عرس الذيب الجزء 15

كيقولوو النوم هو الموت الأصغر و فحالة ما تجمع مع العيى .. ف واخا يطبلوو و يغيطوو قدامك ما تحس بلي ضاير بيك ..!

ضورات وجهها كتمدغ و دوزات يديها على حنكها كتأنن بصوت ناعس و رجعات سكتات .. حتى هربوو البنات من قدامها ..!

البنات لي كانوو هازين سينيال و عكار فالاحمر .. كيزوقوو وجه لي معاهم و هما كيكركرو .. و لي فاقت بيهم كتزاد عليهم .. خالقينها بيناتهم .. نص ساعة هكاك و نعسوو حتى هما ..!

********************************

فتح عينيه على صوت الساعة د التيليفون كتصوني ..! مد يديه طفاه و جلس فبلاصتوو كيتكسل ..! كانت الخمسة د الصباح .. يالاه وذن الفجر بشي شوية ..! الجو بارد و الشمش باقي ما شرقات ..!

وقف غسل وجهوو و نشفوو كيحك فسنانوو و غير كمل .. جبد سبادرين لبسها هي و كيطمة د السبور ..! هز صاك صغير ديال الظهر .. فيه شنوو غيحتاج و مشى للشالي ديال المرشدات ..!

فتح الباب بالشوية و دخل كيقلب على شريفة لي ناعسة ما جايبة لدنيا خبار .. وجهها فيه شوية ديال سينيال و العكار .. لي غير شافوو حكيم تبسم و قال ..!

حكيم: رحبوو بيك ..! ( تحنى على رجليه لعندها كيفيقها بالشوية تا حلات عينيها مبوقة ..! ) نووضي هزي معاك كيطمة .. سبرديلة و تبعيني .. أنا كنتسناك برا ..!

شريفة: انن ( حطات يديها على وجهها كتشوف شنوو ديكشي ) ففف .. حكيم ضربك حما٠ر الليل ؟؟

حكيم: هه ..! نوضي يالاه .. عشرة دقائق عندك تبدلي عليك و تغسلي وجهك ..!

رمى لها كلاموو و خرج من تما ما كيشوفش فالبنات .. مخليها كتفوه و تشوف فالظلام لي باقي طايح ..! بعظام مدكدكين جبدات حوايجها لبساتهم تما نيت .. و مشات للحمام غسلات وجهها و قادات حالتها ..!

حكيم:( جهد صوتوو شوية ) أنا هنا .. اجي ..!

شريفة:( شافت فيه واقف و حداه كلب شادو بسنسلتوو ملويها على يدوو .. قربات منوو بحذر و قالت حاضية لسانوو لي خارج كيلهث ) هاذشي علاش منوضني ؟ ( رخى ليه السنسلة شوية تا غوتات و نبح عليها ) خلييه بعييد ا حكيم و لا نرجع بحالي ..!

حكيم:( ضحك ) تحركي قدامي ما غيقيسكش ( هز يديه ) ما تسمعيش الهضرة غنطلقوو عليك .. أنا علمت ..!

شريفة:( خرجاتلوو لسانها .. حاطة يديها على جنبها ..! ) علاش فين ماشيين بالسلامة ؟

حكيم: نجريييو شوية و نشووف السوفل عندك فين واصل ( حرك راسوو ) يالاه ..!

شريفة:( زادت قداموو و بهدوء قالت ) شنوو وقع البارح ؟ شكون هاذوك لي ضربوو بالحجر و فين شافوو لبنات ..!

حكيم: ولاد هاذ الجهة .. طلعوو مع الصور ضربوو غير من الفوق و هربوو .. شافوهم فالسهرة فاش كنا فالساحة و حتى الشالي عندكم كيبين لبرا و شي بنات كانوو كيبدلوو تما .. عاد هضرت مع بثينة باش يغطيو داك الجهة ..!

شريفة: و دابا واش صافي ؟ كلشي مزيان ؟

حكيم:( شيرلها بيدو كينعث لها ) لا المخيم محروس مزيان .. و هضرت معاهم شرحتلهم لي كاين ما عندكم مناش تخافوو ..!

مدينة الحسيمة فالأصل مقسمة و ما جاياش مجموعة فقنت واحد .. كاينة المدينة .. و كاين ايمزورن و بوكيدارن و بعض المناطق لي ضايرين بهاذ الثلاثة ..! و التعاونية فين جالسين شريفة و حكيم جايا فبوكيدارن ..! لي فيها غير شارع واحد جامع قهاوي .. صيدليات .. خضارة و ديور .. فين كيجلسوو الطلبة لي كيقراو تما ف " ensa " و " fst " ..!

دازو على الجامعات و كملوو طريقهم .. شارع طوييل خاوي مضوي ببولات فالأورونج ..! كلوو ربيع و أراضي .. حس البشر ما كيضورش فيه ..! كاينين غير فيلات كيتسمع منهم صوت نبيح لكلاب ..!

طلق الكلب مخليه زايد حداهم و هو كيجري مع شريفة ..! بدا بالشوية و هو غادي و كيطلع النيفوو و يزيد فالسرعة .. حاضي مع شريفة باش تتنفس بانتظام و هي كتجري و تهضر ..!

شريفة: اويلي هاذشي بانلي بااااقي طويل .. فين غاديين ؟؟

حكيم: دابا تعرفي فاش توصلي ..!

شريفة:( شدات على جنبها لي بدا يحرقها و وقفات كتلهث ) لا لا عييت صافي باركة .. ففف

حكيم:( ضربها بخفة لراسها و قال ) هضرت معاك تتنفسي و نتي كتجري ..! حرقتي داك الرية عندك بالكارو و الشراب ..!

شريفة:( هزات عينيها فيه ) زعما نتا ما كتكميش ؟ الجمل ما كيشوفش حذبتوو كيشوف غير ديال غيرو ..!

حكيم:( بهدوء قال ) ما مبليش .. مرة فشحاااال و بديت نقطعوو معاك .. خاصك غير نتي تبينيلي ..!

شريفة:( تنهدات ) وا راني ما حطيتوش ففمي منين شديت الطريق معاك .. حابسة راسي بزز ..!

حكيم: زيدي حبسيه ( غمزها و قلب راسوو كيشوف موراه فالكلب ..! ) تحركي يالاه ..!

شريفة:( ردات كتدور عينيها فالأراضي لي حداها ) الحسيمة كيقولوو صحابها ملعقين بفلوس الحشيش ( مصات شنافتها كتضحك ) عمرك جربتي تتحشش ا حكيم ؟

حكيم:( هز حاجبوو و قال كيشوف فيها ) بقى لمك غير الحشيش هاذ الساعة ..!

شريفة: وا قووول ا صاحبي ..!

حكيم:( رد معوج وجهوو ..! ) زطلنا فاش كنا بلا عقل و ربي عفى علينا من عندو ..! الحشيش ا الشريفة كيقتل الخلايا الدماغية و حتى يلا كميتيه خاصك تشربي معاه الما بزاااايد و تكوني ضاربة حسابك لشحال غتكيفي ..!

شريفة:( ردات كتضور فعينيها ) كاينين لي كيبغييو يضعافوو و كيكميوه كيضعف .. و لكن كيفما قلتي خاص تكون عارف اش كتدير و تعرف فوقاش تحبس قبل ما يولي بلية ..!

حكيم:( لعب بلسانوو ففموو و قال مصغر عينيه فيها ) و بالرب ا شريفة و تقربي من جهتوو

شريفة:( قاطعاتوو ) تفتخني و تكميني بحال الجوان ياك ا كبيدة ههههههه غير كنضحك معاك .. ما قدو فيل زادوه فيلة .. مالي حمقة ..!

حكيم:( رد ببرود ) نتي سبيطار ..! رديتي النفس يالاه تحركي ..!

شريفة:( رمشات عينيها ) وا باركة خلينا نرجعوو ..!

حكيم:( شاف فالكلب و قال محرك راسوو جهتها ) براد ..! أطااااك ..!

طرطقات عينيها فيه فاش شافت الكلب مخرج لسانوو و جاي لجهتها كيجري .. طلقات رجليها للريح كتغوت بالجهد ..!

شريفة: حكييييييم شدووو .. واااااا لاااااااااا ا صاحبي ما تضحكش معايا هاذ الضحك ( كتضور وجهها كتلقاه باقي موراها و كتزيد فسرعتها كتغوت )

حكيم:( لحق عليه شدوو من السنسلة كيهضر معاه و عينيه فيها ) كتعرفي غير تتكيفي و تسكري ؟ يالاه جري نشوف و يلا وقفتي غنطلقوو عليك ..!

الرياضة فالصباح .. متعة غير مباحة لأي واحد ..! الأوكسيجين باقي نقي و الجو فيه واحد البرد غزال كينعش و كتحسوو كيصفيك من الداخل و يعطيك طاقة اجابية ما كتعوضش ..!

واخا تسخسخات بالجرا .. ضربات هي و حكيم جوج كيلوميتر على رجليهم .. عاد وصلوو ..!

