أنا وبعدي الطوفان الجزء السادس

رجع عندي امل فديك الشوافة المعفونة وتكالميت شوية مابقيتش فوق الشواية لاكن كنتسنى بقراغ الصبر تعيط ليا ديك ختنا حتى عيطات ليا كنت فالبيرو جالسة مابقيتش كنديها فحالتي وتحت عيني بدا يكحال .. ضلامت الدنيا فعينيا . عيطات ليا مجبد البلا قالت ليا دوزي عندي قلت ليها مساليا هانا جايا دابا ونضت مشيت عندها جلست حداها وسادة نيفي . قالت ليا واش كتعرفي شي واحد قريب ليها يرش هاد الماء فعتبة الدار قات ليها عندهم فيلا قالت ليا شي واحد يرش الماء فالباب الدخلاني .. قلت ليها مكنعرف حتى واحد قالت ليا هاكي الماء والباقي عليك رشيه فالباب لداخل . خرجت من عندها هازة الهم .. منقدرش نقرب باب الفيلا فيها كامرة برا قدها قداش وماعرفتش شكون اللي يقدر يدير هادشي .. جلست فالطموبيل كنفكر ماطاحت ليا غير ديك الحادكة اللي عندو فالدار نسيت اش سميتها كاع . مشيت حدا الباب ديال الفيلا بعيدة كنتسناها تبان وبقيت عاسة حتى شفتها خرجات وسدات الباب هازة الزبل لاحتو .. هزيت عيني فالفيلا بان ليا السقيل فالسراجم والبالكون قلت يمكن كاينين وكيجلسو فالجهة لخرى جهة لابسين . كنت غنوقف عليها حدا الطارو لاكن شفتها غادية لابسة الجلابة ودايرة العكسة خارجة بيها وشدات طاكسي صغير تبعتو لقيتها داخلة المارشي ونزلت بالزربة قبل ماتلف عليا .. دخلت السوق تابعاها هي كتوقف عند الخضار وانا كنوقف عند اللي حداه كنقلب كي ندير ندوز ليها .. تقديت التقدية بلهلا يطريه ليا ماعرفت كاع اشنو كنشري غير كنهز والخضار كيسولني وانا كنقول ليه غير دير عبر سربي .. عمرت واحد الميكة وبقيت حاضياها مشات عند مول الحوت ومشيت وقفت حداها قلت ليه عطيني كيلو دالحوت وهي كتشري فالكلمار والكروفيت والميرلا لديك خيتي وتقدا ليها .. دورات وجهها شافت فيا وشغت فيها وضحكت قلت ليها اهلا كي دايرة لباس بيخير .. سلمت عليها من وجهها وبقيت كنسول على احوالها وهي دايرة من اطونسيو كتهضر معايا بلعبار .. قلت ليها كي داير زايد ومرتو .. خرت ديك مرتو بحال الشوك من حلقي قالت ليا الحمد لله وتنهدت غرغرو عيني قلت ليها شفتي شنو دار .. قالت ليا شوفي داكشي قسمة ونصيب .. قلت ليها ضحك عليا وشفتي كفاش كنت انا وياه .. هي السبب دخلات بيني وبينو وبقيت كنبكي ونشكي حتى بقيت فيها وقالت ليا حتى نتي زوينة وبنت الناس دابا ربي يسهل عليك .. قلت ليها وليت مريضة بسببه كنشرب الدوا وحالتي معالم بيها غير الله ..كن مادخلتي ليا لخاطري وكنت حاسباك بحال ختي لكبيرة منهضرش معاك ولاكن نتي باينة فيك بنت الناس .. شافت فيا بأسى قالت ليا كل واحد يخلصو الله مايبقاش فيك الحال .. خدات الحوت وخديت الحوت ماعرفت اشمن نوع وتميت انا وياها غادين فالمارشي وكنشي عليها ونبكي .. نزيدو شوية ونوقفو ونزيدو ونوقفو ورجعت كنتقدا انا وياها والهضرة غادية ماحبداتش ليا حسهم بقيت كنشكي حتى طيبت ليها قلبها وخرجنا من المارشي كان حدانا واحد المطعم فالشوكة قلت ليها اجي نجلسو باقي كاع ماتغديت .. قالت ليا مزروبة خلات مرتو فالدار بلا غدا وقلت ليها ونتي مالكي ماشي انسان ماعندكش الحق تنفسي وترتاحي .. قالت ليا خاصها ترجع دير الغدا قلت ليها نتي راك بنادم يصبرو شوية وجريتها جلسنا حشمات طلبت وقلت للسرباي يجيب ليها احسن حاجة عندهم .. حطيت ليها الشلايض والبلا وكاس ديال العصير قد الشاطو وانا خديت سلاد قلت ليها دايرة ريجيم . وهوا راه ماعندو منين يدوز ليا الصراحة .. بقيت كنهضر معاها ونشكي ونبكي وتغدات كلات حتى شبعات وبديت نسولها عليهم قلت ليها قهروك بتمارة والطياب .. قالت ليا كدخل حتى هي للكوزينة كطيب وكتجمع بيتها راسها ولاكن حدودية مكتهضرش معاها .. قلت ليها ومالها معاك نتي ضريفة وبنت الناس .قالت ليا هي هاكاك نهار كامل شادة البيسي وجالسة كتقرا مكتخرج مكدرج مكتنوض من تما .. وكانت معانا مها جالسة معاها ودابا مشات بحالها

سولتها شنو طرا داك النهار فاش جيت درت ليهم ديك الحالة قالت ليا

من الساعة اللي مشيتي فيها طلع عندها للبيت وكنت تما فالكولوار غادية جايا وخلاو الباب محلول .. وقفات ليه قالت ليه شكون هادي اللي جات لهنا دارت هاد الفضيحة قاليها من بعد ونهضرو فهاد الموضوع .. رتاحي نتي .. جلسات فطرف الناموسية قالت ليه خليني هنا بوحدي مابغيت حتى واحد ومشا عندها كيهضر معاها بشوية ماسمعت شنو كان كيقول ليها ولاكن كان شاد فيها كيرطب معاها ولاكن قلبات وجهها عليه قالت ليه خليني بوحدي دابا باس ليها راسها وطبطب عليها وخرج كان غيلقاني فالباب على شوية .. مشا هبط للجردة جلس تما على الكارو والشراب ودخلت عندها لقيتها كتحيد التكشيطة وتبكي شافتني قلبات وجهها قالت ليا عفاك باش تبغي دخلي ديري الصوت

هيا كتعاود وانا كنتشوط وقلت ليها هادي من النهار الاول بدات هاكا وجالس يحزر فيها .. فيها من مشات النفاخة والعياقة

دروات راسها وقالت ليا : ايييه ولاهيلا الى كل مرة يسولني واش كلات .. واش فطرات .. واش تعشات .. شوفي شنو بغات .. ديري ليها داكشي اللي كتبغي .. ومها غير كدير فلخواطر ولاكن الصراحة مها مزيانة كدخل معايا للكوزينة يدي بيدها

قلت ليها كملي على شنو وقع داك النهار انا راه منعست ماشفتو كنت غنموت .. زيدي خودي شي حاجة ماكليتي والو ..

عيطت ليها على الديسير جابوه ليها وقالت ليا خفت نتعطل راه السي زايد غيشمني من الدخلة وانا كنخاف من المشاكيل

قلت ليها حتى واحد ميوصلها ليه حتى انا مغنبغيش ليك الضرر .. مهم كملي كملي بزربة حتى انا تعطلت على الخدمة .. ولاكن كملي بعدا ماكلتك

قالت ليا: المهم فاش قالت ليا ديك الهضرة خرجت خليتها بقات كتبكي تما حتى للصباح ماعرفتش واش نعسات ولالا .. اما السي زايد غير شرقات الشمس خرج من الفيلا ماعرفتش فين مشا وماشفتها حتى للوحدة نزلات بالتحتية ديال التكشيطة وعينيها حومر قالت ليا شي واحد يجيب ليا الباليزة راه بقات فالطموبيل .. قلت ليها راه السي زايد طلعها بلاتي نجيبها وكان طلعها ليها بقات حدا البيت بقوة البكا وقلة النعاس مشافتهاش ودخلتها ليها قلت ليها زعما واش نسخن ليك الحمام قالت ليا لا بلاش ..قلت ليها واش نجيب ليك الفطور قالت ليا بلاش شكرا غير سدي معاك الباب . صافي خرجت سديت الباب.. هي هاديك الاللة جات مها وجات واحد ختها كبيرة مزوجة وباها وجات الحاجة وما ادراك ما الحاجة

جاني الفضول قلت ليها شنو وقع شنو طرا

قالت ليا : الحاجة جات جلسات سولات على ولدها مالقيت مانقول ليها قلت ليها يمكن خرج .. خفت نقول ليها شي حاجة يجي يندمني .. اما مت العروسة غير جات سولات على بنتها طلعتها ليها دقيت حلات الباب كانت يالاللة لابسة ليك واحد البيجامة هاكا كدير تحلفي ما راها مغبونة .. ولاكن غير شافت مها طاحت عليها بالبكاوت حتى تخلعو وبداو كيسولوها وقالت ليهم والو حقا الواد توحشاتهم وصافي .. مسحات السما بليكا ياختي وقالت ليها امها لبسي شي قفطان ولا شي حاجة نزلو لتحت عاد ناضت دخلات للدوش طرفات وقادات راسها ولبسات ليك قميص جوهرة والبلغة ونزلات سلمات عادي وجلسات معاهم كضحك وجات عندي الحاجة للكوزينة كتسولني عليهم ماقدرت نقول ليها والو .. سكت وقطعت الحس ودارو فيا خير كانو جايبين معاهم الغدا وكولشي حطيتو تغداو وتغدات معاهم صافي وخرج الشيفور وصلهم وهي شدات فمها قالت ليها بقا معايا شي يامات .. بزز باش بغا باها ومشاو رجعو لبلادهم بقات غير مها والحاجة مابغاتش تمشي تاهي جلسات وكل شوية تسول على ولدها فين مشا .. كتصوني كتلتقا تيليفون طافي .. حتى رجع فالعشية كانو كلهم كيديرو كاسكروط فالجردة وهي معاهم ومها كتقول ليها طلقي شعرك ... كحلي عينيك .. كحلاتهم ليها بزز منها وطلقات ليها شعرها عاد تهنات .. اما الحاجة غير دخل ناضت وقفات قالت ليه فين مشيتي قال ليها حقا خرجات ليا شي خدمة من الجنب .. كيهضر ويشوف فزينب اما هي جمعات الضحكة فاش شافتو دخل ماضارتش جيهتو .. جا عندي للكوزينة قلت دابا وهوا سولني على شي حاجة يدوخني ولاكن سول عليها .. معاش فاقت قلت ليه مع الطناش قالي طلعتي ليها لفطور.. قلت ليه مابغاتش تفطر .. قالي وكلات شي حاجة فالغدا .. قلت ليه تغدات معاهم وقالي ردي بالك معاها شوفيها شنو خاصها وريها راها معارفة والو مزال مامولفة

الصبر اللي صبرت على تعاويدها عمرني صبرت عليه فحياتي وفسبيل نعرف شنو طرا كمدتها حتى نكون بوحدي وننفاجر ولا ننتاحر ديك الساعة .

