع بالمعقول
قطع عليا وعاودت صونيت حتى طفا التيليفون .. ماقدرتش ماقادراش نصبر ماعنديش الجهد نخسر روحي ومنخسروش .. ماشي لخاطري وماشي بيدي حاسة براسي غنتسطا ومابقا عندي حتى شي حل من غير حل واحد حطيتو فراسي ونسيت حياتي وبقيت كنتسنا الفرصة فين نتلاقا بديك ختنا وعسيت عليها من الصباح للعشية فباب الفيلا ... شفتها كدخل بشيفور وتخرج بالشيفور مكتمشيش على رجليها وعمرني شفتها خرجات معاه ولا دخلات معاه وحتى هوا كيخرج بوحدو ويدخل بوحدو قلت مدابزين من ديك الساعة ولاكن باقا عندو فالفيلا .. واحد العشية كانت خارجة شفت الشيفور مخرجها هي وشي مرى يمكن مها حيت بلدية فلباسها لاكن هي لا كطلق الشعر ودير نضاضر ولابسة جلابة مخزانية .. دغيا بانو عليها الفلوس فوقت وجيز . تبعت ديك الطموبيل حتى لواحد السوق شفتها نزلات هي وديك المرى وبقا الشيفور فبلاصتو ونزلت تبعتها قبل مادخل للسوق وخرجت ليها فطريقها .. غير شافتني وجهها رجع صفر ومها حداها من النوع اللي كيدير الحنة فيديه ورجليه ودايرة الحجاب وبلدية . شافت فيا تخلعات قلت ليها بغيت نهضر معاك ضاروري وبغات دوز قالت ليا ماتهضري معايا منهضر معاك ومنسمحش ليك على داكشي اللي درتي ليا كما كحلتي عليا نهاري الله يكحلو عليك دنيا واخرة .. جريتها قلت ليها ماكحلتش عليك النهار نتي بنت بحالي بحالك ... غتحسي بيا .. وماتبغيش هادشي اللي طرا ليك يطرا ليا .. مها بقات غير كتشوف وتسول اش واقع وكتشد فيها كتقول ليها ياك لاباس مالكم شنو واقع . نترات يديها وحيدات دوك النضاضر شافت فيا وزدت تطعنت حيت كانت زوينة حتى هي وقالت ليا شنو بغيتي مني ؟ شنو بغيتي مني شنو ؟؟؟ فين كتعرفيني ولا نعرفك اش دخلك فحياتي اختي .. شنو بغيتي عندي هضري يالاه شنو
بديت كنبكي قلت ليها انا مابغيت منك والو .. نتي مادرتي ليا والو ولاكن نتي السبب دخلتي بيني وبين زايد ودوزنا انا وياه 3 سنين كنبغيو بعضايتنا بصح ... واش متأكدة كيبغيك .. متأكدة .. تبغي نجي دخل بينم وبين شي واحد كتبغيه ونديه ليك
قالت ليا شوفي اختي .. داكشي بينم وبينو انا ماعندي دخل فيه .. كن بغاك كن تزوج بيك مايجيش عندي انا
قلت ليها كيبغيني والى نتي خويتي الطريق غادي نرجعو .. حسي بيا عفاك انا منقدرش نعيش بيه بلا بيه
تدخلات مها وقالت ليا : ابنتي حنا شكان ليها فهادشي واش هي جات خداتو ليك من يدك .. اش دارت بيك هاد البنت نغصتي ليا حياتها هي وراجلها واش خطفاتو ليك .. واش كانت عارفاك كتعرفيه وسرقاتو .. هوا جا .. ماقالينا لا كيعرفك ولا والو تفاهم هوا وياها صافي جاب الله تيسير
أنا وبعدي الطوفان الجزء الخامس
محتوى القصة
جلست حيت لقيت راسي مطوية بحال سليب عاطاه قزيبتي كلها وراسي فالزاج وفمي محلول والسفنجة ولان جنب .. اش هاد النيفو الخراوي خلاها زايد كنت كنلبس القهوي ديما واحد النهار قالي عزيز اللون خراوي .. دابا شفت التيفو الخراوي بعيني وماعرفت لا فين انا ولا منين نزلت ولا شكون لاحني هنا .. لقيت عيني حدا الزاج فواحد البومبة وعلى قزيبتي ورجلي تيشورط ديال زايد .. شفت فيه لقيت بلاصتو خاوية ... طليت على برا لقيتو كيعمر البنزين للطموبيل وحدا واحد خدام فالبومبة كيتخلص منو ورجع طلع زدح لباب لقاني مقلوبة وقالي
عندك النعسة ديال اصحاب الكهف
شفت هاكا وهاكا قلت ليه فين حنا اش هاد الخربة جبتيني ليها
قاليا وصلنا هانتي غتعرفي
حيدت التيشورط عليا طويتها بالادب وحطيتها وجلست قاديت شعري حتى كنشوف واحد الباب ديال الحديد قد السخط كبير عندو صوار عالين تحل ودخلنا كان الضلام والنخل ولابيسين فواحد الجهة قداش بحال شي قصبة من دوك قصبات مراكش اللي فالخرجة دايرينهم اوتيلات .. دنيا اخرى لداخل والوسوعية والسقيل ماستقبلنا حتى واحد من غير واحد حل الباب شار لينا بيدو سلم وحط الطموبيل ونزلت مسخسخة مهدودة كلي مكمشة كنمشي بزز ..دار عندي من بعد مت البس تيشورط ديالو وقالي
خاصك شي دفعة من اللور ؟
جاني سخفانة ماعندي جواب ومضهشرة حتى لباب واحد الدخلة ماهي دار ولا اوتيل ولا شنو داكشي تمات واحد المرى جايا كتجري دايخة بالنعاس لابسة واحد البيجامة بلدية والزيف على راسها كتهضر حشمانة قالت لينا على السلامة .. مرحبا مرحبا السي زايد .مرحبا
دخلنا لداخل كانت دار كبيرة والتواسع قديمة شوية فيها الزليج بلدي وفيها جوج دروج من اليمين ليسر كيتلاقاو لفوق جامعهم كولواار داير والوسط خاوي والترية فلسقف مدلية .. غادي قدامي حيد الكاسكيطة وانا كنشوف كانو شي جلسات فالالوان بالبوفات ديال الجلد وطبلة بلدية وشي فوطويات ديال الجلد والتلفازة قداها قداش .. قلت ليه فين حنا ودار عندي كلن كيبان فيه عيا وعينيه حومر زير عليهن بيدو وقالي بعفوية وهوا كيشر لديك المرى . حنا فالفيرما .. سيري غتديك للبيت نعسي تا للصباح
كان مسخسخ ماقدرش يزيد يهضر وكيزير على عينيه ولا يمكن سكر . ضرب ديك القرعة اللي كان هاز كلها بقا فيها غير شوية بان ليا كيقلب غير فين يحط راسو .. مشا طلع مع الدروج وانا هازة عيني داروفداك الكولوار ودخل لواحد البيت سد عليه ومن تما ماعاودش شتو .. حتى انا طلعات معايا ديك المرى لواحد البيت ودخلات معايا كتوريني للحمام وكفاش نتصرف ومشات بحالها سدات الباب وبقيت انا كندور فالبيت كان بلدي والناموسية بلحديد كحلة ومتول والفراش جديد .. عندو بالكون وديكورات بلديين والهدوء مكنسمع حتى شي حس من غير نفسي كطلع وتعهبط ... لحت الغطا ولحت الجلابة بقيت بديباردور وسليب وماجايباش معايا الحوايج .. يالاه تخشيت سمعت الدقان ونضت لويت عليا ليزار قلت شكون جاوباتني ديك المرى وحليت الباب طليت لقيتها جتيبة بلاطو صغير فيه الماء والكاس حطاتو ليا ومشات .. شربت رويت العطش وطحت نعست مافقتش حتى سمعت واحد الصوت كيدير الضجيج .. صدعني فراسي تقب ليا سفق ودني وعصبني كتر من الساعة اللي كتفيقني الصباح .. هي بعدا كنزل عليها نسكتها اما هوا ماعندي كي ندير وماعرفتوش حتى شنو هوا .. مكيمكنش على صوت كيطلق هاد الحيوان ماعرفتو من اشمن صنف .. فقت كان الضوء زادح البيت والهوا كيشهي تتنفسو و النقاااا .. الله على البادية والهدوء احسن بالف درجة من ضوضاء المدينة . طليت من البالكون نشوف شكون هاد النكاف ولا نكافة اللي فيقاتني وانا نتفاجئء .. حليت فمي وقلت واااااو واو وااو وااااو ... منضر مكنتش متخيلة فراسي غنصادفو ... كنطل على واحد الواحة بحال داكشي ديال علاء الدين وسيندباد .. واحد لابيسين بعدا قدامي لونو اخضر واااعر كبير مدورين بيه الكراسا بحال شي اوتيل ... والتواسع من الجناب على حد فين شافت عيني فالواجهة اللي كنطل عليها و مو موراه واحد الارض كبيرة واسعة خاوية فيها غير الشجر صغير وبير كيبات ليا صغير وواحد تيران ديال تينيس فيه الرملة .. ومن مور هادشي كامل فاصل بيناتهم واحد الصور صغير حادر كيبين واحد الاسطبل قدو قداااش فيه ساحة الوسط وفيه واحد الراجل جار خيل كحل كيبري والبيوت دايرين بيه والتواسع والاراضي غادية على حد الشوف .. شفت على ليمن وليسير بان ليا شجروالزيتون والخضرة والاراضي مقسمين تبارك الله الخيرات ديال مولانا و شادين مور الدار دايرين الاراضي بالخضرة وبالذرة وكانت واحد ثدام الباب واحد الشجرة ديال اللوز مشاء الله قدها قداش مضللة
منقدرش نوصف نقاء الجو فهاد المنطقة... باينة منطقة ماشي ساحلية حيت انا عندي الحساسية وكدوز عليا فمدينتي وديما نيفي احمر وكنعطس .. هاد الجو الغزال سرح ليا نيفي وخلاني نسستنشق الهواء الحقيقي النضيف .. غير ليلية وحدة دوزتها هنا ونعست معطلة وتسخسيخ الطريق كانت كافية باش نوض مهلوكة وفيا السخفة ومبنجة .. لاكن لا .. فقت فقمة النشاط وعيني محلولين وبصحة جيدة .. ماعرفتش الهوا اللي كنتفسو فالمدينة واش فيه البنج ... عينينا طايحين وسخفانين ومنونخين .. جو البادية والطبيعة بحال السيروم وفيتامين سي .. ماعرفتش شخال الساعة لاكن الشمس باردة ماشي ساطعة بزاف .. ..قلت تقدر تكون ديك التسعود ديال الصباح .. جيت نشوف شكون اللي فيقني وماخلانيش نشبع نعاس لقيت واحد سيدي طاوس ناشر ريشو غادي جاي لتحت كيدور .. فينما يترعد بريشو كيبدا يطلقو داك الصوت الغريب .. اول مرة نعرف صوت الطاوس قوي ومجهد .. ولايني راك جعواق السي !.. ولاكن ماعليكش .. غزال عجبتيني . رجعت بداك اللحاف ملوي عليا مشيت طليت على تيليفوني لقيتو طافي شابع راحة وحطيتو يتشارجا .. دخلت غسل وجهي بالماء وشللت فمي حيت ماهزيت معايا حتى حاجة من الدار .. طلقت شعري واخا مامصاوبش بغيتو يتنفس وضرني فراسي مجموع تقل عليا .. ماشي حرش .. ولاكن قوي بزاف وكيزيد يتنفخ مكنرتاح حتى كنبهطو . ماعلينا كان باقي شاد فيه شوية ديال برودة الماء وبات ملوي صبح مهدن .. يمكن الجو والمني.. كن صبحت فالدار كن فقت بحال السبع وشعري مشوك . لبست جلابتي الكحلة وبلغتي وحليت الباب طليت .. السكااااااات .. دبانة مكتزنزنش فالدار ... طليت لوسط لقيت واحد القط قدو قداش مزغب متكي مع راسو دايرة واحد النعسة ياسلام على ضهرو .. سعداتو مهني .. ياكل ويشرب وينعس وعايش فهاد البلاصة ممتع مع راسو .
هبطت لتحت كنسرح عيني وعاد بانت ليا الدار مزيان ... الله شحال زوينة ... سراجمها طوال وكبار بالزاج الملون .. داكشي بلدي .. والنقش فالسقف والراجم ديال الخشب بلديين .. بحال شي رياض لاكن داكشي خفيف ضريف ... واحد الصالة فواحد القنت فراشها احمر غزالة وطلامطها عادين لاكن كلشي على البساطة ... مينكنش شحال حبييت هاد البلاصة .. كل تفاصلها زوينين والالوان الثراتية غالبة عليها .. زربية ديال الخيط فديك الصالة والترية نحاسية ... واخا نوصف حتى نشبع كل ركن فيها مانعطيهش حقو . بقيت كندور وانا لابسة ديك الجلابة وشعري مطلوق حسيت براسي بطلة فشي فيلم ثراتي قديم ... ياريث كن عشت فديك الوقت ... ماكرهتش وبشدة كن عشت فدار بحال هادي ولباسي بدلي .. عمرني فضلت البلدي على الرومي حتى شفت هاد البلاصة وتغرمت بالتقاليد ديالنا وثراتنا اللي كيشوفو النصارة شي حاجة فشكل .. شي حاجة بحال افلام علاء الدين وسندباد ... الالوان والبلدي والجلسات ديالنا لا يعلى عليها .. حيث ماعندهمش هما فثراتهم هادشي كيبان ليهم مختالف بحال شي كوكب اخر لامثيل له .
وانا كندور بوحدي فاركان الدار ولا فيلا و لا رياض ولا شنو نسميها ماعرفتش .. ضرباتني ريحة لنيفي ديال المسمن هزاتني فالسماء .. ماشي اي مسمن .. مسمن نيييت وتبعت الريحة خرجت فواحد الكةزينة نصها الكبير عريان فالهواء الطلق .. مجهزة على حقها وطريقها لاكن فيها فران ديال الثراب مربع بحال ديال البيزات فواحد الحيط على الهوا وديك المرا كطيب فيه المسمن !!! كفاش؟؟ المسمن فالفران كي دارت ليه !! .. ضارت شافت فيا وكانت لابسة واحد القفطان بلدي قديم ودايرة واحد لاستيك طويل داير مع ضهرها جامع ليها كما يديها وطابلية على كرشها وشادة راسها كطيب .. تبارك الله عليها كتشم ريحة الحداكة كتنبع منها .. شافت فيا وقالت لي واش بغيتي تفطري هضرتها تقيلة بلدية وشحال زوينة بحال الى غالبة عليها الشلحة مسكينة .. قلت ليها غير جيت شميت ريحة المسمن وقربت لداك الفران لقيتها دايرة مقلة تما فوق العواد وكطيب .. وقفت مربعة يدي حداها كنتجمع ..سولتها على سميتها قالت ليا خديجة .. اسم على مسمى هاد المرى .. دخل واحد الولد صغير كيجري هاز واحد الجرارة كيجرها وجرات عليه وبدات تحلف فيه بالشلحة عرفتو ولدها .. الشلحة ديالها ماشي شلحة ديال سوس وبعيدة عليها .. ماجاتنيش غريبة فهمتها شنو قالت ليه .. قالت ليه هانا غادي نقتلك على دوك الحوايج اللي لبست بيك جداد قدام الناس وكتوسخهم غير جري والله تجيني مطبع حتى نقطع عليك داك قطيب الزيتون .
جاتني الضحكة بقيت كنشوف فيها مابغيتش نحرجها ونقول ليها فهمتك صافي درت راسي مكنفهمش وهرب الولد مشا كيجري وقالت لي اجي تفطري راني حطيت ليكم لفطور . سولتها واش زايد فاق قالت ليا كانت مشافتوش وكانت فلكوزينة ماعرفاتش واش خرج ولا باقي فالبيت .
