عرس الذيب الجزء 18

تخشات فبلاصتها كتطيب فنعاسها و التيليفون فيديها .. عيات تصوني على حكيم .. لكن كيرجعلها فالبلاصة بمخاطبكم مشغول حاليا ..! فهمات بلي تيليفونوو مطفي و لكن احساس خايب حاسة بيه ما مخليهاش ترتاح ... قلبها مخطوف عليها و كيضرب بالجههههد بدون توقف ..!

شريفة:( سجلاتلوو اوديو فالواتس ) حكيم صافا ؟ كي وصلتي للدار قبيلة ..! راكم باقيين فالحفلة ديال محمد امين ؟ سلم عليه معاك و فاش تقرا المسج ديالي عيطلي ا كبيدة ما تهولنيش عليك .. يالاه بون سواغي ..!

*****************************************

حبيبة:( غوتات حتى بح لها الصوت .. طاحت على ركابيها كتضرب فوجهها و تنتف فشعرها غتحماق ) وااااااااااااااا ولديييييييييي .... واااااااااا كبدتييييييي كنتشوى فيييييهااااا .. وااااااا ربيييييي ولدييييييي ..!

شاف الطبيب فالفرمليات و هضر بزعفة ..! فالبلاصة طارت وحدة دوزات الريدو حجبات الشوفة على المحروقين بنار القهر و فلة الحيلة على برا و الثانية وجداتلوو Appareil de réanimation

cardio-pulmonaire

" جهاز إنعاش دقات القلب " .. قاداتوو فالفولط لي عطاها .. و دارت الجيل فوق من لاباغاي و مداتهالوو ..!

حطها على صدر حكيم مزير على يديه .. كيشعلها حتى كيتهز و يتحط فبلاصتوو ..! عين معاه و عين مع الطبيب الثاني لي مركز مع الجهاز ..!

سبحان الله كيفاش الانسان شحال ما وصل من قوة كيبقى ضعيييييف تحت امر الله و اي حاجة تقدر تأثر عليه ..! وجهوو صفر و تحت ععينيه كووووحل ..! مغيب و ما كيتجاوب معاهم بحتى حركة .. واش هاكا كيكون الانسان قبل ما يموت .. واش هاذ الحالة لي كيسميوها الناس مدخول ..! مدخول بالموت ..!

البشر هو هذا .. كتغريه الدنيا حتى كينسى دينوو و علاش هو تخلق لهاذ الدنيا من الأساس .. كتغرو قوتوو و جبروتوو و كيظن للحظة أنوو باقي مطول مدام بصحتوو ..! لكن كينسى هاذ الانسان الضعيف .. بلي الموت ما كتعرف لا كبير لا صغير و تقدر فرمشة عين تخطف منا عز ما كنملكوو ..! و فالاخير كيبقى الدوام لله وحده .. و سعداتك يا فاعل الخير ..!

الطبيب:( جبهتوو عرقات و عينيه خارجين مع الآلة .. كيدعي و يعاود .. خمسة دقائق يلا ما رجعش النبض غيخرج يعلمهم بلي مول الأمانة دا أمانتوو ..! ) يالااااه ياااالاااه ..!

للحظة تسمع صوت مجهد ضاير بيهم .. طووووووووووط طووووووووط طييييييييط .. و بدا الخط د آلة القلب كيطلع و ينزل بشكل مثلثي من بعد ما كان الخط مستقيم ..! حيد Cpr من يديه و تنهد بقوة حاط يديه على ركابيه .. و الطبيب الثاني .. هاز ملف فيديه كيكتب فيه و يراقب عدد دقات القلب .. لي كان ضعييف بزاف على الطبيعي .. و بمعنى واضح .. باقي ما نقز مرحلة الخطر و فأي دقيقة يقدر يرجع يوقف قلبوو من جديد على النبض .. و يمكن هاذ المرة للأبد ..!

بعد ما عقم يديه و غسل وجهوو .. محيد لبافيط و ليكات .. خرج عند حبيبة و ولادها لي شاعلة العافية فيهم .. كيمشييو و يجييو فبلاصتهم و دم٠هم كيغلي بالخوف .. منين استقام الخط ما خرج عندهم شي حد يطمنهم ..! يلا كانوو وجوههم كيوحييو بشي حاجة .. غيكون .. الخوف .. الذعر .. الحزن .. الألم .. الانهيار .. و الامل ..!

شافوو فيه بلهفة و قربوو جهتوو بركابي خاويين .. باغيين يسولوه و ما قادرينش .. على الأقل دابا عندهم امل و لو يكون بنسبة 1% و لكن منين غيهضر واش غيبقى هاذ الأمل مضوي عتمة قلوبهم ..؟

طبيب:( شاف حالتهم و تنهد مشابك يديه و بجدية قال ) باش نحطكم فالصورة .. المريض لحد الساعة ما عرفناش شنوو عندو .. حالتوو غير ما كتزيد تتظهور كثر و كثر .. كاع التحاليل و لي سكانير لي ممكن يتدارو درناهم و كلشي مزيان ..! عندو ديكالاج كبير فالسكر و الطونسيوو كنحاولوو نقادوهم .. سخانة و تنفس ضعيييف لدرجة قلبوو توقف و رجع للنبض بصعوبة كبيرة و ما غيكونش فصالحوو نهائيا يوقف مرة اخرى .. نقدرو نخسروه فدقيقتوو ..! ( سرح يديه و كمل ) فاش وصلتيه لعندنا كان مغيب بكريز ديال السكر .. للأسف هو من الحالات لي صعاب علينا نشخصوهم .. و لكن حنا دايرين كل ما فجهدنا و حتى نتوما عاونونا بالصبر ديالكم ..! سي امغار باقي فحالة الخطر .. و 72 ساعة لي جايا هي لي غتحدد مصيرو ( بأسى ) و لكن وجدو راسكم لجميع الاحتمالات ..!

حبيبة:( ردات بحرقة ما عالم بيها غير الله ..! دموعها كيتسرسبوو بلا حساب ) نوجد قبري قبل من قبرو .. نكفن راسي بيدي قبل ما نشوف ضو عيني طافي ( عنقات محمد أميين مرمية على صدرو كتشهق ..! ) قلبي كيتقطع على ولدي .. واااااا حكيييييم ا محمد أميين .. حكييييم فرحة عمري .. تولي بين ليلة و نهار حرقة سنيني ؟ شنوو درت حتى يكتاب عليا هاذ المكتوب .. فاش قصرت و شمن ذنب صرفتوو فحياتي حتى يخرجلي فكبدتي ..!

بقات تبكي و تهضر بحرقة حتى سخفاتلوو بين يديه .. عينيها مشدودين و كيدمعوو و صدرها كيطلع و يهبط برجفة ..!

****************************************

اللهُ أكبرْ , اللهُ أكبرْ . اللهُ أكبرْ , اللهُ أكبرْ

أشهد أن لا إلهَ إلا الله. أشهد أن لا إله إلا الله

أشهد أن محمداً رسولُ الله . أشهد أن محمداً رسول الله

حيِّ على الصلاة . حي على الصلاة

حيِّ على الفلاح . حي على الفلاح

الصلاة خير من النوم ، الصلاة خير من النوم

اللهُ أكبرْ . اللهُ أكبرْ

لا إله إلا الله

على صوت أذان الفجر ضرباتها الفيقة .. كلها عرقانة و كتلهث بحال يلا كانت كتجري ..! ضورات عينيها فالبيت بخوف .. و شعلات الفايوز حداها مضوي عليها و هي شادة على قلبها ..! كتفكر الحلمة لي حلماتها ..!

ناعسة شريفة مكفنة فوق زربية واسعة .. وجهها منور و كحولة خفيفة ضايرة بعينيها لي مفتوحين فالسقف ما كيرمشوو ما كيتحركوو .. ريحة العود عاطية من المبخرة تحت رجليها فالصالون د الرياض ..! الداخل و الخارج عليها .. البكى على الجهد و لي جا كيبوسلها راسها و يتسامح معاها ..!

تهزات فصندوق حاطينها فسيارة الموتى غاديين بيها للقبر .. و هي كتغوت و تعاود باش يخرجوها من تما .. و بلي باقي عايشة .. لكن لا حياة لمن تنادي .. صوتها ما كتسمعوو غير هي لي عقلها بغى يخرج من بلاصتوو و الدموع فعينيها مغرغرين كتشوف نهايتها ..!

تدفنات و سقاو قبرها بما زهر .. كيقراو عليها لي كتب من القرآن ..! و هي فالظلمات كتناجي ربها و كتقاتل باش تخرج حتى طلعات الروح لمولاها ..! و تما تجازات بالجنة .. و فطريقها شافت شخص واقف مغطي وجهوو بعمامة و لابس عباية لونها كيحمق .. كتبان منوو غير لحيتوو لي كحححححلة ..! مدلها تشرب من يديه لي بووووويض كي الجبن ..! يالاه قربات تشرب ضرباتها الفيقة مخلوعة ..!

شريفة:( برجفة) ياااااا ربي خيير .. يااااا ربي ..!

الحزن مخيم عليهم .. حبيبة لي بقاو معاها حتى فاقت و توكضات .. سكتوها بصعوبة .. كيصبرو فبعضياتهم و كيتسناو شي خبار تفرحهم ..!

جالسة هي و ملاك فوق الكراسة سخفانين بالبكى .. الجهد ما بقالهمش ..! و الدراري كل واحد فين واقف كيتنهد بحرقة ..! حتى فتحات ماري عينيها المنفوخين و قالت

ملاك: هاذشي لي وصل ليه خويا ما يكون غير من خدايم كريمة .. ما دام كلشي عندو مزيان و ما عرفوو منين يجيوه .. يعني هي مور هاذشي .. و يعلم الله شنوو دارتلوو ثاني ..! ( شافت فحبيبة بعتاب و كملات ) عيينا نهضرو معاك ا ماما و نتي ما كتسمعيش .. بقات حتى وصلاتوو للفراش و ماشي بعيد تقت

ما قدراتش تكمل الكلمة .. الموت و لا بحال شي غمامة كحلة كتضور فوق ريوسهم كتخنق فيهم شوية بشوية ..! حطات وجهها بين كفوفها كتبكي بحرقة و شهقاتها كيقطعوو فالقلب ..! و فنفس اللحظة توسعوو عينين حبيبة و ظلاموو ..! وقفات على غفلة وجهها مزير و مخنزرة واااحد التخنزيرة ديال خزيييت ..! بحال يلا عاد تفكراتها ..! شافت فعدنان و قالت بصرامة و بحة د البكى ..!

حبيبة: نوض دااااباا وصلني لدارهم ..!

سبقاتوو كتطير خارجة .. مخلياهم غير كيشوفوو .. بالجرا تبعها عدنان .. لقاها واقفة حدا الطونوبيل كلها كتفيبري بالأعصاب و يديها كترجف .. شوية ما طيح لهم تما بكريز ..!

فتح لها الباب و ركب تا هو .. مقلعيين فسكاااات .. هو مهمووم و كل شوية كتخرج تنهيدة حارة من صدرو حتى كيتهز و يتحط .. و حبيبة دموعها نشفوو و حرقتها ما بغات تبرد .. غير ما زايدة كتاكل فيها و مع وقف حدا العمارة فين كاينة كريمة .. هبطات كتجري .. طالعة فالدروج كتنهج بعينيه شاعلين ..!

الصباح بدا يطلع و الشمش بدات تشرق و هي كتضرب فالباب بيديها و رجليها كتغوت ..!

حبيبة: حلي ا العددددوة .. حلي ا القاطعة يدييك من يديين الرحمة .. حلي ا السحاااارة القتاااالة .. الله ياخذ فيك الحق .. حلووو ..!

تفتح الباب تا كانت غتجي مزدوحة ..! شافت فأب كريمة .. لابس كندورة فالابيض شعرو شايب هو و لحيتوو .. باين فيه موقر .. درويش و داخل سوق راسوو .. و لكن هي هاذ الساعة ما بقى كيبانلها حد .. من غير ولدها لي بين يدين الرحمان ..!

حبيبة: فيين هي داك المووسخة .. القتااالة ديال بنتك .. العرووبية الخانزة ..!

خرجات كريمة لي بزز بغى يديها النعاس من بعد ما دار الدوا المفعول ديالوو و بردات عليها الحكة شوية ..! و حداها امها لي مضهشرة بالنعاس تا هي ..!

طارت جهتها عوالة تغززها بسنانها و فآخر لحظة شدها عدنان مبعدها .. و التشريطة لي كانت غتجي فكريمة جات فيه فنص حنكوو ..!

عدنان:( شادها و هي كتهز و تحط بين يديه ) الواليدة تهدني ..!