قطعوو الشانطي و دخلوو وسط الغابة .. بشجرها و كل ما فيها .. حتى دوزها من واحد الدخيلة و بدات كتشم ريحة البحر و صوت مواجوو العاليين ..! شافت فيه بعينين موسعيين فاش خرجوو فالبحر لي ضايرين بيه الجبال و جاي قريب للغابة ..!

لون الما صااااافي و زرق لواحد الدرجة ما تصورش و الجبال لي ضايرين بيه عاطيين جمالية غير ..! صعيب تلقى بحال هاذ المنظر فبلايص اخرين .. لكن فالحسيمة كاين كل ما كيريح العين ..!

حكيم: هذا البحر د السواني ..! ناخذو شي كيطون ترتاحي و لا نكملوو لونتريما ..!

شيرلها بيديه لجهة خيمات او gياطن مبنيين مقابلين مع البحر و قراب شوية للغابة فين كيشوييو و يطيبوو الطواجن ..!

شريفة:( رمشات بعينيها ببطئ كتشوف فالشمش لي بدات كتشرق ..! قربات منوو و قالت ) لا بلاش ..!صورنا مع الشرووق ( بسعادة ) اوووه على جو شحال كيحمق ..!

جبد تيليفونوو من ساكادو ديالوو و خذالهم تصيورات .. هو موراها و هي قداموو ضاحكة و الكلب كيلعب بين رجليه ..!

غير كمل خبع التيليفون .. خلاها واقفة تما و بعد شوية حدا الصور هو و الكلب ..! حاط الساكادو كيجبد منوو الراكيط  ناوي يدربها بيهم .. و للحظة هز راسوو كيشوف فيها بنظرات هادئة و هي واقفة مقابلة مع البحر مغمضة عينيها بابتسامة و شعرها موراها كيلعب مع الريح د المواج .. عينيه كانوو كيحكييو قصص و حكايات و هو كيشوفها فداك المنظر .. البسيط و المهلك فنفس الوقت ...!

المنظر البسيط و المهلك فنفس الوقت ..!

ووجدتها

من بعدِ أحزانٍ

وبعد التيهِ

في زمنٍ طويلْ

من بعدِ حرمانِ السنينِ

وآهةِ العمرِ العليلْ

و وجدتها

عصفورةٌ وقفتْ تغردُ

فوقَ شُبَّاكي ..!

وقفتُ أنا

لكيْ أتأملَ الصوتَ الذي

يسري بأعصابي

وليسَ له مثيلٌ

أو بديلْ

أغمضتُ عيني فانبهرتُ

فتحتُ عيني فانشطرتُ

رأيتها امرأةً من الملكاتِ

تأتيني على العرشِ الجميلْ

هي أخبرتني

كيفَ خانتها التجاربُ

أخبرتني كيفَ كان الحبُّ سجنًا

واحتوى القلبَ الذليلْ

هي أخبرتني

كيفَ عذَّبها

وأدمتْها صراعاتٌ

وأعطاها من الحبِّ القليلْ

هي أخبرتني

كيفَ للإنسانِ أنْ يحيا

على أملٍ جديدٍ

أنْ يحبَّ

وقلبه يبقى الدليلْ

أنا لستُ أدري الآنَ من بدأَ الحوارَ

ومن أجادَ الوصفَ

من كتبَ القصيدةَ

من أضاءَ الروحَ بالنبضِ الأصيلْ

كيف القلوبُ تذوبُ

كيف يرددُ الموجُ المواويلَ

التي تعلو على عزفٍ نبيلْ

وقضيتُ أيامًا

ولي معها حواديتٌ

من الوجدِ المقدسِ

حين يأخذنا من الزمنِ البخيلْ

أحسستُ أن الحبَّ آتٍ

إنما لا أعرفُ العنوانَ

أخشى أن نضيعهُ

على قال

وقيلْ

أنا كنتُ أرسمُ وجهها

حتى أظلَّ أضيءُ

كنتُ كمن يعيدُ صياغةَ الدنيا

على رمشٍ كحيلْ

وأقولُ شعرًا في الهوى

ما قاله العشاقُ

شعرًا من حروفِ المستحيلْ

أصبحتُ شاعرها

وأعرفُ أن أناجي حبها

وأظلَّ أدعو الله

سبحانَ الجليلْ

الآنَ تجلسُ بانتظاري

ترتدي ثوبَ الملاكِ

وإنني مازلتُ منتظرا

على شغفٍ

وموعدُ حبنا لايقبلُ التأجيلْ

و وجدتها

الآنَ

أعرفُ

ما أقولْ

"حكيم"🐺

و فنفس اللحظة و باحساس غريب متملكها فتحات عينيها و ضورات راسها جهتوو بعذوبة .. لاحظات نظراتوو لي خلاوها تسهى فعينيه لي غارقين و غامضين بحال لبحر .. حتى طلعات تنهيدة من قاع قلبها كتلخص شحال من حاجة ...!

منزوية ..! كحمامة صفعها طفل أفسده دلال أم متهورة ..!

أراقب هذا الشيء الذي يتحرك داخل صدري .. نمل يدب على عجل .. أضاع طريقه نحو غاره الآمن وهو الآن ينتشر على غير هدى .. محدثا تشنجا يلهب هذه المنطقة التي تعلو قلبي .. لا أستطيع تحديدها بالضبط ..! كل ما أعلمه أنها موضع إنجاب الأسى وولادة الحنين ..!

أتحسسها بحذر علني أكتشف سبب الوخز الدقيق المتواصل كمطرقة فقيه يبحث عن كنز نبي لم يذكر في الكتب .. خلف جبل أتعبه صراع أتباع الرسل ..!

كيف يكون اكتساح شخص لمعقل سطوتنا متعة أليمة بهذا الشكل ..!؟ وهل الوخز يعني بداية السقوط ..!؟

هل سيكون علي إبادة النمل الهائج داخل كياني ..أم حري بي حفر غار آمن يندس فيه بين نياط القلب وموطن الروح ..!؟

"شريفة"🐍

فعز الصباح تسمع الدقان فالباب د الحديد لتحت و التعياط بالجهد .. حتى قلقات الجيران و كاين لي طل كاع باغي يسب و غير شافوها مراة بكرشها لفمها حاطة شاكوش حداها كتبكي و تنوح رجعوو سدو شرجمهم كيستغفرو ..!

كريمة: خاااااااالتيييييي واااااا خااااااالتيييي حبييييبة .. خلييييييل .. مااااااري .. عدنااااان .. اتووووما حلووو ليا الgفلة د الباب ..!

حبيبة:( طلات عليها مدوخة بالنعاس و شعرها لي مصبوغ بالأكاجوو طالع فالسما ) كريمة ؟؟ شكديري هنا فهاذ الساعة ؟

كريمة: وااااا خاااالتتتتتي حفييدتك سايرة تتلاوح ما لgات هي و مها فين يكعدوو و ما بgى gاااابل عليهم حد ( هزات شالها مغطية بيه وجهها كتشهق و تبكي ..! )

حبيبة: تسناي تسناي أنا هابطة لعندك ( دخلات كتدعي ) الله يسمعنا خبار الخير يا ربي

هزات بينوارها لواتوو عليها و فيديها السوارت د الدار و د الباب لتحت .. هبطات بالشوية كتنهد فتحات لها .. عاقدة حجبانها و وجهها مخطووف .. خلعاتها على الصباح ..!

كريمة:( ترمات عليها كتبكي ) ما لgيت حد من غيرك ا خالتي .. وا با لاوحني يانا و شراوطي و ما عgل عليا .. با الحنييين ما gبل بيا يانا و لي فكرشي

حبيبة: لا حول و لا قوة الا بالله ..! و علاش ابنتي ؟ باك زعما كنعرفوه حافظ لكتاب الله و درويش مسكين .. ماشي ديال يلوح لك حوايجك للزنقة فهاذ الصباح و يخرجك ..!

كريمة:( زادت فالبكى كتعدد ) ما لgيت فين نكعد .. ما بgى ليا لا والي لا تالي .. مgطووعة من شجرة و با فالدنيا ساير يشوف فيا و يتبرا مني كي الgطة المجذابة ..!

حبيبة:( شافت حتى عيات و بتنهيدة قالت ) دخلي دابا ا كريمة .. دخلي يصبح و يفتح .. أراي عليك داك الشاكوش ما تهزيش الثقل ..!

*********************************

خرجات من الشالي لابسة التوني و هازة فيديها فولارة .. خليط بين الاخضر و الاصفر .. كتحاول تقادها باش تديرها فعنقها لكن والوو .. حتى وصلات لجهة الكوزينة و لمحات أيوب واقف و بابتسامة عيطات عليه ..!

أسية: أيووووب ( شيراتلوو بيها هازاها فيديها ) تعرف تصوبلي هاذي ؟

أيوب:( قرب منها و مدلها يديه ) أراي تشوفي السحر ..!

ضحكات حاضياه كيلويها على ركبتوو .. كمل و عقدها لها .. تحنات بالشوية حتى خشاها لها فعنقها و زيرها على قدها ..!