قالت ليا : راه طلعات للبيت ديالها وتبعها سد الباب ولاكن الحاجة ناضت تبعاتهم حسات بشي حاجة ماشي هي هاديك .. حصلتها كتسنط ودرت راسي ماشفتهاش حتى سمعت زينب كتقول ليه من لداخل مابقيتش باغا هاد الزواج هادا ردني منين جبتيني .. واش كاينة شي عروسة تقبل على راسها يوقع ليها هادشي هادا .. ايوا الحاجة سمعات غير هاد الكلمة وشدان فيها وزغبها الله دقات عليه حل ليها قالت ليه مالكم ياك لاباس غواتكم وصل لتحت .. والصراحة مكان لاغوات لا والو بغات درق تسنيطة على راسها .. ساعا هوا خرج عندها سد الباب وقاليها من تحت الدف معصب كن تشوفي وجهه ديك الساعة فاش خرج زمطاتو لخرى فاش قالت ليه ردني منين جبتيني .. قال لمو هادشي بعيد عليك مادخلش فيه . قالت ليه علاش كتقول ليك مابغيتش هاد الزواج واش حطيتي ليها السيف على عنقها . شعل بدا يغزز سنانو قاليها بعدي من الصدع ... انا اللي مزوج خليك بعيدة هادشي بعيد عليك وماعندك ماتفهمي فيه بلا منطلعو للسما ونوضوها راك عارفاني واخليك بعيدة نضبر راسي.. غير قاليها هاكا وهي تواطا قالت ليه اولدي انا مادرت ليكم والو غير بغيت نعرف وصافي يالاه لبارح تزوجتو علاش كدابزو .. قاليها هاداك شغلي ..بيني وبينها علاش باغيين تعرفو صافي كل واحد يدخل سوق راسو فضيو علينا هادشي واللي دخل راه غيسمع شي حاجة ماتعجبوش . رجعات مو لور قالت ليه ضبر راسك انا غير كنسول . قاليها هبطي تكاي فاش تكون شي حاجة بيني وبينك ولا نتي داخلة فيها مغنقول ليك والو ديك الساعة دابا سيري تسنطي لعضامك غيطلع ليك طونسيو ايوا عاد هبطات وهازة شوكتها ودخل سد الباب ولاكن راه ماساق ليهم حتى واحد الخبار لاش مخاصمين لا مصالحين داكشي بيناتهم فالبيت ومها ماجابت للدنيا خبار وجات عندي الحاجة عيات تبث فيا قلت ليها ماطرات حتى حاجة فالفيلا الى كانت شي حاجة راه غير بيناتهم فالبيت .. بقاو فالبيت كيهضرو ماطلعش حسهم وخرج قال لمو نوصلك وصلها باش ماديرش ليه الصدع وبقات غير مها معانا هوا كيخرج مكيجلسش وهي غير فالفيلا كل مرة فين كتجلس هي والكتوبا ديالها والبيسي مكتهزش الراس حتى للعشية دخل قاليهم السلام وطلع لفوق للبيت وعيط ليها من تما قاليها زينب اجي وطلعات ماعرفت شنو وقع ..وفالليل وريت لمها بيتها وهوا وياها كيباتو فبيتهم حتى واحد ماعارف شنو كيطرا بيناتهم .. كندخل الصباح وليت ندق ونعلم كنلقاها جمعات بيتها وجمعات كولشي والحمام مجموع وعادي ولاكن الهضرة بيناتهم قليلة بزاف ومها غير نية مادات ماجابت

سمعت مايعطيني السكر والطونسيو وتكهمت ماقدرتش نتقبل هادشي .. وليت وحيدة منبودة مفقودة وانا اللي كنت غنكون بلاصتها .. بغيت نكسب بديعة وجبدت الف درهم قلت ليها هادي ديالك تعاونك على الزمان والى خصاتك اي حاجة عيطي ليا وعطيتها نمرتي وخديت نمرتها ونضت وصلتها شوية حتى قربات وحطيتها بعيد مشات ورجعت بحالي مابغيتش نجبد ليها الموضوع من الاول خفت ماتبغيش ولا تمشي توصلها ليه ... فيها الهضرة بزاف والجموع كتنسا راسها واللي خلقها .

بالليل عيطت نسول جاوباتني كنسمع واحد الصوت ديال الطبيعة والشلال وموسيقى هادئة قلت ليها لاباس شخبارك وديك الدخلة الملونة وقلت ليها واش ماوقع ليك حتى مشكل فاش رجعتي معطلة كي لقيتي الاحوال قالت ليا لا ماوقع والو غير رجعت صاوبت لغدا هي مابغاتش تتغدا لقيتها دارت واحد شلاضة وصافي هناتني من الطياب

قلت ليها كنسمع النوسيقى عندكم ..قالت ليا هي طالقاها فالتلفزة وجالسة شادة داك البيسي

: قلت ليها واش بوحدها قالت ليا بوحدها ... مكدير والو من اللي كتفيق وهي يا اما فالجردة جالسة ولا فالبالكون ولا قدام التلفازة مكتفارقش هي وداك المشقوف .. وراه تعكس ليها من الصباح معصبة معاه قالت ليك تقرض مابقاش كيبغي يوقف ليها الشاشة كتميل ..سمعتها كتقولها لسي زايد وهاد العشية فاش رجع جاب معاه واحد البيسي جديد باقي بميكتو حلو ليها وقادو ليها ودابا راه حالاهم بجوج وجالسة قدامهم ماتحركاتش...دخل السي زايد عندي للكوزنية طحن العصير وعمر واحد جوج كيسان كبار وقاليها اجي نجلسو فالجردة وهز معاها داك البيسيات وراهم غير جالسين انا يالاه ساليت روينة ديال ديك الخضرة ستفتها وكنجمع الكوزينة

صبرت حتى عيييت وقلت ليها ضاروري بغيتك فشي حاجة الى عندك كي ديري غدا نتلاقاو قالت فاش بغيتيني قلت ليها حتى نتلاقاو وتافقت معاها حيت مابقيتش قادرة نصبر وهوا ماحاسبنيش كاينة تقول عمره عرفني .. ما كأزم ما مريض وانا غنموت بالفقصة وشي نهار نصبح كارمة غير بالغدايد . تلاقيتها الصباح فالبلاصة فين تافقنا طلعات حدايا قالت ليا راه درت السبة بالزبل خاصني نرجع .. قلت ليها واش كاين هوا قالت ليا الصباح مشا للخدمة وهي مزالة ناعسة .

جبدت ديك القرعة دالميكة صغيرة قلت ليها شوفي رشي هادا فالعتبة ديال دار برا فالباب دخلاني .. تخلعات قالت ليا ويلي منقدرش الدار كلها كامرات الى حصلت نمشي فيها .

ماخليتهاش تكمل الهضرة جبدت ضمسة ديال الفلوس ماحسبتهاش ولاكن راه ضمصة مديتها ليها قلت ليها مغاديري والو .. غير رشيه وصافي وغنعطيك بحالها الى رشيتيه

جبدت واحد الجلابة جديدة من اللور عطيتها ليها بقات كتشوف فداكشي مترددة وانا كنحاول نقنعها حتى قبلات و شداتهم وخليتها مشات ورجعت بحالي كنتسنى على اعصابي .. داز النهار وانا صابرة وعيطت ليها فلعشية كتهضر معايا بشوية قالت ليا راه رشيتو كما قلتي درت راسي كنسيق ورشيتو وجا السي زايد قالي شهاد شي صفر .. بال هنا الكلب سيقيه ودخل وبقيت كندور من هنا لهنا كنتلف حتى نشف داك الماء .. كنت غنموت بالخلعة

ارتاحيت فاش دارت داكشي وقلت ليها تحضيهم توصلي خبارهم وقطعت معاها ورجعت لغد ليه عند ديك الشوافة قلت ليها شنو درت قالت ليا صافي دابا تجيك خبارهم

هاد غيجيني خبارو مزال مازصلني وانا حامية فيا البيضة كنتسنى وكنعيط لبديعة كتقول ليا شنو كيوقع بالديطاي .. بقيت كنتسنى شي شهر وزيادة وهضرت مع بديعة قلت ليها واش باقا هاديك تما قالت ليا بقات ليها سيمانة تمشي ودابا كيجمعو الشوانط غيسافرو .. سمعتهم كيهضرو على السفر برا .. قالك اندونيسيا واقيلا وشي بلايص اخرين غيجلسو عشريام وغترجع يوصلها لطنجة حيت غتبدا القرايا

قلت ليها صافي اللي كانت قوليها ليا قالت ليا راه غتخرج هي وياه تشري داكشي اللي خاصها .. قلت ليها واش دخلات قالت ليا باينة حيت لقيت عندها الكينة دمنع الحمل فالبيت شاربة منها بزاف بقا فيها غير شي حاجة

الطعنة جاتني مضوبلة .. تهزيت وتحطيت وتفقصت قطعت عليها وهزوني هوايشي عند الشوافة مشيت عندها حيحت عليها قلت ليها هادي هي غتجيني خبارو ؟؟ هادي هي كوني هانيا انا كنتسنا تجيني خبارو طلقها صدق غادي يسافر هوا وياها .. ردي ليا فلوس دابا وبقيت كنحيح عليها فكوني منها غير العيالات وخرجت غنموت بالفقصة تبعاتني وحدة برا قالت ليا واش عطيتيها شي خدمة ديرها ليك .. قلت ليها اه .. قالت ليا مكانش عليك تعطيها .. هي مكتخدمش كدير غير الكارطة .. الكارطة اه كطلع ليها ولاكن الخدمة مكديرهاش مامعطياش ليها

قلت ليها بفمها قالت ليا غيرجع ليك غير ديري وديري قالت ليا لالا غير كدبات عليك باش تشد الخدمة .. شحال عطيتيها

قلت ليها 5000درهم فالت ليا لا غير ضحكات عليك .. راه ولاد الحرام كيعطيو لكدوب قتلة حضي راسك معاكن كطيحي .. كدبات عليك بلعاني بنت الحرام قالت ليه اه غيرجع الى خدمتي ليه باش نتي تقولي ليها خدمي ليا وتزدحك هي هاكا كدير حيت كطلع ليها الكارطة بيها باش كضحك على الناس

