حبيبة:( ضحكات ) موووجوود غير تجي لالة فاطمة تسخنوو هو و هاذ البراد ..! شوفلك البنت شحال كتعطي للتبحليس قتلة .. هاذشي كامل على ود المانيا ماشي عليك ا خليل لا يسحابلك ..!
خليل:( ضحك من بعد ما سلم عليهم كاملين و جلس تا هو مداحسيين بيناتهم و ملاك لاسقة عليه ..! ) راني عااااارف ..!
ملاك: كيعاودو على الشكلاط ديالهم لذييييذ و واحد الفرماج بنييين واخا خارج منوو الدود ما نتيقهم تا نشوفوو بعيني بجوج و انا مكمشة فخويا الحبيب من البرد د المانيا ..!
محمد أميين:( كياكل و يضور فراسوو ) تسنايه يطلع لك الوراق و يديك معاه غير عولي .. ما لقيتي شكوون ..!
ملاك: لا انا عارفاه من غذا غيولي يقولنا هاذي جوج عام ما جيت للموووغريب .. موهمد أغييط ..!
ضربها لراسها من لور تا فرنسات فوجهوو و تناساو موضوع الانسطا فخطرة ..! ما كاين غير الضحك و النشاط حتى شاط ..! خليل كيطبل بالكيسان فالسينية و يغني و محمد اميين شاد ليه الايقاع بالمعالق و المواس و ملاك كتحرك شعرها معاهم و تزغرت .. المعقل فيهم هو حكيم لي كيشوف و ساكت .. اما تا عدنان ناض يصلي المغرب مخليهم مجمعين ..!
خليل:( باقي كيضرب ) زيييييدووونااا زييييدونااا هاااذشي ما يكفييينا ..!
ملاك: يووووويوووويووووي .. زييييد زيييد يا شييفوور زيد شوية فالموطوور ..! و لالة فاطمة و يا قطيب اللوز و خلييوها تدوز ..!
محمد أميين: البطبوط نعاماس ..!
ضحكات حبيبة عليهم كتشوف ف فاطمة لي مقابلة الفيرمة جايا بسينية ديال البطبوط سخون كيفور .. فوقوو الزبدة و العسل كيقطر و راجلها عبد الله موراها ببراد د اتاي مشحر ..!
عبد الله و فاطمة:( شافوو فالدراري و قالوو دقة وحدة ) على سلامتكم ..!
حبيبة:( ضحكات و ردات ) غتشركي ا فاطمة نتي و خويا عبد الله شي طاجين ما فيهاش ..!
محمد أميين: و نشركوو شي حولي صردي كرونوو ملوية دابا نيت ..! الزردة ديال سي خليل .. و لا باغيين تاكلونا فيها ..!
خليل: تستاهل ا خاي ..!
محمد أميين:( شاف فحكيم ) اش قلتي ا الباشا .. تخرجلنا شي حولي من عندك نضحييو بيه هاذ الليلة و نتجمعوو عليه .. من شحال ما درنا شي جلسة بحال هاكا .. فيها و لا ما فيهاش ..!
حكيم:( حرك عينيه بنعم ..! ) فيها ا سيدي غير نوض علي على ذراعك و مضي الجناوة ..! ( تكسل فبلاصتوو ) جيب ا با عبد الله شي حصيرة هنا نزيدوها نتيسعوو ..!
عبد الله:( سمع الشوا و ضحك فرحان ) الضيق فالقلب ا ولدي .. دابا نيت هي اللولة ..!
حبيبة:( شافت عدنان جاي و قالت ) حكيم مريض ما يذبح ما يسلخ .. لي بغى شي حاجة ينوض يديرها .. و جمعوو الترسة معاكم حدا السقية لهيه ..!
خليل:( وقف كينغز ملاك برجليه ) نوضي تغسلي الكرشة ..!
ملاك: تبعد مني لا ..!
حبيبة: و مالك ما تغسليها ؟ يالاه تتعلمي ما يفيدك فدار راجلك .. ما بقى ما فات لك معانا .. عاد كنت نشكر فالسوسيات و بنتي حدايا مفضية ما كتعرف القزبور من المعدنوس ..!
ملاك: باقي مطولة معاكم .. شتوو غير ماري ما غتتهناوش منها ..!
محمد أميين:( رد بضحكة كيشوف فيها ) جبدتوو جبدتوو الزواج .. ايوا لالة ماري جاو فيها الخطاب ا الواليدة .. طالبين راغبين فبنتك ..!
خليل:( رد كيضحك ) هذا ساخطة عليه موو ما فيهاش ..! و لا يكون عور مسكين ؟
عدنان:( ضحك تا هو كيدوز على لحيتوو بيديه و نقاطي د الما خفاف كيلمعوو فيها ..! ) نتوكلوو على الله و نشوفوه بعدا .. الحلال هذا و لي طلبوو طلب الطاعة و كمالت الدين .. او لا ا سي حكيم ..!
حكيم:( رد هاز حاجبوو فيها ) كلامك هو الكبير .. رزقها جا تال عندها تدير دارها تا هي ..!
ضوروها بيناتهم تا رجع وجهها حممممر ..! ماشي حيث حشمات منهم .. لا ..! حيث ما باغاش تتزوج و المغربي هو لي حالفة بحلوفها ما تديه .. باركة عليها غير خوتها لي خارجين فعودها .. كيعجبها تطلعها على البشر لا غير .. تيليفونها عامر بالبلانات و لكن دايرة فبالها بلي داكشي غير خوا خاوي ديال تدواز الوقت ..!
تغرغرو عينيها بالدموع تا طلقاتها بغوتة من قلبها ..! صوتها رقيق و فاش كتغوت كيولي كيتقب فالوذنين ..!
ملاك: ا عوووووو ما بغيييييتش ..! اويييييييلاااااااي ..!
فاطمة:( قالت على نيتها مشاركاهم الهضرة و غير ما زادت وحلاتها لملاك ) و علاش ا بنتي لي هرب الزواج هرب للطاعة ..!
حبيبة:( ضحكات و عنقاتها كتسكتها ) اويلي بعدولي من بنتي .. ما ساخياش عليا .. باش نعطيها دابا و هي هاكا هشيشة كي البسكوتة تقيسها تتفرتت ( ضحكات تا دمعوو عينيها )
ملاك: ياك ا مااااامااا .. حتى نتي ..!؟
محمد أميين:( رد بابتسامة ) دابا بلا ضحك و تطليعة .. كنهضر معاكم من نيتي ..! السيد مهندس فاتصالات ميسرة عليه من كلشي .. قرينا مجموعين و عاد عاد كان عندنا فالمحمدية و شاف ماري معايا فالطونوبيل .. و نوى معاها المعقول يلا قبلات ..!
ملاك:( ردات مجننة ) واش باغي تحمقني ؟؟؟ انا نتزوج ؟؟ و بصاحبك من الفوق ...!!! ويلي ويلي ويلي .. واخا نكون حمقة و عندي سوابق فسبيطار المخلخلين ما نديرها .. نتوما و صحابكم ما ديال زواج ( هزات كتافها ) و انا اصلا ماشي ديال المعقول ..!
خليل:( رد باستهزاء ) و ديالاش نتي ؟ د شي اوبا ..!
ملاك: احححححح سكت سكت ناااااري ما تجبدهمش على فمك .. راه قلبي غير هشيش ..!
محمد أميين: ياك ا المرضية ؟
ملاك: دابا غير قولي و نتا و وجهك ..! و نخلييو الاخوة و الحكرة لي غنتعرض لها من مور هضرتي و التهميييش لي غيجيني من كلام الحق .. جنب ..!
محمد أميين: ايييه زيدي ؟
ملاك: دابا هاذ بوزبال معامن عايشين تقارنولي ب .. جي سونغ .. لي جون .. Lee min hoo .. Gong yoo ... Hyun bin ..! هاذو يتقاااارنوو ؟؟ و الله تا خاصك تحشم على عرضك ..!
حبيبة: وا شكوون هاذو ؟؟
ملاك: رجاااااالاتي لي غنتلاقهم فاش نمشي لكوريا طال الزمان و لا قصار .. احييييه ..!
محمد أميين:( رد باستهزاء شانق عليها ) دابا غتمشي تتعلقي بلاصة الحولي .. من بعد و نشوفوو هاذ كوريا .. با عبد الله شي كوردة فازكة معاك الله يعزك لما رطبها مزيااااان ..!
ملاك:( خرجات عينيها فيه و هو شادها ) هيهيهي كتضحك معايا ياك ؟ ( باستوو فحنكوو ) خويا العزيز ديالي ..!
حكيم:( رد كيحرك راسوو بالنفي ) براهش ..!
دخلوو للكوري فين عندهم خمسة ديال الحوالة بالحساب .. كيعلفوهم للعيد .. واحد لعبد الله و مراتوو و البقية ديالهم ..!
جبدو واحد وسطهم صردي .. وازن تبارك الله و صحييح ..! تعاونوو عليه و عولوو صافي غيذبحوه ..! حبيبة و فاطمة وجدو الما و البانيوات و الطباسل فين يحطوو و الكوردة باش يتعلق فين يتسلخ ..!
ملاك كتصور من بعييد .. كتموت بالخلعة من الحوالة و من اي كائن حي فيه الروح كتمشي .. من غير بنادم اكييد ..!
اجواء ديال الضحك و النشاط .. عدنان شادوو من كرونوو كيتصور معاه و يعيط على ملاك تكحز قدامهم تصورهم و تتصور معاهم و هي كترد بضحكة صفرة ..!
ملاك: من هنا الشوفة وااااعرة و لاهيلا غير بداو بسم الله .. انا معاكم بالفيديو ..!
حبيبة: دوزي عمري الما من السطل و هزي الكراطة تجري الدم لي غيسيل للقادوس .. قالك كنصوركم ..! ( شافت فحكيم و مشات حيداتلوو الجنوي من يديه و قالت ) و الله لا ذبحتي وا لا حطيتي يديك فيه .. و حنت حلوفي ..! مريض دوز تجلس بحالك .. شحال بيهم مجموعين هما يقضييو ..! ( خرجات عينيها فولادها ) طلقوونا يالاه ..!
و هكاك كان حط من يديه مربعهم كيشوف فيهم و يلعب ففموو بهدوء .. حتى تحرك جهة ملاك شد فيها جرها و هي مزيرة تا قال هاز حاجبوو ..!
حكيم: تخافي و أنا معاك ؟؟
حركات راسها بلا و ترخات .. ماشية معاه .. تا وقفها قدام الحولي كيدوز لها يديها على صوفتوو و وجهوو ..! و هي كتترعد مخلوعة .. و ما دازش بزاف جرها من شعرها لعندو كيهضر فوذنيها و وجهها قريب من الحولي كتقول شوية ما ينطحني ..!
خوتها ضايرين بيهم كيضحكوو و يصوروهم .. عند بالهم كيحيد منها الخلعة و يهضر معاها بالهداوة .. ما بايناش فيه ناتفها غيقلع لها الشعر من بلاصتوو و سنانوو مزيرين .. كيأكد عليها و يعاود ..!
حكيم: ما باغيش نتعدا عليك .. خليني معاك زوين ا ملاك .. قبل ما نقطع لمك داك اللسان لي كيتدخل فشي حاجة بعيدة عليه .. من الجذر ..!
ملاك:( ردات محرقة و ما مبيناش ) اييي صافي صافي و الله ما نبقى نهضر ..!
طلق منها ضاحك ببرود كيشوف فيها و هي وجهها رجع احمر غيطرطق و بزز منها ضحكات و قفزات مبعدة من حداهم .. مخلية محمد أميين و خليل شادينوو و عدنان كيسمي الله باش يدوز عليه ..!
ذبحوو ذبحة وحدة بلا ما يعذبوو .. و طلقووه مخليينوو كيتركل و حبيبة و فاطمة كيكبوو الما على جنابوو و يكرطوو ..! و يفرقوو اللغى ..!
حبيبة: وا دازت اياااام قاسحة ا لالة فاطمة .. نفرحوو مع بعضياتنا شوية .. تا حنا ما كنتجمعوو غير فالمصائب .. و دابا بعدا ملمومين على الخير .. حكيم ناوي يخطب و صح شوية و خليل تقبلات ليه الفيزا د الخدمة فألمانيا و محمد اميين تا هو عرسوو قرب .. كان كيتسنى غير خوه يولي شوية .. و الله يدومها فرحة علينا ..!
محمد اميين:( رد مقاتل مع الحولي باش يحيد الراس و الكرعيين ..! غير بسوفيطمة و شورط ..! ) با حكيم ..! خفتي نزيروك فشي زردة و لا ؟ ( ضحك و شاف فيه ) ا سيدي مبارك مسعود بالبنين و البنات ..!
حكيم:( حرك راسوو و رد بنفس النبرة د خوه ) ا سيدي الله يكبر بيك و الزردة المخيرة ديالك ..!
خليل: مبرووك ا خويا .. الله يسهل الامور ..!
محمد أميين:( هو الضحوكي و الزهواني فخوتوو ..! ضحك و قال ) هاذي عجباتك ا الألماني ديالنا .. القضية داخلة فيها الزردة ..!! وا شد داك الكراع معاك مزيان ..!
ملاك:( ردات بتكركيرة .. من بعد ما برد الدم فيها ) غير جبدتي ألمانيا ها هو غيقولك .. مي سي كوا صااا .. كتقتلوو الحيوان و تاكلوووه ؟ فين الانسانية و الضمير و حقوق الحيوان .. فين قطييييبي ديال الكبدة ههههههههههه
عدنان: هههههه صرعتيهم ..!
و هاذي هي الجمعة ديال الحباب و الخوت .. ما كاين غير قولها و ضحك عليها .. كلشي ناشط و فرحان من فرحة حبابوو ..! و بعييد على هاذ الأجواء .. جالسة شريفة من مور ما تهلات فأسية و رداتها كتلمع ..! مجمعة مع حكيم بالمسجات .. واخا كيتعطل شوية باش يرد عليها ..!
متحمسة تتعرف على عائلتوو عن قريب كثر و تعرف شكون جاي و كل واحد كي داير كراكطيرو و كيفاش كيفكرو و زيد و زيد ..! و بين فكرة تديها و فكرة تجيبها ..! تبسمات بحزن ..! شكون غيستقبل عائلتوو و ما كاينة غير هي و أسية لا غير ..!؟
فبحال هاذ المواقف فين كتحس باليتم و الوحدة ... كتحس بلي بصح هي مقطوعة من شجرة و ما عندها حد لي يوقف ففراحها و حزانها ..! شحال كانت كتسمع من البنات فالفيسبوك على الامهات لي كيجييو مع نسابهم على بناتهم .. كيولييو مقطرين لهم من العين تقول هو ولدها و فينما تشكي لها بنتها بيه .. تجي معاه و تخرج فيها العيب ..! تمنات تا هي تعيش بحال هاذ الاجواء و لكن للأسف ماشي كاع لي تمنيناه كيصدق ..!
تعلمات توقف على شغالها بيديها و ما تعول على حد .. و ديكشي لي كان نفضات راسها مزيان و دخلات للانسطا كتقلب على النكافات المعروفين فالرباط و سلا .. شافت شحال من وحدة سكريناتها .. و رجعات دخلات للفيس بفوكونط ديالها ..! سولات البنات فالجروبات و كلشي شكر لها نكافة وحدة معرووووفة ..!
تا قنعوها بيها و عولات تاخذ من عندها لبستها د الخطبة ..! ناعسة و كتفكر و تحلم بالخطبة .. تا صبح الصباح و لقاها واقفة بسبرديلة و كيطمة مكرفطة و عوالة على التكرفيس هاذ النهار .. شعرها قصييير كالعادة و النظاظر د الشمش فوق راسها .. كتشوف فاللباسي مع المساعدة لي عاطياها صوابها ..!
و شريفة معوجة فمها بغير اقتناع .. كل شوية تسوط و تقلب فعينيها ..! الصواب عاطيينوو و لكن ماشي ديال السمعة لي سمعات عليهم ..! تا حاجة من لي جبدولها ما عجباتها و مولات الشي ما ضرباتش تا الضربة عندها تشوف معاها ..! واخا كاينة و حاضرة فالبيرو ..! و غير دخلات وحدة مجبدة كتكسول بصندالة ديال الطالون و الشعر زعر مطلوق و الكلاس كيشقشق .. خرجات عندها كترحب و تعاود و دخلاتها لصالة بعييدة و بدات تجبدلها اللب د الحوايج ..!
الموقف لي خلى شريفة كتغلي فبلاصتها .. عضات على فمها و خرجات من تما كتسوط ..! يمكن الفلوس لي كانت غتحط شريفة يكونوو الضوبل و التريبل على الكليانة الثانية .. لو تعطاها حقها .. و لكن للأسف المظاهر خداعة ..!
هاذ الموقف غير ما خلى عينين شريفة يزيدو يتفتحوو على الواقع و على الناس و تفكيرهم كي داير .. زاد طموحها كبر كثر و كثر ..! ما حدها كتخلص فكريدياتها و الربح تا هو داخلها .. ما حدها كتفكر تزيد للقدام ..! الريسطوو دايرالوو الاشهارات على الجهد و خدامة عليه ليل و نهار .. تا تعرفات عند الناس ..! سيغطوو المحل جاي فبلاصة فيها غير الفيلات و الفرييع ديال الفريييع .. ما ساكن غير سيدي و مولاي لي فينما كانت عندهم شي عراضة .. بلاصة يمشييو يقلبوو على طريطور بعيد كيدوزو ياخذو كوموند من طاق طاق للسلام عليكم و يزيدو مع الطريق مرتاحين ..!
زيدهم على الناس لي كيجييو يدفعوو الفيزا فالقنصليات د السعودية و امريكا .. بلاصة ما يتسناو فطونوبيلاتهم كيجييو عندها للمحل .. عدد منهم خليجيين و أجانب .. كيعجبهم المحل المرة اللولة و يرجعوو ثاني هما و صحابهم .. شي كيعلم شي و الدعاية خدامة ..! بلا المدارس لي دارت معاهم الكونطراطات و الليفغيزون لي خدامة بالجهد مع البعاد ..!
محل ديال الناس الهاي .. الاثمنة طالعة و لكن تعرف تا عند لي على قد الحال .. خصوصا فرمضان من الفطورات لي كانت كتدير فابور .. و كل مرة خارجة ببروموسيون فشكل .. و تا دابا دايرة لي جا و طلب قبل من ثلاثة د العشية يخلص غير نص الثمن .. باش كلشي يكون فالمتناول ..!
كتطيح فالثمن لشي و كتضرب يديها ثاني مع لي مكيشوفوش فالثمن من الاصل و مع صحاب الشركات لي عجبهم الريسطوو و رجعوو يديرو عندها الاجتماعات و الصفقات ..!
على العموم .. مضبرة على راسها فالهموز و لسانها مسرح مع الناس ما كاين غير نعام ا لالة و نعام ا سيدي ..! تا من الكوافورة كل مرة معيطة لها على شوتينغ جديد بلي كوموند ديالهم بلا لي كوموند ديال الصالون نيت .. واخا امتانعات على الشوتينغ و ما بغاتش باقي تديرو فداك الوقت لي كانت غارقة فيه مشاكيل ..!
و من الموقف لي طاحت فيه ..! ما بقاتش قانعة بالريسطوو و الباتيسري لي عوالة تديرها مشروكة مع المحل .. غير حتى تتهنى من الكريديات لي عليها ..! لا ..! دابا تحلوو عينيها لضومين آخووور فيه الفلوس الصحيحة ..!
من ريسطوو تزيد باتيسري و من باتيسري تتوسع و تولي منسقة حفلات و افراح .. و أكيد الطريطور ما كتمشي معاه غير النكافة ..! و شكون يلقاو بحالها لا فالاناقة و الذوق و التاويل ...! و علاش لا من بعد تزيد حتى صالون و تولي سميتها معروووفة من بين أحسن لي ميكاب أرتيسط فالمدينة ..! يلا الشعر كتفنن فيه و لا غير الوجه كتصرعوو صريع .. تقول رسامة ..! شدات الحرفة على صغرها و كبرات معاها و علاش لا تخدّمها تا هي و ما تبقاش غير خازناها و حاطة رجل على رجل .. تقرا و تشد الديبلوم و تزيد تتعمق بلي فورماسيون و ها هي ناضية ..!
تحمسسسسسات شريفة حتى ما قدات .. داك الطاقة ديال الحماس و الخدمة لي جاتها هاذ الدقيقة ما بحالها طاقة ..! و حلفات بحلوفها تا توصل لهاذشي لي كتحلم ليه و كثر .. تا حاجة ما مستحيلة .. لي حفر كيوصل .. و تا واحد ما حسن من الثاني .. كيفما فلانة تعرفات و دارت المشاريع و ولا كولشي كيهترف بسميتها واخا ما تستاهلش .. تا هي غيولييو يذكرو سميتها فالطالعة و النازلة .. غير هي غتدير لي فجهدها باش تكون كتستاهل و ما تكونش من لي كيبداوها نيشان و غير يزيدو للقدام شوية .. كيقلبوها غش ..! لي غشك راه غش راسوو لا غير و هو لي ضايع ..!