أيوب: و دابا ناضي كانادي ( لعب لها فشعرها بشقاوة ) ا الشهيبة الصغيورة ..!

أسية:( تزنكوو حناكها و حنات راسها كتقاد شعرها و بصوت خافت قالت ) شحال فعمرك ا أيوب كاع ما قلتيلي ؟

أيوب:( رد كيتفوه ) وا من شحاااال و أنا عايش ( فرنس لها ) فعمري 24 عام و الشعيبية ؟

أسية:( ردات بغنج جامعة يديها كتلعب بيهم فالتوب د التوني ) الله يخليك لواليديك حتى يفرحوو بيك كيفما بغاو .. أنا 17 لعام

أيوب:( تبدلوو ملامحوو و ببحة قال ) الواليدين نتلاقاوهم فداك الدار .. الله يرحمهم و يوسع عليهم ( شافها حزنات و هو يضحك ) ايييه على الخنفوسة قربات تدير عقلها

أسية:( ردات حانية عينيها حشمانة ) هههه أنا اصلا بعقلي .. نخليك دابا نرجع للشالي حتى نتا خاصك ترجع للفرقة ديالك او لا ؟

أيوب: اييه بعقلك ... عجبك المخيم أ اسية ؟ تبقاي تمشي معانا كل عام و تجي لدار الشباب تنشطي معانا فالأيام العادية .. اش قلتي ؟

أسية: أنا ما ساكناش ففاس .. فسلا دابا و لكن المخيم يلا خلاتني شريفة .. نجي علاش لا

أيوب: اااه نسيت .. اييه ان شاء الله .. يالاه تهلاي ا خنفوسة الشهيبة نرجع عند البراهش د الاشبال قبل ما يديرو شي كارثة

واقف حكيم هاز الركيط د الجلد فيديه .. فيهم علامة أديداس فالكحل و الابيض ..! مقدم رجل على الثانية و بجدية كيشوف فيها كتتحرك فبلاصتها على وضعية الهجوم ..!

حكيم:( حرك يديه بمعنى تضرب ) ضغواط .. gوش .. ضغواط .. يالاه تحركي ..!

قربات منوو و هزات رجليها ضربات الراكيط بليمين و رجعات عاودات فاليد الثانية بالشمال .. و ضارت كلها نقزات معلية و ضربات ثاني بليميين .. و حكيم غادي معاها بريتم ثقييل باش تولف .. كيتحرك تا هو بحرية كل مرة تابعاه لقنت و خارج لها بوضعية جديدة .. حتى تهدات و هبطها تدير طراكسيون ..!

كتهبط و تطلع و ترجع توقف و تنقز و تولي تهبط و هي غادية ..! وجهها رجع حمر بحال الد٠م غتطرطق .. شعرها تشعكك و العرق كيصب عليها بالجهد .. ما قادراش تكمل .. يديها كيرجفوو عليها .. و هو متكي برجليه حداها مخرج عينيه فيها مجهد صوتوو ..!

حكيم: واااحد .. جوووج .. طلللللعيييي ..!

شريفة:( كتلهث ..! بزز رجعات وقفات و غوتة خرجاتلها بلا ما تحس ..! ) اااااااااااه .. عييييت ما قادراش صافي ..!

حكيم:( رد باستهزاء ) هاذي هي القوة لي فارعالي راسي بيها ؟ ( ببرود قلب عينيه كيستفزها و هي جالسة فالرملة كترد النفس ) دوماج صدقتي ضعيفة و الريح لي جا يديك ..!

شريفة:( ردات عليه مخنزرة كتنهج ) أنا ما ضعيفاش ..!

حكيم:( هز حاجبوو بثقالة ) ضعيييفة و غتبقاي ضعييفة ( شيرلها بصبعوو ) دايرة هاذ الحالة باش نشفق عليك ( كيقصد السخفة ) .. كتعاني ياك ؟ باراكة خاصنا نحنوو عليك ؟

استفزها بهضرتوو حتى رجعات هبطات تكمل منين بدات و فالمقابل تبسموو عينين حكيم .. عارفلها الكود ديالها ..!

شريفة:( ردات كتتعصر باش تهبط و ترحع تطلع و توقف تنقز ) أنااا .. اععععع قووووية اااااه

حكيم: رجعتي تكملي باش تتحدايني .. باغى تبينيلي بلي قوية ؟ ( ربع يديه ببرود ) هي يلا تحديتك على ود الشراب غترجعيلوو فدقيقتك ؟ ( ضحك باستهزاء ) راه قلت لك ضعييفة و نهار تعذبك الدنيا غتجري لعندو .. بحال دابا .. خاص غير لي يبداك و تكملي ..!

شريفة: ماااااا غنرررجعلوووش ( شافت فيه هابطة للأرض و راسها مهزوز .. خط د العرق هابط مع جبهتها ) أنا ما ضعيييفاش و عمممري نرجعلوو ثاااني ..!

حكيم:( حرك يديه جهتها كيلعب لسانوو وسط فموو ) برهنيلي ..!

حركات راسها و كملات العدد لي بقالها .. ما سالات حتى ولات بحال الشرويطة ..! مد لها يديه نوضها و بهدوء قال

حكيم: براكة عليك ..!

جرها من يديها جهة الساكادو و جبد فوطة صغيرة عطاهالها تمسح وجهها و عنقها ..! ولات كتلصق بالعرق .. عيات بالجهد و الهدف كان تحس شحال صعيب ذاثها تتخلص من السموم لي كتدخل لهم و شحال ساهل تهلكها عند أول مشكل وقع معاها ..!

تعمد يستفزها باش تخرج كاع الجهد و القوة لي هي براسها ما حاساش بيهم .. و هاذي غير البداية .. اليوم كان باغي غير يطيسطيها و يعرف قوة التحمل عندها لفين واصلة ..!

رمشات عينيها فيه بهدوء حتى شاف فيها و قرب جهتها .. باسها من جبهتها لي طايبة بالحرارة و دقات قلبها كيتسمعوو مجهدين ..!

حكيم:( بعد شوية كيدوز يديه على شعرها كيقادو ) إلا الصبر أريبري ديلى الصبر أريتجبار.. صبر سول زايد غصبرنم ..!

《 كاين صبر يدبر و كاين صبر يجبر ... صبري و زيدي فصبرك ..! 》

شريفة:( تنهدات و ردات كتسرح عينيها فالبحر متكية على كتفوو بتعب ..! ) حتى حاجة ما كتجي بالساهل ..!

جمع حوايجوو و خرجوو من البحر .. وصلوو للشارع و شدو طاكسي كبير وصلهم تال باب المخيم .. الطريق كاملة و هي مسخسة متكية عليه و ساكتة كتفرج فالجبال لي قدامها ..!

تفارقات معاه و كل واحد مشى فطريقوو باش يبدلوو عليهم ..! مع جات تدخل للشالي تهز باش تدوش .. لقات بثينة مقابلة معاها كتقاد فولارها .. تبسمات و قربات منها ..!

شريفة: بثينة الزين بغيت نسولك ..!

بثينة:( حركات راسها بابتسامة ) مرحبا الفنون .. قوليلي بعدا فين كنتي ؟ واش قائد أمغار دخل للشالي هاذ الصباح ؟ حسيت عليكم و كنت مدوخة ما قدرتش ننوض نتأكد ..!

شريفة: ااه دخل فيقني مشينا درنا السبور ( عقدات حجبانها بتعجب ) فاش نضت من النعاس لقيت دونتي فخيس ( الدوا د سنان ) فوجهي هو و شي عكار .. ما فهمت والوو ..؟

بثينة:( ضحكات ) اااه هههه غير البنات ضحكوو معاك و صافي .. موالفين كنلعبوو بيناتنا هاكا .. و لكن قائد أمغار علاش دخل علينا ؟ ( عوجات فمها بحركة كتبين ما عجبهاش الحال ..! )

شريفة: ما عرفتش اختي .. يمكن ما لقى فين يعيط ليا باش نخرج عندو .. حيث نمرتي مشاتلي عاد غناخذ وحدة اخرى ..!

بثينة: و لو .. ما يدخلش ..! هما كيدخلوو شحال من مرة و لكن كنكون معاهم .. مور ما كنكملوو الاجتماع د القادة فليل .. كاين لي كيديرو دي ماسك على وجههم و يلبسوو شي حوايج كيخلعوو و كيجييو نخلقوها بيناتنا .. و لكن قبل كنضور على البنات لي دايرة الفولار تلبسو و تستر و لي عريانة كنغطيها .. عاد كنفتحلهم الباب .. و حتى باش يراقبوو و لكن بوحدو ما جاتش كاع .. دابا نهضر معاه ..!

شريفة:( هزات كتافها و قالت ) بيناتكم ا بيضاوة ..!

بثينة: يالاه سيري لبسي الزي .. شوية و غنخرجوو للتجمع د الصباح .. ما بقاش الوقت بزاف ..!