تبعتها لفين غادية وهزيت معاها واحد الطبق صغير فيه المسمن وهزات هيا الحرشة وشي حوايج اخرين وتبتها خرجاتني من واحد الباب لقيت راسي فديك البلاصة اللي كنت كنطل عليها ولابيسين لهيه مقابل معاينا .. كانو جلسات بالقصب و المغطيين بالخشب داكشي غزال حدا الباب وطبلة ديال السيما لاسقة مع الارض مزلجة بزليج الفسيفساء لقيتها عامرة .. ها اتاي ها القهوة والزبدة بلدية وحطات ديك الحرشة بالسمن والزبدة بلدية .. دارت ليها واحد القشرة الوسط وحطات ديك زبيدة وسط ديك الحرشة المضورة ودورات الطبلة بكل ما هوا بلدي .. زيتون عسل خبز سخون ديال التراب مسمن بغرير بيض مصلوق البيض بالخليع وحطات واحد السوبيرة فيها الحسوة بيضاء وايلان وبزاف ديال الحوايج تقول رمضان والضياف جالسين .. وعاد السفوف ديال الزرع والعشوب داكشي كنحطوه عندنا حتى حنا فالبلاد عرفتو بلا منختاج نسولها على شنو هوا وبقيت كنشوف فيها كتحداك حتى وقف علينا زايد سمعتو قال ليها بالشلحة كيضحك معاها .. والو اخديجة قصرتي معانا .. جبت ليك المرى ومادرتيش منها هادشي كيف والو
الله وأكبر على شوية نهز يدي فالسما ونوقف نقول حااضرة ... حساب ليه مافهمتوش اش قال وديجا قلت ليه انا شلحة من الاطلس ولاكن عمرني توقعت يكون هوا نيت شلح ... صافي عاد عرفت ديك النفخة وديك النفس منين جابها .. لاكن ماكتبانش عليه نهائيا تقول ولد كازا ولهجتو لا علاقة ليها بالشلوح .. ولاكن صدمني السيد بقيت كنشوف ودرت راسي مكنفهمش وخديجة تزنكات حناكها رجعو بحال مطيشة وحمرا ومشات بغات تصاوب شي حاجة وماخلاهاش قاليها تجلسي مابغاتش كضحك وحشمانة بقل ليها شوية تولي تقطر .. دخلات فجنابها وهوا شاد فيها وجلسها معانا فالطبلة والسيدة كتعصر بوحدها مسكينة وكتبان على وجهها حشمانة .. تلفت شاف فيا عاض على شنايفو ورشقني لعنقي من اللور وشدني من رقبتي قالي صباح الخير . صبح راشقة ليه مقزب حدايا فواحد الشورط ولابس تيشورط ومدوش هوا اللي جات معاه ماشي انا اللي جايا فالجلابة وبقيت فالجلابة وغنبقا فيها تا نرجع فضيحة .
قلت ليه صباح الخير وانا كنشرب القهوى وشد ليا عنقي داني وجابني وطبطب على حنكي وجلس كيشرب القهوى وقال لخديجة قربي داك الطاجين دالخليع قرباتو ليه وهوا يشد فيها عاوتاني حتى بدات تحمار قاليهت بالشلحة تقاداو ليك اخديجة مشات لحداكة ...بقات كضحك وسولها على راجلها وهي كتهضر من نيتها قالت ليه مشا للسوق وقاليها هادي ماشي دقة السوق .. هادي شي مرا تما مشا عندها وخلاك هنا قاليك غادي لسسوق ... لا والو هزك الماء اخديجة مابقاش عاجبو للمسمن ديالك ... كديري فيه الملحة وهوا فيه السكر .. مسسكينة رجعات حمرا كضحك من عينيها وقالت ليه على نيتها ايوا غير خليه ربي يحسابو
كمل عليها زايد وانا دايرة راسي زي الاطرش في الزفة وقال ليها كتزيدي الملحة فالخبز اخديجة مابقيتيش كتهلاي فعمر .. اش هادشي هادا .. لا ولاكن واخا يدور السوق حتى يعيا مايلقاش بحال خديجة وكسكسو خديجة والطاجين دخديجة
. كيبدا يضرب حتى كينعس على الطبلة .
ميلات راسها كضحك وهوا شاد فيها .. بدا كيقلب على الموس ناضت جابتو وقلت ليه حشومة عليك شنو كنتي كتقول ليها .. ضحك وقالي كتحشم مسكينة خديجة عزيزة عليا
رجعات بالموس وجلسات كتشرب قهوتها حتى جا ولدها مكرفس شد الفران حداه وتخبا فمو حشمان كيطل علينا مشاعراتش براسها حتى قالت بالشلحة معصبة والله حتى نسلخ والديك على هاد الفضيحة بهدلتي الحوايج جداد والله فيك لابقات .
شدو زايد قاليه جلس جلس اعمي تفطر تجلس
قالت ليه لا فطر خليه يمشي ينقز
قاليها اودي خلي الولد يجلس يفطر غتسلخيه على الحوايج جداد وسخهم .. مابقا فيك اللي يصبن قلت ليك عمر راه مشا دار المرا فالسوق كتعرف تصبن
قالت ليه على نيتها اوالله ما يلقا بحالي غير خليه
رد القهوى من فمو كيضحك حتى شالا وقال ليها دابا بيني وبينك واش تقبلي عمر يجيب المرى الثانية...
عقدات حجبانها وعينيها حشمانين قالت ليه والله مانجلس عندو حتى دقيقة
قاليها ياك نتي الري نتي الشوار .. يعطيك السوارت ليديك نتي تحكمي
هزات خنافرها وقالت ليه : اهمم .. داكشي غير فالاول
رد عليها : هي قاابلة يجيب الثانية اخديجة .. انا بعدا ماعنديش مشكل يجيبها لهنا الشرع عطا ربعة .. وتحرمي عمر مسكين الى بغا يفوج ويتزوج .. ماشي حشومة عليك
دورات راسها : اييي .. انا اللي مسكينة .. هوا مسكين يتزوج
هز يدو وقال: واعييتي اخديجة كترو فيك الشكاوي والنكير ...
تنهدات : انا فيا الشكاوي يانا .. شحال وانا صابرة معاه .. ايوا الى دارها يخلصو الله
قاليها ماعندو مايتخلص داكشي ديال الله ...
بقات ساكتة حشمامة وقالت ليه ايوا نتا تقدر دير ربعة
قاليها كيضحك : ايوا بلاتي نديرو اللولة بعدا ... هاهيا غتسمعك غديري ليا مشكل معاها دابا . وهانتي كنجري غير فالمشاكيل اخديجة .. دابا الى قالت ليا شي كلمة تقليد عليك نتي دابا جبدتي الصدع وانا يالاه نويت
ولات حمرا مزنكة وقالت ليه: لاااالا مندير ليك بو المشكيل الله يكمل عليك بلخير
شد فيها وقال : لا درتي ليا مشكل دابا مع المرا يالاه .. غنرجع للدار تقولي الحاجة مالك معاها نقول ليها خديجة مجبد البلا ... واهاهيا دابا قلبات وجهها وفكي ليا عاد الحريرة
خديجة : انا راني مادرت ليك المشاكيل هاني كنقول
هز راسو كيضحك ويموت عليها بالضحك قاليها : ااااودي يا خديجة لهلا يعطيك ما يضرك .. عمر مسكين كن كوراه شوطاتو الشمس كيقلب ليك على البيجامة ونتي كتجمعي فالدنوب وتشكي فيه .. حشوومة عليك خرجتي للعيب خرجتييييي للعيب
دوز داك الفطور كامل شاد فخديجة وانا كنتسنط ونفطر ماقاداني فرحة سمعت الحوار تحلات ليا وتيقت ولاكن تصدمت فزايد بزاف .. غير بدل البلاصة بدا التقشاب والضحك وبان ليا مولف يقشب معاها حيت كتزنك وتحشم وهوا عاد مكيزيد يتقنها حيت نية وعندها شي هضور كيضحكو داكشي علاش كيعجبو يشد فيها . ماهضرتش بقيت كنسمع حتى بان ليا شي واحد جا على الخيل كان راجل كبير شوية لحيتو بيضاء وشعره حتى هوا عندو الكرش شوية .. راحل ستيني لاكن باين عليه الخير كان لابس سروال توني وتيشورط بيضاء وسبرديلة وداير نضاضر ديال الشمس وطريبيشة مدورة .. شافو زايد وابتسم بدا كيمسح يديه باش يسلم ونزل داك الراجل من فوق الخيل وجا كيردد
اهلا اهلا اهلا .. انهار كبير هادا
وقف زايد سلم عليه بالاحضان وشاف فيها وقفت مديت ليه يدي قالي سافا بنتي مزيان احوالك مزيانة .. قلت ليه الحمد شكرا . وقالي زايد .. عمي يحي قلت ليه متشرفين وجلست فصمت مأدبة اما خديجة ناضت وجدات ليه فين يجلس وجلس حدا زايد اللي عرض عليه يفطر معانا وقاليه فطرت وقال لخديجة تخوي ليه شي كاس دالقهوى كحلة عطاتو ليه وحط يدو على ركبة دزايد كيتساولو علة الاحوال والضروف وقال ليه عمو شفت الطموبيل ديالك داخلة لبارح قلت زايد هادا اللي جا .. ايوا على سلامتك اللي تفكرتي البلاد وجيتي غير نشوفو مابغينا منك والو اصاحبي
بداو كيتجمعو بيناتهم ويضحكو انا خديجة مشات للكوزينة كتبان ليا كتجري من جهة لجهة مكتساليش وعمو كيهضر على العائلة وعلى شي شخصيات جداد واحوال الخدمة والفيرما والمحصولات وشي اتقافات دازت من قبل ومشاكيل مع ناس اخرين .. هضرة كنجيب هضرة وماهضرت ما نطقت والهضرة مكتشاليش .. ناض عمو يمشي شدو زايد يجلس مابغاش قاليه جيت نشوفك ودوزو تغداو معانا مرحبا بيكم .. تردد زايد فالاول وشاف فيها مجرد شوفة وعمو كيأكد عليه قالي والو غادي تجي غنديروه على حسابك .. حط زايد يدو على كتف عمو رحب بالعراضة ومشا ركب على الخيل كيدور بيه ومشا
مشا كلشي وانفردنا غير انا وياه جالسين .. دار عندي قاش ليا فشعري وقال
السوالف الاللة .. والقصة.. شنو بان ليك نمشيو نتغداو عند عمي
شفت فيه وقلت ليه : ولاكن كفاش غنمشي عندهم هاكا؟ شكون كاين فالدار عندو ؟
رد بعفوية : حتى واحد غير ومرتو .. ولادو كاملين برا كبار بقا هوا ومرتو وتقاعد رجع للبلاد .. هادا احسن واحد فعمامي كاملين
ترددت وقلت : ولاكن كن غير علمتيني كن جبت معايا غير حوايجي .
قالي كن علمتك ماكنتيش اصلا غتهبطي. هاكا مزيانة مافيك والو
جبد الكارو وتكا كيتنهد بانت ليه خديجة هازة واحد البانيو دايزة من لهيه وهوا يعيط ليها واااااخديجة ههه... واجي نكمل معاك الهضرة
واحد اللحضة حسيت بالغيرة من خديجة واخا ماعنديش علاش نغير .. المرى مزوجة بولدها وكتشوف غير قدامها وعزيزة عليه حيت درويشة وخبز ربي فطبقو .. ولاكن واخا هادشي كامل جاتني الغيرة ضحكت غير بزز وهي تعيط ليه هاا نعام ؟ قاليها واجي عطي الراحة راسك غتشرفي ماتبقاش تباني لعمر
هبطات راسها مشات كتجري حشمانة وانا كنبرد ديك الغيرة اللي ماعرفت علاش جاتني حدحتى قلت مع راسي اويلي واش تسطيتي ؟ راه الحماق هادا ونتي ماحاساش بيه
تقرصت حسيت بنغزة ماشي هي هادي ونضت ماعجبنيش الحال وقالي فين غادية قلت ليه وباينة على وجههي نافضة غنمشي نجيب تيليفوني .. مشيت طلعت للبيت هزيت تيليفوني وخرجت يالاه جيت نهبط مع الباب لمحت باب بيتو وقالي راسي شوفي كي داير وشنو عندو تما .. جاني لفضول وشفت هاكا وهاكا مابات ليا حتى واحد ومشيت بالزربة حليت الباب ودخلت سديتو ورايا وسرحت عيني مان بيت عادي بحال اللي تعست فيه مزايدش عليه بزاف .. لاكن قشغت تيليفونو كيشارجا ومشيت ليه نيشان هزيتو وانا نفرح وجاني واحد الحماس بحال الى هزاتني شي موجة كبيرة فاش فاش مالقيت لا كود لا شيما ودخلت نيشان نقلب .. فر2ة فين نعرف هاد اسرار الدولة ونعرف شنو ميدور ليه فهاد التيليفون اللي عمرو خلاني نقلبو ولا نشوف فيه . دخلت ليزابيل نيشان كنشوف النوامر طلعات ليا وحدة هي اللولة بسمية ليليا صونات عليه جوج مرات غير شي جوج دقايق دابا .. شكون هاد ليليا هادي عاود ؟ تكون زعما ديك ليهودية اللي قالت ليا عليها فدوى ؟ بقيت كنقلب لقيت ليزابيل ديالها كتار وشي نماري اخرين ماعرفتش ديالمن مامكتوباش فيهم السمية . مشيت للواتساب كنقلب لقيت المحادثة ديلو هوا وديك ليليا كلها فرونسي قريت شوية شي فهمتو شي مافهمتوش وجاني الفضول نعرف شكون هادي .. مشيت طليت على التصاور مالقيت حتى صورة ليه هوا .. شفت تصاور اللي كيترسلو من الواتساب وشكون مسيفطهم بانت ليا ديك ليليا مسيفطا شي تصاور مصورة مع دري صغير .. شعرها كحل طالقاه ولابسة قميجة ودجين فشي بلاد على برا ومسيفطة ليه تصاور اشكال وانواع ديال الدري الصغير .. دخلني الشك علاش هادي كتسيفط ليه هادشي شكون هي وعاطيها وقت كيهضر معاها فالواتساب .. لقيت تصاور بسمية نادين حتى شعرها كحل لابسة واحد الكوستيم عبارة عن فيست كحلة وميني حد الركبة وقميجة بيضاء دايرة بادج فصدرها وواقفة كتقدم شي حاجة بحال الى راها فشي مؤثمر ولا منعرف فين .. شاشة كبيرة وراها والمنصة والميكروفونات تابثين قدامها وكتهضر ..
