عرس الذيب الجزء 22

بابتسامتوو البشوشة و ملامحوو الرجولية المميزة .. دخل للمحل ديالوو د الذهب ..! كونطوار ضاير بالزاج من الراس للراس .. كاع لي خدامين محتارمين راسهم فاللباس بيونيفورم موحد .. كيوريو للناس و يعطيوهم وقتهم باحترافية ..!

عدنان: السلام عليكم و رحمة الله تعالى و براكته ( حرك راسوو بالايجاب و هو داير ابتسامة خفيفة ) الله يعاون ..!

زاد داخل لقلب المحل .. عينيه مع الدروج لي كيطلعوو عندو للبيرو الفوق ..! و بالصدفة رمى عينيه للجنب جهة الفوطويات د الجلد لي تما .. و هي تبانلوو بنت جالسة بالخمار ديالها .. كيبان وجهها صافي و ملامحها زوينين .. لكن عينيها حووومر و حناكها مزنكين ..! استغرب و قال غادي لجهتها ..!

عدنان: ختي زكية ؟

زكية:( شافتوو و وقفات كتفتف .. شادة موشوار على نيفها و عينيها مدمعين ) خويا عدنان ( شهقات و حطات يديها على صدرها كتبكي بحرقة ) انا مشييييت فيها هء ..!

عدنان:( جمع حجبانوو بقلق و قال بهدوء كيشوف فالناس لي مركزين معاها ) واخا أجي معايا للبيرو ( شيرلها بيديه قداموو بلا ما يقيس فيها ) ان شاء الله خير ..!

حركات راسها بواخا و طلعات قداموو كترعد حتى دخلوو للبيرو .. خلى الباب مردود عليهم و جلس مقابل معاها فاصلاهم طبلة د الزاج صغيرة فوق منها لي كاطالوغ ديال الذهب ..! كب لها كاس د الما و عطاها شربات عاد قال بلطافة ..!

عدنان: بالشوية عليك .. كلشي عندو حل ( حرك حجبانوو بعفوية ) شي باس ما كاين ؟

زكية:( ردات حانية راسها و مزيرة على يديها ..! ) تغذرت ا خويا .. غذروني و رزاوني فرزقي و رزق الناس ( خرجات النفس مرعد و كملات ) خرجت هاذ الصباح لشي شغال و فالطريق وقفاتني واحد المراة هي و الراجل ديالها ..!

عدنان:( رد بتركيز ) سرقوك ؟

زكية: مصاااااب كن جات فهاذشي مصاب ..! هضرو معايا كيسولوني على واحد الحي و انا كنعت لهم بنيتي .. حتى ترفعت .. ما بقيت عارفة راسي لا فوق الارض لا تحتها .. غير فاتحة فمي .. كنسمع بحال المضبعة و هما كيدخلوو و يخرجوو فالهضرة .. جبدولي خوتي و واليديا و شي عكس دايرينولي ..!

سكتات كتبكي حتى كيتهزو كتافها كترعد كاملة .. و هو قبالتها كيرمش بشوية حاط يديه جهة فموو كيلعب بلحيتوو .. ما عرف ما يقولها باش يبرد عليها و يسكتها حتى رجعات كتهضر بوحدها ..!

زكية: قالولي نجيبلهم الذهب لي عندي فالدار كامل و نتسلف من الجيران لي كنعرف و هما غيبقاو فالباب لتحت بالطونوبيل .. غنمشي معاهم ..! و حنا كنا حضارين لعرس غير هاذ اليوماين و معانا خالتي .. مشيت هزيت كاع لي فالدار و زدت طلبت لخالتي و عطاتني و مشيت حتى عند الجارة صاحبتي و مداتلي ..!

عدنان:( رد ساهي فنقطة بعيدة ) بفف مشكلة هاذي ..!

زكية: هما واخا شافوني مخلوعة و كندخل و نخرج فالهضرة و كنتفتف بوحدي ما داو ما جابوو و عطاوني .. ذهب قديييم و ثقيل شاريينوو بفلوس صحيحة .. غير خالتي مداتلي مضمة ديال الذهب و سرتلة و تعليقة د الصدر .. بلا ذهب صاحبتي و ذهبي و ديال ماما ..!

عدنان: و شنوو وقع باش تختمات ؟

زكية: جمعت كلشي فميكة كحلة و هبطت لعندهم عطيتها لهم .. و زادو بيا تال حدا مرجان .. فالخلى و القيفار وقفوو .. عطاتني المراة بتسرفيقة و تما بحال يلا يالاه توكضت و فقت من ديكشي لي دارولي و فالبلاصة لاحوني من الطونوبيل و طارو ما بقاش لهم الأثر كاع ..! ( ضربات على فخاضها ) تما عااااد رجعاتلي السينتة اللور و عرفت راسي شنوو درت و بقيت نبكي و نغوت بغيت نهبل .. غير الناس دارو فيا خير و رجعوني للهنا ( شهقات حانية راسها كتبكي ) ما عرفت عندمن نمشي من غيرك تعاونني و ربي يفتحلك بواب الجنة فوجهك ..!

عدنان:( وقف كيتحرك فالبيرو و يتنهد .. بقات فيه من بكاها .. خصوصا فترة و هو كيعرفها و جاتوو انسانة متقية الله و كتعرف بينها و بينوو .. ماشي ديال التكرفيس ..! ) خدمووك خدمة صحيحة بففف .. عمرك سمعتي بصحاب السماوي ؟

زكية: لا ..!

عدنان:( تنهد و رد ) السماوي هو لي دارولك .. ناس كيوقفوو عليك كيكونوو لابسين مزيان .. محتارمين و من وجههم باين الخير ما تشكش فيهم كاع .. كيسولوك على شي محل و لا شي بلاصة قريبة و مع نتي كتهضري معاهم .. مع هما كيقراو عليك شي حوايج ديالهم حتى كيتطمس الواحد و كيولي مرفوع ما كيعرفش شنوو كيدير .. لي قالولوو كيمشي معاه ..!

زكية:( قالت و هي كتمسح عينيها من الدموع ) بحال يلا كينوموك مغناطيسيا .. هاكا وقعلي حتى ضرباتني و لاحوني فالطريق و بقيت جهد خمسة دقائق عاد رجعلي كولشي .. بغيت نحمااااق ..!

عدنان:( شاف فالساعة و قال كيتحرك ب حرية ..! ) ما عندك ما ديري .. ماشي نتي اللولة .. عداااد تدارت بيهم .. مشاو فيها الملايين و الاملاك .. راه دابا بردااات القضية .. واحد الوقت كانوو كثرو بزاااف و المخزن خدام غير معاهم .. شحاااال باش قدرو يشدو شي عصابات ..!

زكية:( ردات بحرقة ) الله يلطف بينا يا ربي .. و دابا شنوو غادي ندير و منين غنجيب لهم ذهبهم و الفلوس ديالهم ..! راه غير المضمة د خالتي ساوية الملايين و الذهب القديم راه ساوي الزبابل د الفلوس و صحييح على ديال دابا .. راك عارف ..!

عدنان:( رد بجدية كيشوف فيها جامع حجبانوو ) الصراحة راحة .. غتجمعيهم و تعاودي لهم شنوو وقع .. ضروري ما يديرو معاك شي حل .. دابا مشى الحال غذا ديكلاري فالكوميسارية بشنوو وقع معاك .. و يلا كنتي باقى عاقلة عليهم غتكون مخيرة كاع ..!

زكية:( تنهدات بحزن و وقفات .. من ملامحها باين عليها الاحباط و كانت كتسنى منو ما كثر ..! ) واخا الله يجازيك بالخير و سمحلي طيبتلك قلبك و صدعتك بمشاكيلي ..!

عدنان:( رد بهدوء ) ما كاين صداع بالعكس مرحبا فأي وقت ..! ( رمش عينيه كيدوز بيديه على شعرو ) غذا يلا بغيتي نمشي معاك تديكلاري .. خويا عميد ممتاز غيعرفوك من جهتوو غيديرو جهدهم معاك

زكية:( تبسمات بحزن و قالت ) واخا شكرا بزاااف ..!

عدنان: العفو ..! و بلا ما تمرضي راسك .. كلشي عندو الحل غير هضري معاهم و يكون خير ..! ( جبد الكونطاكط د الطونوبيل من جيبوو و قال ) يالاه نوصلك ما تمشيش بوحدك فهاذ الحالة .. و الظلام طاح دابا ..!

هزات راسها بالايجاب سابقاه حتى طرق البيرو و هبط .. لقاهم تا هما جمعوو كلشي و هبطوو الريدو د الحديد صحيح .. عاد ديال المحل د برا .. مشدود بالقفولة مضوبلين ..!

مشاو الخدامين بحالهم و زاد هو سابق زكية تال الشارع فين عندو الطونوبيل من نوع ألفا روميو فالابيض ..! فتح لها الباب بلطف حتى تزنكات .. شكراتوو و عطاتوو العنوان د الدار ..!

جامعة يديها عندها كتضور فعينيها .. مرة كتشوف فيه بنص عين .. مرة فالطريق باش ما تعيقش ..! بعد مدة صمت قالت

زكية: يقدرو يعطيوني كريدي من البنكة باش نرد لفلوس لصحابها بلاصة الذهب ..! خدمتي فجمعية محمد الخامس للتضامن زعما تعاونني ؟ كمساعدة اجتماعية زعما ..!

عدنان:( رد و عينيه فالطريق ) الحاجة د الربى .. عمر ربي يسخر فيها .. شحال ما بقات كتخرج فالواحد و خاص ضروري يكونوو عندك ضمنات بحال الاملاك مثلا ..! و الكريدي باش ترضي بيه الذهب ما يعطيوهلكش غير بلا ما تعيي راسك ( بهدوء ) ديري لي قلت لك و نشوفوو شي حل ان شاء الله ..!

سكتات عاضة على لسانها بالفرحة .. فهمات من هضرتوو بلي غيعاونها و غيتكلف ..! و من تما ضربات الطم ما بقات هضرات .. تا وصل للراس ديال الشارع لي كيدخل لدربها و قالت ..!

زكية: غير هنا ا خويا .. هذا هو درب ديالنا .. أنا غنكمل على رجلي ..سمحلي مرة اخرى و شكرا بزاف .. من هاذي يتعلم الانسان عمرو يوقف لشي واحد و القرآن يبقى ديما ففموو .. واخا كنبغييو نديرو الخير و لكن بنادم خايب ..!

عدنان: لا إله إلا الله و صافي ..!

زكية:( تبسمات و فتحات الباب ) محمد رسول الله .. ليلة سعيدة .. غذا فالصباح دابا نجي عندك للمحل تمشي معايا للكوميسارية لي قلتي .. يلا ما كانش شي ازعاج ..!

عدنان:( رد بلطافة ) لا بالعكس و بلا ما تعذبي .. انا دابا نجي موراك تلقايني هنا كنتسناك .. تسعود و نص مزيانة لك ؟

زكية: مزيانة .. الله يكثر خيرك ..!

حرك راسوو بابتسامة هادئة حتى شدات الباب و مشات كتزرب .. اما هو بقى حاضيها حتى تأكد بلي دخلات لعمارتها و راها فأمان عاد زاد بحالوو ..!

الدنيا كلها اغراءات و هموم .. كتدينا و تخلينا نغرقوو وسطها .. كنساو علاش تخلقنا فهاذ الدنيا و شنوو سبب الوجود ديالنا .. كنساو طريق الله و كنبعدو عليها بزاف ..! ما كنتفكرو القبلة و الدعاء حتى كتشتد علينا ديال بصح ..!

الله بطبعوو سمووح و غفور رحيم .. قبلتوو ديما مفتوحة و باب رحمتوو ما كيتشد فوجه حتى واحد .. غير يقصدو الانسان بنية صالحة و يصلي و يبكي و يدعي من قاع قلبوو و يكثر من الاستغفار و أكيد دعوتوو و أنيينوو غيتسمع لرب العباد ..! كلشي فيه حكمة عند الله عز و جل ..!

الوقت كامل و حكيم شاد عليه فالواحد البيت صغير .. توضى و بدا كيصلي .. كيصلي و هو مبورش و نادم على شحال من حاجة دار ..! كيصلي و هو كيطلب ربي يسمحلهم و يغفر عليهم و تنوض شريفة بخير و على خير .. كيطلب الراحة النفسية و السكون .. باغي داخلوو يرتاح من داك الاحساس لي قهرو و هدو ..!

دازو ساعات و ما ملش من الصلاة و من الدعاء .. حتى تفتح الباب و دخل خليل كينحنح و بهدوء قال

خليل: حكيم راهم خرجوو من العملية كيتسناوك برا ..!

كمل صلاتوو بحال يلا ما سمعوش و بتنهيدة ثقيييلة خارجة من قاع قلبوو .. سجد و هو كيدعي و يعاود .. مطول فالسجوود .. حتى سالى بالشوية عليه و ناض .. لبس سبيرديلتوو و خرج لعندهم .. شاف فيهم بالواحد واقفين مع خليل لي كاين تما لا غير و بصوتوو لي رجعلوو شوية لكن تدعدع كثر و تجرح تا ولى كيخلع .. قال ..!

حكيم: ا مضرا ..!؟

نسيمة:( ردات بابتسامة سعيدة ) العملية دازت مزيانة بزاااف ما كانوو حتى مضاعفات .. بالعكس المريضة عاوناتنا و صبرات معانا .. و حتى الدكتورة الفاسي دارت كل ما فجهدها ..!

حكيم:( غمض عينيه و رجع حلهم و رد بتنهيدة ) الحمد لله .. يعني ما تقاست لها حتى حاجة و تقدر تحمل من بعد عادي ؟

د.الفاسي:( ردات عليه بجدية ) القنوات د فالوب مزيانين و الرحم ديالها نقي و المبيضين كيشعلوو .. المهم كلشي هو هذاك ما عندكم مناش تخافوو ..!

نسيمة:( شابكات يديها بجوج و قالت ) و ماشي غير هاذشي ..! قبل ما نديرو العملية الثانية كان ضروري نديوها تدير الرنين الميغناطيسي .. باش الدكتور الهيري يتأكد من شكوكوو ... و دابا خرجوو .. ديال الراس و د العمود الفقري ..! ( شاداهم فيديها فواحد لونفلوب )

حكيم: و شنوو النتيجة ؟ عندها نزيف ..! خاصها عملية ؟

نسيمة:( حركات راسها بالنفي و وراتوو فالضو ) سلييمة .. ما عندها لا نزيف لا والوو .. الشكوك ديالنا كانت غالطة و ما غتحتاج لحتى عملية الحمد لله .. غير تقسحات فجبتها شوية ..!

