ذو التيجان الجزء السابع

وقف يور على وجهه وشاح والريح بحال العجاج كان نايض فداك النهار ويمامة دايرة القب على راسها وعليها سلهام كحل مطروز برموز ذهبي حتى للارض .. كيشوفو فداك الجيش من اعلى تلة وفدوك المدافع المتوجهة جهة اصوار المدينة ..قالت ليه مك والحريم ديالك والجيش كامل لداخل امولاي.. القوة دابا ماعندهاش باش تنفعك يقدرو فأي لحضة يضربو المدينة ولا يدخلو على القصر

زير على قبضة يدو قاليها خاصني نوقف هادشي قبل ماتبدا الحرب

خليك هنا بعيدة على المدينة ..انا عندي جيش فيه ميات واحد وكل واحد بمية راجل اخف من البرق

حركات راسها بالنفي قالت ليه فكر مزيان فشنو خاصك دير.. ميات واحد شنو غادي دير بيهم ؟

عقد حجبانو قاليها كما محاصرين المدينة غنحاصروهم من اللور بالسهام مغنخليو حتى واحد فيهم حر

قالت ليه وشكون ضمن ايك هاد الخطة غادي تنجح ..والوقت اللي غتخاصروهم يستنجدو بجنود اخرى من غرناطة ويرجعو يهجمو على القصر..انا قريت القانون فبلاد السلطان الاصيل..قريت على سيايستو للبلاد..عندو ثلات اقسام فالجيش.. قسم الجنود الضوئية واللي هما هادو كيواجهو مواجهة عادية ..وعاد ماشي كاملين جايبين غير جزء منهم..وقسم السيف القاتل اللي مدرب تدريب خاص بفن محترف وكيتكون من عشرين الف مقاتل.. والقسم الاخير اشباح الليل ..اللي متعرفهم منين خرجو ليك وهما متخصصين فصنع المكائد وكيتقننو فن الصيد للفريسة بكل سهولة .. يعني ماعندكش كيفاش دير والحرب ماخصاهاش تنوض..ماشي لصالحك ..ماتنساش باللي اللي قدامك خوك دابا ماشي عدوك ..

تلفت قاليها وشنو اللي خاصني ندير؟ مكاينش حل اخر من غير نواجهه واخا يكون خويا ..هوا جاي يحارب خوه وانا ماغاديش نحني ليه الراس

تنهدات كتشرف فداك الخشد قالت ليه يمكن معارفش؟ ولا يقدر يكون عارف وجا يضرب عصفورين بحجر واحد..ينتاقم لباه ويمحي ليك الاثار ..ماتنساش دابا راك كتشكل خطر كبير عليه وعلى الولاية ديالو من بعد..يعني حلم السلطنة تبخر عند الامير وخاصك ترد بالك منو ..هوس السلطة كيقتل امولاي

تلفت قاليها وشنو الحل؟ نفضي هاد الروينة بلا منسيل الدم؟ واخا الدم غادي يسيل والى تهدنات دابا غتنوض مرة اخرى

هزات راسها كتشوف فالامير سلطان اللي كان فالواجهة على عودو كيمشي ويجي ويشوف فاسوار المدينة وقالت ليه بتمعن

شد راس الافعى ..الى شديتي راس الافعى غتتحكم فالديل واخايكون كبر منك .اما الى شديتي الديل غادي تلوى عليك وتخنقك

صغر عينيه كيتأمل فالجيش ويستوعب كلامها وحرك ليها راسو بالايجاب قاليها الله يسلم ليا دماغك الذهبية هادي ايامامة

تبسمات هازة حاجبها كتشرف فالامير وقالت ليه بمجهود قليل غتقضي على حرب كبيرة .. شد الامير سلطان واسره عندك ..خليهم بلا قائد تالفين خايفين ..وغادي يخضعو ليك من الصغير للكبير ..الى طالبوك بفدية ولا ساوموك ماتعطيهمش الامير ..خاصو يبقا تحت يدك حتى يفيق الاصيل..اما الى سلمتيهم الامير فعول على حرب خت هادي غادي تصيبنا منهم مادام السبطان اصيل طريح الفراش..هاكا غادي تسيطر على غرناطة من اولها لاخرها

تلفت قاليها والى ماصحش السلطان؟ ومات ؟

شافت فيه قالت ليه ديك الساعة غتسلم ليهم الامير..ولاكن ماشي كامل..غير راسو ..

تلفت قاليها راسو؟!!!!

حركات ليه راسها قالت ليه راس واحد اللي غيبقا ..يا راسك يا راسو ..حيت راس واحد اللي غيبقا بغيتي ولا كرهتي..ماتناس امولاي راك ولد الاصيل ..والاصيل عندو ولي العهد دابا ..والعرش كيبغي واحد ماشي جوج .نتا قدام اكبر حرب تقدر تخوضها فحياتك .. .. يا اما نتا وحاشيتك.. يا إما الامير سلطان وحاشيتو ..هادا علاش فطر بيه قبل ميتعشا بيه واسرو عند وماتخليش الغبار ينوض

فكر فالحل اللي عطاتو لقاه مناسب باش يوقف داع العجاج اللي ضاير بمدينتو.. تلفت عندها قاليها دابا بقات حاجة وحدة..الطريقة باش نخطف الامير من وسط داك القوم

قالت ليه ساهلة !! غادي ترسل ليه رسالة مع شي واحد من حاشيتو يقول ليه باللي السلطان فاق بغا يشوفك ..وفاش يشد الطريق ويبعد تما طير عليه شدو وغبرو غبرة جهد اللي مايوصلوش ليه الجنون

قاليها موحال يتيق بالرسالة

ضحكات قالت ليه. كن متأكد غادي يتيق.. تلقاه مخلوع دايخ من جهة السلطان ..ماعارف اش يدير حيت سلطان بحال الاصيل راه هبته حية واخا طريح الفراش..غيمشي كيجري واخا يكون متأكد كاع منها كدبة..غير سمية الاصيل غادي تديه يتأكد .. وهادا اكثر وقت مناسب..حيت مرتاح من جهتك ومتأكد من قوته والحصار اللي داير ليك وكيضن انك لداخل ..وحتى واحد ميقدر يخرج من القصر لا جسوس لا رسول..هوا متأكد انه سيطر عليك ومتحكم فالوصع كله .. ماعند الذبانة فين تزتنرن ..وغادي يكون مفتاخر براسو وبقوتو دابا وهوا سلطان زمانو وعايش اللحضة..وفرحتو بهاد القوة وحماسو غادي يخليه يمشي بوحدو بلا خوف بلا توثر.. غير توكل على الله

قاليها هادشي اللي كتقولي مستحيل ..مستحيل واحد من الجنود يقبل بهاد الكدبة .

حيدات قلادة من الذهب فعنقها عطاتها ليه قالت ليه هادي غادي تخليه يتفد بلا ميتفنفن ..ختار غير الكمارة المناسبة وستعين بواحد من دوك الجنود اللي بقوة ميات راجل يوقف معاك .

قاليها ونتي فين غتمشي؟ شنو غادي ديري؟

قالت ليه انا غنتسناك عند الواد

سكت مصغر عينيه قاليها لا ..انا غنديك فين تسنايني تبعيني

ضرب الخيل برجلو مشا كيجري وتبعاتو طلعها لواحد الجبل عالي وفقمة الجبل ارض واطية وهبطة غارقة مخيفة وقاليها نزلي من فوق الفرس غنديها معايا عند صحابي

شافت ديك الهبطة المخيفة المضلمة وقالت ليه منقدرش نبقا. هنا بوحدي..هاد البلاصة كتخلع

قاليها من بعد فاش دخلي ليها غتحبيها اكثر مني.. اري يدك

شد فيها هبطها وزاح واحد الحجرة كبيرة حيدها دخلها فدخلة صغيرة مضلمة مهبطة راسها وشادة ليه فيدو حتى فاتو داك الضيق ولقات راسها فمغارك فاباطن الارض وسط كنوز وذهب مضيئة كتبري ورمال من المال لا تنتهي وحلات عينيها مصدومة قالت شنو هادشي

قاليها بقاي هنا جلسي حسبي ليا شحال ديال المال حتى نرجع عندك

ضوا ليها باقي الشمع من شمعة وحدة كانت تما ضاوية وخرج خلاها جالسة حالة فمها فديك الكنوز العضيمة

مشا خلاها جالسة كتشوف فداك الكنوز ومشات كتجري نقزات وسط ديك الرمال الذهبية وبقات كطير من سنسلة لسنسلة ومن خاتم لخاتم وتلبس ووتعلق وتجرب هادي وهاديك ..اما السلطان مشا ينفد الخطة ..ولاكن ماشي كما عطاتها ليه ..فضل طريقة اخرى للخطف ومشا عند صحابو اللي ساكنين الجبال وناصبين لخيام وختار من بينهم فتاح وانطلق هوا الرياض فين ناعس السلطان الاصيل لقاوه كامل جنود مطوق والرجال منتاشرين فالمنطقة كلها ..استهدفو واحد فيهم ونتروه بحال التمرة من الشجرة خطفوه ضربوه وفضلو يكتفوه بعيد على انهم يقتلو مسلم ويمشي على يدهم شهيد.

حيدو ليه لباس الجنود لبسو فتاح وتنكر فيه ومشا نيشان لمكان الحصار تقن الدور على اكمل وجه ودخل بين الجنود بسهولة عند الصدر لاعضم حنا ليه راسو وقاليه عندي رسالة للامير سلطان

قاليه الصدر الاعضم عطيني الرسالة

قاليه فتاح الرسالة قولا ..مولاي السلطان محمد اصيل المرتضي بالله فاق من غيبوبته ..وطلب يشوف الامير سلطان فأقرب وقت

تفاجأ الصدرالاعضم وتلفت مشا حدر راسوللامير خبرو وناض الامير على وجه السرعة ركب حصانه وكان غايرافقو الصدر الاعضم لاكن منعو الامير وقاليه نتا غتبقا هنا تراقب الوضع مكاني والى وقعات اي حاجة ماشي فصالحنا نفد الامر واخا منكونش حاضر .

خرج الامير مرفوق بثلاتة ديال الجنود شدو الطريق ومعاهم فتاح بنفس لباسهم اللي كان فوق الخيل هوا الاخير حتى وصلو لنقطة الالتقاء ومشا جنب واحد من الجنود ضربو بيدو لصدرو طيحو من فوق الخيل وضرب الثاني برجلو اللي هز فوق الخيل لضهرو طيحو وشهر الامير بسرعة سيفه فاش شاف الخطر حاط بيه ..خرج ليه السلطان يور على رجلو فالطريق بوشاح على وجهه كحل ملثم وكان فيدو غير الخنجر الكبير ديالو ..رفع الامير وجهه بقوة قدامو ضن انه قاطع طريق ونزل يواجههم بجوج .. هز السلطان يور يدو قاليه حط السيف وصلم راسك بلا ما نرقو الدماء .

ناضو الجنود الجوج اللي طاحو شهرو السيف جيجريو لاكن توالاهم فتاح بسيفه بحال الطاحونة لوسط فجود خطوات طيحهم بجوج بلا ميقتل ولا يجرح ..شاف الامير خفة البرق اللي طاحو بيها الجنود ديالو لاكن مابغاش يستسلم .. خشا السلطان يور الخنجر فحزامو وطلق صبعانو كيشوف فيه خلاه حتى هجم عليه وبقا فكل هجوم كيخوي بحال البرق ويشوف فيهم ويقرب منو حتى لقاه الامير مور ضهرو واقف ضرب ليه يدو طيح السيف وجمع ليه رجليه بجوج فحركة فنية وبرك ليه بصبعانو على نقطة فعنقو. غاب وهزو فوق الخيل. داه

وصل للمخيم اللي بين الجبال وحطو امانة عند فتاح وصحابو كرموه مزيان ..دارو ليه احسن تكتيفة وجلسوه وسط خيمة بحال السجن ماعندو فين يدور . اما يور حيد ليه عبايتو اللي على ضهرو خاتمو ومشا هوا وصاحبو الحمق اللي لسانو ديما راميه فزوبية معاهم رجعو لارض الحصار وهاد المرة وقفو وراه الجيش مباشرة تمعنو فيه مزيان وضربو الدورة جاو قدام حكيم اللي تصدم ماعرفو منين خرج وبسرعة امر رجاله يشدوه..لاكن يور لاح ليه العباية قدامو قاليه هادي عباية اميرك سلطان .. وهادا خاتمو

هز الخاتم بين يديه ..

تزعزع حكيم قاليه ميمكنش؟!

حيد يور اللثام على وجهه قاليه اميرك فقبضة يدي ..واللي جاب ليك خبار السلطان واحد من رجالي.. ودابا غنخيرك بين جوج ..غترجهو لاراضيكم في وسلام ..ولا غادي نرسل ليكم راس السلطان مقطوع

هز حكيم راسو قاليه وعندك الجرأة تقتل خوك ؟!

رفع يور راسو قاليه وعندك الجرأة تقتل ولد السلطان ؟ وعندو هوا الجرأة يقتل خوه؟! الحرب بحال البعث مكتعرفلا اخ لا اب.. ودابا ختار بين هادو

قاليه حكيم غادي نرجعو اراضينا..ولاكن بأميرنا

رد عليه يور قاليه الامير سلطان امانة عندي حتى يفيق السلطان ويجيياخدو بنفسو ..من غير السلطان ..حتى واحد ميقدر ياخد مني الامير .. والى تهورتو غادي نعجل اللي اجلت

بقا حكيم ساكت وتلفت ليه احمد يافع رأيس الحرس قاليه خصنا نرجعو .. فسبيل الامير وسلامتو خاصنا نرجعو

هز حكيم يدو شار للجنود اللي وراه باش يبداو يجمعو رحالهم وتلفت يور امر جنودو اللي نعاه يبقاو فبلاصتهم حتى يرجعو ومايبقاش الاثار ديالهم ول اديال الحصار ودخل للمدينة اللي كانو ابوابها الكبيرة مقفلة وتحلات وتضربات اجراس الهدنة وخرجو الجنود اللي سطاو عليها من لداخل عاد قدرات المدينة ترجع حياتها وانشطتها ، طلع الامير للقصر ودخل فوق الخير والكل كيجري حدر ليه الراس وكيتهفو باسمه وينصروه حتى دخل ومشا مباشرة لجناح روح الندى لقاها ففراشها ناعسة مريضة وقرب منها فكل خطوة كيشد عينيه ويحلهم وكيتفكر شنو دارت فيه ..وقف جنبها فالسرير وغير شافتو ناضت وقفات كتقيس ليه وجهو وتعنقو وتقوليه رجعتي؟! رجعتي ليا ولدي رجعتي ليا الروح ديالي

بقا واقف متحركش حتى بردات ورتاحت قاليها الحصار تفك ..ورجعات المدينة لاستقرارها ..مننوع عليك تخرجي من باب القصر منعا كليا

لاح كلمتو وخرج قابل ذو الفقار امرو باش ياخدو الحذر ديالهم وميأمنوش للحصار للي تفك ويردو بالهم مع الجواسيس وخرج حامل معاه من القصر طعام وقوت وماء وطلع للجبل دفع الحجرة ودخل لقا يمامة ناعسم وسط الهب كلها لابسة ومعلقة ومعنقة مضمضة وفرق راسها تاج

دخل للمغارة لقاها ناعسة وجلس بدا كيشوف فيها ويضحك وتكا يرتاح حتى داتو عينو ..فاقت من بعد نومة عميقة بغات تجلس لقات راسها تقيلة بالذهب.. دورات راسها لقاتو ناعس متكي على واحد الصندوق لاكن حل عينيه فاش سمع صوت التخرشيش وشاف فيها وهي مزنكة كدور فعينيها وتسوس راسها وقالت ليه بابتسامة وارتباك

كنت غير كنقيس امولاي وصافي

ضحك وقاليها اجي تاكلي من لبارح ماكليتي

حدات داكشي اللي كانت معلقة ومشات جلسات حداه وشعرها كامل عامر بالذهب وكل حاجة فين لاسقة ..دورات عينيها فديك المغارة وقالت ليه واش هادشي كامل ديالك

سرح عينيه فداكشي قاليها والى كان ديالي شنو الفرق ؟

قالت ليه ومشيتي وسمحتي فهادشي؟؟ واش كاين شي واحد كيسمح فهاد الكنز كله

تنهد وقاليها اجي تاكلي..الكنز راه ماكيتكالش

طلات على القوت اللي جاب ليها ودارت يديها كتاكل وقالت ليه

واش نجحات ليك الخطة

هز عينو شاف فيها مطولا وابتاسم وحيد ليها حلقة معلقة فشعرها قاليها نجحات ..ماعندي مانتسالك.. كولي باش نرجعو للقصر

كملات ماكلتها حتى سالات وناض نوضها من يدها وهي كتشوف فداك الذهب وفمها محلول وقالت ليه كتمتم

خلينا جالسين هنا شوية

هز يديه كيتكسل قاليها هزي اللي حبات خاطرك من هاد الكنز واللي تقدر تعمر عينيك ويالاه نمشيو

مشات كتشوف فداكشي وهي في حيرة قالت مع راسها وعلاه العين كتعمرها شي حاجة من غير التراب…هادشي راه بزااف منين غنبدا؟!!

