ذو التيجان الجزء التاسع

دارت شامة يدها فيد روح الندى واخا في مامضى عمرهم تفاهمو ولا جمعاتهم طريق.. صغرهم فهاد القصر داز كحل زحل عليهم بجوج..ماقصراتش شامة من جهدها باش تصفيها لروح الندى وماقصراتش حتى روح الندى من جهدها باش ترد دقتها .

الحاصول كيقول المثل.. انا وخويا على ولد عمي ..وانا وولد عمي على البراني.. هادا مكان مع روح الندى ولاللة شامة .. اللي من بعد ما حلفاتها فشهرزاد وخرجات من جناح روح الندى كتتحلف ومشات فطريقها لجناحها ..خرجات فجهرزاد حتى هي غير كدور ماعندها مايدار من غير تعرف شنو كيجرا فالقصر .

وقفاتها قالت ليها مالك نتي غير كتختلي من قنت لقنت ؟!! ياك لاباس

هزات لااللة شامة راسها وحاجبها وقالت ليها

هادي راه عندها سميتها .. الشريفة

حلات شهرزاد عينيها قالت ليها قالت ليها. طوال ليك اللسان ومابقيتيش عارفة شنو كتخرجي على فمك …انا لاللاك شهرزاد

ردات عليها شامة قالت ليها وانا لالاك شامة..

قربات شهرزاد كتشوف فيها بكره قالت ليها عنداك يحساب ليك وقوفك جنب روح الندى غادي يقضي ليك شي حاجة.. كن كان الخوخ يداوي كن داوا راسو ..هي براسها غير ضيفة هنا وغتزيد مع الطريق ..انا هي ام ولي العهد عنداك تنساي هادشي سمعتي

زادت شهرزاد خلفة وبقات شامة واقفة وسم كلام شهرزاد كيسري فعروقها وهي سادة عينيها .. حلاتهم وقالت بغضب صافي براكة.. عييت نصبر للسم ديالك اللفعة ولاكن دابا غتكمدي.

مشات شامة بداك السم اللي شرباتها شهرزاد وصات وصيفتها تسخر ليها وسيفطاتها جابت ليها السم من عند عطاو فالسوق بالوصاية المكتوبة فورقة وحضراتو للاللة شامة اللي شداتو بين عينيها وهزاتو كتشوف فيه وتتوعدها.. كانت فديك الليلة نفسها روح الندى على موعد مع السلطان بالليل فالسر باش تمشي تشوف ولدها مور ما نعس كولشي وخرجات خزنة بحال العادة ركبات حداه ومشات

وصلات روح الندى للقصر القديم عند ولدها ودخلات عندو لقاتو كيجلس وكيقدر يتحرك لاكن مزال ضعيف مكيقدرش يوقف بزاف ومناعته قليلة.. فرح بيها وجلسها جنبو كيهضر معاها وهي كتسول على حاله وحواله وقالت ليه بابتسامة

ولدي الغالي.. جاك وليد غزال محطوط منسوط غير نتا من متعة

تفاجأ قاليها جاني ولد !!

تبسمات قالت ليه مبروك عليك اولدي ان شاء الله يكبر فعزك ..ويكون بحالك واحسن منك

باس يدها قاليها امين وعنقاتو قالت. ليه كابر اوالدي.. كابر راك طولتي فهاد المرضة..الله ياخد الحق فاللي كان حيلة وسباب.

تكات حداه كتمسح على شعره وتعاود ليه حتى دخل عليهم السلطان تبسم قاليها يالاه نرجعو بحالنا قرب الفرج يطلع

تنهدات ناضت وتحنى هوا عند يور حط يدو على ركبتو زير عليه باش يشتد وينوض فاقرب وقت ..بقا يور كيشوف فيه ولاول مرة ووبتردد هز يدو على يد الاصيل وحطها باطمأنان قدام اعين روح الندى اللي دارت يدها عاى نيفها متأثرة كتبكي فصمت..تبسم الاصيل وفتح يديه ليور وتم الصلح التام والعناق الحار قدام روح الندى اللي سدات عينيها كتشكر الله وتحمده على هاد الرحمة اللي نزل عليهم ، اما حكيم مكانش راضي على داك الصلح وكان كيشوف فكولشي بانزعاج من ورا شباك من الخشب كبير وتذكر يوم طعنه طعنة الموت نعس فيها السلطان ايام وشهور ..دور وجهه مشا خرج برا وقال بغضب كيجمع على قبضة يدو

بااينة نيتك اروح الندى..كلشي واضح عندي ومغنخليكش توصلي لداكشي اللي بغيتي .غادي نلقا ليك راس الخيط ضاروري تكون عندك نقطة ضعف

تلفت وراه كيتنفس لاكن شاف منضر كيقطع الانفاس بين الاصيل وروح الندى اللي وقفو برا قراب من بعض في قبلة كانت باينة شاملة للقديم والجديد ومابغاتش تنتهي طعنات حكيم كملات ليه ما بقا وقلب وجهه سد عينيه حتى سمع صوت الاصيل قاليه يالاه جهز العربة نرجعو

حنا حكيم راسو قاليه جاهزة امولاي وهز عينو فروح الندى اللي دايزة قدامو كتشوق فيه وتشحر ليه السم على عينيه ومشات ركبات فالعربة ديالها

فهاد الاثناء مشا المسير كيجري لجناح شهرزاد كيدق عليها ويضرب حنكو حتى حلات ليها وصيفتها الباب ودخل لقاها واقفة مستورة فثوب طويل ديال النوم باين كانت ناعسة ..

قالت ليه اش واقع اش جابك فهاد الوقت

قاليها والله ماكنت نجي الاللة كن ما القضية فيها الامير

حلات عينيها طارت عليه قالت ليه هضر شنو وقع ؟ الامير بيخير

قاليها مفزوع الامير كيموت الاللة

خرجات من جناحها بحوايج النعاس كتجري مشات لجناحو وقبل مادخل شافت العبيد مخرجين كسدة فوق خشبة ميتة مغطيينها من واسها حتى لرجليها ..غوتات للسما العالية وطارت عليها حسذات الغطا على وجهها لقات جارية من الجواري لونها اخطر والروح طالعة ..ناضت دخلات للبيت كتجري بحال الحمقى لقاتو ففراشو كيتولى والحكماء ضايرين بيه كيقييوه بزز منو وكشاكشو خارجة ..طاحت حداه شداتو بجنون كتغوت وتقوليه نوض..نوض شوف فيا انا مك…معنخليش الموت تديك مني..نوووض توكض كن راجل..كن راجل

بقات كتغوت وضرب وجهها بجنون حتى جروها العبيد ورجليها فالارض خرجوها برا كتركل وناضت وقفات مطرطقة عينيها شنقات على المسير قالت ليه شكون يغا يقتل ليا ولدي.. شكووون وكلو السم ..فين السلطان يجي يشوف ولدو فين

مشات كتجري فطريق جناحه وتمسح نيفها بجنون حتى قربات توصل وخرجات فيه نيشان جاي هوا وروح الندى بالسلهام ووقفات مصدومة كتشوف فيهم ..تصدمو حتى هما مافهمو والو فحالتها وشافو العبيد والخدم جايين وراها كيجريو ..شهرزاد فقدات عقلها وتذكرات تهديد روح الندى ومشات بغات طير عليها لاكن الاخيرة تخبات ورا ضهر السلطان اللي شد شهرزاد من يديها وهي كتغوت

سممتي ليا ولديييي..سمممتي ليا ولدي يا اللفعة ..غنقتلك بيدي

شدوها العبيد وهي كتغوت وقال السلطان باشمأزاز خودو عليا هادي من هنا حتى يرجع ليها عقلها

داوها كتغوت وتشوف وراها وروح الندى واقفة كتبسم ليها وعطاتها بوسة بيدها كضحك وحكيم حاضيها اش كدير بالحرف. اما السلطان كان كيسمع للمسير اللي قاليه الامير كان فالخلوة وتسمم والجارية ماتت فالبلاصة وهوا مزال كيصارع الموت

مشا السلطان كيجري وحكيم وراه لاكن وجع باللور وقف قدام روح الندى قاليها مابقا قد ما فات الاللة روح الندى..الى قدرتي ضحكي على السلطان ومشاعره انا مغضحكيض عليا كولشي باين

هزات راسها قالت ليه واقيلا خاصني نبالي بيك نتا نيت احكيم.. عدويا قريب ليا وانا كنحسيو بعيد عليا

عطاتو بضهرها مشات خلاتو كيجمع الكره وتبع السلطان كيجري اجناح الامير

صبح الحال من بعد صراع مع الموت لاكن الموت كان اقوى من صبر سلطان وخيم على جناحو وهو بين يدين الاصيل اللي كام كيصارع معاه لاجل البقاء..لاكن سلطان سلم امره لملك الموت وهوا كيشوفو قدامو وبغا يريح روحو خر يدو بلع ويقه وهوا عرقان بعد يدين الاطباء عليه وشاف الاصيل اعتارف ليه بجريمته وقاليه انا السبب فسقوط غرناطة …وانا اللي قتلت السلطان يور بالسهام انتقاما لما دار فيك وفيا ..انا تعلقت بالعرش..انا عماني الطمع… انا بغيت نحكم من بعدك ونسيت انك باقي فالحياة

انا كرهت يكون عندي اخ

انا غواني الشيطان ونسيت الموت كاينة

انا نسيت بااللي الموت مكتفرقش بين كبير وصغير

انا الطامع فالسلطة .. قتال خوه .. قتال المسلمين ..عدو للاسلام

انا الضالم وانا المضلوم

انا اخبث انسان ..قتل بدم بارد

جا الدور عليا… باش قتلت باش نموت

انا مكنتاهم حتى واحد

انا عدو المسلمين وهادا جزائي

هادا جزاء كل طماع

جزاء كل خبيث

يموت وهوا جاني غير الفاخر باش يزنذ نارو

سد السلطان عينيه وهبط راسو بغا يهضر لاكن سلطان حل فمو كيشهق قاليه انا طالب السماحة ..طالب الغفران

زير عليه السلطان قاليه مسامح ليك الى بقيتي .منسمحش ليك الى مشيتي

ماشي وقتك. اولدي..ماشي وقتكم ومزال الحياة قدامكم ..

كحز عندو السلطان شد فيه لاكن سلطان هز عينيه فالسما قاليه انا غنموت ..انا كنشوف الموت

ماداهاش السلطان فكلامو خلاه كيهضر وقالبو على جنبو بداو كيقييوه من جديد والسلطان وراه مزير عليه كيدفعه باش يتشبت بالحياة لاكن سلطان كيدفع يدين الاطباء ويستسلم

شدو السلطان من وجهو هز ليه راسو قاليه بغضب وتبات مغتموتش …غتعيش يالاه كن راجل ..يالاه

قلبو على جنبو شاد ليه يديه اللور باش يخلي الاطباء يشربوه الدواء ويتقيا وبقاو فديك المعانات كاملين بيه حتى اذن الفجر وطاح سلطان على ضهره سخفان ماقدرش يتحرك والعرق كيتصبب من جبينو ..خرجات منو وشاف الموت بأم عينيه ومتطلقاتو حتى دوقاتو مرارتها بالثني والثلت وطيحات ليه قوته كلها وجبداتو فوق الفراش جنب السلطان اللي رجع كامل كيقطر بالعرق وحوايجو فازكين .

