عرس الذيب الجزء 25

متكية فناموسيتها .. مخشية فالغطى ملوية فيها .. حناكها حوومر و عينيها مجبدين و معكرين بالنعاس ..! البيت مظلم و البيسي محطوط قدامها كتفرج ففيلم ميريكاني و التيليفون فيديها كتميساجى مع أيوب ..!

أيوب: شنوو دابا حتى فالعطلة ما غنشوفكش ؟ ( سجلها اوديو بصوتوو ) أسية توحشتك ا الشعيبية .. هاذشي راه بزاااف و عييت منوو .. فهميني راسي من رجلي ..!

أسية:( سمعاتوو و رجعات كتباتلوو ) حتى انا عيييت من هاذشي .. و الله تا مرضتيني أ أيوب و ما باغيش تسمع مني و تفهمني ..شنوو غادي ندير لك كثر من لي دايرة ..!؟

أيوب: دابا انا كنهضر معاك مقاد و نتي شوفي كي كتجاوبيني ..!! و فلخر ترضيني أنا لي ما فاهمكش .. راك حبييبتي أ اسية و من حقي نشوفك و نهضر معاك و ندوزو وقت زوين بيناتنا .. واش تا أبيل فيديو حارماها علينا و ما خاصنيش نتعصب !!!

أسية:( تنهدات مغمضة عينيها و رجعات كترد ) تعصب و نوض بلوكيني عاود حتى يفوت واحد الشهر و عاد رجع ديبلوكيني و هضر بحال حتى حاجة ما كاينة .. صافي ولفت ما بقاتش شي حاجة غريبة ..!

أيوب: بفففففف ..!

أسية:( رمشات عينيها و سجلات لوو اوديو بصوتها الرقيوق ) نتا كتقول ما فاهماكش و لكن نتا لي ما فاهمنيش واش ما كتشوفش بلي رجعنا فينما نهضرو غير كندابزو على الخروج و الملاقية ؟ نتا ساكن بوحدك و ما عندك تا حد حاضيك فالدخلة و الخرجة .. يلا انا كبيرة فعينيك و خاصني ندير لي انا باغاه .. فعينين خويا حكيم كنبانلوو صغيرة و اااه ما نقدرش نقولوو لا على شي حاجة قالها و ما نقدرش نخرج عيني و نقولوو كبرت و ندير لي عجبني و نخرج بوحدي باش نتلاقاك .. ما نقدرش نقولوو يخليلي التيليفون فالايام د القرايا باش نهضر معاك و نتا اصلا ما كتدخل للدار تال التسعود الوقت لي كيكون تطفى الويفي عندنا و مشيت ننعس بحالي ..!!

سيفطاتولوو كتنهج و عينيها خارجين بفقصة .. شافت الاوديوو تقرا و راه كيسمعلوو و هي تبدا تسجل فالثاني ..!

أسية: ماشي نتا لي ختك و ماماك و كاع لي كتملك مريضة و كتطفى نهار على نهار قدام عينيك و ماشي نتا لي عايش مع خويا حكيم فنفس الدار هو ماشي خايب و ما كيمسحش شخصيتي كيفما كيسحابلك .. هو خايف عليا و حاطني فعينيه و تانا ما باغاش ندير شي حاجة لي نطيح من راسي و منوو فيها .. خاصك تفهم ا ايوب أنا عمري حسيت بلي عندي أب فهاذ الدنيا واخا كانوو ( إلياس ) و لكن ماشي بحال خويا حكيم و نتا كتعرفوو قبل مني كي داير .. أنا فرحانة حداه حيث لقيت لي ينتابه لي و يغوت عليا فاش نغلط و يفرح تا هو بنجاحي أنا .. النجاح لي ما باركتيليش عليه كاع و همك كامل غير نخرج لعندك .. أنا ما غاديش نكذب عليهم و نتسلت باش نشوفك .. هما دايرين جهدهم معايا و حتى انا ما غنضحكش عليهم .. خاطري ما يعطينيش ..! لي كيبغي شي واحد راه كيبغيه كيفما هو و كيفهم ضروفوو .. ماشي أول وحدة دارهم صعاب و ما كيخليوهاش تخرج و كن كانت حتى شريفة صحيحة هي براسها ما غتبغينيش نتلاقاك و تا يلا طلبتها و كذبت عليها .. بيديها غتوصلني لعند صحاباتي و غتبحث فيهم و تعرف معامن غادية و فين و فوقاش غنرجع ..! هاذي حياتي و انا ولفت .. بغيتي تكون فيها .. فهمني شوية و رخف عليا .. ما بغيتيش ما غاديش نشدك ..!

سيفطاتلوو المسج الثاني و فالبلاصة طلع لها كيسمعلوو .. تنهدات بقوة و مسحات الكونفيرساسيون ديالهم كاملة .. حيدات الويفي و طفات التيليفون فخطرة ..! وقفات الفيلم لي هو لي تفرج فيها ماشي العكس ..!

رمات الغطى عليها و ناضت بالشوية كتلبس فبارطوفتها و تجمع شعرها ..! تا سمعات باب الدار تفتحات و خرجات لعندهم بابتسامة ..! شافت فشريفة لي مايلة على حكيم و شادها مزيان .. باينة فيها سخفانة و مسالية .. تبسماتلها بتعب و قالت ببحة ..!

شريفة: مبروك عليك فرحت لك ..! ( قربات منها عنقاتها و باستها فحنكها بالشوية ) تستاهلي ..!

أسية:( غلباتها البكية و بصوت مقجوج قالت ) تووووحشتك توحشتك بزاااف ( شهقات فصدرها بحرقة تا ما بقاتش شادة البكية و طلقاتها )

شريفة:( دوزات يديها على شعرها بالشوية مغمضة عينيها شوية و مكمشة جبهتها من حريق الراس .. و بخفوت ردات ) بانلي عندك بزاف ما تعاوديلي ( رمشات عينيها فحكيم ) خرجتي منها الزيت البلدية ا الشاف ..!

حكيم:( حرك راسوو للبيت ) دخلي ترتاحي دابا .. خاصك تشربي دواك و تنعسي .. يالاه ..!

أسية:( طلقات منها كتمسح دموعها و باستها بقوة فحنكها و بتنهيدة خرجات مع هضرتها قالت ) الله يزيد فراحتك ..!

غمضات عينيها و رجعات فتحاتهم باطمئنان و زادت لبيتها شادة فحكيم مسندها عليه ..! جلسات على الناموسية فاشلة و راسها كيتقطع عليها بالحريق ..! ما قدراتش تحنى تحيد البوط من رجليها و بلا ما تهضر حيدولها حكيم و حطوو الحنب و فتحلها المونطوو حتى بقات بحوايج الدار و تخشات فبلاصتها مكمشة كتشوف فيه كيتحرك فالبيت و يرد كل حاجة لبلاصتها و يجبدلها دواياتها ..! عزيز عليه النظام و ماشي من النوع لي كيخرب و يزيد ..!

خلاها متكية و دخل للكوزينة .. مزال بحوايجوو حدو زول من رجليه لا غير ..! جبد الفواكه من الثلاجة كيقطع فيهم طريفات صغار و زاد معاهم التمر .. الزبيب .. الكركاع .. اللوز و فتح جوج دانونات خلط بيهم كلشي فبانيوو صغير حاطوو فالسينية مع معلقة و كاس د الما فيه دوليبران و كاس عامر باش تشرب دواياتها لي باقيين ..!

هز السينية بلي فيها و خرج من الكوزينة للبيت .. لي غير شافتوو شريفة تقادات فالجلسة و شداتها فوق فخاضها كتاكل بالشوية عليها و مرة مرة ترمش عينيها فيه ساكتة .. تا كملات و شربات دوليبران و حطات الكاس ..!

شريفة:( شافت فيديه لي مد لها بيها الدوا و عيبات وجهها ) صافي باركة كيروعلي قلبي ما كنقدرش عليه ..!

حكيم:( فتحلها فمها بيديه و حطلها الحبة و مد لها الما هاز حاجبوو فيها ) الدوا هذا ما كنلعبوش فيه .. بلعي نشوف ..!

غمضات عينيها و شدات الكاس من عندو شرباتوو كامل تا بلعات الحبة و عوجات راسها مخيبة وجهها من مروريتوو ..! حاسة بيدين حكيم كيدوزو على شعرها بالشوية تا جابلها النعاس .. دفعات السينية من عليها و شدات فيديه .. فتحاتلوو صباعوو و حنات باستلوو الرحى ( لداخل ) د يديه و ببحة قالت ..!

شريفة: شكرا على كاع لي درتيه و كتديرو ( هزات عينيها فيه ) معايا و مع اسية ..! ( سكتات شوية و رجعات قالت بحنان ) حكيم أمغار

حكيم: همم ..!؟

شريفة: شريفة المير كتبغييييك

رجعات باستلوو يديه حتى حط الثانية على كتفها و جرها لعندوو معنقها ..!

حكيم: أجي لهنا ا الحمقة ..!

شريفة:( بابتسامة دافئة ردات ) حمقة و محمقاك ..!

من بعد مدة و هي فطبيب الامراض العقلية بأمر من المحكمة باش يتأكدوو من حالتها النفسية و العقلية .. أخييرا جا وقت المحاكمة و خرجوها من تما ..!

لبسوها جلابتها لي جات بيها أول مرة فوق اللباس ديال الطبيب .. عينيها موسعين و كل مرة كتقفز و تشوف فجنابها و تبدا تضحك بوحدها ..! ما بغاتش تحرك لهم .. بزز كيزيدوها مرخية بالدوايات لي كتشرب و الشوَك لي كيقيلوو يضربوو لها ..!

شادينها جوج فرمليات مخرجينها و هي كتضحك بوحدها هازة عينيها فالسقف و كتشير بيديها بحال الحمقة ..! تا ركبوها فطونوبيل صغيرة فالابيض و فيها الكتابة فالجنب .. بحال اونمبيلونص غير هي صغيرة ..!

عينيها فالتين فالشوارع كتشوف فالناس غاديين جايين و صوت الكلاكصون و الغوات و المدابزة .. بحال يلا شي حاجة غريييييبة مدهووشة بيها ..! الفرمليات كيهضرو بيناتهم كيتعاودو و هي جالسة فالجنب و القدام كاين لي صايك و بوليسي اخور معاهم ..!

وقفوو حدا المحكمة و هبطوها بالشوية تا وقفات وسط الناس غاديين جايين .. ساكتة و مهدنة .. هاذشي لي خلى الفرمليات يرتاحوو من جهتها .. مشات وحدة كتهضر مع لي صايك و الولد الثاني دخل كيهضر مع واحد البوليسي و البنت الثالثة مرة مرة كتشوف فكريمة و مرة دايرة وذنها مع صاحبتها و الشيفور ..!

الطريق خوات فعينين كريمة .. ضورات راسها هاكا و هاكا كتشاور مع راسها واش تهرب .. واش فيها ما يجري .. حتى ضحكات واحد الضحكة من الوذن للوذن معوجة راسها للجنب و بدات كتزرب مبعدة و مرة مرة كتشوف موراها .. حتى بانولها كيغوتوو و انتابهوو لها هربات .. عاد بدات كتجري بكاع جهدها و تقول ما جرات ..!

فرحانة بحال داك الدري صغيير لي خرج اول مرة يلعب مع صحابوو فالزنقة .. لاعبة معاهم شفار و بوليس و حالفة ما يشدوها .. كل شوية تطبل بيديها و تسفق و تزيد ف جراها .. حتى تلفات عليهم و ما بقاو عرفوها شمن طريق شدات ..!

و هي غير زايدة كتجري .. تا حسات عليهم ما بقاوش تابعينها و هي توقف مدلية شنافتها بحال لي بيبي كتسووط و يديها مربعين ..! و بالشوية بالشوية عينيها بداو كيتفتحوو و يتبسموو بالتدريج .. قربات من بنت يكون فعمرها طناش العام هكاك و هزات يديها حتال السما و ضرباتها بطرشة قلبات لها الوجه .. صمكاتها بيها تا ما بقاتش تحس بحنكها و كريمة مخرجة عينيها فيها كتهضر بلهفة ..!

كريمة: يانا ضربتك ضربتك .. تبعيني نكعطوو يانا و ياك .. جرييي علياااا ... خاصني .. خاصني .. نطرg عبد العااالي .. ما نمشيييش لعندو فرادية كي الgطة المجرابة .. مووولا دااارييي غيحصلني ..!

مشات كتهضر بوحدها مخلية البنت موراها مصدومة و مخلوعة .. عرفاتها حمقة و ما قدراتش حتى تطلع النفس .. تا شافتها زادت من حداها عاد طلقاتها ببكية من قلبها و الناس ضايرين بيها كيسكتووها .. أما كريمة .. غادية و كتحرك راسها بحال مونيكة د عاشورة .. نفس الحركات كيتعاودو متابعين .. راسها عوج و عينيها خارجين و فلسانها غير

كريمة: نديرو اللحمة و نكادو الشغل لمولا داري .. لبووك ا تايمة ( حطات يديها فوق كرشها ) عبد العالي خدمتوو تجمد الما .. غيسgم لنا الطرح ..!

فتح باب الدار بالسوارت و دخل لابس جاكيط سخونة د الجلد .. حيد يديه من جيابوو كيدوزهم على راسوو و عنقوو من اللور و هو غادي جهة بيت شريفة لي مخليه لها كتنعس فيه بوحدها و هو فبيت الجلاس ..!

