أنا وبعدي الطوفان الجزء السابع

هبطت راسي وهزيت فيه عينيا قلت ليه نعام!!!

قالي ماعقلتيش عليا ؟

قلت ليا لا فكرني !

قالي انا اللي فرشختي ليه الطموبيل .. صافا عليك بعدا

هزيت راسي وقلت ليه : ااااه جاد ياك

قالي : اييييه .. جاااد

رجعت اللور بقيت كنشوف فيه ونطلع ونهبط .. الصراحة ناضي مع راسو ! هادا نيت اللي كان وصلني ولاهيلا راني مهمة .. قلت ليه شكرا اسيدي سمح ليا بزااف على داكشي اللي وقع الصراحة ماعرفت مانقول

تواضع حتى هوا فاش شافني كنهضر بالصواب حذر راسو قالي: ماشي مشكل بحال هادشي كيطرا عادي .. نتي سافا مزيانة بعدا طموبيلتك ما وقع فيها حتى مشكل

قلت ليه لا يالاه خرجتها ليوم كانت كتصلح .. فالصراحة ماعقلتش على الضربة كيفاش كانت واش كانت شي ضربة خايبة بزاف .. تقاصتك ليك الطموبيل بزاف

قالي: لالا هانيا صافي تصاوبات رجعات كي كانت

قلت : سمح ليا بزااف ماقصدتش .. والى كانت صدرات مني شي حاجة خايبة سمح ليا راك عارف هههي..

قالي : هااانيا مكاين حتى مشكل المهم نتي بيخير .. هادشي اللي بغينيا

ابتسمت وقلت ليه : شكرا .. نخليك دابا صحاباتي كيتسناو

قالي شرفيني بالسمية

قلت ليه شيماء..

ابتسن وقالي متشرفين اشيماء

ابتسمت ومشيت كنقطر بالصواب ولاكن راه حشوومة داكشي اللي درت خايبة حتى للتعاويدة .. ضربت ليه الطموبيل ومشا صلحها راسو ومن فوف هادشي وصلني ورجع حتىفي للطموبيلتو فنصاص الليل

مشيت سلمت على البنات وجلست شافوني كنهضر معاه قالو ليا واش ديجا كتعرفيه ؟

قلت ليهم لا راه وقع بيني وبينو شي مشكل وبديت نعاود ليهم وقالو ليا واش عرفتيه بعدا شكون ؟ قلت ليهم باش نعرفو شكون هوا؟ كيدير شي حاجة ؟

قالت ليا فاتن : راه بوكسور عالمي كنعرف صاحبو وراه غيمثل المغرب فالمقبلات العالمية الى وصل للفينال وداها عرفتي شحال الفلوس غيدي بلا الحزام الذهبي والشهرة بحال هادوك اللي كيبانو خداو الشومبيونا ..

قلت ليها : اوييلي والله ماكنت عارفة !! كيحساب ليا شي واحد عادي!

قالت ليا فاتن : لا هوا متواضع كن واحد اخر الارض مايمشيش عليها مي هوا التواضع وعادي عايش

تصدمت بقيت غير كنشوف ففاتن وقلت ليها .. اويلي طيحت النيفو معاه

قالت ليا : عادي مالو هوا ماعارفش السكرة كي دايرة .. المخيرة هنا تسكر تلف على الباب ودير كتر من هادشي.. هاد القضية غير بلا ماتبقاي تهضري عليها حااجة عادية الشراب هادا كيلعب على مولاه وكولشي عارفها مكيديوش على واحد شارب .. غير حيدي هاد الفكرة من دماغك مافيها لا تشوهت لا والو الشوهة هي الى كنتي بعقلك عارفة شنو كديري حقيقتك باينة اما ونتي شاربة !! لالا عادي ... ديك المرة هنايا وحدة شربات حتى سكرات وتعرات بقات بسليب وسوتيامات وهبطات فالماء.. عقلتي هند على ديك البنت اللي هبطان فلابيسين ديك الخطرة .. عادي متسوق ليها حتى واحد عامت وسالات وجابو ليها فوطة ناضا مشات جلسات عايشة حياتها مامسسوقاش للبشر

تحرجت وقلت ليها : واخا هاكاك غادي يقول هادي مساليا

فاتن : ويقول تا نتي .. علاش اصلا جايا لهنا ؟ جايا تصلي ؟ جايا تسكري وتمشي وكتخلصيه من جيبك ماجابك حتى واحد ... وراه عارفين وكيشوفو حسابك بنادم مكلخ ولا مكيفهمش.

بقينا مجمعين حتى بان لينا راجع وبقيت كنشوف فيه سهيت ..اش ديك الطولة يا خويا وديك الفورمة .. ااش ديك الوقفة وديك المشية .. داك العنق مفصل ومطراسي .. هادا غا عنقو اما اللي لداخل ماعرفت كي غيكون . متأ ..بسيف السيد متريني مزيان شابع اونتخيما .. وماعندو حتى شغل من غير الرياضة والضرب هي كلشي عندو .. بسيف مايكون بحال هاكا .. شكون غيكون هاكا انا !.. اللي مابقيتش كاع كنمشي لاصال بديت نفيض من ليهونش والماكلة مابقاتش مقادة غير كنضرب ونزكل .. دار شاف فينا ومابغاتش يعيق مشا جلس مع صحابو كانو بيهم جوج دراري وجوج بنات كاوريات مجمعين .. بقيت كنشوووف فيه فركوس مع راسو ولاهيلا .. الشعير غزال والحية هي هاديك جايا معاه ماكتيراش بزاف حروفو كوحل وعويناتو عسليين .. غلى مزيناتو الصراحة الله يحفض ليه مو اللي جابتو للمغرب يهز الراية ديالنا . شفت ففاتن ويدي على فكي وقلت كنت كنعبر فيه وهوا كل شوية تهرب ليه عينو جهتنا وكيشتت النضر فاش كيلقاني كنشوف فيه . وسولتها واش مصاحب؟

قالت ليا ومالو لوبية ضاروري يكون مصاحب شكون اللي مامصاحبش فهاد الوقت

قلت ليها وانا كنشوف فيه : الصراحة زوين وضريف وانا نيت كنحس بواحد الفراغ عاطفي غيقتلني ماكرهتش زعما نعمرو

فاش قالت ليا فاتن ديك الهضرة وانا نقول بصح .. واش كاين شي واحد بحال هادا بلا صحبة ولا بنت ... هادي الى مكانش خلاط . ماعلينا يخلط ولا يكرض شغلو هاداك . ولاكن الصراحة باينة فيه ضريف غير من ديك الليلة الكحلة اللي وصلني فيها للدار بلا ميقرب ليا فطموبيل وما خلانيش مليوحة فشي قنت راه فعلا ولد الناس . حتى هوا كل شوية يشوف فيا فينما تجي عيني فعينو كنضحك ليه .. دخل ليا لخاطري ماعرفتش علاش ؟ واش حيت دار معايااك لوجيست ولا علاش.. ولاكن حتى فوجهه مقبول وزوين ..مسيرير كيدخل للخاطر .. يكون حتى هوا داير القبول زعما ؟ اويلي انا صافي تسطيت رجع اثر عليا هاد التخربيق .. ولاكن بلاقبول بلا قنبول كاين شي وجوه محببة عند الخلق كدخل للخاطر واخا حتى هوا كيبان شوية متعجرف ولاكن كاع بحال هاكا .. حتى انا اللي شافني كيقول متعجرفة حاسة براسها ولاكن فالحقيق انا بنت الناس وضريفة وقلبي ابيض . بقبت كنتأمل فيه وهوا جالس مع صحابو حتى صونا ليا تيليفون لقيت ماما .. الله واكبر علاش معيطة ليها فهاد الليل ياك لباس ؟ نضت خرجت من داك الجو والموسيقى مطلوقة وبعدت جاوبتها ومخلوعة خايفة تكون وقعات شي حاجة .. لاكن هضرات معايا وكتهضر بالحس سولتها ياك لباس قالت ليا لالا والو باس غير بغيت نسولك .. واش باك جا عندك طلب ليك شي فلوس ؟

قلت ليها علاش ؟

قالت ليا غير سولتك راه قالي بغيت ندير وندير وندير وهوا ماعندو منين يجيبهم كيحلم بشي حوايج اكبر منو

قلت ليها: واييه راه جا غادي ندير ليه داك المشروع راه تما شي ميات مليون ماقدرتش نقول ليه لا

قالت ليا: قولي ليه ماعنديش .. اويلي على ميات مليون هاي هاي

قلت ليها : راه بدا كيعد ليا فشنو شريت ومابغيتش نسمع هضرتو وصافي ماعندي مندير

قالت ليا: شوفي ابنتي .. باك هاداك مافيها والو الى عاونتيه .. ولاكن ماتعطيهش ليديه وديري ليه كولشي .. قولي ليه غادي نشركو انا وياك حيت ماعندي منين نجيب الفلوس وحتى انا داكشي اللي عندي كامل غنعطيه ليك

بديت كنضحك وقلت ليها: والله حتى ينكدها عليا مايبغيش

قالت ليا : يعاود راسو مالها اش فيها الفلوس يعجبو الحال يطلبهم منك ونتي ماتشركيش معاه! كما هوا باك حتى نتي بنتو .. وباك راك عارفة كي داير قبيح غدا ولا بعد غدا يوقع شي حاجة مايعقلش علينا

قلت ليها: شنو غيوقع كااع

قالت ليا: الله يرضي عليك ابنتي راه الدنيا والزمان هادا كحل الراس كيتقلب .. حوايجي ومكنتيقش فيهم بقا غير كحل الراس

دخلات ليا الوسواس لراسي ولقيت عندها الحق واخا غندخل فالمشاكيل مع بابا وزعما ميقدرش يدير شي حاجة خايبة .. قلت ليها صافي انا غنقولها ليه

قالت ليا: وياااك تعطيه .. صبعك تما ولا قوليه ماعنديش .. واخا يخلعك بالهضرة ماتخافيش يا اما دخلي معاه يا اما ماتعطيهش ماتحشميش كما حتى هوا ماحشمش يجي يطلب مية مليون !! ماهي عشرة ولا عشرين ... كبر كرشو بزاف

طمنتها وقطعت ولاكن تربجت فعقلي دوخاتني وعندها الحق فهادشي .. انا براسي تحشات ليا اكبر حشية ماكنتش فحياتي كنتخيلها .. كحل الراس مافيه تيقة ماما على حق .

رجعت نجلس ودخلت فواحد الدوامة ديال الهم وكفاش غادي نقولها لبابا باشمن وجهه نخرجها وكي ندير ليها .. ماعرفتش كاع اش غيقول عنداك يتسيف عليا .

بقيت ساكتة كنشرب ونخمم وندي ونجيب وكارو تابع لاخر حتى طمستها عاوتاني نسيت كاع فاش كنت كنفكر والبنات بغاو يمشيو ونضنا تكعدنا مشات كل وحدة لطموبيلتها .. خرجو سبقوني وانا كانت فيا بولة مشيت درتها فالحمام وخرجت غادية للطموبيل مكنشوفش قدامي حتى وقف عليا واحد كيتبسل قال هادي شاربة مع راسها نديها نلعب بيها شوية .. كانت باينة فيا شاربة حيت كل شوية نشد فشي حاجة وفاش مابغيتش نوقف ليه بدا يجرني من يدي ويتحرش .. وكبير عليا الحمار وطويل بحال البغل وعامر عندو واحد العنكرة ديال كسكسو ومابغاش يبعد مني برزطني واليد اللي تنزل عليه تقيلة ولساني تقيل وفاش كنتقل كنبقا غير نشوف وساكتة منهضرش

بقا عليا غير نهصر معاك مانهضر معاك وكيدور بجنابي ويشدني من يدي صافي تجنتت وانا ندفعو قلت ليه بعد مني ولا نعيط على سيكييرتي يجيو يهزوك .. ومع ديك التعصبة دورت وجههي لقيت جاد جاي هوا وصاحبو والى ماخفت نكدب ميكون غير صاحبو ديال ديك المرة .. كان جاي بشوية عليه شوية بدا يزرب شد ليه يدو هبطها ليه وقاليه مالك شي حاجة ؟؟

لاخر تعصب مارضاش قاليه : انا وياها ونتا مالك بيني وبينها

هزيت صبعي بزز ولساني كيتولى قلت ليه : اش بيني وبينك الحمار فين كنعرفك

قالي حمار .. انا غنوريك الحمار كي داير . اندفع عندي بغا يخلعني وجاد حط يدو على صدرو باشمأزاز وكيشوف فالارض قاليه

- صاف صافي سير بحالك صافي يالاه

قاليه لاخر ماتحطش يدك عليا ومع بغا يحط يدو على يد جاد هز الاخير يدو غير شوية وعطاه للصدر نفس البلاصة دقة سامة رداتو اللور وقاليه دوينا معاك مابغيش تفهم شنو باغي دابا

تدخل صاحبو بيناتهم وجرو شدي ليه وجهه قاليه

- تابعاك بطولة ا** باغي تجلس هنا بسبب هاد البقرة

ويلي سمعتو وانا نوض ليه قلت ليه البقرة هي ختك الحلوف وتصدم شاف فيا قالي والله ماقصدتك ولاكن نتي كطيري نيت راكي بقرة

هزيت صاكي تزيرت بغيت نضربو ورجع اللور وداك الاخ الوديع بغا يضارب مع جاد وجاو السيكيريتي فكوهم وانا ولاخر موراهم عطيني نعطيك بالهضرة ورجع جاد كيفك فينا .. جاني البكية وانا علىالسبة حسيت بالحكرة والشراب كمل عليا قلت ليه شفتي كيفاش عايرين وقالي ماشي عليك على لاخر قال ليه بقرة . قلت ليه هاداك كنقولو عليه عجل ماشي بقرة البقرة قالها ليا انا . جا صاحبو كيحلف ويعاود قالي واختي الى قلتها عليك يالاه يعطيني ماعرفت شنو .. ماقصدتكش نتي

