عرس الذيب الجزء 30

نور:( جلسات على فخض حسام كيهزهزها و هي كتلعب فيديه و حكيم حداهم كيتناقشوو بيناتهم .. تا هزات يديها عطاتوو الصبع تا هي كتلعب بيه و تضورو عجباتها الحركة و جاتها مسلية و بصوت مسموع قالت ) أموو سوسو ماااار " عموو حسام حمااار "

شافوو فيها بجوج .. ما فهموش شنوو قصدات ب مار و لكن الصبع باين و واضح وضوح الشمس ..! نحنح حكيم و قال بهدوء و ابتسامة ..!

حكيم: نور غني لعمك حسام لبويزي لي حافضة ..! ( كمل بتفسير ) شريفة كتمشي تدير اليوغا مرة مرة و كتدي معاها نور كيشدوها تا هي كتلعب مع لي قدها و كيحفضوهم ..!

حسام:( رد هاز راسوو بملامح انبهار لنور ) اووه هاذشي زوييين .. سمعيني ا نور ..!

ضحكات حشمانة و الحنيكات مطبزين حوومر و وقفات كتحرك فنصها و تغني لهم بالفرنسية و هضرتها كلها مخربقة مزال ما مفهومة مزيان ..! بقاو حتى تلفوها و نسات شنوو سمعات من عند ملاك ..! لا حكيم لا حسام بغاو يسولوها و يبحثوو فيها .. باش ما تدخلش لبالها بلي شي حاجة وااااو و ما دام هضرو عليها و دارو رد فعل .. إلا و غتبغي تكتاشف كثر و كثر ..!

خلى تا يهضر مع شريفة و يفهم بعدا ..! واخا بجوجهم كينتابهوو بزايد لكلامهم و حركاتهم قدامها باش ما تلقطش شي حاجة خايبة منهم و لا من المحيط لي ضاير بيها و لي مختاريينوو بعناية ..!

شريفة:( سرسباتها هبطات و قالت بعصبية لملاك ) واش نتي مريييضة ؟ كتهضري قدام البنت هاكا ؟ و هي خاصها غير ما تلقط ..! جاب الله ما فهمات والوو و ما انتابهاتش لك ..!

ملاك: وا صافي راه ما دات ما جابت ( عقدات حجبانها غتطرطق ) علاش جا اليوم ؟ ياك قال هاذ الليلة مشغول تال غذا و يلحق علينا مع الدراري .. و لا باغي غير يفقصني و صافي ..!

شريفة:( عصباااااتها بقالها شوية و تصعر عليها ) عرفتي شنوو ؟ فرعتيلي المخ د المخيخ د راسي ..! ما بقيتيش مرتاحة مع الزمر طلقيه و هنينا ..! فاش كيدخل الشك بين جوج صافي ما كيبقى لهم فين يزيدو .. ما كاين زواج بلا ثقة ..! ( ساطت النفس ) هضري معاه سوا يشرحلك سوا تفضييو هاذ البعر كاااامل و ترتاحوو ..!

ملاك:( يالاه جات تجاوب و سمعات التعياط ) حكيم هذا لي كيعيط ياك ؟

شريفة: وي ..! يالاه نهبطوو هذا هو وقت الغذا ..! الخبز جاه الجوووع ..!

شدات البيت و نزلوو بجوج بيهم .. لقاو لالة فاطمة المراة لي كانت فالفيرمة القديمة كتحط الغذا .. توفى راجلها و باعوو داك الفيرمة و جابوها لعندهم كتعاون شريفة شوية ..!

تجمعوو كاملين و ملاك متبعة نور بعينيها حمقاتها و هي جالسة حدا شريفة دايرالها منديل مشدود مع عنقها و الثاني على رجليها باش ما توسخش ..! طبسيل صغير ديالها حداها و الخبز كتقطعولها ماماها طريفات صغار و الماكلة تا هي نفس الشي ..!

مخلياها تاكل بيديها و منظمة كتحاول ما توسخش و يلا قاست راسها كتقولها لشريفة تمسحلها و هي موسعة داك العينين الخوضر كتمصمص فشنافتها التحتية لي ديما مسحوقة ففمها .. عندها الفوقانية كبر من التحتانية و ديما خاشياها ففمها كتعض و تجبد فيها كتجيها ساهلة ..!

كملوو و تجمعات الدنيا عاد طلعات شريفة مع نور لبيتها يديرو القيلولة و يرتاحوو شوية .. مخلية حكيم مع ختوو و حسام .. عطاهم شالي يجلسوو فيه ياخذو راحتهم و يلا احتاجوو شي حاجة يعيطوو للاستقبال و يقوموو معاهم بالواجب ..! سبقاتوو ملاك لداخل و بقى هو موخر مع حكيم لي قال

حكيم: كلشي هو هذاك ؟ ( حرك حاجبوو لبعيد ) الأمور بيناتكم هانية ..!؟

حسام:( رد بتنهيدة ) وااا شنوو غنقولك ا خاي ..! ( حك نيفوو و كمل ) ما غنجيبوهاش للبر أنا و ياها شحال ما بقينا ..! هضر معاها نتا و شوف واش تسمع منك .. أنا يلا زدت هضرت غنضرب ( وسع حكيم عينوو فيه بتعجب تا قال ) اللهم خليني مبدل ساعة باخرى باش ما نضيعهاش معاك نتا و الخوت ..!

حكيم: بلاتي .. بلاتي ..! فهمني من اللول شنوو واقع ..؟ باش نحكم ..! ( سرح عينيه ) زيد نتحركوو من هنا ..!

تمشى معاه بهدوء .. حكيم ساكت خاشي يديه فجيابوو و حسام حداه كل شوية كيتنهد كيجبد فشعرو ..! مدة صمت طويييلة من جهتوو .. ما عارفش باش غيبدا و باش غيسالي ..! باغي حكيم يتدخل و لكن فنفس الوقت ما باغيش يكحلها على ختوو معاه كثر ما هي مكفسة بيناتهم " حكيم و ملاك " ..!

موالف كيعاودلوو مشاكيلوو ديما و كيلقاو لهم حل بجوج .. فينما يوحل كيرجعلوو و لكن دابا شنوو غيقول ؟ بعد تفكير نطق و لي ليها ليها .. كيشوف فمعيزات صغار ضاير بيهم السياج ..!

حسام: كان عندك الصح فاش قلتي ما غنتفاهموش و ماشي ديال بعضياتنا .. كانوو عينينا معميين شحال هاذي ( تنهد بقوة و بصراحة كمل ) عيييت كنفكر و بانلي الطلاق هو الحل ..! ( شاف فيه و حكيم كيسمعلوو بجدية ) مبعد عليها باش ما نحطش يدي فيها و نندم من بعد .. ما باغيش نخسر عشرتنا لا بالضرب لا بالطلاق ..!

حكيم:( رد جامع حجبانوو بجدية ) ما غتخسرهاش .. شنوو المشكل ؟

حسام:( رد بحيرة ) نتا عارف ما حدي مزال ما طلعت كراد .. عندي ديبلاصمون بزايد و بعد المرات انا كنتطوع و نمشي باش تتزاد لي فالضوسي .. هاذشي معروف و حتى نتا كنتي كتديرها ..!

حكيم: معلووم ..!

حسام: الخدمة مزيرة و الوقت لي كيبقى لي كنبغي ندوزو فالدار مرتاح ..! و فلخر كنلقى كلشي مقلوب تا حاجة ما فبلاصتها .. الروينة و الوسخ معفن .. لا ماكلة لا والوو و فاش كنهضر معاها كنتسمى حكار و ما جبتهاش خدامة عندي ..!

حكيم:( حك حاجبوو فصمت كيسمع )

حسام: الواليدة كتقيل تعيط تسول عليها و تتشكى ما كتمشي عندها ما كتقلب فيها ..! و نهار كتجي لعندي للدار كتبدا تمعني عليها .. الضياف خاصهم يعلموو قبل ما يجييو و كدا ..!

حكيم:( هز حاجبوو بتساؤل ) هاذشي لي كاين ؟

حسام: لا ..! هضرت معاها مرارا على هاذ الفعايل و فلخر كتقلبها غضييب و ما كتبقاش تتصنت لي فخطرة و ديما شاكة فيا ندير لي درت .. وحلت معاها و ما عرفت كي ندير نفهمها ..! جاو الامتحانات و تزيرات ما بقيتش كنحكر باش ما نتسماش أنا لي سقطتها ..! و هي كل مرة مع واحد جايباه تال باب الدار .. قالك كيقراو معاها و كيوجدو .. سرطناها مرة و عشرة و لكن بزاااف ( تزيرو ملامحوو ) هضرت معاها تبدل لباسها و تتحجب .. مراتي ما نقبلش عباد الله يتزللو عليها ..!

حكيم:( رد ببرود ) و ما بغاتش ..!

حسام: ما بغاتش و غير نوضناها بيناتنا يلا أنا كنشوف ماشي كلشي زلال بحالي ..! خليتها و سافرت ديبلاصمون فالخدمة و هي كملات امتحاناتها و جلسات كتسنى النتيجة ..! و منين رجعت قريت كونفيرصاسيون ديالها هي و واحد كوري ..!

حكيم:( وسع عينيه و عقد حجبانوو ) نعام !!

حسام: مسمية عليه أوبا .. يوميا بالهضرة ليل نهار .. مسيفطلها التصاور ديال دارو خدام فيها بالاصلاحات و تصاورو هو نيت .. ها هو فالخدمة ها هو فلاصال كيتريني .. و كبير ماشي شي واحد صغير .. تكون عندو 40 - 45 عام ..! ( بعصبية ) مراتي نخليها فدارها معززة مكرمة و انا كنضرب عليها تمارة و هي كتلعب مور ظهري ..! أنا كنحفر بحال الفاس و هي عاطياها ل لي زابيل فيديو مع الز*** ؟؟ تا من الأفلام تفرجوو فيهم مجموعين خالقينها ( باستهزاء ) و شكووون بحالهم ..!

حكيم:( سكت عاقد حجبانوو كيغزز فسنانوو .. عينيه كحالوو على ملاك )

حسام: و فاش شافتني هاز تيليفونها صعرات كتغوت و كن ماشي على وجهك .. كن ضربتها تا شافت النجوم و طلقتها فالبلاصة ( بتنهيدة ) و لكن بعدت و عطيتها التيساع حتى نفكر مزيان .. و الكورية " ماري " غضبانة لاش نغوت عليها كتتسنى نجي نصالحها و نطلب السماحة ..! ( بعد صمت ) شنوو بانلك فهاذشي ؟

حكيم:( رد بجدية كيضرب على كتفوو ) خليك بعيد انا غنتكلف بيها و لي بانلك أنا معاك فيه ..! بلاصتك نذبح مها بموس حافي نخليها كتخرخر و ما نبردش ..! شنوو بقى مزال فوق هاذشي ..؟ ( باستهزاء ) تدخلوو عليك لقلب الدار ..! و لاهيلا مخيرة كاع ..! ( قلب وجهوو كيتمتم )

حسام:( وسع يديه و قال ) ها نتا هضرتي ..! نهار تزوجتها حلفت لك عمري نغذرها و نخونها .. و نحطها فقلب عيني و لكن بفعايلها هرسات كلشي و عماتني ..! ما بقى كيبانلي فين نرجع مزال .. غير نتا و خالتي حبيبة و الدراري لي بين عيني هاذ الساعة ..!

رجعوو بجوج و حكيم عاقد حجبانوو معصب و مزير قدام حسام .. كتبقى ختوو محسوبة عليه و ما رضاش نهائيا على شنوو دارت .. راها خياااانة يشرب من دمها عليها ..! كي دار صبر حسام عليها ما عرفش ..!

لي سكت فخطرة ما بقاش هضر غير كيتنهد و كيفكر تا قربوو للشالي فين كاينة و باقتناع قال ..!

حسام: خلي هاذ الليلة تدوز نهضر معاها أنا و غذا يلا بغيتي نتا تتدخل عاد تدخل ..! نشووف شنوو غتقول بعدا ..!