بقات كدور وهوا واقف كيشوف فيها وكل مرة تهز حاجة وتطمع فحاجة اخرى وتحط اللولة وتهز الثانية حتى عيا يتسنا وقاليها سربي راسك الضلام غيطيح ..والى طاح الضلام غيخرجو الجنون اللي كيحضيو الذهب يضربوك

حلات عينيها مخلوعة وبقات كدور بجنابها وهزات المضمة اللي كانت معنقة وتمات جاية ورجعات تاني كتجرب حلات جلايلها بدات كتعمر فالذهب وتمات راجعة عندو متقلة وهوا هاز حاجبو كيشوف فيها ..تنهد وخوا ليها جلايلها قاليها نتي باغا تفضحينا ..الفتنة ديالكم هي الذهب

هزات حاجبها قالت ليه ونتوما الفتنة ديالكم النسا..

عقد حجبانو قاليها طوال ليك اللسان

دورات وجهها ساكتة وهزات كتفها وهوا كيخوي ليها جلايلها وجرها بغا يخرجها لاكن تحنان بالزربة هزات واحد الكمشة وخرجها من تما بزز ورجع الحجرة بلاصتها وحيد ليها الذهب من يديها قاليها شنو غديري بهادشي ؟

قالت ليه نقدر نحتاجو نشري بيه شي حاجة

قاليها ماعندك ماديري بيه

حلات عينيها مخلوعة فاش بغا ياخدو وقالت ليه غير عطيه ليا والله منقولها لشي واحد

ضحك بسخرية كيدور راسو قاليها تقوليها لشي واحد! وتقدري بعدا

دورات وجهها حتى لقات يدو على راسها وبلا متشعر داتها عينيها حتى قرا شنو فراسها وصعر عينيه شاف فيها وهي كتحل عينيهت قاليها صافي هادا جهدك؟

استغربات قالت ليه شنو ؟

قاليها جهدك تبهاي بيه بين الخدم والحريم !!

بقات ساكتة مهبطة راسها قالت ليه وشنو فيها حتى هما كيفقصوني ويطرطقو ليا مرارتي

رد ليها الفلوس من بعد ما خواهم فكميميسة صغيرة قاليها سوقكم سوق خاوي .

طلعها فوق الخيل معاه قدامو جالسة بالجنب وعطا رجلو للريح وهي كضحك بوحدها حتى قرب يوصل وبدا العود يتمشى بشوية. وطل عليها قاليها الطريق كلها ونتي كضحكي شنو اللي كيضحك

دخلات يدها بين يدو وخصرها وقالت ليه صافي مغنبقاش نضحك

ضرب العود كمل طريقو كيضحك ودخلو للقصر نزل وهبطها قاليها سيري وحضري عقلك ..مانخليش شيطانك يغلب عليك

حدرات راسها بابتسامة ورجعات دخلات ومع الدخلة جمعوها الخدم بكموستها طلعوها لجناح روح الندى اللي كانت كتسنى فيها وحطوها قدامها ..دورات يمامة راسها فجنابها مافهمات شنو اللي وقع وضارت عندها روح الندى رافعة راسها قالت ليها

بلا زيادة فالكلام ..غتقولي لي فين مشيتي نتي والسلطان ومنين جيتو ..بالحرف

حلات عبدية الكموسة قدام عينين روح الندى لقات فيها مضمة وفلوس وهزات راسها كتغامز هي وروح الندى على يمامة اللي هبطات راسها كتشوف فرزقها وتتحصر

بقات يمامة ساكتة وروح الندى كتشوف فداك الذهب وقالت ليها

منين جاك هادشي

دخل عليهم السلطان فالوقت المناسب لقاهم فديك الوضعية .. بلعات روح الندى ريقها وخبات عبدية وجهها اما يمامة سدات عينيها ورتاحت ورجعو دقات قلبها كيتساواو ..

رفع راسو كيشوف فروح الندى وقال كيوجه كلامو لعبدية

هزي الذهب رجعيه لمولاتو وديها لمكانها

جمعات عبدية الكموسة هزاتها وناضت يمامة خرجات حانية راسها ورا عبدية وبقا السلطان وحه لوجه هوا ولاللة روح الندى وقالي ليها شنو كتحاولي ديري بهاد التصرفات ديالك؟

هبطات عينيها كتمتم مالقات ماتقول ولا باش تجاوب وقرب منها وقف قدام وجهها هز صبعو قاليها غلطة وحدة .. غتغلطي غلطة وحدة غنجردك من السلطة ديالك وماتبقا عندك حتى صلاحية لشي امر من الاوامر ديالك..

ضار بغا يخرج وقالت ليه من حقي نعرف شنو كيوقع ؟؟ ومنين جابت الذهب وفين مشات وشنو واقع فالقصر

تلفت رجع تقابل معاها وخزر فيها مزيان وقاليها

اخر حاجة كنتمنى نديرها هي نطلع قرار بالاعدام ديالك ..

رجع وجهها صفر وتلفت بغا يزيد لاكن رجع شاف فيها باشمأزاز وقاليها مامختالفة على الاصيل فحتى حاجة..حسن ليك ردي بالك

خرج مشا طالع ليه الدم وذو الفقار تابعو وهز ليه صبعانو وهوا كيتمشى قاليه جيب ليا يمامة فالحال

دخل لبيتو ورجع ذو الفقار كيجري مشا لقا عبدية عاصراها فواحد القنت باغا تخرج منها العضرة ووقف قاليها مولاي طالب يمامة فجناحو وفالحال

رجعات عبدية اللور ودفعات ليها كموستها شداتها وخلاتها تبعات ذو الفقار نيشان لجناحو ودخلات مهبطة راسها لقاتو كيتسناها ويديه وراه ..تلفت عندها قاليها انا كنتيق فيك ..امنتك على اسراري..وقربتك مني.. واش مستاعدة ضحي على قبلي ؟

هزات راسها قالت ليه اه مستاعدة امولاي

حرك راسو بالايجاب قاليها ولو يوقع اللي وقع ..حتى واحد ماخاصو ميعرف بشنو طرا ..لا فين مشينا ..ولا منين جينا..ولا حتى لكلام اللي دار بيناتنا تفاهمنا

حركات ليه راسها بالايجاب وناضت مشات خايفة والدموع فعينيها كتردد

اش داني كاع ..شداني لهادشي وهاد الموصيبة اللي طيحت فيها راسي

دخلات عبدية عند روخ الندى لقاتها كتبكي جالسة وقالت ليها عييت فيها تهضر ولا بغات تنطق الاللة ..تقول سرطات لسانها

تلفتات روح الندى كتمسح عينيها قالت ليها هاد البنت خطيرة علينا .. خطيرة اكثر مللي كتصوري اعبدية..

استغربات عبدية قالت ليها وشنو الخطر اللي فيها؟

هزات روح الندى راسها قالت ليها قريبة من السلطان وصندوق اسراره .. وهادا هوا الخطير ..زيد على هادشي دارت تروة من وراه .. ثلاتين ناقة وفرس..والذهب..واش عارفة شنو كيعني هادشي؟ هي ثاني وحدة عندها الملاك من بعدي فهاد القصر.. يعني ماشي قريب تاخد بلاصتي وهادشي ماخصوش يكون ..خصها تكون بحال قراناتها ..تاخد الراتب ديالها بحالها بحالهم..ماشي يعطيها ليها مضاعف على جوج ..الى بقات هاكا غادي تقوى .. وهاد الجهد والقوة مغاديش يخليها تابتة وخاصها تخرجها ..وغادي تخرجها فينا حنا اللولين .

دارت عبدية يدها على خدها كتفكر وقالت ليها شنو المعمول

هزات روح الندى يديها حايرة وقالت ليها ماعرفتش..حاسة براسي تشللت ..خايفة وماعارفة مندير ومابقاش ليا الحق نتصرف..ولا حتى نخرج من القصر ..ومقاداش علاش مشاكل اكبر من هادي واللي خاصني ندير هوا نرجع تيقة ولدي بحال اللول .. والاهم نكسر تيقتو بيها . هادا اهم شيء قبل ماتقوى اكثر ودير فينا مابغات

رجعات يمامة للعمبر لقاتو خاوي ودورات عينيها كتشوف واش مكاين حتى واحد وهزات سريرها حطات تحتو الذهب وناضت نفضات يدها كتسوط من جهد الضغط وخرجات من العمبر تلاقات بصيرة فالباب شداتها مخرجة عينيها قالت ليها جيتي .. على سلامتك الغزالة ..عندك الزهر ..عندك الزهر خرجتي مع السلطان اما انا راه شاديني عليك شي جنون ماكرهتش نكرضك طراف

ضلام الحال فالقصر وكل وحدة شدات بلاصتها وتجمعات يمامة مع صحاباتها كيضحكو ويتعاودو

شدات فيها سمر قالت ليها عاودي لينا فين داك ..سعداااتك ياختي مكرهتش كن كنت فبلاصتك

تنهدات يمامة هزات راسها فالسما قالت ليها كن تعرفي فين كنت ..فالجنة ياختي ..جنة من الذهب

حلات سمر فمها قالت ليها حلفي..عاودي لينا بالتفصيل

هبطات يمامة عينيها تنهدات وشافت سرير شادية خاوي وقالت

اجي ..فين هي شادية ؟!!

ميعات سمر قالت ليها شادية ولات تحسب فراسها همة وشان ..شفت بصيرة عاوتاني داتها

كانت فهاد الاثناء شادية جالسة كضحك فرحانة وحناكها حومر بالحشمة وعبدية كدفر ليها شعرها وقالت ليها

كون بحالك .. يعيط ليك السلطان ويختارك من دوون البنات .. ايوا ديري عقلك ..كوني مرا وقادة .. سعديه يسعدك يا زينة البنات

هبطات شادية راسها حشمانة كضحك قالت ليها نصحيني انا مكنعرف ماندير

دارت عبدية يدها على نيفها حشمانة كضحك وكرشها كتهز ونواضرها كيضلو مكركبين قالت ليها لوكان كان الخوخ يداوي لوكان داوا راسو

ضحكو العبيد. من النسى وكانن مرى غلضة لون شكلاطي لابسة قفطان صفر ععادي ومكفضاه للحزام وسروال قندريزي والبلغة بقوة المشية والجري عواجت للجنب

لواه لواه الاللة عبدية ..تبارك الله عشتي فالقصور من ونتي صغيرة وجنب لاللة روح الندى لابد ما تكوني عارفة ماشي ضاروري تجربي

ضرباتها عبدية حشمانة وردات يدها على نيفها مدرقاه بطرف الحزمة اللي على راسها قالت ليها سكتي الله يمسخك وووك ووك

تنهدات شادية شادة فدفيرتها قالت ليها انا بغيتو يبغيني بوحدي ..مايبغي حتى وحدة من غيري

تحنات عندها زوليخة السمرا قالت ليها سمعي ابنتي ما ينفعك ..العمبر يدير منك عشرة وراه قرب يضرب الالف .. والزين غير مشتت.. ارا لينا شنو ورا هاد الزين..هاهي يمامة زينها مابحالو زين عينيها يقطرو بالعسل ورموشها يجرحو بالكحل وغادية وفشعرها كتكتر.. ومكيعيطش ليها للخلوة .. واخا بالزين كتقطر ..الزين ماشي هوا كولشي ابنتي ..العقل واللسان والحلو ..عرفي كيفاش تهضري وشنو تخرجي من فمك وخليه ديما جنبك ..ديري فراسك باللي ماشي وحدك اللي كاينة ..كاين مية منك ..

تنهدات شادية قالت ليها وشنو ندير نصحوني؟؟

قالت ليها عبدية نتي اللي غتعري..نتي اللي كنجلسي معاه وتعاشريه

سهات شادية قدامها قالت ليهم دابا يمامة حسن مني ؟؟

قالت ليها زوليخة اش قضات بيه !! .. الزين راه كيطلع فالراس..ويجي يوم يمل منو ..عطا الله مايدار باش تشديه تبقاي ديما جنبو

حنات شادية راسها بأسى قالت ليها انا ا اشنو غنعرف؟؟ غير بنت القبيلة مابيدي حيلة

ناضت عبدية وقفات ونوضاتها قالت ليها نوضي يالاه مشا الحال

ناضت شادية وقفات شهوة منها .. الدفيرة فالجنب والحوالق طوال من الفضة و التكشيطة فالابيض والمجدول مدلي .. تقدمات ورا عبدية ودخلات لجناحو بوحدها حادرة راسها لقاتو واقف طاوي يدو ورا ضهرو وكيشعل واحد الشمعك من شمعة اخرى ولباسو خفيف ضريف وتلفت عندها ابتاسم كيشوف فيها وقاليها قربي اشادية

قربات حشمانة باست ليه يدو وشد ليها حنكها هز ليها راسها كيشوف فعينيها وهي من الحشمة دورات وجهها ويالاه بغا يحط يدو عليها سمع الصدع قدام الباب وهز راسو مشا حل الباب بعصبية لقا يمامة واقفة فالباب مدايزة مع العبيد وغير شافتو رجعات اللور وهبطات راسها كتنهج .

قاليها شكاين ؟؟

حنات راسها قالت ليه قلت ليهم يخليوني ندخل ومابغاوش

قاليها بغضب رجعي للعمبر وماتجيش حتى يجيبوك العبيد

قالت ليه قلت يمكن بغيتي شي حكاية

حمر فيها قاليها رجعي للعمبر وماتخرجيش بلا اذن

شافت فيه بأسى قالت ليه بغيت نقول ليك شي حاجة

رجع حمر وسد عينيه بنفاد الصبر قاليها مغنعاودش كلامي

دورات وجهها بغات تمشي لاكن نتابهات لشي حاجة وهزات عينيها وراه شافت شادية بداخل من بعيد هزات يدها شارت ليها دارت كضحك باستفزاز حتى رجعات حمرا وخرجو عينيها وهزات راسها فيه قالت بغيت نهضر معاك

رجع اللور سد ليها الباب فوجهها وخلاها كتغلي واق فة على برا

مشات كتجري خرجات للجردة دالورد بلا عقل بقات نتف نتف وكرضات كاع الور ريشاتو ورفساتو حتى شافها عابد ومشا كيجري عندها شدها كيولو ويندب جرها هوا والعبيد داها للعمبر ومشا فيق بصيرة خرجها بحوايج النعاس قاليها شدي المتعوسة ربطيها الليلة كحلة زحلة

حلات عينيها قالت ليه شكون شنو وقع

ضرب فخادو قاليها الجردة دالسلطان رجعات رفيسك خصها شي كديدة وهاد الكديد هوا حنا وعقلي فين قلتها ليك

تبعاتو كتجري للجردة الخاصة بالسلطان وكانت غتسطى فاش شافت داك المنضر وبدات تهز فالورد وتولول وتردد

ياربي نكون كنحلم ياربي ميكونش هادشي بصح ..اويلي وحدي ..اويلي على غدايدي واش ندب وجهي ولا نتف شعري ..مشات كتجري للعمبر دخلات عليهم فيقات اللي ناعس بديك الدخلة ومشات قصدات يمامة اللي كانت مركنة كتسوط نوضاتها وعطاتها طرشة حتى طاحت وهزاتها من شعرها وقفاتها قالت ليها شكون نتي حتى تخرجي من العمبر وتمشي ترفسي الجردة ..شكون نتي يا الكلبة ..الصباح يجيبو خبارك تحركي والله فهاد العمبر لا دوزتي الليلة

جروها العبيد دارها لبيت خاوي مضلم مافيه حتى فرشة وسدو عليها خلاوها تما كتقفق بالخلعة وتغوت عليهم يحلو وتبكي فاللخر شدات واحد القنت كتقفقف جلسات فيه مكتشوف حتى حاجة ويبسات معاوداتش تحركات .