قلت ليه عاودتي قلتيها ليا فوجهي قالي وانتي باغا ضربي وكتسبي عصبتيني . قلت ليه نتا ماشي راجل كتحكر على البنات وماتهز حتى دقة

شد فراسو وقالي: مشكيلة معاك اختي .. ديك المرى بروصي دابا موصيبة .. مافهمتكش والله مافهمت فيك شي لعبة

كنت غنجاوبو ولاكن تجرتل ماقدريتش وفشلت بديت كنبكي وجرني جاد قالي اجي . طلعي فطموبيلتك ماديش عليه خوا غا حمق راه الطبيب مخرج ليه دوا الحماق

طلعني فطموبيلتي تحنيت على الفولون كنتفش فالبكا وهبطت الزاج يدخل الهوا وكان واقف اللور مع صاحبو كيهضر معاه وسمعتو قاليه

- ونتا مريض ف*** داير راسك فيها والله تا مريض

قاليه صاحبو: واخاي راه مساليا هاد ختنا طيحتي نيفو

قاليه جاد : وعاادي كتجي تجلس مع صحاباتها يفوجو مكيجبدو حتى واحد بنادم كيلسق بحال هاد خونا

قلت ليه من الطموبيل سمعت وانا نحل الباب بغيت نخرج نوريه النيفو وهوا يوقف جاد سد عليا الباب .. حنقول حل خليني نوريه نيفو مي داير وهوا كيدفع ويقول ليا صافي غادي فحالو صافي

قاليه سير تا نلحق عليك ومشا لاخر كيسوط وانا نحل الباب قلت ليه واش هادا صاحبك !.. هادا حتى هوا يديروه الناس صاحب

بدا كيضحك وحل ليا واحد القرعة قالي شربي تفيقي شوية ... مكيجيش معاك الشراب كيشوهك حسن قطعيه

قلت ليه : كنخويه فكرشي خويتو ليه ليك فكرشك علاش مكدخلوش سوق راسكم خليو اللي بغا يشرب يشرب واللي بغا يموت يموت عاد غتجي توريني شنو يصلاح ليا وشنو مايصلاحش

مد ليا القرعة وقال : وا شربي شربي دابا .. ولايني حتى نتي جلدة مع راسك .

شربت وهبطت القرعة كنهلت قلت ليه انا عارفة شنو غندير.... غنبدا نمشي بالحراسة ونجي بالحراسة هاد القوم هادشي اللي ينفع معاهم

جلس كيضحك و قالي : واش تعرفي تسوقي يا الحراسة

قلت ليه : قادة نسوق

قالي: نوصلك

قلت ليه بلا نعدبك

قالي: الله اودي على تعدبيني براكة هاد العذاب اللي شفنا معاك ماشفناهش فلونتخيمو

قلت ليه : ااه نتا حقا كتلعب البوكس

حرك ليا راسو وقالي: شنو كدير نتي ؟

قلت ليه: فان د افير

قالي: مزيااان ولاكن علاش دايرة هاد الحالة فراسك ديما واش عندك شي مشكيل؟

حك ليا على الدبرة وقلت ليه : شفتي انا .. ماعندي زهر فهاد الدنيا ..

استغرب وقالي: وعلاش ماعندك زهر؟؟ فام د افير تبارك الله ... فاش ماعندك زهر ؟

غرغرت وكنت على سبة قلت ليه: ماعنديش الزهر فحتى حاجة ... كنحس براسي مدبوحة وكومة دالمشاكيل على ضهري وكنجي هنا نفوج ولاكن المشاكيل ديما تابعيني

تكا على باب الطموبيل ديالي كيشوف فيا وانا لداخل كنبكي قالي : واش مزوجة؟ .. عندك شي ولاد

بديت نكحب تخنقت وحركت ليه راسي وجاتني التقية خرجت حدا واحد الطرورطوار فيه الربيع رديت مسارني عاد رتاحيت وعطاني الماء وشد فيا حتى جلست ورجع وقف قدامي قالي

- مامزوجة .. ما عندك ولاد .. ما بيطالية... شنو هما هاد المشاكيل ؟... هادو هما المشاكيل المعروفة ونتي ماعندك حتى وحدة فيهم

هزيت راسي تكيت كنبكي وقلت ليه : زايد ... سرقاتو ليا واحد الوحدة وتزوجات بيه

هز راسو كيضحك ويحركو يمين وشمال وقالي : والله تا نتي علام .. سرقاتو ليه بزطام سرقاتو ليك!

قلت ليه: والله حتى داتو وسحرات ليه باش يتزوجها وانا وياه كنبغيو بعضياتنا

بقا ساكت غير كيشوف فيا وهزيت تيليفوني جاني الحنين بغيت نعيط ليه ونسمع صوتو .. ميل راسو قالي لمن كتعيطي .. قلت لزايد

حيد ليا تيليفون وقالي: واحد مشا تزوج وعايش مع راسو ونتي هنا كتبكي عليه ! قطع عليك الحليب ولا؟ .. ماحدك تابعاه غتسمعي غير اللي مايعجبكش ومكاينش غا هوا فالدنيا باش نتي تموتي وهوا ماكاينش هنا ماحاسش بيك وماعاقلش عليك اصلا واش باقا حية

قلت ليه : راه سحرات ليه :

قالي: واتسحر ليه ولا تجلس ياك هوا عاجبو الحال والسحور وصافي يعاود لمو شوفي حياتك شوفي راسك .. بنت كتقطر بالزين بحالك جالسة تبكي هنا على واحد زاد وخلاها ! التسطية كي دايرة

شفت فيه كنتنخصص وقلت ليه: راه كنبغيييه منقدرش

دور وجهه كيسوط وقالي: بغي اللي باغيك ماشي اللي سامح فيك وباغي وحدة اخرى... الف وحدة يتمناك نتي وحنتي لاسقة فوااااحد بحال لا هوا اللي كاين ... فيقي شوية .. عرفتك من الاول ماشي ديال هادشي وقلتها مع راسي .. قلت هاد ختنا عندها شي مشكيل كتنساه بهاد الطريقة دالمرض

قلت ليه دابا نتا راجل بحالك بحالو .. شنو ندير باش يرجع ليا

قالي: ديري العز .. بااااقا غدور السينتة فوااحد الوقت تكوني نتي نسيتي شكون يكون وعايشة ويرجع .. هاكا بنادم داير يدور يدور ويرجع

قلت ليه: غيرجع بصح !!

قالي: ونتي غتبقاي تسنايه؟ شحال فعمرك دابا؟

قلت ليه: 33 سنة

قالي: تبارك الله راك بعقلك .. صافي تكونتي مابقا ليك فين تزيدي التكوين . دابا عندك 33 والى ندم هوا على خمسين عام ! يلقاك جالسة مكمشة كتسنايه غيشوف فيك؟

بقيت ساكتة كنشوف فيه وقالي: وا دوي دابا .. غتلقاي شبابك مشا وشرفتي بالمشاكيل والهموم .. اللم نساي عليك المرض وعيشي حياتك راه غيفوت الحال وتندمي

بقيت ساكتة ساهية وضرب الدورة قالي نزلي انا غنوصلك .. على الله غدا تبقاي عاقلة على هاد الهضرة وفكري فيها مزززززيااان قبل ماتفني شبابك على الهوا والاوهام

نزلت فشلانة وراسي ضرني بالبكا جلست فالجهة الاخرى وطلع بلاصتي .. تكيت بقيت ساهية كنشوف فالطريق ودورت وجههي قلت ليه

- شنو اللي خلاك دير معايا هادشي ماشي بحال صاحبك؟

هز حاجبو وميل فمو قالي: ماعرفتش ... كاين ناس نقدرو نديرو معاهم زوين وحنا معارفينش علاش .. ولا يمكن مرتاحين ليهم هادشي اللي كاين .. ماشي ضاروري نطمعو فشي حاجة(شاف فيها وضحك) بلا ميهرب ليك وتنويها خايبة .. بنتي ليا هارب ليك نتي

قلت ليه وانا متكية كنشووف فيه كنعس بعيني كيتلسقو وضااحكة كنتأمل .. والله مانويت فيك شي حاجة .. بلعكس رتاحيت ليك ... شكون مايرتاحش بلبوكوص بحالك وبوكسور

بدا كيضحك تا شبع وقالي : ياك بعدا... وعاد دابا كنتي كدمعي على واحد مشا وخلاك

قلت ليه: لااا .. هاداك عاوتاني راه الحب الاسود ... عمرك جربتيه

حرك ليا راسو وقالي: عاادي اي واحد كيدوزو ... قاصحة مي غترجع عندك المناعة من بعد .. مكيتعاودش ولاكن تقدر تعيش الحب بطريقة زوينة وفحدود .. اما هادا اللي هضرت عليه وكتعيشي ما حب ما حبوب.. غير المرض واي واحد يقدر يدوز منو .. مي مزيان دوزي منو باش تعاودي تجربي من بعده شناهوا ا هوا الحب وتعرفي الفرق

قلت ليه : دابا هادا غير المرض زعما

قالي: كنهضر معاك بصح ... من بعد فاش تبراي غتنساي هادشي كامل ماتبقايش هاكا غتبدلي .. هاد الزمر كيتعاش مرة وحدة صافي حيت من بعد كتولي المناعة قوية وغتنساي بحال الى عمرك فحياتك بغيتي ولاكن غتكوني فاكسيني ديك الساعة .. تعاودي تعيشب الحب ولاكن حب زوين نقي من الامراض والخوف والهواجس اللي كانت كتجيك وغتعر

بقا كيهضر وانا ساهية كنتأمل حتى وصلني قالي هانتي وصلتي .. شفت فاافيلا وقلت ليه مابغيتش ندخل دابا .. كندخل كنتخنق

قالي خاصني نرجع طموبيلتي خليتهت عندهم فباركين غيسدو عليها .. عطيني نمرتك الى كان فيك مايخرج غدا ومساليا نعيط ليك .. كنسالي لونتخيمو مع الثمنية

عطيتو تيليفوني قلت ليه قيدها وشدو حليت ليه الشيما وكانت صورة زايد فالواجهة .. شافه فيها وقالي هادا هوا اللي جالسة تسكري عليه

قلت ليه هداك حوبي

قيد النمرة كيضحك وعطاني تيليفوني قالي ها نمرتك عندي غدا مور الثمنية نتشاوفو الى كان فيك اللي يخرج

خديت تيليفون فشلانة ودخل ليا الطموبيل للفيلا تعرضات ليا سعاد والعساس دخلوني وهوا مشا رجع بحالو . طلعت لبيتي مسهوطة طحت نعست مافقت غير على صوت تيليفوني وراس غيطرطق .. تفووو على حياة وليت فيها كي دايرة والمشكل مرتاحة فيها وعاجبني الحال ولاكن راه وليت فمستنقع غارقة .. واش رجعو المستنقعات كيعجبوني مافهمتش ! طليت على التيليفون لقيتها الحداش والطبيبة النفسية ديالي كتصوني عليا مابغيتش نجاوبهت حتى لمن بعد .. مافيا اللي يهضر معاها .. عيطت لبديعة نعرف اخر الاخبار وقالت ليا باللي راه رجعو من السفر سمينة على عسيلة وكتوجد راسها تمشي لطنجة تقرا وسمعاتو كيقول ليها حتى لتما ودوزي لبيرمي وقالك غيوصلها ويشد ليها شي دار قريبة لفين كتقرا باش متبقاش متقلة على عمها . وقفات ليا فالحلق مابغاتش تهبط هاد الهضرة حسيت بالقبض والانقباس فكرشي وصدري ولقيت راسي فعلا محتاجة للطبيبة نرجع عندها وتاصلت بيها من بعد مافطرت وحليت عيني بواحد الكارو .. تعودت عليه قطيب رقيق وكلاصيال العيالات ماشي بحال اللي كتكمي فاتن مالبورو مكنقدش عليه قوي عليا ومن البدية بديت بداك الرقيق واخا زايد الثنن لاكن لقيت فيه واحد الوناسة خطيرة ماكنتش عارفاها من قبل . قالت الطبيبة شحال هادي مارجعتي قلت ليها انا فالدار غادي نجي محتاجة جلسة وخديت موعد . دوشت درت حمام عمرت البانيو بالماء والرغوة وجمعت شعري لفوق .. تخشيت تكيت فيه وهزيت تيليفون كنهضر مع بشرى لقيتها سيفطات ليا مسج فواتساب .. حطيت حدايا كاس قهوة وشعلت كارو وبقيت مجمعة كتعاود ليا على سفرها ديال الخدمة فاللخر قلت ليها راني فالحمام حتى نجلسو نتشاوفو وكملت غسيلي وخرجت لاوبة فوطة عيطت لسعاد تعاوني ..لبست حوايجي وقاديت راسي دزت لصالوني المولفة بيه نشف شعري ونصاوبو وجلست كنسرح عيني وانا نلقا تما زينب عاوتاني جالسة

شفتها حيت بالنغزة فقلبي لاكن ماهضرتش معاها وماجلستش حداها وحتى هي شافتني قلبات وجهها .. بغيت نصاوب شعري ونخرج من تما حيت لساني كياكلني وغندير مجهود باش نفقصها وانا جهدي صافي تقادا . صاوبت والوقت كامل شادة تيليفون ونضت باش نخلص ناضت حتى هي وقفات قدامي لاكن ماهضرت معاها ماجبداتني وخرجنا قد قد شفتها طلعات مع الشيفور وطلعت انا فطموبيلتي والضيم طايح عليا . مشيت للموعد عند الطبيبة نفش عليها قلبي وقابلتها سولاتني علاش مابقيتش كنجي قلت ليها فالاول غير الوقت وصافي ومن بعد بديت كنعاود على شنو وقع معايا وحكيت ليها كلشي حتى للحضة اللي وصلني فيها جاد .. بقات ساكتة مطولا وتنهدات ولاول مرة تخرج ليا الدوا نشربو ..قلت ليها فالاول ماكنتيش كتعطيني الدواء علاش خرجتيه ليا .. قالت ليا بأسف .. ماعندي منخبي عليك امدموزيل شيماء .. عندك اضطراب نفسي حاد وخفت ديري شي حاجة بلا ماتشعري .. حيت فعلا كديري شي حوايج وماشي فكامل قواك العقلية .. كنتمنى تبعي الدواء بدون انقطاع وتبعي الجلسات ديالك ..