قلت ليها واش داكشي دابا مانفع فوالو قالت ليا غير ضحكات عليك .. الى بغيتي تخدمي غنديك عند واحد دقته مكتزهش الغبرة مسخوط تبان ليك النتيجة من الدقة اللولة ولاكن كيطلب الثمن . قلت ليها ماشي مشكل الثمن المهم النتيجة . قالت ليا خودي نمرتي عيطي ليا ونديرو نتلاقاو ونديك عندو مكاينش هنا جا فواحد الدوار كيمشي ليه الناس حتى لعندو

درت عاوتاني مع ديك خيتي نمشيو عند الفقيه ونضت الصباح باش يالاه ندوزو من اللوين .. طلعتها معايا فالطموبيل ومشينا شدينا واحد الطريق معندها حتى سمية ودخلنا فواحد الدوار حتى وصلنا عندو لقينا العيالات مربعين جالسين وبقينا جالين فواحد الصالة وهوا قدامنا كيدوز فينا .. على الاقل هادا عندو الدار نقية واخا فلعروبية .. تسنيت نوبتي وجلست سولني علاياش جايا قلت ليه ها علاش ها شنو بغيت و قالي خاصك بعدا القبول نتي هوا الاول حيت دابا مابقاش كيشوفك .. وديك خيتي دارت ليه التقاف على كولشي وساحرة ليه .. ونفكو السحور والتقاف بعدا اللي واقفين ليك فطريقك و نديرو ليك القبول نتي وعاد ديك الساعة نخدمو ليه يتفرق معاها

قلت ليه شحال ديال الوقت واش غيطول هادشي قال ليا نتي وحداتك .. عطاني شي تخربيق نشريه وشي نقرة من العطار يدير لسا فيها القبلة وشي اسماء ديال شي حوايج ماعمرني سمعت بيهم وقالي خاصك تمشي لسيدي بو لعجول تجيبي الماء من تما جيبي جوج بوادا ديال الماء . عمريهم وجيبيهم .

نضت انا على سعدي ووعدي رغبت هاديك اللي جات معايا نمشيو لهاد سي بو لخرا وبزز باش بغات تمشي وماعرفناه حتى فين جا .. اللي سولنا عليه كيقولنا عمرني سمعت بيه .. ايوا فين غنلقاو هاد سيدي بولعجول . زدنا شوية والشمس كتحرق كنسولو فالناس ونقلب عليه فقوقل والو ماطلعش ليا تقول كنقلب على المريخ فوق الارض . وقفنا عند واحد سولناه عطانا النعت ديالو وشدينا واحد الجبدة ديال الطريق غير الغابة ولخلا والقيفار . وصلنا لواحد الدوار قلتا ليهم واش هادا هوا سيدي بولعجول قالو لينا لا .. هادا دوار قزدير.. اش عاوتاني هاد دوار قزدير ولا الزمر حسابني كيكدب ووقفت عند واحد مول لحانوت عندو غير سرجم سولناه قال لينا دوار قزدير هادا مكاين هنا حتى شي دوار ولا شي حاجة سميتها بولعجول .

سولت شحال من واحد كيقولو نفس الهضرة ورجعت خارجة مع الطريق ولابيست حالتها والشمس كتغرب وتكرفصنا فالتقلاب والو ديك البنت كتقول ليا تعطلت خاصني نرجع لدارنا قلت ليها بلاتي نعرفو غير فين حنا واشمن طريق نشدو حتى الشانطي مقاد مكاينش غير لابيست والمغرب كتأذن وهي نفخات ليا راسي قلت ليها فخاطري تعطلي ولا جلسي ماعندي مندير ليك انا .. بقينا غادين والضلام كيطيح خفنا نبقاو تما واحلين ولا يخرجو لينا شي ولاد لحرام وبديت نعطي الجهد بطموبيل باش نخرج من لابيست للطريق حتى وصلت واحد الرمبوان الطريق عادية ووقفت عند واحد البوليسي قلت ليه عفاك تلفنا على الطريق ماعرفناش فين حنا وبقينا تالفين وكنقلبو على واحد البلاصة كيقولو ليها سيدي بولعجول قالينا ماشي هنا .. بعيد على هنا مع هاد الطريق ... وبدا ينعت ويورينا والضلام كيطيح وديك الزمرة مصدعاني باغا ترجع عصباتني قلت ليها الى بغيتي نزلي نزلي ماتمرضينيش تا نتي وهي تسكت كملت الطريق حتى لفين قالي ووقفت فواحد المبوبة على الطريق تكيت تما ونعسنا حيت قربنا للبلاصة وماعندنا فين نباتو .. صبح الحال فقنا مضهشرين فطرنا تما وشربت قهوة كحلة نفيق بيها وكملنا الطريق حتى لقينا بلاكة فيها سيدي بولعجول ودخلنا معاها ضربنا طوالة فلابيست حتى لقاع وسولنا على ديك العوينة ديال الماء قالو لينا مكتوصلش ليها الطموبيل . حطيتها وخفت عليها حيت مرسيديش خارجة دوبلفي فالثمن عطيت لواحد كيبيع الديطاي مية درهم قلت ليه الى رجعت لقيتها باقا كما هي نزيدك وحدة اخرى وناض وقف عليها ومشينا كنقلبو على البوادا منين نحيبيوهم .. شحفنا بالتقلاب فالدوار محشر ومشينا لواحد الزبالة لقيناهم تما هزيت جوج ومشينا على رجلينا مرة طالعين مرة هابطين وكنتلاقاو الناس جايبين الماء من تما و الطريق ديقة كدوز وتحد والحجر فالجناب والهبطة بحال الى طالعين فالجبل . ماوصلنا ليدك العين حتى شحفنا لقيناها عامرة وجلسنا شادين نوبة حتى وصلاتنا شللت دوك البوادا اصلا كان فيهم غير الماء مزيانين عمرناهم ورجعنا طالعين مع العقبة كنموتو .. سخفت وقلت نجلسو على شي حجرة نرتاحو ساعة تكركب واحد البيدو هبط مع العبطة حتى تفركع لتحت مع الحجر وانا نسخط صعرت ومشينا طلعنا عرقانين كنموتو حطينا البيدو فالكوفر ورجعنا للزبالة درنا نفس الخدمة وعمرناه ورجعنا مقطع فينا اللحم هادشي غير باش نتفوسخو الله يفسخ لهاد الفقيه عضامو

من سيدي بولعجول لعند داك الفقيه المجراب مارتاحيتش وصلت ليه البوادا وجلست كنتسنا النوبة حتى وصلاتني عطينتهم ليه دار فيهم شي عشوب مطحوني غبرة وقالي واحد سيقي بيه دارك واحد دوشي بيه . هزيتهم ورجعت للفيلا عندي عطيتهم واحد للخدامة قلت ليها سيقي بيه الفيلا كلها قالت ليا هادا يالاه يسيق بيت شنو هادشي . قلت ليها سيقي بيه ورشي شوية شوية ماتبقايش تسولي بزاف ديري داكشي اللي قلت ليك .

دخلت دوشت وشللت بداك الماء يفوسخني من العكس باينة ديك زينب دارت ليا شي حاجة وليت كنحس براسي ماشي عادية . المهم خرجت لقيتها كتسيق قلت ليها غنمشي للصالون ونرجع وخرجت مشيت للصالون اللي كنمشي ليه ديما .. اشهر صالون معروف هاي كلاص . دخلت ننشف شعري ونصاوبو وجلست فالكرسي كان الصالون عامر بالناس . انا كنصايب شعري وهي دخل ست الحسن والجمال ! دورت وجههي ضحكت قلت الله على صدفة هادي مابان ليها غير هاد الصالون .. ولاكن نعذرها مسكينة حتى هي بغات تجرب الصالونات الواعرين . سمعتها كتقول ليهم فالاستقبال بغات تصاوب وتصاوب ودير وشحال من حاجة .. عرفتها كتوجد للسفر ودازت مورايا مشافتنيش مشات دارت لاسيغ .. ساليت انا ومابغيتش نخرج حتى نعطيها واحد جوج كلمات مادام جات حتى لعندي وبديت ندير السبة بالضفار وشي حوايج ماكنت اصلا ناوية نديرهم .. جلست فالطبلة ديال المانيكير كانت طويلة فيها كراسا بزاف الناس جالسين كيصاوبو دفارهم وهي تخرج غير شافتني ماحملاتنيش ودورات وجهها وجلسات قالك بغات دير شي سوان لشعرها .. بغيت دام السوان يطيح ليك الشعر تولي قرعة انا كاع . مشات جلسات داروه ليها وخلاوه ليها فشعرها وناضت لابسة ليك سروال دجينز كحل وصندالة بلا كحلة و واحد تيشورط سامبل حتى هي كحلة والصاك نعام اسيدي العروبية تبلدات تعلمات تلبس و ولات تجلس فالصالونات الكبار وتتشرط ويجيبو ليها العصير حتى لعندها . جابوها حدايا كان كرسي خاوية وقفات وقالت ليهم مكاينش شي بلاصة اخرى من غير هادي قالو ليها لا كلشي عامر هانتي شفتي وهي تجلس كتسوط بغات تصاوب دفارها وماجات غير حدايا حطات الصاك من الجهة لخرى خافت نسرقها هه .. باز . طلقات يديها ومطولة ليك الدفار .. فين يدين بنت الجيل المشكين مابقاوش رطابو بالفلوس وولات كتربي الدفار هاي هاي ! والساعة فاليد والكورميط والخاتم ديامون وبراسليات كارتيي ولاهيلا وليتي تعرفي بزربة !. مشافتش جيهتي كانت ملوية على راسها سولوفان وبدات دير فالمانيكير حتى هي والريحة راشاها كي دايرة ! .. ماحملتها ماقبلتها مابغيتش نشوفها اصلا ودورت وجههي كنضحك قلت ليها بانو عليك الفلوس تبلدتي يا العروبية طميميعة . شافت فيا كضحك وقالت ليا عنداك الطرطقي يا العقربة هه

بدات كضحك وقلت ليها نطرطق هه .. علاش غنطرطق يا لعرقبة ديال بصح سحيحيرة

قالت ليا : كاين شي سحارة قدك ... مانعطيكش وقت براكة عليك هادشي ... اللي فيك يكفيك

قلت ليها : الحمد لله بديالي ماشي طماعة بحالك .. شفتي الفلوس والسيد لباس عليه طرتي عليه .. ماعرفتي شكون هوا ولا شكون يكون .. ياك الطميميعة