و بنفس الطاقة ركبات فطونوبيلتها مديمارية كتقلب فتيليفونها .. تا صونالها فيديها نيت و بصوت مرح ردات ..!
شريفة: اوووه شكون تفكرنا ..! مدام سامية هاذ الغبرة ماشي ديالك .. توحشنا غير نشوفوو وجهك العزيز و نهضرو و نضحكوو مجموعين .. لا نتي لا للموسيوو بقيتوو تبانوو ..!
ردات برقة: غير سمحيلي ا حبيبة ديالي .. رمضان داز علينا قاسح و تسخسخنا معاه .. ما بقينا نشوفوو حتى واحد من صحابنا و معارفنا ..!
شريفة: سيفغي الله يحسن العوان مع الخدمة و الوليدات .. المهم نتوما مزيانين ا حبيبة ديالي ؟ و لاهيلا توحشتك غير تترخف عليك اجي عندي للمحل غيكون هذاك هو النهار الكبير ..!
تسمع عندها صوت الكلاكسون و فنفس الوقت قالت : و الله تا ندوز عندك .. البارح مع العيد ما حليتيش ياك .. درت غير طليلة و دخلت بحالي للدار .. كنت باغاك فواحد الموضوع ..!
شريفة: آمر ا الزين الله اودي ..!
تبسمات و ردات : كاين شي زين قدك .. اما حنا بدينا نكبرو و نعياو .. المهم يالاه هاذ اليوماين تفتحات داك الفورماسيون ديال الكوميرس " التجارة " لي كنتي باغى تتقيدي فيها ..! غير علمني صلاح ( راجلها ) قلت لوو يزيد سميتك و يتدخل لك يلا كان شي مشكل .. راك عارفة البلايص محسوبين ..!
شريفة:( ردات بسعادة ) ربي يخليك و لاهيلا فرحتيني .. يسحابلي غير نسيتيني ..! ضروري تدوزي عندي نشوفك و نعطيك الخلاص ديال الفورماسيون و فوطوطوبي ديال لاكارط ديالي
ردات عليها بهدوء : اوك مع ديك الربعة نجيب الولاد من المدرسة و ندوزو انا وياهم ... و عنداك الفورماسيون غتبدا من هنا شهراين .. راك عارفة كيفتحوو التسجال قبل باش الناس يكونوو على بال .. و راه باللونغلي و صحابها مغاربة جايين من كندا .. غيعطيوكم اللب ديال اللب د التجربة ديالهم ..!
شريفة: واخا ا حبيبة لهلا يخطيك .. ميعادنا فالعشية .. سلميلي على صلاح ..!
قطعات معاها .. شادة الطريق و عقلها كيفكر و يخطط .. حتى وقفات قدام .. السونطر أميريكان ..! هزات بزطامها ديال لي كارط و هبطات مطرقة الطونوبيل ..!
شريفة:( هازة راسها بثقة و داخلة ) مالها اللونغلي تغلبنا ؟ لهلا يحييها و يطول الزمان عليها ..! تخلعنا ؟ اودي غير تكون سبع و تاكلني كاع ..! ( بابتسامة قالت للبنت لي فالاستقبال ) عافاك بغيت نتقيد فشي سيسيون عندكم د اللغة .. تبداو معايا من الزيرو .. يعني من لاباز ديال لاباز ..!
استقبلوها و عطاوها من وقتهم حتى تقيدات .. حاطة فلوس صحيحة تما و واخا هكاك فرحانة .. المهم غتستافد شي حاجة ..! و مع كملات صونا تيليفونها ثاني ..! حركات راسها بابتسامة للبنات و خرجات كتجاوب ..!
شريفة: الوو وي ..! سي مصطفى صافا ؟ طرونكيل الحمد لله .. مشيتي للمحل و لا باقي ؟ اااه مزال ..! المهم بلا ما نوصيك .. غتدخل بحال أي كليان عادي ..! و طيسطي ليا كولشي ..! شوف الاستقبال كي داير و السيغفيس واش مزيان و لا عيان .. طلب لهم شي حاجة ما كايناش و شوفهم واش غيديروهالك و كيفاش غيتصرفو معاك ..! نتا عارف شغالك ما نزيدش نشدك .. فالعشية يكون عندي الرابور كامل .. ميغسي بون جوغني ..!
قطعات معاه كتتنهد ..! هاذ الايام مشغولة و غتغبر على المحل .. ماشي ديما غتكون مسالية باش تشوف الكاميرات و تبحث فالشادة و الفادة ..! لقات هاذ الطريقة لي غتنفعها بزاااف .. و هي تجيب ناس بعاااد عليها كليا .. كتخلص عليهم كاع لي طلبوو و هما كيطيسطيو كلشي و كيعطيوها تقرير مفصل ..! و بيه هي غتتكلف و تعرف شكون تخليه خدام معاها و شكون للباب و شنوو ناقص تصلحوو .. و هي غادية ..!
ركبات راجعة بحالها للدار .. دارت مناقص من شي نكافات و من شي لباسي .. غتجبد باليزاتها و تختار غير من لي عندها و تنوض نايضة .. على ما يصوني عليها حكيم باش يمشييو يقلبوو على الدار د الكرا و يدوزو يختارو الخاتم ..!
حكيم لي ما بقاش هز التيليفون فخطرة ..! على الصباح هبط لكازا عند العميد لي قرب يخرج تقاعد .. علموو بلي هو لي غيولي بلاصتوو و غيترقى فخدمتوو ك " عميد ممتاز " .. تقديرا لمجهوداتوو و على شحال من عملية كان هو السبب باش قبطوو عليهم ..! و ماشي غير هو عدد منهم .. كتخرج ليسط بالسميات و التعليمات كاملة و لكن ضروري ما كيدوزو من كونكور كيكون شكلي فقط و بعدها كيرقيوهم ..!
خذا المعلومات لي خاصاه بما أنوو ما بقاش موقف من الخدمة و الشهراين فاتت .. دافع دابا غير شهادة طبية حتى يولي شوية و يرجع لخدمتوو ..! و لكن لي خلاه يمشي لكازا هو شريفة ..! متأكد مليار فالمية الموافقة د الزواج غتتعكس .. ضروري من حسن السيرة من عند البوليس .. و تما غيطلعوو ضوسيها بلي فايتة مدوزة الاصلاحية .. عاد فمعلوماتها الشخصية .. طليقها تشد بتهمة تهريب المخذرات و ورقتوو كحالت ..!
و هنا غيدخلوو فسين و جيم و ما غيقبلوش يعطيوه الموافقة د الزواج .. واخا يطير و ينزل ..! عارف هاذشي مزيان و شاربوو ما .. و عارف حتى الطريق لي خاص يمشي منها و الناس لي يهضر معاهم .. باش يدير الما منين يدوز و يرصي الامور .. قبل ما يطيح الفاس فالراس ..! و الموافقة كتتعطل .. كاين لي كيعطلوهالوو من عام تال عامين و شوف تشوف و كاين لي كيبقى حاضي ضوسيه و كل مرة ماشي عندهم كيزربهم .. و تما تقدر تخرج فست شهوور او قل ..!
بلبستها الهماوية .. فالغوز بيبي محجرة و مخدومة بذوق رفيع ..! واقفة كتشوف فالمرايا ..! جاتها عبار مع فصالتها .. محزمة بمظمة د السقلي الحر .. و طالون عالي فرجليها ..!
الشعر خلاتوو قصير حدها نشفاتوو و سرحاتوو ..! لافرونش لي طوالت لها شوية هابطة على عينيها .. و خيط الروح كيلمع فجبهتها ..! دايرة مكياج خفيف بزاااف ..! ماسكارا مجبدة شفارها و خط د الأيلاينر جاي مع عينين الغزال كيفتن ..! ايشادو خفيف فالغوز بيبي ما كيبانش .. و كلوز كيبري فشفايفها تا هو فالغوز .. مع تزنيكة فالحنيكات ..!
دايرة لي براصلي لي كان جابلها حكيم فالمخيم .. بثلاثة بيهم فيديها .. و سنسلة صغيرة فعنقها فيها القلوبة فالكحل و هابطة عليه وحدة ثانية طويلة مظفورة تال صدرها مع حوالق صغار بحال الحبة فوذنيها ..!
الفرحة باينة من عينيها و من صوتها لي كيدندن لأسية ببحة كتقيس القلب و احساس خارج من اعماقها ..!
شريفة:( كتطبل بيديها و تغني ) ليلة الخميييس و الفرحة عندي في دارنا .. عروسة و عريس و مرحبا يا جيراننا .. انفرحوو و نسعدوو ليهم .. يا ربي تكمل ليهم .. انفرحوو و نسعدو ليهم .. يا ربي تكمل ليهم .. اليووووم ليييلة الخميس و الفرحة عندي فدارنا ..!
أسية:( واقفة بالبلدي تا هي كتطل من الشرجم .. حتى بدات كتنقز فبلاصتها ..! ) جاااااو جااااو جاااااو .. ناري شحال بيهم اححح على خويا حكيم كي طالع ..! اجي تشوفي ..!
رمشات شريفة عينيها فأسية و بقات ساكتة و مرزنة فبلاصتها .. قلبها كيضرب فوذنيها و كرشها مكمشة عليها بالخلعة .. بدات تعراق و يديها يترعدو .. بحال اول مرة غتشوفوو ..! ما قدراتش تنوض تطل عليهم .. كتقول غير غنوقف غادي نجي مزدوحة .. برجلي لي كيلعبوو تحتي كي العجينة ..!
كلشي كيدوز عندها ثقيييل .. بحال يلا مخشية فشي قرعة و شاديين عليها .. الهضرة و الحركة كيدوزو عندها بالعرض البطيئ ..! ما عرفاتش فوقاش خرجات أسية تستقبلهم هي و الحجامة لي توصى و تأكد عليهم يكونوو كاملين رجال ..! شريفة ما بقاتش كتيق فالبنات فخطرة .. يلا ما ضروهاش غيعطيوها لها بالعين تا تجلس فالركنة ..!
صالون بلدي كبير واسع مفرش بطلامط الخريبة فالصفر كيعشقوو فالشوفة ..! الطبالي د الأرز منقوشين و تقال هما و لي كوطي فجناب الصالون و الصوندريات الصغار ..! ريحة العود عاطية من مبخرات الكبار المذهبين لي محطوطين فوق الدربوز ..! و الزهر مقطر على اليد كيترش عليهم مع الدخلة من عند أسية .. لي ولات حمرة غتطرطق بالحشمة بوحدها و لكن ما عندها ما تدير .. هذا هو الوقت فين توقف مع شريفة ..!
شريفة لي بزز ناضت و خرجات عندهم تسلم عليهم ..! طاحت عليها واحد الحشمة و الخلعة تا عينيها دمعوو و تزنكات كثر ما هي مزنكة ..! جامعة شوية من لبستها بيد وحدة و مميلة راسها بابتسامة خفيفة بزز كتبان ..! الصالون عامر و بالدهشة لي طاحت عليها من السما .. دازت كتسلم بلا ما تهز عينيها و تركز فشكون حاضر و شكون لت .. عاطيهم الصواب و هي مضهشرة ..!
حتى وصلات لراس الصالون فين جالس حكيم ..! حكيم لي بحال يلا أول مرة غتشوفوو و تهضر معاه ..! حتى من يديها تقالت عليها باش تمدها لوو ..! ما فهماتش هاذ الاحاسيس لي جاوها مناش .. و لكن فهاذ اللحظة بالذاث بغات تبكي ..! خنقة زيراتها فصدرها .. و مع زيرلها على يديها كيحرك راسوو بابتسامة .. هبطات دمعة من عينيها ..!
دمعة و تبعاتها شهقة ..! الاحاسيس لي تجمعوو عليها خنقوها و كان لا بد تخرجهم و لا غتبقى مريضة فالجلسة كاملة .. واخا ما كانوش احاسيس خايبة بالعكس كيقيسوو القلب بزااف و كيخلييوه يرجف كثر من القياس ..! يمكن حيث صدق معاها راجل و صبر عليها و على كاع الخايب فيها و ها هو دابا فقلب دارهم هو و عائلتوو .. مكبر بيها و معتارف بحبوو ليها قدام العالم و باغي يكمل حياتوو معاها ..؟
دمعة هابطة من عينيها و هي معوجة راسها شوية و شنافتها مدلية ..! كتبان أميرة فعينيه بدلالها و شقاوتها و كلشي فيها .. نوارة الحدود ديال حكيم .. حكيم و بس ..!
مد يد وحدة طبطب بيها على ظهرها .. وجهوو قريب لعنقها و بصوت خافت و حنين قال ..!
حكيم: ششش ..! مالنا ؟
هزات كتافها بمعنى والوو و فنفس اللحظة رمشات فحبيبة لي واقفة بشعرها القصير فلاكاجوو مطلوق و لبسة جوهرة فالابيض مخيطة على حقها بالسفيفة د اليد ..! دايرة ذهبها الوازن و من وجهها كتبان بكوشة و ظريفة ..! تبسمات فوجه شريفة تبسيمة فكراتها بزمااان و غير فتحاتلها يديها مشات عندها عنقاتها بالجهد و بمعزة خالصة من القلب ..!
تعنيقة خلات حبيبة عينيها يتغرغرو و هي كتفكر شنوو دوزات شريفة مع امها و شحال كانت عزيزة عندها و كتمنى ربي يرزقها ببنت بحالها ..! و نفس التعنيقة خلات شريفة تتفكر شحال كان قلبها كياكلها ماكلة و كتحسد حكيم و خوتوو على ام بحالها .. و كتتمنى كن كانت تا هي بنتها ..!
حبيبة:( ضحكات و بعداتها شوية عليها كتمسح دموعها و دموع شريفة الخفاف ..! ) هاذي نفسها شريفة لي كانت كتجي عندي بالظفيرة و الكرطابل ؟؟ هههه تبارك الله و الصلاة على النبي عليك يا بنتي الغزالة .. عروسة كتحمق ما شاء الله الرحمان ( زادت عنقاتها و شافت فولدها ) صافي ولات ديالنا دابا ماشي غير ديالك ا المرضي ..!
شريفة:( ضحكات براحة .. و شحال كانت متوثرة من اللقاء و بمعزة شدات فيها و ردات ) الله يكبر بيك ا خالتي .. عويناتك لي فنين ما شاء الله و كيشوفوو كلشي زوين و غزال ..!
تبسمات معاها و دارتلها بلاصة حدا حكيم ..! حكيم لي جالس فبلاصتوو هاز سروال د التوب فالبلوو غوايال .. من جهة فخاضوو شوية ..! موسع بين رجليه و حاط يد على فخضوو و اليد الثانية فوق المخذة .. كتبان فيها ساعة د روليكس فالنقري كتلمع ..!
قاميجة فالابيض مفتوحة من العنق و شعيرات خفاف من صدرو كيبانوو ..! صدرو عريض و صحتوو عامرة و وازنة واخا طيح بزاف على لي كان و لكن باقي كيبان صحيح .. غير من القاميجة لي مطراسية و مزيرة مع يدييه ..!
مرة مرة كيلعب بلسانوو ففمو و يقشر شنافتوو بالهداوة ..! بشرتوو مايلة للسمورية الفااااتحة .. حروفوو كوحل من شعرو لي رجع ضرب ليه الواحد و مطراسيها كالعادة مع جبهتوو مزيان ..! ل اللحية لي خلاها خفيفة و نقية ..! لحجبانوو الكثاف و عاليين بحال الجناح ..!
عندو حضور قوي .. كاريزما .. شخصية و هبة ..! و حتى وسامة و لكن حرررشة من النوع لي تشوفيه و تقولي زينوو عادي و لكن حرش الشوفة ما تزعميش تكمليها فيه .. غير من حركاتوو الثقال و كيفاش كيهضر و يحرك ملامح وجهوو .. يذوبك فبلاصتك ..!
كيفما ذابت شريفة و هي كتشوف فيه بنص عين و قلبها كيزدح غيسكت كثر من اول مرة شافتوو و عرفاتوو ..! عرقات يديها حتى بدات كتمسحها فاللبسة بلا ما تعييق و ابتسامة خفيفة كتوزعها على الناس لي حاضرين .. و لي منهم خوتوو كلهم أكيد .. و اشخاص آخرين ما عرفاتهمش ..!
حنات راسها ساكتة كتنحنح و تسرح حلقها بالشوية .. و الحجامة خدامين كيفرقوو الما عليهم ..! تا حسات بيديه كتقيس فيديها بالحس .. تبسمات عاضة على فمها ما كتشوفش جهتوو .. هازة راسها فحبيبة كتتبادل معاها الهضرة بابتسامة خفيفة .. مرة مرة تحرك راسها و تفتح عينيها بتفاجئ موسعة بؤبؤ عينيها .. و اليد الثانية كتتحرك بثقالة كتشرح بيها بملامح سعيدة و مرتاحة ..!
الصبعان تلامسوو بيناتهم حتى تشابكوو و زير على يديها تا رجف لحمها شوية من برودية يدييه مقارنة مع سخونيتها ..!
و بنظرة خفيفة شافت فيه لقاتوو هايم فيها و بنبرة صوت هادية تسمعها غير هي قال ..!
حكيم: الزواج رزق لي وصلوو غرق ( بابتسامة واضحة ) و أنا غرقت ..!
حرك صبعوو مع كف يديها و هي حشمانة و مرزنة قدام الناس و الضحكة غتنقز من عينيها بالفرحة و فرحة الحلال ما بحالها فرحة .. خصوصا مع الانسان لي نتا باغيه و شاريه بمال الدنيا ..!
نشوفك جايا يرجف قلبي و تضحك عينيا
نبغي نكلمك و نخاف كلامي يغدر بيا
سحرتيني خطفتي قلبي ربي لي عالم بيا
من شوفة عينيك ماعرفت شنو صرالي
عيني مبقات تنام وليت نشوفك فالأحلام
روحي عاشقاك و قلبي بحبك راضي نتي حبي و ناسي و أرضي و بلادي
طمع عما عينيا و عيشتي حرارت ليا
درت جهد جهدين مبغاش حبك ينتسا ليا
يا شريفة حني فيا نتي بوحدك لي عارفة ما بيا
Malik amir
الزين غير مطلوق و الاناقة حاضرة لا فالرجال لا فالعيالات و البنات ..! حضرو فالخطبة خوت حكيم كاملين .. زيد عليهم بسمة مرات محمد أميين و عم حكيم لي فمثابة باه .. جوج خوالاتوو ببناتهم و اكيد حسام لي ماشي غير صاحبوو راه خوه لي ولداتوو ليه الدنيا .. معزتوو بوحدها .. محسوب من العائلة و كثر ..!
نحنح العم و قال بجدية مقاطعهم على الهضرة و مقاطع أسية من النظرات المسروقة لعدنان كتحاول ما تخليهش يحس عليها ..! كان مشى من بالها من لي وقع و قالت نساتوو .. و لكن غير رجعات شافتوو حسات براسها كلها كتفتف و مخلوعة غيهبطلها الطونسيو و تجي على وجهها غير من حضورو ..!
العم: الحمد لله لي تجمعنا معاكم فهاذ الساعة المباركة .. لي نتمناو ربي يدومها عليكم افراح و مسرات ( بضحكة ) و تعرضونا ..!
محمد أميين:( ضحك و رد ) غير ما تنساش الكادو ا العميم .. اما بلاصتك واجدة حدا البرزة نشد انا و ياك البريات د الفلوس نخبعوهم لحكيم بلا ما يتقلولنا الباشا ديالنا ..!
العم:( ضحك و قال ) هههه الله اوووودي حنا فالخدمة ..! ( رجع نحنح و بجدية كمل ) سيدي حكيم و لالة شريفة .. تجمعنا اليوم باش نباركو لكم فهاذ المناسبة السعيدة و نتمناوها تكون فاتحة خير عليكم .. نتوما متافقين بيناتكم و حنا ما تسالونا غير الله يبارك ..!
حبيبة:( تبسمات و قربات لشريفة شدات فيها ) طالبين راغبين فلالة لبنات لولدي سيدي حكيم سيد الرجال .. ما غنزوجش غير ولدي .. لا .. غتتزاد عندي بنية اخرى مع خواتاتها بسمة و ماري ان شاء الله .. و من هنا نقولك قداموو .. يديرلك شي حاجة غير اجي عندي و رجعي اللور .. يلا ما جبدتلوش الوذنين راني ماشي لالة حبيبة ..!
شريفة:( ضحكات بخفة و باستها فحنكها ) لهلا يخطييك ..!
بالثقالة حركات شريفة عينيها لواحد من الحجامة .. حتى غبر شوية و رجع جار هو و واحد ثاني طبلة متوسطة ..! فيها مشموم د الورد ما كبير ما صغير .. كتتشم منوو ريحة طبيعية زوينة ..!