اما شادية دوزات مع السلطان ليلة معتبرة دايزها الكلام .. ماعقلات على حتى واحد..صبحات الصباح ناعسة جنبو وناضت فاقت هي اللولة كسلات يديها وتلفتات عنقاتو حتى فاق وضار عندها حل عينيه دوز يدو على شعرها قاليها صباح الخير

تبسمات قالت ليه صباح النور

دوز يدو على خدها قاليها كي صبحتي

..قالت ليه حسن من ايامي اللي دارت كلها

ناض جلس كيضحك مسح على شعرو و وجهه ولحيتو قاليها يالاه رجعي للعمبر الزين ديالي ورتاحي

باسها فخدها وناض وهي دور وجهها حشمانة درقاتو وناضت تخبات لبسات حوايجها وخرجات من جناحو خلاتو فحمامو الكبير كيدوش ومشات كتجري فرحانة دخلات للعمبر لقاتو خاوي ومشات بلاصتها طاحت عليها عنقات مخدتها وسدات عينيها كتخايل .

خرج السلطان من جناحو عوال يطلع الجبل وكان لابس سروال جلد وبوط جلد وسترك كحلة وعلى يدو ملوي السماطي دالجلد والاساورالحديدية والوشاح على عنقه وذو الفقار جنبه تابعو كيجري قاليه نوجدو ليك الخيل امولاي

قاليه رد بالك مع لاللة روح الندى مابغيتهاش تغلط..الى غلطات نتا اللي غتحاسب بلاصتها

حدر ذو الفقار راسو سكت وهرح معاه داز جنب الحديقة اللي كتبان من بعيد شاف الخدم كيشطبو الورد والجردة الخاصة بيه منتوفة وقرب مصدوم قال لذو الفقار شوو اللي وقع هنا؟؟ شكون اللي رتاكب هاد الجريمة فحق هاد الجردة

حدر ذو الفقار راسو قاليه جارية سيادتكم امولاي ..هي اللي دازت بحال الاعصار على الجردة الخاصة بيكم

تلفت عندو السلطان قاليه جاريتي؟ شكون هاد الكافرة بالله اللي تجرأت ودارت هادشي

قاليه ذو الفقار يمامة امولاي..من حمامة السلام لسقر كاسر ..وهادشي وقع لبارح بالليل

رجع وحه السلطان زرق وغزز سنانو مسح على لحيتو رافع راسو كيشوف فداكشي اللي اللي كيتشطب

وقف وسط قاعة من قاعات القصر الوسطانية هاز راسو والغضب كيمص الدم من عروقو لاكن كل داك الغضب مكانش باين على وجهه اللي ديما كيخي تعابيره الحقيقة مهما كانت ..شاف فبصيرة وعابد والخدم كلهم الرئيسيين كلهم اللي مكلفين بالخدم وقال

خرجات من العمبر وتسارات فالقصر كما بغات ..الخدم فين كانو فاش خرجات؟

بلع عابد ريقو قاليه غفلات كولشي امولاي ..وانا كنت عند لاللة روخ الندى طلباتني فجناحها ..فاش نزلت شفت ديك الفضيحة

تلفت شاف فبصيرة قاليها ونتي..شنو كنتي كديري ؟

بلعات بصيرة ريقها قالت ليه انا نعست البنات كلهم امولاي..ومشيت ننعس ..حتى جا عندي عابد قالي على اللي وقع

نزلات اثنائها روح الندى شافتهم هازة راسها بالتاج وقربات منو وقفات كتشوف فيهم ومازال معارفة شنو واقع .. تلفتات عند عبدية اللي كانت حداها وشوشات ليها فودنها قالت ليها على ما جرا وحلات روح الندى عينيها اللي تبسمو بمكر وبقات ساكتة كتفرج فداك الحساب ..شار السلطان بصبعو لبصيرة عزلها من خدمتها وعاقب الخدم الباقيين وخرج منها عابد كيحمد الله ويشكرو وفرقهم من قدامو وتلفت كيمد الغضب ديالو وقف كيشوف جهة الحيوط ويدو وراه كيفرد صبعانو مع بعضياتهم

هزات روح الندى راسها قالت ليه بهدوء. شنو غادي دير مع الجارية ديالك امولاي؟ غتخليها بلا عقاب ..شنو دنب بصيرة والخدم اللي معاها يتعاقبو بلاصتها

هز راسو قاليها ذنبهم خلاوها تخرج وماقدوش يحكموها..ما داروش الخدمة ديالهم اللي كان خاصهم يديرو ويراقبو كل صغيرة وكبيرة ..اما يمامة بنت صغيرة مزال طايشة .. اي وحدة بلاصتها كانت غادير مادارت

صغرات عينيها قالت ليه بتشكيك وشنو اللي السبب؟ اللي يخلي اس وحدة بلاصتها دير ما دارت ؟

سد عينيه مطولا كيرتاح من الغضب ديالو قاليها خلي فجناحك ..مللي مقدرتيش تتحكمي فالحريم وتهزي مسؤولية القصر ..فحسن بلا متسولي على شنو كيوقع خلي ذو الفقار يسير القصر بلاصتك احسن وعادي يسيرو حسن منك

عطا بضهره مشا خلاها واقفة كتغلي بلاصتها وسدات عينيها وحلاتهم بقوة وضارت شافت فعبدية قالت ليها بغضب.

سيري جيبي ليا الناموسة لهنا عندي وجمعي ليا كبار الخدم ونتي براسك معاهم تحركي ..ليوم غنوريكم السيبة كيف دايرة

تنهدات عبدية مشات نيشان عطات الامر لعابد يجمع الخدم ومشات بنفسها هي والعبيد يجيبو يمامة وحلو عليها الباب فداك البيت اللي مافيه حتى سرجم وضلامو كحل دفعوه ودخلو لقاوها طايحة فالارض وجهها صفر ويديها ورجليها باردين تلج

ردوها للعمبر قدام البنات وشادية حاضرة حطوها بلاصتها وسمر كتسول مالها وشنو واقع ليها ..اما شادية غير كتشوف فيها بنص عين ودور وجهها ..فيقاتها الحكيمة بدورشماتو ليها وناضت مهرسة قفزات مخلوعة وبدات كتهضر بوحدها وتمتم ..شافت عبدية حالتها ماشي طبيعية وشارت للعبيد براسها يحولوها لجناح انفرادي بعيد على البنات

اما السلطان ركب على الخيل خارج كيجري وماجات فبالو غير اللحضة اللي شد فوجههاالباب وشرد ومن موراها جات لقطة حميمية ليه مع شادية شرد فيها ورجع فاق من الشرود ديالو كمل طريقو مشا للجبل عند صحابو ودخل وسط المخيم قابل فتاح ونزل على الخيل قاليه

شخبار اميرنا؟ مهدن ولا كيدير البسالة

ضحك فتاح قاليه مهدن بحال القطة امولاي

قاليه السلطان عنداكم تكونو درتو ليه شي حاجة

ضحك فتاح قاليها ووووك كون كيف كان فالاول..ولاكن دابا تبت ورزن عجباتو الجلسة عندنا امولاي

مشا السلطان دخل للخيمة بوجه مكشوف هاد المرة لقاه جالس حاط راسو بين رجليه وساد عينيه .. شافو سلطان دخل وناض وقف شد فالقضبان وقاليه

غادي تندم غلى هادشي اللي درتي ..غتندم ودابا تشوف

هز السلطان راسو شاف فيه من فوق نيفو وقاليه جلس لارض بلا تهديداتك الخاوية .. وتسنا حتى يفيق باك ونتفاهمو على الحرب اللي علنتي علينا وعلى هادشي كامل

ضرب سلطان بيديه فالقصبان قاليه غدار ..حنا عطيناك الدعم والسند والقوة وطلعتي غدار

بقا السلطان ساكت كيشوف فيه وخرج من تما خلاه كيغوت بوحدو ومشا جلس صحابو دوز النهار فالمخيم وزاد اربع ايام اخرى جالس فيها تما بلا ميهبط للقصر حتى تخلعات روح الندى من هاد الغياب وخافت تكون وقعات ليه شي حاجة وجلسات كتسنا وكل شوية ترسل عابد ولا عبدية يشوفو واش رجع .. دخلاتها الزيت وعيطات لعبدية قالت ليها يور ربع ايام وهوا غايب وقلبي مامطمنش ..خايفة عليه من الغدر والاغتيال اعبدية

تنهدات عبدية قالت ليها دابا يرجع تلقايه ستحلى الصيد ونسا راسو ..هادا حالو .. المهم دابا جيت نقوليك المتعوسة راه ولات مزيانة ورجعناها للعنبر .. دابا شنو نجيبها ليك تصفي معاها الجو؟؟

نترات روح الندى يدها قالت ليها ماعندي خاطر ولا كانك ليها دابا وقتها غتوصل ونربيها ونوريها السيبة كيف دايرة.. انا دابا عقلي مع ولدي مقادراش نفكر فشي حاجة من غيرو

دخل فديك الاثناء السلطان للقصر ونزل على الخيل كينفض يديه داخل تعرض ليهطو الفقار حادر راسو

قاليه السلطان وجد ليا الحمام يكون سخون

دار على صينية ديال الفواكه هازاها وصيفة غادية بيها ووقف خدا حبة دالعنب معاه فطريق خشاها فمو وهز حاجبو قال لعابد

بغيت شي ليلة عمرها دازت ..مع بنات العمر كلهم هاد الليلة ….وتكون الفوق فسطح القصر بحال النهار اللول اللي جينا فيه لهنا ..

تبسم ذو الفقار قاليه السمع والطاعة ..

تلفت السلطان هاز صيعو وحاجبو وباينة عليه راشقة ليه قاليه كاع البنات ماتنسا حتى وحدة ..الا يمامة ..يالاه سير شوف شغلك

سوصلات خبار رجوع السلطان لروح الندى واخيرا رجع ليها عقلها .. ورتاحت وجلسات تفكر فحاجة اخرى من غير غيابو اللي كان شاطنها ..

تهز القصر بالفرح والافراح وكولشي ساق الخبار .. البنات صبحو فالقاعات كيتعلمو يرقصو رقصة وحدة والخدم طالعين نازلين كيبدلو الفراش لسطح من سطوح القصر اللي كيجلس فيهم السلطان ويشوف المدينة كلها من لفوق ..الطباخين كيتجاراو خدامين ويوجدو للعشا والشمعوع طالعة ..نهار كامل وهما كيجريو تقول العرس عندهم .. اما لاللة روح الندى كانت حكايتها حكاية .. واخا كلام ولدها الموجه ليها مكانش فيه اللعب لاكن صبرها تقادا .. استغلت الوقيتة اللي كولشي مشطون مع الحفلة ولبسات سلهامها وبلا ميشوف حتى مخلوق تسلات وجرجات من القصر فوق الخيل بالتخبية فنصاص الليل شادة الطريق جهة الرياض حتى قربات توصل وطاحت فمصيدة مكانت على بال الجن ..تخطفات خطفة وحدة وتهزات ماعرفات راسها فين كاينة وغبرات الغابر الضاهر .

اما بنات العمبر كانو ساعتها معاندات شكون تجي زوينة وتفوج على السلطان وتبهرو فالسهرة .. تعاندو وتسابقو وكل وحدة كتقول انا هي نجمة السلطان الليلة..اما يمامة فمكان عندها خاطر وماباغاش تحضر للسهرة ولا حتى تشوف الصلطان وتقابلو ..نزات خنافرها وبقات كطلع وتهبط فيها السدة دالباب اللي دار ليها فوجهها قدام شادية ..اييه شادية نيت اللي حداها كتلبس وتتزين وكانت بحال العروسة فلباس الشلحة هاد المرة .. وكل شوية دور تشوف فيمامة وطلقها ضحكة .. لبسات ليك الحمر والسبنية وجات مختالفة على كاع البنات اللي معاها . اما يمامة حطو ليها تكشيطة بيضاء مخزانية بيدين واسعين والسفيفة لبساتها ليها عبدية وهي كدفع فيها ..واخا مابغاتش تحضر وعزات راسها لاكن فالاخير لبساتها وجلسات قالبوك وجهها وشعرها المدرج قدامها والخدم كيصاوبو ليها خيط الريح وهي بحال الاميرة جالسة هازة خنافرها .. دارو البنات شافو لباس شادية وكلهم بغاو يلبسو بحالها..لاكن تأسفات حيت ماعندهاش من غير لبسة وحدة وهي باش جات من قبيلتها .

لبسو وسالتو وخرجات وحدة مور وحدة طالعين للسطح واخر وحدة موراهم هي يمامة اللي كانت غادية بالنفخة حتى وصلات للدروج وشار ذو الفقار بيدو من مور جذار خشي منقوش بينو وبين الحريم وقال لعبدية حيدي يمامة .. مولاي مابغاش يشوفها

تلفتات شارت لعابد براسو مشا شدها من يدها قاليها نتي ماطلعيش

شافت فيه نترات يدها قالت ليه شنو؟؟

قاليها ماطلعيش

قالت ليه انا اصلا طالعة بزز

خرجات ليها عبدية قالت ليها دابا غتجلسي بالخاطر ماغطلعيش بزز ..حيت مولاي اصلا مابغاش يشوفك

طلعات العافية مع يمامة من صبعانها وهي كشتوف فيها وسدات عينيها ومصات شفايفها ورجعات قالت ليها انا بوحدي ؟

تنهدات عبدية ودارت يد على يد وقالت ليها اييه نتي بوحدك ..يالاه رجعي للعمبر

بقات يمامة كتشوف فيها والدموع محجرين وقالبة شفايفها لداهل والعروق عاصيين فرقبتها ورجعات هازة تكشيطتها مشات دخلات للعمبر اللي كيصفر خالي وبوحدها اللي فيه ..سدات الباب وراها تكات عليها وبلا متكبي طاحو الدموع على خدها حجر ومشات رجعات لبلاصتها وقفات رافعة راسها سدات فصمت ور عات حلاتهم وبعات ريقها قالت

واخا ..مغنبكيش.. اخر مرة نبكي.. ااخر مرة

حيدات الهيط على راسها بشوية وحلات المضمة ديال تكشيطة حطاتها وجلسات فبلاصتها هازة رجليها ساهية كتشوف قدامها وفخادها عريانين وهزات خيط الريح شدات الجهة الماضية غرساتها ففخدها جاراها وراسها مرفعو والدموع بوحدهم كيقطرو وقالت

هادي اخر مرة ..اخر مرة غادي نسمح لقلبي يغلبني.. هادي اخر مرة .. ان شاء الله تكون هاد الشرطة على عنقي الى تحكم فيا قلبي مرة اخرى .