حكيم:( حرك عينيه بالايجاب ) واخا لي بان لك ..! ( شاف فالساعة فيديه .. كانت العشية و المغرب قربات توذن .. الوقت داهم بين صمت و هضرة و حرقة من طرفهم بجوج ) خليك ترتاح هاذ النهار .. غنسيفط لكم العشا للشالي عندكم .. يلا احتاجيتي شي حاجة غير عيط للاستقبال فالتيليفون .. يقضييو لك ..!

حسام:( زير على كتافوو ) واخا الله يحفضك ..!

حكيم:( تنهد و حرك راسوو بقلة حيلة و بنبرة مجروحة و متأسفة قال ) سمحلنا ..!

حسام:( حرك راسوو بالنفي ) نتا لي سمحلنا من اللول هضرتي و ما سمعناش لك .. كن كان عندنا العقل كن قبلنا بهضرتك لا أنا لا ختك و جلس كل واحد بوحدو معاك و فهم علاش معارض .. و لكن ...! المكتاب ..!

دق حسام تا فتحاتلوو ملاك الباب و دخل ..! و حكيم شاف فيها بنظرة د القتيييلة تا تكمشات و زاد من تما على رجليه علمهم يسيفطولهم العشا للشالي و كمل هو للفيلا ..! فتح الباب بالسوارت و دخل شادها عليهم ..! طالع كيحرك راسوو بشكل دائري و كيطلق عضلاتوو لي تشنجوو بلي سمع ..!

دخل لبيتهم و تبسموو عينيه ..! بانتلوو شريفة فبيت الصلاة لي دايرينوو مقنت .. صغيير و مثول ..! طالقة السجادة و كتصلي باسدال بيض مغطيها كاملة و نور حداها تا هي مغطية شعرها بفولار و كتقلدها و مرة مرة تضور راسها للجنب و تضحك فرحانة تا شافت باباها و نقزات لعندو كتجري .. هزها و قال بكسل

حكيم: شنوو كتديرو بلا بيا همم ..!؟

نور:( ردات بتلعثم ) انا و مامي .. الله أكبر ..!

تبسم معاها و عينيه على شريفة ..! تا مشى بالوو لأول مرة غتصلي فيا و تبدا تقتانع بالحجاب من بعد ما كلحاتوو و عصباتوو فلول ..!

***** فلاش باك 🔥 *****

دخل للحمام توضى و خرج كيهبط فكماموو و يمسح الما من على وجهوو و شعرو ..! و هي هازة نور عندها كتمص فرضاعتها كتراري بيها باش تنعس .. عين مع المشة و عين معاه ..!

جاها غريييب حكيم يثوب و يبدا يصلي ..! يمكن هي كانت مريضة و وصلات تال للموت و تا هو نفس الشي ..! فهمات بلي الحرام ما حدو فين و ندمات و لكن هنا بقى الحد تفكيرها .. عكسوو لي بكى عليها كاع و صلى لساعات طوال كيتمنى تبرا و ترجعلوو ..! شاف الحكمة د الله من لي دوزو و شاف عظمتوو سبحانه فاش نقزاتها و نجحولها العمليات ..!

لقى راحتوو لي شحال و هو كيقلب عليها ..! ما ارتاح فحتى حاجة كيديرها ..! صحتوو من جهة و نور لي مريضة و خاصها عمليات و هي صغييرة باقي ما كتعرف والوو غير ملاك محطوط ..! شريفة لي معلقة على شعرة بين الحياة و الموت ..! الخدمة لي مزيرة عليه .. القضية ديالها و الكوارث لي بانوو فيها .. أسية و الريسطوو و المشاريع ديالوو لي خاص يوقف عليهم .. أيوب و شنوو طرا معاه و شريفة و الحالة لي وصلات ليها كتقطع فالقلب ..! مسؤولية خوتوو و زيد و زيد ..!

كن كان شي واحد من غيرو .. غيسمح فكلشي و يزيد خلفة و لا تا هو غيقول عييت و يحط الحمل كامل للأرض .. كيبقى غير انسان و عندو حد ديال التحمل و إلا غيحماق ..! و لكن هاذشي كامل عطاه صورة واضحة على شنوو خاص يدير .. و على الحرام لي خاصوو يصفيه كامل ..! رجع أب و مسؤول على بذرة صغيرة خاصوو يزرعها فتربة مزيانة و يوفر لها الظروف المناسبة باش تزهر ..! نور ماشي اسم على غير مسمى .. العكس تماما .. ضوات لوو حياتوو فالوقت لي كاع البيبان تشدو عليه .. نوراتلوو طريقوو وسط العتمة و بسبابها خدا المبادرة لشحال من حاجة عمرو كان كيتوقع غيجي شي نهار و يديرها .. على ود أي مخلوق كيفما كان ..!

حكيم:( شاف فيها و قال كيحرك راسوو ) شريفة دخلي توضاي غنتسناك نصلييو ( هز حاجبوو فيها بقطع ) يالاه نوضي ..!

شافت تا عيات و وقفات مخلية نور مكالية بالمخاذ باش ما تطيحش .. توضات و خرجات عندو جبدات قميص مرخوف على طولتوو .. قادات فولارها و وقفات موراه فين طالق السجادات تا قال كيشوف فرجليها ..!

حكيم: لبسي التقاشر غطيهم ..!

شريفة: علاش ضروري ؟

حرك راسوو بالايجاب تا مشات لبساتهم و هو متبعها بجدية كيكرر شنوو غتقول فالسجود و الركوع و الشهادة و التحية ..! غيبقاو السور تتبع معاه شنوو كيقرا ..!

شريفة:( ردات عاقدة حجبانها فيه ) راني ماشي يهو٠٠٠٠٠&&دية ..! فالابتدائي قراونا كيفاش نصلييو و كنا كنطبقوو فالقسم .. الوضوء و الصلاة ..! عاقلة مزيان و عمري ننسى كيفاش .. كليت عليها العصا تا شبعت باش تشداتلي فاللخر و بقات لاسقة ..!

تبسم كيحرك فراسوو و من بعدها تقاد قدامها و هي موراه .. صلى بيها مثقل بشوية عليه و عاطي لكل حاجة حقها كيحاول يتخشع ..! و ختم بالدعاء ليها ..!

حكيم:

《 اللهم إني أسألك أن تجعل زوجتي خير سندًا لي وأن تجعلها متمسكة بعشرتي،

وأن تجعلها عوناً لي على طاعتك، وأن تجعلني عوناً لها على طاعتك، واجعلها لي زوجة صالحة.

اللهم حببني إلى قلب زوجتي وجمّلني في عينها، واجعلنا هداة مهتدين ومن عبادك الصالحين.

اللهم اجمع بيني وبين زوجتي بخير، وآلف بين قلوبنا وارزقنا الرضا وراحة البال وأبعد عنا الهم والكسل والحزن.

اللهم اجعلني لها خير الزوج والأب والأخ واجعلها لي خير زوجة وأم وأخت وراحة

من كل شر، اللهم اشرح صدر زوجتي للإيمان.

اللهم إني أسألك أن ترزق زوجتي مع كل نبضة قلب وطرفة عين أمناً وأماناً وعفواً وسلاماً وصحة وسعادة وثباتاً على الحق والطاعة.

اللهم اجعلني لزوجتي أباً في الحنان، وأخاً في الطاعة، واجعلها لي أماً في الحنان، وأختاً في الطاعة.

اللهم اهدِ زوجتي للإيمان وثبتها عليه، اللهم اجعلها من عبادك الصالحين الملتزمين

بطاعتك واتباع سنة نبيك محمد صلى الله عليه وسلم 》

ضار عندها مربع يديه كيشوف فيها بالحجاب مستورة و وجهها مزنك ..! شد فيديها بهدوء و قالت ..!

شريفة: ما حسيت بواااالوو ا حكيم ..! علاش كيقولك الواحد فاش كيصلي كتجيه الرجفة و يتخشع و يحس بالراحة ..! أنا راه ما حسيت بحتى حاجة من غير عييت قنطانة .. باغية غير نكمل و نور مورانا كنسمع صوتها خايفة تطيح ..!

حكيم:( قاد الجلسة و قال ) دابا نتي العام الجاي غتدفعي لكطريام حر تدوزيه ..! ( بخاطر واسع كمل ) غتقراي الماط ياك ؟ ( هزات راسها بااه ) اووك ..! الدروس فلول أول مرة تشوفيهم .. غيجيوك مألوفين لشي حاجة قريتيها شحااال هاذي و لكن فاش غتجي تطبقي بديكشي لي نتي عارفة غتوحلي و يبدا يبان لك غير الضباب .. غتشوفي مع البروف التصحيح و غتنقلي لدفترك .. غير كتكوبيي عندك و تعاودي من موراه و نتي فيك النعاس بالملل ..!

شريفة:( فهمات لاش باغي يوصل ) بحالي دابا أنا و ياك ..!

حكيم:( هز راسوو بهدوء ) غتتعاود هاذ القضية مرة و جوج .. غيبدا يبانلك راسك مكللللخة و عقلك ثقيل ..! بلاصة تبقاي كتكتبي بلا ما تفهمي .. غتهزي كتابك و تقراي الدروس .. غتقيدي العلاقات المهمة لي كيتعاودو بزاف فورقة و تبداي تحاولي تفهمي البروف كيفاش كيفكر باش حتى نتي تفكري بحالوو باش تخرجي تمارنك ..! و الحاجة لي ما فهمتيهاش و جاتك صعيبة غتقلبي على طريقتها بوحدها فيوتيب و لا كتوبة د الخدمة ..! حتى غتبداي تعرفي تبداي و توحلي فالوسط و من بعد خطوة بخطوة غتعرفي تحلي كلشي بوحدك ..! لي كان بحال الضبابة فعينيك غيتفهم و يبانلك سااااهل ..! و ديكشي لي صعيب و كرهتيه و حتى نفرتيه و بعدتي عليه .. منين شديتيه بالشوية و فككتيه كتحاولي تفهمي كل حاجة بوحدها غتقدرتي تنجحي ..! باش فلخر تولي كتسناي الساعة لي غتخدمي فيها الماط باش تطبقي ديكشي و يجيك بحال الما بين يديك و نتي كتصوبي و نتي مستمتعة و باغى تعرفي كثر و تتعمقي ..! واخا حتى ديكشي فلول غيكرهك و ما يعجبكش و لكن من بعد .. غتلقاي راسك فيه و نتي مرتااااحة ..!

حكيم:( طبطب على يديها ) هاذشي غادي تديريه حتى فدينك ..! حتى حاجة ما كتجي دقة ..! الاسلام نزل بالتدريج و حتى حنا غنشدوه بالتدريج ..! نفهموو و نعرفوو لي غافلين عليه ..! الكتاب د الدروس ديالك هو القرآن .. هزيه واخا غير مرة فالنهار لربع ساعة .. قراي و حاولي تفهمي كل آية بوحدها و لي ما فهمتيهش قيديه و قلبي على الشرح ديالوو .. غتلقاي راسك دخلتي لبحر زوين غيعجبك و نتي كتسمعي قصص الأنبياء و تاخذي منهم العبر و تصححي شحال من حاجة غالطة فراسك ..!

شريفة:( سكتات كتشوف فيه و ترمش و حناكها عاد ما زادو تزنكوو كثر ما عرفاتوو صهد و لا رهبة و لا حشمة ) الصمت

حكيم: لي كيصلي لأول مرة و يقولك بكى و جاتوو الرعشة .. اما من عند الله و اما .. غالبا كذاب و عايش فالوهم و صافي ..! الراحة و الخشوع كتجي مع الوقت فاش تتعمقي و تقراي الكتوبة ..! المكتب فيه شحال من واحد .. جربي تبداي و تشوفي ..!

شريفة: ااه شفت قبيلة " لأنك الله "

حكيم:( رد بهدوء ) بدايه خمسة د الصفحات كل ليلة بحال الما غيجيوك ..! ( وقف كيطلق عظاموو جاب القرآن و وراق بويض فين كيكتب و يقاد البحث قبل ما يطابيه فالبيسي .. مع ستيلوو ..! فتح فسورة الفاتحة و مدولها ) أنبدا أنا و ياك هاذ النهار .. يالاه قراي ..!

