خرج ولي العهد راشقة ليه من جناحو هاز راسو عوال يخرج للصيد بحال العادة وهاد المرة حتى السلطان بغا يصيد ويشوف مهارات سمو الامير فالصيد.. تافقو يخرجو بجوج وبحال العادة لبس ملابسه المعروفة واتاجه لبيت متعة هي اللولة يصبح على ولدو عاد يمشي للصيد . وصل لبيتها ودفع الباب دخل مبسم لقاها جالسة كطوي ليه حوايجو وهوا فالارض فوق توب ناعم كيلعب وتقلب ويتشقلب ..وقفات فالحين حدرات راسها مبسمة قالت ليه مولاي..شرفتينا بزيارتك
تحنا هز ولدو اللي مزال ماشاد راسو مزيان باسو وشد ليه حناكو طبيبيزة وكان مشاء الله تقيل الوزن وطبيبيز والثنيات فيديه ورجليه وعنقو مكيبانش. باين عليه الاهتمام والرعاية وهادشي كيعجب لسمو الامير ويفرحو ..تلفت. جهة متعة قاليها خصكم شي حاجة ؟
قالت ليه خصنا راحة بالك امولاي..
سرح عينيه فجناحها قاليها مرتاحة ؟
قالت الحمد لله مرتاحة وماخصني حتى خير كاين الوصيفات اللي كيعاونوني فرعاية الاصيل الصغير وحتى لاللة روح الندى مامخلياناش محتاجين
تبسم قاليها خرجييه شوية لبرا يشم لهواء.. ماتبقايش نهار كله جالسة فهاد البيت
قالت ليه واخا مولاي غير تعاشا العشية ونخرجو للحديقة
باس خدو وعطاه ليها قاليها الله المعين
خرج من عندها ومشا نيشان للصيد مع السلطان .
استغلت روح الندى غيابهم بجوج وناضت وجدات راسها ولبسات سلهامها وخرجات خلسة مع عبدية لاكن لمحات خيالها عين حكيم اللي كان فبرج من ابراج القصر كيراقب الاجراس ولمحها غادية لاكن ماعرفش شكون تكون وكون هاديك اللي ملوية فالملحة ومعاها مرى غليضة ركبو عربة ومشاو . ماتخيلش تكون روح الندى ومجاتش على بالو بالمرة واول وحدة شك فيها بلا تردد هي يمامة..نزل والشك كياكل فيه ويقول مع راسو ماشي خير وجرات فيه وانما عندها اهداف والتضحية اللي دارت ماشي على قبل الاسلام وانما عندها مصلحة وكتسعى لما اكثر..للحضة دخل الخوف قلب حكيم وخاف تكون مخطط لشي حاجة خايبة والاكثر تخوفا هوا تضحيتها اللي ضحات وذكائها وبهائها اللي فاق الحدود وخصوصا التضحية اللي مغتكون الا على شي دمار شامل من الاول حتى للخر ويخوفو يكون تأخر ولا فات الفوت وعلاش من الاول ماحطوش عليها العين وصدقوها .
بقا نازل كيجري مع الدروج وعقلو غيوقف باغي يلحق الادى وخايف يكون تعطل وكيلوم غبائهم وتقتهم واللي داز حداه كيدفعو ويدوز ومشا نيشان يقطع الشك باليقين وقصد جناحها فرع الباب عليه وهوا متأكد مغيلقاهاش تما لاكن جات الصدمة الكبيرة فاش خلعها وهي كتقيس القفاطن اللي جابو ليها وكانت شبه عارية بوحدها ويالاه نوات تلبس لاكن بسرعة مع الخلعة حطات القفطان قدامها على جسها قبل ميشوف شي حاجة وخرجات عينيها فيه مخلوعة ووجها اصفر كتشوف فيه وجهه اصفر اكثر منها وصدرو كينهج وعينيه مطرطقين مصدوم متوقعش يلقاها ..اما كساتها ولا عراتها ولا الوضعية اللي هي فيها فماقدرش حتى ينتابه ليها من شدة الصدمة حتى غوتات من بلاصتها بجنون قالت ليه وهي كترعد عليه بالغضب
واش نتا حمق؟!!! واش خرج لباباك العقل
تقول عطاتو بتسرفيقة رداتو للوعي ديالو خرجاتو من دوامة شكوكو وانتابه لراسو وحدر عينيها فالارض وعطاها بالضهر كيتفتف فالهضرة ماكيشوف لا يمين لا يسار
خركات عليها واحد القميص خفيف بالزربة خرجات راسها من عنقو المزير بالغدايد حتى تطراسا ليها فحناكها ومشات قصداتو وقفات قدامو كتغوت قائلة
الى ماشكيت بيك للسلطان هاااااوجهي دفل عليه باش تعلم تدخل على حرمة لقلب جناحها
قاليها كيتفتف ويتلعتم ويشوف فلارض
سمحي ليا انا .. ماشي. ..ماا
غوتات بغضب حتى كان وجهها غيطرطق وعرقوها طلو قالت ليه خرج عليااااا من بيتي ..خرج عليااا غنشكي بيك للسلطااان
خرج تالف كيدور بجنابو خلاها كترعد ماحملاتش الوضع اللي تحطات فيه وحسات بالحكرة لاول مرة وكانت اصلا هازة فقلبها من الفطور وجات النقطة اللي تفيض الكاس بدات كتبكي وجلسات هبطات راسها على رجليها وعطاتها للبكى
خرج حكيم للوسعة المعرفة اللي وسط القصر مع الدخلة ديالو من الباب الكبيرة ثلاتة ممرات واحد مقابل معاه وواحد على ليمن واحد على ليسر
اللي على ليمن كيدي لجناح الحريم وقسم الادارة الى اخرج واللي على ليمن كيدي لجناح الامراء والسلطان ..بقا بين دوك الممرات غادي جاي كيلعن اللحضة اللي فكر يدخل عندها واللحضة اللي شك فيها وغاضب على نفسه حتى بانت ليه جاية من جهة ليمن كتزرب لابسة بلغة كحلة بالصم اصفر وقفطان كحل محلولمن الجنابحت للركب بلدي مطروز وهازاه للجنب وغادية كتتحلف مشافتش فجنابها، شافها قاطعة قدامو لجهة جناح السلطان ومشا تبعها وقفها وووقفات كتشوف فيه مخرجة عينيها كتسناه يعطيها مبرر لاكن مللي مالقا ميقول ليها علاش دخل عليها زادت فيه وكملات طريقها وتبعها وقفها المرة الثانية قاليها السلطان خرج للصيد وغيتعطل
قالت ليه ايوا نمشي عند سمو الامير
قاليها سمو الامير مشا مع السلطان وماكاينينش ..انا ماقلتش ليك هادشي حيت مابغيتكش تمشي ولاكن حيت ماقصدت فيها حت حاجة
لحسن حظ روح الندى مانتابه حتى واحد لغيابها وحكيم مرض بسبب التسرع ديالو مابقاش كاع كيسول ويخمم فشكون خرج خلسة رجع كيفكر فشنو غيوقع ليه الى يمامة شكات بيه للسلطان وكيفاش كتفك حريرتو معاها وهي جلدة مانفعات معاها حزارة وغادي تغرقو ..فاخر يامو وشحال وهوا فالقصر عمر شي واحد خلاه يعيش الرعب حتى جات نص خبزة وخلاتو يفكر ويخرج عرقو باش يتفاك معاها وهز ليها هم الدنيا والاخرة .
اما روح الندى منعات منها ووصلات للرياض في امن وسلام ودخلات لاحت عليها الحاية ومشات نيشان طلعات لبيتها وطلعات للسطح اللي فوقو فين نعتات ليها لاللة عيشة حتى وقفات عليه فا جآتو وناض وقف فالبلاصة تقول شاف الجنة ونعيمها .. بقات كتشوف فيه وضحكات مشات عنقاتو وعنقها بقوة وقاليها بلهفة
قالت ليها عبدية بتوثر منقدرش اعيشة..راه كن يسيق الامير لخبار لهادشي راه يقطع لينا روسنا.. مايعقل لا عليا لا عليها وهاد الوقت اللي جينا فيه ماشي وقت الخروج من القصر.. كن تسنات بعدا حتى طيح الضلمة..يقدر يرجع الامير من الصيد يسول فيها مايلقاهاش يقلب الدنيا ونمشيو فيها كاملين بينا وانا مابغيتش نخون التق ديالو عمرو يرجع يشوف فوجهي
تنهدات لاللة عيشة قالت ليها واغير جلسي بعدا ما عند الخلعة ما تفديك دابا
مزال ماكملات كلامها رجعات روح الندى هابطة وكتلبس حايكها بالزربة قالت ليها يالاه نمشيو خرجات عبدية كتجري من بعد ما ردات الروح وما تهناو حتى فاتو الرياض وقالت ليها
عاد رجعات الروح اروح الندى .. عمرني نعاود نعتب بابالقصر بغيني ولا كرهيني
دارت الحايك على وجهها وقلباتو للجهة لاخرى رجعو للقصر بلا ميفطن بيهم ختى واحد ومن موراهم رجع السلطان ولقا حكيم واقف مستقبلو وحاني راسو ..لاحظ السلطان لون وجهه وتعابيره لعريبة وشاف فيه مطولا ودخل ماقاليه والو .. نزل وراه سمو الامير كيتفض يديه حدر ليه حكيم راسو واستأذن من السلطان ومشا وبقا حكيم غادي جنب السلطان حتى قاليه اشنو تما احكيم خبار الخير
قاليه حكيم خاصني نقول ليك شي حاجة مهمة امولاي
رفع السلطان راسو ومشا دخل جناحو وتبعو حكيم وقف قدامو حادر راسو والعبيد ضايرين بالسلطان من كل جهة كيحيدو ليه حوايجو باش يستاحم وفنفس الوقت كيسمع لحيم اللي قاليه بكل اسى ..
كنت امولاي فالبرج كنراقب حبال الاجراس وشفت جوج عيالات ملتمات وحدة رقيقة وحدة غليضة خارجين من باب لخيول لقديم وكيتختلو وركبو واحد العربة ومشاو ..
استغرب السلطان قاليه شكون هادو احكيم ماتقوليش ماقدرتيش تعرف شكون؟!!
قاليه حكيم بأسى كنت فالبرج ومشاو وانا مزال لفوق منلحقش نشدهم ..ولاكن مشا شكي لسبأ نيشان ماعرفتش علاش شكيت فيها لدرجة تيقنت تكون هي ..ومشيت باش نقطع الشك باليقين وانا فحالة جنون من اللي شفت ومن الخوف من افعالها اللي سبق وخدماتهم فقتل التوام جن جنوني بقاو الافكار كيتضاربو فراسي ومشيت فرعت عليها الباب على اساس منلقاهاش تما ونرتاح من شكي لاكن مع الاسف وقع اللي ماكنتش متوقع يوقع ..لقيتها وكانت فحالة شبه عارية واخا مارديتش الباب كاع للوضعية ومن الصدمة تلهبطات لي الافكار مع صورة وجهها والمشكل هوا طحت فدنب ما مقصودش..ودخلت على حرمة فقلب جناحها بلا منقصد
وقف السلطان رافع راسو بصرامة قاليه غتجيب ليا هاد الجوج حييني ولا ميتين ..من بعد نشوفو قصة الحرمة ..الجواسيس عندي فقصري واش كتسنا يوقع ليا ما وقع لويسيوس وخوه ؟!!
حدر حكيم راسو قاليه غنلقاهم امولاي كن هاني من هاد الناحية وغادي نجيبهم حت لبين يديك .
تسمع الدقان فالباب وتفتح دخل عبد قال للسلطان مولاي ..بنت كتقول اسمها يمامة بغات تشوفك
شار ليه السلطان بصبعو تدخل وهوا فحالة من غير الحالة اللي جا بيها من الصيد وتشطن بسبب اللي سمع من حكيم وتقلقات راحتو . وقفات يمامة قدامو كدور فعينيها شافت حجبانو معقودين وحكيم حادر راسو فهمات انه وصلها ليه .. هبطات راسها بحزن شكات عليه ما جرا ليها خلاها حتى سالات وقاليها شنو كطلبي فداء لدم وجهك؟
قالت ليه كنطلب منبقاش انا وياه فنفس البلاصة ماعنديش الوجه اللي يشوف فيه كل نهار .. ولا يشوفني وهوا شايف عراتي
هزات عينيها مصدومة كتمتم تقول بلعات لسانها لاكن السلطان عطاهم بالضهر وشار ليها بصبعو يخرجو عليه يخليوه مع خبر الجواسيس اللي سلاط عليه قلق راحتو وقاليهم
زواجكم الجمعة الجايا يالاه خرجو شوفو شغلكم
خرجات يمامة مصدومة حالة يديها كتشوف فيهم من هول الصدمة وومراها حكيم حتى هوا اكثر منها وعمره توقع يتزوج يمامة او جات فبالو بالرغم من جمالها وجادبيتها لاكنه عمرو تخيلها زوجة ليه ..ماهضر مانطق بقا كيشوف قدامو كيستوعب ويمامة حاللة فمها ، مشات خلاتو بلا متشوف فيه اما هوا هز عينو فيها وهي غادية عاد بدا يستوعب الفكرة والقرار وبدات تبان ليه كزوجة واخا عمرو تجرأ وتخيلها وكانت شي حاجة اللي مستحيلة انه يحضى بداك الجمال والرقة والثقافة والاكثر انها كانت جارية لامير بشحمه ولحمه .
وهي غادية فطريقها بلا عقل صادفات متعة جايا وهازة ولدها مخرجاه ودازت حداها يمامة بحال البرق تقول عورة ..بقات متبعة ليها العين ومشات تبعاتها ودخلات وراها لنجناحها وفيدها ولدها طلات عليها وردات الباب كتساؤ ا مالها متهضر بوحدها ؟ شنو وقع ليها؟
قالت ليها يمامة انا اللي بغيت ..انا عمرني ماكنت جارية وعمرني غنكون.. حاسة براسي كنتقطع امتعة ديري لي شي حاجة ولا قتليني نرتاح
تنهدات متعة قالت ليها الحل الوحيد تقوليها للامير يور يقدر يخرجك من هاد المصيدة
قاليت ليها يمامة منقدرش امتعة حتى لوجه باش نقولها ليه ماعنديش.. وقفت قدامو اخر مرة قلت ليه حررني..ديك الساعة كان عندي الحق نطلب اما دابا بصفتي شكون؟ علاش غيوقف معايا؟ ومنقدرش نمشي نطلبو ولا نترجاه عطيني شي حل اخر
قالت ليها متعة شوفي مع لاللة روح الندى.. حتى هي عندها كلمة تقدر تعاونك واخا طبعها صعيب مكتحملش حريم الامير وكتغير غلى ولدها ولاكن متعرفي
قالت ليه يمامة لاااالا والله حتى تزوجني بيه فلعشية قبل من غدا غير ضد فيا .. كتقلب ليا على السبة وعادي نعطيها ليها بيديها لالالا ميمكنش
قالت ليها متعة انا ماخبيتش غليك انا غبروني مابقيتش كنشوف حتى واحد وجابو ليا وصيفات جداد ومنعو عليا نفوت واحد الحد.. مابقيت كنعرف شنو كيوقع فالقصر قالو ديها فولدك وفحملك ونتي مسؤلة عليه صافي تركنت وقطعت الزي ..ولاكن كما قلتي درتي فيا خير عمرني ننساه ليك ..غادي نحاول نتوسط ليك مع الامير .. واخا مكيديهاش كاع فيا وفهضرتي ولاكن غادي نحاول وندير اللي فجهدي باش يخرجك من هاد الحريرة اللي طاحت عليك من السما
بدا اصيل الصغير كيبكي فالارض ومشات متعة هزاتو وخلات يمامة طايحة على واحد المخدة كتبكي وشافت فيها باسى وتنهدات وخرجات مشات بشوية عليها لجناح الامير.. هازة ولدها وراسو على كتفها كيركً ومشات ستأدنات من الحراس اللي فبابو ودخلات عندو لقاتو فجناحو معاه الحريم كل وحدة وشنو كدير ..ها اللي كتمسح ليه كتافو من مياه الاستحمام ها اللي كتنشف ليه رجليه ها اللي موجدة ليه حوايجو وها اللي كطويهم ليه . تبسم فاششافها جاياه بالولد وفتح يديه لولدو شدو عندو وجلسات هي جنبو مبسمة في حين حدر ليهم الجاريات الراس وانساحبو وناضت كملات شغلهم بيديها حطات ليها منشفة جديدة على كتافو وهزات حوايجو حطاتهم قدامو وبدات كتمسح ليه شعرو بشوية من اللور وتفكر كيفاش تجبد ليه الهضرة ..قاليها وهوا كيلعب مع ولده واش خرجتيه شوية لبرا هاد العشية
تنهدات وقالت ليه خرجتو لاكن الهوا مكانش هوا هاداك
قاليها لا كان هوا هاداك
قالت ليه هوا القصر امولاي ماشي هوا هاداك
باس يد ولدو قاليها علاش شنو واقع
قالت ليه علاش امولاي مافخباركش اخر الانباء؟
هز حتجبو شاف قدامو قاليها اشمن انباء؟
قالت ليه مولاي جلالة السلطان راه صدر قرار فحق يمامة والصدر الاعضم وقرر يزوجهم
ترخفات التعابير كلها من دقة الصدمة على وجه الامير بقا غير كيشوف قدامو وهي كطل عليه وتسنا ردة فعله ..بان ليها تصمر ماتحركش ورجعات قدامو قالت ليه عطيني محم د اصيل نحطو عليك
قال الجمعة الجايا فاتحتهم ..ولاكن امولاي لغريب فالامر هوا يمامة كانت من الحريم ديالك يعني كيفاش هاكا فجأة تصبح مرات الصدر الاعضم !!واش المرى الى تحررات صافي يجوز ليها تزوج بأي راجل
هبط عينيه شد بصبعانو فيهم بجوج قاليها خودي محمد اصيل لبيتو يرتاح امتعة خصو ينعس
قالت ليه واخا امولاي..فالصراحة مغنسخاش بيمامة الى مشات من القصر دوزناها معاها ايام زينة ودكريات متنساش..لاكن من حقها حتى هي تزوج وتولد ولادها واخا حكيم مايناسبهاش وغنزوج بيه تحت قرار السلطان وصافي الله يكون فعوانها مسكينة
حدرات راسها خرجات وبقا هوا جالس بلاصتو لابس سروال توص طويل تقليد فالازرق وصدرو عريان والمشنفة على عنقو ..عيط للعبيد جاو فالحين وقال لواحد فيهم يعيط ليه على يمامة ومشا عندها مباشرة كانت مزال فبلاصتها كتكمدها وندمات اشد الندم على شكوتها وتمنات لو تشقات بيها الارضاو منعها شي واحد قبل ماتوصل عند السلطان .. سمعات الدقان وهزات راسها قالت ليه دخل ودخل العابد حادر راسو قاليها سموالامير بغاك فجناحو فالحين
شهقات وناضت وقفات عرفات باللي لخبار وصلات ليه ومشات ديك الساعة غسلات وجهها باش تستقبلو ومابغاتش يشوف ولو ذرة ضعف فوجهها او انكسار بالرغم من كلشي والاهم متشوفش الشفقة فعينيه عليها ..