د.الفاسي:( ردات بتأكيد ) حتى أنا شفت ركابيها و يديها مجروحين و تا حنكها شوية عاد الزروقية لي فجبهتها .. غالبا تضربات و طاحت على ركابيها .. سبقات كرشها مطاكية بيديها تا تجرحات فمرفقها و حنكها تقاس مع الكوضرون د الارض شوية .. عاد كلاتها فراسها .. دقة خفيفة .. ماشي بالجهد لي يديرلها نزيف ..!

نسيمة: يعني دابا بقات غير العملية ديال غذا ان شاء الله على الكبدة .. نتمناو تدوز بخير .. غنديوها دابا للإنعاش تبقى تحت المراقبة .. ممنوع تشوفوها هاذ الساعة .. الله يجيب الشفا ..!

مشاو مخليين حكيم متكي على الحيط .. هاز راسوو فالسما و يديه بجوج محطوطين جهة فموو و نيفوو .. جامعهم بحال المثلث .. كيدعي و يحمد الله ..!

حكيم:( فتح عينيه مبسمين فخليل و قال كيزفر النفس بقوة ) الحمد لله .. الحمد لله ..!

خليل:( عنقوو بقوة كيضرب على ظهرو ) ان شاء الله خير .. نتفائلوو حتى فالعملية د غذا و ربي ما غيخيبكمش ا خويا ( بمزاح ) و لا نقولك الباشا على قولة محمد أميين .. بعدا فين هو ؟ شفتوو غابر ..!

حكيم: هو و يَّما مع كريمة ولدات

هز عينوو فالكولوار .. بانتلوو أسية جاية جهتهم كتزرب و كتضور فراسها بالزربة .. بحال يلا كتقلب على شي واحد .. وجهها حممممر غيطرطق ..! شافت فيه و مشات لجهتوو طايرة .. تا بعد خليل من حداها و هي واقفة كتفتف و ترعد ..!

أسية: ع عل علاش ج جا جابووني لهنا ؟؟ ( كتفيبري فبلاصتها و تزير على رجليها بحال يلا شاداها البولة ) ش شريفة ..شريييفة مالها ؟؟ فين هي ؟

هز عينوو فالكولوار .. بانتلوو أسية جاية جهتهم كتزرب و هي كتضور فراسها بالزربة .. بحال يلا كتقلب على شي واحد .. وجهها حممممر غيطرطق ..! شافت فيه و مشات لجهتوو طايرة .. تا بعد خليل من حداها و هي واقفة كتفتف و ترعد ..!

أسية: ع عل علاش ج جا جابووني لهنا ؟؟ ( كتفيبري فبلاصتها و تزير على رجليها بحال شاداها البولة ) ش شريفة ..شريييفة مالها ؟؟ فين هي ؟

حكيم:( رخى النفس و شد فيديها زير عليها و قال ) تهدني بعدا ..!

أسية:( ردات برجفة و غوتات فوجهوو بلا ما تحس ) ما تقوووليش تهدني .. فيييين هي شريفة ..؟؟ جبتوني لهنا عندها فين هي ...؟؟؟؟

حكيم:( عقد حجبانوو من غواتها لكن ما قال والوو .. بقى مزير عليها و تحنى جهتها شوية و بنبرة كيحاول ما أمكن يخليها حنينة قال ) شريفة مريضة ( غمض عينيه بعصبية و رجع فتحهم كيغزز سنانوو ) تضربات بالموس فالسوق و جابوها لهنا .. دابا ولات شوية على لي كانت ( كيحاول يبسط لها الأمور ) ما عندك مناش تخافي ضربة خف ..!

ملاك:( قاطعاتوو بفضول ) سنيتيلهم باش يديرولها العملية ؟ ( شافت فيها أسية مخرجة عينيها و رجعات قالت بتفسير ) حيث حالتها خايبة بزاف و الاطباء قالوو ممكن تموت فاي لحظة .. كان خاص لي يسني و يتحمل المسؤولية .. باش من بعد ما ترجعش اللومة عليهم هما ..!

ضورات عينيها بالعرض البطيئ جهة حكيم لي باقي شاد فيها .. وجهها حمممر و عينيها عامرين بالدموع و خارجين فيه .. و بترعيدة قالت

أسية: ت تم تموووت ؟؟؟ تسني .. تسني لهم ...؟؟ ( زيرات بيديها الثانية على صدرها ) اويييييلي شرييييييييفة ..!

خليل:( بأسف قال ) كان ضروري تدير العملية .. دارت جوج و الحمد لله دازو مزيانين .. دابا بقات آخر وحدة ديال غذا و ان شاء الله تولي بخير ..!

أسية:( هبطوو دموعها كيفرفرو و هي مطرطقاهم فحكيم و بلوم قالت ) كييييفاش سنيتي على ختي ؟؟؟ على ماااااماااا ...!؟ ( ضربات لصدرو بيديها ) شكوووون تكووون نتا حتى تقرر ..!!!!! كن ماااااتت شريييييفة قبل ما نشوووفها ؟؟ كن جييييت دابا و لقيتها ماتت بسبابك ؟؟ شكووون تكون نتا حتى تسني قبل ما نشوفها هء

حكيم:( طلق منها و رد بعصبية حتى هو كيحرك صبعوو جهتها ..! ) هيييه ..! صوووتك نزليييه .. كتسمعي و لا لا ..! تعرفي تهضري و نتي محتارمة راسك و لي ضايرين بيك مرحبا .. ما غتعرفيش أنا لي غنعرف شغلي معاك ( قلب وجهوو للجنب ) البسالة د والوو ..!

أسية:( ردات بحزن و دموعها هابطة ) بغيت نشوف شرييييفة دااااابااا ..! ( شهقات شادة على فمها ) فالصباح جات كتفيقني بغات تعنقني و تسلم عليا و ما قدرتش نوض ..! ( خرجوو عينيها فالارض و دموعها شلال ..! ) واش دابا صافي ما غنعاودش نعنقها .. كيفاش تموت فأي لحظة ؟؟؟ ( رمشات بألم ذاتها كترعد عليها ) فيييين غتمشي و تخليييني بوووحدي ؟؟ شريييييفة راه ماما هي حياتي هي عائلتي كلها و ما كنكساب والوو بلا بيها ...!!!!

غمض حكيم عينيها شحال كيسمع لها .. زفر النفس بقوة و زاد خطوة لعندها عنقها مزير عليها .. كيطبطب على ظهرها و كيسكتها .. لكن ما قدرش بقات غير تبكي و تشهق و تهضر ..!

أسية: مشات ماما الله يرحمها و رجع مشى بابا و تنازل عليا ( بقهرة ) عمرووو سول فيا .. و من بعدها عمي إلياس تا هو نساني بحال عمري كنت بنتوو .. و دابا شريييييفة هء .. شريييييفة لي حياتي كاملة دوزتها معاها غتمشي ؟؟؟؟ علاش كااااع لي كنبغيهم كيمشيييو و يخليوني ..!!؟ واش أنا خاااايبة تال هاذ الدرجة ..؟؟؟ واش هء واش تسوى حياتي بلا بيها ا خويااا ( زيرات على يديه بيديها كتشهق فصدرو ) علاش تمشي و تخليييني موووراها ؟؟؟ نموووت أنا و ما تموتش هي .. ماااا نقدرش ما نقدرش نعيييش بلا بيها .. أنا بلا بيها وااالووو وااااالووو

بحرقة و ألم بكات و خوات قلبها حتى بدات كترعد فيديين حكيم .. تقلبوو لها العينين رجع كيبان غير البيض و رموشها فازكين كيطلعوو يهبطوو بالزربة .. رجليها التحت تعوجوو و فكها تشنج للجنب بالبكى ..!

بقى شادها غير حكيم كيطبطب عليها و كيحاول يفتحلها يديها لي تكنزو جامعاهم بونية .. و حسام و خليل مشاو بالزربة كيقلبوو على شي طبيب و لا فرملية .. تا جاو كيجريو هزوها و دخلوها لواحد من البيوتة لي عامرين بالناموسيات كاينين لي ناعسين فيهم الناس و كاينين لي خاويين ..!

قلّبوها و ضربولها شووكة فالسيروم و خلاوها ناعسة من بعد ما تقادو رجليها .. يديها و فمها .. الدموع دايرة خطوط فوجهها مطراسية و ملامحها حتى و هي ناعسة مألميين ..!

د: جاها انهيار عصبي .. صعيييب بزااااف فهاذ لاج و هي هاكا صغيرة يجيها انهيار عصبي .. انتابهوو لها و حاولوو معاها باللتي هي أحسن .. خليوها دابا ترتاح و الله يجيب الشفاء ..!

حكيم:( شاف فملاك و حرك راسوو لبرا خارج ) تبعيني ..!

ملاك:( حركات راسها بواخا و غير مشى عضات على فمها كتولول و قالت لحسام و خليل ) زبلتها ياكوو ..!؟

خليل:( هز كتافوو و قال ) بعدي من طريقوو هاذ الساعة .. معصب و مريض فخاطرو غير بوحدو .. صافي قلبي عليه ا ماري و شدي فمك شوية ..!

حسام:( رد بتأكييد ) شديه بزااااف ..!

ملاك:( قالت كتفتف ) أنا غير بقات فيا و سولت عليها .. ما نويتش غنخلع أسية .. ما سحابليش ..! ( بغات تبكي ) غيضربني ؟؟

حسام:( قلب عينيه بملل و قال ) يالاه تمشي بحالك نوصلك للدار .. نعسي و هنينا .. ما تشوفي لا حكيم لا غيرو ..!

و ديكشي لي كان خرجات مع حسام كتسلت .. ساعة ما بانلهاش حكيم تما كاع ..! اما خليل قلب عليه لقاه جالس فالجردة المعلومة .. داير رجل على رجل كيلعب بيها بالزربة ..! جلس حداه و قال

خليل: مشى حسام و ملاك ..! ( سكت شحال و قال ) رخف عليها شوية .. اااه باسلة و فيها الهضرة الزايدة و لكن عندها عزيز و غالي بزاف .. فتحات عينيها عليك بلاصة الواليد الله يرحموو .. نفس المعزة ديالوو واخا تعلقها فالبولة و تقتلها عصا ( ضحك ) ا سيدي سعداتك ..!

حكيم:( تبسم بهدوء و قال ) عارف ..! ( ضرب على ركبة خوه ) الساعة لله و صافي ..!

خليل:( سهى فالسما و فالجو لي بارد شوية و قال ) هضرت مع محمد أمين و الواليدة .. ولدات كريمة على خير و لكن البنيتة يمكن مريضة خاصك تمشي تشوفها .. و هما غذا دابا يجييو يشوفوو شريفة .. حتى بسمة خدامة هنا غير هاذي يوماين و هي كارد .. عيات ما بقاتش قادرة تبقى واقفة .. فاش هضرت معاه كانت باقي ما ردات عليه غالبا ناعسة .. غذا و تجي تشوفها .. راك عارف التخصص ديالها القلب و الشرايين يقدرو يحتاجوها ..!

حكيم:( رد بثقالة ) على مولانا ..! البيبي غذا غنمشي نشوفها .. خاصني قبل ندوز للخدمة .. اليوم ما رجعتش ..!

خليل:( بتردد قال ) واش باغي تشد القضية ديال شريفة ؟ و لكن نتا أغلب خدمتك فمحاربة المخذرات او لا ؟

حكيم:( بهدوء قال ) لا ..! نقدر نشدها .. خليت حسام يتكلف بالطلب حتى تولي شريفة شوية و نشوف شنوو دار فيه ..!

خليل: شكوون غيكون ضربها ؟ واش بغاو يسرقوها و لا شنوو ؟ بففف على حالة فين وصلات ..!

سكت حكيم ما ردش عليه .. كيفكر ساهي .. لا هو لا خليل نعسوو داك الليلة .. واخا عيى فخوه يمشي بحالوو .. ما بغاش يخليه ..! أما حتى أسية منين ضربولها المهدئ فالسيروم ما بقات فاقت ..!

ليلة دازت طويلة عليهم كاملين .. و على شريفة أكثر لي كتقاوم و متشبتتة بالحياة .. لكن حتال فوقاش ؟ الله اعلم ..!

🌞 يوم جديد 🌞

ناعسة حبيبة بالعيى فوق الكرسي .. راسها عوج و ما حاساش بيه .. حتى تفتح الباب و دخل حكيم .. عينوو بحال الجمر بالحمورية .. باين من وجهوو بلي عيان و ما ناعسش ..! مع الفتحة د الباب قفزات حبيبة شادة على عنقها لي تقبط ..!

تفوهات و وقفات مبسمة فوجه حكيم .. لي قرب جهتها باسلها يديها و راسها و عنقاتوو مزيرة عليه كتنهد ..!

حبيبة: شوية ا الحبيب ؟؟ و شريفة كي بقات ؟

غمض عينيه و رجع فتحهم بمعنى الحمد لله على كل حال ..! تبسم تبسيمة خفيفة و هو غادي للجهة فين ناعسة بنتوو .. عريانة غير بليكوش و السلوكة مركبين فصدرها و يديها .. متاصلين مع الآلات ..!

ألموو منظرها و لكن رعشة خفيفة حسها فقلبوو لي تكمش عليه .. كيقولوو هاذ البنوتة الصغنوونة بنتك نتا من لحمك و دمك ..! قلييييولة .. صغييييرة و ضعيفة .. باينة فيه مريضة .. ملامحها زوعر غير من حجبانها لي ما كيبانوش بالزعورية و شعرها لي خفيف و زعر فااااتح لي يشوفوو من بعيد يقول قرعة ..!

لكن وجهها و لحمها زرررررق .. كلها زررررقة مسكينة و ذاثها مشششششعرة .. غير هي زعرة ما كيبانش الشعر بزاف .. عينيها واخدة ديال امها .. نفس اللون لي كيفتن العين .. و بؤبؤها فيه شوية ديال الدم .. باقي ما صفاو مزيان و منفوخين من الفوق ..!