طبعات واحد الورقة عطاتها ليا وقالت ليا : هادي خليها عندك لربما تحتاجيها وحتى الضوسي ديالك خاصو يكون عندك .. ماعرفتش.. ربما ترتاكبي شي حاجة على الاقل يكونو عند الاوراق ديالك اللي كيدلو على الاضطرابات العقلية والنفسية اللي عندك .. والجلسات ديالك ضاروري تبعيهم من هنا لقدام حيت الوضع لا يبشر بالخير وهادي بداية فقدان العقل عند الانسان .. خاصك تردي لبال لنفسك وتاخدي الدواء ديالك بانتضام والجلسات ديالك تبعيهم .. الى مادرتيش هاكا مع الوقت تقدري تفقدي السيطرة بشكل كلي على تفسك حيت فعلا فقدتي السيطرة وغادي تآدي راسك وكنتأسف للحال اللي وصلتي ليه !

درت يدي على فمي والدموع هبطو ليا وقلت ليها : واش زعما حماقيت !!! اوييلي

قالت ليا : مكنقولوش حمق بهاد المسطلح .. حيت الحمق ماشي جا وحماق ولا هوا حمق !.. كنقول عندو اضرابات نفسية حادة او اصرابات عقلية .. مكيكونش واعي بشنو كيعمل ومنقدروش نلوموه او نحاسبه حيت هادا مرض وخاصو يتعالج ماشي يتحاسب .. نتي دخلتي فواحد الشبكة ديال هاد الاضطرابات وخاصك تبدلي مجهود كبير تحافضي على راسك قبل فوات الاوان .. الحمد لله اللي شفتك ليوم وقدرت نشخص الحالة ديالك ونعلمك بهادشي قبل ماتآدي نفسك وتآدي الناس اللي معاك .. حاليا خاصك الراحة ... خاصك تبدلي البلاصة والجو وترتاحي وتبعدي على الناس اللي ضايرين بيك وكيوثروك .. بعدي على التوثر وحاولي تنقصي من الشراب حيت حتى الادمان غيوصلك لمالا تحمد عقباه بسرعة وفوقت وجيز ..

بقيت ساكنة كنشوف فدوك الاوراق وكنبكي .. وقلت ليها انا مكنحسش براسي مريضة كما قلتي .. حيت كنخدم وعادي بحال اي واحد ماشي كنضرب بالحجر

تنهدات وقالت ليا: اييه نتي كتقولي هاد الهضرة .. ولاكن انا الطبيبة ديالك كنقول ليك باللي نتي معارفاش وماشي فالوعي ديالك ونتي ماحاساش وسي نوغمال تقولي هاد الهضرة حيت ماحاساش .. حتى تلقاي الله يستر راسك شي نهار جالسة قدام الحيط كتهضري معاه وكيحساب ليك راجل .. ويحساب ليك ديك الساعة باللي نتي طبيعية !.. والحقيقة هوا انكي ماشي انسانة طبيعية .. انا مخاصنيش نقول هاد الهضرة للمريض ابدا ونزيد نكمل عليه .. لاكن كيتوجب عليا نشرح ليك الحالة ديالك باش تبادري براسك وتعرفي اشنو كاين وتقولي باللي انا مريضة وعندي اطرطربات خاصني نتعالج والآدية اللي كندير ماشي طبيعية وماخصنيش نديرها وتوقفي .. تقولي انا مريضة .. هادشي مكيروش انسان طبيعي اذا خاصني نوقف مانديرش هاد الحاجة .. وخاصني نشرب الدوا وخاصني نتبع على حالتي الصحية والنفسية .. واي توثر او قلقلك كيخليك تفقدي السيطرة على راسك قبل حتى ماتقولي راني مريضة ماخصنيش ندير ولا نفعل .. وفهاد الحالة الى حسيتي براسك تعصبتي او توثرتي غير شوية خاصك تاخدي هاد الدواء اللي كتبت ليه بين هاد الادوية باش يهدنك ويخفض مستوى التوثر عندك .. غادي تسجلي فنادي السباحة حيت مهم بزاف بزاااف .. السباحة غتخلي اعصابك يترخاو مزيان وصدرك يوساع والتنفس ديالك يمشي احسن من قبل .. باش متبقاش تجيك ديك الخنقة وديق التنفس كل مرة توثرتي فيها . الرياضة كذلك غادي داومي عليها شاك جوج .. فالصباح .. ونصف ساعة سباحة كافياك فاليوم باش يدوز عندك النهار مريح ومزيان . ياك عندك لابسين فالدار

حركت ليها راسي وقالت ليا: ايوا استغليه فاش تفيقي الصباح ومغادي تخسري والو .. ماحدنا ففترة الصيف استغلي القرب ديالو باش متقوليش لا البعد لا عاد خاصني نمشي .. عاد خاصني ندير . القهوة بعدي منها كتزيد توثرك اكثر .. ونقصي من الكارو والشراب هما السبب الرئيسي اللي غيزيدو يتقلو على عقلك ويخرجو على صحتك . كنتمنى ديري بهادشي وماتهمليش راسك .. غنعطيك شهر ديال الراحة حتى يعطي الدواء مفعوله مزيان وبعدي على التوثر

خرجت من عندها كنبكي والاوراق فيدي وطلعت الطموبيل بقيت كنشوف فيهم عاد فهمت هادوك اللي كيقولو ليك انا حمق باوراقي ماعندك ماتصور مني .. فعلا كيلانو بعقلهم لاكن محاسينش بارواحهم .. بقيت كندمع وماتقلبش اللي كيطرا ليا وانا ماسايقا خبار !.. كلشي بسبب زايد وهوا ماحاس حتى ببزقة من هادشي اللي كنعيش وعايش حياتو بالطول والعرض.. كنت عارفة راسي غنشرب المرار قبل حتى مايكون بيني وبينو والو ومع ذلك قبلت تكون معاه علاقة حيت ماكنتش غنقدر نرفض!

بعصبية رميت دوك الاوراق مورايا فالطموبيل وطحت على وجهي كنبكي ونزير على الفلون مابغيتش يوقع ليا هادشي مابغيتش حيت ماكنتش بحال هاكا بمرة . بكيت حتى طبت وتكيت سديت عيني .. كنشوف هاد الفلوس اللي مادراو ليا حتى حاجة .. مكنحسش بطعم السعادة نهائيا .. ولاكن كنقول حال حسن من حال .. كن ماكان عندي حتى ريال كن راه حالتي اكفس وحتى طبيب منلقاش باش نخلصو ولا باش نشري الدوا لراسي . بعد ما تكيت ورتاحيت نزلت حليت الباب اللوراني جمعت دوك الاوراق فالملف وحطيتهم حتى نطلعهم للدار . ديماريت ووقفت عند اقرب ساكة نزلت خديت الكارو ديالي .. اللي شافني نازلة من المرسيديس كاط كاط اللخرة بالكسوة والنضاضر والروايح والصندالة ديال كريستان ديور بلا ديال القش يقول هادي اكثر وحدة عايشة الحياة .. وانا اكثر وحدة مقودة عليها فحياتها وحياتي مشبكة بحال ليزيكوتور . طلعت قلعت من تما شعلت واحد الكارو وغادية كنفكر .. هاد الفقيه اللي جالس عليا عطيني وندير ليك .. عطيني نفعل ليك وحتى حاجة من داكشي مابانت .. بدا يدخلني الشك فيه قلت يمكن غير كيتفلا عليا حنى هوا ورجعت عندو لقيت الدنيا عامرة وكلشي كيطلع فيا ويهبط . وقفت حدا واحد الجوج كانت هاديك اللي خدامة تما عندو كتفرق النماري بحال الى راحنا فسبيطار واقفة مورايا كتهضر مع وحدة يمكن كتعرفها وانا كنسمع .قالت ليها شنو جيتي ديري هنا .قالت ليها لخرى جيت ندير لراجلي كيدير ليا ويفعل ليا وكيهضرو بشوية فير بيناتهم باش ميسمعهم حد .. مافراسهم باللي لحيوط كيسمعو . قالت ليها ديك الشارفة اللي خدامة تما سيري سيري ماعندو مايقضي ليك راه غير الهضرة لخاوية.. كن فيدو كن زوجني انا اللي شحال وهوا يكدب عليا كيقول ليا نزوجك وشي زواج ماشفناه خمسطاش لعام هادي

. قالت ليها لخرى وكيقولو عليه زعما واعر . قالت ليها لخرى مت. مكاينش من داكشي .. كولشي داكشي اللي كيجيبو الناس دلبخور وتخربيق كيعاود فيهم لبيع هنا ويقولهم غندير ليكم كلشي من عندي ويزدحهم فالثمن .. سمعي مني انا اللي عارفة شكاين راه هوا حياتو كلها فناها هنا عارف كفاش يدخل بنادم ويكدب عليه

تفكرت ستة دالملاين اللي طير مني وماشرا ضروبة مادار حضرة وبديت نتعصب وودنيا كيصفرو .. جيت نخرج لقيت نوبتي وصلات ومشيت جلست قدامو كندير فيه شي شوفات فشكل بغيت نقج مو النصاب لاخر وقلت ليه واش غنديرو التفرقة وداكشي علاش تاقفنا عليه قالي اه .. دابا جيبي ليا شي حاجة من حوايجها ولا شعرها وحوايحو حتى هوا ونخدم ليك عليهم .. قلت ليه بشحال هادشي قالي الجواد ماقبلوش بديك الحضرة جاتهم ناقصة مابغاوش يخدمو ليا .. خصها تعاود

قلت ليه خصها تعاود .. اييه وشحال كتعاود

قالي: نتي وجودك دابا .. بغيتي يخدمو ليك تهلاي فيهم انا منقول ليك والو

قلت ليه واخا انا غنخرج نتيري لفلوس ونجي . نضت درت صاكي تحت باطي هازة راسي بلا مندير حتى تعبير خرجت من تما كنترعد طلعت فالطموبيل وجلست كنكمي .. رجعت اللور شوية سطاسيوني وبقيت عاصرة النهار كامل خدامة مع البنات فالبارا غير بالتيليفون حتى ودن المغرب والنهار مشا ليا فوالو كله جلاس فطموبيل .. ماكليت ماشربت .. مونسة بداك الكارو والموسيقى حتى بان ليا خرج من ديك الزاوية المشؤومة مقوس الضهر لابس واحد الدربالة وموراه ديك ختنا سدات الزاوية ..بقيت متبعاه بعيني حتى قطع الشانطي وغادي بشوية عليه كيجر فواحد الصندالة وضرب جبدة على رجليه حتى وصل لواحد الزنقة مكتخرجش ووقفت كنشوف فيه من الطموبيل شفتو حل باب واحد الكاط كاط كحلة طلع فيها .. اييه يا شارف كيحطها بعيدة باش ميشوفو حد وكيغوفل على الناس بداك الدربالة اللي كيلبس.. درتي الكاط كاط على ضهري انا واللي بحالي .. واخا

زدت بعدت حتى خرج من تما كيسوق وتبعتو بقا غادي مع الطريق ودخل فلابيس . بانو ليا غير الفيرمات تما عرفتو جا لشي فيرمة وماتكون غير ديالو ولد لحرام .

تبعتو حتى وقف قدام واحد الحانوت عندو سرجم صغير نزل مشا تسخر منو جاب واحد الميكة صغيرة فيدو وخليتو حتى بغا يقطع .. شفت هاكا وهاكا مابان ليا حتى واحد فالطريق والضلام كيطيح وغير الفيرمات مفرقين فواحد الصف ديال الطريق وانا نكسيري بطموبيل حتى ضارو الروايض بلاصتهم وزدت دخلت فيه هزيتو حتى للسما تلاح قدامي ودزت ليه على رجليه ومشت ضربت الدورة بالزربة مع واحد الطريق ولابيست خدمت الدفع الرباعي مع ديك الطريق وزدت كنطير مشيت بحالي حتى دخلت للمدينة ووقفت كنلهت والتيليفون كيصوني ماشفتش فيه .. تكيت براسي كنرد النفس وماكفانيش داكشي ماكرهتش كون هرست لمو ديك الطموبيل مانخلي فيها حتى حديدة صحيحة .

جبدت واحد الكارو كميتو وتكالميت عاد هزيت تيليفون لقيت واحد النمرة معيطة .. شفت الساعة كانت تسعود وانا نتفكر جاد قالي نتلاقاو ليوم وماتكون غير نمرتو هادي

جاوبتو بدا كيسول فيا وكي صبحت قلت ليه الحمد لله .. قالي فيك مايخرج نجلسو شوية قلت ليه الصراحة مافياش .. باغا نمشي للدار ماكليت والو النهار كامل وعييت . قاليا واش نتعشاو اونسومبل حتى انا ساليت لونتخيمو ومازال ماكليت والو قلت نعيط ليك نتي اللولة.