رمشات عينيها بتردد و قرات السورة بسلاسة و منها بدات سورة البقرة لي تلوى لسانها و تلعثم فيها .. ما موالفاش بالخط العثماني و حتى الشكل كتغلط فيه شحال من مرة .. جاها صعيب و ما فهماتش شحال من حاجة ..! و لكن لقات حكيم لي سبقها و مدة و هو كيقلب باغي يرصي على البر .. كيصحح لها و يشرحلها .. و بعد المرات كيقولها تا انا ما فهمتش ..! باش يخليها تتحمس و تقلب بنفسها على الشرح فالتيليفون و الكتوبة ..!

هاذشي خدا منوو وقت و عطاها مساحة تاخذ راحتها فيها .. ما هبطش عليها دقة وحدة .. و بلاصة ينفرها و يكرهها بالحرام و العقاب و النار .. سبق لها الجنة و النور و الجزاء .. يلا تحجبات و مشات فالطريق المستقيم ها شنوو المكافأة لي غتلقاها فالمقابل ..! و هنا النظرة ديالها تبدلات تماما و حتى يلا تذكر العقاب كتلقى بلي الجزاء اكبر بكثيير و يستاحق العناء .. و بلي الله غفور رحيم .. الصورة تبدلات و مزالة كتتبدل فعينيها و تصلح .. مقتانعة بلي هي مؤمنة و قلبها نقي لأنوو فينما كتوحل و لا كتبغي شي حاجة كتذكر الله و كتفكرو حتى فأسوء أيام حياتها و هاذشي عندو معنى واحد .. روحها مرتابطة بيه كان خاصها غير درس و شكون يشد فيديها و يمشي معاها خطوة خطوة بحال بيبي صغير عاد كيتعلم يتمشى ..! شدات فصلاتها بسباب حكيم لي معاونها و كينبهها فينما تتهاون و حتى الحجاب اقتانعات بيه و عارفة بعيد على الدين حكيم شحال ما بقى غيديرولها .. كيحكر على اللباس و المكياج و ما كانتش كتعجبوو شحال من حاجة كتديرها غير كيتسناها تبرى لا غير ..!

شريفة:( دخلات عندو للمكتب و قالت بدهشة ) عرفتي قريت واحد الحاجة ..! قالك .. عمر بن الخطاب رضي الله عنه ‏فاش شاف شي ناس جالسين حدا العافية .. عيط عليهم و قال " يا أهل الضوء " و ما قالش " يا أهل النار " باش ما يجرحهمش ..! و البشر شحال كيجرحوو فبعضياتهم بالسبان من السمطة للتحت و مفتاخرين عاجبنا راسنا ردينا دقتنا و قهرنا لي قهرنا ..!

حكيم:( رد بالايجاب ) ‏و فايت حتى انا قريت .. الإمام الغزالي .. جا عندو راجل سولوو .. ما حكم تارك الصلاة ؟ .. رد عليه .. حُكمه أن نأخذه معنا إلى المسجد ..! ماشي نوضوو نسبوه و نرجموه نزيدو نحقدوه ..! كاين شي حد ينفر و يكره دين بحال ديالنا ؟ و بوابوو ديما مفتوحين للتوبة ..!

شريفة:( حركات راسها بالنفي ) و علاش كيشوهوه ولاد الحرام فعايلهم ..!

حكيم: ما تخليهمش يشوهوه غير نتي يلا بغيتيه من قلبك و تعمقتي فيه .. غتخلي ولادك تا هما يبغيوه و ولادهم و هي غادية ..! ( بتشجيع كمل ) قريتي فالقرآن تا شبعتي و سرحتي لسانك ..! دابا غتبداي تحفضي و تلحقي عليا حتى نتي ..! عندك ثلث شهور يلا حفضتي سورة البقرة كاااااملة بلا حتى خطأ واحد .. غتكون كتسناك مفاجأة شحال و نتي باغياها ..! ما قدرتيش ( ضرب يد مع يد ) مشات المفاجأة و غنعرف ما فيديكش ..!

شريفة:( ردات بحماس ) فيدي قالاك ما فيديش .. ثلث شهوور و نعرضها عليك بحال الما و لكن شنوو هي المفاجأة ( رمشات عينيها فيه كتلعب فيديه و تحلون )

حكيم:( هز حاجبوو فيها بابتسامة كيشجعها و يحفزها ) حتى يوصل وقتها و تعرفي و لكن تستاهل هاذ الصبر كامل .. ما كرهتش لي يعطيهالي أنا بلاصتك ..!

و بالفعل دازت ثلث شهور و عرضاتها عليه كاملة بلا حتى غلط و تما داها لدبي دارت التجميل لي شحال و هي باغاه و مترددة باش تديرو فالمغرب .. حيدات الأثر د العمليات لي بقاو فلحمها و نفسيتها تحسنات كثر و كثر ..!

و هاكا بقى كيشجعها بالتدريج كل مرة بسورة كتحفضها و كل مرة بمفاجأة فشكل و لكن المكافأة لكبيرة هي فينما كتطيح فموقف صعييب و خايب كتلقى داك السور بحال الثلج على قلبها كيدخلولها السكينة و الرحمة و يوقفوو معاها .. و هاذي أحسن حاجة قدر يعطيها لها حكيم و يعطيها لراسوو و يبدل منوو للأحسن و يصون لسانوو و حركاتوو هو و ياها خصوصا قدام نور لي واخداهم قدوة و فعينيها كيسواو الدنيا و ما فيها ..!

" إنَّ الله إذا أحَبَّ عَبداً أنارَ بَصيرته.. ولا تُستَنار البَصيرة إلّا بالحُزن..

فَعِند الحُزن يرى المَرء حَقيقة كُلّ شَيء .. حَقيقة نَفسه، وحَال قَلبه، وصُحبته، وأهله ..! حقيقة الدُنيا على حالِها، وما صارت إليه روحه ..!

تُدرِك بَصيرته جَمال الأشياء الَّتي مَرَّت عليه وتجاوزها على عَجل .. تتّصِل رَوحه بالسماء ... فَتصبح كُلّ ذَرَّةِ حُزنٍ في نَفسه "نوراً" يُضيء بِه بَصيرته حَتّى يُدرِك هَوان الدُنيا برغم جَمالها ..! "

العودة🔥

شريفة:( كملات صلاتها و شافت فيه بابتسامة ) فين مشيتي العشية كاملة و نتا غابر ..! ( شافت فنور ) نعست أنا و نور درنا القيلولة و صوبنا بايلة للعشا طيباتها الشاف الكبيرة ديالنا لالة نور الخنفوسة و قرينا القرآن و صلينا .. عاد جاي ؟ آش هذا ههه ..!

حكيم:( تبسم و حك يديه مع ظهر نور ) هاذشي كامل .. برافوو بنتي بطلة ( باسها فحنكها و هي كتضحك حشمانة و الحنيكات مزنكين مكمشة فيه كتردلوو البوسة )

شريفة: هههه أجي بعدا نعرض عليك عاد دخل دوش و بدل عليك .. تلقى الطبلة تحطات باش نتعشاو .. ملاك و حسام جايين ؟ نسيفط شي واحد يعيط عليهم ..!

حكيم:( جمع حجبانوو و ظلم الشوفة لا اراديا و قال ) لا غيبقاو فالشالي هضرت معاهم يديو لهم العشا ..! ( بدل الموضوع ) حافضة و لا غتديري بحال لبارح ..!

شريفة: حافضة ( خرجات عينيها فيه ) و سكت راك كتوثرني ..! دوز تجلس ..!

نزل نور للأرض و حيد صباطوو و التقاشر جلس حداها متكي على جنبوو مكالي بالمخاذ و هي مربعة قداموو بالاسدال و الوجه صافي مزنك كتعرض عليه فسورة طوييلة .. كتجود بصوت فيه بحة كتقيس أعماق القلب ..! و هو كيسمعلها و حداه نور تا هي .. تا كملات بلا حتى خطأ و تبسمات ..!

شريفة: صدق الله العظيم ..! ( غمزاتوو فرحانة ) كا و لا ما كا ..!

نور:( ردات بصوتها الصغيور ) سوووبير كا ..!

شريفة: هههه هاذ الحلوة غناكلها أنا غناكلها ( نعساتها على ظهرها كتهرها خاشية نيفها فكرشها و نور غتهبل بالضحك )

نور: ههههههه شافي ماما شافي باكاكا " باركة : هههههه مامي باكاكا ..!

شريفة:( ضحكات و قالت ) فين هي مكافأتي ..! ( صغرات عينيها فيه ) مالك ؟ جيتيني ماشي هو هذاك ..!

حكيم:( رد بهدوء ) قرييييب بزااااف تعرفيها ..!

شريفة:( هزات حاجبها حاطة يديها على جنبها ) ولد حبيبة ما تافقناش هاكا ..!

حكيم:( زير على رقبتها من اللور جرها عندو كتضحك و نور نقزات فوق منهم بجوج كتلعب تا هي ) باركة عليك ا الطميميعة ..! ( سكت شحال و باسها فجبهتها بين عينيها ) الله يرضي عليك ..!

**********************************

ملاك:( ردات بغضب ) دابا مقلب لي تيليفوني بلا خباري كتشك فيا و زايد غضبان ..! كنهضر مع الولد عادي .. هو فنفس الضومين د خدمتي و عاونني فامتحاناتي .. كان داخل فاكتئاب و عاونتوو خرج منوو و عاونني حتى أنا ..! لا هو عارفني مزوجة لا انا عارفاه واش مزوج و لا عندو حتى لولاد حيث بعاد على هاذشي و ما واخذينوش شخصي ..!

حسام:( وسع عينيه فيها و قال ) دابا هاذشي لي جا ففمك تقوليه ؟ واش كنرضع صبعي قبالتك ؟

ملاك:( ضحكات باستهزاء ) هههه لا نسيت نتا بوليسي ما كيتيقش حتى فحوايجوو عاد يثيق فيا أنا ..! يلا عينيك فالتين مع كاع لي كتعرفهم و ديما ناويها عوجة ماشي كلشي بحالك .. كاين لي ماشي زلال و نيتوو صافية ..!

حسام:( رد لكلام من وسط فموو .. هاز يديه بلا حول و لا قوة إلا بالله ) عرفتي نتي و الله ما ديال الهضرة و الكلام ..! ( مشى كيجر ففاليزتوو خارج من تما )

ملاك: تقاضاو لك ا سي كازانوفا .. حيث عارفني عندي الصح ..! و كلشي عارفها اصلا .. خاصني نسمع لشريفة لي قالتلي نطلق منك ما عندي ما ندير ببحالك و ألف واحد يتمناني ..!

حسام: شريفة ..! ( حرك راسوو بالايجاب ) سيري ها الطريق قدامك يلا صبر لك واحد من هاذ الألف .. نقطعوو من الجذر ..!

خرج من الشالي زادح الباب عليها مخليها واقفة مبلوكية كترمش فعينيها لي عمرو بالدموع و بداو كيهبطوو وحدة تابعة ختها ..! تا تكمشات فوق الناموسية معنقة مخذتها كتبكي فوقها و شعرها مليوح قدامها ..!

أما هو مشى ديريكت للاستقبال طلب لهم ساروت د شالي واحد آخور ..! بعد تفكير و اعتذار عطاوه ديال أسية .. بوحدو لي واجد و نقي ..! أما بقية العائلة لي شالي ديالهم ما يوجدو تال غذا و كلشي عامر ..! اتافقوو معاه يوجدولوو واحد جديد غذا مع ثلاثة د العشية غيكون كلشي مقاد و من هنا لتما يباث ف ديال أسية ..! و تما غادي يجيبولوو العشا و ديكشي لي كان ..! كل واحد شاد عليه بابوو ..!

هو لي ربي لي عالم بيه غيطرطق و الاعصاب كياكلوو فيه من الداخل .. و ملاك لي كتبكي و تقول ما بكات ..! و حكيم و شريفة لي تعشاو مجموعين من بعد ما دوش و ارتاح ..! متكي فالبيت و البيسي حداه خدام فيه ..! تا جات شريفة لي نعسات نور و قرات لها قصة بحال العادة .. على البطلة الأميرة ..!

بدلات لها حوايجها و انتابهات لسمطة د سروالها لي شاداها لها فبلاصة محددة .. حاسبة شحال من تقبة عاد خاشياها و كيفاش عاقدة لها حوايجها ..! كتحاول تخليها ديما معاها و لا مع باها ما تغفلش عينيهم عليها .. و واخا هكاك من لي شافت و عاشت ..!