طلعو لبنات للسطح عمروه كامل وتخاطفو على البلايص اللي قراب للسلطان وجلسو كيضحكو ..منهم اللي كيعزف ومنهم اللي كيرقص ومنهم اللي واقفات على مكانو فوق درجة كبيرة خصصوها ليه وفرشوها بزرابي ناعمة ووسايد ..طلع عندهم ضاحك وقفو كولشي دارو ليه التحية حتى جلس وشار بيدو ليهم يكملو شغلهم ..شافت جيهتو شادية ضحكات ليه وتلفت شاف فيها تبسم ليها وبدات كتسفق بيديها ..جاو ليها البنات كيجروها باش تنوض وهي كتجمع يديها حشمات وتشوف فالسلطان حتى شار ليها براسو باش تنوض وناضت مزنكة واخا. مكتعرفش تشطح شطحات معاهم وكل شوية كتشوف فيه واش كيشوف فيها ..كانت مراقباه وهوا كيشوف فيها حتى لواحد اللحضة تلفتات شافتو كيشوف فوحدة اخرى وبحال الى ثارت اعجابه وبقا حاط عليها العين وعلى الرقص ديالها وهي كتتمايل وتسيح بحال العسل .رجعات شادية بلاصتها جلسات وطارت ليها الفرحة وبقات كتشوف فيه وهوا متبعك لجارية السمرا مولات الشعر كحل اللي كتلوى وتتميل وزادت قرباتو عندو اكثر حتى وصلات ليه ..كانت بنت سمراء اللون جميلة الوجه وشعرها حرير اسود ولحمها صافي وعندها جسد كأنه مرسوم ومشدود وكتتحركو على هواها ..هز السلطان عينو لعابد اللي فهم المعنى ومشا نيشان سلها من يدها من بين البنات تحت عينين شادية اللي خرجو وناضت مشات جيهتو جلسات وتبسمات ليه كترمش ..تلفت شاف فيها ومسح على ضهرها بابتسامة وتنهد ناض من بعد دوز معاهم نص السهرة خلاهم يكملو الحفلة بلا ميوقفهم حتى واحد ونزل مشا لجناحو لقا السمرا الفتانة جالسة .

اما شادية غير نزل نزلات حتى هي وجهها حمر فهمات شنو وقع قدام عينيها ورجعات للعمبر دخلات كتبكي ماحسابش ليها يمامة تما حتى لقاتها فسريها اللي مقابل معاها جالسة متكية على ضهرها سادة عينها وطالقة رجل وهازة رجل والدم من فخدها سايح والتكشيطة البيضا ء مطبعة

حلات عينها شافت شادية قدامها كتحل الزيف وتنتر العقيق من عنقها ورجعات سدات عينيها ووحدة ماهضرات مع لخرى ..حيدات شادية كلشي وطاحت غطات راسها بدات كتبكي فصمت لاكن صوت بكاها كان واصل لودنين يمامة اللي ماتحركات ما هضرات تقول بوحدها فهاد الكون .

صبح الحال ودخلات عليهم السمرا الغزالة فرحانة لقاتهم مزالين ناعسين ومشات نيشان بلاصتها كتنقز حتى تخلعات لقات يمامة دايرة ديك الجلسة قفزاتها من بلاصتها تخلعات وشافت الدم نشف على رجلين يمامة العريانين وكان باين عليها سادة عينيها وماناعساش .رجعات السمرا اللور كتشوف فيها بنص عين وتردد بمفمها المعودات ومشات نيشان لبلاصتها تغطات وكل شوية كطل على يمامة اللي بوذحها جالسة بحال الجن .

اما السلطان صبح فايق مع الفجر .. ركب الخيل حيت كانت تابعاه طريق طويلة دات ليه نهار ونص ديال الطريق قطع فيها جبال ووديان بلباس الصيد المعتاد حتى وصل لقصر قديم صغير فالشكل لاكن حدائقه واصواره كبيرة ..دخل مع الباب لقا جنود الجبال ولقا احمد يافع واقف استقبله برجولة .هبط السلطان من فوق الحصان شاف فيه مطولا وسد ليه احمد يافع عينيه ودار ليه الطريق يدوز كأنه كأكد ليه ما دار فراسو بديك الحركة ودخل للقصر نيشان بوحدو مشا مباشرة لواحد الباب حلها ودخل قفزها من بلاصتها بالخلعة وهي جالسة فوق سرير احمر

وقفات ويدها على قلبها ماقدراتش تهضر ومالقات باش تبدا ..وقف قدامها كيشوف فيها وحرك ليها راسو بالايجاب قاليها وصيتك ..وصيتك قلت ليك ماتغلطيش..قلت ليك وياااك تغلطي.. ولاكن نتي درتي اللي بغيتي

قالت ليه بأسى اشنو درت ؟ مالي شكون كاع درت

نفض يديه هزها بالخلعة قاليها وااالووو. مادرتي وااالو ..

قرب منها كيشوف فيها مطولا قاليها نتي كنتي غاديري اكبر غلط فالتاريخ … كنتي غتكوني وصمة عار على المسلمين سمعتي.. كنتي غدمري بلاد سالت على قبلها لارواح ..

بلعات ريقها مصدومة قالت ليه شنو كتقول شنو كنت غندير؟

زفر من مناخرو قاليها معارفاش شنو كنتي غديري؟ واخا لاللة نقول ليك شنو كنتي غديري..(بصوت غاصب) نتي كنتي غضربي ليا كاااع الجهدوكاع الخدمة فالخاوي.. كنتي غتردمي كاع اللي كنبني بسبب الطيش ديالك .. شنو كاااان غيوقع كن خطفوك رجال الاصيل وحكيم عاس على فرصة كيتسناه تجيه ؟؟ وشنو نتي اصلا كنتي غادية ديري فرياض السلطان هاا؟ علاش. كنتي غادية عندو

بقات ساكتة عيات من العوات والغضب ديالو وهزات راسها قالت ليه اه كنت غادية عندو حيت كاين حساب خصو يتحل.. وكان خاصني نمشي نتأكد من الوضع ديالو ونقابله حيت اللي وقع مأخرا كيطلب مني نقابلو ومهضر معاه ونتا ماسمحتيش ليا نخرج

ضرب واحد الضبلة بغضب خلعها قاليها واش معارفاش اشنو كديري.. واش باغا تقتليني ؟؟؟ باغا تحمقيني؟؟؟ قلت ليك ماتخرجيش من القصر هي ماتخرجيش من القصر ..بقاي فالقصر..ونتي لا خرجتي ومشيتي كتقدمي ليهم السلاح بين يديهم باش يضربوني ..باش يهرسوني؟!!! واش معايا ولا ضدي هاااا؟ واااااش معايا ولا ضدي شنو باغا بالضبط. لقيت الخير فالبراني فعز الشدة والقهرة والعذاب ومالقيتوش فيييك نتي لي مي!! علاش كديري هادشي. واش ضد فيا ؟؟ واش بلعاني ؟!

دارت يدها على فمها كتبكي قالت ليه لا ماشي بلعاني..انا والله مانويت نآديك انا بلعكس مفديك بروحي

قاليها روحك هي كن جلستي وتركنتي حيت حنا فوضع فيه البلاد مهزوزة على حافة السقوط وشادينها بسنانها. واش كتفمي باش شادينها؟!! شادينها بسنانها ونتي بغيتي تخرجي علينا بسبب التهور ديالك ..انا شاد الامير سلطان رهينة عندي باش نسيطر على الاوضاع ..باش نتحكم فغرناطة وباش نهيت الحرب والحصار اللي كان علينا بلا دم .. وهما بحاا الكلاب كيشمشمو على المدينة كيقلبو منين يدوزو ليا ويلويو ليا دراعي.. وكيتسناو الفرصة المناسبة فين يضربو ني بسلاحي ويقضيو عليا..ونتي برجلك غادية حتى لعندهم !! شنو كان غيوقع كن ماضربت حساب هادشي؟ شنو كان غيوقع ما حطيتش الحراسة على بيبان القصر وعينين سهرانة ليل ونهار على سلامتكم .. وسلامة هاد البلاد. وحدين كيديرو مجهود يشدو الساس ووحدة كدير مجهود باش تهبط الساس!!

تصدمات رجعات اللور كتبكي قالت ليه اويلي انا كنت غندير هادشي؟؟ واش انا كنت غندير عاد المصيبة ؟

قاليها واكثر حيت كن شدوك كن ساوموني بالامير ..ياخذو الامير ويعطيوك ليا ومن بعد يجيبو القوات ديالهم يمسحو اثار قرطبة بالليل فيها ..هانتي دابا شفتي فاش كنتي غطيحيني.. وسيق ليا وصيتك مابغيتش تسمعي..دابا هنا غتبقاي وهنا غتعيشي .. حتى واحد ماعارف بلاصتك وماعندك كي ديري تخرجث حيت ضايرين بالرجاال دبصح.. واخر مرة غترجعي للقصر

ضار عطاها بضهرو خارج وهي تابعاه شداتو من يدو جراتو لاكن بعد يديه قاليها حوايجك وصيفاتك كولشي ايوصلك لهنا .. وبلا ماتزيدي تخليني نحقد

خرج خلاها تما فالقصر لقديم وقال ليافع كيوصيه من اعماقه

منبغيش شي غلطة يا احمد يافع.. ماتفوتش اصوار القصر والى وقعات اي حاجة علموني

حدر احمد يافع راسو قاليه كن مرتاح من هاد الناحية وخلي الباقي عليا ..انا غنتكلف بكلشي كما وصيتي وفوق جهدي كن هاني امولاي

حرك السلطان راسو قاليه عارف ..ولاكن الحذر واجب. انا مخايفش من العدو ..خايف منها هي تتهور

حط احمد يافع يدو على صدرو قاليه غير رتاح امولاي من هاد الناحية

خرج السلطان من القصر ركب الخيل ديالو وانطلق رجع للقصر فاليوم التالي ودخل كيجري بالخيل حتى وصل للباب وونزل خلاه للعبيد ودخل لداخل لقا عبدية جايا مخلوعة وقفات قالت ليه اسيدي مولاي لاللة روح ااندى مكايناش وهادي ربع ايام ماضهرات

زاد خلاها قاليها تبعيني

مشات كتجري وراه دخل لجناحو لقا فيه البنات كيرتبو ويعطرو ومن بينهم شادية اللي كانت كتشعل لبخور وشافت فيه بنص عين لاكن رفع راسو عادي واخا شافها وشار ليهم يخرجو .

استفرد بعبدية ودار يديه ورا ضهره قاليها شنو واقع ؟

قالت ليه روح الندى مكايناش ..ربع ايام وهي غايبة على القصر حتى واحد معارفها فين كاينة ؟؟

قاليها شكون اخر عارف بغيابها ؟

قالت ليه القصر كامل مقلوب وذو الفقار حتى هوا كيقلب

سد عينيه متص الغضب ورجع شاف فيها عينيه حومر قاليها خرجي عليا ..خرجي عليا من هنا قبل ماندير فيك شي كارثة ..ومن اليوم ممنوع عليك دخلي جناحها وممنوع عليك تتدخلي فالشؤون الخاصة بيها..يالاه خرجي وكلمي ليا يمامة

مشات خرجات مافاهمة والو وخرج وراها عند رئيس الحرس امره يحضر ليه ذو الفقار فالحين ودخل للديوان جلس حتى دخل ذو الفقار ودخلات عليهم يمامة كتشوف فيهم بعينيها مافاهمة والو وحدرات راسها مستغربة وتسد الباب عليهم

تلفت السلطان لذو الفقار قاليه معامن ستاشرتي خرجتي الجنود ديالك يقلبو عليها ؟

حدر ذو الفقار راسو قاليه ما درت غير الواجب امولاي فاش قالت ليا عبدية راه مكايناش فالقصر .. درت اللازم من بعد فاش طال غيابك

رفع السلطان راسو وقاليه لاللة روح الندى كانت معايا ..ودابا رجعات لجناحها ..جمع الجنود وخلي الوضع يستاقر .. مكاينش لاش تقلب عليها صافي رجعات لمكانها ..لاكن معاقبة وممنوع عليها تخرج من جناحها

حذر ذو الفقار راسو قاليه هي اللولة امولاي

شار ليه السلطان بيدو مشا وبقا غير هوا ويمامة اللي واقفة ومدورة وجهها ..شاف فيها مطولا وهي كتسوط وقاليها

يمامة .. غنكلفك بمهمة مكاينش من غيرك يقد عليها

شافت فيه قالت ليه لبارح همشتيني وليوم كتكلفني بمهمة ؟!

قاليها البارح ماشي هوا اليوم ..

هزات راسها قالت ليه انا مغنقدرش نتحمل مسؤولية فوق طاقتي ..فوق نفسي امولاي

قرب منها كيشوف فيها وهي كترمش دورات وجهها وشد ليها دقنها دورو قاليها واخا اللي بغيتي يمكن ليك تمشي

ضارت بغات تمشي وحتى حطات يدها على الباب وسدات عينيها رجعات تلفتات عندو وحدرات راسها للجنب تنهدات قالت ليه

شنو المهمة ؟

تبسم ومشا جلس قاليها اجي جلسي

جلسات جنبو نافخة وقاليها لاللة روح الندى مكايناش فالقصر.. نتي غادي تخلي كلشي يصدق انها كاينة فالقصر..

استغربات قالت ليه وعلاش هادشي؟شنو السبب؟ وفين مشات؟

قاليها لبارح بالليل خرجات وكان بيني وبينها نزاع راكي عارفاه.. وارجالي خطفوها وداوها لابعد منطقة فنص الليل لقصر قديم .. دابا المشكل خبار خروجها نتاشرات وانا متأكد المدينة عامرة جواسيس وماشي بعيد يكونو عندي وسط القصر ..كما غارسهم فقصور العديان . المهم المطلوب منك توهمي كاع اللي فلقصر برجوعها ..مابغيتش العدو يقلب عليها ولا يلقا منين يدوز ليا..ماحدنا مجموعين فقصر واحد فماعند العدو منين يدوز ..ولاكن الى تشتتنا غادي يصطادونا واحد بواحد ..والباقي راك عارفاه علاش

دورات وجهها كتشوف قدامها مطولا وقالت ليه ولاكن عبدية هي المكلفة بجناح لاللة روح الندى

هز حاجبو قاليها نتي كوني قدها وقدود وديري اللي قلت ليك عليه

ضار حداه عطاها سلهام روح الندى قاليها يالاه نشوف

شدات السلهام وناضت خرجات جنبو شاداه فيدها ومشات فطريق جناح روح الندى تلاقات مع عبدية غادية ليه ووقفاتها قالت ليها لاللة عبدية

تلفتات عبدية شافت فيها والسلهام فيدها قالت ليها شنو كديري هنا؟

تبسمات يمامة قالت ليها جايبة للاللة روح الندى السلهام ديالها اللي عطاتني وهي داخلة للقصر

استغربات عبدية قالت ليها لاللة روح الندى رجعات؟

تبسمات يمامة قالت رجعات مع مولاي السلطان ..هي اللي عطاتني السلهام بيديها.. ومولاي كلفني بجناحها كاع اللي كيخصها

تصدمات عبدية وقالت ليها شنو كتقولي؟؟ نتي غتكلفي بجناح لاللة روح الندى؟؟ وشكون نتي بالسلامة؟

هزات يمامة راسها قالت ليها انا يمامة..ومولاي كلفني بهادشي والى ماتقتيش سوليه

نترات عبدية السلهام من يدها قالت ليها اري لهنا قالك تكلفي بجناحها.تقادو الكتاف تبارك الله ايوا مزيان

مشات بغات تدخل للجناح لاكن العبيد اللي فالباب منعوها وشافت فيهم مصدومة قالت ليهم اش هادشي؟ كتمنعوني ندخل لجناح لاللة روح الندى !!

خدر ليها عقد من العبيد راسو قاليها هادي الاوامر الاللة عبدية ..