بواطات ديال الذهب فالاحمر مفتوحين ..! فيهم كوليي ديال العنق عاطي لعين .. مرشوم و منبث فالرشمة بالاخضر و الاحمر جاي كيحمق ..! و معاه السرتلة ديالوو بنفس الرشمة و لوون التنبيتة ..! و الحوالق تا هما بحجيرات بين الاخضر و البيض صغار و مضورين بحال شكل الرشمة .. كيتشدو بالطراقية من اللور ..! و خاتم ديالهم حتى هو بنفس الشكل كمالة ديال الطقم ..!
عاد بواطة ثانية فيها ساعة يدوية أنثوية من الذهب و فالجنب د الزاجة جايين ثلاثة د الحجيرات كيلمعوو ..! و معاهم خاتم الزواج .. من الذهب الابيض و بولة وسطوو كتلمع باينة من الاحجار الكريمة ..! خفيف و كلاص .. عاطي للعين بزايد ..! و آخر بواطة فيها خاتم حكيم لي تا هو فالابيض مع رشمة كحلة ..!
سينية فيها جوج زلايف د الحليب و طبسيل د التمر فوق منوو قبة من الكركاع ..! عاد لاطاغط د الخطبة فالابيض مخدومة باللوز و الكركاع .. مكتوب فيها " خطبة مباركة .. شريفة ♡ حكيم ..! "
وقفات اسية بابتسامة مدات زلافة د الحليب لحكيم و العينين كلها عليهم و الكاميرات خدامين كيصورو ..! قربلها الزلافة لشفايفها لي غير حطاتهم هازة عينيها فيه و بعدات ..!
رجعات عطاتوو حتى هو شرب جغيمة ..! و بعدها دازو للتمر .. عضات براس سنانها و كمل هو التمرة ..!
حبيبة: الله يخلي ديما حياتكم بيضة كي الحليب و حلوة و معسلة كي التمر ..!
ردو بأميين و رجعات أسية مداتلوو الكولي ..! حط يديه على ظهرها و حك عليه بابتسامة تا عطاتوو بالجنب .. حيدلها لي دايرة و ركبلها الكوليي لي جا كيلمع فعنقها .. نخوة على نخوة ..! أنفاسوو كتحسهم سخان على عنقها و صبعانوو مرة مرة كيدوزهم على لحمها بخفة تا كتقفز .. ما شد داك الكولي و بعد تا ربي غفرلها ..! وجهها رجع ماطيشة كتضور فعينيها و غير ما زاد السر طاح عليها و قالوو مسكينة حشمانة ..!
و غير حط يديه على الشحمة ديال وذنيها وحكها بصباعوو بجوج .. مثقل و مرزن فحركاتوو و هي كتفيبري بوحدها ..! زطمات على رجليه بالطالون تا عض على فموو و تحت سنانها قالت ..!
شريفة: غير خلي الحوالق نركبهم من بعد ا مولاي السلطان ..! ( شافت فيه كتخرج عينيها )
حكيم:( ضحكوو عينيه و خلى البواطات كاملين كيفما هما .. هز غير الخاتم .. ركبولها و باسلها يديها تحت التصفار د خوتوو و الكاميرات لي كيصورو ..! هز عينيه فيها غمزها بابتسامة جذابة ) للدوام ..!
حكيم:(هز عينيه فيها غمزها بابتسامة جذابة ) للدوام ..!
تبسمات بعينين كيلمعوو و هزات خاتموو شادة فيديه كتشوف فيها .. حمرة بالنقى و ضفارو مقطعيين و مبروضين ..! يديه مشعرة بطريقة كتجذب العين و زايدينها العروق الخفاف لي فيها .. جاذبية على جاذبية ..!
ركبات لوو الخاتم بهدوء و هزات راسها فيه بهدوء و بابتسامة خفيفة حركات راسها بخفة كتمعني ليه يهبط عندها ..! و غير تحنى جهتها باستغراب ..! حطات يديها على جناب راسوو من جوج جهات .. و باستوو فجبهتوو برقة .. بوسة حنييييييينة لخصات فيها شحال من حاجة ..!
شريفة: فالحلوة و المرة ان شاء الله ..!
تبسمات و هو كيشوف فيها بتفاجئ ما كرهش يعنقها ..! يخشيها فقلبوو و يسد عليها فخطرة ..! كن ما كانوو عائلتوو لي منهم حمقوهم ككوبل و منهم لي حشموو و بداو يضورو فعينيهم ..! ما يترددش يديرها .. و لكن لكل مقام مقال ..!
اكتفى يزير على يديها وسط يديه ..! حتى تمد لهم الموس باش يقطعوو الحلوة ..!
تقطعات الحلوة و وكلوو بعضياتهم و البقية تكلفوو بيه الحجامة و تفرق على الناس هو و العصائر و لي طاغط سواغي .. بلا دواز د أتاي الحلوو و المالح مع كاس د اتاي منعنع ..! الشعبي مطلوق و كلها فين مجمع بالهضرة و التصاور ..! العزبات كيشطحوو و لي عندها شي شعر حضراتوو و الحجامة غاديين جايين مقوميين النهار على حقوو و طريقوو ..!
كلشي مرصياه شريفة و حكيم لي ما خلاهاش تطيب و تهلك راسها بتمارة .. كلشي وصل واجد من لي غيتحط فالعشية تال للعشا .. لي اختارو يكون بلدي بحال المعتاد ..! نص حولي مشوي فكل طبلة مع الخضرة مسطوكية و القوام لي كيمشي مع اللحم .. من زيتون و قرعة معسلة و زعلوك ..! و بسطيلة ديال الدجاج كتذوب فالفم .. خاتمينها بالكلاص و الديسير ..!
حكيم:( حرك صبعوو فكف يديها لي فاتحاه ليه و هو كيخطط فيه بهدوء .. مرة ترميلوو كليمة مرة هو .. ما بقى لهم والوو و يمشييو بحالهم من بعد ما تعشاو ..! ) نهضرو فالمفيد ..!
شريفة:( هزات حاجبها و ردات كتطنز ) اييه نهضرو ا مولاي السلطان فالمفيد .. من دابا نقولك انا ما عنديش الرجال لي يبرزولي مبندين و العيالات غاديين جايين عليهم .. باش تكون على بال و تجمع راسك ا سي ..!
حكيم:( ضحكوو عينيه و هز حاجبوو ) ياك ا مدام ؟
شريفة: هههه معاك بصح .. ما غنبرزش انا و نبقى مبندة للبشر حاضيني فالطالعة و النازلة .. ها هي ضحكات هي هي كحات ها هي دمعات .. ييخ ..! فمي يتكوانسا غير بالضحكة الصفرة و فلخر ما يعجبهم العجب ..!
حكيم:( ضحك ضحكة خفيفة و قال ) بالله ما منك جوج .. سبحاااااان من خلقك ..!
شريفة:( رمشات عينيها و قلباتهم للسما كترفرف بيهم ..! ) عارفة ا الزين ديالي .. خاصك تدير شي حجة و تبقى غير تحمد الله و تشكرو فيها لي سيفطني فطريقك ..! و فينما تشوفني تكرفط بالله يبارك فعمر لالة ...!
هرباتلها الضحكة تا مالت عليه كتفرنس و تضحك .. ضحكة مكركبة ..! و هو مبسم معاها كيشوف فالحمقة لي بلاه الله بيها .. و كان احسن ابتلاء فعينيه ..! جالسين فبيت بوحدهم و البقية فالصالون كيوجدو راسهم يمشييو بحالهم ..! حشموو يدقوو عليه حدهم صوناو لوو علموه و ناض وقف ..!
حكيم: هو هذا .. حتى نرجع من بعد ..!
حركات راسها بالايجاب و هو مقرب عندها يسلم عليها .. تا غفلها و جرلها شنايفها بمصة مغذذة و ختمها بعضة .. مخليلها فمها كيضرب ..!
حكيم:( حك شفايفوو مع بعضياتهم و يديه شابكها مع ديالها جارها معاه لبرا تسلم على العائلة ..! ) دابا عاد نقولوو مبروك ..!
شريفة:( سلتات لها الضحكة و ضرباتوو لكتفوو ) باااااز ..!
هز حاجبوو فيها كيضحك و فتح الباب و مع الفتحة بانتلهم أسية غادية فالكولوار هازة كاس د الما ..! بالضورة باش غتضور دخل فيها عدنان حتى تكب عليه كاس كامل .. رجعات القاميجة د الكوبوو مارون لي لابس كتقطر .. و أسية وجهها حمر كتشوف فيه مخلوعة و حشمانة .. واخا هو لي دخل فيها بلا ما ينتابه ..!
أسية: سم سمممحلي سمممحلي .. ما قصدتش ..!
حطات يديها على صدرو كتنفضلوو تالفة .. تا رجع خطوة اللور هاز يديه بجوج فالسما باستسلام ..!
عدنان: صافي ما وقع والوو .. أنا لي مني الغلط كنعتاذر ..!
شاف فعينيها لي بحال نقطة د العسل كيلمعوو و يتحركوو بخوف و رجع قلب الشوفة كيتلف الموقف تا سمع صوت حكيم قبالتوو ..!
حكيم: ما عقلتيش عليها ؟ ( شاف فيه عدنان باستغراب و حكيم حط يدو على كتف أسية بحال يلا معنقها ) أسية بنت دار **** .. وااايلي ا صاحبي شحال لعبتي معاها و هزيتي فيها و هي صغيرة ..!
عدنان:( رد و هو كيحاول يتفكرها ) ما بقاتش فبالي كاع .. دازو سنييين دابا ( بابتسامة ليها ) مشرفين و سمحيلي مرة اخرى ..! كملتي ا حكيم ؟
حكيم:( حرك راسوو بنعم ..! ) يالاه مشييينا ..!
وقفات الطونوبيل فشارع كبير و نقي ما كيتسمعش فيه حس الصداع ..! طونوبيلات خفاف مبلاصيين حدا الشجر لي مغروس فالدرب .. مظللين من الشمش ..!
هبطات شريفة و تبعها حكيم .. شدات فيديه كتسرح عينيها فالعمارة لي قبالتها ..! كبيرة و متيسعة فيها الدخلة بالدروج مزلجين .. و الباب كبيرة د الخشب و الزاج كيبين ..! الارض مزلجة بزليج بلدي هي و الحيط لي لاسق مع الباب .. و تما حافرين نيت واحد المربع مزلج دايرين فيه التراب و غارسين الورود ملونين ..!
فتح الباب بالساروت و دخلوو .. طلعوو فالسانسور تال الطبقة الرابعة .. فين كاينة دار وحدة بباب د الحديد صحيحة ..!
شريفة:( حيدات النظاظر كتتنهد ) سخفت بالطريق واك واك الحق .. وليت كنغفل عين كنلقى راسي نعست .. ما كنشبعش راحة كاع غير جري عليا نجري عليك ..!
حكيم:( رد بهدوء كيحط السوارت ) نتي بغيتي ..!!! المحل و الباتيسري كتوجدي فيه .. السونطر أميريكان و الفورماسيون ..! فين غادية ؟ حنا و ما بقيتيش تلقاي لنا الوقت ..!
شريفة:( تبسمات بخفة و قربات منوو عنقاتوو و باستوو فحنكوو ) الكبيدة ديالي نتا .. ديما فالبال و لكن بصح عييت اوووف .. الكاميوو كان تابعنا ياك ؟ غيكونوو وصلوو دابا كيطلعوو الفراش ..!
حكيم: سي ..!
خلاها جالسة فالصالون لي كيصفر خاوي .. فيه غير شي كراسة ديال ميكة لا غير ..! دخل هو للكوزينة لي فيها شي حاجة قليلة د المواعن .. عصر فالعصارة د القهوة .. كاس ليه و خرج لعندها من مور ما سمع الدقان و الهضرة ديال المعلمية لي جايبينلهم الرحيل ..!
شهر و نص داز على الخطبة و من تما و هما خايدين .. حكيم تزادت عليه الخدمة ما بقاش كيسالي فخطرة .. جالس فبوسكورة و حلف لا بقى حط رجليه فدارو .. طلقها للبيع حتى جابت الثمن لي تستاهل و باعها بكلشي لها ..! و رجع قلب على دار جديدة تعجبوو هو و شريفة حتى لقاو هاذي و شراها كاتبها فسميتها ..!
واخا عييات تتحجج و تبعد و لكن أصر تكون فسميتها و هذاك هو صداقها عندو .. غيحلل بشي حاجة قليلة و الدار ها هي ديالها ..! دار بجوج طبقات موسعة يجري فيها الخيل .. حط فيها فلوس صحيحة نيت ..!
كل مرة كيشريو حاجة على ما يسكنوو فيها فخطرة .. تا واحد فيهم ما كيسالي يحك راسوو و يشوف شنوو ناقصوو .. حكيم مرة مرة كيجيه داك الحريق و كيمشي .. بحال يلا ذاتوو ولفات عليه .. عيات شريفة تعطيه فالوصفات و تا حاجة ما نفعاتوو و خلاتوو يرتاح فخطرة .. و ها هو مكابر مع الوقت كيتسنى غير يطلق هو و كريمة و يدفع الوراق ديال شريفة للخدمة باش تخرجلهم الموافقة د الزواج ..! فبحال هاذشي كيمشييو غير المعارف لا غير .. اليوم انا نسلكك .. غذا غنوقف عليك نلقاك .. ما غتخدمليش حتى انا غنعصرك و هي غادية ..!
شريفة:( مشات حداه و قالت ) فوقاش الجلسة ؟
حكيم:( شاف فالساعة و قال ) واحد الساعة و نص هكاك .. يكملوو و نخرج نتوكل .. و نتي هانتي فالدار بيناتنا التيليفون ..!
شريفة: واخا الله يسر الأمور و هاذ المرة ما تزيدش تتأجل ثاني ..! ( عقدات حجبانها ) تا هاذ القاضي ما لقى فوقاش يدير كسيدة تا بغى يطلقكم ..!
حكيم:( ضحك باستهزاء و سكت )
*************************************
كتقلب فحوايجها بعصبية و وجهها حمممر بالفقصة ..! كرشها مقنبلة حداها و مقبلة يعني ما بقى لها والوو و تولد .. لابسة جلابتها و شعرها مخربق شوية .. كتقلب و تعاود على الخدمة د الشوافة لي عوالة عليها فهاذ النهار ..!
شحال و هي حاضنة عليها و نهار وقفات عليها .. تقول تشقات الارض و بلعات داك الزبل ..! كتشوف الوقت زحمها خاصها تخرج دابا يالاه توصل للمحكمة .. و ما عندها ما تدير ..! لوات على شعرها شال قاجاه فعنقها بالفقصة .. كتزدح فرجليها تال برا عند باها لي داير امارش للطونوبيل كيتسناها ..!
الطريق كاملة و هي ساكتة كتدمع بوحدها و مرة مرة تقيس صدرها تتأكد من الحجابات واش باقيين لها تما على الله يحننو قلب حكيم عليها و يديرولها القبول معاه ..!
طول ما هي مع باها ما نطقاتش بكلمة و تا هو نفس الشيئ .. تا تسمعات سميتها من عند الشاوش و دخلات للجلسة و موراها بشوية وصل حكيم و دخل كيسمع للقاضي لي كيقرا فالمقال ديالوو ..!
كلام كثيييير فيه حقوق كريمة و النفقة ديال بنتها لي غتخرج لحكيم غير تولد على خير و يبدا يعطيها لها ..! و ختم كلاموو ب
القاضي: رمي عليها يميين الطلاق ..!
حكيم:( رد ببرود ) مطلقة و محرمة عليا ليوم الدين ..!
شاف فيها بنظرة خالية من اي احساس .. أما هي فبحال يلا تخشى فيها موس حاااامي و حرقها من الداخل ..! دموعها طاحوو شلال على وجهها كتغوت بقهرة و القاضي كيسكت فيها محمر عينيه على الصداع ..! و بين هذا و هذا كاين الأب لي كيعز حكيم فوق القياس و بقى فيه من الحالة لي وصل ليها بسباب بنتوو .. خصوصا فاش وراه محمد أميين تصاورو كيف كان فداك الفترة .. من بعد ما تلاقاه .. لكن ما فاليد حيلة و هو براسوو مغلوب تحت أمر مراتوو و بنتوو ..!
بنتوو لي سمعها كتخطط هي و صاحبتها باش ترجع تآذي هاذ ولد الناس لي عمرو وصلوو و لا أذاه .. و بلا ما يفكر خلى حتال الليلة بليلتها د جلسة الطلاق و رمالها خدمتها كلها فالزبل ..!
الأب:( دمعة خفيفة نزلات من عينيه كتحفر فالتجاعيد لي خلفوهم السنين ..! ) الله يسمحلنا منك ..!
***************************************
هزات راسها فالسيرفور لي كيحط لها هي و سامية شنوو طلبوو ..! قبالتهم البحر و ريحة الحوت دخلات لأعماق أعماق شريفة ..! هزات نص حامضة عصراتها على الكلامار و قالت
شريفة: امممم زبدة زبدة يا ختي هووف درتيها زوينة فاش صونيتي عليا .. كنت جالسة غير بوحدي فالدار قنطانة ..!
سامية:( هي لي عاوناتها فالفورماسيون ..! ) تانا جيت لكازا هربت من الولاد و الراجل قلت نجلس شي سويعة د المكانة نرتاح .. طلعلي داك الرباط فالراس ..!
شريفة:( ضحكات و قالت ) وا كولي كولي ما حدو سخون ( ردات النفس ) ناري يا صاحبتي شحال رجعت كناكل .. تنخفت وليت كي البابور .. عاطياها غير للملوحات و الحموضات .. و لي يشوفني ما كنجلسش من الجرى يقول هاذي غتكون بحال العود ..!
سامية:( ضحكات ساهية و قالت ) بصحتك خيرك و كيبان عليك ..!
شريفة: وايييه و لكن جاهدت فراسي بلا قياس و عيييت حتى حكيم مسكين ما بقيت عاطياه وقت .. كنجي من الزنقة كنطيح ننعس ديريكت و هو هنا فكازا ما كيصلاحش ليه يجي عندي لسلا ديما ..! و نكذب عليك و الله تا كنهلكوو راسنا بيدينا .. انا لي قدامك .. الخاطر و لا عندي فوق ضيق للهيه و الراس ديما شادني كثير شي فاش كنشد الطريق لهنا .. كنتقيى مسارني و شي دوخة عمرها كانت كتشدني رجعات فيا .. غير بالخدمة هوووف تا التنفس بدا يقلالي .. ما بقاش عندي السوفل فشلت و الله تا فشلت ..!
سامية:( ردات بحيرة ) زيديني علييك هاذشي كامل لي كتقولي فيه و الوحم من الفوق .. ما عرفت نفرح و لا نتفقص .. كنا ناويين على جوج وليدات صافي حتى تعطلات عليا ليغيكل و مشيت درت الطيسط .. و لقيت لي وقع وقع ..!
شريفة:( وحلات لها حتى وجهها رجع حممممر .. بدات تكح بالجهد مخنوقة و سامية كتمد لها فالما مخلوعة تا بردات و قالت ) كح كح كح .. سامية حاسة براسي ماشي هي هاذيك غير سمحيلي نخليك هنا بوحدك .. تا نرجعوو نتلاقاو من بعد ا حبيبة ..!
وجهها صفار و هي كتفكر ليغيكل من فوقاش ما جاتهاش ..! آخر حاجة كانت تجيها لبالها فهاذ الوقت هي تكون حاملة .. مع الخدمة و الهلكة ما بقاتش داياها فليغيكل تعطلات او لا .. تا هضرات سامية عاد بحال جمعتي معاها بطرشة للوجه ..! الخلعة قلبات لها كرشها حتى تلوات فوسط الشارع كتتقيى مسارنها .. عرقات و الدنيا ضارت بيها .. بزز جرات رجليها لأول فرماسيان بانتلها و شرات الطيسط ..!
ذاتها كتترعد و مزيرة مزيرة لدرجة ما تتخيلش .. بحال حياتها واقفة على الريزيلطا لي غتخرج لها .. و لي اكدات عليها مولات الفارماسيان تديرها فالصباح بكري فأول بولة باش تكون النتيجة مظبوطة كثر ..! الاعصاب لعبوو عليها .. عرق فجبهتها زرق منفوخ كيضرب بالجهد غيطرطقلها فالراس .. شعر راسها وقف و عينيها حمارو العروق فيهم ..!
ما بقات رجعات لا للدار ما سولات لا فحكيم و شنوو دار فالطلاق .. ديريكت للاكار شدات الطران للرباط و فالطريق سيفطاتلوو مسج بلي خرجاتلها شي خدمة و كان خاصها ضروري ترجع ..!
ليلة و شمن ليلة دازت عندها .. بالاعصاب لي فيها غير كتبوع و تجي على وجهها .. حلقها تجرح بكثرة الردان ..! كتبكي تبكي تبكي .. كلها كتترعد لحمها سخووون و كيرجف ..! زيرات على راسها بزيف يهدن لها و سطل حاطاه حداها تحت الناموسية .. و هي هازة راسها فالسقف من الدوخة لي شاداها و السخفة د قلة الماكلة ..!