جاني لفضول نعرف شكون هاد البنات وجاتني الغيرة منهم تشوطت ماعرفتش شنو كيديرو عندو هنا . حطيت تيليفون بلاصتو وخرجت من البيت قبل ميحصلني تما شي واحد .. هبطت لتحت مالقيتوش بلاصتو وسولت عليه خديجة قالت ليا مشا لشي بلاصة تما ومشيت كندور ونكتاشف فنفس الوقت حتى وصلت لاسطبل لقيتو مع واحد الخدام تما وراكب فوق واحد الخيل كحل تبارك الله صحيح ومطراسي .. كيدور بيه غير تما ويقلبو واش مزيان ويطبطب عليه وعلى عنقو .. وقفت حداهم بعيدة كنشوف عجبني العود تبارك الله كيبان عن قرب همة وشان وكبير وعالي ماشي بحال التصاور والافلام كيبان عادي .. عندو واحد الهبة سبحان الله العضيم ربانية .. شار ليا زايد بيدو قالي اجي وقربت خايفة بغيت نقيس فالعود .. قالي واش عمرك ركبتي على العود قلت ليه من اللي كنت صغيرة وصافي .. عمرها جابتها الصدفة .. نزل وقالي اجي نركبك قلت ليه لا وقربت همست ليه فودنو باش ميسمعش داك الخدام وقلت ليه راه مالابسات من تحت الجلابة .. ضحك وقالي نجلسك جنب ومتخافيش .. خفت فالاول وانا تقيلة واخا ماشي شيوغلض ولاكن بخيري لاطاي ديال كايلي هه.. هزني وانا مخلوعة وهوا كيدفع فيا حتى خرجو عروق يديه وجلسني فوق الخيل وطلع بالزربة وانا لاسقة بيدي خايفة نزلق وشد اللجام بيا وضربو برجلو زاد بينا .. حسابني غيمشي غير تما ساعة خرجني كيدورني فدوك الاراضي الخضراء الواسعة بشوية .. حنيت لاحضانو وانفاسه تمنيت كن رجع الزمان اللور وماوقعوش دوك المشاكيل اللي هزو علاقتنا ... حسيت براسي كننتاعش وكنكبر ونترعرع وانا بين يديه والدنيا كلها ديالي والسعادة كلها سعادتي بوحدي مانتقاسمها مع حتى واحد . بدا كيوريني فدوك الاراضي اللي ديالهم واللي ديال عمو واللي ديال ولاد عمو وحدين اخرين وقالي غنديك لواحد البلاصة زوينة وهبطني مع واحد الطريق لواحد البراج كبير فيه الما وسط ديك الطبيعة والخضورية ووقف العود بديت كنشوف الطبيعة والمنضر بدا كيوريني منين جاي البراج وحتى لفين كيمتدد وهزيت راسي كنشوف حتى حسيت بواحد البوسة فعنقي ماكنتش متوقعاها
تزنكت ماعرفتش نقول ليه غير زيد بوسنس توحشتك ولا نقول ليه علاش بستيني ونحمضها .. دوزتها مكمدة ماهضرتش وشاف فالساعة قالي نمشيو عند عمي غيكون كيتسنتنا ورجعنا فوق داك العود كنهضرو على الطبيعة ولخضورية حتى للفيرمة ودخل العود حتى لفين فطرنا ونزل هزني هبطت وقالي يالاه نطلعو نشوفو ليك شي حاجة تلبسيها باش نمشيو . طلعت معاه للبيوت لفوق حل واحد البلاكار كانو فيه شي حوايج قلال مطويين وشي كساوي بلدين عادين معلقين قلت مع راسي يمكن يكونو حوايج خواتاتو وفعلا قالي ديال نادين ختو وانا نتفكر ديك نادين اللي كانت واقفة كتلقي الكلمة .. عندها الدوق ولاكن شوية قدام يمكن بقاو هنا ودازت الموضة ديالهم .
خديت واحد سورفيت عادية بيضاء مافيها حتى زواق لبستها مع ديك البلغة جيت مابياش ..عادية جاو معايا ونزلت عندو لقيتو لابس سورفيت عبارة على تيشورط كحلة و سروال سبور ديال الدراري وسبرديلة ديالو وشاد الخيل هوا واحد الخدام .. قالي تقدري تركبي عليه بوحدك قلت قلت ليه اه الى مكانش غيجري بيا .. قال ليا هادا راخ ولد هادا .. يعني الخيل اللي غنركب عليه انا ولد هاداك الكحل اللي ركبنا عليه قبيلا وماباينش ولدو كيبانو بحال بحال .. مهليين فيهم ومنقيينهم حسن من ولادهم .. عاونني حتى ركبت وطلع هوا فوق الخيل ديالو وتمينا غاديين بيهم حتى خرجنت للطريق.. ماشي طريق غير بقوة ما كيدوزو الطموبيلات والناس تطراسات . كان الربيع فالجناب والشجر وداك العود اللي راكبة عليه انا حلف ميزيد جلس كيرعا تما وزايد قدامي كيقول ليا ضربيه برجلك وانا خايفة نصربو يهزني يلوحني .. بقا غادي بيا فين عاجبو يرعى حتى رجع عندي زايد كيجري بالعود ضربو كينوض فيه عاد تحرك ومشينا كنتجمعو ونضحكو حتى لباب واحد الفيرما ودخلنا كانت فريما لا تقل جمالا على اللي كنا فيها .. حتى هي ززينة وعندها جماليتها الخاصة .. مشينا بالخيل حتى لداخل كاع واستقبلنا عمو فالباب رحب بينا وفرح بينا وانا حشمت ماعرفت ما نقدم ولا ما نوخر.. مد ليا يدو شديت فيه دخلني معاه واستقبلاتنا مرات عمو كانت مأدبة و متولة كتهضر بالكرام وسلمات عليا وجلسنا فواحد الصالون بلدي غزال وجلسو معانا كنتجمعو لاكن كانو كيهضرو بالعربية يمكن باش منتنواش انا حتى قالت ليه واحد اللحضة مرات عمو وهي كضحك معته بالشلحة .. واقيلا صافي نويتي
هبط راسو ضحك وشاف فيا بنص عين وقال ليها ايلا كتاب نشاء الله
حشمت ماعرفت اشمن ردة فعل ندير.. شافت فيا مرات عمو كترحب بيا وسولاتني منين انا قلت ليها من خنيفرة .. قالت ليا واش شلحة ياك .. قلت ليها اه .. وقالت لزايد ايوا راه شحلة بنت البلاد .. حرك ليها راسو وقاليها كتفهم واقيلا ..شاف فيها وقالي كتفمينا شنو كنقولو راه بحال بحال كيتشابهو
مابغيتش نكدب وحركت راسيي قلت ليه اه ولاكن مكنعرفش نهضر بيها مزيان لساني تقيل .. قالت ليا مرات عمو حتى هوا دابا يحساب ليك كيطير فيها ! حتى هوا بزز باش كيخرجها شداتو ديك كازا مابقاش كاع كيشوف العائلة والحاجة مكتفهم فيها والو كملات الباهية
فهمت ان مو ماشي شلحة باه اللي شلح يعني تقدر ماتتقبلنيش ولا تبغي ليه عربية ماعرفتش ردة فعلها كفاش غتكون... الى كانو عاملوها عائلة راجلها مزيان وحسنو ليها مكنضنش ترفضني ولاكن الى كانو عاملوها خايب مغتحملينش وتاخد عليا حتى انا نضرة خايبة واخا يكونو كاملين عاملوها مزيان الا وحدة علملاتها خايب غتجمع كلشي فكفة .
الصراحة عنو ومرات عمو مزيانين مافيهم مايتعاب ومعقولين حتى ديك الهضرة من تحت لتحت ماعندهمش .. كيهضرو نيشان ويوضحو الامور .. تهلاو فينا وحطو لينا لغدا مبررع وكل شوية ترحب بيا مرت عمو وهوا وعنو مجمعين .. جلسنا انا وياهل كنتجمعو بغات تتعرف عليا وهضرة كتجيب هضرة فالحوار العفوي قلت ليها عندي بارافارماسي وهافين ساكنة وهاشحال فعمري وحتى هي قالت ليا عندها جوج بنيات وربعة ديال الولاد كلهم فالخارج البنات مزوجين والاولاد حتى هما واحد فيهن اللي يالاه تخرج هوا الصغير كاع وبقا تما وبدينا كنهضرو على الثقافات ديالنا مالقيناش فرق كبير بيناتنا الصراحة .. داتنا الهضرة وعجبتها حتى قاليا زايد يالاه نمشيو ونضنا خرجنا للخيل كان الغروب ديك الساعة .. مشيت جهة العود ركبني وزاد بيا وهوا يالاه جا يركب سمعت مرتو عمو قالت ليه ديتي الزين وبقا كيضحك طلع على الخيل لحق عليا وخرجنا كنتمشاو فداك الغروب والجو زويين واحد الجو لامثيل له بحال شي لوحة فنية
وصلنا الفيرما وقالي اجي نجلسو هنا شوية فديك البلاصة اللي فطرنا فيها .. جابت لينا خديجة براد ديال اتاي وحطات لينا طبسيل ديال الكرموس كيشهي وشبكة فيها الكركاع واللوز وشعلو الاضواء فالفيرما وفين جالسة انا وياه وعم الصمت ... جا الوقت فين نضرو ونصفيو الحسابات ديالنا ... شعل واحد الكارو يتمزك ليا ولكلامي وتلفت عندي بجدية قالي
- شيماء ياشيماء .. باقا هازة فقلبك عليا؟
ضحكت بسخرية وقلت ليه انا ماهازا فقلبي حتى حاجة من جيهتك
قالي الى ماهزة حتى حاجة من جيهتي غنوضحو هاد العلاقة اللي بيني وبينك .. سمعتيني شنو قلت لمرت عمي فهمتيني
تنهد وحركت راسي فصمت وقالي : دابا نتي .. مقتانعة بيا ؟
درت راسي مكنفهمش: كفاش مقتانعة بيك
رد بجدية : واش مقتانعة بيا وقادرة تكملي حياتك معايا ولالا ؟
بقيت ساكتة مالقيت منقول ووجهت ليه نفس الؤال قالي: انا كنشوف راسي مقتانع ... ومخلي العلاقة غادية حتى نشوف فين غتميل .. الى مالت جهة الزواج انا ماعندي حتى مشكل
رما ليا الكرة وشديتو منها باش نجرو يتزوج حيت الى بقيت تابعة العلاقة وتوازنها غادي تسيفطني للسبيطار ومندير والو قولت ليه
- انا عيت من هادشي .. مابقاش عندي الخاطر للصدع والمشاكيل وتخربيق وكنفضل نستاقر احسن ما نبقا كنتمايل من جهة لجهة ... ونتا كتشوف وكتعرفني مزيان الى كنتي باغي تزوج راه غنبان ليك واش ديال الزواج ولالا
ضحك ضحكة خفيفة وشد ليا فيدي قالي: كن ماكنتيش كتبان ليا ديال الزواج .. وبنت الناس مغنجبدش معاك هاد الهضرة ... شوفي راسك واش مقتانعة بيا .. ماشي كصاحب ولا حبيب .. لا .. كزوج يعني واش تقدري تكملي معايا حياتك وديري معايا وليدات
بقيت شاكتة حشمت نقول ليه اه مقتانعة ستين الف مرة وقالي
- فكري مزيان .. باقي عندك الوقت فين تفكري وهاحنا بجوج حتى نشوفو فين غتوصل بينا هاد العلاقة
كنت غنقول ليه اه ونحسم الامر ونخرج بنتيجة ولاكن فاش خلا ليا الوقت نفكر سكت مابغيتش نبين ليه راني مزروبة ومحروقة كنتسنى الفرصة .. بغيت نبين ليه باللي خلعني الموضوع وماكنتش كنتناه وخاصني وقت نفكر فيه وداكشي اللي وقع .. بصراحة كنت كنتسناه يتحنا على رجليه ويعطيني الخاتم يقول ليا تزوجي بيا ونعنقو ونتبواسو وداكشي لاخر... جاتني هضرتو صارمة بزاف ولاكن من نطاق المعقول ماقال حتى كلمة ديال العيب . كنت باغا نقبل ديك الساعة وفرحت .. سد الموضوع ومابغيتوش يسدو لاكن ميمنكش ليا نجبدو معاه وفنفس الوقت بغيت ندير العز راسي قلت ليه فيا النعاس غادي نطلع ننعس وطلعت شديت تيليفوني وسديت عليا كنفكر ونخمم .. بديت كندور لقيت الناس كيشكرو فواحد الكتاب ديال تحدي النفس ودخلت لقوقلةقلبت عليه طلع ليا بديت نقراه وماحدي كنقرا وانا كنكتاشف شي حوايج فيا وكنزيد نقرا .. بقيت شاداه ورقة تسيفطني لورقة حتى صبح الحال و لقيت راسي باقا كنقرا .. نعست واحد الساعتاين و فقت حيت خاصنا نرجعو بحالنا وكملت القرايا فطموبيل حدا زايد اللي سولني شنو كنقرا وخلاني مابغاش يقاطعني .
كملت الكتاب كله ولقيت رسالة فالاخير وضحات ليا الامور واكتشفت انه انا .. ماشي انا ... والاختيار الصح ماشي هوا اللي كيكون تحت التخذير وانا تحت مخدر الحب فماعنديش الحق مختار او نقرر لان عيوني مغمضة .. والانسان السليم المعافا من هاد التخذير يمكن ليه يقرر فحسانو ويختار حيت غيحسن الاختيار .. هاد الكتاب جاني فوقتو ركبو فيا واحد الخوف رهيب وخلاني نفكر مليون مرة فعرض زايد اللي كنت غادي نعكيه رأيي فالبلاصة .. صدقت كنفكر ونعاود .. خلاوني اسطر الكتاب ورسائله نفكر .. فواش هاد الشخص مناسب ليا .. مناسب لشخصيتي ومناسب لشيماء الحقيقية اللي ماشي هي هادي .. شيماء اللي غتفيق من بعد من هاد البنج المسيطر عليها .. واش هوا غيتفاهم مع شيماء المستقبلية ولا غادي يفشل هاد الزواج من بعد ما تتزوح شيماء المبنجة وتعيش وتوصل للمبتغا ديالها وتمل وتحل عينيها .. واش تقدر تكمل معاه كشخص وتصبر لشخصيته .. بعيدا على قوة الزين والكارزيما .. واش تقدر شيماء تتأقلم مع هاد الشخصية اللي هي شخصية قوية ... واش تقدر تتنازل .. ولا غادي ترفع حتى هي شخصيتهل ودخل معاه فصراع ما لا نهاية والاطفال حاضرين . مانفكرش فحبي انا ... منفكرش فشنو بغيت فقط ... نفكر فداكشي اللي بغيت واش مناسب ليا كشخصية حساسة ولالا .. فكرت مزيان ودوزت اسبوع كامل غير ديال التفكير لقيت انني منقدرش ... منقدرش نبكي حياتي كلها ونصبر .. تكفيني شخصية نص نص وانسان يبغيني ولاكن بالقياس باش ميدرش ليا حياتي عذاب بداك الحب .. يكفيني شخص نفرض معاه شخصيتي حتى انا ويتنازل شوية ونتنازل شوية ونكملو علاقتنا ونزيدو لقدام .. ماشي مهم نكون كنبغيه .. المهم نكون مرتاحة معاه ماشي مريضة بالشك والغيرة وكل حرف كنديروليه تأويل وديما خايفة يتقلق مني ولا من شي حاجة ماعاجباتوش .. ديما رادة البال لهادشي مع زايد .. عايشة فالخوف وهادشي حيت ماشي انا هي شيماء الحقيقية .. انا فقط اسيرة الحب وروبو كيتحكم فيا الحب ومشاعري وضعيفة . ومتأكدة انه غيجي نهار تموت فيه هاد الشخصية الوهمية مع الوقت والولف وتفيق شيماء اللي مكيهدها حتى واحد .. شيماء اللي فاش كتبغي توصل لشي حاجة كتوصل ليها .. شيماء اللي مكتخافش ومكيهدهاش ريح وكتقول اراسي ياراسي .. شيماء اللي قدرات تاخد تروة تقتل فسبيل شرفها وسبيل رغباتها . هادي هي انا الحقيقية واللي فتاقدت لراسي وبعدت عليه من نهار عرفت زايد .. واخا كنت عارفة غادي يوقع هادشي من اول يوم شفتو حيت هاداك هوا فراس احلامي .. لاكن جا الوقت نتخلا عليه ومنتخلاش على نفسي .. يا اما نضحي بيه والوقت كفيل بعلاج الجورح وعذاب الحب . او نتخلا على نفسي ونبقا اسيرة مدا الحياة او نخرب حياتي واولادي من بعد ما تفيق شيماء الحقيقية وتقلب الامور سفاها على علاها بدون ماترحم ويكونو الاطفال هم الضحايا
صعيب عليا هاد القرار ومارحمتش راسي فيه .. اصعب قرار ممكن ناخدو فحياتي كلها لاكن قدامي جوج طرقان واحد فيها النار فالاول والثاني فالاخير .. وفضلت النار اللي فالاول .. اللهم نتحرق ونوض من بعد ولا نعيش العسل ونفيق فاخر ايامي نتحرق . قررت نحط جاوبي على ورق وبدات النار تلتاهم فيا فور ما بديت نكتب كلماتي .. كان جزء فيا فخور بيا وبشنو كندير وكنعزز راسي والباقي كيتحرق بحال شي دفتار ديال الذكريات . حاولت نوصل ليه الرد فكلمات بساط وجمل قليلة .. وخير الكلام ما قل ودل .. بينت ليه انني ماكنتش كنفكر فهاد القرار لاكن لقيت هوا الانسب ليا .. حسب ما عشت ومادوزت والكواليس اللي ماشفتيش والحالات اللي مريت بيها خلاوني نعطي هاد النتيجة وبكل قوايا العقلية كنقول ليك باللي نتا ولد الناس .. وحتى انا بنت الناس .. لاكن طرقاننا مختالفين ومنقدرش نقبل عرض الزواج .. غتكون هاد الرسالة هي الاخيرة بيني وبينك وكنتمنا من موراها تعيش حياتك بلا ماتحاول تقرب ليا .. باش هاكا نقدر حتى انا نعيش حياتي ونبدا من جديد. وماتوقلش انني كنت كندوز الوقت .. لا ..كنت كنتسنا فهاد النهار بفارغ الصبر .. لاكن فاش جا جاب معاها هاد النتيجة ومقتانعة بيها .. كنشوف الفراق هوا الحل الانسب ليا وليك وكنتمتى فراقنا ميكونش بحال لقائنا الاول .. كنتمتى نبقا ذكرى زوينة دازت فحياتك واخا اللي مرينا منو صعيب وماشي ساهل يتنسا .. كنقول ليك بالتوفيق فحياتك العملية وفحياتك الشخصية وشكرا على كل لحضة عشتها معاك سواء كانت زوينة او خايبة حيت مادازت حتى خلات موراها دروس كثيرة علماتني كفاش نسير حياتي فالدنيا . شيماء.