مارداتش عليه وخلاتو مشات وجلس متبع ليها العين حتى غبرات ودخلات لجناح الامير بشوية عليها حدرات راسها ليه ورجعات هزاتو لقاتو مزال جالس فبلاصتو وكيطلع ويهبط فيها وهي كتقرا نضراتو اللي كتبين انه مساخيش بيها وكيشوف فاجملواعز حمامة من بين حمامو فطريقها للطيران بلا عودة .
قالت ليه بابتسامة طلبتيني امولاي ؟
بقا كيشوف فيها مطولا كيحاول يفهم شي حاجة من تعابير وجهها لاكن البنت ملامحها باردة لا توحي بشيء. .. تبسمات فوجهه تبسيمة جميلة قالت ليه مولاي واش طلبتيني
عقد حوجبو وقاليها وهز واحد فيهم وقاليها مرتاحة ؟
ضحكات كترمش وهبطات عينيها قالت ليه الى كنتي مرتاح حتى انا مرتاحة..راحتك اولا من راحتي امولاي
قاليها مرتاحة فقرار السلطان ؟
قالت ليه اشمن قرار؟
قاليها قرار زواجك بحكيم؟
هبطات عينيها كتشوف فيديها وجمعات شفاها لداخل ورجعات تبسمات قالت ليه الى كان هادشي غيرضيه ماعنديش مشكل .. مولاي السلطان عطاني كاع اللي نحلم بيه ..ماشي خسارة فيه نرضيه فزواجي
حرك راسو. معجب من هادالرد وقاليها زواج راه ميثاق ومن الشروط دياله تكون المرى قابلة وراضية بلا ضغوطات ..
قبل ميكمل كلامو بدات كضحك وكتخفي بضحكتها الدموع اللي ماراضياش طيح قدامو ولا ثير الشفقة ديالو او تضعاف لاكن خانوها دموعها وهبطو وسط ديك الضحك كيتسابقو وبدا تمسحهم بسرعة وتخل عينيها كأن شي حاجة دخلات ليها تما ..لاكن كلشي كان وضاح قدام الامير وناض وقف قدامها وهي كتشوف فجنابها وهز ليها وجهها شاف فعينيها وقبل ميهضر نفاجرات بالبكا وبدات كلها كترعد وكتقمع البكية فنفسها باش مطلعش ورجعات اللور كتخبي وجهها وحدرات راسها بغات تستأذن باش تخرج ومشات خلاتو واقف . ديك الساعة لبس عليه ومشا لجناح السلطان دخل عمدو لقاه مهموم عقلو فشكون اللي غيكون خرج سالت وعيايفكر فشكرن من اعدائه اللي مغروس وسط قصره
وقف قدامه سمو الامير حدر ليه الراس باحترام ورجع رفع راسو قاليه مولاي السلطان.. سمح لينا غادي نرجعو لتارودانت..انا واهلي وحبابي وكاع اللي جاو معايا..يكفي هاد الوقت اللي ضايفتونا عندكم لاكن جا الوقت نرجعو لاراضين في انتضار رجوع قرطبة لينا
تفاجأ السلطان من هاد القرار السريع ووقف كيشوف فيه قاليه اش هاد القرار المفاجأ ؟ ومن امتى كنتو ضياف عندي فالقصر؟
قاليه سمو الامير حنا عندنا اراضينا واقابئلنا ..جا الوقت فين نرجعو ونستاقرو وترجع الاًوضاع كما كانت من قبل
حمار وجه الامير وبقا كيشوف ليه فعينيه مطولا وقاليه وقاليه جلالة السلطان .. انا علمتك باش نمشي .. ولاكن ماشي باش ناخد الاذن ..مزال مستاقل بداتي وعندي ارضي .. واهلي وحبابي انا اللي كنقرر فيهم وحتى واحد ما من حقو يجردني من قراراتي بخصوص اهلي .
استغربالسلطان قاليه وشكون جردك من اتخاد القرارات الخاصة بيك ؟ لحد الساعة مزال كتقرر وحتى واحد مكيتدخل فقراراتك
سد الامير عينيه وخرج النفسبفاد الصبر وقليه لا كاين خطوط تجاوزات ومن غير هادشي انا ماقادرش نرتاح هنا فالقصر..من الصواب نرجع لبلادي ويبقا كل واحد عارف صوابه..جلاسي هنا غيزيد يعقد الامور وماشي فصالح حتى واحد فينا
بقا السلطان غير كيشوف فيه وكيحاول يفهم اسباب هادالقرارات علاش كيهضر وماجاوبوش قاليه غادي نناقشو هادشي من بعد ان شاء الله
خرج الامير من عندو ومشا لجناح روح الندى دخل عليها قفزها قاليها وجدي راسك وعلمي الخدم والعبيد والحريم واي واحد دخل فطريقنا لهاد القصر يجمع راسو باش نرجعو لاراضينا..يكفي هاد المدة اللي دوزنا هنا من الصواب نرجعو بحالنا
ناضت مصدومة قالت ليه علاش شنو وقع ؟ ياك لاباس
قاليها جلاسنا هنا خطأ كبييير وحنا عندنا بلادنا ..عفاك امي ماديريشليا بحال المرة الفايتة وتشديني هنا وفكل مرة نبغي نرجع بحالي تشديني.. جالس على قلبي هنا ومغنرتاح حتى نخوي هاد القصر ولو تدعى الضرورة نعيشو فالجبال فالخيام
اما هوا خرج ورسل عابد لسبأ دخل عندها كانت مركنة كتبكي وتمسح وقاليها لاللة ..سي المير قاليك جمعي قشك باش نرجعو للديار ديالنا فتارودانت
بكثرة الضغط والخاطر المكسر عمد روح الندى خرجات من ناجها نيشان لجناح السلطان اللي كان اكثر منها والجو معكر عندو من جوج جهات من جهة الجواسيس اللي سمع ليهم ومزال مابانو وعايشين وسط قصرو وماخلاوهش يتهنا ويرتاح ومن جهة الامير يور اللي زاد عكر صفوة مزاجهه وكفس عليه النهار .
بنيرانها الحامية دخلات عليه لجناحو بلا متشعر وقالت ليه بانفعال
شنو عاوتاني درتي ليه حتى خليتيه يطج من حوايجو !! اش كاين اش بينك وبينو
شد عينيه ويد على فمو ويد على جنبو وضار عندها قاليها خرجي من هنا قبل ما نقلب عليك هاد البيت لا نتي ولا ولدك اللي بدا كيطلع ليا فالراس وصبري نفد من طغيانو والتمرد دياله .
عقدات حجبانها قاليت ليه انا اصلا غنخرج وعمرني نرجع لهاد القصر ..الله يكثر خيرك ويخلف عليك واصلا اللي ماعندو كبدة على ولادو ما رباهم من صغرهم صعيب يحس بالقرب منهم
هز يدو كان غيضربها لاكن طاحت ليه بكثرة الضغط والانفعال قبل ماينزل عليها وغيبات فالارض وجا التاج فجهة اخرى وبقات يدو فالسما وكيشوف فيها طايحة . ضن انه تبوحيط النسا ومكان حتى سبب يخليها تسخف غير هاكاك وهي دخلات عندو بحال الثور صحة سلام. دار يدو ورا ضهره وعطاها بالضهر كلم العبيد دخلو كيجريو عندها قاليهم وهوا عاطيهم بضهره باكراه
هزوها ردوها لجناحها واخر مرة تحط رجلها عندي هنا
هزوها العبيد مغبية كيجريو بيها لجناحها وحانت شادية دايزة من جنب جناحها شافتها داخلة بديك الحالة و تبعاتها كتجري وتجمعو عليها فجنتحها الوصيفات والحكيمة وعبدية حتى هي .
فهاد الاثناء كان ضغط السلطان طلع وجلس تكا على واحد الكرسي كيرتاح وسد عينيه وطول فغمض العينين حتى عفا غفوة مابين اليقضة والنوم شاف فمنامو ملخص نص نهار اللي غبر فيه على القصر ومشا مع الامير للصيد وكان اهم جزء اللي شاف مع غنضة عينو هوا خروج جوج نسا من القصر كيبانو فيهم غير العيني ..حاول بعقلو الباطني يتبعهم واخا كان لعقل مشوش وغفا وهوا معصب دازت الرؤية مشوشة والاخداث شي كي خل فشي وبجهد كبير باش يعرف شكون ماقدرش لاكن وسط ديك السرعة دالاحداث الملخبطة بانت ليه روح الندى فجأة فمشهد كتبتاسم فيه واقفة بين يدين راجل طويل وعامر وتكات على صدره وشوية تكات معاه على السرير .. بدا العرق كيتصبب من جبينو وكيحاول يشوف الوجه ديال داك الشخص لاكن دخلات فالخط صورة يمامة وهي قدام الامير كتبكي وهوا شاد دقنها وكيتكلم معاها وفنفس الوقت جات صورة اخرى دخلات بدون سابق اندار لشفاه مرة كبيرة كتتكلم وتقول بصوت كيتردد بحال الصدى مبروك عليك الاللة يتربى فعزك ان شاء الله . ومع هاد الجملة هزات روح الندى راسها جلسات وهنا فتح السلطان عينيه فجأة وصدرو كينهج وناض شد راسو وصد عينيه كيحلهم ويسدهم وكيحاول يستوعب ويفهم اشنو كيوقع وقلبو علاين يسكت من الرؤية اللي شاف اللي مافهمش منها شنو المغزى وشنو هاد المنامة الكحلة زحلة اللي كانت غتزهق ليه الروح كن ما فتح عينيه وخرج منها
فجناحها كانت متكية مصدومة من كلام الحكيمة ليها واللي خلاتو سر ماتعرفو غير الحكيمة وعبدية اللي غتاكل جنابها من اللي سمعات وكتلومها وضرب فخادها .
تحل الباب فجأة مع صوت العبيد كيباركو فعمر السلطان اللي رجلو على الباب وغير سمعات روح الندى صوتو ناضت من صدمتها جلسات جامدة فبلاصتها وجها اصفر وعبدية واقفة كتفتف حادرة راسها.. مع دخل هز راسو كيسرح عينيه ويفلي فالبيت وحول نضره جهتها لقاها جالسة فسريرها وتقلب عندها وقف قدامها في حين خرجات عبدية كتجري تسلات خلاتو منو ليها .
شاف فيها مطولا وقلبها غيوقف من الخلعة لاكن كاتمة احساسها وصارمة فنضراتها اللي كثتملكهم الخوف
قاليها كي بقيتي شوية؟
حركات راسها بالايجاب قالت ليه شوية الحمد لله
قاليها شنو عندك ؟ شنو قالت ليك لحكيمة ؟
استغربات من كلامو كأنه عارف اشنو واقع وباللي جات عندها لحكيمة ..لاكن هي نكرات كلشي وقالت ليه ماكشفاتش عليا الحكيمة فقت راسي !
هز حاجبو قاليها متأكدة ماجاتش عندك لحكيمة !
كانت غتغلط وتعتارف لاكن احسن حضها كملات فكذبتها رقالت ليه لا ..بغاو يجيبوها قلت ليهم لا مايحتاجش
تحرك من بلاصتو حساب ليها غيمشي لاكن ضار على السرير وجلس قدامها على واحد الكرسي ربع يديه كيشوف فيها ويشوف فحالتها وفصيعها اللي كيترعد وهي كتكمد يديها مع بعض .
هز عنيه شاف فيها قاليها شفتك مابقيتيش داياها فجناح الحريم و حتى خيالك مابقاش كيبان فالقصر؟
بلعات ريقها كدور عينيها لاكن قوات تفسها وقالت ليه انا غثر ضيفة هنا ماعنديش الحق نهي ونآمر .. وجا الوقت فين كل غازي يقصد بلده .
حرك راو بالايجاب شد فاهه الفوقانية بسنانو قاليها ولاكن مزال حتى نصفيو كاع الحسابات ..باش كل واحد يبقا على خاطره
قاليها الى بغيتي ترجعي نتي وولدك لبلادكم غتنازلو كلياسيادتكم على قرطبة.. بلا صدع بلا مشاكل بلا ما نخلوضو الدم ..
استغربات قالت ليه شنو كتقصد؟
قاليها انا فيا ما يرجع قرطبة بزز منكم لا نتوما ولا الصليبين ..وبالقوة ..ولاكن ماباغيش الحرب تنوض بيني وبين ولدي..حبدا لو يتنازل عليها بخاطرو غيكون حسن .. واخا راني كندير مجهود باش نردها وقادر نستولى عليها ..ولاكن ولدي واقف ليا فالطريق ومابغيتش نصيب العلاقة بيناتنا فهمتي دابا؟
هز راسو ووقف قاليها ماحدي فالحياة حتى واحد فوالدي مغينال السلطنة ..لا يور ولا سلطان.. وجوج سلاطين من فصيلة وحدة عمرها كانت ولا غادي تكون.. السلطان الوحيد على الاندلس هوا انا ..
بقات كتشوف فيه مصدومة قالت ليه فاش أداك دابا يور حتى كتنتاقم منو بهادشي؟ هوا دار فيك التيقة ودار يدو فيدك علاش تقلبتي عليه ؟
قاليها بصرامة دنبو الوحيد طلع ولدي..ولد السلطان..هادا هوا الخطأ..السلطان كيبقا سلطان واولادو كيبقاو امراء..سواء ربيتو ولا تربا بعيد.. كيبقا ولدي ومن بعد موتي غيتحسب من الورثة ..فهمتي..
عطاها بضهرو غادي وقاليها حاولي معاه يبايعني بخاطرو ولا هاد المرة غنخدم معاه القوة ومغنعقلش عليه.ونتي حسابك هوا اللخر
واخا ماقادراش لا تهضر لا تتكلم ولا تجبد شي نقاش لاكن كتبرات ورسلات ليور ، خبروه باللي مريضة والحال تزاد عليها وفعلا داخت بيها الدنيا وبانت فوجهها ودخلات عليها الوقت الصعيبة ومشات الايام الزينة وراحة البال.
جا فالحال حضر فجناحها لقاها متكية ووجهها شاحب ومشا جلس حداها شد فيدها ..بقات ساهية كتشوف فيدو وتشوف فيدها وتبسمات قالت ليه كن حسابني غتجي تشد فيا بحال هاكا كن شحال هادي طلبت من الله نمرض..غير باش نشوف خوفك عليا واهتمامك بيا ..