دارت يد على يد قالت ليهم وشكون عطاها ليكم ؟

حدرو الراس قالو ليها عابد الاللة اللي عطانا هاد الاوامر ..وهي امر من السلطان

ضارت عبدية عند يمامة شافت فيها وهنا تبسمات يمامة ومشات خدات من يدها السلهام بلخاطر ودازت قدامها دخلات للجناحها خلات عبدية كطير وتنزل فبلاصتها وبلا متشعر مشات كتجري خرجات كتقلب على السلطان ومشات وقفاتو وهوا فطريقو وهوا فالجردة كيشوف الخدم كيزرعو ورود وازهار كبيرة بلاصة الورود اللي مشات هبائا منتورا. حدرات ليه الراس ووجهها حمر قالت ليه اولدي .. اشنو كدير ؟!علاش منعتيني ندخل لجناحها شنو درت ليك؟

هز راسو شاف فيها قاليها حيت مكتخليو حتى حاجة مستورة..شي كيزر الحبال وشي كيقطع ..ماعندك ماديري فجناحها

تنهدات كتحاول تردو على قراره وقالت ليه

اولدي الله يهديك..مالقيتي من لحريم غير يمامة تحطها فهاد المنصب؟؟!! علاش ماحطيتي شادية بعدا كتفاهم مع لاللة روح الندى !! اما يمامة غادي غير تزيد المشاكل وهي ولاللة روح الندى مكايتفاهموش

خرج عنقو حدر عندها قاليها غير خرجي هاد السوق وديها فشغل القصر الي من جيجك الخدم والعمبر..اما جناح السلطة انا عارف شكون يقد بيه

بقات كتشوف فيه مطولا بحسرة قالت ليه سبحاااان الله ..الخالق الناطق

صغر عينيه قاليها رجعيها لمكانك بلا متخليني نقطع الخيط اللي بيني وبينك ..وعطي التيساع ليمامة خليها تشوف شغلها

بقات ساكتة غير كتشوف وتتحسر وخلاها واقفة ومشا بقات متبعة ليه العين وعينيها غرغرو ورجعات للقصر بقا فيها الحال نزل ليها الرتبة لقسم الخدم والحريم وحيدها من قسم السلطة وحط مكانها يمامة . اللي كانت فهاد الوقت وسط جناح لاللة روح الندى كدور وتمتع عويناتها بداك الجناح وقالت رافعة راسها

درتيها بيديك مادفعك حتى واحد..بقيتي كطيري حتى جبتي الدقة الصحيحة لراسك..ايوا مزيان تستاهلي على مادوزتي عليا ..كما وصلتيني للموت هاهوا ودعيت فيك فعز قهرتي وحكرتي ربي ستاجب وسقاك من السم اللي سقتيني.واخا درت فيك خير رديتك من الموت..ما قرش فيك الخير .حصدي دابا شنو زرعتي .

حطات السلهام بلاصتو وخرجات من الجناح هازة راسها مشات عند عابد جنب العمبر قالت ليه لاللة روح الندى بغات تاكل ..وجد ليها صينية وجيبها ليا ندخلها ..يالاه طلق راسك

رجع عابد براسو اللور قاليها هاي هاي وليتي نتي تآمريني

تبسمات وقربات منو لابسة قفطان كحل مخزاني طويل بفتحات فالجناب وجامعة شعرها كعكة اسفل رقبتها وقالت ليه

مزال ماشفتي والو اعابد..الى نتا سيتي الكويك دالعافية انا اثرها مزال على يدي مانسيتوش

الوقت اللي كتوجد فيها الماكلة كانت شادية وسط البنات اللي بداو يتعلمو فالمسيد ديال القصر كتقرا على يد المعلمات وعاقدة حجبانها عيات تركز والو واش قدرات تشد .. ضارت عليهم المعلمة وحدة عرضاتهم القاعدة وصلات لشادية اللي مربعة رجليها قالت ليها شادية ..عرضي القاعدة اللي حفضتكم البارح

بقات شادية كتشوف فيها وتمتم بدأت النص وسكتات كدور عينيها والمعلمة واقفة كتشوف فثها معصبة وقالت ليها

قلت ليكم البارح حفضو القاعدة علاش ماحفضتيهاش؟

دورات شادية عينيها قالت ليها كنا فالحفلة ديال السلطان الاللة

خزرات فيها المعلمة قالت ليها غير نتي اللي كنتي فحفلة السلطان ؟؟ مالهم هادو عقلو عليها فين عقلك نتي

هبطات شادية راسها قالت ليها غدا نجي حافضاها

قالت ليها المعلمة غدا بلا متجي الى ماخفضتيهاش. يالاه نوضو وغدا غتعاودو تعرضوها عليا

ناضو هزو وراقهم فيهم الحروف مكتوبة وخرجو من المسيد غادية فجرادي القصر راجعين للعمبر حتى صادفو السلطان وحناو ليه الراس ودازو وبقات شادية مهبطة راسها تفكرات ليه الليلة دلبارح وبقات جامعة الضحكة ..وقف قدامها شد ليها الورقة اللي فيدها لقاها كاتبة الحروف عوجة وتبسم قاليها فين وصلتي فالقراية؟

عبسات قالت ليه انا ماعندي ماندير بهاد القراية مابغاتش تدخل لي لراسي

بدا كيضحك قاليها غير الاول اللي صعيب.. خاصك تعلمي القراية غتنفعك وتفقهك

هزات كتفها قالت ليه تفقهو هادوك اللي قاريين ؟!!

هز حاجبو قاليها معلوم ..غير اللي بغا يتعاما ..

تنهدات قالت ليه انا بغيت نشوف غير عويشة .. مسكينة رحلوها من هنا طلعو للبرج لفوق ماعاودتش كاع شفتها

هز يعينو فالبرج ورجع شاف فيها قاليها سيري شوفي ختك

هزات راسها مصدومة قالت ليه بصح ؟؟ الله يطول فعمرك امولاي

باست ليه يدو وخلات ليه الورقة اللي خصها تحفظ بين يديه ومشات كتجري للبرج لقات عالم اخر ..خدم اخرين وخدمة اخرى وبيوت اخرين وقفها واحد من العبيد قاليها شكون نتي ؟

قالت ليه انا من العمبر دالسلطان ..هوا عطاني الحق نجي نشوف ختي

استغرب قاليها شكون ختك؟.

قالت ليه ختي عيشة..شعرها كحل وزوينة

قاليها ختك مشات لباب الرمى ..مابقاتش هنا

عقدات حجبانها قالت ليه فين جا هاد باب الرمى ؟

قاليها الجهة دالشمال من القصر نزلي لتحت وسيري لباب الرمى تلقايها تما

نزلات كتجري مع دوك الدروج مشات من على برا كتسول على باب الرمى حتى بعدات لقات راسها فالجهة الاخرى من القصر وكان هاد باب الرمى خاص بالجيش تما الخياطة اللي كيخيطو لباس الحرب وحوايج القصر وكانو خياطا كثار ومطبخ كبير خاص بماكلة الخدم والحراس ديال القصر ..بقات كتسول حتى لقات وخدة من الخدم سولاتها وقالت ليها ختك فحناح النسيج ..طلعي عندها

طلعات مع الدروج كتجري لقات ساحة كبيرة كلها خيوط مدلية وزرابي ولقات بنات كثيرة كينسجو ومشات كدور بيناتهم حتى لقات ختها جالسة دايرة العكسة قدام زربية واقفة كتنسج وجالسة كضرب ودخل الخيط وقصداتها نيشان حاللة عينيها قالت ليها عيشة؟؟

دورات عيشة وجهها شافتها وعقدات حجبانها قالت ليها شكون نتي؟

قالت ليها شادية انا شادية؟!!!اويلي؟

ضارت عندها عيشة قالت ليها مكنعرفكش

جراتها شادية من يدها قالت ليها واش تسطيتي؟

ضارت عندها عويشة بغضب قالت ليها اه تسطييت .. عاد جايا كتسولي فيا؟ هاا؟ عاد تفكرييني؟؟ هاد السنين كلها عاد دابا جيتي كتسولي عليا

هيطات شادية عينيها بأسى قالت ليها راه حتى انا ماكنتش فالقصر..حتى انا خرجت وهاد السنين كاملة وانا برا عاد رجعت .. ونتي لاباس عليك

هزات عيشة يديها قالت ليها ها لاباس..هانتي كتشوفي حالتي نهار ومطال وانا مقوسة هنا كنسج ونوصل الماكلة للعساسة..هادي هي حالتي مابقيتش كنشوف الضو

بقات عيشة كتبكي وشادية كتشوف فيها وعنقاتها كتواسيها وقالت ليها غادي نردك للجناح عندنا ..مغنخليكش هنا ..صبري غير شوية وانا غادي نردك

شافت فيها عيشة قالت ليها انا عييت بهاد تمارة ..رديني حداكم و البزولة اللي رضعاتنا

عنقاتها شادية قالت ليها غنردك غير صبري عليا..والله منخليك هنا ..

كلات روح الندى الوهمية وشربات فجناحها ..ولاكن الحقيقة هوا ان يمامة هي اللي رفسات الماكلة ونقباتها باش يبان باللي روح الندى اللي كلات منها وخرجات الصينية للخدم داوها ردوها لاكن كانت عبدية واقفة كتسنى شافت الصينية واستغربات قالت

روح الندى فاش كتكون مفقوصة ولا بالها مع شي واحد مكتاكلش ومكدوزش ليها

ولعجب مولفة زعما كتصبح على شادية وتمسي عليها هادا شحال ما عيطات ليها !!

بدات عبدية كتشك ويدخلها الشكل وكل يوم حاضية يمامة وكتراقبها وهي كدخل الصينية وتخرجها منقوبة . بغات دخل واحد كانو فيها العبيد دباب روح الندى كيتعشاو ومشات دفعات الباب بغات تدخل لاكن لقاتو مسدود..سمعات صوت السوارت وتلفتات لقات يمامة وراها واقفة هازة الساروت كتوريه ليها وقالت ليها

علاياش كتقلبي؟؟ ها المفتاح

ضارت عبدية معصبة ومشات قالت ليها حلي الباب .. غادي نخرجو منك كاع هادشي اللي درتي

نترات يمامة يدها قالت ليها ماعندكش الحق تقيسيني. ولا نتي اللي غتندمي

مشات خلاتها واقفة واول مرة تتعصب عبدية وشمرات على يديها حلفات فيها وبغات تتأكد من شنو كيوقع فالبيت لداخل ..صبحات الصباح واقفة على الفطور وبغات ترسل رسالة لروح الندى عبر داك الفطور وخوات الخليب فكاس نحاسي ورسلاتو شداتو يمامة دخلاتو لداخل حطاتو وبحال العادة نقبات من الفطور حركاتو وهزات الكاس دلحبيب شربات منو وحطاتو هزات صينينة خرجاتها ويالاه خرجات طاحت الصينية من يدها وطاحت على ركابيها فالارض وعبدية كطل من مور واحد الصور شافتها فاش طاحت وبدات ترد ومشا واحد من العبيد كيجري عيىط لعابد هزوها عاد خرجات عبدية مشات طلات على الحليب لقات غير شوية اللي تزلع منو وقالت

كدابة اللفعة لخرى..البيت خاوي وروخ الندى مكتشربش الحليب اصلا..شنو كيوقع ؟!! اوييلي فين روح الندى!!

تخلعات عبدية وحطات يدها على خدها وتبعات يمامة اللي حطات مسارنها بسبب داك الحليب اللي حطات ليها فيه عبدية دوا كيدير الحساسية وخلاتها حتى ردات ورجع وجهها احمر وجلسات رتاحت فالحمام عاد ذخلات عليها وقفات هازة راسها قالت ليها دابا غادي تقولي ليا فين راها روح الندى..تكلمي

حطات يمامة يدها على عنقها قالت ليها نتي اللي درتي هادشي..نتي

بداك يمامة كتكحب حتى فشلات وتكات على الحيط كترتاح وعبدية قدامها كتخلف فيها وتهددها

حركات ليها يمامة راسها وعينيها خارجين قالت ليها ديريها فين تجيك..هانتي غتشوفي شنو ندير فيك

قالت ليها عبدية نتي اللي غتشوفي شنو ندير فيك الكافرة بالله

ناضت يمامة وقفات ليها فوجهها قالت ليها الكفار هما نتوما يا رباعة دالمنافقين ..

رجع وجهه عبدية احمر وعطاتها واحد الطرشة للحنك حتا ضار راسها وقالت ليها بغيت غير نعرف اشنو عشق فيك وخلاه يتيق فيك

شدات يمامة حنكها كمداتها ودورات وجهها شافت فيها قالت ليها وفيمن غيتيق؟ فيك؟ ولا فمو اللي كدبات عليه عيشاتو فكدبة طول حياتو ..وخبات عليه باه ونكراتو وسيراتو كيف بغات .. ونتي اللي ربيتيه وكبرتيه يا حسرة ..كتشوفي فيه كيقابل باه عاين باين ومخلياه فدار غفلون ..عاد مزال يتلفت جيهتكم ولا يأمن ليكم .. حمدو الله وشكروه اللي رجع عندكم وزطم على قلبو فسبيل هاد البلاد وهاد الشعب..اما هوا فالحقيقة كان ينفيكم كلكم ويهجركم ويخليكم تعومو بحركم وعمركم تشوفو وجهه .. قتلو داك الامير الحنين مول القلب الكبير اللي كان كيحسبك بحال مو .. وكان كيشوف مو بحال الجنة .. ايوا دابا تفرجو فشنو صنعات يديكم ووجدو راسكم للتشواط كلكم .. لانتي لا مو لا حتى واحد مابقيتو كتعنيو ليه شي حاجة ..والى رجع راه رجع على قبل هاد الشعب اللي مدار لا بيديه لا برجليه فالموصيبة اللي درتو ..ههه لا ومزال كتسناو يطلب رضاكم ويطيعكم ..فيقو ..فيقو حلو ودنيكم مزيان راه اللي قدامكم دابا ماشي ولدكم ..جلادكم

خرجات يمامة خلات عبدية مصدومة ويديها على خدها ماتوقعاتش من يمامة تعرف الحقيقة وتنطق من لسانها داك الكلام اللي ركب الرعب فقلبها وتذكرات كلام روح الندى فاش قالت ليها باللي راها خطر عليهم كاملين .

مشات الارض وجات بعبدية وتخلعات وضربات فخادها وقالت

اويلي الساحة خوات ..شكون يوقف هاد الكارثة اللي سلاطت علينا ..شكون يوقفها وشكون يحدها ويردعها ..الى بقينا ساكتين غادي دير فينا ما بغات

مشات كتجري وتقلب على عابد خرجاتو من الكشينة وداتو لواحد البيت شافها مخلوعة قاليها مالك ؟ شنو واقع ؟

ضربات فخادها قالت ليه روح الندى مكايناش واصلا مارجعاتش.. اصلا ماجاتش ويمامة كدور بينا وكتزيد تقوى وتعلى ..خاصنا نعرفو فين هي روح الندى ..

تصدم عابد قاليها اويلي؟؟ وعلاش قالو رجعات ؟

قالت ليه عبدية منعرف شنو كيوقع ..خصنا نعرفو مكانها مكاينش من غيرها اللي يوقف هادشي ..