طويت ديك الرسالة بقطرات من دموعي وخبيتها فصاكي باش نعطيها ليه .. دازت عليا الليلة كحلة لاطن تعودت نعيش هاد الكآبة والحزن .. لاكن الافضل ليا وليه .. حطيت على قلبي حجرة وفقت الصباح لبست حوايجي وماعنديش الكانة .. كنت دايرة معاه نتلاقاو لاكن ماراهش على علم بالرد ديالي .. بقيت نقاوم كأنيي فالبحر .. يد كتهز الرسالة ويد كتحطها وتشهيت نقطعها ونلوحها فالزبل ونمشي نعنقو وننلاسقو الى الابد .. لاكن هاد مجرد وهم والحقيقة صعيبة .. هزيت ورقة اخرى قطعتها بنفس الطريقة باش نبرد وخرجت تلاقيت معاه فالمقهى ديالنا وجلست وانا دايرة فبالي انها اخر جلسة ليا معاه .. حاولت منبقاش نشوف فيه بزاف باش منضعفش واخا كان كيهضر معايا عادي وكنشوف بعيني البنات حاطين عليه .. ومبرردة كنقول ليهم فخاطري نتوما حاطين عليه ماكرهتوش يعطيكم وقت .. وانا بيدي غادي نسمح فيه ونهي هاد العلاقة فمرة .. خليتو حتى ولف الجلسة ولاحض سكاتي وتغيير مزاجي وانا نجبد الورقة كانت مطوية مديتها ليه فوق الطبلة وقلت ليه هنا غادي يكون جوابي على موضوع الزواج .. ولاكن ماتحلوش حتى نمشي عفاك ..استغرب بغا يسولني علاياش كنهضر لاكن هزيت صاكي بهدوء وقفت .. لاحضت ملامح وجهه تبدلو وحس بشي حاجة وفتح الورقة كيقرا واستغليت الفرصة غاردت المكان خليتو ومشيت بالزربة حابسة الدمعة حتى خرجت من القهوة وبديت نتنخصص وحليت باب طموبيلتي وهزيت راسي لاخر مرة كان جالس لفوق والزاج فاصل بيني وبينو ..لقيت اخر نضرة عليه وعيني حومر كان حط الورقة قدامو وتكا على الكرسي اللور كيشوف فيها فسهوة عميقة .. دور وجهه بتتاقل جهة سيارتي لاكن بسرعة دورت وجههي وركبت خرجت الطموبيل وهزيت عيني شفت فيه كان داير فيا نضرة عميقة ماعرفتش كفاش نفسرها وشديت طريقي كنبكي .. البكا ماعندو مايدير ليا ... بكست من قبل حتى عييت وغنبقا نبكي حتى نشبع ومزال غنشوف الويل ونتعذب ونبات بلا نعاس .. لاكن كما كان الحال رجعت كبريائي هاد المرة اللي تداس ومرتاحة من هاد الجهة وحتى انوثتي رجعتها وكياني وكل شي فيا كان تكسر ووصلت بسبيه للموت رجعته وهادشي اللي ساعدني باش نزيد نصبر ونحاول نوقف على رجلي .. زرت الدكتورة ديالي حكيت ليها على كلشي طرا شجعاتني وعجبها الحال حيت انا قدرت ندير هادشي كله ماشي حيت تفارقت .. ولاكن حيت قوية ومكانتش منوقعة مني ندير هاد الخطوة كما انا ماكنتش متوقعاها من راسي .. لاكن على الاقل رافعة راسي هاد المرة ... ضعيفة من جهة الحب لاكن قوية كإمرأة حرة .. حسيت بشيماء رجعات من جديد وهاد المرة مكنتوهمش .. هاد المرة رجعت حييت ورجع ليا الغرور ديالي ورجعات شخصيتي اللي تستمتع بملذات الحياة كما كانت مشتاقة من قبل . ماجاني حتى اتصال ولا رسالة منو وكنت متوقعاها واصبح هادشي عادي بالنسبة ليا .. ماشي شي حاجة اللي غريبة .. بديت فقط كنحاول ننسا .. كنحاول نخرج من هاد الحالة ديال الاكتآب اللي انا فيها ونخرج راسي براسي .. دخلت لاصال وتعرفت على ناس جداد لاكن خليت العلاقة سطحية ... كان ضاروري شي واحد فحياتي يخرجني من هاد الجو اما بوحدي عايشة فالقوقعة ديالي صعيب نخرج منها .. لاصال كان كيجمع غير الناس النقيين وكان ثمنه غالي .. وانا مادخلتش باش نتريني .. وانما نبدل الجو ونتعرف على الناس ونمط العيش ديالهم وتعرفت على بشرى .. بشرى اربعينية عندها قصة مأثرة حكاتها ليا خلاتني ننسا قصتي ودعماتني قصتها باش نخرج من الحالة المزرية اللي انا فيها حيت شفتها هي كفاش عايشية ومهلية فراسها ابدا واش تعطيها اربعين سنة ... عاد هي تعرضات للنصب وحبيبها كلا ليها رزقها وخلاها كتخلص الكريديات فالبنكة وقبل منو تزوجات و زوجها طلع ماشي راجل وكانت كتبغيه بزاف واكتشفت الحقيقة ومرضات وطلقات وقبل متخرج من ازمة دخلات فوحدة اخرى وكانت ضحية النصب ديال واحد جنتلمان فالصورة دياله .. لاكن من بعد المعانات بدات من الزيرو ومكان عندها لا دار لا والو غير كارية و مديرة فشركة وكتخلص مزيان لاكن اللي مرات منو ماخلاها دير والو ومن بعد ماسالات الكريدي اللي هزات باش تعاون داك النصاب اللي هرب بيهم عاد بدات حياتها معطلة وخدات دار زوينة وطموبيل وبدات كتخرج مع صحابها ورجعات للحياة .. ماعاودتش ليها شنو طرا ليا اكتافيت بقصتها وخديت منها كل ماهوا اجابي وكنتسنى نوبتي حتى انا باش نحل عيني ونستنشق الحرية كما هي استنشقاتها من جديد .. عرفاتني على انس و سليم هادو كبار فالسن كل واحد ووضيفته وبعقلهم بعيدا على التبرهيش الخاوي اللي كنت فيه وكانو كيديرو الكولف فبوزنيقة كانو دائما كيديوني معاهم باش نبدل الجو وكيعرضو عليا وكنخرج على الله وعسى نحيا من جديد
الوقت غادي وحياتي شاغلاها باش منفكرش فزايد او حتى نطق سميتو على فمي .. شغلت راسي اكثر من القياس حتى مابقيتش كنخلي لراسي فرصة نفكر فيها الا بالليل فاش كنحط راسي على المخدة كيرجع معايا الحنين وكنبكي .. عاونني باش ننساه حتى هوا وماعاودش سول فيا وكان هادشي مهم ليا بزاف وفادني .. صافي خرجت الذكريات من تيليفوني والبلايص اللي عارفاهم كيكون فيهم مابقيتش كنمشي ليهم .. دازت عليا ايام صعبة بزااف فالاول كنت كنهار ونشرب الدوا .. لاكن مع الوقت ولات عندي رغبة قوية باش نتفاداه .. مابقاش عندي الجهد نقلب عليه .. او نمشي لمكان هوا كيجلس فيه .. وليت انا كنتهرب باش منقابلوش وندير مجهود حيت فعلا الجهد تقادا وفشلت وصحتي تهدات فهاد الطريق .
داز عام ونص والحمد اخيرا رجعت لحياتي الطبيعية ... رجعات شيماء اللي كانت من قبل كتعشق الحياة .. واخا بقاو ذكرايات فبالي وكيجيني لبالي مرة مرة لاكن مكنتجرحش.. عادي ورجعت كنبتاسم فاش كنتفكر شي ذكرى او شي حاجة قديمة ونقول ايام دازت كانت مضلمة بزاف وكنت عايشة فداك الضلام ومرتاحة .. شحال من بنت كنعرفها كانت كتحب بجنون وفاش كتنسا كيرجع يبان ليها صاحبها كي الجفاف حيت كانت معمية.. لاكن انا لا ... شفت زايد كراجل حقيقي .. وشخصية صعيبة لاي وحدة تصبر عليها .. وانا متقبلة الوضع حاليا ورجعت كنفكر ليه هوا مع وحدة اخرى ونقول صعيب بزاف يكمل مع شي وحدة .. وصعيب على اي وحدة دير الخطوة اللي درت انا . وليت كنقول على الله يتبدل وميعدبش معاه هاد بنت الناس اللي غتعيش معاه .. على الله
تنهدت حيت رجعات بيا الذاكرة للور وتفكرت الماضي ومكنتماش نرجع لداك الماضي ابدا ولا ديك الضلومات اللي كنت عايشة فيها .. رجعت كنلبس احسن لباس .. كنمشي لاحسن بلايص .. كناكل تحسن حاجة .. بدلت الدار وشريت فأحسن موقع فيلا زوينة كما كنت كنتمى .. فتحت بارا وحدا اخرى بنفس الحجم وناجحة فالبزنس ديالي ومكملة فيه الحمد لله . بديت حياة اخرى .. حياة زوينة وبقات ذكرى زايد مرسخة عندي ميمكنش تمسح حيت حبيت من قلبي .. حبيت وصعيب ننسا اللي بغيت .. لاكن قادرة نعيش بلت معانات وبكل اريحية .. وزايد خلا طابع زوين .. مابلغش عليا وبفضلو انا عايشة احسن عيشة . عرفاتني بشرى على شاب الماني ماشي مغريبي .. عندو حقو من الزين وحروفو غربية وضريف ... خرجت معاه الخرجة الاولى عرفت راسي غنتفاهم معاه حيت كيعطيني الحق نعبر ونختار .. وحتى انا مابقيتش ديك الشخصية العبيطة .. بلعكس قوية كنفرض عليه الوجود ديالي وكيحسسني انني ملكة فوق هاد الارض ومكيبغيش يخسر ليا خاطري وهادشي اللي كنت باغا .. باغا واحد نعيش معاه مرتاحة ومن بعد يجي الحب .. و فيوغي كيفهمني وكنحس بالاعجاب من جيهته وكنلقا راحتي معاه وحاسة انه تقدر تكون بيناتنا شي حاجة حيت هوا الشخص المناسب ليا وعقليتو تفاهمات مع عقليتي واهم حاجة انه عندو رغبة يسلم من بعد ما نبهته لهاد النقطة وشرطتها عليه
لقيت راسو انه مايصلاح ليا غير كاوري وضربت على المغريبي اللي بحالي بحاله بصفة نهائية ...كنتحاور انا وفيوغي بالفرونسي شوية لاكن كنتفاهمو هادي اهم حاجة ... عجبني الحال وشفت ان الحياة الزوجية خصها العقل يخطط ليها .. وانا لقيت الانسان اللي نكمل معاه والعقلية مختالفة.. الصرامة والعناد ماصالحينش ليا حيت المسألة ماشي مسألة يوم او شهر .. بل حياة كلها لابد يجي النهار فين نكره ديك الشخصية اللي كنت باغا .
اتصالي بفيوغي مستمر وحسيت بيه تعلق بيا وكيبغيني فعلا .. فاش كيكونو عينيك محلولين كتعرفي شكون كيبغيك بصح من اللي كيضحك عليك وفيوغي تبان عليه مثيم .. وانا طبعا ماتعرفتش عليه باش نشرشمو ولا نقمعو حيت كيبغيني .. لا.. ولكن باش نكمل حياتي مع اللي باغيني وندير وليداتي حتى انا وهادشي تافقت عليه انا وفيوغي وتافقنا باش يجي نديرو خطبة .. ماوصلت لهاد النقطة حتى تأكدت انني غنعيش معاه حرة وعقليتو غربية غنتزوجو وغنبقا عادي بحال الى مامزوجاش مغيحرمش عليا صحابي والخروج وداكشي اللي كنبغي .. يكفي نكون انا وياه بجوج هادا هوا الاهم .