شريفة: خاصني ندوش بعدا .. فين كتدوشوو ؟

بثينة: فالحمام نيت .. تعمري الما بسطيلة و لا طاسة يلا عندك و تدوشي تما حدا البزابز و لا لداخل .. الما بارد ..!

شريفة:( رمشات عينيها ببطئ ) لاااا سخونة غنتفرع بالبارد تء ما بلانش ..!

بثينة:( تسمع التصفار و بدات كتزرب فالهضرة خاصها تخرج البنات ) لبسي دابا عليك الزي و خرجي للتجمع حتى نكملوو و نفطرو عاد دوشي تكوني بردتي ..!

عقدات حجبانها و مشات كتجبد فلي برودوي ديالها و الزي الكشفي لي عطاه لها حكيم ..! طرفات فالحمام غير بفوطة مفزكاها و رطبات لحمها بالكريمات .. كتشم و تعاود واش ما بقاتش فيها ريحة العرق .. حتى قادات حالتها و ردات حوايجها لبلاصتهم عاد تبعاتهم ..!

وقفات هي اللولة فالصف .. لي كيتسمى الطليعة و تبعات البنات الثانيين لي عارفين شنوو غيديرو .. أما هي ما عارفة ما تقدم و لا تأخر ..!

تمشاو بالشوية تا خرجوو للساحة اللور و قبل ما يتقابلوو مع القادة بداو كيجرييو و ينقزو فبلاصتهم .. كيغنييو بالجهد بالايقاع كينغموو و يطولوو فالكلمات .. الفرقات كاملين غاديين بنفس النظام ...!

《 لنجتمع في الثواني .. نعطي قيمة للزمن .. ساعة تدور لا ترحمنا هيييه و الالتزام هو شعارنا هييه .. لاي لاي لاا لااا لاي لاي لالا ..! 》

بقاو كيعاودو فيها حتى هزلهم حكيم يديه بمعنى سطوب .. و تقدم واحد من القادة كيقشب معاهم و يسولهم كي داز صباحهم .. و بعدها بدا كيردد نشيد صباحي و شريفة معجبة من صوتوو .. عندو بحة خطيرة ..!

نشطوو و غناو و نقزو و شطحوو حتى شبعوو و موراها .. تقدم حكيم لي بدورو لابس زي فالرمادي فيه شارات فكتافوو .. كاسكيط فوق راسوو و فولارة فالاخضر و الاصفر فعنقوو ..! عطاهم التحية و قال

حكيم: ندوزو دابا .. لزهرة اليوم .. شبل اليوم .. كشاف اليوم .. مرشدة اليوم .. جوال اليوم ..!

بدا كيعيط باسم واحد من كل فرع .. كيعطيو التحية و كيتقدم واحد من القادة كيحيد الفولارة ديالوو و كيركبها لكشاف اليوم و كيدير القائد الفولارة د الولد .. كيكون بحال تكريم منهم ليهم و غير كيكملوو كيوقفوو حداهم ..!

حكيم:( شاف فالمرشدات و بهدوء قال ) مرشدة اليوم .. شريفة ..!

ضحكات باستغراب و قربات عطاتهم تا هي التحية كيفما شافت لي قبل منها كيديرو .. و هاذ المرة حكيم لي حيد فولارتوو و ركبها لها .. واقفة حداهم تا هي ..!

حكيم:( سرح عينيه فالطليعات و بصوت قوي قال ) حكمة اليوم ..! ( شاف فشريفة بنص عين بحال كيمعني عليها و تا هي تسناتوو بفارغ الصبر شنوو يقول ) الفراشات لا تعرف لون أجنحتها .. لكن أعين البشر تعرف مدى روعتها ..!

حكيم:( شاف فشريفة و لي حداها ) يالاه ا الكشافة شكون يشرحلنا الحكمة د اليوم ..!

شريفة:( تبسمات و هزات يديها تا حرك راسوو و قالت ) معناها .. تقدر تكون نتا ما عارفش بقيمتك و لكن كاين واحد من البشر عارف و غيقدرك كيفما كتستاحق ..!

هز راسوو بالايجاب و عطى الكلمة للبقية .. عاد دازو للبروغرام د اليوم شنوو غيديرو فيه .. قسموو المصالح عليهم كاملين .. المصالح كيتقصد بيهم .. النظافة الشخصية و ديال المخيم .. كيقادو الشاليات ديالهم و كتجي لجنة د القادة كتضور و تشوف .. كيسيقوو فين كياكلوو .. كيضورو على الزبل فالساحات و يجمعوو شنوو خاص يتجمع .. و كاينة لي كتعاون فالكوزينة .. كل وحدة على حسب عمرها و طاقتها ..!

و قبل ما يتسالى التجمع و يمشييو يفطرو تقدمات بثينة كتغني و هما كيعاودو من موراها .. بنص عين كتشوف فحكيم .. كتخشيلوو الهضرة و تا هو فمها طايرة بلي كتدق عليه ..!

بثينة: من كوة لنا و من خصاص الباب .. دخل خيمتنا بالص بلا نقاب .. ما سال راينا حقا له العتاب .. او نال إذننا يا عجب العجاب ..!

دخلت خيمتكم ( سفقات ) فقط لأخبركم .. الليل قد ولى و الصبح قد أتى ..!

شريفة:( شافتهم بداو كيرجعوو منظمين و هي تقرب من حكيم و همساتلوو بخفوت ) لحق عليا للخيمة ديالك تعطيني داك السخرة لي خدينا ففاس ..! باش تشرب الحليب بوراق السدر و عاد نمشييو نفطرو ..!

حكيم:( حرك راسوو ) خليهم يمشييو و تبعيني ..!

*******************************

دخل لخيمتوو و شريفة موراه كتضور فعينيها .. جبد الساشي لي فيه العشوب .. هزات لي غتحتاج و خلاتلوو الباقي ..!

شريفة: خاصني نطحنهم و نسخن الحليب .. يالاه نمشييو للكوزينة .. منها نيت ناخذو بانيوو تحطو حدا رجليك ..!

حكيم:( لاح الكاسكيط كيدوز على راسوو ) واخا .. يالاه ..!

شريفة:( قلبات عينيها باش تخرج و هي تلمح ساشي فيها لبسة د البنات .. باستغراب قالت ) شنوو ديكشي ؟

حكيم:( ضار لفين نعتات ليه .. بهدوء تمشى و هزها مدها لها و ببرود قال ) يلا ما لبستيهاش بلا ما توريني وجهك .. و ما كاين بحر .. هنا غتبقاي ..!

شريفة:( عقدات حجبانها بتعجب و جبدات الثوب من الساشي و عينيها بالشوية كيتوسعوو ) البوركيني ؟ ( رمشات عينيها ببطئ ) باغيني نلبس البوركيني باش كيعوموو المحجبات فالبحر ؟ ( مصات شنافتها ) فوقاش شريتيه ؟

حكيم:( ببرود رد ) غتستري راسك عاد تخرجي و لا خليك مرتاحة غتكوني تسخسختي بالسبور د الصباح ..!

شريفة: من نيتك ؟؟ ( مصات شنافتها و قالت مغذذة ) ما غنمشيش لابسة هاذ البعر ..! راه البحر هذا شكون غيشوف فيا ؟ بحالي بحال البنات .. و غنلبس كسوة مستورة على الخريطة لي خليتي فيا ( هزات حاجبها )

حكيم:( حرك صبعوو فالهوا ) بلا كثرة اللغى و بلا ما تفرعيلي كري .. هضرتي قلتها و ساليتها ..!

شريفة:( زفرات النفس بصوت مسموع كتكالمي فراسها ما باغاش تتعصب ) حكيييم ما تمرضنيش .. راه البحر هذا شكون غيديها فيا و المخير فهاذو لي هنا .. صغر مني بقرن و زمارة ..!

حكيم:( عقد حجبانوو و بزعفة رد كيقرب منها ) صغر منك ما عندهمش الز* لي يقيموو بيه عليك ؟

شريفة:( ردات بفقصة ) علمي علمك .. تسنى نمشي نقلبهم و نرد عليك الخبار ..!

هبط من الدروج كيغني و يدندن بوحدوو .. ريحتوو فايحة و فينما مشى كيخليها موراه عاطية ..! الحروف زوعر و اللحية لونها حمر مغلوق مايل للنحاسي ..!

العينين زورق شابه فجداتوو و ماماه لالة خديجة لي جالسة حاطة رجل على رجل بقميص ثليجة فالباج مرة مرة كتنهد و تمد لسي أحمد برادة باش يكمل فطورو و يشرب الدواه ديال السكر ..!

مهدي:( جر الكرسي و جلس مقابل معاهم ) بونجوغ الشباب .. ماااام .. دااااد .. اليوم منورين هاهاها شنوو السر هاهاها ..!

أحمد برادة:( عقد حجبانوو و قال ) peux-tu m'expliquer " تقدر تشرح لي " شنوو داك الوقت و الحالة لي داخل بيها فليل ؟

مهدي:( قلب عينيه و عوج فموو بملل ) pfff papa arrête stp j'en ai marre " بففف بابا عافاك باركة .. مليت و عييت " من هاذ السيجي ..! ( شاف فماماه خديجة ) واش chaque jour " كل نهار " أ ماما ..!