بقيت كنفكر فيه قلت مادام سبق مني نخرج نتلاقا بيه وكنرتاح ليه ماشي بحال شي وحدين

قلت ليه واخا ولاكن صبر عليا ندخل للدار ونبدل حوايجي .قالي ماشي مشكل حتى انا مزال مادوشت وليوم تعطلت فونتخيمو فاش تسالي ابيل موا .قلت واخا وقطعت معاه .. كان خاصني ندوش من ريحة الكارو والعيا والبكا باش نرتاح شوية ونحس براسي هي هاديك ومشيت لقيت فرمسيان فطريقي نزل عطيتهم لوغدونونص عطاوني الدوا كامل وقالو ليا على واحد الكينة باللي خاصني مانحطهاش قدام شي واحد يمشي يشربها والى هزيتها نهز معاها لوغدونص ضاروري حيت ممنوعة وكيشدو عليها البوليس الى لقاوها عندي غيحساب ليهم كنتضروكا .. عاد فهمت باللي هي مخضر ممنوع كيتعطا بلوغدونونص وكتباع عشوائيا لدوك الشماكرية اللي كيتقرقبو بيها بالحبة ولا بالسمطة بطريقة غير قانونية . عرفت راسي تقطع ليا لحبل غادي نبدا نشربها باش نهدا وخفت منها كأول تجربة.. كانت ناقصاني غير هي نيت وخرجوها ليا نشربها فاش نبغي نعس بالليل فقط ومانبقاش جالسة ولا فايقة وحيت انا مريضة مغتأثرش فيا بداك الشكل اللي كيأثر على المقرقبين وإنما غادي تعاوني باش نترخا وننعس .. فالاول قالو نص حبة فقط حتى نتعود عليها واحد الشهر وناخد حبة كاملة.. والباقي ادوية اخرى و كينة اخرى فواحد القريعة نهزها معايا اينما حليت وارتحلت هاديك فالاوقات الحرجة اللي نحس فيهم بالتوثر والاعصاب ناخد حبة وماخصهاش تخطاني .

خديت داكشي ورجعت بحالي حطيت الدواء ديالي فالمجر وحيدت حوايجي دخلت للحمام لقيت سعاد حطات ليا بينوار وجديد وفوطات .. هادشب باش كتعجبني مكنبقاش عاد فين هادي فين هادي .. كلشي كتنضمو بحال الاوتيل مكنحتاج كاع نعيط ليها واخا كتفقصني . جمعت شعري باش مايفزكش ويبقا مصايب وغسلت لحمي مزيان والمناطق .. كنت ديجا حيدت الشعر بلالومييغ بلو مابقاش كينوض تهنيت منو ومن تمارتو ولبست بينواري وخرجت حطيت ماسك لوجهي يرتاح شوية .. عاود صونا ليا جاد لقيت راسي كنهضر معاه ونضحك بالادب هه تقول ماشي انا اللي كنت كنبكي عليه لبارح وخنونتي هابطة . ولاكن هوا كيخليني نهضر معاه بهاد الطريقة حيت هوا كيهضر معايا بشوية ومهدن كنلقا راسي كنهضر معاه بنفس الطريقة .. وانا فحقيقتي ديما كنهضر بالزربة وعصبية فتيليفون ومنرفزة غير بوحدي بلا ميدير ليا حتى واحد شي حاجة .

قلت ليه بالادب والتاويل يا لاللة : يالاه دوشت حتى انا وغنلبس غير حوايجي ميم با نص ساعة ونخرج من الدار .قالي فين تبغي نتلاقاو واش ندوز عليك ولا نتلاقاو فشي بلاصة .قلت ليه ماعرفتش اللي بغيتي .. قالي صافي ندوز عليك ونشوفو فين نمشيو

قلت ليه اللي بغيتي . قطعت معاه و مشيت للدريسين كنتفرج فيه .. عراام ديال الصيكان غيطيحو اللخر فيهم محطوط فالارض والصبابط والصنادل كيدوخو تحير شنو تلبس وعاد الشراوط شي حدا شي شي مطوي شي معلق .. كنحس براسي وسط شي حانوت ديال الجوطية مكنعرف مانلبس .. ماحدهم كيكثرو وانا كندوخ مكنبقاش عارفة كاع شنو عندي .. نص ساعة دوزتها غير فشنو باغا نلبس ولقيت شي كساوي عندي باقين بالتيكي عمرهم تلبسو .. جات سعاد هازة حوايج مصبنين مصلوحين مطويين حطاتهم ولقاتني ساهية كنخمم .. قلت شنو نلبس وهي تقولي لبسي القهوي كيجيك واااعر

قلت ليها ديما كنلبسو .. قالت ليا هوا اللي كيجيك فنن مع شعرك

بقيت كنقلب بين دوك السكاوي جبدت وحدة طويلة تحت الركبة خيطها رطب كتجي لاسقة وهابطة مع الجسم وصدرها كول في واسع ويديها طوال .. قلت ليها نشوف هادي كي تجيني نجربها عمرني نلسبها .. اصلا بالليل كيبرد الحال هي اللي غنلبس . لبستها وكتجبد عليا هبطاتها ليا سعاد من اللور جاتني لاسقة ومع انا طويلة شوية بانت عليا وبينات ليا لاطاي جا خصري خاوي فيها كتبغي الكرش داخلة وانا ماعنديش الكرش جاتني عي هاديك فالقهوى وفيها خيوط رقاق باج مخيطين معاها وطويلة مجموعة تحت الركبة كااع اقتانعت بيها وقاديتها من الصدر .. جمعاتو ليا وطلعتها شوية باش منبقاش عادية والشق قدو قداش كيبان .. شوية براكة ان زاد الشيء عن حده انقلب الى ضده . قاديتها من اليدين وطلعتهم شوية وطلقت شعري نزل مقلوب بقيت كنشوف كي جيت وقلت مع راسي بشوية شنو نلبس معاها فرجلي .. قالت ليا سعاد الطالون كيجي واعر معاك قلت ليها ميجيش معاها هي كتبغي البلا غنبان بدلية . هزيت صندالة زوينة ستيل غزال ديال كوتشي فيها بحال زغيبات باج خارجين من لفوق ومجموعين بسنيتة ديال كوتشي فالحمر وبلا جاتني هي هاديك معاها ودفاري بالاحمر ودايرةوواحد سنيسلة ذهب فرجلي .. صافي اقتانعت .. سامبل وكلاص .. درت فعنقي سنساة غليضة شوية ديال كريستيان ديور وتحتها سنسلة رقيقة فيها قلب صغيور جاو مع العنف وليزاكسيسوار ديالي وساعتي بحال ديما وحطيت مكياج خفيف بزاف وحتى لعكر درتو نيود جا زوين ورشيت ريحتي وهزيت صاك كوتشي .. اييه لفري كينطح لفري ماعنديش شي حاجة ايميطاسيون ووليت نطيرو فالسما ماشي بحال هادي مكنعرف لفري من المدرح . ولاكن كولشي كيطلع فالراس ويرجع ممل . وكنقول دائما .. حال حسن من حال اللهم الملل وسط الفيلا وليمارك ولا وسط الزلط .

نزلت هازة صاكي فيدي درت فيه دوا الستريس وخرجت لبرا حل العساس الباب لقيت جاد واقف .. عندو طموبيل كحلة كوبي ديال جولييتا .. كانت كتحمقني هاد الطنوبيل شحال هادي وعمرها دازت عندي . حليت الباب طلعت كنضحك وكنت ضربت لسناني حكة ديال القلب وحتى هوا كان فريكس .. شافني بدا يضحك ولابس ليك قويميجة بيضا مخيطة بالازرق ديال الخروج .. حيد عليا قوامج السربايا كيتكمشو دغيا .. السيد ضاربة ليك قميجة ديال لاكوسط واخا مافيهاش الرمز عرفتها .. وليت نقلع الماركة فالسما ومعاها دجين ازرق فيه شي حكات مستل والسبرديلة منهضرش عليها راه ولد الرياضة كيعرف فيهم منعرفس حسن منو .. ايزا الساعة فاليد والسنسلة نقرى فالعنق رقيقة بزاف غير شعاع ديالها اللي كيبان والشعر مقاد تابت واللحية كتشعل والروايح عاطية كتقول يا ليل يا عين .. ماعرفتش اشمن ماركة ولاكن نوع زوين مريح عجبني ومع انا مولوعة بالروايح كيخليو ليا ديما بصمة وقصة والى مارتاحيتش ليها كنفر من هنا .. حسيت باللي هاد الريحة غتخلي حتى هي بصمة حيت عجباتني بزاف ومريحة تشهيت نبقا غير نشمها .. سلمت علبه من لابيز وجلست بعقلي زعما .. مارفاسوش راه خارج مع حمقة معترف بها من طرف وزارة الصحة

لالا ولاكن الواحد يقولوالله يحسن العوان حتى واحد ماختار يكون مريض ولا كيعاني من شي تعذيب فحياتو . انا كنشوف راسي طبيعية لاكن كما قالت الطبيبة ومغنعرفش حسن منها باللي مواعياش بشنو كندير ويجيب ليا الله راني عادية . المهم شاف فيها كيطلع ويهبط ويبتاسم يديه على الفولون وحسيت بالخجل بقيت كنشوف قدامي .. ماعرفتش واش حيت عرف اسراري ولا حيت جيت زوينة وحشمت على زيني وهوا كيشوف فيا ولا حيت هوا ضريف مصواب والتواضع والتعامل ديالز خلاني نحشم منو ومن راسي .. المهم حسيت بالحشمة وحتى كنت نسيت على احساسها وافتقدت ليها حيت كتخليك تحس براسك انسان وعندك احساس وقلب . وانا مع المعانات اللي كنعيش وقتلو فيا الاحاسيس والقلب نسيت واش حتى انا انسان عندو قلب وعندو مشاعر .. كنت محتاجة لهاد التغيير فالمشاعر شوية من الاسود للابيض .. هاد احساس بالخجل ماشي خايب وانما زوين وفيه لذة والشعور بالاعتزاز ومتعة كتنعش الروح والدت .. عكس الاحراج فيه تجريح والم و عدم الرضا . كانو فعلا مشاعرين محتاجين ولو تغيير بسيط يقلبهم غير شوية للضفة المشرقة .

قالي فين بغيتي نمشيو ؟ وكيسوف فيا بديك الابتسامة .. ابتسمت نفس الطريقة وقلت ليه .. ماعرفتش ..

قالي واش كتعرفي شي بلاصة كترتاحي فيها نمشيو ليها

هزيت عيني قدامي كأن الذاكرة تمحات ليا مع هاد السؤال المفاجئ ماعرفتش شنو نقول حيت ماجاني لراسي حتى بلاصة وقلت ليه نمشيو لشي بلاصة ماتكونش مخنوقة مهوية وزوينة الى كتعرفها

قالي: كاينين نجربو تشوفي واحد البلاصة .. عرفتك شنو كتبغي وهاد الستيل كاين فالامارات بزاف .. عمرك مشيتي للامارات ؟

قلت ليه لا عمرني مشيت ليها

قالي: زوينة .. غير الجو فيها صعيب ناشف .. زوينة غير بالليل

قلت ليه دابا نمشي ليها ان شاء الله

بقينا غادين كنهضرو على الامرات وقالي باللي لاولامبيات منضمين فدبي وغادي يمشي من دابا شي 3 ايام داكشي علاش كيتريني يوميا النهار كامل ومن بعد اسبوع غتبدا البطولة ومابقا ليه والو يمشي بقينا كنهضرو على هادشي وحنا غاديين حتى وصلنا لواحد لغيسطو كبير بزاف عامر من برا ومن لفوق ومن لداخل ونزلنا دار ليا الطريق كنتمشى حداه قالي كاينة جردة كبيرة عندهم لداخل واش تبغي نجلسو فيها ولا نطلعو لفوق .. قلت ليه لفوق بان ليا عامر بزاف الى كانت خاوية نجلسو فيها احسن .. خرجنا ليها كانت عامرة شجر وغرس وكراسا بين ال بيع وفطوبيات والخصات ديال الماء فكل جهة مبردة وزوينة واخا فيها الناس الطبالي بعاد على بعضياتهم . جلسنا فبلاصة فيها طبلة وفوطوي شوية واسع ديال جوج دالناس وكراسا من الجناب من نفس الفطوي طرب فالكري .. جلست فداك الواسع وحطيت صاكي حدايا وجلس هوا على الفردي جيهتي وقدامنا الطبلة .. قالي كي جاتك هادي زوينة قلت ليه هادي اللي كنت محتاجة الصراحة .