سمع صوت الما مطلوق فالدوش و بهدوء طلع الريدو د البيت و فتح الشرجم شوية تمشي ريحة نعاس ..! تا خرجات شريفة عندو كتمسح يديها من الما .. مستغربة شنوو كيدير هنا ..!

شريفة:( باستغراب ) خدمتي غير نص نهار ؟

حكيم:( هز عينيه فيها بجدية و قال ) البارح كامل و اليوم .. كاع لي خدامين معايا كانوو كيقلبوو على كبيرة ( حك حاجبوو و كمل الهضرة ) دار العجزة لي تدخل لها إلياس فيها .. كاينة هنا فكازا ..!

شريفة:( رمشات عينيها و اللون تخطف منها تا تمتمات بصوت خافت ) ااء ؟ ب بص بصح ؟ فففف فكازا ( مسحات على جبهتها و يديها بداو كيترعدو تا شدلها يديها بجوج عندو و هي كتشوف فيه تالفة ) دابا هي كاينة هنا ؟؟؟ معانا فنفس المدينة ؟ ( وسعات عينيها ) يا ياكما جبتيها للدار ( بحدة ) حكييييم ..!!!!

حكيم:( شاف فيها مطول و قال ) تهدني ما جبتهاش ..! كبيرة ماتت أ شريفة .. توفات شحال هاذي و عياو يعيطوو لإلياس يعلموه و لكن النمرة لي عطاهم ما بقاتش خدامة و تقطعوو خبارو عليهم .. ما عرفوو ما يديرو فلخر دفنوها هنا ..!

شريفة:( جرات يديها من عندو و قالت بانفعال ) ن نعاااام ...؟؟ مااااتت ؟؟ كيفاش تموووت ( ضرباتوو لصدرو بعينين مخنزرين ) ما منحقهااااش تمووووت و تخليني هنا ما عارفة راسي من رجلي .. ما منحقهاش تخرب حياتي هاكا و تمشي مرتاااااحة ( شدات على صدرها و تطوات حانية على ركابيها و ببحة قالت ) مااااتت ..!!!؟

حكيم:( رد بالايجاب ) ففراش الموت كان على لسانها غير سميتك .. بغات تتسامح معاك و ما لقاو لك طريق ( تهز صدرو بتنهيدة و كمل ) خلات لك أمانة .. وصات و عاودات ينتابهوو ليها باش يلا جا شي نهار و قلبتي عليها فيه .. تلقاي امانتك عندهم ..!

شريفة:( ردات بضياع ) امانة .. هههههه أمانة ..! واخا شنوو هي هاذ الأمانة لي موصية عليها .. شي خويا و لا ختي من جهتها تا هي ..!؟

حكيم: متأكدة باغى تعرفي ..؟

عضات على فمها مغمضة عينيها لمدة و من موراها فتحاتهم فيه و حركات راسها بنعم تا جرها من يديها لجهة الناموسية جلسها و فتح المجر حداه جبد منوو بيسي بورطابل ..! شعلوو هازو على فخاضوو .. ركب فيه يوسبي صغير حتى تقرا و عطاه فيديوو و دخلوو ..!

طالعة تصويرة كبيرة فالشاشة .. فين الزين السوسي و فين داك الصحة و القوة .. الزين مشى و الصحة رشات و الجهد ما بقاش .. الزمان كلاها ماكلة و بانت فيها بالمزيان ..! جالسة فكرسي و الحيط موراها فيه الصباغة مقشرة بالبرودة و ناموسية راشية ..!

تجمعوو الدموع فعينين شريفة و هي كتشوف صورتها .. كيفاش بقاو فيها غير العظومة و لحم وجهها تطبع بنقيطات صغار كوحل .. لي كيكونوو فالناس الكبااااار لي عاشوو سنيين و منيين و ما بقالهم والوو و يودعوو ..! و ببحة قالت

شريفة: قهراااااتني ا حكيم .. حتى باش تبقى فيا قد هاكا و أنا كنشوفها بهاذ الحالة .. ما بقاتش .. قتلات قلبي من جهتها

بلعات ريقها و هبطوو جوج دمعات من عينيها .. وقفات ببطئ حلات الماريوو و جبدات منوو صندوقة صغيرة فيها البراسلي د حكيم و شحال من ذكرى قديمة و من بيناتهم تصويرة كبيرة .. تصويرة جاتها فنة و هادية ماشي شرانية .. ملامحها واضحين فيها و هي الحاجة الوحيدة لي بقات لها من عند امها ..! و كانت مخبعاها للنهار لي غتواجه معاها فيه و ما ظناتش الموت غتسبقها و تخطفها بلا ما ترجع تشوفها و تلومها على كاع لي دارتوو معاها من جديد ..!

حكيم:( شاف فالتصويرة و شاف فيها جالسة قدام البيسي و الفيديو واقف باقي ما بدا ) يلا ما قادراش و غتمرضي كثر .. ما كاين لاش تتفرجي فيه ..!

شريفة:( خرجات النفس مقطع و قالت ) بغيت .. طلقوو نسمع شنوو قالت ..!

طلع موراها و هي قداموو .. حاسة بانفاسوو عليها .. يديه حاضنين يديها و مزيرين على ذرعانها و هي كتفرج فالفيديوو .. عينيها مفيكسيين على كبيرة فصمت و هدوء .. حتى دموعها جمعاتهم و ما بقالهم حس ..! رموشها لي كترمشهم مرة مرة لا غير ..!

كبيرة:( بلكنة غالبة عليها السوسية قالت ) عمري كان كيسحابلي النهار لي غنموت فيه غنكون بوحدي مرمية فدار العجزة .. ما عندي حتى لي يقرب لي كاس د الما ( رمشات عينيها حتى نزلوو دموعها ) أنا ما كنلومكش .. أنا لي درتها لراسي بيدي .. قلبي كان قاسح بزاااف من جهتك حتى رجع قلبك قسح من ديالي ( حكات شنايفها مع بعضياتهم مفوهة فمها شوية و بتنهيدة و ألم كتهضر ) بغيت غير نشم ريحتك و نعنقك عندي و نشبع من شوفتك و ما قادراش .. ربي غياخذني لعندو و بنتي باقى لدابا ما سمحاتليش و باقى ما قادراش تشوف فيا لوجه الله ( بقهرة هبطوو دموعها و بصوت مرعد باين فيه العيى كملات ) ما غنطلبش منك بزاف .. بغيت حاجة وحدة .. كيفما ربيتك و خليتك عندي حتى قربتي تديري خمسطاش العام .. سمحيلي من قلبك و ترحمي عليا نتي و راجلك و وليداتك يلا عندك .. ما طلبتش منك تهزيني كي هزيتك .. بغيت غير الرحمة واخا هاذ الكلمة تقيلة و ماشي من حقي و لكن .. ربي و كيسامح علاش البشر ما يسامحوش ..!

شريفة:( حنات راسها شاداه بين يديها و كتحركوو بالنفي .. هازة عينيها فالفيديو ببروود ) الصمت

كبيرة: با كان كساب ضعيف على قدو .. كنا يلا تغذينا ما نتعشاوش و بعد المرات كيدوزو يامات بالجوع كنفزكوو الخبز كارم فالما باش ندوزوه و نشدو جوعنا .. كنا بين عشرة د الخوت ..! جوج بنات فوسط العزارة ..! كل واحد و فين سيفطوو با يضبر على راسوو و علينا .. و حتى حنا البنات دخلّنا للمدينة خدمنا فالديور ..! با كان صعيب و ما كنقدروش نطلعوو النفس قداموو و يلا قال شي حاجة هي لي كتكون و تا حد ما يقدر يقولوو لا .. و تا مي ما كتهزش العين فيه و كانت حارة و ما كتحنش فينا باش نطلعوو بحالها و نكونوو بذراعنا ..!

شريفة:( ضورات راسها لحكيم و قالت ) علاش كتعاودلي هاذشي .. شنوو زعما يلا سمعت غتبقى فيا و نقول ااااه نستاهل .. وينوو تا هي امها ما كانتش كتحن فيها ..!!!

كبيرة:( سكتات مدة و كملات ) خدمت فالديور و شحال تكرفست بالعصا و الجوع و النعاس فالضس ( فالارض ) و شحال من مرة بغاو يتكرفسوو عليا و كنفلت و نهرب .. حتال واحد الليلة ..! كنت خدامة فأكادير عند واحد العائلة لباااااس عليها .. الرااجل خدام فاسبانيا مرة فالمغرب مرة تما و المراة جالسة غير فالدار .. بجوج بيهم سواسة حرين .. كانوو كيعاملوني مزيان .. عندهم جوج ولاد .. بنت صغيرة و دري كان فالقد ديالي ..! و داك السيمانة كانوو بداو يوجدو راسهم يطلعوو لطنجة يسكنوو تما على حساب خدمة البوو د العائلة .. باش ما يبقاش يتمحن فالطريق .. و ولدهم لي قدي فواحد الليلة فداك السيمانة ( غمضات عينيها شادة على فمها لي كيترعد كتبكي ) دخل لعندي للبيت لي عاطييني فلاكاب د الفيلا حدا الكوزينة ..! شد لي فمي بجفافة و قطع لي حوايجي فوق لحمي .. عييت نضرب و فينما نبعدوو كينزل عليا بعصا قاسحة تا دكدكت و ما بقيتش قادرة نتحرك و صوتي ما كيتسمعش بالجفافة لي ففمي ..! اغت٠٠٠صبني تا شفت دمي مقطر .. شرفي مشى فداك الليلة و قتلني ( هزات يديها كيرجفوو قدام الكاميرة ) و هو كان سكران و ماشي فعقلوو .. هاذشي لي قالولي عائلتوو باش يبررو ليه .. بغاو يجرييو عليا و يعطيوني الفلوس باش نسكت و نمشي بحالي و شنوو نقول انا لعائلتي لي صعب منهم ما كان .. شنوو نقول ل مي لي فينما نطلع عندها كتقلبني و تأكد واش مزالة بنت و لا لا ..!

كبيرة: و ماشي غير بغاو .. جراو عليا و عطاو فلوس بزايد ل با لي كيجي فلخر د كل شهر يتخلص علينا .. داني معاه للدار و انا مرعودة تعرف مي و خوتي كاملين مجموعين .. و غير سالات ليا و قلباتني عرفات بلي ما بقيتش بنت .. عرفات و شوهاتني مع كلشي .. كليت لي ما كلاهش تا الطبل و وليت بحال الكلبة عندهم .. و مشينا للمدينة كنسولوو عليهم كانوو مشاو و عيينا نقلبوو و طلع با تال طنجة و والوو ما عندهم أثر ..! تا داز شهر و بدات الدوخة و الردان و قلباتني القابلة و علمات مي بلي حاملة .. ناضت كنازة عندنا و بغاو يقتلوني و جرجروني تال اكادير و من زهري لقيناهم تما .. و فاش علمهم با و مي بلي حاملة .. نكروني و خرجوو فيا العيب و بلي كنت كنهرب مع الرجااال فالليل و كيغطييو عليا و ولدهم اصلا ما كاينش فالمغرب مشى لسبانيا كثر من شهراين هاذي و نشوف داك الكرش منين جبتها ( غطات وجهها كتبكي ) واليديا تبراو مني و لاحوني بحال شي زبلة و تهناو منها و عائلة باك ما قبلوش عليا و بقيت مليوحة حدا باب دارهم ..! تال النهار لي جا خوو مولات الشي .. يعني خال باك .. كان باين عليه على قد الحال ما عندوش و ما خصوش ماشي بحالهم .. الضعيف كيفهم خوه الضعيف .. غوت معاهم و تزايدوو فالهضرة و خرج من تما جاهل و داني معاه لدارو فأكادير نيت .. تما فالدشيرة فين كبرتي ..!

شريفة: الصمت

كبيرة: كان مزوج و دارو فيها جوج طبقات عطاني التحتانية و هو مراتوو الفوقانية .. واخا هو فقيه فالجامع و انا ما كنقرب ليه ما كنجيه و ماشي من المحارم ديالوو .. دخلني لقلب دارو و تستر عليا و قابلاتني مرتوو بكلشي ليا .. كنت خايفة بزااااف .. بين ليلة و نهار تقلبات حياتي و رجعت مراة عندها بنت فيديها .. بنت سبابها فعذابها ..! ( تنهدات بالجهد و شربات من قرعة د الما حداها .. حلقها نشف ) و فالسابع ديالك .. خال باك عيط على عائلتوو و جابهم لعندو .. نحلوو المشكل و يقيدوك فسميتهم و يدخلوك فالحالة المدنية و لكن ما بغاوش و ولدهم ما بقيتش شفتوو من داك الليلة .. ناض الصداع و الغوات و كلشي عرفك كرش الحرام و الناس ما بغاوش يسكتوو و ينساو .. واحد كيقولها للثاني .. و سميتك شريفة على داك الليلة لي مشى فيها شرفي .. "شرف بلا ثمن" .. ما قدرتش ننسى العذاب لي دزت منوو و ما قدرتش نشوف فيك و نبغيك .. كتشبهي ليه بزاااااف .. ملامحك كلهم ديال عائلة باك الموسخين و كنتي موسخة بحالهم فعيني و كتفكريني بيهم و بيه و بشنوو دارلي و كنبرد حري فيك .. عينيك .. عينيك بوحدهم لي شبهوو فيا و ما قدروش يحنوني عليك .. واخا عيات فيا مرات خال باك و الفقيه تا هو نحن و ننسى و ما نضيعش اجري فيك و لكن ما قدرتش .. حتى حملات تا هي و ولدات اسية و ماتت فنفاسها و خلات البنت لحمة صغيرة هكاك ..!