حبيبة:( ردات بحرقة عينيها خارجين فكريمة و الدموع بداو يتغرغرو و ينزلوو كيحرقوو فحناكها ..! ) قوليلي غير فاش اذاك داك الولد ؟ ( شهقات بالجهد و هضرتها مرعدة بالبكى ) أنااا فاش آذيتك باش تحرقيلي كبدتي ؟ درتك بنتي .. دخلتك لداري .. وكلتك طعامي .. هزيتك على كفوف الراحة و لي طلبتيه يجي تال عندك ( ضربات على صدرها بالجهد ) ولدي عاديتوو على ودك .. ولدي تغاوت معاه عليك ..!

كريمة: خالتي يانا

حبيبة: نتي بنت الحرااااام مقطرة .. نتي سووووسة و دخلتي لحيااااتنااا ..! بقيتي تابعة داك الزبل حتى خرجتي علينا كاملين ( فشلات و طاحت على كتف عدنان ) ارتاحيتي دابا فاش سيفطتيه ناعس كومة ؟ كل ساعة كنقولوو ها هما غيخرجوو و يقولونا ( عضات على فمها كترعد ) البركة فراسكم من جهة الغالي ..!

عدنان:( قال بلا ما يشوف فيهم .. منزل عينيه غير ف موو ) حكيم ناعس فالكلينيك فالخطر و الاطباء ما عرفوش شنوو عندو و حاروو فيه ..!

حبيبة:( ردات بحرقة ) نتي سبابوو .. عيى يجمع يجمع و ها هو طاح طيحة وحدة ( شافت فعينيها و القهرة كتهضرها ) حتى نتي حاملة و يلا كتاب عليك غتهزي بنتك بين يديك و غتعرفي الكبدة شحال صعيبة ( بحقد ) أنا بغيييتك عمرك طفريييه فحيااااتك و لا تفرحي ببنتك .. كيفما حرقتيني و حرقتي خوتوو عليه و خرجتي على حياتوو .. بغيت ربي يعطيهالك متابعة و عمرك تشوفي الضو و النهار الزين و نتي عايشة .. كيفما باغى ترزيني فولدي و مخلياه طايح هاذ الطيحة .. الله يرزيك فبنتك و صحتك و عز ما عندك .. الله ياخذ فيك الحق ( شافت فواليديها لي واقفين مشعوطين و قالت ) الله ياخذ فيكم الحق .. الله ياخذ فيكم الحق .. حسبي الله و نعم الوكيل ..!

خرجات و خلاتهم ساكتين واحد كيشوف فالثاني .. اما هي هابطة فالدروج كتمايل بحال السكرانة .. الرجلين كيلعبوو تحتها بحال العجينة ما شادينش حتى راسهم ..! دموعها ما حبسوش و فمها كيترعد و هي كتعاود ف " حسبي الله و نعم الوكيل فيكم " ..!

عدنان:( شاف فالأب و تنهد بحزن و قال ) حكيم بين الحيا و الموت يلا كانت بنتك دارتلوو شي حاجة و عارفة باش نعتقوه .. تهضر و تعاوننا .. يلا ماشي عليه .. على بنتهم لي جايا فالطريق ..! ( عض على فموو غالباه البكية و شحال صعيب يشوف حكيم فداك الحالة ) كنرغبك هضري ا كريمة .. ما تحرقيش قلبنا عليه كثر ما هو محروق .. يلا صرف فيك شي خير .. خليه يشفعلوو عندك هاذ النهار .. ريحينا و ريحيه من العذاب الله يرحملك الواليدين ..!

الأب:( شاف فبنتوو وجهوو حمر و الدموع مغرغرين فعينيه .. ما لقى جهد و مغلوب على أمرو حتى هو ..! ) هضري ا بنتي و قولي لي عندك ..!

كريمة:( ساهية فالارض و الدعاوي د حبيبة كيتعاودو فوذنيها .. داخلين معاها بحال السيف ..! ) ا با ..!

هزات راسها فيهم وجهها مكبص .. دخل معاها الصح من حالة حبيبة و عدنان لي ما شافش فيها فخطرة .. و بتردد قالت و الدموع بداو يغلبوها ..!

كريمة: يانا كاع ما نويت يكعد فالطبيب .. يانا كنت سايرة نضور باش نجمع شملنا يانا و مولا داري و نكعدو هانيين فموضعنا ..!

عدنان:( رد بنفاذ صبر حاني عينيه للارض خصوصا ما دايراش فولارها .. خارجة عندو بشعرها ..! ) شنوو درتي ما عندناش الوقت ؟

كريمة:( حنات راسها من نظرات باها لي كيقولوو بزاف ..! هو حشم منها و من فعايلها ..! ) عبد العالي لفgيه لي كنت سايرة نمشي عندو .. gاد ليا لحم مكتوب فيه و gالي نديرو فخرgة نخزنوو تحتي ليلة و الغذ ليه نطيبوو و ياكلوو و يانا درتولوو فالطعام ديال خالتي .. هو gالي غيرجع ليا و يتكعد ميموني يانا و ياه و نطرgوو مسايلنا بجوج .. يانا ما عرفتش ( بدات تدخل و تخرج فالهضرة من بعد قلباتها بكى ) ..!

عدنان:( زير على يديه حتى زيرهم و بانوو عروقوو .. هز عينيه و شاف فيها و هو عايفها و رخى النفس بالجهد ..! ) حسبي الله و نعم الوكيل ..!

شاف فباها و حرك راسوو بلا حولة و لا قوة الا بالله و خرج من تما لحق على حبيبة لي لقاها متكية على باب الطونوبيل غتسخف بالبكى ..!

عدنان:( تنهد بقوة و نوضها معنقها .. حتى ركبها فبلاصتها ) الله يهديك الواليدة على راسك ..!

حبيبة:( ردات ببحة فمها مفتوح و عينيها ذابلين ..! ) أنا السباب .. أناااا ..!

《 إياك أن تؤذي روحا لا يسمع أنينها إلا الله 🌹 》

سكت و سكتات حتى هي حاضية الطريق و عينيها عشرة من العين .. كتبكي و تعطي لقلبها و تقول ما عطيت ..! دخلوو للكلينيك و بلهفة قربات حبيبة من الزاجة كتشوف فحكيم لي ممدد و فاتح عينيه هاذ المرة و الاطباء ضايرين بيه كيهضرو معاه و هو كيحرك غير صبعوو بلا او يغمض عينيه باه .. لسانوو ثقييل عليه ..!

حبيبة:( بفرحة قالت كتعنق فمحمد أمين ..! ) فاااق ؟؟ فاااق ؟ كي بقى دابا ؟ شنوو قالوو لكم ؟ نقدرو ندخلوو لعندو ؟ عرفوو شنوو بيه ..!؟

محمد أمين: يالاه فاق دابا و مزال ما عرفنا واش نقدرو نشوفوه .. و يمكن غينوضوه يعاودولوو لي سكانير ..!

عدنان:( شاف فيهم كاملين و ضرب يد مع يد و قال ) انا عارف شنوو عندو ..!

شافوو فيه كاملين جامعين حجبانهم .. حتى بدا كيعاودلهم على شنوو وقع فدار كريمة و الحوار لي ضار بيناتهم من بعد ما خرجات حبيية بحالها ..!

دمهم غلى و هما كيسمعوو الدنائة و العفن فين وصلها و ملاك حاطة يديها على فمها و هي كتفكر كن لثانية هزات اللحم و شافتوو غتعرفوو فاسد و ما غتوقع حتى حاجة لحكيم .. لكن المكتاب حكم و القدر قال كلمتوو ..!

ضرب محمد أميين يدو مع الحيط حتى فرعها .. و خليل حداهم كيمشي و يجي فبلاصتوو مجبد شعرو غيقلعوو من الجذر ..! أما حبيبة بحال سطل د الما و تكب عليها .. جامدة فبلاصتها و كلشي كيرجع لها و كتندم فراسها بلي هي سباب ولدها .. هي لي راسها حجر و ما كتسمعش الهضرة ..!

خرج الطبيب لي شاف فيهم بأسى و حرك راسوو بالنفي .. بمعنى ما كاين حتى جديد من غير فتح عينيه و الخطر باقي عليه ..! لكن الجديد كان عندهم هما نيت .. و بلهفة قال عدنان و محمد أمين دقة وحدة ..!

عندنان و محمد أميين : خاصنا نهضرو معاك ضروري ا دكتور ..!

دكتور:( حرك راسوو بالايجاب و قال ) اجييو معايا ..!

*************************************

ضرباتها الفيقة فالصباح بكري .. من الفجر و هي كتتقلب ما بغاش يرجع يديها النعاس فخطرة ..! هزات تيليفونها كتقلب فيه واش تلقى شي مسج و لا ابيل فاتتها من حكيم بلا ما تحس .. لكن ما لقات والوو ..!

قلبها مخطوف .. خصوصا مع الحلمة لي حلمات .. عارفة حكيم ما كيهزش التيليفون بزاف و ما عندوش مع الهضرة الكثيرة و لكن القليلة يسول على نهارها كي داز و كي وصلات للدار و شنوو دارت موراه .. غير من الصواب ..!

ميلات راسها و دوزات لابيل ليه هي .. لكن كترجع فالبلاصة بمخاطبكم مشغول حاليا ..!

شريفة:( عقدات حجبانها كتسوط ) اوووف احكيم اوووف .. زعما يكون ديشارجا ليه و ما انتابهش .. بلاتي و نرجع نعيطلوو على ما يفيق .. العيى قهرو باينة .. و لا نسجلوو اوديوو حسن ..!

تشاورات مع راسها و دخلات كتسجل ليه اوديوو .. ببحة صباحية و صوت كسلان ..!

شريفة: صباااااحوو ا النعاس ..! أنا فقت و نتا خامر .. هاذشي كولوو عيى هههه ؟ ايوا ما عليش جات معاك ا سيدي .. خوذ راحتك ..! المهم ا حكيم .. عيطلي ضروري فاش تسمع المسج راه قلبي مخطوف .. ما تخلعنيش ..! آلي " يالاه " بييزو ..!

سيفطاتلوو المسج و ناضت ..! الخاطر مغير و واحد الخنقة شاداها باغى تتطرطق و المصيبة هو ما عارفاش علاش .. باغى تبكي و ما قادراش ..! لقات غير التخمال تبرد فيه جنونها ..! أسية ناعسة و هي كتفرك و تعاود .. ما خلات لا ركاني لا قناتي ..! كلشي نقاتوو حتى رجعات الدار كتلمع ..!

زفرات النفس براحة .. خوات داك الطاقة السلبية لي كانت عندها و دخلات لبيتها كتقلب فحوايجها شنوو تلبس .. حتى فتحات بلاكار صغير فالارض .. مستفين فيه قراعي د الشراب ..!

عينيها تفيكساو عليهم .. تنفسها تزاد و ذاتها بدات كترجف .. و عقل باطني كيقولها هزي قرعة منهم و خوذي غير كاس .. ما دا ما جاب ..! بلعات ريقها بصعوبة و زدحات داك الباب بالجهد و من تما نيشان للحمام ..!

جمعات شعرها سفنجة للفوق و حيدات حوايجها كاملين .. حاطاهم فوق لافابوو .. كتمشى فالارض بالحفى و يديها محطوطين على جناب عينيها كتماصي راسها لي عاطيها الحريق ..!

طلقات الما فالبانيوو .. زادت معاه أملاح معدنية و زيوت طبيعية باش يمصها لحمها و يشربها مزيان .. و فالاخير كبات باندوش ديالها بسخاوة و يديها كتحرك فالما .. حتى رغوى مزيان و تخشات وسطوو ..!

مغمضة عينيها و مرخية وسط الما .. كتبان هادئة و مسالمة .. مرة مرة كتلعب فالرغوة بيديها .. خذات وقتها الكافي لي ترتاح فيه ..!و كتحاول ما تفزكش شعرها ما باغاش تغسلوو ..!

حركات عنقها بحركات دائرية و يديها خداميين كيماصييو فرقبتها و يطلعوو تال وذنيها كتحك جنابهم و تدوز يديها على وجهها .. هابطة لصدرها و ذاتها كاملة .. كتدير مساج خفيف .. منها لحمها يتجمع ما يبقاش مرخي و منها يشرب لي برودوي لي فالما ..!

وقفات بالشوية عليها باش ما تزلقش و طلقات الما يخوى من البانيوو .. كتشوف فظفران يديها و رجليها لي مصبوغين بفرانش خفيف .. بابتسامة هادئة .. و هي كتلبس البينوار ديالها .. فالغوز بيبي حد الركبة و لور مكتوب فيه شريفة بالذهبي ..!