باس يدها قاليها الله يفضك وينجيك ..انا شغاندير فهاد الدنيا بلا بيك ..
قالت ليه الوقت تبدلات اولدي..مابقيتيش غتعيش غير ليا وعلى قبلي..غتعيش لولادك حتى هما..انا دوري فالحياة سالا ..وهادا دور الواليدين..كيربيو ويجاهدو ونهار يوصلو ولادهم كيوفى اجلهم ..والى عاشو كيعيشو غير شي حاجة قليلة..وجا الدور عليه فين تربي وتجاهد وتوصل وليداتك ..هادي سنة الحياة اولدي
بقا ساكت محني على يدها وهي كتشوفيه وتبسمات قالت ليه يالاه نرجعو بحالنا ..الحمد لله اللي علينا درناه .. دقنا من كل حتجة شوية..من طعم النصر ودقنا من طعم الغدر ودقنا من طعم الخسارة..وكما كنتي كتقولي ديما ..الى كانت البلاد كتبقا تحت سيادة المسلمين انا مستاعد نتنازل على الحكم ..دابا البلاد فأيادي امنة ..ونتا عارف السلطان لاياش كيسعى ..وعارف الشغف فضم المناطق للاندلس.. وهوت السلطان الاول واكثر واحد كيجاهد باش يحافظ على هاد التوحد..وهاد المسيرة .. وعارف باللي هوا سلطان على الاندلس كلها والى بايعتيه فقرطبة غتكون بايعتي باك ماشي شي واحد غريب عليك..وباك مسلم وعازي ومجاهد ..نتا باقي صغير وباقية الحياة قدامك ..باقي غيجيو واحد الوقت تهز هاد المسؤولية على عاتقك كلها كما هازها باك.. ماعندكش مافر الى بقينا فالحياة ..وهادي هي الاصول هاكا كتقول..بايعو فقرطبة وخلينا نرجعو بحالنا ..خلينا نستاعلو هاد الفترة ونعيشو .. اما نهار تكبر كون على يقين غتكبر معاك المسؤولية..وغتلقا راسك بلاصة باك وديك الساعة غيكون واجب عليك تتحمل هاد الهم الكبير بوحدك ومغنلقاش معامن تقسمو ..اما دابا عندك معامن تقسمو وباقي فبداية الطريق
بعد حوار طويل هادئ وتبسيط الامور قاليها يور فاخر كلماته
قاليها انا تغدرت امي..تطعنت فضهري ..ديك الحرب بالنسبة ليا ماشي خسارة ..غدر
وهادشي اللي كتقولي خصو تفكير وشوية ديال الوقت..
قالت ليه انا مريضة منقدرش نصبر هنا ..كنحس براسي مريضة..البيعة مع باك احسن ليك من هاد التجرجير وهاد الدل..تفكر كلامك فاش قلتي ليا مكتهمنيش السلطة..المهم البلاد تبقا تحت سيادة المسلمين .. متخليهش هوس السلطة يمشي فدمك نتا انسان مسالم وانا وربيتك تربية احسن بزاف من تربية السلاطين لولادهم ..بايعو ورجع بحالك..اصلا هاد البيعة مغتقدل حتى حاجة..كتبقا ولد السلطان وهادشي بزز من كلشي وبزز من السلطان ومن نيفو ..وعزة نفسه..
تنهد ومسح على يدها قاليها يكون خير ..يدير الله الخير غير رتاحي
غطاها وباس راسها وخرج مشا لجناحو مهموم ..عيا يفكر ويهدم ويبني وبين كل مهلة ومهلة يصلي صلاة استخارة حتى مابقاش عاقل شحال من صلاة صلى
اعتاكف ثلاتة ايام وفهاد الثلت ايام حتى واحد ماداق طعم الراحة ..كلها وهمو..روح الندى همها فحملها اللي كرهها فالزواج حتى ندمات اشد الندم عاد بان ليها ولدها ووجهه خصوصا فاش تصلحات الامور بيناتهم ورجع حنين معها..ام يور ضارت بيه الدنيا ماعرف فين يعطي بالراس وتاجه للقبلة كيطلب من الله صباح وليل ينور ليه الطريق..
ويمامة بكات اللي عمرها بكاتو طول حياتها على قرار زواجهها ولا قرار بان من بعد داك القرار الملعون ونهار وليل كطيح وتنوض فالبيت بوحدها وغير متعة اللي كطل عليها تواسيها مرة مرة
اما الاصيل حكياتو حكاية..عقلو غيخرج مع ديك الرؤية اللي شاف وعروق راسو تشربكو وتزيرو وحتى الشهية مشات ليه والنعاس طار ليه مابقاش قادر يفكر فشي حاجة من غير داكشي اللي شاف واخا عيا يحاول يشتت تفكثرو ويشغلو بحاجة اخرى لاكن والو حتى كيلقا فديك الدوامة كيفكر .
شرقات شمس اليوم الرابع وشي مشاف شي ..ومن غير الاحداث اللي وقعات كتاب المكتوب وتصرف فداك النهار بالضبط.غير احوال القصر سفاها على علاها وكانت الضحية وحدة من اللي عمرها فكرات تموت صغيرة ..وياريت ما خرجات ما ضرجات داك النهار
ماقال ليها عقلها والجو صافي مبرد فداك الصباح والشمسية باردة قالت نخرج نشم الهواء نتنفس شوية على الله ترجع فيا الروح .. خرجات من جناحها بقفطانها الابيض والدفيرة جنب ووجهها اصفر بقلة النعاس والبكا وصادفات فطريقها متعة هازة ولدها وغير شافتا خرجات فرحات ليها وقالت
الحمد لله على سلامتك.. ايوا هاكا خرجي شوية يضرب فيك البرد..راه اللي دارها الله هي اللي تكون
تنهدات يمامة قالت ليها شبحان الله امتعة من ديما كنتي كتواسيني.. واش مكانتش كتجيك الغيرة مني ؟ خصوصا دابا مللي ولدتي ولي العهد
ضحكات متعة قالت ليها علاش غنغير منك؟ انا اصلا عمرني تخيلت نكون ام ولي العهد ولا حتى نكون اميرة ..ومكنسعاش ليها اصلا
قالت ليها يمامة وهما خارجين كيتمشاو وعلاش هاد الشؤم هادا كله
قالت ليها متعة حيت انا ماشي بحالك..كل واحد كيسعى حسب اصله وفصله..انا غير بنت باب الله تولدت فالفقر وعشت فيه وكان كل همي نلبس وناكل وصافي.. فاش لقيت داكشي اللي باش كنحلم قنعت ..اما نتي تولدتي اميرة وعشتي اميرة ..عادي تسعاي باش تكوني اميرة
تنهدات يمامة قالت ليها المضاهر خداعة امتعة .. حياتي ماشي كما كتشوفي نتي..حتى انا عشت البؤس واخا اميرة..ولاكن نتي كنشوفك جالسة مكتجتاهديش باش ديري بلاصتك ومكانتك واخا تعطاتك فرصة دهبية
قالت ليها متعة منقدرش نخشي راسي بين الريوس الكبار ..انا اختي كنخاف كنخاف يقتلوني ولا يحلفو فيا..الاهم نصقر واللي دارها الله هي اللي كاينة
جلسو على واحد الكرسي طويل من الحديد فالحديقة وكمشات يمامة يديها مع بعض على كتافها قالت ليها اااح اربي..سعداتك امتعة كنحسدك على هاد النفس اللي عطاك الله ..انا منقدرش نكون بحالك..
تبسمات يمامة مع اصيل الصغير اللي فيد متعة وباست يدو قالت ليها منقدرش امتعة ..انا الى تهمشت كنمرض ..صعيب تفهميني حيت انا ونتي مكنتشابهوش.. انا منقدرش حتى نتنفس ..كنتخنق وكنبقا نتحرق.. منكدبش عليك نقوليك كنسى دغيا ولا كنسامح دغيا ..ولا كنبرد بكلمة ولا جوج..انا نفسي طاغية عليا لدرجة كنكره هاد النفس حيت هي سبابي فعدابي.. نفسي مكترضاش امتعة مكترضاش وصعيب ترضى وكترجع ليا تعدبني وكتهدني..صعيب عليا نوصف ليك ونشرح ليك ..انا كنفضل نموت على الخضوع لشي واحد ماقابلاش عليه وماراضياش عليه
ضحكات متعة قالت ليها سبحان الله كل واحد كيف داير
قالت ليها يمامة حمدي الله على النعمة اللي نتي فيها ..ماكرهتش كن كنت بحالك
وهما كيهضرو دازت واحد اللفعة كحلة من الربيع بين رجليهم بلا ميحسو بيها وطلعات راسها بين القفطان كتشم دم الحيض ومع الحركة دالرجل عضاتها فالفخد عضة قاتلة حتى غوتات لربي اللي خلقها وكانت غطيح الولد لولا يمامة شداتو بالزربة وتخلعات من الغوتة وناضت وقفات شاداه معنقاه وكتشوف فمتعة شادة فخدها كتألم وقالت ليها عضاتني شي حاجة
قالت متعة وكأنها كانت حاسة بشنو غيوقع ليها فداك النهار وكان كلامها فالحوار ملخص على شغويقع ليها بلا متحس وكأن الموت علماتها قبل ماتجي وبلا متحس قالت ليها سبأ ردي البال لولدي..رديه البال انا مأمناك عليه وماعنديش من غيرك.. لا ختي لا مي لا حتى واحد..
بتوثر قالت ليها يمامة متخافيش عليه انا غنقابلو حتى تبراي ..انا غنقابلو ليك كوني هانية
جروها العبيد فاش دخلات عندها الحكيمة بغاو يخرجوها ومتعة هازة يدها كتغوت وتشوف فيها ويمامة كتعلق بعينيها فيها
قالت ليها متعة وهما كيجرو يمامة. مافرطيش اسبأ… ماتفرطيش منحسمش ليك الى فرطتي ..منسمحش ليك الى تعدب ولدي وسط وولادكم… متفرطيش اسبأ انا خليت ليك ولدي
مع هاد الكلام الاخير حضر الامير فور ما خبروه بشنو وقع وشاف على عينيه وسمع على ودنيه ودخل يشوف متعة وبقا لداخل ويمامة على برا مخلوعة غادية جايا وكتراري بالولد اللي قلبو غيخرج بالبكا ..
حضرات ديك الساعة شادية لبيت متعة كتسول على شنو واقع لقات الدنيا مقلوبة والولد كيغوت وقالت ليها
شنو واقع مالها متعة
قالت يمامة ويديها كيترعدو والولد كيبكي ليها
عضها حنش
قالت ليها شادية عطيني الولد نسكتو اريه
هرباتو يمامة قالت ليها لا خليه انا غنشدو
قالت ليها شادية انا غنعرف نسكتو غير اريه
قالت ليها يمامة لا اختي غير خليه مغنعطيهش ليك
تنهدات شادية كتشوف فيها قالت ليها الى ماتقتيش فيا بقاي حادايا..الولد غيموت بالبكى مسكين انا غنرضعو غيسكت
بقات شادية كتسايس حتى سلاتو من يدها بشوية شداتو تخبات بيه فواحد البيت جنب داك البيت ويمامة تابعاها حاضياها وجبدات البزولة بغات ترضعو لاكن مابغات يشدها وبقا كيغوت حتى سخف بالبكا وسكت كينين وحطات ليه شادية البزولة فمو رضع بكثرة البكا والشحفة ونعس
بقاو كيطلو بعينيهم مخلوعين من الباب بان ليهم الامير جالس جنب السرير حادر راسو بأسى وهز الغطا غطا وجهه متعة
دارت شادية يديها على فمها مصدومة وحلات يمامة فمها وطاحو دموعهم حجر وشافو فالولد بجوجهم وتبعادو كل وحدة فين عطات وجهها كتبكي ماقدروش يصدقو ان متعة ماتت وخلات ولدها رضيع
مشات مسكينة عند الله وخلات ولدها صغير كيبكي وراها .. موتها صدم كاع البنات والخدم والعبيد .. واكثر وحدة حزنات عليها هي يمامة ..من اول نهار ليهم وهما صحابات حتى لاخر نهار ..
دفنوها ودارو ليها الصداقة وتفرقات الدعوة وبالليل نفارد الامير فجناحو شاد ولدو فيدو كيشوف فيه بأسى وهوا كيحل عينيه ويلعلب بيديه الصغيرة
باش جبهتو وسد عينيه مطولا حتى سمع الباب تحل ودخل عبد حادر راسو قاليه مولاي
هبطات عينيها كتشوف فيه ويديها كيترعدو بالخلعة ماعمرها توقعات تشد طفل صغير تربيه ولا تكون ام ليه وعمرها تخيلات راسها أم وبين ليلة ونهار كتولي ام فجأة
بقات ساكتة وبلعات ريقها قالت ليه انا غندير ما فجهدي باش نطبق وصية متعة الله يرحمها .. غندير جهدي واكثر
دار يديه وراه وهز راسو كيشوف فيها مطولا وقاليها وجدي راسك غنمشيو من هنا
قالت ليه باستغراب فين غنمشيو؟
قاليها غنمشيو لبلادنا فالمغرب..
هبطات راسها قالت ليه واخا وخرجات معنقة اصيل الصغير وخرج وراها الامير مشا لجناح السلطان وفيدو ورقة .دخل لقاها جالس كيقرا القرآن مربع ومشا وقف قدامو فصمت حتى سد السلطان القرآن وتنهد وطلق رجليه جلس نيشان عاد جلس جنبو يور وحط ليه الورقة قاليه
هادي البيعة ديالي على قرطبة .. انا كنبايعك سلطان عليها
تصدم السلطان من هاد القرار بقا غير كيشوف فيه متوقعش ابدا ولو شوية يبايعو وكان متوقع يدخل معاه فصراعات لاكن وقع ما لم يكن فالحسبان ، حاول السلطان يستافزو باش يخرج اسوء مافيه ويشوف شنو فراسو وقاليه
لو كنتي سلطان حقيقي ماتبايعنيش وتموت على بلادك .. ولاكن واضح باللي ماتستاحقش تكون سلطان اصلا
بقا يور ساكت كيشوف فيه ببرود مطولا وقاليه
قول عليا اللي بغيتي .. المهم انا راجع بحالي احسن ليا وللجميع ..اللي كيستاحق السلطة غادي يبان مع الايام
ناض بغا يمشي وناض السلطان وقف كيشوف فيه بغيض قاليه ماكنتش متوقع منك تنازل بهاد السهولة !! خيبتيي ضني فيك
شكت يور مطولا وقاليه واش ماشي حسن ما تنوض الحرب بيناتنا وتفكك البلاد كما سبق وقع لينا حتى خسرنا قرطبة؟
واش ماشي احسن نتنازلو الى كان التنازل فصالح هاد القوم وهاد البلاد؟
مكنسعاش لمصالحي الشخصية كنسعى للحفاض على هاد الرسالة .. البيعة ديالي فصالح الشعب وفصالح لاستمرارية ..المهم من هاد السلطة الحفاض على التوحد ونشر الاسلام وهادا هوا الهدف ديالي من اللول..اما السلطة ماحاطهاش من اولوياتي . مكنحاربش على قبل السلطة وانما عاى قبل ديني امولاي
حدر ليه راسو بهدوء وخرج من جناحو ماخلاش ليه فين يزيد وتأكد السلطان من كلام روح الندى اللي سبق ليها وقالت ليه باللي مكيسعاش للسلطة ..ماعندوش هدف يكون سلطان باش يمشي متكبر فالارض وانما هدفه فنشر الاسلام اولى وجات الفرصة فين برهن ليه يور وزاد بين ليه باللي تيقته فيه كبيرة بالبيعة ديالو ليه وكيشوفو مرتبة اللي السلطان براسو مكانش متوقعها عند ولده .
دخل السلطان بلا صوت بلا صدع الحضور لجناح روح الندى لقاها ناعسة وجهها صفر وحداها طاس نحاسي كترد فيه والوصيفات جالسين فجنابها ..