شريفة:( ردات ببحة لحكيم موقفة الفيديو ) عاقلة فاش ولداتها .. كنت قربت نكمل عشر سنين .. كنت كنغير من اسية بزااايد و كرهتها واحد الوقت واخا امها ماتت .. علاش هي كتسهر معاها و عاطياها الخاطر .. كتبدل لها و تمد لها الرضاعة و تقابلها و انا ما كاين غير العصا و السبان ..! و من بعد بدا قلبي كيحنان و انا كنشوفها هكاك صغيرة غير ملاك محطوط و ما عندها حد من غيرنا .. باها ما كيعرفلهاش و كبيرة ما كانتش بنادم فعيني .. كنت كنشوفها وحش و كنخاف منها بزاااااف .. شحال فزكت تحتي غير من حلوفها فيا و هضرتها و ما جاتنيش غتقدر تكون بيها ..! أسية هي الحاجة الزوينة فهاذشي كامل و بغيتها من قلبي و نهار دخلات للمدرسة ديتها و راسي مهزوز .. حاسة بيها بنتي و انا المسؤولة عليها .. واخا انا براسي مزالة صغيرة و ما فاهماش الثقل ديال هاذ الكلمة .. بنتي .. ماشي غير أجي و قول بنتي ..! ( سكتات سااااهية و رجعات طلقات الفيديو )

كبيرة: انا حاسة براسي غنموت فهاذ الليام و يقدرو شي نهار يجييو يفيقوني فالصباح و يلقاو مول الامانة دا امانتوو .. ما كاين حتى لي يشد لي يدي و يشهد لي و يبقى معايا تا تطلع روحي .. و عاد حسيت و ندمت على شنوو درت معاك .. لا انا لقيت عائلتي لا نتي كانت عندك عائلة كيف الناس ( بتنهيدة ) ما لقيتينيش فاش احتاجيتيني و ما لقيتكش فاش احتاجيتك .. هاذي هي الدنيا .. و غنطلبها منك مرة اخرى و يمكن هاذ المرة تشوفي فعيني ماشي بحال المرة لي فاتت .. سمحيلي على كاع لي درتوو .. ذنب باك معايا ثقيييل و ذنبك معايا ثقل منوو و بجوجنا لي درناه فيك ما كيتغفرش .. فهمت غالطة .. و راني عرفت كاع العمايل د الفقيه .. وراني وجهوو الحقيقي من بعد .. ناااادمة ا بنتي على كاع لي درت فيك و اللوحة لي لحتك و الهضرة لي خرجت فيك .. سمحيييلي حيث عارفة قلبك شحال ما قساح غيكون حن من ديالي و غتكوني مراة مزيانة و ام حسن مني ببزاااف و غتعيشي حياتك و نتي هازة راسك و شْريفة ..!

تقطع التسجيل و وصل لنهايتوو ..! رمشات عينيها بالشوية و ببرود قالت و هي كتشوف قبالتها نايضة تلبس عليها ..!

شريفة: ديني لقبرها .. بغيت نمشي نشوفوو ..!

حرك راسوو فصمت .. حيد اليوسبي و طفى البيسي مخليها كتلبس عليها مونطوو و بوط فوق الكيطمة كالعادة ..! خرجوو بجوج مخليين أسية باقية ناعسة شادة عليها ..! مسافة الطريق و وصلوو للمقبرة .. غادي على حسب التنعات لي عطاوه و الارض حالتها بالشتا لي طاحت ..!

شادة فيه شريفة و هو زايد قدامها .. كتشوف فالقبورة و لحمها مبوورش عليها بواحد الاحساس ما عرفاتش فين تصنفوو و لكن كافي يزيرلها على صدرها و تجيها خنقة ما بحالها خنقة و رهبة و هي كتسمع حكيم و العساس لي داخل معاهم كيقلب ليهم على القبر .. كيرددو ..! " السلام عليكم .. أنتم السابقون و نحن اللاحقون "

تا وقفوو قدام واحد فيهم .. مبني بالسيما و صابغينوو بالجير الأبيض لي بدا كيبهاث و يمشي ليه اللون .. زليجة فالراس مكتوب عليها اسم كبيرة و كنيتها .. فوقاش تزادت و فوقاش ماتت .. و آية قرآنية ..! ضور معاه حكيم و مشى مخليهم ..!

جلسات حدا القبر و حكيم بعيد عليها بشوية .. واقف موسع بين رجليه و مربع يديه كيشوف بجدية و حجبانوو معقودين .. حتى بدات شريفة كتهضر بالشوية .. مرة كتدوز يديها على التراب و تبقى تشووف فيه .. مرة تهز عينيها فحكيم ..!

شريفة: عمري شفت شي وجه قسح من وجهك .. انا لي كنقول على راسي مسنطحة و حشمت فبلاصتك ا كبيرة ..! عمرك كان يسحابلك غتموتي بوحدك فدار العجزة و ما تلقاي لي يعطيك كاس د الما و يشهد لك ..؟ بغيتي تشمي ريحتي و تعنقيني و بوجهك حمر كتقوليلي كيفما هزيتك لخمسطاش العام .. ترحمي عليا نتي و راجلك و ولادك يلا عندك .. ما طلبتش منك تهزيني كي درت انا .. طلبت غير ترحمي عليا ( ضحكات باستهزاء .. ضحكة كتحسك فالقلب تا عينيها تغرغرو بالدموع ) الله كيسامح علاش العبد ما يسامحش ..!! ( بالغوات ) و أنا من عندي لهههههههههلا يرحم فيك شي عظظظظظم ..!

حكيم:( حك حاجبوو فصمت كيسمع )

شريفة: ما لقيتيش لي يمدلك كاس د الما حيث نتي فحياااتك كاملة كلب هو اللخر ما طعمتيهش .. بنتك و كنتي كتخليها كتلقف قدامك و جغمة د الما القاطع تعطيها لها تبرد عليها .. كنتي كتعزيها فيها .. حراااك الما .. يلا نتي بغيتي ريحتي تشميها و بغيتي تعنقيني قبل ما تموتي و عاد تحركوو فيك المحاسيس .. أنا تقتلوو من جهتك .. تقتلوو و انا كنشوفك كتحني فكلشي الا فيا .. اسية لي ماشي بنتك و كتعنقيها و تبوسيها و أنا غير نهضر معاك كتجمعيها معايا حتى وليت كنخليك تا كتنعسي و نجي نتخشى فيك و نعنقك و نبكي عليك و نطلب ربي غير تشوفي فوجهي مرة وحدة و تضحكي ..! فين كانت هاذ .. ربي كيسامح و علاش البشر ما يسامحوش شحال هاذي فاش كنتي كتعداي عليا و لا تا وليتي تشوفي عزرائيل كيضور عليك عاد بانلك ربي و الرحمة و السماحة ..!

شريفة: فين كانت هاذ الرحمة و المسامحة .. فاش كنتي كتسبيني قدام الحومة كاملة و ما كاين غير الموسخة و بنت الحرام .. فين كانت فاش كنتي كتبيتيني بالجوع و فعز الليالي د البرد كتخليني عريانة فالكور شادة عليا و البرد كيضرب فيا من كل جهة و تجي فالصباح تكملي عليا بالدق ..! فين كانت فاش كنتي كتسلخيني قدام البشر و تخلي لحمي كامل مزوق .. فين كانت هاذ الرحمة فاش كنتي كتحكي لي السودانية كتقطع ففمي و فقزيبتي و تخليني حداك كنطير و ننزل و نرغب و نبكي و نتمرغ و نتي قاطعة الما من دار و كنبقى النهار كامل هكاك حتى كنبغي نموت و مرضتيني بالبواسر و انا باقى صغيرة و كان آخر همك و بسبابك و بسباب الهزة لي هزيتيني لخمسطاش العام بالتربية .. العصا و الحار ما بقيتش كنشوف مزيان و خسرت الزبابل د الفلوس على عينيا ..! فين كانت هاذ المسامحة فاش حرقتيني على ود الشعر .. على ود جوج زغبات نتي قطعتيهم و نسيتي و لا درتيها بلعاني باش تبردي سمك فيا .. خليتي فيا علامة نتفكرك بيها حياتي كاملة و تا داك العلامة ما رضيتش نبقى جامعاني بيك و درت التجميل و حيدتها .. نتي قتلتيني و أنا كنشوف .. فين كانت هاذ الرحمة و أنا هربانة و نتي طالعة فوقي و كتجمعي معايا و تجريني بحال الحولي المكتف و نتي كتكوي فيا و نتي مهبطة لي سروالي و كتحكيلي الحار فتحتي .. بحال يلا كتحكي الصوفة بالقرشال .. سخفت و بغيت نموت فيديك و قلبك ما هزكش حتى شوية عليا ..! واش نتي رحمتيني باش انا نرحمك ؟ واش شفتي فيا لوجه الله و نتي كتمرمدي بيا قدام صحابي فالمدرسة و نتي كتسبيني و توكليها لي قدامهم و و تعايريني بأصلي .. كتعايرني بشي حاجة نتي دايراها ..! نتي لي علمتيني الرحمة ما كايناش .. نتي لي كنتي كتقوليلي انا ماشي ربي .. انا مكنسامحش .. و كن غير كنت كندير شي حاجة تستاهل هاذشي كامل .. خاصك غير السبة فين تدوزيلي ..!

تنهد حكيم بقققققوة تا تهز صدرو و رجع نزل مرات متابعة و شريفة غير كتهضر و دموعها هابطين شلال مع عينيها .. تا تخنق لها نيفها و ولا كيتسمع صوتها منغنغ ..!

شريفة: يلا مك كانت كتقلبك كل مرة واش بنت .. انا ما عندي حتى ذنب تقلبيني تانا بحال النعجة شاداها بالشحط .. و ما عندي ذنب يلا بلغت و وليت مراة .. ماشي انا لي فقت واحد النهار بوحدي و قلت نوضي ا شريفة تبلغي .. باش تضربيني و تتكرفسي عليا و تحلفي فيا غير حيث بلغت .. يلا نتي غتاااااصبووك و يلا حتى مشيتي مع الرجاال بخاطرك .. هذاك سوقك و لحمك ماشي لحمي و ماشي ضروري نكون بحالك .. باش تمرضيني بفعايلك .. يلا هزيتيني فكرشك من الحرام و كحلت عليك عيشتك .. كنتي تمشي تطيحيني و يلا ما باغاش الولاد فخطرة قولي لهم يردوك عقيمة و ما ترجعيش تولدي و ها نتي مهنية .. حرقة وحدة ففالوب و هانتي مهنية من هاذ الخطية و الخطيات كاملين لي غيعذبوك فحياتك .. نهز جنوي و نخشيه فكرشي .. نقطع مسارني و ما نولدش وحدة عيني ما قادراش نفتحهم فيها غير باش نخلص فعايل باها فيها .. يلا هو و عائلتوو موسخين نتي راك عطاااارة كتمشى على رجليها .. الذبان و الوسخ ضايرين بيك و نتي ماشية غالطة كيسحابلك كيمجدوك و نتي غير دايرة الضحك فراسك .. و كاع لي كتديريه لي كيرجع ليك .. ماشي انا لي كنتلام نتي لي كتلامي ..!

خرجات النفس مفقطع كيرجف و هي حاطة يديها على صدرها لي كيحرقها هو و دموعها لي دايرين طريقهم فحناكها و عينيها عروقاتهم حووومر ..!

شريفة: يلا نتي تغتا٠٠صبتي و واليديك سمحوو فيك .. حتى نتي درتي فيا نفس الشي .. بنتك هربات من الدار ما عارفاها لا واكلة لا شاربة لا مغطية و بالك هاني .. همك كامل هو تخيبي صورتي فعينين البشر و بلاصة ما تندمي و قلبك يحنان غير شوية عليا .. عاد ما زدتي حقدتي و خرجتي فبنتك الهضرة .. خرجتي الهضرة فشرفها لي جالسة كتهضري عليه و تبكي ..! يلا نتي ما حنيتيش فيا فاش عيطولك فالكوميسارية و بفمك و عينيك خارجين .. تبريتي مني و قلتي لهم اااااه بنتي تديرها و تسرق الملايين و هي اصلا غير موسخة و هذا هو مقامها .. خليوها تتربى .. غنجي انا نحن فيك دابا ؟؟

شريفة: الشرف لي نتي كتهضري عليه .. بيديك بعتيه لإلياس .. بعتيني ليه بالفلوس و تساومتي عليا بحال يلا كتبيعي بقرة خاصك غير تهناي منها ..! و جايا دابا كتهضريلي على الفقيه ؟ وراك وجهوو الحقيقي و عرفتي شنوو دار معايا و ندمتي ..!!! علاش غتندمي ؟ كن عرفتي قبل غترديني انا لي كنتزكك عليه و انا لي ما خاصنيش نقرب منوو و نهضر معاه .. واخا بيديك كتسيفطيني عندو يرقيني و هو ما رقاش حتى راسوو .. مكبووووت و يديه غير كيضورو و شحال من مرة حسيت بشوفاتوو و حركاتوو ماشي هما هاذوك و لكن يّما لي نهضر معاها و نشكي لها و تسمعلي اصلا ما مسوقاش و عندها كي الربح كي الخسارة ..! شنوو غنقولك دابا ؟ عبر عليك و برد قلبي من جيهتك فاش لاحك لوحة د الكلاب و خلاك كترماي من زبالة لزبالة .. بعدا هو باع بنتوو لينا و تفاوض فيها و داير الطايلة لراسوو و لكن نتي .. مكلخة و مجلجة و فينما كنتي بقيتي .. حياتك كااااملة ..!