فتحات الكوافوز د الخشب قدامها و جبدات طاسة صغيرة مع الشيتة ديالها و ساشي ديال ماسك د لافوكا ..! و بانسوو رقيق فالراس ديالوو دائرة ..! كتدوزو على نيفها و تبرك مركزة كتحيد لي بوان نواغ من تما و من جناب فمها ..!

غير كملات فتحات الساشي د الماسك .. خلطاتوو فالطاسة و دارتوو لوجهها و هزات دي بوند فالذهبي كيلصقوو .. لسقاتهم تحت عينيها على ود لي سيغن ..! رطبات يديها مزيان بكريمهم هما و رجليها .. باش ما يحراشولهاش بلي بخودوي ديال الكوزينة و التسياق ..!

و ما نساتش لحمها حتى هو .. جبدات كريم د الكوك خاص بيها .. و بدات كتذهن و تماصي .. من رجليها و هي طالعة للفوق ..!

كملات و ردات كلشي لبلاصتوو عاد خرجات .. لبسات دوبياس ديالها فالكحل و بينوار ساتان فالاحمر حد الركبة ..! شافت فالساعة لقاتها يالاه الثمنية و نص ..! و بنفس مفتوح مشات للكوزينة ..!

عصرات لوغونج و دارتوو فكاس كبير فالتلاجة كيبرد ..! و بالخف طيبات لي كخيب بالشكلاط و البانان خدات حقها و خلات لأسية منين تفيق ..! شافت الساعة لقات بلي كمل الوقت للماسك .. حيدات لي بوند و غسلات وجهها مزيااان .. نشفاتوو فرحانة بيه كيبان نقي كيلمع و رجعات تكمل فطورها ..!

قلات البيض و كبات عليه زيت بلدية و زوقات بالزيتون كحل ..! حمرات الخبز فبانيني و حطات الكاشير و الفروماج و الزيتون مسلالة ..! عصرات كاس د القهوة معطرة بالعشق ..! و هاكا كملات بلاطوها .. و فالجنب حاطة وريدة فالاحمر من البوكي د الافتتاح ..!

شربات من قهوتها حاطة رجل على رجل فالبالكون فين عندها جليسة كتهبل بالكراسة ديالها .. كتطل على الجردة ديال العمارة .. السكات كلشي باقي ناعس .. قليل فين كيضور شي واحد .. الصيف هذا الاغلبية كيفيقوو من 11 للفوق ..!

حداها مبخرة ديال العود عاطية ريحتها .. الريحة لي كتدخل لاعماقها و تنعشها كثر و كثر .. يلا كانت شريفة كتحماق على شي ريحة غتكون العود الاصيل ..!

فطرات بالشوية عليها كتمذق و تسرح عينيها فالخضورة و المناظر لي مقابلة معاها ... توحشات تجلس بوحدها و تتصنت لعظامها .. توحشات دارها و ركانيها و حريتها فيها ..!

شريفة لي تكون واصلة فيها للعظم كتنوض و تتهلى فراسها .. و تعطي لنفسها وقت فين ترتب افكارها و تشوف راسها فين غادية و شحال ما تخربقوو السلوكة د حياتها كتحاول ترجع ترسم طريق جديدة لي تسلكها ..!

ما كتحملش تشم شي ريحة خايبة فيها و لا الناس يلاحظوو عليها ..! و شحال كتجيها قهرة فاش كيجيها التبول لا ارادي و كيكون معاها حكيم .. كتبغي الارض تشق و تبلعها و ما تبقاش حداه .. واخا هو عندو هانية و ما كيحكرش ..!

خذات وقت طويل مع راسها كتكافئو على صبرو معاها فمحنتها ..! و بعدها بدلات عليها بلباس سبورتيف باش تتحرك بسهولة ..! خرجات دايرة النظاظر د الشمش على عينيها و الكاسكيط فوق راسها .. من بعد ما علمات اسية و وصاتها على راسها و على الدار ..!

طالقة الموسيقى فالطونوبيل كتدندن معاها و مكسيريا فالطريق .. ما وقفات تال الصالون عندمن صوبات شعرها و ظفرانها .. دخلات بابتسامة كتسلم على البنات لي تما .. بما أنها ولات كليانة مهمة عندهم ..!

شريفة:( بهدوء قالت ) كاينة مدام سهام ا الزين .. بغيت نحيد ليزيكسطونسيون دالشعر و ندير شي كوب ..!

....:( ردات عليها بلطافة ) تفضلي معايا لهنا .. شوية و تهبط عندك ا مدام ..!

شريفة: ميغسي ..!

جلسات فالكرسي حدا المرايا كتضور فعينيها و كتوزن البنات و المحل غير من لتحت للتحت .. حتى جات سهام مولات الصالون لي بيديها كتصاوب لها .. تسالموو و شرحاتلها شنوو بغات و بدات لها فالخدمة و هما مجمعين مع بعضياتهم ...!

شريفة: عرفتي ا سهام .. عندكم كلشي غزاااال .. لا التعامل ديال البنات مع الكليانات لا لي برودوي باش كتخدموو لا كلشي .. من غير حاجة وحدة لي ناقصاكم و تولييو مخيرين ..!

سهام: لي هي ..!

شريفة: خاصكم تديرو كولابوغاصيون مع شي ريسطوو .. يبقى يوصل لكم الماكلة تال عندكم .. هاكا حتى الكليان غيرتاحوو و يعجبهم الحال .. تاخذي ميكرو أند تبقاو تسخنوو فيه و تحطوو للناس .. بحال دابا انا حلقي نشف بغيت غير شي عصير نبرد بيه و والوو .. ما تلقاوهلي حتى نسخف .. و كن لقيتوو عندكم ما غنفكرش جوج مرات و ناخذو واخا يكون الثمن زايد على برا ماشي مشكل ..!

سهام:( دخلات لها الفكرة للراس ) و لاهيلا مخيرة هاذي عندك .. و نزيدوها عندنا حتى فالباج د الفيسبوك و الانسطا .. باش كلشي يبقى على بال .. ناخذو الكوموند لي نحتاجوو فالنهار بلا ما نضيعوو فيها و تبقى لنا فيدينا .. و لي بغات شي حاجة تخلصها ..!

شريفة: فوالا هاذشي لي كنهضر عليه .. و دابا تشوفي يلا ما تزادولك الكليان كثر ...!

سهام: و كتعرفي شي ريسطوو مزيان و ثقة نتعاملوو معاه ؟

شريفة:( هزات حاجبها و بتبسيمة عريضة جبدات كارط فيزيط ديال الريسطوو ديالها و مداتولها ) بيان سيغ ..! هذا الريسطوو ديالي .. يالاه البارح بدينا الخدمة .. كلشي جديد و نقي كيلمع و حيث نتي عزيزة غنديرلك بروموسيون ناضية .. غنقصلك 10% من الثمن .. و هاكا بجوج بينا رابحين .. شنوو قلتي ؟

شريفة: غنقصلك 10% من الثمن .. و هاكا بجوج بينا رابحين .. شنوو قلتي ؟

سهام:( ردات بالايجاب ) حسبيني ا لالة كليانة عندك من غذا .. غير يكون المذاق حاضر و ما تساليني كاع لي كنعرف نسيفطهم لعندك .. بعدا ليفرور كاين لي يوصلنا الماكلة تال لهنا ..!

شريفة: كاين الله اودي ( شافت فلي حداها و قالت بابتسامة ) حتى نتوما ا البنات مرحبا بيكم عندي فاش نكون خارجة نخلي لكم الكارط فيزيط د المحل .. غير اجييو و قولولي حنا من جهة مدام سهام و مرحبا نتوما و معارفكم ..!

الكل: ربي يخليك ا الزين ..!

دخلات مراة مع باب الصالون كتسلم و تسوط من الصهد .. جلسات فالفوطوي مور شريفة و سهام .. لي سلمات عليها و قالت ..!

سهام: فين هاذ الغيوب ا ختي ..!

....: غير جري عليا نجري عليك .. اودي سكتي و خلي داك الجمل راكد .. الصبر و صافي .. هاذ الثلث شهور فين كنضربوو يدينا .. باش نلقاو ما ناكلوو فالعام كامل ..!

شريفة:( ردات بتدخل ) هاذي هي الدنيا و حلاوتها .. اما يلا كنا لي حلينا عليها فمنا كنلقاوها بلا ما نتحركوو كلشي غيبسال فعينينا ..!

....: عندك الصح ا بنتي .. ايييوا الله يعاوننا عليها هاذشي لي يقول الواحد ..! ( عبراتها بنص عين و شريفة حاطة عليها ..! ) انا نكافة عندي المحل ديالي غير هنا .. النكافة الحسنية غتكوني سمعتي عليا ..!

شريفة:( ضورات عينيها و رمشاتهم بالشوية عليها .. عمرها سمعات بسميتها و لا محلها .. و باقى جديدة فالمدينة ما كتعرفش بزاف ) الله اودي .. كلشي كيشكر خدمتك و لي ما عرفك خسرك .. الدار الكبيرة ..!

....:( فرحات و تزادلها كراد ) الله يحفضك ا الزينة .. و السيمانة الجايا عندنا شوتينغ ديال القفطان المغربي .. انخرجوو كوليكسيون جديدة انا و ختي .. ختي خياطة و لا نقولوو مصممة .. العروسة كنجهزوها بكلشي بميكتوو من عندنا .. ا راك غير نفرحوهم .. قولي بعدا اش سماك الله ..!

شريفة:( ضحكات و قالت ) كيقولولي شريفة ..!

....: تبارك الله .. تبارك الله ..! اييوا ا لالة شريفة تخدمي معايا فهاذ الشوتينغ .. كانت ناقصاني وحيدة هانا لقيتها و راه سهام تعاودلك عليا .. الدق و السكات ما كاين غير الخدمة و هي نيت لي كتقادلكم المكياج و الشعر .. ما عندكش مناش تخافي و حتى الثمن نتفاهموو فيه ..!

شريفة:( ضوراتها فعقلها مزيان و قالت ) و كتدوزو النهار كامل فالشوتينغ ؟

.....: واه .. على ما يوجدو البنات و يجي الكاميرة مان .. و يوريكم لي بوزيسيون و تتدربوو عليهم .. و لكن ما كنتعطلوش يلا طولنا السبعة د العشية كنكونوو مساليين ..!

شريفة:( بابتسامة ردات ) و بعدا دايرين مع شي ريسطوو يجيبلكم باش تعتقوو الروح .. اونبورطي و لا والوو ..؟

.....: الصراحة لا .. الشوى و الكوا فالاثمنة فهاذ الجوايه .. كنعلموهم يجييو معرقينها فالفطور و تا يمشييو بحالهم و يتعشاو و لا يتغذاو شغالهم هذاك و كاينة لي كتجيب معاها ماكلتها و كتاكل فالبوز د الغذا ..!

شريفة: اييوا شنوو بان لك ا لالة حسنية .. فشي بروموصيون من عندي .. و شحال ما كان الطلب كثير شحال ما غنقص لكم فالثمن .. و غير على وجهك العزيز لي دخللي لقلبي بحال نسمة د الغربي و انا كنشوفك من لهييه جايا للمحل ..!

.....:( ردات بدهشة ) علاش نتي فاش خدامة ؟ عندك شي ريسطو ؟

شريفة:( بضحكة قالت ) انا هي مولات الشكارة ههه لي كتكون قد البرميل و غير مدلية شنايفها و هازة حجبانها للسما بحال الشي٠طان .. حتى حاجة ما عاجباها و قانعاها تضور و تنكر ههههه

.....: ههههه حاشة .. باينة فيك مبشورة .. و فين عندك المحل ..!

شريفة:( شافت فسهام لي خدامة لها فشعرها .. مداتلها كارط اخرى عطاتها للنكافة ) ها العنوان بالضبط و لكن كاينة ليفغيزون يوصل لك لي بغيتي تال بين يديك و على حسابنا .. نتي خلصي غير الكوموند ديالك .. و راه باج د الانسطا ديالنا حاطين الموني كامل تما .. كل سيمانة كيتبدل و كنحطوو الجديد .. دخلوو اختارو لبلى " الطبق " لي غمز معدتكم .. و مرحبا بيكم ..!

شريفة: ختارو ل بلى " الطبق " لي غمز معدتكم و مرحبا بيكم ..!

....: الله يكبر بيك ا الزينة .. ها نمرتكم عندي قبل من الشوتينغ نعيط و نرصي معاكم الامور ..! و قوليلي نتي .. تكوني معانا مودل ؟ تصاورك فالحفض و الصون و كلشي مستور .. غيتحطو فواحد المجلة كنتعاملوو معاهم و عندنا فالكاطالوغ ديال المحل ..!