وجدت لاستقبال فيوغي حيت غيجي يطلبني من دارنا وعلمتهم وقلت لبابا انه غيسلم ومستعد عن اقتناع .. هادي حسنة ناخدها فيه وندخلو ديني وفرحانة بيها .. بدينا التوجاد وجا هوا وعائلته ووصيتو باش يلسبو مستور على قبل بابا حيت هما عندهم عادي تجي مو بالميني ولا ختو .. جهزت نهار خطوبتي ودرتها كبيرة عرضت فيها على كاع حبابي وصحابي وركب ليا الخاتم وشربنا الحليب والتمر وداز النهار زوين كلشي كيقول ليا تواتيتو مع بعضياتكم حيت بجوجنا زعرين وجينا مع بعضياتنا .. ماماه عجبها الحال وختو تفاهمات مع ختي ودازت الخطبة كما كنت باغا فالفيلا وبديت كندرس حياتي انا وفيوغي بالقاعدة .. كيسمع ليا وكنسمع ليه ومابغيناش نطولو الخطبة حيت مكاين لاش .. عطينا لراسنا مهلة نجمعو فيها وريقاتنا انا وياه ونتزوجو ويجي هوا يدير لبروجي ديالو هنا ونعيشو انا وياه هنا حدا البزنس ديالي ونبنيو حياتنا هنا حيت البروجي دياله يقدر يدرو فأي بلاصة ويصدر ماعندوش اشكال فهاد النقطة وهنا غيتقدام عليه بثمن اقل وينجح ليه اكثر
بديت نجمع الاوراق تقول غنمشي لكوكب اخر .. طلع وهبط وهبط وطلع يكرهوك فالزواج من اجنبي ومايجي منو .. كانت خاصاني واحد الورقة من الكوميسارية وقلت لبابا يمشي هوا يجيبها باش مانصطادمش بزايد ومشا ورجع قالي خاص المعنية بالامر هي اللي تمشي وماحملتش نمشي لتما ... كان فيوغي رجع لألمانيا يوجد وراقه وانا فقت واحد الصباح كان عندي خاص غير بالاوراق من بلاصة لبلاصة وسبقت الكوميسارية هي اللولة .. ومشيت لابسة كلاص بحال ديما حيت فهاد البلاد كيهمهم المضاهر وهادي حاجة معروفة . طلقت شعري وتريحت ومشيت حتى للباب وبقيت فطموبيل تاصلت بفدوى هي عارفة شنو كاين وفين وصلت وحضرات للخطبة ديالي .. قلت ليها هاشنو بغيت ها شنو خاصني قالت ليا اجي عندي للبيرو انا اللي كنصايب دوك الاوراق هنا ومشيت طلعت بالزربة حاذرة راسي حتى للبيرو عندها ودخلت جلست بلا منهضر على حتى واحد من غير شغلي اللي جيت عليه .. قالت ليا باللي غادي يسولوك شوية على شكون هادا اللي غتزوجي بيه وشنو كيدير وفين خدام مهم ماتخلعيش .. قلت ليها واش زايد نيت اللي غيسولني قالت ليا لا ماشي هوا هوا بعيد على هادشي .. غيسولوك البوليس عادي وناضت معايا هازة دوك الاوراق فيدها قالت ليا اجي معايا ومشينا دخلنا لواحد البيرو فالجهة ديال زايد ودخلنا لقيناه هوا نيت تما كيقرا واحد المحضر واقف والبوليسي لاخر جالس فالبيرو .. غير شفتهم حشمت ورجعت خرجت وحتى فدوى تصدمات وكانت ديجا دخلات عطات لداك البوليسي الاوراق كيقراهم قاليها واش زواج باجنبي وقالت ليه اه هاهي برا ندلها وانا كنسمع حتى خرجات عندي قالت ليا دخلني .. غرقت فحوايجي .. عام ونص ماشفتو وجيت دابا باش نتلاقا بيه مشكيلة .. دخلت وحسيت بالارتباك حسيت بقلبي ضرب وقالي البوليسي تفضلي .. هبطت عيني وكان زايد حدايا .. باقي كما هوا نفس الوقفة والشخصية والهبة ومتكي على صبعانو كيشوف فداك الملف .. قبل منجلس عز عينو فيا بعفوية وكان غيرجع يشوف فالملف وعاود حل عينيه فيا حسيت بيه تصدم وداك البوليسي كيسولني قالي هاد السيد اللي غتزوجي نتي وياه اشمن بلاد
قبل مانجاوب سد زايد داك الملف قاليه من بعد نشوفو هادشي الله يعاون وخرج بقيت جالسة دخت قدام داك البوليسي اللي كيسول .. مابغيتش نتصادف معاه ولا نشوفو وخصوصا فهاد الوقت اللي انا كنجمع فيه اوراقي باش ندير داري واولادي .. كانو اسئلة بسيطة جاوبت عليهم وهما دايرين خدمتهم ورد الاوراق لفدوى خرجت انا رجعنا للبيرو عطاتني كاس ديال الماء شربتو قلت ليها مانويييتهاش ... مابغيتش كاع يشوفني ولا نشوفو ووقع العكس .. قالت ليا دابا صافي اصلا عادي ياك نسيتيه صافي .. بقيت كنسوط رتاحيت من ديك الصدمة وقالت ليا باقي خاصك تخرجي شي اوراق اخرين جيبيهم قالتهم ليا وخرجت شفت يمين يسار مالقيت حتى واحد يصدمني ومشيت بالزربة هبطت كنجري طلعت فطموبيلتي وخرجت من تما
كنت غادية فالطريق حتى عيطات ليا فدوى قالت ليا راه مشيت عندو للبيرو باش نعطيه واحد التقرير من مور ما مشيتي لقيتو جالس شاد راسو ومحني على واحد الكاس فيه دوليبران كتشكش وشاف فيا قالي شنو كاين ؟ عطي داك الدوسي لفلان واش غير انا اللي هنا . قلت ليه راه نتا خاصك وخاصك قالي من بعد مامساليش دايا وخرجت خليتو ومن مورايا غير بشوية خرج ماعاودش رجع .. بقيت ساكتة وقلت ليها شغلو هاداك مابغيت نسمع عليه حتى اخبار وقطعت معاها كملت طريقي حيت انا دابا وحدة مخطوبة وقريبة نتزوج ماخصنيش كاع نفكر فيه .. كملت طريقي لخدمتي وعندي بزاف ديال الاشغال مابقيت صاحبة مشروع واحد ولاو عندي جوج مشاريع كبار كنسيرهم انا وخاصني وثف عليهم .. لاكن مهما نتهرب ونكر رأية زايد اثرات عليا نوعا ما خلاتني نحن وخلاتني نفكر فيهم اليوم كله . وجدت الاوراق اللي طلبات فدوى ومشيت باش نديهم ومع الدخلة تصادفت معاه فالباب خارج داز حدايا بديك الكاسكيطة وداك الستيل ديالو وانا نهبط راسي كنحك ودني قلت ليه السلام .. قالي عليكم السلام وكل واحد مشا بحالو بحال الغرباء .. بحال الى عمرنا تصادفنا ولا هضرنا ولا تعارفنا وبقا فيا الحال اللي ماهضرناش واخا نسولو غير على احوال بعضياتنا ماشي هاكا تقول ماعمرو شافني .. وكنت باغا نوقف معاه ونهضر معاه عادي حيت ماشي كرهته .. انا فقط رجعت حياتي وصحتي ونفسي اللي ضاعو مني وتعالجت من داك الحب المريض او كما كنسميه انا السرطان . لاكن مللي ماوقفش حتى انا ماوقفتش ودخلت عنظ فدوى سلمت عليها وجلست عطيتها الاوراق .. هضرة كتجيب هضرة وكتهضر ليا على زايد بزاف حسيت بيها مابغاتناش نتفارقو وماكرهتاش نرجعو لاكن تمشي الرياح بما لا تشتهي السفن .. قالت ليا باللي صاحبتو اللولة ليهودية رجعات وكتودد ليه وعيطات لمو كتسول فيها لاكن قال لمو نساي شي حاجة كانت بيني وبينها ومكاينش معاها مستقبل غير هني راسك . وقالتها لماما وهي فرحانة حيت خافت ترجع دور بيه ولاكن فاش قاليها ديك الهضرة ارتاحت
ماسولتش اكثر .. عير فدوى كتهضر وصافي عرفتها علاياش كدور وشنو باغا مني لاكن مافتحتش ليها داك الباب وماطرحت عليها حتى سؤال.. حدها قالت ليا غادي يوجدو ليك الاوراق نعيط ليك وصافي نضت خرجت بحالي سرحت عيني وطلعت مشيت لشغالي .. ايامي ولات واضحة وفيوغي كل مرة يسولني فين وصلت فداكشي اللي واقفة عليه .. هوا وجد وراقه ومزالة انا باش نجمعو الاوراق نبداو فطلع وهبط وحدا اخرى . عييت تسخست كرهت الاوارق ومايجي منهم .. عيطات ليا فدوى باش نمشي للكوميسارية عاوتاني سخسخاتني تسخسيخة ديال الكلاب .. لقيت باللي ورقة اخرى خاصة ومللي جلست وهي زايد زايد زايد زايد حتى قلت ليها عفاك ماتبقايش تجبديه ليا .. انا غير نسالي هاد الحريرة نبدل شهادة السكنة على ديك الكميسارية اللي حدايا لهيه . بقات كضحك وشحال فيها ديالةالضحك .. جات مع وقت خروجها نيشان ونزلنا خرجنا باش نشربو انا وياها شي قهوة وفاش خرجنا كان زايد برا كيكمي وهي خاشية يدها فيدي عاد بان ليها تهضر معاه وتسولو على الخدمة وجراتني معاها بزز وقفاتني قدامو .. مشافش فيا وبقيت كنبرق فعيني تحرجت .. اما هي قالت ليا تسنايني هنا نمشي نجيب شي حاجة من البيرو نسيتها ومشات خلاتني واقفة وابتسمت ليه كنحك فودني قلت ليه سلام زايد لباس عليك
رد عليا باشارة من راسو قالي الحمد لله .. الله يكمل بلخير
بلعت ريقي قلت ليه امينالعقبة ليك حتىى نتا
قالي وهوا كيمي ويشوف فجهة اخرى .. امين شكرا اختي
ختي هه!... من حقك ولاكن تصدمت فاش قالي ختي .. واخا دازت عام ونص وحسيت براسي تبدلت على كيف كنت .. حسيت براسي ترزنت وماشي شيماء اللي كانت من قبل هي ديال دابا .. واخا مزال كنحس بشي نغزات من جهته بحال الجرح فاش كيبرا منبداو نقشرو فيه ونحفرو هاكاك حسيت . لاكن ابتسمت وسولتو من باب الصواب على ماماه و عمو ومرات عمو والناس اللي عرفت فطريقه .. اكتفا يحرك ليا راسو بالايجاب فقط وكيبخ الدخان وسكت وبقيت ساكتة كنتسنا فدوى اللي مشات وجلسات متبعاتش كاع تبان .. واحد الشوية قالي علاش مابدلتيش شهادة السكنة مزال دايرة القديمة . قلت ليه ماعنديش الوقت دابا كنصاوب الوراق اللي خاصني على شهادة السكنة ديال دارنا
قالي مزيان الله يعاون . قلت ليه كي داير مع الخدمة قالي السربيس هوا السربيس عمرو يتبدل . كيهضر وكاره الخدمة وبحال الى عايش فالملل قلت ليه نفس الخدمة كتسخف قالي كحل الراس اللي كيسخف اما الخدمة مادرات والو . بقيت ساكتة شوية وقلت ليه كحل الراس هوا هادا .. شخبار ماماك لاباس عليها . قالي الحمد لله .. واقف حدايا ومكيشوفش جيهتي وهضرة تجبد هضرة فحوار عادي ختى قلت ليه الانسان ماحدو كيكبر وهوا كيدير عقلو . ضحك بسخرية وقالي الانسان ماحدو كيكبر وهوا كيهتر وكيسحابو كيديروعقلو .. ماعرفتش علامن كيهضر واش عليا .. قلت ليه لا بلعكس كيدير عقلو .. قالي كيبان ليك ..يالاه نخليك تهلاي فراسك . شار ليا بصبعانو حدا راسو من بعد ما كمل داك الكارو ومشا ركب فطموبيلتو داز من حدايا ومشا وطلعت حتى انا فطموبيلتي كنتسنا فدوى ونصوني ليها عاد هبطات وتعصبت عليها قلت ليها راني عايقة بيك عارفاك شنو بغيتي توصلي وماغادي تستافدي والو
مشيت انا فدوى نشربو قهوى وندماتني .. انا مابغاش نسمع سميتو وهي كتهضر ليا عليه قلت ليها الى بقيتي هاكا غير غتكرهني فيه وهي تسكت شربنا داك الكاس دالقطران وقلت ليها الى غتبقاي تدي وتجيبي فيا للكوميسارية على قبل زايد باش نتلاقاه غادي تخسر علاقتنا انا وياك .. فاش يوجدو الاوراق جيبيهم معاك انا مغاديش نبقا نرجع للكوميسارية وسديت الموضوع ورجعت لحياتي الطبيعية .. ديك العشية تناقشت انا وفيوغي وكنت على سبة طالع ليا الدم بقينا ومني منك قلت ليه بناقص من هاد الزواج .. كان موضوع بسيط مايحتاجش ديك العصبية لاكن انا اصلا كنت معصبة فلحضة غضب قلت ليه ديك الهضرة وماكنتش كنقصد بيها نتفارقو زعما فخطرة. طفيت تيليفون وماطليتش عليه بمرة وفاش شعلتو لقيت شي سطوريات فالواتساب ديال فيوغي .. بغا يفقصني بيهم زعما باش نغير ولا مانعرف اش قاليه راسو وكنت ناوية نهضر معاه نقول ليه راه فلحضة غضب قلت ليك ديك الهضرة لاكن تعصبت فاش شفت واحد السطوري مع صحابو ومعاهم وحدة كانت معاه وقل ليه من قبل بعد منها مكاين لا امي لا زمر.. ولاكن هوا بلعاني جالس حداها وكيصور .. اللي شافو كبير بعقلو وبرهوش فمخو مافهمتش هاد الفعايل ديال الزبل زادوني عصبوني وانا نتعصب بصح وبلوكيتو ومابغاتش تسرط ليا .. يالاه سبب تافه وصلنا لهادشي وانا كنجمع فالاوراق ونتسخسخ . شافني بلوكيتو وعيط ليا كيهضر معايا زعما وفاش قلت ليه علىسطوريات قالي غير بغيت نعصب ... كنت معصبة وزاد عصبني بهاد الهضرة وقلت ليه اها نتا هاكا ديال نخليها تغير عليا وداك الخرا كامل .. ايوا جنيتي على راسك دابا وا شد مايفقصك . قلت ليه سالينا .. داك التبرهيش حنا عندنا فالمغرب كنديروه فسطاش لعام ماشي فاش كنجيو نتزوجو .. كمل الباقي اللي خاص حساب ليه غادي يشفع ليه وقالي انا غنخلي ديني على ودك ونسلم على ودك !! لا صافي جا يكحلها عماها .. اذا الى دابزنا يرجع لدينو وها المعقول بدا يبان .. ومزيان اللي تناقشنا حست عمرنا تناقشنا وقلت ليه عرفتي شنو ... كنت ندوز ليك اي حاجة الا تقول ليا نسلم على ودك وانا كنت كنحسابك مقتانع مي دابا لا صافي ماتصلاح ليا مانصلاح ليك انا غادي نحبس هنا وسديت عليه بلوكيتو حتى عيط ليا بابا قالي راه عيط ليه كيقول ليه تخاصمنا وانا نقول لبابا شنو وقع وقالي لا صافي الله يعاونو وسديت عليه كاع الجهات .. مابقاش فيا الحال وحتى الخاتم خليتو فصبعي عادي مزينة بيه .. اما قبل كنعقل فاش كنا تخاصمنا انا وزايد كان داك الخاتم ديالو كيضرني ماقدرتش نخليه فصبعي ونشوف فيه . مي دايا عادي واخا بقا فيا الحال على هادشي اللي وقع والخطبة والروينة كلها لاكن ماشي مشكل ماكتابش وسديت الموضوع عادي جدا قلت دابا غادي نركز على البزنس ديالي حيت والو الزهر مع الرجال .. مابقاتش فالزين بقات فالزهر .. كيتبعوك عشرين باغيين الدار وعشرين باغيين تعاونيهم على المستقبل وواحد مزنزن بحال فيوغي باغي يتزوج وكيدير الفعايل .. اما اللي نيت رجال وديال الصح ماع مكيتبعو هادوك ولا يحسسوك حتى واش كاينة