الاحتياط ضرووري و ديما معلمة لها حوايجها و غير بالخاطر و العقل خلاتها تعاود لها أي حاجة وقعات معاها و بلي لي كيوقع عندهم فالدار سر من اسرارهم لي ما خاص حتى واحد يعرفوو .. هي أميرتهم البطلة لي خاص تحميهم و ما تخرجش أسرارهم لبرا باش ما يغلبوهمش و يفرقوهم و يبقاو ديما مجموعين ..!

و ما تخلي تا واحد يقرب منها و يقيس فيها و لا يحاديلها جهة سروالها و مؤخرتها و يلا حتى طاحت فداك الموقف كيفاش تتعامل باش تفك راسها ..! و هاذشي غير بالشوية و كل مرة كتعاودو تا ولات كتغني غير بيه .. باش نور تشدو من عندها و تدخلوو مزيان لعقلها .. واخا ما تفهموش و ما تقدرش تستوعبوو دابا .. المهم تعرف بلي شي حاجة خايبة و خاصها تغوت و تهرب و تقول لماماها شنوو كاين ..!

حيدات البينوار من عليها و تخشات حداه كتماصي راسها .. تكات على كتفوو حتى شد البيسي و جرها لعندو .. مخشية فيه و يديها على صدرو كتلعب فالزغب .. كتلوي فيه و مرة مرة تجر تا كيتقسح و تبدا تضحك ..!

حكيم: هدااااي ما كنضحكش رصاي من البسالة ..!

شريفة:( تبسمات و هزات راسها فيه ) و يلا ما رصيتش .. شنوو غتدير ؟ ( عضات على فمها ) غتعطيني عقوبة ا كبيدة ..!؟

حكيم:( شاف فشفايفها و قال بعينين منيمين ) همم ..! فكرتيني فالعقوبة بعدا ..! ( هز حاجبوو فيها ) قبيلة نور عطات الصبع لحسام و غالبا سباتوو و هي ما فاهماش .. " أموو سوسو مار " شنوو كيعني هاذشي ؟

شريفة:( لعبات بعينيها كتفكر حتى وسعاتهم و قالت ) بفففف داك ملاك لي يكددها تفوو ..! ( شافت فيه ) كنت كنبدل لنور و جات معصبة من حسام .. قاتلك حسام حمار و عطات الصبع للباب مفقوصة و هضرت معاها تنتابه حدا نور ..! جاتني ما دات ما جابت قولي هي هزات ديكشي كيفما هو و دارت بحالوو ..!

حكيم:( هز حواجبوو بجوج فيها ) معلووم شي حاجة جديدة غتعجبها و تبغي تقلدها ..! ( لعب بلسانوو ففمو كيسووط ) ملااااك ..!!! شحال ما بقيت غنهرس مها من شي قنت ..!

شريفة:( بابتسامة هادئة قالت ) علاش ؟ شنوو واقع ..! أجي ما قالك حسام والو ..؟ مرضات و هي شاكة فيه كيخونها و مرضاتني معاها .. عييت ننصح و نسلك دايرة الما منين يدوز و هي لاسقة فيه زلال ما ت زلال ..! تا تعصبت و قلت لها يلا ما كاين زواج بلا ثقة و نتوما الشك كينخر فيكم ما كتحاورو ما كتهضرو .. الطلاق حسن لكم ..! عنداك تمشي تديرها و تقولهم شريفة لي زعماتني ..!

حكيم:( شاف فيها جامع حجبانوو ) و نتي شنوو مشى لك وسطهم حتى تتدخلي ؟ هضرت معاك و تبريت منك ما تعاودي تقربي لجهتها و لمشاكيلها و لا ما هضرتش ؟

شريفة:( جمعات الضحكة و قالت ) هضرتي و تا هي هضرات و جات عندي كتبكي و تشكي .. شنوو نقولها ؟ خوك تبرا مني سيري قلبي علامن تخوي قلبك ؟

حكيم:( رد باستهزاء و نرفزة ) رجعتي بركاسة كيخوييو قلبهم فيك ..!؟ منين عارفاها برهوشة و غتمشي تلسق كلشي فيك .. لاش فاتحة فمك من اللول ؟ سمعيلها و بلّعي لسانك و لا ما كتعرفيش لهاذي ..؟

شريفة:( ناضت من فوقوو .. وجهها تزنك و حجبانها تعقدوو ) من نيتك ا حكيم ؟ دابا خاصني قبل ما نهضر .. نخاف نتفهم غلط و يتقلب كلشي عليا ..!

حكيم:( رد بحدة ) هاذشي كان خاصك تكوني تعلمتيه ماشي عاد نجي نعلموو لك أنا ..! و لا ظهرك مالح كيعجبك كلشي يلصق فيه .. كنتي دايرة و لا ما دايراش ..!

شريفة:( تزيرو عينيها باغى تبكي بزز حبسات راسها ) ااه ظهري مالح فاش يوقع شي مشكل أنا لي غناكلها ماشي نتا غير تكى على جنب الراحة ..!

حكيم:( ضحك باستهزاء هاز حاجبوو بثقالة ) و غنتفاهم معاك ساعتها بالمزيان و نكمل عليك باش تتعلمي تسمعي الهضرة و تبعدي من صداع الراس ..!

حنات راسها ساكتة و هو كيسوط حداها تا بداو كتافها كيتهزو و صوت شهقات مكتومة كيتسمعوو ..! هز عينيه فيها و جرها من يديها تشوف فيه .. تا بعداتها بسكات قالبة وجهها للجنب و عاد ما تسمع صوت بكاها بالجهد ما بقاتش قدرات تحبسوو .. كلها كترعد و ترجف و النفس كتطلعوو بزز ..!

حكيم:( دفع الغطى بنرفزة و قال ) دايراها قد راسك و زايدة بالبكى من الفوق .. غير لي يبكيك ديال بصح باش تبكي فراحتك مزيااان ..! ( سكت شوية كيغزز فسنانوو و كيشوف فيها و يزيد يتعصب ) واش مزال ما فهمتي بلي داك السيدة ماشي د النصيحة ..! غتمشي معاها بنيتك و نهار تحصل و تشوف راسها غالطة و ما عندها كي تفك غتلسقها فأول واحد حداها لي هو نتي ..! عاماين د القطيعة ضربيها نتي كاملة فالزيرو بفهايمك ..!

شريفة:( هزات عينيها فيه .. وجهها مزنك و عينيها حووومر هما و حناكها و نيفها .. مسحاتوو كتشمر و صوتها منغنغ و الهضرة كتخرج لها مقطعة بالبكى ) هء مععع صصصب ما ت هء تعصصص بشش عل عليااا .. أنا ما ددد رررت وااا هء واااالوو ..! ( سكتات شحال شادة على صدرها تا تهدنات ) ندمتيني كاع لاش هضرت معاك ..! نصحتها باللتي هي أحسن .. ما درت حتى حاجة د العيب ..!

سكتات و سكت تا هو قالبين وجههم على بعضياتهم .. كتسناه يصالحها كتسمعلوو التنخصيصة د البكى بلعاني و الرجفة لي فصوتها ..! تا برد على خاطرو و جرها من يديها و تا هي ترخات ليه و تكات عليه مخلية يديه كيدوزو على شعرها ..!

حكيم: صافي دابا .. نفختي عينيك ..! ( هز حاجبوو فيها ) الدموع واجدين عندك فالباب خاص غير لي يفتح البزبوز و تبداي ..!

شريفة:( خرجات تنهيدة عامرة فصدرها ) نتا لي ظلمتيني .. كنت غير كنضحك صدقنا فما عرفت شنوو .. مناقص من شي هضرة و لا شي نصيحة ..!

حكيم: ما باغي حتى واحد يجبدك بالعيب و يهضر فيك قد هاكا ( دارلها حركة بيديه ) يلا غير بنادم خيخنا منوو ..! ( شافت فيه بهدوء و بادلها ) و باقي على هضرتي غنتفاهم معاك يلا مشات تا هضرات و جبداتك .. باش تولي تشدي فمك ..!

شريفة:( عوجات فمها و هزات حجبانها للسما بملل كتميق فيه تا تبسمات بعينين حومر ) غذا غتجي اسية .. ناااااري لمها شحال توحشتها غنقطعها من لحمي .. شهر ما شفناها ..!

حكيم:( حرك راسوو بالايجاب ) خلات بلاصتها .. مع العشرة نمشييو للمطار نجيبوها ..! مخيرة دارتها بلا ما تكرفس فالطريق .. تشد الطيارة من مراكش لهنا .. ساعة و نص و هي معانا ..!

شريفة: وايييه ..! ( ضحكات كتبدل الجو و قالت مصغرة عينيها فيه ) نعاود لك قصة تطيب بيها نعاسك بحال شهرزاد و شهريار .. تسطابني حتى نتا ماشي غير المشة د نور هههه ( ضحك كيسمع لها و حرك حجبانوو بمعنى آتي ما عندك ) قالك هذا واحد الملك بغى يختار بين ثلاثة ديال البنات .. وحدة زوينة .. وحدة شعرها طويل و وحدة رجليها زوينين ..! هههه نتا بعدا كنتي غتاخذ مولات الرجلين هاذي نبصم عليها ..!

حكيم: ههههه ياك بعدا ..!

شريفة: عارفة خروب بلادي ههه ايوا ا سيدي مشى فكر تا عيى و رجع قالهم ..! الزين خليقة و الشعر تلبيقة و جمعي رجليك ا بنت الحميقة ..! ههههه و ختار الزوينة ..!

حكيم:( تبسم كيحرك فراسوو و خربق لها شعرها ) نعاود لك قصة حسن من هاذي ؟

شريفة:( مصات شنافتها و قالت ) اوووهووي .. خاصني ننعس ..!

حكيم:( هز حاجبوو بمغازلة ) شوفي و كان ..!

شريفة:( ضحكات بحال الفارة و قربات لعندو ) يلا كنتي غتكمل القصة دغيا علاش لا هههع تقولي فوذني واقيلة ياك ..!

مع الخمسة د الصباح فاق حكيم و نوض معاه شريفة ..! صلاو الفجر و خرجوو بجوج كيجرييو كي العادة و هو عقلوو مشطون بختوو ..! جراو نص ساعة فالآلي و نص ساعة فالروطور ..! و من تما ديريكت دخلوو من اللور د الاوطيل لجهة لاصال ..! شد عليهم الباب و حيدات شريفة الفولار و الفوقاني د الكيطمة لي نازل على مؤخرتها ..!

بقات غير بالسروال و الديباردور ..! حكيم كيلعب الحديد حداها و كيطريني و هي فطابي غولونط و فالآلات لي كيجيوها ساهلين ..! مرة مرة كيوقف عليها يزير معاها الطرح تا كتولي كتقطر بالعرق و تغوت بالعيى ..! ساعة اخرى فلاصال عاد رجعوو للدار ..! كانت مزالة يالاه السبعة ديال الصباح ..!

طلعوو ديريكت للطبقة الفوقانية .. شريفة وجدات الحمام بالشمع و الورد و عصائر طبيعية و الشكلاط و الفواكه و حكيم تأكد من نور مزيانة و عاد خلط عليها ..! لقاها مخشية فالجاكوزي و الرغوة مغطياها كتلعب بيها فيديها و صدرها ..!

تبسم و تزاد معاها خالقينها بيناتهم ..! ساعتين د الضحك و النشاط و اللعب بجميع اشكالوو ..! ولفوو هاذ السيسطام منها كيصلييو الفجر و منها كيلعبوو الرياضة و يشدو صحتهم كثر .. و يعطييو وقت لبعضياتهم باش ما يتضغطوش و يهملوو علاقتهم ..! نور ما كتفيق تال التسعود و لي كان مسالي كيتكلف بيها يدخلها للحمام و تغسل سنانها و تلبس باش تهبط ..! و الثاني كيكمل لباسوو و يهبط يبدا فتوجاد الفطور .. تا كيتجمعوو كاملين و كيتعاونوو ..! تا من نور كتهز لهم الخبز و ديكشي الخفيف و الرقيق تحطوو فالطبلة ..!