شريفة:( تحمسات نوعا ما .. أي حاجة تزيد بيها للقدام غتفتح يديها بجوج باش تستقبلها ..! لكن ترددات شوية قبل ما تقبل و برزانة قالت ) صافي بليزيغ نخدم معاك و الله .. انفكر و نرد عليك و ضروري ما نتشاور حتى مع الموسيوو ( ضحكات ) راك عارفة ..! المهم تقدري تخليلي نمرتك حتى يلا احتاجيت شي لبسة نجي لعندك ..!

....: بكل فرح ..!

قلبوو هضرتهم فمنحى ثاني حتى كملات سهام لشريفة شعرها .. قطعاتوو قصير حد وذنيها هابط شوووية على عنقها لا غير ..! كوب كاغصون مديكرادية ..! جات مع الفورمة ديال وجهها و بينولها كثر و كثر ..! حمقها و دالها العقل حتى بغات تغوت بالفرحة .. ما تخيلاتش يطلع هاكا ..!

شريفة:( بثباث قالت و الضحكة من الوذن للوذن ) تبارك الله عليك و على هاذ اليديدات لي كيخرجوو الذهب .. حمقني و الله ( شدات فيديها و زيرات عليها ) ميغسي بووكوو ماشيغي ..!

سهام: بصحتك و راحتك ..!

شريفة:( شافت فالنكافة و قالت و هي كتهز ساكها ) يالاه ا تووت .. التيليفون بيناتنا ..!

خرجات معاها سهام حتى للاكيس .. خلصات و شابكات يديها بجدية ..!

شريفة: فبحال هاذشي ما تنساينيش .. فينما كانت شي نكافة و لا شي وحدة عندها شي شوتينغ و لا مناسبة صغيرة تفكريني و شحال ما كان الطلب كثير شحال ما غنتهلى فيك ..! و الحساب صابون بيناتنا ..!

سهام:( حركات راسها بالايجاب ) كوني هانية .. كنعرف بزاف بحال حسنية كنخدم لهم .. فينما تبان شي همزة انا معاك و حتى نتي ما تنساينيش ..!

شريفة: هاذي بلا هضرة بلا كلام غير تهناي من جهتي ..! يالاه نخليك .. عاد غنمشي نشوف المحل و نوقف عليهم .. نهارك مبروك ..!

*****************************************

طبيب:( عينيه خرجوو فاش سمع هضرة عدنان و محمد أمين و بانفعال قال ) هاذي راه قتااالة قاطعة يديها من رحمة الله ..! يلا نتوما سمحتولها انا واجبي غيخليني نعيط للبوليس و نعلمهم .. راه محاولة قت٠ل ..!

محمد أمين: لي مهم دابا عندنا هو حكيم ا دكتور .. دير لي فيديك باش حالتوو تتحسن و منين يفيق عطينا التقرير ديالك .. ديجا دافع دعوة د الطلاق .. يزيد التقرير فالملف ..! و يلا بغى يدعيها فالجنايات راه غيدعيها ..!

طبيب: اكييد غنكتب تقرير مفصل على حالتوو .. المهم المريض دابا غندخلوه للعمليات .. نديرولوو غسيل المعدة و غيبقى ناعس فالانعاش واحد الاسبوع على الاقل .. خاص يبقى تحت المراقبة ديالنا ..!

عدنان: يكون خير ان شاء الله ..!

طبيب: لي زاد أثر عليه و كيفما قلتيلي شرب الحلاوة بزاف .. عند بالكم الطونسيوو لي لاعب عليه .. و لكن هو عندو تسمم من الدرجة الاولى بديكشي لي واكل و فالتحاليل ما كيطلع والوو حيث سحر و السحر مذكور فالقرآن و كاين ..! ( تنهد بقوة ) و هاكا كل ما خذا الحلاوة كل ما التسمم نشط كثر و كثر و حالتوو زادت تأزمات و عاد كريز د السكر لي وقعاتلوو ..!

عدنان: و شنوو المرحلة لي مور غسل المعدة ا دكتور ..؟

طبيب: يلا تحسنات حالتوو غتدخلوو عندو لمدة قليلة و تخرجوو .. غيتبع معانا الدوا لي غيعاونوو يصح .. و الماكلة غتكون مضبوطة فريجيم قاسح على حساب حالتوو ..!

عدنان:( رد بالنفي ) ضروري ما نرقيه و نجلس معاه بالساعات و غنلجئوو حتى للطب البديل .. غسيل المعدة و الريجيم ما كافيينش ..!

دكتور: ان شاء الله تتحسن حالتوو و نهضرو فالتفاصيل كثر ..!

محمد امين: و عليه نخلييوك تدير خدمتك و شكرا مرة اخرى ..!

دخلات للمحل ديالها .. هازة نظاظر الشمش فوق راسها .. وجهها صافي بلا حتى نقطة د المكياج .. مخلياه يرتاح من بعد حفلة البارح ..! كتشوف الخدمة فين وصلات ..!

الورد تبدل و رجع تحط واحد جديد كيفتح النفس .. السرباية كيضورو على الطبالي ينقيوهم و يعاوطوو كلشي .. الارض كتلمع و ريحة سانيكروا بالحامض عاطية ..! باقي الكليان ما جا و الدنيا خاوية فالصباح كاينين غير هما ..!

دازت للكوزينة لي فيها لي شاف كويزينيي لي اختارتهم بعناية و اهم شرط عندها هو النقى ثم النقى و التنظييييم ..! دارت ضورة عليهم نبهاتهم .. و مشات لبيروها لداخل .. دوزات لابيل للاستقبال هضرات معاهم يكلمولها شي دراري و بنات تما .. لي بدورهم ما تعطلوش عليها فالبلاصة لقاتهم واقفين عليها ..!

شريفة:( بجدية شافت فيهم و قالت ) بون .. المحل باقي جديد و باش يتعرف خاصو الاشهار بزااااف .. اكيد و حنا محافضين على السمعة ديالنا ..!

رد واحد فيهم و قال : شنوو المطلوب منا ا مدام ..!

شريفة:( حركات راسها و قالت ) هضرت مع الشركة ديال الاشهارات .. واحد نص ساعة و غيجيبولي البانويات فيهم اشهار للمحل بالمعلومات كاملين ديالنا .. و معاهم وراق صغار .. نتا و ياه و شي الدراري غيتزادو عليكم .. كل واحد غيقصد قنت فالمدينة ..! تفرقوو على الناس الوراق ..! هاذ الخدمة غتشدوها نص نهار .. و النص ثاني غيرونبلاصيوكم فوج ثاني و هي غادية ..!

ردو لي كلفاتهم بالمهمة : واخا ا مدام ..!

شريفة:( شيرات بيديها للبقية ) و نتوما غتمشييو للمدارس ديال الدراري الصغار لي كيكونوو فالصيف .. غالبا كيشدوهم من تسعود للربعة د العشية كيديرولهم انشطة منهم الرسم و الطبخ و العومان ( قلبات عينيها بملل ) المهم حنا ما كيهمناش هاذشي ..لي مهم عندنا هو داك الغذا لي كيجلسوه تما .. غالبا كيكونوو متافقين سوا مع طريطور سوا مع ريسطوو يجيبلهم الماكلة ..!

ردات البنت بتأييد : وي هاذشي لي كيكون حتى ختي الصغيرة مسجلينها فوحدة منهم ..!

شريفة: باغفي " ممتاز " ..! قلبت على هاذ المدارس و جمعتهم فليسط ( فتحات ساكها و جبدات الوراق مطبوعين و مداتهم ليهم ..! ) غتاخذو معاكم البلى دو جووغ " طبق اليوم " و نفس الوراق لي غيفرقوو صحابكم .. و غتقصدو هاذ المدارس وحدة وحدة .. تهضرو مع الادارة و تعطيوهم الشونتييو يذوقوو و ترجعوو بحالكم مخليين لهم المعلومات كاملة ..! كنظن كلشي مفهوم هاذ الساعة ..!

الكل: مفهووم ..!

شريفة: دونك سالينا كل واحد يمشي لخدمتوو .. بون كوغاج ..!

بابتسامة خرجوو واحد تابع الثاني و غير شدوو الباب عليها .. زفرات النفس .. حاسة براسها داخلة على حرب يا تربحها يا تربحها .. لا مجال للفشل ..! شحال من واحد مخدمة معاها خاصهم يتخلصوو فلخر د الشهر و عليها كريديات تردهم .. دم جوفها حطاتوو فهاذ المشروع و ما غترضاش ليه غير يكون فالقمة .. و كلشي كيهضر عليه ..!

جبدات قرعة د الما من الصاك هبطات عليها كتفزك حلقها .. و يديها الثانية كتجبد فالتيليفون ..! عقدات حجبانها و غوبشات فاش لقات مسجاتها باقي ما قراهم و طالعة غير شرطة وحدة فالواتس .. كتعيط و تيليفونوو طافي كيرجع فالبلاصة .. للحظة شكات واش جاتوو الحالة و بلوكاها و عيطات بالأنكووني و كان نفس الجواب .. و هنا بدا يدخل معاها الصح و تتخلع ..!

شريفة: حكييييم ...! واااا فينك ا صاحبي .. واخا تكون من اصحاب الكهف ما غتغبرش هاذ الغبرة كلها .. راني بديت نتخلع .. ما تقلقنيش عليك الله يحفضك ..!

سيفطاتوو و جلسات كتتسنى و رجليها كيفيبرييو بوحدهم بتوثر ..! النمرة ديال ملاك مشات لها مع التيليفون القديم و ما كانتش قيداتها عندها فلاجوندا جاتها فوقت مزحوم مع السفر و التوجاد و نسات تكتبها ..! حتى من الفيسبوك د ماري من نهار عطاتوو لشريفة ما بقات دخلاتلوو و واخا هكاك سيفطاتلها مسج تما كتسول ..!

ما عندها الكونطاكط ديال حتى واحد فخوت حكيم ..! قلبات فالفيس و الانسطا والوو تا واحد فيهم ما طلع لها من غير عدنان و لي بدورو ما قبلهاش و ما شافش المسج ..!

تعصبات و طلعلها الدم .. وقفات بالزربة بحال يلا شي نحلة قرصاتها .. ما قادراش تزيد تتسنى كثر .. أكييد شي حاجة واقعة .. هاذ الغبرة ماشي عادية ..! هزات ساكها خشات فيه التيليفون و النظاظر و الكونطاكط فيديها ..! و مع الخرجة لقات جوج بنات سرباية واقفين جنب كيتغامزو شابعين ضحك ..!

مشات جهتهم بلا عكز عليها .. ضربات بجوج صباع على كتف وحدة تا ضارت عندها .. مقابلين معاها بجوج ..!

شريفة:( بنبرة جدية محمرة عينيها فيهم و حجبانها مهزوزين فالسما كطلع و تهبط فيهم ..! ) عندي الحلقة ديال جامع الفنا هنا و انا آخر من يعلم ؟؟ ياكما نجيبلكم شي كاس د العصير تبردو بيه ؟

ردات وحدة فيهم باحراج : لا ا مدام فهمتينا غلط .. غير كنت كنوريها واحد

شريفة:( قاطعاتها هازة يديها بمعنى سطوب ) هاذ الهضرة بخري بيها ا مادموزيل .. جايباك هنا باش تخدمي ماشي باش توريها .. فاش تخرجوو على هاذ الباب ضبرو مخكم .. ما حدكم عندي هنا هضرتي لي كتمشي ( بحدة ) و لي ما عجبوو الحال الباب وسع من كتافوو .. عطى الله لي يخدم ..!

ردو بجوج دقة وحدة ما حاملينش راسهم : آخر مرة ..!

شريفة:( هزات حاجبها و مع بغات تهضر شافت الكليان داخل .. مصات شنافتها و تحت سنانها قالت ) قابلوو خدمتكم ا بنات الناس و بشرو وجههكم شوية من الفهامات الخاوية ..!

.....1:( غير عطاتهم بالظهر قالت وحدة فيهم كتبركم ) الله يستر شحال هازة نيفها للسما و عاجبها راسها .. يلا كان الرزق بين يديها غير الله يقطعوو تفوو ..!

......2: قوليها لها داك الساعة فوجهها و الله ما تعطلك ...! ( باستهزاء ) حتى نتي علاش ما يعجبهاش راسها ؟ واش شايفة لاطاي عندها كي دايرة و وجهها كي صافي و كيبري بلا مكياج .. زينها قتاااال .. المحل تبيعيني انا وياك و ما نجيبوش ثمنوو و الطونوبيل ديالها شتيها كي عالية كتحمق .. عاد خطيبها و لا راجلها دايرلها كي الما القليل .. شفتوو معاها البارح بغيت نحوال .. هاذشي كامل و ما يعجبهاش راسها ؟ ايوا لهلا يزيد كثر ..!