بدات كضحك ودوك الجوجات اللي كيصاوبو لينا كيشوفو فبعضياتهم وانا وياها بالبارودي عطيني نعطيك وهما خدامين وكيشوفو .. ماهمونيش لا هما لا هي وقالت ليا

طميميعة ! ... ماتوصليش ليا وعايراتني بالفرونسي وبدات تستهزأ

تعصبت ماعرفتش كفاش نجاوبها وقلت ليها كنضحك .. كدبت عليك ... طماعة واخدة الراجل على فلوسو . واخدة واحد مكيبغيكش اصلا ولا عمرو بغاك ... اما انا كان كيموت عليا سيري سوليه

طلعاتني وهبطاتني وقالت ليا: ايوا كان عور دابا تصحح ليه النضر رجع كيشوف مزيان .. عينيه كان فيهم العجاج ديال دخانك

قلت ليها : حبيبة كان مسحور بيا ماشي بحالك شاداه بالسحور حساب ليك ماعارفاش هه

قالت ليا : السحور نتي مولاتو اما انا بزااااف عليك مامحتاجاش نسحر ... الى كان كيبغيك اييييييلى كان فراه غير بالسحور ديالك كنتي شاداه وعفا عليه الله .. العطار كيشم غير ريحتو

بديت كنضحك وقلت ليها: هي شميتي ريحتك العروبية .. وليتي تعرفي الصالونات حتى نتي .. ايوا ماعندي مانتسالك تعلمتي فوقت وجيز وطحتي على الكنز يهزك من الجوع نتي وواليديك

ميقات فيا وقالت ليا: ايوا اكبيدة لعروبية ماشي عيب .. ماتقديش عليها بنت البيض الكروازي والدجاج الخانز والخضرة مسوسة .. نتي راه لعب بيك وكان كيدوز بيك الوقت ونهار بغا المعقول راه جا عند الاصل .. بنات الاصل ماشي بحالك نتي مديليلة

هزيت حاجبي وقلت ليها: لا احبيبة راك غالطة ... سولي راجلك بيمن كان غيتزوج .. انا اللي ماعطيتوش وقت وخليتو

ضحكات وقالت: وعلاش جيتي كتبكي وغتموتي .. بردي على راسك ها العصير شربيه يالاه تبردي شوية

قلت ليها : شربيه غير نتي باش نهبط ليك من القرجوطة .. اما البكا والشكا كيعرفو ليه غير اللي بغاو بصح ماشي اللي داخلين على الطمع .. ونتي معذورة حيت ماعشتيش شنو عشت انا .. الحب على اصولو .. جابك ديري ليه الاولاد وصافي

هزات راسها كضحك وقالت لي : ايزا كمديها راه شبع منك عرفك ماشي ديال المعقول .. عرفتي شنو .. عطيتك كنر من وقتك احبيبة ..شوفي ليك شي حاجة تنفعك وبعدي من الراجل راه كضيعي غير وقتك

رديت عليها : وقتي عااامر ماشي بحالك شافت الراجل شدات فيه بيديها ورجليها خافتو يهرب .. فين عمرك كنتي كتحلمي بواحد بحالو كن ما خليت ليه كية فقلبو جا عندك مكيشوفش باش يبرد كيتو .. وحتى دابا مزال طلعي ليه فالراس ويلوحك

قالت ليا: لا احبيبة انا مكنحلمش بالراجل بحالك ... انا كنقرا وهادشي كامل عندير دوبل ديالو .. وحنا الى تزوجنا راه تزوجنا عن قناعة ومقتانعين ببعضياتنا ومفاهمين .. ونتي واخا تعياي دوري عمرو يشوف فيك ..صافي تبيريميتي احبيبة غير شوفي ليك شي جهة اخرى شدي فيها ..

ساليت ضفاري ونضت كنضحك معاها قلت ليها بالصحة يا طماعة بروفيتي مزيان جاب ليك الله فيمن تبروفيتي

مشيت خليتها وجلست كنصاوب رجليا مجاوباتنيش وبقيت كنضحك مع هاديك اللي كتصاوب ليا رجليا جاتني غريبة حتى هي اللي قلتها ليها كتبدا ضحك ومع انا ديما كنصاوب عندها مولفين بالهضرة والضحك قالت ليا راه واكلة المعجون .. قلت ليها اري شوية ومشات جابتو ليا حيت كنت معصبة وكليتو بديت كنحس شوية براسي رتاحيت والدنيا هانيا كنضحك معاها وحسيت براسي نشيطة .. اما لاللاهم زينب مشات غسلات شعرها وصبغات ليك الدفار وزوقاتهم وبدات كتشالي بيديها وقطعو ليها ليبوانت من شعرها شطبوه للجنب جهة واحد لافابو ووقالي راسي جابو الله نقدر نحتاجو فشي حاجة ولا يطلب ليا الفقيه شي حاجة من شعرها .. يالاه نضت بغيت نمشي ندير راسي كنشلل يدي نهز منو وهي تنوض ديك الساعة سبقاتني وانا حمارة بقيت كنتلف باش ماتعيقش ساعا مشات هاكاك بشعرها مطلوق تحنات عليه جمعاتو كامل وطلبات ميكة من عند البنت اللي كانت حداها جمعاتو فيه وتمات جايا مبردة كتهضر وتحشي ليا قالت ليا ايوا الوقت والزمان الواحد هوا اللي يخاف على راسو . مشات جلسات وبقاو البنات غير كيشوفو فيها ويضحكو وميقو اما هي دارت الفوطة على كتافها كتصاوب شعرها وسمعتها كتقول لهاداك اللي كيصاوب ليها

بنادم مافيه تيقة حاضيك كتر من حياتو

قاليها لالا راه حتى واحد مايدير ليك شي حاجة خاصك تحيدي هادشي من راسي .

قالت ليه : محيداه ولاكن دابا لا .. انا اللي عارفة علاش كنهضر .. كمل ليا عفاك دغيا راجلي مابقا ليه والو يخرج من لاصال يدوز عليا يلقاني مزالة معطلة مكيبغيش يتسنا

بدا كيصاوب ليها وقاليها درتيها مفروشة ا مدام زينب

بدات كضحك وتشوف فالمرايا وقالت ليه : اللي بغا يشوف يشوف مغيعرفوش حسن مني.. ياك هزيت شعري ماشي شعر وحدة اخرى! ايوا صافي شغلي هاداك .. راك عارف بلا منشرح ليك راه ماشي ديما كنهزو معايا مي دابا سي دونجوغو مع شي ناس

ماكرهتش نجرها من داك الشعر وكتصايب وتشوف فيا وتسملل فعينيها . كملات قبل مني قالو ليها واش كنتي غتصايبي رجليك واش صافي انيولي قالت ليهم لا ماشي وقتهم دابا غدا مسافرة بكري حتى لتما ونصايب بيهم .. اصلا هاديك بلاصتهم .

ناضت مشات لاكيس حلات داك الصاك بدات تجبد فالزرقات مسرحين باقين جداد وحدة مور وحدة وتحط لهاديك اللي تما كتحسب وكتهضر فتيليفون اخر موديل فالايفون حتى قالت ليها صافي وجات ترجع ليها الصرف قالت ليها بصبعها عطيه للدري اللي صاوب ليا والبنات ومشات .. السيدة كتهلا فاللي كيخدم ليها داكشي علاش مسبقينها دايرين معاها الخاطر وطلعات مجبدة بنت الجبل شبعانة لبن وحليب وخبز الدار موكضة .. ولاكن فلتات بداك الشعر كنت باغا نديه نوريها الهضرة والفهامة شحال كيتقامو . ديت عيني جهة الباب والصلون كله زاج بانت ليا طموبيل زايد وهوا تما بلكاسكيطة كحلة وتيشورط كحلة وانا نتأزم جاتني البكية .. اما هي حلات الباب طلعات كتسلم عليه وكتوريه دفارها وتهضر معاه وضحك شحال عاد تحركو مشاو وبقيت انا شاداني السخفة ويدي كيترعدو بغيت ناكل دفاري .. شفت البلاصة اللي كنت كنركب فيها ونجلس فيها وعندي فيها ذكريات داتها وكتفرس فيا من لفوق بغاتني نقتلها شي نهار ولا نرتاكب فيها شي جريمة

تكعدت من فوق داك الكرسي مشيت بحالي ولاكن مزيان درت خير فراسي وليت كنبان انا هي بنت الجبل وهي بنت المدينة .. وليت حالتي يتقيا مني الكلب . جامي واحد الملل رهيب فالهدمة حياتي ولات فارغة .. مالقيتش اللي يبرد ليا القلب حتى بشرى وفدوى كيجيني منهم الملل مابقيتش كندور بيهم بزاف .. تكيت على البيرو عيطت لبديعة سولتها اش واقع فالفيلا قالت ليا راه الصباح شدو الطيارة مشاو .. تمنيت تقلب بيهم ديك الطيارة تهبط فوق شي جبل تشتت ويرجع ليا زايد سالم غانم حسن ما نزيد نعمر فالدنوب على ضهرها . بقيت طالعة نازلة فالفايس حتى لقيت راسي فواحد الكروب ماعرفتش شكون دخلني ليه .. ديما خاشييني فالكروبات وكنخرج ولاكن هاد الكروب بان ليا فيه مايدار .. كيحجو تصاورهم ويحطو فيه الحفلات والسفرات اللي كيمشيو ليها وبنادم كبير بعقلو مافيهمش البراهش وفيه غير شي خمسالاف واحد .. الله يجعل البراكة لهلا يزيد اكثر . بقيت كندور طالعة نازلة كانو دايرين واحد السهرة مسميينها كالا اول مرة نسمع بهاد النوع ودايرينها بالفلوس .. قلت نمشي حتى انا نشوف كي داير هادشي نقتل هاد الملل وننسا الوقت اللي عطاني الفقيه باش نتفوسخ ونفوسخ زايد من داك السحور اللي دايرا ليه ديك بنت الحرام باش يحل عينيه . المهم ساهمت ولقيتهم دايرين اللبس البلدي حتى انا مشيت تقاديت ولبست التكشيطة وقصدت القاعة دخلت كلشي حل فيا فمو فدوك الدراري حسيت براسي غريبة وغير الشباب اللي تما ومحيحين بالشطيح والرديح .. اما البنات شفت الغيرة فعينيهم وماتسوقش بقيت غادية لقيت واحد الطبلة فيها شي بنات ثلاتينات ولقيت السلام وجلست بيناتهم وهما كيتجمعو ويهضرو .. مجمع النساء مكانوش كلهم ميعرفو بعضياتهم ولقيت راسي مجمعة معاهم .. عضرة تجيب هضرة قلت ليهم انا فام دافير عجبهم الحال يتعرفو عليا ويتصاحبو معايا وواحد طبيبة دالسنان حتى هي كانت معاهم تبادلت انا وياهم انماري .. لقيتهم حمقات مساليات نيت وزعما كبار ولاكن ضاربين الدنيا بركلة ماهزين هم ماشي بحالي غنموت حاسة بالخنقة . سالات ديك الحفلة وعجبوني دوك البنات ماشي بحال فدوى كنقول ليها نخرجو كتبقا عليا اه راجلي اه لغدا له لعشا .. وبشرى ديما مسافرة ديما خدامة بزز باش كنشدها وكنبقا مقطوعة مكاين حتى علامن شكي .