حبيبة:( قالت بصوت طفولي ) ها بابا زا .. سفتي بابا ..!

حكيم:( تبسم و هو كيتلمس فيديها الصغييورة و تحنى باسهالها .. تا حس بيها شداتلوو على صبعوو و زيرات .. كتكمش فعينيها و تنغنغ .. فمها حممممر تقول معكر ..! ) نور ..!

حبيبة: نور ؟ ( ضحكات بعينين كيلمعوو بالدموع و قالت ) ههه هاذ الكميشة هي النور لي غتنور حياتنا ..! امم نتي ا بابا لي غتنورينا ..!

حكيم:( هز عينيه فالألات و هي باقى شادة فيه و صبعوو الكبير كيدوز على يديها بهدوء ) شنوو عندها .. باش مريضة ؟

حبيبة:( ردات بألم ) كلكم لمتوني و كنتوو كتشوفوني نية و بلا عقل فاش كنجي من كريمة و كنحاول نصلح لي غنقدر عليه .. و لكن أنا لي كنت كنديرو .. راه كنديرو غير على ود هاذ البنية و على ودك نتا ..!

حكيم:( هز حاجبوو بثقالة كيسمع ..! و نظراتوو عندها معنى .. بحال يلا كيقولها كيفاش على ودي ؟ ) الصمت

حبيبة: على ودك نتا .. باش النهار تتزاد هاذ البنية .. ذنبها ما تهزوش على رقبتك .. حيث لي ما درتيهش نتا على ودها دارتوو مك ..! ( تنهدات بقوة و كملات ) هاذ الملاك حتى هي بحقها .. واخا تولي طير فالجنة .. غنتحاسبوو كاملين عليها .. من كريمة لي ما رحماتهاش .. و بداك السم و الزبل لي كانت كتدير خرجات عليها .. حتى لينا حنا ..!

حكيم:( رد بعصبية مكتومة ) حنا بعاااااد ا حبيبة .. هي لي كانت هازاها فكرشها و كتدير بيها المصائب .. أما نتي هزيتيها على كفوف الراحة .. و انا لي حلات فمها عليه كنت كنحطوو .. و الشهرية كتوصل لك .. فراس كل شهر .. من الطبيب للدوا للحوايج ( حرك صبعوو جهة الارض كيأكد ) و فاش مشات لدارهم .. كل شهر كتوصل لباها .. هاذشي كامل علامن ؟؟ على هاذ البنت .. هذا جهدي معاها و هي فكرش مها ..!

تفاجئات حبيبة .. حيث عارفة كان دايرلها الشهرية فاش كانوو مزوجين و منين عرفها كتسحر لوو بيها .. قطعها ..! لكن غير عرفها حاملة رجع كيسيفطها لحبيبة تتكلف .. و بيديها داتها شحال من مرة للطبيب موفرة لها احتياجاتها كاملة و من بعد ناض الصداع و كل مرة خاوية الدار .. ها هي عندها ها هي مع واليديها .. ها هما جراو عليها و هي غادية .. و من تما ما بقى سيفط لحبيبة .. فقالت حبسها عليها ..!

حبيبة:( ردات بحرقة ) دابا تندم كريمة و تعض فالتراب و ما تنفعها ندامة ..! ( شافت فالبنيتة ) مسكينة مريضة بزاااف .. خرج شهرها بشحال و ما جاها وجع و هي ما سايقة خبار و ما عارفاش تا فوقاش غتولد .. تا زراقت البنت و كن زادت شوية كن ماتت لها .. تولدات ضعيفة بزاف .. فيها جوج كيلوو و 700 غرام ..! عندها السوائل زايدين فالرئتين دياولها .. هاذشي لي قالولي .. خاصها العملية ضروري .. و خايفين تكون هزات واحد جوج فيروسات من امها .. خداو لها الدم مسكينة يديرولها التحاليل .. حتى نتا خاصك تديرهم ا ولدي ..!

حكيم:( غزز سنانوو ) هاذي يحنوو فيها الناس ؟ ( ضحك باستهزاء ) لحمها و ما حناتش فيه ..!

تنهدات بحزن و سكتات كتشوف فالبنية لي طلقات من يد حكيم .. لي بعد شوية كيكتب فالتيليفون و بعد مدة صمت قال

حكيم: ما شافتهاش ياك ؟ ما عطيتوهاش ترضعها ..!؟

حبيبة:( ردات بالنفي ) ولداتها و داوها غسلوها و قلبوها و جابوهالنا هنا شدينا علينا .. ما شافتها لا هي لا عائلتها .. أنا و محمد اميين لا غير .. و الفرمليات كل ساعة كتسيفطهم يجيبوهالها و كيأجلولها .. اصلا يلا كانت بصح مريضة .. حليبها كلوو سم .. يلا مشات تا رضعاتوو البنت غتهز من عندها المرض و موحال تصبر هاذشي لي قالت لنا الطبيبة و التحاليل ما يخرجوو من هنا ثلث ايام ..!

حكيم:( هز راسوو من التحت للفوق كيغزز ففموو و قال ) موصيهم و معاود .. غير يلا بغاو يتعاماو ..! و داك الكل٠بة .. أنا غنمشي نهضر معاها .. باش نفضييو علينا هاذ الفيلم فخطرة و نتنهاو ..!

حبيبة: و دوز ا ولدي عند الطبيبة لي ولداتها بعدا راه بغاتك تهضر معاك .. و انتابه تمشي تلوح عليك داك الخانزة شي حاجة ..!

حكيم:( رد باستهزاء ) يلا عمات لها تديرها ..!

سكت شوية وجهوو مزير .. شد فالحيط حاني راسوو و حبيبة كتسولوو مالوو باستغراب ..! تزير و عراق تا لسق عليه التيشورط و تطبع ..! رجعلوو نفس الحريق .. المواس كيقطعوو فيه من الداخل .. واحد الوجع قاااااسح لدرجة ما كتصورش .. صعييب تصبر عليه ..! مدة و هو هكاك و حبيبة مخلوعة عليه كتصوني على الاطباء من واحد البوطونة تما يجييو .. تا طاح حداها مغيب ..!

متكي و هو جالس .. فاتح عينيه فصمت .. السيروم فيدو و حبيبة حداه كتتنهد ..! حتى دخلات الطبيبة لي ولدات كريمة .. شافت فالملف ديالوو لي معلق تحت البياص فيه الملاحظات و قالت

د: طاح لك الطونسيوو و حتى السكر عندك هابط بزاف ( شافت فيديه ) يكمل السيروم و تقدر تخرج و لكن ضروري تفطر و تشرب الدوا ديالك ( د السكر ) ..!

حكيم:( هز راسوو بالايجاب فصمت )

حبيبة: هاذي هي الطبيبة لي ولدات كريمة ا ولدي .. كنتي باغي تسولها ؟

حكيم:( رد بجدية ) وي ..! بغيت تقرير كامل على الحالة د البنت و على لي فيروس لي هضرتوو عليهم .. و حتى على كريمة ( هز حاجبوو بثقالة كيضغط على الحروف ) كلشي ..!

د: بيان سيغ .. من حقك ..! أنا نشرحلك الحالة بالضبط و نكتب لك التقارير كاملة ..! بون نبدا بكريمة ..! ولدات سيزاغيان .. لأنوو فاتها وقت الولادة .. ما جاهاش الحريق و علماتش الطبيبة ديالها فاش خرج شهرها .. باش تديرلها حريق اصطناعي يعاونها ..! ( بجدية ) المدة كاملة لي جلسات .. كان ممكن البنت تنشف من الما و تخنق و تموت .. لكن ربي جا معاها ..!

حبيبة:( ردات بحرقة ) الله ياخذ الحق ..!

د: ألوغ لي خاصكم تعرفوو .. هو داك الفيروسات المهبلية ماشي ضروري الوحدة تكون هزاتهم و لا انتاقلولها .. بزاااف ديال الحوامل كيجيوهم فالشهورة اللخرين ديالهم .. و هنا ضروري الطبيب كيعاون بدوايات و كيعطيك طريطمون علاياش تمشي .. باش داك البيبي ما يتضررش .. و فأغلب الأحيان الولادة كتكون سيزاغيان .. لأنوو لي فيروس كيفما قلت كيكونوو فالمهبل ديال المراة و كاينة واحد النسبة د الخطر .. باش فالولادة ينتاقلوو للبيبي ..!

حكيم: يعني نور ما غتكونش هزاتهم من عندها ..!

د:( حركات راسها بالايجاب ) كنتمناو و التحاليل غيبينولنا كثر .. ألوغ مدام كريمة خدينا منها الدم هي و ( تبسمات ) نور و سيفطناهم للابوغاطواغ لي مع الكلينيك .. ثلث أيام و يخرجوو النتائج .. و كيفما قلت لك .. فاش شفت الضوسي ديالها كان ضروري نحيد شوية د الشكوك لي جاتني .. و من بعد ما تخذرات و قبل ما نولدها .. درتلها منظار .. هاذ المنظار واحد الألة كندخلوها فالرحم و بيها كنقطعوو طريف صغيييير .. كنديرو عليه التحاليل ديالنا .. و تا هي تسيفطات مع البقية .. ربع ايام بالكثير و تخرج الغيزيلطا ..!

حكيم:( رد جامع حجبانوو ) بحالاش هاذ الشكوك ؟

د: كنفضل حتى نشوف التحاليل بين يدي عاد نهضرو فهاذ السيجي ..! كخلاصة العملية دازت مزيان .. شفتها هاذ الصباح و الفرمليات مهليين فيها بلي سوان بكلشي .. ما عندكم علاش تخافوو من هاذ الناحية ..!

حكيم: و نور ..!

د: نور عندها ضيق فالتنفس و الدقات د القلب ما منتاظمينش مزيان .. نسبة السوائل طالعة فالرئتين .. و هاذشي غيسبب لها مشاكل كثيرة .. و نتمناو مدام كريمة ما تكونش حاملة للفيروسات و ما تكونش نقلاتهم لبنتها .. الرضيع صعيب عليه يتحملهم ( بأسف ) و ممكن يتسببو فالوفاة ديالوو كاع ..!

حكيم:( زفر النفس بقوة و قال ) تقدري تشرحي كثر .. باقي ما فهمت مزيان .. هاذ لي فيروس ديالاش ؟ ( بتأكيد ) بالنسبة للبيبي ..!

د: بيان سيغ ..! اول فيروس هو " عدوى الفيروس المضخم للخلايا ( CMV ) " بالنسبة للبيبي .. تقدر من بعد اشهر و لا سنين كاع .. ما تبقاش تسمع .. يتأخر النمو ديالها .. تلقى مشاكل فالبصر و ما تبقاش تشوف ..! و يلا جينا نهضرو على الاعراض لي يقدرو يجيوها مع الولادة ف هما .. انخفاض الوزن .. تكون ضعيفة بزاف .. الجلد يصفار و العينين حتى هما .. يخرجوو فلحمها بقع فالموف و لا طفح جلدي .. تضخم الطحال .. التهاب الرئة .. الراس يكون صغير بزااااف و هذا راجع لصغر الدماغ ..!

حكيم:( دوز يدو على عنقوو فصمت )

د: المشكل هو هذا واحد من الفيروسات لي منتاااااشرة بزاف و ما معروفاش .. نهار كتقاس بيه كيبقى معاك حياتك كاملة .. غير هو ممكن يكون نشيط و ممكن يكون كامن .. كامن يعني ما خدامش و ما مأثرش فيك و مناعتك متغلبة عليه .. لهذا المناعة خاص ديما تكون طالعة .. و صعيب الواحد يشك بلي راه هاز الفيروس حيث ما عندوش اعراض لي يخليوك تحس بالخطر .. بحالوو بحال الفيروس الثاني ..! و كيفما قلت للواليدة .. كينتاقل بالسوائل .. بمعنى .. بالدم .. بالبول .. بالبزاق .. بالدموع .. بالحليب د الام .. بالسائل المنوي و اخيرا بالسوائل المهبلية لي كتكون فأي علاقة جنسية .. على هاذشي خصك حتى نتا تدير التحاليل ضروري ..!

حكيم:( رد بتركيز ) قلتي المناعة ضروري تبقى ديما طالعة و فحالة هبطات ؟ شنوو ممكن يوقع ..!؟

د:( تنهدات ) بزااااف .. لي عندهم مناعة ضعيفة كيأثر عليهم فوق ما كتخيلوو .. يقدر يوصل لالتهاب الكبد .. الرئة .. الدماغ .. الجهاز العصبي و الهضمي و فقدان البصر ..!

حبيبة:( شدات على فمها و قلبات وجهها باغية تبكي .. و لي كتفكر فيه هو يلا كريمة مريضة بصح و دارت اللحم تحتها و حكيم كلى من داك الزبل .. راه حتى هو مشى فيها على هاذ الحساب ..! )

د: الفيروس الثاني هو الهربس لي فيه جوج د الأنواع .. واحد و جوج ..! هربس 1 هو الهربس الفموي .. يعني كيكون عندك الفيروس ففمك .. حتى هو ما عندوش اعراض من غير كيخرجولك الحبوب بزاف و بعد المرات كيوليو تقيحات ..! هربس 2 هو الهربس التناسلي و نفس الحاجة كيخرجولك حبوب .. قيح .. حريق و ماكلة فالاعضاء التناسلية ..! الاغلبية كيمرضوو بيه العيالات و كينقلوه لرجالهم بالجنس ..! و المضاعفات نفسهم ديال الفيروس الاول .. و كنأكد و نعاود يلا كانت المناعة طالعة كتتغلب عليهم و ما كيقدرو يديرولك والوو ..!

حبيبة: يعني حتى حنا لي كنا كنقيسوو فيها .. ممكن نكونوو مراض ..!

د:( ردات بجدية ) بمضخم الخلايا ممكن .. اما الهربس فكيموت بالزربة منين كيخرج من الجسم .. يعني يلا قستي الطواليط و لا الفوطات باش كتمسح و كذا .. ما غتعدايش نهائيا .. الهربس العدوى كتكون بالجنس لا غير و الاغلبية لي كيكون كيخلط هو لي كيتصاب بيه .. و مع الاسف مضخم الخلايا فاش كيتجمع مع الهربس التناسلي .. ممكن جدا مع الوقت يتطور و يرجع فقدان مناعة و يتصاب الحامل د الفيروسات بالايدز .. أي بالسيدا ..!