صبح عليهم الحال وتهناو من ذيك الليلة المشؤومة وخلاه فجناحو ناعس من يعد ما طمأن عليه تجاوزها وخرج لبرا فداك الصباح الباكر هزو راسو كيتنفس ويشكر الله ويطلب السماحة وقال مهموم

ياربي..الى كنت ضالم عاقبني وماتوريني باس فولادي..نصبر بعدابي ومنصبرش اعداب ولادي

هبط راسو مسح على وجهه وتلفت لقا حكيم واقف وراه حاذر راسو قاليه

مولاي ..الجو بارد وانت عرقان خايف عليك من البرد

هز السلطان راسو تنهد قاليه خلي هادالبرد يضربني على الله تبرد داتي

حدر حكيم راسو فصمت وشاف فيه السلطان ويديه على جنابو في حيرة قاليه

شنو هادشي كيوقع احكيم ؟كنشوف ولادي كيطيحى بالسم واحد ورا الثاني،، شنو كيوقع لولادي وشنو واقع قحياتنا..شنو اللي مخلي شي كيقتل شي بلا شفقة ولا رحمة ..حرب وسط عائلتي احكيم خاصها حتما طفا

حدر حكيم راسو وقال بتردد وارتباك كيشتت النضر فالارض وقاليه

مولاي.. هاد المشاكل بدات فالعائلة الملكية من يوم ضهور لاللة روح الندى الى لاحضتي هادشي.. سيادتكم كنتي متنبأ بشنو غيوقع وقلتي واحد المرة باللي رجوعها وقربها منك عندو. هدف بلا شك ..ساعتها فاش قلتي هاد الكلام كنتي كتشوف الامور من جميع الزوايا امولاي

رفع السلطان راسو صغر عينيه قاليه هاز حاجبو

بغيتي تقصد باللي من قبل كنت كنخدم عقلي..دابا كنمشي بقلبي

بقا حكيم ساكت حادر راسو وكان فهاد السكوت علامة الرضى ..قرب ليه السلطان ورفع صبعو وقال ليه هاز حاجبو

انا السلطان محمد اصيل احكيم ..عنداك تنسى هادشي..والاصيل مضحك عليه حتى مرى ..واخا تكون روح الندى بنفسها اللي فوق نساء العالم كلهم . عنداك تنسا هاد الكلام

تبسم حكيم بتوثر من كلام السلطان وقال

حشا امولاي نكون تجاوزت حدي فالكلام ..انا فداك امولاي روحي متغلاش عليك ..من خوفي قلت هاد الكلام

حط السلطان يدو على كتف حكيم وقاليه

اي واحد قريب من العرش راه شيطان فسيفة انسان..هادا راه كرسي العرس اصعب اختبار فالدنيا..الى شفتيه مرة غتشوف راسك جالس عليه من بعد ..يعني كاع اللي فالقصر كيشوفو راسهم فوق هاد الكرسي..وكلشي كيسعى ليه ..روح الندى وولدها ..شهرزاد وولدها ..شامة ..اسمهان..وجميع اللي فهاد القصر..الى جينا نحيدو اي واحد حط العين على هاد الكرسي غنبقاو غير حنا ..والى بقينا غير حنا مغنلقاو ما نحكمو وغنحكمو راسنا..يعني اللي موخروه نسبقوه ونحكمو راسنا وسط حبابنا ..الهدف تسيطر عليهم كلهم وتمشيهم على سيراطك ..واكبر دليل ليك احكيم هوا سلطان اللي يغا يقتل خوه وسمعتي بودنك اشنو قال فاش شداتو الموت .نسى الكلام اللي قلت على روح الندى فالماضي.. المرى اللي هضرت عليها كانت ديال راسها ..اما دابا هي ام ..وكتسعى وضحي على قبل ولدها ماشي على قبل نفسها

بقا حكيم ساكت وتحنا على يد السلطان كيعتاذر بغا يبوسها لاكن السلطان خطف يدو بسرعة ورتب على كتفو ودخل خلاه واقف في حيرة كيفكر ويردد بينو وبين نفسو

تكون هاد المسخوطة بصح مرى مزيانة كما كيقول السلطان ..تكون كتبغي السلطان بصح ولا هادا جزء من خطتها باش توصل لهذفها..لالالا ميمكنش هادشي مكيتنساش بين ليلة ونهار والحرب بادية هادي خمسة وعشرين عام!!! هادا راه عمر البعد كيرشي والوقت كينسي.. ماشي دقة خمس سنين ولا عشر سنين..خمساااا وعشرين عام ديال الفراق.. نقول السلطان ماقدرش ينساها حيت هربات ليه بالولد..و هي ؟! شنو غيفكرها فيه؟!!

الى كان السلطان بنفسه اعتارف ليا واحد المرة وقالي نسا على تركيبة وجهها وكيحاول يفرز ملامحها فعقلو مكيقدرش ..وباللي بقات صورتها مضببة ماواضحاش فذاكرتو نضر لصغر سنها والسنين اللي مرت كلها ..كيفاش هي اللي غير بنت صغيرة ساعتها تبقا عاقلة على صورتو بقا غير تحن ليه ..لالا هادي بلا شك فكرشها لعجينة..زيد هادي على نهار شافتو اول مرة وطاحت طيحة وحدة

هز حكيم راسو فالسما تنهد وقال مع راسو

كنا هانيين حتى بنتي الله يغبر ليك الشقف

وزاد مع الطريق كيسوط ويدوح براسو ..

اما السلطان دخل على شهرزاد لبيتها صدم كولشي بالدخول ديالو..لقاها جالسة كيكمدو ليها يديها وراسها من الصراع اللي عاشت واللي وقع ليها ..ناضت وقفات بالزربة حدرات راسها وحالتها حالة وخرج كلشي حادر راسو كيجري بقات غير هي ..هزات راسها كتبكي قالت ليه

هي سبب هادشي اللي وقع لولدنا امولاي

بقا كيشوف فيها مم فوق نيفو كتبكي وتشكي وتتاهم فروح الندى وهوا بحال الجماد ..هز صبعو حركو سكتها وقاليها

غندير راسي مافاهم ما عالم.. ولاكن ..تسنطي مزياااان..الى درتي غلطة وحدة ..وحدة ياشهرزاد غنحرمك عليا ليوم الدين ..هادشي الى ماقطعتش ليك الراس وخليتو عبرة للي بحالك

خرجات عينيها من الصدمة وفاضت عينيها بالبكى قالت ليه انا شنو درت امولاي؟ حاسبها هي اللي يغات تقتل ولدنا ..هي اللي خصها تتحاسب ماشي انا

رد عليها بغضب شديد قاليها علاااش غتسممو؟؟ علاش؟ باش شنو؟؟ شنو الهدف ؟؟

بقات متمتم وتشوف قدامها بارتياك قالت ليه حيت كيحساب ليها قتلت ليها ولدها وانا السبب فموتو وبغات تنتاقم مني

صغر عينيه بقا كيشوف فيها وقاليها

كن قتلتيه اشهرزاد بصح كن راكي مزالة معلقة وسط السوق من شعرك ..وولدك كلاه الدود فقبره..

حمدي ربك اللي وقف معاك ..وماماتش على يدك

خرج خلاها زرقة بالخلعة مشا ويالاه خرج دخل المسير كيجري عندها اصفر لقاها زرقة وكمل عليها قاليها

لاللة ..لاللة شهزاد نهار كحل زحل

سمو الامير خرج شي كلام بحال السيف طيحها طيحة حرة فوذن السلطان قاليه انا اللي قتلت خويا السلطان يور ..وانا اللي ضربتو بالسهام .. وانا نستاهل نموت مسموم كما قتلت خويا ..ياربي اش هاد الكلام دابا كان يحسابو غيموت وبقا كيتهرس غيذخل للسلطان الشك دابا فموت السلطان يور وقاليه انا سبب سقوط قرطبة يالاللة ..

كان كيهضر حتى طاحت قدامو شهوزاد وفمها محلول كانت غتموت من الصدمة ..جلسوها وصيفاتها عتقوها بالماء والمسير مخلوع كيهدنها على نيتو ويقول ليها ماتخافيش الاللة راه باينة الامير كان ماشي فوعييه ومستحيل السلطان يصدقه

دفعاتهم كاملين بقات كتشوف قدامها وتستوعب وترمش وتردد

صافي مشيت فيها ..مشيتي فيها نتي وولدك اشهرزاد.. السلطان كيعنيك نتي بموت ولدو وكيتوعدك ونتي مجايبة خبار.. صافي كتاشف الحقيقة وكان كيتوعدني بشنو كيعمل فيا..صافي هادي اللخرة ليا

حل المسير عينيه وهوا مقوس كيقادليهاومن الصدمة بقاكيشوف فيها مقوس وكيرجع اللور مخلوع ومصدوم قاليها بصح داكشي اللي قال الامير؟ يعني مكانش كيضهسس فالهضرة؟!! لاللة شهرزااااد!!! نتي …نتي اللي…ياربي اشهادشي

تصدم المسير فيها وبقاكيرجع باللور ويدو على فمو مخلوع ومشا خرج هرب وفمو ناشف بالخلعة .

الكارثة اللي وقعات لسلطان دخلات شهرزاد سوق راسها وخلاتها تعاود تراجع حساباتها من الاول..وضرب الف حساب وحساب من روح الندى ..ماطاحتش ليها شامة غلى البال بالمرة ..لاكن اللي وقع خلاها تنساحب من ساحة المعركة شوية حفاضا على ولدها ومكانتها اللي رجعات على المحك.

اما شامة فرضات بالنتيجة واخا ما وصلاتش لشنو بغات ونتاقمات لموت لولدها لاكن على الاقل زرعات الرعب فقلب شهرزاد وهزاتها من التبات والطمأنينة اللي كانت عليها من قبل..

بعد ما صح سلطان ورجع عافيتو كان ليه هضرة وكلام مع السلطان.

دخل عليه حكيم لجناحو لاكن كان كان باين عليه الغضب من جيهته بسبب تهوره وقلة حيلته غبائه وطمعه اللي خلاه يفكر فقتل خوه وكان باين من طريقته المنفورة فالكلام مع سلطان اللي من نهار رجع صحتو ما عتب باب بيتو واعتاكف مابقاش كيشوف حتى واحد ولا باغي شي واحد يشوفو ..تأنيب ضميره وندمه الشديد على ما عمل عذبو فالدنيا قبل الاخرة و خلاه يصلي بالليل وبالنهار ويطلب الله يغفر ليه ويسمح ليه ويرتاح من العذاب اللي عايش فيه .