سالات ديك الحفلة وخرجنا لبرا انا والبنات كنضحو بقينا واقفين وجاو واحد جوج مجبدين .. يخ على كنس الرجال اللي كنشوفو عند هادا كنشوفو عند هادا كرهت ديلمهم خيخت منهم وليت كنشوفهم كنتعصب .. والصواب ديالهم فاش كيشوفو وحدة جديدة كيزيد يفقصني .. بقاو واقفين مجمعين دخلونا بالهضرة والبنات كيضحكو ويتغامزو عرفوهم علاش جاول وقفو .. وحتى انا عرفتهم علامن كيدورو غير درت راسي بريئة .. تخيلت دابا كن نحيد قناع الحشمة والبرائة ونقول ليهم شنو كيدور فبالي وباش حاسة غادي يهرولو ماشي غير يهربو .. ولاكن كما عاطيينا وجه الصواب والرجولة عطيتهم وجه البرائة والانوثة قالو شحال زوينة وضريفة .. ايه اولاد الكلاب تموتو على الضريفات وتقولو ليهم ضريفات باش يتحلو ليكم وتخشبو يديكم ورجليكم فيهم . بداو البنات كيتشتتو غادين وقالي واحد فين غادية؟ واش نوصلك ؟

حسيت بواحد الشيطان فيا بغا ينوض يتكعد يهزو بشي جوج كلمات يغسلو ولاكن ابتسمت بقيت فديك الضرافة الرزينة وقلت ليه ليا جوسوي موطوغيزي ميغسي . زيدو حتى هادي غادي يقول باها وزير وقارية فالخاريج .. اما فاش وطوطات الطموبيل ميرسيدس هي الواعرة فدوك الطموبيلات كاملين .. وشنووو كنلعبو حنا .. راه الحديدة هاديك يعطي زكو ومايشريهاش دوبلوي هاي هاي . البنات بقاو غير كيشوفو وجاب ليا الله علامن نبان حسيت بالفخر .. كنهضر على الرجال اللي كتجي مرا طيب عليهم مكيرضاوش كيبغيو يطرطقو .بحال داك القرد اللي هربات ليه القردة وبقا ينقز باغي يقضي .

طلعت بديك الابتسامة الناعمة فطموبيل وخرجت عاجبني راسي مشيت بحالي .. ولاكن غير رجعت للفيلا بديت نحس بالفراغ ونحس بالمرض ورجعت نحزن ونفكر .

لغد ليه مشيت كأيها الناس للخدمة وعقلي مع داك الفقيه كنتسنى تفوت ديك الوقيتة اللي قالي باش نرجع وكنتلف الوقت ونسوط ماعرفتش اشنو ندير باش الوقت يطير ماقادراش نصبر . تاصلات بيا واحد النمرة غريبة رديت عليها لقيتها وحدة من البنات ديال البراح كتسول فيا وهضرنا عادي كنتجمعو وتعارفنا واصلا انا عزيز عليا التعارف عزيز عليا نبدل الكمامر . قالت ليا واش تخرجي نسهرو هاد الليلة قلت ليها شكون نتوما قالت ليا غير حنا انا وهند وفاتن و سارة . قلت ليها اه صافي معاياش .

تافقنا على الوقت والبلاصة ودرتها فبالي حتى سالينا الخدمة ومشيت للدار جبت واحد دجين وبودي واسع من لفوق قصير ومعري من الضهر عندو سيور رقاق فالكحل وطالون كحل .. ماعنديش مع ليغوب والتقزاب فالسهرة مكناخدش راحتي الا الى كان شي عشا رمنسي مع زايد اه .

لبست لباسي وصاكي ورشيت ريحتي ومكياج خفيف وطالوني ومشيت طلعت فالطموبيل نيشان لواحد النادي ليلي كبير فواحد الفيلا قدها قداش نقي وزوين .. تلاقيتهم ميتسناوني فالباب مفركسات غزالات وسلمت عليهم فرحو بيا .. طبعا بز منهم يفرحو بيا فاش كنشوفو شي واحد لاباس عليه و كلاص كنعطيوه قيمو واخا نغادي يعطينا والو . دخلنا كنضحكو وكانت بيناتنا وحدة عندها ربعين عام ولاكن راه نحلف عليها ماواصلاها .. خليني من العيالات مساكن واحد النوع كيوصل ربعين عام كتلقاها غليضة قدها قداش ولادها دايرين بيها وشعرها فالعكسة ومجمعة مع العيالات حدا باب الدار . لااالالا كنهضر على الربعينيات الكلااص الاللة كنهضر على الجهة المضيئة بالفلوس والخدمة السيدة مافيها حتى تكمشية وغزالة كضحك كتوصل الضحكة للطيارة اللي فالسما .

كانت الدنيا مزوهرة والجردة كبيرة كل جلسة فين وجلسنا فالفوطويات مجمعين فالهواء الطلق والديكورات والاضائة .. الله شحال زوينة الخرجة غير مع البنات بلا ميكون فيها كحل الراس . تعشينا كلنا .. الله يعز الفلوس كنطلب بلا منضرب ليهم حسبة وشحال عادي ماشفت الاحراج المادي الحمد لله تهنيتو منو . مور العشا طلبو مشروب كحول حط ليهم جوج قرعات مختالفين وكانو كيكميو كارو العيالات رقيق وكنتجمعو .. حسيت براسي بحال مهم مكندير والو وقالت ليا هند واش كتشرب نكب ليك قلت ليها اه اه بيان سيوغ . عطاتني الكاس كنشرب منو بشوية وكنضرب ونقيس وكميت معاهم شي كويروات ومابغيتش نكتر فالشراب نطيح كاو .. غادية عيني ميزاني وحسيت باسي وليت كنفهم فالشراب وغادية للاحترافية ماعندي مايتسالني .

حدي حسيت براسي شد فيا ويدي تقيلة حبست قلت هادا هوا الجهد باش منديرش شي فضيحة ولا نجلس نندب على زايد راني على سبة .. ولاكن جاني الفوغيغ شبعت ضحك مع البنات وسكرنا ولاكن ماشي حد الكاو .. هاد القياش هوا اللي كان خاصني وجا معايا .. عيينا صافي بغينا نرجعو بحالنا ونضنا خرجنا كنتمشا ولاكن مرة مرة كنميل . المهم .. نميلو ومنطيحوش . وصلت للطموبيل توادعت معاهم ماعقلت كاع شكون خلص داكشي كامل المهم انا ماحطيت حتى ريال وحتى صاكي بقا فالطموبيل نسيتو . ركبت بقيت جالسة شحال مركزة وقلت خاصني نتوكض السياقة هادي وتوكضت حليت عيني خرجت انا اللخرة فالبنات وكنحس بالترويعة ديك الماكلة تنادم معاها الحال بغات تخرج .. انا يالاه خرجت من تما مع الباب لكبير مع الدورة كانت واحد الطموبيل كحلة مع الضلام قدامها وحدة اخرى واقفين جنب الطريق .. تلفو ليا رجليها ودخت على الفران ودخلت فيها من اللور

ضربتها وبقيت جالسة حتى بان ليا واحد خرج من ديك الطموبيل لابس الكحل واللي قدامو حتى هوا خرج وجا شاف الضربة ووقف عليا بقا كيشوف فيا وقاليا

- وجااالسة !!!... نجيب ليك شي حاجة تشربيها ؟

شفت فيه مابانش ليا مزيان مابقيتش عاقلة على راسي وحسيت بلساني شوية تقيل كنبغي مهضر كتخرج معطلة وكندير بناقص من الهضرة كاع .

قال ليا واخرجي شوفي فين دخلتي باغا الضربة تجي عندك !

حليت الباب خرجت ماهضرتش معاه ومشيت كنقرقب شفت الضربة وقلت ليه : ومالها ماشي شي ضاااااربا غير ضريبة!!

جا لاخر اللي معاه وقف كيشوف فديك الضربة ولاخر مول الطموبيل قالي : ماشي شي ضربة !!! ضربتيها هزيتني انا وياها وكتقولي ماشي شي ضربة غير ضريبة

عصبني بديت نأفاف وقلت ليه : صافي صافي براكة من الهضرة بحال لا ضربت ليك طيارة !! .. راه طموبيلتي تا هيا كلاتها ماشفتيهاش !

قالي: وانا دخلت فيك !! نتي داخلة فيا هاطريق اش جابك ليا (شاف فصاحبو) تفووو يالاه جينا نشعلو داك كارو طفاتو لينا فالفم

هزيت فيه صبعي وقفت قلت ليه : ايييوا تفو خليها عندك عرف راسك معامن كتهضر

ضحك وقالي: واعرفيني !!.. شكون نتي كااع .. عرفتي شنو ردي طموبيلتك الله يحفضك وسيري .. صافي سيري فحالك مابغيت منك والو

قلت ليه : شحااال كااع غادي تكون ساوية هاد الضربة ... انا غنعطيك باش تصلحها وسد فمك

قالي: ماتعطيني مانعطيك سيري غا فحالك حيديها من ورايا

قالي صاحبو : ديماري رجعي شوية اللور باش نشوفو شنو واقع

طلعت ديماريت وهوما واقفين مول الطموبيل طلع ليه الدم شعل كارو بقا غادي جاي كيبركم بوحدو كيبان ليا غير خيالو .. رجعت اللور وعاودت خرجت طليت مابانش ليها مزيان مهم بولة شاعلة بولة طافيا وقلت ليه

- مالها مزيانة !! .. شنو واقع ليها غير مجروحة واقيلا

جا عندي مولاها قالي مجروحة !!! ... لا اختي نتي راك بنتي ليا مفوتة مكتعرفيش اش كتقولي ومكتشوفيش .. سيري غا فحالك دابا الله يحفضك

جيت نجاوبو وطلعات ليا التقية بقيت كنخرج الحروف كنت غنقول ليه واحد جوج كلمات على ودنيه ولاكن سدات ليا التقية فمي ومشيت كنجري مور الطموبيل بديت نرد حتى سخفت وكنسمعهم كيهضرو بجوج ماعقلتش اشنو كيقولو وهزيت راسي كيبان ليا غا هوا كيمد ليا قرعة دالماء

شديت ديك القرعة خويتها على وجهي كامل كنلهت وهبطت عليها شربت حتى فشلت وعطيتها ليه قلت ليه بالسسخفة شكرا ومشيت خليتو واقف طلعت تكيت على الكوسان بقات رجل برا ورجل لداخل حتى وقف عليا خوا نيت قاليا واش قادرة تسوقي ؟

حركت راسي بزز قلت ليه : قادرة ... عطيني نشرب سخفت

عطاني القرعة هبطت عليها ورجعتها ليه قالي واش سيووغ قادرة تمشي بهاد الحال !