حكيم:( حنا راسوو مزير عليه و بعد صمت قال ) تقدرو تاخذو الدم دابا و تديرو التحاليل ..!

د: داكووغ أنا نسيفطلك الفرملية تتكلف .. الله يجيب الشفا و خلييو هضرتي كاملة جنب على لي فيروس حتى نتأكدو .. دابا فكرو غير فالسوائل الزايدين لي عندها فالرئتين .. خاصها عملية ضرورية .. لي أنا ما نقدرش نغامر و نديرها .. يلا عندكم كي تديرو تخرجوها للخارج غيكون احسن كنصيحة أخوية ..!

حكيم:( هز راسوو بنعم ..! ) واخا شكرا ..!

د: على واجب ..!

بقاو ساكتين حتى جات الفرملية خداتلوو الدم و سيفطاتوو للابوراطوار باش يديرولوو التحليلات .. و عطاتوو فالبلاصة بلاطوو فيه الفطور .. كلاه و حيد السيروم و وقف خارج لعند كريمة ..!

حبيبة: فين غادي ؟ شنوو بانلك فالهضرة د الطبيبة على الخارج ..!

حكيم:( رد بهدوووء ..! ) غنسيفطها مع خليل و معاك لألمانيا تتداوى .. بلاتي نقلب على الاطباء لي مزيانين تما يقدرو يديرولها العملية .. غنسيفط لهم الضوسي ديالها .. فألمانيا و لا فأي بلاد .. المهم تولي لباس ..!

حبيبة: و لكن .. الحضانة للأم ما تقدرش تخرجها ..!؟

ضحك باستهزاء و ما ردش عليها .. تبعاتوو دخلات عند نور و هو مشى فالكولوار طالع فالدروج تال للبيت ديال كريمة فتح الباب و دخل بكل بروووود كيسرح فعينيه ..!

فتح الباب و دخل بكل بروووود كيسرح فعينيه ..! لقاها ناعسة ببيجامة فالشيبي 3 د لي بياس .. فوق منها ليزار فالابيض مغطية بيه و وجهها صفر ..باينة فيها عيانة و الوجع قتلها ..! بوحدها فالبيت ما معاها حد ..!

كريمة:( مغمضة عينيها و كتهضر ) طرgتيلي ا مي الفرماسيان .. لgيتي عندو دوليبران و لا تgادى " تسالا " ..! ( فتحات عينيها و غير شافتوو رجعات باللور شوية كتقاد فالجلسة موجعة ) حكيم ..!

حكيم:( رد باستهزاء و قرب لعندها ) امم حكيم ..! كي بقيتي مزيانة ؟

كريمة:( ردات بحزن ) توحشت داري و مولا داري و بنتي من البارح و انا سايرة نبرح لهم يمكنوها ليا و تgول جابوها لي ..!

حكيم: توحشتي دارك و مولا دارك و بنتك امم ..! ( حك حاجبوو كيدوز يدو على وجهوو و بنفس النبرة قال ) كتبغيني انا و بنتك ا كريمة ياك ؟

كريمة:( تفتحوو عينيها و قالت بلهفة .. كيسحابلها تراجع و باغي يردها ) فوg ما تتصور .. يانا و الله تا ندمت على كاع العمايل لي درت .. نتا مولا داري و تاج راسي علامن كنعول و ما عندنا حد يانا و بنتنا من غيرك .. عمري نولي ندير لي يعصبك و يمرضك ( رمشات عينيها كتجبد فشالها على وجهها لي تزنك ) يانا كنحتارمك و نعزك فgلبي ..!

حكيم:( رد و هو عاقد حجبانوو ) شنوو هو الاحترام و الحب عندك ..؟ ( غوت تا قفزات مقسحة .. من بعد ما خرج عينيه مطرطقهم ..! ) واش عارفة لعدو ر*** ا بنت الق*** شنوو درتي فداك البنت و لا ما عارفاش ..!!!!!

كريمة: ما يسحابليش يانا هاذي اللخرانية ليا انا متايبة ( هي ثايبة زعما ) يانا بنتي هي

قرب منها المسافة لي بقات و بعصبية عطاها بظهر يديه لوجهها .. شرك لها الحنك و العين و الوذن .. تا ضربها الضوو و ضارت بيها الدنيا .. و فالبلاصة شنق عليها كيديها و يجيبها مغلغل ..!

حكيم: ما هضرتش مع الق*** مك على الفعايل د القو*** لي درتي معايا .. بلعت لك الحالة لي وصلت لها بخنز ط*** الواسعة مك .. و لكن بنتي بالرب

زير يديه على عنقها كيخنق فيها و هي وجهها رجع حممممر و عينيها خارجين بزز كتنفس .. كتسمع بحال تلقيفة د الموت ..!

حكيم: بالرب العاااااالي ا كريمة و كنقسم فمي بالله و يوقع لها شي حاجة بالتق*** د الز* ديالك .. حتى نقسم مك طراااف و ندخل على ط** للحبس .. بالرب حتى نوريك الزم** شكدير ( طلقها كترد النفس تا بزق عليها فكمارتها و كمل معصب ) تولي تشوفي هاذ الوجه تبغي تبزقي عليه ..! لدابا باااااااقي ما خرجت معاك للعب الزو*** ( شرط فالحيط ) و هانا فين كنقولها لك .. بعز ما عندي و تكون بنتي هازة من ط*** مك شي قل** لي غنديرو فيك عممممرك فحياتك تنساااايه ( باستهزاء ) يلا بقيتي عايشة بعدا ا الق** ..! ( بزق فالارض كيمشي و يجي قبالتها ..! ) تفووو

كريمة: يانا ما كنتش عالمة .. يانا بغيت نشووف بنتي ا حكيم ( بدات كتبكي بالجهد ) واش يانا نبغي لها الخايب

بداو يديه كيترعدوو .. عينيه كووحل بالغضب و الاعصاب شي عقل كيقولوو غير شد لها راسها و بقى تضرب فيه فداك الحيط حتى تهني البشري منها .. قرب منها غيطرطق .. هز يديه تا غمضات عينيها كتسنى الدقة .. لكن ضرب فبوطونة فوق راسها تا شعلات بولة حمرة فالباب د البيت و بنبرة صوت كتخلع ..!

حكيم: غتشدي عليا حلقك قبل ما نذبح الق*** لي حطاتك من الوذن للوذن و نخليك كتشرشري هنا كي البهيمة ..! ( بحدة ) و شي حاجة سميتها بنتك نساااااايها ( ضرب سنة فسنة و قال هاز حاجبوو بمعنى تطرطقي ) رييييحتها و الله لا شميتيها ..!

كريمة:( ردات موسعة عينيها .. حالتها حالة بالدموع و الحريق .. بلا حنكها لي منفووخ حمممر .. مطراسي بيد حكيم ) لااااا ا حكييم نموووت يا و الله ت نموووت ..!

حكيم: موتي و لا قو*** .. كنتي فنعمة كيتمناوها الناس ليل و نهار .. بنتك لي فرطتي فيها بيديك .. كاين لي بين الموت و الحيا و كيتقاتل على ودهم .. كاينة لي كتبكي ليل و نهار على ود الاولاد و ما لاقياهمش ( شيرلها بصبعوو جهتها ) الصحة لي عندك هاذ الساعة .. غيرك كيتمنى الربع فيها و ما لاقيهاش ( باستهزاء ) و نتي ما حامداش الله ( ضرب يد مع يد ) و دابا سالينا .. نولي نشوفك نتي و لا شي قو** من عندك .. كيضور بيا و لا بعائلتي .. و بديييينيييي ا كريمة حتى نح** عرووق طاسيلتك قبااالة عينيك .. يلا ما تقبتهمش لك بالواحد راني زا*** و خاصني لي يح*** .. و سطري عليها مزيااان .. و دابا ها حنا بلعنا علينا هاذ الباب ..!

فتح الباب و خرج من عندها مكشكش حتى تبعاتوو تا هي كتجري بحال الحمقة .. الحريق كيقطع فيها و ما قادراش تزيد .. كلها كترررعد و عرقانة .. تا العينين بغاو يتقلبولها بالوجع و لكن تابعاه و صابرة .. حيط يكاليها مع حيط .. تا وصلات للكولوار فين غادي و نتفات شعرها محيدة الفولار كتغوت لربي لي خلقها .. و الدم سايل منها .. باينة طرطقات الغراز ..!

كريمة: ويييييك ويييييك وااااا بنتيييييي بغيييييت بنتيييييي .. واااا تاااااااايمة وااااا عووووكعووووك

جاو الفرمليات كيتجاراو لعندها .. ربعة بيهم شدوها و هي كتبكي و تضرب ففخاضها و تنتف فشعرها بالصعرة العروق فنواظرها خرجوو .. دمها سخن و غير ما كيسيل من الجرحة لي طرطقولها فيهم الغراز ..!

الفرمليات كانوو جايين عندها من البوطونة لي برك عليها حكيم .. لكن فاش شافوها هكاك بحال الحمقة .. مشات وحدة فيهم بالزربة جابت كالموون .. ضرباتولها فيديها و بقاو شاديينها شوية عاد ترخات و تكالمات ..!

تعاونوو عليها حتى دخلوها للبيت .. سواناو ليها الجرحة و عاودولها الغراز لي تفتحوو .. مخليينها متكية فبلاصتها فاشلة و الدموع هابطين غير بوحدهم ..!

أما حكيم من تما نيشان طلع للبيرو ديال المدير د الكلينيك ..! جبد بطاقة صغيرة ديال الخدمة ديالوو .. حطهالوو فوق البيرو مقابلة مع عينيه و قال بجدية ..!

حكيم: الكاميرات د الكولوار لي حدا البيت 45 .. بغيت التسجيل ديالهم ..!

جبد يوسبي من جيبوو مركز مع المدير لي كيدوز التسجيلات .. حتى وقفوو فاللحظة لي خرجات كريمة من البيت كتغوت جاهلة بحال الحمقة .. هز المقطع لي بغى فاليوسبي و شكر المدير .. و هما جالسين دخلات الطبيبة لي ولدات كريمة و عطاتوو التقارير لي بغى ..! هز كولشي و خرج من تما من بعد ما شكرهم .. مخلي الحضية على مو و على نور .. فبيت بوحدهم ما عارفوو تا واحد ..!

حكيم:( ركب فالطونوبيل مقلع من تما و التيليفون فوذنيه .. كيقشر ففموو بعصبية و صباعوو كيطقطقوو فوق الفولا ) سي عبد الرحمان ( زفر النفس كمل بمجاملة ) من الحامدين و الشاكرين الله يحفضك .. محتاجك فشي خدمة .. تقدر تدوز عندي للولاية ( شاف فالساعة ) انا واحد ساعة هكاك نكون تما .. مسلكاك ؟؟ صافي مزيان .. الله المعين ..!

قطع معاه شاد الطريق لدارهم الجديدة .. الدار لي كتبها فسمية شريفة كصداق ليها فاش يتزوجوو .. غيحلل بمبلغ بسيط و ها الدار ديالها ..!

الدار مزال ما مفرشة و ناقصاها شحال من حاجة من غير بيت النعاس ديالهم لي وجد و تقاد و تبلاصى فآخر نهار كانت شريفة فيه مع حكيم فكازا .. قبل ما تعرف بلي حاملة ..!

لبس بذلتوو الرسمية فالابيض مزينة بشارات فوق كتافوو و صدرو .. و كثرة ميداليات التتويج على خدماتوو و مجهوداتوو لي كيقدم ..! الفردي مخشي فبلاصتوو .. فجنب سروالوو كيبان منوو غير النص ..! ملامحوو جدية و صارمة و اللبسة غير ما زادت عطاتوو هبة و وقار ..!

فتح مجر حداه و جبد ملف كبيير .. مكتوب فيه بخط واضح " كريمة العثماني " .. هزو عندو هو و وراقوو و السوارت و رجع خرج .. ديريكت لولاية الامن ..! مسافة الطريق و كان وصل .. منين ما داز كيعطيوه التحية و هو كيحرك فراسوو ك رد ..! حتى قرب للبيرو ديالوو ..! فتح ليه الشرطي الشاوش الباب و قال ..!

ش: وكيل الملك سي عبد الرحمان المكي .. كيتسناك فالبيرو ديالك لداخل مون شاف ..!

حكيم:( حرك راسوو بالايجاب و قال ) شي كاس د القهوة معاك و قسحها مزياااان ..! ( دخل لقى قبالتوو راجل فالربعينات من العمر بالكوبوو و الكرافاطة .. شعرو شايب شوية و بشوش الملامح ..! ) وكيل الملك كامل عندنا هنا ..!

عبد الرحمان:( ضحك و وقف بالابتسامة تسالم معاه بمعزة و قال ) سعادة العميد الممتاز سي امغار ..! توحشناك ا صاحبي .. خاصك تخلص الحق ..!

حكيم:( حط من يديه و شيرلوو يجلس .. دايز للكرسي ديالوو ) نخلصووه الله ا ودي ..!

بعد جلسة طويلة بيناتهم .. منغمين بكاس ديال قهوة .. ريحتها كتعشق ..! الهضرة حلات لعبد الرحمان ما خلى ما عاودلوو موحش الجماعة معاه ..! جا الوقت ديال الصح من بعد ما كتب شحال من ورقة بخط يدو .. جبد الملف .. كيهضر و يمدلوو ورقة بورقة ..!

حكيم: انا و المدام تطلقنا .. وقعوو مشاكل كبار بيناتنا .. و لي ما يخليونيش نسمح لها فالحضانة ديال البنت ..!

عبد الرحمان:( رد بتفاجئ ) تزادت عندك بنيتة ؟ ا سيدي مبارك و مسعود وا هاذي خبار زينة ..!

حكيم:( تبسموو عينيه و رد كيحرك راسوو ) الله يحفضك ا خاي ..! المهم الوراق ها هما عندك كاملين بغيتك تتكلفلي بالدعوة و تحاول لي قدرتي عليه باش تكون الجلسة فاقرب وقت .. البنت مريضة بزاااف و باغي نسيفطها لبرا تتعالج ..!

عبد الرحمان: و لكن نتا ما تقدرش تخرج معاها .. راك عارف على حساب خدمتك ..!