حنات راسها شاداه بيديها بجوج .. تا ضارت لجهة حكيم هازة عينيها فيه بنظرة أليييمة و بضحكة مكسوورة ..!

شريفة: عرفتي من بعد سنيين قلبات عليا .. لقات نمرة إلياس و بغات تلاقاني و بقيت شحاااال مترددة نتلاقاها و نهضر معاها و فلخر مشينا و سافرنا تال اكادير باش نشوفوها ..! كنت كنقول غادي نلقاها نادمة و باغى تصلح كاع لي دارتوو معايا .. الله يجعلها تبكي دم قدامي غير تصلح لي فات .. و لكن هي دموعها كاملين كانوو د التماسيح لدرجة خنقني النفاق لي كان فعينيها و ما قدرتش نغوت و انا كنشوف فوجهها و نخوي كاع لي فقلبي .. و كيفاش غنخوي و هي همها كامل فالفلوس و فالرزق لي وليت عايشة فيه .. قالك حبيب قلبها الفقيه لاحها و ما عندها فين تمشي و غير كتمرمد فالزنقة .. جالسة كتمسكن و باغاني نحن عليها و هي غير كتمثل فالوقت لي انا كنت كنتقطع قدامها بالطراف و نبكي حتى يمشيلي الصوت و نسخف و ما كتهز فيها حتى شعرة ..! أنانية و غتبقى ديما أنانية و كتهضر فالفيديو و هي مطرطقة عينيها .. بحال يلا دارت فيا خير كبييير و خاصني نردو لها ..!

كالات بيديها و وقفات كتنفضهم و بقهرة و دموع حااارة .. صدرها كياكلها و يحكها و العافية شاعلة فيه تما .. شاااخض من جهتها و التبوريشة طالعة معاها من الجو د القبور ..! و هاذشي كامل ما عكزهاش باش تقول ببحة و تغوت بكاع جهدها ..!

شريفة: بغييييتك تعذبييي فقبرك كيفما عذبتيني فحياتي .. بغيتوو يكون حبس ليك و تتخنقي فيه و يدوز عليك كاع العذاب لي وكلتيه لي و أنا باقى ما شفت ما تشوفت فهاذ الدنيا .. يلا نتي عانيتي أنا ذقت التريبل ديال ديالك و الرحمة من جهتك ما كايناااااش .. بغيتك تموووتي فقهرتك و روحك تعذب كل دقيقة و دقيقة .. عمرك ترتاحي واخا متي و شبعتي مووت .. حيث ذنبك كبير و كبير بزاااف و ما كيتغفرش بين ليلة و نهار .. و لا على فيديوو كتعاودي فيه قهرتك .. لو جيت نعاودلك انا شنو قاسيت .. ما توصليلي حتى فواحد فالمية و ما درتش لي نتي درتيه فيا ..! لي كتدوز عليه ما كيمرضش لي معاه و ما كيبغيش يعقدهم و يدوز عليهم كفس من لي داز عليه باش يحس براسوو مرتاح .. من غير يلا كان مريييض و ذنبك نتي ماشي غير معايا .. حتى مع الله لي فوقي و فوقك و عطاك امانة لبين يديك تعوضك و تعوضيها و تتهلاي فيها و لكن ما كنتيش قد الأمانة ديالوو ..! سيري لهههههههلا يسمحلك لك .. لا دنيا لا آخرة .. الله يحرقك عظم عظم .. باش تجربي الحرقة لي انا تحرقتها بسبابك و العافية لي كنتي كتشعليها فيا و تخليني كنترطى حداك و كتضحكي فرحانة و تشمتي فيا .. عاجبك الحال مخلياني كنتقلى و مركبة فيا الصعر و الاعصاب على صغري و انا غير كنجمع و نخبع فقلبي ..!

فشلات تا بغات تطيح و بالزربة شدها حكيم مكاليها عليه و هي كترجف فيديه و تشوف فقبرها .. تا خشات راسها فصدرو كتبكي بحرقة و هو كيحك لها على ظهرها بالشوية ..!

شريفة: لهلا يسمح لها .. الله ياخذ فيها الحق ..!

بقات مدة و هي كتعاود نفس الجملة .. حاطة راسها على صدر حكيم و مكمشة يديها فالجاكيط ديالوو .. رجليها فاشلين عليها و عينيها حووومر غيطرطقوو بلا راسها لي الشقيقة ناضت لها فيه بالهضرة و البكى ..! حتى حسات بيدين حكيم طبطبوو على حنكها .. هزات راسها فيه بتنهيييدة كيهضرو غير بالعينين .. و بعد صمت طوييل شافت فالقبر و قالت

شريفة: يمكن انا بعيدة على الدين و هاذشي بسبابكم نتي و الفقيه ديالك .. و لكن عارفة بلي الثوبة لي كتكون على فراش الموت ما كتقبلش و كيكونوو بواب الرحمة ديال ربي تشدو .. كيعطينا فرص كثاااار فين نتراجعوو و لكن فاش كنوصلوو لفراش الموت ما كتبقى ثوبة .. ما كتبقى صلاة ما كيبقى عقل كيتذكر .. ما كيبقى لسان مسرح ... يلا جيت لهاذشي و كاع لي درتيه عمري نسمح و لكن

تنهدات بقوة مزيرة على يديين حكيم .. كيعطيها الطاقة ..!

شريفة: و لكن كيفما قلتي انا حسن منك .. و غنسمحلك باش حتى فالآخرة ما نتلاقاكش و ما نشوفش وجهك .. ما حدك عارفة ذنبك ما كيتغفرش معايا .. ما حدك كتعذبي و كتجيني فالحلامات باش نجي نترحم عليك و نتغافر معاك ..! و انا غنسمحلك باش ما نبقاش نشوفك حتى فالخيال ديالي و ماشي حيث بقيتي فيا و لكن حيث شفيتيني .. عشتي و متي و نتي إنسانة مريضة فقلبها ما قادراش تنسى ما قادراش تسمح و تزيد بحياتها للقدام .. بقيتي عايشة غير فلي فات و ما تمتعتيش بحياتك حتى شوية ..! و انا عكسك و عمممري غادي نكون بحالك و لا نشبه لك حتى بشوية و كيفما قلتي بفمك غنكون ام مزيااااانة و بزاااف كاع و غنعوض فولادي الحنان لي كان ناقصني و غنعيش و انا شريفة و هازة راسي فالسما ماشي بحالك وجهك مغطوس فالتراب و نتي سبابك فكلشي و تا حد ما غيتفكرك فهاذ الدنيا حتى بدعوة د الخير ..!

حكيم:( غمض عينيه و رجع حلهم كيدوز على ذراعها فصمت )

شريفة: يلا سمح لك ربي راني مسامحة لك ..! ( شافت فحكيم و بتعب قالت ) حد لهنا بيني و بينها صافي .. غننساها و تنساها حتى نتا و عمرنا نولييو نجبدوها .. اليوسبي ديال الفيديوو هرسوو و لوحوو لبعييد ..!

جبدات من جيبها التصويرة ديال كبيرة و مداتلوو يديها يعطيها بريكي لي وصاتوو يهزو فالدار ..! مدولها و شعلات العافية فالتصويرة .. حاطاها فوق قبرها كتفرج فيها حتى ما بقى منها غير الرماد ..!

شريفة:( قلبات راسها جهتوو حاطة يديها على حنكوو و هو شادها و راسها معلي فيه ..! ) انا ما كرهتش ولادي فاش عرفت راسي حاملة و ما عيطتش عليك و غوت معاك حيث انا ما باغاهمش .. انا كنت خايفة .. خايفة نولي بحال كبيرة و تانا نكرههم .. عارفة راسي ما غنخرجش فيهم الحر و غنحن عليهم و لكن خفت يفكروني بهضرتها و بالحرام لي درت و نبقى نشوفهم حياتي كاملة من كرش الحرام ..! ( دمعوو عينيها و رجفات شنافتها ) و لكن فاش شفتهم هكاك .. صغااار و بحال النقيطات .. شحال ضعاااف و ما عندهم جهد و لا طاقة و محتاجين لي يشد بيديهم .. قلبي تهز من جهتهم و بغيتهم و حسيت بيهم .. كنت واجدة نعوضهم على كلشي و لكن مشاو فرمشة عين

حكيم:( لعب بلسانوو ففموو و قال ) بجوجنا خسرناهم و ما كانتش ساهلة عليك و عليا .. جوج رواح مني و منك مشاو و نتي بين الحيا و الموت و حالتك غير كتكفس نهار على نهار و بنتي تا هي تزادت مريضة و معذبة سيمانة و هما كيضربولها فلونتيبيوتيك و العرق ما باينش ناشفة و كيتقبوو فيها تا شدوه .. و هي ضعيفة اللحم على العظم و زرقة و مريضة .. كلها لاسقة فالسلوكة و مشات مع خليل و بدات فالعمليات و الدوايات من جديد ..! ( رخى النفس و حرك راسوو بالنفي ) هاذشي ما ساهل على تا واحد فينا لا انا لا نتي لي كتطفاي بحال الشمعة قدامي و خالعاني عليك بزايد و ما باغى تهضري مع حد ..!

شريفة:( رمشات عينيها و قالت ) شنوو سميتيها ؟

حكيم:( تبسموو عينيه و رد عليها بهدوء ) نور ..!

شريفة:( عاوداتها من موراه ) نور ..! ( تنهدات بقوة و قالت ) فاش كنت صغيرة كنت كنخاف بزاف من الناس و كان عندي علاش نخاف و مع الوقت تعلمت قساحيت و عرفت كيفاش من الضعف ديالي نخلق القوة و ما نخلي تا حد فهاذ الدنيا يخلعني كيفما كان يكون ( ضحكات و الدموع كيلمعوو فعينيها ) فاش كنت جايا عندك فلوطورط .. لأول مرة ما كنتهورش فالصوكان .. عارفة راسي ضابطة اموري و واخا نعطي الفيطاس ما غتغلبنيش و لكن فاش حسيت و شفت فالتلفزة بلي جوج رواح مزروعين فوسطي أنا و غيتعصبوو يلا تعصبت و يفرحوو يلا فرحت و غادي ياكلوو مني و لي ضراتني غادي تضرهم .. وليت خايفة عليهم و عندي علاياش نخاف من بعد سنييين ..!

حكيم: الصمت

شريفة: منين شعلات العافية فالكابوو .. خرجت كنترعد و سمحت فكلشي فلول كن ما عاونوني الشيافرية لي تما .. زيرت على كرشي بحال يلا كنطاكي عليهم و خايفة يتضرو بشي حاجة .. و ما كانش فبالي كاع غيلحقوو عليا ربعة و يضربوني .. مع كل ضربة كنت كنحس بروحي كتطلع .. كنشوفهم بين عيني صغار و بريئين كيتقطعوو طراف ..! يلا قلت لك بصح ما حسيتش بالحريق فداك الوقت من غير الصدمة اللولة و بقى بالي كلوو معاهم و عقلي معاك حتى نتا ( تزيرات حتى نزلوو دموعها ) كنقول صافي ما غنعاودش نشوفك مرة اخرى .. نهار غنموت غنمشي فيه و حنا مدابزين ..!

عضات على فمها بقهرة كتشهق مزيرة صباعها عليه و هو كيسكتها ..!

شريفة: فواحد اللحظة كلشي وقف فعيني .. بقى غير الظلااااام .. كنت كنتقاتل فاللول بحال شي وحدة غرقات و المواج كيضربوها و الما مكلاصي جمدها و واخا هكاك مقاتلة .. كتحاول تطلع للفوق و تنفس .. كتحاول تنسى الحريق لي عاطياه لها ذاتها .. حتى قلت انا علاااااش كنتقاتل و نتضارب ؟ شنوو ربحت من هاذ الدنيا ؟ و تما ترخيت فخطرة و ما بقيتش باغية نعيش و ما بقات عندي حتى حاجة نصبر عليها .. ما فرحتش فاش حليت عيني حيث صافي عييت و ما بقاليش فين نزيد نصبر و الحريق زاد قتلني كثر و كثر .. جربت جميع انواع العذاب و لكن ديال الشهورة لي فاتوو ( بقهرة ) بزاااااف بزاااف كاع ..! لي فات زمان ما نسيتوش و رجعت كنشوفوو نهار على نهار بين عيني .. كنشوف شحال قاومت و فلخر كلشي رجعلي و حتى حاجة ما تنسات و مشات .. شحال ما زدت القدام فلخر راني رجعت للور ..! اللهم نرخي كلشي و نبقى بوحدي .. ما عنديش الزهر فالبشر .. قلال لي كيصدقوو .. شحال ما درت فيهم الخير ما كينفعش و كييتسناوك غير تخرج للعيب باش يضوروك ..!