ديك الليلة اللي فضيت فيها مع فيوغي طرات واحد الفاجعة هزات المدينة كلها .. تخطف واحد الولد صغير من باب دارهم وغبر ودارت ضجة فجميع مواقع التواصل الاجتماعي .. كلشي كيهضر عليه والصحافة خرجات وعائلته غتسطا والناس تعاطفو معاه . عيطت لفدوى مكتجاوبنيش نهضر معاها على هاد الاختطاف .. صونيت حتى عييت عاد جاوباتني قالت ليا الدنيا مقلوبة عندهم وجاهم امر من لفوق ناضو تحركو حيت القضية وصلات للرأي العام وعطاوهم وقت وجيز يلقاو فيه الولد والمختطفين وماعندهمش الوقت ومكينعسوش لا بالليل لا بالنهار خدامين فالتحقيق والتحريات ربعة وعشرين ساعة على ربعة وعشرين .. بقينا كنهضرو على هاد الموضوع وبقا فيا داك الدري وقلت ليها لغي داك الاوراق مابقا زواج ولا زمر صافي حبسي داكشي وجيبيهم ليا مللي دوز هاد الفاجعة وقطعت معاها كملت حياتي عادي ومشيت لاصال ورجعت لصحابي .. بشرى كتحاول تقنعي نرجع مع فيوغي وسديت ليها الموضوع فمرة ومبرزطها كل شوية يعيط ليها لاكن جمعت وطويت معاها وجلسنا كنهضرو على داك الوليد مسكين اللي خطفوه بقا فينا قداش وأزمنا وبقينا ندعيو على الله يلقاوه .. دازت واحد الثلات ايام و فين ما ندخل تيليفون طلع ليا صورة داك الولد حتى لواحد اللحضة بداو كيطلعو ليا احداث جديدة عليه والناس كيقولو لقاوه والتصاور كيطلعو .. شفت واحد الصورة مخرجينو من واحد الكراج كيخلع هوا وجوج ولاد صغار اخرين تخلعت .. هادي مافيا ماشي انسان عادي .. وصلتي مسج فالواتساب من عند بشرى قالت ليا لقاو داك الولد مسكين واش شفتي الفيديو اللحضة اللي شدوهم .قلت ليها لا وسيفطاتو ليا دخلت ليه بان ليا التصوير من شي بلاصة عالية مخبعة بين الحديد وبعيدة ودايرين الزوم .. هادا شي واحد من الناس كان كيصور من دارو ديك المداهمة ديال داك الديبو اللي جا عاطي وجهه لواحد تيرا خاوية كتخلع .. بان ليا الامن كيحوم جهة داك الديبو ودخلو شي وحدين سيفيل وشي وحدين باللباس الرسمي هاجمو الكراج لاكن هرب ليهم واحد من ديك المافيا فيدو السلاح وجار داك الوليد الصغير كيهددهم يبعدو . فديك اللحضة تخطفت بان ليا واحد جاه من الجنب بشوية كان داير كاسكيطة كحلة ولابس تيشورط ودجين غفلو طواه والسيد اللي كيصور كيزومي مزيان ويقول برافو برافو .. بانت ليا ديك الفورمة بحال ديال زايد وفاش قرب اكثر بان ليا وجهه وحطيت يدي على فمي حسيت بواحد الفخر ماعرفتش علاش ... واكثر من هادشي هرب الدري والشرطة منيشة عليه بالفردي باش يحط السلاح وكان زايد دخل معاه فديك المعمعة اللي دازت فرمشت عين بحركة احترافية جر الولد مشا كيجري ودخل فصراع مع هادك مكاملش دقيقة ضربو هزو فالسما بواحد النص تا طار وطاح عليه وشدوه مينطوه . انا كنتفرج وهي تكنب ليا بشرى مسج قالت ليا شوفي هاداك اللي هزو فالسما واش شفتيه
قلت ليها شفتو مالي عورة .. بقيت كنضحك عجبني الحال ودخلت لمواقع كنتفرج حيدو غير ديك اللقطة ديال زايد اللي جر فيها الولد وضرب داك مسخوط الواليدين وجلسو ينشرو فيها مكاينش الصفحة اللي مانشراش داك المقطع واراك للتحرش .. وجهه مكانش باين مزيان لاكن فورمتو كانت واضحة تزعطو فيها وماهي غير شي ساعات حتى لاحو واحد تصويرة ديالو واضحة واقف جنب لابس قميجة بيضاء والشعر كيبري كيشوف فتيليفون .. صورة جاتو واعرة بدات كطلع وتهبط وتبارطاجا حتى وصلاتني عاوتاني من عند بشرى قالت ليا شوفي هاداك اللي عتق الولد هاهوا . طلعت ليا في وخليتها براكة التحرش اللي كيتحرشو بيه الصحفات وحدة قالت ليهم قولو لهادا ضاروري يجي يعتقني راني من اللي شفتو وانا خاطفة راسي فالبيت . وحدة اخرى كاتبة .. هاد الشهر برعاية مول الكاسكيطة ... وخدة اخرى قالت ليهم كاع البنات ولاو باغينو بوليسي .. الحاصول شبع تحرش ضاروري مغيكون كيوصلو داكشي .. بديت طالعة نازلة كنقرا التعاليق فالصفحات حتى لقيت وحدة كاتبة بالفرونسي خويا البطل ربي يحفضك من عينين الناس . داك التعليق جمع عرام ديال ليجيم والتعاليق كيسولوها واش خوك اختي . واش بصح .. وكيشكرو فيه حتى مولات الصفحة قالت ليها تبارك الله عليه اختي واش مزوج
الله اش دخول الصحة وحاطين ليها على داك السؤال 500 لايك باش تجاوبها خنو لاكن ماجاوبات حتى واحد حتى قالت ليهم وحدة راه طايح مع شي بنت ثلات سنين كيتفارقو ويعاودو يرجعو ومفارقين دابا ولاكن دابا يرجعو هادا هوا حالهم . ملي جيت نشوف شكون هاد فاعلة خير كنلقاها فدوى وسكرنيت التعليق وسيفطتو ليها قلت ليها تبارك الله على فدوى حساب ليك ماعرفتكش . بقات كضحك قالت ليا مالي اختي كدبت ... فراسك راه عطاوه شهادة تقديرية على داك العمل البطولي والى تعاود بحال هادا مرة اخرى و تسجلات ليه الاصابة غياخد عليها وسام قلت .ليها يستاهل .. قالت ليا راه كيحتارمو اللي بحال هادو كيسبقوهم هما اللولين فكلشي حيت الامن محتاج بحال هاد النوع قلت ليها تبارك الله عندنا فالبلاد بحالو الله يخليهم لينا .. قالت ليا ايوا هي لا جمعتي نوضة راه تشهر دابا كولشي رجع كيعرفو .. دابا تجرو ليك شي وحدة . ماجاوبتها وبقيت غير كنقرا طالعة نازلة كنقرا اراء الناس .. بعض المشاهير حاطين داك المقطع فالسطوريات كاتبين ليه برافو هاد السيد يستاهل وسام ماشي اللي كتعطي قزيبتها تشطح وتغني كتسنى تحضى بالاحترام .
طيبوني ديك التصويرة غير كدور ميكون غير شي واحد فصحابو اللي لاحها ويقدر مايعجبوش الحال .
خليت امري لله عيت مابغيتش نفكر بزاف والحنين كيجرني ليه وانا كنتهرب .. خرجت مع انس وسليم وبشرى باش نبدلو الجو صدقو جابدين ليا الموضوع قالك هادوك عصابة كيخطفو الدراري الصغار وفرتكوهم دابا وعتقو دوك الوليدات .. قاليهم انس ولاكن شفتو داك خيينا اللي داير بوم .. واعر الحق يتقال ماعندك ماتسالو .. باش دير داك الشي اللي دار داك خونا خاصك تكون واعر ومكتخافش تموت .
هما كيهضرو وانا ساكتة طعنوني كنتسناهم يبدلو الموضوع والو ونضت قلت ليهم غنمشي للحمام وخرجت لواحد الجردة وقفت ساهية...ماحسيتش براسي حتى هزيت تيليفون وكتبت نمرتو .. باقا على طرف لساني ولاكن ماعرفتش واش تكون مزالو عندو ولا بدلها .. دوزتها وهي تصوني بقيت كنتسنا يرد وقلبي كيضرب وجاوبني .. الطريقة باش جاوبني عرفتو عرفني ماسول شكون ولا والو .. قلت ليه لباس عليك كي بقيتو من مور ديك الفاجعة .. قالي الحمد لله شكرا .. قلت ليه تبارك الله عليك شرفتي بالامن وبالبلاد .. قالي شكرا وبقيت ساكتة ماعرفتش باش نجاوبو وشنو نقوليه ... قلت ليه يمكن راك مشغول بلا منشدك .. تهلا فراسك ... والى عندك شي وقت بغيت نهضر معاك .. هادا في حالة ما عيطتي وكنتي باغي .
قالي تهلاي فراسك نشاء الله وقطع
جمعت النفس وطلقتو ماعرفتش .. لقيت راسي كنقول ليه هاكا ... وشنو غنقول ليه اصلا .. ولاكن مكنضنش يعيط ليا غير هضرت وصافي وحسيت بيه ماعندوش رغبة يهضر معايا .. ماشي مشكل من حقو واخا غيبقا فيا الحال بزاف الى ماصوناش .. ومغاديش نصوني ليه طبعا مرة اخرى .
رجعت للخدمة والروتين ... بديت كنراقب تيليفون مرة مرة نشوف واش صونا حتى دازت اربع ايام وقلت صافي ماغاديش يعيط حتى تفاجأت باتصال ديالو غير فيبا وقطع .. وقفت ابتسمت وعاود رجعت جلست قلت يمكن غلط فالنمرة ... لاكن تعاود الاتصال وبديت كنضحك بوحدي .. مادام اتصال كما قلت ليه الا وحتى هوا كيفكر فشي حاجة .. فتحت الخط رديت عليه قلت ليه كي داير لاباس عليك .. قالي ببرودة الحمد ونتي ... قلت مزيان ... الى عندك وقت نقدرو نجلسو ونهضرو .. تنهد وقالي لعشية فالكافي فلان فلانية وقلت ليه اوكي وقطعت معاه .. سمحت فالخدمة ومشيت للصالون عاودت كلشي من الاول ورجعت للدار بدلت حوايجي لبست دجين وطالون وقميجة كيجيوني زوينين وتريحت وماكيت وهزيت صاكي مشيت للكافي كنقرقب وشعري بوكلي منفوخ لقيتو جالس عاطي وجهه للزاج لاكن ماعيط ما حتى حاجة .. مشيت سلمت عليه من يدي وجلست قدامو حشمانة ماعرفتش شنو غادي يطرا ... دور لكرسي لجيهتي وجا النادل طلبت قهوة نكمد بيها وبقيت ساكتة وهوا كيسوف جهة الزاج .. عم الصمت كيتسناني نهضر حتى وقفو علينا واحد جوج بنات زعما كبارات ماشي صغار وقالت ليه وحدة سلام .. بوليسي ديال قضية الاختطاف ياك
شاف فيها مستغرب وانا معلقة عيني فيهم غير كنشوف وقالت ليه الصراحة تبارك الله عليه عمل بطولي ما عمل بطولي بقات كتشكر فيه قالي ليها شكرا وانا مربعة يدي كنشوف وكيشوفو فيا .. قالت ليه واخا ناخد معاك صورة الى كان ممكن .. بحال الى انا مكايناش ماقالت ليا حتى سمحي لينا .. لاكن زمطها قاليها سمحي ليا اختي مكنتصورش . تصدمات وانا نقلب وجههي وقالت ليه زعما علاش واش غيشكل ليك مشكل .. قاليها بالادب انا ماشي فنان ولا عندي فانز .. ماكنتصورش عادي توسابلومو
ابتسمت وقالت ليه سمح ليا وانا نستغل الفرصة بالضحك قلت ليه وانا تقدر تصور معايا وهزيت تيليفون بلعاني نشوف شنو نقول وكحزت جيهته كنضحك خديت صورة واخا مشافش فيها وبقا مستغرب مافهم والو لاكن جبتها من باب الضحك باش نفتح معاه الموضوع
كانت مجرد تجربة باش معرف واش يخليني نصور ولا حاسبني برانية ويقول ليا .. وحتى الى قال ليا عادي مكاين حتى مشكل غادي نهضر معاه بطريقة اخرى .. لاكن فاش سكت وخديت صورة عرفت باللي انا ماشي اي بنت عادية وغنعرف كفاش نتواصل معاه .
سديت تيليفون واشف فيا ببرود واستغراب قالي لشنو باغا توصلي ؟؟ جيني من اللخر بلا هاد الحموضة
دورت وجههي وقلت ليه : حموضة هه... انا غنجيك من اللخر ازايد .. انا ونتا مادوزناش قليل عارفها .. ويمكن باقي عندك تساؤلات باغي تعرف شي جوايج
شاف فيا بجدية وقال : ماعندي حتى حاجة وماباغي نعرف عليك حتى حاجة ... الى جيتي كتقلبي على خلا دار بوك مرحبا ..
رديت عليه : ماجيتش كنقلب على الصدع ..
قاطعني: وعلاش جايا وعلاش باغا تهضري طلقي دغيا ماعنديش ليك الوقت
تجرأت وقلت ليه : عارفة درت معاك غلط كبير ...
قاطعني: درتي معايا غلط مادرتيش انا اصلا مابقيتش عاقل ..
رديت بصرامة : خليني نهضر بلا ماتقاطعني ... ماجيتش ندابز جيت نوضح شي حوايج .. عجبك الحال داكشي اللي بغيت ماعجبكش الحاا نتا حر ختار لي يناسبك
رجع اللور دار يدو على فمو وقال : واخا هضري اري ما عندك نشوفو اشنو باغا توضحي ولا متوضحيش
ماعجباتني طريقته فالهضرة وجمعت طاقتي وصبري وقلت ليه هادشي هوا اللي خلاني نختار نمشي بحالي عرفتيه دابا ؟ ... هاد الطريقة ديالك فالحوار هي اللي خلاتني نفكر الف مرة قبل مانقبل نتزوج بيك
انا كنهضر وهوا قالب وجهه كيضحك بسخرية وقالي عاااد دابا عاد جايا كتفتي عليا الزابور ديالك .. ومن بعد هادشي كامل ... انا مصالحش ليك ونتي ماعرفتش كفاش باغاني شنو الفايدة من هادشي كامل .. شنو بغيتي وعلاش كتوضحي وتشرحي ... ياك كطلعي وراق الزواج شنو باغا اخر باغا تعددي نتي ولا شنو ؟
وقفت حيت صافي ماغاديش نقدر نتواصل معاه وهزيت صاكي قلت ليه انا غلطت اللي عيطت ليك يمكن .. قلت لراسي حشومة داكشي اللي درتي وزايد ماشي اي واحد سيري وهضري معاه .. ولاكن نتا باقي هوا نتا عمرك تبدل ..
رد عليا بغضب وجاب الله القهوى خاوية ماشي مفركعة نتشوهو ثدام الناس وقالي
عام وزيادة عاد فاق عليك الضمير جايا تبرري ... فاش كنتي كتعطيني الورقة وغادية ما فكرتيش تعطي معاها تبريراتك ... .. عرفتي شنو ... (وقف) راه مابقاتش فالزين والزعورية ... بقات فهادا شنو فيه (حط صبعو على دماغو) ونتي هنا عندك خرية وشخصية زيرو .. بلا متجي تشرحي ولا تزمري داك الشرح ماعندو مايقضي ليك .. وجابك الله تسمعي واحد جوج كلمات عقلي عليهم مزيان ... انا ماعندي ماندير بوحدة مساليا بحالك بلا ماتحاولي دوزي ليا سمعتي...
عصبني وقاطعتو قلت ليه مكانحاولش ندوز ليك .. ونتا مكتعرفنيش باش تقول شخصية زيرو ومغاديش نجرح فيك كما كدير نتا حيت هادا هوا عيبك وانا ماشي بحالك
قاطعني : شنو غنعرف عليك ؟؟؟ شكون كااع نتي وباش باغا تسمعي شي حاجة متعجبكش .. شوفي هاد الهضرة ماعندي مندير بيها ..