قالي خاصك تمشي تشوفي دبي مللي كيعجبك بحال هادي ... الجرادي وليغيسطو ولابيسين جاو وسط ناطحات السحات .. كتجلسي فالغيسطو برا وهما دايرين بيك من كل جهة

قلت ليه شهتيني فيها .. فوقاش غتمشي نتا ؟

قالي غير واحد طخوا جوج وغنمشيو .. تمشي معايا هه

قالها ليا بالضحك وقلت ليه : اه نمشي .. انا براسي خاصني نرتاح ونبدل الجو

تصدم ماتوقعش نكون على القرص قالي مرحبا نهار كبير هادا . هي غتفرجي فيا وانا فلاصين

قلت ليه عمرني مشيت لشي تيران ولا شي بلاصة بحال هاكا

قالي: اللى كنتي بصح باغا تمشي و دخلي تفرجي قوليها ليا نقطع ليك البيي في اي بي حيت لكراسا مابقاوش

قلت ليه اه صافي غير قطع ليا البيي . واش غتمشي بوحدك ولا غيمشي معاك شب واحد اخر

قالي: لا غير انا واللي معايا .. هما خمسة .. كل لاعب كيكونو كيمشيو معاه المدربين المساعدين ديالو راك تكوني تفرجتي شي مرة فشي مقابلة

قلت ليه اه اه عرفت ديجا شفت هشي غير مكنهمش فيه بزاف وصافي .. البطولة شحال فيها .. زعما فوقاش غترجعو

قالي: فيها شي شهر .. بحال هاكاك

قلت ليه : فالصراحة عمرني ما شفتك ولا سمعت عليك واش اول مرة ؟

قالي: لا غير مامتبعاش الرياضات وصافي ... مي انا عاوتاني باقي فالاولامبيات نتي غتكوني كتفرجي فليماتش لكبار اللي كتنضموه كلوري .. هادوك بوحدهم كيدارو مرة فالعالم مي حتى كيكون عندك واحد الحزام اللي كيمكن ليه بيه تسمى بطل عالمي ويعيطو ليك تلعب فنزال عالمي مع الابطال لكبار .. هنا فين كتولي معروف على الصعيد الوطني والعالمي .. مي انا مزال ماوصلتش لداك النيفو باقي فالاولامبيات .. الى وصلت للفينال وخديتها ديك الساعة كتبدا تلعب ديريكت فمقابلات كبار كيراهنو عليك الشركات ويراهنو عليك كاع اللي لاباس عليهم عالميا وكيعطو ليك كيجبو ليك بطل عالمي حتى هوا وكينضمو مقابلات . غير هما هادوك اللي كينضموها بحال كلوري مثلا . مرة وحدة فالعام .. يعني كتلعب مقابلة وحدة فالعام مع بطل عالمي

قلت ليه : صافي غير مقابلة وحدة فالعام

قالي : اللي بغيتي بغيتي تبقا تلعب هنا وهنا وهنا لعب مي المقابلات لكبار كيتنضمو مرة وحدة فالعام .. الى بقيتي كتلعب بزااف غتهلك غير صحتك حيت اصلا هاداك اللي غتلعب معاه بطل عالمي واعر خاصك ليه عام عماين ونتا كتدرب باش يالاه تربحو وتسمى بطل عالمي واللي مكيعرف بلادك يولي يعرفها وكتشرف بالبلاد عاوتاني

قلت ليه بصح الصراحة الرياضة كتشرف بالبلاد

قالي : الرياضة هي صعيبة ولاكن بلادك كتشرفها وتبقا فالصدارة ديما عالميا ... شكون هاداك اللي ربح .. مغربي .. شكون اللي خدا البطولة .. مغربي .. كيولي العالم يعرف بلادك ويقدرها حيت الرياضة هي اللي كيهز فيها شعار بلادك فالسما كيرجع اللي معارفوش عارفو .

قلت ليه الله يسهل عليك تربح البطولة ..

تنهد وقالي: امين كادكشي اللي كنتمناو .. ماشي بوحدي اللي مغربي لاعب تما ولاكن غنديرو جهدنا واكثر

وقف النادل علينا لقانا كنهضرو نسينا منشوفو شنو ناخدو .. كان فيا الجوع والهدوء وريحة التراب وهاد الخضورية والاضواء شهاوني فشي طبق يكون فيه دجاج مقرمش .. طلبت سوب لونتخي عاد الطبق الرئيسي وحتى هوا طلب سوب فالاول بحالي وحطو لينا لعشا .. شفت لاسوب ديالو بيضاء قلت ليه ديالاش قالي اول مرة نجربها دوقيها الى بغيتي تعرفي وكحزت دقت منها بنييينة ووبديت مرة نشرب من ديالي مرة من ديالو وحتى هوا خدا من لاسوب ديالي .. المهم نوعنا وحنا كنهضرو على الرياضة بكل انواعها حتى حطو لينا الاطباق الرئيسية كتشهي داكشي واعر فالتقديم وكثير .. مع انا فيا الجوج شفت فديالي وديالو وهوا يقربو للوسط قالي عرفتي شنو غنديرو .. نوعو انا ونتي بنتي ليا عزيز عليك الماكلة

بقا كيضحك قلت ليه كتعجبني الحاجة اللي ماشي ديالي وبدينا نضحكو .. حطو لينا العواصر وبدينا كنتعشاو ونهضرو ونتجمعو شركنا داكشي كامل وحطو لينا سلاد منوعة حتى هي المهم حسيت براسي مرتاحة فالماكلة فالهضرة فكلشي .. كنهز منين ما عجبني تقول مولفة نخرج معاه وكنضحك فوجت الصارحة حتى سالينا لعشا وهزو كلشي وبديت نفيبري قلت ليه واش ماعندهمش هنا الشراب؟

قالي لا ماعندهمش .. مي حسن بلاش باش ماترضيش داكشي اللي كليتي .. خودي ليك شي حاجة اخرى ونسي بيها

قلت ليه : زعما غير سولت وصافي ..

قالي : متبقايش تشربي بزاف كير تلف الكبد الى كترتي منو .. مي نتي واللي عجبك بغيتي تشربي ماعنديش مشكل نمشيو لشي بلاصة اخرى شوفي نتي فين رتاحيتي

قلت ليه لالا صافي .. عندك الحق ماخصنيش نكتر راه غير الولف وصافي

جبدت الكارو ديالي حطيتو ودرت رجل على رجل تكيت اللور وقلت ليه مكتشربش بزاف

قالي: لا ماشي ديما .. مكنفوتش كاس وكنميلونجيه بشي بواصو .. غير كيعجبني وصافي ومع السبور مكنبغيش نكتر

ضحكت وقلت ليه: كنشربو سيك

قالي: بداي تميلونجيه حسن ..سيك قاصح عليك

قلت ليه : غنبقا نخلطو مع كوكا ولا هواي

قالي: حسن من سيك

جبد الكارو ديالو هوا حطو وشعلو وكنت جالسة قريبة ليه بيني وبينو غير يد ديال الكرسي ديال وديالو وهوا مقلوب جهة الطبلة تكيت على حنكي والكارو بين صبعاني بقيت كنشوف فيه قلت ليه شحال ونتا كتمارس هاد الرياضة..شنو عجبك فيه

قالي الكيك بوكسين من الصغر وهوا كيعجبني .. كنفرغ فيه طاقتي كنرتاح ولقيت راسي فيه صافي مني عقلت على راسي وانا عطيني نعطيك لليوم

كانت يدو محطوطة حدايا وحطيت صبعي عليها قلت ليه

- اه شحال قاصحة !!..

بدا كيضحك وقالي: هاد اليد اللي غتعطي الضربة القاضية كي بغيتيها تكون

قلت ليه: كتريني يوميا !!

قالي: مع الستة دالصباح .. كنبدا لناطاسيو ساعةساعة ونص ساعتاين شي مرات كنحرق نيكوتين ديال لكارو .. واخا مكنكميهش بزااف حيت نهار كامل وانا فلونتخيمو كنساه وماخصنيش نكمي وسط لونتخيمو غنضيع كلشي ونقتل السوفل .. المهم الستة كنبدا لاناطاسيو والتسعود كنفطر وكنرتاح شوية .. العشرة كنبدا نتريين داكشي بالسميات ماتعرفيهش المهم من الشعرة للجوج .. كنتغدا وكنرتاح ساعة .. غير تما مكنمشي حتى بلاصة غير مع تيليفون صافي كدوز .. الثلاتة كنبدا البوكس مع المدربين كل مرة كيجي مع واحد حتى لاخمسة وكنرتاح شوية ونكمل حتى للثمنية وكنخرج

صدمني تبارك الله قلت ليه انا كنجري غير شوية كنجلس نرتاح . وفاش كنرتاح كندير بناقص

ضحكتو وقالي: خاصك شي نهار تمشي تريني معايا نوريك الجرا .

: قلت ليه : لالا انا باغا ندير السباحة دابا وصافي

قالي: مزيان باش صدرك يتحلو فيه دوك الجعابي وريتك تهز النفس مدة طويلة

قلت ليه واش هما كيعطيوكم معلومات بحال هادو زعما

قالي: هنا كيوريك كلشي .. الطبيب اللي متبع معاك كيوجهك ويعطيك شنو تاكل شنو تشرب باش تفطر لاش تغدا . كيكون مختص فهادشي هادا والمدربين ديالك اللي كيوجدوك ويعاونوك حتا هما كيبقاو حاضيين معاك .. فيها الخدمة ماشي شي حاجة ساهلة راه العام كامل ونتا كتوجد فراسك باش يالاه تربح واحد من بلادك ولا تربح فمقابلة ودية مع شي اجنبي ولا سي حاجة بحال هاكا .. اما باش تدي البطولة راه الحلم ديال كاااع هادوك اللي مشاركين ماشي ديالك بوحدك

كهمني حسيت براسي سخفت .. كيهضر فالرياضة وانا متبعة معاه تقول كنجري وتنهدت قلت ليه حسيت بالسخفة تقول انا اللي داز عليا هادشي كامل . .

سكت وضحك وبقينا ساكتين شحال .. ومتكية بيدو حدا يدو .. الهزة اللي غنهز راسي ليقتو كيتأمل فيا ضحكت ليه قالي كتباني بعقلك .. اللي شافك دابا ميقولش هي نفسها اللي كانت لبارح كدمع فطموبيل

فكرني وتنهدت من بعد ماطفيت ديك الطفية وسخفت حطيت وجههي على يدي وقلت ليه

- ماشي هاكاك ... راه الضروف كتخليني نولي هاكاك ..بفمك قلتيها نسيتي

كنهضر معاه وبزز .. فشلانة .. كان قريب من راسي وقاسني بجبهتو قالي

- فيقي ... الى باقا عاقلة على الهضرة دالبارح مزيان .. مابقيتيش عاقلة نعاودوها حتى تعقلي

قلت ليه فخبارك واحد الحاجة .. ول مرة نجلس مع شب واحد طيط اطيط بحال هاكا ونعاود .. صحباتي وراه معارفينش داكشي كامل اللي قلت لبارح

بخ الدخان فالجهة الاخرى وقالي: حسن .. مافيه مايتعاود

درت يدي على فكي شفت فيه وقلت ليه : فايت ليك زعما وقع ليك بحال هاكا

هز راسو فالسما تكا وقال لا

قلت ليه : وعلاش لبارح قلتي ليا اه

قالي: دابا قلت ليك لا .. نتي براسك غيجي واحد الوقت تقولي لي لا .. صافي غتنساي هاد المرض علاش غتقولي اه!!. اه في حالة ما باقي مأثر علينا مانسيناش

قلت ليه بتردد: امم .. زعما شكون هاد البنت .. كفاش وقع ليك معاها

ميل راسو جيهتي كان بان فيه النعاس وقالي بواحد الابتسامة كيشوف فعيني وشعري ووجهي

- تخربيقة وصافي كدوز

حسيت بيه مابغاش يعاود ومابغيتش نعيق خليتو وبقينا كنهضرو ومدام غنمشي لدبي خاصني نعرف كيفاش دايرة ومصاريفها وعطاني جميع المعلومات وقالي هوا باللي هما كيتكلفو ليهم الجامعات الدولية دالرياضة بكلشي ديالهم .. بينت ليه باللي ماعنديش مشكل ديال لفلوس غير خاصني فكرة باش نعرف شحال ناخد معايا وبدا كيعاود ليا على دبي وكنهضرو حتى داز الوقت وعيينا .. بغا ينعس بدا كيهضر ويسد عينيه اما انا والو عاد تخلو ليا لعينين ولفت السهير . نضنا خرجنا بغيت نخلص دار فيا واحد الشوفة وماخلانيش دفع العشا وخرجنا مشينا وصلني للباب وقالي الى كنتي ناوية تسافري وجدي راسك تمشي معايا فنفس الطيارة .. قات ليه واخا صافي و سلمت عليه ونزلت جا العساس وسعاد كيجريو عندي وقبل منسد الباب ميل راسو شاف فيا كيضحك وقالي : حمقتيهم معاك

بقيت كنضحك وسديت الباب شافتني سعاد والعساس مزيانة عادية ورجعات دخلات مضهشرة بالنعاس .. ماخليتيهاش تمشي تنعس قلت ليها طلعي معايا بغيتك وطلعات معايا للبيت قلت ليها غنسافر خاصني نجمع الحوايج ديال السفر واللي خاصني نشريه حيت بقات ليا غير 3 ايام . قالت ليا كتفوه خلي حتى لغدا قلت ليها غدا غندير اجتماع فالخدمة نطرق معاهم المسمار باش نمشي هانيا .. وبعدو يالاه نشوف راسي شنو خاصني ماعنديش الوقت كاع

وكضتها وبديت ندور فداك دريسينغ جاتني الدوخة والنعاس طار .. بديت كنقلب شنو ناخد معايا وعطيتها دفتر بديت كنملي عليها شنو ناقصني كتكتبو تما .. لقيت عندي الحوايج تبارك الله وبديت ندوز واللي مابقيتش كنلبسها كنحيدها ونعطيها لسعاد وهي توكض معايا وقفات وعجبها الحال .. عطيتها عرام ديال الصنادل والصبابط وشي صيكان صافي مابقيتش باغاهم وشحال من بيجامة .. كان قالي جاد باللي الصهد كيقطر تما وهزيت واحد جوج ديال ليسوميج دو نوي نعس فيهم .. بينوار دالحمام ديجا مستعملاهم قيدتو ناخد واحد جديد وحتى النفسية تجدد .. خرجت البابيزات وربعت ديك اللة حتى صبح الحال ستفت جوج باليزات يالاه هزو ليا الصيكان والصنادل والحوايج وماكترتش بزاف كنت ناوية نمشي ونشري من تما . جمعت وطويت وقفتهم وخليت سعاد ترد داكشي لاخر بلاصتو ومشيت نعست .

الصباح صبحت فالخدمة فالبارا اللولة جمعتهم كاملين درنا اجتمعاع وشفت السطوك والاوراق واللي خرج واللي دخل والحساب مع الكونطابل .. كان النهار عامر خدمة ومارصيت داكشي حتى تشق ليا راسي .. خرجت ركبت فطموبيل مشيت كنكمي للبارا الثانية حتى هي نفس الشيء ولحق عليا الكونطابل اللي شادهم بجوج وريكلت معاهم المسائل كلها ووصيتهم وقاديت الشغل باش نمشي مرتاحة من جميع النواحي . خرجت معطلة تفكرت جاد عيطت ليه مكيجاوبش .. عاودت عيطت ليه وشفت الساعة كانت التسعود يعني سالات لونتخيمو .. فالتعييطة الثانية جاوبني وكيهضر بشوية بحال الى كان ناعس .. كنت بغيت نسول فيه وكيهضر بحال الى ماباغيش يطول الهضرة حتى قالي بسلامة وانا نسمع صوت بنت قالت ليه جاد ؟ فينك؟

قطع وقلت واقيلا نوضوتو من شي بوزيسيو ماشي هي هاديك ميعجبوش الحال . ولاكن انا غير سولت فيه وصافي .