خديجة:( شافت فأحمد لي بدا يتعصب و قالت ) سيدي أحمد بالشوية عليك ( طبطبات على كتفوو ) على ود صحتك ..! إييي ألووغ مهدي ..! Jusqu'à quand " تال فوقاش " غتبقى بهاذ الحالة ؟ و مرافقلي مع ديك الشمكارة .. كتدخل سكران و محشش حتال شمن وقت .. لا خدمة لا ردمة .. شنوو غيقولوو علينا الناس ؟ واش ولد لالة خديجة الأندلسي و سيدي أحمد برادة .. يدير بحال هاذ الفعايل ..؟

مهدي:( ضرب بالمنديل فوق الطبلة و وقف ) ماما أغييط .. شادية ماشي شمكارة داكوغ ؟ و أنا ما بقيتش صغير عارف شنوو كندير و من حقي نختار حياتي و نسيرها كيفما أنا بغيت ..!

سمح فيهم و خرج كيدردك من الفيلا ركب فطونوبيلتوو و قلع طاير من تما ..! تنهدات خديجة بتعب و شافت فأحمد

خديجة: خاصنا نزوجوه بشريفة فأقرب وقت .. هي لي غتعاونوو يبعد على شادية و على البلية و يرجع يقابل خدمتوو و خدمتك .. شفتيه كي شد الضد و سمح فكلشي .. هاذشي لي كيدير فيه كلوو بسباب داك الشمكارة ..!

أحمد برادة: ديجا هضرت معاها و قبلات .. نتسناو ترجع من les vacances " العطلة " و نحلوو هاذ المشكل .. شريفة souriante et sympa " ضحوكية و ضريفة " غيرتاح معاها سيدي مهدي و تا هي غتلقى راحتها معانا .. واخا ما عجبهاش الحال من هضرتي و كيفاش ضغطت عليها و لكن مع الوقت غيصفاو الخواطر ..!

خديجة:( تنهدات ) حتى نتا غتفكها من مشاكلها مع طليقها .. و هذا هو الزواج واحد كيوقف مع الثاني و يكملوو بعضياتهم .. هي تعاون ولدنا و حنا نعاونوها .. كتبقى تا هي كلاص و راقية بحالنا .. من المستوى د مهدي و غتعرف تتعايش معانا و الحمد لله لي مهدي قبل بيها و تا هو عاجباه .. ما عارضش ..!

أحمد برادة: نخاف غير يتزوجها و يرجع يجيب شادية ضرة عليها غير ضد فينا ..!

وقف حدا وحدة من القهاوي د الكورنيش .. طلب فطورو و جلس كيتصنت لعظاموو و الريح د البحر ضارب فيه .. ضور وجهوو للجنب و هو يلقى واحد كيشوف فيه و بابتسامة قال ..!

.....: كيgولوو البحر كيريح القلب .. لي مهموم يتقابل معاه .. باين فيك معصب .. الصباح هذا ضحك و سيبها كيفما جات ..!

مهدي:( خرج تنهيدة و قال ) و شكون خلاك ا خويا ..! غير ولدوك صافي هما عارفين مصلاحتك و خاصهم يتحكموو فيك و نتا ملزوم تدير لي يقولوو فيه ..!

.....: وا الواليدين هما هاذو .. تانا كنت بلاصتك واحد الوقيتة .. فلخر رمييت كلشي مورايا و زدت خلفة .. و وريتهم أنا علاياش قاد و دابا قول لهم يهضرو ( ضرب على ذراعوو ) نهار تخرج من تحت جناحهم تما فين غتعيش حياتك .. ما يبقى حد يمن عليك بالسانتيم الاحمر ..!

مهدي:( ضحك ) هاهاها ما تعرفناش بعدا .. أنا مهدي .. مهدي برادة و نتا ؟

....: " وقف و سلم عليه " كيgولوو ليا ولد رقية .. ولد رقية جاب سلعة نقية ( جمع صبعانوو و باسهم ) عندي كافي فكازا نشوفوك تما ا الخاوة ( عطاه كارط فيزيط فيها النمرة ديالوو و القهوة فين جات ) بغيتي تتكيف فالقنت صوني عليا .. الطبلة المخيرة ديالك ..!

مهدي:( خداها كيقرا فيها ) نجييو هاذ الليلة نيت هاهاها نشوفوو سلعة ولد رقية ..!

*********************************

عض على فموو مخنزر .. مدة و هو كيشوف فيها ما حركش عينيه المحمرين ..! حتى وثرها و بدات كتحك فعنقها من اللور و ترمش فيه و ترجع تقلب وجهها للجنب ..!

نحنح و هز حاجبوو بثقالة فيها و قال

حكيم: بالرب تا غنهرس لمك وجهك ( عقد حجبانوو و زاد قرب منها شادها من ذراعها ) كتقلبي عليا نشمعهالك ؟

شريفة:( كتحاول تجر يديها و هو مزير عليها ) حكيم قصحتيني طلق مني ..! ( هزات حجبانها فيه ) ما سوقكش فيا و فلباسي أنا حررررة ..! ( ساطت النفس ) ما عندي ما عدا من هاذ الحكام الخاوي .. شنوو زعما باغي تبينلي هضرتك لي كتمشي ؟

حكيم:( زاد زير عليها و قال ببرود ) غتفطري و تمشي للشالي ديالك .. ما كاينش البحر هاذ النهار .. لا بالبوركيني لا بغيرو ..! ( يالاه حلات فمها تجاوبوو هز صبعوو بتهديد مقابل مع عينيها ) تزيدي كلمة وحدة .. غنحرمك منوو فخطرة و يلا قدرتي عتبي فيه ..!

عضات على فمها مغذذة .. أكثر واحد كيقدر يستفزها و يلعب على أعصابها هو حكيم .. بعصبية جرات يديها من عندو و تا هو رخاها ببرود .. شانقة على البوركيني و العشوب باليد الثانية و كتمشى قداموو كتاكل فراسها بالفقصة ..!

شريفة: أنا فهموو ندادي و هو يقلع فوتادي .. تشرب فيه جغذيذ ا ولد حبيبة ..! ( ضارت موراها لقاتوو تابعها للكوزينة كيتمشى ببرود هاز حاجبوو بحركاتوو المكلظمة ..! رجعات قلبات وجهها بنفخة ) غير بلاتي عليك ا بو زنطيط ..!

دخلات للكوزينة و بهدوء قالت كتشوف فالطباخة و الحجامة لي تما ..!

شريفة: بغيت شي مونيليكس فين نطحن هاذو .. و شي كاس د الحليب و كاسرون باش نسخنوو .. و بانيوو غارق عفاكم ..!

عطاوها كاع لي بغات .. ركزات و هي كتقاد فيه حتى كملات و مداتوو لحكيم يهزو حيث سخون و هي شادة فيديها البانيوو .. ما مفاكاش معاه حتى تشوفوو شربوو بعينيها بجوج ...! رجعوو للخيمة .. حطاتلوو البانيوو حدا فين كينعس .. باش يلقى راحتوو و هو جالس ..!

بهدوء شربوو و بقى جالس هاز راسوو فيها .. بمعنى هانتي ما كاين والوو ..! حتى حس بالتبويعة و تحنى كيرد .. قلبوو باغي يخرج من بلاصتوو و شريفة واقفة عليه معيبة وجهها عايفة من المنظر د السيور لي كيخرجوو من فموو كوحل ...!

بقى شحال على نفس الحالة .. حتى تهدن و ارتاح .. مداتلوو قرعة د الما يشلل بيها فموو و يغرغر باش حلقوو ما يتجرحش .. حاطة يديها على كتافوو ..!

حكيم:( طبطب على نفس اليد و قال ) سيري تفطري أنا مزيان غير سيري .. شوية و نخلط عليكم ..!

شريفة:( حركات راسها بالايجاب ) واخا ..! حكيم خاصني لاكارط د التيليفون نركبها باش نهضر مع هاذوك على ود الفيديو ..!

حكيم:( رد باختصار ) فالعشية تكون عندك ..!

******************************

الشعر زعر مطلوق على طولتوو و العينين عسليين مرمشيين .. ضاربة فيهم الشمش كيبانوو كيفتنوو .. قليولة و كلشي فيها حدو قدو و لكن حليلوة .. كتبان الكياتة فتصرفاتها و حركاتها .. مربية .. خوافة .. ضحوكية و حشومية فنفس الوقت ..!

عوجات فمها غالباها البكية كتشوف فالفطور لي محطوط .. الحليب بالقهوة و اتاي .. الكومير مع الزبدة و كوفيتير ..!