قاطعتو : وعلاش قبلتي نجلسو ونهضرو مللي ماعندك ما دير بهضرتي ماتقلبش تلاقاني من الاول وعندك الاعذار ختار اللي عجبك ولاكن نتا قبلتي تلاقاني وتسمع ليا ودابا ماخليتينش نهضر .. ولاكن عادي تسمع ومن بعد ضبر راسك .. انا مزالة عند كلمتي ماتراجعتش فيها وماشي حيت عيطت ليك باش نهضرو راني ندمانة .. لااا حيت نتا عمرك تبدل وانا ختاريت طريقي حيت مانقدرش نعيش مع واحد يديرنيز تحت رجلو .. وحتى وحدة مغادي تقبل على هادشي واخا تكون كتموت عليك ولو تزوجو نتا وياها يا اما غاظي تقتل ليها الشخصية يا اما غادي تفارق معاك من بعد ما تضبر .. مكتنازلش ... مكتفاهمش .. هادا طبعك وطبعك خايب وبغيت نقول ليك هاد الهضرة باش تعرف علاش هربت انا وعلاش هربات اللولة حيت نتا صعيب فالعشرة والحياة تنازلات ازايد .. (خفضت صوتي وعييت ) سمع ازايد ... انا ماشي رفضت نتزوج بيك غير هاكاك .. ولاكن صعيب نعيش معاك ... فاش وصلات المسألة للزواج والولاد لقيت راسي منقدرش .. واخا نكون كنبغيك .. واخا نكون كنحماق عليك راه نفسي اولا ليا من كولشي .. اللا مبالات و البرود والغضيب ديالك و النفخة راه مانقدرش عليها سمح ليا والى كانت شي وحدة قابلة على هادشي الله يكمل عليها لاكن انا لا .
شاف فيها بابتسامة باردة وقال : ساليتي ؟ ... واحسن اختاريتي تعيشي بعيد .. وهاديك اللي هضرتي عليها دابا قلتي عليها مشات وخلاتني .. هادي عندها الجرأة عليك وواعرة عليك جات فاص قالتها . وقلت ليها انا الى كان هاكا احسن كل واحد فينا يشد طريقو واختارت تمشي بحالها وفكيناها هاكا .. اما نتي لا .. نتي وحدة مريضة فراسها ماعارفاش اشنو باغا ... المصاحبة كانت عاجباك ماكنتش كنبان ليك غول .. حتى جينا نديرو معاك المعقول عاد بانو ليك العيوب وبديتي تفلسفي ..
رديت عليه وقلت ليه واش عاارف شنو هوا الزواج ؟؟؟ عارف ولالا ... الزواج ماشي هوا نتفارقو ونرجعو ونبقا كنلعبو بحال اللي كنديرو .. الزواج مسؤولية وانا حاليا ماهزاهاش .. وباش نهزها خاصني نضرب ليها الف حساب وحساب .. كيهكوني الوليدات اكثر من راسي ... انا حاليا ماعندي ولاد نقدر نختار حياتي فكل مرة ونطيح ونوض ولاكن من بعد فاش ندير وليدات غنضحي براسي على قبل ولادي وباش يعيشو بين واليديهم اللي كانو غيكونو انا ونتا انا خاصني نصبر عليك وعلى عقليتك وانا منقدرش
قاطعني : وشنو باغا دابا هانا عرفت وفهمت شنو بغيتي من اللخر ؟ باغا نرجعو ؟ رجوع سالينا منو انا الشيب بدا بينوض ليا فالراس تجي نتي تلعبي بيا كي بغيتي
قاطعتو قلت ليك نرجعو؟ ماقلتش ليك نرجعو وانتا اول واحد جبتي العيب معايا نسيتي ولا نفكرك...
قالي مانسيتش ولاكن انا ماشي بحالك ... كنت طايح معاك من القلب نتي درتي بلان خايب وجايا كتهضري ... جات من عندك دابا لا الوااااعرة هي حتى جبدت معاك المعقول وكذا عاد نتي تسيفتي .. هانيا والله تا هانيا الدنيا تجارب اشيماء . دابا جيتي هضرتي وسمعتك .. من حقك ختاريتي طريقك
قاطعتو : سديت ديك الطريق وفسخت الخطوبة
رد بسخرية : فسخيها عقديها شغلك هاداك مكيعنيش الى فسختيها غنرجعو كي كنا ... الامور وضاحت وقلتي اللي عندك ... وانا هوا انا ميمنكش نتبدل ماشي نتي اللي غتبدليني .. وحاجة اخرى .. لهلا يجيب هادي اللي متقلبش عليا الى كانت غا بحالك وبحال هاديك اللي دازت قبل منكم .. بلاااش بناقص نعيش هاكا حسن ليا من العشرة معاكم . تهلاي فراسك ... وماتبقايش معمرة راسك بيا انا خرجتك من هنا (حط و على راسو ) شغل البراهش ماعندنا منديرو بيه ودابا السلام عليكم اختي
مشا وبقيت واقفة كنشوف فالطبلة .. مابقاش فيا الحال قد ما رتاحيت مللي وصلت ليه الهضرة ومتأكدة غيبرد ويكون كلام اخر .. وليت كنعرف زايد مزيان ... فلحضة غضب كيقول هضرة ومن بعد كيتهدن ويقول هضرة اخرى .. رجعت بحالي للدار كنفكر فشنو دوزت وحسيت بالجراح كتنوض من جديد ... احيانا كنتأثرو بشي حوايج يالاه كتاشفناهم و كنمشيو مع ثيارهم حتى كندمو من بعد .. هاكا حسيت .. حسيت بالندم كياكل فيا على اللي وقع وعلى شنو درت .. لاكن بصح شخصيته صعيبة عليا نصبر عليها وهوا مامستاعدش يتبدل على قبلي .. اذا شنو المعمول ؟ الطريق مسدود والحل مكاينش .. هاد المرة واخا تأزمت ماشي بحال من قبل .. قادرة نخدم وقادرة ندير شي من حاجة وكنقول مزال غيجي نهار يعيط حيت هادا هوا طبعو وهادا هوا حالنا .. رجعت لصحابي كندوز معاهم الوقت والدنيا غادية وملهية مع شغالاتي اللي واخدين ليا وقتي كامل .. حتى فدوى مابقيتش معاها على اتصال بزاف حيت مكنساليش .. نهار على نهار حتى دازت اربع شهور طايرة وكل مرة نسول فدوى على زايد كتقولي كتشوفو غير فالخدمة ومها واخا كتزور مو ماعندهم حتى جديد .
حتى لواحد النهار كنت فالخدمة وعيطات ليا فدوى نتلاقاو وقالت ليا ضاروري خاصنا نتلاقاو .. تخلعت قلت ياك لباس ومشيت تلاقينا ديك العشية نيت فقهوى جلسنا وقلت ليها شنو وقع خلعتيني ؟
شافت فيا بنضرات غريبة وقالت ليا غنقول ليك واحد الحاجة .. ولاكن مايبقاش فيك الحال .. قلت ليها شنو هي هاد الحاجة خلعتيني
بقات ساكتة مترددة وقالت زايد
قلت ليها مالو شنو خلعتيني
قالت ليا زايد .... ت.. تزوج
سمعت التصفار فودني مع الخبر ومشا بيا الارض وجات .. كان كلشي فامان الله حتى تقلبات بيا الدنيا سفاها على علاها وتصدمت ماقدرتش نتيق وبديت كنضحك قلت ليها زايد زايد .. زايد اللي كنعرف تزوج !!
قالت ليا اه زايد اللي كنعرف علامن كتهضري .. واش بصح .. ميمكنش غير كدوب يالاه تلاقيتو هادي ربع شهور ميمكنش مستحيل . لالالا واخا تحلفي ليا فماعرفت فاش منقدرش نتيق افدوى
قالت ليا؛ تزوج بصح .. دار العقد وماما معروضة للعرس السيمانة الجاية .. هادي عشرين يوم باش عقد
مزالة كنضحك وكنقول ليها : كي داير هاد الزواج فربع شهور ! ميمكنش يتزوج وحدة عرفها غير فهاد المدة
تنهدات وقالت ليا : راه بصح ولاكن خاصك تعرفي شكون باش تحكمي
فاش قالت ليا بحال هاكا زاد الدم جمد بيا فالعروق وضرباتني الساكنة ماقدرتش نتقبلها ابدا ابدا ابدا وحسيت بانهيار .. كملات كلامها كتشوف فيا بأسى وقالت ليا
- مكيعرفهاش .. وحتى هي مكتعرفوش .. ولاكن من بلادهم شلحة غير بنت لعروبية مسكينة باها ومها على قد الحال فالجبل .. ولاكن ...
هزيت عيني فيها وقلبي غيسكت قلت ليها شنو ولاكن
قالت ليا : كتقرا عند خالها بناي فطنجة ... وجابت سبعطاش ونص فالباك ودارت مدرسة ديال المهندسين ... مايبقاش فيك الحال اشيماء الزواج قسمة ونصيب .. والمزوجين فالسما وهوا اصلا مكيعرفهاش غير بالصدفة يمكن كان مشا لبلاد وهي عطلة تما و طلع هوا وعمو للجبل يمكن وشافها .. فاش سول عليها قالو ليه راه واليديها هاشنو هاشنو وهي كتقرا عند خالها فطنجة ووالديها عندهم امل فيها زعما تخرجهم من ديك العيشة وتمارة
درتها بيدي وارتكبت اكبر غلط فحياتي .. فدوى كتهضر وانا مصمكة مقادراش نستوعب وقلت ليها غنمشي بحالي صافي ومشيت للدار انفردت انا وتقلباتي .. الليلة كحلة ماتوقعتش هادشي ابدا وبهاد السرعة ... الصدمة كانت غتحمقني واكثر حاجة الندم ماحسابنيش غنوقف على هادشي شي نهار !
كل نهاركيزيد فيه العرس يقرب كنزيد نمرض وفدوى كتسول فيا كل نهار وكنمثل عليها ونقول ليها عادي ماعندي والو وانا ربي اللي عالم بيا . وصل النهار دلعرس وكانت فدوى غادية مع امها وقالت ليا غيديرو فالفيلا عند مو اللي كبيرة ولبسات ووجدات راسها ومشات تحضر وبقيت انا ديك الليلة كلها كنتشوط ونبكي .. ماقدرتش نجلس وبغيت نمشي نشوف ونشوف هادي اللي تزوج وخرجت فنصاص الليل مشيت للفيلا عند مو تفكرت اول يوم جينا ليها بجوج وخدينا كسكسو من عندها .. لقيت الدنيا مخلطة و الاضواء والروينة والهايلالا ونزلت دخلت غادية وكنسمع الجوق كيقول اا زنوبة .. اا لمرضية هاكا يكونو بنات الرجال المحضية .. تطعنت والدمعة فعيني حاصلة ووقفت فالباب قدام الناس لداخل شفتها فالعمارية هازينها ... ماعرفتش شنو نقول عليها حيت كانت حاطة مكياج .. لاكن وجهها كيبان صغير وحروفها كوحل شوية عندها حفرة دالزين وعينيها ماعرفتش واش ليلونتي ولا خوضر من عند لله وعاجبها الحال كضحك مصاوبين ليها الشعر مطلوق والتاج والتكشيطة وكيغنيو عليه هوا دا زين ما دا زين .. بقيت كنشوف فالعروسة باينة عليها بنت الجبل .. داك النوع كيكون كيحشم و نسلهم فشكل كيكون الشعر كحل والعينين ملونين .. زوينة وكتفتن وهادشي اللي طعني اكثر خلا مرارتي تفركع وكملات فاش شفتو واقف حدا البرزة كيهضر ويضحك مع شبان بحالو حتى نزلو ليه العروسة شد ليها فيدها جلسها وجلس حداها بالكوستيم والكرافاطة عريس ديال بصح .. كنت كنشوف راسي فبلاصة ديك البنت ... كنت غنكون تما و لاكن درتها بيدي
جاني انهيار عصبي وخرجت من تما ماقدرتش نبقا واقفة وطلعت فالطموبيل سايكة حتى لقيت راسي حدا باب الفيلا ديالو وقفة وكنشوف فيها وحالتي يعلم بيها غير الله ... ماتوقعتش الزواج يكون ماتوقعتوش بمرة ... بقيت تما حتى بدا النهار كيطلع وبانت ليا طموبيلتو جايا حسيت بالارض لاحتني فالهواء عرفت العرس سالا وجات لعروسة لدارها اللي مفروض تكون داري انا وهاداك راجلي انا ... فرنشة عين مشات ليا كلشي وماقدتش نصدق . حلو ليه باب الفيلا دخل بالطموبيل وانا جالسة ... ماعرفتش راسي شنو كندير... مابقيتش كنفكر ... مابقبتش متحكمة فراسي حتى لقيت راسي تبعت الطموبيل ديك الساعة دخلت موراها وكان يالاه نزل لابس غير قميجة بيضاء وراخف الكرافاطة وطايح عليه سر العرسان .. ايه علاش لا الليلة ليلتو مع العروسة يطيح عليهم السر بجوج الله اودي .. شافني وقفت قدامو وتصدم كما انا مصدومة وكنبكي وبحال شي حمقة هجمت عليه كنغوت علاش علاش علاش ... فين هي العشرة فين هوا الحب فين هوا داكشي اللي دوزنا علاش درتي بحال هاكا ... بقيت كنغوت ونزلات هي من الطموبيل مخلوعة بالتكشيطة والطالون الا التاج مادايرهاش وملبسينها داكشي موديغن جايبين ليها احسن مصممة اللي شافها ميقولش عليها بنت الجبل .. تعصبت فاش شفتها هاجمتها وبقات فبلاصتها وشدني من يدي طرطق فيا عينيه قالي هييييه ... حدك تما .. شاف فيها شاروليها باسو وقاليها دخلي لداخل حتى نجي
مشات وكدور تشوف فينا وجنوني غيقلوني ويقتلوها ويقتلوه حتى هوا .. ناضت فيا العافية اما هي مشات هازة تكشيطتها ومعاوناها الخدامة وانا برا كنطيح ونوض وزايد شادني ماخلانيش نتبعها وكنعيط ليها تجي لاكن ماجاتش بقات غير كطل من لداخل كاع وقلت ليها اجي نعاود ليك شنو دوزت انا وياه باش تعرفي باللي تزوج بيك باش ينساني سمعتي .. باش ينساني حيت ماقدرش ينساني وكيبغيني انااا وثلاتة سنين وانا وياه سمعتي
.جرني من يديا بالجهد والدم غيطوش ليه من عينيه قاليا غتسكتي ولا غنهرس ليك هاد الفم .. دفعتو وقلت ليه عرسو ... هرسووو ليوم نفضحك .. خليها تسمع وتعرف باش ماتفرحش بزااف ... خليها .. تعرف باللي ...
قبل منكمل الهضرة هز يدو حتى للسما كان غيعطيها ليا لوجهي ورجع شدها وجمعها بونية وخرجني برا للشارع وسد الباب قالي علاياش كتقلبي ؟ عندم شي مشكل فكيه معايا اش دارت ليك البنت تنكدي عليها ؟ كانت معاك ؟ قالت ليك ها شنو ديري وشنو ماديريش؟ شنو باغا بالضبط وااااش باغا نلبق ليك بروصي نسيفطك بعشر سسنين للحبس باش مانبقاش كل مرة نتصدا ليك .. اش بينك وبينها حتى قلتي ليها ديك الهضرة ؟
ضحكت وقلت : اااه خايف عليهااااا مسكينة خفتيها تبكي؟؟؟ ااا؟ انا مافكرتيش فيا ؟ مافكرتيش شنو ممكن يطرا ليا ؟ الى نتا تزوجتي
قالي بغضب: نتي مريضة ... واش مكتفعميش... راك نتي اللي مشيتي وتخطبتي وكطلعي الاوراق وكنتي غادة فداكشي ديالك ... عاد بان ليك زايد . صافي سالينا ونتي قررتي .. بلا متجي ديري لينا الشوهة هنا وتنكدي على بنت الناس معارفة والو وماجاتش جرات عليك وشدات بلاصتك ...