ماعجبنيش الحال تنادم معايا الحال على هاد الموقف ورجعت بحالي للدار نرتاح شوية .. حطات ليا سعاد بان كيك وكريب صواباتهم وعزيز عليها الشهيوات والطياب كتموت عليه خاصها غير المقادير كنقول ليها غير بدعي وعجبني وفعلا كتبدع .. حطات ليا كاس دالليمون وجلست فلاتيغاس فبيتي كناكل ونهضر مع ماما علمتها بالسفر .. كنت جالسة مابيا ما عليا فالبرودة لابسة سوميج ديالي كحلة متولة وصندالة فنكوشة رطبة مزغبة وطالقة شعري كيتبرد مرتااحة حتى دازت ابيل جاد فلابيل ديالي انا وماما ومابغيتش نجاوبو .. عادي حتى انا مامسالياش حتى نسالي ويكون خير .. قطعت مع ماما وهوا يعاود المرة الثانية عيط وموكض هاد المرة قالي صافا بيخير .. قلت ليه بهدوووء وكياتة ناشطة مع راسي

صااافا الحمد لله .. ونتا فين غبرتي

قالي : قالي ماغبرت ما والو ونتي شنو كديري .. شنو درتي ليوم

قلت ليه وجدت حوايجي ورصيت اموري.. دابا جاااالسة فلاتيغاس .. الجو مبرد زوين كندير كاسكروط .

قالي بالصحة .. راه قطعت ليك البيي معايا فالطيارة

قلت ليه علاش قطعتيه انا نقطعوه وبقينا مني منك ماعجبنيش الحال يخلصها و قالي صافي دازت .. كنتسالك عراضة يالاه بقيتي على خاطرك .

قلت ليه تستاهل غير جيب الحزام الذهبي ونعرض عليك لطوكيو كاع

قالي : طوكيو كاع

وكيهضر بشوية عندو واحد الضحكة مهدنة غير بشوية .. طاقتو السلبية كيفرغها ويرتاح . هضرنا شوية قالي حتى هما جمعو كلشي مغادي يتريني غدا غيمشي يدير صونا ومساج تقطع فيه اللحم قلت ليه داكشي اللي غندير حتى انا .. غندير حمام وسبا نقاد الحالة . بدا كيضحك وقال زويينة بلا ماتزيدي تقادي .. جاني الخجل عاوتاني .. ياه على احساس شحال زوين . لعلا يرحم شي وحدة من نعمة الخجل كنحس براسي كيوت وانثى من الفوق . ولاكن شكون اللي غيحسسك بالانوثة وانا محرومة حتى من الكلمة الطيبة وعاملة بحال شي ارض شافة تشققات بالجفاف

هضرنا شوية بدا كيتفوه قلت ليه فيك النعاس .. قالي عييت .. كنت غنقوليه بصحة وداكشي دالبراهش نبان زعما عقت بيه ولاكن انيولي داك الزمر قلت ليه رتاح ليك مزال تابعك طريق طويلة عاد غتبدا

تنهد قالي وايه .. يالاه تصبحي على خير .. قطعت معاه ومسحت يدي شعلت واحد القطيب وتكيت كنتأمل حتى ساليت وقالي راسي هبطي عومي .. من نهار شريتها عمرني عمت فيها غير ختي وخويا اللي كيجيو يعومو فيها وكتجيب ولدها يلعب هنا .. هي بعدا تزوجات دارت دارها مع الليويستاهلها واخا الحياة كلها مشاكيل لاكن مرتاحة فحياتها ضبر راسها . نزلت للجردة شعلت الضو فلابسين لداخل وحيدت السوميج هبطت بدو بياس كوحل .. غير بوحدي والكالم مامعايا حتى واحد والشجر عالي والنخل داير فاصوار الفيلا مدرق كلشي بديت كنتطلق تما ونمشي ونجي حتى عييت وطلعت لويت عليا فوطة ومشيت لبيتي شللت من الكلور بجيل دوش ونعست .

الصباح بدلت الصالون .. كانت فاتن و راتني واحد السبا كتمشي ليها كبيرة فشي فيلا عجباتني ومشيت ليها فعلا كانت زوينة .. عندهم درت كولشي وكلفني النهار كامل من الطناش حتى للستة .. درت عندهم حمام ومساج وصايبت رجليا صبغتهم ويديها حتى هما قاديتهم وصبغتهم وشعري درت ليه سوان باش مامبقاش نصاوبو فمرة غير نشفو وصافي . قالي الولد اللي صاوب مللي كيعجبك شعرك بوكلي ناخد بابيليز غليض نبقا غير ندورو بزربة مع دابا درت بروتين رجع حرير مابقاش كيتنفخ كاع وتهنيت من التصاوب كل نهار .. ساليت داكشي اللي غندير شريت من عندهم البابيليز اللي نصحوني بيه وردت سوان لوجهي نقيتو وخرجت مرتاحة كنحس براسي انضف وحدة فالدنيا . مشيت للمول جبدت الورقة شريت داكشي كامل اللي خاصني ودزت للبارا جمعت ليبخودي ديالي اللي كنستعمل وقالي جاد الجو ناشف خديت مرطب الشفاه مداقه حلو كنديرو فمي كنحس بيه رطب وبحال الحلوة دغيا كيتقادا ليا .. خديت منو خمسة وبخاخ الفم ومعجوم الاسنان ومكملات غدائية رجعت مدمنة على هاد التخربيق والمساحيق . مشيت للفيلا عاودت ستفت كولشي وحطيت اللي نحتاج فالباليزة اللي غنطلع معايا وقاديت اموري .. الحوايج اللي نمشي بيهم حطيتهم جنب وجهزت كلشي حتى فاجاني اتصال بابا قالي راه مك قالت ليا غتسافري وداكشي اللي هضرنا فيه قلت ليه غنرجع منتعطلش عندي شي خدمة وشي سلعة غنجيبها ونجي نبداو داكشي . بقا عليا دوزي ليا لفلوس ما دوزي ليا بقيت كنتهرب ونتبت فيه وقطعت معاه بالزربة حيت جاد كيصوني . رديت عليه بدا كيسول عليا وعلى احوالي وكنهصر معاه وكيتكسل قلت ليه كي بقاو عضامك جانو الضحكة قالي كيسلمو عليك . قلت ليه حاامض ..قالي بحالك وبقيت كنضحك وقالي وجدي راسك غدا مع الخمسة دالصباك نلقاك فالمطار راه الطيارة عندنا مع الستة ونص يالاه ندوزو . تافقنا صافي وطحت نعست شربت الدوا حسيت براسي فشكل تبنجت وفاش نعست ما حلمت ما والو والصباح واخا صونات الساعة والتيليفون ماسمعت والو كن ما سعاد اللي فيقاتني قالت ليا قلتي ليا نفيقك مع الخمسة .. نضت بزز استغربت .. ماحسيتش بالوقت وماسمعت حتى خاجة .. قالت ليا راه شحال وانا كنفيق بزز باش فقتي .. قاا ليها الدوا اللي شربت صيفطني للاخرة راه كما نعست بقيت حتى فقت ! وعنقي صبح كيضرني مكندورش للجنابي كاع بقيت غير كنشوف قدامي وعييت نسرح فيه مابغاش.

صبحت منونخة عمرني صبحت تقيلة واخا حتى بالشراب .. كان ضاروري نعاود ندوش باش نفيق وغسلت بماء براد شوية مع ذلك بقيت منونخة .. يمكن الساعات ديال الدواء مزال ماسالات باش يمشي مني التأثير ديالو حيت فقت بكري وشربتو معطلة . ميمكنش حاسة براسي بحال مبنجة واخا دوشت واخا خرجت للبالكون ضربني البرد كنحس براسي فشكل .. دايخة ومعولة على سعاد تعاوني .. مدات ليا حوايجي اللي وجدت بالليل كانت سورفيت ديال الصفر مريحة وزوينة وانيقة عندها سروال ايلاستيك بحال الكولون كحل وديباردور قطن كحل من لتحت وفيست ديالها فيها شوية دالابيض والخزي قصيرة واسعة من لتحت ستيلها زوين والقب واسع والسنسلة كحلة حليتها غير النص لبست معاها صبرديلة بيضاء زوينة ونشفت شعري مزيان لاول مرة نطلقو سامبل .. جيت فشكل كنبان خفيفة وكيوت .. مادرنش مكياج حيت السفر كنعيا فيه كنبدا نتلسق .. درت مرطب شفاه صافي وبقيت على طبيعتي ورشيت الريحة .. انا كنوجد راسيووالعساس كيهبط البالز حتى ساليت وركبت معاه يوصلني للمطار ويد الطموبيل . وصلت للمطار دخل لياالبالز فالشاريو جارهم وانا موراه هازة صاكي وتيليفوني كيصوني كاج جاد . لقيت كندور عيني وجاوبتو سولنيزفين وصلت يالاه غادي نجاوبو شفتو جالس فواحد الكافيتيريا داير كاسكيطة على راسو مخبي فيها وكيهضر معايا قالي صافي شفتك وقطع ناض عندي .. كان جالس هوا ومعاه شي وحدين لابسين لباس عادي سبورتيف كاملين وقدامهم عرام ديال البالز والصيكان .. جا عندي كان لابس سورفيت واعرة ديال النايك .. ايييه الفريز كينطح الفريز ومستيلية الاموض فالكري والكحل وسبرديلة ومع طويل تبارك الله مفورمي وقف قدامي مد ليا حنكو تهزيت باش نسلم عليه ولقا السلام على العساس مسكين اللي وصلني وخدا من عندو الشاريو داني معاه من بعد ماوصيت العساس على الدار وكولشي . وقفو كاع اللي معاه كانو تبارك الله مطوكرين حتى هما سلمو عليا وعرفني عليهم واحد واحد .. كان من بينهم داك صاحبو اللي ديما انا وياه شد ليا نقطع ليك وتصدمت فاش قالي مدرب ديالي وخويا فنفس الوقت !

ؤهيييه تصدمت !!! فاش قالي خوه وقالها وباغي يضحك شاد الضحكة بلسانو ودغيا دور وجهه .. اما انا مبربقة اصلا ماعرفتش واش بصح قالي خوه ولا غير تخايل ليا ومع ذلك سملت عليه وخا سلامو كان ناقص نوعا مع وجر ليا كرسي جلست معاهم .. بقيت كنشوف فيه عاد حققت مزيان فيه واخا خانني التركيز حاسة براسي باغا نرجع ننعس .. خوه ابدا مكيشبهش ليه وباين كبير عليه شوية وماشي غير هوا اللي كيدربو .. عندو تما جوج ديال المدربين خوه وواحد اخر كبير تكون عندو ربعين عام ولاكن يهز القهوة ويهرب بيها حتى هوا . جلسو كيهضرو بيناتهم و جاد كيعضر معايا وانا كنتمايل ماقدرتش نهضر وخوه غير كيشوف فثا ويسملل قال هادي فاطرة بشي قرعة دالفوطكا وانا راه غير اوا اللي بهدلني .. وجاد حتى هوا حسيت بيه شك فيا بقا غير كيشوف وقالي مالكي واش عيانة ؟

قلت ليه ماشبعتش نعاس وحاسة براسي عيانة .. مكنقدرش ندور عنقي

قالي نعستي عوجة وبقينا كنهضرو حتى وصلات الوقيتة اللي غنوضو فيها ومشينا دوزنا الشنط وكولشي وانا وخوه خزر فيا نخزر شفتو ماعجبوش الحال علاش نمشي معاهم واصلا انا ماحملتوش يكون خوه ومكيشبهش ليه جاد زوين عليه ومسرار لاخر لا ملامحه بعيدة وفشكل وفيه شي شيبات بيضين فلحيتو ميكون غير شي ربعيني ولاكن كيبان صغير بديك الفورمة وحتى الرياضة كتصغر بنادم

ماعلينا دوزنا كولشي وطلعنا الطيارة لقيت كاع اللي معاه شدو كراسا عاديين وانا وياه فبزنز كلاص .. حنى انا اول مرة نسافر فيها واخا عندي الفلوس عمرني فكرت نمشي فيها .. كانت واعرة مجهزة فيها كل شيء وجلست جهة السرجم وهوا حدايا بيني وبينو واحد اللعيبةيال المشروبات وكتكا عليها حتى اليد رطبة وقدام كل واحد فينا تلفازة .. يالاه جلس حدايا وهوا يصوني ليه تيليفون جبدو وشفت فيه كانت وحدة سميتها رانيا صونات المرة الاولى ماجاوبش وعاودات المرة الثانية والصباح بقبت غير كنشوف هادي اللي فايقة فهاد الاوقت كتعيط ليه سعداتها .. انا بحال الى مضروبة بمقلة حتى راسي تقيل عليا .. فتح الخط جاوب حيت مابقا والو للطيارة تقلع و الريزو يمشي وماعندو كي يدير ينفارد جاوبها وتكيت انا على الجهة لخرى خليتو يهضر وياخد راحتو وبقيت كنسمع ليه كيهضر

قاليها الو صباح الخير وبدا يهضر عادي باينة كتسولو فين وصل والسقيل فالطيارة وكيهضر بشوية انا اللي حداه بزز باش كنسمعو شكيقول .. ماكملتش التسناط صافي نعست ماحستش بالطيارة فوقاش طارت ولا فوقاش طاحت المهم لقيت راسي على واحد الحديدة ! لالا غير يد جاد حسابني حديدة وانا ناعسة عليها . هزيت راسي بزز وعنقي عوج لقيتو ناعس مسكين حتى هوا حيد فيست السورفيت وجلس بتيشورط كحلة كانت مزيرة عليه وحاط الكاسكيطة على وجهه والكيت بلوتوت فودنيه كحل وهاز رجلو على واحد اللعيبة قدامو غير بالتقاشر بيضين وناعس .. بقيت كنشوف فيه وحسيت براسي توكضت .. داك الدوا كان مزال شاد فيا الصباح عاد عرفت باللي كيمشي التأثير دياله حسب الوقت . شفت فالسحاب كانت الشمس ساطعة برا وخنقاتني لافيست حيدتها وبشوية باش منقيسش جاد نفيقو وحطيتها فوق صاكي فالجنب وجربت ديك اللعيبة اللي قدامي كما دار هوا حيت كان التيساع بيني وبيها والبلاصة مريحة وزوينة .. حيدت سبرديلتي حتى انا وتكيت على ضهري عاد تنفست حسيت بالراحة وجاني الجوع لقيت كولشي قدامي الى بغيت نطلب ولا الى بغيت شي حاجة ولاكن مابغيتش نطلب غادي يدوزو ليا الماكلة على جاد ويفيقوه وباينة فيه عيان مهدود باغي غير يرتاح ومازال تابعو مبارات

شديت تيليفون مالقيت ماندير ومابقا صالح لوالو فاش مشات لكونيكسيون جلست كنتصور ونلعب فتيليفون رجع بحال شي خرشاشة فيدي .. حتى الالعاب مافيهش ! واحد اللحضة هز جاد راسو هبط الكاسكيطة وكان مغوبش فايق خاسر .. هاد التغوبيشة اول مرة نشوفها . ديجا شفتها وانا سكرانة ولاكن مابقيتش عتقلة عليها النهار الاول .