بقاو كيتافقو فالبيت ويمامة نازلة ضارت مع جنب داك البيت غلى غفلة ورجعات اللور شافت عابد خارج ووراها عبدية كيهضرو بشوية ..جمعات شفاها اللور بين سنانها تخبات ومشات رجعات كتسلت هزات قفطانها وطلعات كتجري بالبلغة جامعة رجليها ومؤخرتها كتتهز . مشات للعمبر نيشان دخلات لقاتو خاوي ومشات جبدات كموسة دالفلوس من تحت سريرها وخرجات كتسلل تابعة عابد ومعارفاش شنو فراسو وعلاياش ناوي هوا وعبدية ..خرجات ليه فطريقو خلعاتو ووقفات دارت يديها على جنبها تبسمات وقربات منو كتخلعو

قالت ليه عااابد… جات نوبتك

رجع اللور تخلع قاليها علاش؟ شنو درت

قالت ليه جات نوبتك ..حيت عرفتي بسر السلطان اللي معارفو حتى واحد ..وانا دابا يالاه جيت من عندو قلت ليه عليك نتا وعبدية ولشنو كتخططو ..وجد راسك اعابد قربات نهايتك

تخلع رجع وجهه الاسمر زرق قاليها اشنو بغيتي عندي؟؟ اشنو درت ليك الى درت ليك شي حاجة سمحي ليا ..سمحي ليا الله يرحم والديك

وقفات هازة حاجبها قالت ليه سمع شنو غنقوليك ..الى درتي هادشي اللي قلت ليك نسا الكوية ونسا السلطان انا نسرح ليك الطريق معاه ونتا عارفني نقدر نديرها ..هانتا كتشوف..حتى واحد مابقا فالقصر من غيري.. حتى لاللة روح الندى ماكايناش وبوحدي اللي عارفة مكانها ومصيرها .. انا عارفاك وصلاتك الخبار ..ولاكن اللي غادي نحاسبك عليه هوت الى خرجات الخبار ..

قاليها كيتغبن شنو غندير دابا ؟ انا مافجهدي مندير

ضربات رجلها مع الارض خلعاتو قالت ليه عبدية ..انا باغا عبدية

قاليها شنو بغيتي بيها غير ولية وهبيلة

ضربات برجلها الاخرى كتزيد تقرب خلعاتو قالت ليه الهبيل هوا نتا.. هبالكم هوا اللي غادي يخرج علينا..ودابا ختار يا حياتك يا صف عبدية

حدر راسو ساكت قاليها شنو المعمول؟

قالت ليه تبعني نوريك المعمول

صبح الصباح وكل واحد كيجر من جيه والصباح فغرناطة ليوم عيد ..وعيد كبير .. فهاد الصباح فتح السلطان الاصيل عينيه .. ونقز المحنة اللي جبداتو علاين شهر غايب على الدنيا..سرح عينيه فالاطباء اللي ضايرين بين وهز راسو كتنفس بعمق.. وصلات الخبار لحكيم جا كيجري من قصر الحمرا للرياض ودخل لقاه ناض جلس وعضامو تقال .. كيحرك كتافو المتشنجة لاكن مزال فاتو الحال ..حدر ليه حكيم راسو كيبارك ليه وقاليه نهار كبير هادا ..الحمد لله على سلامتك امولاي..هادا نعار عضيم اللي رجعتي لينا بالصحة والسلامة .

هز السلطان الاصيل راسو شاف فيه وتنهد قاليه بصوح مبحوح ..شنو الاخبار ؟ شنو وقع فهاد المدة كلها

رد حكيم بأسى قاليه وقعو كوارت امولاي..ولاكن على قبل صحتك ماشي وقتها تسمع ليها

ناض السلطان وقف لبسوه عبايتو الشرقية على ضهرو المحلولة من القدام وشار بعينيه لحكيم يخرج كولشي من جناحو وبقاو بجوج

جلس كيجمع النفس بشوية علىكرسي واستقام بضهره وحط يدو على ركبتو قاليه تكلم ..عاود ليا شنو وقع من الاول حتى للخر

بدا حكيم كيعاود الاحداث كأنها كتتكرر بصورة شفافة قدام السلطان ..بدا ليه من الساعة فاش تضرب وفاش رجع السلطان يور خدا مو وشحال كافحو باش الخبار ماتوصلش .. وشحال حاولو يكتمو السر لاكن فالاخير تشتت ووصل لامير سلطان ومن شدة غضبه علن الحرب والحصار وناضت الروينة وكيفاش حتى تغتال وتخطف من قبل السلطان يور وكيفاش هما تحت السيطرة ديالو ومكاينش اللي يعطيهم امر وحابسين كلشي

سد السلطان عينيه جمع النفس وجمع القبضة ديدو وقال لحكيم علاش وصلتي الخبار لسلطان وسمحتي ليه ينوض هاد الروينة

حدر حكيم راسو قاليه كانت غادي توصلو امولاي حيت الخبار تشتتات ..وزيد على هادشي لقينا جواسيس قشتالة بيناتنا وحاولو يسربو الخبار وشدينا الواصل بينهم لاكن قتل راسو قبل منعرفو الجسوس..وغالبا الخبار تكون وصلات ويكونو فطريقهم بالمعدات ديالهم لينا امولاي.

عمر صدر السلطان بالنفس وقاليه مارسلتوش اللي يتفقد الوضع يشوف واش فطريقهم لينا؟

رد حكيم بالنفي قاليه مارسلناش امولاي

سد السلطان عينيه قاليه رسل على وجه السرعة اللي يتفقد الوضع .. اما قضية سلطان الغبي اللي علن الحرب على مدينة اسلامية بلا ميفكر هاديك بوحدها .

دابا الاهم هوا نقابل السلطان يور .. عطيني ورقة وقلم

فقصر قرطبة كانت الاجواء مختالفة .. مشات يمامة على الصباح لجناح السلطان ودخلات بابتسامة حنات ليه الراس وهوا واقف كيسد الادرع الحديدية اللي فيدو

تلفت شاف فيها وقال

شمن خبار جايبة ليا

هزات راسها جمعات النفس وقالت ليه

لاللة عبدية امولاي.. بغات تشوف لاللة روح الندى بأي طريقة .. بغات تدخل تشوفها حيت متعلقة بيها وبغات تطمن عليها .. وقالت لعابد ياخد السوارت من جيبي ديال جناحها اللي كنسد ويعطيهم ليها باش تدخل

هز راسو مسح على لحيتو كيشوف فيها وهي تحدر راسها شافت وراها وشارت لعابد راسها مخرجة دخل كيتفتف حادر راسو قدام السلطان ويمامة وتقفة شادة يديها قدامها قالت ليه قول للسلطان داكشي اللي قلتي لي اعابد

رد عابد كيشوف فالارض قاليه نعام اسيدي قالت لي نوصي بنت من البنات دالعمبر ..باش بالليل تسرق السوارت ليمامة ديال جناح لاللة ونعطيهم ليها .. وانا امولاي تحت امركم ..باش وصيتيني كنفد وجيت قلتها ليمامة باش نخبروك امولاي

تبسمات يمامة قالت ليه شكرا اعابد حيت وفي ..اكثر واحد وفي فهاد القصر ومكيهمو حتى واحد من غير مولاي السلطان

حدر عابد راسو رجع باللور خرج وهزات يمامة راسها مشات تقدمات والسبولة عريضة مع كتفها بالجنب والتكحيلة فعينيها البراقة ..شدات ليه فعبايتو قاداتها وقالت ليه

كن ساعفتيني سيفط عبدية عند لاللة روح الندى .. بقائها فالقصر كيدير المشاكل وباغا تعرف شنو واقع .. الحمد لله عابد طلع وفي واخا خزنت السوارت ومكانوش يقدو يلقاوهم..ولاكن من الاحسن رسلها حتى يفوت هادشي

هز ليها دقنها كيمرر صبعو على شفافها ويشوف فعينيها وتنهد عيط لذو الفقار وتنحات هي للجنب وقفات وراه ..دخل ذو الفقار قاليه خرج عبدية للسوق بشي طريقة فلعشية

حدر ذو الفقار راسو خرج وخرج السلطان وراه و جنبه يمامة قاليها ردي البال ..مابغيتش مشاكل فهاد الوقت .. ومامساليش لشغل النسى

قالت ليه شغل النسى امولاي كامل مشاكل.. خصوصا دابا مكاين اللي يسير شغل الحريم وكلهم كيلغي بلغاه .. وعاد غياب لاللة اللي خالق فضول لكلشي

خرج للجردة سرح عينيه ورسل واحد من الخدم يكلم ليه وتحد من جنود المخيم اللي كانو لداخل فالقصر وتقدم قدام السلطان حدر راسو في حين رجعات يمامة اللور تسترات مور ضهر السلطان العريض وحدرات راسها وهوا واقف يديه وراه امره السلطان يخطفو عبدية في سرية تامة مباشرة فاش تخرج من القصر ويديوها للقصر القديم بلا مايسيق حتى واحد الخبار .رجع الجندي اللور حادر راسو ماهزوش ورجع وراه مشا علد خرجات يمامة مور ضهرو قالت ليه وهاد الجندي زعما تيقة

تلفت شاف فيها قاليها هادا واحد من الجنود ديالي فرقة خاصة تقدري تسميها ..

جا الرسول دالقصر كيجري ورجعات يمامة بسرعة تخبات ورا ضهرو .. حدر الرسول راسو قاليه مولاي..رسالة من الرياض

شد السلطان الرسالة فتحها ورجع الرسول مشا ورجعات يمامة مكانها وقفات كتشوف فيه شافتو تزير وهز راسو كمش الرسالة كيشوف بعيد

قالت ليه مالك امولاي؟ شنو فالرسالة؟ سمحي ليا على فضولي

قاليها الاصيل ناض وطالب يشوفني

تبسمات قالت ليه بشرى زوينة هادي.. على سلامتو

شاف فيها كيخزر وهي دير يدها على فمها كدور عينيها وتنهدات قالت ليه انا قلت هاكا حيت الاصيل كيبقا باك ..مستحيل نغيرو الحقيقة.. نتا امولاي قلبك كبير .. وربي بغاك وهبك الدنيا ومافيها .. ماتخليش الغضب والحقد يسيطرو عليك .. على الاقل قابلو كسلطان لسلطان وماتنساش اهم حاجة ..مصلحة البلاد فوق كولشي..واخا يتطلب منا الامر نضحيو بارواحنا المهم راية الاسلام تبقا عالية..اما حنا مغاديش نخلدو هنا الموت تابعانا تابعانا

جمع النفس وساط قاليها غيكون باغي يتفاوض..باش نرجع ليه الامير سلطان

قالت ليه تفاوض حتى نتا ..وطلب تعويض على الاضرار والخسائر اللي تعرضنا ليها بسببهم

قاليها ماعندها التعويضات مادير ليا ..هوا عندو جيش قوى من جيشي

شدات ليه فيدو قالت ليه عندك تعويض اللي يخلي كلشي يحل فمو ..ويزعز البلاد بالليل فيها … طالبو يعتارف بيك قدام العالم

تسيف عليها قاليها ويااااك..وياااك تعاودي تقولي هاد الهضرة ولا نسمعها منك ..انا اخر حاجة كنفكر فيها هي نتنسب ليه

شدات فيه وزيرات على يدو قالت ليه الخطية الى مساقو ليها الناس الخبار كتولي ربح ..والحقيقة ماعندك ماتبدل فيها وليوم ولا غدا غادي يسيقو كاع الناس الخبار..الى مابغيتيش مغيقولوش ولدو اللي مابغاش..غادي يألفو قصص واجا ما فكنا من السنتهم وغتخلي الناس تتقسم لشي ضدك وشي معاك.. اما الى خرجتي ليهم فالضو ونطق بيها الاصيل غادي يخلي كاع الناس تخضع للحقيقة .. ومغيوقش الانقسام ..ماتخليش هادشي يتقلب علينا بلعكس خليه لصالحنا .. اي حاجة تقويك وتزيد فقوتك شد فيها واخا تكون كتكرهها .حنا مابغيناش يوقعو مشاكل بين الشعوب..اكيد غتلقا ناس غيكرهوك والكره كيولد الانفجار وغادي تتعرض للتمرد وغتوحل غير مع الشعب .. وضع نهاية لهاد البداية من الاول بلا متخلي الحكاية طوال وفالاخير النهاية هي نفسها ..الحقيقة هي الحقيقة

رفض الفكرة ديالها رفضا باتا وقاليها هادشي بعيد عليك .. دابا شوفي شنو كيوقع لداخل سيطري على الوضع ماتخلي حتى حاجة توقع وتشتت تركيزي ..هادا هوا المهم عندك

مشا خلاها واقفة كتشوف فيه وقالت بغيض

حمق ..كن كنتي عارف مصلاحتك ماتقولش هاد الهضرة ..نتا عماك الحقد وغتبقا حتى يجي سلطان يمحيك نتا وباك .. مستحيل مو تسكت الى عرفات الخبار راه غادير المستحيل على ولدها ..ديك اللفعة انا اللي عارفاها اش كتسوا .

ركب الخيل ديالو مشا للرياض نيشان ودخل هاز راسو هوا وجوج من صحابو ..ونزل خلا كولشي مخلوع واخد الحذر ديالو ..دخل للبيت لكبير اللي كان جالس فيه السلطان وتقدم وقف حال رجليه ويدو على الخنجر الل فحزامو ورفع راسو .. تلفت الاصيل شار بعينو لكاع اللي معاه خرجو وتسد الباب عليهم ووقف الاصيل هز راسو شاف فيه قاليه

الاب والابن ..من بعد خمسة وعشرين عام ديال الفراق

هز يور راسو قاليه بحقد عمرني مغنكون ولدك ..

ضحك الاصيل وتنهد قاليه ولدي ..بغيتي ولا كرهتي ولدي .. لحد الساعة ماعرفتش الميزة اللي عندك .. شنو اللي خلاك طعني ديك الطعنة القاتلة

قاليه يور مستاعد نطعنك ميات طعنة اخرى .. على داكشي اللي دوزتي على مي فصغرها

قرب عندو الاصيل وفتح يديه قاليه هانا قدامك ..طعني.. طعن باك الى كان هادشي غيبرد النار اللي فقلبك . الى كنتي غترتاح طعني..

بدات يد كترعد فوق الخنجر وعاض على سنانو ونتر يدو من فوق الخنجر بعدها وجمع القبضة ديدو كيشوف فالاصيل اللي حط يديه على كتافو تنهد وقاليه مصغر عينيه

نتا ولدي.. ولدي الحقيقي ..سبع بحال باك وجبل ميهزك ريح .. انا لقيت ولدي اللي يستاحق يكون ولدي.ولد الاصيل

هبط يديه ومشا عضاه بالضهر دار يديه وراه وقاليه عرفتي. كنت بحالك فديك الوقت ..يمكن كنت كتر منك حيت كانت عندي اسباب..كانت عندي ضروف خلاتني نكون قاسي.. عشت احداث اللي ماعشتيهاش نتا .. شفت خوتي ماتو قدام عيني..با مات قدام عيني..عائلة مي تحرقات قدام عيني..ماشي لخاطري مشيت لديك الحرب وماشي انا السبب فيها..ولاكن با داني باش يقصح قلبي.. وكانت فكل مرة تجيه فرصة اللي تخلي قلبي يقصاح كان كيحطني فالواجهة .. فاش عرفت مك ماكنتش عارف شنو كتعيني لي ..حتى هربات عاد عرفت الحقيقة . فعلا كنت ضالم وطاغية ..ولاكن مك عطاتني درس فحياتي عمرني نساه . ..زيد على هادشي عرفتها فالمراهقة .. كنت توليت الحكم فسن مبكر ..

قاليه يور هادشي مكيعنيش تحكر عليها وتتعدا عليها نتا وعائلتك .. عندك الزهر ماكنت فديك الوقت ..كنت غنحرق النسل ديالكم كاملين من الصغير للكبير

هز الاصيل راسو ضحك قاليه هادا هوا ولدي اللي تمنيت .. انا ماقلتش ليك غفر ليا ..ولا عفو عليا.. من حقك تكرهني وتحقد عليا..ولاكن شنو دنب خوك سلطان اللي خديتي رهينة ؟ ومعارفش اصلا بالحقيقة

قاليه يور انا حميت بلادي وارضي وشعبي..والى كان ولدك غيشكل خطر علينا غادي نمحيه على وجه الارض..