حدها شافت شريفة داخلة و هي تمشي عندها كتزرب .. وجهها مزنك و مغبنة .. بصوت باكي قالت

أسية: فيا الجووووع حاسة بالسخفة و الفطور خايب ( عوجات فمها ) الحليب شربتوو جاني مزفر اعععع ( غمضات عينيها كتحرك راسها بلا ) شنوو غناكل انا دابا ؟

أيوب:( شافهم واقفين الوسط و لحق عليهم ) كاين شي مشكل ؟ ( مد يديه لشريفة سلم عليها ) شريفة ياك ؟ ( بابتسامة ) مال الصغيورة ؟

شريفة:( ردات بهدوء معنقة أسية لصدرها كتلعب فشعرها ) كتفشش علينا ..!

أيوب: هههههه يلا على الفشيوشات راه ما يجييو غير معاها ..!

طرطقات أسية فيه عينيه و زادت تخشات فشريفة حشمانة منها و منوو و من الموقف كامل .. دمعوو عينيها شوية و وجهها رجع بحال ماطيشة .. غطرطق بالحمورية ..!

شريفة:( هزات حاجبها بابتسامة ) بنتوو ليا تعرفتوو على بعضياتكم مزيان ..!؟

أيوب:( رد بعفوية ) لا لا غير شوية و صافي .. بغيناها تتطلق و تندامج معانا بالزربة و لكن الصغيورة عندكم كتحشم ( شاف فأسية كيضحك ) ياك ا الشعيبية هههه ؟

أسية: اننن شنوو ؟ ( شافت فشريفة بنص عين و بدات تطرطق فصباعها بثوثر )

ايوب: هههههه غير كنقشب معاك ( هز عينيه فشريفة ) حكيم وصاني عليها قبل ما تلحقوو علينا .. باش نعاونها يلا احتاجت شي حاجة .. و تا دابا يلا كاين شي مشكل .. مرحبا .. أسية ما رخيصاش علينا .. تا هي مهدنة و ماشي شويطنة ..!

شريفة: ياك ؟ ( ضحكات ببرود كتقلب فعينيها و تعوج ففمها ..! ) حتى ديك القطة لي كتكون زويينة و كالم .. تتشهى فيها غير الشوفة .. نهار كيقرب شي حد لولادها .. كتتسيف و تخرج نايبها و ظفارها عليهم ( خنزرات فيه ) أ طونسيون أ قائد تمشي تقرب لشي حاجة ديال ماليها ..!

أيوب:( ضحك هاز يديه فالسما ) واخا أ أستاذة سمحيلنا ( دوز يديه على قفاتوو من لور كيشوف فأسية و يتنهد .. راجع لعند فرقتوو ..! )

شريفة:( باستها فجبهتها حاطة يديها على راسها كتلمس عليها ) هاذ ايوب ما عجبنيش أ أسية .. عينيه ما صافيينش .. ما تخليهش يبقى لاسق فيك .. ضوري فيه يلا جا عندك مرة اخرى .. بلا داك الضحك الباسل ديال والوو ..!

أسية:( ردات بهدوء ) واخا ا حبيبتي ( تهزات باستها فحنكها )

شريفة:( ضحكات ) هههههه يا ختي على الحلاوة لي عندي أنا .. أجي معايا نشوف شنوو نعطيك تاكلي .. ا المشيشة ديالي ..!

أسية:( ردات بدلع ) كبييييدة ..!

********************************

جامعة القدامي د شعرها و مخلية الباقي مطلووق على عنقها ..! لابسة سروال طاي هوت طالع حتال النص فكرشها .. خاشية فيه قاميجة منفوخة شوية .. دايرة نظاظرها و هازة صاك معاكساه معاها فالجنب .. سمعات الكلاكصون عليها و صاحبتها كتشيرلها و هي تبتاسم ... فتحات الباب و طلعات اللور ..!

ماري:( سلمات على صاحبتها و الراجل لي معاها .. جالسة فالوسط خاشية راسها بيناتهم ) خليتوني منشورة فالشموش .. جمالي ذاب معاكم هاذ الصباح ..!

رد الشاب بضحكة : سكتينا ا غريبة د الكوك .. خاص غير لي يقيصك و تفرتتي فيديه ..!

ماري:( ضربات بشعرها لور و قالت ) جيتي بحال خميس ولد حديدان و نتا كتقولها ( عوجات فمها كتشوف فصاحبتها ) اش هاذ لوبية مرقدة معاشرة معاها ؟ تا هذا يبغيوه الناس ؟ يعطيكم الذل بجوج شلة تقرف ..!

ردات صاحبتها كضحك: ايييه عاطية منا ريحة البصلة .. الله يعطينا وجهك غير نتصورو بيه ا بسكوتة

رد الشاب كيفرنس: يخليلي بسكوتة ناقصك غير رايبي جميييلة و تكملي الحطة

ماري: هيهيهي و نتا ناقصك غير شي دوبيرمان يعضك من قلقولتك ..!

الطريق كاملة و هما شاديين فبعضياتهم حتى وصلوو لطماريس .. عوالين يدوزو النهار تما حدا البحر ..! ما قالت ماري تا خلاتها حبيبة تخرج تفوج شوية .. مغطية عليها من خوتها ..!

اختارو وحدة من القهاوي و جلسوو مقابلين مع البيسين و البحر بريفي .. العرا لعلك ترضى و الضحك و التكركير كيتسمع من بعيد .. الجو لي كيحمق ماري عزيز عليها الزهو و النشاط .. باقيين كيهضرو حتى وقف عليهم شاب يكون فالثلاثينات ..!

ضارب الحطة و الشعر مفيكسي بجيل .. السنسلة مذهبة كتلمع من عنقوو و السنان كيبرييو .. مطراسي اللحية .. حالوو حال أغلب ولاد الوقت .. سلم عليهم و جلس قدام ماري ..!

قالت صاحبتها كتعرفهم : هاذي ملاك و كنعيطولها ماري و هذا علي

علي:( رد بضحكة ) و كيعطولي علووش ههه ..!

ماري:( ردات كتشوف فيه ) مشرفين ..!

طلبوو الفطور و تجمعوو عليه مقرقبين الناب .. ناشطين ماشطين .. حتى ناضت ماري لطواليط .. دايزة من قدام علي لي كيطلعها و يهبطها بعينيه و بابتسامة جانبية ناض تبعها مخلي داك الجوج كيضحكوو عليه ..!

حضاها حتى دخلات لطواليط ..! شاف بين جنابوو و دخل موراها تا هو كيقلب فالبيبان .. تا وصل لفين شادة عليها و دق بجووج صباع ..!

علي: ماري راك هنا حلي ..! هذا غير انا علي .. فتحي ..!

********************************

تقسموو المصالح بين البنات .. كل وحدة شنوو مشات تدير .. بقاو خمسة بيهم فالشالي كيسيقوه و يقادوه .. قبل ما تجي اللجنة د القادة تضور ..! كيزربوو دغيا باش يكملوو و يمشييو للبحر ..!

الما مطلوق و كل وحدة مكلفة بجهة .. شريفة كتكرط و اسية كتمد لها الما و تعاونها ..!

شريفة: تاسانوو سيري للكوزينة و لا للقاعة د الماكلة قول لهم يعطيوك الشطابة .. جمعي هاذ الزبل ..!

أسية: واخا ..!

بحماس خرجات كتنقز .. ما لقاتش الشطابة تما و زادت كتسول لي لقات قدامها . واحد كيسيفطها لعند لاخور .. تا خرجات للساحة فين كاينين الاشبال كيزرعوو و يسقييو الغرس .. و أيوب شادها فيديه كيشطب بيها ..! بتردد قربات جهتوو و قالت بلطف

أسية: عافاك واخا تعطيني الشطابة حتاجيناها فالشالي .. نكمل و نردها لك ..!

أيوب:( ضار عندها كيضحك .. مدها لها و هو باقي شادها ) هاي هاي على الصغيورة و الحداكة ..!

أسية:( تبسمات بحناك مزنكين .. حانية راسها شوية ..! و بصوت غنوج رقيق قالت ) و شنوو راني حارة فشغالي بحال شريفة

أيوب:( ضحك بالجهد و قال ) هههههههه الحرورية خليها لماليها .. نتي باركة عليك غير تكوني حلوة ..!

علي: ماري راك هنا حلي ..! هذا غير أنا علي .. فتحي ..!

بدا كيدق بالجهد فالباب و هي واحلة مع حوايجها كتطلعهم .. خلعها تا قلبها ولا كيضرب فصدرها بحال المدفع ..! كيفاش هاذ حلي غير أنا ؟

علي: راني شفت رجليك .. فتحي الباب ندوي معاك ..!

عرقات و نشفات فبلاصتها كتضور عينيها تشوف واش عندها منين تهرب ..! ساعة لا حياة لمن تنادي يا غتفتح ليه الباب يا غيفرعها عليها بهاذ الجهد لي كيضرب بيه .. ما عندهاش حل آخر باش تخرج .. و هو باين شنوو ما باغي ما دام تابعها تال الطواليط ..!

ما فكها غير الباب د الحمام لي تفتحات و دخلوو جوج د البنات .. خنزرو فيه و عيطوو على السرباي لي كان دايز من تما .. جا خرجوو و هو كيعتاذر بحجة راه غير غلط ..!