غير دخل وقفو حدرو الراس خرجو وتقدم كيشوف فداك الطاس ويشوف فيها ناعسة شاحبة والشك غيقتلو كيربط بين الرؤية والحقيقة كيلقاها هي نفسها لاكن ماقادرش يصدق نفسه وكيتمنى يفوق من هاد الكابوس.حلات عينيها بتعب ويدها على فمها بغات ترد ..بدات تفتف بيدها حتى حط ليها الطاس قدامها ردات فيه وهزات راسها كتنفس شافت فيه وتصدمات بقات ساكتة
حيد داك الطاس بعدو وقاليها بتشكيك
مالكي شنو كيضرك ؟
دارت منديل على فمها قالت ليه ضربني البرد وزيد الفقصة ديال هاد السفر والمشاكيل
قاليها هادي ماشي قضية مشاكيل ..هاد الرضان وهاد الحالة فكراتني فوحم شهرزاد و شامة واسمهان
بلعات ريقها بزز قالت ليه شنو بغيتي تقصد؟
قاليها هادي حالة وحدة حاملة
دخل عليهم يور فديك اللحضة يطمن عليها لقاه معاها وحدر عينيه وجلس جنبها باس يدها وقاليها
كي بقيتي ؟ شوية
قالت ليه الحمد لله كنشرب العشوب اولدي
قاليها السلطان غتجي الحكيمة تفحصك نشوفو شنو عندك بالضبط
قاليها يور بصح خاصنا نعرفو شنو كليتي ..
قالت ليه انا باغا غير نرتاح ماخاصني لا طبيب لا طبيبة خاصني الراحة ..هادشي اللي خصني
باس يور يدها وقاليها غنأجلو السفر شوية حتى تبراي
شدات فيدو زيرات عليه قالت ليه لالا قادرة نسافر ..اصلا غنسافر فالعربة الكبيرة وغنسافر ناعسة مكاين لاش تأجلو
ربع السلطان يديه هز راسو وقاليها مكاين مشية اروح الندى هاد الساعة حتى تصحي وتوقفي على رجليك .. الله يشافي
خرج خلاها متبعة ليه العين بالخلعة ..شدات فيد يور وقالت ليه شنو درتي ؟ بايعتيه
حرك راسو بالايجاب قاليها مابقا لينا منديرو هنا الى كنتي قادرة تسافري نسافرو غدا فالصباح
قالت ليه نسافرو عدا الصباح ..انا مليت من الجلسة هنا
حرك راسو بالايجاب وبغا ينوض لاكن شدات فيدو قالت ليه ولدك شخبارو .. ماقدرتش حتى نوض نشوف. اش واقع
طبطب على يدها قاليها فالحفظ والصون غير رتاحي انا مكلف بيه
تبسمات قالت ليه جيبو ليا نشوفو
قاليها رتاحي متفكري فحتى حاجة ..مزال تشوفيه وتلعبي معاه
تبسم وناض خلاها متكية مريضة تقول كلات السم . مهدودة وماقدراتش تصبر وغير ناعسة
بداو يجمعو حوايجهم وكل واحد فين مركن .. كيطوي كموستو
عقداتها مسعودة كتنهد وقالت لشادية
واهيا ناري توحشت القبيلة ..توحشت جيراني وحبابي ..توحشت دويرتي
قالت ليها شادية حتى انا امي توحشت البلاد والقبيلة ..توحشت صحاباتي وحتى ديك السرحة اللي ماكنت حاملة توحشتها
شافت فيامنة وهي مركنة مابغاتش تمشي وعاطياها للبكى والنحيط حتى شيرات عليها مسعودة قالت ليها نوضي الله ينوض جلدك ..جمعي شراوطك ولا غنوض نشتف عليك ..
سدات يمامة الصندوق اللخر من صنادقها وجمعات حوايجها وحوايج الاصيل الصغير وحطات كلشي جاهز ومشات هزاتو من فوق الفراش خرجات بيه كتقلب على شادية حتى وصلات لبيتها ودخلات عليهم لقاتهم كيطويو حوايجهم .. بقات كتشوف بنص عين وترمش فمسعودة وقالت لشادية بارتباك
الى بغيتي ترضعيه مارضعش مسكين
ميعات مسعودة ودورات وجهها هازة نيفها وشادية كتشوف فيها بنص عين ومدات يديها قالت ليها اريه
شد اصيل الصغير البزولة كيرضع وبدا يضحك مع يمامة ويمد يديه ليها كيلعب وكل شوية يشوف فيها ويتخبا فبزولة شادية حتى بدات كضحك معاه وشدات ليه فيدو باستها ..تبسمات شادية ومسحات على راسو بشوية ورضعاتو بلا متهضر وحدة مع لخرى حتى نعس وناضت يمامة هزاتو وقالت ليها شكرا
تعرضات طريقها يمامة ماخلاتهاش تاخدو منها واظطرات عبدية تمشي تشكي بيها للامير لاكن صدمها برده وقاليها خليه عندها انا عطيتو ليها وهي قادرة على تربيتو
قالت ليه عبدية البنت مامجربة ولاد ولا عمرها ولدات كيف غدير تربيه
قاليها خليها الى ماقدراتش ديك الساعة عندكم الحق تاخدوه وترعاوه بنفسكم
بغات تهضر عبدية لاكن وقفها بيدو قاليها خلي. هادشي كما هوا ادادا عبدية مانقصني صدع ولا هم .. وجدو راسكم الصباح مع الفجر غتقلع القافلة
تنهدات عبدية خرجات والصباح مع الفجر كل واحد هز رحالو وحوايجو ووجد راسو للسفر قبل ما تشرق الشمس .
خرج السلطان فداك الصباح واخا مكانش راضي على ديك المشية لاكن مابغاش يخلق المشاكل من والو وهوا اللي فالاصل طلب وتشرط ولباو ليه جميع الشروط مخلاو ليه مايقول.
خرج للساحة لقا العربة الكبيرة واجدة فين غتركب روح الندى وتنعس ولقا جميع الخدم والعبيد اللي جاو معاهم جاهزين للسفر ..شادية ومها ويامنة فعربة بوحدهم شي داخل شي خارج كيوجد راسو والعبيد فعربة معرية عامرة ماكلة وقوت مجموعين فعربات مصافين و عاد صحاب يور الفرسان اللي سبق ولتاحقو بيهم من تارودانت كل واحد راكب الخيل ديالو استعدادا لهاد السفر الطويل.
تنهد السلطان بعمق وقرب من عربة شادية ومها خرجو منها كاملين حادرين الراس ..تبسم ومسح على راس حفيدته وباس يدها وتلفت هز راسو فالسما ومشا لعربة صغيرة فيها الوصيفات ويمامة جالسة شادة اصيل الصغير
تصدمات فاش شافتو من بين الاتواب وناضت خرجات حدرات راسها وحتى هوت استغرب من رحيلها واكثر واحد طاحت عليه السما فاش شافها هوا حكيم اللي كان مرافقالسلطان فداك الصباح
عرا على وجهه اصيل الصغير وباس يدو ودعا ليه حتى هوا بالبركة وشاف فيمامة قاليها غتمشي معاهم ؟
قالت ليه الى سمحتي امولاي..حيتالمرحومة وصاتني عليه وانا اللي مكلفة برعياته
شاف فيه حكيم بنص عين حادر راسو كيتسناه يمنعها ولا يقولشي كلمة لاكن خب ضنه فاش قاليها السلطان حفيدي امانة فرقبتك اسبأ..
باست يدو وطلعات فالعربة مرتاحة اخيرا بل غطق من الفرحة وتحمسات للسفر اكثر من اي واحد. بركم حكيم وقال للسلطان مولاي ..وقرارك اللي خديتي فحقي وحقها
قاليه السلطان نسا القرار وكل مافات .. واش مبانش ليك باللي حفيدي خصو ام بحال سبأ..واعية وقارية ومتعلمة ..وفوق هادشي دكية
بقا حكيم ساكت مزادش نطق وتبخرات احلامه فالهواء الطلق..بان ليه يور جاي جاهز للسفر وجنبه روح الندى شادين فيها الوصيفات كتقول غير امتى نخوي البلاد..
شافت فالاصيل بنصعين ووقفات و رايور اللي وقف يودع الاصيل وحدر ليه راسو قاليه مولاي..سمح ليناالى كنا تقال على القلب.
تبسم السلطان وفتح ليه يديه عنقه قاليه بلعكس اولدي..نعم الاولاد والترابي..طريق السلامة والله يكون معاك نتا والعشيرة ديالك
تبسم الامير قاليه شكرا امولاي..
رجع باللور ركب على العود. الكحل ديالو وضرب برجلو غادي كيجري على طول القافلة يشوفشنو ناقص شنو زايد وبقات روح الندى مهبطة عينها كتشوف فالارض وقالت ليه خلينا ليك الراحة امولاي..سمح لينا على كلشي الله يعاون
كنتمنى متخيبيش ضني فيك .. منتمنى ترجع المياه لمجاريها شي يوم
بقات ساكتة كترمش فالارض ومشات ركبات عربتها وبعدات التوب لقاتو واقف كيشوف فيها وبقا هاكاك حتى قلعات القافلة وبداو الفرسان كيكبرو ويسميو الله بصوت واحد وهما خارجين من القصر حتى بقات اخر عربة غادية هي اللخرة هازة القش والتبن ولعلف للماشية لحق عليها الطباخ محبوب يامنة والرزمة على ضهرو كيجري طلع فيها وتكمش جنب العبيد
مع الضهر والقافلة فطريقها وصل مرسول لقاضي لقضا وكان مرسول صادم بالنسبة ليه بحيث كانت كتوضح ليه الامور وخبراتو بغيابها وعدم الرجوع والرحيل الى الابد وبلا ميحاول يبحث عليها ولا يوصل ليها ..جاتو صدمة على قلبه ماقدرش يتحملها وطاح فبلاصتو مرض وتأزم ولزم الفراش وفيديه الرسالة مابغاش يطلق منها ..كانت صدمة قوية على قلبه جبداتو شهر فالفراش ونهار على نهار كتساء حالته حتى صبح واحد الصباح مفارق الحياة من شدة الحزن والاسى .
مرت سنة
فالقلعة نازل محمد اصيل الصغير كيجري وتابعاه يمامة من اللور كتعيط حتى خرج فالامير يور طالع مع الدروج شدو هزو فالسما قاليه فين هارب؟ فين كتجري ؟
وقفات يمامة كضحك قالت ليه من الصباح وانا كنجري موراه سخفني
حلات يديها عنقاتو وقالت ليه كي داز الصباح فالموسم ؟
قاليها مزيان الحمد لله .. كي صبحتي ؟
قالت ليه مزيان كنحمدو الله ونشكروه
قاليها جيت نطل عليك ونخرج ..اصيل هاهوا معاك
خرج مع الباب غادي وتصادف مع شادية جاية ومعاها جوج من الخدم فجنابها ..اشمنك يا لباس واشمنك يا مجوهرات ..فيدها ترابي صغير كدور وتسارا بيه وغير شافتو تبسمات وقالت ليه مولاي.. نهارك مبروك
ذو التيجان الجزء 12
محتوى القصة
خرج ولي العهد راشقة ليه من جناحو هاز راسو عوال يخرج للصيد بحال العادة وهاد المرة حتى السلطان بغا يصيد ويشوف مهارات سمو الامير فالصيد.. تافقو يخرجو بجوج وبحال العادة لبس ملابسه المعروفة واتاجه لبيت متعة هي اللولة يصبح على ولدو عاد يمشي للصيد . وصل لبيتها ودفع الباب دخل مبسم لقاها جالسة كطوي ليه حوايجو وهوا فالارض فوق توب ناعم كيلعب وتقلب ويتشقلب ..وقفات فالحين حدرات راسها مبسمة قالت ليه مولاي..شرفتينا بزيارتك
تحنا هز ولدو اللي مزال ماشاد راسو مزيان باسو وشد ليه حناكو طبيبيزة وكان مشاء الله تقيل الوزن وطبيبيز والثنيات فيديه ورجليه وعنقو مكيبانش. باين عليه الاهتمام والرعاية وهادشي كيعجب لسمو الامير ويفرحو ..تلفت. جهة متعة قاليها خصكم شي حاجة ؟
قالت ليه خصنا راحة بالك امولاي..
سرح عينيه فجناحها قاليها مرتاحة ؟
قالت الحمد لله مرتاحة وماخصني حتى خير كاين الوصيفات اللي كيعاونوني فرعاية الاصيل الصغير وحتى لاللة روح الندى مامخلياناش محتاجين
تبسم قاليها خرجييه شوية لبرا يشم لهواء.. ماتبقايش نهار كله جالسة فهاد البيت
قالت ليه واخا مولاي غير تعاشا العشية ونخرجو للحديقة
باس خدو وعطاه ليها قاليها الله المعين
خرج من عندها ومشا نيشان للصيد مع السلطان .
استغلت روح الندى غيابهم بجوج وناضت وجدات راسها ولبسات سلهامها وخرجات خلسة مع عبدية لاكن لمحات خيالها عين حكيم اللي كان فبرج من ابراج القصر كيراقب الاجراس ولمحها غادية لاكن ماعرفش شكون تكون وكون هاديك اللي ملوية فالملحة ومعاها مرى غليضة ركبو عربة ومشاو . ماتخيلش تكون روح الندى ومجاتش على بالو بالمرة واول وحدة شك فيها بلا تردد هي يمامة..نزل والشك كياكل فيه ويقول مع راسو ماشي خير وجرات فيه وانما عندها اهداف والتضحية اللي دارت ماشي على قبل الاسلام وانما عندها مصلحة وكتسعى لما اكثر..للحضة دخل الخوف قلب حكيم وخاف تكون مخطط لشي حاجة خايبة والاكثر تخوفا هوا تضحيتها اللي ضحات وذكائها وبهائها اللي فاق الحدود وخصوصا التضحية اللي مغتكون الا على شي دمار شامل من الاول حتى للخر ويخوفو يكون تأخر ولا فات الفوت وعلاش من الاول ماحطوش عليها العين وصدقوها .
بقا نازل كيجري مع الدروج وعقلو غيوقف باغي يلحق الادى وخايف يكون تعطل وكيلوم غبائهم وتقتهم واللي داز حداه كيدفعو ويدوز ومشا نيشان يقطع الشك باليقين وقصد جناحها فرع الباب عليه وهوا متأكد مغيلقاهاش تما لاكن جات الصدمة الكبيرة فاش خلعها وهي كتقيس القفاطن اللي جابو ليها وكانت شبه عارية بوحدها ويالاه نوات تلبس لاكن بسرعة مع الخلعة حطات القفطان قدامها على جسها قبل ميشوف شي حاجة وخرجات عينيها فيه مخلوعة ووجها اصفر كتشوف فيه وجهه اصفر اكثر منها وصدرو كينهج وعينيه مطرطقين مصدوم متوقعش يلقاها ..اما كساتها ولا عراتها ولا الوضعية اللي هي فيها فماقدرش حتى ينتابه ليها من شدة الصدمة حتى غوتات من بلاصتها بجنون قالت ليه وهي كترعد عليه بالغضب
واش نتا حمق؟!!! واش خرج لباباك العقل
تقول عطاتو بتسرفيقة رداتو للوعي ديالو خرجاتو من دوامة شكوكو وانتابه لراسو وحدر عينيها فالارض وعطاها بالضهر كيتفتف فالهضرة ماكيشوف لا يمين لا يسار
خركات عليها واحد القميص خفيف بالزربة خرجات راسها من عنقو المزير بالغدايد حتى تطراسا ليها فحناكها ومشات قصداتو وقفات قدامو كتغوت قائلة
الى ماشكيت بيك للسلطان هاااااوجهي دفل عليه باش تعلم تدخل على حرمة لقلب جناحها
قاليها كيتفتف ويتلعتم ويشوف فلارض
سمحي ليا انا .. ماشي. ..ماا
غوتات بغضب حتى كان وجهها غيطرطق وعرقوها طلو قالت ليه خرج عليااااا من بيتي ..خرج عليااا غنشكي بيك للسلطااان
خرج تالف كيدور بجنابو خلاها كترعد ماحملاتش الوضع اللي تحطات فيه وحسات بالحكرة لاول مرة وكانت اصلا هازة فقلبها من الفطور وجات النقطة اللي تفيض الكاس بدات كتبكي وجلسات هبطات راسها على رجليها وعطاتها للبكى
خرج حكيم للوسعة المعرفة اللي وسط القصر مع الدخلة ديالو من الباب الكبيرة ثلاتة ممرات واحد مقابل معاه وواحد على ليمن واحد على ليسر
اللي على ليمن كيدي لجناح الحريم وقسم الادارة الى اخرج واللي على ليمن كيدي لجناح الامراء والسلطان ..بقا بين دوك الممرات غادي جاي كيلعن اللحضة اللي فكر يدخل عندها واللحضة اللي شك فيها وغاضب على نفسه حتى بانت ليه جاية من جهة ليمن كتزرب لابسة بلغة كحلة بالصم اصفر وقفطان كحل محلولمن الجنابحت للركب بلدي مطروز وهازاه للجنب وغادية كتتحلف مشافتش فجنابها، شافها قاطعة قدامو لجهة جناح السلطان ومشا تبعها وقفها وووقفات كتشوف فيه مخرجة عينيها كتسناه يعطيها مبرر لاكن مللي مالقا ميقول ليها علاش دخل عليها زادت فيه وكملات طريقها وتبعها وقفها المرة الثانية قاليها السلطان خرج للصيد وغيتعطل
قالت ليه ايوا نمشي عند سمو الامير
قاليها سمو الامير مشا مع السلطان وماكاينينش ..انا ماقلتش ليك هادشي حيت مابغيتكش تمشي ولاكن حيت ماقصدت فيها حت حاجة
قالت ليه دخلتي عليا وسط جناحي واش عارف الدنب اللي درتي؟ والعقوبة ديال هادشي؟
بقا كيتمتم مالقا ميقول فاللخر قاليها اه عارف ولاكن نتي مر حرة دابا كان الدنب فيكون كبير كن كنتي من حريم السلطان ولا ن حريم الامير
قاليت ليه مكاينش فرق كنبقى حرمة وكتحتارم والى دخلتي عليا ليوم غدا يدخل عليا الجيش كله وانا تحت الحماية ديال السلطان وماتنساش عاطيني الوسام وبوحدي ونتا براسك موحال واش عطاه ليك
قاليها خلينا دابا من الاوسمة وهاد الهضرة كلها انا غلطت كنعتاذر عمرها تتعاود
قالت ليه دم وجهي مقابلش اعتدارك انا منقدرش نبقا مع واحد دخل عليا كندبل فمكان واحد .. منقدرش نبقا نشوف وجهه ويشوفني كل مرة ونتفكر شنو دار ليا
قاليها والله ماكنت واعي وتعمات لبا البصيرة وماعرفت حتى شنو كنتي كديري
قالت ماشي شغلي انا ونتا واحد فينا يغبر دلقوشو من هاد القصر مانشوفك ماشتوفني وغيجي السلطان غنقولها ليه
مشات كتنكر وجهها احمر وبقا هوا كيسوط غادي جاي وخرج غينفاجر للحديقة يتنفس
لحسن حظ روح الندى مانتابه حتى واحد لغيابها وحكيم مرض بسبب التسرع ديالو مابقاش كاع كيسول ويخمم فشكون خرج خلسة رجع كيفكر فشنو غيوقع ليه الى يمامة شكات بيه للسلطان وكيفاش كتفك حريرتو معاها وهي جلدة مانفعات معاها حزارة وغادي تغرقو ..فاخر يامو وشحال وهوا فالقصر عمر شي واحد خلاه يعيش الرعب حتى جات نص خبزة وخلاتو يفكر ويخرج عرقو باش يتفاك معاها وهز ليها هم الدنيا والاخرة .