حكيم:( زفر النفس ) كاين استتناءات .. يلا كنتي غتمشي للحج و لا كان عندك مرض و لا شي حاجة بحال هاكا .. يقدرو يخليوني نسافر معاها ( زير على جبهتوو ) و لكن الظروف معكسة من كل جهة و ما نقدرش فهاذ الوقت .. غنسيفطها مع يَّما و تا خليل غادي لألمانيا غيبدا الخدمة معاهم السيمانة الجايا .. عليها عيطت لك .. يلا لقيتي ما تسرع غير سرع ..!

حرك عبد الرحمان راسوو بالايجاب .. و الملف د كريمة حداه ..! غرقها حكيم حتى ما بقالها فين تزيد ..! التصاور ديال السحور لي كان لقاه عندو فالدار باش حرقها .. يوسبي فيه فيديوات ديالها و هي كتجبد ديكشي فالبيت عندو و تدخل تشعلهم فالحمام ..! يوسبي الثاني فيه الفيديو ديالها فالطبيب و هي كتغوت بحال الحمقة ..! شهادة من عند طبيب نفسي بلي هي مختلة عقليا و ما عندهاش الأهلية .. و ماشي غير طبيب واحد .. ثلاثة ديال الأطباء مختالفين ..! وراق من البنكة ديال كشف الحساب لي كان كيسيفط لباها باش تمشي للطبيب و تاخذ الدوا ديالها .. و التقارير ديال الطبيبة و لي ساج فام لي ولدوها و لي كانوو مغلغلين عليها .. خصوصا لي ساج فام .. عمروهم ليها بالاهمال و بلي ما عندهاش حس المسؤولية .. ما متبعاش مع الطبيبة ديالها بحجة ما عندهاش الوقت .. البيبي داز عليها الوقت بزااف و هي ما سايقة خبار .. و التحاليل الخطيرة لي ما دارتهمش و ما تسوقاتش .. البيبي لي خرجات مريضة و كلها بسباب اهمال امها بما انهم كانوو منفاصلين فداك الفترة .. الحالة الصحية مفصلة ديال البيبي و الاخطار لي عليها من كلشي حتى من الرضاعة الطبيعية تذكرات ..! المحضر ديال كريمة لي كان تقيد و ما تدفعش و بقى عند حكيم .. المحضر كيبين بلي تهزات من قلب دار ديال مشعوذ و كاينين الشهود كاملين ..! زيادة على تقارير الطبيب ديال حكيم لي ما خلاش من جهدو على الحالة لي كان وصلها .. و أخيرا تصويرة ديال اللحم خاااانزة .. داروها فميكة و خلاوها عندهم فاش عرفوو شنوو سباب حالتوو .. و فاش ولى شوية و عرف راسوو شنوو غيدير هزها لعندو .. صورها و خلاها جنب محتافض بيها ..!

ما نسى لها حتى حاجة و كحل عليها الضوسي بالمعقول و بلا المطالبة بالحضانة د البنت .. اتهمها اتهامات خطيييرة من بيناتهم الخيانة الزوجية .. بما أن لي فيروس لي هازاهم كيجييو الاغلبية بالاتصال الجنسي و بما أنا سبقلها تشدات فدار ديال رجل غريب عليها لي هو عبد العالي .. واخا كانوو معاهم الناس .. و لكن شكون يضمنلوو بلي ما وقعاتش خيانة فشي مرة كانوو بوحدهم ..! و علم بلي حتى هو غيدير التحاليل و يلا كان مريض بيهم و هزهم من عندها .. بمعنى هي الحامل ماشي هو .. فكلشي غيبان فالتحاليل .. و كيطالب بحبسها فاقصى العقوبات و بتعويضات صحييييحة ليه على الاضرار النفسية و الجسدية لي تسبباتلوو بيهم .. و على السموم لي دخلات لذاتوو و باقي لدابا كيعاني منهم ..!

عبد الرحمان:( كمل القرايا مبهوط و قال ) واااا وااا واااا ...! الحضانة غيعطيوهالك فنهارها ..!

حكيم:( رد بثقة ) عاااارف .. الجلسة تكون فاقرب وقت ا عبد الرحمان .. غتوريهم وراقها د الطبيب و بلي خاصها تخرج تتداوى اليوم قبل من غذا ..! اليوم غنشد الرونديفو د الفيزا ليَّما و نجمعلها وراقها .. غيشدولها الوقت باش يقبلوها .. و لكن ماشي مشكل .. تمشي نور مع خليل و نديرلها تما فرملية تقابلها حتى تتعالج .. على ما يقبلو للواليدة الفيزا و نسيفطها ..!

عبد الرحمان: صافي كن هاني انا غنتكلف بالقضية .. حتى نتا غير بدا توجد فوراقك لي غتعطي لخليل باش يديها .. حسب الحضانة ديالك ..! ( وقف سلم عليه باش يمشي يقضيلوو الغرض )

حكيم:( زير عليه ) الله يحفضك ..!

بما أن عملية شريفة ما غتدار حتى تفوت 24 ساعة بالتمام و الكمال .. أي ما غتدخل للعمليات حتال للعشية .. كان ضروري حكيم يمشي يشوف شغالاتوو الثانية .. من بينهم القضية ديالها .. لي بعد مشاورات من قبول و رفض .. شد القضية ديالها ..!

مشاروات بين القبول و الرفض لأنوو حكيم ماشي اختصاصوو بحال هاذ الجرائم .. لأنوو الشرطة واخا هكاك مقسمة لوحدات هما ..!

الشرطة القضائية لي كتستقبل الشكايات د المواطنين على اعتداءات و سرقات و جرائم من هاذ النوع ..!

الهيئة الحضرية و الأمن العام .. هما لي كينظموو حركة السير و التجول و كيكونوو كيضورو فالمدينة بالموطورات ..!

مكافحة المخذرات .. هاذو لي كيشدو مهربين .. الشيرا .. الكيف .. اوراق التبغ .. الاقراص المهلوسة و المخذرة .. الكوكايين .. الهروين .. و كيداهموو حتى القهاوي لي كيكونوو عندهم اخباريات عليهم ماشي غير الشاحنات الكبار .. لا نطاق خدمتهم واسع و غير محدود ..!

فرقة مكافحة العصابات ( BAG ) .. من المهام ديالها مكافحة العصابات و تقلب على المجرمين لي مبلغين بيهم و لكن هاربين ..! و هاذ العناصر يقدرو يكونوو اي واحد فينا لأنهم كيديرو خدمتهم بزي مدني عادي بحال كاع الشعب ..!

الشرطة التقنية و العلمية هي لي كتكلف فمسرح الجريمة بالبصمات و التصاور .. كيخدموو غالبا فالسرقات و جرائم القتل و كيكونوو حتى فالملاعب د كرة القدم باش يشدو صحاب الشغب لأنوو عندهم كاميرات و معدات ديال التصوير .. متطوووورة بزااااف ..!

الشرطة السينوتقنية و هي لي كيقلبوو على المتفجرات و اي حاجة ملغمة قابلة للانفجار ..! و غير هاذشي كيقلبوو على الجثث ديال الناس فالبلايص لي فيهم الفيضانات .. الزلازل و الكوارث الطبيعية .. و كيتأكدوو من العملات و الاوراق النقدية فالحدود ..! و كيتسماو حتى فرق الكلاب البوليسية لأنوو خدمتهم كاملة بالكلاب لي كيقدرو يشموو و يعاونوهم ..!

كاين فرق كثييرة وحدة اخرى من بيناتهم .. الصقور .. الوحدات المتنقلة لشرطة النجدة .. الوحدات الجوية للتدخل .. شرطة الخيالة .. الحماية المقربة .. فرق الأخلاق العامة .. فرق تفكيك المتفجرات .. الجرائم الالكترونية و غسيل الأموال .. المجموعات المتنقلة للحفاظ على النظام ( GMMo )

كل وحدة منهم و طريقة خدمتها لكن اغلبيتهم تابعين و كيعاونوو الشرطة القضائية .. و هذا واحد من الاسباب لي خلاوهم يعطييو لحكيم القضية ديال شريفة .. بالرغم من انوو مركز فخدمتوو الاكثرية على مكافحة المخذرات .. لكن فينما كان شي تدخل عندو علاقة بالشرطة القضائية كيكون واجد و حاضر .. كيفما دابا ..!

جالس فالبيرو ديالوو و واقفين قبالتوو الضباط كيعطيوه التقارير ديالهم و لاياش توصلوو حتال دابا ..! قرا الشهادات ديال الناس لي كانوو حاضرين و تخيل الحاذثة كي وقعات و قلبوو كيتعصر عليها ..! بتركيز سمع لهم كاملين و قال

حكيم: غتبداو من الطونوبيل ( بجدية هاز حجبانوو ) الضحية يالاه دارت الكونطرول ديال الطونوبيل ما كاملاش يوماين .. ما يمكنش تشعل فيها العافية غير هكاك ..! نتا ( شير لواحد فيهم ) غتمشي للفوريان و معاك ميكانيسيان يقلبها و يعطينا تقرير كامل عليها ..! و نتا ..! غتمشي للرباط ( كتبلهم للعنوان فين قادات طونوبيلتها بما أنوو كان عارف من قبل ..! ) غتدخل عند مول المحل و تعطيه هاذ الاستدعاء و تجيبوو لعندنا ..! ( سكت كيقرا مركز ) الكاميرات يلا كاينين فهاذ الشارع يحضرو .. و يلا ما كانش غتمشييو نتا و ياه تسولوو الحوانت لي ضايرين بالسوق .. يلا كان شي واحد مركبهم و صورو الحاذثة ..!

و هكا بدا التحقيق .. بجدية تااااامة .. كل واحد باش تكلف و بقى حكيم فالبيرو كيبلاني فالقضية ديالها و خدام على الملفات لي عندو .. حتى يلا كانت شي حااالة نيت عاد كيعطولوو يتدخل ..!

الضابط:( دق و دخل عطى التحية و قال ) مون شاف .. سي عدنان أمغار هنا هو و سي محمد اميين أمغار .. كيتسناو فالباب ..!

حكيم:( عقد حجبانوو باستغراب و قال ) دخلهم ..!

بقى عاقد حجبانوو و هو كيشوف فمحمد أميين داخل هو اللول تابعوو عدنان .. و موراه زكية بالخمار حانية راسها و شادة فمراة كبيرة شوية غالبا امها ..!

حكيم:( ركز عينيه فخوتوو و قال ) كاين ما نقضييو ؟

محمد أمين:( هز يديه باستسلام كيضحك ) ا خويا انا جابني غير باش ما تكونش خلوة نعام ا سيدي بين راجل و مراة بوحدهم .. تا لقينا البنت جايبة امها معاها ( حرك راسوو غالباه الضحكة ) باش ما يبقاوش الراس فالراس .. طنجرة و لقات غطاها .. غير نقولوو مبروك ..!

حكيم:( شاف فزكية و امها و قال ) جلسي ا الشريفة ..! كاين شي مشكل ؟

عدنان:( حرك يدو كينعث ليه جهة زكية ) هاذي زكية ماستر فالفينونص .. خدامة فجمعية محمد الخامس للتظامن .. تعرفنا هاذي شي شهر هكاك .. كليانة فالمحل و فاعلة جمعوية كتعاون الناس بلي قدرات عليه و هاذ المرة جات لعندي نعاونها و نتمناو ما تردناش خايبين ..!

حكيم: واخا شنوو المشكل ..!

زكية:( ردات بصوت خافت ) سرقوني .. داولي ذهبي و ذهب ماما و خالتي و جارتنا لي هي صاحبتي فالأصل .. داروها بيا صحاب السماوي ..!

عاودلوو عدنان الواقعة كاملة و امها قبالتها غير كتنهد و تدعي فيهم حتى كملوو .. و عيط على واحد من الضباط كتب لها المحضر ..! لكن قبل ما ينوضوو قال حكيم بجدية ..!

حكيم: الحاجة .. عطيتيها الذهب بلا ما تسولي لا علاش لا كيفاش ؟ ( هز حاجبوو فزكية ) خالتك نقولوو ثاقت فيك و لكن جارتك ؟

زكية:( رمشات بعينيها كتخطف فيه الشوفة و تقلبها ) راها صاحبتي ..!!

حكيم:( رد باستهزاء ) و من بعد ؟؟ صاحبتك غتنوض و تعطيك ذهبها بلا ضمانات .. هاذي كلها ثقة عمية ..!؟ ( عيط على الشاوش لي فالباب و قال كيشوف فيها ) عطينا سمياتهم بجوج غادي نستدعيوهم ..!

زكية:( شافت فعدنان و قالت بصوت مقجوج و عينين باغيين يدمعوو ) ما ن نقدرش .. غادي نجيبلهم صداع هما بعاد عليه ..! ما نقدرش و الله .. قلتي لي غيعاونني ..!

حكيم: راني كنعاونك و كندير خدمتي ا الشريفة .. طلقينا خلاص ما عندناش النهار كامل ..! ( خرج عدنان عينيه فيه و طرطقهم حكيم تا هو مقابل معاه .. بمعنى شنوو ؟ )

عدنان: حكيم .. راها خايفة اول مرة تدخل لشي ولاية و لا كوميسارية من مور ما صوبات لاكارط .. و الناس لي سلفوها عائلاتهم أكيد ما غاديش يبغييو و غادي ينوض لهم الصداع ..!

حكيم:( رد باستهزاء ) خايفة ؟ واخا دابا تولف ..!

ردات الام مخلوعة : كيفاش تولف ؟؟

حكيم:( شاف فيها و قال ) ما عندك مناش تخافي ا الحاجة .. غير يلا تشدو دابا نعيطولها تأكدلنا واش هما .. يعني باقي غتجي لعندنا شحال من مرة ..!

وقف بهدوء فتح خزانة موراه كيقلب فالملفات حتى جبد واحد فيه تصاور ديال شي مشتبهين .. سطرهم قدامها و قال بجدية ..!

حكيم: ركزي معاهم و قوليلي واش شي واحد فيهم من لي نصبوو عليك ..!

خلاها كتشوف فيهم و وقف حدا محمد اميين مربع يديه .. كيهضرو بيناتهم و كيسولوو ..!