لقاه حكيم جالس فشرفة جناحو مربع رجليه كيقرا القرآن بالتجويد فعزلة على البشر وخلاه حتى سكت وحدر راسه قالب وجهه بنفور قاليه سمو الامير… مولاي السلطان باغيك فجناحو فالحال

وقف سلطان مستغرب قاليه فاش بغاني؟

بقا حكيم ساكت ماجاوبوش وسلطان كيشوف فيه وقاليه

حتى نتا دورتي وجهك احكيم؟ كلكم عطيتوني بالضهر

هز حكيم راسو كيشوف فجهة اخرى قاليه هادا اقل ما يمكن لينا نديرو معاك اسمو الامير..نتا ومراضيش على نفسك حيت عارف الجرم اللي رتاكبتي

قاطعو سلطان قاليه كن خليتوني نبقا فوق عاد السرير كنتوجع ختى نموت اارحم ليا من هاد الدنيا وهاد الحياة الدنيئة..ارحم من هاد العذاب اللي كنعيش دابا..السلطان من يوم رجعت من الموت ما شاف وجهي

تنهد حكيم قاليه يقدر ليوم غترتاح من هاد العذاب

برقات عيون سلطان من شدة الحزن وفهم من كلام حكيم ان السلطان بغا يعدمو على الطريقة الملكية واستسلم للامر الواقع ورجع مكسور سد المصحف وباسو وحيد الخواتم من يديه وخرج قدام حكيم مشا لجناح السلطان المخيف اللي كلشي كتشدو الرعدة فداك البيت واخا بيتو اكثر بيت متول وراقي وجميل وكبير مفتوح على جوج شرفات كبار افخم ريحة لاكن كلشي كيهاب الدخول ليه واستنشاق ديك الرائحة اللي كتسرع دقات القلب من الخوف.

تفتحو ابواب البيت ودخل سلطان حادر راسو بعباية بيضاء ديال الصلاة شرقية مجموعة من العنق ووقف قدام السلطان اللي كان جالس قدام الماكلة متكي بيدو على ركبتو والتسبيح كحل بين صبعانو كيشوف قدامو وملامحه جدية صارمة ..ناض وقف دار يديه وراه هاز راسه وحقق فسلطان مزيان وحكيم وراه واقف بعيد حادر راسه ..شاف يديه خاويين غير التسبيح اللي داير بالمعصم دياله وقاليه فين خاتم السلطنة اللي عطيتك قبل ماتستاقل بالحكم

بقا سلطان ساكت حادر راسو وقاليه فاش غينفعني وانا كيتسناني الكفن

بقا السلطان ساكت كيشوف فيه وقاليه هز راسك شوف فيا

هز سلطان راسو بتوثر كيرمش شاف فيه واستاقم فالوقفة وقاليه السلطان

نهار تزايديتي سميتك سلطان ..باش تكون سلطان اسم على مسمى ..ماسميتكش جبان

بلع سلطان ريقه وتحرج من كلام الصلطان وحدر راسه ساكت شوية وقاليه انا راضي بأي قرار خداتو سيادتكم فحقي

قاليه السلطان

شكون شارك معاك فالجرم اللي رتاكبتي ؟

رجع احمر بقا ساكت شوية وقاليه بوحدي امولاي..ماشاركني حتى واحد

هز السلطان حاجبو وبقا كيشوف فيه مطولا وشاف يدو كترعد وجنبينو كيعرق عرفو مضغوط ومخبي وراه شي واحد اللي غلى من نفسه وقاليه

مك شاركاتك؟

طيح سلطان التسبيح فالارضمن شدة الضغط والخوف وتحتى بغا يهزو ماقدرش وماقدر حتى يشدو وماجا فين يوقف حتى لقى السلطان قدام وجهه كيشوف فيه قاليه شاركاتك مك فالجريمة ؟

بلع سلطان ريقه تقول سرط لسانو وقاليه

بوحدي امولاي ..مي ماعندها حتى علاقة ..انا بوحدي اللي خططت نقتلو

خزر فيه السلطان قاليه كن صادق ولو مرة وحدة فحياتك

حدر سلطان عينيه كيترعد وقلبو غيسكت قاليه انا بوحدي ..الوحيد امولاي..مي اصلا مكانتش عارفة حنا خوت .. وماشاركني حتى واحد

رجع السلطان خطوة اللور طلق البشرة بقا كيشوف فيه قاليه داكشي علاش وقفات معاك ..

بقا سلطان ساكت حادر راسه قاليه لا ماوقفاتش معايا ..

تنهد الاصيل وقاليه وجد راسك غادي نخرجو هاد العشية

هز سلطان راسه مستغرب لاكن بسرعة حدر عينيه قاليه امرك امولاي وخرج هرب من داك الضغط اللي فيه ودخل لجناحو استفرغ كاع صبر الاعصاب اللي كان جامع ومشا غسل وجهه بالزربة وجد راسو يخرج مع السلطان فين حين كان هاد الاخير هوا وحكيم كيتمشاو فالحديقة كيحلل معاه كلام سلطان من جهة مو . قاليه حكيم مكنضنش امولاي تكون ساهمات معاه فهاد الجرم ..كما قال سمو الامير هي شخصيا مكانتش عارفة الحقيقة ..والحقيقة ما تكشفات حتى تنشر خبر الوفاة الوهمي ..

تبسم السلطان قاليه انا كنفهم ولادي قبل مينطقو بحرف احكيم .

بقا حكيم ساكت حادر راسو حتى خرج سلطان لابس ملابس الفارس الخفيفة باش كيخرج ووقف حدر راسو قال

انا واجد امولاي

شاف السلطان فحكيم وتبسم قاليه يالاه خلينا نمشيو نشوفو شغلنا

بقا سلطان ساكت ومشا واخا معارفش فين غادي وركب الخيل ديالو حتى هوا وانطلقو فطريقهم كيجريو حتى وصلو للقصر القديم

نزل السلطان وسمو الامير وحكيم داخلين وكان باين على وجه سلطان الاستغراب وزاد استغرب وتفاجأ اكثر فاش دخل لوسط القصر فصالة كبيرة فزاوية منها شاف شاب عريض الاكتاف كتيف الشعر بجبادور قصيرة بسروالها طويل كحلة خفيفة شفافة شوية عاطيهم بالضهر وشاد فيدو كتاب..

تلفت الشاب جهة كتفو حس بالغاشي وناض وقف تلفت وراه وكانت الصدمة الكبيرة لسلطان وحتى ليور اللي تقابل هوا وخوه بحضور السلطان ..

كانت الصدمة قوية واقوى على سلطان بالاخص..فالاول ماقدرش يصدق ..لاكن فالاخير تأخرات ليه جالس جنب يور وكل واحد كيشوف فزاوية والاصيل وحكيم خرجو خلاوهم يصفيو خلافاتهم بجوج ..

طال الصمت والاخوة ساكتين حتى واحد ماتكلم .. لاكن فجأة حنحن سلطان وقاليه ماعرفت راسي واش كنحلم ..ولا بصح ؟ يمكن الله ربي رضى عليا وعطاني فرصة جديدة نصلح غلطي..

تنهد يور قاليه كاع تعطاونا فرص دابا..حتى واحد ماقصر من جهدو ..انا درت مجهودي باش نحافض على شعبي وارضي .. ونتا درتي مجهودك باش تحافظ على مكانتك وتنتاقم لباك .

حدر سلطان راسو قاليه انا نتاقمت من راسي ..كان يحساب لي انا ولي العهد..كبروني على هادشي وعلموني جميع القواعد وجهزوني وغرسو فيا شغف الحكم والسلطة..كنت مرتاح مكاين اللي ينافسني..عشت بوحدي عند بالي انا الوحيد اللي كاين..وانا الكبير..وبين ليلة ونهار كنتصدم باللي عندي خويا كبر مني !! واخا كنت كنسمع شي قصص وروايات من بزاف دالناس كيقولو باللي السلطان كانت عندو جارية هربات وهي حاملة..وطول ديك السنين وهوا كيقلب عليها ..لاكن متوقعتش تكون هاد الحكاية حقيقية خصوصا دازت عليها سنوات كثيرة..كان كيحساب لي غير هضرة وكلام وصافي ..وكنت كنقول ماشي بصح حيت كن مان بصح كانت غترجع ديك الجارية بولدها وتنافس العائلة على العرش

تلفت يور شاف فيه قاليه ديك الجارية اميرة..عمرها كانت جارية… بلا منبقاو نهبشو فالماضي كثر من هاكا ونحييو الجرح من جديد..غير باش تمحي هاد السمية من بالك..هاديك راه مي وتولدات اميرة والضروف خلاتها دخل بين الجواري..اما هي عمرها كانت جارية..وهي راه بنت خال السلطان ..واللي كان سلطان حتى هوا قبل مايموت..وحنا مكنتنافسوش على العرش والسلطة..مادابينا كن كنا احرار بعاد على هاد القيود وهاد الوزر اللي على كتافنا ..نتا اللي كتنافس على السلطة مع الشخص الخطأ..

قاليه سلطان انا مقصدش نقلل من قيمة لاللة روح الندى ..وعندك الحق نافست على حاجة مادايماش.. وبغيت نقتل خويا اللي من دمي ولحمي ..

تصدم يور وناض وقف شاف فيه قاليه شنو؟؟عاود اش قلتي ؟

بقا سلطان كيشوف فيه قاليه انا ندمت وكنطلب منك السماحة ..انا عمرني نسامح نفسي على مادارت

قاليه يور مصدوم نتا اللي ضربتني؟؟ نتا اللي بغيتي تقتلني

بقا سلطان ساكت كيشوف جنب وشدو يور شنق عليه وكشاشكو خارجة قاليه نتا قالتي شعب …قتلتي بلاد …نتا اناني وماتستاحقش حتى هاد الامارة اللي عليك..ماتستاحقش تكون من هاد السلالة اللي هرقات دمها ومشات فيها ارواح خلات ولادها ايتام وراها باش هاديك البلاد تبقا واقفة … واش عرفتي اشنو درتي المكلخ … نتا ماشي راجل بزاف عليك الرجلة ..طعنتيني فضهري الوقت اللي كنت انا وباك ورجال شراف عاطيين وجههنا للعافية ..فالوقت اللي كان خاصك تكون واقف معانا طعتينا كلنا …باك وانا وكاع الرجال شي مات شي نجا ..نتا عالة وميشرفنيش تكون خويا سمعتي ..ميشرفنيش

كحز اللور بزق فالجنب وشاف فيه باشمأزاز وعطاه ضهرو غادي ..تلفت رجع هز صبعو قاليه عمرني منسمح ليك ..كن غير مت ولا شفت وجهك الملعون هادا

من بعد المواجهة اللي دازت بين الخوت خرج سلطان للخارج يشم الهوا وهوا كله ندم وحسرة على ماجرى ..لقا السلطان وحكيم تما وحدر راسو بأسى ساكت مانطق بحتى كلمة ..رفع السلطان راسو شاف فيه وقال ليه هادشي اللي شفتي هنا يبقا هنا

قاليه سلطان والحزن فعينيه انا تحت امركم امولاي

شار السلطان لحكيم براسو يرجع معاه للقصر ورجع السلطان دخل عند يور لقا جالس وشاد راسو ..وقف يور فالحال قاليه واش كنتي عارف شكون سبب فهادشي اللي وصلنا ليه

رفع السلطان راسو بجدية قاليه هادشي سببه حنا كاملين..من مك حتى لخوك سلطان وانا ونتا الوسط ..حتى واحد ماقصر من جهدو ..كل واحد يشوف ويراجع اغلاطه اولا عاد يشوف اخطاء لاخر

تصدم يور من كلام السلطان وقاليه يعني مي هي السبب فهادشي كامل؟!!