تيليفونها من الدقيقة لي وصلات للدار و هزاتوو جاوبات حكيم لي عرعر عليها علاش ما تتسناش و علمها بلي اخيرا تطلق و غيدفع الوراق ديالها فالخدمة .. ما بقات هزاتوو ..!
ما نعسات ما شافتوو حتى قرب يصبح الصباح عاد داتها عينيها فنعسة حلوة ترخات ذاتها فيها لي كانت مكنززة و مزيرة ..! واخا الشمش لي ضربات فيها ما خلاتهاش ترتاح نيت .. و لكن حال حسن من حال ..! بعدا تدير الطيسط و هي عاقلة على راسها ..!
الطيسط لي قرات ورقتوو ديال التعليمات بحال يلا كتقرا فورقة ديال الامتحان .. و بالفعل امتحان و امتحان كبير بزااااف .. فاش طلعات النتيجة .. خط احمر مغلوق واااضح و خط ثاني فنفس اللون خفيييف ..! دليل على أنها حااااااملة ..!
بغات تحماق فبلاصتها .. كلمة وحدة كتتعاود فوذنيها .. حاملة .. حاملة ..! خرجات من الحمام كترجف .. عينيها مغمضين بالاعصاب .. هزات التيليفون كتصوني لحكيم و غير شدلها الخط قالت
شريفة: الله ينعل النهار لي عرفتك فيه .. عشر .. عشر سنيييين ديال الزواج و عمرها تدارت بيا و جيتي نتا من مرة وحدة غذرتيني .. غفلتيييييني .. قلت لك ما باااااغااااااش الولاد ( تجننات ) اعععععععععععع بشمن لغة كتفهم باااااش ؟
حكيم:( رد بخشونة و حدة فصوتوو ) مال مك مفرعنة علينا هنا ؟ صبحنا على الله ..!
شريفة:( ردات بعصبية ) صبحت انا على الحمااااالة على الولاااااد .. ولااااد انا ما باغهومش .. واااش ندير شي حاجة فراسي عاد تفهم ؟؟؟ غددتيني غددتيني ا حكيم و غفلتييييني واخا درت الاحتياط تفووو تفووو تفووو .. ندمت على النهار لي عرفتك فيه .. ندمت .. ندمت .. ندمت ..!
حكيم:( رد عاقد حجبانوو و باندفاع قال ) و انا ندمت على النهار لي حطيت ز** فيك ..!
شريفة:( تالفة و دايخة .. الدنيا ضايرة بيها غير كتمشي و تجي .. مجننة و كتبكي و واحد الحالة لا اله إلا الله ..! مسحات نيفها و قالت ) غنطيحووو .. غنطيحووو ما غنخليهش ا حكيم .. ما غيبقاش كتسمع و لا ما كتسمعش ؟؟
حكيم:( رد بعصبية ) طيحييه و لا قو** من التفرعين ديال الز* ..!
حكيم:( رد بروووود باينة فيه وصل لآخر درجات الأعصاب ..! و بنبرة كيتحلف بيها قال ) طيحييه ..! يلا كنت حو*** مك بلا حريق .. سيري طيحيه و حطي فيه يديك ..!
شريفة:( سكتات شحال كتبرد النفس فيها و كتحاول تستعقل و تتهدن من الرجفة د الاعصاب لي شاداها ..! ) ما نقدرش نخليه ( قبطات فراسها بيديها و قالت تالفة ) شنوو ندير شنوو ؟؟؟
حكيم:( رد باغي يطرطق ) فينك دابا ؟؟ طلعي عندي للهنا نتهلى فيك شوية .. من شحال هاذي ما ضرتلك بجنابك .. ياك ؟ توحشتي العصا .. راسك رجع بحال الحجر و انا غنرطبوو لملتك ..! ( بصعرة غوت ) وا بالرب تا نطحن مك يلا قستييه ..!
شريفة:( عرفاتوو فالخدمة ما يقدرش يخرج دابا .. اما كن قطع عليها و شد الطريق لعندها .. بتنهيدة قالت ) انا فالدار .. غنمشي لعند شي جينيكولوغ نتأكد و نجي لعندك لكازا خاصنا نهضرو .. التيليفون ما فيه كلام ..!
حكيم:( رد بانفعال ) و هانا كنتسناك .. دوزي عندي للولاية ..!
قطع عليها حاط يدو على جنبوو مغذذ و بالزربة كيقشر فشنافتوو حتى دماها .. و داك الحجبان معقودين و طالعين فالسما .. حااااقد على الوضعية كن لقاها قداموو هاذ الساعة يغززها ..!
اما هي أول عباية بانت لها قدامها جراتها لبساتها و هزات ساكها خارجة من تما طايرة .. العقل طفى و كاع داك العصبية رجعات عليه ببروووود و هي جالسة كتتسنى نوبتها عند طبيبة ديال النساء و التوليد ..! هزات راسها فالفرملية بكل هدوء فاش سمعات سميتها ..!
دخلات لعند الطبيبة و جلسات قبالتها وجهها صفر و باينة فيها باكية حتى من صوتها تجرح و زاد بحاح كثر ما هو فيه بحة مميزة ..!
شريفة: صافا ميغسي دوكتوغ ..! درت الطيسط فالدار و طلع ليا بلي كاين حمل و جيت نتأكد و ناخذ استشارة طبية من عندك بيان سيغ ..!
الطبيبة:( ردات بابتسامة ) درتي التحاليل د الدم ..؟ ( حركات شريفة راسها بالنفي و بهدوء شيراتلها للجهة د الفحص و قالت ) داكوغ اجي معايا نشوفوو شنو عندك ..!
و ديكشي لي كان .. تكات فوق البياص معرية على كرشها و فاتحة السنسلة د سروالها ..! دارتلها الجيل فوق كرشها و هزات جهاز ألتراساوند .. كتحركوو و تبرك مزيان .. مهبطاه تال تحت كرشها بشوية ..! و شريفة مركزة فالشاشة .. حتى حبسات الطبيبة و كبراتلها الصورة .. طالعين جوج ديال الدوائر صغاااار و مفارقين ..!
شريفة: تسنااااي ..! نقدر نسمع صوت دقات قلبهم ( رمشات عينيها مغبنة و شنافتها مدلية ..! )
الطبيبة:( حركات راسها بالنفي ) للأسف ما تقدريش .. البيبي كيبدا قلبوو يتكون و ينبض من 5 د الاسابيع و لكن كيكون صغير بزاف و ما كيعطيش موجات كافية تخليك تسمعيه .. من 12 اسبوع للفوق نسمعوو دقاتهم ان شاء الله
بابتسامة خلاتها كتشوف فالصور ديال ولادها هي ؟؟؟ شي حاجة تحركات فداخلها و هي كتشوفهم غير بحال جوج نقيطات صغاااار .. حاسة بقلبها رجف الداخل من شوفتهم .. مسحات كرشها و حطات يديها فوقها .. فاتحة عينيها فالسقف ..! و بتنهيدة طويلة قالت ..!
شريفة: الله ..!
بابتسامة خلاتها كتشوف فالصور ديال ولادها هي ؟؟؟ شي حاجة تحركات فداخلها و هي كتشوفهم غير بحال جوج نقيطات صغاااار .. حاسة بقلبها رجف لداخل من شوفتهم .. مسحات كرشها و حطات يديها فوقها .. فاتحة عينيها فالسقف ..! و بتنهيدة طويلة قالت ..!
شريفة: الله ..!
بقات مدة و هي هكاك غير ساكتة و حاطة يديها على كريشتها و مرة مرة تشوف فالشاشة ..! تا وقفات بالشوية عليها قادات حوايجها و خرجات عند الطبيبة ..!
الطبيبة: ألوغ نتي باقى فأول الحمل ديالك و ان شاء الله كلشي غيدوز مزيان بمساعدتي و مساعدتك .. هاذو تحاليل ضروري تديريهم و تجيبيهم لي و هاذو دي فيتامين غيعاونوك و يعطيوك الطاقة باش توقفي و هاذي الفوطوو ديال لي بيبي ..!
شريفة:( حركات راسها و رداتلها التبسيمة ) بونجوغني ..!
خرجات من عندها للاستقبال نيشان خلصات و عطاتها فوقاش ترجع .. هابطة فالدروج بالشوية و شادة فكرشها كتتحسسها و بتعجب كتفكر كيفاش داك الكميشة لي شافت غيكبرو فكرشها نهار على نهار حتى تنفخ و ترجع تحس بيهم .. يهروها و من بعد يبداو يضربوو كاع .. باغيين يخرجوو و هي كتحلم ليل و نهار فوقاش تشوف عويناتهم و تشم رويحتهم معنقاهم بين يديها .. واخا خايفة و مرعوبة من الولادة ..!
مشاعر كثار تحركوو فيها و خلاو قلبها يحنااااان كثر و كثر .. نسات الدباز و الغوات مع حكيم و بصوت مخنوق بالبكية و لكن هاذ المرة ديال الفرحة عيطاتلوو ..!
شريفة:( كتشوف فالتصاور ) عندنا جوج كميشات صغاااااار ا حكيييم .. وليداتنا هاذو ؟؟ ما قادراش نتيق .. واش هاكا كيكونوو ؟؟ ( غمضات عينيها تا طاحوو دموعها مفزكين حناكها ) توااااام صغييييورين غيكبرو و يحسوو ببعضياتهم .. ما غنبقاش مقطوعة من شجرة .. صافي غتولي تا انا عندي عائلة تهز ليا الهم ..!؟؟؟ ما متيقاش هاذو ولادي .. ولادي انا و ياك ..! حمقة انا و الله تا حمقة .. كيفاش ما نبغيش هاذ جوج نقيطات لي غيكبرو معايا و نكبر معاهم ؟؟
حكيم:( غمض عينيه كيزفر النفس .. باقي يسمعهم لها و لكن فهاذ اللحظة .. لمس احاسيسها و ضعفها ) ولااااادك و من صلبي انا و ياك ..! نتي جنتهم و هما نعايمك ..!
شريفة:( ببحة ردات كتديماري ) أنا جايا عندك .. خاصنا نهضرو و نعرفوو شنوو نديرو فلي جاي ( حطات الوراق فالكوسان جنبها ) حكيم سمحلي على الهضرة لي قلت كنت تالفة و ضايعة .. ما عرفتش شنوو وقعلي فالطبيب فاش شفت طرف مني و منك فكرشي و شحال ضعاااااف و محتاجين لي يكون بيهم .. محتاجين ليا و ليك .. قلبي حسيتوو غيخرج من بلاصتوو و الله .. ندمت حتى فكرت لدقيقة نطيحهم ..!
حكيم: المهم ..! حتى توصلي و نهضرو ..!
شريفة:( ردات كتمسح عينيها ) خليني نهضر دابا .. انا كنواعدك و نواعدهم غنكون احسن ام ليهم .. غنعطيهم الحنانة لي انا ما لقيتهاش ... غنحافض عليهم و نصونهم مني و منك حنا اللوالة .. عمرنا نضروهم بشي حاجة .. غنعييشوهم مرتاحين و غنبغيوهم بزااااف بزاااف .. غنعيشوو معاهم و نكبرو معاهم ..! اوووف عيني حرقوني بالبكى و لكن بصح انا باغياهم و غنعيش معاهم كاع ديكشي لي ما عشتوش فصغري ..!
سكتات كتبكي و تضحك فنفس الوقت بحال الحمقة و حكيم كيسكتها ..!
حكيم: شششش صافي دابا .. انتابهي مع الطريق .. قلتها لك من قبل و غنعاود نقولها لك .. غتكوني احسن ام فالدنيا ..! نوارة غتنور حياة ولادها بظلها عليهم و ما تخلي حد يقرب من حدودهم و يقيسهم لا بالخير لا بالشر ..!
شريفة:( تبسمات ) يلا كانت عندنا بنت .. نسميوها ذكرى ا حكيم ؟؟ كيفما نتا كونتي النقطة البيضة فذكرياتي القدام .. هي غتكون وحدة من النقاط البويض الكثار فحياتي و غنبنيو معاها ذكريات جداد زوينين .. ولادنا غيخليونا نتفكرو احسن أيامنا ..!
حكيم:( رد بالايجاب كيحرك راسوو ) مزيان نيت و منها نفكرك فهضرتك فاش توصلي لعندي ..! ( بنبرة استهزاء كمل ) غتلقاي السمطة كتتسناك باش تتفكري مزيان و يسخنولك جنابك شوية .. كيبانلي بردو عليك و ما بقيتي تعرفي آش كتخرجي من فمك ياك ؟؟
شريفة:( ردات كتحبلس ) حبيييبتك انا ما تسخاش بيا .. أنا و خنافيشي ..!
حكيم:( رد بنفس النبرة اللولة ..! ) غير بلااااااتي ا مدام ..! قطعي دابا مشغوول ..!
قطعات معاه مكسيرية فالطريق و لكن غير بالعقل حاضية راسها ..! الفرحة و المشاعر لي تحركوو فيها عماو ليها العينين و ما خلاوهاش تنتابه للطونوبيل لي تابعاها من لور غير بالحس حتى دخلوو لكازا ..!
الدنيا عامرة غتطرطق بالبشر فالشارع لي دايزة منوو على السويقة ..! عيات تحاول تسلك راسها و والو وحلات واقفة قدام المحطة ديال الطاكسيات حاصلة ..! تا بدات كتبانلها العافية شاعلة فالكابوو ديال الطونوبيل من القدام و الدخاخن طالعة ..! عينيها خرجوو و بالزربة هبطات مخلوعة .. تا جاو الشوافرية كيغوتوو باش تطفي الطونوبيل ما تخليهاش امارش ..!
دخل واحد فيهم طفاها و عطاها الكونطاكط و تجمعوو كيعاونوها تا همدات العافية ..!
.....: خاصها المعلم ضروري ا العشيرة .. انا نكوولك .. هذا راه الباتري تقاس لك .. جاب الله لقيتينا كاينين معاك ..!
شريفة: و لكن انا يالاه يوماين باش مشيت درت الكونطرول للطونوبيل و كان كلشي مزيان ..! ما علينا يلا عندك ا خويا شي نمرة ديال شي ميكانيسيان قريب نعيط ليه يجي موراها .. ما تبقاش حابسة الطريق هنا ..!
....: واه هاك قيدي ..!
قيدات النمرة و شكراتوو واقفة حدا المحطة كتهضر مع الميكانيسيان و الخلعة باقي لاعبة عليها ..! قطعات معاه و بقات بوحدها .. لي عاونوها مشاو بحالهم خداميين على راسهم بالكورصات و هي شادة ساكها مزيرة عليه من الزحام .. ما كتحملش تتمشى على رجليها و تبقى بلا طونوبيل ..!
مرة مرة كتسووط مبرزطة مع الميكانيسان كتتسناه حتى وقفوو عليها ربعة د العيالات دايرين النقاب .. طوال و مكضرين كل وحدة يا وحدة ..! فرمشة عين ضوروها وسطهم حتى خلعوها كثر من ما هي مخلوعة ..!
شريفة:( خرجات عينيها من شوفاتهم لي مكيبشروش بالخير ..! حاطة يديها على كرشها بحال يلا كتحمي ولادها و قلبها كيترعد فصدرها .. احساااس خايب سيطر عليها ..! خافت و خافت بزاااااف على ولادها ..! هي لي طول عمرها زعيمة و ما كتخاف من حد ..! ) شكووون نتوووما ؟؟ بعدوو لهيه اويلي ..! مالكم ضورتوني ..!؟ شنوو باغيين مني ؟؟
حاضنة راسها بيديها كتبعد عليهم و تشوف فالسويقة لي موراها ..! و بصوت عالي و لكن مبحوح بالبكى و الغوات د الصباح قالت
شريفة: عتقوووووووونييييي عتقوووو امم
شداتلها وحدة فيهم فمها و الجوج الثانيين لواو لها يديها مور ظهرها شاديينها للبنت الأخيرة لي معاهم و لي ما كيبانوو غير عينيها ..! عينيها لي حاطاهم على عينين شريفة لي خارجين فيها و عامرين بالدموع .. دموع قلة الحيلة و القهر على لي فكرشها و شنوو غيوقعلهم ؟
وجهها رجع حمممممر و هي كتهز و تحط فيديهم و تحاول تبعد اليديين عليها و على فمها ..! لكن والوووو .. عيات تدفع و ما تزحزحوش .. يديهم بحال الحجرة عليها ..! الناس كيتفرجوو من بعيد و تا واحد فيهم ما قال نقرب و نفكهم .. كل واحد مكمش على راسوو و خايف و ففمهم غير " شي حسااااااب هذا بيناتهم " ..!
نطقات المنقبة لي مقابلة معاها أخيرا و بصوت مدعدع قالت ..!
......: هاذي من عند صحيبك العزيز .. سلمي على عزرائيل معاك ا بنت الق** ..!
غمزاتها بعينيها بميوعة و فنفس اللحظة جبدات جنوي طويل تحت من لباسها و خشاتوو فكرش شريفة ..! ثلاثة ديال المرات متابعين و هي كتخشيه فيها و ترجع تجبدو ..! و غير تأكدات بلي صفاتها لها و دارت لي عليها .. خبعات الجنوي عندها و مشات كتجري هي و لي معاها لطونوبيل كونغوو وقفات لهم من العدم ..! قلعوو و طارو من تما بحال عمرهم كانوو ..!
مخليينها طايحة فالارض حدا تيليفونها و صاكها ..! عينيها خارجيين و وجهها صفر بالحريق .. حاطة يديها على كرشها كتشوف فالدم بصدمة ..! لسانها ثقال عليها و الريق هابط من فمها بالجهد واخا هي كتحس بيه ناشف ..! عينيها بداو كيتغمضوو و مع ذلك مكابرة و غمة كتحرق فيها و تحكها من الداخل .. كتتقاتل باش تهضر و توصل صوتها للناس لي عاد ضارو عليها كيغوتوو و يعيطوو للاسعاف ..!
شريفة: ولااااااااااادي ( مزيرة على كرشها و دمعتها واحلة فطرف عينيها ) و ولا ولااادي ولا و و
تغمضوو عينيها على اسم حكيم لي كيعيط فالتيليفون قبالتها و الدمعة لي كانت واحلة لها .. طاحت كتجري مع حناكها ..!
.....:( كتغوت و تضرب فراسها ) قتلووووووها عدويييين الله .. يتمووووو واليديها فيها .. ويييييييك وييييييك ا عباد الله .. الرووووح طاحت .. رزااااااو حبابها فيييييها ..! وااااااا ربي عيطوو للومبيلوونص .. الموووت داخلاها و شنوو داييين معانا من هاذ من غير اعمالنا و سعداااااتك يا فاعل الخير ..!
أذكرني بخير ..
إذا تذكّرت يوماً سِياطك واحتِمالي..
قسوتك وحناني...برودك واحتراقي..
صمودك وانهياري..
أذكرني بخير..
حين تبحث عن أشباهي وتحاول استنساخي وتعجز..
حين أغيب غيبةً لن تعد تراني مجدّداً
حين تشتاق لكلماتي وقصائدي وأشعاري
حين تسمع صدى ضحكاتي وأنين بكائي..
أذكرني بخير حين تشعر بصقيع البرد يلفح صدرك
حين تسجد لله أذكرني بدعوة صادقة فأنا لا أحتاج منك الآن سواها
أذكرني ولا تنسى أبداً أنني يوماً كنت منك قريبة جداً
عرس الذيب الجزء 20
محتوى القصة
حبيبة: يا بنتي ما كتعيياش من شري شري ؟ و كن غير كتحافضي على حاجتك .. يوماين ثاني و نقراو الفاتحة على روح المرحومة ..!
خليل:( رد من موراهم داخل هو و محمد أميين ..! ) حتى ما تكونش ماري .. عاد تتهد ..!
غير شافتوو غوتات بالضحك و وقفات عنقاتوو و هو كيضور بيها تا دوخها .. و محمد أميين سلم على البقية و جلس مربع رجليه ..!
محمد أميين: خوي معاك ا الواليدة شي كاس منعنع .. بقاي حاضية داك الجوج ..! كاين شي بطبوط ..!
حبيبة:( ضحكات ) موووجوود غير تجي لالة فاطمة تسخنوو هو و هاذ البراد ..! شوفلك البنت شحال كتعطي للتبحليس قتلة .. هاذشي كامل على ود المانيا ماشي عليك ا خليل لا يسحابلك ..!
خليل:( ضحك من بعد ما سلم عليهم كاملين و جلس تا هو مداحسيين بيناتهم و ملاك لاسقة عليه ..! ) راني عااااارف ..!
ملاك: كيعاودو على الشكلاط ديالهم لذييييذ و واحد الفرماج بنييين واخا خارج منوو الدود ما نتيقهم تا نشوفوو بعيني بجوج و انا مكمشة فخويا الحبيب من البرد د المانيا ..!