اما روح الندى منعات منها ووصلات للرياض في امن وسلام ودخلات لاحت عليها الحاية ومشات نيشان طلعات لبيتها وطلعات للسطح اللي فوقو فين نعتات ليها لاللة عيشة حتى وقفات عليه فا جآتو وناض وقف فالبلاصة تقول شاف الجنة ونعيمها .. بقات كتشوف فيه وضحكات مشات عنقاتو وعنقها بقوة وقاليها بلهفة
مغنخليكش تمشي هاد المرة ..غتبقاي معايا واللي بغا يوقع يوقع
قالت ليه كضحك لواه راه غير تشطنا وصافي ماقدرتش نجي ولاكن قريب غنجي ونجلس معاك مدة طويلة
شد وجهها قاليها بصح؟!! وفين غبتي عليا لا خبار لا مرسول ..توحشتك توحشت ريحتك وتوحشت صوتك وكلامك وهاد الوجه المنور
قالت ليه كضحك صافي المهم هانا جيت وماخصنيش نتعطل..انا مخايفاش على راسي خايفة عليك ايحي ..اما انا قادة بشغلي..
قاليها انا مابقيت كنخاف من حتى واحد ..ومن حتى خاجة ..اللي بغا يوقع يوقع المهم مغنتفرقش عليك
نزلات هي وياه كضحك وعبدية جالسة لتحت غادية جايا غتاكل جنابها ولاللة عيشة واقفة حداها كتقوليها
يهديك الله الاللة عبدية جلسي غير تهناي
قالت ليها عبدية بتوثر منقدرش اعيشة..راه كن يسيق الامير لخبار لهادشي راه يقطع لينا روسنا.. مايعقل لا عليا لا عليها وهاد الوقت اللي جينا فيه ماشي وقت الخروج من القصر.. كن تسنات بعدا حتى طيح الضلمة..يقدر يرجع الامير من الصيد يسول فيها مايلقاهاش يقلب الدنيا ونمشيو فيها كاملين بينا وانا مابغيتش نخون التق ديالو عمرو يرجع يشوف فوجهي
تنهدات لاللة عيشة قالت ليها واغير جلسي بعدا ما عند الخلعة ما تفديك دابا
مزال ماكملات كلامها رجعات روح الندى هابطة وكتلبس حايكها بالزربة قالت ليها يالاه نمشيو خرجات عبدية كتجري من بعد ما ردات الروح وما تهناو حتى فاتو الرياض وقالت ليها
عاد رجعات الروح اروح الندى .. عمرني نعاود نعتب بابالقصر بغيني ولا كرهيني
دارت الحايك على وجهها وقلباتو للجهة لاخرى رجعو للقصر بلا ميفطن بيهم ختى واحد ومن موراهم رجع السلطان ولقا حكيم واقف مستقبلو وحاني راسو ..لاحظ السلطان لون وجهه وتعابيره لعريبة وشاف فيه مطولا ودخل ماقاليه والو .. نزل وراه سمو الامير كيتفض يديه حدر ليه حكيم راسو واستأذن من السلطان ومشا وبقا حكيم غادي جنب السلطان حتى قاليه اشنو تما احكيم خبار الخير
قاليه حكيم خاصني نقول ليك شي حاجة مهمة امولاي
رفع السلطان راسو ومشا دخل جناحو وتبعو حكيم وقف قدامو حادر راسو والعبيد ضايرين بالسلطان من كل جهة كيحيدو ليه حوايجو باش يستاحم وفنفس الوقت كيسمع لحيم اللي قاليه بكل اسى ..
كنت امولاي فالبرج كنراقب حبال الاجراس وشفت جوج عيالات ملتمات وحدة رقيقة وحدة غليضة خارجين من باب لخيول لقديم وكيتختلو وركبو واحد العربة ومشاو ..
استغرب السلطان قاليه شكون هادو احكيم ماتقوليش ماقدرتيش تعرف شكون؟!!
قاليه حكيم بأسى كنت فالبرج ومشاو وانا مزال لفوق منلحقش نشدهم ..ولاكن مشا شكي لسبأ نيشان ماعرفتش علاش شكيت فيها لدرجة تيقنت تكون هي ..ومشيت باش نقطع الشك باليقين وانا فحالة جنون من اللي شفت ومن الخوف من افعالها اللي سبق وخدماتهم فقتل التوام جن جنوني بقاو الافكار كيتضاربو فراسي ومشيت فرعت عليها الباب على اساس منلقاهاش تما ونرتاح من شكي لاكن مع الاسف وقع اللي ماكنتش متوقع يوقع ..لقيتها وكانت فحالة شبه عارية واخا مارديتش الباب كاع للوضعية ومن الصدمة تلهبطات لي الافكار مع صورة وجهها والمشكل هوا طحت فدنب ما مقصودش..ودخلت على حرمة فقلب جناحها بلا منقصد
وقف السلطان رافع راسو بصرامة قاليه غتجيب ليا هاد الجوج حييني ولا ميتين ..من بعد نشوفو قصة الحرمة ..الجواسيس عندي فقصري واش كتسنا يوقع ليا ما وقع لويسيوس وخوه ؟!!
حدر حكيم راسو قاليه غنلقاهم امولاي كن هاني من هاد الناحية وغادي نجيبهم حت لبين يديك .
تسمع الدقان فالباب وتفتح دخل عبد قال للسلطان مولاي ..بنت كتقول اسمها يمامة بغات تشوفك
شار ليه السلطان بصبعو تدخل وهوا فحالة من غير الحالة اللي جا بيها من الصيد وتشطن بسبب اللي سمع من حكيم وتقلقات راحتو . وقفات يمامة قدامو كدور فعينيها شافت حجبانو معقودين وحكيم حادر راسو فهمات انه وصلها ليه .. هبطات راسها بحزن شكات عليه ما جرا ليها خلاها حتى سالات وقاليها شنو كطلبي فداء لدم وجهك؟
قالت ليه كنطلب منبقاش انا وياه فنفس البلاصة ماعنديش الوجه اللي يشوف فيه كل نهار .. ولا يشوفني وهوا شايف عراتي
قاليه السلطان ادا غتزوجي بيه وتفكي هاد العقدة اللي بينك وبينك وبينو
هزات عينيها مصدومة كتمتم تقول بلعات لسانها لاكن السلطان عطاهم بالضهر وشار ليها بصبعو يخرجو عليه يخليوه مع خبر الجواسيس اللي سلاط عليه قلق راحتو وقاليهم
زواجكم الجمعة الجايا يالاه خرجو شوفو شغلكم
خرجات يمامة مصدومة حالة يديها كتشوف فيهم من هول الصدمة وومراها حكيم حتى هوا اكثر منها وعمره توقع يتزوج يمامة او جات فبالو بالرغم من جمالها وجادبيتها لاكنه عمرو تخيلها زوجة ليه ..ماهضر مانطق بقا كيشوف قدامو كيستوعب ويمامة حاللة فمها ، مشات خلاتو بلا متشوف فيه اما هوا هز عينو فيها وهي غادية عاد بدا يستوعب الفكرة والقرار وبدات تبان ليه كزوجة واخا عمرو تجرأ وتخيلها وكانت شي حاجة اللي مستحيلة انه يحضى بداك الجمال والرقة والثقافة والاكثر انها كانت جارية لامير بشحمه ولحمه .
وهي غادية فطريقها بلا عقل صادفات متعة جايا وهازة ولدها مخرجاه ودازت حداها يمامة بحال البرق تقول عورة ..بقات متبعة ليها العين ومشات تبعاتها ودخلات وراها لنجناحها وفيدها ولدها طلات عليها وردات الباب كتساؤ ا مالها متهضر بوحدها ؟ شنو وقع ليها؟
تلفتات يمامة وراها كتبركم بفمها وقالت
اناا!! انااا سبأ نتزوج حكيم؟!!! علاش؟ علاش هادشي علاش كيوقع لي بحال هاكا
بقات متعة كتشوف فيها ومشات حطات ولدها بشوية فالارض بعيد وقربات منها حطات يدها على كتفها قالت ليها
سبأ!! مالكي شنو واقع ليك
ضارت عندها يمامة وتلاحت عليها كتبكي وتفرغ حتى تفشات ورتاحت حتى مواسات متعة عاد بداو كيهضرو بشوية وقالت ليها متعة
علاش بغا يزوجك واش غير حيت شافك نص مستور نص عريان؟
قالت ليها يمامة وهي كتمسح نيفها ماعرفتش .. مافهمتش انا مصدومة مقدراش نصدق
قالت ليها متعة مستحيل هاد الزواج يتم جواري الامير محرم عليهم الزواج من راجل اخر الى متحرروش
قالت ليها يمامة انا تحررت امتعة ..حررني ويارييت كن ما تحررت.. حسابني غنتهنى ونرتاح صدقت طايحة فبير غرق من اللي قبل منو
تفاجآة متعة قالت ليها علاش تحررتي؟؟ واش نتي بغيتي ؟
قالت ليها يمامة انا اللي بغيت ..انا عمرني ماكنت جارية وعمرني غنكون.. حاسة براسي كنتقطع امتعة ديري لي شي حاجة ولا قتليني نرتاح
تنهدات متعة قالت ليها الحل الوحيد تقوليها للامير يور يقدر يخرجك من هاد المصيدة
قاليت ليها يمامة منقدرش امتعة حتى لوجه باش نقولها ليه ماعنديش.. وقفت قدامو اخر مرة قلت ليه حررني..ديك الساعة كان عندي الحق نطلب اما دابا بصفتي شكون؟ علاش غيوقف معايا؟ ومنقدرش نمشي نطلبو ولا نترجاه عطيني شي حل اخر
قالت ليها متعة شوفي مع لاللة روح الندى.. حتى هي عندها كلمة تقدر تعاونك واخا طبعها صعيب مكتحملش حريم الامير وكتغير غلى ولدها ولاكن متعرفي
قالت ليه يمامة لاااالا والله حتى تزوجني بيه فلعشية قبل من غدا غير ضد فيا .. كتقلب ليا على السبة وعادي نعطيها ليها بيديها لالالا ميمكنش
تنهدات متعة قالت ليها وشكون غادي يوقف معاك صافي هادو اللي يقدرو يوقفو معاك
قالت ليها يمامة ونتي؟؟.. انا وياك ديما صحابات عقلتي فاش كنتي حاملة وفكيتك نتي واللي فكرشك فوقت الحرب..مافرطتش فيك واخا بجوجنا جاريات امير واحد وخبيتي عليا خبار الحمل ومع ذلك ماحاسبتكش وفكرت فصحتك وفلودك .
قالت ليها متعة انا ماخبيتش غليك انا غبروني مابقيتش كنشوف حتى واحد وجابو ليا وصيفات جداد ومنعو عليا نفوت واحد الحد.. مابقيت كنعرف شنو كيوقع فالقصر قالو ديها فولدك وفحملك ونتي مسؤلة عليه صافي تركنت وقطعت الزي ..ولاكن كما قلتي درتي فيا خير عمرني ننساه ليك ..غادي نحاول نتوسط ليك مع الامير .. واخا مكيديهاش كاع فيا وفهضرتي ولاكن غادي نحاول وندير اللي فجهدي باش يخرجك من هاد الحريرة اللي طاحت عليك من السما
بدا اصيل الصغير كيبكي فالارض ومشات متعة هزاتو وخلات يمامة طايحة على واحد المخدة كتبكي وشافت فيها باسى وتنهدات وخرجات مشات بشوية عليها لجناح الامير.. هازة ولدها وراسو على كتفها كيركً ومشات ستأدنات من الحراس اللي فبابو ودخلات عندو لقاتو فجناحو معاه الحريم كل وحدة وشنو كدير ..ها اللي كتمسح ليه كتافو من مياه الاستحمام ها اللي كتنشف ليه رجليه ها اللي موجدة ليه حوايجو وها اللي كطويهم ليه . تبسم فاششافها جاياه بالولد وفتح يديه لولدو شدو عندو وجلسات هي جنبو مبسمة في حين حدر ليهم الجاريات الراس وانساحبو وناضت كملات شغلهم بيديها حطات ليها منشفة جديدة على كتافو وهزات حوايجو حطاتهم قدامو وبدات كتمسح ليه شعرو بشوية من اللور وتفكر كيفاش تجبد ليه الهضرة ..قاليها وهوا كيلعب مع ولده واش خرجتيه شوية لبرا هاد العشية
تنهدات وقالت ليه خرجتو لاكن الهوا مكانش هوا هاداك
قاليها لا كان هوا هاداك
قالت ليه هوا القصر امولاي ماشي هوا هاداك
باس يد ولدو قاليها علاش شنو واقع
قالت ليه علاش امولاي مافخباركش اخر الانباء؟
هز حتجبو شاف قدامو قاليها اشمن انباء؟
قالت ليه مولاي جلالة السلطان راه صدر قرار فحق يمامة والصدر الاعضم وقرر يزوجهم
ترخفات التعابير كلها من دقة الصدمة على وجه الامير بقا غير كيشوف قدامو وهي كطل عليه وتسنا ردة فعله ..بان ليها تصمر ماتحركش ورجعات قدامو قالت ليه عطيني محم د اصيل نحطو عليك
هزات ولدها والامير غايب فكلامها حطات الرضيع وسط السرير كيلعب بيديه وقالت ليه كتنهد
قال الجمعة الجايا فاتحتهم ..ولاكن امولاي لغريب فالامر هوا يمامة كانت من الحريم ديالك يعني كيفاش هاكا فجأة تصبح مرات الصدر الاعضم !!واش المرى الى تحررات صافي يجوز ليها تزوج بأي راجل
حرك عينيها اتجهاها قاليها شكون قالك هاد الكلام منين جبتيه؟
قالت ليه قالتو لي يمامة بنفسها
هبط عينيه شد بصبعانو فيهم بجوج قاليها خودي محمد اصيل لبيتو يرتاح امتعة خصو ينعس
قالت ليه واخا امولاي..فالصراحة مغنسخاش بيمامة الى مشات من القصر دوزناها معاها ايام زينة ودكريات متنساش..لاكن من حقها حتى هي تزوج وتولد ولادها واخا حكيم مايناسبهاش وغنزوج بيه تحت قرار السلطان وصافي الله يكون فعوانها مسكينة
حدرات راسها خرجات وبقا هوا جالس بلاصتو لابس سروال توص طويل تقليد فالازرق وصدرو عريان والمشنفة على عنقو ..عيط للعبيد جاو فالحين وقال لواحد فيهم يعيط ليه على يمامة ومشا عندها مباشرة كانت مزال فبلاصتها كتكمدها وندمات اشد الندم على شكوتها وتمنات لو تشقات بيها الارضاو منعها شي واحد قبل ماتوصل عند السلطان .. سمعات الدقان وهزات راسها قالت ليه دخل ودخل العابد حادر راسو قاليها سموالامير بغاك فجناحو فالحين
شهقات وناضت وقفات عرفات باللي لخبار وصلات ليه ومشات ديك الساعة غسلات وجهها باش تستقبلو ومابغاتش يشوف ولو ذرة ضعف فوجهها او انكسار بالرغم من كلشي والاهم متشوفش الشفقة فعينيه عليها ..