باغيين يبقى داك الجو د الدفئ بيناتهم ..! تا من البنات و لالة فاطمة لي كيعاونوها فالدار ما كتطلبهم تا يلا كان عندها التخمال و لا شي عراضة كبيرة و ما سالاتش كلشي بوحدها ..!

شريفة:( كملات كاسها د القهوة كتمذق فيه و تلعب بشعرها لي مزال فازك ) هاذي التسعود و نص .. غنطلع ندير الدرة دغيا و نشوف الشالي ديال أسية واش واجد ما ناقص فيه والوو و نتحركوو ..! خلي معاك نور صافي ما غنتعطلش ..!

حكيم:( شاف فالساعة ) واخا غير طلقي راسك .. يالاه باش نوصلوو فالوقت ..!

شريفة: اوكي مون شاف ( لنور ) غنمشييو نجيبوو طاطا يايا .. نعطيوها بوسة كبييييرة و تعنيقة و شنوو نقولو لها ..!

نور:( ردات كتضور فعينيها و تضحك بتشيطين ) نزيبوو يايا ؟ ببووك ..!؟

شريفة: هههه ايييه نجيبوو يايا و نقولوو لها مبرووك ..! سبقوني للطونوبيل أنا خمسة دقائق و هانا معاكم ..!

طلعات للبيت كتجري قادات دغيا فولارها و هبطات فالدروج كتطيير للاستقبال .. دخلات بالزربة هزات الساروت الاحتياطي لي تما د الشالي .. ما سمعاتش حتى للبنت شنوو باغية تقول بالزربة ..!

....:( رخات يديها بفقصة ) وا مدااام راه البيت فيه سي حسام ..! ( ضربات جبهتها ) لمن كتعاودي راها مشات ..!

فتحات الباب و دخلات كتشعل فالضواو .. تا تفتح باب الحمام و خرج حسام عريان ملوي غير فوطة على نصوو ..! تصدم منها تا تخطف اللون فوجهوو و غوتات تا هي و عطاتوو بالظهر ..! تا جات عينيها ديريكت فملاك .. لي سولات عليه فين بايت و نعتولها ..!

تخطات شريفة كتشوف فيها بعين حمرة مخنزرة تا تعجبات منها .. هاذي مالها ..! و لكن صدمتها كفس و نحس فاش هضرات و هي حاضية راجلها لي دغيا هز الكالصون و الشورط لبس فالحمام و خرج عندهم .. كيخشي التيشورط فراسوو و كيسمع لماري عاقد حجبانوو ..!

ملاك: قولولي نتوما هاكا و انا و خويا ناعسين على وذنينا ..! أنا كنشكي عليك و حاطة عليك الراس و نتي كتنافقي فيا و تخشي المواس فظهري ..! و نتا داير فيها مظلوم مسكين و نتا كتغذر صاحبك مع مراتوو ..! كتخوني معاها و كتغوت علاش نهضر فالتيليفون .. نتا راك ماشي غير هضرتي ..!

شريفة:( تقلبات عندها بوجه حمممر و عينين خارجين و قالت كتغوت ) واااااش نتي مريييضة و لا كتمرضني علينا ؟ كيفاش هاذ كيخونك معايا ؟ يلا كتضربي الزطلة عند شي حشايشي بدليه .. راك بديتي تخراي و تجلسي فوقوو ..!

ملاك:( شافت فيها بعين حمرة ) هاذشي علاش كتقوليلي نطلق و كتزعميني ..! قولي عينيك فيه ؟ يلا هاذي ماشي خيانة شنوو غتكون ؟ كتشوفيه واش يناسبك و لا لا ..! راه حرايفي ما تخافيش و تا خويا حرايفي و كيعرف شنوو كيدير و هاذشي كامل غيوصلوو بالحرف و نوريكم الغذر كي داير ..!

شريفة:( شافت فحسام لي حاط يديه بونية على فموو مزير عليها .. وجهوو حماااار بعصبية و عروقوو تزيرو .. و بنرفزة قالت ) واش عند بالك كتخلعيني بخوك ؟ كنبان لك بنت ربع سنين هنا غنديرها فسروالي كنترعد منوو حيث غتشكمي بيا ..!

ملاك: ما كتخافيش ؟ واخا دابا نشوفوو ..!

شريفة:( عيات مزيرة لسانها و يديها باش ما تضربهاش فلخر قالت بعصبية ) وا سيري تقو*** نتي كاع .. صبحنا على الله ..! أنا لي غنوصل هاذشي لخوك و يلا ما قطعلكش لسانك و رماه للكلاب بحالك ما نتسماش شريفة ..! و لاهيلا هاذشي لي بقى تضربيني فشرفي و فوسط داري و ملاكي ..!

يالاه ضارت ماشية و ملاك هضرات كتغاوت معاها من اللور ..! تا سمعات تسرفيقة مجهدة و غوتة د ملاك نيت تقبات لها الوذن .. تا شدات على قلبها و شافت فيهم لقات حسام شادها من شعرها ملويه على يدو و كيعطيها فالطرش ..!

مصات شنافتها بشفاية .. جاتها على قلبها و حلفات لا فكاتهم ..! خلاتوو لاحها فوق الناموسية كيقلب فالفاليز ديالوو بجهالة على باش يزرق لها لحمها ..! و شدات عليهم الباب ..! كتسمع فغوات ملاك لمدة تا تقطع بقى غير أنينها و صوت الشحط و حسام محيح ..! عطاها سلخة د الكلاب تموت ما تنساها ..! و كمل بالكوافوز و البيت .. شقلبوو كامل و صعر عليها صعرة د العداو ..! فين هو حسام الضحوكي و لي قليل فين كيتعصب و تا يلا تعصب كيحاول يقلبها ضحك و يبرد على راسوو ..!

تسيف عليها و شافت وجه عمرها شافتوو فحياتها .. جمعلها كولشي كرجة .. قلبوو عامر عليها و زادت كملات بهضرتها ..! ما فهمش كيفاش قدرات تطعن فيهم هاكا و تهضر قداموو بعين حمرة و بداك النبرة الوقحة ديالها ..! بحال يلا حصلاتهم كيفسدو و دارت الطايلة غتخرج عليهم و تجيب لي يربيهم ..! ما شايفاهش را٠٠جل قدامها نهائيا ..!

حكيم:( شاف فيها بنص عين مركز مع الطريق و بهدوء قال ) كاين شي مشكل ؟ مالك جيتيني ماشي هي هاذيك ..!؟

شريفة:( خشات لاسانتيغ تحت من يديها مبعداها على صدرها و قالت ) والوو غير السمطة حرقاتني مع صدري .. كيضرني هاذ الأيام بزاف ..!

حكيم:( حرك راسوو بالايجاب ) الشالي ديال أسية واجد ؟

شريفة: باقي كيقادو فيه .. يلا ما كانوش كملوه ها هي معانا من هنا لليل يكون واجد ترتاح ..!

سكت و سكتات و نور فالكرسي ديالها اللور متبعة الطريق بعينيها حتى بدات كتنعس و تمشي بيها عينيها ..! كتعجبها الركبة فالطونوبيل .. فاش كيوحلوو معاها فالنعاس كيخرجها واحد فيهم و لا بجوج يضربوو بيها دورة و يرجعوو ..!

شريفة مرة مرة كتنهد .. حاس بيها ماشي هي هاذيك و تا هي عارفاه حاس و كيتسناها تهضر ..! و لكن باش غتبدالوو ما عرفاتش و حارت ..! متأكدة غيصعر عليها هي اللولة عاد يدوز لختوو ..! و بعد تفكير قالت حتى يجيبو أسية و تشدو فالفيلا تهضر معاه ..! ماشي و هو صايك لا يصدق قالبهم فالطريق و منها ترتب أفكارها ..! و هما هكاك فتحات لاسانتيغ بالزربة شادة على فمها .. كتشيرلوو يوقف تا حبس بفران سيك تسمع فالشارع كامل ..!

و فنفس الللحظة هبطات كترد كاع لي فجوفها .. شادة على قلبها لي كيضرب بالجهد وسط صدرها بحال يلا مشاركة فشي ماراطون غتسخف و وذنيها بداو كيصفرو بتعب ..! مد لها قرعة د الما شللات فمها و جلسات فبلاصتها كترد النفس بزز و جوج دميعات هابطين مع جناب عينيها ..! ما كتحملش تستفرغ .. كيقتلها و يسالي معاها تا قلبها و معدتها كتحسهم غيخرجوو من بلاصتهم ..!

حكيم:( فتح لها الفولار بالزربة باش تتنفس مزيان و قال ) شوية دابا ؟ ( قاس بظهر يديه فحنكها و جبهتها ) عيانة بزاف ؟

شريفة:( شدات على فمها مخيبة سيفتها كرهات الريحة ) فففف لا غير يالاه نتحركوو خودلي شي مسكة نبدل المذاق ..! ضرني البيض واقيلة د الصباح مع الزيت معدتي تلوات بالطونوبيل ففف

تكات فشلانة و الشال مرمي فجناب راسها كتلهث ..! وقف خدالها مسكة و كاع لي بغات و كمل تال للمطار كل مرة يسول واش مزيانة .. تا وصلوو و فاقت نور كتبكي و تغوت ..!

شريفة:( شادة طرف ديال شوينكوم كتشم فريحتوو و طالقة لكليم و واخا هكاك مزالة دايخة و فاشلة ) ديها معاك عافاك و سيرو تلاقاو أسية ( شافت فالساعة ) دابا غتكون وصلات .. غتكون كتسنى الفاليز ديالها .. شوية و تخرج عندكم ..!

حكيم: متأكدة تبقاي بوحدك ؟ ( ضار عند نور لي كتجبد باغى تخرج من تما فتح لها السمطة و هزها عندو و قال كيشوف فيها ) باركة من الصداعات ..!

شريفة: متأكدة غير سير .. يلا تزاد عليا الحال غنعيط لك .. تيليفونك معاك ياك ..!

حكيم: واخا صافي ..!

خلى لها الكونطاكط ديال الطونوبيل يلا بغات تهبط تلحق عليهم و مشى هو و نور .. دخلوو للمطار لداخل للجهة فين كيخرجوو المسافرين ..! شاف فالطابلوو لقى طيارتها وصلات ..!

نور:( حطات يديها على لحيتوو كتطبطب بيديها الصغيورة ) بابا نزيبوو يايا ؟ ببوك ؟

حكيم: وي نجيبوو أسية ( رد بغير انتباه كيجبد تيليفونوو لي كيصوني .. سحابلوو شريفة تا طلعات لوو نمرة حسام ..! جمع حجبانوو و جاوب ) وي حسام ..!

حسام: راك فالدار و لا محرك ؟ المهم ( بتنهيدة كمل ) ماري يمكن خسرات .. ضربتها و طاحت كتغوت بالحريق فكرشها و رجعات كلها دمايات تا سخفات .. دايها دابا للطبيب لي كان غنعلمك بيه و يلا مسالي تخلط عليا .. أجي لكلينيك **** ..!

حكيم:( غمض عينيه كيزفر النفس ) انا خارج دابا .. قضي نتا و بيناتنا التيليفون .. نكمل و أنا معاك ..!

قطع معاه و شاف جهة البوابة بانتلوو أسية خارجة جارة شاريوو عامر بلي فاليز ديالها ..! ملامحها باقيين هما هما البراءة كتقطر منهم و داك الزعورية و الهدوء لي كيبان فيها .. كيحمق أي واحد ..! مجبدة عسل عينيها بأيلاينير خفيف و كلوز فشفايفها ..!

طالقة شعرها و جايبة القصة للجنب معوجاها بعفوية و شي زغيبات طالعين فالسما ..! ضعاااافت على لي كانت بأشواط ..! لابسة تيشورط فالابيض سامبل خاشياه فسروال د الدجين و سبادغين فرجليها و صاك سبورتيف معاكساه معاها .. فيه لاكارط و وراقها ..! شافتهم و تبسمات بضحيكة من الوذن للوذن كتشير بيديها و نور كتفركل عندو .. تا هبطها للأرض و مشات كتجري طارت على أسية لي تحنات لها فاتحة يديها بجوج .. كتضور فبلاصتها و تبوس فحناكها المطبزين و نور ففمها غير

نور: يايا ببوك ..! ببوووووك ..!