حكيم: هضرتي مع بسمة ؟ باش ساليتيوها ..! ( هز حاجبوو ) يَّما مخليها بوحدها فالطبيب باش تجي لعندي للكوميسارية ( باستهزاء ) ياكما نضايفك ..!؟

محمد أميين:( رشقوو لكتفوو ) باركة من الطنز ا صاحبي منين دخلنا و نتا طالقها علينا .. عدنان ما بغاش يركب معاها بوحدهم و لسقني نبقى معاه .. اما بسمة غتمشي هاذ الصباح لعند شريفة .. تقلب لها قلبها و صدرها واش كلشي هو هذاك و غالبا فالعشية غتدخل معاهم للعملية .. بقات فيها بزاااف فاش سمعات الخبار ..!

زكية:( ردات كتشوف فيهم ) هذا هو .. هذا و هاذي ..!

حكيم:( قرب لعندها و قال ) عاودي تأكدي حتى تكوني ميقنة ..!

زكية:( ردات بثقة ) مأكدة بحال لي كنشوفك .. ما يمكنش ننسى عليهم ..!

حكيم: واخا سيرو الله يعرضكم السلامة .. يلا كانت شي حاجة دابا نعيطوو عليك ..!

زكية:( ردات باستغراب ) صافي ..؟

حكيم:( هز حاجبوو ) يلا باغى تزيدي معانا شي يوماين مرحبا ما نردوكش ..!

ضحكات وجهها حمممر .. سرطات القمعة و هزات راسها بلا و خرجات هي و امها .. و موراها حرك حكيم راسوو باش الباب تتشد .. هز الورقة د المحضر قطعها شقافي و قال عاقد حجبانوو فعدنان ..!

حكيم: التصاور لي شافتهم .. ماليهم تشدو مخيخين فالحبس سنين دابا و فالمخذرات ماشي فالنصب ....! ( ضرب على كتفوو و كمل ) هاذي يا عطاتهم لصاحبها و خورها .. يا باعتهم و لسقاتهم فالسماوي باش تفك راسها .. و لا باغى تنصب عليك نتا نيت ..!

عدنان:( رد بالنفي ) راه ما يمكنش .. راه

حكيم:( قاطعوو و قال ) يمكن .. و كيفما كنعرفك مزيان .. كنعرف حتى شكون كيكذب و شكون كيقول الصح .. و باش بلا ما نطول معاك .. تعطيها جالوقة وحدة من المحل و لا تحط شي حاجة من جيبك على هاذ البلانات الخاوية .. غنطحنك ( هز حاجبوو فيه بثقالة ) غنطحنك ا عدنان و ما كنضحكش هنا ..! ماشي مميك عليكم راني ناعس على وذني نتا و ياه ..!

محمد أميين:( فوه فموو و قال بضحكة ) و أنا مالي ..شنوو درت ؟؟ ( دفع عدنان من كتفوو ) زيد ا صاحبي زيد .. جايين معاك باش نسمعوو الهضرة على وذنينا وااااا دير الخير ( غمز حكيم ) الباشا تهلى .. نتلاقاو فالعشية ..!

حكيم:( رد كيطنز تا هو ) شغندير بيك ؟ سير جلس حدا مك .. حضي معاك بنت خوك ..!

محمد أميين: نعطيها البزولة تعصرها ؟؟ ( شير عليه بكومة تا ضحك و رجعهالوو و قال خارج .. جار معاه عدنان لي ساكت كيفكر فهضرة خوه ) الله يعاون ..!

غير خرجوو رجعوو ملامحوو جامدين .. مكمل خدمتوو و كل مرة كيتنهد .. مدة و هو هكاك حتى وذن الظهر ..! حط الستيلوو و شد الملفات لي فيديه .. دخل للطواليط توضى و خرج كيهبط فكماموو و ينشف فيديه ..!

مشى لقنت المكتب فرش واحد الجاكيطة عندو تما فالخزانة .. قام الصلاة و بدا كيصلي بالشوية عليه .. مطول فالسجود .. حتى كمل و دعى من قلبوو و ناض فتح الباب على الظابط لي شحال و هو كيدق واقف تما .. ما قدرش يدخل لراسوو ما دام ما قالوش يدخل ..!

حكيم: شكاين ؟؟

ظ:( رد بجدية ) الميكانيسيان لي دينا عطى التقرير ديالوو .. ها هو كتبناه و العنوان لي عطيتينا جبنا مولاه .. كيتسناك عند الظابط فارح ..!

حكيم:( شدو كيقراه و بهدوء قال ) عيطلوو للمكتب هنا .. يجي هو و الشاف حسام فارح ..!

و ديكشي لي كان .. ما كاملاش خمسة الدقائق كان جالس الميكانسيان مول المحل قبالت حكيم و معاهم حسام ..! شاف فيه حكيم ببرود و قال ..!

حكيم: هاذي ربع ايام جات عندك واحد السيدة للمحل .. بغات كونطرول جينيغال للطونوبيل ديالها من نوع **** .. قلبتوها و أكدتوو بلي كلشي هو هذاك ..! نفس الطونوبيل من بعد يوماين شدات بيها الطريق من سلا لكازا .. و فالدخلة د كازا شعلات العافية فالكابوو و بزز قدرو يطفيوها .. و فنفس الساعة و فنفس البلاصة .. تعرضولها و تضربات ثلاثة ديال الضربات د الموت .. و دابا راها فالخطر ..!

رد كيضور عينيه عليهم : و لكن انا شنوو المطلوب مني ..!

حسام:( رد بهدوء ) المطلوب منك تشرحلنا .. كيفاش الباتري ديال الطونوبيل فيوماين خسر و شعلات فيه العافية غير بوحدو ..!!!

حكيم: كاين احتمال من جوج .. نتا و لا واحد من المعلمية ديالك .. بدل الباتري الجديد بواحد قديم ..! ( بكل برود تكى على البيرو مربع يديه ) يا بعتيه نتا و لا هما و لا درتوه لشي طونوبيل اخرى و فجميع الاحوال ربحتوو فيه .. و هنا كاينة قضية نصب و احتيال ..! يا ايما لي تعرضولها شراوك بالفلوس باش تبدل الباتري و تعاونهم فخدمتهم الموسخة و هنا قضية ( شاف فحسام بضحكة جنب )

حسام: محاولة قتل مع سبق الاصرار و الترصد .. يديك و رجليك و كلك مخشي فهاذ لgلتة ..!

حكيم: gلتة متختخة بالغيس ( حك حاجبوو ) و فجميع الاحوال المحل ديالك غيتشمع فاللخر .. المحل مشى .. السمعة مشات ..

حسام: و حتى الحرية قولها بسلامة من دابا .. باقي غنضايفوك معانا شي يامات ..! ضيافة النبي ثلث ايام كيقولوو ..!

رد مخرج عينيه و بالغوات قال : شنوو كتخربقوو عليا هنا .. انا ما عارف واالوو ..!

حكيم:( ضرب فوق المكتب و طرطق عينيه بشوفة كتخلع و صوت مدعدع كيجيب الرهبة ..! ) صوتك ما يعلااااش ا سي محمد ( ضرب على كتفوو ) يلا جينا نتغاوتوو هنا .. صوتي على من صوتك و صحتي مع صحتك ( طلع و هبط فيه ) ما باغيش نحكر عليك .. كنهضرو بالعقل و بالشوية هضر بالشوية حتى نتا .. باش نبقاو مزيانين ( باستهزاء ) و ما تتسماش تعديتي على عميد ممتاز و هو كيدير خدمتوو ..!

حسام:( بغى يطرطق بالضحك من الطريقة لي كيهضر بيها حكيم .. بزز زير على فموو و رد بنفس الطريقة كيطنزو بجوج على الوقت ) التعدي على موظف أثناء مزاولة عمله .. جريمة كيعاقب عليها القانون عارفها ياك ..؟

رد بصوت عادي لكن باين من وجهوو بلي تخلع .. خافهم يضوروه تما : ما غنقول حتى كلمة حتى يجي المحامي ديالي ..!

حكيم:( ضحك ضحكة بلا روح .. و مشى هز التصويرة ديال الطونوبيل .. شنق عليه بيد زادحوو مع الحيط و اليد الثانية حاط ليه التصويرة قدام عينوو ..! ) كتفرج فالافلام بزاف .. و انا هاذ الساعة ما عنديش الوقت للتقوا*** الخاوية ..! هاذ القلا*** شكون لي حط يدوو فيها و صاوبها .. ما غنعاودش نسولك مرة اخرى ..!

رد كيتفتف و عينيه مرة مع حكيم لي بدا يتعصب .. مرة مع حسام لي مربع يديه ببرود : انا .. انا اش داني لهاذ صداع الراس كامل .. كان عندي الكراج عامر و غير مدام سامية لي تدخلات لها باش قبلت نخلي طونوبيلتها و نقلبوها لها ..! ما بقيتش .. ما بقيتش عاقل شكون خدم فيها ..!

حكيم:( رد بتساؤل مخنزر فيه ) مدام سامية ؟

رد عليه نيشان : مدام سامية القطبي ..!

حكيم:( طلق منوو .. نفض على كتفوو و قال و هو كيكتب فواحد الورقة ) صاحبتها ..! دي هاذ خينا تكلف بيه حتى يتفكر على خاطرو و سيفط لي يجيب مدام القطبي .. ها الاستدعاء .. قبل ما نخرج من هنا فالعشية تكون حاضرة ..! ( عطاه الورقة عاقد حجبانوو )

رد كيضور فعينيه : كيفاش تكلف بيه حتى يتفكر على خاطرو .. انا عندي عائلة و خدمة

حكيم:( قاطعوو مكشكش تا البزاق ديالوو كيطير ) حتى البنت لي تضربات عندها عائلة محروقة عليها .. كانت حاملة .. ماتولها ولادها و ضاعت فيهم .. تشركات و كلاتها فصحتها بالمزيان .. عندها خدمة .. مشاريع واقفة عليهم بوحدها .. عندها قراية و مستقبل و مسؤولية ( شير لوو بصبعوو بتهديد ) دابا يا غتبلّع عليا فمك .. يا غنشدولك بالطريقة لي كنعرفلها و نفهمها مزيان ..!

سكت لاخور .. خلعوو حكيم لي مشى للشرجم كيطل .. حاط يديه على جنبوو و كل مرة يزفر النفس .. الخدمة على الجهد و الولاية د كازا .. ما كتخوى لا ليل لا نهار .. ديما الصداع و المشاكل حتى كيخيخوو بنادم و كيطلع لهم فالراس ..!

الوقت كامل و حكيم كيعيط على خليل يعلموو بالجديد على شريفة و يطمن على اسية .. ما عندو كي يدير يسمح فالخدمة و يبقى معاها و فعز شغالوو .. فوقما يتسمع الأذان .. كيتسناه حتى يكمل و كيمشي يصلي ..! و بعد يوم طويل .. أخيرا وصلات سامية هي و راجلها .. لي عاونوو شريفة باش تدخل لداك الفورماسيون و كونات معاهم علاقة زوينة ..!

حبسوو راجلها ما خلاوهش يدخل .. بقى مع البوليسي لي فباب الولاية ..! و طلعات سامية للبيرو د حكيم ..! حكيم لي كانت كتشوفوو غير من بعيد مرة مرة عند شريفة فالمحل .. ما كتعرف عليه والوو من غير الاسم ..! حرك راسوو باش تجلس ..! و بلا لف و دوران .. مد لها التصاور ديال الطونوبيل و ديال مسرح الجريمة .. فين بقى دم شريفة مهروق .. حتى طوقوو الجهة و خداو البصمات و كاع الأدلة و حرقوه .. لأنوو كيتستعمل فالسحر من لي قاطعين يديهم من رحمة الله .. و ما خاصوش يبقى هكاك ..!

حكيم:( ببرود قال ) شريفة فطريقها لكازا شعلات فطونوبيلتها العافية .. عاونوها و نزلات كتسنى فالديباناج .. داك الساعة تغذرات فالسوق و تضربات ضربات د الموت .. و دابا فأي وقت تقدري تسمعي خبارها ..!

سامية:( شدات على فمها بصدمة موسعة عينيها ..! ) اويييلي ..!!! ناري مسكييينة .. الله أكبر ..!!!

حكيم:( هز حاجبوو مربع يديه ) فوقاش آخر مرة تلاقيتي شريفة ا مدام القطبي ؟

سامية: هاذي ثلث ايام .. نوو يوماين .. فاش كانت هنا فكازا معاك فالدار .. أنا عيطت لها و خرجنا تغذينا بجوج ..!

حكيم:( صغر عينيه و كمل بهمهمة ..! ) همم ..! يعني نهار قبل ما تضرب .. كانت مزيانة داك النهار ؟ حسيتيها مرتاحة و لا ...! ( سكت كيلعب بلسانوو ففموو ..! )

سامية: نوو كانت عيانة فيها السخفة و الدوخة .. قلبها طالع و شكات ليا بلي رجعات كتنعس بزاف و تهلكات فصحتها بالخدمة ( كتفكر و تهضر بحركات أنثوية د البريستيج ) كلات معايا عجبها الحوت .. كترات من الحامض و الملحة ( ضحكات ) و تشكات منهم حتى هما نفخوها و ولات كتشهاهم بزاااف ..!

حكيم:( بتركيز قال كيحلل الهضرة ..! ) مزوجة ا مدام القطبي ؟ عندك وليدات ..!؟

سامية:( ردات بالايجاب ) عندي جوج بنيتة و وليد ( حطات يديها على كرشها ) و الثالث فالطريق ان شاء الله .. و داك النهار نيت علمت شريفة و فرحاتلي ..!

حكيم:( رد بجدية هاز حاجبوو فيها ) ثلاثة ديال الولاد .. غتكوني عارفة الاعراض ديال الحمل و اكيد شكيتي بلي شريفة حاملة و مخبية من الاعراض لي قالتهم لك .. شكيتي بلي حاملة .. بغيتي تأكدي شكوكك ..! ( صغر عينيه فيها ) آخر وحدة جلسات معاها هي نتي على هاذ الحساب ..! تبعتيها فاش كملتوو غذاكم عرفتيها ما بقاتش فكازا و رجعات لسلا ..! و قبل سيفطتيها عند الميكانيسيان لي كتعاملي معاه .. خلصتي واحد من الدراري باش يلعب فالطونوبيل ..!