طلقات شعرها البني المتدحرج كله وسرحات حواجبها بيديها ولبسات من الحلي الفضة خلخال ونبالة وعقد الجوهر واجمل قفطان فلونها المفضل البيج لبساتو وكاكل مطرز بالمعلم والفتاحي فجنابو على رركبة والبليخة دالصم والحزام والحوالق مدليين بلديين .. جبدات من ااعطور اللي يناسبها ووقفات شافت راسها مزيان حتى رضات وهزاتو وخرجات غادية فاتجاه جناحو ..قبل متوصل تصادفات مع حكيم كان غادي جاي ساهيوغير شافها تزعزع خاطرو ووقف قدامها متردد يهضر ..ابتسم ليها قاليها كلشي غيدوز مزيان اسبأ..متعرفي الخير فين كاين
مارداتش عليه وخلاتو مشات وجلس متبع ليها العين حتى غبرات ودخلات لجناح الامير بشوية عليها حدرات راسها ليه ورجعات هزاتو لقاتو مزال جالس فبلاصتو وكيطلع ويهبط فيها وهي كتقرا نضراتو اللي كتبين انه مساخيش بيها وكيشوف فاجملواعز حمامة من بين حمامو فطريقها للطيران بلا عودة .
قالت ليه بابتسامة طلبتيني امولاي ؟
بقا كيشوف فيها مطولا كيحاول يفهم شي حاجة من تعابير وجهها لاكن البنت ملامحها باردة لا توحي بشيء. .. تبسمات فوجهه تبسيمة جميلة قالت ليه مولاي واش طلبتيني
عقد حوجبو وقاليها وهز واحد فيهم وقاليها مرتاحة ؟
ضحكات كترمش وهبطات عينيها قالت ليه الى كنتي مرتاح حتى انا مرتاحة..راحتك اولا من راحتي امولاي
قاليها مرتاحة فقرار السلطان ؟
قالت ليه اشمن قرار؟
قاليها قرار زواجك بحكيم؟
هبطات عينيها كتشوف فيديها وجمعات شفاها لداخل ورجعات تبسمات قالت ليه الى كان هادشي غيرضيه ماعنديش مشكل .. مولاي السلطان عطاني كاع اللي نحلم بيه ..ماشي خسارة فيه نرضيه فزواجي
حرك راسو. معجب من هادالرد وقاليها زواج راه ميثاق ومن الشروط دياله تكون المرى قابلة وراضية بلا ضغوطات ..
قبل ميكمل كلامو بدات كضحك وكتخفي بضحكتها الدموع اللي ماراضياش طيح قدامو ولا ثير الشفقة ديالو او تضعاف لاكن خانوها دموعها وهبطو وسط ديك الضحك كيتسابقو وبدا تمسحهم بسرعة وتخل عينيها كأن شي حاجة دخلات ليها تما ..لاكن كلشي كان وضاح قدام الامير وناض وقف قدامها وهي كتشوف فجنابها وهز ليها وجهها شاف فعينيها وقبل ميهضر نفاجرات بالبكا وبدات كلها كترعد وكتقمع البكية فنفسها باش مطلعش ورجعات اللور كتخبي وجهها وحدرات راسها بغات تستأذن باش تخرج ومشات خلاتو واقف . ديك الساعة لبس عليه ومشا لجناح السلطان دخل عمدو لقاه مهموم عقلو فشكون اللي غيكون خرج سالت وعيايفكر فشكرن من اعدائه اللي مغروس وسط قصره
وقف قدامه سمو الامير حدر ليه الراس باحترام ورجع رفع راسو قاليه مولاي السلطان.. سمح لينا غادي نرجعو لتارودانت..انا واهلي وحبابي وكاع اللي جاو معايا..يكفي هاد الوقت اللي ضايفتونا عندكم لاكن جا الوقت نرجعو لاراضين في انتضار رجوع قرطبة لينا
تفاجأ السلطان من هاد القرار السريع ووقف كيشوف فيه قاليه اش هاد القرار المفاجأ ؟ ومن امتى كنتو ضياف عندي فالقصر؟
قاليه سمو الامير حنا عندنا اراضينا واقابئلنا ..جا الوقت فين نرجعو ونستاقرو وترجع الاًوضاع كما كانت من قبل
هز السلطان راسو قاليه بصرامة انا اللي كنقرر فوقاش خاصكم ترجعو
حمار وجه الامير وبقا كيشوف ليه فعينيه مطولا وقاليه وقاليه جلالة السلطان .. انا علمتك باش نمشي .. ولاكن ماشي باش ناخد الاذن ..مزال مستاقل بداتي وعندي ارضي .. واهلي وحبابي انا اللي كنقرر فيهم وحتى واحد ما من حقو يجردني من قراراتي بخصوص اهلي .
استغربالسلطان قاليه وشكون جردك من اتخاد القرارات الخاصة بيك ؟ لحد الساعة مزال كتقرر وحتى واحد مكيتدخل فقراراتك
سد الامير عينيه وخرج النفسبفاد الصبر وقليه لا كاين خطوط تجاوزات ومن غير هادشي انا ماقادرش نرتاح هنا فالقصر..من الصواب نرجع لبلادي ويبقا كل واحد عارف صوابه..جلاسي هنا غيزيد يعقد الامور وماشي فصالح حتى واحد فينا
بقا السلطان غير كيشوف فيه وكيحاول يفهم اسباب هادالقرارات علاش كيهضر وماجاوبوش قاليه غادي نناقشو هادشي من بعد ان شاء الله
خرج الامير من عندو ومشا لجناح روح الندى دخل عليها قفزها قاليها وجدي راسك وعلمي الخدم والعبيد والحريم واي واحد دخل فطريقنا لهاد القصر يجمع راسو باش نرجعو لاراضينا..يكفي هاد المدة اللي دوزنا هنا من الصواب نرجعو بحالنا
ناضت مصدومة قالت ليه علاش شنو وقع ؟ ياك لاباس
قاليها جلاسنا هنا خطأ كبييير وحنا عندنا بلادنا ..عفاك امي ماديريشليا بحال المرة الفايتة وتشديني هنا وفكل مرة نبغي نرجع بحالي تشديني.. جالس على قلبي هنا ومغنرتاح حتى نخوي هاد القصر ولو تدعى الضرورة نعيشو فالجبال فالخيام
بقات ساكتة كتشوف فيه بأسى خارج وتنهدات قالت
عاوتاني الاصيل دك ليها شوكة فجنابو ..ماحدو فهاد القصر بزر منو يخضع لاموامر الاصيل اللهم يدير اللي يريحه وانا معاه هاد المرة
قالت ليها عبدية دابا يتصالحو هادا حالهم ديما
اما هوا خرج ورسل عابد لسبأ دخل عندها كانت مركنة كتبكي وتمسح وقاليها لاللة ..سي المير قاليك جمعي قشك باش نرجعو للديار ديالنا فتارودانت
بكثرة الضغط والخاطر المكسر عمد روح الندى خرجات من ناجها نيشان لجناح السلطان اللي كان اكثر منها والجو معكر عندو من جوج جهات من جهة الجواسيس اللي سمع ليهم ومزال مابانو وعايشين وسط قصرو وماخلاوهش يتهنا ويرتاح ومن جهة الامير يور اللي زاد عكر صفوة مزاجهه وكفس عليه النهار .
بنيرانها الحامية دخلات عليه لجناحو بلا متشعر وقالت ليه بانفعال
شنو عاوتاني درتي ليه حتى خليتيه يطج من حوايجو !! اش كاين اش بينك وبينو
شد عينيه ويد على فمو ويد على جنبو وضار عندها قاليها خرجي من هنا قبل ما نقلب عليك هاد البيت لا نتي ولا ولدك اللي بدا كيطلع ليا فالراس وصبري نفد من طغيانو والتمرد دياله .
عقدات حجبانها قاليت ليه انا اصلا غنخرج وعمرني نرجع لهاد القصر ..الله يكثر خيرك ويخلف عليك واصلا اللي ماعندو كبدة على ولادو ما رباهم من صغرهم صعيب يحس بالقرب منهم
هز يدو كان غيضربها لاكن طاحت ليه بكثرة الضغط والانفعال قبل ماينزل عليها وغيبات فالارض وجا التاج فجهة اخرى وبقات يدو فالسما وكيشوف فيها طايحة . ضن انه تبوحيط النسا ومكان حتى سبب يخليها تسخف غير هاكاك وهي دخلات عندو بحال الثور صحة سلام. دار يدو ورا ضهره وعطاها بالضهر كلم العبيد دخلو كيجريو عندها قاليهم وهوا عاطيهم بضهره باكراه
هزوها ردوها لجناحها واخر مرة تحط رجلها عندي هنا
هزوها العبيد مغبية كيجريو بيها لجناحها وحانت شادية دايزة من جنب جناحها شافتها داخلة بديك الحالة و تبعاتها كتجري وتجمعو عليها فجنتحها الوصيفات والحكيمة وعبدية حتى هي .
فهاد الاثناء كان ضغط السلطان طلع وجلس تكا على واحد الكرسي كيرتاح وسد عينيه وطول فغمض العينين حتى عفا غفوة مابين اليقضة والنوم شاف فمنامو ملخص نص نهار اللي غبر فيه على القصر ومشا مع الامير للصيد وكان اهم جزء اللي شاف مع غنضة عينو هوا خروج جوج نسا من القصر كيبانو فيهم غير العيني ..حاول بعقلو الباطني يتبعهم واخا كان لعقل مشوش وغفا وهوا معصب دازت الرؤية مشوشة والاخداث شي كي خل فشي وبجهد كبير باش يعرف شكون ماقدرش لاكن وسط ديك السرعة دالاحداث الملخبطة بانت ليه روح الندى فجأة فمشهد كتبتاسم فيه واقفة بين يدين راجل طويل وعامر وتكات على صدره وشوية تكات معاه على السرير .. بدا العرق كيتصبب من جبينو وكيحاول يشوف الوجه ديال داك الشخص لاكن دخلات فالخط صورة يمامة وهي قدام الامير كتبكي وهوا شاد دقنها وكيتكلم معاها وفنفس الوقت جات صورة اخرى دخلات بدون سابق اندار لشفاه مرة كبيرة كتتكلم وتقول بصوت كيتردد بحال الصدى مبروك عليك الاللة يتربى فعزك ان شاء الله . ومع هاد الجملة هزات روح الندى راسها جلسات وهنا فتح السلطان عينيه فجأة وصدرو كينهج وناض شد راسو وصد عينيه كيحلهم ويسدهم وكيحاول يستوعب ويفهم اشنو كيوقع وقلبو علاين يسكت من الرؤية اللي شاف اللي مافهمش منها شنو المغزى وشنو هاد المنامة الكحلة زحلة اللي كانت غتزهق ليه الروح كن ما فتح عينيه وخرج منها
فجناحها كانت متكية مصدومة من كلام الحكيمة ليها واللي خلاتو سر ماتعرفو غير الحكيمة وعبدية اللي غتاكل جنابها من اللي سمعات وكتلومها وضرب فخادها .
تحل الباب فجأة مع صوت العبيد كيباركو فعمر السلطان اللي رجلو على الباب وغير سمعات روح الندى صوتو ناضت من صدمتها جلسات جامدة فبلاصتها وجها اصفر وعبدية واقفة كتفتف حادرة راسها.. مع دخل هز راسو كيسرح عينيه ويفلي فالبيت وحول نضره جهتها لقاها جالسة فسريرها وتقلب عندها وقف قدامها في حين خرجات عبدية كتجري تسلات خلاتو منو ليها .
شاف فيها مطولا وقلبها غيوقف من الخلعة لاكن كاتمة احساسها وصارمة فنضراتها اللي كثتملكهم الخوف
قاليها كي بقيتي شوية؟
حركات راسها بالايجاب قالت ليه شوية الحمد لله
قاليها شنو عندك ؟ شنو قالت ليك لحكيمة ؟
استغربات من كلامو كأنه عارف اشنو واقع وباللي جات عندها لحكيمة ..لاكن هي نكرات كلشي وقالت ليه ماكشفاتش عليا الحكيمة فقت راسي !
هز حاجبو قاليها متأكدة ماجاتش عندك لحكيمة !
كانت غتغلط وتعتارف لاكن احسن حضها كملات فكذبتها رقالت ليه لا ..بغاو يجيبوها قلت ليهم لا مايحتاجش
تحرك من بلاصتو حساب ليها غيمشي لاكن ضار على السرير وجلس قدامها على واحد الكرسي ربع يديه كيشوف فيها ويشوف فحالتها وفصيعها اللي كيترعد وهي كتكمد يديها مع بعض .
هز عنيه شاف فيها قاليها شفتك مابقيتيش داياها فجناح الحريم و حتى خيالك مابقاش كيبان فالقصر؟
بلعات ريقها كدور عينيها لاكن قوات تفسها وقالت ليه انا غثر ضيفة هنا ماعنديش الحق نهي ونآمر .. وجا الوقت فين كل غازي يقصد بلده .
حرك راو بالايجاب شد فاهه الفوقانية بسنانو قاليها ولاكن مزال حتى نصفيو كاع الحسابات ..باش كل واحد يبقا على خاطره
دق قلبها بحال المدفع بالخوف وقالت ليه اشمن حسابات؟. حساباتنا فضيناهم
قاليها الى بغيتي ترجعي نتي وولدك لبلادكم غتنازلو كلياسيادتكم على قرطبة.. بلا صدع بلا مشاكل بلا ما نخلوضو الدم ..
استغربات قالت ليه شنو كتقصد؟
قاليها انا فيا ما يرجع قرطبة بزز منكم لا نتوما ولا الصليبين ..وبالقوة ..ولاكن ماباغيش الحرب تنوض بيني وبين ولدي..حبدا لو يتنازل عليها بخاطرو غيكون حسن .. واخا راني كندير مجهود باش نردها وقادر نستولى عليها ..ولاكن ولدي واقف ليا فالطريق ومابغيتش نصيب العلاقة بيناتنا فهمتي دابا؟
قالت ليه شنو المطلوب مني ؟ نهضر معاه يتنازل ليك عليها؟
قاليها الى كنتي باغا ترجعي لبلادك نتي وياه..يكفي سيادتكم على تارو دانت ..
بقات كتشوف فيه مطولا قالت ليه شنو بغيتي تقصد بالضبط ولشنو باغي توصل؟
هز راسو ووقف قاليها ماحدي فالحياة حتى واحد فوالدي مغينال السلطنة ..لا يور ولا سلطان.. وجوج سلاطين من فصيلة وحدة عمرها كانت ولا غادي تكون.. السلطان الوحيد على الاندلس هوا انا ..
بقات كتشوف فيه مصدومة قالت ليه فاش أداك دابا يور حتى كتنتاقم منو بهادشي؟ هوا دار فيك التيقة ودار يدو فيدك علاش تقلبتي عليه ؟
قاليها بصرامة دنبو الوحيد طلع ولدي..ولد السلطان..هادا هوا الخطأ..السلطان كيبقا سلطان واولادو كيبقاو امراء..سواء ربيتو ولا تربا بعيد.. كيبقا ولدي ومن بعد موتي غيتحسب من الورثة ..فهمتي..
عطاها بضهرو غادي وقاليها حاولي معاه يبايعني بخاطرو ولا هاد المرة غنخدم معاه القوة ومغنعقلش عليه.ونتي حسابك هوا اللخر
واخا ماقادراش لا تهضر لا تتكلم ولا تجبد شي نقاش لاكن كتبرات ورسلات ليور ، خبروه باللي مريضة والحال تزاد عليها وفعلا داخت بيها الدنيا وبانت فوجهها ودخلات عليها الوقت الصعيبة ومشات الايام الزينة وراحة البال.