قاليه السلطان مك وانا ونتا وخوك ..كلنا ..كل واحد عندو يد..انا غلطت فالماضي انا ومك ..وها. الحقيقة ماقدرتيش تقبلها..طعنتيني وهادي اول خطوة خداها العدو باش يهاجمنا..ثانيا سمحتي فكلشي وراك وانا فالفراش ومابقا شكون يسير الحاشية..لا حاشيتي ولا حاشيتك.. زيد على هادشي لقينا راسنا قدام حرب كحلة وخرج لينا خوك من الجنب حتى هوا دار حقو . فهمتي دابا المعنى؟

قاليه يور بانفعال وغضب انا ماعنديش اخ ..ماعنديش اخ ..وماعمرني مغنسحم ليه

قرب منو السلطان طرطق عينيه فيه مزيان حتى بدا الدخان يخرج ليه من نيفو وقاليه

راك واقف قدام السلطان قبل ما يكون باك ..نتابه لمستوى صوتك ونتا كتهضر معايا سمعتي

خرج السلطان من تما خلا يور يغلي فبلاصتو وعضامو كيطرطقو وخرج لبرا وصى الحرس والجنود عليه باش مايخرجش من تما والى ضطرو يشدوه بالقوة ومشا رجع للقصر..

دخل نيشان لجناحو معصب وامر يجيبو ليه روح الندى اللي راها فالحمام ناعسة كتكمد عضامها بالحناني وماجايبة للدنيا خبار ..

دخلات عندها عبدية فيقاتها من سباتها خلاتها تسرع فحمامها وخرجات جهزات راسها ونشفات شعرها ولبسات تكشيطتها وتألقات باش تليق بمقام السلطان ومشات راشقة ليها دخلات عندو لجناحو مبسمة لاكن هجرو ليها ضار عندها قاليها بصرامة خاصك نهار باش تجي ؟؟

جمعات الضحكة قالت ليه كنت فالحمام ؟!! علاش شنو واقع

قاليها وجدي راسك تمشي عندك ولدك فالحال ..وردي ليه عقلو لبلاصتو بلا ميتهور ويدير شي مصيبة تخليني نسخط عليه حتى هوا ..

قالت بخوف وارتباك اويلي مالو شنو دار ؟ شنو وقع؟

قاليها سيري راه خاصو معامن يهضر ..وعلميه كيفاش كيهضرو الاولاد مع باهم ..علميه مايعاودش يهز صوتو قدام السلطان

بقات كتشوف فيه مافاهمة والو حتى خلعها قاليها سيري يالاه شكاتسناي

بلعات ريقها كتفتف خرجات كتجري مشات لاحت عليها سلهامها وشداتها بجرية فوق العود حتى للقصر ودخلات مخلوعة لقاتو جالس شاد راسو..قبل ماتسولو ناض فاش شافها وقاليها بغضب حتى وااحد مايفرض عليا داكشي اللي باغي..انا كندير داكشي اللي كنبغي وكبرت بلا اب مايجي حتى واحد يفعل الابوة ديالو عليا دابا

قالت ليه مخلوعة مالك اشنو كاين ؟ علاش اش واقع

بقا كيغوت وكشاكشو خارجة عاود ليها بعشوائية شنو جرا وبزز باش قدرات تفهم من كلامه شنو صرا وجلساتو شادة فيه كتهدن فيه قالت ليه علاش معصب؟ صافي ما وقع والو !! مابغيتيش تسامح لسلطان نتا حر ..السلطان بنفسو راه ساخط عليه عنداك يحساب ليك منعسو على ريش النعام..راه مكيشوفش فيه حتى الشوفة ..اما طريقتك فالهضرة اولدي راه خاصك تبدلها شوية..راه باك وهوا السلطان ..انا ماصدقت تصالحتو ورجعات لمياه لمجاريها بغيتيو عاوتاني تحييو لعداوة

قاليها بغضب انا مزال حتى مامستوعب حياتي ..مزال معارفش راسي حتى واش فايق ولا كنحلم..داك الحمار راه تسبب فسقوط بلاد على قدها ..واش كتفهمي ولالا؟ علاش السلطان كيدافع عليه وكيحملني انا المسؤولية

شدات ليه فكتافو جلساتو قالت ليه الله يرضي عليه اولدي.. الى كنت عزيزة عليك ماتخلي حتى حاجة تأثر على علاقتك بباك ..يوقع اللي وقع هاداك باك ونتا ولدو ..كما كتقدرني قدرو حتى هوا ..ماشي مشكل انا مك واخا تغوت عليا عارفاك وتربية يدي عارفة لسانك كيزلق..ولاكن باك راه ماشي اب عادي..راه السلطاااااان اولدي ياك شحال من مرة قلتي ليا تمنيت كن كان عندي اب بحال الاصيل ..نسيتي؟ كنتي متأثر بيه وكتقدرو دابا شنو تبدل؟

ضحك قاليها شنو تبدل ؟؟ والو غير طلع با بصح وخويا بغا يقتلني وشتت ليا العش ..ديك الحرب امي راه مشاو فيها اعزز ناس عندي..سمعتي..ماتو فيها اعز الناس ..بغيتو نتقبل سلطان خويا. وهوا اللي تسبب ليا فهاد الخلا..وكيفاش غنختارم السلطان وانا ماعشتش معاه ؟! حتى كلمة دبا مقادر نطق بيها .. علاش كضغطو عليا ؟ وعلاش يعاملني بهاد القسوة الى كان غادي يسخط عليا ويمرضني غير خليني نموت ..مايجاهدش باش يرجعني من الموت

تنهدات كتشوف فيه قالت ليه مزال معارف بحر الكبدة ..ولاكن ربي رزقك ولدك دابا تعرف علاش ماخلاكش تموت عاملك خايب..باك واخا يعاملك خايب مايبغي حتى واحد يعاملك بالخايب ولا يآديك.. والاصيل هادا هوا طبعو ..فيه المزيان وفيه الخايب..نتا جر الجهة المزيانة جيهتك حاول تتقرب ليه ..حتى هوا كيحاول يبني معاك مستقبل ويقربك ليك ولاكن المشكل ديالك معارفش تتعامل مع باك..انا كنعذرك ولاكن مكنطلب منك والو ..بغيتك غير تحاول..والى كان كيهضر معاك احتارمو ..تعامل معاك بحال من قبل فاش عاد تعارفتو يكون احسن. ماتنساش باللي راه باك ماشي شي واحد من حاشيتك .

هبط راسو شاد فيه قاليها خليني باغي نبقا بوحدي

حطات يدها على عنقو قالت ليه الله يرضي عليك ..راه بزاف اللي متحمسين لبحال هاد المشاكل هادي بينك وبين وباك ..ماتخليش ليهم فرصة فين يدوزو بيناتكم.

شاف فيها مطولا بحسرة حتى انا غيهضر ورجع سكت قلب وجهه قاليها خليني ساكت مافيا اللي يبقا يهضر بزاف..صافي خليني نجلس بوحدي وحسن كاع مايجي عندي حتى واحد ..

تنهدات لاكن مابغاتش تمشي بقات لاسقة ليه تما عيا يسيفط فيها مابغاتش حتى شافتو برد شوية عاد ناضت راسها لاحت عليها سلهامها وتبسمات ليه كتمسح على وجهه ومشات خرجات صادفات فتاح جاي على عجلة من امره حدر ليها راسو ودخل عندو ..استغربات من قدوم فتاح بهاد الطريقة ومشات كتسلت مخرجة لسانها وقفات ورا الباب كتسنط

حدر فتاح راسو قاليه مولاي ..رجلي من غرناطة لهنا ..

هز يور راسو شاف فيه وقال ليه اشمن خبار جايب افتاح؟

قاليه فتاح باقين فالقصر شي عبيد من ديالنا كيخدمو الصلبيين وشي حريم من الحريم اللي تشدو ومحسوبين على رؤوس الاصابع كيخدمو اولاد الملك ويسهرو على متعتهم .

وقف يور قاليه ويمامة ؟

قاليه فتاح ..كما سبق وقلت ليك امولاي فاش حليتي عينك ..باللي ماتت وسط القصر..حتى الحارس اللي حطيتي عليها يحميها ويخرجها من تما مات ..وشي عبيد من اللي بقاو فالقصر قالو باللي شافوها ناعسة فجناحك الساعة اللي دخلو عليهم العديان ..رفضات تخرج من الحارس وهرب خلاها ناعسة لاكن لقا حتفه حتى هوا ..واحد من العبيد اللي نجاو راه مزال فالقصر كيخدمهم وهوا اللي قالي شافها حتى تلقات للموت بيديها وطاحت قدام عينيه ..عبيدنا امولاي مستاعدين يفديونا بدمهم وراهم رهن الاشارة

جلس يور سد عينيه وشد راسو بيد يديه كيردد

قلت ليها خرجي وبداي حياة جديدة وعطيتها طريق الجنة فوق الارض ..علاش فضلات الموت

قاليه فتاح يمكن حيت ساقت خبار الموت ديالك .. النسا صعيب تفهم طريقة تفكيرهم

تسلات روح الندى هازة سلهامها وخرجات ركبات العود ديالها وزادت مع الطريق مشات للقصر وغير وصلات قصدات جناح السلطان نيشان لاكن لقات الحرس فالباب ملاقيين الرماح بيديهم لوسط ووقفات مستغربة رافعة راسها قالت ليهم علمو السلطان باللي انا جيت وبغيت نقابله

قاليها واحد من الحرس السلطان مع زوجته الاللة روح الندى

تبسمات بعفوية قالت ليه ومن بعد فين كاين المشكل

تكلم حكيم من وراها قاليها السلطان عندو خلوة الاللة روح الندى

تلفتات عندو وجهها احمر بقات كتشوف فيه مطولا وقربات منو بغضب قالت ليه شنو عندك معايا احكيم؟؟ مكندوورزش ليك مع الحلق ..واقفة ليك فالقرجوطة

تبسم قاليها علاش غتوقفي ليا الاللة روح الندى ؟!! علاش شكون سيادتكم باش توحلي ليا؟ مجرد ضيفة فالقصر

حمارو عينيها بقات كتخنز فيه مطولا ..طلعاتو وهبطاتو من راسو لساسو ومشات خلاتو واقف وسنانها غيطيحو بالغيض ، رجعات لجناحها سدات عليها وجلسات قدام مرايتها سدات عينيها كتبرد دمها وتنهدات بعمق خرجات النفس بشوية وقالت برواق

حكييييم.. نساااي كلشي اروح الندى ..كلللشي وبالي بحكيم .. هادا اكبير عدو ليك من بعد شهرزاد الكلبة

ناضت وقفات هزات راسها وقالت كتتجمع قوتها وطلق اصابع يديها وتجمعهم مع بعض وعيطات لعبدية قالت ليها كلمي ليا لمسير ..يحضر عندي فالحال

مشات عبدية حضراتو ليها جا حادر راسو عندها وتسدو الابواب عليهم بجوج وقربات منو كتشوف فيه من فوق نيفها وقالت ليه

بوشعيب.. اشنو ربحتي من وقفتك جنب شهرزاد من نهار حطيتي رجلك فهاد القصر

حدر راسو قاليها والو الاللة

تبسمات قالت ليه باينة فيك خادم وفي ليها ..وماشي بعيد تكون عاونتيها فخدمتها نهار قتلات ليا ولدي

حط يدو على جبهته قاليها لالالا الللة روح الندى انا بالله وبالشرع مع هادشي..عمرني نفكر نقتل ولا نغدر الاللة روح الندى

قالت ليه وفراسك باللي سلطان هوا اللي قتل ولدي..ومو ليها يد فيد هادشي.. واعتارف بفمو قدام السلطان

قاليها ايييه الاللة عارف

قالت ليه وشكون اعوان شهرزاد المعروفين فهاد القصر؟

بقا ساكت كيشوف فجنابو وروح الندى كطلع وتهبط فيه وقالت ليه سمع ابوشعيب..شهرزاد امرها محسوم عند السلطان هي وولدها ..جريمتهم غادي يدفعو ثمنها غالي..يعني شكون اللي غيبقا ليك ؟ بلا متعول على ولد السلطان الصغير حيت ماعرفناش اجلو واش بعيد. ولا قرييييب..يعني حفيدي. هوا ولي العهد ابوشعيب

بقا بوشعيب ساكت كيدور فعينيه وروح الندى كطلع وتهبط فيه قالت ليه عطيني معلومات على حكيم ..مزوج ؟ مطلق؟ عينو على شي وحدة ؟ صحابو ؟ خوتو ؟ منين اصله منين جا اصلا؟

قاليها المسير الصراحة حكيم مامزوج ما مامطلق..هوا من خراسان الاللة روح الندى جا فمهمة هادي شحال لهنا للاندلس وكان عوين وصافي..السلطان تعرف عليه وقربو منو هادشي اللي كنعرف ..