محمد أميين:( كياكل و يضور فراسوو ) تسنايه يطلع لك الوراق و يديك معاه غير عولي .. ما لقيتي شكوون ..!
ملاك: لا انا عارفاه من غذا غيولي يقولنا هاذي جوج عام ما جيت للموووغريب .. موهمد أغييط ..!
ضربها لراسها من لور تا فرنسات فوجهوو و تناساو موضوع الانسطا فخطرة ..! ما كاين غير الضحك و النشاط حتى شاط ..! خليل كيطبل بالكيسان فالسينية و يغني و محمد اميين شاد ليه الايقاع بالمعالق و المواس و ملاك كتحرك شعرها معاهم و تزغرت .. المعقل فيهم هو حكيم لي كيشوف و ساكت .. اما تا عدنان ناض يصلي المغرب مخليهم مجمعين ..!
خليل:( باقي كيضرب ) زيييييدووونااا زييييدونااا هاااذشي ما يكفييينا ..!
ملاك: يووووويوووويووووي .. زييييد زيييد يا شييفوور زيد شوية فالموطوور ..! و لالة فاطمة و يا قطيب اللوز و خلييوها تدوز ..!
محمد أميين: البطبوط نعاماس ..!
ضحكات حبيبة عليهم كتشوف ف فاطمة لي مقابلة الفيرمة جايا بسينية ديال البطبوط سخون كيفور .. فوقوو الزبدة و العسل كيقطر و راجلها عبد الله موراها ببراد د اتاي مشحر ..!
عبد الله و فاطمة:( شافوو فالدراري و قالوو دقة وحدة ) على سلامتكم ..!
حبيبة:( ضحكات و ردات ) غتشركي ا فاطمة نتي و خويا عبد الله شي طاجين ما فيهاش ..!
محمد أميين: و نشركوو شي حولي صردي كرونوو ملوية دابا نيت ..! الزردة ديال سي خليل .. و لا باغيين تاكلونا فيها ..!
خليل: تستاهل ا خاي ..!
محمد أميين:( شاف فحكيم ) اش قلتي ا الباشا .. تخرجلنا شي حولي من عندك نضحييو بيه هاذ الليلة و نتجمعوو عليه .. من شحال ما درنا شي جلسة بحال هاكا .. فيها و لا ما فيهاش ..!
حكيم:( حرك عينيه بنعم ..! ) فيها ا سيدي غير نوض علي على ذراعك و مضي الجناوة ..! ( تكسل فبلاصتوو ) جيب ا با عبد الله شي حصيرة هنا نزيدوها نتيسعوو ..!
عبد الله:( سمع الشوا و ضحك فرحان ) الضيق فالقلب ا ولدي .. دابا نيت هي اللولة ..!
حبيبة:( شافت عدنان جاي و قالت ) حكيم مريض ما يذبح ما يسلخ .. لي بغى شي حاجة ينوض يديرها .. و جمعوو الترسة معاكم حدا السقية لهيه ..!
خليل:( وقف كينغز ملاك برجليه ) نوضي تغسلي الكرشة ..!
ملاك: تبعد مني لا ..!
حبيبة: و مالك ما تغسليها ؟ يالاه تتعلمي ما يفيدك فدار راجلك .. ما بقى ما فات لك معانا .. عاد كنت نشكر فالسوسيات و بنتي حدايا مفضية ما كتعرف القزبور من المعدنوس ..!
ملاك: باقي مطولة معاكم .. شتوو غير ماري ما غتتهناوش منها ..!
محمد أميين:( رد بضحكة كيشوف فيها ) جبدتوو جبدتوو الزواج .. ايوا لالة ماري جاو فيها الخطاب ا الواليدة .. طالبين راغبين فبنتك ..!
خليل:( رد كيضحك ) هذا ساخطة عليه موو ما فيهاش ..! و لا يكون عور مسكين ؟
عدنان:( ضحك تا هو كيدوز على لحيتوو بيديه و نقاطي د الما خفاف كيلمعوو فيها ..! ) نتوكلوو على الله و نشوفوه بعدا .. الحلال هذا و لي طلبوو طلب الطاعة و كمالت الدين .. او لا ا سي حكيم ..!
حكيم:( رد هاز حاجبوو فيها ) كلامك هو الكبير .. رزقها جا تال عندها تدير دارها تا هي ..!
ضوروها بيناتهم تا رجع وجهها حممممر ..! ماشي حيث حشمات منهم .. لا ..! حيث ما باغاش تتزوج و المغربي هو لي حالفة بحلوفها ما تديه .. باركة عليها غير خوتها لي خارجين فعودها .. كيعجبها تطلعها على البشر لا غير .. تيليفونها عامر بالبلانات و لكن دايرة فبالها بلي داكشي غير خوا خاوي ديال تدواز الوقت ..!
تغرغرو عينيها بالدموع تا طلقاتها بغوتة من قلبها ..! صوتها رقيق و فاش كتغوت كيولي كيتقب فالوذنين ..!
ملاك: ا عوووووو ما بغيييييتش ..! اويييييييلاااااااي ..!
فاطمة:( قالت على نيتها مشاركاهم الهضرة و غير ما زادت وحلاتها لملاك ) و علاش ا بنتي لي هرب الزواج هرب للطاعة ..!
حبيبة:( ضحكات و عنقاتها كتسكتها ) اويلي بعدولي من بنتي .. ما ساخياش عليا .. باش نعطيها دابا و هي هاكا هشيشة كي البسكوتة تقيسها تتفرتت ( ضحكات تا دمعوو عينيها )
ملاك: ياك ا مااااامااا .. حتى نتي ..!؟
محمد أميين:( رد بابتسامة ) دابا بلا ضحك و تطليعة .. كنهضر معاكم من نيتي ..! السيد مهندس فاتصالات ميسرة عليه من كلشي .. قرينا مجموعين و عاد عاد كان عندنا فالمحمدية و شاف ماري معايا فالطونوبيل .. و نوى معاها المعقول يلا قبلات ..!
ملاك:( ردات مجننة ) واش باغي تحمقني ؟؟؟ انا نتزوج ؟؟ و بصاحبك من الفوق ...!!! ويلي ويلي ويلي .. واخا نكون حمقة و عندي سوابق فسبيطار المخلخلين ما نديرها .. نتوما و صحابكم ما ديال زواج ( هزات كتافها ) و انا اصلا ماشي ديال المعقول ..!
خليل:( رد باستهزاء ) و ديالاش نتي ؟ د شي اوبا ..!
ملاك: احححححح سكت سكت ناااااري ما تجبدهمش على فمك .. راه قلبي غير هشيش ..!
محمد أميين: ياك ا المرضية ؟
ملاك: دابا غير قولي و نتا و وجهك ..! و نخلييو الاخوة و الحكرة لي غنتعرض لها من مور هضرتي و التهميييش لي غيجيني من كلام الحق .. جنب ..!
محمد أميين: ايييه زيدي ؟
ملاك: دابا هاذ بوزبال معامن عايشين تقارنولي ب .. جي سونغ .. لي جون .. Lee min hoo .. Gong yoo ... Hyun bin ..! هاذو يتقاااارنوو ؟؟ و الله تا خاصك تحشم على عرضك ..!
حبيبة: وا شكوون هاذو ؟؟
ملاك: رجاااااالاتي لي غنتلاقهم فاش نمشي لكوريا طال الزمان و لا قصار .. احييييه ..!
محمد أميين:( رد باستهزاء شانق عليها ) دابا غتمشي تتعلقي بلاصة الحولي .. من بعد و نشوفوو هاذ كوريا .. با عبد الله شي كوردة فازكة معاك الله يعزك لما رطبها مزيااااان ..!
ملاك:( خرجات عينيها فيه و هو شادها ) هيهيهي كتضحك معايا ياك ؟ ( باستوو فحنكوو ) خويا العزيز ديالي ..!
حكيم:( رد كيحرك راسوو بالنفي ) براهش ..!
دخلوو للكوري فين عندهم خمسة ديال الحوالة بالحساب .. كيعلفوهم للعيد .. واحد لعبد الله و مراتوو و البقية ديالهم ..!
جبدو واحد وسطهم صردي .. وازن تبارك الله و صحييح ..! تعاونوو عليه و عولوو صافي غيذبحوه ..! حبيبة و فاطمة وجدو الما و البانيوات و الطباسل فين يحطوو و الكوردة باش يتعلق فين يتسلخ ..!
ملاك كتصور من بعييد .. كتموت بالخلعة من الحوالة و من اي كائن حي فيه الروح كتمشي .. من غير بنادم اكييد ..!
اجواء ديال الضحك و النشاط .. عدنان شادوو من كرونوو كيتصور معاه و يعيط على ملاك تكحز قدامهم تصورهم و تتصور معاهم و هي كترد بضحكة صفرة ..!
ملاك: من هنا الشوفة وااااعرة و لاهيلا غير بداو بسم الله .. انا معاكم بالفيديو ..!
حبيبة: دوزي عمري الما من السطل و هزي الكراطة تجري الدم لي غيسيل للقادوس .. قالك كنصوركم ..! ( شافت فحكيم و مشات حيداتلوو الجنوي من يديه و قالت ) و الله لا ذبحتي وا لا حطيتي يديك فيه .. و حنت حلوفي ..! مريض دوز تجلس بحالك .. شحال بيهم مجموعين هما يقضييو ..! ( خرجات عينيها فولادها ) طلقوونا يالاه ..!
و هكاك كان حط من يديه مربعهم كيشوف فيهم و يلعب ففموو بهدوء .. حتى تحرك جهة ملاك شد فيها جرها و هي مزيرة تا قال هاز حاجبوو ..!
حكيم: تخافي و أنا معاك ؟؟
حركات راسها بلا و ترخات .. ماشية معاه .. تا وقفها قدام الحولي كيدوز لها يديها على صوفتوو و وجهوو ..! و هي كتترعد مخلوعة .. و ما دازش بزاف جرها من شعرها لعندو كيهضر فوذنيها و وجهها قريب من الحولي كتقول شوية ما ينطحني ..!
خوتها ضايرين بيهم كيضحكوو و يصوروهم .. عند بالهم كيحيد منها الخلعة و يهضر معاها بالهداوة .. ما بايناش فيه ناتفها غيقلع لها الشعر من بلاصتوو و سنانوو مزيرين .. كيأكد عليها و يعاود ..!
حكيم: ما باغيش نتعدا عليك .. خليني معاك زوين ا ملاك .. قبل ما نقطع لمك داك اللسان لي كيتدخل فشي حاجة بعيدة عليه .. من الجذر ..!
ملاك:( ردات محرقة و ما مبيناش ) اييي صافي صافي و الله ما نبقى نهضر ..!
حكيم: بقاي تطيري تا نربط مك معاهم فالكوري .. راك بديتي تزنزنيلي فوذني ..!
طلق منها ضاحك ببرود كيشوف فيها و هي وجهها رجع احمر غيطرطق و بزز منها ضحكات و قفزات مبعدة من حداهم .. مخلية محمد أميين و خليل شادينوو و عدنان كيسمي الله باش يدوز عليه ..!
ذبحوو ذبحة وحدة بلا ما يعذبوو .. و طلقووه مخليينوو كيتركل و حبيبة و فاطمة كيكبوو الما على جنابوو و يكرطوو ..! و يفرقوو اللغى ..!
حبيبة: وا دازت اياااام قاسحة ا لالة فاطمة .. نفرحوو مع بعضياتنا شوية .. تا حنا ما كنتجمعوو غير فالمصائب .. و دابا بعدا ملمومين على الخير .. حكيم ناوي يخطب و صح شوية و خليل تقبلات ليه الفيزا د الخدمة فألمانيا و محمد اميين تا هو عرسوو قرب .. كان كيتسنى غير خوه يولي شوية .. و الله يدومها فرحة علينا ..!
محمد اميين:( رد مقاتل مع الحولي باش يحيد الراس و الكرعيين ..! غير بسوفيطمة و شورط ..! ) با حكيم ..! خفتي نزيروك فشي زردة و لا ؟ ( ضحك و شاف فيه ) ا سيدي مبارك مسعود بالبنين و البنات ..!
حكيم:( حرك راسوو و رد بنفس النبرة د خوه ) ا سيدي الله يكبر بيك و الزردة المخيرة ديالك ..!
خليل: مبرووك ا خويا .. الله يسهل الامور ..!
محمد أميين:( هو الضحوكي و الزهواني فخوتوو ..! ضحك و قال ) هاذي عجباتك ا الألماني ديالنا .. القضية داخلة فيها الزردة ..!! وا شد داك الكراع معاك مزيان ..!
ملاك:( ردات بتكركيرة .. من بعد ما برد الدم فيها ) غير جبدتي ألمانيا ها هو غيقولك .. مي سي كوا صااا .. كتقتلوو الحيوان و تاكلوووه ؟ فين الانسانية و الضمير و حقوق الحيوان .. فين قطييييبي ديال الكبدة ههههههههههه
عدنان: هههههه صرعتيهم ..!
و هاذي هي الجمعة ديال الحباب و الخوت .. ما كاين غير قولها و ضحك عليها .. كلشي ناشط و فرحان من فرحة حبابوو ..! و بعييد على هاذ الأجواء .. جالسة شريفة من مور ما تهلات فأسية و رداتها كتلمع ..! مجمعة مع حكيم بالمسجات .. واخا كيتعطل شوية باش يرد عليها ..!
متحمسة تتعرف على عائلتوو عن قريب كثر و تعرف شكون جاي و كل واحد كي داير كراكطيرو و كيفاش كيفكرو و زيد و زيد ..! و بين فكرة تديها و فكرة تجيبها ..! تبسمات بحزن ..! شكون غيستقبل عائلتوو و ما كاينة غير هي و أسية لا غير ..!؟
فبحال هاذ المواقف فين كتحس باليتم و الوحدة ... كتحس بلي بصح هي مقطوعة من شجرة و ما عندها حد لي يوقف ففراحها و حزانها ..! شحال كانت كتسمع من البنات فالفيسبوك على الامهات لي كيجييو مع نسابهم على بناتهم .. كيولييو مقطرين لهم من العين تقول هو ولدها و فينما تشكي لها بنتها بيه .. تجي معاه و تخرج فيها العيب ..! تمنات تا هي تعيش بحال هاذ الاجواء و لكن للأسف ماشي كاع لي تمنيناه كيصدق ..!
تعلمات توقف على شغالها بيديها و ما تعول على حد .. و ديكشي لي كان نفضات راسها مزيان و دخلات للانسطا كتقلب على النكافات المعروفين فالرباط و سلا .. شافت شحال من وحدة سكريناتها .. و رجعات دخلات للفيس بفوكونط ديالها ..! سولات البنات فالجروبات و كلشي شكر لها نكافة وحدة معرووووفة ..!
تا قنعوها بيها و عولات تاخذ من عندها لبستها د الخطبة ..! ناعسة و كتفكر و تحلم بالخطبة .. تا صبح الصباح و لقاها واقفة بسبرديلة و كيطمة مكرفطة و عوالة على التكرفيس هاذ النهار .. شعرها قصييير كالعادة و النظاظر د الشمش فوق راسها .. كتشوف فاللباسي مع المساعدة لي عاطياها صوابها ..!
و شريفة معوجة فمها بغير اقتناع .. كل شوية تسوط و تقلب فعينيها ..! الصواب عاطيينوو و لكن ماشي ديال السمعة لي سمعات عليهم ..! تا حاجة من لي جبدولها ما عجباتها و مولات الشي ما ضرباتش تا الضربة عندها تشوف معاها ..! واخا كاينة و حاضرة فالبيرو ..! و غير دخلات وحدة مجبدة كتكسول بصندالة ديال الطالون و الشعر زعر مطلوق و الكلاس كيشقشق .. خرجات عندها كترحب و تعاود و دخلاتها لصالة بعييدة و بدات تجبدلها اللب د الحوايج ..!
الموقف لي خلى شريفة كتغلي فبلاصتها .. عضات على فمها و خرجات من تما كتسوط ..! يمكن الفلوس لي كانت غتحط شريفة يكونوو الضوبل و التريبل على الكليانة الثانية .. لو تعطاها حقها .. و لكن للأسف المظاهر خداعة ..!
هاذ الموقف غير ما خلى عينين شريفة يزيدو يتفتحوو على الواقع و على الناس و تفكيرهم كي داير .. زاد طموحها كبر كثر و كثر ..! ما حدها كتخلص فكريدياتها و الربح تا هو داخلها .. ما حدها كتفكر تزيد للقدام ..! الريسطوو دايرالوو الاشهارات على الجهد و خدامة عليه ليل و نهار .. تا تعرفات عند الناس ..! سيغطوو المحل جاي فبلاصة فيها غير الفيلات و الفرييع ديال الفريييع .. ما ساكن غير سيدي و مولاي لي فينما كانت عندهم شي عراضة .. بلاصة يمشييو يقلبوو على طريطور بعيد كيدوزو ياخذو كوموند من طاق طاق للسلام عليكم و يزيدو مع الطريق مرتاحين ..!
زيدهم على الناس لي كيجييو يدفعوو الفيزا فالقنصليات د السعودية و امريكا .. بلاصة ما يتسناو فطونوبيلاتهم كيجييو عندها للمحل .. عدد منهم خليجيين و أجانب .. كيعجبهم المحل المرة اللولة و يرجعوو ثاني هما و صحابهم .. شي كيعلم شي و الدعاية خدامة ..! بلا المدارس لي دارت معاهم الكونطراطات و الليفغيزون لي خدامة بالجهد مع البعاد ..!
محل ديال الناس الهاي .. الاثمنة طالعة و لكن تعرف تا عند لي على قد الحال .. خصوصا فرمضان من الفطورات لي كانت كتدير فابور .. و كل مرة خارجة ببروموسيون فشكل .. و تا دابا دايرة لي جا و طلب قبل من ثلاثة د العشية يخلص غير نص الثمن .. باش كلشي يكون فالمتناول ..!
كتطيح فالثمن لشي و كتضرب يديها ثاني مع لي مكيشوفوش فالثمن من الاصل و مع صحاب الشركات لي عجبهم الريسطوو و رجعوو يديرو عندها الاجتماعات و الصفقات ..!
على العموم .. مضبرة على راسها فالهموز و لسانها مسرح مع الناس ما كاين غير نعام ا لالة و نعام ا سيدي ..! تا من الكوافورة كل مرة معيطة لها على شوتينغ جديد بلي كوموند ديالهم بلا لي كوموند ديال الصالون نيت .. واخا امتانعات على الشوتينغ و ما بغاتش باقي تديرو فداك الوقت لي كانت غارقة فيه مشاكيل ..!
و من الموقف لي طاحت فيه ..! ما بقاتش قانعة بالريسطوو و الباتيسري لي عوالة تديرها مشروكة مع المحل .. غير حتى تتهنى من الكريديات لي عليها ..! لا ..! دابا تحلوو عينيها لضومين آخووور فيه الفلوس الصحيحة ..!
من ريسطوو تزيد باتيسري و من باتيسري تتوسع و تولي منسقة حفلات و افراح .. و أكيد الطريطور ما كتمشي معاه غير النكافة ..! و شكون يلقاو بحالها لا فالاناقة و الذوق و التاويل ...! و علاش لا من بعد تزيد حتى صالون و تولي سميتها معروووفة من بين أحسن لي ميكاب أرتيسط فالمدينة ..! يلا الشعر كتفنن فيه و لا غير الوجه كتصرعوو صريع .. تقول رسامة ..! شدات الحرفة على صغرها و كبرات معاها و علاش لا تخدّمها تا هي و ما تبقاش غير خازناها و حاطة رجل على رجل .. تقرا و تشد الديبلوم و تزيد تتعمق بلي فورماسيون و ها هي ناضية ..!
تحمسسسسسات شريفة حتى ما قدات .. داك الطاقة ديال الحماس و الخدمة لي جاتها هاذ الدقيقة ما بحالها طاقة ..! و حلفات بحلوفها تا توصل لهاذشي لي كتحلم ليه و كثر .. تا حاجة ما مستحيلة .. لي حفر كيوصل .. و تا واحد ما حسن من الثاني .. كيفما فلانة تعرفات و دارت المشاريع و ولا كولشي كيهترف بسميتها واخا ما تستاهلش .. تا هي غيولييو يذكرو سميتها فالطالعة و النازلة .. غير هي غتدير لي فجهدها باش تكون كتستاهل و ما تكونش من لي كيبداوها نيشان و غير يزيدو للقدام شوية .. كيقلبوها غش ..! لي غشك راه غش راسوو لا غير و هو لي ضايع ..!
و بنفس الطاقة ركبات فطونوبيلتها مديمارية كتقلب فتيليفونها .. تا صونالها فيديها نيت و بصوت مرح ردات ..!