قاليه صاحبو صافي خليها ضبر راسها يالاه نمشيو حنا مالنا .. سمحتي ليها فضربة قداش صافي زيد فحالك اجاد ماناقصنا صدع يالاه فكينا مشكيل لبارح نعاودو نغرقو فواحد اخر

حليت فيه عيني مالقيت ليه جهد ولساني تلوى ليا .. بقيت كنشوف فيه لين شفاري بزز ومتكية وقلت لداك صاحبو

- قاصحك شي واحد ؟ .. ضربك شي واحد ؟ ... هضر معاك شي واحد !.. واسد قمقومك براكة من الهضرة راه غير ماعنديش ليك الطاقة اما نوريك درتي فيها وخير والهضرة الناقصة

قالي واسيري ونتي كاس تلفك على سميتك وباقا كتهضري

نضت خرجت من الطموبيل قلت ليه كاس واتر فيا اما نتا بحال الجمل برميل وميقدك كرشك تسكر ونتا لا .. حسابك واعر .. واسيري

جا لاخر بيناتنا وقف قاليه صافي دابا فرعتو لنا راسنا .. طلعي اختي شوفي واش قادة تسوقي

قلت ليه : نتا حسن من هاد خيينا هادا شو وجهك كي داير كيبين شنو عندك لداخل

الصراحة ماشفتش وجهه اصلا ماكايبانوش ليا كاع كي دايرين وهاداك اللي ضربت قاليه صافي سير اصاحبي ..

دار ليه واحد الاشارة شفتها بزز زعما هي مفوتة ونتا كتعطا معاها صافي دوزها .. قلت ليه انا شوف .. راه ماشي عورة انا راني شفتك غمزتيه .. واسير نتا وياه راه نسوقكم بجوج

طلعت وقالي ويالاه صرعيها وسيري فحالك نشوفو

رجعت اللور يالاه سايقة وكنت غندخل فواحد الحجرة تا بداو يغوتو بجوج هزو يديهم قالو لي عنداك عندااااك وقفي وقغي وانا نوقف وهوا يقوليه صاحبو شوف كي دير مع هادي ماتقدرش تمشي فحالها

قاليا هاداك اللي صربت واش جيتي بوحدك شكون جا معاك

قلت ليه صحاباتي ومشاااااو

صاحبو جاه اتصال بدا يهضر وقاليه انا غنسبق لشي بلاصة ماعرفتش اشمن بلاصة قصد ليه ورد عليه لاخر قالو فين غتمشي غتخليني مع هادي واحل هنا اصاحبي

قاليه فلانة واقفة كتسنا والليل هادا ومشا بقا معا مول الطموبيل قالي فين كتسكني نتي فين ؟

بديت نعت ليه بزز وجرني بحال المعزة قالي خرجي من هنا خرجي

خرجت من بلاصتي جلست فالجهة لخرى وجلس بلاصتي كيهضر بوحدو قالي غنغامر معاك وصافي .. غنوصلك فحالك ونرجع لهنا فطاكسي صغير هادشي اللي غندير واخا عطبتي لينا الطموبيل فهاد الليل

طلع حدايا يالاه زاد بيا وانا نعس مابقيتش عاقلة على راسي حتى بديت كنحس بشي واحد كيحركني ويرشني بالماء وحليت عيني بزز .. السكرة والنعاس وانا اصلا النعاس كيسكرني بلا والو دابا كملات . قلت ليه خليني نعس وخرجتها بزز وشمعتو كيقول ليا واش هادي هي دارك ؟ غا شوفي فيها ونعسي شوفي واش دارك هادي

قلت ليه اه وانا ناعسة وعاود رشني بالماء وهزني من قرفادتي قالي شوفي هنا .. قلتي ليا دراي هاد الفيلا ديالك ؟ دوي

شفت فيها بزز وقلبت وجههي ويدي كنحكركهم بزز ماقدرتش .. كنشوف غير بزز بان ليا نزل بدا يصوني فيها وفتح ليه العساس وانا قالبة وجههي جخة السرجم والهواء كيضربني .. قاليه واش مولات الدار هي هاديك اللي فهاد الطموبيل؟

جا العساس شافني قاليه اه اسيدي ياك لاباس شنو وقع ليها

قاليها لاخر : لا والو غير سخفات وجبتها دابا متأكد هي

قال ليه العساس : اه اسيدي هي لالاة شيماء

رد عليه لاخر: واش كاين شي واحد فالفيلا يخرج يدخلها ..

قاليه لعساس: غنعيط على سعاد خدامة ديالها ..دابا راه تكون ناعسة

قاليه لاخر: عيط ليها الله يحفضك اخاي راه خليت طموبيلتي فالخلا

مشا العساس دخل ورجع عندي داك جاد قاليا اختي هانتي وصلني على سلامتك .. مرى اخرى الى فوتي غتلقاي راسك كندا و ضربي وقيسي .. هادي ها سوارت طموبيلتك تهلاي

بقا واقف حتى شكرا ماقلتهاش ليه وجات سعاد كتجري هزات ليا صاكي وعاوناتني دخلت مع الباب ودورت وجههي شفت ورايا لقيتو باقي واقف حاضينا وشيرت ليه بيدي ماعرفت علاش شيرت وهز ليا يدو ومشا بحالو وطلعاتني سعاد لبيتي طحت على نموسيتي بحوايجي نعست ماعقلتش على راسي

دخل الصونيت ديال تيليفون لودني فيقني .. حليت عيني بزز جريتو لقيت وحدة من البنات كتصوني عليا كتسول عليا .. نضت كنهضر جلست هضرت معاها شوية وكنحس براسي كيضرني . قطعت وعيطت لسعاد جابت لياوليبران شربتها ونضت جمعت حوايجي ودخلت للحمام .. هزيت راسي فالبرودويات ديالي كنلقا شحال من حاجة ناقصة وانا نعيط لسعاد كنت واقفة بدو بياس وشعري فالسما مشعكك جامعاه غير بواحد ستيلو .. قلت ليها فين هوا بات دوش وشمبوان مالقيتهمش

بدات تفتف عليا قالت ليا راه خواو وجمعتهم رميتهم

عرفتها غتبدا تسطا عليا بحال اىة انا زعما جايا من القمر مكلخة وقلت ليها عاد جبتهم كنشربهم انا باش يخواو ... فين درتيهم هزيتيهم .

بقات كتحلف وتعطي لراسها ودعي فراسها دخلات ليا الشك فراسي وليت كنقول واش اللي حماقيت ولا بنت الحرام رزاتني فيهم خلاتني زبطة كنشوف فالسما .. ولاكن انا متأكدة جبتهم من البارا وخليت فيهم شوية راني باقا عاقلة ماشي داز عليا عام وانا ناعسة .. ماطولتش معاها الهضرة وراسي كيزدح قلت ليها داااابا غالبسي جلابتك وتمشي للبارا عند البنات انا غنعيط ليهم يعطيوك داكشي جيبيه وماتزيديش معايا الهضرة

قالت ليا بعيد الحال غنتعطل قلت ليها غتمشي بالزربة وتجي وطيري يالاه غنهبط نفطر نتسناك

خرجات مشات باش نعلمها دوخني وشافتني فايقة من السكرة قالت هادي غير مسطية ولاكن سيفطتها تمرمرد باش تعلم تحط يديها على ديال غيرها . لويت عليا واحد البينوار كحل ديال واحد البيجامة ونزلت لتحت جلست كنشرب واحد الكاس ديال القهوى بوحدي حتى بان ليا بابا داخل مع الباب وانا نجمع النوضة .. من شريت ليه واحد الطموبيل وهوا خيطي زيطي عندي كيغفلني . شفتو كيهضر مع العساس قلت صافي حط ليه الضوسي وغنجري على مو يمشي عند بابا يخدمو.. لاكن ماهضرش و دخل عندي كيسرح عينيه وكيهضر بالجهد وراسي كيحرقني وفيه التبركيك والحضية والنكير كيعطيه قتلة داكشي علاش هربت من الدار . قالي مامشيتيش للخدمة ليوم قلت عيانة مريضة وبقا يبحث فيا .. قالي بوحدك ..قلت ليه سعاد مشات تسخر .. جلس خويت ليه واحد الكاس ديال القهوى وتكى قالي راه لقيت واحد الارض فواحد التجزأة .. بغيت تكملي ليا باش نشريها ندير فيها شي مشروع . شديت راسي غينفاجر قلت ليه شحال خاصك قالي ستين مليون .. فيقني من الدوخة خرجو عيني وقلت ليه وهي شحال دايرة ..قالي ستين مليون .. وانا باك مالك ما تشريش ليا الارض ماتعتقي ما ترحمي نتي .

سكت وكلت امري الله قلت ليه انا غنشوف وندوزهم ليك لحسابك .عجبو الحال وتمرح قالي ولاكن غنقوف عليك عاوتاني .

طيح عليا الضيم قلت ليه فاش

قالي ايوا شكون غيعاونني ندير المشروع نشري الارض ونجلس فيها

شديت راسي كنكره يجبد ليا حس الفلوس ويطلب ليا كنكره جنابي اللي يقول ليا عطيني . سولتو شنو بغا فهاد المشروع قالي بغا يدير فيه حمام وفران لتحت . الله ياربي الله هادشي خصو ميزاينة .. قلت ليه قول ليا عطيني ميات مليون وتهنا

قالي ايوا بحال داكشي .