هزات راسها كتنهد قالت ليه نتا كلك زعما وماعارف عليه والو ؟!! بااز سير سير درق عليا وجهك

خرج بوشعيب كيضور فعينيه مشا كيطير وصلها لحكيم دافية حطها ليه فودنو حسي مسي خلاه كيضحك بوحدو قاليه مزيااان ابوشعيب..هادشي اللي كان خاصني حتى انا ..دابا خليك قريب منها ..خليها تيق فيك ..عاود ليها شوية دالخبير عليا واللي قالت ليك ديرو ديرو وعلمني بكل خطوة..خليني نشوف هاد الحية فين باغا توصل وشنو هدفها من هادشي..يالاه سير ونتابه لا تغلط

بلع بوشعيب ريقو قاليه عندي بيك خبار جديدة على لاللة شهرزاد

استغرب حكيم قاليه اشمن خبار ؟

قاليه بوشعيب. لاللة شهرزاد هي راس الحية الكبيرة اسيدي حكيم ..هي اللي خططات ودرسات لموت السلطان يور .

ضحك حكيم قاليه ماتتأثرش بكلام روح الندى نصو كدوب ..هاداك غير الحقد عامي عينيها هوا اللي خلاها تقول هاد الكلام

حرك ليه بوشعيب راسو قاليه لااالا اسيدي حكيم ..لاللة شهرزاد بنفسها عتارفات وقالتها لي..هي اللي دارت كلشي ودفعات ولدها يقتل خوه

تبدلو ملامح حكيم وشاف قدامو مصدوم قاليه متأكد من هادشي ابوشعيب

قاليه بوشعيب متأكد كما متأكد من وقوفي جنبك اسيدي

بقا حكيم ساكت ودرسها فعقلو وقال بصوت بين شفاهه

اذا كانت عارفة الحقيقة من زمان وكتسنا الفرصة ..قول نتي هاكا ملاك فصفة شيطان

رجع وجهه حكيم احمر وتلفت شاف فبوشعيب خلعو قاليه سمع شغنقول ليك وعلقو حلقة فودنك

هاد الشيطانة غادي تحط عينيك عليها ..زيدها على روح الندى والصغيرة والكبيرة نبغيها توصلني ..الى مشاو حتى دارو شي زبلة نتا اللول غتحاسب سمعتي..

قاليه بوشعيب وقضيك التسمم اللي امرنا بيها السلطان

قاليها حكيم باين شكون مولاها ..شكون من غير روح الندى ولاكن الدليل فين هوا ..حتى الجارية الاي دخلات ليه الماكلة بيديها ماتت حداه ..الهضرة بلا ادلة كتحسب على مولاها يالاه سير شوف شغلك ابوشعيب وحل عينيك مزيان على هاد المسخوطات

حدر بوشعيب راسو فتبات قاليه كن هاني اسيدي احكيم..خبارهم تبات عندك قبل مايصبح الفجر

مشا بوشعيب وبقا حكيم مزير على قبضة يدو كزفر ويردد بغضب

كتخدمي مصالحك الخاصة اشيطانة .. دمرتي بلاد على قبل العرش واوجدي راسك نهار تشوفي ولي العهد لحقيقي ..الله يخليها سلعة والله يقطعهم نسى الى كانو بحالكم تفو

بزق حداه ودار يديه وراه عاقدهم ومشا طالع ليه الدم كيسب ويعرق

صبح الحال فالقصر وهاد المرة فجناح الخدم والحريم فين صابحة مسعودة كطوي الحوايج ديال الصابون وتستف والشمار مدور على يديها وضهرها ..باينة عليها دغيا ولفات القصر وتمارتو جاتها سهل من تمارة على برا ..على الاقل ضامنة ماكلتها وشرابها ونعاسها وبناتها حداها ..حطات ليها يامنة السلة القصبية ديال النشير اللي جمعات ومسحات جبينها قالت ليها عييت امي ..

ضارت عندها مسعودة عطاتها صف ديال التواب مطويين دالكشينة قالت ليها هادو ديهم للكشينة ..حطيهم ورجعي عاونينين يالاه جري

هزاتهم يامنة دخلات للكشينة هازاهم وضربات فواحد الطباخ من الطباخين حتى كانو غيطيحو فالارض وشافت فيه قالت ليه واش عور ؟!!

كان الطباخ رقيق بحال القطيب وقرع وراسو طويل وسنانو مدابزين على البلايص لاكن مسيرير فعويناتو وضحكتو قاليها كيرمش ماشفتكش الاللة!!

هزات يديها قالت ليه انا كااااملي وماشفتنييش واش تشوف ؟!!

قاليها لالا حاشة واش منشوفكش ونتي تبارك الله فيك ربعة ..

هزات يدها حطاتها ليه قدام وجهه قالت ليه خمسة في عينيك ..كي شتيني تخاليني يا مبلق لعينين

قاليها انا عيني خرجو حيت شفتك ازين وصافي

رجعات حمرا دغيا دخلاتها الحشمة بقات دور فعينيها قالت ليه الزين؟!!

قاليها اييه الزين ..الجمال ..الفنون !

طولات وجهها حشمانة حتى حوالو عينيها وهزات تصبينها مشات كتجري حشمانة وهوا كيطل عليها ويضحك فرحان قال

تباارك الله شهوة منها بنية ..كتحشم هيهههيي

مشات يامنة غارقة فحوايجها تلفات على شغلها مابقات عارفة شنو ندير ولا شنو كانت غدير ..عطات لحوايج لوحدة من الخدم قالت ليها هاكي اختي هاشي حطيه في مكانو..اما انا راه مابقيتش عاقلة على سميتي

مداتو ليها وزادت مشات يالاه بغات تخرج من داك المطبخ الكبير وهي تشوفو واقف كيقطع اللحم بواحد المقدة وتخبات كطل عليه من ورا الباب مخرجة لسانها كضحك حشمانة غير بوحدها وسرطات نوفتها السفلية وحطات عليها سنانها وبقات كتوف فيه وتتكمش غير بوحدها حتى قفزها كبير الطباخين زعبول بصوتو الغليض وكلامو التقيل قاليها اشاوا تاديري هنا بلا شغل ؟!!

تهزات من بلاصتها ضارت عندو كتفتف وترمش قالت ليه كككننت جايبة اللحم اللي طوات مي وووهي قالت ليا ديه حطيه في بلاصتو

هربات يامنة كتجري رجعات عند مها ..اما روح الندى صبحات جالسة واجدة اميرة مكاينش بحالها ..كتسنى الخبار من عند عبدية اللي رجعات عندها وقالت ليها بهمس بعيد على وصيفاتها لاللة اسمهان اللي كانت باتت عندو لبارح ..وقالت لي طامو هوا نيت اللي طلبها للخلوة بكانتو

هزات روح الندى راسها وقلبات وجهها تنهدات قالت مع نفسها

ومالو..مرتاح مزيان مزوج من حقو ..انا اللي شايطة زايدة ناقصة فهاد القصر وفوق هادشي بستو بلا قاعدة ..ياربي كن غير بلعاتني لارض وما وصلت لشفايفه .نستاهل الدل اللي طيحت راسي فيه

جمعات نفسها مارضاتش ومابقاتش كاع كتبغي تتفكر ديك اللقطة واخا جات فوقت ضعف وجو خلاهم يقربو من بعض وكانو فعزلة ومساوات كيواسيو بعضياتهم حتى لقات راسها بين يديه

سدات عينيها كطرد دوك الافكار من بالها باش ماتزيدش تكمل على مابيها وتلفتات شافت فعبدية قالت ليها وهي شاردة

عبدية.. واش انا مانستاهلش زعما راجل يبغيني ونتزوج ونعيش داكشي اللي ماعتش ..واش انا مكتاب عليا نبقا هاكا حتى نموت ..شحال بقا ليا ونشيب ونشرف اعبدية وانا ماشفت ماتشوفت

تنهدات عبدية وبدات دوز يدها على شعرها المطلوق والتاج على راسها خفيف قالت ليها

علاش مالك اش ناقصك؟ باقا صغيرة.. والمرى فالثلاتينات عاد كتحلى وتزيان ..شكون هادا اللي يقول ليك لا الاللة

تنهدات روح الندى قالت ليها احيااني اعبدية ..هاديك غير هضرة..الثلاتينات كدوز بحال العجاج ..المرى فاش كتمشي عليها الدم صافي مابقاليها ماتقول

وعاد يور واش يخليني نتلفت هاكا ولا هاكا ..سكتي عليا خليني ساكتة

ضحكات عبدية قالت ليها ايوا شوفي فباه نيت اللي راه قدامك ..وياك قلبك عليه

تنهدات روح الندى قالت ليها منكدبش عليك اعبدية..الاصيل طلع ليا فراسي ..ماكرهتش نعاود حياتي من الاول..شي واحد جديد مكيعرفني مكنعرفو..شهوتي نعيش حب اخر ..داكشي ديال المراهقة..داكشي اللول فاش واحد مكيعرف لاخر..داكشي بحريته ماشي بزز..شوفة من هنا ..مرسول من هنا ..ماكرهتش يجي شي واحد اخر اللي ينسيني فالاصيل فمرة ويدير بلاصتو فقلبي..بغيت نكمدها للاصيل هاد المرة ونخرج على المعتاد ديالو وعلاياش موالف ..والله ماكرهت نزيحو للجنب نرتاح منو ومنها نيت نعرف نتصرف معاه بالعقل

تنهدات تنهيدة عميقة ساهية وعبدية جنبها كتفكر وقالت ليها

علاش ما تبادريش نتي نيت ..