بقا كيشوف فيه عاقد حجبانو عاد ضحك وقلت ليه نسيتس راسك فين غادي

مسح على وجهه وقالي: واييه .. تسخسيييخاااا

طلب الماء يشرب جابو ليه عرقان كيشهي وطلبت نشرب وقالي واش تاكلي شي حاجة .. قلت ليه قبيلا كنت غنطلب ولاكن مابغيتش نبرزطك دابا اه ..حيت جاني الجوع الصراحة . كانت قدامنا والشاشة فيها الى بغيتي تفرجي فشي حاجة وفيها حتى الالعاب وفيها الى بغيتي طبلي و هادشي عاد وراه ليا هوا وقلت ليه قنطت .. ماكرهتش كون كانت كونيكسيون .. هز عينيو فيا مستغرب وقالي علاش ماعارفاش راع كونيكسيون فالطيارة ؟!

قات ليه بصح !!! زعما راحنا فالسحاب وسافرت ماعمرني تكونيكطيت

قالي كاينة اري نوريك .. راه كتشريها من عندهم دايرين لوفر ديال الطيارة

قلت ليه ومنين شادة اشمن دولة واشمن خط

ضحك وقالي: شادينها من الساطيليت اشمن دولة ... هادو متقدمين يوريوك لعجب .

ماصدقتش حتى طلقها ليا قاليا هانتي يالاه تكونيطاي.

شديت تيليفون الصراحة فاللول جاتني غريبة تعجبت ولاكن فاللخر تعجبت لتأخر الخيال ديالي وعقلي وتفكيري المحدود اللي مابغاش يصدق حاجة ممكن تكون وبسيطة بحال هادي !. لكشي ممكن الكلاخ ديالي اللي غير ممكن وخاصني نبدا نتخلاط ونتحرك باش منبقاش متأخرة والناس يضحكو عليا . ولاكن مزيان هانا كل مرة نكتاشف حاجة جديدة وتقولها للي كنعرف حتى انا .. وفعلا فاش فكرت شوية لقيت باللي الكابتن كيكون على تواصل مع المطار يعني كفاش كيتواصلو والريزو مقطوع ويهضرو معاهم .. اذا كلشي ممكن . شديت تيليفون بقيت كنلعب فيه حتى حطو لينا الماكلة.. وماكلة نيييت كتشهي يا سلام والتقديم غزال بحال الى راني فشي غيسطو .. طلبنا غير فطور صحي حطو ليها متنوع بدينا كنفطرو ونتجمعو وتيليفونو كل شوية يصوني فالواتساب وطلع ليه رانية كتسول عليه واش وصل واش ماوصلش .. سيفطات ليه ابيل فيديو قطعها وبدا يكتب ليها بالزربة وعاودات سيفطاتها وحيدها ورجع كيكتب وسد التيليفون مرة حطو حداه لاكن عاودات صونات ابيل فيديو حتى زفر وهز تيليفون قطع عليها وتاصل بيها كنسمعها كتقول ليه دير ليا ابيل نشوفك علاش مابغيتيش نشوفك

بالزربة بدا ينقص الصوت وانا كناكل درت راسي صمكة وقال ليها حتى نوصل ... نوصل ونعيط ليك ..وبقا مل شوية يعاودها ليها ويهضر بالعبار وقطع حط تيليفون ودار واحد التنهيدة غارقة وقلت ليه : مالك عليها

شاف فيا وقالي : شنو هي ؟

قلت ليه : هاد التنهيدة

بدا كيضحك وماقال والو سكت وكملنا الماكلة وتكيت بديت نقشر فواحد الحبة فكتفي وساهية .. حتى طرطق صبعانو حدى ودني قالي فين مشيتي

تلفت قلت ليها والو غير عييت كنتسنى نوصلو وحطيت يدي على ديك اللعيبة اللي حدايا ورخيتها كنت دايرة فيها واحد الكروميط ذهب فيها رموز مدليين والساعة وبدا يحرك فدوك الرموز ساهي والملل قاتلنا .. انا بعدا جاني الملل كل شوية نتقلب لجهة تقهرت .. اما هوا بدا كيحرك فدوك الخراشش وغادي مع يدي وانا ساهية فالزاج حتى وصل لصبعاني وبدا يخبش ليا فدفري .. شوية حط يحط حط يدي على راحة يدو كيشوف فيها وقالي يديك زوينين

ضحكت وتنهدت واحد التنهيدة كنشوف حيت بحال هاد الشدة كان دار ليا زايد واحد المرة فجموبيل ونفس الكلمة قالي .. حنيت وتزيرت وفكل مرة كنحن كنبغي نبكي .. بقيت ساهية وجاد كيلعب ليا فيدي حتى لواحد اللحضة دار صبعانو بين صبعاني وجمع القبضة ديدو .. وكل حركة كيديرها كتخليني نتفكر زايد ... حتى هوا كان كيشبك يدي مع يدو ويبقا يهضر .. قلبي ضرني حسيت بغصة وتنهد تنهيدة طول من اللي تنهد جاد حتى ردها ليا وقالي ومالك عليها ؟ تكيت راسي على الرسي كنشوف فيدي وبقا هوا مرة يفتح صبعانو مرة يجمعهم فصمت حتى طلقو الاشارة باش نربطو الاحزمة نزلو

وصلنا اخيرا ودخلنا واحد الانبوب متاصل بالباب للمطار ومعايا جاد هز شكارتو على كتفو وباليزتي فيدو وجاي مورايا مورايا وموراه الطبقة ديالو .. داز خوه سبقنا زربان كان غيدوز فيا .. وكن قاصني كن عطيتو فهاد ضوباايي بالطريقة الضوباوية ولاكن ماقاسنيش خرجنا من المطار قالي واش تجلسي فنفس الاوتيل فين نازل انا قلت ليه ماشي مشكلو قبلت .. خرجنا من المطار كانت طموبيل طويلة كحلة وعالية كتسنانا طلعنا فيها كاملين وكانت المقدمة فيها كراسا مقابلين جلست حدا وقدامي خوه ووتحد اخر واللور البقية .. حسيت بخوه معاجبوش الحال من وجهه ومكيشوفش فيا وباينة غيقول ليه علاش جبتيها ويبقا عليه وانا اصلا جايا باغا نفوج والطبيبة عطاتني الراحة وكنت غنسافر ماشي بالضرورة مع جاد غير جا فطريقي .. ولاكن هما بجوج وكاملين ماعرفينش هادشي كنبان ليهم شي وحدة مسوفجة لسقات فيه وجابها .. وماكرهتش تجي الفرصة ونقول ليهم انا ها شنو جابني لدبي باش مايمشيوش غالطين وحتى خوه العجل مايفكرش بديك الطريقة الخراوية ديالو . انا فقط حاسة براسي تايهة . . تالفة اي حاجة ممكن نشد فيها واي يد تمدات ليها حسيت بيها حنينة غنشد فيها والوجهة ديالي مامعروفاش اللي شكر ليا شي حاجة ونمشي ليها . لحد الان مزال ماعارفاش راسي من رجلي ودايخة . حسيت بالتوثر ودخت وانا كنفكر فهادشي وحسيت بالبكية .. ماعرفتش علاش وليت هاكا كنتأثر واخا بسبب تفكيري .. مجرد اخد ورد مع عقلي وترني وبغيت ناخد شي حبة ماصلاحش ليا قدامهم وبقيت هاكاك هربات ليا الراحة وانا كنتخيل خوه كيسبني ليه ويقول ليه علاش جبتيها .. ماحدي كنتخيل المنضر وتوثري كيكبر حتى وصلنا لواحد الاوتيل كبير ونزلو لينا الشنط دخلهم ونزلت ماهضرتش مشيت نيشان سبقتهم دخلت وقلت لهاداك االلي جرهم يعزلهم بوحدهم ومشيت راسي ماشفتش مورايا شديت غرفة بقا هاداك كيهضر ليا على نوع الغرف وانا مرفوعة كنتخايل الى ضرت لقيت خوه كيهضر معاه ولا كيقلل مني قدامو مغيعجبنيش الحال ومغنرداش وكن كنت شاربة ندوزها ولاكن ساحية مغنتقلبهاش وغيبقا فيا الحال ومنرضاش قدام جاد .. ضرت شفت ورايا لقيت غير جاد واقفو كيهضر فتيليفون وفاش شافني شافت فيه هز ليا يدو ماعرفتش واشوقصد بيها نتسناه ولا شنو .. ماديتهاش فيه وكنتخيل باللي خوه قاليه ديك الهضرة وهوا عندو دابا فبالو ومالقا كي يدير ليا وحشم مني وندم و حطيتو فموقف خايب .. كل مرة نتخيل ونبني ونعلي ونمرض فراسي صافي حتى بديت نسوط وفاش قطع جا عندي يالاه وقف حدايا كيشوف فتيليفون بغا يدخلو للجيب وانا نقول ليه بواحد الطريقة مكروهة .. صافي شكرا غير سير انا عارفة شنو غندير .. ندمت كاع علاش جيت لهنا .

خديت الكلي ومشيت بالزربة خليتو واقفغير كيشوف فيا وتبعت هاداك اللي هاز ليا الشنط طلعني لبيتي بدا كيوريني وانا صمكة مكنسمعش حتى خرج وسديت عليا وانا نفاجر بالبكا بديت كنحس بالندم وبديت كناوم راسي ومارضيتش .. تفكرت الدوا وهزيتو جلست بلاصتي اول مرة نجربو وخديت وتحد الحبة سرطتها بلا ماء وجلست كنشوف قدامي ونمسح دموعي حتى بدا التيليفون فيكس كيصوني وبديت نقلب بعيني فين محطوط

هزيت لباراي كنت كنتخصص بالبكا وصوتي معجن قلت الو ورد عليا صوت جاد قالي الو شيماء؟

قلت ليه : اه نعام ؟

من بعد ما تأكد مني هبط مستوى صوتو بهدوء وقالي مالك اشيماء طلعتي معصبة واش طرات شي حاجة عصباتك

بديت كنبكي قلت ليه خوك مابغانيش نجي لهنا وانا اصلا ماجيتش معاك .. انا اصلا كنت باغا نسافر وعندي عطلة ماكنتش عارفة فين نمشي وجيت معتك لهنا وندمت كاااع اللي جيت لهنا ..

قطع عليا وانا كنهضر ونتخنصص وزدت تعصبت كنت غنهز ديك لاباراي نضربها ولاكن فشلت وجلست حتى سمعت الدقان ومشيت حليت لقيتو قدامي معصب حاجب داخل فلاخر ودخل سد الباب قالي شنو وقع ؟

قلت ما وقع والو خوك مابغاش نجي معاك لهنا وهوا كيحساب ليه انا لسقت فيك ...