أسية: ههههه يخليلي يايا .. توحشتيني ؟ أنا بعدا توحشتك بزاااااف و جبتلك لي جويي معايا .. نلعبوو أنا و ياك هههه ( تزنكوو حناكها كتشوف فحكيم ) خويا حكيم ..!

حكيم:( قرب منها سلم عليها و عنقها بمحبة ) على سلامتك .. كي داز الفول ؟

أسية:( تبسمات حشمانة منوو ) مزيان الحمد لله ..! نتا كي داير ؟ صحتك لباس ؟ ( دورات عينيها كتقلب ) شريفة ما جاتش ؟

حكيم:( ضحك من الثوتر لي باين عليها ) كلشي بخير ..! جات كتسناك فالباركينغ عيانة شوية ..! نتحركوو ؟

أسية: واخا ..!

شدات فنور و جرلها هو الشاريوو تال حدا اللوطو ..! خبع لي فاليز فالكوفر و هبطات شريفة لعندهم من بعد ما قادات شالها ..! فتحات يديها و عنقات أسية بالجهد لي بدورها تخشات فيها كاملة و شريفة كتبوس فيها و تعاود و عينيها كيلمعوو بالدموع ..!

شريفة: توووحشتك توووحشتك تووووحشتك .. فففف ( بعداتها عليها شوية ) ضعافيتي ا الخايبة ما كتاكليش ؟

أسية:( ردات بتنهيدة ) كنمووت ما كملنا تا ربي غفرلي كاع الزبايل لي درت فحياتي كاملة ( ضحكات كتشوف فيها و رجعات عنقاتها ) اخخخخ و شحال توحشتك و عندي بزااااف ما نعاود لك ما تتخيليش هاذ الشهر لخر شنوو وقع معايا .. بحال الأفلام هههه

شريفة: ههههه الصيف كامل فيدينا نتعاودو من دابا للصباح ..!

حكيم: و لوحوني أنا للتوش ..! ( غمزها بثقالة ) صافي جاو حبابك نسيتي صحابك ..!

شريفة: هههه لا نتا هو كلشي على أنا نقدر ..! ( خربقات لها فشعرها ) ها تاسانوو ا نور .. قلتي لها مبروك ..!

نور: ببوك مامي ..!

ركبوو مجموعين كيهضرو و يسولوو فيها واش داز الفول زوين واش تعذبات و لا مزيان ..! و هي كتجاوب بسعادة موحشاهم و نور حداها كتلعب معاها .. شادة يديها عندها كتشوف فخواتمها تقيس فيهم و ترجع تحط صبعها على فمها و ترمش عينيها فأسية موسعاهم .. تا بغات تاكلها .. شبعاتها بوسان و هران ..!

شريفة:( بعد تفكير قالت ) خاصني نهضر معاك ضروري فاش نوصلوو .. يلا عندك شي خدمة أجلها .. سبقني أنا اللولة ..!

حكيم:( شاف فيها هاز حاجبوو ) ملاك طيحات واقيلة .. داها حسام لكلينيك .. نلحق عليهم و فاش نجي نتذاكرو ..!

شريفة:( تفاجئات و ردات بالنفي ) لا هضرت معاك أنا اللولة ..! ( سكتات شوية ) خالتي حبيبة و الدراري غيجييو اليوم ياك ؟

حكيم: فالعشية يكونوو معاك ان شاء الله ..! غيتلاقاو خليل هو اللول و يجييو مجموعين ..!

شريفة:( رخات النفس ) واخا الله يجيبهم على خير ..!

وصلوو للفيلا لي دايرلها دخلة بوحدها .. بلاصى و هبطوو كلهم ..! خلاو الشوانط غيسيفط لي يتكلف بيهم ..! طلعات أسية مع نور لبيتها كتجبد لها فمونيكاتها و لعبها و كسيواتها كتوريها و كل واحد مسمية عليه سمية عجيبة ..! و شريفة دخلات حكيم لبيتهم و شدات الباب عليهم .. كتمشي و تجي قداموو و هو متبعها باستغراب مربع يديه .. تا قرب جهتها و شد فيديها و قال بجدية ..!

حكيم: غير هضري شنوو كاين ؟ خليتك فلون رجعتي فلون ثاني .. هازة القناطر على ظهرك ؟

شريفة:( تنفسات مزيان ) الشالي ديال أسية فاش حليتوو لقيت فيه حسام خارج من الدوش ( عضات على جنب شنافتها ) غير بالفوطة و لكن و الله ما شفت .. حدي داك الخيال لول ..!

حكيم:( هز حاجبوو فيها ) اهاه ..!

شريفة: و جات ملاك داك الساعة شافتنا و بدات كتخرا علينا فالهضرة ..! حقا و الواد انا كنخونك مع حسام و هو غدركم بجوج و غادي تقولها لك و تتفاهم معانا و أنا جايا نشوف العبار ديال حسام واش يوالمني و حرايفي بحالك و لا لا .. و عليها قلت لها تطلقي حيث عيني فيه ..!

شريفة:( وسعات عينيها فيه ) ما فهمتش أنا واش ما كتشوفش حسام را٠٠جل قدامها ؟ ما خلات ما قالت فيه و كن أنا بلاصتوو ننفيها و ما نعقلش عليها ..!

هزات حاجبها فيه بجدية .. مشات الدهشة و الخلعة لي كانت شاداها باش تهضر و تطلقات نيشان ..!

شريفة: ما عطاتوو هو قيمة ما عطاتك نتا ..! سمحلي و لكن انا أسية تهضر عليك بداك الطريقة ما تتخيلش شنوو ندير فيها ..! ناكلها بسناني ..! قاصتني فالشرف ديالي لي هو ديالك حتى نتا و كتجابه من الفوق غتجي تشكم عندك ..! زعما أنا بيبي ديال ربع سنين كنرضع صبعي و غنبول فسروالي من الخلعة منك يلا قالتها لك ..!

حكيم:( هز حاجبوو فيها مصغر عينيها كيسمع فسكات )

شريفة: يلا عندها شي مشكل معايا تحطوو نيشان و نخرجوو أنا و ياها للاهاي ..! ماشي انا كنتعامل معاها و دايراها بحال نفسي و هي كتحفرلي ..! وا أقسم بالله ا حكيم ما قلت لها تطلقي .. بالعكس شحال و أنا نرصي فيها باش تنعل الشيطان و ما تفكرش فالخيانة و تهضر معاه و يتحاورو ..! حتى قطعت منها لياس فخطرة عاد قلتها و شداتها غير هي ..! دايرة منها اليدين و الرجلين لسقات فيها تقول جريتهم بجوج و درتلهم السيف على عنقهم يتطلقوو بزز ..! يمشييو ينتاحرو كاع أنا مالي ..!

حكيم:( خنزر فيها و حرك راسوو بالنفي ) هاذ نتي مالك ..! قوليها لراسك قبل ما تبداي بالفهايم الخاوية ديالك ..! بلحاق ماشي دابا الهضرة تا نسالي لكم بجوج ..!

شريفة:( ربعات يديها و قالت ) نصحتها ما بقى حد يدير الخير ؟ باغي تصعر و تغوت صعر تا تشبع و لكن نتا عارف أنا ما دايرة والوو .. فتحت الباب بحال أيها الناس تا لقيتوو مسفح قبالتي و مراتوو كتغوت مورايا بحال يلا ما عرفت شنوو شافت .. وا لواه ..! فلاش يوقع مع أي واحد ..!

حكيم: شرييييفة .. بلعيييه ..! داك الكلبة كن كانت بعقلها ما غتمشيش تهضر و تجيب لحسام الر٠٠جال تال باب دارو ..! ( حك سنانوو مع بعضياتهم مغذذ ) ما لقاتش لي يحكمها و لاعبة عشرة للضس مع داك ولد الناس لي داير بوجهي و وجه امها ..! أما كن حكها نهار اللول غيتهنى من الصداع كامل ..! هاذيك ما كتمشيش بالخاطر ..!

شريفة:( باستغراب ) شمن رجال جابتلوو و هضرات معاهم ؟

حكيم:( رد باختصار ) لقاها كتهضر مع شي كوري .. عاد قلب عليها ..! يلا كان شي واحد كيخون .. غتكون هي ..! ( زاد عقد حجبانوو و قرب منها جرها من وذنيها كيهضر فيها ) و بالفهامة ديالك .. غتمسح كلشي فظهرك ..! حتى يلا خسرات غتولي نتي سبابها ..! ( طلق منها ) ظهرك مالح وا وجديه تاكليها بوحدك و منين نكملوو من هاذ التخرويض كامل .. فكريني نكمل عليك ..!

خلاها فالبيت و خرج زادح البيت عليها ..! تسناتوو يحرك الطونوبيل و لكن ما حركهاش ..! حضاتوو من الشرجم ماشي على رجليه تا مشى للجهة د لوطيل و الاستقبال ..! عرفاتوو ما غيمشيش لعند حسام و ملاك فخطرة تا يجييو ..! غير غيفلعصها فقلب الطبيب و تلقى فمن تشد تا هي ..! اللهم خليها تا تجي و حالف فيها حلفة ديال العداو .. حتى تندم على النهار لي حلات فمها فيه .. تشوف كمارتوو تقول الله يخليها سلعة ..! تكرهوو و لا تجلس .. آخر هموو هاذ الساعة ..!

تنهدات شريفة كتحيد فالكاب و الشال ..! تا وقفات و جبدات تيليفونها من صاكها مدوزة لابيل لحبيبة و مصغرة عينيها بتشيطين ..! بغات غير تلعب معاها .. تا هي غتلعب خوو لعبها تا يشوفوو شكون غيتهد ..!

شريفة:( بنبرة أسف قالت ) ألوو خالتي حبيبة .. عاد سمعت شنوو وقع تصدمت بزاااف ما بقيت عرفت ما نقدم و لا نوخر .. قلت والوو نعيطلك نبرد عليك شوية .. نتي بعدا حالتك غتكون كفس مني ..!

حبيبة:( ردات مخلوعة ) اويلي ا بنتي شنوو كاين ؟ خلعتيني ؟

شريفة:( ردات بتفاجئ مصطنع ) ناااااري شنوو درت .. ويييلي وييلي حكييم ليوم ياكلني .. واش ما قالولك والوو ا خالتي ؟ والوو كاع !!!

حبيبة:( شدات على قلبها مخلوعة ) شنوو واقع ا شريفة ما تزيديش تكملي عليا بالخلعة .. ياكما ماري مع حكيم ؟ زعما سبقناها باش يتصالحوو .. نوضوها بيناتهم ؟

شريفة:( ردات بتردد ) وا شنوو غنقولك ا خالتي ..! راه ماشي مع حكيم مع حسام ..! حصلها كتهضر مع واحد الكوري فالتيليفون و تزايدوو فالهضرة تا ضربها و ناضت القيامة هنا و حكيم حالف فيها تا يكددها ..!خفت غير تطيح الروح ما عرفت شكون نبرد و معامن نهضر ..!

حبيبة: اوييييلي على المسخوطة باغى تسكتلي القلب ..! كيفاش حصلها كتهضر مع كوري ؟؟؟ اويييلي وحدي ..!

شريفة: ايييه حصلها و بغات تقلبها عليه بلي هو لي كيخونها و سمعها كتشكيلي و تعاود أسرارهم و زاد كفر عليها ..! و أنا من نيتي واقفة معاها و كننصح فيها و قلبي كلاني عليها .. اللهم وحدة مطلقة و لا تبقى مع واحد خاين ..! و هو منين سمع الطلاق هاج ..! قالها يعني انا خاصني نطلقك و ما نبقاش معاك ( لعبات بعينيها ) و هي ما رضاتش و تعايرات معاه طيحات منوو ..! بشي هضرة ما عندي ما نقولك و رداتلي أنا اللومة على ود الطلاق .. صدقت أنا لي جابدة الصداع و انا نيتي حسنة ..!

حبيبة:( عقدات حجبانها ترون لها العقل ) و دابا فين هما ؟ شنوو وقع مزال ؟

شريفة: طاحت سخفات و داها حسام للطبيب ما عرفت مالها تا يرجعوو و نعلمك و حكيم كيتسناها موجد لها .. غير تبانلوو يبالي بيها ..! حاولوو تجييو نتوما بكري شوية تفكوو يلا لقيتوو ما تفكوو ..!