وهوا كيهضر هزيت عيني فااسما كنسوط بانت ليا من الزاج دالفيلا واقفة جنب مع الخشب من لداخل وكطل علينا بتخبية ماعرفتهاش واش خايفة منو ولا شنو لاكن فاش شافتني شفتها هربات مابقات تما وقلت ليه بسخرية .. لقيت اللي تناسبك ... تصبر عليك وتحني ليك الراس واللي قلتي هي اللي كاينة يا دك
صعرت بالغوات تما وماخلانيش ندحل للفيلا وبدا يهضر معايا بالهداوة عرفتو باغي يصدرني .. ماقدرتش نستحمل طجيت من كتافي ومشيت طلعت طموبيلتي رجعت لداري داعرفتش كفاش وقع ليا حتى وصلت للدار ماحسيتش بالطريق ودخلت كنترعد عيطت لفدوى قلت ليها تجي عندي للدار ماقدراتش تجي حيت رجعات لدارها عند راجلها وقالت ليا نوجد الفطور ونجمع الدار ونجي .. كنت محتاجة شي واحد معايا وعيطت لبشرى خلعتها بصوتي وكان الفجر ديك الساعة ناضت بزز منها جات عندي طحت عليها بالبكا حتى سخفت .. درت كنازة وبديت نهترس فالهضرة فهمات مني شنو كنقصد وخوات عليا الماء وبديت كنطيح والنوض بحال شي حولي مدبوح .. تمنيت نموت ومانبقاش كنتنفض .. حسيت بالشمتة وشمت راسي بيدي وكرهت راسي كرهتو لاقصى درجة ماعرفتش كفاش ننتاقم من نفسي ومن راسي والطيران والفهامة ديالي .. كان يحسابني غادي يرجع واحتمال الزواج بعدتو وعمرني فكرت فيه و قلت يمكن يتصاحب هادي مافيها ششد ولاكن زايد اللي كنعرف يتزوج .. هادشي ماقدرتش نصدقو .. بقيت هاكا حتى وصلات فدوى كتجري مع الغدا بداو يصبروني تقول مات ليا ولدي .. صبروني على الفراق والاوجاع والعذاب ونعست واحد عشرة دقايق وفقت لقيتها كتجمع هي وبشرى عند راسي وكتعاود ليها شنو اللي وقع وعلامن كنهضر . غير فقت استرجعت عقلي قلت لفدوى ياك كنت كنحلم مكاين لا زواج لا والو غير كنحلم ... بقات ساكتة وكيشوفو فبعضياتهم وبدينا عاوتاني المعنات وكنبحث فدوى ... مابغاتش تعضر وتزيد تمرضني ولاكن انا كنبحث بغيت نعرف كولشي وشديت واحد المخدة معنقاها وناعسة ساهية ..قلت ليها شكون حسن واش انا ولا هي وهي تدخل بشرية بنفاد الصبر قالت ليا راه مابقاتش فالزين . الزين فالدفلة وحااااار مرر .. راه تعجبيه فالوجه وميكملش معاك حتى دقيقة من بعد بقات فالعقل وشنو فيه وبنادم واش تابت ولا مزنزن ماتقارنيش راسك بيها حيت نتي بوحدك وهي بوحدها ماعرفناها حنى كي دايرة
جبدات فدوى تيليفون قالت ليها انا نوريها ليك راه كنت معاهم ونضت جلست بغيت نشوف وهي تبعدو فدوى قالت ليا اش غتشوفي ... ماعندك ماتشوفي صافي سالا الفيلم ماضيعيش راسك على قبلو كما مشا بنا حياتو بني حياتك حتى نتي .
هي كتهضر معايا وبشرى كتفرج فتيليفون وطيرتو ليها من يدها بغيت نشوف وحيدوه ليا دارو بناقص ... شربت واحد المهدئ عاوتاني تكيت وغمضت عيني حسابهم نعست وانا كنسمع اش كيقولو ويتجمعو
بشرى : شنو كدير هادي اللي دا دابا واش غير جالسة
فدوى : لا راه عندها العام اللخر فالهندسة كتقرا فطنجة
بشرى : شحال فعمرها دابا : تكون عندها ديك 24 ... حيت قالك باها ماكنش عندو الحالة المدنية.. عايشين غير فالجبل راكي عارفة حياة الجبل ... مادخلاتش بكري للمدرسة وباها حتى صاوب الحالة المدنية عاد دخلها تقرا وبالكشايف والمدرسة بعيدة فاش وصلات السادس جلسات عام فالدار ماعندها كي دير الاعدادية ماتماش وباها قالبها جلسي براكة .. قالك مها اللي وقفات معاها بغاتها تقرا دارت عليها المستحيل باش سيفطها عند خالها لطنجة غير بناي مسكين كتقرا عندو وفاش جابت المعدل فالباك قالو ليهم الناس مضيعوهاش خليوها تكمل وعاونوها غير الناس ودارت الهندسة دابا كتقرا قربات تسالي بقا ليها هاد العام .. وباها عاد رجع كيقول ليها قراي .. اامي اختي ماعارف والو حتى وصلات البنت .. قالك كطحن القرايا طحين ماعاونوها بمىاجعة ولا والو راسها كتقاتل مابغاتش ترجع للجبل المنقد ديالها هي لقرايا
يشرى : الله يكون فالعوان ... هاديك دابا ماجايبة للدنيا خبار .. واش دخلات بعدا ؟
فدوى : اللي سمعت هاد الصباح قالت ليا ماما دابزو وقع بيناتهم شي مشكل قالت ليه مابغاتش هاد الزواج .. قالك نوضوها مشات امها عاى حساب الفطور لقاتها فالبيت كتبكي وهوا خرج ... ااه نسيت قالك شرطات عليه تكمل قرايتها وتخدم .. ااايه وقاليها كملي وغيبقا هوا هنا وهي فطنجة غيكري ليها تما ويصرف عليها حتى تسالي وتجي عندو
طعنوني بديك الهضرة ونضت درت راسي ماسمعت والو ومشيت للطواليط وهوما تابعيني ختيفين عليا ندير شي حاجة فراسي .. بغيت نسد عليا لباب لقيتهم واقفين قالو خراي ولا بولي غير خلي الباب محلول .. مابغيتش وسدتيو عليا وجبدت تيليفوني صونيت عليه .. بقيت كنصوني حتى جاوبني بواحد صوت خلعني قالي مالك عدو ربك نتي واش باغا ندبح مك ولا شنو علاش كتقلبي ؟؟ شنو باغا بالضبط غتكرهيني فالنهار اللي عرفتك فيه شنو باااغا شنووو
قلت ليه بالهداوة وكنتنخصص غير سمع ليا وصافي مابغيت منك والو .قاطعني قالي ماباغايش نسمع .. ماتعيطيش ليا ولا غنوريك شي وجه ميعجبكش .. صافي سالينا هي سالينا تقبليها ودويت معاك بشوية دابا غادي ن***د معاك السوايع بالمعقول
قطع عليا وعاودت صونيت حتى طفا التيليفون .. ماقدرتش ماقادراش نصبر ماعنديش الجهد نخسر روحي ومنخسروش .. ماشي لخاطري وماشي بيدي حاسة براسي غنتسطا ومابقا عندي حتى شي حل من غير حل واحد حطيتو فراسي ونسيت حياتي وبقيت كنتسنا الفرصة فين نتلاقا بديك ختنا وعسيت عليها من الصباح للعشية فباب الفيلا ... شفتها كدخل بشيفور وتخرج بالشيفور مكتمشيش على رجليها وعمرني شفتها خرجات معاه ولا دخلات معاه وحتى هوا كيخرج بوحدو ويدخل بوحدو قلت مدابزين من ديك الساعة ولاكن باقا عندو فالفيلا .. واحد العشية كانت خارجة شفت الشيفور مخرجها هي وشي مرى يمكن مها حيت بلدية فلباسها لاكن هي لا كطلق الشعر ودير نضاضر ولابسة جلابة مخزانية .. دغيا بانو عليها الفلوس فوقت وجيز . تبعت ديك الطموبيل حتى لواحد السوق شفتها نزلات هي وديك المرى وبقا الشيفور فبلاصتو ونزلت تبعتها قبل مادخل للسوق وخرجت ليها فطريقها .. غير شافتني وجهها رجع صفر ومها حداها من النوع اللي كيدير الحنة فيديه ورجليه ودايرة الحجاب وبلدية . شافت فيا تخلعات قلت ليها بغيت نهضر معاك ضاروري وبغات دوز قالت ليا ماتهضري معايا منهضر معاك ومنسمحش ليك على داكشي اللي درتي ليا كما كحلتي عليا نهاري الله يكحلو عليك دنيا واخرة .. جريتها قلت ليها ماكحلتش عليك النهار نتي بنت بحالي بحالك ... غتحسي بيا .. وماتبغيش هادشي اللي طرا ليك يطرا ليا .. مها بقات غير كتشوف وتسول اش واقع وكتشد فيها كتقول ليها ياك لاباس مالكم شنو واقع . نترات يديها وحيدات دوك النضاضر شافت فيا وزدت تطعنت حيت كانت زوينة حتى هي وقالت ليا شنو بغيتي مني ؟ شنو بغيتي مني شنو ؟؟؟ فين كتعرفيني ولا نعرفك اش دخلك فحياتي اختي .. شنو بغيتي عندي هضري يالاه شنو
بديت كنبكي قلت ليها انا مابغيت منك والو .. نتي مادرتي ليا والو ولاكن نتي السبب دخلتي بيني وبين زايد ودوزنا انا وياه 3 سنين كنبغيو بعضايتنا بصح ... واش متأكدة كيبغيك .. متأكدة .. تبغي نجي دخل بينم وبين شي واحد كتبغيه ونديه ليك
قالت ليا شوفي اختي .. داكشي بينم وبينو انا ماعندي دخل فيه .. كن بغاك كن تزوج بيك مايجيش عندي انا
قلت ليها كيبغيني والى نتي خويتي الطريق غادي نرجعو .. حسي بيا عفاك انا منقدرش نعيش بيه بلا بيه
تدخلات مها وقالت ليا : ابنتي حنا شكان ليها فهادشي واش هي جات خداتو ليك من يدك .. اش دارت بيك هاد البنت نغصتي ليا حياتها هي وراجلها واش خطفاتو ليك .. واش كانت عارفاك كتعرفيه وسرقاتو .. هوا جا .. ماقالينا لا كيعرفك ولا والو تفاهم هوا وياها صافي جاب الله تيسير
قالت ليا معصبة عليا واش دابا بغيتني نطلق ؟ غير قولي بغيتي نطلق ؟ شنو المطلوب مني
قلت ليها الىةقدرتي ماكرهتش .. حيت انا وزايد واخا كندابزو واخا مانعرف شنو يوقع كنرجعو
امها تخلعات فاش شافت بنتها كتقول هاكا وهي تجرها قالت ليها يالاه يالااه نمشيو بحالنا
نترات يدها وقالت ليها خليني نشوف هادي اشنو بغات .. واش بغيتي نطلق انا باش نتي ترتاحي؟؟ الحماق هادا الى كنتي اختي مريضة سيري داواي انا مغنطلقش باش تبقاي نتي على خاطرك والى كيبغيك غيبقا معاك .. اش بغيتي منيييي مافهمتش موصيبة هادي منين خرجات ليا ..
فقدت اعصابي قلت ليها تزوجك ضد فيا ... راه مكيبغيكش وغايرجع يرجع هانتي غتشوفي وعقلي على هاد الهضرة
عطات لمها الصاك والنضار وبغات طير عليا حسيت براسي قصحتها وامها جات بيناتا قالت ليا ها العار ابنتي عطينا التيساع .. عا العار مابغينا صدع ولا مشاكيل الراجل راه هوا اختار ماضربو حد على يديه
كنا غنترايشو وكنت غنجرها من شعرها كن ما مها اللي جات بيناتنا والناس تدخلو .. هزات عليا صبعها كتحلف الى ماعطيتهاش تيساع غتندمني وقلت ليها والله مايبقا ليك وبقيت كنحلف ليها حيت هضرت معاها ماحساتش بيا وشنو عايشة وجراتها امها هضرات معاها الشلحة حساب ليها مغانفهمش وقالت ليها زيدي بعدي من المشاكيل غتمشي دير ليك شس موصيبة تحمقك صافي ماتجاوبيهاش قالت ليك بعيد منو قولي ليها واخا .. لاكن بنتها بقات كتحلف فيا وانا اكثر منها بغيت نبرد فيها غدايدي وجنوني اللي شاديني ومشات ورجعت بحالي للطموبيل كنترعد تكيت على الفولون كنفكر فديك الهضرة اللي قالت ليها مها وماجاني فبالي غير نمشي لشي فقيه هوا اللي غيفكني .. رجعت للدار طحت مريضة وكنتسنا زياد يعيط ليا حيت غادي تعاود ليه شنو طرا ضاروري ماغادي يجي ولا يعيط لاكن والو ماعيطش وقلت يمكن واصلات ليه حتى حاجة .. جاتني عارفة شنو كدير ومابغاش المشاكيل بينها وبينو وتسترات على الموضوع باش يتنسا لاكن حلف ماتبقا معاه وبقيت كنقلب على شي شوافة ولا شي فقيه .. مشيت للخدمة على حساب هادي جبدت الموضوع مع البنات على اساس صاحبتي ماشي انا وقالو ليا على واحد الشوافة غير عرفتها فين كاينة شديت الطريق عندها . كانت فحي شعبي حالتو دخلت عندها قلت ليها تشوف ليا شنو كاين وانا سطلة مكنفهم فهادشي حتى حاجة وعمرني فكرت نوصل ليه لاكن مابقيتش كنشوف قدامي تعميت ورحع محور حياتي هوا زايد وديك خيتي . طلقات ليا الكارطة بقات كتعاود ليا غير داكشي اللي انا عارفة وقلت ليها مابغيتش نعرف داكشي اللي فات بغيت نعرف هوا وياها كي دايرين وشنو غيوقع . بقات كتشوف فالكارطا وتضمس و طلق والدار خانزة حالتها حالة جلست فيها غير بزز وهي خنز من دارها ومسخة عيفاتني كتر ما انا عايفة الدنيا قالت ليا هاجر لفراش معاها .. سولتها واش يكون دخل بيها قالت ليا باقا عزبة حيت هادشي اللي طلع ليا هنا ولاكن عايشين تحت سقف واحد .. سولتها واش هوا اللي هاجرها ولا هي قالت ليا لا هي هاجرة الفراش وبيناتهم صدع كبير وكبير بزااف ماشي عادي ولاكن راه طايح فحجرها .. مافهمتش شنو كتقصد قلت ليها زيدي وضحي ليا قالت ليا كيروم ليها يعني طايح ليها فيدها .. تطعنت بديت كنبكي وقالت ليا مغاديش يكملو وغادي يرجع ليك خاصك غير تخدمي ليه ... راه طالع ليا هنا مغاديش يكملو . قلت ليها نخدم ليه وطلبات ليا تصوريتو كانت واجدة عندي فتيليفون قالت ليا خرجيها وجيبي معاك شي عشوب وشي تخربيق كتباتهم ليا ومشيت خرجت شريت داكشي وخرجت التصويرة ديالو ديتها ليه وقالت ليا غنخدم ليك فيها ولاكن ب 5000 درهم .. قلت ليها خدمي حتى بمليون غير فرقيها عليه نشري ليك دار تسكني فيها . فرحات حتى بانو صراسها مسوسين وقالت ليا عطيني وجبدت الشيك قالت ليا اسبس .. رجعت خرجت عاوتاني كنجري خرجتهم من البنكة وجبتهم ليها فجوا بقات مقابلاني غير انا ونسات لخرين اللي عندها عطيتها لفلوس وقالت ليا غير توجد الخدمة نعيط ليك .. سولتها شحال ديال الوقت واش غيتعطل ماقدارش نصبر غادي نحماق وقالت ليا ضاروري تصبري شوية ولاكن كولشي داكشي اللي بغيتي غيكون . صافي طرقت معاها المسمار ومشيت بحالي للدار بقا بالي معاها كنتسنا غير هاد الخدمة هادي تكمل وتعيط ليا ماعنديش الجهد للصبر وكنوقف غير بفيتامين سي والمنشطات
يتبع...
التنقل بين الأجزاء