حكيم:( بفهم ) و دابا ؟

شريفة: و دابا كنحاول .. كنحاول نخرج من داك الظلام لي غرقت فيه .. كنحاول نولي شوية و ماشي غير على ودي .. على ودك نتا كثر .. على كاع صبرك معايا و على اسية حتى هي .. ما تستاهلوش تضيعوو معايا ..! بغيت نسمح و ننسى و نكمل حياتي و نعيشها كيفما كنتمنى .. بغيت نرجع نوّر من جديد ( حكات شنايفها مع بعضياتهم ) نوور ..! شنوو وقع مع كريمة باقي ؟

حكيم: فالطبيب .. و حتى نتي عندك رونديفوو هاذ العشية مع طبيبة نفسية ( جات تهضر و سكتها ) تقدري تسمحي لهم كاملين و تقوليها بالفم و تحسي بيها .. تخوي قلبك و لكن عمرك غادي تنساي .. كيبقاو ذكريات من طفولتك و مراهقتك و شبابك .. باش ترتاحي ديال بصح خاصك تتقبليهم و تتعايشي معاهم حتى ما يبقاوش يأثرو عليك فخطرة ..!

شريفة:( تنهدات بقوة ) عااااارفة ..!

حكيم: و هاذشي غتخدمي عليه مع الطبيبة ديالك .. عندك حصة وحدة معاها فالسيمانة كافية و موفية و نتي ماشي مريضة و لا حمقة .. اي واحد فهاذ الدنيا كيجي وقت كيخصوو يخوي فيه و يلقى لي يسمعلوو و يرشدوو و ينصحوو .. نصيحة لي غتنفعوو .. ماشي نتي كتشكي بالقلب و لي كيسمعلك كيقولك يمكن فيك الحلاقم ..! خاص لي يسمع يكون قادر يعرف شنوو بيك و يفك معاك العقد لي عندك و ما غتلقاي حسن من الطبيبة تنفعك فهاذشي ..!

شريفة:( شافت فالقبر و قالت ) واخا نمشييو من هنا بعدا ..!

حرك راسوو بالايجاب و تحنى حط يد تحت من فخاضها و يد مضورها على ظهرها تال كرشها ..! هزها على غفلة تا تفزعات و ضورات يديها على عنقوو .. مبسمة بتعب و نيت فشلات و ما كانتش قادرة تزيد شي خلفة .. جات الهزة فوقتها هي هاذيك ..! حطات راسها على صدرو فسكات كتصنت ليه ..!

حكيم: داكشي لي كتسمعي و تشوفي و تبداي تغوتي بسبابوو .. جاي من قلة النعاس لا غير .. الارق لي دارها لك .. كيخليك تتخيلي شي حوايج ما كاينينش .. و تا على هاذشي خاصك تمشي للطبيب ضروري باش تعطيك شي دوا كينعس .. تا تولي مزيانة و تقطعيه باش ما تولفيهش حتى هو ..!

شريفة:( ردات بهدوء و تعب ) راسي كيتقطع عليا بالحريق ..!

حكيم: ضروووري .. لبارح مع إلياس و اليوم مع كبيرة و البكى لي بكيتي .. عادي يحرقك راسك و غتحسي بيه بحال يلا خوى و خفاف عليك .. حيث رميتي شحال من حاجة كانت خانقاك و مزيراك .. و فنفس الوقت درتي مجهود و طاقة كبيرة .. خاصك تريحييه ..!

شريفة:( تبسمات و باستوو بلطف فحنكوو ) نتا الجوكير ديالي ..!

حكيم:( شاف فيها بنص عين ضاحك ) الجوكير ديالك .. غيحيد لك الفشوش ا مدام .. عطينا الخاطر بزايد .. دابا غتحيدي داك التيليفون فخطرة .. ما نلقاكش كتفرجي فشي حاجة د البكى و الموت .. لا اغاني لا افلام و البيت ديما يبقى طالع فيه الريدو و مضوي و ما حد اسية عطلة غتديرو بجوج ساعة فالنهار تمشاو فيها ديرو لامارش و سيري معاها للاصال يلا بغيتي تتفرجي فيها كتطريني ..!

شريفة: بغيت نشوفك نتا كتطريني .. منين رجعنا من المخيم ما بقيتي مشيتي ل لاصال واقيلة ..!

حكيم: ما كنساليش ..!

شريفة:( ردات بهدوء ) خرج لوو وقتوو حتى هو .. كنت كنقول فاش غتكبر غتكون بوكسور كيفما كنتي كتحلم .. بيتك باقي بين عيني معلقين فيهم داك التصاور و بيني و بينك ههه كنت كنتسلت مرة مرة نتفرج فيك كتلعب فالنادي مع الدراري د الدرب ..! ( تنهدات ) الرياضة كتكالمي الواحد و ما كيبقاش معصب .. كيلقى راحتوو فيها و لكن ما كتوكلش طرف د الخبز و خدمتك اولى ليك منها و لكن عليك الضغط بزايد .. فرغوو فالسبور غترتاح حتى نتا .. واخا غير ساعة فالنهار .. ما تشوفنيش غير انا تا نتا عيان و بزااف ..!

حكيم:( ضحك كيشوف فيها و حاضي فين كيحط رجليه ) نتريني بيك ..!

شريفة: هههه نلعبوو كومبا ..! ( بابتسامة ) فالصباح ضرباتني الفيقة بكري .. شفت تصاورك و الميداليات ديالك و الكؤوس لي ربحتي .. خمس شهور فالدار و عمري نتابهت لهم و ما كانش كيسحابلي عندك ديكشي كامل .. مزيان منين ما ضيعتيش الشغف ديالك ( بتنهيدة ) ما تخليش المشاكل ينسيوك فلي شحال و نتا كتحلم بيه ..!

حكيم:( ضحك جنب ) هاذ الهضرة قوليها لراسك ..!

شريفة:( قلبات عينيها كتميق فيه من لتحت للتحت .. لاسقة فيه بيديها بجوج .. حتى خرجوو للتيساعة لي حدا التقاوس د المقبرة فين مباركي الطونوبيل .. و بهدوء و صوت مرخي قالت ) عقلتي على اقشور فاش هزيتيني و ديتيني للطبيب .. قلت لك جابلك الله فمن تتدرب باش تهز مراتك و فلخر صدقت انا هي ..!

حكيم:( رد بهدووء و عينيه حاضيينها ) الموافقة د زواجنا خرجات هاذي ثلث أيام ..! كنت غنقولها لك قبل و ما صلاحش مع كاع لي واقع ..!

شريفة:( بلعات ريقها و قالت ) ااااااه ( سرطات لسانها لثواني و عاودات هضرات ) و شنوو المعمول ؟

قهقه بالجهد من وجهها كي ولى .. تا تهزات فصدرو تا هي .. فتح باب الطونوبيل حطها للداخل حداه و قاد لها السمطة .. وجهوو حدا عنقها و عينيه مهزوزين فيها تا بلعات ريقها و تزنكات بالتدريج ..!

حكيم: واحد الفارة بغات تشدها المصيدة و بانتلي خايفة ..!

شريفة:( لعبات بعينيها غالباها الضحكة و قالت ) لا انا قابلة .. يلا نتا قابل على لحية التهامي و شلاغم داني و بلغة المدني .. علاش أنا لي ما نقبلش ؟

حكيم:( شاف فالموسطاج لي باين من بعييييد تعلق فيه الرباطي د البصلة و يشيط الخير و واحد الحجبان نايضين و لي بوان نواغ دايرين حالة فوجهها هما و نشوفية تا ولا كيتقشر بوحدو ..! ضحك عاض على لسانوو و قال ) لا بلاتي نعاود نفكر حسن ما نتصيد ..!

شريفة:( ضحكات و ضرباتوو لصدرو بخفة تا شد عليها الباب و ركب حداها خارج من تما ) و لا عرفتي نأجلوو السؤال تال للدار و تاكل الهريسة و نجمعوو و نطوييو ..!

حكيم:( رد باستهزاء ) فلفلة حارة هي لي غتاكليها نتي .. غذا ..! ( هز حاجبوو فيها ) هذا هو الجهد ..!

وصلوو للدار و طلعوو بجوج هو دخل للبيت كيجمع حوايجوو د الحمام و شريفة مشات عند أسية علماتها تجمع صاكها تا هي و لحقات عليه كتجمع و تشوف لي بخودوي لي عندها واش باقيين صالحين .. النص فيهم رماتهم فالزبل و هزات لي مزيان و غتحتاجوو ..!

شدو الطريق لسونطر بيوتي كبير و معروف حداهم .. فيه حمام د الرجال و د العيالات مفروقين و فيه ديال لي كوبل مخلط .. كل بيت بوحدو كتدخلوو و تشد عليك ..! مقسم البيت على جوج .. جهة فيها جليسة فين تبدل حوايجك و تحطهم و فالجنب كاينة طبيلة صغيرة فيها فواكه جافة و قرعة د عصير الليمون مغطية مع كيسان خاويين مقلوبين على وجههم و الجهة الثانية كتفتح بباب د الزاج مضببة بالسخونية ..!

حمام بلدي تقليدي بالنقش فالزليج مخلط بين الزرق و الاحمر و الاخضر ..! سينية ديال النحاس فيها الحنة مطحونة و الورد و الريحان و كثرة العشوب مع طاسة ديال الصابون البلدي ..! و الوسط كاينة رخامة طويلة و عالية فالابيض و مقابلة معاها قبة صغيرة بالبزابز ديال النحاس و طاسة فنفس الشكل .. فالفضي و تقيلة مخشية فسطل د الما كيعمر بالسخون ..!

كل حمام فيه كسالة للعيالات و كسال للرجال كيدخلوو معاك كيغسلولك من طاق طاق للسلام عليكم .. و عاد علمهم حكيم بلي بغاو حمام د العرايس ..! هو داز نيشان يتحمحم و شريفة سبقات لاسيغ .. فصال بوحدها تا نتفات كلشي عاد دخلات تكسلات و خلاتهم حمحموها من ديكشي الرفيع ..! واخا حشمات منهم حيث كانت خانزة بهاذ المفهوم .. عاد بان فيها الضوو .. زيانت و تنورات ..! خلاتها هي .. كانت غوريلا و دابا عاد رجعات بنادم ..!

شكراتهم و ضورات معاهم .. جالسة بالبينوار ديالها حاطة رجل على رجل كتشرب من عصيرها هي و اسية لي تجبدات تا هي معاها و ارتاحت عاجبها الحال ..! شربوو العصير و ذاقوو من الحلويات لي جابولهم هما و الفواكه الجافة ..!

واخذين راحتهم بالشوية عليهم .. عارفين حكيم غيدير سبا و حمام و بحال والوو تبانلوو فشي حاجة و يجربها ..! يعني الوقت عندهم و ما زربانين فين .. هضرو و ضحكوو بيناتهم محيدين السخفة و السخونية د الحمام .. عاد لبسوو حوايجهم و خرجوو هازين صيكانهم ..!

لقاو البنات كيتسناوهم و هبطوو معاهم للتحت فين غتقاد ظفرانها و تصوب شعرها تنشفوو .. اما حتى حجبانها قادوهم لها كيفما بغاتهم فاش مشات ل لاسيغ ..! جالسة طالقة يديها و رجليها كيتصوبوو و هي كتختار اللون و الشكل د الزواقة لي تديرلهم و حداها اسية لي صوباتوو كتديرلها بحالوو و تختار معاها ..!

سكسفوو على الحالة و خرجوو كيشكرو البنات تال الاستقبال فين كيتسناهم حكيم .. لقاوه خلص و سالى ..! هز عليهم الصيكان دارهم فالكوفر و ركبوو ..! شاف فيها و ضحك حتى غلباتها الضحكة تا هي و عينيها تبسموو ..!

شريفة: هههههه شنوو ما بقيتيش غتاكل الهريسة و ما تجاوبش على السؤال .. صافي زيانيت ..!؟

حكيم:( لعب بلسانوو ففموو و قال ) اللي ما قدرات تكون نجمة في السما .. تكون شمعة في الدّار ( غمزها مطمر و هز عينوو فالمرايا فأسية ) عندي الصح و لا لا ..!؟

أسية:( ردات بتأكيد ) عنننننندك ..!

شريفة: ناري شحال كتموت فيك هاذ الموصيبة .. محامي صحييح يا خويا ( ميقات فيهم و قالت كتعوج ففمها ) ايوا لي بغى يبوسك راه كيعرف فمك حتى فالظلام ..! شبعني صباغة تا يتسالى الكرموس و نشوفوو آش غتدير ا الشاف ..!

حكيم:( حرك راسوو بالنفي كيضحك ) ندوزو للهندية تا هي قاضية الغراض ..!

كملوو طريقهم مرة ضاحكين مرة ساكتين .. دوزهم لريسطوو د الحوت مضخم تغذاو فيه .. فرحانين بالنجاح د أسية و فنفس الوقت كيفوجوو على شريفة لي دايرة جهدها معاهم حتى هي ..!

مشاو غسلوو يديهم و عطروها محيدين ريحة الحوت و لحقوو على أسية لي يالاه كملات ماكلتها و ناضت تا هي ..!

شريفة: تاسانوو انهبطوو نخلصوو و نتسناوك فالطونوبيل حدا الباب .. صافي ؟

اسية: واخا غير سيرو ..!