سكت بقيت غير كنشوف قلت ليه حتى نشوف واش غتخرجني الميزانية وهوا يقول ليا والطموبيل خرجتيها دوبلفي القايد ماسايقهاش حتى جيت دابا انا عندك عاد ولات الميزانية ما االميزانية . دورت وجههي كندور فعيني عرفتو غيبدا يحسب ليا ها الفيلا ها الطموبيل ها مانعرف شنو وانا نسكتو قلت ليه صافي انا غنشوف وهوا يجلس قالي لاااا نعول عليك ... صافي راه درت مع الناس ناخد الارض غيديوها ليا هي اللي بقات شوكة

قلت ليه فخاطري الشوكة هي واحلة ليا دابا فحلقي غنعطيه الفلوس وانا كنبكي وماعندي ماندير وتبتو عاد تهنا خلا ليا ديك القهوة وخرج قالي يالاه هانا مشيت بحالي

بقيت جالسة خرج ليا بروصي فيه زبالة ديال الملاين غنحطهم عمرني تخيلتها ... كمل عليا جاتني السخفة وفشلت فوق الطبلة . الا الفلوووس الا الفلووووس اعباد الله طلبو اللي بغيتو . انا تكيت نبرد السخفة وهي تعيط ليا خالتي . ايوا كيدايرة بنيتي شخبارك شخبار الدار كي غادة مع الخدمة . بدات تلوى عليا فالهضرة وانا كنتسنط مافيا اللي يجاوب وجاتني نيشان قالت ليا عفاك احبيبة سيفطي لينا واحد الخمسة ديال المليون الله يرضي على بنتي مكاينش من غيرك يفكنا .. قلت ليها شنووو شنو كتقولي!! قالت ليا راه ختك مسكينة لقات واحد الطوينيبيلة قالها عشرة وماضرباتش حسابها .

ختي زعما اللي يالاه ولان ختي اللي هي بنت خالتي اللي اصلا مكنهصرش معاها حتى فالاعياد ليوم ولينا خوت سبحان الله على نهار . قلت ليها ايوا تشري ديال خمسة براكة عليها .. بقات دوز ليا من هنا ومن هنا وتحلون قلت ليها من اللخر مع انا اصلا مكنمركش عطيتها . قلت ليها شوفي شوفي اخالتي . كن كان شي مرض شي عملية شي حاجة اللي ماخصهاش تسنا تسنا ضارورية اه على الراس والعين ... ولاكن تجي تقولي ليا طموبيل !!! هادشي مكيدخلش للعقل

قالت ليا ومابغيتش نكدب عليك جيتك للصراحة زعما وهي بحال ختك وبدات تخور عليا فالهضرة براكة غير با اللي جا حزقني على الصباح كيتو باقا فحلقي باغا نساها ماقيتدش . جابت ليا الضحكة وقلت ليها هاد الساعة ماعنديش غير سمحي ليا

بقات تلون عليا وقلت ليها بسلامة قطعت .. ضسرو ضسرو ضسرو اكثر من القياس ساقو الخبار سيفطت شي فلوس لواحد ولد خالتي كان وقف عليا بغا يدخل لجوندارم يخدم ولقا اللي يدخلو غير طلبو ليه الفلوس وقالها ليا حشمان مسكين كيواعدني باش يرجعهم ليا فاش يبدا وعطيتو خمسة دالمليون قلت ليه الله يسامح بحال خويا واصلا كان كيطلبها وحشمان مني وحتى انا ماريضيتوش وفاش سيفطتها ليه تاسع فيه الحال ومو كدعي معايا وباه ومع ذلك فاش بدا الخدمة قالي راه عطيني النمرة دحسابك ندوز ليك فيه شي حاجة ونبقا كل شهر نحط ليك حتى نكملها . فاش دار معايا هاد لوجيست حلفت عليه مايردهم ليا وهوا يالاه بادي انا نحلف هوا يحلف وصافي مابغيتش نشد منو الله يسهل عليه حتى هوا يستاهل . ولخرين فاش سمعوها صافي قالو البنك العائلي موجود يعطينا الوقت اللي بغينا وابااااز

هادشي اللي كان ناقصني كنبان ليهم انا فالربح الفلوس غير كيتشتتو عليا !

وصلات لاللة غنو فشلانة هازة الصاك ديال ليبخودوي وقالت ليا

- سخفت عمرني ننسا هاد النهار

قلت ليها اري لهنا داك الصاك نشوف شنو جبتي وكنت نسيت ماعيطت للبارا على شنو غيعطيوها ساعا جابت داكشي هوا هاداك .. قلت ليها شنو قلتي ليهم قالت ليا قلت ليهم شمبوان وباندوش وعطاوني وحدين اخرين قلت ليهم لا ماشي هادو هي كدير وحدين اخرين وعاد جات واحد الوحدة تما قالت ليا واش مادموزيل شيماء قلت ليها اه وجبدات ليا هادشي

قلت ليها ماعليكش المهم راك مطرقة سيري شوفي شغلك انا غندخل ندوش ونضت طلعت للحمام والصراحة واخا كتفقصني وكتبغي مرارتي طرطق ليا ولاكن راه كتعجبني فالسخرة وكتفهمني وحادكة حارة فشغلها وكترد البال لكولشي وهادشي كيشفع ليها فزبايلها وكندوزهم ندير راسي مافهمتش. هاد المرة دات ليا الشمبوان وبان دوش المرة اللي فاتت خوات ليا الثلاجة داتها وخلاتني بلا تقدية كنت كنشرب من دمعا .. ورازياني فالمكياج والتخربيق ديما كناقاها طالياه راسها .. هي ماشي شفارة وعمرها مدات يديها على شي حاجة من غير هاد التخربيق ديال البنات حتى هي كتبغي دير وطلس وكنقول ماشي مشكل دوزها راه بنت بحالها بحال البنات كتبغي طلس لوجهها .. وديجا عطيتها النص جمعتو قلت ليها خوديه ديه وشريت من جديد ولاكن كتنبش كتبغي تجرب وترش وتقول لصحاباتها الفيلا ديالنا وحصلتها شحال من مرة كتكدب على الرجال حتى جا خطبها واحد من هنا واحد المرى وجات كترغب كتقولي ماتفضحينيش هاشنو قلت ليه عاشنو وغسلتها باش تعلم ودوزتها ليها صدرنا داك خيينا مشا بحالو

دوشت وخرجت لبست حوايجي .. الدجينات بحال ديما .. كنحماق عليهم مكاين غير المحكوك والمقطع والمشرك والمستل وطاي هوت وتيشورطات والنضار .. خرجت من الفيلا شفت طموبيل تفكرت الضربة وكحلت بالعما .. الله اربي اش درت خاصني عاوتاني نمشي نصلحها ونجلس نتسنا درت بريكول راسي .. تفكرت اش طرا وتفكرت كولشي وزدت تفكرت هادوك اللي كيقولو ليك سكرنا وفاش فقنا ماعقلنا على والو .. هزيت فمي فالسما خريت بالضحك على اكبر كدبة كيدرقو بيها السكايرية فعايلهم ويقول لبك نسيييينا .. وخصوصا البنات ... مكايناش هاد القضية ديال نسينا فحتى بلاد ولا فشي قارة من القارات .. واخا تشرب حتى تشعل للبولة تسعين وماتبقا عارف مادير وتولي جرتيلة يجروك من رجليك ونتا ماحاسش .. اينفزا كتفيق من القلبة كتعقل على كاااع داكشي اللي درتي .. راه ماكتفقدش الذاكرة غير كتسكر ويطير ليك الفرخ وعقلك عادي كيسجل باش من بعد تفيق وتذكر. ولاكن وجهه دوك الزوج اللي ماعقلتش عليهم مزياااان ... صورتهم فبالي وماواضحاش ماقادراش نتبت الملامح كيهربو ليا من دماغي حيت كنت سكرانة نيت فاش شفتهم اول مرة وهادي فعلا كتوقع .. مكتعقلش مزيان على الوجوه اللي كتشوف اوا مرة فاش كتسكر ولاكن الصورة راه عندك فبالك خاصها توضاح وصافي

ماعلينا هزيت الطموبيل مسكينة ديتها تصلح ومشيت كريت وحدة اخرى عاوتاني تهز ليا رجليا ودزت نشفت شعري فالصالون ومشيت عند الفقيه المجراب جلست كنتسنى النوبة تا وصلات وجلست قدامو قلت ليه درت داكشي اللي قلتي ليا شنو ندير دابا .قالي هاكي هاد الشمع بقاي تشعليه فالدار يبات حتى يطفا وديري كل نهار جزج شمعات وخليهم راه عندك تما 3 ايام ديال الشمع .. شديت داك الشمع احمر وواحد الورقة حطاها ليا قالي كتبي فيهم هادشي وهاشنو ديري هاشنو ودابا خصليني فتفوسيخا وطير مني الف درهم وقالي هاديك اللي درتي غير تفوسيخة ديالك .. ولاكن ديال داك اللي كتبغي راه صعيبة غادي نخدمها ليك هنا جيبي ليا شي حاجة من حوايجو . الله ياربي كي غندير نجيبها ولاكن بديعة فالدمة هي اللي غتفكني . خرجت عيطت ليها قلت ليها شنو تجيب بقاو كتلوى عليا تا طمعتها وخلاتني منشورة حدا الفيلا كنتسنا عاد خرجات ليا واحد تيشورط ديال لتحت شديتها وضبرت عليها .. توحشت نشم ريحتو وبديت نعنق ونبوس فديم تيشورط ورجعت كعطة للفقيه قبل المغرب حيت كيجمع ويطوي عطيتها ليه وعطاني واحد الحجاب ديال النقرى فيه شي كتابة قالي هادا القبول بقاي معلقاه ديما غيجلب ليك القبول . طلب مني مية الف ريال عطيتها ليه وراق وخديت داك القبول درت ليه واحد الخيط وعلقتو فعنقي ومشيت بحالي .. نهار ديال طلع وهبط سخفت ودخلت للفيلا طلعت لواحد لبيت دايراه للضياف اللي جا يبات فيه عندو ناموسية وكلشي وبدلت حوايجي لبست واحد البيجامة مقزبة وربعت فالارض شديت واحد الابرة بديت نكتب فداك الشمع وونكمل فالشمع لاخر وكل شوية طيح ليا الابرة ونوض نقلب عليها حتى سخفت وحطيت واحد جوج شمعات شعلتهم وبديت ندردر عليهم فالحرمل كما قال حتى دخلات عليا بديعة لقاتني كندردر خلعاتني قالت ليا شكديري قلت ليها ماشي سوقك سيري مادخليش لهنا وخرجات بقيت بوحدي .