رخات النفس و حمدات الله لي هازة ساكها معاها .. خرجات كتسلت بالشوية .. ما ناوياش ترجع عندهم .. ندمات على النهار لي شركات معاه الجلسة ..!

ماري: تفوو أجسام البغال و عقول العصافير .. فتحي غير انا علي .. ضاربة أنا وياك الخط الزيناتي .. ا المهتوك ..!

وصلات للشارع لي مصطوكي بالطونوبيلات و وقفات كتسنى تدوز شي طاكسي تركب فيها .. حتى بانلها حسام من الجهة الثانية كيكلاكصوني عليها تجي لعندو .. ضحكات باستغراب و قطعات الشانطي ..!

ماري: كازانوفا .. آش كدير هنا ؟

حسام: نتي لي شنوو جابك تال طماريس .. كتسناي شي حد ؟

ماري: ااه طاكسي بغيت نرجع للدار بحالي ( ضورات وجهها للشانطي ) ساعة بانلي الجفاف ..!

حسام: طلعي نوصلك ..!

حركات راسها بمعنى اوك .. ضربات الضورة مخلياه كيطلع و يهبط فالبنات لي منهم غاديين جايين غير بالمايوو د العومان ..! شافت فيه وحدة و عض على شنافتوو .. حركة ديال اححح و نشدك و بصوت مسموع قال ..!

حسام: خوك يتيم ما ترضعيهش من داك الخير لي عندك و تدي الأجر مع هاذ العبد الضعيف ( ضرب على صدرو و هز صبعوو للفوق ) و مع الله ..!

ضارت شافت فيها ماري كتميق و البنت قاطعة الشانطي كتموت بالضحك .. ركبات حداه و قالت

ماري: زيد طلع و هبط .. راك باقي ما عبرتيهم مزيان باش تخيط لهم جلابة على فورمتهم ( جرات السمطة ركباتها ) تصلاح خياط ا كازانوفا

حسام:( ضحك و رد كيديماري الطونوبيل ) يثوب على مول الثوب لي خلى مول التكاشط ديما ناشط ..! ( دوز بلسانوو على فموو حاضي وحدة اخرى كتكسول فالطريق .. خرج راسوو و قال ) وااا طلقينا ا لالة ( طبل بيديه على كرشوو و بصوت مضخم كيجبد فالهضرة كمل ) باخ باخ باخ وشد اااا حمد شد واش انا فجنة ..!

ماري: ههههههههههههههه و الله ما كتحشم ..!

حسام:( دخل راسوو و قال كيضحك ) غير كنقشبوو مع الجنس اللطيف ديالنا .. وا خيووورات هما ( شاف فيها و فالصدافة لي تحلات لها د القاميجة حتى بانت الشقة ديال صدرها مزيرة ) و مال داك البز٠ول كيطل عليا ؟

أيوب:( ضحك بالجهد و قال ) هههههههه الحرورية خليها لماليها .. نتي باركة عليك تكوني غير حلوة ..!

أسية:( تزنكات ) ففف حشوومة ..!

جرات الشطابة من عندو و مشات من قداموو كتجري مخلياه مبسم بعذوبة كيشوف فالدراري الصغار لي معاه و يراقب شنوو كيديرو ..!

أما أسية عطاتهم الشطابة و جلسات فالجنب كتفكر هضرتوو و تغلبها الضحكة و كترجع تجمعها .. حتى كتولي تفلت لها من جديد .. حاسة براسها مخلوعة و قلبها مخطوف من بلاصتوو ..!

احساس غريب كتعيشوو لثاني مرة .. المرة اللولة مع عدنان فاش سيفطاتلوو المسج و جلسات كتسنى الرد و دابا مع أيوب لي فينما ضارت كتلقاه .. كيضحك و يقشب معاها ...!

المراقبة كتكون على مستوى الشالي و النظافة ديالوو و النظافة الشخصية ك كل .. من فاليز مرتبة لهندام الانسان إلى آخره ..! الهدف هو يعلموهم يعتامدو على راسهم و يقادو أمورهم بيديهم .. كل واحد تما مسؤول على راسوو ما كاين لا خويا لا بابا ..! هو بدورو نشاط كيدوز بالضحك و الغنا .. الدقة المراكشية و الشطيح لعلك ترضى ..!

من بعد ما كملوو بداو البنات كيوجدو راسهم للبحر .. و لي قبل علماتهم بثينة يلبسوو محترم و مستور بلا ما يخلييو شي حد يحل فموو عليهم ..!

بحماس متبعاهم بعينيها .. داك الأجواء لي كيكونوو بين البنات فالمراهقة و كل وحدة باغى تكون زوينة كثر من لوخرى و داك المعاندة الكيوت ..! خلاو شريفة تنوض بلهلا يكزيه لها تلبس حتى هي ..!

خدات لومبغ سوليي و الزيت باش تشمش .. النظاظر و أي حاجة تقدر تحتاجها فصاك بحال القفيفة فيه فراشات فالغوز مرسومين مع كلاكيط فرجليها .. و بوركيني فالقهوي لابساه ..!

خارجين كيضحكوو بيناتهم .. حتال القاعة برا فين مطلوق الشعبي و الغنا ..! تجمعوو على الديجي كيشطحوو .. حتى وصل الطرونسبور فين غيركبوو و بداو كيمشييو بالصف و كالعادة شريفة واقفة فاللول ..!

رمشات عينيها ببطئ فحكيم .. لي لابس شورط فوق الركبة بشوية فالكحل .. كلاكيط د أديساس و تيشورط فالابيض سامبل ..! هز يديه و حرك صبعوو بشكل دائري للداخل كيشيرلها و هي كتشوف فيه بهدوء ما فهماتش شنوو بغى يقصد حتى نطق و قال ..!

حكيم: ضربي الضورة و رجعي منين جيتي ( طرطق صباعوو كيحرك راسوو ) يالاه ..!

شريفة:( ضورات عينيها فالبنات لي حداها و قالت من تحت سنانها ) حكيييم ..!

حكيم: ما غتمشيش .. هضرت معاك ( جهد صوتوو كيشوف فلي باقيين واقفين ) تحركوو نتوما .. ما عندناش النهار كامل ..!

شريفة:( دازت من حداه زطمات على رجليه بلعاني .. عاقدة حجبانها فيه ) ديريها فين تجيك ا سي أمغار ..!

حسام:( عض على فموو كيشوف فصدرها و الصدافة لي تحلات لها تا بانت الشقة مزيرة ) و مال داك البز٠ول كيطل عليا ؟

ماري:( حنات عينيها بالزربة لصدرها شداتها مخرجة عينيها فيه ) كانت مشدودة .. غير تحلات بوحدها .. و شوف قدامك حسن ما تدخلنا فشي حيط .. عينيك غير كيضورو الله يستر ..!

حسام:( رد بطنز ..! ) منين نويت نثوب جابك ليا المكتوب .. آش نديرو ا لالة ملاك ..؟

ماري:( ردات بصوت خافت ) والايني صباح هذا .. هاذ الزلايلي هذا .. حتى هو ..!

سمعها و ضحك مكسيري فالطريق منين خوات الدنيا .. ما وقف بيها حتال قدام دارهم .. هبطات كتقاد فحوايجها و بابتسامة صفرة قالت

ماري: الله يخلف عليك .. بسلامة ..!

حسام:( هز يديه بمعنى الله يعاون .. و اليد الثانية كيدوز بيها أبيل ..! ) وجدي راسك ندوز عليك .. نقضييو هاذ الليلة بجوج .. نشييخوو مع بعضياتنا .. ما كاين غير هشك بشك الزين ..!

*********************************

ربعة د السوايع و هي كتضور بين الكوزينة لي كيوجدو فيها الغذا و الشالي لي ما فيه حد ..! قنطات و جاها الملل خصوصا باقي ما خذات لاكارط د التيليفون .. بغات غير تدخل للانسطا تتلف الوقت شوية و ما لقات كي تدير ..! حتى سمعات صوت الطرونسبور كيحطهم .. داخلين بصداعهم .. كيشللوو رجليهم فالجردة و ديريكت للشالي يهزو حوايجهم و يمشييو يدوشوو بالنوبة من الصغير للكبير ..!

زفرات النفس بملل كترمش بهدوء حاضية أسية لي جايا عندها ملوية عليها فوطة فرحانة ..!

اسية: شريفة علاش ما مشيتيش معانا ؟ قلبت عليك و ما لقيتكش ..! المهم راه عموو حكيم كيتسناك برا .. قالك خرجي عندو ..!

شريفة:( قربات باستها فحنكها ) عجبك الحال معاهم ا تاسانوو ؟

أسية: بزاااف .. بقات بلاصتك .. عييت نقلب عليك حتى قالي عموو حكيم بلي بقيتي فالمخيم ..!

شريفة: امم بقيت هنا .. درتي لومبغ بعدا عنداك تكوني تحرقتي ؟ ( شافت لحمها و قالت ) حماريتي بزاف .. سيري تدوشي من الملحة و الرملة .. يالاه تجي مع الغذا نيشان ..!