ضحكات روح الندى بسخرية قالت ليها شكون هادا اللي غيقدر يهز فيا عينو والاصيل تابعني بحال النعلة .. عارفين ولدت معاه وعايشة فقصره ..شكون هادا اللي سخا بحياتو اعبدية غير قولي ليا

قالت ليها عبدية انا نيت الاللة روح الندى..انا حبيبك وغرامك..نشوفو الاصيل اش غيدير

شافت فيها روح الندى قالت ليها واش هبلتي؟!! انا كنهضر بصح ماباغاش الحب الوهمي..باغاه ليا اختي نعيش ونتمتع بيه ..مابغيتش نفقص الاصيل ونبقا حداه..

وقفات عبدية قالت ليها ايوا الاللة اللي يبغيك يضحي عليك ..خرجي حتى نتي شوفي الدنيا وخلي الدنيا تشوفك ..هادشي الى ماكنتيش باغاه ملك ولا سلطان

تنهدات روح الندى قالت ليها انا باغا حب جديد..باغا دوا وبلسم لجروحي..اللي ينسيني فكلشي..ماباغا لا سلطان لا امير يكون غير قريب من مقامي شوية ويليق بيا ويعجبني ونرتاح ليه ..ويقدر ينسيني هادا اهم شيء اعبدية..شكون دابا هادا اللي غينسيني فالسلطان ويخرجني من هاد القوقعة والوحدانية فين غارقة والعيالات دايرين بيا من كل جهة ..انا حرة دابا مابقا عند الاصيل ما يحكم فيا ..الى مشيت حتى طحت فاللي ينسيني فيه والله منعقل عليه غنخرج ونزيد خلفة لتارودانت نعيش تما . واصلا قواعدنا مكتمنعناش من هادشي.. ياما اميرات تزوجو جوج وثلاتة وربعة وسبعة كاع منهم الملوك والسلاطين

قررات روح الندى دير الخطوة اللولة وقاليها راسها خرجي شوفي الدنيا وفين ماداتك رجليك سيري ..حيدات حوايجها لبسات قفطان بلدي مخزاني من توب الخريب بالسفيقة عليضة وحيدات التاجة جمعات شعرها الناعم لواتو حدا رقبتها ودارت خيط الريح اخضر رقيق من الذهب داير على راسها قدام فرقة شعرها ومدلي بقطرات بحال الماء صغاد كيبان قدام فرقة شعرها بحال نصف دائرة وحوالق طوال وخطات وجهها بلثام ابيض شفاف شوية ولبسات سلهام فصالتو رجالية طويل وكبير تغطات بيه وخرجات هي وعبدية وشي وصيفات من وصيفاتها ملثمين بالحايك مشاو للسوق كيساراو ويخضرو عويناتهم وبدات كتسارا من تاجر لتاجر وتعزل وتتخير فالاتواب حتى طاح يدها ويد واحد الخويدم دقة وحدة على توب واحد ومابغات حتى وحدة تنازل عليه .. كانت عبدية باغا تدخل لاكن هزات فيها روح الندى حاجبها ماخلاتهاش تكشف هويتها وقالت لتاجر

قولي اسيدي عندك منو غير واحد؟

قاليها هوا اللي بقا ..وصاتني عليه هاد الخويدم وخليتو ليها ..الى بغات لاللة نجيبو ليها تعطيني واحد الشهيير يكون عندها ..باينة عليك بنت الدار لكبيرة

قالت ليه روح الندى لا اسيدي ..شهر بزاف عليا ..هادا اللي بغيت ونعطيك اكثر من ثمنه

قاليها في حيرة الدعوة ماشي فالثمن الاللة ..راه جبتو بالوصاية لبنت قاضي لقضى . كتوجد فدهازها وغير هي اللي عند باها ..ماتت مها وخلاتها صغيرة..ومابغيتش نخصر ليها نعام الاللة ..وباها راجل حقاني الله يعمرها دار ..لسانو كينطق بالعدل وماجاتش مانعدلش حتى انا الاللة ولا لالا؟

تلفتات شافت فعبدية وتبسمات وقالت ليه سمع اسيدي..انا من هاد التوب نخلاق..الى كان هاد القاضي كينطق بالعدل ايوا يفاصل بيني وبين بنتو .. نشوفو شكون فينا اللي اولا بيه! واش انا ولا هي ؟

تلفتات عند عبدية غمزاتها ومابقا على التاجر غير يمشي معاهم لدار القاضي ويفك الجرة ..وفطريقهم قالت ليها عبدية وعلاش هاد القاضي؟ ياك داك التاجر عجبك اللولاني عجبك !

قالت ليها روح الندى لا ..الوصف دهاد القاضي سلبني انتباهي..باغا نعرف شكون هوا وشكون يكون .. ونشوف هاد العدل كيفاش داير عندو

وصلو لدار القاضي وجلسو قدامو كاملين والتوب فيد التاجر ..كان القاضي راجل رزين ولحيته طويلة مخلطة بالشيب وطول وقامة ..فتح الجلسة وبدا التاجر يحكي متجرى والقاضي مصدوم ومستغرب لهاد القضية اللي لقا راسو هوا المدعى عليه وخصو يفصل بالعدل .

تلفت لروح الندى اللي كانت جالسة طاوية رجليها جنب ومن جلستها وكلامها باينة عليها بنت الدار لكبيرة وبنت الخنات

قالت ليه انا حطيت عليه يدي اللولة اسيدي ..

قالت ليه خويدم بنتو لا اسيدي يحيى انا شديتو لولا ولاللة مرجانة رسلاتني عندو هوا بالدات

رمشات روح الندى والابتسامة مكتفارقش وجهها من تحت لثامها الشفاف وقالت ليه نقسمو التوب فالنص

قالت ليها لخويدم فاش ينفع الى تقسم وتقرطط..واقيلا ماعينكش فالتوب الاللة

هزات روح الندى عينيها شافت فالقاضي ورشمات وحتى هوت بقا كيشوف فشنو كيلمحو عينيها وقال ليهم

لاللة مرجانة واش شافت التوب؟

قالت ليه لخويدم لا اسيدي يحيى..شكرو ليها التاجر وعطاها الوصف ..وفاش جابو رسلاتني ونجيبو ليها

شار القاضي بيدو قال ليهم التوب من حق السيدة اللي لمحاتو بعينيها ..

تصدمات الخويدم وقالت ليه ولاللة مرجانة اسيدي يحيى ؟!!

قاليها عيون لاللة مرجانة مشافوش التوب وغينعسو مرتاحين..توب اخر يغطي على الوصف اللي عطيتوها ..اما السيدة راه شافتو بعينيها وهي اولا بيه على لاللة مرجانة

حدرات الخويدم راسها شافت فروح الندى بنص عين ساكتة وعطا التاجر التوب لروح الندى قاليها بصحتك الاللة

شداتو فيدها وشافت فعبدية شارت ليها بعيونها عطاتو رزمة ديال الفلوس حق التوب وقالت للقاضي شكرا اسيد القاضي..عمرني شفت القضاة بحالك ولا عدل بحال عدلك ولا عادل نن عير الله سبحانه ..

ولاكن انا غنكون فرحانة ومرتاحة الى قبلتي مني هاد الهدية لبنتك مرجانة تكمل بيه دهازها

عطات التوب للخويدم شداتو فاجآتهم كلهم بداك التصرف وناضت مبسمة شكرات القاضي اللي بقا غير ساكت وكيشوف وخرجات هازة راسها كضحك بشوية في فيناء دار القاضي الكبيرة وعبدية جنبها كتقوليها شنو ربحتي من هاد تخربيقة دابا

ضحكات روح الندى كتمشى قالت ليها سكتي غيسمعك القاضي

ماجات عبدية فين تكمل كلامها حتى سمعو صوتو وراهم قال

سمحي ليا الاللة ..

وقفات روح الندى وتبسمات تبسيمة طويلة وتلفتات عندو في حين بعدات عبدية ووصيفاتها شوية وقالت ليه

نعام اسيد القاضي

قرب بابتسامة قاليها بغيت نشكرك الاللة على هديتك لبنتي مرجانة..الى تركمتي وحضرتي معانا اللامة ديال بنتي بعد غدا ان شاء الله غنكون فرحان

هزات عينيها فيه قالت ليه هاد الدعوة رد الجميل اسيد القاضي؟

قاليها هادا اقل ما يمكن ليا نشكر بيه الاللة…

تبسمات قالت ليه روح الندى

حدر راسو باحترام قاليها الاللة روح الندى

ماجاوباتوش خلات ليه الدعوة ماعرف لا واش قبلات ولا رفضات ورمشات فيه ومشات عند وصيفاتها خرجو من الرياض خلاتو واقف معلق عينيه فيها وتنهد بعمق وتلفت شار بصبعو لواحد الخادم قاليه تبع هاد السيدة شوف ليا شكون تكون ..وفين كتسكن..وياك تفلت ليك بلا منعرف اصلها وفصلها

تبع الخادم روح الندى وهي على العود حتى دخلات القصر ورجع كيجري ويلهت سخفان عند القاضي وطاح حدا رجلو فوسط الرياض فين كان جالس وقاليه سيدي. يحيى ..سيدي يحى

قاليه القاضي يحيى اشكاين تبعوك السبوعة جاي كتلهت هاكا؟

قاليه الخادم تبعتها اسيدي يحيى ..تبعتها حتى دخلات

قاليه القاضي فين دخلات؟ شي رياض؟

قاليه الخادم سخفان لا اسيدي يحيى دخلات للقصر

تقاد القاضي بضهرو جلس قاليه معجب لقصر؟

قاليه الخادم اه اسيدي يحيى ..وبعيني شفت الحرس خواو ليها دوز ..باينة عليها بنت القصر وشي اميرة من الاميرات

هز القاضي عينيه كيفكر قاليه تكون بنت السلطان ؟ شكون تكون؟!

دخلات روح الندى لجناحها كضحك حيدات السلهام وجلسات ترتاح وعبدية حداها قالت ليها وشنو دابا ؟ غتخرجي على هاد القاضي مسكين وهوا على نيته حتى سلاطيتي عليه من السما ضربي لباباه الجايحة

سهات روح الندى قدامها تبسمات وقالت ليها فخبارك اعبدية انا دابا فرحانة.. ماتيقينيش الى قلت ليك حاسة بالراحة وعجبني القاضي يحيى ..عجباتني حياتو

قالت ليها عبدية ونتي فين شفتي حياته باش تعجبك بعدا؟

قالت ليها روح الندى عجبني داك الرياض حسيت فيه بالراحة..مافيهش قوة الغاشي..كلامو وطريقتو وحتى وجهه ..هوا كراجل عجبني .. فعينيه البرائة والنية اللي شحال ماشفتها فعيون شي واحد! هاد السيد هادا غتكون معاه شي حاجة عقلي فين قلتها ليك

قالت ليها عبدية وراه غير قاضي ماهوا وزير ولا سلطان

قالت ليها روح الندى مابغيت لا وزير لا سلطان ..اي واحد عندو علاقة بالقصر ماعندي مندير بيه ..انا شفت وسرحت عيني وكان عندي احساس قوي كيقول ليا داك القاضي خاصك تشوفي..وشفتو وتصدق احساسي بصح ..دابا عاد تحلات ليا الشهية وبغيت نفطر

دخل عليها المسير قاليها لاللة روح الندى ..السلطان بغاك فجناحو فالحين

تنهدات بملل قالت حتى نسيت وجاي تفكرني

خرجات من جناحها مشات عندو دخلات ميلات ليه راسها وقالت ليه نعام امولاي؟

تلفت عندها كيمسح يديه بلعطر. قاليها شنو بغيتي لبارح قالو ليا جيتي عندي

تبسمات بسخرية قالبة وجهها قالت ليه نسيت ..ماعقلتش!