شريفة: اوووه شكون تفكرنا ..! مدام سامية هاذ الغبرة ماشي ديالك .. توحشنا غير نشوفوو وجهك العزيز و نهضرو و نضحكوو مجموعين .. لا نتي لا للموسيوو بقيتوو تبانوو ..!
ردات برقة: غير سمحيلي ا حبيبة ديالي .. رمضان داز علينا قاسح و تسخسخنا معاه .. ما بقينا نشوفوو حتى واحد من صحابنا و معارفنا ..!
شريفة: سيفغي الله يحسن العوان مع الخدمة و الوليدات .. المهم نتوما مزيانين ا حبيبة ديالي ؟ و لاهيلا توحشتك غير تترخف عليك اجي عندي للمحل غيكون هذاك هو النهار الكبير ..!
تسمع عندها صوت الكلاكسون و فنفس الوقت قالت : و الله تا ندوز عندك .. البارح مع العيد ما حليتيش ياك .. درت غير طليلة و دخلت بحالي للدار .. كنت باغاك فواحد الموضوع ..!
شريفة: آمر ا الزين الله اودي ..!
تبسمات و ردات : كاين شي زين قدك .. اما حنا بدينا نكبرو و نعياو .. المهم يالاه هاذ اليوماين تفتحات داك الفورماسيون ديال الكوميرس " التجارة " لي كنتي باغى تتقيدي فيها ..! غير علمني صلاح ( راجلها ) قلت لوو يزيد سميتك و يتدخل لك يلا كان شي مشكل .. راك عارفة البلايص محسوبين ..!
شريفة:( ردات بسعادة ) ربي يخليك و لاهيلا فرحتيني .. يسحابلي غير نسيتيني ..! ضروري تدوزي عندي نشوفك و نعطيك الخلاص ديال الفورماسيون و فوطوطوبي ديال لاكارط ديالي
ردات عليها بهدوء : اوك مع ديك الربعة نجيب الولاد من المدرسة و ندوزو انا وياهم ... و عنداك الفورماسيون غتبدا من هنا شهراين .. راك عارفة كيفتحوو التسجال قبل باش الناس يكونوو على بال .. و راه باللونغلي و صحابها مغاربة جايين من كندا .. غيعطيوكم اللب ديال اللب د التجربة ديالهم ..!
شريفة: واخا ا حبيبة لهلا يخطيك .. ميعادنا فالعشية .. سلميلي على صلاح ..!
قطعات معاها .. شادة الطريق و عقلها كيفكر و يخطط .. حتى وقفات قدام .. السونطر أميريكان ..! هزات بزطامها ديال لي كارط و هبطات مطرقة الطونوبيل ..!
شريفة:( هازة راسها بثقة و داخلة ) مالها اللونغلي تغلبنا ؟ لهلا يحييها و يطول الزمان عليها ..! تخلعنا ؟ اودي غير تكون سبع و تاكلني كاع ..! ( بابتسامة قالت للبنت لي فالاستقبال ) عافاك بغيت نتقيد فشي سيسيون عندكم د اللغة .. تبداو معايا من الزيرو .. يعني من لاباز ديال لاباز ..!
استقبلوها و عطاوها من وقتهم حتى تقيدات .. حاطة فلوس صحيحة تما و واخا هكاك فرحانة .. المهم غتستافد شي حاجة ..! و مع كملات صونا تيليفونها ثاني ..! حركات راسها بابتسامة للبنات و خرجات كتجاوب ..!
شريفة: الوو وي ..! سي مصطفى صافا ؟ طرونكيل الحمد لله .. مشيتي للمحل و لا باقي ؟ اااه مزال ..! المهم بلا ما نوصيك .. غتدخل بحال أي كليان عادي ..! و طيسطي ليا كولشي ..! شوف الاستقبال كي داير و السيغفيس واش مزيان و لا عيان .. طلب لهم شي حاجة ما كايناش و شوفهم واش غيديروهالك و كيفاش غيتصرفو معاك ..! نتا عارف شغالك ما نزيدش نشدك .. فالعشية يكون عندي الرابور كامل .. ميغسي بون جوغني ..!
قطعات معاه كتتنهد ..! هاذ الايام مشغولة و غتغبر على المحل .. ماشي ديما غتكون مسالية باش تشوف الكاميرات و تبحث فالشادة و الفادة ..! لقات هاذ الطريقة لي غتنفعها بزاااف .. و هي تجيب ناس بعاااد عليها كليا .. كتخلص عليهم كاع لي طلبوو و هما كيطيسطيو كلشي و كيعطيوها تقرير مفصل ..! و بيه هي غتتكلف و تعرف شكون تخليه خدام معاها و شكون للباب و شنوو ناقص تصلحوو .. و هي غادية ..!
ركبات راجعة بحالها للدار .. دارت مناقص من شي نكافات و من شي لباسي .. غتجبد باليزاتها و تختار غير من لي عندها و تنوض نايضة .. على ما يصوني عليها حكيم باش يمشييو يقلبوو على الدار د الكرا و يدوزو يختارو الخاتم ..!
حكيم لي ما بقاش هز التيليفون فخطرة ..! على الصباح هبط لكازا عند العميد لي قرب يخرج تقاعد .. علموو بلي هو لي غيولي بلاصتوو و غيترقى فخدمتوو ك " عميد ممتاز " .. تقديرا لمجهوداتوو و على شحال من عملية كان هو السبب باش قبطوو عليهم ..! و ماشي غير هو عدد منهم .. كتخرج ليسط بالسميات و التعليمات كاملة و لكن ضروري ما كيدوزو من كونكور كيكون شكلي فقط و بعدها كيرقيوهم ..!
خذا المعلومات لي خاصاه بما أنوو ما بقاش موقف من الخدمة و الشهراين فاتت .. دافع دابا غير شهادة طبية حتى يولي شوية و يرجع لخدمتوو ..! و لكن لي خلاه يمشي لكازا هو شريفة ..! متأكد مليار فالمية الموافقة د الزواج غتتعكس .. ضروري من حسن السيرة من عند البوليس .. و تما غيطلعوو ضوسيها بلي فايتة مدوزة الاصلاحية .. عاد فمعلوماتها الشخصية .. طليقها تشد بتهمة تهريب المخذرات و ورقتوو كحالت ..!
و هنا غيدخلوو فسين و جيم و ما غيقبلوش يعطيوه الموافقة د الزواج .. واخا يطير و ينزل ..! عارف هاذشي مزيان و شاربوو ما .. و عارف حتى الطريق لي خاص يمشي منها و الناس لي يهضر معاهم .. باش يدير الما منين يدوز و يرصي الامور .. قبل ما يطيح الفاس فالراس ..! و الموافقة كتتعطل .. كاين لي كيعطلوهالوو من عام تال عامين و شوف تشوف و كاين لي كيبقى حاضي ضوسيه و كل مرة ماشي عندهم كيزربهم .. و تما تقدر تخرج فست شهوور او قل ..!
بلبستها الهماوية .. فالغوز بيبي محجرة و مخدومة بذوق رفيع ..! واقفة كتشوف فالمرايا ..! جاتها عبار مع فصالتها .. محزمة بمظمة د السقلي الحر .. و طالون عالي فرجليها ..!
الشعر خلاتوو قصير حدها نشفاتوو و سرحاتوو ..! لافرونش لي طوالت لها شوية هابطة على عينيها .. و خيط الروح كيلمع فجبهتها ..! دايرة مكياج خفيف بزاااف ..! ماسكارا مجبدة شفارها و خط د الأيلاينر جاي مع عينين الغزال كيفتن ..! ايشادو خفيف فالغوز بيبي ما كيبانش .. و كلوز كيبري فشفايفها تا هو فالغوز .. مع تزنيكة فالحنيكات ..!
دايرة لي براصلي لي كان جابلها حكيم فالمخيم .. بثلاثة بيهم فيديها .. و سنسلة صغيرة فعنقها فيها القلوبة فالكحل و هابطة عليه وحدة ثانية طويلة مظفورة تال صدرها مع حوالق صغار بحال الحبة فوذنيها ..!
الفرحة باينة من عينيها و من صوتها لي كيدندن لأسية ببحة كتقيس القلب و احساس خارج من اعماقها ..!
شريفة:( كتطبل بيديها و تغني ) ليلة الخميييس و الفرحة عندي في دارنا .. عروسة و عريس و مرحبا يا جيراننا .. انفرحوو و نسعدوو ليهم .. يا ربي تكمل ليهم .. انفرحوو و نسعدو ليهم .. يا ربي تكمل ليهم .. اليووووم ليييلة الخميس و الفرحة عندي فدارنا ..!
أسية:( واقفة بالبلدي تا هي كتطل من الشرجم .. حتى بدات كتنقز فبلاصتها ..! ) جاااااو جااااو جاااااو .. ناري شحال بيهم اححح على خويا حكيم كي طالع ..! اجي تشوفي ..!
رمشات شريفة عينيها فأسية و بقات ساكتة و مرزنة فبلاصتها .. قلبها كيضرب فوذنيها و كرشها مكمشة عليها بالخلعة .. بدات تعراق و يديها يترعدو .. بحال اول مرة غتشوفوو ..! ما قدراتش تنوض تطل عليهم .. كتقول غير غنوقف غادي نجي مزدوحة .. برجلي لي كيلعبوو تحتي كي العجينة ..!
كلشي كيدوز عندها ثقيييل .. بحال يلا مخشية فشي قرعة و شاديين عليها .. الهضرة و الحركة كيدوزو عندها بالعرض البطيئ ..! ما عرفاتش فوقاش خرجات أسية تستقبلهم هي و الحجامة لي توصى و تأكد عليهم يكونوو كاملين رجال ..! شريفة ما بقاتش كتيق فالبنات فخطرة .. يلا ما ضروهاش غيعطيوها لها بالعين تا تجلس فالركنة ..!
صالون بلدي كبير واسع مفرش بطلامط الخريبة فالصفر كيعشقوو فالشوفة ..! الطبالي د الأرز منقوشين و تقال هما و لي كوطي فجناب الصالون و الصوندريات الصغار ..! ريحة العود عاطية من مبخرات الكبار المذهبين لي محطوطين فوق الدربوز ..! و الزهر مقطر على اليد كيترش عليهم مع الدخلة من عند أسية .. لي ولات حمرة غتطرطق بالحشمة بوحدها و لكن ما عندها ما تدير .. هذا هو الوقت فين توقف مع شريفة ..!
شريفة لي بزز ناضت و خرجات عندهم تسلم عليهم ..! طاحت عليها واحد الحشمة و الخلعة تا عينيها دمعوو و تزنكات كثر ما هي مزنكة ..! جامعة شوية من لبستها بيد وحدة و مميلة راسها بابتسامة خفيفة بزز كتبان ..! الصالون عامر و بالدهشة لي طاحت عليها من السما .. دازت كتسلم بلا ما تهز عينيها و تركز فشكون حاضر و شكون لت .. عاطيهم الصواب و هي مضهشرة ..!
حتى وصلات لراس الصالون فين جالس حكيم ..! حكيم لي بحال يلا أول مرة غتشوفوو و تهضر معاه ..! حتى من يديها تقالت عليها باش تمدها لوو ..! ما فهماتش هاذ الاحاسيس لي جاوها مناش .. و لكن فهاذ اللحظة بالذاث بغات تبكي ..! خنقة زيراتها فصدرها .. و مع زيرلها على يديها كيحرك راسوو بابتسامة .. هبطات دمعة من عينيها ..!
دمعة و تبعاتها شهقة ..! الاحاسيس لي تجمعوو عليها خنقوها و كان لا بد تخرجهم و لا غتبقى مريضة فالجلسة كاملة .. واخا ما كانوش احاسيس خايبة بالعكس كيقيسوو القلب بزااف و كيخلييوه يرجف كثر من القياس ..! يمكن حيث صدق معاها راجل و صبر عليها و على كاع الخايب فيها و ها هو دابا فقلب دارهم هو و عائلتوو .. مكبر بيها و معتارف بحبوو ليها قدام العالم و باغي يكمل حياتوو معاها ..؟
دمعة هابطة من عينيها و هي معوجة راسها شوية و شنافتها مدلية ..! كتبان أميرة فعينيه بدلالها و شقاوتها و كلشي فيها .. نوارة الحدود ديال حكيم .. حكيم و بس ..!
مد يد وحدة طبطب بيها على ظهرها .. وجهوو قريب لعنقها و بصوت خافت و حنين قال ..!
حكيم: ششش ..! مالنا ؟
هزات كتافها بمعنى والوو و فنفس اللحظة رمشات فحبيبة لي واقفة بشعرها القصير فلاكاجوو مطلوق و لبسة جوهرة فالابيض مخيطة على حقها بالسفيفة د اليد ..! دايرة ذهبها الوازن و من وجهها كتبان بكوشة و ظريفة ..! تبسمات فوجه شريفة تبسيمة فكراتها بزمااان و غير فتحاتلها يديها مشات عندها عنقاتها بالجهد و بمعزة خالصة من القلب ..!
تعنيقة خلات حبيبة عينيها يتغرغرو و هي كتفكر شنوو دوزات شريفة مع امها و شحال كانت عزيزة عندها و كتمنى ربي يرزقها ببنت بحالها ..! و نفس التعنيقة خلات شريفة تتفكر شحال كان قلبها كياكلها ماكلة و كتحسد حكيم و خوتوو على ام بحالها .. و كتتمنى كن كانت تا هي بنتها ..!
حبيبة:( ضحكات و بعداتها شوية عليها كتمسح دموعها و دموع شريفة الخفاف ..! ) هاذي نفسها شريفة لي كانت كتجي عندي بالظفيرة و الكرطابل ؟؟ هههه تبارك الله و الصلاة على النبي عليك يا بنتي الغزالة .. عروسة كتحمق ما شاء الله الرحمان ( زادت عنقاتها و شافت فولدها ) صافي ولات ديالنا دابا ماشي غير ديالك ا المرضي ..!
شريفة:( ضحكات براحة .. و شحال كانت متوثرة من اللقاء و بمعزة شدات فيها و ردات ) الله يكبر بيك ا خالتي .. عويناتك لي فنين ما شاء الله و كيشوفوو كلشي زوين و غزال ..!
تبسمات معاها و دارتلها بلاصة حدا حكيم ..! حكيم لي جالس فبلاصتوو هاز سروال د التوب فالبلوو غوايال .. من جهة فخاضوو شوية ..! موسع بين رجليه و حاط يد على فخضوو و اليد الثانية فوق المخذة .. كتبان فيها ساعة د روليكس فالنقري كتلمع ..!
قاميجة فالابيض مفتوحة من العنق و شعيرات خفاف من صدرو كيبانوو ..! صدرو عريض و صحتوو عامرة و وازنة واخا طيح بزاف على لي كان و لكن باقي كيبان صحيح .. غير من القاميجة لي مطراسية و مزيرة مع يدييه ..!
مرة مرة كيلعب بلسانوو ففمو و يقشر شنافتوو بالهداوة ..! بشرتوو مايلة للسمورية الفااااتحة .. حروفوو كوحل من شعرو لي رجع ضرب ليه الواحد و مطراسيها كالعادة مع جبهتوو مزيان ..! ل اللحية لي خلاها خفيفة و نقية ..! لحجبانوو الكثاف و عاليين بحال الجناح ..!
عندو حضور قوي .. كاريزما .. شخصية و هبة ..! و حتى وسامة و لكن حرررشة من النوع لي تشوفيه و تقولي زينوو عادي و لكن حرش الشوفة ما تزعميش تكمليها فيه .. غير من حركاتوو الثقال و كيفاش كيهضر و يحرك ملامح وجهوو .. يذوبك فبلاصتك ..!
كيفما ذابت شريفة و هي كتشوف فيه بنص عين و قلبها كيزدح غيسكت كثر من اول مرة شافتوو و عرفاتوو ..! عرقات يديها حتى بدات كتمسحها فاللبسة بلا ما تعييق و ابتسامة خفيفة كتوزعها على الناس لي حاضرين .. و لي منهم خوتوو كلهم أكيد .. و اشخاص آخرين ما عرفاتهمش ..!
حنات راسها ساكتة كتنحنح و تسرح حلقها بالشوية .. و الحجامة خدامين كيفرقوو الما عليهم ..! تا حسات بيديه كتقيس فيديها بالحس .. تبسمات عاضة على فمها ما كتشوفش جهتوو .. هازة راسها فحبيبة كتتبادل معاها الهضرة بابتسامة خفيفة .. مرة مرة تحرك راسها و تفتح عينيها بتفاجئ موسعة بؤبؤ عينيها .. و اليد الثانية كتتحرك بثقالة كتشرح بيها بملامح سعيدة و مرتاحة ..!
الصبعان تلامسوو بيناتهم حتى تشابكوو و زير على يديها تا رجف لحمها شوية من برودية يدييه مقارنة مع سخونيتها ..!
و بنظرة خفيفة شافت فيه لقاتوو هايم فيها و بنبرة صوت هادية تسمعها غير هي قال ..!
حكيم: الزواج رزق لي وصلوو غرق ( بابتسامة واضحة ) و أنا غرقت ..!
حرك صبعوو مع كف يديها و هي حشمانة و مرزنة قدام الناس و الضحكة غتنقز من عينيها بالفرحة و فرحة الحلال ما بحالها فرحة .. خصوصا مع الانسان لي نتا باغيه و شاريه بمال الدنيا ..!
نشوفك جايا يرجف قلبي و تضحك عينيا
نبغي نكلمك و نخاف كلامي يغدر بيا
سحرتيني خطفتي قلبي ربي لي عالم بيا
من شوفة عينيك ماعرفت شنو صرالي
عيني مبقات تنام وليت نشوفك فالأحلام
روحي عاشقاك و قلبي بحبك راضي نتي حبي و ناسي و أرضي و بلادي
طمع عما عينيا و عيشتي حرارت ليا
درت جهد جهدين مبغاش حبك ينتسا ليا
يا شريفة حني فيا نتي بوحدك لي عارفة ما بيا
Malik amir
الزين غير مطلوق و الاناقة حاضرة لا فالرجال لا فالعيالات و البنات ..! حضرو فالخطبة خوت حكيم كاملين .. زيد عليهم بسمة مرات محمد أميين و عم حكيم لي فمثابة باه .. جوج خوالاتوو ببناتهم و اكيد حسام لي ماشي غير صاحبوو راه خوه لي ولداتوو ليه الدنيا .. معزتوو بوحدها .. محسوب من العائلة و كثر ..!
نحنح العم و قال بجدية مقاطعهم على الهضرة و مقاطع أسية من النظرات المسروقة لعدنان كتحاول ما تخليهش يحس عليها ..! كان مشى من بالها من لي وقع و قالت نساتوو .. و لكن غير رجعات شافتوو حسات براسها كلها كتفتف و مخلوعة غيهبطلها الطونسيو و تجي على وجهها غير من حضورو ..!
العم: الحمد لله لي تجمعنا معاكم فهاذ الساعة المباركة .. لي نتمناو ربي يدومها عليكم افراح و مسرات ( بضحكة ) و تعرضونا ..!
محمد أميين:( ضحك و رد ) غير ما تنساش الكادو ا العميم .. اما بلاصتك واجدة حدا البرزة نشد انا و ياك البريات د الفلوس نخبعوهم لحكيم بلا ما يتقلولنا الباشا ديالنا ..!
العم:( ضحك و قال ) هههه الله اوووودي حنا فالخدمة ..! ( رجع نحنح و بجدية كمل ) سيدي حكيم و لالة شريفة .. تجمعنا اليوم باش نباركو لكم فهاذ المناسبة السعيدة و نتمناوها تكون فاتحة خير عليكم .. نتوما متافقين بيناتكم و حنا ما تسالونا غير الله يبارك ..!
حبيبة:( تبسمات و قربات لشريفة شدات فيها ) طالبين راغبين فلالة لبنات لولدي سيدي حكيم سيد الرجال .. ما غنزوجش غير ولدي .. لا .. غتتزاد عندي بنية اخرى مع خواتاتها بسمة و ماري ان شاء الله .. و من هنا نقولك قداموو .. يديرلك شي حاجة غير اجي عندي و رجعي اللور .. يلا ما جبدتلوش الوذنين راني ماشي لالة حبيبة ..!
شريفة:( ضحكات بخفة و باستها فحنكها ) لهلا يخطييك ..!
بالثقالة حركات شريفة عينيها لواحد من الحجامة .. حتى غبر شوية و رجع جار هو و واحد ثاني طبلة متوسطة ..! فيها مشموم د الورد ما كبير ما صغير .. كتتشم منوو ريحة طبيعية زوينة ..!
بواطات ديال الذهب فالاحمر مفتوحين ..! فيهم كوليي ديال العنق عاطي لعين .. مرشوم و منبث فالرشمة بالاخضر و الاحمر جاي كيحمق ..! و معاه السرتلة ديالوو بنفس الرشمة و لوون التنبيتة ..! و الحوالق تا هما بحجيرات بين الاخضر و البيض صغار و مضورين بحال شكل الرشمة .. كيتشدو بالطراقية من اللور ..! و خاتم ديالهم حتى هو بنفس الشكل كمالة ديال الطقم ..!