جا فالحال حضر فجناحها لقاها متكية ووجهها شاحب ومشا جلس حداها شد فيدها ..بقات ساهية كتشوف فيدو وتشوف فيدها وتبسمات قالت ليه كن حسابني غتجي تشد فيا بحال هاكا كن شحال هادي طلبت من الله نمرض..غير باش نشوف خوفك عليا واهتمامك بيا ..
باس يدها قاليها الله يفضك وينجيك ..انا شغاندير فهاد الدنيا بلا بيك ..
مسحات على راسو وقالت ليه كتنهد ..
يالاه نرجعو بحالنا ..نرجعو لهدوء ديالنا وبلادنا الزينة .. ماتوحشتيش تارودانت وقبايلنا ؟
تبسم قاليها توحشتها ..اصلا من نهار خرجنا منها وحياتنا اللور
قالت ليه بلعكس..نتا غزيتي وحررتي بلاد من يد الصليبين ..دخلتيها للاسلام وكان هادا هوا هدفك ..كان هدفك ضمها للاسلام وعمرك طمعتي فالحكم ولا السلطة..وكنتي ديما كتمنى تعيش حر طليق .. واقيلا ربي استاجب ليك
شاف فيها باستغراب قاليها شنو كتقصدي
قالت ليه انا عييت اولدي..كنحس براسي مريضة وقلبي مقبوط ..كنحس بالموت كتقرب مني.. ماتعرف ليوم ولا عدا يوفى اجلي..بغيت نطمن عليك
سكتاها قاليها طمني عليا وانا ؟ فين راحة بالي وفين مي اللي عشت ليها وعلى قلبها؟
قالت ليه الوقت تبدلات اولدي..مابقيتيش غتعيش غير ليا وعلى قبلي..غتعيش لولادك حتى هما..انا دوري فالحياة سالا ..وهادا دور الواليدين..كيربيو ويجاهدو ونهار يوصلو ولادهم كيوفى اجلهم ..والى عاشو كيعيشو غير شي حاجة قليلة..وجا الدور عليه فين تربي وتجاهد وتوصل وليداتك ..هادي سنة الحياة اولدي
بقا ساكت محني على يدها وهي كتشوفيه وتبسمات قالت ليه يالاه نرجعو بحالنا ..الحمد لله اللي علينا درناه .. دقنا من كل حتجة شوية..من طعم النصر ودقنا من طعم الغدر ودقنا من طعم الخسارة..وكما كنتي كتقولي ديما ..الى كانت البلاد كتبقا تحت سيادة المسلمين انا مستاعد نتنازل على الحكم ..دابا البلاد فأيادي امنة ..ونتا عارف السلطان لاياش كيسعى ..وعارف الشغف فضم المناطق للاندلس.. وهوت السلطان الاول واكثر واحد كيجاهد باش يحافظ على هاد التوحد..وهاد المسيرة .. وعارف باللي هوا سلطان على الاندلس كلها والى بايعتيه فقرطبة غتكون بايعتي باك ماشي شي واحد غريب عليك..وباك مسلم وعازي ومجاهد ..نتا باقي صغير وباقية الحياة قدامك ..باقي غيجيو واحد الوقت تهز هاد المسؤولية على عاتقك كلها كما هازها باك.. ماعندكش مافر الى بقينا فالحياة ..وهادي هي الاصول هاكا كتقول..بايعو فقرطبة وخلينا نرجعو بحالنا ..خلينا نستاعلو هاد الفترة ونعيشو .. اما نهار تكبر كون على يقين غتكبر معاك المسؤولية..وغتلقا راسك بلاصة باك وديك الساعة غيكون واجب عليك تتحمل هاد الهم الكبير بوحدك ومغنلقاش معامن تقسمو ..اما دابا عندك معامن تقسمو وباقي فبداية الطريق
بعد حوار طويل هادئ وتبسيط الامور قاليها يور فاخر كلماته
منقدرش نبايعو ونرجع نندم .
قالت ليه علاش غتندم اصلا شكون معاون معاك باش تردها؟ شكون واقف معاك؟ نتا خسرتيها اولدي
قاليها انا تغدرت امي..تطعنت فضهري ..ديك الحرب بالنسبة ليا ماشي خسارة ..غدر
وهادشي اللي كتقولي خصو تفكير وشوية ديال الوقت..
قالت ليه انا مريضة منقدرش نصبر هنا ..كنحس براسي مريضة..البيعة مع باك احسن ليك من هاد التجرجير وهاد الدل..تفكر كلامك فاش قلتي ليا مكتهمنيش السلطة..المهم البلاد تبقا تحت سيادة المسلمين .. متخليهش هوس السلطة يمشي فدمك نتا انسان مسالم وانا وربيتك تربية احسن بزاف من تربية السلاطين لولادهم ..بايعو ورجع بحالك..اصلا هاد البيعة مغتقدل حتى حاجة..كتبقا ولد السلطان وهادشي بزز من كلشي وبزز من السلطان ومن نيفو ..وعزة نفسه..
تنهد ومسح على يدها قاليها يكون خير ..يدير الله الخير غير رتاحي
غطاها وباس راسها وخرج مشا لجناحو مهموم ..عيا يفكر ويهدم ويبني وبين كل مهلة ومهلة يصلي صلاة استخارة حتى مابقاش عاقل شحال من صلاة صلى
اعتاكف ثلاتة ايام وفهاد الثلت ايام حتى واحد ماداق طعم الراحة ..كلها وهمو..روح الندى همها فحملها اللي كرهها فالزواج حتى ندمات اشد الندم عاد بان ليها ولدها ووجهه خصوصا فاش تصلحات الامور بيناتهم ورجع حنين معها..ام يور ضارت بيه الدنيا ماعرف فين يعطي بالراس وتاجه للقبلة كيطلب من الله صباح وليل ينور ليه الطريق..
ويمامة بكات اللي عمرها بكاتو طول حياتها على قرار زواجهها ولا قرار بان من بعد داك القرار الملعون ونهار وليل كطيح وتنوض فالبيت بوحدها وغير متعة اللي كطل عليها تواسيها مرة مرة
اما الاصيل حكياتو حكاية..عقلو غيخرج مع ديك الرؤية اللي شاف وعروق راسو تشربكو وتزيرو وحتى الشهية مشات ليه والنعاس طار ليه مابقاش قادر يفكر فشي حاجة من غير داكشي اللي شاف واخا عيا يحاول يشتت تفكثرو ويشغلو بحاجة اخرى لاكن والو حتى كيلقا فديك الدوامة كيفكر .
شرقات شمس اليوم الرابع وشي مشاف شي ..ومن غير الاحداث اللي وقعات كتاب المكتوب وتصرف فداك النهار بالضبط.غير احوال القصر سفاها على علاها وكانت الضحية وحدة من اللي عمرها فكرات تموت صغيرة ..وياريت ما خرجات ما ضرجات داك النهار
ماقال ليها عقلها والجو صافي مبرد فداك الصباح والشمسية باردة قالت نخرج نشم الهواء نتنفس شوية على الله ترجع فيا الروح .. خرجات من جناحها بقفطانها الابيض والدفيرة جنب ووجهها اصفر بقلة النعاس والبكا وصادفات فطريقها متعة هازة ولدها وغير شافتا خرجات فرحات ليها وقالت
الحمد لله على سلامتك.. ايوا هاكا خرجي شوية يضرب فيك البرد..راه اللي دارها الله هي اللي تكون
تنهدات يمامة قالت ليها شبحان الله امتعة من ديما كنتي كتواسيني.. واش مكانتش كتجيك الغيرة مني ؟ خصوصا دابا مللي ولدتي ولي العهد
ضحكات متعة قالت ليها علاش غنغير منك؟ انا اصلا عمرني تخيلت نكون ام ولي العهد ولا حتى نكون اميرة ..ومكنسعاش ليها اصلا
قالت ليها يمامة وهما خارجين كيتمشاو وعلاش هاد الشؤم هادا كله
قالت ليها متعة حيت عارفة راسي مغنوصلش ليها
ضحكات يمامة بتعب قالت ليها وعلاش كتقولي هاد الهضرة؟
قالت ليها متعة حيت انا ماشي بحالك..كل واحد كيسعى حسب اصله وفصله..انا غير بنت باب الله تولدت فالفقر وعشت فيه وكان كل همي نلبس وناكل وصافي.. فاش لقيت داكشي اللي باش كنحلم قنعت ..اما نتي تولدتي اميرة وعشتي اميرة ..عادي تسعاي باش تكوني اميرة
تنهدات يمامة قالت ليها المضاهر خداعة امتعة .. حياتي ماشي كما كتشوفي نتي..حتى انا عشت البؤس واخا اميرة..ولاكن نتي كنشوفك جالسة مكتجتاهديش باش ديري بلاصتك ومكانتك واخا تعطاتك فرصة دهبية
قالت ليها متعة منقدرش نخشي راسي بين الريوس الكبار ..انا اختي كنخاف كنخاف يقتلوني ولا يحلفو فيا..الاهم نصقر واللي دارها الله هي اللي كاينة
جلسو على واحد الكرسي طويل من الحديد فالحديقة وكمشات يمامة يديها مع بعض على كتافها قالت ليها اااح اربي..سعداتك امتعة كنحسدك على هاد النفس اللي عطاك الله ..انا منقدرش نكون بحالك..
قالت ليها متعة وعلاش متقدريش؟ عادي ديريها فيديها وسيري مع الحيط لحيط
تبسمات يمامة مع اصيل الصغير اللي فيد متعة وباست يدو قالت ليها منقدرش امتعة ..انا الى تهمشت كنمرض ..صعيب تفهميني حيت انا ونتي مكنتشابهوش.. انا منقدرش حتى نتنفس ..كنتخنق وكنبقا نتحرق.. منكدبش عليك نقوليك كنسى دغيا ولا كنسامح دغيا ..ولا كنبرد بكلمة ولا جوج..انا نفسي طاغية عليا لدرجة كنكره هاد النفس حيت هي سبابي فعدابي.. نفسي مكترضاش امتعة مكترضاش وصعيب ترضى وكترجع ليا تعدبني وكتهدني..صعيب عليا نوصف ليك ونشرح ليك ..انا كنفضل نموت على الخضوع لشي واحد ماقابلاش عليه وماراضياش عليه
ضحكات متعة قالت ليها سبحان الله كل واحد كيف داير
قالت ليها يمامة حمدي الله على النعمة اللي نتي فيها ..ماكرهتش كن كنت بحالك
وهما كيهضرو دازت واحد اللفعة كحلة من الربيع بين رجليهم بلا ميحسو بيها وطلعات راسها بين القفطان كتشم دم الحيض ومع الحركة دالرجل عضاتها فالفخد عضة قاتلة حتى غوتات لربي اللي خلقها وكانت غطيح الولد لولا يمامة شداتو بالزربة وتخلعات من الغوتة وناضت وقفات شاداه معنقاه وكتشوف فمتعة شادة فخدها كتألم وقالت ليها عضاتني شي حاجة
دورات يمامة عينيها وشافت اللفعة الكحلة قد السخط هاربة وغوتات بأعلى صوت تجمعو العبيد وقالت ليهم بخوف حنش..حنش حنش عضها حنش
سمعات متعة سمية الحنش وبغات تنوض لاكن طاحت ماقدراتش توقف وهزات عينيها مخلوعة شافت فولدها نيشان وهزات يدها جيهته قالت ليه
ولدي..ولدي
هزوها دخلوها وهي كتهتهت بولدها ويمامة وراها تابعاها هازاه حتى لبيتها ووقفات حدا راسها كتقوليها هاهوا ولدك متخافيش هاهوا حداك
شهقات متعة بخوف قالت ليها ولدي ..عنداك توقع ليه شي حاجة
قالت ليها يمامة ماعندو مايوقع ليه هاهوا ماتخافيش..غير عضة ها الحكيمة جايا دابا وغتبراي
قالت متعة وكأنها كانت حاسة بشنو غيوقع ليها فداك النهار وكان كلامها فالحوار ملخص على شغويقع ليها بلا متحس وكأن الموت علماتها قبل ماتجي وبلا متحس قالت ليها سبأ ردي البال لولدي..رديه البال انا مأمناك عليه وماعنديش من غيرك.. لا ختي لا مي لا حتى واحد..
بتوثر قالت ليها يمامة متخافيش عليه انا غنقابلو حتى تبراي ..انا غنقابلو ليك كوني هانية
جروها العبيد فاش دخلات عندها الحكيمة بغاو يخرجوها ومتعة هازة يدها كتغوت وتشوف فيها ويمامة كتعلق بعينيها فيها
قالت ليها متعة وهما كيجرو يمامة. مافرطيش اسبأ… ماتفرطيش منحسمش ليك الى فرطتي ..منسمحش ليك الى تعدب ولدي وسط وولادكم… متفرطيش اسبأ انا خليت ليك ولدي
مع هاد الكلام الاخير حضر الامير فور ما خبروه بشنو وقع وشاف على عينيه وسمع على ودنيه ودخل يشوف متعة وبقا لداخل ويمامة على برا مخلوعة غادية جايا وكتراري بالولد اللي قلبو غيخرج بالبكا ..
حضرات ديك الساعة شادية لبيت متعة كتسول على شنو واقع لقات الدنيا مقلوبة والولد كيغوت وقالت ليها
شنو واقع مالها متعة
قالت يمامة ويديها كيترعدو والولد كيبكي ليها
عضها حنش
قالت ليها شادية عطيني الولد نسكتو اريه
هرباتو يمامة قالت ليها لا خليه انا غنشدو
قالت ليها شادية انا غنعرف نسكتو غير اريه
قالت ليها يمامة لا اختي غير خليه مغنعطيهش ليك
تنهدات شادية كتشوف فيها قالت ليها الى ماتقتيش فيا بقاي حادايا..الولد غيموت بالبكى مسكين انا غنرضعو غيسكت
بقات شادية كتسايس حتى سلاتو من يدها بشوية شداتو تخبات بيه فواحد البيت جنب داك البيت ويمامة تابعاها حاضياها وجبدات البزولة بغات ترضعو لاكن مابغات يشدها وبقا كيغوت حتى سخف بالبكا وسكت كينين وحطات ليه شادية البزولة فمو رضع بكثرة البكا والشحفة ونعس
خداتو يمامة ناعس شداتو فيديها كتنخز فنعاسو بالبكا وناضت حتى شادية ..سمعو الباب تحل وخرجو بجوج شافو الحكيمة خارجة حادرة راسها ووصيفات متعة واقفين فجناب الحيط لداخل حادرين راسهم
بقاو كيطلو بعينيهم مخلوعين من الباب بان ليهم الامير جالس جنب السرير حادر راسو بأسى وهز الغطا غطا وجهه متعة
دارت شادية يديها على فمها مصدومة وحلات يمامة فمها وطاحو دموعهم حجر وشافو فالولد بجوجهم وتبعادو كل وحدة فين عطات وجهها كتبكي ماقدروش يصدقو ان متعة ماتت وخلات ولدها رضيع
مشات مسكينة عند الله وخلات ولدها صغير كيبكي وراها .. موتها صدم كاع البنات والخدم والعبيد .. واكثر وحدة حزنات عليها هي يمامة ..من اول نهار ليهم وهما صحابات حتى لاخر نهار ..
دفنوها ودارو ليها الصداقة وتفرقات الدعوة وبالليل نفارد الامير فجناحو شاد ولدو فيدو كيشوف فيه بأسى وهوا كيحل عينيه ويلعلب بيديه الصغيرة
باش جبهتو وسد عينيه مطولا حتى سمع الباب تحل ودخل عبد حادر راسو قاليه مولاي
يمامة فالباب
حرك ليه الامير راسو بالايجاب ومشا العبد دخلها ودخلات مهبطة راسها بأسى وقربات منو بشوية كتشوف فيه وقالت ليه
مولاي ؟
هز عينو وناض وقف قرب منها مدو ليها فيدها وقاليها
حسني تربيتو .. وردي ليه البال
هبطات عينيها كتشوف فيه ويديها كيترعدو بالخلعة ماعمرها توقعات تشد طفل صغير تربيه ولا تكون ام ليه وعمرها تخيلات راسها أم وبين ليلة ونهار كتولي ام فجأة
بقات ساكتة وبلعات ريقها قالت ليه انا غندير ما فجهدي باش نطبق وصية متعة الله يرحمها .. غندير جهدي واكثر
دار يديه وراه وهز راسو كيشوف فيها مطولا وقاليها وجدي راسك غنمشيو من هنا
قالت ليه باستغراب فين غنمشيو؟
قاليها غنمشيو لبلادنا فالمغرب..