بقا الاصيل غير كيشوف فيه وقاليه دابا اللي نطولوه نقصروه ..شنو المطلوب باش ترجع ليا سلطان

رفع يور راسو شاف فيه مطولا وقاليه تنازل على السلطة

بقا الاصيل كيضحك قاليه نتنازل على السلطة؟ علاش ؟

قاليه يور التنازل ديالك غتكفر بيه على الذنب ديالك ..

بقا الاصيل ساكت وقاليه انا نقدر لوي ليك دراعك ايور ..ااه فكرتيني ..سميتك زوينة..مك ختارت ليك سمية زوينة ..المهم ماعلينا ..قلت ليك انا قادر نلوي ليك دراعك ..باش غدافع على راسك؟

هز يور راسو قاليه انا مكنخافش من الموت ..نموت وراسي مرفوع احسن ليا من عيشة مدلولة

قاليه الاصيل جاوبتي على السؤال ديالك ..هادا هوا جوابي اولدي .. يا طرف مني ..من دمي ولحمي .. حتى انا كنفضل نموت وراسي مرفوع ولا عيشة الذل .

مسح الاصيل على وجهه وجلس وقاليه نهار كبيير هادا ..انا مرتاح اكثر من قبل ..الى بغات تجي الموت مرحبا بيها.. ولاكن نتنازل على العرش اللي سيرتو هاد السنين كلها ..لا مستحيل..علاش منجلسوش..ونتناقشو..ونخليو الامور السياسية بوحدها والعائلية بوحدها ومانخلطوش بيناتهم ..هاكا نعرفو نتعاملو مع بضياتنا اكثر

قاليه يور صعيب تفرق بين النحل والخلية والعسل.. كما صعيب بفرق بين السياسة والعائلة ..موضوع واحد شاملهم كما كتشمل الخلية النحل والعسل. كيفاش غادي نفرقو بين السياسة اللي جامعة بيني وبينك وموضوع الولاد وانا سلطان ونتا سلطان

قاليها اذا خليها مشابكة وخلينا نركزو فموضوع السياسة اكثر ..خاصك تعرف ان قشتالة قاصدة تشتتنا .. وهاد الحرب بيناتنا عمرها مغتسالي..الى تلهينا بالصراعات بيناتنا غيجي العدو يقضي علينا كاملين..دابا خلي موضوعنا وشوف موضوع قشتالة اللي جاية قاصدة ضرب قرطبة .. انا طبعا يدي مادها ليك ..غادي نوقف معاك بحال المرة الفايتة ..

قاليه يور الرك الفايتة كان هدفك ضم قرطبة للاندلس وتخليها تحت الامرة ديالك

قاطعو الاصيل قاليه بصح ولاكن لحد الساعة ماعطيتش امر فحقها ونتا اللي مسيرها بلا تدخلات ..

قاليه يور وشنو المقابل ديال هاد المساعدة ديالك؟

قاليه السلطان المقابل ولدي سلطان .

رفع يور راسو قاليه بشرط

صار الاصيل عينيه قاليه شنو هوا شرطك؟

قاليه يور تعتارف بيا ولدك قدام العالم كامل

هز الاصيل راسو وتبسم ن هاد المفاجأة ومشا شد ليه كتافو قاليه دابا عاد هضرتي.. دابا نفدرو نتفاهمو بالعقل

حيد ليه يور يديه وقاليه غنتفاهمو نهار يعرف الكل باللي انا ولدك..ديك الساعة نقدرو نتفاهمو

خرج من حضرة الاصيل ومشا داز وسط حراسه ركب على الخيل وخلا الاصيل جالس بلاصتو كيردد

غادي تخضع اولدي ايور ..غادي تتقبلني طال الزمان ولا قصار ..اما نتي يا روح الندى الله يسمح ليك على مادارتي فيا وما مزال كديري فيا

خرج من البيت حنا ليك الكل راسو ووقف قدام حكيم قاليه جهز الخيل نرجعو للقصر

حضرو ليه العود دياالو ركب واخا مزال فيه تعب المرض ورجع للقصر ..استقبلوه ضفوف الحراس والجنود والنفار كينفر بصوت عالي والمدافع كتطلق باش الصغير والكبير يعرف برجوع السلطان اللي خبارو كلها نتاشرات فالمدينة على انه مريض وكيتعالج بعيد على القصر.

دخل لقا عائلته كلها واقفة استقبله تقدو باسو ليه اليد وحدة وحدة وعنقوه بناتو وموات بناتو وهز ولود الصغير بين يديه قاليه البطل ديالي.. شنو درتي فغيابي

هز الصغير يدو قاليه انا غادي نكبر نكون بحال بابا

حطو الاصيل وهز راسو. فشهرزاد اللي الدموع سبقوها وطاحت ليه على رجليه كتبكي ..وقفها شد ليها فكتافها وهي كترجاه يرجع ليها ولدها سالم غانم ويفك اسره

رفع السلطان راسه قاليها غيرجع قريب بلا ماتخافي

قالت ليه كتبكي اسره الكفرة بالله ..غتالوه واسره

طبطب على كتفها ومشا دخل لجناحو وقال لحكيم

جمع ليا اعضاء الديوان كلهم .. والامام والمفتي وقاضي القضات دالمدينة ..هاد العشية

حدر ليه حكيم راسو وخرج ينفد وفطريقو لقا شهرزاد واقفة وقالت ليه حكيم ..طمني ..ولدي سلطان غيرجع

حدر ليها راسها قاليها اكيد غيرجع الاللة شهرزاد اير كوني هانية

قالت ليه وشنو السبب اللي خلى هاد العداوة تنوض؟ غتكون بلا شك عارف؟؟ عارف شنو السبب اللي خلى السلطان يور يطعن السلطان اصيل..

قال حادر راسو كولشي كيوضاح فالوقت المناسب الاللة

بلعات ريقها كتشوف فيه وكتحاول تعرف منو وقالت ليه قولي شنو السبب اللي

حدر راسو قاليها نتي عارفة انا خادم سيدي كنفد ومكنزيذ حتى حرف

قالت ليه نتا الصدر الاعضم والدراع ليمن ..مافيها باس تقولي السبب انا راني ام ..قلبي واكلني على ولدي

قاليها سمحي ليا شهرزاد تعطلت على تنفيد الاوامر

مشا وهزات راسها بغيض سدات عينيها وباغا تعرف شنو راه كيدور فالقصر..عيات تبحث وتقلب مالقات حتى واحد يجيب ليها شي خبار ولا قدرات توصل لشي حاجة هاد المدة كلها .. بقات مكتفة معارفة باش تبدا وشنو دير وخايفة على ولدها ومنصبه وهازة هم تقل من الجبل مابقات لا كتنعس لا كتاكل

تجمعو اعضاء الديوان بمن فيهم قاضي القضاة والمفتي والمدون والامام والوزراء والمستشرين .

جلسو فالديوان على رأسهم السلطان الاصيل وشار للمدون قاليه سجل على دفتر العائلي للدولة الاموية والسلالة الملكية .. انني مسؤول على قولي واعترافي امام الله والملائة الى يوم الدين..واعترف ان السلطان يور بن محمد المرتضي بالله ..هوا ابني البكر ..

نحرك المجمع و وشي شاف فشي وتصدمو بقاو كيتمتمو والسلطان كيشوف فيهم بابتسامة هادئة خلاهم يستوعبو الصدمة وقال

يور بن محمد المرتضي بالله هوا ولدي من الاميرة روح ندا بنت جعفر بن محمد .واللي هي في الاصل بنت خالي المرحوم جعفر بن محمد حاكم مدينة تارودانت المغربية .. واللي كانت جارية عندي بعد سقوط المدينة ووفاة جميع افراد عائلتها ..انا المعترف السلطان محمد اصيل المرتضي بالله

رفع راسو وقال للمجمع انتهى الاجتماع يا سادة ..يمكن ليكم تخرجو

ناضو مصدومين حتى واحد ماقد يهضر وخرجو حتى لبرا عاد بقا واحد كيقول لواحد واش هادشي معقول!!! سلطان قرطبة ولد السلطان الاصيل!! اش هاد الخبر !!

هادا مدفع ماشي خبر تفرق المجمع على برا وخرج السلطان عطا امر باش يتجمعو افراد عائلتو وفعلا تجمعو فجناحو كلهم وتستفو قدامهم كيتسائلو شنو السبب اللي خلاه يجمعهم ..دورات شهرزاد عينيها كتشوف جنابها وتفكر فشنو ممكن يكون وقع غالديوان الاي جنع ليه كاع الريوس الكبيرة وزاد حمعهم حتى هما قدامو ..وقف شاف فجويرية تبسم وقاليها اجي ابني عندي

تقدمات جويرية شد ليها راسها باسو قاليها لعروسة ديالي وبنتي وحبيتبي كبرات ..ولات عروسة

حدرات جويرية راسها حشمانة باست ليه يدو وقاليها كيضحك خرجي تسناي على برا حتى نعيط ليك

هيطات راسها خرجات ورفع راسو شاف فمرتو والحريم ديالو الجوجات وبناتو وقال كلكم عارفين القصة اللي كدور من فم لفم ..اللي عشت واحد الوقت وكل واحد ألفها كيف بغا .. عارفين باللي كانت عندي جارية قريبة ليا وعندها مكانة خاصة.. وهربات حاملة

بلعات شهرزاد ريقها وشدات فحلقها كتشوف فجنابها ..تبسمات وخدة من لحريم ديالو وشافت فشهرزاد وقالت

ان شاء الله يكون اللغز اللي مر عليه سنين تحل ولقيتي بنتك ولا ولدك امولاي

قالتها وشافت فشعرزاد بابتسامة مستفزة ..تنهد السلطان بعمق وقال ليهم اللغز تحل ..وولدي لقيتو

حلات روح الياسمين فمها مصدومة قالت ليه عندي خويا واحد اخر ابابا؟

تبسم شاف فيها شاف فيها وقال

عندك خوك بحال باك .. راجل ونص وسلطان من لفوق

تصدمو كلهم وفديك الصدمة توجهات الانضار لشهرزاد اللي من الخنقة والصدمة قطعات العقيق على عنقها ..اما روح الياسمين قالت ليه مصدومة بصح ابابا ؟؟ خويا سلطان ؟؟

قاليها ايه ..خوك هوا حاكم قرطبة

طاحت شهرزاد على طولها سخفات والحريم لخرين كلهم تصدمو واولهم ام جويرية اللي دارت يدها على قلبها وتفكرات بنتها ..قاليها السلطان خرجي وحاولي تشرحي لبنتك وتبسطي ليها الموضوع .. ونتي عارفة كيفاش تسايسي بنتك

خرج من تما خلاهم مقلوبين وداز جويرية مسح على راسها وقاليها حتى حاجة ماتستاهل دمعة منك ابنتي..

خرجات الام عند جويرية شدات فيها من يديها كتشوف فيها بأسى وداتها لجناحها وقفاتها وشدات فكتافها لحبيبة..بنت الاصيل اعضم سلطان ..تستاهل اعضم سلطان ..

شافت فيها جويرية قالت ليها بابا بغا يزوجني ياكي

ردت الام بأسى قالت ليها باباك عندو خبر..بنتي جويرية ..السلطان يور

شافت فيها حويرية بعيون براقة قالت ليها مالو

قالت ليها الام السلطان يور خوك

عقدات حويرية حواجبها قالت ليها شنو؟ كيفاش خويا؟

قالت ليها الام بأسى الاميرة روخ الندى ..كانت حملات من باباك حيت كانت جارية فقصره ..وهربات حاملة وولدات ..هاد الولد هوا يور ..خوك

بقات كتشوف فيها جويرية حتى بداو عينيها يتقلبو وسخفات ليها بين يديها وبدات كتعيط على الخدم والوصيفات .اما السلطان طلع عند مو وكان بينهم حوار عميق..واخا مكان فيها اللي يهضر لاكن ختاصر ليها كولشي وقاليها ولدي لقيتو ..ولدي اللي سنين وانا كنقلب عليه

ابتسمت اخر ابتسامة ليها وعلى كلمتو سدات عينيها ورحلات من الدنية وخلات كولشي وراها وتهنات . مكانش متوقع الموت ديالها .. تصدم الاصيل وجلس شد فيها وسد عينيه هبط راسو على يدها فصمت مطولا وناض باس راسها وخرج من جناحها مطأطأ الراس كيتذكر سلسلة حياتو معاه من الاول حتى للاخر وهوا نازل فالدروج ..لاكن كانت المفاجأة الكبيرة اللي تجمعات على الاصيل هوا حكيم اللي دخل كيجري حدر ليه الراس على عجلة وقاليه مولاي… حنا قدام حرب كبيرة والعدو على الحدود وخاصنا نتحركو ..لحسن الحظ رسلتي اللي يتفقد الوضع ..فعلا العدو دارها

تلفت الاصيل شاف وراه فمو اللي خلا فالبيت ورجع شاف قدامو وتسيف فسيفتو عقد غوباشتو وعول على الحرب وقال

جهزو الجيش والامتاع الليلة الصباح مع الفجر نتعرضو ليهم فالحدود ..وانطلق على وجه السرعة لقرطبة خبر السلطان باش ياخد الحذر ديالو .. فأي لحضة يدخل عليه العدو .. علمو يخرج اهل القصر من تما ..العدو العدف ديالو يقطع النسل ماشي يدمر المدينة اللي عينو فيها يالاه طلق راسك

مشا حكيم على وجه السرعة كيطير عند السلطان اللي كان فهاد الاثناء جالس فجناحو وبحال العادة وفهاد الايام الصعبة مكتفرقش عليه يمامة ..كانو بجوج جالسين بالليل على شرفة البيت فداك الجو الهادي وتنهد قاليها

مابقيت عارف ماندير .. تايه .. اول مرة نتيه ويوقف تفكيري ومانعرف لا شنو نقدم ولاشنو نأخر..وماعرفتش علاش درت بكلامك فآخر لحضة

قربات منو ابتاسمات وشعرها المدرج مطلوق كامل والفرقة الوسط ولابسطة قفطات جوهدة ابيض محلول من الجناب حتى للركبة ومشدود بالمجدول وعيونها مكحلة وفاها وردةي تقول وردة مغمضة

حطات يدها على كتفو قالت ليه تايه حيت الامر كيعني..حيت قاسك فقلبك امولاي.. حيت جرحك والجرح كيتلف مولاه على الطريق الصحيح..احسن مادرتي

دور وجهه شاف فيها كيتأمل وجهها قريب وهي متكية على كتفو بيديها وكدوز على عنق السترة البلدية المحلولة فتحة كبيرة على الصدر بالسفيفة وقال

شنو الهدف من انه يعتارف بيا ؟

تنهدات ودوزات يدها على لحيتو الكحلة قالت ليه اك بصوتها العذب الضعيف والحنين

الهدف تقوي بلاصتك.. حيت عدوك هوا قوتك امولاي ..هاد العدو اللي خديتيه عدو ..هوا قوتك ..نتا دابا فحرب مع مستقبلك وعدوك وقوتك فراجل واحد..خاصك تعرف كيفاش تخوض هاد الحرب..الحرب ماشي ديما بالعنف..حتى كسب المحبة راه حرب… غادي تجاوز هاد المرحلة ويرجع استقرار تفكيرك ..وغادي تلقا راسك رايح تيق بيا

تكا شوية ب ضهرو سرح يديه كيخمم وتكات

وتكات على صدرو بيديها كتشوف فيه وتمرر صبعها على لحيتو وقالت

نتا امولاي من اقوى السلاطين ..حيت هادشي اللي وقع ليك ماشي ساهل ولاكن مع ذلك بقيتي صامد

كانت كتهضر ويدو على فخضها كيتسارا بصبعانو ساهي حتى حس بشي حتجة قاصحة وهز راسو عرا ليها رجلهت قاليها شنو هادشي ؟

شافت جهة الحرحة اللي لوات عليها خيط غطاتها وقالت ليه والو امولاي غير طحت

تلفت شاف فيها وهز يدو حطها على شعرها ودخل صبعانو في فروة راسها قربها عندو كثتأمل جمال وجهها وعيونها العسلية كبيرة وشوية بشوية تخلطات الانفاس وتقاربات الشفاه وباسها على شفايفها وكانت بوسة اللي خلات جميع مشاعره ورغباتو تنوض فموجة وحدة هزاتو من بلاصتو قرباتو ليها وتكاها بلاصتو حط يدو على عنقها وزيد على يدها اللي فوق راسها بقوة وحل عينيه شاف فيها بعيون كتبري دايبة تأمل فتعابيرها مزيان وهز ليها يدها حطها على كتفو العريض .. بين امواج كدي وتجيب فيهم وقبلات حارقة بدا الدقان بالجهد فالباب ناض على اثره السلطان غاضب وناضت جلسات تشوف شكون من بلاصتها ونص صدرها عريان وحطات يدها على توبها كتخطي فخادها .