و ديكشي لي كان مشاو سبقوها و دخلات هي للحمام كتغسل فيديها حانية راسها و مع الهزة لي هزاتوو شافت أيوب موراها فالمرايا حتى قفزات مخلوعة .. قلبها بغى يسكت .. أما هو تبسم بفرحة و ملامح مبهجة بحال عادتوو ..!

ايوب: غير أنا ا حبيبة ما تخلعيش ( مد لها كاغيط من لي محطوطين مسحات فيه يديها .. وجهها حمر و مزالة مصدومة فيه ) كنت كنتغذا مع شي صحابي و شفتك نتي و حكيم و شريفة .. ما بغيتش نسلم عليك حداهم باش ما تخلعيش .. ساعة تا دابا صدقت خالعك ..!

أسية:( ضحكات بصفورية كتشوف فالباب ) اااه وا خرج بحالك تمشي تدخل شريفة و تشوفك ما غيعجبهاش الحال .. غينوض الصداع على والوو ..!

أيوب:( رد باحباط ) ما توحشتينيش ؟ و انا لي داير المستحيل باش نشوفك ( شد فيديها مزير عليها ) سمحيلي حيث كنتعصب عليك و لكن كنتوحشك ا حبيبة و كتغبري عليا شحال .. كنبقى مقطوع الراس بلا بيك .. عندك الصح فشنوو قلتيلي آخر مرة .. ما غتعاودش ..!

أسية:( ردات بابتسامة كتجر يديها بالشوية و هو مزير عليها و كيشوف فيها شوفات ما فهماتهومش و لكن حشمووها بزايد ..! ) مزيان من لي تلاقينا هنا .. ها نتا شفتيني .. دابا خاصني نمشي قبل ما يتخلعوو عليا ..!

أيوب:( رد بهدوء ) و ما غتسلميش عليا ؟

جرها من يديها تال عندو باسها فحناكها بجوج و بعد كيضحك على حناكها لي رجعوو بحال ماطيشة بالحمورية و بابتسامة قال

ايوب: بغيت نعطيك الكادو ديال النجاح ديالك و لكن ما هازوش معايا ما يسحابليش غنتشاوفوو اليوم ا الزين الحشومي ( قرصها من حنكها تا بعدات اللور شوية ) ههههههه

أسية: أيوب حشووومة .. جمع يديك عندك شوية ويييلي ( خرجات عينيها العسليين فيه ) و طلقني نمشي ..!

أيوب:( رد بهدوء مبسم معاها ) ما تحشميش مني أ اسية .. نتي دابا حبيبتي و كبيدة ديالي و الشعيبية ديال كبور .. هاذشي عادي بين جوج كيبغييو بعضياتهم .. ما كرهتش نعنقك و نشبع من ريحتك و نبوسك فداك الشنيفات تا نحمرهم لك .. نتي صاحبتي ماشي ختي باش تا يديك ما نشدش فيهم .. أنا فاهمك و حتى نتي فهميني و بغيني كيفما أنا كنبغيك ( حرك راسوو بالنفي و كمل ) ما حاسش بقيمتي عندك كيجيني غير دايرة لي الخاطر و ما تايقاش فيا و يلا ما كانتش الثقة ما كاين والوو ( زاد زير على يديها ) أنا عمري نآذيك بشي حاجة .. باغيك غير تحسي بيا ..!

أسية:( دخلات لها هضرتوو للدماغ و رجعات غمضات عينيها حركات راسها بالنفي .. بحال يلا كتلوح كلاموو من عقلها .. جبدات يديها بزز منوو و قالت ) ماشي دابا خاصني نمشي أ أيوب ..!

خلاتوو واقف و فتحات الباب هابطة فالدروج بالزربة كتفتف بوحدها مخلوعة .. ركبات فالطونوبيل لور وجهها حمر و مخطوف منوو اللون غير كتضور فعينيها و حانياهم على حجرها باش ما تعيقش و يحسوو عليها .. زيرات على صبعانها و قالت ..!

أسية: تعطلت عليكم سمحولي ..!

شريفة: نوو براحتك ..! غنمشييو للطبيب دابا ياك ا حكيم ..!

حكيم: وي .. اسية غتبقاي فالطونوبيل .. دغيا غنكملوو و نجييو ..!

أسية: واخا ..!

و ديكشي لي كان وصلوو للعيادة د الطبيبة .. بلاصى و خلاها جالسة لداخل كتفكر فهضرة أيوب و فحكيم و شريفة .. كاع التوصيات ديالهم لي كيوصيوها و يفقهوها .. و رجعات الصورة ديالهم و هما ناعسيين بجوج لبالها .. كتقرانها مع هضرة أيوب و نصائح شريفة عليه و بلي ما عندهمش مستقبل و باقيين صغار .. تا غمضات عينيها باغى تبكي .. كلشي مخربق فراسها و حتى حاجة ما واضحة .. واش باغاه هو و لا عدنان و لا تديها فقرايتها واش تبعد منوو و لا شنوو تدير ..!

بقات هكاك حتى رجعوو لعندها .. ما تعطلوش بزااف و كانت غير حصة تعريفية بيناتهم .. دارت معاها فوقاش ترجع عندها و العلاج كي غيمشي و شنوو الحوايج لي تبغيها ما تبقاش تديرهم و عطاتها تمارين تبعهم غيحسنوو من نفسيتها و فالأخير كتبات لها دوا غيعاونها تنعس و ترتاح ...!

ديمارا الطونوبيل خارج من المطار .. كيشوف فخليل حداه و حبيبة اللور مع نور و كيتبسم بفرحة ..!

حسام: وا هاكا يكونوو المفاجئات و لا بلاش .. حكيم غيفرح بزاااف بهاذ المجية .. جات مع ضريب الصداق ديالهم نيشان .. عوال غذا يمشي للمكتب د العدول يتزوجوو تما و يقادو وراقهم ..!

حبيبة:( ردات بابتسامة كتشوف فنور ناعسة فيديها ) تا حنا جينا على ود زواجوو .. شحال و حنا نتسناوه و فلخر ما نحضروش ليه و ما نفرحوش بيه ..!!! عيينا من الهم و الغبينة .. نتجمعوو نشطوو شوية ..!

خليل:( رد كيشعل تيليفونوو و يركب نمرة جديدة د المغرب شراها من المطار ) و الله ا خاي تال الدقيقة التسعين عاد علمنا و بدينا نجمعوو الحوايج .. طلبت لهم كونجي على الله كنقول موحال يقبلوه .. ساعة الحمد لله عطاوه لنا و فكونا ..!

حبيبة: علمتي عدنان و محمد أمين و ماري يتلاقاونا عندو ؟ على الله غير يكون فالدار و ما نبقاوش نتسناو فالبرد ..!

حسام: ما عندو فين يمشي تا هو اليوم شد الكونجي د زواجوو .. يرتاحلوو شوية ..!

كملوو طريقهم تال الدار د حكيم .. جاو نيشان مع محمد أمين و عدنان و ماري ..! نزل خليل هو اللول طاير لعندهم سلم عليهم بحرارة كيعنق و يعاود و هما نفس الشي فرحانين بيه .. و يالاه جات تنزل حبيبة تا هي .. قال حسام بالزربة ..!

حسام: الواليدة بغيتك فشي حاجة قبل ما تنزلي ..!

حبيبة: اهاه الله يسمعنا خبار الخير ا ولدي ..!

حسام:( نحنح كيضور فعينيه حشمان منها و من الموقف و خاصوو يزرب قبل ما يجييو ولادها ) نتي فمقام الواليدة و ربي عالم بمعزتك و حكيم كثر من خويا .. أنا ما بغيتش نسبق بيه حتى نهضر معاك نتي اللولة ( طلقها فوجهها و لي ليها ليها ) بغيت ماري للزواج يلا قبلتوو عليا ..!

صدمها ما عرفات باش ترد عليه ..! بقات غير ملبكة و كتضور عينيها فيه و فنور و فولادها برا ..!

حسام: زربت و ماشي وقت الهضرة دابا و لكن ما عرفتكش واش غترجعي لألمانيا ثاني و لا غتبقاي هنا و ما كرهتش تهضري معاها بيناتكم ما حدك هنا .. و يلا كانت شي حاجة نديرو الخطبة دابا و العرس فالصيف مور ما تسالي امتحاناتها و تشد اجازتها ..!

حبيبة:( ردات برزانة ) واخا ا ولدي نهضر معاها و نرد عليك .. نتا منك من ولادي و بالفرحات عليا نعطيها لك .. غنكون مأمنة عليها معاك و لكن فاللول و فاللخر كتبقى ماري مولات الري و الشوار ..!

حرك لها راسوو بالايجاب و هبطوو بجوج بيهم .. خذا من عندها الصاك ديال نور و هي هازاها عندها .. تعانقات مع ولادها بالبكى و الدموع خصوصا ماري لي ما سخاتش تبعدها عليها كن ما ناضت نور تبكي ..!

طلعوو كاملين و بقات ماري متلية كتشوف فحسام مبسمة و تا هو عض على شنافتوو و قال

حسام: اش هذا .. اللحم موجود و الكزار مشدود ؟؟؟

ملاك: هههههه البسالة عندك فالدم .. فين غبرتي ؟ ثلث شهور ما بقينا شفناك ..!؟

حسام: كنت خدام عاد دخلت هاذ السيمانة .. توحشتيني الزين ..!؟

ملاك: هيهيهي آش فيك ما يتوحش ؟ غير جاني العجب فيك .. ساكت و قارم ما سمعنا لك الحس من شحال هاذي ..!

حسام:( رد كيشوف فيها بمغازلة ) وا طلعي ا الزين قبل ما نوريك علاياش قارم و نقطعوو ورقتنا انا و ياك مع المخزن ( حكيم )

ما كاين ما حسن من لمة الخوت و الحباب من بعد فراق دام مدة طويلة ..! صوت الضحك كيتسمع من بعييد خارج من الصالون فين جالسين ..! تعانقوو و تسالموو بحرارة .. فرح حكيم بالمفاجأة بزايد ..! و لمعوو عينيه و هو كيشوف فنور ناعسة مكمشة فغطاتها ..!

الشعر كبر و ولى ملولب فلون الشمش .. ذهبي كيلعب و حروفاتها زوووعر .. الحجبان فنفس اللون و الفيم حممر و مكمشة الشنافة التحتانية ففمها لداخل كتمصها ..! و كتبقى عادتها هي عادتها .. يد ديما محطوطة تحت راسها معوجاها و مكالية بيها ..!

دخلات عندهم شريفة بقميص جوهرة خفيف فالغوز بيبي .. مطلوق على طولتوو جايها حساب ..! سلمات عليهم كاملين حتى وصلات لعند حبيبة و ناضت عنقاتها بحنان كتبارك لها و تصلي على النبي ..! تا طلقاتها بتزغريتة فاعلة تاركة .. قفزات فيها نور من بلاصتها فراس الصالون فين مكاليينها ..!

داوها رجليها جهتها و جلسات حداها .. و نور كتكمش ففمها و ترمش شفارها بشوية كتوجد راسها تطلق بكية من الاعماق .. تا حسات بيدين كيطبطبوو عليها مبسمين و بدات تجبد و تفوه و هي كتشوف فيها ..! مبطبطة و غليلضة شوية ..!

الحنيكات بويض صافيين و حوومر بالنعاس تشهاي فيهم غير شي عضة تشبعي حلاوة ..! العينين خوضر مايلين للزيتي بحال كريمة بالضبط .. و ليبة فالابيض كتغني يا ليل يا عين مع كسيوة د الدجين هابطة على ركابيها واسعة بحال الأميرة .. تحتها تيشورطات سخان باش ما يضربهاش البرد .. و مونطوو طويل فالاحمر محطوط فالجنب ..!

وقف حكيم هزها لعندو و هي كتوسع عينيها فيه بالتدريج .. مأتيغيها اللون د التيشورط ديالوو .. خشات يديها كتمص فيها و ريوكها هابطين جناب فمها و مرة مرة كتضحك معاه و تلعب برجيلاتها بفرحة .. تا بدا يقفزها بين يديه و هي كتوغوغ فرحانة و كتزيد تعلى و تلعب براسها كتديه و تجيبوو بحماس ..! و غير حسات بيه غيرجعها تنعس بدات تغوبش باش تبكي ..! و لكن هو مدها لشريفة لي شافها مترددة باش تهزها عندها ..!

حطها قدام الامر الواقع تا زيرات عليها خايفاها تطيح لها ..! باستها فحنكها بحنان تا طلعات معاها ريحتها .. الريحة ديال لي بيبي لي كتدخل فالاعماق ديال أي واحد و تنشر السعادة ..! رجعات باستها بوسة ثانية خاشية راسها فعنقها كتشم فرويحتها ..! و تحرك يديها بالشوية باش ما تبكيلهاش ..! عينيها معاها و وذنيها مع حبيبة لي قالت

حبيبة: غذا غادي تضربوو العقد ان شاء الله .. غنمشييو معاكم لعند العدول و من تما .. نشدو الطريق و نطلعوو للبلاد ديال المرحوم ..! نشوفوو العائلة و نفرحوو بيكم حتى نتوما شوية ..! ( شافت فولادها ) عدنان ؟

عدنان: واخا غنخلي المحل للجيرون هو يتكلف بيه حتى نرجع .. ما كاين مشكل ( لحكيم و شريفة ) الله يسخر ..!