قاليها كيضحك وشنو اللي نساك الاللة روح الندى ؟

بدات كضحك وتشوف فالسقف وتهدات قالت ليه عطا الله ماينسيني امولاي.. عطااا الله

هز حاجبو كيشوف فيها ويضحك وقرب منها شوية قاليها درتي لولدك عقلو ؟

يالاه غيشد فيديها رجعات اللور وبعدات شوية كتشوف فداك الزينة اللي غجناحو قالت ليه شوية.. ولدي مزال مامولف عليك مكيعرفش يتعامل معاك حيت مامولفش..الى ضغطتي عليه غيطج ..ولدي كنعرفو مزيان

بقا غير كيشوف بالو مع ردة فعلها ونفورها اللي حس بيه وبعدات قبل مايقيسها وهضرتها الباردة ..بقا ساكت كيشوف فيها كتسارا فالبيت وحطات يدها على واحد الصنيديقة صغيرة وقالت بلا متشعر ساهية

توحشت تارودانت

سكتات ساهية وعقلها كيدور فالماضي مابغاتش كاع تشوف جهة فراشو باش ماتشوف حتى صورة ليها من الماضي .. حسات بيه وراها حط يدو على يدها لاكن جمعاتها وبعدات كتشتت النضر مبسمة وتنهدات قالت ليه ماضغطش على يور امولاي..راه كبر يتيم معارفش بحق الابوة .. الى ضغطتي عليه غادي تأزم الامور اكثر ..خليه على راحته

تلفات شافت فيه لقاتو ساهي فبلاصتو واقف فنفس البلاصة فين كانت واقفة عاقد حجبانو ماجاوبهاش ..ميلات راسها قالت ليه صباحك مبروك امولاي خليت ليك الراحة

خرجات وهزات راسها جمعات قوتها وسدات عينيها كتنفس وحلاتهم لقات حكيم قدامها واقف كيضحك بوحدو ..

قالت ليه ضحك احكيم..ضحك باش تهجرو مزيان

دازت من حداه حنا ليها راسو كيضحك ومشات ودخل عند السلطان حدر ليه الراس لقا الجو تعكر عندو وماشي على برجو ..قاليه ليوم غنجيبو يور للقصر ..وجد لهادشي احكيم

تصدم حكيم لاكن حدر ليه راسو قاليه امرك امولاي.. خرج فالحين عطا التعليمات خلى كلشي كيوجدو لحفل واخا ماعارفينش المناسبة والخدم كيتسائلو بيناتهم والطباخ زعبول مافاهم والو ..

قال للطباخ الجديد بنرفزة مانعرف منين خرجات لينا هاد الزردة عاوتاني !! هاد القصر مابقيت كنفهم فيه والو

هوا كينكر والطباخ ساهي حال فمو كيضحك ليامنة اللي خيطي بيطي حداه مابغاتش تخرج من لكوزنية وكتعوج وتشوف فيه بنص عين .. خلا زعبول حتى خرج وقرب منها عطاها الحمص خضر منفوخ فيدها قاليها هاكي شوية دالحمص..واخا مامقشرش راني نفختو بالخاطر

شداتو فيدها كلاتو فدغمة قاليت ليه حتى انا نيت عزيز عليا الحمص ..وعاد الى كان بي جلوفو

قاليها المرة الماجية نفخ ليك بانيو الزين

هربات من حداه حمرا حشمانة خلاتو واقف كيضحك ويردد

مسكينة ..كتحشم هيييهيي

وصل حكيم للقصر لقديم باش يجيب معاه يور ودخل عندو لقاه كيصلي ووقف وراه خلاه حتى كمل صلاتو ودار الدعاء وناض تلفت هز راسو والحقد عامي عينيه من جيهة حكيم وقاليه

شنو جابك عندي؟

سد حكيم عينيه مطايقش يور حتى هوا لاكن قاليه باحترام مولاي رسل ليك باش تمشي للقصر..قالك هاداك هوا مكانك من هنا لفوق

رفع يور راسو دار يديه وراه قاليه رجع منين جيتي..مكاني انا عارفو فين كاين

تبسم حكيم ابتسامة خفيفة قاليه السمع والطاعة امولاي

خرج من تما ديك الساعة جاه الرد على قلبو ..اما يور خرج صارم لقا فتاح برا قاليه سير للقصر قول للاميرة روح الندى توجد راسها ..الصباح بكري غنرجعو بحالنا لتارودانت

حدر فتاح راسو قاليه هي اللولة امولاي

خرج فالحال مشا للقصر وصل هوا وحكيم قد قد واحد مشا يوصل الرد للسلطان ولاخر مشا يوصل المرسول لروح الندى

غير سمعات من لسان فتاح اش وصل ليها يور وقفات قالت ليه كيفاش؟؟ تارودانت؟ كيقلب على الصدع ولاشنو؟

اما الاصيل غير وصلو الرد من عند حكيم طرطق واحد القصبة كان شادها فيدو وناض وقف رفع راسو قاليه جيبوه بزز منو

وقفات عليه روح الندى ديك الساعة عينيها خارجين قالت ليه الى جبتيه بزز غادي تخسرني انا وولدي ..حنا نموتو ومانمشيوش بالقوة امولاي.. عمر السبع مايرجع ضبع . ولدي عاش حر وكبر حر وغيموت حر ..وحتى انا معاه

تلفت كيغزز سنانو وبدا يخرج منو الوجه القبيح وقاليها قلت ليه يجي لهنا هي يجي لهنا..اشنو كيعني هادشي وشنو باغي بالضبط ؟

بلعات ريقها خايفة قالت ليه مابغينا والو امولاي..حنا ماعندناش من غير بعضياتنا ..عندنا بلادنا عندنا ارضنا خليناها وجينا.. حنا ماشي اسرى ياك حنا غير ضيوف عندك ..جا الوقت فين نرجعو لبلادنا ونكملو حياتنا ..انا وولدي..هادشي خير لينا وليك امولاي وحتى للناس اللي فهاد القصر ..انا كنترجاك خليني انا وولدي بلا مضغط عليه وعليا ..غادي تكسر كولشي وصلنا ليه غادي تهدم كولشي انا كنترجاك ماتجيبوش بالقوة

شاف فيها معصب قاليها من تحت لسنانو غتمشي تجيبيه ..بخاطرو ..ولا غنجيبو راكع عند رجلي

قبلات بلا تردد قالت ليه صافي غنمشي نجيبو ياك هاد الحفلة على قبلو ..صافي نجيبو غير خلي كلشي كما هوا

مشات كتجري لاحت عليها سلهامها وعطات وجلها للريح ماتنفسات حتى وصلات ونزلات كتجري عندو غير قربات ليه وهي طلق البشرة والضحكة ودخلات عندو لقاتو كيلوي السمطة دالجلد على كفو وواجد لابس حوايجو وعلى يديه ادرع ديديهم من الكوح للمعصم ..تبسمات دخلاتو بالضحك قالت ليه صافي دغيا سخيتي بغيتي نرجعو

تلفت قاليها هاداك القصر ماشي ديالي..ديال ماليه انا ماعندي مندير فيه

ضحكات قالت ليه شكون قالك اصلا ديالك ..باك داير واحد الزردة فاعلة تاركة فرحان بالشفاء ديالك ومابغاش يخليك فالسر ..كن تشوف القصر كيف كيطيح وينوض ويوجد ليك

قاليها هادشي كامل ماعندي مندير بيه..ماعنديش الجميل اللي نرد .. صافي تكلف وعالجني الله يجازيه بالخير ..نكون تحت السلطة ديالو والقوانين ديالو لا ..سامحتو وسامحني كل واحد كفر على دنبو ..دابا كل واحد يرجع منين جا

قالت ليه وعلاش هادشي. ياك كنتي نتا وياه مزياننين؟! شنو اللي تبدل ؟! واش حيت هضر معاك خايب فداكشي ديال سلطان

قاليها انا تقبلتو كأب ..ولاكن ماعندي منقدم ليه باش نرد الجميل ديالو.. الى كان كيدير هادشي باش يخليني نحتارمو بزز ونبقا دينا ممنون ليه لا الاللة..جيتي مزيان باش نمشيو من هنا

بلعات ريقها مصدومة قالت ليه لا ..الى كان شي دين خاصك تردو هوا دين باك ..كما وقف على علاجك حتى ترديتي صحتك خاصك تكبر بيه وتمشي للحفلة اللي دار على قبلك.. حشومة ! نسا دابا واش اصلا هوا السلطان ..شوف فيه كأب..واش ماشي حشومة ترد المعروف بهاد الطريقة؟

هزا راسو واحاجيو قاليها علاش كدافعي عليه اشنو كاين ؟!! كل مرة كتجي عندي وتقلبي ليه على الاعذار ..هاداك السيد راه عندو ولد واحد ..هوا سلطان ..كن بصح حاسبني ولدو مايجيش من جيهت ولدو الخاين ضد فيا .. واش انا اللي طيحت البلاد ؟ وجايبو حتى لعندي نتصالح معاه ونسا اللي فات علاش كن انا اللي درت هادشي كان غيعقل عليا؟

قالت ليه لالالالا شكون قالك دوزها لسلطان؟! ماتعرف اشنو فراسو حتى يصدمك غير متزربش.. خلي بعدا ندوزو هاد الحريرة ونشوفو شنو يدير مع ولدو

قاليها من بعد ديك الهضرة اللي قالي صافي هزيت يدي مكاين لا اب لا والو..سبق السلطنة على الابوة

قاطعاتو قالت ليه حيت ماعرفتيش تهضر معاه الناس كيهضرو بالسياسة ..شوف غير كيفاش كان معاك قبل ماتعرف بالحقيقة..

سد عينيه وسد فهمو بزز كتمتم قاليها خليني ماندعي شي دعوة ..خليني مانخرج شي هضرة ضرك

عنقاتو كتبكي وترغبو باش يمشي معاها وطيحاتهم حجر حتى لينات قلبو وتنازل قاليها صافي صافي ..هانا غنمشي ولاكن مغنباتش تما

خرج قدامها ويالاه خرج ناضت تقول مكانتش كتبكي..مسحات دموع التماسيح بالزربة وخرجات تبعاتو ركبات على الخيل وشدات الطريق معاه حتى للقصر

وصل يور للقصر وكان حكيم فاستقبالو حدر ليه راسو وهوا فوق العود قاليه مولاي السلطان كيتسناك فالديوان سمو الامير

كان ساعتها السلطان جالس فالمجمع فالديوان مع الوفد و كبار رجال الدولة والكل ساكت وواقف وشي كيشوف فشي وكيتسناو يعرفو علاش جمعهم السلطان تما ..اما الاخير فبحال عادتو وطبيعتو ماتفهمو علاش مطوي ولا ناوي ..يديه وراه ورجلو فوق الزربية كتشطح وكيتسنى حتى دخل حكيم مع الباب حدر ليه الراس عاد تبسم السلطان وشار ليه بعينيه يدخلو .. توخر حكيم للجنب فالباب وشار بيدو حادر راسو ليور يدخل..دخل نافخ زربان حساب ليه غيلقا غير السلطان حتى تفاجأ بقوم على جناب يديه واقفين حادرين الراس كيشوفو فيه ..منهم اللي تصدم وخرجو عينيه ومنهم اللي ماعرفوش شكون يكون ..اما السلطان تبسم وتنهد قاليهم سيادنا ..كبار دولتنا ..اليوم نهار كبير ..ليوم عيد ويوم رجوع ولدي البكر سمو الامير يور

كلشي تصدم بقا شي كيشوف فشي وكاين اللي مصدقش وسول واحد اللي حداه قاليه واش كاين شي واحد كيرجع من الموت

قاليه اللي حداه مصدوم كاين كما كتشوف بعينيك ..ولدو بشحمه ولحمه كما قابلتو اخر مرة فالحرب !!