عاد بواطة ثانية فيها ساعة يدوية أنثوية من الذهب و فالجنب د الزاجة جايين ثلاثة د الحجيرات كيلمعوو ..! و معاهم خاتم الزواج .. من الذهب الابيض و بولة وسطوو كتلمع باينة من الاحجار الكريمة ..! خفيف و كلاص .. عاطي للعين بزايد ..! و آخر بواطة فيها خاتم حكيم لي تا هو فالابيض مع رشمة كحلة ..!
سينية فيها جوج زلايف د الحليب و طبسيل د التمر فوق منوو قبة من الكركاع ..! عاد لاطاغط د الخطبة فالابيض مخدومة باللوز و الكركاع .. مكتوب فيها " خطبة مباركة .. شريفة ♡ حكيم ..! "
وقفات اسية بابتسامة مدات زلافة د الحليب لحكيم و العينين كلها عليهم و الكاميرات خدامين كيصورو ..! قربلها الزلافة لشفايفها لي غير حطاتهم هازة عينيها فيه و بعدات ..!
رجعات عطاتوو حتى هو شرب جغيمة ..! و بعدها دازو للتمر .. عضات براس سنانها و كمل هو التمرة ..!
حبيبة: الله يخلي ديما حياتكم بيضة كي الحليب و حلوة و معسلة كي التمر ..!
ردو بأميين و رجعات أسية مداتلوو الكولي ..! حط يديه على ظهرها و حك عليه بابتسامة تا عطاتوو بالجنب .. حيدلها لي دايرة و ركبلها الكوليي لي جا كيلمع فعنقها .. نخوة على نخوة ..! أنفاسوو كتحسهم سخان على عنقها و صبعانوو مرة مرة كيدوزهم على لحمها بخفة تا كتقفز .. ما شد داك الكولي و بعد تا ربي غفرلها ..! وجهها رجع ماطيشة كتضور فعينيها و غير ما زاد السر طاح عليها و قالوو مسكينة حشمانة ..!
و غير حط يديه على الشحمة ديال وذنيها وحكها بصباعوو بجوج .. مثقل و مرزن فحركاتوو و هي كتفيبري بوحدها ..! زطمات على رجليه بالطالون تا عض على فموو و تحت سنانها قالت ..!
شريفة: غير خلي الحوالق نركبهم من بعد ا مولاي السلطان ..! ( شافت فيه كتخرج عينيها )
حكيم:( ضحكوو عينيه و خلى البواطات كاملين كيفما هما .. هز غير الخاتم .. ركبولها و باسلها يديها تحت التصفار د خوتوو و الكاميرات لي كيصورو ..! هز عينيه فيها غمزها بابتسامة جذابة ) للدوام ..!
حكيم:(هز عينيه فيها غمزها بابتسامة جذابة ) للدوام ..!
تبسمات بعينين كيلمعوو و هزات خاتموو شادة فيديه كتشوف فيها .. حمرة بالنقى و ضفارو مقطعيين و مبروضين ..! يديه مشعرة بطريقة كتجذب العين و زايدينها العروق الخفاف لي فيها .. جاذبية على جاذبية ..!
ركبات لوو الخاتم بهدوء و هزات راسها فيه بهدوء و بابتسامة خفيفة حركات راسها بخفة كتمعني ليه يهبط عندها ..! و غير تحنى جهتها باستغراب ..! حطات يديها على جناب راسوو من جوج جهات .. و باستوو فجبهتوو برقة .. بوسة حنييييييينة لخصات فيها شحال من حاجة ..!
شريفة: فالحلوة و المرة ان شاء الله ..!
تبسمات و هو كيشوف فيها بتفاجئ ما كرهش يعنقها ..! يخشيها فقلبوو و يسد عليها فخطرة ..! كن ما كانوو عائلتوو لي منهم حمقوهم ككوبل و منهم لي حشموو و بداو يضورو فعينيهم ..! ما يترددش يديرها .. و لكن لكل مقام مقال ..!
اكتفى يزير على يديها وسط يديه ..! حتى تمد لهم الموس باش يقطعوو الحلوة ..!
تقطعات الحلوة و وكلوو بعضياتهم و البقية تكلفوو بيه الحجامة و تفرق على الناس هو و العصائر و لي طاغط سواغي .. بلا دواز د أتاي الحلوو و المالح مع كاس د اتاي منعنع ..! الشعبي مطلوق و كلها فين مجمع بالهضرة و التصاور ..! العزبات كيشطحوو و لي عندها شي شعر حضراتوو و الحجامة غاديين جايين مقوميين النهار على حقوو و طريقوو ..!
كلشي مرصياه شريفة و حكيم لي ما خلاهاش تطيب و تهلك راسها بتمارة .. كلشي وصل واجد من لي غيتحط فالعشية تال للعشا .. لي اختارو يكون بلدي بحال المعتاد ..! نص حولي مشوي فكل طبلة مع الخضرة مسطوكية و القوام لي كيمشي مع اللحم .. من زيتون و قرعة معسلة و زعلوك ..! و بسطيلة ديال الدجاج كتذوب فالفم .. خاتمينها بالكلاص و الديسير ..!
حكيم:( حرك صبعوو فكف يديها لي فاتحاه ليه و هو كيخطط فيه بهدوء .. مرة ترميلوو كليمة مرة هو .. ما بقى لهم والوو و يمشييو بحالهم من بعد ما تعشاو ..! ) نهضرو فالمفيد ..!
شريفة:( هزات حاجبها و ردات كتطنز ) اييه نهضرو ا مولاي السلطان فالمفيد .. من دابا نقولك انا ما عنديش الرجال لي يبرزولي مبندين و العيالات غاديين جايين عليهم .. باش تكون على بال و تجمع راسك ا سي ..!
حكيم:( ضحكوو عينيه و هز حاجبوو ) ياك ا مدام ؟
شريفة: هههه معاك بصح .. ما غنبرزش انا و نبقى مبندة للبشر حاضيني فالطالعة و النازلة .. ها هي ضحكات هي هي كحات ها هي دمعات .. ييخ ..! فمي يتكوانسا غير بالضحكة الصفرة و فلخر ما يعجبهم العجب ..!
حكيم:( ضحك ضحكة خفيفة و قال ) بالله ما منك جوج .. سبحاااااان من خلقك ..!
شريفة:( رمشات عينيها و قلباتهم للسما كترفرف بيهم ..! ) عارفة ا الزين ديالي .. خاصك تدير شي حجة و تبقى غير تحمد الله و تشكرو فيها لي سيفطني فطريقك ..! و فينما تشوفني تكرفط بالله يبارك فعمر لالة ...!
هرباتلها الضحكة تا مالت عليه كتفرنس و تضحك .. ضحكة مكركبة ..! و هو مبسم معاها كيشوف فالحمقة لي بلاه الله بيها .. و كان احسن ابتلاء فعينيه ..! جالسين فبيت بوحدهم و البقية فالصالون كيوجدو راسهم يمشييو بحالهم ..! حشموو يدقوو عليه حدهم صوناو لوو علموه و ناض وقف ..!
حكيم: هو هذا .. حتى نرجع من بعد ..!
حركات راسها بالايجاب و هو مقرب عندها يسلم عليها .. تا غفلها و جرلها شنايفها بمصة مغذذة و ختمها بعضة .. مخليلها فمها كيضرب ..!
حكيم:( حك شفايفوو مع بعضياتهم و يديه شابكها مع ديالها جارها معاه لبرا تسلم على العائلة ..! ) دابا عاد نقولوو مبروك ..!
شريفة:( سلتات لها الضحكة و ضرباتوو لكتفوو ) باااااز ..!
هز حاجبوو فيها كيضحك و فتح الباب و مع الفتحة بانتلهم أسية غادية فالكولوار هازة كاس د الما ..! بالضورة باش غتضور دخل فيها عدنان حتى تكب عليه كاس كامل .. رجعات القاميجة د الكوبوو مارون لي لابس كتقطر .. و أسية وجهها حمر كتشوف فيه مخلوعة و حشمانة .. واخا هو لي دخل فيها بلا ما ينتابه ..!
أسية: سم سمممحلي سمممحلي .. ما قصدتش ..!
حطات يديها على صدرو كتنفضلوو تالفة .. تا رجع خطوة اللور هاز يديه بجوج فالسما باستسلام ..!
عدنان: صافي ما وقع والوو .. أنا لي مني الغلط كنعتاذر ..!
شاف فعينيها لي بحال نقطة د العسل كيلمعوو و يتحركوو بخوف و رجع قلب الشوفة كيتلف الموقف تا سمع صوت حكيم قبالتوو ..!
حكيم: ما عقلتيش عليها ؟ ( شاف فيه عدنان باستغراب و حكيم حط يدو على كتف أسية بحال يلا معنقها ) أسية بنت دار **** .. وااايلي ا صاحبي شحال لعبتي معاها و هزيتي فيها و هي صغيرة ..!
عدنان:( رد و هو كيحاول يتفكرها ) ما بقاتش فبالي كاع .. دازو سنييين دابا ( بابتسامة ليها ) مشرفين و سمحيلي مرة اخرى ..! كملتي ا حكيم ؟
حكيم:( حرك راسوو بنعم ..! ) يالاه مشييينا ..!
وقفات الطونوبيل فشارع كبير و نقي ما كيتسمعش فيه حس الصداع ..! طونوبيلات خفاف مبلاصيين حدا الشجر لي مغروس فالدرب .. مظللين من الشمش ..!
هبطات شريفة و تبعها حكيم .. شدات فيديه كتسرح عينيها فالعمارة لي قبالتها ..! كبيرة و متيسعة فيها الدخلة بالدروج مزلجين .. و الباب كبيرة د الخشب و الزاج كيبين ..! الارض مزلجة بزليج بلدي هي و الحيط لي لاسق مع الباب .. و تما حافرين نيت واحد المربع مزلج دايرين فيه التراب و غارسين الورود ملونين ..!
فتح الباب بالساروت و دخلوو .. طلعوو فالسانسور تال الطبقة الرابعة .. فين كاينة دار وحدة بباب د الحديد صحيحة ..!
شريفة:( حيدات النظاظر كتتنهد ) سخفت بالطريق واك واك الحق .. وليت كنغفل عين كنلقى راسي نعست .. ما كنشبعش راحة كاع غير جري عليا نجري عليك ..!
حكيم:( رد بهدوء كيحط السوارت ) نتي بغيتي ..!!! المحل و الباتيسري كتوجدي فيه .. السونطر أميريكان و الفورماسيون ..! فين غادية ؟ حنا و ما بقيتيش تلقاي لنا الوقت ..!
شريفة:( تبسمات بخفة و قربات منوو عنقاتوو و باستوو فحنكوو ) الكبيدة ديالي نتا .. ديما فالبال و لكن بصح عييت اوووف .. الكاميوو كان تابعنا ياك ؟ غيكونوو وصلوو دابا كيطلعوو الفراش ..!
حكيم: سي ..!
خلاها جالسة فالصالون لي كيصفر خاوي .. فيه غير شي كراسة ديال ميكة لا غير ..! دخل هو للكوزينة لي فيها شي حاجة قليلة د المواعن .. عصر فالعصارة د القهوة .. كاس ليه و خرج لعندها من مور ما سمع الدقان و الهضرة ديال المعلمية لي جايبينلهم الرحيل ..!
شهر و نص داز على الخطبة و من تما و هما خايدين .. حكيم تزادت عليه الخدمة ما بقاش كيسالي فخطرة .. جالس فبوسكورة و حلف لا بقى حط رجليه فدارو .. طلقها للبيع حتى جابت الثمن لي تستاهل و باعها بكلشي لها ..! و رجع قلب على دار جديدة تعجبوو هو و شريفة حتى لقاو هاذي و شراها كاتبها فسميتها ..!
واخا عييات تتحجج و تبعد و لكن أصر تكون فسميتها و هذاك هو صداقها عندو .. غيحلل بشي حاجة قليلة و الدار ها هي ديالها ..! دار بجوج طبقات موسعة يجري فيها الخيل .. حط فيها فلوس صحيحة نيت ..!
كل مرة كيشريو حاجة على ما يسكنوو فيها فخطرة .. تا واحد فيهم ما كيسالي يحك راسوو و يشوف شنوو ناقصوو .. حكيم مرة مرة كيجيه داك الحريق و كيمشي .. بحال يلا ذاتوو ولفات عليه .. عيات شريفة تعطيه فالوصفات و تا حاجة ما نفعاتوو و خلاتوو يرتاح فخطرة .. و ها هو مكابر مع الوقت كيتسنى غير يطلق هو و كريمة و يدفع الوراق ديال شريفة للخدمة باش تخرجلهم الموافقة د الزواج ..! فبحال هاذشي كيمشييو غير المعارف لا غير .. اليوم انا نسلكك .. غذا غنوقف عليك نلقاك .. ما غتخدمليش حتى انا غنعصرك و هي غادية ..!
شريفة:( مشات حداه و قالت ) فوقاش الجلسة ؟
حكيم:( شاف فالساعة و قال ) واحد الساعة و نص هكاك .. يكملوو و نخرج نتوكل .. و نتي هانتي فالدار بيناتنا التيليفون ..!
شريفة: واخا الله يسر الأمور و هاذ المرة ما تزيدش تتأجل ثاني ..! ( عقدات حجبانها ) تا هاذ القاضي ما لقى فوقاش يدير كسيدة تا بغى يطلقكم ..!
حكيم:( ضحك باستهزاء و سكت )
*************************************
كتقلب فحوايجها بعصبية و وجهها حمممر بالفقصة ..! كرشها مقنبلة حداها و مقبلة يعني ما بقى لها والوو و تولد .. لابسة جلابتها و شعرها مخربق شوية .. كتقلب و تعاود على الخدمة د الشوافة لي عوالة عليها فهاذ النهار ..!
شحال و هي حاضنة عليها و نهار وقفات عليها .. تقول تشقات الارض و بلعات داك الزبل ..! كتشوف الوقت زحمها خاصها تخرج دابا يالاه توصل للمحكمة .. و ما عندها ما تدير ..! لوات على شعرها شال قاجاه فعنقها بالفقصة .. كتزدح فرجليها تال برا عند باها لي داير امارش للطونوبيل كيتسناها ..!
الطريق كاملة و هي ساكتة كتدمع بوحدها و مرة مرة تقيس صدرها تتأكد من الحجابات واش باقيين لها تما على الله يحننو قلب حكيم عليها و يديرولها القبول معاه ..!
طول ما هي مع باها ما نطقاتش بكلمة و تا هو نفس الشيئ .. تا تسمعات سميتها من عند الشاوش و دخلات للجلسة و موراها بشوية وصل حكيم و دخل كيسمع للقاضي لي كيقرا فالمقال ديالوو ..!
كلام كثيييير فيه حقوق كريمة و النفقة ديال بنتها لي غتخرج لحكيم غير تولد على خير و يبدا يعطيها لها ..! و ختم كلاموو ب
القاضي: رمي عليها يميين الطلاق ..!
حكيم:( رد ببرود ) مطلقة و محرمة عليا ليوم الدين ..!
شاف فيها بنظرة خالية من اي احساس .. أما هي فبحال يلا تخشى فيها موس حاااامي و حرقها من الداخل ..! دموعها طاحوو شلال على وجهها كتغوت بقهرة و القاضي كيسكت فيها محمر عينيه على الصداع ..! و بين هذا و هذا كاين الأب لي كيعز حكيم فوق القياس و بقى فيه من الحالة لي وصل ليها بسباب بنتوو .. خصوصا فاش وراه محمد أميين تصاورو كيف كان فداك الفترة .. من بعد ما تلاقاه .. لكن ما فاليد حيلة و هو براسوو مغلوب تحت أمر مراتوو و بنتوو ..!
بنتوو لي سمعها كتخطط هي و صاحبتها باش ترجع تآذي هاذ ولد الناس لي عمرو وصلوو و لا أذاه .. و بلا ما يفكر خلى حتال الليلة بليلتها د جلسة الطلاق و رمالها خدمتها كلها فالزبل ..!
الأب:( دمعة خفيفة نزلات من عينيه كتحفر فالتجاعيد لي خلفوهم السنين ..! ) الله يسمحلنا منك ..!
***************************************
هزات راسها فالسيرفور لي كيحط لها هي و سامية شنوو طلبوو ..! قبالتهم البحر و ريحة الحوت دخلات لأعماق أعماق شريفة ..! هزات نص حامضة عصراتها على الكلامار و قالت
شريفة: امممم زبدة زبدة يا ختي هووف درتيها زوينة فاش صونيتي عليا .. كنت جالسة غير بوحدي فالدار قنطانة ..!
سامية:( هي لي عاوناتها فالفورماسيون ..! ) تانا جيت لكازا هربت من الولاد و الراجل قلت نجلس شي سويعة د المكانة نرتاح .. طلعلي داك الرباط فالراس ..!
شريفة:( ضحكات و قالت ) وا كولي كولي ما حدو سخون ( ردات النفس ) ناري يا صاحبتي شحال رجعت كناكل .. تنخفت وليت كي البابور .. عاطياها غير للملوحات و الحموضات .. و لي يشوفني ما كنجلسش من الجرى يقول هاذي غتكون بحال العود ..!
سامية:( ضحكات ساهية و قالت ) بصحتك خيرك و كيبان عليك ..!
شريفة: وايييه و لكن جاهدت فراسي بلا قياس و عيييت حتى حكيم مسكين ما بقيت عاطياه وقت .. كنجي من الزنقة كنطيح ننعس ديريكت و هو هنا فكازا ما كيصلاحش ليه يجي عندي لسلا ديما ..! و نكذب عليك و الله تا كنهلكوو راسنا بيدينا .. انا لي قدامك .. الخاطر و لا عندي فوق ضيق للهيه و الراس ديما شادني كثير شي فاش كنشد الطريق لهنا .. كنتقيى مسارني و شي دوخة عمرها كانت كتشدني رجعات فيا .. غير بالخدمة هوووف تا التنفس بدا يقلالي .. ما بقاش عندي السوفل فشلت و الله تا فشلت ..!
سامية:( ردات بحيرة ) زيديني علييك هاذشي كامل لي كتقولي فيه و الوحم من الفوق .. ما عرفت نفرح و لا نتفقص .. كنا ناويين على جوج وليدات صافي حتى تعطلات عليا ليغيكل و مشيت درت الطيسط .. و لقيت لي وقع وقع ..!
شريفة:( وحلات لها حتى وجهها رجع حممممر .. بدات تكح بالجهد مخنوقة و سامية كتمد لها فالما مخلوعة تا بردات و قالت ) كح كح كح .. سامية حاسة براسي ماشي هي هاذيك غير سمحيلي نخليك هنا بوحدك .. تا نرجعوو نتلاقاو من بعد ا حبيبة ..!
سامية: اااه اااه خودي راحتك .. ياك لباس ا شريفة ؟؟
شريفة:( ردات بالزربة هازة ساكها ) والوو عيى خفيف و صافي ..!
وجهها صفار و هي كتفكر ليغيكل من فوقاش ما جاتهاش ..! آخر حاجة كانت تجيها لبالها فهاذ الوقت هي تكون حاملة .. مع الخدمة و الهلكة ما بقاتش داياها فليغيكل تعطلات او لا .. تا هضرات سامية عاد بحال جمعتي معاها بطرشة للوجه ..! الخلعة قلبات لها كرشها حتى تلوات فوسط الشارع كتتقيى مسارنها .. عرقات و الدنيا ضارت بيها .. بزز جرات رجليها لأول فرماسيان بانتلها و شرات الطيسط ..!
ذاتها كتترعد و مزيرة مزيرة لدرجة ما تتخيلش .. بحال حياتها واقفة على الريزيلطا لي غتخرج لها .. و لي اكدات عليها مولات الفارماسيان تديرها فالصباح بكري فأول بولة باش تكون النتيجة مظبوطة كثر ..! الاعصاب لعبوو عليها .. عرق فجبهتها زرق منفوخ كيضرب بالجهد غيطرطقلها فالراس .. شعر راسها وقف و عينيها حمارو العروق فيهم ..!
ما بقات رجعات لا للدار ما سولات لا فحكيم و شنوو دار فالطلاق .. ديريكت للاكار شدات الطران للرباط و فالطريق سيفطاتلوو مسج بلي خرجاتلها شي خدمة و كان خاصها ضروري ترجع ..!
ليلة و شمن ليلة دازت عندها .. بالاعصاب لي فيها غير كتبوع و تجي على وجهها .. حلقها تجرح بكثرة الردان ..! كتبكي تبكي تبكي .. كلها كتترعد لحمها سخووون و كيرجف ..! زيرات على راسها بزيف يهدن لها و سطل حاطاه حداها تحت الناموسية .. و هي هازة راسها فالسقف من الدوخة لي شاداها و السخفة د قلة الماكلة ..!