......1: زيدي قبل ما تجري علينا .. راه الكاميرات كيصورو .. الحضية فينما مشينا .. خزييت ..!

شدات الطريق د لوطورط عاقدة حجبانها و كل شوية تتنهد ..! طالعة لعند حكيم لكازا و ربي كبير ..! واخا متأكدة غادي تتلف على الطريق و على دارو .. حيث مرة وحدة لي مشات لها لا غير .. لكن دايراها فيد الله .. و لي عندوو لسانوو ما يتلف ..!

شعلات الراديوو مدوزة بيه الطريق .. و ما تجي غير مع برنامج تفسير الاحلام ..! هزات حاجبها كتشاور مع راسها و بلا عكز عليها .. قيدات النمرة فين كيعيطوو و دوزات ليهم لابيل .. بقات شحال كتتسنى عاد قبط لها الخط .. عاودات الحلمة بالتدقيق ما نسات والوو و غير كملات لهتات و قالت ..!

شريفة: شنوو التفسير فنظرك ؟

بعد مدة صمت قال : العلم لله وحده .. هذا غير اجتهاد من عندنا لا غير .. و لكن لي نقدر نصحك بيه هو صلاتك ثم صلاتك .. الدنيا فانية و كلنا مرجوعنا لله .. عاودي وراقك ابنتي .. يمكن هاذ الحلمة جات كتنبيه ليك قبل ما يفوت الفوت ..!

سكتات كترمش بعينيها تا قطعات عليه و طفات الراديوو فخطرة ..!

حبيبة:( شافت فولادها و قالت بتعب ) دابا شنوو غنديرو ؟ الطبيب ما عندو باش ينفعوو ..!

ملاك: اللهم غسيل المعدة بعدا و لا والوو .. و حتى الريجيم غيعاونوو شوية .. خاصوو غير يحل عينيه و يتوكض ..!

عدنان:( حرك راسوو بتأييد و قال ) خاصوو يتوكض .. تما ندخل عندوو نقرا عليه القرآن .. نديرلوو الرقية بالقرآن و هضرت حتى مع واحد الشيخ معرفة .. غيجي لعندو ..!

حبيبة: و خاصوو يرجع ديكشي لي واكل ضروري .. عقلتوو على العوادة لي كنت ديت ماري عندها فاش وحلات لها شوكة د الحوت و ما خلينا ما درنالها و والوو ..!

محمد أميين: وي مالها ؟

حبيبة: كانوو عندها تا شي ناس كيتعالجوو من التوكال .. كتعود ليهم و كيبداو يردو ديكشي ما تشوفش فيه لله .. و خاص تداوم عليه ..!

عدنان:( رد بهدوء ) باش كتعود ؟

حبيبة: وا هذا عليا ..! كل وحدة و طريقتها انا مكنعرفهمش كاملين و ما عندي علم بشنوو كيديرو .. و لكن لي فبالي كاينة لي عندها قصبة كتديرهالك ففمك و كتبقى تمتم بشوية و تجر و كتخرج ديكشي و كاينة لي بالعشوب كتعطيك تشربهم .. واخا ريحتهم ما تبلعش و لكن من بعد كيريحوو ..!

محمد أميين:( شاف فعدنان و قال ) حنا عاد غنجلسوو نتشرطوو ؟ عيطيلها ا الواليدة و ديري معاها فهاذ اليوماين على ما يفيق حكيم شوية و يقدر يشرب شي حاجة و انا نمشي نجيبها بيدي .. خليل نتا و ماري طلعوو للدار ارتاحوو هاذ الليلة و غذا دوزو للدار عند حكيم جمعولوو حوايجوو باش يبدل .. التيليفون بيناتنا يلا كان شي جديد ..!

خليل و ماري:( شافوو فبعضياتهم و قالوو ) واخا ..!

محمد أميين:( تنهد بتعب .. بزز كيخرج القوة من الضعف ..! ) و نتا ا عدنان خوذ شي طاكسي و سير للفوريان باش تخرج الطونوبيل د حكيم و شوف السيد لي دار معاه الكسيدة تفاهموو ..! كنت غنمشي انا و لكن بسمة شوية و تجي .. بغات تدخل عندو تشوف حالتوو يلا خلاوها ..!

حبيبة: تا هي طبيبة علاش لي ما يخليوهاش ..!

محمد أميين: طبيبة و لكن ماشي فهاذ الكلينيك .. يقدرو يتعكسوو معاها .. المهم لي فجهدنا ها حنا دايرينوو ... غير يفيق و ما يبقاش مغيب باش يعاوننا شوية ..!

*****************************************

مهدنة و مكالمية لدرجة كتخلع .. باينة كتفكر فشي حاجة .. و عقلها بدا يبلاني عليها من جديد .. ناسية الهضرة ديال مفسر الاحلام لي شحال و هي تزنزن فوذنيها ..!

و بالفعل ما دوزاتش بزاف تا كانت عضات على فمها و عيطات لأحمد برادة .. حالفة بحلوفها تا تكرهوو فيها و يلا ما صدقش البلان لي مبلاني ليه حكيم و لي لا علم لها به .. يصدق ديالها بعدا ..!

شريفة:( بميوعة قالت ) موسيوو أحمد برادة .. و لا نقولك عمي و نيت ما بقالك والوو و تولي شيخي و ربي لي عالم راك فبلاصة بابا لي ما عنديش ..!

أحمد برادة:( الفيزيبلات ديال مخوو بغاو يتحرقوو معاها ) شريفة ؟؟

شريفة: ما تقول والووو ا عمي .. انا عارفة بلي عزيزة عليك و فبلاصة بنتك .. و بنتك شريفة واقفة عليك ( هزات حاجبها ) واقفة على واحد ربعة د المليون يلا جات على خاطرك هاذ السيمانة .. ما لقيت حسن منك يمدها لي حتى و كان تكون عندي راحنا عائلة مع بعضياتنا ..!

أحمد برادة: ك كي كيفاش ؟؟ ربعة د المليون ؟؟

شريفة:( قلبات عينيها بملل و قالت ) وي ربعة ما تجيكم والوو فالثروة لي عندكم تبارك الله و الصلاة على النبي .. كيفما شفتكم نخليكم .. و ما تقولش راني طماعة فاش تكون عندي دابا نرجعها لك و لا عرفتي شنوو ؟ نقصها من الصداق ديالي بولدك ( بميووعة عوجات فمها ) سيدي مهدجييي ..!

أحمد برادة:( رد كيتفتف ) ااء ؟ شريفة خاصني نمشي مدام خديجة كتعيط عليا .. نهضرو من بعد ..!

قطع عليها فالبلاصة مخليها باغية تفركل بالضحك ..! ضربات مسافة د الطريق حتى دخلات لكازا و اراك لسيركيلاسيون ديال الطريق .. ما كاين غير الكلاكصون و المعاطية ..!

خدمات أبليكاسيون ديال الوايز فالتيليفون و كتبات فيه السمية ديال البلاصة لي ساكن فيها حكيم .. واخا العمارات يقدرو يتالفوو لها و لكن على الاقل توصل لتما و تسول ..! علقات التيليفون حداها متبعة الخريطة د الطريق لي عاطيينها ..!

كتمشى بسرعة قليلة .. و عينيها حاضيين هنا و هنا .. عنداك تمشي تغلط و كل شوية توقف تسول واحد من العساسة .. حتى لقات العمارة ديالوو و زادت تأكدات من عند الكونسييرج لي سولاتوو عليه و قال بكل نية ..!

.....: انا اختي يالاه جيت هاذ الصباح عوضت صاحبي مشى للعروبية ماتت حنة ديالوو " جداتوو " .. و لكن هذا لي كتسولي عليه كنعرفوو مزيان .. شحال من مرة جيت عاونت العشير ديالي و تعاملت معاه .. رجووولة الخاوة ..!

شريفة:( تنهدات و قالت ) واخا شكرا ا خويا الله يحفضك ..!

طلعات فالدروج تال الطبقة الثالثة .. عقلات على الباب و ميزاتها .. صونات فالباب كتتسنى و لا رد ..! رجعات دقات و صونات و والوو ..!

عضات فمها مفقوصة و التيليفون فيديها كتصوني و تعاود و كالعادة مطفي ..! و بلا عكز عليها سجلاتلوو اوديوو مرة اخرى و هي هابطة فالدروج .. شافت فالكونسيارج و رجعات مشات عندو و قالت ..!

شريفة: يلا بغيت نمشي للولاية د الأمن من هنا .. شمن طريق نسلك .. كنظن لي خدام فيها حكيم تابعة لسباتة .. انا داك الجهة ما نقدرش ندخل لها .. ما غنعرفش نخرج من تما و انا بوحدي ..!

.....: سيري بحالك غير برا برا .. اجي نوريك منين تمشي ..! ( نعت لها مزيان الطريق لي غتشد ) و تما سولي اي واحد يقولك منين تسلكي ..!

جبدات من ساكها شي بركة و مداتها لوو شكراتوو و ركبات خارجة من تما تال الشارع و وقفات مبلوكية فالسطوب ..! الشموشات كتحرق و الكلاكصون على الجهد دارلها الشقيقة ..! طابت بالجلاس و هي من سطوب لسطوب و من طريق لطريق .. حتى كتقول وصلت و كتلقاهم كيخدموو الطريق و شادين داك القنت و كيسيفطوها من جهة اخرى ..!

حمقوها و نيرفاوها .. طلع لها شي دم و شي اعصاب ما بحالهمش .. و زايداها الشقيقة مكملة عليها ..! ما وصلات للولاية حتى بغات تغوت بالعداو ..!

هزات ساكها و جبدات لاكارط ناسيونال .. دخلات مع الباب .. وقفها بوليسي تما و قال

ب: عندمن غادية ؟ ( خذا من عندها لاكارط كيقرا فيها )

شريفة:( بعد تفكير قالت ) جيت نديكلاري تسرقت ..!

ب:( ردلها لاكارط بكل برود و قال ) غتديكلاري فالكوميسارية لي تابعة لفين تسرقتي و فاش يتلقاو غنعيطولك هنا فالولاية ..!

شريفة:( هزات النظاظر حطاتهم على راسها كترمش فعينيها بالشوية و بضحكة صفرة قالت ) لا راه عيطتولي غير مع الخلعة د الكوميسارية تلفت .. هيهيهي ..! قالولي ندوز عند سي حكيم امغار هو لي غيفك معايا هاذ الحجاية ..!

ب: الشاف أمغار ما كاينش خارج كونجي .. شكون لي عيط عليك ؟

شريفة:( ردات بتساؤل ) و ما جاش كاع للولاية فهاذ اليوماين ؟ ( شافتوو مصغر عينيه فيها و هي تضحك ) غير كنسول زعما .. ما يمكنش يعيطولي و ما يكونش ..! خليني ندخل بعدا يلا كان شي حد آخور معامن نهضر .. شي واحد ديبلاصاه و شد بلاصتوو على ما يرجع من الكونجي ..!

ب:( رد بالنفي ) ما كاين حد دابا .. سيري حتال السيمانة الجاية و أجي .. تلقاي الشاف فارح رجع ..!

شريفة:( شافت حتى عيات و تنهدات بقوووة ..! ) فففف ..! شوف ا خويا باش ما نبقاوش عرك و زيد فالما أنا و ياك هنا .. الشاف امغار كيجيني من العائلة البعيدة و كان داير معايا نتلاقاو باش يعاونني فشي شغال .. و لكن هاذ اليوماين كاملة كنعيط و تيليفونوو طافي .. و حتى دارو مشيت لها و والوو ما كاين حد .. بغيت زعما غير يلا عندكم نمرة ديال التيليفون د شي واحد من خوتوو .. و لا الفيكس د دارهم ديال سباتة .. و لا حتى يلا كاين شي صاحبوو هنا نهضر معاه .. قلبي ما هنانيش عليه .. الله يستر عليك ..!

ب:( بقى ساكت لمدة عاد قال ) ا ختي ما نقدر نعاونك فحتى حاجة من لي باغى تعرفيه .. ممنوع علينا نعطييو المعلومات الشخصية ديال اي واحد هنا .. و الشاف امغار ما نقدرش نخاطر معاك و نعطيك شي حاجة عليه .. غادي يتجبدلي الصداع معاه

شريفة:( غمضات عينيها بنفاذ صبر و رجعات فتحاتهم فيه ) واخا ما تعطيني والوو .. غير شي صاحبوو نهضر معاه ..!

ب: راه ما كاين حتى واحد هنا غيفيدك بشي حاجة عليه .. لا انا لا غيري ( ضور عينيه و قرب منها مكمل ) صاحبوو لي كتهضري عليه هو الشاف فارح حسام لي قلت لك عليه قبيلة .. دابا خارج فخدمة برات كازا ما غيرجع تال السيمانة الجايا .. داك الساعة اجي و ندخلك عندو ..!