فتح السلطان يدو بابتسامة ليور اللي سكت لقا راسو امام الامر الواقع ..ماعندو مايدير قدام واقع السلطان وماشي شي حاجة خايبة ..بلعكس كبر بيه ورحب بيه وعلنو قدام الجميع وخرج بيه للعلن بكل افتخار ..واخا يور مكيعرف منين يجي فالصواب مع باه وطاير ليه حتى حاجة مكدوز ليه لاكن ماجاتش يعاند غيبان قليل الصواب وقليل الاصل وقليل الترابي وولد السوق.مكان عليه غير يوقف ويسكت ويتقبل اش كيوقع ويتسنط لخطاب السلطان اللي لا كلمة فوق كلمتو والى قالها تكون واخا طيح عليها الارواح.

ماعلينا..بدا السلطان كيهضر ويقييم فولدو اللي واقف جنبو تقول هوا وياه خوت..ماتعرف الاب من الابن كن ما شوية دالشيب اللي مجموع فجهة وخدة فلحية السلطان بحال الخط فجناب لحيتو ..الطول والقلدة والعرض الخالق الناطق .. تربيعة الدقن والدورة دالوجه والعنق واسع .. العينين كبار كوحل والحواجب عالية..الفرق بيناتهم بريق العين اللي عند يور والبرائة فعينيه داتها الايام وقسوة الزمان من عيون الاصيل ..الحاصول كلشي بقا مصدوم ..عاد لاحضو الشبه الكبير اللي بين الولد وباه .. وقالو سبحان من خلق من الشبه اربعين..وسبحان من يحيي ويميت

ختمها الاصيل وقال ليهم

ليوم من بعد رجوع ولدي يور المرتضي بالله .. كنعلن قدامكم وقدام الجميع .. ان ولي العهد وحاكم الدولة المستقبلي من مشرقها لمغربها ..هوا ولدي يور .. ومن اليوم ..هوا النائب عني فغيابي ..ودراعي الايمن فحضوري.

حدر الكل راسو قدمو ليه الولاء وعينو السلطان رسميا ولي العهد وعطاه الوسام الذهبي قدام الحضور وانتهى الاجتماع بصدمة الجميع وخرج السلطان من الديوان مع ولدو اللي معاجبوش الحال نهائيا ..نفاردو هوا وياه وحكيم معاهم وباحترام حدر حكيم راسو قاليه وشنو بخصوص سمو الامير سلطان امولاي؟

رفع السلطان راسو قاليه من اليوم مابقات عندو حتى صلاحية فاتخاد القرارات..ولا حتى السلطة او عندو حق يعطي امر وممنوع منعا كليا عليه. يشوف مو ولا هي تشوفو ..او يدخل عندو شي واحد او يخرج نن جناحو بلا اذن مني..وهادي مهمتك احكيم نتا تكلف بيه

حدر حكيم راسو قاليه امرك امولاي..الى سمحتي نمشي نشوف شنو كيوقع فالقصر من بعد رجوع سمو الامير يور

حرك ليه السلطان عينيه مشا ويالاه فبر تلفت يور وقاليه شكرا تكرمتي عليا بهاد الوسام وعتارفتي بيا قدام العلن..ولاكن ماسولتينيش واش راضي بهادشي

تبسم السلطان قاليه وشنو اللي يرضيك اولدي؟

تنهد يور كيشوف جنب خادر راسو وقاليه انا بلاصتي ماشي هنا ..عمرني فكرت نكون ولي العهد دهاد الدولة كاملة..انا عندي بلادي. عندي شعبي عندي قبيلتي

قاطعو الاصيل شود ليه كتافو قاليه سمع اولدي..بلادنا وحدة وقبائلنا وحدة ..وحتى قرطبة غادي ترجع وان شاء الله غترجع تحكمها بحال من قبل..ولاكن بصيفتك ولي العهد اللي البلا. كلها خصها تعرفو من اولها لآخرها..نتا ولد الاصيل..الخليفة ديالي وغيكون عندك شان عضيم انا متأكد من هادشي..عارفك فاش كتفكر وشنو باغي ..عارف عندك رغبات واختيارات خاصة..ولاكن هادشي كامل غيتبدل مغيبقاش واحد الوقت ..مزال تزيد تنضج اكثر وغتفهمني شنو كنقول..ديك الساعة راسك غادي تقلب على هاد الشان العضيم وبلاصتك الحقيقية ..حيت هادي هي بلاصتك ..وحتى دابا ماشي مشكل عيش السن ديالك واستمتع بالرغبات ديالك كلها..ماحدي فالحياة ماتهز هم لهاد البلاد ..همها مزال تهزو واحد الوقت بزز منك سواء بغيتي ولا كرهتي.. الرجوع للاصل اولدي فضيلة والانسان مهما هرب من اصله كيرجع ليه سمعتيني

تنهد يور قاليه واخا مزيان حتى هادا كلام ..ودابا رغبتي نرجع لتارودانت انا ومي ..نرتاحو شوية ونجمعو قوتنا من جديد ونستاعدو باش نسترجعو قرطبة

دار الاصيل يديه وراه زفر من نيفه ورجع تهدن قاليه فكر فولدك اللي تزاد باغي يشوفك ..نسيتيه ؟

تفكر يور ولدو وبلا ميحس تبسم قاليه بغيت نشوف ولدي

فهاد الاثناء دخل المسير كيطير على شهرزاد هاز صبعو قاليها لاللة لاللة لاللة ..صدمة العمر الاللة..صدمة ما بعدها صدمة انا مللي ماسكتش ليا القلب فيها راه عمره يسكت

ناضت وقفات قالت ليه شنو واقع ياك لاباس

قاليها نزلي فالحال تشوفي بعينيك حيت واخا نحلف ليك على المصحف ماتصدقيش شنو شافت عيني

نزلات مع الدروج تلاقات باسمهان وشامة كل وحدة منين جايا حتى هما باغيين يشوفو شنو واقع وتلاقاو فالساحة فباب القصر ولقات روح الندى واقفة لابسة قفطان ابيض تليجة بالسفيفة بلدية صفرا والتاج على راسها والوصفات وراها رافعة راسها وماتلفتاتش وراها ..بقات كتسنى حتى ضهر الاصيل ودخل مع الباب وجنبو سمو الامير يور اللي صدم الكبير والصغير ومشا النطق لشهرزاد بالصدمة بغات تهضر ماقدراتش وطاحت فالارض باغا تهضر وكتمتم ..شدوها هزوها داوها وبقات اسمهان وشامة مصدومين

شامة : ياربي شهادشي كنشوف!! واش ماشي ولد روح الندى؟!! ولد السلطان نفسه

اسمهان: ضربيني !! ضربيني واش كنحلم

بقاو كيشوفو فروح الندى فتحات يديها استقبلاتو بالحضن قالت ليه

اهلا وسهلا..مرحبا بيك فدارك .. فقصرك وبين واليديك اولدي الحبيب

حلات شامة فمها وبلا متشعر قالت لسمهان. هادي اخرت شهرزاد ههه!!! اويلي ماقدراش نتيق !! جوج صدمات!! رجوع ولد روح الندى وسقوط شهرزاد فنهار واحد ههه..ياربي شهاد السعد اللهم لك الحمد حيتيني حتى شفت شهرزاد كطيح شوية بشوية على مهلها …اخييييرا اشهرزاد طحتي وطاحت مكانتك باش شنتي وتحدو ليك ..ياك قلت ليك اسمهان راه روح الندى ماشي ساهلة ..تعقلو فاش قلت ليكم جنية ضحكتو عليا.. ايوا شوفي بعينيك روح الندى الحقيقية ..صاافي دكات الوتد الصحيح فهاد القصر اللي ميقدر حتى واحد يزحزحو

دخلات روح الندى سمو الامير يور لجناحها وتما لقا متعة جالسة فوق واحد السداري فالجنب هازة ولدها.. تفاجآت واخا سمعات من روح الندى خبار رجوعو لاكن الشوفة كانت مختالفة وتلفات ماعرفات ماتقدم ولا توخر .. وقفات حاللة فمها ماحسات بيه حتى خدات ليها روح الندى الولد بشوية وعطاتو ليه ليدو شدو ..فرح بيه وباس جبهتو ودوز صبعو على خدو وقاليها مشاء الله تبارك الله..شنو سميتوه

تبسمات روح الندى قالت ليه سميتو محمد اصيد

شاف فيها مستغرب قاليها محمد اصيل

بدات كدور فعينيها قالت ليه تولد فضروف صعيبة.. وو و راك عارف دزنا من ضروف صعيبة ماجا فبالي غير محمد اصيل قلت نسميه على اسم باك..وكن تشوف شحال عزيز على السلطان ..وشحال كيطلق يشوفو وكيسبق منو الصباح

حول يور عينيه مبسم قاليها ماشي مشكل..المهم يشبه ليا

بدات كضحك وخلاتو حتى شبع شوفة من ولدو عاد شداتو منو مشات بيه لعند وصيفتها وبقات متعة وقفة قدامو حدرات ليه راها قالت ليه على سلامتك امولاي

بغات تبوس ليه يدو وخطفها مررها على راسها بحنان قاليها مرتاحة ؟

قالت ليه الحمد لله امولاي ..وتبسم طبطب على كفتها وهز راسو بغا خرج عند الاصيل يكمل معاه الهضرة لاكن شداتو روح الندى بالكلام في حين وصل رسول القصر عند السلطان ومعاه عبد وقاليه رسول القصر

مولاي ..هاد العقد كيقول كان عبد فالقصر فقرطبة ومزال تما ..عندو شي حاجة مهمة بغا يعطيها ليك ليديك

هز السلطان راسو قاليه شنو سميتك ؟

قاليها العبد. عابد امولاي

قاليه السلطان شنو كاين ارا ماعندك

خشا عابد يدو فطيات حوايجو جبد شي حاجة وقاليه انا امولاي من الناس اللي نجاو ولاكن خدموني فالقصر ..غير بالسيف خرجت هاد الخرجة وجيت نصل ليكم الامانة اللي هادي سبع ايام وهي عندي

مدالسلطان يدو شد الامانة وكانت عبارة عن ورقة صغيرة ملوية فتحها لقا مكتوب بحال الحجاية كيقول

"حمامة ربيتوها ..لذو التيجان هديتوها

جناحها داست عليه الاقدام ..وجناح النسر هداتها الايام

فلحناني تعجن ليه ..وبمرودكم تنقش ليه"

يتبع...

‎