لاول مرة نشوف لعصبية على وجهه ومع ذلك كيهضر معايا بشوية وقالي

- خويا ماعندو حتى علاقة بهادشي .. انا جبتك وانا بغيت نجيبك فين كاين المشكل ؟ واش هضر معاك ؟ قالك شي كلمة ولا سمعتي شي كلمة ؟

قلت ليه انا حاسة بيه وكيدير فيا شي شوفات باينة ماكيحملنيش وماباغانيش نجي .. صافي ماتبقاش تعيط ليا ولا تسول فيا انا جيت هنا باغا نبدل الجو ونتا عندك داكشي ديالك ركز عليه وضرب عليا دابا مابغيتش كاع نتلاقا بيك ولا تشوفني ولا نشوفك هنا ومابغيتش خوك يجي يقولي نتي السبب باش خسر ولا يعايرني بشي كلمة حيت مانعرفش شنو نقدر ندير معاه ديك الساعة

بقا ساكت غير كيشوف فيا واحد الشوفة حادة و دخلو الشك قالي هضر معاك؟ قاليك شي حاجة؟ قولي ماتكدبيش غادي نعرف منو الى كدبتي

قلت ليه مقالي والو ماهضرتش معاه ولاكن هوا محاملينش انا حاسة بهادشي وقالك علاش جبتيها وعلاش

قاطعني وقالي مقال ليا حتى كلمة ومكيدخلش ليا فحياتي خاصك تعرفي هادشي .. نتي حاسة يمكن حيت دابزتو ما مرة ماجوج كيتخيل ليك .. اما اللي كاين هوا هادا ماهضرت معاها ماهضر معايا ونتي جيتي معايا غتمشي معايا .. ماعندك حتى علاقة بنجحت ولا خسرت

بقيت ساكتة وقلبت وجهي كنمسح عيني وهوا واقف غير كيشوف .. تشتت النضر وقشع ديك القرعة ديال الدوا بوحدها فوق الناموسية وجلس حداها بغا يعرف ديالاش وهزها لاكن خطفتها ليه من يدو خبيتها ورا ضهري وقالي معجب

مالكي شنو فيها الى شفتها؟

رجعت اللور قلت ليه : لا داكشي ديال لعيالات مافيه ماتشوف ومشيت بزربة للحمام وقفت بقيت كنشوف فين نخبيها وخبيتها ورجعت عندو كان مزال جالس شابك يديه وكيخمم

قالي واش شوية كتحسي براسك صافا ؟

حركت ليه راسي وقلت اه صافا

تنهد ووقف : قالي مايبقاش عقلك يمشي بعيد .. خويا اصلا ماكيكرهكش غير نتي وياه بيناتكم ديك الحساسية وصافي .. نعلي الشيطان ماتبقايش تقولي شي هضرة مكايناش

بقيت ساكتة وقالبة وجههي وحط يدو على راسي دوزها على شعري وجرني عنقني كيدوز يدو على ضهري وانا نطلقها بكية حسي مسي حتى تخنقت وجلست على جنب الناموسية وجلس قدامي على ركابيه كيشوف فيا مافهم والو وشد ليا فيديا

قالي: علاش كتبكي ؟ شنو المشكل اللي عندك راه مايمكنش هاد البكا كامل بسبب شوفة ولا وسواس!! .. مالكي هضري شنو كاين

بقيت ساكتة كنتنخصص وهوا كيتسناني نهضر فاللخر ضرب على ركبتي وقالي عرفتي شنو

. نوضي يالاه نتلفو انا وياك .. ماعندنا منديرو بالجلاس هنا . كنت على سبة ونضت مسحت وجهي وعطيتو صافي هزو ودخلت للحمام شللت وجههي وخرجنا مشينا .. وصلت لباب الاوتيل عطاتني الشمس لوجهي نيشان لقيناها باقا شاخدة ورجعت اللور للضل جبدت واحد ليكخون خديت منو حزيقة دهنتنها بلا مرايا لوجهي وزدت مشيت حداه وبدا كيمسح ليا بصبعو حدا ودني ومشينا كانت كندورو على رجلينا كان الجو سخون خرجت غير بديباردور ديال السورفيت وهوا بتيشورط وكاسكيط على راسو وبقينا غادين حط ليا واحد الكيت بلوتوت فودني بلا منطلبو لقيتو كيتسنط لموسيقى غربية و بديت نسمع ونشوف ونسرح عيني والدنيا عامرة بالبشر والارص كتشعل وناطحات السحاب على الجهد قالي غنديك لدوك ليغيسطو اللي كيعجبوك وقلت ليه واخا وبقينا غادين كنشوف شي بنات لابسين شي لباس خلعني .. الكسوة مزيرة وجناب من لفوق حتى لتحت معريين ومشدودين بالسيور.. سي بزازل مدليين .. انا واخا لابسة ديباردو مامعرياش لديك الدرجة بقا شوية يبان الصدر كامل .. واحد الحال شوهة كيخرجو بالطالون انا الطالون منضورش بيه فالزنقة ابدا وهما بحال لا سهرانين فالشارع والشمس كتقلي فيهم .. اما المكياج الشوهة و شي وحدين بالتجميل بقوة ما بقا يجملو ولاو بحال شي متحولين جنسيين . جاتني القطعة وماشميتش ريحتو من الصباح وشفت فجاد قلت ليه واش ماشي مشكل نكمي هاكا . زعما مكيعرفني حتى واحد هنا

لاح يدو على كتفي عنقني وحنا غادين وقالي اصلا شكون قالك عربية ... كتباني بحال شي روسية ولا اوكرانيا

قلت ليه علاش وعما قلتي روسيات و اوكرانيات ..

قالي: حيت واعرين عمرك شفتيهم ؟

قلت ليه : كيجيوني نصارا كاملين

قالي: مي الروسيات والاوكرانيات حتى السويدات بوحدهم .. زوينين بحالك .. نتي زايدة عليهم اكثر

ضحكت وقلت ليه فاش زايدة : قالي هما مسخين .. كيعيفو وعقليتهم باسلة .. واخا كتبان نقية من برا فاش كتهضر معاها ولا تجلس حداها كتحس بيها مسخة وبحال الى مهمجين فهمتي ماعرفتش كيفاش نشرحها ليك

قلت ليه : ايوا بعدا المغاربة كيموتو عليهم مكيقولوش هادشي

قالي: اودي .. راه كيطيحو مع اخنز وحدين كيحساب ليه طاح مع الزين ولا طاح مع شي حاجة .. الكبت خايب

قلت ليه بعدا فصحونا بالسويديات والروسيات كيفضلوهم علينا

حنى راسو عندي وقالي اصلا شكون هادا اللي غيفضلهم ويدوخ فيهم من غير حمار شاعلة فيهم العافية جمع كبت المغاربة كامل وكان مقموع فاش قبلات عليه وحدة حتى هي جامع كبت السويد ومقموعة فبلادها .. مسكين كيحساب راسو هوا النزق وفالحقيقة راه طلع معاه اكبر قالب

ديت عيني وحدة دايزة حدايا بواحد التروم قدو قداش موراها بحال الكرسي وواحد الصدر والشعر كحل مطلوق ولابسة واحد الكسوة بيضاء لاسقة عليها قصيرة وعندها فتحة فالجنب واصلة حتى للخصر .. حاطة مكياج ونافخة فمها شوهاتو وملسقة الدفار وبيضاء بلقة وكتجر واحد الصندالة .. شافت فيا وحولات عينيها وملسقة الشفار انا عييت بلاصتها باز ليها على ديك الحالة . دارت فيا واحد التمييقة معيقة حتى وقفت وقلت لجاد

شفتي هادي على شوفة دارت فيا !! الحسد الله يستر !!!... اش داك الشوهة يخ وداك الفم قالك على شكل قلب

.قالي: كاانت غديرو على شكل قلب وخرج ليها على شكل بواسر

بديت كنضحك وقلت ليه هادو مكيتحروش بيك اجاد ؟

رد بالنفي: علاش غترحش بيا انا باينة فيا مزلوط وهي كتقلب على صحاب الابيض والزيرو كحل يلسق ليها الدولار

قلت ليه : لالالا اشمن مزلوط مزيان الحمد باينة فيك ولد لخير

قالي: انا راه مزلوط بالنسبة ليها هي .. هي باغا اللي يشري ليها رانج ويشري ليها ديور ويعطيها باش تنفخ داكشي وتنفخ وجهها .. هادشي دايراه لهادوك لممم..عفنين ديال الخليج اللي كيشتتو الفلوس على بحال هادو وكيعجبوهم هاد الانواع

قلت ليه دابا هادو شنو هي خدمتهك هنايا منين غيكريو والكرا غالي .

قالي: كتلقايهم مجموعة ديال البنات بزاف كاريين دار وحدة .. وحدة كتشطح وحدة كتسربي وكل وحدة شنو كدير وفنفس الوقت كيضبرو على راسهم .. مهم قاضيين الغراض .. ماشي بحال السعودية خاصك الكفيل والروينة كتبقا مرهون .. هادو كيجيو هنا احرار كيديرو اللي بغاو . ولاكن الى كحلوها مع البوليس وحصلو عليهم شي حاجة كيجريو عليهم مايعاودوش يرجعو للامارات... وكتبقا ليهم السعودية هاديك قانونها بوحدو كتكون وحدة كتجيبهم مكلفة بيهم كتجمعهم فدار وحدة وتبدا تبيع وتشري فيهم وهما راضيين كيقسمو داكشي. ماتقدرش تبقا تما حرة ضاروري الكفيل ..وكيمشيو ليها غير اللي تريفولاي من هنا حيت ماعندهم فين يمشيو يخدمو ولا كيرجعو لبلاداتهم

تصدمت اول مرة نعرف هادشي.. وا الدينا فيها العجب وانا ماعارفا والو !! حسيت براسي فالامارات بحال شي وحدة يالاه جات من العروبية دخت وتلفت .. مولفة نشوف داكشي فالانسطا واليوتيوب ولاكن باش نجي حتى لعندهم نشوفهم مباشرة !!! راه مينكنش.. هما غير التصاور وكيجيوني فشكل فاش كنشوفهم ونتابعهم اما فالحقيقة نشوفها قدام عيني تخلعت والله واخا نعيا نوصف الدهشة ديالي منقدرش نوصفها كما كنشوفها وكنشوفهم قدامي . دخلني لواحد لغيسطو فواحد ناطحة السحاب بقينا داخلين الديكور كيهبل لتحت بقينا غاديين حتى خرجنا لواحد الجردة من اللور كبيرة مشروكة بين دوك ليغيسطو اللي ضايرين بيها والنخل والربيع والطبالي والارض بالخشب هادشي غير جردة اسطناعية وفيها بزاف ديال المطاعم مفرقين ودايرين بيها البنايات طوال وديكور اجمل ماشافت عيني والورد غارسينو .. بين الطبيعة والحداثة جا واحد الملبونج هائل .. جلسنا على لفطويات وجلست حداه لاح يدو على ضهري اللور وقالي نتغداو

قات ليه ختار ليا على دوقك انا ماعارفاش شنو كيصاوبو هنا .. قالي جيتي لواحد البلاد جديدة جربي ماكلتهم .. بحال الكبسة كيصرعوها

قلت ليه صافي ناخد الكبسة باللحم هوا اللي كيعجبي .. حتى هوا طلب الكبسة ومقبلات وحطوهم بقينا كنتغداو ونهضرو وكنشوف فالناس اللي جالسين تما كيسربيو ليهم الشراب بحال الموناضة فالكيسان عادي وبقيت عرام ديال داك النوع ديال الفاشيونسطات اللي ضاربين مليون كيبانو فشكل فالتصاور ولاكن مباشرة راه لا يعقل ... الفم خلاها جاد مطرطق بحال البواسر و عينيهم مجبدين لابسين لباس اكثر من فاضح .. لالا ماشي هادا هوا التحرر ... هادي راه الزملة ! وكن غير شي فورمة كلهم متبعين الغلض وخانقين الكرش وفورمتهم فشي شكل باينة ماشي طبيعية .. وحدة كانت قريبة ليا جيهتي عندها واحد الصدر ضرني فضهري فاش شفتو حسيت بالتقل والخنقة دايراه ليه واحد البودي فيه خرقة وحدة ضاير على صدرها وكرشها كتبان كلها ولابسة واحد الدجين غيتفركع مخنوقة فيه وسبرديلة وشعرها مشوط بالصبايغ والسوشوار واخا مصاوب باين مشحلف .. كلشي نافخ الفم والجلدة دوجههم كتبان ليا مباشرة بحال شي ميكة رقيقة قريبة تفزر خرجو عليها وفرحانين .. بقيت غير كنشوف فيهم سدو ليا الشهية اما جاد باينة فيه مولف ضرب طبسيل ديال الكبسة وكلا حتى ماخلا حتى حاجة .. قلت ليه واش عادي يدورو بيك بحال هادو وماتشوفش فيهم زعما عادي انا راني تخلعت

قالي: كولي راه برد هاديك راه كيضبرو على راسهم كاع مكتباني ليهم نتي واخا تبدا الخدمة هنا قدامك ماتسوقش ليك

دورت وجهي كملت ماكلتي واحد اللحضة وقفو علينا شي دراري ومعاهم شي بنات كبار كيعرفو جاد وقف سلم ليعهم اما وحدة عنقاتو بلعاني قدامي قالت ليه توحشتك فين غبرتي

انا بقيت غير جالسة قالو ليا غير السلام والدراري مدو ليا يديهم . مابغاتش تفهم ليا واحد القضية فشي بنات علاش مللي كيشوفو شي دري جالس مع شي بنت واخا تكون بينو وبينها علاقة عادية او سطحية غير كيشوفو فشي بلاصة جالس مع شي بنت كيجيهم يعنقو ويمثلو ديك الذهشة ! شنو كيبغيو يوصلو لديك البنت بهاد المسج .. لا والزوينة تقدر تجلس حداه بحجة توحشاتو وبغات تعرف اخبارو وكدير شي حركات غريبة بحال واحد الوحدة فيهم جلسات حداه وقالت لخرين غير سيرو جلسو انا جايا. بدات كتهضر معاه وترشقو على ركبتو وانا جالسة دايرة رجل على رجل كنتبسم ليها .. سولاتو على المقابلة وقالت ليه غادي نحضرو ضاروري وبدات كتجمع وجاد كيهضر معاها ويهضر معايا باش منحس براسب ترميت للشوت .. لقيت راسي كنهضر ونضحك عادي معاهم وشفتها تفاجآت مني وبدات كتهضر معايا وتواضعات بلهلا يطريه ليها وراسها بدات كتبدل وتضراف وحيدات داك تطوال اليدين حساب ليها انا شي مسمومة غادي تفقصني براسها لاكن فاش شافت العكس تبدلات طريقتها فالهضرة وجلسات معانا شوية وقالت لينا بلا منصدعكوم حتى نتلاقاو فالمقابلة قلت ليها لا بلعكس مكاين حتى مشكل مرحبا بيك . ضحكات معايا وقالت ليا شكرا بزاف احبيبة مرة اخرى وسلمات عليه وجات عنقاتني وباستني وقالت لينا سمحو ليا على ديغونجمو . قلت ليها مكاين حتى شي ديغونجمو احبيبة . دارت لينا باي باي ومشات كضحك جلسات مع صحابها ورجعنا حنا للتبركيك ديالنا

يتبع...