شريفة: صافي واخا شكرا ..!

عرفات بلي ما كاينة نتيجة لا معاه لا مع غيرو .. رجعات من الباب بحالها .. ركبات و قلعات غير كتضور بين الشوارع .. ما عرفات ما تدير .. واش تشد الطريق و ترجع بحالها .. و لا تزعم و تمشي لسباتة و لي ليها ليها ..!

بعد تفكير طوييييل شدات طريق لوطوروط راجعة بحالها .. ما تقدرش تغامر و تدخل لتما بوحدها .. تخاف على راسها المنطقة شعبية بزاف و ما نساتش آخر مرة منين تكريسات تما .. و من غير هاذشي داك الجهة مفرعة و مقسمة لبزاف .. اش جاب ما لقالها دارهم ..!

شريفة:( فالطريق تفكرات كريمة و بدون تردد صونات عليها .. بقى كيصوني حتى قطع و لا رد ..! عاودات عيطات ثلاثة د المرات و والوو .. حتى زدحات التيليفون فوق الكوسان حداها مفقوصة ) الخرا المخرنن هذا ... منين ما غتجاوبوش على التيليفون لاش دايرين اصل موو من لول ..! البعر كي داير ..!

الأيام كتفوت و لا جديد يذكر ..! أسبوع و حكيم ناعس فالانعاش تحت المراقبة د الاطباء لي ما خلاوش من جهدهم باش تتحسن حالتوو .. بعد عملية غسيل المعدة .. كان تحسن خفيف لا غير ..!

ما بقاش مغيب بدا كيفتح عينيه بالساعات و كيحاول يهضر لكن كيتسمع من عندو غير الانين فقط و كلمات متقطعة ..! السكر قادولوو داك الديكالاج لي وقعلوو فيه .. و تبع معاه طبيب ديال الديابيتيك و خرجلوو دوا يبدا يشربوو من بعد ما يتحسن .. و لي كيعطيوهلوو حاليا فالسيروم ..!

الطونسيوو مرة مقاد مرة كيهبط و يرجع يطلع .. نفس الشي بالنسبة لدقات القلب .. باقي ما رجعوو لحالتهم الاعتيادية .. شي لي خلى الاطباء يزيدو يشدوه معاهم ..! خصوصا حكيم كيتخنق و الهوا ما كيوصلش لريتوو فبعض المرات .. فكيخصوو الاوكسيجين ضروري و مؤكد ..!

حالتوو كتقطع فقلوب كاع لي كيشوفوه .. فين داك الصحة و القوة ..! بين ليلة و نهار طاح طيحة وحدة كيناجي ..! حبيبة تأنيب الضمير و الندامة كياكلوو فيها ماكلة .. ضعافت حتى هي و صفاااارت ما بقى فيها والوو .. ليل و نهار واقفة على راس ولدها و تدعي و تعاود ..!

أما خوتوو بكاو دم عليه .. عمرهم شافوو حكيم ضعيف لهاذ الدرجة .. عمرهم شافووه كيبكي بالحريق و كيبغي يغوت و ما كيلقاش الجهد .. كيتسمع منوو غير أنين كيقطع فالقلب ..! الجناوا كيحسهم كيذبحوو فيه من الداخل .. واحد كيخرج و الثاني كيدخل بلا رحمة بلا شفقة كيقطعوو فأوصالوو ..!

حريق ما قدرش يصبر عليه و بكى بلا ما يحس و هو هاز عينيه فالسقف و الآلات لي ضايرين بيه .. كيشوف الموت بين عينيه ..!

عدنان الوقت كامل و هو معاه كيقرالوو فالقرآن حتى كيبدا يهز يديه يحبسوو .. ما قادرش يسمع و كل ما قراو عليه الفقية لي كيجيب كلما ذاثوو كتنمل عليه و عقلوو كيبغي يخرج من بلاصتوو كيدخل فواحد الهستيرية لا تتصور ..! حتى كيبكي عائلتوو معاه و كيوقفوهم ..! شربوه من الما د الرقية و تعاونوو و غسلوو ليه بيها و والوو ..!

العوادات ما وحدة ما عشرة جابوهم ليه و الأغلبية ما عرفوو ما يديرولوو .. من غير وحدة لي رد على العشوب لي عطاتوو .. بقى يرد يرد حتى تقيى الدم و حلقوو تجرحلوو .. و فالبلاصة جاتوو السخفة و الهلكة .. طاحلوو الطونسيوو و قلال ليه التنفس من جديد و دقات قلبوو ما بقاوش منتاظمين .. كيضربوو بجههههد كيخلع .. ديال شوية و غيوقفلوو ..!

الشي لي خلعهم و خلى حتى الطبيب ينبههم .. يقدرو يخرجوو عليه بداك العشوب و هو حالتوو اصلا كتشفي العدا .. غير تسوط عليه يطيح .. ما غيقدرش يصبر على داك التخالط كاملين ..! حاروو فيه حيرة ديال العداااااو و نهار على نهار شمعتوو كتذوب ..!

قلة الحيرة وصلاتهم تال عند عبد العالي للحبس كيقلبوو عليه .. يعطييو لي قدامهم و لي موراهم غير يولي حكيم شوية ..! غير يقولهم شنوو دارلوو و شنوو الحل ..! لكن الصدمة لقاوه مات مقت٠٠ول لداخل .. و مول الأمانة دا أمانتوو عندو .. و كيفاش غيتلاقى بمولاه و هو ما خلى ما آذى فعباد الله و خرجلهم على حياتهم ..!؟

و بين حبيبة .. محمد أميين ... عدنان .. خليل .. ملاك .. كاينة شريفة .. شريفة لي ما بقاتش كتذوق النعاس .. ليل و نهار شادة داك التيليفون و كتعيط و تعاود و بلا ما تمل كتسجلوو فالمسجات و تسيفطهم بحال يلا كاين و كيسمعها .. كتعاودلوو على البلية و فين وصلات فالقطيع و الاعراض لي باقى كتحس بيهم و شحال كتشغل راسها باش ما تفكرش فالشراب مجرد التفكير .. فخدمتها و مشروعها كي غادي و هي واقفة عليه وقفة ديال مراة و نص ..! و على الطريق لي كتضرب يوميا لكازا كتسول .. ما عيات ما ملات .. لكن ديما مكتلقى حتى جواب .. دارو حتى واحد ما جا لها هاذ السيمانة كاملة على قولة الكونسيارج .. و دار واليديه فاش قطعات لياس دخلات كتقلب عليها و تلفات تما بين الدروبة .. ما خلات شكون سولات و تا حد ما عرف على دار من كتقلب .. بغات تحماق و تلقى راس الخيط لي يوصلها لحكيم و ما لقاتوش ..!

تخنقات ؟ فوق الخنقة بدرجاااات .. بكات حتى بحات فليالي طواااال و هي مربوطة ما عارفة ما تدير .. بين ليلة و نهار غبر ليه لأثر و لعائلتوو كاملة .. تا حد ما كيجاوب لا عدنان فالانسطا لا ملاك فالفيس و فالتيليفون .. لي لقات نمرتها عند أسية .. و صونات حتى عيات و والوووو فلخر التيليفون تطفى و ما بقاش تشعل فخطرة .. كيرجع لها فالبلاصة ..! و هاذشي لي بغى يسطيييها .. واش لهاذ الدرجة حتى واحد فيهم ما قادر يجاوب و يقلب تيليفونوو ؟ حتى من كريمة ما كتردش ..!

تقهرات قهرة ديال العداو حتى بدات كتقلب عليه فالسبيطارات .. ديال كازا و الرباط و سلا .. لا يكون دار كسيدة و هو راجع لدارو من بعد بارك لها الافتتاح ..! و شحال قدها ؟؟

*******************************************

كيقولك المثل ما تديرش ما تخافش ..! و هاذ المنطق لي غادي بيه مهدي برادة ..! من بعد ما وصل السلعة " الشرابل " لمليلة .. رجعوو عمرولوو السلعة و سيفطوه بوحدو ..! و تا هو ما حكرش و عجباتوو المغامرة مرتاح من النكير ديال واليديه ..! لي ميكوو على شريفة تا هي كيتسناوه حتى يرجع و عاد يقررو شنوو يديرو ..!

بعد ايام و هو مغتارب أخيييرا دخل لمسقط الرأس ديالوو و بلدو الأم " المغرب " ..! و بالضبط لمدينة الناظور ..! صف طويييل ديال الكاميوات واقفين واحد تابع الثاني كيدوزو فالديوانة ..!

البوليس على الجهد تما .. حاضيين من كل الجوانب و معاهم كلاب قد السخط كيخلعوو .. لسانهم خارج كيلهثوو بيه و هما كينبحوو .. و فجنب اخر صحاب Dst ..! بلباس كلوو كحل .. مغطيين وجههم ما كيبان منهم غير عينيهم و يديهم لي هازين بيها كلاشينكوف ..!

منظر كيخلع و ما كيكونش فغالب الايام .. إلا يلا كانت عندهم شي اخبارية صحييحة و متأكدين منها ..! وصلات النوبة فمهدي لي هبط الشرجم و مدلوو الباسبور و الوراق كاملين ديالوو و ديال الشركة معامن خدام ..!

حسام:( قرا المعلومات كاملين كيراجعهم .. و بنبرة قاسحة قال و هو كيضرب بيديه جهة الشرجم ) تكعد نتا من تما .. كتتسنى الضيافة ؟

مهدي:( رد بضحكة ) هاهاها و ضيافة النبي ثلث ايام هاهاها ..!

هبط لعندو مرتاح .. جبد الساروت فتح لهم الكاميوو من لور .. و بداو البوليس كيجبدو فالكراطن كيرميوهم بالجهد و كيقطعوو فيهم بالمواس ..! و الكلاب ضايرين بيهم كيشمشموو و ينبحوو تا خلعوو مهدي و تكمش فالجنب لا تمشي تجي فيه شي عضة ..!

الكراطن عامرين بثواب ديال الحرير .. مدكسينهم فاللول و السلعة فالوسط و اللخر ..! و بلا عكز عليهم نقز واحد فيهم فوق داك الكراطن و جبد كارطونة من الداخل و مع فتحها و سرح الثوب .. طاحوو حبوب مهلوسة .. مكمشين تما ..! و فالبلاصة ضربوو مهدي لعنقوو من لور تا طاح للأرض وجههو محكوك مع الكوضرون .. و الناس موراه كيشوفوو مخلوعين و كاين لي كيصور بالتخبية قبل ما يحصلوه و يهرسولوو داك التيليفون لي فرحان بيه ..!

مهدي: واااوااااو تهدنوو ا هاهاها شنوو هاذشي

غوت بالجهد من ضربة جاتوو لجنبوو و صوت حرش قاسح .. قال ..!

....: السكااااات ..!

فساحة واسعة لمديرية الامن د مدينة الناظور .. تعتاقل الكاميوو هو و كاع لي فيه ..! تستفوو التيليفونات و الاقراص المهلوسة فالارض .. ضاير بيهم شريط مكتوب بالاصفر و بلاكات صوفر مرقمين بالكحل ..! و المخاباراتيين لي مغطيين وجههم مشتتين فالساحة كاملة ..!

التلفزة كتصور و دايرين استجواب مع عميد الشرطة و الضباط و المفتشين و كاع لي شاركوو فنجاح العملية ..! و كيعطييو معلومات مضبوطة على شنوو لقاو ..! أما مهدي من بعد ما صوروه .. دخلوه خذاو اقوالوو و هبطوه للاكاب .. جالس مصدووم ما عرف باش تبلى ..!

غيدوز عند وكيل الملك فالعشية باش الغذ ليه غيتحاكم هو و الياس لي لقاو سميتوو فالوراق و متحملين بجوجهم المسؤولية ديال اي حاجة توقع ..! فالبلاصة داروو اتصالاتهم لمديرية الأمن فمدينة اليوسفية و قرقبوو عليه فخدمتوو .. خرجوه بالمينوط و هو كيغوت و يتنثر باغي غير يفهم علاش شاديينوو و دايرينلوو هاذ الشوهة كاملة .. و هو سمعتوو راس مالوو ..! كيشوف راسوو خارج على المدينة شاديين بيه الطريق .. لفين الله و علم .. حتى واحد فيهم ما فتح فموو بكلمة ..! و فينما يسولهم كيردو ب " حتى نوصلوو و تعرف .. سكتنا "

******************************************

جالسة فالبيرو ديالها .. صبحات عيانة هاذ النهار و ما قدراتش تشد الطريق .. حدها مقابلة خدمتها و واقفة عليهم البق ما يزهق .. حتى من البوفوار دايرة صندوق لي شد شي حاجة كيحطها فيه و فاللخر د النهار كتقسموو على السرباية بالعدل ..! باش ما توقعش واحد الحرب بيناتهم على الكليان لي كيعطي البوفوار كثر .. و يهملوو الكليان الثاني حتى يطلعلهم الدم و ما يبقاوش يرجعوو ..!