خليت الشمع شاعل وسديت الباب نزلت للكوزينة نوصيها مادخلش لتما لقيتها مجمعة فتيليفون كضحك وتقول عليا خطيرة مسخوطة لقيتها خدامة كتحسر فواحد البيت وانا نقفزها حتى طاح ليها تيليفون فلافابو فزك وقلت ليها شدي يالاه دنوبي عادو باش تعلمي تهضري فيا .. والله ومادخلتي سوق راسك حتى ندير فيك شي موصيبة هاني علمتك .. والبيت مادخليش ليه

قالت ليا الى طاحت شي شمعة غتشعل العافية حطيهم وسط شي طبسيل قلت ليها ديها فراسك انا قادة بشغلي ومشيت طلعت للبيت بغيت نخرج قنطت وعيطت للبنات .. وفاتن وهند اللي بغاو يخرجو صافي ولبست واحد الكسوة موردة قصيرة زوينة عنظها الخيوط من الكتاف خفيفة ماشي سوارية غير كسيوة ومعاها قرقابة خفيفة وطلقت شعري ودرت معاها نضاضر شفافين مستلين عندهم سنسلة من الجناب شكلها مستطيل زوين وماكيت شوية ودرت الريحة وهزيت صاكي خرجت تلاقيت بيهم مشينا لنفس البلاصة ديال البارح .. عجباتني ورتاحيت فيها وجلسنا بقينا مجمعين وتعشينا وشربنا وكمينا وبديت كنضحك حتى لودنيا وخلصت انا هاد المرة .. قصرنا شوية ونضنا نمشيو بحالنا .. جاب الله لابسة البلا حيت كل شوية نميل ومنقة صاكي وكنضحك حتى دزت فالخرجة ديال الباب فالجردة حدا واحد الطبقة فيهم بنات واولاد مجمعين وعيني معسلين كنحس بيهم فشكل .. جاني الضحك ديال الدنيا والدين بقيت غادة مجمعة مع البنات تا وقفني واحد قالي

عليكم السلام ...

قلت ليه السلام !!... ياكما زطمت عليك اخويا سمح ليا ههههه .. ولا عرفتي شنو لهلا تسمح بقيتي ليا غا نتا

بقا كيشوف فيا كتبان ليا غير القميجة بيضاء وقالي واش نتي مكتسحايش !!!

قلت ليه لا وطلقتها بواحد الضحكة ورجعت باللور وانا نضرب واحد طيحة شديت فالهوى وجيت جالسة .. جات هند وفاتن كيجريو يهزوني ساعا حتى هما كثاار مني رباعة ديال السكايريات طاحو عليا وانا نحزق وديك الكليكة كيخراو بالضحك .. قلت ليهم حزقتوني وبدينا نضحكو جاو دوك الدراري هزونا وقفنا وداك الدري جا عندي قالي .. كندا نيشااان هاد المرة

بقيت كنشوف فيه قلت ليه ماشي نتا هوا جطو ولا شي حاجة بحال هاكا .. قالي انا علي الهمة .. ونتي بزااف اختي عالااام .. سيري سيري موحااال توصلي

قلت ليه نتا اللي موحال توصل .. اه نسيت ماقلت ليك شكرا وصلتيني لبارح مهم انا قلتها ليك .. كي بقات طموبيلتك

قالي فالانعاش اختي ونتي طموبيلتك صافا عليها

قلت ليه كوما وانا نهزها بواحد الضحكة ومشيت خليتهم كيشوفو ويضحكو خرجت وكنت كريت واحد فياط سانسو حمرا بحال اللي كانت عندي نقضي بيها .. طلعت فيها وانا نتلف .. ولفت الاوطوماتيك وهادي جيت ساحية سايقة مزيان دابا بديت كنقلب على ليزوبسيون اوطوماتيك كنت غنتسطا غير بوحدي وهبطت راسي كنشوف حدا رجليا كنقول مالها ولات هاكا .. هرب ليا مابقيت فاهمة والو وديماريت مشيت كنشطح فالطريق وكل شوية نحبس نتقيا حتى وصلت لباب الفيلا كنكلاكصوني يحلو ليا حتى بان ليا العساس ديالنا جاي عندي وقف عليا قالي اجي راه ماشي هنا ها الفيلا ديالك .. هزيت عيني كنشوف لقيتها ماشي هي ورجعت اللور كيدني دخلت لداخل وحليت الباب مع الحلة بغيت نزل جيت برا على فمي انا وصاكي وسوارتي وتيليفوني . جات سعاد كتجري كتحزم راسها هزوني ودخلاتني قلت ليها صافي انا غنطلع ننعس .. طلعت لفوق مشيت للبيت اللي فيه الشمع حليت الباب طليت عليهم لقيتهم دابو كاملين لسقو مع الارض وسديت الباب مشيت لبيتي طحت على الناموسية نعست

فقت بحال شي حمقة وهاكا رجعت كنفيق ديما .. وهادي ايامي وعاجبني الحال .. تبعت داك الشمع حتى كملتو ومشيت رجعت عند الفقيه قلت ليه راه كملتو . قالي دابا غادي نفسوخو ليك الراجل اللي كتبغي وغادي نحيدو ليه السحر اللي دايرة ليه هاديك .. ولاكن راه القضية غادي تجيك غالية. قلت ليه شحال كاع غتجيني قالي واحد المليون وغادي تجيبي ليا الضحية ..قلت ليه صافي المهم يتحيد بيه السحر وغدا نجيب ليك الضحية.. قالي لا الضحية فيها شروط انا اللي غنشريها راسي والجواد راه باغيين ضروبة .. قلت ليه وشحال كدير هاد الضروبة ..قالي واحد المليون .. قلت ليه بزاف مليون ديال التفوسيخى مليون ديال الضروبة وعاد عطيتك ميلت الف ف عشرين راه وصلتا لربعة دالمليون !! قالي ايوا هادشي يحساب ليك ساهل .. مرتو راع دافنة ليه السحر فالقبر المنسي حتى مابقاش كيشوف قدامو .. كتقول ليه شا شا را را .قلت ليه بصح السيد تبدل ولات كتشرط عليه ويقول واخا وهوا كان كان بحال التور . قاليا ايوا سحورها تقيل خاصو الخدمة ومزااال شحال ديال الخدمة باش نفكو ليه هادشي .قلت ليه وفاش يتفك صافي غنساليو هادشي. قالي مزااال ابنتي عندم الخدمة كثيرة راه عندك بزااف ديال السحر خاصو يتفك .. حيت نتي خدامة كتفكي وهي كتسحر ليه .. وفاش نساليو بعدا التفوسيخة ديالو غادي نديرو ليهم التفرقة باش يتفارقو .. وديك الساعة ديري الرجوع باش يرجع ليك . قلت ليه هادي رجعات محكمة على هاد الحساب .. محكمة فقهية. قالي سيري فكري دابا وعاد اجي ردي عليا راني مامساليش للهضرة . قلت ليه صافي صافي غدا نجيب ليك الفلوس بدا ليا الخدمة ديال هادشي غدا الصباح نتيريهم ونجيبهم ليك . خرجت من تما كنحسب ناري شحال ديال الفلوس هادشب بحال المكحمة شحال فيه ديال طلع وهبط .. ولاكن والله مانهدا ليها هي تسحر وانا نفك حتى نشوفو شكون غيعيا .. عليييها السيد تزوج بين ليلة ونعار قول هي تزربات عليه قادات ليه الدقة رجع كي القط .. الصراحة الفقيه عندو الحق جا فيها نيشان .. ماشي خسارة فيه الى فك ليا هاد الروينة .

رجعت بحالي خرجت ديك العشية مع البنات لبلاصتنا عاوتاني ضربتها بسكرة وجيت تزلعت ليهم حدا باب الفيلا وجبت معايا كارو اللي كنكمي رقيوق وطويل ديال العيالات هوا اللي كيونسني فاش كنكون بوحدي . اما داك جود ولا جاد مابقيتش كنشوف خليقتو هادي شي عشر ايام .

تاصلت بديعة سولتها واش رجعو قالت ليا مازال مارجعو .. صافي عجباتهم الجلسة تما بلحق موراهم موراهم حتى نفرتك العش لديك السحارة دزينب .

الفقيه ديت ليه الفلوس وخدم ليا داكشي اللي غيخدم وعطاه ليا ملوي فواحد الميكة قالي رميه فالبحر هاد تيشورط ديالو وديري عليه شي حجرة باش ميطلعش راه غادي يتفوسخ الراجل . مشيت على سعدي ووعدي للبحر فوق واحد الجرف لسقت معاه حجرة بالسكوتش مزيان ورميتو ورجعت عند الفقيه قالي نصبرو شوية ونديرو ليهم الخيوبة والتفرقة. ولاكن هادي هي الضربة الصحيحة اللي مهمة باش يتفارقو وخاصها الليلة ديال الحضرة ..

قلت ليه وشنو المطلوب . قالي ديري الليلة ولا عطيني باش نديرها .. قلت ليه وشحال غتقادم هاد الليلة ديال الجنون بقا عليا خاصني نشري ليهم ونشري ونشري وندير كناوة قلت ليه جيني من اللخر شحال . قالي جوج ديال المليون وانا نخرج عينيه قلت ليه بزاف .. قالي هادشي اللي الى بغيتي الخدمة تصدق. قلت ليه صافي يالاه قضي بالزربة غدا ندوزها ليك . دوزتها ليه وبديت نتعصب من هاد الفلوس اللي رجعات كاتمشي بالملاين وحتى نتيجة ماشفتها لحد الآن .

بالليل درت مع البنات نخرجو وتعطلت قلت ليهم سبقوني حتى نجي ومشاو سبقوني حيت كان باقي خاصني ندوش من التسخسيخة اللي تسخسخت عاد نلحق عليهم . درت فوطة على راسي وغسلت غير لحمي شللت بان دوش مزيان ووجهي وسناني ورجعت هازة معطر الفم فالصاك باش الكليان ميشموش فيا ريحة الكارو . لبست لاول مرة واحد الكسوة باج مزيرة شوية سامبل فوق الركبة و صباط طالون وطلقت شعري الاشقر كولشي كيحماق على لونو بوكلي ديكرادي كيبدا يتهز معايا فاش كنكون كنتمشى ودرت مكياج خفيف والريحة واكسسواراتي ديال ديما ومشيت شديت الطريق دخلت وسطاسيونيت بين الطموبيلات ونزلت درت صاكي تحت باطي سديت الطموبيل .. ويالاه جيت ندور نخرج من تما تم جاي حدايا واحد زربان مطومر بحال بدر هاري فالطول والعرض لابس سروال دجينز زرق وقميجة فاتحها شوية من الصدر وشعرو كحل عندو لحية كحلة وباقي صغير كيبان ومسيرير فوجه كيشوف فتيليفون ديالو جهة طموبيلتو وهز راسو شافني ووقف بالزربة وقفني شفت فيه باستغراب قلت فخاطري مال هادا وقف قدامي كيطلع ويهبط فيا . بقيت كنشوف فيه يحيد وقالي عليكم السلام !

قلت ليه السلام !!! كتعرفني اسيدي !!

هز راسو دار واحد الضحكة جنب سنانو بيضين وقالي الله واكبر .. ساحيا

 

يتبع...