حبيبة: محمد أميين ؟؟

محمد أميين:( هز راسوو بالايجاب ) أنا و ماري و اسية ديسبونيبل .. كاملين عندنا عطلة ديال السوميستر اللولة .. ساليت خدمتي انا معاهم واحد الشهر د الكونجي عاد غنرجع و بسمة تا هي شحال و هي طاابة الكونجي ديالها .. اليوم آخر كارد عندها و غتشد جوج سيمانات كنا عوالين نسافرو فيهم ..!

حبيبة: حتى البلاد غتعجبكم و تشبعوو غير راحة ..! يعني تافقنا و نتا أ حسام ؟

حسام: حتى أنا كونجي .. يالاه رجعت من ثلث شهور د الحرب .. عندي سيمانة د الراحة دابا و حكيم تا هو شد عطلة د زواجوو .. يعني ميسرة لكلشي ..!

حبيبة: لالة العروسة و مولاي السلطان آش قلتوو مسلكاكم ..!؟

شافوو فبعضياتهم و هزات شريفة راسها بالايجاب و رد حكيم عليهم تا هو بالموافقة ..!

حكيم: لي درتووه حنا معاكم فيه ..!

حبيبة: اييوا مزيان .. ما باغيينش العرس .. القليلة نديرولكم حنينة تحن عليكم و تفتح بيبان الخير فوجهكم نتوما و داك الملاك ..!

كلهم شافوو فنوور لي مخشية فصدر شريفة و ساكتة كتوغوغ بوحدها و تضحك .. كتفركل برجليها و تمص فيديدتها ..!

*********************************

فاقد الشيء .. لا يعطيه ..

يبحث عنه .. يجذبه .. يحصل عليه .. يتلذذ به ..

إلا أنه لا يملكه ..

لا يوجد داخل قاموس مشاعره ..هو بكل بساطة ..

لا يعرفه .. ولا يأبه بمن يحتاج إليه ..

لذلك ..مهما أعطيته .. لن يعطيك .. وإن بلغ من العمر عتياً ..

أمّا مفتقد الشيء .. فهو أكثر من يعطيه ..

فقد ذاق مرارة الفقد .. الإحتياج .. وتخاذل البشر ..

يتألم .. ولا يريد لغيره أن يتذوق طعم الألم ..

لذا ..هو أقدر من يعطي ..

بل ويسرف في العطاء .. مهما كلفه ذلك ..

***********************************

أي إنسان فهاذ الدنيا محتاج علامن يحط راسوو و يتقاسم هموموو و مشاكلوو .. شخص لي يكملوو و يخفف عليه و يفرح معاه ..! المراة خاصها راجل يوقف معاها و يكون لها سند فالشدة قبل من الفرح .. مسخن لها كتافها .. و الراجل محتاج الفطنة د المراة فحياتوو .. حكمتها و حنيتها و قلبها الرحيم ..!

كيبقى الزواج قسمة و نصيب و باش يكمل خاص المودة و الرحمة و الاحترام بين الازواج و بزاف د الصبر ..!

هذا كان جزء من كلام العدول لي شحال و هو يهضر لهم على الزواج فالدين و كيفاش خاصهم يصبرو على بعضياتهم .. عاطيهم أمثلة من السيرة النبوية الشريفة و من الحياة الاجتماعية بصفة عامة ..! و بعدها سول شريفة على صداقها واش شداتوو و هزات راسها بالايجاب ..!

مد لها كتاب د الجلد تسني فيه كيوريها فين و هي شادة الستيلوو بين ظفرانها النقيين و المصبوغين بلون بارد زوين و خاتم زواجها كيلمع فيديها هو و ثلاثة د لي براسلي د الذهب لي كان جاب لها فالمخيم ..! كل واحد فلون .. الذهب الابيض و الاصفر و الاحمر .. كيعشقوو مع بيوضية لحمها و هي كتسني ورقة تابعة ختها ..! و غير كملات سنى حكيم حتى هو و تعالاو الزغرتات من عند حبيبة معاوناها بسمة و اسية لي كتضحك فرحانة مشاركة معاهم ..!

وقفات شريفة لابسة مونطوو فالابيض و فيه شوية د الرمادي بالفورور رطيطب و سروال د التوب محبب سخون فالرمادي مغلوق مع سباط د الجلد فالكحل .. طالع شوية مع رجليها ..! زاد علاها كثر ما هي طويلة ..! كتستقبل التهاني و هي مبسمة عينيها كيلمعوو و مجبدين بأيلاينير خفيف و كلوز غوز كيبري فشفايفها .. حناكها حوومر و مزنكين طبيعيين و كل شوية ترجع شعرها مور وذنيها ..! هابط مسرسب مع كتافها .. نازل عليهم بشوية .. و اللون د الفورور الابيض مع ظلام ليل شعرها كيجذب العين لي كلها عليهم ..!

و على حكيم لي وقف حتى هو بتيشورط كول " V " فالرمادي و دجين فرجليه مع كاط فالكحل و جاكيط كبيرة بحال شي هيضورة مقطنة من الداخل .. سخوونة ..! حط جوج صبعان على ذقنها طلع لها وجهها فيه و هي كترمش بالشوية .. طاحت عليها واحد الحشمة عجييييبة ..! باسها فجبهتها و همس فوذنيها بصوت رخييم و ثقييل ..!

حكيم: مبروووك علينا ا مدام ..!

شريفة:( تبسمات بهدوء ) الله يبارك فيك ا كبيدة و مبروك عليك حتى نتا ا موسيوو ( خرجات لسانها للجنب بشقاوة عاضة طرف من شنافتها ..! )

كملوو الاجراءات و خرجوو من مكتب العدول لبرا فين واقفين ربعة ديال الطونوبيلات عاليين .. معمرين الكوفر بالسيكان كبار ديال الكونطر بوند و الكراطن مشدودين بالسوكتش و سطوك ديال الغطاوات .. مفرقين ديكشي بالقد على ربعة ..!

كان عوال حكيم يخرج صدقة عليه و على صحتوو هو و بنتوو و شريفة لي رجعات من الموت و جات هي هاذيك مع الزواج .. و فاش تافقوو على الطلعة للبلاد ما لقى تا صدقة حسن من هاذي يكسي بيها المحتاجين لي تما و لي عارف حالتهم كيف كتكون و قلة الشي موصيبة خصوصا فالمناطق النائية ..! و تا خوتوو و حسام فاش شافوه كيتقضى دارو حتى هما حقهم و لي هز منوو كيزيدو بحالوو فربعة ..!

تفرقوو على الطونوبيلات كيتافقوو بيناتهم و كل واحد من الدراري شكون دا معاه .. مخليين شريفة و حكيم بوحدهم .. ياخذو راحتهم فالطريق ..! و تا هو غير ركب حيد الجاكيط و شعل لاكليم .. كيشوف فشريفة بشوفة واضحة و هي حاضياه بنص عين هربانة من نظراتوو و عينيها كيرمشوو و يتعوجوو بوحدهم ..!

حاطة يديها على فخضها كتطبطب بيها .. شدها لها و جرها بالمهل لعندو ..! تا قلبات وجهها لجهتوو بنظرات حنيينة و هادية ..! لعب بابهاموو فمرفقها بلاصة النبض و مد يديه رجع لها شعرها مور وذنيها .. هايم فعينيها .. كيدوز صبعوو بالشوية على حنكها متحسس رطوبيتوو و انفاسوو كتضرب فوجهها و عينيها كيصغارو و يتشدوو بالشوية و هي كتشوف فشفايفوو و تبلع ريقها ..!

هو كيقرب و هي كتقرب حتى تلاقاو فالنص فقبلة شغووفة بدات بحنان و كملات بعنف محبب و لهفة و شوق منهم بجوج .. كيمصلها فشفايفها بالجهد حتى كيتقطع منهم الدم و كتعاودها موراه حتى هي شادة الاتجاه المعاكس ديالوو .. كيغزز فشنايفها و يتلذذ بحلاوتهم .. تا خلاهم منفوخين و حوومر كيضربوو بحال القلب .. و هي كتنهج ..!

طلعات معاها السخونية و تزير عليها الحال .. المونطوو تحل كيبان من تحتوو تيشورط بالكمام ديال الخيط و الشقة د الصدر باينة كتلمع وسطها التعليقة ديال السنسلة المذهبة .. الشعر تخربق و تشنتف و الكلوز ساح و داع ففمها .. تا هبطات المرايا قدامها كتقاد حالتها و تسمع لتنهيدات حكيم لي كيقاد فالسمطة د السروال و يوسعها .. ما كرهش يتكيها تما و إنما للصبر حدوود ..!

حكيم:( ديمارا مكسيري لاحق على خوتوو و صبعوو كيدوزو على كف شريفة بهدوء .. عين مع الطريق و عين معاها .. مبسم و ضاحك ) غنبقاو غير نذوقوو ا مدام ؟ فوقاش نغمسوو فالشهد المعسل ..!

شريفة:( لعبات بعينيها كترمش بيهم بالهداوة حاطة رجل على رجل و مميلاهم جيهتوو فجلسة انثوية ..! ) حتى يوجد باقي الحال .. صبر على خبزتك تطيب ..!

حكيم:( هز حاجبوو كيطنز ) وااايلي على باقي ما طاب .. شوفي و كان ..!

شريفة:( ضحكات بالدموع كتشوف فيه و قالت و هي كتحيد سباطها من رجليها ) المعسل ا كبيدة خاصوو جلسة بقواعدها .. واش غير اجي و طلع التبويقة بيه ههههه ..!

حيدات السباط فخطرة و هزات رجليها جهتوو بتردد .. حتى تكات بظهرها على الباب و حطاتهم فوق فخاضوو قراب من حجرو ..! مصات شنافتها مصغرة عينيها فيه بشوفات كيذوبوو ..!

حكيم:( شاف فرجليها و رجع شاف فيها بغمزة مثقلة ) شنوو خاصوو المعسل ؟

شريفة: خاصو جلسة مشحرة ههه محتاج لي يزندو بجميرات و يسوط عليه حتى تفوح ريحتوو ..!

دوزات صبعها على شنافتها بتبسيمة مبينة فيها سنانها كيلمعوو ثلجة حدا ختها .. بويض ..! تا حسات بيديه شدو لها رجليها .. سلت لها التقاشر و بانوو الصبيعات نقيين و مصبوغين بدم الغزال .. جاي اللون كيشقشق مع بيوضية لحمها و مبين لونها كثر و كثر ..!

ضربها بخفة لقاع رجليها و هرها بجوج صبعان حتى كمشاتهم كتضحك و هو شادهم عندو ..تا خشى يديه تحت السروال و قرصها مغذذ ..!

حكيم: دابا تخلصي على هاذ الفعايل ( لعب بلسانوو ففموو كيتنهد ) و الخلاص ثقيييل و متختخ معاك ..!

شريفة:( ردات بدلع ) كون سبع و كوووولني ..!

بفرحة و سعادة كبيرة تقادات فبلاصتها كتشوف فالطبيعة و الجبال قبالتها .. الخضورية فينما ضرتي و صوت البراطل كيغردو فالشجر كيتسمع تال عندها ..! الغرسات و الجنانات ديال اللوز و الكرموس و التفاح معمرين الدنيا و الداليات د العنب .. مغطيينهم من الفوق بشباكي بويض رقاق على ود التبروري ..!

الطريق كلها بيسط و حجر .. كيتهزو و يتحطوو فيها .. كن كانوو لبن كن تمخضوو .. حتى حبسوو ف تيساعة كبيرة عامرة بالحجر و الرملة و الشجر كبار فالجناب مظللين ..!

الديور مشتتين و مفرقين كلهم فاللون دالياجور بين الاحمر و الاورونج .. مبنيين بالتراب و دايرين بيبان د الحديد مصديين شوية ..! الناس كل واحد فاش مشغول و الدراري كيلعبوو بالحفا فالتراب .. لابسين كبابط ديال الخيط و الصوف واسعين عليهم كيجبدوو فيهم و سراولهم مجرجرين فالارض و هما كيشوفوو فداك الطونوبيلات كاملين ..!

عينيهم خارجين فيهم بدهشة و فرحة و حشمة كلشي مجموع ..! حاضيينهم من بعيد و غير كيشوف فيهم شي حد كيهربوو ..! و سبحان الله على زين فداك الوليدات .. العينين فشي الوان كيسطييو .. الزعورية و السمورية مشتتة و البراءة حاضرة بقوة .. واخا حالتهم مكرفسة و كتعز فالقلب و لكن زينهم كيفتن و باين وسط التشعكيكة د البنات و التقريعة د الدراري و الحوايج باليين و الخنونة لاسقة فوجههم يابسة و التراب معمر رجليهم بسنادل ديال ميكة مقطعيين ..!

شريفة:( شافت فحكيم لي هز نور عندو مكمشة فصدرو و قالت بحنان ) شووف على وليدات شحال كيحمقوو .. هاذو فاش يتنقاو و يلبسوو و يتقادو فين يبانوو ملوك الجمال قدامهم ( تنفسات هَوَا نقي و عينيها على الجبال لي ضايرين بيهم من كل جهة ) الله على جو شحال كيريح ..!

حكيم:( رمى يديه على كتفها غادي بيها للدار ديال عائلتوو ) و يجيو يقولك المغرب ما فيهش المناظر و الزين ..! بلادنا فيها اللب ديال الخيرات و الطبيعة بحال يلا جالس فسويسرا و حسن ..!