و لي سهل عليها المأمورية كثر هما الكاميرات لي فالمحل .. حتى واحد ما كيزعم يلعب عليها .. و تا هي عملية معاها فوق القياس و على قولتها الحساب صابون ما كاينش الدغل و التلاوي .. كتجي لبنادم فاص و حتى الكاميرات علماتهم بيهم قبل ما يخدموو معاها .. و سيناو فالكونطرا بلي قابلين و عارفين بلي كاينين .. لأنوو تقدر تمشي للحبس يلا ناض واحد فيهم دعاها و قال بلي ما فخباروش .. و هي ما منحقهاش تصورهم ابدا ..! لهذا اختارت الشفافية و الوضوح كعنوان ليها و لمشروعها .. صفي تلقى ما تشرب ..!

صونا تيليفونها حتى قفزات من بلاصتها .. و بالزربة فتحات ساكها و ملامحها بداو كيتبهجوو من بعد ما كانوو ذابلين .. و غير طلعات لها كريمة لي كتعيط .. ساطت النفس و كاع داك الفرحة تبخرات فالهوا .. و مع ذلك ردات بالخف .. عل و عسى تكون هي عارفة شي حاجة عليه ..!

شريفة: الله يا ختي الله .. كنتي فوق الأرض و لا تحتها ؟ ما خليت فين عيطتلك و عاودت و والوو .. يلا جاوب داك الحيط جاوبتي نتي ..!

كريمة:( ردات عليها بعد مدة صمت ) شريفة توحشتك ا صحييبتي .. تي اش سايرة تعاودي و كي عاملة مع مولا دارك .. وا يانا كنت مشغولة فهاذ ليامات مكنطلش على التينيفون كاع ..!

شريفة:( قلبات عينيها كتميق ) كلشي بخير يسول فيك الخير ا الزين .. وا غير بغيت نديك عند هذاك لي قلنا عليه و صافي ...!

كريمة: لا ياااانا ربي عفى عليا و نسيت داك الطريg الكحلة و سايرة نضور على راحتي و راحة مولا داري .. ما gلتش لك .. ياو راه رضني لموضعي .. تصالحنا و سايرين نبنييو عشنا من تَوْ و جديد .. فين تجي تايمة تا هي ..!

سكتات شريفة ضرباتها اللقوة تا تبلع لسانها ..! سطل د الما طايب و هبط عليها سلقها و خلاها تحك جلدها بحال يلا فيها الحساسية ..! كتحرك فراسها بالنفي و عينيها خارجين ..! ما فكراتش حتى لثانية بلي الغبرة ديال حكيم غيكون موراها رجوعوو لكريمة ..!

كريمة: يااااو شريفة تي اش سايرة تعملي .. مخلياني كاعدة نهضر فرادية ..!

شريفة:( رمشات عينيها و قالت بنبرة صدمة كتحاول تغطيها ) اااء ؟؟ كيفاش رجعلك ؟ واش ردك لداركم صافي ..! و لكن كيفاش ( غمضات عينيها و حركات راسها ب " لا " بالجهد .. كتفيق راسها بزز ..! )

كريمة: و علاه سايرة تسولي .. كيفاش ؟ .. بحال كاع المزوجين .. كعدنا و تسامحنا .. يانا صافي بعدت على داك الطريg المجرابة .. ياو هو gلب على كاع بنات الحرام .. بنات الزناgي .. لي كانوو سايرين يضورو يتgبطوو بيه .. و دابا راحنا مفااااوجين مسافرين ..!

قطعات عليها ما قادراش تزيد تسمع هضرتها ..! قلبها كيضرب بالجهد و عينيها تغرغرو حتى طاحوو دموعها بوحدهم .. و هي ببلاهة كتقيس فيهم هازة يديها الفازكة قبالت عينيها و هضرة وحدة كتضور فراسها .. حكيم رجع لكريمة ..!

عوجات راسها للجنب و هزات كتافها كتبكي بحرقة و شنافتها كتترعد بوحدها .. حرقة خايبة شعلات فيها من الداخل ..! الوحيد لي بغاتوو فحياتها .. تاقت فيه .. عطاتوو نيتها و فتحاتلوو قلبها .. حتى هو غذرها ؟ فين مشى كلاموو و وعودو ليها ..! فين مشاو الافعال ديالوو ..! صافي دغيا مل منها و سل الشوكة بلا دم .. مبعد عليها .. كيتسناها تفهم راسها ..!

ضربات جبهتها بيديها و غوتات بصعرة كتردد " حمااااارة نتي حمااااارة " .. يمكن من قبل ما فكراتش هاكا .. و لكن دابا بحال يلا بدا كيتوضح ليها كلشي ..! حكيم بدل نمرتوو و لا طفاها حتى تعيى و يرجع يشعلها .. هضر مع خوتوو باش حتى واحد ما يرد على المسجات و لي زابيل ديالها .. صافي يميكوو عليها .. حتى من دارو غيكون خاويها هاذ الساعة .. باش ما تلقى حتى حاجة لي تربطها بيه ..!

ياااااااه شحال طلعات مكلخة فعينيها .. فهاذ اللحظة .. قلبها كيتحك فوسط صدرها و دموعها شلال .. اااه كتبكي عليه .. كتبكي على الحب لي عطاتولوو و ما كانش يستاهلوو .. كتبكي على الوقت لي ضيعاتوو معاه .. كتبكي على التضحيات لي ضحات على ودو .. و حنيان الراس لي حناتوو ليه هو بوحدو .. كتبكي على الحلوف لي حلفات فيه فالكوميسارية و كانت عندها مليون طريقة تآذيه و ما قدراتش .. و كيفاش تأذي "روح الروح" ديالها ؟ كيفاش الانسان كيقدر يآذي نفسوو ؟ هو ماشي غير واحد الانسان عرفاتوو فحياتها دوز وقتوو و مشى .. هو كل حياتها .. معاه كانت كتحسن بالانتماء .. حكيم ما كانش شخص عادي .. كان "وطن" شريفة كتنتامي ليه ..!

هو "وطن" شريفة كتنتامي ليه ..! تراب الوطن عمرو ما كان خاين .. عمرنا كرهناه .. واخا عشنا فوق منوو مآسي كبيرة .. واخا تحكرنا و بكينا حتى عماو عينينا .. واخا كلينا العصا و حنا كنطالبوو غير بحقنا لي تهظم بحال عمرو ما كان ..! الوطن انتماء و روح كتنبض فداخل كل انسان بقوة .. و يلا تقاست غير شعرة فيه كنوقفوو كاملين وقفة وحدة و العافية شاعلة فقلوبنا ..!

يمكن الظروف كتخلينا نهاجرو وطننا لبعييد .. من لي عشنا فيه .. و لكن عمرنا كنكرهوه .. ديما الحنين ليه حاضر و بقوة .. هو دم كيسري مع عروقنا و روح كتطلع و تنزل فينا ..! و هذا هو حكيم عند شريفة ..! شريفة لي كتبكي بقهرة .. بحال مهاجر واقف فسلم ديال الطيارة كيودع تراب بلادو لي ما شاف منوو غير الخير .. و لكن الظروف و الناس لي فوق هاذ الارض ما خلاوهش يرتاح و بزز منوو اختار يبعد على وطنوو و هو فآخر درجات الانهيار النفسي ..!

يمكن كن ما كانتش كريمة .. إلياس .. احمد برادة و زيد و زيد .. كانوو يعيشوو فسلام ..! و يمكن حتى حكيم واخذ شريفة مجرد "رهان" .. و قدر يبينلها بلي هي بحال العجين بين يديه و يقدر يشكلها كيفما بغى .. يمكن و يمكن و يمكن .. هاذي كلها افتراضات زارت عقل شريفة و سافرات لبعيييد مخلية قلبها لي متحكم فيها فهاذ اللحظة .. القلب و الروح لي عندهم رأي آخوور و ما عالم بيهم غير الله و شريفة ..!

شريفة:( سجلاتلوو آخر مسج ببحة صوت كتضر فالقلب و شهقاتها مسموعين كيقطعوو ماشي غير القلب .. كيقطعوو الروح و الوجدان كامل ..! ) ما عرفتش واش غتسمع هاذ الاوديوو و لا حتى هو غيتزاد على خوتوو ..! و لكن غنسجلوو لك .. غنسجلوو لحكيم لي أنا كنعرف .. لحكيم لي بغيتوو من قلبي .. لي حسبتوو نفسي .. و روح روحي قبل من أي حاجة ( ضحكات وسط دموعها ) قبل منك .. كنت كنشوف جوج لوان .. يا بيض يا كحل .. يا نبغيك بكل ما نملك يا نكرهك و نحقد عليك و نكرهك فحياتك .. و لكن معاك عرفت حتى الرمادي .. عرفت كيفاش نبغي و نكره فنفس الوقت .. شفت فيك الجنة و النار .. شفت فيك السلام و الحرب و بغيتهم .. ما فرقتش بيناتهم .. بغيتك بكلشي فيك .. يمكن نتا ما قدرتيش تبغيني ( غمضات عينيها و دموعها كيتسرسبوو من عينيها بقوة .. كتبلع فريقها و صدرها كيطلع و يهبط بسرعة خيااااالية ) ما قدرتيش تبغيني للدرجة لي أنا بغيتك فيها .. و هذا من حقك .. ماشي أي واحد بغيناه فهاذ الدنيا كيكون من نصيبنا .. و ماشي أي واحد وعدنا واحد النهار بوعد .. غادي يوفي بيه ..! ( شدات على صدرها مزيرة عليه بقوة ) سير أ حكيم الله يسهل عليك و يفرحك فحياتك .. واخا ما نكونش انا فيها .. المهم نتا تكون مرتاح .. اختاريتي ترجع لمراتك و بنتك و اكيد ما غنلومكش .. يمكن ما عندكش الجرأة لي عندي باش توقف قدامي و تواجهني .. و لكن كريمة وفات و كفات .. و من عندي .. الله يرزقك السعادة ديال الدنيا حيث تستاهل .. و هذا آخر مسج من نوارة الحدود ديالك .. و لي عمرها غتكون لشي واحد من غيرك ..! عرفتي علاش ؟ حيث معاك نورات و فاح ريحانها كيفما قلتي لي من قبل ..! و حيث النوارة ما خلاتش قلبها بحال الساقية لي جا يشرب منوو .. بالعكس غرقات لقاع لبحر .. فين كاين غير نتا و ياها .. و يمكن حتى نتا غير كنت كنخايلك و ما قدرتيش تغرق فيا لداك الدرجة .. و لكن أنا غرقت ( هزات عينيها كترمش .. ما بقاتش كتشوف بالضبابة ديال الدموع ..! ) غرقت فالفحل الوحيد لي عرفتوو فحياتي و حتى دابا ما نادماش حيث عرفتك .. على الاقل عشت معاك ذكريات نتفكرهم كل ليلة ..! نتفكرك و نتا جبيرة لي جبراتني انا و قلبي ..! و نتا لي كتفكر فيا قبل من راسك .. و ستار لكاع العيوب لي فيا .. و كتدافع عليا و انا ما كيناش و مكبر بيا و حاطني فوق الراس .. فعينيك و فعينين الناس ..! نتفكرك و نتا العصا لي كنتكى عليها و كتهز معايا همومي و ما كتخويش بيا .. كتقويني و تدعمني باش نفوت الحزة و انا رافعة راسي للسما .. نتفكرك و نتا الهوا لي كنتنفس و انا فاتحة يدي .. طايرة للسما .. غاطسة فقاع البحر .. و مجربة معاك لي عمري عشتوو .. نتفكرك و نتا كتخشيني فصدرك و تزير عليا ( ضحكات بألم ) نتفكرك و انا كنقولك تعنيقتك حنينة و ترد عليا .. حيث ماشي مسموم بحالك ..! ( تنهدات بقوة ) هاذ المسمومة كتقولك تهلى فراسك و خليك ديما فحل كيف البارود ..! يمكن غذا او بعدو نندم على هاذ المسج .. يمكن نكون طيحت من قيمتي .. و لكن بصح بغيتك تسمع هاذ الهضرة من عندي .. واخا كنت باغى نكون كنشوف فعينيك و انا كنقول كنبغيييك كيفما عمر شي وحدة بغات شي واحد فهاذ الدنيا .. و لكن ما كتابش ..! و قيمتي عند راسي ديما عااااالية و عمري خفت نعتارف بشنوو كنحس و انا هازة راسي ..! و قبل ما نقطع بغيت نقولك .. هاذشي سمعوو بروحك اما يلا كنتي غتسمعوو غير بوذنيك .. فبحال سمعتيه بحال لا ..!