حبيبة: لا حول و لا قوة إلا بالله .. لا حول و لا قوة إلا بالله ..! هاذ البنت غتحمقني .. بلاتي على الخانزة فلفلة حارة يلا ما غززتهاش ما نتسماش حبيبة ..! مسيفطينها تصلح الأمور و لا تزيد تعميها مع كلشي ..! ( تنهدات ) الطيارة د خليل غتوصل مع الثلاثة .. الربعة هكاك نكونوو شادين الطريق لعندكم ..! و بلاتي يسمعوو خوتها يكددوها ..! اويلي بغات تحمقني و تخرج على راسها ..!

شريفة:( ردات بأسف ) ما تديريش فبالك مزالة صغيرة و طايشة دابا تدير عقلها ..! و عافاك ما تقولي والوو لحكيم .. يلا عرفني عيطت لك و علمتك غيتسيف عليا .. و أنا من نيتي سحابلي فخبارك ..!

حبيبة: ففف كوني هانية ..!

بقات شحال معاها كتصبرها تا قطعات و خلاتها ..! حكيم سمع منها و فهم و واخا تبغي تلبقها ليها ما عندها ما تصور من عندو ..! و خوتوو نفس الشي و بنفس العقلية كاملين ..! غتبقى حبيبة فكرات تسبق و تهضر معاها قبل ما تكذب عليها ملاك و تقلبها عليها و تولي هي لي مخربة لها دارها ..! دابا بعدا مع غتوصل غتهرس لها كمارتها و ما غتسمعش منها و أي واحد بعقلوو مستحيل يتيق شريفة تخون حكيم و معامن مع حسام ..!

حكيم لي ما كيتيقش تا فراسوو ما غيعرفهاش كتخونوو ؟ لا و غتحصلهم ملاك و غيخلي مراتوو معاه بحال حتى حاجة ما وقعات ..! يتوقعوو يذبحها و يقتلها فبلاصتها .. أما يبرد هاذيك لي عمرها تكون ..! بمعنى تا حبيبة ما غتيقش بيها و غتجيها هضرة شريفة منطقية على بنتها ..!

شريفة:( خرجات عند أسية و نور .. شعلوو للصغيورة التلفزة عايشة معاها ما راهاش تما و بقاو كيهضرو بجوج تا قالت ) شفتي هاذ العاماين لي حكيم جمع فيها يديه عندو .. غيخلصني فيها كرجة اليوم ..! غيعلقني بلاصة الحولي أنا و ختوو و يتناوب علينا بالسليخ غير على هاذ اللسان لي ما بغاش يدخل سوق راسوو ..!

أسية: ههههه علاش شنوو درتوو ..!؟

شريفة: ما درت والوو الشكوى الله .. داك البرهوشة بحال التابعة لاسقة فقزيبتي عييت نحزق عليها ندوخها بالريحة تعطيني شبر د التيساع و تقول واش تململات .. عجباتها ريحتي واقيلة كتزطلها هههههه تفوو كذبت تا شبعت بسبابها .. الله يسمحلي يا ربي ..!

أسية: ههههههه ا ربي شنوو دارت لك ؟

شريفة:( عوجات فمها مفقوصة .. عاودات لها كلشي تا هضرتها مع حبيبة و قالت ) ندمت لاش عيطت واخا هكاك .. غنكون خلعتها و حكيم و الله ما يسرطها تا هو ..!

أسية: أجي ما قالك والوو على النقطة د الجهوي ؟ حدو عرفها ما بارك لي ما حتى حاجة .. موحال تكون عجباتوو .. أنا براسي كنت كنتسنى كثر و لكن تضغطت ما عرفت شنوو وقعلي تبلوكيت ..!

شريفة: خمسطاش مزيانة علاش ما غيعجبوش الحال ؟ ما قالي والوو ..! راه عارف السيسطام عندكم قاسح عسكري و سيونص ماط من الفوق ..! عادي عادي ..!

أسية: ايوا على الله ..!

شريفة:( حكات جبهتها و قالت ) عرفتي هاذ ملاك ..! ماشي الدم لي كنصفيوه و نخرجوه بالحجامة ..! لا هاذي الدم ديال البيغيود .. ديال لاغيكل لي كيهبط مننا كل شهر و كنتهناو منوو و نساوه ..! هاكا خاصني نحسبها و نقطرها من حياتي ..! ما عرفت علاش كتبقى فيا و نرجع نحن لها ..! و الله تا خاصني العصا نيت ..!

أسية:( طاحت عليها كتضحك ) هههههههههه و لاهيلا توحشتك و توحشت حماقنا ..! عرفتي ختك مسخسخة ما كرهتش شي مساج و شي حمام ..! تا لاسيغ ديريهالي الله يستر عليك .. جيت بزغبي ما لقيتش الوقت كاع فين ندير شي حاجة ..!

شريفة: هههه نوضي نوضي نمشييو للحمام نيت تا يلا ساق الخبار و تهلى فيا نكون دوشت و تريحت فخاطري ..!

أسية: و عنداك تغضبي ثاني ههههه ..!

شريفة:( تبسمات كتشوف فنور و قالت ) ما يقدرش واخا هكاك حلف ما يعاود يحط يدو فيا و وفى بيها .. عارفاه غيغوت و يزدح تا يشبع و يغضب نيت عندو شي فعايل كيخليني كنتحرق من الداخل .. كنقول يضرب و ما يستفزنيش هكاك ..! و عاد عارف ختوو لي غلطات معايا ..! ( قلبات عينيها بملل ) خلينا منها ..! شاكة فواحد الحاجة ..! ( حطات يديها على كرشها )

أسية:( حركات راسها باستغراب تا عاودات قالت موسعة عينيها ) حاملة ؟؟؟

شريفة: شششش بالشوية غتسمعك ..! شاكة و صافي مزال ما تأكدت و لكن حابسة البيلول مدة هاذي .. درنا عام و نص بالاحتياط على ود العمليات و الدوايات و من بعد حبستوو ..! لي غيكل تعطلات عليا و عندي شي اعراض و لكن ما عرفتش قلت حتى ندير التحاليل و نتأكد ..!

أسية:( عنقاتها بفرحة ) و ديريهم ا صاحبتي شنوو كتسناي ؟

شريفة: غنديرهم فهاذ اليوماين .. يلا كانت شي حاجة باغى نخليها مفاجأة تال عيد ميلاد حكيم و نقولها لوو ..! ( ضحكات باستغراب ) سبحان الله ديما فعيد ميلادو كتكون نايضة الحرب و مع ملاك ..! عقلتي على نهار الكوميسارية باش دانا عندو للدار و سلخها نيت ..! داز عندو النهار كحل و كملها فليل بختوو و دابا ثاني .. زهر عندو تا هو ..!

أسية:( سهات كتفكر و أول ما جا لبالها هو عدنان .. كانت أول مرة تشوفوو تما .. الذكرى باقى بين عينيها بحال يالاه لبارح ..! )

*********************************

ملاك:( فاقت معلقين لها السيرو .. مخشية الشوكة ديالوو فيديها و حسام واقف عليها .. شافت فيه و قالت بصوت مبحوح خافت ) تهنيتي دابا ..! ارتاحيتي ا الرو٠يجل بقى لك غير الضرب ها نتا ضربتي ..!

حسام:( عقد فيها حجبانوو و قال ) ها نتي غتشتاقي لهاذ الروي٠٠جل و العز لي كان معيشك فيه ..! يتسالى لك السيروم و دوزي قدامي نردك لعند خوتك ..! حتى توصلك براتك لبين يديك ..!

ردات عليه عاقدة حجبانها ما راضياش ما تبلعاتش لها هضرتوو و القتلة لي عطاها تا زوقها ما بقاتش قادرة تحرك و كن ما ليغيكل فاضت عليها و تخلع بزايد .. حسابوو حاملة و طيحات .. كن علم الله شنوو دار فيها باقي و تا هي جاتها على القلب .. دغيا سخفاتلوو بموت يا حمااار ..!

ملاك: باز لوجهك .. ضاربني و زايد بالنفخة ..! قالك عز .. كنت معززة فدارنا قبل ما تهزني من عندهم ..! أنا لي تزرفت فيك .. نتا راك عارفني كي دايرة و شفتي يدي و رجلي و وجهي و فورمتي و جيتي طالب فيا للزواج كترغب بالشهورة باش نقبل عليك ..! أما أنا كن شفتوو قداش ما ندخلكش حتى على الشتا ..! قالك العز ..!

حسام:( خرج عينوو المعكرين بالأعصاب فيها و جرها من شعرها تا بغى يقلعوو من الجذر ) عاودي شنوو قلتي ؟

ملاك:( شداتلوو يديه غالباها البكية و مطاكية وجهها بالثانية تا شهقات و هي كتهضر ) ايييه هء كن كنت عارفة راسك صغيير و دماغك خاوي بحال هاكا و الله ما نديك .. خرجتي عليا

زادت كتشهق بالجهد و تبكي حتى طلق منها و خرج من البيت زادح الباب موراه .. مخليها مكمشة كتبكي شادة على قلبها .. طيبات عينيها و تخنقات ..! كلشي ترون فحياتها من البارح لليوم و فبلاصة ما تصلح و تهضر بشنوو هي باغية بصح .. تابعة المعاطية كتبلز فالهضرة .. ما راضياش على راسها و تالفة تا حبيبة لي تنصحها بعيدة ..!

و خوتها لي كتهضر عليهم عارفة حسام حتى يلا ما كانش عاود لهم قبل غيعاود دابا و يبرئ راسوو و يخليها منها ليهم .. يلا هو ضربها هما غيقتلوها بلا ما يفكرو جوج مرات .. كلهم غيكونوو عند حكيم اليوم .. ما كرهاتش يزيدو يشدوها فالطبيب و ما تمشيش للفيلا .. غتسخف بالخلعة و البكى و حتى تيليفونها و صاكها ما عندهاش كلشي بقى فالشالي ..!

داز الوقت تا نعسات مكمشة كتلوى بالجوع ..! قرب يطيح الظلام و حسام باقي ما رجع تا قالت نساها .. عاد فتح عليها الباب ما كيشوفش فيها ..!

حسام: تحركي قدامي ..!

زادت بالشوية بزز كتحرك سبقاتوو و هو موراها تال الطونوبيل ركبات و ديمارا غادي منير فالطريق ..! تا وصلوو للمنتجع و بالضبط للفيلا د حكيم ..! شافت الطونوبيلات د خوتها مبلاصيين و بلعات ريقها كترعد ..! و قلبات وجهها جهتوو بعينين مغرغرين بالدموع كيلمعوو ..!

ملاك: ح حسام ..!

حسام:( رد بحدة ) صوتك ما نسمعوش .. بغيتي غير خوتك و عزهم أنا جبتك لعندهم ..! دابا دوزي تق*** ..!

هبط و تبعاتوو حاسة براسها داخلة لجهنم ..! صوت خليل كيهضر كيضحك و محمد أميين شاد فيه شدة العمى فالظلمة و حكيم مرة مرة كيتبسم معاهم و حداه عدنان كيهضرو بيناتهم ..! تا وقفوو عليهم ..! تجمعات الضحكة و الهضرة ما كاين غير التخنزير و العين الحمرة .. عرفاتوو غرقهم لها مع خوتها .. تا باش تمشي تعنق خليل لي شحال ما شافتوو و توحشاتوو .. ما قدراتش ..!

لاسقة فبلاصتها ثابثة كتدعي تخرج شريفة و لا حبيبة او حتى أسية و نور يفكوها منهم و ما تبقاش بوحدها معاهم ..! ما عارفاش بلي البنات كاملين سيفطهم حكيم للمنتجع لداخل .. ما خلى تا واحد كيدور قداموو ..! و تبرا منهم يجي شيي واحد لعندهم .. ما يلوم غير راسوو ..! حط كلشي ل موو و خيرها تهز بنتها و تزيد بيها لفينما بغات و عمرها ترجع عندو ترغب على ملاك حقا ختك واحلة عاونها ..! أو تبعد و تخليهم منهم ليها ..! فالاخير كتبقى ختهم و ما غيلوحوهاش و لكن ما غيدوزوها لهاش ..! خصوصا حكيم على شنوو قالت لشريفة و باش متاهماها بوقاحة باش تفك راسها ..! جمع لها كلشي من نهار وقفات فوجهوو تال دابا ..! و تخطاهم كاملين جرها من شعرها و عطاها تسرفيقة حسات بالضو ضربها و طلقاتها فسروالها فالبلاصة طايحة للأرض و الضبابة طلعات لها مع عينيها ..!