تيليفونها من الدقيقة لي وصلات للدار و هزاتوو جاوبات حكيم لي عرعر عليها علاش ما تتسناش و علمها بلي اخيرا تطلق و غيدفع الوراق ديالها فالخدمة .. ما بقات هزاتوو ..!
ما نعسات ما شافتوو حتى قرب يصبح الصباح عاد داتها عينيها فنعسة حلوة ترخات ذاتها فيها لي كانت مكنززة و مزيرة ..! واخا الشمش لي ضربات فيها ما خلاتهاش ترتاح نيت .. و لكن حال حسن من حال ..! بعدا تدير الطيسط و هي عاقلة على راسها ..!
الطيسط لي قرات ورقتوو ديال التعليمات بحال يلا كتقرا فورقة ديال الامتحان .. و بالفعل امتحان و امتحان كبير بزااااف .. فاش طلعات النتيجة .. خط احمر مغلوق واااضح و خط ثاني فنفس اللون خفيييف ..! دليل على أنها حااااااملة ..!
شريفة:( بصوت بزز كيتسمع كلوو كيرجف ) ح حا حام حاملة ( شدات على راسها كتمشي و تجي فالحمام ) حاملة .. حاملة .. ههههههههه انا حاااااملة ( ضربات حناكها بجوج و زدحات راسها مع الحيط بانهيار ) حااااااااملة ا شريفة حاااااملة ..!
بغات تحماق فبلاصتها .. كلمة وحدة كتتعاود فوذنيها .. حاملة .. حاملة ..! خرجات من الحمام كترجف .. عينيها مغمضين بالاعصاب .. هزات التيليفون كتصوني لحكيم و غير شدلها الخط قالت
شريفة: الله ينعل النهار لي عرفتك فيه .. عشر .. عشر سنيييين ديال الزواج و عمرها تدارت بيا و جيتي نتا من مرة وحدة غذرتيني .. غفلتيييييني .. قلت لك ما باااااغااااااش الولاد ( تجننات ) اعععععععععععع بشمن لغة كتفهم باااااش ؟
حكيم:( رد بخشونة و حدة فصوتوو ) مال مك مفرعنة علينا هنا ؟ صبحنا على الله ..!
شريفة:( ردات بعصبية ) صبحت انا على الحمااااالة على الولاااااد .. ولااااد انا ما باغهومش .. واااش ندير شي حاجة فراسي عاد تفهم ؟؟؟ غددتيني غددتيني ا حكيم و غفلتييييني واخا درت الاحتياط تفووو تفووو تفووو .. ندمت على النهار لي عرفتك فيه .. ندمت .. ندمت .. ندمت ..!
حكيم:( رد عاقد حجبانوو و باندفاع قال ) و انا ندمت على النهار لي حطيت ز** فيك ..!
شريفة:( تالفة و دايخة .. الدنيا ضايرة بيها غير كتمشي و تجي .. مجننة و كتبكي و واحد الحالة لا اله إلا الله ..! مسحات نيفها و قالت ) غنطيحووو .. غنطيحووو ما غنخليهش ا حكيم .. ما غيبقاش كتسمع و لا ما كتسمعش ؟؟
حكيم:( رد بعصبية ) طيحييه و لا قو** من التفرعين ديال الز* ..!
شريفة:( كررات كترجف ) غنطيحوو ااااه غنطيحوو ..!
حكيم:( غزز سنانوو و قال ) طيحييه ..!
شريفة:( قاطعاتوو كترجف ) غنطيحوو ااااه غنطيحوو ..!
حكيم:( رد بروووود باينة فيه وصل لآخر درجات الأعصاب ..! و بنبرة كيتحلف بيها قال ) طيحييه ..! يلا كنت حو*** مك بلا حريق .. سيري طيحيه و حطي فيه يديك ..!
شريفة:( سكتات شحال كتبرد النفس فيها و كتحاول تستعقل و تتهدن من الرجفة د الاعصاب لي شاداها ..! ) ما نقدرش نخليه ( قبطات فراسها بيديها و قالت تالفة ) شنوو ندير شنوو ؟؟؟
حكيم:( رد باغي يطرطق ) فينك دابا ؟؟ طلعي عندي للهنا نتهلى فيك شوية .. من شحال هاذي ما ضرتلك بجنابك .. ياك ؟ توحشتي العصا .. راسك رجع بحال الحجر و انا غنرطبوو لملتك ..! ( بصعرة غوت ) وا بالرب تا نطحن مك يلا قستييه ..!
شريفة:( عرفاتوو فالخدمة ما يقدرش يخرج دابا .. اما كن قطع عليها و شد الطريق لعندها .. بتنهيدة قالت ) انا فالدار .. غنمشي لعند شي جينيكولوغ نتأكد و نجي لعندك لكازا خاصنا نهضرو .. التيليفون ما فيه كلام ..!
حكيم:( رد بانفعال ) و هانا كنتسناك .. دوزي عندي للولاية ..!
قطع عليها حاط يدو على جنبوو مغذذ و بالزربة كيقشر فشنافتوو حتى دماها .. و داك الحجبان معقودين و طالعين فالسما .. حااااقد على الوضعية كن لقاها قداموو هاذ الساعة يغززها ..!
اما هي أول عباية بانت لها قدامها جراتها لبساتها و هزات ساكها خارجة من تما طايرة .. العقل طفى و كاع داك العصبية رجعات عليه ببروووود و هي جالسة كتتسنى نوبتها عند طبيبة ديال النساء و التوليد ..! هزات راسها فالفرملية بكل هدوء فاش سمعات سميتها ..!
دخلات لعند الطبيبة و جلسات قبالتها وجهها صفر و باينة فيها باكية حتى من صوتها تجرح و زاد بحاح كثر ما هو فيه بحة مميزة ..!
شريفة: صافا ميغسي دوكتوغ ..! درت الطيسط فالدار و طلع ليا بلي كاين حمل و جيت نتأكد و ناخذ استشارة طبية من عندك بيان سيغ ..!
الطبيبة:( ردات بابتسامة ) درتي التحاليل د الدم ..؟ ( حركات شريفة راسها بالنفي و بهدوء شيراتلها للجهة د الفحص و قالت ) داكوغ اجي معايا نشوفوو شنو عندك ..!
و ديكشي لي كان .. تكات فوق البياص معرية على كرشها و فاتحة السنسلة د سروالها ..! دارتلها الجيل فوق كرشها و هزات جهاز ألتراساوند .. كتحركوو و تبرك مزيان .. مهبطاه تال تحت كرشها بشوية ..! و شريفة مركزة فالشاشة .. حتى حبسات الطبيبة و كبراتلها الصورة .. طالعين جوج ديال الدوائر صغاااار و مفارقين ..!
الطبيبة: مبروك ا مدام .. عندك 6 ديال الأسابيع دابا ..! شفتيهم ؟؟
شريفة:( رمشات عينيها ببطئ و شوية بشوية عينيها كيعمرو بالدموع ..! ) واش ؟؟ واش هاذو هما ؟؟ ( سكتات شوية و شدات على فمها ) توام ؟؟؟
الطبيبة:( بابتسامة حركات راسها بالايجاب ) توام ... مبروك عليك ا مدام .. الله يتمم كلشي بالخير ..! ( مداتلها لانجيط باش تمسح كرشها و وقفات ) نتسناك فالبيرو لداخل ..!
شريفة: تسنااااي ..! نقدر نسمع صوت دقات قلبهم ( رمشات عينيها مغبنة و شنافتها مدلية ..! )
الطبيبة:( حركات راسها بالنفي ) للأسف ما تقدريش .. البيبي كيبدا قلبوو يتكون و ينبض من 5 د الاسابيع و لكن كيكون صغير بزاف و ما كيعطيش موجات كافية تخليك تسمعيه .. من 12 اسبوع للفوق نسمعوو دقاتهم ان شاء الله
بابتسامة خلاتها كتشوف فالصور ديال ولادها هي ؟؟؟ شي حاجة تحركات فداخلها و هي كتشوفهم غير بحال جوج نقيطات صغاااار .. حاسة بقلبها رجف الداخل من شوفتهم .. مسحات كرشها و حطات يديها فوقها .. فاتحة عينيها فالسقف ..! و بتنهيدة طويلة قالت ..!
شريفة: الله ..!
بابتسامة خلاتها كتشوف فالصور ديال ولادها هي ؟؟؟ شي حاجة تحركات فداخلها و هي كتشوفهم غير بحال جوج نقيطات صغاااار .. حاسة بقلبها رجف لداخل من شوفتهم .. مسحات كرشها و حطات يديها فوقها .. فاتحة عينيها فالسقف ..! و بتنهيدة طويلة قالت ..!
شريفة: الله ..!
بقات مدة و هي هكاك غير ساكتة و حاطة يديها على كريشتها و مرة مرة تشوف فالشاشة ..! تا وقفات بالشوية عليها قادات حوايجها و خرجات عند الطبيبة ..!
الطبيبة: ألوغ نتي باقى فأول الحمل ديالك و ان شاء الله كلشي غيدوز مزيان بمساعدتي و مساعدتك .. هاذو تحاليل ضروري تديريهم و تجيبيهم لي و هاذو دي فيتامين غيعاونوك و يعطيوك الطاقة باش توقفي و هاذي الفوطوو ديال لي بيبي ..!
شريفة:( خذات من عندها و قالت ) واخا شكرا ..!
الطبيبة: لانفيغمييغ غتعطيك لاداط ديال الكونطرول فوقاش ترجعي ( بابتسامة ) بونجوغني ..!
شريفة:( حركات راسها و رداتلها التبسيمة ) بونجوغني ..!
خرجات من عندها للاستقبال نيشان خلصات و عطاتها فوقاش ترجع .. هابطة فالدروج بالشوية و شادة فكرشها كتتحسسها و بتعجب كتفكر كيفاش داك الكميشة لي شافت غيكبرو فكرشها نهار على نهار حتى تنفخ و ترجع تحس بيهم .. يهروها و من بعد يبداو يضربوو كاع .. باغيين يخرجوو و هي كتحلم ليل و نهار فوقاش تشوف عويناتهم و تشم رويحتهم معنقاهم بين يديها .. واخا خايفة و مرعوبة من الولادة ..!
مشاعر كثار تحركوو فيها و خلاو قلبها يحنااااان كثر و كثر .. نسات الدباز و الغوات مع حكيم و بصوت مخنوق بالبكية و لكن هاذ المرة ديال الفرحة عيطاتلوو ..!
شريفة:( كتشوف فالتصاور ) عندنا جوج كميشات صغاااااار ا حكيييم .. وليداتنا هاذو ؟؟ ما قادراش نتيق .. واش هاكا كيكونوو ؟؟ ( غمضات عينيها تا طاحوو دموعها مفزكين حناكها ) توااااام صغييييورين غيكبرو و يحسوو ببعضياتهم .. ما غنبقاش مقطوعة من شجرة .. صافي غتولي تا انا عندي عائلة تهز ليا الهم ..!؟؟؟ ما متيقاش هاذو ولادي .. ولادي انا و ياك ..! حمقة انا و الله تا حمقة .. كيفاش ما نبغيش هاذ جوج نقيطات لي غيكبرو معايا و نكبر معاهم ؟؟
حكيم:( غمض عينيه كيزفر النفس .. باقي يسمعهم لها و لكن فهاذ اللحظة .. لمس احاسيسها و ضعفها ) ولااااادك و من صلبي انا و ياك ..! نتي جنتهم و هما نعايمك ..!
شريفة:( ببحة ردات كتديماري ) أنا جايا عندك .. خاصنا نهضرو و نعرفوو شنوو نديرو فلي جاي ( حطات الوراق فالكوسان جنبها ) حكيم سمحلي على الهضرة لي قلت كنت تالفة و ضايعة .. ما عرفتش شنوو وقعلي فالطبيب فاش شفت طرف مني و منك فكرشي و شحال ضعاااااف و محتاجين لي يكون بيهم .. محتاجين ليا و ليك .. قلبي حسيتوو غيخرج من بلاصتوو و الله .. ندمت حتى فكرت لدقيقة نطيحهم ..!
حكيم: المهم ..! حتى توصلي و نهضرو ..!
شريفة:( ردات كتمسح عينيها ) خليني نهضر دابا .. انا كنواعدك و نواعدهم غنكون احسن ام ليهم .. غنعطيهم الحنانة لي انا ما لقيتهاش ... غنحافض عليهم و نصونهم مني و منك حنا اللوالة .. عمرنا نضروهم بشي حاجة .. غنعييشوهم مرتاحين و غنبغيوهم بزااااف بزاااف .. غنعيشوو معاهم و نكبرو معاهم ..! اوووف عيني حرقوني بالبكى و لكن بصح انا باغياهم و غنعيش معاهم كاع ديكشي لي ما عشتوش فصغري ..!
سكتات كتبكي و تضحك فنفس الوقت بحال الحمقة و حكيم كيسكتها ..!
حكيم: شششش صافي دابا .. انتابهي مع الطريق .. قلتها لك من قبل و غنعاود نقولها لك .. غتكوني احسن ام فالدنيا ..! نوارة غتنور حياة ولادها بظلها عليهم و ما تخلي حد يقرب من حدودهم و يقيسهم لا بالخير لا بالشر ..!
شريفة:( تبسمات ) يلا كانت عندنا بنت .. نسميوها ذكرى ا حكيم ؟؟ كيفما نتا كونتي النقطة البيضة فذكرياتي القدام .. هي غتكون وحدة من النقاط البويض الكثار فحياتي و غنبنيو معاها ذكريات جداد زوينين .. ولادنا غيخليونا نتفكرو احسن أيامنا ..!
حكيم:( رد بالايجاب كيحرك راسوو ) مزيان نيت و منها نفكرك فهضرتك فاش توصلي لعندي ..! ( بنبرة استهزاء كمل ) غتلقاي السمطة كتتسناك باش تتفكري مزيان و يسخنولك جنابك شوية .. كيبانلي بردو عليك و ما بقيتي تعرفي آش كتخرجي من فمك ياك ؟؟
شريفة:( ردات كتحبلس ) حبيييبتك انا ما تسخاش بيا .. أنا و خنافيشي ..!
حكيم:( رد بنفس النبرة اللولة ..! ) غير بلااااااتي ا مدام ..! قطعي دابا مشغوول ..!
قطعات معاه مكسيرية فالطريق و لكن غير بالعقل حاضية راسها ..! الفرحة و المشاعر لي تحركوو فيها عماو ليها العينين و ما خلاوهاش تنتابه للطونوبيل لي تابعاها من لور غير بالحس حتى دخلوو لكازا ..!
الدنيا عامرة غتطرطق بالبشر فالشارع لي دايزة منوو على السويقة ..! عيات تحاول تسلك راسها و والو وحلات واقفة قدام المحطة ديال الطاكسيات حاصلة ..! تا بدات كتبانلها العافية شاعلة فالكابوو ديال الطونوبيل من القدام و الدخاخن طالعة ..! عينيها خرجوو و بالزربة هبطات مخلوعة .. تا جاو الشوافرية كيغوتوو باش تطفي الطونوبيل ما تخليهاش امارش ..!
دخل واحد فيهم طفاها و عطاها الكونطاكط و تجمعوو كيعاونوها تا همدات العافية ..!
.....: خاصها المعلم ضروري ا العشيرة .. انا نكوولك .. هذا راه الباتري تقاس لك .. جاب الله لقيتينا كاينين معاك ..!
شريفة: و لكن انا يالاه يوماين باش مشيت درت الكونطرول للطونوبيل و كان كلشي مزيان ..! ما علينا يلا عندك ا خويا شي نمرة ديال شي ميكانيسيان قريب نعيط ليه يجي موراها .. ما تبقاش حابسة الطريق هنا ..!
....: واه هاك قيدي ..!
قيدات النمرة و شكراتوو واقفة حدا المحطة كتهضر مع الميكانيسيان و الخلعة باقي لاعبة عليها ..! قطعات معاه و بقات بوحدها .. لي عاونوها مشاو بحالهم خداميين على راسهم بالكورصات و هي شادة ساكها مزيرة عليه من الزحام .. ما كتحملش تتمشى على رجليها و تبقى بلا طونوبيل ..!
مرة مرة كتسووط مبرزطة مع الميكانيسان كتتسناه حتى وقفوو عليها ربعة د العيالات دايرين النقاب .. طوال و مكضرين كل وحدة يا وحدة ..! فرمشة عين ضوروها وسطهم حتى خلعوها كثر من ما هي مخلوعة ..!
شريفة:( خرجات عينيها من شوفاتهم لي مكيبشروش بالخير ..! حاطة يديها على كرشها بحال يلا كتحمي ولادها و قلبها كيترعد فصدرها .. احساااس خايب سيطر عليها ..! خافت و خافت بزاااااف على ولادها ..! هي لي طول عمرها زعيمة و ما كتخاف من حد ..! ) شكووون نتوووما ؟؟ بعدوو لهيه اويلي ..! مالكم ضورتوني ..!؟ شنوو باغيين مني ؟؟
حاضنة راسها بيديها كتبعد عليهم و تشوف فالسويقة لي موراها ..! و بصوت عالي و لكن مبحوح بالبكى و الغوات د الصباح قالت
شريفة: عتقوووووووونييييي عتقوووو امم
شداتلها وحدة فيهم فمها و الجوج الثانيين لواو لها يديها مور ظهرها شاديينها للبنت الأخيرة لي معاهم و لي ما كيبانوو غير عينيها ..! عينيها لي حاطاهم على عينين شريفة لي خارجين فيها و عامرين بالدموع .. دموع قلة الحيلة و القهر على لي فكرشها و شنوو غيوقعلهم ؟
وجهها رجع حمممممر و هي كتهز و تحط فيديهم و تحاول تبعد اليديين عليها و على فمها ..! لكن والوووو .. عيات تدفع و ما تزحزحوش .. يديهم بحال الحجرة عليها ..! الناس كيتفرجوو من بعيد و تا واحد فيهم ما قال نقرب و نفكهم .. كل واحد مكمش على راسوو و خايف و ففمهم غير " شي حسااااااب هذا بيناتهم " ..!
نطقات المنقبة لي مقابلة معاها أخيرا و بصوت مدعدع قالت ..!
......: هاذي من عند صحيبك العزيز .. سلمي على عزرائيل معاك ا بنت الق** ..!
غمزاتها بعينيها بميوعة و فنفس اللحظة جبدات جنوي طويل تحت من لباسها و خشاتوو فكرش شريفة ..! ثلاثة ديال المرات متابعين و هي كتخشيه فيها و ترجع تجبدو ..! و غير تأكدات بلي صفاتها لها و دارت لي عليها .. خبعات الجنوي عندها و مشات كتجري هي و لي معاها لطونوبيل كونغوو وقفات لهم من العدم ..! قلعوو و طارو من تما بحال عمرهم كانوو ..!
مخليينها طايحة فالارض حدا تيليفونها و صاكها ..! عينيها خارجيين و وجهها صفر بالحريق .. حاطة يديها على كرشها كتشوف فالدم بصدمة ..! لسانها ثقال عليها و الريق هابط من فمها بالجهد واخا هي كتحس بيه ناشف ..! عينيها بداو كيتغمضوو و مع ذلك مكابرة و غمة كتحرق فيها و تحكها من الداخل .. كتتقاتل باش تهضر و توصل صوتها للناس لي عاد ضارو عليها كيغوتوو و يعيطوو للاسعاف ..!
شريفة: ولااااااااااادي ( مزيرة على كرشها و دمعتها واحلة فطرف عينيها ) و ولا ولااادي ولا و و
تغمضوو عينيها على اسم حكيم لي كيعيط فالتيليفون قبالتها و الدمعة لي كانت واحلة لها .. طاحت كتجري مع حناكها ..!
.....:( كتغوت و تضرب فراسها ) قتلووووووها عدويييين الله .. يتمووووو واليديها فيها .. ويييييييك وييييييك ا عباد الله .. الرووووح طاحت .. رزااااااو حبابها فيييييها ..! وااااااا ربي عيطوو للومبيلوونص .. الموووت داخلاها و شنوو داييين معانا من هاذ من غير اعمالنا و سعداااااتك يا فاعل الخير ..!
أذكرني بخير ..
إذا تذكّرت يوماً سِياطك واحتِمالي..
قسوتك وحناني...برودك واحتراقي..
صمودك وانهياري..
أذكرني بخير..
حين تبحث عن أشباهي وتحاول استنساخي وتعجز..
حين أغيب غيبةً لن تعد تراني مجدّداً
حين تشتاق لكلماتي وقصائدي وأشعاري
حين تسمع صدى ضحكاتي وأنين بكائي..
أذكرني بخير حين تشعر بصقيع البرد يلفح صدرك
حين تسجد لله أذكرني بدعوة صادقة فأنا لا أحتاج منك الآن سواها
أذكرني ولا تنسى أبداً أنني يوماً كنت منك قريبة جداً
وأبعدنا القدر..
شريفة حكيم 🐍 🐺
نهااااية الفصصل الثاااااني🔥
يتبع...
التنقل بين الأجزاء