سيفطات الاوديو حتى وصلوو و طلعات شرطة وحدة و طاحت على ركابيها كتشهق و تبكي بحرقة و كتضرب على صدرها .. كأنها حاضرة فجنازة حكيم و يالاه خرجووه من الدار كيمجدو باسم الله .. و هي واقفة مكتفة اليدين .. روحها غتطلع من قلب صدرها و احساس أنها ما غتقدرش ترجع تشووفوو مرة اخرى كيخنق فيها ..!

يمضي بيَّ العمرُ ، يطوي صفحةً أخرى

فهل سيصبحُ ذِكْرِي عنده ذِكْرَى..؟!

ذاكَ الذي كان دون الكلِّ يعرفني

وكان أكثر مني بي هو الأدرى...!

ذاكَ الذي أفلت عيناهُ عن أفقي

ولم أجد بعده في عالمي بشرى...

ذاكَ الذي قطعت يمناه أوردتي

وقد رأيتُ شراييني على اليسرى..

ولستُ أنسى ، وكم عانيتُ وحشتهُ

عند المغيبِ ، وعيني دونهُ حيرى..

أغوصُ في كل عمري ، كي أفتشهُ

علِّي ألاقي إليهِ في المدى مسرى...!

ماذا أقولُ وهذا الشوق أخرسني ؟

وذكرياتي لديهِ ، كلها أسرى..!!

قلبي السموال وفّى عهدَ ذمتهِ

لكنّهُ في عهود المنتهى .. كسرى..!

هو الذي عطّرَ التفاحُ وجنتهُ

وفي الشفاهِ يحاكي طعم كمثرى..!!

شريفة🐍

بقلم .. خالد الباشق

وجهوو صفر و عينيه خارجين .. كيتسمع طنييين قوي فوذنيه من الصدمة .. بين ليلة و نهار تقلبات حياتوو راس على رجلين ..! رمش كيشوف فالياس ما متيقش بلي هذا واقعوو .. للحظة قال غيكون غير كيحلم و شوية غيفيق من هاذ الكابوس لي خنقوو ..! كيفاش تحكم عليه بست سنين حبس ؟ هو ستة و الياس ستة .. متقاسمين التهمة ..!

كيفاش هو تخشى فهاذ المعمعة ..! طاحت دمعة حارة من عينيه و تبعوها دمووع ندم و البوليس مخرجينوو بالمينوط دايز قدام واليديه لي غيحماقوو بالبكى عليه .. ندم حتى عض فالتراب لي ما سمعش لهضرتهم و ما بقاش تحت جناحهم .. بغى يطير و ها هو جابها فراسوو ..!

و موراه كاين إلياس .. لي وجههو حمر ما راضيش بالشوهة .. عينيه منزلهم فالأرض و القهرة باينة على وجهوو .. حداه المحامي كيزرب باش بلحق عليه و يسمعوو ..!

المحامي: غادي نستأنفوو .. و إن شاء الله يخففو عليكم الحكم .. ما عندك مناش تخاف ا سي إلياس .. دايرين كل ما فجهدنا ..!

ناس داخلة و ناس خارجة و أحمد برادة واقف هو و مراتوو مدام خديجة الادريسي محروقين على كبدتهم .. و الناس ضايرين بيهم كيسولوو ..!

....: بشحال تحكم عليه مسكين ؟

....: 6 سنيييين و ما تجمعها غير الفم .. بااااز لمييمتوو مسكينة .. هاذ ولاد الوقت كيمشييو للحرام و يغرقوو فيه و كيخلييو واليديهم فالعافية ما عالم بيهم غير الله ..!

خديجة:( بقهرة تكات على صدر احمد معنقها ) ولدي سيدي مهدي .. أ أحمد ولدي ..!

أحمد برادة:( رد بصرامة من بعد ما جمع شتات نفسوو .. هاز نيفوو للسما ) غادي نستأنفوو .. واخا نعرف نحط لي قدامي و لي مورايا غنخرجوو ..!

الحبس هو هذا .. فيه الظالم و المظلوم .. فيه الصالح و الطالح .. ماشي أي واحد دخل ليه بالضرورة يكون مجرم ..!

******************************************

متكي حكيم فاتح عينيه فالسقف .. كيتنفس بانتظام و صدرو كيطلع و يهبط بهدوء .. محيد الاوكسيجين هاذ الساعة ..! غير صدرو لي عاري و ملسقين فيه السلوكة ديال الآلات .. و خصوصا د القلب لي كتسمع .. طييييييييط طييييييط طووووووط ..!

الجو بارد فالانعاش و الصوت د الألات و الهدوووء التام .. كيخلع ..! كيخليك تفكر فأسوء الاحتمالات ..! هز يديه لي تقييلة عليه و برك فواحد البوطون قداموو ..! تا تشعلات بولى حمرة فالباب و بعد مدة دخلات الفرملية كتجري و تطفى الضوو د البولى ..!

حكيم:( شاف فيها و بصوت ضعييف و متقطع بزز كيتسمع قال ) ع عي عيطي .. ل طب طبي طبيب ( سكت مدة كينهج ) بغي بغيت ن نخ نخرج ..!

الفرملية:( ردات بابتسامة ) صافي سخيتي بينا ؟ أنا نعلم الدكتور .. و لكن ضروري تزيد تصبر و تجلس معانا شي يامات ..!

شاف فيها ببرود و ما ردش عليها .. حتى تبسمات باحراج و قالت ..!

الفرملية: نمشي نكلموو لك .. راه الواليدة و الخوت معاه فالبيرو ..!

بعد مدة دخل عندو الطبيب لي فحصوو و شاف طابلوو صغير محطوط تحت رجليه .. قرا الملاحظات و قيد ملاحظاتوو حتى هو .. و بابتسامة قرب من حكيم كيقنعوو يجلس باقي شي يامات .. لكن ما قبلش .. قسح راسوو باغي يخرج .. كثر من سيمانة و هو فالانعاش .. و الاطباء تا حد فيهم ما نفعوو بشي حاجة .. شنوو غيبقى يدير ..؟

عدنان:( من بعد ما عقم راسوو و لبس اللباس الخاص باش كيدخل عندو .. داير البافيط و ماسك على شعرو .. قال ) الدكتور سنى على الورقة د خروجك و كتب التقرير ديالوو .. و الواليدة عيطات للسيد لي مقابل الفيرمة ديال سكورة باش يوجدها .. ندوزو فيها هاذ رمضان مجموعين و منها تشم هوا نقي و ترد صحتك فالطبيعة ..!

حكيم:( غمض عينيه و رجع فتحهم و بضعف قال ) ش شي و وا واح واحد .. في فيكم .. ي يم يمشي للدار .. صاكا صاكادوو .. دياليي .. يجيي يجييبوو ..!

عدنان:( رد بتساؤل ) انا نمشي دابا نيت .. من نهار طحتي فالفراش ما بقينا دزنا عندك للدار .. حتى من حوايجك ديبانينا غير بلي حاط عندنا .. و jim راه معانا لهيه مقابلوو خليل .. باغي شي حاجة اخرى من الدار نهزهالك ؟

حكيم:( رد بتعب ) الصا كا دو .. ف فيييه .. مي كة .. د العشب العشووب .. ت تأك تأكد م من منها .. و جي جيب ها لي ..!

واقفة شريفة بكسيوة موردة .. مزيج بين اللون الاحمر و الاخضر ..! هابطة طويلة تال رجليها لتحت و مفتوحة من جهة وحدة حد الركبة ..! شعر قصير مقاد و الوجه مجبد بمكياج خفيف جاي معاها ..!

حاطة يديها على جنبها .. معوجة نصها و راسها مهزوز فالسما .. كتضحك مبينة على سنانها .. ثلجة ثلجة كيلمعوو ..!

.....1: زوومي ا صاحبتي على التصويرة نشوف ..!

.....2: وا هانا الزمر فقصتيني ..! ( كبرات التصويرة د شريفة كيبرككو فيها ) غزالة يا ختي سعداتها ..!

.....1:( ردات كتفرنس ) وا الحق يتقال واخا هي دافعة كبير و هازة نيفها للسما و مزيرة معانا الطرح و لكن توحشناها ..!

.......2: جات معاها يلا دفعات كبير .. باركة غير هاذ رمضان .. يوميا كتدير اعلان بمائدات الفطار عندها فالمحل و ما كتخلص بحتى درهم .. لي عندو كتخرجها منوو و لي ما فحالهمش فاتحة لهم بابها ..!

.....1: حتى انا ما قلت لك والو .. دارت فالخير حتى عيات .. و مراة بميات راجل .. تا حد ما يديرها بيها و واقفة على شغالها .. و لكن واخا هكاك كنحس بعينيها طافيين ا ختي ..!

......2:( ضحكات و قالت ) ههههه هاذاك غير العيى ديال الصيام .. حتى نتي ..!

.....1: لا لا .. عينيها طافيين ما كتحسيهمش كيلمعوو كيف كانوو .. و قليل فين كتضحك كيف كانت .. شحال من مرة دخلت عليها على غفلة كنلقاها كتبكي و مغطية عينيها بالنظاظر و كتبدا تغوت و تلف الهضرة بلعاني .. عندها شي مششششكل باينة .. حتى من خطيبها و لا راجلها .. هذاك لي كان فالافتتاح .. من داك النهار ما بقى بان ليه الأثر ..!

.......2: وا يطفاو و لا يشعلوو حنا مالنا ؟ ياك كناكلوو معاها طرف د الخبز و مهلية فينا .. ايوا صافي حياتها بعيييدة علينا .. و ما عرفنا هذاك راجلها و لا خوها و لا غير كتعرفوو و حضرلها ..! دوزي دوزي ننعسوو .. الكونجي د العيد تسالى و الخدمة غذا كتنادي ..!

*******************************************

شهر و أسبوع و هما جالسين فالفريمة ديال بوسكورة ... خارجة على كازا بشوية .. و هي نفس الارض لي شرا حكيم من عند اب كريمة و كانت سباب زواجهم ..! معروف عليه كيحماق على الاراضي .. و التراب بالنسبة ليه ذهب .. عمرو يرجع عليه بالخسارة ..!

كاين اراضي لي بناهم عمارات و منشئات و باعهم و كاين لي خلاهم غير منزلين كيخلص عليهم الضريبة حتى يفكر شنوو يدير فيهم و كاين لي شراهم بثمن رخيييص و عاود فيهم البيع .. رابح التريبل فيهم ..! و مشاريعوو ما كتسالاش .. التبزنيز عندو فالدم .. قاري سواريه و واخذ احتياطاتوو ..!

فهاذ المدة تبع العشوب لي كانت خذاتلوو شريفة .. عاونوه بزاف باش يخوي داك السم لي فذاتوو .. و فنفس الوقت تأثيرهم ماشي قوي بحال داك التخالط د العوادات ..! بمعنى ما اثروش على صحتوو المهلوكة ..!

شوية بشوية بدا كيتحسن .. لكن بااااقي ما رجع كيف كان .. باقي كيجيه الحريق كيقطع فيه .. بعد المرات كيشدوو قلبوو و كلاويه .. بحال يلا كيضربوو الضوو .. و شحال داك الحريق قاسح و صعيب ..! و لكن تأقلم مع حالتوو و ولفها .. و عطى الجهد على راسوو باش يوقف على رجليه بزز منوو و حتى الصيام عاونوو بزاااف .. أما ذاتوو ابدا ما صفاتش من داك السم ..!

تيليفونوو من الكسيدة ما بقاش قلب فيه .. ما سول على حتى واحد و حتى مع خوتوو ما كيهضرش قليييل .. حتى هما فاش شافوه رجع شوية عاودولوو شنوو دارت كريمة ..! تسناو منوو شي رد فعل .. لكن قابلهم بالبرود هاز حاجبوو للسما .. و المحامي مكلف لوو بقضية الطلاق ..!

حبيبة:( قاست فلحيتوو لي خلاها كبرات .. كترضي عليه ) الله يرضي عليك ا ولدي لما سمع الهضرة و خليك باقي هنا تا ترتاح مزيان .. سمع مني غير هاذ المرة ..!

حكيم:( رد بصوتوو الحرش ..! ) يَّما .. عندي ما نقضي هاذ الساعة ما غنبقاش مريح هنا بلا شغال ( باسلها راسها ) هناي من جهتي ..!

يتبع...

‎