سامية:( خرجات عينيها و قالت بالغوات ) شنوووو كتخررررربق ..واش وااااااعي لشنوو كتقووول ؟؟؟؟؟

حكيم:( رد بحدة ) بقيتي حاطة عليها حتى خرجات من دارها و مشات لعند الجينيكوو و فاش تأكدتي بلي حاملة .. سيفطتي شكون يصفيها لها .. يلا ما صدقش بلان الطونوبيل .. يصدق البلان الثاني ..! ( زاد رفع صوتوو كثر ) شريييييفة تضربات فكرشها ثلاثة د المرات و ماشي بالصدفة .. و ما كااااااين حتى واحد من غيرك غيكون شاك فيها حاملة ..!

زاد قرب لها حاط يديه بجوج على الكرسي ديالها .. كل وحدة فجيهة .. و عينيه محاصرينها بنظرات كيخلعوو ..!

حكيم: دخلتيها بكليانة فالمحل .. كتتقربي منها نهار على نهار حتى دارتك صاحبتها .. وقفتي معاها فالفورماسيون و سهلتي لها الامور ماشي غير هكاك .. هاذشي كلوو باش تزيد تقربك من حياتها .. تخرجوو و تقهواو بجوج و تتشكى لك كيفما دارت ( ضرب يد مع يد قبالت وجهها ) و هنا ضربتي ضربتك ..!

سامية:( عمرو عينيها بالدموع و قالت بجدية باغى تهز ساكها ) نتا حماقيتي .. جوو بوو با " ما نقدرش " ما غنزيدش دقيقة وحدة هنا ..!

حكيم:( رجع دفعها للكرسي بالشوية و بنظرات حارة قال ) ما عندك فين تخرجي هاذ الساعة .. نتي المتهمة اللولة و مستحيل نخليك تمشي ( شاف فكرشها ) راك حاملة .. ما تخلينيش ندير معاك شي تصرف نندم عليه من بعد ..!

سامية:( مسحات دموعها برقة و قالت ) ها نتا قلتيها .. أنا حاملة و عندي وليدات واش غنكون بلا قلب باش نقتل ولاد مراة وحدة اخرى و لي كانت صاحبتي و عندي عزيزة و كنقدرها ( حطات يديها على صدرها ) و ربي لي عالم بمحبتها فقلبي ..!

حكيم:( رد بلا مبالات كيجبد من تيليفونوو تصويرة ليها و لسيدة ثانية .. من الانستغرام ديال سامية نيت ..! ) اكيد كتعرفي هاذ السيدة و معزتها خاصة عندك و محبتها فقلبك كبيرة ( عوج فموو باستهزاء ) ياك ؟

سامية:( رمشات شادة من عندو التيليفون ) وي كنعرفها .. مدام خديجة الادريسي .. صديقة عزيزة عندي و معرفة قديمة بيناتنا ... تعرفنا فواحد الجمعية انا و ياها ..!

حكيم:( خدا من عندها التيليفون و حرك راسوو بالايجاب و قال ) و غتكوني عارفة بلي خديجة الادريسي .. نفسها المدام ديال أحمد برادة .. لي ولدهم تشد مؤخرا فتهريب المخذرات .. تشد هو و الطليق ديال شريفة .. إلياس ..!

سامية:( خرجات عينيها و حركات راسها بالزربة و قالت ) لا انا ما عارفة والوو و ما باغاش نعرف .. حكيم خويا انا حاملة حرام عليك تديرلي هاكا ..!

حكيم:( رد مكمل كلاموو ) أحمد برادة لي كان متافق مع إلياس و كيهدد فشريفة باش تتزوج بولدوو و نهار دخل مهدي برادة و الياس *** للحبس .. غيكون شك بلي شريفة المير لي لعباتها عليهم كاملين .. حسبها ضحكات عليه و تخطبات ليا ( شيرلها صبعوو ) حد لهنا ما كنتيش حاضرة فحياة شريفة .. حتال مور الخطبة عاد بنتي و ترافقتي معاها .. هاذشي كامل ما يمكنش يكون صدفة ..!

سامية:( ردات كتبكي ) واااا و الله ما درت شي حاجة علاش ما باغيش تسمعلي ..!

حكيم:( صغر عينيه و بفحيح فنبرة صوتوو قال ) دين كبير هذا على رقبتك لي يخليك تديري ذنب ما كيتغفرش فحق ملائكة مزال حتى ما تزادو لهاذ الدنيا ..! ( بلوم كيلعب لها على اعصابها ) الدين تخلص و لكن الذنب ديال شريفة غتبقاي تشوفيه حياتك كاملة فعينين ولادك .. لا هما غيغفرو لك .. لا نتي غتغفري لراسك ..!

غوتات منهارة كتبكي و بقهرة قالت

سامية: ما درت والووو و الله ما درت هء ..!

سكتات خاشية وجهها بين كفوفها كتشهق ..! و بدورو بعد منها مخليها ..! باركة عليها و هي حاملة ..! بجدية فتح الباب و هضر مع الشاوش و رجع شاف فيها و قال

حكيم: غتخرج مذكرة بالاعتقال ديالك قيد التحقيق .. دابا ماشي وقت البكى .. موقفك ضعييف بزاااف ا مدام القطبي و تأكدي يلا كانت عندك يد فهاذشي ما غنرحمكش و غنخليك تعفني فالحبس حتى ولادك لي تشوفي فعينيهم ما غتلحقيهمش ..! ( هز راسوو ) ممنوع تشوفي حتى واحد .. مدي لوو الصاك ديالك .. تيليفونك و اي حاجة هازاها .. راجلك انا غنهضر معاه يوجدلك شي محامي ( ضحك جنب و قال ) كود لاك ..!

خلى الظابط معاها .. مداتلوو كاع لي عندها و زاد قلبها تأكد .. عاد خرجها من تما .. غتبقى عندهم ما حدهم مزالين كيحققوو معاها ..!

أما حكيم هز تيليفونوو و السوارت و البزطام و خرج هابط بحالوو ..! فطريقوو تلاقى حسام مزال خدام و بجدية قال

حكيم: كتب ا ستدعاءات .. لأحمد برادة .. خديجة الادريسي .. شادية أرسلان و ملاك أمغار .. غذا فالصباح يكونوو عندي ..!

حسام:( رمش عينيه فيه و بتفاجئ قال ) م ملاك ؟ ختك ؟ ( هز حكيم حاجبوو فيه ساكت حتى رد بجدية ) ا طون اوغدغ مون شاف ..!

حكيم:( ضربلوو على كتفوو بهدوء ) مزيان ..!

خلاه واقف موراه و زاد حتال للباب .. هضر مع راجلها و شرحلوو بلي متهمة فجريمة محاولة القتل مع سبق الاصرار و الترصد .. ما غتخرج حتى يكمل التحقيق و يقدر يشوف محامي يلا بغى ..!

و غير كمل معاه و سينيا على الخروج ديالوو .. ركب فطونوبيلتو فاتجاه المستشفى الجامعي ابن رشد .. مسافة الطريق و كان واقف جهة الانعاش مقابل مع الزاج فين ناعسة شريفة لداخل .. كتصارع الموت ..!و حداه أسية كتشوف فيها بألم و حرقة .. حتى بدات كتهضر بصوت خافت لكن مسموع ..!

أسية:( كتبسم و عينيها عامرين بالدموع ..! ) ما قادراش نشوفها هاكا .. كن كانت فالدار تلقاها .. طالقة أم كلثوم و لا عبد الحليم حفيض و لا كاظم الساهر .. هاذ الثلاثة كتحمااااق عليهم .. تضور تضور و تغني معاهم .. شاعلة الشموع فبيتها فيهم ريحة ديال الورد زوينة .. و العود ديما عندها فالمبيخرة كتطلقوو و تحماق عليه تشموو .. دايرة جو ديالها بوحدها ..! ضروري تبدا نهارها بكاس د القهوة كحلة بلا سكر و عاد يتقاد لها المجاج ههه عزيز عليها الجموع و الضحك و النشاط .. كتموت فشي حاجة سميتها السقاطة ديال الحولي .. ديما دايرة يديها كترون فيها .. ما كتعيفش و ما فيهاش العياقة بحالي ( ضحكات و دموعها هبطوو بلا ما تحس ) أنا ما كنحملش ديكشي و كيغيلفني و لكن هي لا ..! ( هزات عينيها فيه ) عرفتي ديما فشعرها واحد الريحة كتحمقني .. و عمرها بغات تقولي شنوو هي .. حتى لحمها من غير العطورة لي كتدير .. كانت ديما فيها واحد الريحة زوينة ديال النقى .. حتال البارح فاش دخلت للدار بقيت كنقلب و عرفتها .. د شعرها هي الخزامة .. و الريحة لي كتبقى فلحمها هي المسك ..!

حكيم:( جمع حواجبوو باستغراب كيسمعلها و عينيه معاهم كيوجدوها باش يديوها للعمليات ) بصح ؟

أسية: بصح ..! كنت ديما باغى نعرف و نهار عرفت .. شوية ما تبقاش شريفة فحياتي ؟ أنا ما باغاش نشم الخزامة و لا المسك بوحدهم ( بألم ) أنا باغية ريحتهم و هما فشريفة و هي كتحرك و تضحك حدايا ( زيرات على يدين حكيم كتشوف فيه بضياع ) ياك غترجعلي ؟ ما غاديش تخليني ..! ( شهقات بحرقة ) أنا ما عندي حد من غيرها ..!

حكيم:( رخى النفس بالجهد مغمض عينيه .. بقى هكاك لمدة عاد فتحهم و قال ) نتمناو .. كنتمناو ..!

أسية: هي ديما كانت حاضرة على ودي .. كتعرف عليا كلشي و كتقراني غير من عيني .. راحتي عندها هم من راحتها هي .. عمرها عاملاتني خايب و لا حسساتني بلي أنا ( سكتات شوية ) بنت السيد لي مرضها فحياتها .. بالعكس من ديما تاسانوو ديالها واخا ما عرفت شنوو ندير ..!

حكيم:( حرك راسوو بالايجاب فصمت )

أسية: و لكن هي كتهز فقلبها بزاف و كتسكت .. ماشي ديما كتعاود لي كيضرها .. أنا كنت كنشوفها ضاحكة و فرحانة و عايشة حياتها و كنتمنى نكون فبلاصتها و نعيش عيشتها فاش نكبر حتى انا بحالها .. و لكن نهار عاوداتلي شوية من بزاف صدماتني و حرقاتني عليها ( شافت فيه بنظرة حنينة ) انا كتخاف عليا و كتعاودلي غير الزوين قليل فين كتعاودلي الخايب .. و لكن نتا خاصك توقف معاها فاش تفيق .. هاذ الضربة لي كلات قاسحة عليها بزاااف و ما غتقدرش تصبرلها انا متأكدة ..!

حكيم:( تفكر نهار قالت لوو نتا دوايا .. و حتى دابا خاصوو يكون دواها و يعاونها .. و يا ربي غير تفتح عينيها و تولي بخير ..! سكت شحال تا شافهم مخرجينها و قال بالزربة ) ما تحتاجيش توصي ( بابتسامة خفيفة كمل فنفسوو ) الجوهر الحر ..!

******************************

الموت ..! كلمة كتخلع الكبير قبل من الصغير .. المؤمن و الآثم ..! واخا نعياو نديرو فالخير و الحسنات .. كتبقى شي حاجة كتخلعنا .. كتخافوو ما نكونوش فالمستوى المطلوب ..! لكن يلا جينا نسولوو راسنا شنوو هي أصعب حاجة فهاذ الدنيا .. غنلقاو الجواب هو الانتظار ..! نتسناو الموت و حنا عارفين باقية لنا ايام معدودة فهاذ الدنيا و لا حتى نتسناو العقاب على شي حاجة ..!

شي حاجة لي جايا فالطريق و غتوصلنا توصلنا .. و حنا جالسين مربعين يدينا كنتسناوها .. هاذ الاحساس بوحدو .. أصعب حتى من الموت ..!

ساعات و هما فالعمليات من بعد ما طمنوو حكيم .. ملاك .. اسية .. عدنان .. خليل و محمد امين .. عليها .. و قالوو بلي غادي يديرو كاع لي فجهدهم باش ينقذوها .. و هاذ المرة دخلات بسمة معاهم فحالة يلا سكت قلب شريفة مرة اخرى .. تكون حاضرة و تتدخل بالزربة ..!

كلهم جالسين على أعصابهم كيتسناو من غير حكيم لي مشى لنفس البيت توضى و بدا كيصلي و يدعي معاها بلا يعيى أو يمل ..! كيفما روحها معلقة فهاذ الساعات بين الحياة و الموت حتى هو روحوو معلقة معاها .. و يلا كانت هي كتقاتل و تقاوم .. هو غيكون تما بالدعاء ديالوو لي يخليها تقوي راسها كثر و كثر ..!

داز الوقت و هو بوحدو فالبيت حتى تدق الباب و دخل خليل مرة أخرى علموو بلي خرجوو من العمليات .. كمل دعاءو فخاطرو كيتمنى يسمع اخبار زوينة .. و بثقاااالة خرج .. كيتمشى بالشوووية جهتهم و مع وقف شافت فيه نسيمة و قالت كتحرك راسها بالايجاب ..!

نسيمة: قدرات تنقزها .. العملية نجحات كيفما خاصها تكون و المريضة تعاونات معانا بزاااف .. غادي يديوها دابا للانعاش تبقى تحت المراقبة ..!

تعانقات أسية مع ملاك كتشهق بحرقة و دموعها غير كيتكبوو .. فرحانة حيث نقزاتها و لكن واحد القهرة كتحكها فصدرها و باغى تتهنى منها بالبكى .. باغى تحيد فكرة شريفة ماتت او غتموت من بالها ..!

الدراري كاملين ضحكوو فرحانين و عنقوو حكيم .. لي بقى ثابث مزير على يديه و مغمض عينيه كيزفر النفس براحة و يتمتم بصوت خافت ب الحمد لله ..! تا ضرب على ظهرهم بنظرات غريبة فعينيه .. صعيب يقراهم أي واحد و يعرفوو باش كيحس ..!

نسيمة: موسيو أمغار .. تقدر تجي معايا للبيرو واحد خمسة الدقائق ..!

حرك راسوو بالايجاب و تبعها تال للبيرو ديالها .. دخلات و دخل موراها .. جلس مقابل معاها كيتسناها تهضر ..!

نسيمة:( نحنحات مشابكة يديها و قالت ) احم .. مدام شريفة ( شافت فساعتها ) من هنا شوية غنفيقوها من البنج .. و لكن قبل خاصك تعرف شحال من حاجة باش تعرف تتعامل معاها ..!