هبطات راسها قالت ليه واخا وخرجات معنقة اصيل الصغير وخرج وراها الامير مشا لجناح السلطان وفيدو ورقة .دخل لقاها جالس كيقرا القرآن مربع ومشا وقف قدامو فصمت حتى سد السلطان القرآن وتنهد وطلق رجليه جلس نيشان عاد جلس جنبو يور وحط ليه الورقة قاليه
هادي البيعة ديالي على قرطبة .. انا كنبايعك سلطان عليها
تصدم السلطان من هاد القرار بقا غير كيشوف فيه متوقعش ابدا ولو شوية يبايعو وكان متوقع يدخل معاه فصراعات لاكن وقع ما لم يكن فالحسبان ، حاول السلطان يستافزو باش يخرج اسوء مافيه ويشوف شنو فراسو وقاليه
لو كنتي سلطان حقيقي ماتبايعنيش وتموت على بلادك .. ولاكن واضح باللي ماتستاحقش تكون سلطان اصلا
بقا يور ساكت كيشوف فيه ببرود مطولا وقاليه
قول عليا اللي بغيتي .. المهم انا راجع بحالي احسن ليا وللجميع ..اللي كيستاحق السلطة غادي يبان مع الايام
ناض بغا يمشي وناض السلطان وقف كيشوف فيه بغيض قاليه ماكنتش متوقع منك تنازل بهاد السهولة !! خيبتيي ضني فيك
شكت يور مطولا وقاليه واش ماشي حسن ما تنوض الحرب بيناتنا وتفكك البلاد كما سبق وقع لينا حتى خسرنا قرطبة؟
واش ماشي احسن نتنازلو الى كان التنازل فصالح هاد القوم وهاد البلاد؟
مكنسعاش لمصالحي الشخصية كنسعى للحفاض على هاد الرسالة .. البيعة ديالي فصالح الشعب وفصالح لاستمرارية ..المهم من هاد السلطة الحفاض على التوحد ونشر الاسلام وهادا هوا الهدف ديالي من اللول..اما السلطة ماحاطهاش من اولوياتي . مكنحاربش على قبل السلطة وانما عاى قبل ديني امولاي
حدر ليه راسو بهدوء وخرج من جناحو ماخلاش ليه فين يزيد وتأكد السلطان من كلام روح الندى اللي سبق ليها وقالت ليه باللي مكيسعاش للسلطة ..ماعندوش هدف يكون سلطان باش يمشي متكبر فالارض وانما هدفه فنشر الاسلام اولى وجات الفرصة فين برهن ليه يور وزاد بين ليه باللي تيقته فيه كبيرة بالبيعة ديالو ليه وكيشوفو مرتبة اللي السلطان براسو مكانش متوقعها عند ولده .
دخل السلطان بلا صوت بلا صدع الحضور لجناح روح الندى لقاها ناعسة وجهها صفر وحداها طاس نحاسي كترد فيه والوصيفات جالسين فجنابها ..
غير دخل وقفو حدرو الراس خرجو وتقدم كيشوف فداك الطاس ويشوف فيها ناعسة شاحبة والشك غيقتلو كيربط بين الرؤية والحقيقة كيلقاها هي نفسها لاكن ماقادرش يصدق نفسه وكيتمنى يفوق من هاد الكابوس.حلات عينيها بتعب ويدها على فمها بغات ترد ..بدات تفتف بيدها حتى حط ليها الطاس قدامها ردات فيه وهزات راسها كتنفس شافت فيه وتصدمات بقات ساكتة
حيد داك الطاس بعدو وقاليها بتشكيك
مالكي شنو كيضرك ؟
دارت منديل على فمها قالت ليه ضربني البرد وزيد الفقصة ديال هاد السفر والمشاكيل
قاليها هادي ماشي قضية مشاكيل ..هاد الرضان وهاد الحالة فكراتني فوحم شهرزاد و شامة واسمهان
بلعات ريقها بزز قالت ليه شنو بغيتي تقصد؟
قاليها هادي حالة وحدة حاملة
دخل عليهم يور فديك اللحضة يطمن عليها لقاه معاها وحدر عينيه وجلس جنبها باس يدها وقاليها
كي بقيتي ؟ شوية
قالت ليه الحمد لله كنشرب العشوب اولدي
قاليها السلطان غتجي الحكيمة تفحصك نشوفو شنو عندك بالضبط
قاليها يور بصح خاصنا نعرفو شنو كليتي ..
قالت ليه انا باغا غير نرتاح ماخاصني لا طبيب لا طبيبة خاصني الراحة ..هادشي اللي خصني
باس يور يدها وقاليها غنأجلو السفر شوية حتى تبراي
شدات فيدو زيرات عليه قالت ليه لالا قادرة نسافر ..اصلا غنسافر فالعربة الكبيرة وغنسافر ناعسة مكاين لاش تأجلو
ربع السلطان يديه هز راسو وقاليها مكاين مشية اروح الندى هاد الساعة حتى تصحي وتوقفي على رجليك .. الله يشافي
خرج خلاها متبعة ليه العين بالخلعة ..شدات فيد يور وقالت ليه شنو درتي ؟ بايعتيه
حرك راسو بالايجاب قاليها مابقا لينا منديرو هنا الى كنتي قادرة تسافري نسافرو غدا فالصباح
قالت ليه نسافرو عدا الصباح ..انا مليت من الجلسة هنا
حرك راسو بالايجاب وبغا ينوض لاكن شدات فيدو قالت ليه ولدك شخبارو .. ماقدرتش حتى نوض نشوف. اش واقع
طبطب على يدها قاليها فالحفظ والصون غير رتاحي انا مكلف بيه
تبسمات قالت ليه جيبو ليا نشوفو
قاليها رتاحي متفكري فحتى حاجة ..مزال تشوفيه وتلعبي معاه
تبسم وناض خلاها متكية مريضة تقول كلات السم . مهدودة وماقدراتش تصبر وغير ناعسة
بداو يجمعو حوايجهم وكل واحد فين مركن .. كيطوي كموستو
عقداتها مسعودة كتنهد وقالت لشادية
واهيا ناري توحشت القبيلة ..توحشت جيراني وحبابي ..توحشت دويرتي
قالت ليها شادية حتى انا امي توحشت البلاد والقبيلة ..توحشت صحاباتي وحتى ديك السرحة اللي ماكنت حاملة توحشتها
شافت فيامنة وهي مركنة مابغاتش تمشي وعاطياها للبكى والنحيط حتى شيرات عليها مسعودة قالت ليها نوضي الله ينوض جلدك ..جمعي شراوطك ولا غنوض نشتف عليك ..
سدات يمامة الصندوق اللخر من صنادقها وجمعات حوايجها وحوايج الاصيل الصغير وحطات كلشي جاهز ومشات هزاتو من فوق الفراش خرجات بيه كتقلب على شادية حتى وصلات لبيتها ودخلات عليهم لقاتهم كيطويو حوايجهم .. بقات كتشوف بنص عين وترمش فمسعودة وقالت لشادية بارتباك
الى بغيتي ترضعيه مارضعش مسكين
ميعات مسعودة ودورات وجهها هازة نيفها وشادية كتشوف فيها بنص عين ومدات يديها قالت ليها اريه
عطاتو ليها يمامامة وجلسات قاطعة الحس كتشوف فيديها ومسعودة كتنفخ وتسوط قالت ليها غير رجعي لبيتك غترضعو وتجيبو ليك
قالت ليها يمامة لالا غير خليني انا غادي نتسناه شحال ما كان ديال الوقت
نخزات شادية مها كتقوليها سكتي صافي لاكن مسعودة مابغاتش تسرط ليها وناضت خرجات خلاتهم جالسين وحدة كترضع ووحدة كتحسب الوقت وتسنى
شد اصيل الصغير البزولة كيرضع وبدا يضحك مع يمامة ويمد يديه ليها كيلعب وكل شوية يشوف فيها ويتخبا فبزولة شادية حتى بدات كضحك معاه وشدات ليه فيدو باستها ..تبسمات شادية ومسحات على راسو بشوية ورضعاتو بلا متهضر وحدة مع لخرى حتى نعس وناضت يمامة هزاتو وقالت ليها شكرا
سمحي لينا عدبناك .. غير ترصا الامور غادي نجيبو ليه مرضعة ترضعو
قالت ليها شادية لالا بلعكس انا نرضعو مكاين لاش تجيبو ليه مرضعة
عطاتو يمامة وقالت ليها شكرا اختي الله يرحم الوالدين
وخرجات داتو لبيتها حطاتو فالمهد ديالو وغطاتو قبل متنعس دخلات عندها عبدية مشات نيشان للمهد بغات تهزو لاكن ناضت ليها لغرابة اللي فيمامة وقفات قدامها قالت ليها شنو بغيتي ديري؟
قالت ليها عبدية حيدي من طريقي..شحايدير معاك ولد الامير فجناحك
قالت ليها يمامة انا الوصية عليه وانا اللي غنتحاسب عليه
قالت ليها عبدية لهلا يحوجك الالة راه عندو اللي يربيه ويرعاه
تعرضات طريقها يمامة ماخلاتهاش تاخدو منها واظطرات عبدية تمشي تشكي بيها للامير لاكن صدمها برده وقاليها خليه عندها انا عطيتو ليها وهي قادرة على تربيتو
قالت ليه عبدية البنت مامجربة ولاد ولا عمرها ولدات كيف غدير تربيه
قاليها خليها الى ماقدراتش ديك الساعة عندكم الحق تاخدوه وترعاوه بنفسكم
بغات تهضر عبدية لاكن وقفها بيدو قاليها خلي. هادشي كما هوا ادادا عبدية مانقصني صدع ولا هم .. وجدو راسكم الصباح مع الفجر غتقلع القافلة
تنهدات عبدية خرجات والصباح مع الفجر كل واحد هز رحالو وحوايجو ووجد راسو للسفر قبل ما تشرق الشمس .
خرج السلطان فداك الصباح واخا مكانش راضي على ديك المشية لاكن مابغاش يخلق المشاكل من والو وهوا اللي فالاصل طلب وتشرط ولباو ليه جميع الشروط مخلاو ليه مايقول.
خرج للساحة لقا العربة الكبيرة واجدة فين غتركب روح الندى وتنعس ولقا جميع الخدم والعبيد اللي جاو معاهم جاهزين للسفر ..شادية ومها ويامنة فعربة بوحدهم شي داخل شي خارج كيوجد راسو والعبيد فعربة معرية عامرة ماكلة وقوت مجموعين فعربات مصافين و عاد صحاب يور الفرسان اللي سبق ولتاحقو بيهم من تارودانت كل واحد راكب الخيل ديالو استعدادا لهاد السفر الطويل.
تنهد السلطان بعمق وقرب من عربة شادية ومها خرجو منها كاملين حادرين الراس ..تبسم ومسح على راس حفيدته وباس يدها وتلفت هز راسو فالسما ومشا لعربة صغيرة فيها الوصيفات ويمامة جالسة شادة اصيل الصغير
تصدمات فاش شافتو من بين الاتواب وناضت خرجات حدرات راسها وحتى هوت استغرب من رحيلها واكثر واحد طاحت عليه السما فاش شافها هوا حكيم اللي كان مرافقالسلطان فداك الصباح
عرا على وجهه اصيل الصغير وباس يدو ودعا ليه حتى هوا بالبركة وشاف فيمامة قاليها غتمشي معاهم ؟
قالت ليه الى سمحتي امولاي..حيتالمرحومة وصاتني عليه وانا اللي مكلفة برعياته
شاف فيه حكيم بنص عين حادر راسو كيتسناه يمنعها ولا يقولشي كلمة لاكن خب ضنه فاش قاليها السلطان حفيدي امانة فرقبتك اسبأ..
باست يدو وطلعات فالعربة مرتاحة اخيرا بل غطق من الفرحة وتحمسات للسفر اكثر من اي واحد. بركم حكيم وقال للسلطان مولاي ..وقرارك اللي خديتي فحقي وحقها
قاليه السلطان نسا القرار وكل مافات .. واش مبانش ليك باللي حفيدي خصو ام بحال سبأ..واعية وقارية ومتعلمة ..وفوق هادشي دكية
بقا حكيم ساكت مزادش نطق وتبخرات احلامه فالهواء الطلق..بان ليه يور جاي جاهز للسفر وجنبه روح الندى شادين فيها الوصيفات كتقول غير امتى نخوي البلاد..
شافت فالاصيل بنصعين ووقفات و رايور اللي وقف يودع الاصيل وحدر ليه راسو قاليه مولاي..سمح ليناالى كنا تقال على القلب.
تبسم السلطان وفتح ليه يديه عنقه قاليه بلعكس اولدي..نعم الاولاد والترابي..طريق السلامة والله يكون معاك نتا والعشيرة ديالك
تبسم الامير قاليه شكرا امولاي..
رجع باللور ركب على العود. الكحل ديالو وضرب برجلو غادي كيجري على طول القافلة يشوفشنو ناقص شنو زايد وبقات روح الندى مهبطة عينها كتشوف فالارض وقالت ليه خلينا ليك الراحة امولاي..سمح لينا على كلشي الله يعاون
بغات دوز لاكن وقفها بكلامو وقاليها كيتأمل فتعابير وجهها
كنتمنى متخيبيش ضني فيك .. منتمنى ترجع المياه لمجاريها شي يوم
بقات ساكتة كترمش فالارض ومشات ركبات عربتها وبعدات التوب لقاتو واقف كيشوف فيها وبقا هاكاك حتى قلعات القافلة وبداو الفرسان كيكبرو ويسميو الله بصوت واحد وهما خارجين من القصر حتى بقات اخر عربة غادية هي اللخرة هازة القش والتبن ولعلف للماشية لحق عليها الطباخ محبوب يامنة والرزمة على ضهرو كيجري طلع فيها وتكمش جنب العبيد
مع الضهر والقافلة فطريقها وصل مرسول لقاضي لقضا وكان مرسول صادم بالنسبة ليه بحيث كانت كتوضح ليه الامور وخبراتو بغيابها وعدم الرجوع والرحيل الى الابد وبلا ميحاول يبحث عليها ولا يوصل ليها ..جاتو صدمة على قلبه ماقدرش يتحملها وطاح فبلاصتو مرض وتأزم ولزم الفراش وفيديه الرسالة مابغاش يطلق منها ..كانت صدمة قوية على قلبه جبداتو شهر فالفراش ونهار على نهار كتساء حالته حتى صبح واحد الصباح مفارق الحياة من شدة الحزن والاسى .
مرت سنة
فالقلعة نازل محمد اصيل الصغير كيجري وتابعاه يمامة من اللور كتعيط حتى خرج فالامير يور طالع مع الدروج شدو هزو فالسما قاليه فين هارب؟ فين كتجري ؟
وقفات يمامة كضحك قالت ليه من الصباح وانا كنجري موراه سخفني
ضحك قاليها علاش مكاينش البنات اللي يعاونوك. فيه؟
قالت ليه كاين..
مشا هازو فيدو ودخل عند روح الندى لقاها واقفة قدام المرايا كضحك وتلبس حوالقها وتلفتات عنده قالت ليه شكون جا. عندي
حلات يديها عنقاتو وقالت ليه كي داز الصباح فالموسم ؟
قاليها مزيان الحمد لله .. كي صبحتي ؟
قالت ليه مزيان كنحمدو الله ونشكروه
قاليها جيت نطل عليك ونخرج ..اصيل هاهوا معاك
خرج مع الباب غادي وتصادف مع شادية جاية ومعاها جوج من الخدم فجنابها ..اشمنك يا لباس واشمنك يا مجوهرات ..فيدها ترابي صغير كدور وتسارا بيه وغير شافتو تبسمات وقالت ليه مولاي.. نهارك مبروك
تبسم قاليها كيف داير ولدي ..
قالت ليه ساكت داير عقله
مسح على راسو وقاليها دخليه من الشمس باقي صغير
مداتو لوحدة من البنات اللي معاها قالت ليها دخليه ينعس ابدرية
شداتو بدرية دخلاتو وتمات شادية غادية جنب الامير وشادة ليه فيدو كدللع قالت ليه تشهينا شي نزاهة فجنان الزيتون . من نهار تزوجنا ما خرجنا للنزاهة
قاليها كيضحك كاع يامنا نزاهة ماشي ضاروري نخرجو برا
تنهدات بعمق قالت ليه احسن حاجة درنا رجعنا بحالنا..شفتي سبحان الله كلشي تقاد راسو بلا مانديرو حتى مجهود..بلادنا مكاينش ما حسن منها
طبطب على ضهرها قاليها مامتشي غير فين مشاك الله .. هادا حال الدنيا كتقلب ودور نهار ليك نهار عليك
باسها فخدها ومشا خلاها دخل جناحو حيد حوايج الموسم ولبس حوايج الصيد بحال عادته وخرج وقف برا لقا عابد حادر ليه الراس وقاليه
اش حب الخاطر امولاي
مسح الامير على يديه قاليه رسل ليا يمامة علمها باللي غنخرجو للصيد
يتبع...
التنقل بين الأجزاء