شريفة: عزيز عليك التخيام و الجبال ياك ..!

حكيم:( حرك راسوو بالايجاب ) ما خلينا حتى قنت .. فينما نشد كونجي كنهز ساكادو و لاطونط " الخيمة " فوق كتافي و نضرب فالطرقان ..! هاذيك هي الحياة د بصح وسط الجبال و الويدان ضايرين بيك .. كتشوفي الجبال ديال الحجر خارج منهم الما و نتي وسطهم كتعومي و الما مجمد و هابط بحال الشلال كيديك ( بتساؤل ) هاذشي ف تاغية .. عمرك مشيتي لها ؟

شريفة: لا والوو ..!

حكيم: و الكنزرة ؟ ( حركات راسها بالنفي و ضحك كيحك على ذراعها ) ما عندك حياة ا بنتي .. والوو .. الكنزرة جات فالخميسات خارجة عليها شوية و لكن كيوصل ليها الطرونسبور .. واحد المناظر واخا نعيى نوصف لك .. خاصك تشوفي بعينيك .. سولتك حيث واحد الوقت كانت مشهورة بزاايد و كلشي كيمشيلها يخيم فيها .. كيفما واقع دابا فأقشور و البحورة ديال الناظور و الحسيمة ..!

شريفة: ااااه عمري مشيت .. غالبا يلا سافرت كنمشي لمدينة د البحر نشبع حوت و عومان و نرجع صافي .. تا الصحرا عمري وصلت لها .. نتا غتكون زرتيها واقيلة ( حرك راسوو بااه و بحماس قالت ) عاودلي فين مشيتي اخوور ..!

حكيم:( رد كيسرح عينيه فالدنيا و يتكسل ) فكل جهة و طريق .. هاذ البلاصة كتفكرني بتفراوت .. تا هي ضايرين بيها الجبولة و كان اول جبل نطلع ليه هو لكست فتافراوت نيت .. فيها الخير و البركة ما يتشاف .. قبعة نابليون و الصخور الملونة و واحد القلعة معروفة و المخازن على الجهد ..!

شريفة:( ردات بابتسامة ) خاصك ترجع تديني معاك .. نشوف هاذشي .. شوقتيني و الله ..!

وقفوو حدا دار ما كتختالفش على الديور الثانيين .. دق حكيم فالباب د الحديد .. تا خرجات مراة كبيرة ظهرها مقوس شوية .. دايرة وشم فجبهتها و ذقنها من التحت .. لابسة بينوار سخون فالغوز و عاقدة فولار على راسها من القدام .. كيبان شوية من نواظرها فيهم الشيب خارج ..!

غير شافت حكيم ضحكات من الوذن تال للوذن فاتحة يديها بجوج و كتهضر بالسوسية مسرحة .. كترحب و تعاود الفرحة باينة من عينيها لي دمعوو كاع ..! مد حكيم نور لشريفة و سلم عليها كيبوس فيديها و راسها و هي كترضي عليه ..!

تحت نظرات شريفة لي كتشوووف فملامحها و تجاعيدها لي كيعاودو حكايات من قهر الزمان و من الكفاح ..! تا حط يدو على ظهرها و قربها لجهتوو كيعرفهم و الهضرة كلها بالسوسية ..! عرفاتها عمة باه الله يرحموو و عرفاتها العمة بلي مراتوو و هاذيك بنتوو ..!

باستلها شريفة تا هي راسها و يديها مخلياها كترضي عليها و ترحب بيهم يدخلوو للداخل .. كتعيط لبناتها و ولادها و لجد حكيم لي مزال فالحياة و لكن كبر و ما بقاش كيشوف مزيان و عيى شوية فصحتوو .. خلطوو عليهم الدراري و حبيبة و البقية .. مجموعين على الضحك و الهضرة ما كاينة غير السوسية كتشير .. كلشي كيفهمها من غير حسام و ملاك و بسمة أما حتى اسية بقات محافضة عليها مع شريفة و تا مع إلياس و عائلتوو لي تا هما سواسة و فبزاف د المرات كيهضرو غير بيها ..!

عمة باهم عندها ثلاثة د البنات كلهم مزوجين و بولادهم .. و عاد ولادها الرجال لي تا هما بديورهم .. ساكنين قراب من تما .. من غير الصغير فيهم لي باقي جالس مع جدو بلا زواج .. كيرعى الكسيبة و حاضي رزقوو و رزق عائلتوو ..! كلشي تجمع عند الجد ملمومين فبيت مفرش بالزرابي المنسوجين باليد و الهياضر ديال الخرفان و المعيز ..! طبلة صغيرة د الخشب مضورة فوسط البيت و شرجم عالي كيدخل منوو الهوا بارد و الشعى د الشمش لي بدات كتغرب ..!

ناض حكيم و خوتوو مع ولاد العمة للطونوبيلات كيهبطوو السلعة و يقطعوو فالسكوتش كيحلوو الكراطن و لي كونطر بوند الكبار و يجردو الغطاوات لي كل وحدة مخشية فميكة جاية على قدها قاسحة كتشد بالسنسلة ..!

خلاو عائلتهم هي اللخرى و فرقوو الصدقة على الديور الثانيين .. من موونة د الكوزينة جامعة الطحين و الزيت و و .. لي يحتاجوو و تعاونهم شوية و الغطاوات و الكبابط د الصوف دافيين .. تيشورطات و سراول و مونطويات و جواكط كبار و سخان ..!

شي خدام كيفرق شي مشى للكوري جبد جوج حوالة مضخمين .. في ساع تذبحوو و تسلخوو معلقيين و بداو كيوجدو للشوا و الريحة د الفاخر كتعطعط .. كلشي داير يديه كيرون من غير شريفة لي غير عرفوها عروسة ما خلاوهاش تحرك حتى كاس من بلاصتوو .. كلشي كيوصل لعندها بين يديها .. مجلسة نور بين رجليها كتقفزها و تضحك معاها و هي كترد عليها و توغوغ و تلعب بيديها و رجليها ناشطة ..!

ملاك: شنوو قالوو لك ؟ من قبيلة و انا كنسمع تمغرا ما تمغرا ما فهمتش ؟

شريفة:( تبسمات و قالت ) عرفوني عروسة و يالاه تزوجت انا و خوك و حلفوو تا يديرولي العرس هنا و يفرحوو بيا .. تمغرا هي عرس ..! ( رمشات فيها شادة الضحكة ) فاش تشوفي خوك علميه بلي راه حلفوو ما يطلقوني و ما يشوفني عريسي تا يسالي العرس و يديرولي العادة ..! قولوو قالت لك شريفة شدات مدام .. المؤمن مصاب و الصبر مفتاح الفرج ههههههه

ضحكات ملاك حتى شبعات و خرجات تا هي للتيساعة فين كاينين خوتها تا شافت حكيم هاز ربعة د الكراطن د بيمويات و دانونات كيفرق على الدراري الصغار و هما مجموعين عليه كيبوسوو فيه .. عاطيهم الخاطر و عزاز عليه الدراري صغار .. شافها و شيرلها للداخل تعيط لشريفة .. و تا هي ما عطلاتوش مشات كتجري عندها و قالت

ملاك: خويا قالك تكلميلوو .. عتقي راجلك راه ضايرين بيه كل وحدة كتبوس من جهة ..!

جمعات شريفة حجبانها بابتسامة و وقفات كتنفض حوايجها هازة معاها نور .. تا خرجات لعندو .. ضحكات من المنظر و بدات كتمد لهم تا هي .. تا بقات كارطونة وحدة عامرة فيديه .. خدات منها بيموو و دانون عطاتهم لوو و شدات الكارطونة عندها ..!

شريفة: ها خلاصك الثقيل و المتختخ .. شبع شكالط و حلاوي و برد على راسك تا يجيك الفرج ( حنات عينيها لنور ) عميتوو حلفات علينا و حكمات المحكمة ياك ا بجغوطة ..!

فرشوو مور الدار فجليسة تما مغطية بالقزدير من الفوق على ود البرد و التبريرو لي كيطيح مرة مرة ..! الربيع ضاير بالقنت و بدا كيتبدل ليه اللون من الاخضر للصفر ..! مفرشين فالارض كواش قدام و سخان باش ما تطلعش معاهم البرودة ..!

ربعة د الطبالي مفرقين على كل مجمع .. يالاه باش تكافاو فالجلسة ..! ريحة الفاخر و الشوا عاطية و اتاي منعنع كتكبوو العمة هازة البراد حتال السما .. كينزل برزتوو فالكاس مكشكش .. و التقلية مع الخل مصبوبة فالغطران ..!

نور جالسة بين شريفة و حبيبة .. مضورين بيها المخاذ مكاليينها .. باقي ما كتقدر تجلس بوحدها و داك الراس غير غادي جاي معاها كتلعب بيه تا كتكون غتجي عليه و ترجع اللور .. فلخر هزاتها شريفة عندها .. جلساتها فحجرها كتفركل برجليها و تضرب فوق الطبلة مرة مرة .. عينيها ضاحكين و حنيكاتها مبغجين غير د البوسان .. تضور تضور و تبوسها حتى بكاتها و طلقات زواكتها ..!

شريفة:( كضحك عليها و تسكتها و والوو لا بغات ) شكون تعدا على بنتي شكوون هاذ الكحلة الخايبة .. عيشة بواسة لي كلاتها .. نضربووها ا نور نعطيوها داااه ..!

حبيبة:( ضحكات كتطبطب بيديها على شريفة ) هاذ المشة هاذي كتفشش علينا ..! عطيها بطيعة فزكيها لها فالمرقة تاكلها ..!

شريفة:( ردات بالايجاب ) واخا ..! بدات كتاكل ؟

حبيبة: وا تبارك الله عندها خمس شهور .. ضروري ما كنعاونوها بخضيرة مطحونة و نذوقوها من الماكلة تربي الصحة ديالها ياك ا الميمة يحفضك ليا ..!

شريفة:( حطات صبعها تحت فمها كتوغوغ معاها ) ا غووو غووو .. قولي لي غووو ..! ( ضحكات فاش عاوداتها من موراها و كلها كتهز باغى تنقز بالفرحة و اليدين كيطبلوو مع بعضياتهم ..! تا باستها بالجهد فعنقها و قالت ) هاذ الفرماشة هاذي غناكلها ..!

كملوو عشاهم بالهضرة و النشاط .. وكلوو معاهم حتى نور و عطاوها رضاعتها مكمشة عليها بيديها و رجليها ناعسة فحجر شريفة كترضعها و هما مدوزينها بكاس د اتاي جابدين المواضيع الجديدة و الحايلة ..! تا كملات و حيدولها الرضاعة و بدات كتعنتت و تدفع باغى تطلق منها ..! و غير خلاتها هبطات كتحبوو هاربة كتضحك .. تا وصلات للطبلة فين جالس حكيم ..!

ما حسات عليه تا خطفها من الارض و لاحها فالسما و رجع شدها خاشي راسوو فكرشها كيهرها و هي كتمووت بالضحك و كتزيد تنقز و تهز باغاه يعاودها لها و لي جا على فمها كتطلقوو .. تا حاجة ما مفهومة و باقي الحروف ما كيخرجولها من غير التوغويغ لي داير لهم لومبيونص و هو كيقفزها و يضحك معاها .. غادية من يد ليد و كلشي فرحان بيها و هي صوت ضحكها كيتسمع منين لين تا كيقولوو قلبها غيسكت .. واحد البراءة و واحد الضحكة مكركبة كتفاجي على القلب ..!

بقات هكاك حتى نعسات و تفرق المجمع .. العيالات بقاو فالدار د الجد و الرجال مشاو للدار الثانية د الولاد غير حداهم تما ..! فرشولهم و ما خلاو حتى حاجة تنقص لهم ..! و فالدار فين شريفة عاد تجمعوو على الغنى و الشطيح ..!

حزموو البنات على نصهم كيشطحوو و الدقان و التطبال على الجهد ..! كلشي بالبيجامات و الفراش مفرشينوو واجد .. ناعسة فيه غير نور .. اما هما دايرين دائرة على العمة لي جبدات الحنة و مهراز قديم كتدقها باليد معاونين عليها و طالقة حلقها بموال سوسي ثقيييل ..! و الليلة بعنوان الأهازيج الامازيغية لي كيحمقوو شريفة و حافضة شحال من واحد فيهم و تا هي نحنحات و غمضات عينيها كترد على العمة بداك البحة لي كتبورش فصوتها و الاحساس لي كيخرج من اعماقها .. ما كتحسيهش صوت طالع من حلقها و صافي .. لا كتحسي بقلبها و مشاعرها كلهم حاطاهم فداك التحفة الأمازيغية ..!

تطحنات الصقلة كاملة على اليد .. من الحنة .. الخزامة .. الورد .. الريحان .. الحلبة .. الحمص .. الفول و العكر الفاسي ..! خلطوو كلشي و عراو شريفة فحمام بلدي سخوون دايرينوو فقلب الدار بحال ديال الزنقة تا من البرمة بانيينها ..! طلاو لها كلشي فلحمها و جابوو جوج بيضات بلديين فقاوهم فوق راسها خلخلوهم فشعرها مزيان مع زيت بلدية بلا ملحة و بداو كيدهنوو لها فالحنة د الشعر لي ما تبدلش لها اللون .. مطحونة بقوامها لي ما خلاوش ريحتها قوية ..!

يتبع...

‎