خلاتها و خرجات كتجر كلاكيط فرجليها .. باقى لابسة البوركيني .. عكزات تحيدو و خلاتوو .. لمحاتوو واقف فالجنب و مشات عندو ما كتشوفش فيه .. نافخة شنايفها و مربعة يديها ..!

شريفة: قالولي بغيتيني .. هانا شنوو كاين ثاني ؟

حكيم:( هز حاجبوو بثقالة و قال مخنزر تا هو ) ياك لباس ؟ مالنا على هاذ الهضرة ؟

شريفة: شوف فعايلك ا سي أمغار ..! و زيد طرطق فيا داك العينين غتخلعني زعما ؟

حكيم: اهاااه ..! ( ضار هنا و لهيه و جرها من شفايفها لعندو قارصها منهم .. كيلوي لها فالتحتانية و هي خاشية ظفارها فيديه ) رجعنا للتقح*** د الز* عاود ؟؟ نطرطقهم لمك ؟

عصرلها شنافتها تا ولات حمرة بالحال الد٠م .. و هي كتخبش فيه و تضرب يطلقها .. لكن حاكمها بيديه الثانية .. حتى سمع الحس د شي حد جاي عاد رخاها .. محمر عينيه فيها ..!

حكيم: الله يعميها لك ..! ( طلعها و هبطها بعينيه ) غنخرج أنا و ياك تحركي هزي صاكك و باش تبدلي و خرجي عندي للطونوبيل برا ..! ( زاد حداها و قال ) خليك بالبوركيني ..!

شريفة:( ردات بغضب دافعاه من صدرو ) ما تبقاش تحط عليا يديك .. واش مكتفهمش ؟؟

زفرات بغضب فاش ما جاوبهاش و مشى بحالوو ..!

رجعات للشالي دايرة يديها على فمها .. خلاه لها كيوزوز حارقها تقول شدها بلقاط ماشي جوج صباع .. بزز قالت بصوت ما كيتسمعش ..!

شريفة: هربنا من القح** طحنا فولادهم .. البعر ..!

*********************************

المرصة د الحوت من أحسن البلايص لي ممكن تمشيلهم فمدينة الحسيمة باش تاكلي الحوت طري ..! البحر قبالتك مستفين فيه الفلوكات و القوارب الصغار باش كيدخلوو يصيدوو ..! الحمام الابيض و الطيور كيضورو من فوق راسك ..!

الصيادة مفرشين سلعتهم تتعزلي و تخيري فيها و هما كيتكلفوو يديوها للريسطوو لي غتجلسي فيه و يطيبوهلك .. يا مقلي يا مشوي على الفاخر كيفما اختارت شريفة و حكيم ياكلوه ...!

المحلات مباعدين على بعضياتهم شوية .. طبالي مستفين و مغطيين بميكات فالاحمر .. كتشمي ريحة البحر و صوت الحمام من فوقك و القطوط مفرقين وحدة هنا و وحدة لهيه باغيين دواقتهم حتى هما ..!

تحط الخبز مع الشلايض .. الفريت و الموناضا باردة .. على ما وجد الفريتوز مشكل بفواكه البحر و جوج شوايات ديال السردين .. كتاكل و تتبسم بهدوء من بعد ما رجع المود ليهم بجوج ..!

شريفة:( شافت فقطة واقفة حداها و بضحيكة قالت ) بس بس .. مياااو أجي هاك ( لاحت لها طرف د الحوت و رجعات كتاكل )

حكيم: ما كتوبيش ..!

شريفة:( شافت فيه ) هههه حنانات كيحمقوني ما كرهتش نربي شي وحدة ..!

حكيم: و نتي ؟

شريفة:( مصات شنافتها كتلذذ بالماكلة ) امم لا أنا مسمووومة ( رمشات عينيها ) لفعة ..!

حكيم:( رد باستهزاء ) كملي غذاك و يالاه نديك فين تبدلي الجلدة ..!

ضحكات و حنات راسها كتاكل .. فهمات بلي غيمشييو للبحر باش تتشمش و تبدا تتقشر و هاكا غتكون بدلات الجلدة ..!

مغامرة جديدة فحياة شريفة .. سعادة خيالية ... كتحس براسها فوق السحاب و تا حد ما فرحان بحالها .. مغامرة ما كتخطرش على البال ..! الأدرينالين عندها طالع فالدم .. يالاه بدات كتعيش الحياة لي كانت كتمناها ..!

الباراشوت مركبين معاه جوج د المقاعد ثابتين مزيان شادينوو بخرصة د الحديد مع يخث صغير .. داخل لعمق البحر .. و شريفة و حكيم معليين فالسما .. كيضرب فيهم الما د البحر و طايرين فنفس الوقت ..!

لا حدود للحرية .. لا حدود للسعادة .. حاسة براسها محررة من كاع القيود لي كانت رابطاها .. كتشوف فحكيم لي مبتاسم بهدوء و كيصورهم بجوج هما و المنظر الرائع لي موراهم ..!

كتغوت بفرحة و مشاعر ممتنة .. و حتى هو فرحان معاها كيفما عمرو فرح فحياتوو لي من ديما كان كيميل فيها للوحدة .. لكن فاش تزادت فيها شريفة الفرفوشة ضواتها و حلاتها كثر فعينيه ..!

ضارو بيهم كيمادو كامل " بحر " .. مرة يزيدو فالسرعة مرة يثقلوو شوية ... تا وصلوو حدا الحجر و هبطوهم للباطوو .. و مع وقفات على رجليها طارت عليه بتعنيقة ملوية رجليها عليه و مشعبطة فيه ..!

شريفة: شوووووكرا شوووووكرا شوووووكرا .. ya ayyyyyyy و شحال فرحااااااااااانة

مع كملات حسات براسها تهزات هي و حكيم لي نقز بيها للما .. تا هبطو للتحت و رجعوو طلعوو .. مخشية فيه كتمسح فوجهها و تكح ..! البحر بارد و الما زرق نقي مايل للخضورة تشوفي فيه وجهك .. دفعاتوو و بدات كتعووم و هو موراها .. حتى تخشاو بين الحجر ما بقاوش كيبانوو ..!

كالاها معاهم كيشوف فعينيها لي حمارو شوية بالملوحة .. فمها مفتوح كتلهث و صدرها كيطلع و يهبط ببطئ ..! مد يديه زير على جنابها هزها شوية عندو .. مميل راسوو لجهتها كيقرب لشفايفها ..!

شريفة:( بصوت خافت قالت و هي كتبلع ريقها ) حكييم ..!

حكيم: شششش ..!

قاطعها بق٠بلة ملهووفة .. كيم٠ص فشفايفها بالجهد و يدييه مزيرين على جنابها باغي يقطعهم ..! بن٠شوة حطات يديها على عنقوو و كتهبط ظفارها مع ظهرو .. كأنهم فصراع بجوج كيلهثوو و ما كيبعدو حتى كتسمع صوت البو٠سة مجهدة و كيرجع يجرها عندو مرة أخرى و هي فاتحة فمها بش٠هوة .. كتطالب المزيد مخلياه كيم٠ص فلسانها و عنقها .. هابط مع حلقها حتى كتغوت و تأنن .. بصعوبة بعدات كتهضر بصوت متقطع

شريفة: حح حك حكيييم .. فف ص صافي باركة ..!

حنى راسوو فيها صدرو كيطلع و يهبط .. وذنيه حمارو و تزييير ..! تبلونجا للتحت غاذي و كيضرب بالجهد مبعد عليها .. كيعووم .. باغي يتناسى و يبرد شوية قبل ما يرجعلها و يشدها ما يطلقها ..!

أما هي مشات كتعوم للباطوو و جلسات حاطة يديها على قلبها لي كيضرب بالجهد .. و مرة مرة تقيص فشنايفها لي تنفخوو و حمارو محقون فيهم الد٠م .. حتى رجع حكيم و طلع تا هو جلس حداها حيد التيشورط كيعصرو من الما .. بنص عين شافت فصدرو العاري غالباها الضحكة من الموقف ...!

شريفة: هههههههههه ( شاف فيها و حرك راسوو بمعنى مالك و بضحكة قالت ) كتعرف تبووس هههههههه

حكيم:( توسعوو عينيه و غلباتوو تا هو الضحكة و بصوت خافت قال مقرب من وذنيها ) كنعرف حتى نح**

شريفة:( زادت ضحكات حتى دمعوو عينيها و ضرباتوو لكتافوو كتمايل عليه بالضحك ) هههههههههههههه اووووف ههههههههه راه قلت لك فحل كيف البارود ديما كتخلي الد٠م يسيل معاك ..!

حكيم:( هز حاجبوو كيلعب بلسانوو ففموو مقرب منها ) و نتي فوقاش نسيلوو د٠مك ؟ ( صغر عينيه فيها و بهدوء كمل ) العدة شحال باقي لها و تكمل ؟

يتبع...

‎