فتح البيبان بصدرو عريان لقا ذو الفقار حدر ليه الراس قاليه مولاي الصدر الاعضم حكيم فالقصر كيتسناك وكيقول الحالة مستعجلة ميمكنش تتسنى

قاليه السلطان خودو للديوان

دخل صد الابواب ورجع هز حوايجو وناضت وقفات قالت ليه ياك لاباس

قاليها حكيم ..الصدر الاعضم دالسلطان اصيل جا

قالت ليه وفهاد الليل؟ ياك لاباس؟

جرها من خصرها باسها قاليها ماتخرجيش غادي نرجع

نزل السلطان عند حكيم اللي كان كيتسناه على احر من الجمر وحدر راسو نسا الحسابات والصراعات والمواجهات اللي دازت بيناتهم قبل وقال

مولاي.. السلطان الاصيل كيخبركم بتوخي الحذر لاننا فوجه حرب كبيرة مع قشتاله ..وراهم دابا على حدود البلاد ويقدرو يدخلو على قرطبة من هنا لبضعة ايام .. مولاي كيقول ليكم جهزو انفسكم موعدنا مع الفجر غادي نتعرضو ليهم خارج المدينة ..وكيقول ليكم خرجو اهل القصر اللي مستهدفين من السلالة الحاكمة

تلفت السلطان يور كينعل ويلعن قشتالة ومايجي منها وقاليه خبر السلطان باللي المعلومة وصلات وغادي نكونو جاهزين

حدر حكيم راسو مشا كيجري وخرج السلطان على عجلة هبر ذو الفقار ورئيس الحرس ودار اجتماع فنص الليل مع المستشرين واعضاء الديوان اللي لقطوهم من بيتوهم واحد واحد شي كان ناعس شي كان فايق .. اجتمعو فالحين على الحرب الملعونة وقررو شكون اللي غيمشي وشكون اللي غيبقا ودقات اجراس الخطر والحرب فالقصر وابراج المدينة باش كولشي يتوخا الحدر ديالو ..ناضو البنات فالعمبر فاش سمعو الاجراس وناضت الروينة والخدم تلفو وكلشي ترون ولا من ينضم ولا من يحكم .

خرجات يمامة من بيت السلطان كتجري بشعرها محلول لوات عليه وشاح تستارات وخرجات لبرا لقات الروينة نايضة وقابلات ذو الفقار فطزيقها وقفاتو قالت ليه شنو كيوقع ؟ شنو طاري؟

قاليها الحرب ..والعدو على الحدود وحنا فخطر خاصنا نجهزو راسنا

تلفات ماعرفات فين تمشي ودخلات للقصر لقات الخدم كيتجاراو وعابد دايخ جراتو قالت ليه شنو واقع ؟. شنو كاين ؟

قاليها البنات تخلعو وناضت الروينة فالعمبر وكيدفعو الباب باغين يخرجو والى خرجو كارتة غتوقع شكون يحبس داك الكم كامل

تلفات قالت ليه واش كاين السلاح ؟ كاين السلاح

قاليها كاين السلاح ماعندناش الحق بيه وذو الفقار اللي مكلف بيه

دفعاتو قالت ليه سير جيب ذو الفقار لهنا

نزلات كتجري مع الدروج جهة العمبر لقات الخدم مكاليين الباب من برا والباب كيمشي ويجي باغي يتفتح

رجع عابد كيجري قاليها مكاينش ذو الفقار مالقيتوش

قالت ليه فين كاين السلاح هضر؟

قاليها كاين لتحت

قالت ليه السلاح كيطلق النار ؟

قاليها لا

شدات فوجهها ومشات كتجري خرجات كتقلب على ذو الفقار حتى بان ليها السلطان داخل ومشات جراتو من يدو كتنهج قالت ليه غتوقع كارثتة ..البنات فالعمبر كيدفعو الباب باغيين يخرجو والخدم صابرين ولاكن مابقا ليه والو يتحل

سخط اكثر ماهوا ساخط عيط لرئيس الحرس دخل بنفسه ومعاه قوة ردعات الباب بحديد كبير وحبسوهم لداخل .. وغوت عليهم رئيس الحرس بالجهد باش يتهدنو والا غيخليوهم تما يموتو ..شوية بشوية بدا الصدع كيهدى لداخل وطلعات يمامة كتجري مع الدروج تشوف كيوقع ولقات متعة قدامها جايا كتجري وكرشها خارجة مخلوعة وشدات فيمامة اللي كانت كتشوف فيها مصدومة وكتشوف فكرشها

متعة : شنو واقع ؟؟ واش بصح الحرب؟؟ واش خاصنا نهربو ؟

هبطات يمامة يدها على كرشها قالت ليها شنو هادشي ؟

شدات متعة فكرشها قالت ليها غيقتلوني انا ولدي ولد السلطان

فشلو ركابي يمامة وشدات فواحد الحيط وراها وجلسات دايخة ومتعة كتشد فيها وتسول مالها وتسول على شنو واقع وبقات جالسة ماتحركاتش وماقدراتش تيق وعاد فمهات علاش غبرات متعة وشنو السبب ..طولات فالجلسة ومتعة حداها حتى هي جلسات خافت تبقا بوحدها وحتى ستوعبات يمامة وتلفتات قالت ليها نتي حاملة من السلطان يور؟

حركات ليها متعة راسها قالت ليها اه ..خلاوني بوحدي ماعرفت مندير

قالت ليها يمامة هادشي علاش غبرتي

شافت فيها متعة قالت ليها علاش كتبكي؟ مالكي واش حتى نتي خايفة من الحرب

مسحات يمامة خدها قالت ليها لا كنبكي على راسي ..على حالي

شدات فيها متعة قالت ليها شنو غندير ؟ فين لاللة روح الندى ؟ وفين دادا عبدية خلاوني بوحدي ماداوهاش فيا

سدات يمامة عينيها وبدات السخونية كطلع معاها وبدات كترعد وحطات يدها على الجرح اللي فركبتها وكمداتها وهي كتزير على الجرح ومسحات دموعها وناضت هزات راسها كتشوط وتنفض صدرها قالت ليها نوضي..نوصي معايا اجي

ناضت متعة تبعاتها شادة فيها ومشات طلعاتها لجناح السلطان اللي كان كيخطط فورقة كبيرة ويرسم خطة لهاد الحرب اللي جات على غفلة

ماخلاوهاش الحرس تدخل لاكن دفعات الباب ودخلات جارك متعة حتى وقفات قدام السلطان اللي هز راسو شاف فيها وشاف فمتعة وراها حادرة راسها ..تفاجأ وقال ليها متعة ؟؟ !!

شافت فيها يمامة قالت ليه متعة بقات بوحدها هي ولدك امولاي.. ماعرفاتش شنو دير وفين تمشي وانا ماعرفت باش نعاونها وجبتها عندك

مشا قرب من متعة وتحنا القرفصاء قدام كرشها شدها بيديه وسد عينيه حط جبهتو عليها ويمامة مدورة وجهها وعاضة شنوفتها وقجات صبعها الابهام حتى جاتها الدوخة والدموع نزلو وسال الدم من شفايفها وعيات تصبر فالاخر عطات وجهها للباب وخرجات

رسل يور متعة والوصيفات مع الجنود ديالو للقصر القديم وهي غتموت بالخلعة وناض رجع للمخططات ديالو ..اما يمامة فكانت ديك الجرحة بحال التلج كل مرة تشد فيها وتتفكر الوعد اللي عطات راسها واخا تكسرات وسمحات فالحرب وشدات واحد البيت سدات عليها فيه كمداتها حتى نعسات . بلغ الفجر ..وخرجات الدفعة اللولة اللي هازة المدافع والرحيل وتبعاتها الدفعة الثانية وبقا غير يور وجنود الجبال اخر دفعة مامشاش حيت كانت الحدود قريبة ليه وجلس فالقصر حتى يتحطو الرحال ويلحق عليهم ..

ونهار بغا يمشي خرج وسد عينيه ومشا كيدور فالقصر ويشوف جدرانه وقلبو مامأمنوش..امر بفتح باب العمبر وتحل ولقا البنات قدامو واقفين مخلوعين ومن بينهم شادية ..تقدم والكل حدر ليه الراس سرح عينيه وداز حدا شادية هز ليها راسها من دقنها ومسح على خدها قاليها رجعي لبلادك ..وجمعي شملك .. وكمل طريقو من بعد ضرب دورة فالقصر وداز حدا الخدم كانو كاملين مصافين .. كانت يامنة وسطهم حادرة راسها ورقف قدامها السلطان وتبسم قاليها شنو غديري ايامنة الى خرجني من القصر؟

شافت فيه كتسائل قالت ليه انا بعدا كنعرف نطيب نخدم في قصر اخر

ضحك وكان محتاج لديك الضحكة ورتب على كتفها وطلع لفوق قايل ذو الفقار وامره يعطي تعويضات لكاع اللي خدموه وسهرو على راحتو .. ويتهلا فيهم بالذهب اللي يقدر يعيشهم فالبداية ..حدر ذو الفقار راسو قاليه غادي نربحو الحرب امولاي

تنهد السلطان يور قاليه قلبي كيقول حاجة. اخرى

مسح على وجهه ومشا لجناحو طلق سجادتو وامر باطلاق سراح الامير سلطان اللي خرج ساخط تبع الاصيل للحرب لقاه واقف قدام الخيمة المنصوبة ليه ووقف قدامو حدر ليه الراس وقاليه مولاي..واش كتعاونو الراجل اللي طعنكم

قاليه السلطان هاداك الراجل خوك اسلطان

هز سلطان راسو مصدوم قاليه ماتقوليش الهضرة اللي كدور بصح مستحيل امولاي

رفع الاصيل راسو قاليه ماشي مستحيل ..هادي الحقيقة اسلطان وكان خاصك تفرح ماشي تغضب ..دابا حنا فحرب..والمدينة بوحدها ..رجع وقف على تسييرها حتى نرجع ونهضرو فهادشي ..ماعندناش الرقت دابا

سكت سلطان وحدر راسو قاليه واخا امولاي

مشا ركب على الخيل لاكن حلف حتى ينتاقم من يور ومادار فيه وفيهم وضرب الخيل برجلو مشا

اما السلطان يور سلم يمين وسلم شمال وهز يدو دار الدعاء وخرج من جناحو امر عابد يجيب ليه يمامة .

مشا عايد جابها من البيت فين حبسات راسها داها ليه لجناحو لقاتو بلباس الحرب وجاهز باش ينطالق

شافت فيه بأسى مطولا وسدات عينيها هبطات راسها ..قرب هز ليها راسها قاليها في حالة ما وقع اللي مابغيناش يوقع .. سيري للمغارة هزي مايكفيك من الذهب ..وخرجي بداي حياة جديدة.. تزوجي وولدي ولادك ..الحياة مزالة قدامك

تبسمات وحركات ليه راسها قالت ليه غادي نبدا حياة جديدة ..كون مرتاح من جيهتي

شد ليها راسها باس جبهتها وشد فيدها خرج هوا وياها مشات معاه حتى ركب على الخيل ورجعات اللور كتشوف فيه وعينيها مغرغرين باادموع

انطلق يور لحدود الحرب وتقابل مع الاصيل فالخيمة ودرسو الهطة بجوج جنبا الى جنب .. وحكموها وكانت ناجحة مية فالمية وكل واحد خدا الدور ديالو فالحرب وتقسمات المجموعات واستعدو للعدو اتم الاستعداد ووقفو فوجه المواجهة . بدات الحرب اللعينة وشن الهجوم والبلدان بجوج صمدو وكانت الخطة محكمة وتقدمات القوة الاولى نجحات والثانية اللي تحت قيادة حكيم نجحات وبقات اخر دفعة اللي بيها غيختمو الحرب لصالحهم واللي كان فيها السلطان يور مخفي كيتسنا الفرصة فين يعطي الاشارك ..لاكن فاللحضة الحاسمة فوق الجبل والجنود ديالو الاقوياء منتاشرين مكيبانوش وكان فتاح حاضه كيتسنا اشارة منو ضهر فجأة سلطات ملثم من بين دوك الجنود وخلاه حتى وقف يعطي الاشارة وضربو بالسهم طيحو وعاود ضربو بالسهم الثاني وهرب خلاها طايح ..حل عينيه كيحاول ينوض ولو على الاقل غير يخرج سيفه يعطي الاشارة لاكم ماقدرش وعيا يكابو فالاخير طاح فمرك وحدة وبقاو الجنود كيتسناو الاشارك وققدات القوة التوازن ديالها والنضام اللي كانت غادية عليه ومافهمش الاصيل شنو اللي وقع وفين قوة يور اللي كان خاصها طيحهم فالفخ ..تقلب عليهم كولشي وغير السلطان الخطة عطا للدفعة الاولة الحق فالهجوم بالسهام وردم النص ديالهم ..فوسط الحرب طلع فتاح كيجري يشوف شنو واقع وعلاش ماعطاش الاشارك لاكن لقاه غارق فدمو حتى لودنيه وناض هز راسو بغضب شديد عطا الاشارة لاكن كان فات عليها الفوت ودخلات القوة تدافع لاكن حتى دخل العدو على ارض الحدود وزطم فكولشي واستهدفو الاصيل اللي كان مزال مابرا مزيان باش يطيحوه ووقع عليه هجوم عنيف حاول قدر المستطاع يطيح منهم عدد كبير وطيحو لاكن تصاب وشافو حكيم تصاب فضهره وانطلق كيجري شار بيدو للجنود دارو ليه درع من الجنود وبغاو يهربوه لاكن مابغاش ودفع حكيم قاليه انا هنا غنموت

طاح على ركبتو شد فضهره قاليه مغنهربش هنا غنموت

ماسمعش حكيم لكلامو وهزوه داوه غبروه .

وصل جندي للقصر كيجري قبل العدو هاز راية حمرا وتدقات الاجراس وتفتحو الابواب وخرج الجميع من القصر هرب وكانو وشدات شادية فختها يامنة هاربين وشي كيزطم فشي ..شافت ختها عيشة وسط داك الطوفان هاربة نازلة من لفوق لاكن بقوة الدغط وكلشي هارب طاحت من العلو العالي ماتت قدام عينين شادية اللي غوتات فالسما وطاحت على ركابيها بولا يامنة اللي جراتها هرباتها وخواو القصر خلاو ه خاوي غير يمامة بوحدها اللي ناعسة فجناح السلطان على سريرو ..سمعات صوت الاجراس وتذكرات صوته فقصرهم والعدو داخل عليهم ..نفس الصوت ..نفس الجو ونفس الرائحة ..لاكن هاد المرة مكانتش خايفة ..ناضت وخرجات بشوية عليها والريح كيضربها ونزلات للساحة لقاتها خاوية غير هي بوحدها وصوت الارض كتزلزل والعدو جاي ..سرحات عينيها فالقصر ووقفات كتشوف فيهم داخلين كيجريو وهزات يديها سدات عينيها وصيعها فالسما كتشهد وهما هاجمين دفعة وحدة وسلمات راسها لسيف جا قاصدها نيشان ضربها طيحها فبلاصتها

يتبع..

‎