حكيم: مثلا ؟

نسيمة: العمليات لي دارت صعاب ماشي شي حاجة لي ساهلة و لي غتنوض منها بالزربة .. حاليا غتبقى معانا فالانعاش حتى نتأكدو بلي ما غيوقعلها حتى نزيف داخلي .. و موراها تقدرو تديوها للدار ..! و لكن غيكون عندها ريجيم قاااااسح خاصكم تتبعوه بالحرف ..!

حكيم:( مداتلوو وراق د الريجيم مطبوعين كيقرا فيهم ) الصمت

نسيمة: الأمعاء ديالها تقاسوو و خاصهم مدة عاد يبراو من العملية اللولة لي تدارت ..! ممنوع عليها منعا كليا تاكل شي حاجة من غير السوائل .. و فاش كنقولك السوائل .. خاصهم يكونوو بحال الما .. غير الشوربة د الخضرة بالنسبة ليها ثقيلة و تقدر توصلها لنزيف ..! غادي تتعاون بدوايات و طريطمون غنعطيهلك على ما تتشافى شوية بالشوية .. باش تخصر جوج د لي بيبي و تتضرب فالكبدة و المصارن و تحيد المرارة و تشق صدرها راه ماشي شي حاجة لي ساهلة و غتتعذب بزاااف فاش تفيق من البنج .. غنعاونوها بلي قدرنا عليه باش الحريق يهدن عليها شوية .. و لكن نتوما او نقولوو نتا لي غنخليوك تدخل عندها .. خاصك توجد راسك .. تصبر و تصبرها ..!

حكيم:( هز راسوو من التحت للفوق بنعم .. و خبع الورقة عندو هي و الدوايات لي طلباتوو يشريهم ..! ) كلشي غيكون مزيان ..!

نسيمة: ان شاء الله .. و من الأحسن فاش تولي تقدر تخرج و تتحرك .. تديوها تتبع مع طبيب نفسي .. غيعاونها بزاف .. كيكونوو دايرين عملية وحدة صعيبة و كيدخلوو فاكتئاب .. فما بالك بيها هي ..! ( تنهدات ) قاسحة عليها ..! ( وقفات كتلبس الطبلية ديالها ) تبغي تكون معانا فاش نفيقوها ؟

حكيم: ما يحتاجش سؤال ..!

نسيمة: واخا يالاه معايا ..!

خرجوو بجوج غاديين لجهة الانعاش و فالطريق عطى لمحمد أمين لوغدونونص يجيب الدوا .. و البقية تبعوهم كيشوفوو من الزاج برا ..! من غير حكيم لي عقموه و وجدوه يدخل عندها بالزي الطبي ..!

قرب منها بالشوية كيشوف فالاطباء و الفرمليات لي ضايرين بيها كيفيقوها ..! شريفة لي وجهها صفر مسقووط من الدم .. تحت عينيها كححححل و شنايفها بياضوو يابسين ..! الأوكسيجين على نيفها ..! و ملبسينها بيجامة طويلة مشدودة غير من اليدين لا غير ..!

ثوب ازرق كيبين الشقة لي فصدرها و لي فوق الرحم ديالها بالشوية .. مغرزة ..! و الكارثة الكبيرة هي كرشها ..! واحد المنظر كيبورش و يهز اللحم و يعصر القلب عصييير ..! من فوق الصرة نيشان طالعة تال للفوق و هابطة ثاني من الصرة للتحت .. تخيطية على الجنب ليمن قصيرة فيها شبر .. و على الجنب ليسر تقريبا ضاربة الطول د كرشها كاملة او نصها ..! التخييطة جايا بحال المثلث ..!

زير على يديها واقف حداها كيشوف فصدرها لي كيطلع و يهبط بالشوية و فالآلات لي ضايرين بيها .. كيتسمع منهم صوت كيوثر و كيفكرو فاش كان هو مريض و طايح فالفراش ..!

حرك راسوو بالنفي مركز مع شريفة لي بداو رموشها كيتحركوو .. كترمش شوية و ترجع ترخي عينيها .. حتى حلاتهم فخطرة مكمشاهم من الضوو لي فوق راسها ..!

الضوو لي كيبانلها ثقيييل و كيمشي و يجي و ناس كثار فوق راسها كيهضرو معاها .. هضرة ثقيييلة كتسمعلها بالعرض البطييييئ هي و حركاتهم .. لي ضحكوها و خلاوها تتبسم تبسيمة خفيفة ..! بحال يلا كتفرج فالرسوم .. و لكن هي غير باقى دايخة بالبنج و باقي ما حاسة لا بحريق لا بوالوو ..!

شوية بشوية بدات كتهز فيديها و حكيم مزير على اليد الثانية عندو .. كيحرك راسوو من الفوق للتحت و عينيه مبسمين .. تا حطاتها على الاوكسيجين لي ديرونجاها فوجهها .. بعداتوو بالشوية و بصوت بزز كيتسمع و لسان باقي ثقيييل عليها و ما مطلوقش قالت ..!

قالت و هي كتشوف فالألات و الاطباء لي كيقلبولها عينيها و يضربولها شوك فالسيروم لي لاسقة الشوكة ديالوو فذراعها ..! ترصات الحركة فعينيها و عرفات راسها فالطبيب من لباسهم و من البيت لي هي فيه ..! لكن شنوو وقع معاها و علاش هي هنا .. تا حاجة ما عارفاها .. خاصها تا توكض مزيان عاد تبدا تتفكر ..!

شريفة: ح حك حكيي حك .. م ..! " حكيم "

حكيم:( ضحكو عينيه و زير على يديها و رخف حتى ضارت براسها شوية لجهتوو و قال بصوت خافت و نبرة قوية ) ها أنا هنا .. ا المشاغبة ..!

شريفة:( تبسموو ملامحها بتعب و من وجهها كتبان عيانة بزاااف .. غير باش تهضر كتضيع طاقة كبييرة ..! ) ب باااا ق يي .. م مااا .. غ ااا د يي .. ت تهههه نى .. م ن .. الا ب ت ل ا ء .. لييي بببب لااااك ب بييييه ا ال الله ..! " باقي ما غادي تتهنى من الابتلاء لي بلاك بيه الله "

كتتهجى حرف بحرف بثقااالة بعينين ذابلين .. و حكيم متبعها بفرحة .. تماما بحال فرحة الواليدين بأول كلمة قالها ولدهم ..! فهم شنوو بغات تقول و بضحكة رد

حكيم: ياك قلتي المؤمن مصاب ..؟ هه ..! لا كلام فوق كلامك ا مدام ..! ( حط راسوو على ذراعها .. يالاه قايسها شوية و بنظرات حنينة كمل ) يلا قلت لك واحد الحاجة تيقيني ؟

شريفة:( غمضات عينيها و رجعات فتحاتهم .. بمعنى ااه ..! )

حكيم: أركم تّيريخ " كنبغيييك " ( باسها فيديها مغمض عينيه ساكت و البقية كيشوفوو فيهم فصمت ..! )

شريفة:( ضحكات حتى تقسحات و قالت ) ك ن ت .. عاااا ر فة ..! سسسس بببب ع بوووو بببب طططط اااا يييي ننن يييي نننن وو " سبع بو بطاين ينوو = ديالي "

ضحك من هضرتها راجعة فيه الروح و قلبوو كيضرب بالزربة بحال يلا راه فماراطون كيتسابق ..! حتى من ذاتوو سخنات بالدم لي كيجري فعروقوو بالجهد ..!

**************************

لم أكن لأحبك ..!

لكنك أيقضتي ما كان في صدري ،

منذ سنين في سبات ..!

ما كنت لأريدك ..!

لكنك أنرت في روحي ما كان مظلما ،

و أحييت ما كان ميتا ،

و أخذت بيدي لطريق أضعته ..!

لم أكن لأحبك بهذا القدر ..

لكنك بنيت لي بيتا في صدرك ،

حيث أنني لم أعد اجوب شوارع العزلة ..

بعد أن عرفتك أو اشتهيها ..!

لم أكن لأحبك .. لكنك أنت من احببتني فيك ..!

امرأة بنكهة خاصة ..!

دافئة كشمس الشروق ..!

حارقة كشمس الظهيرة ..!

ساحرة كشمس الغروب ..!

***************************

و ماشي غير هو لي رجعات فيه الروح ..! حتى أسية ضحكات وسط دموعها فرحانة .. حاطة يديها على الزاجة كتسنى فيه يخرج و تدخل هي ..! و فهاذ اللحظة بالذاث رمات عينيها لجنابها .. شافت فمحمد أمين لي حاط يدو على كتاف بسمة بحال يلا معنقها كيهضر معاها و يضحك ..! و ملاك وسط خوتها بجوج .. خليل و عدنان .. كتفشش عليهم و تبحلس ..!

حتى جات عينيها فعين عدنان و بلا ما ينتابه لها قلبهم جهة ختوو شانق عليها من رقبتها بالضحك ..! بلعات ريقها من الموقف حاسة بقلبها كيضرها و بقى فيها الحال بالجهد ..! الوحدة خنقاتها و هي كتشوف كل واحد معامن كيرتاح و هي تما واقفة بوووحدها ..!

تنفسات بالجهد و جبدات تيليفونها ... دخلات عند أيوب كتفزك شفايفها بتوثر و هي و كتكتب ليه فالمسج ..!

أسية: ما بغيتكش تهز فخاطرك مني .. حتى أنا ما عندي حتى واحد من غير شريفة ( هزات عينيها قبالتها كتشوف فيها بابتسامة باهتة ..! ) و متأكدة حتى هي غترتاح لك فاش تعرفك مزيان .. أنا موافقة ..!

*********************************

نسيمة:( قلباتها و سوانات ليها الجرحات .. دارتلهم الدوا و غطاتهم بالفاصمة ..! و موراها شدات فحنكها كطبطب عليها و بجدية قالت ) ركزي معايا و قوليلي ..! شنوو سميتك ؟؟

شريفة:( ردات بتعب ) ش شري شرييفة ..!

نسيمة: مشرفين ا شريفة أنا نسيمة الطبيبة ديالك .. قوليلي شحال فعمرك ؟

شريفة:( ردات بتبسيمة خفيفة و صوت ثقيل بدا كيتطلق ) حشوووومة ..! شششش ..! ( شافت فلي معاهم واقفين ) عيب تسولي مراة شحال فعمرها و كثير شي يلا كان ضاير بيها هاذ الزين كامل ..!

حكيم:( زير على يديها و قال بتنبيه ..! ) شريييفة ..!

شريفة: موون شاااف .. فعمري 27 و لكن قلبي ديال بنت 16 العام و الله .. باقي ندك و ندردك لاهيلا ..! ( رمشات عينيها بالشوية ) ..!

نسيمة:( قالت غالباها الضحكة ) ههه تبارك الله عليك ..! ( لحكيم ) غنخليوكم دابا .. باقي البنج شاد فيها خاصها تخرج الريح باش ما يبقاش فذاتها ..!

شريفة:( ردات كتشوف فيهم ) ضروري تقوليها حداهم ؟ ( ضحكات لحكيم ) شريفة الزهوانية الحزاقة هي أناااا ..!

خرجوو من عندها ضاحكين فالوقت لي جلس هو قدامها شاد فيديها بابتسامة راشقة ليه .. عض على فموو تحت الكمامة و قال بضحكة ..!

حكيم: غنتفاهموو على هاذشي فاش تفيقي ا الشيطانة ..!

شريفة:( ردات بصوت خافت كتضحك ) كتظلمني .. أنا غير شويييطنة و لفيييفيعة .. كتحضيك و نتا كتبدل حوايجك بالسريييقة .. كنشووف فعموو الشينور لي كيثقب العزبات ..!

حكيم:( غلباتوو الضحكة حتى قهقه بالجهد و قال ) هههه نعام ؟؟

شريفة: اممم انا شريفة الزهوانية الحزاقة السخووونة ..! و نتا ( هزات يديها ثقيلة عليها طراسات صبعها مع صدرو و كملات ) نتا ماشي حو** السخوونات .. نتا عزرائيل لي كيبغيني ( فزكات شنايفها بلسانها )

حكيم:( شد على جبهتوو كيضحك و قال ) شنوو عطاوك فداك الدوا ..! هذا كامل بنج ؟؟

شريفة:( ردات ب نية .. الدماغ ا فرفر ) طب*** تا هو تبنج ؟ هء ..! ما غنبقاش نحس بيه ..؟؟

حكيم: هههههه ( غمض عينيه و رجع حلهم حاني جهتها ) الطاكتيل باقي خدام ا المدودة غير ارتاحي ..!

و هما كيهضرو دخلات أسية حتى هي بلباس الطبي معقمة .. مشات لعند شريفة من الجهة الثانية شدات فيديها و باستها كتبكي فوقها بلا صوت .. حتى هزات راسها كتمسح دموعها بلا حس ..!

شريفة:( شدات فيها كتنهد ) تسانوو البكاية .. حتى أنا كنبكي .. غير نتي من الفوق و أنا من التحت ( شافت فحكيم بالعة ريقها و حجبانها بداو كيتعقدوو بالشوية و كتزير ) ف فيااا الحريييق .. ديكشي هابط مني كيدير pvvvv .. بالجهد ..! الدم ..!؟

سكتات مغمضة عينيها مزيرة عليهم و عاصرة يد أسية بين يديها .. غززات سنانها و حكيم واقف فوق راسها كيبرك مرة و جوج و عشرة على البوطون لي تما باش يجييو عندهم ..!

حكيم:( دوز يديه على شعرها و وجهها ) صبري شوية .. البنج بدا كيمشي منك .. ضروري من الحريق .. غير صبري ..!

شريفة:( فتحات عينيه فيه .. شعرها لسق عليها بالعرق و العروق فنواظرها تطراساو بكثرة ما هي مزيرة و موجعة ..! و بنبرة مسرحة عكس كيف كانت قبيلة مدوخة .. كتدخل و تخرج فالهضرة ) ماتوو ياك ؟

نبرة صوتها فيها احباط كبيييير .. بحال يلا كتقولوو عافاك قول العكس ..! و غير حرك راسوو باااه .. عضات على فمها و حركات عينيها من الفوق للتحت و رجعات غمضاتهم ساكتة ..!

يتبع...

‎