ملاك: هء ح حك حكيم ..!

حكيم:( تحنى عندها زير على فكها بيديه و قال ) سرطيه قبل ما نديرها بيدي ..! ( طلق منها و شاف فحسام حرك لوو راسوو للداخل ) دوز تجلس ..! نفكوو هاذ المنامة ..!

محمد أميين:( ناض هاز تيليفونها لاحوو عليها و قال ) فتحي الكود ..!

ملاك:( حركات راسها بالنفي كتبكي و فتحاتوو حتى نترولها ) هء ما د درت والوو و الله ما درت شي حاجة ..!

خلاهم حكيم فالصالون شادين التيليفون ..! لقى محمد أميين الكونفيراصاسيون ممسوحة ..! و بلا عكز عليه فتح الشانطة د البيسي ديالوو برونشا الكابل معاه و دخل كيخربق و يكتب بالزربة .. كيتسمع غير الصوت د الكتابة و الشاشة كحلة قداموو بكثرة الرموز ..!

ما عرفوهش شنوو كيدير ..! و لكن عارفينوو مهندس أنفورماتيك و أسهل حاجة يقدر يديرها هي هادي ..! مخليينوو خدام كيشوفوو باش غيخرج فلخر ..! حتى جا حكيم من الكوزينة هاز حديدة سخوونة حمرة كتلقف ..! بحال الطورنوفيس عندها يد باش كتشد ..! سخنها فوق البوطة مزيااان بعينين كوحل على ختوو .. عاقد حجبانوو فيها ..!

غير شافتوو ملاك وجهها مشى منوو اللون .. تفكرات نهار حرق كريمة حدا محمد أميين و خلاه يدير فيها لي بغى ..! و دابا جات نوبتها تا هي و ما كاينش لي غيحن فيها فخطرة ..! وقفات برجلين كيلعبوو بحال العجينة تحتها و زادت طلقاتها فسروالها تا شرشرات فالأرض ..!

شافوو كاملين فيها و فحكيم لي جرها من شعرها حاكمها عندو و مسرح لها يديها قداموو و هي كتبكي بالجهد و ترغب .. قلبها غيسكت و صوتها كيقطع فالخاطر ..!

ملاك: حكييم حكييم و الله و الله هء ماااا ما ددد رررت و وااالوو .. ععععف عفاااك خ خليينيي غير ن نهههضر ..! ( شافت فالبقية بعينين حوومر كيحرقوو ) هء خلييل حساااااام

حكيم:( رد ببرود ) هضرت معاك و عاودت .. ضربت و تبريت و ما بغيتيش تفهمي ..! هضرتي على مراتي و شفتيني ساكت لك يسحاب لك راك لاعبة عليا العشرة ؟ ركبتي على ظهرنا كاملين و دليتي نتي رجليك و خريتي علينا كاع ..! ( خرج لها نيشان بعصبية ما بقاش عاقل شنوو كيقول ) بقى لك غير ز** تا هو تهضري فيه .. كتفصلي و تخيطي فيه ا بنت الق*** ..! شريفة ما مشبعهاش أنا و ماشية كتقلب على حسام باش يبردها ؟ ( ضحك مغذذ و حرك راسوو من الفوق للتحت ) هه ..! واخا و نتي شكون غيبردك الكوري ديالك ..! هاذ اليدين هما لي كينبشوو على المشاكل ياك ..! بيهم كتهضري مع الصاحب ديالك ..!

حركات راسها بالنفي بالزربة و الهضرة مع البكى و تنخصيصة تسرطات لها ما بقاتش خرجات .. كتسمع غير بحال تلقيفة .. تا حط لها الحديدة حامية بالمعقول على يديها ..! تسمع صوت بحال الشياط و غوتات لربي لي خلقها هازة راسها فالسما و دموعها نازلين و هو شادها مغلغل عليها ..! ما تهزاتش فيه حتى شعرة .. و جرها ثاني باحتكاك معاها تا عاودات غوتات و هاذ المرة بلا صوت .. مشالها الصوت و بغات تسخف ..!

خليل:( بقات فيه بالجهد .. قطعاتلوو قلبوو تا ناض لعندو و قال ) حكيم صافي باركة على وجهي طلقها ..!

حكيم:( شاف فيه و حرك راسوو بالنفي ) هي دارت بوجهنا ؟ دارت بوجه حسام لي زطمات عليه و مرمدات موو فالأرض ..!

خلاه واقف و جرها هكاك من شعرها تال للكوزينة طلق الما و خشالها راسها تحتوو حتى توكضات و تخنقات .. عاد جبدها و رجع شعل البوطة كيعاود يسخن الحديدة و هي صافي كتشوف الموت قدامها .. يديها كتقطعها بالحريق و عاطياه لذاثها كاملة ..! بولة تابعة ختها كتطلقها و تبكي بأنين ما قادراش تجمع يديها و خليل واقف فالباب قلبوو واجعوو عليها ..!

كيشوف فحسام جالس كيتحك فبلاصتوو و محمد أميين مزال خدام فالبيسي حتى يكمل عاد يتولاها ..! و حداه عدنان كيسمع لغواتها و تعياطها ليهم .. ما مسوقش تا يشوف بعينيه شنوو دارت .. عاد غيهضر هو ..!

رجعات حمات الحديدة مزيان و شدلها يديها الثانية ضارب سنة مع سنة و قال ..!

حكيم: هاذي عقلي عليها مزياااان .. باش منين تبغي تحلي فمك على شريفة مرة اخرى و لا تذكريها حتى بينك و بين نفسك ..! تتفكري هاذ النهار ..!

رجع حطها عليها ملسقها مع لحمها نيت تا غوتات ثاني بوجه حمممر و عروقها كاملين مطراسيين .. مشات فيها الغوتة و البكية تا ما بقالهاش الصوت و الحديدة جرات معاها الجلدة كاملة تا بدا الدم كيسيل و اللحيمة البيضة كتبان ..! و غير طلق منها طاحت فالأرض بحال الشرويطة ..!

غير طلق منها طاحت فالأرض بحال الشرويطة كلها كترجف واحد الحريق راه لا إله إلا الله ..! و فالبلاصة مشى لعندها خليل هزها مكمشة فصدرو كتبكي بالجهد حاسة بالموت داخلاها ..!

تعصب و بقات فيه ختوو و بقى فيه خوه حتى هو و الحالة لي وصلوو لها ..! حطها فالصالون ما عارف ما يديرلها و تا واحد فالبقية ما تزحزح ..! رجعات الكونفيرصاسيون كاملة ..! عرفوها تعرفات عليه ف tinder خلصات و اختارت الدولة لي بغات " كوريا " و بدات كتهضر مع هذا و هذا .. تا قلبوها للواتس .. مدة طويلة و هما على اتصال ..! لدرجة ناوي يجي للمغرب يشوفها ..!

كلشي على أعصابوو ..! و هي كتهته حداهم ..! حسام ضربها و لي عطى الله عطاه شنوو غيزيدو يضربوو كثر ..! يقتلوها !؟ و حكيم تا هو ما قصرش من جهتوو .. دابا حتى الهضرة و شوف تشوف واش تتوكض لها ..! و لكن حسام كان عندو رأي ثاني ..! و ما بقالوو فين يزيد مزال حاس براسوو غتطرطق فيه شي حاجة لداخل .. من هاذ الضغط لي ضغط راسوو ..! وقف على غفلة قرب من جهتها و قال

حسام: سيري راكي مطلقة ..! ( نفض يديها فجنابو و كمل كيشوف فالدراري ) ورقتها غتوصل تال عندها ..!

خليل:( تنهد و قرب من محمد اميين ) عيط لبسمة تجي لهنا و تجيب معاها الشانطة ديالها تشوف شنوو تديرلها ..! غتخليوها هاكا حتى تعفن لها يديها ؟

سكت مخلي محمد أميين كيدوز لابيل لمراتوو و حكيم حبس حسام فالصالون باش ما يتحرك فين و تا هو دوز لابيل لشريفة و علمها تخلي كاع لي فيديها و تجي دابا ..! تا لحقات هي و بسمة كيجرييو و وقفوو مشوكيين فمنظر ملاك ..!

بسمة مشات ديريكت لعندها هازة شانطة صغيرة د الاسعافات فيديها .. باش تعقم لها الحرقة و تديرلها الدوا و شريفة قربات من حكيم عاقدة حجبانها و هو كثر منها .. صافي جهل و طلعلوو كلشي فالراس .. شاف فيها بحال عمرو عرفها .. بحال يلا كيقولها ظهرك مالح و يالاه كوليها دابا بوحدك ..!

بنفس الشوفة جرها من يديه و حرك عينيه لحسام باش يزيد تا هو ..! وقفهم قدام ملاك لي توكضات شوية بالما لي عطاها خليل .. كتبكي و تعاود ..! و بنرفزة نطق ..!

حكيم: قلتي شريفة كتخوني مع حسام ..! هضرتي فشرفي يعني متأكدة من شنوو كتقولي ..! ما درتي والوو و هما لي دارو تبلاو و ضحكوو عليك ؟ و أنا حماااار بجوج وذنين قدامكم ..! يالاه وريني شنوو شديتي عليهم ؟

شريفة:( وسعات عينيها فيه و قالت ) حكييييم واعي شنوو كتقول حتى نتا و لا ما واعيش ..!!!!

حكيم:( ضحك باستهزاء .. ضحكة مغذذة كياكل فيها راسوو من الداخل ) واااعي و بزااااف كاع ..! باش تهضر فشرفي و تجلس تفصل و تخيط كيف بغات .. خاصها تكون هي نيت واعية و عارفة شنوو كتقول و شنوو كتدير ..! نذذذذذذبح مك نتي و ياه و نشششرب من دمكم قبل ما تفكرو تديروها و عارفكم ما تديروهاش ..! و لكن الغزالة د ملاك فاهمة و شايفة شي حاجة حنا ما شايفينهاش واقيلة ..! ( حط يديه على جنبوو و الثانية كيجبد بيها لحيتوو ) ها هما قدامك آتي ما عندك .. هانا كنسمع لك دابا ..! و لكن تكوني كذبتي عليهم و تبليتي .. راها ماشي غير نحرقك ريتك نجبدها لك ..!

زفر حسام النفس معصب كيسب و يعاود فنفسوو كيتمتم و شريفة شادة على جبهتها .. تطراسالها عرق تما كيضرب بالجهد .. يديها عراقوو و تعصباااات لدرجة ما كتخيلش .. حاسة غتطيح بكريز فبلاصتها من الموقف كامل .. قدام هاذ البشر كامل .. لي تا هما ما بقاو حاملين لا راسهم لا ملاك لا حكيم لا فين محطوطين دابا ..! كلشي سكت و تا ملاك ما لقات ما تقول غير كتبكي بقهرة و ألم ..!

حكيم: ما عندك ما تقولي ؟ ( رخى يديه تا رخاها و تضربات مع رجليه ) حسام فاش قال ملاك كتهضر مع واحد كان عارف شنوو كيقول و متأكد و عندو أدلة عليك ..! و واخا هكاك ما قدرش ينطقها نيشان .. بنننننتكم كتخوووني و نتي بالزاها قد راسك و ما عندك والوو عليهم ؟ ( كمل بالغوات عقلوو خارج .. وجهوو مزنك و العروق فجبهتوو و يديه مطراسيين و التفل كيطير من فموو .. ما بقالوش العقل ) واااا الله ينعل عدو ر*** مراااااتي ماشي ق*** الداخل و الخارج عليها .. باش فينما تحفالك الجرية تجبديها ..!

تنهد محمد أميين مغمض عينيه ما باغيش يسمع هاذ الهضرة و خصوصا حدا مراتوو ..! كن جات غير فالخوت و حسام غيسرطوها و عمر لي وقع يعاود يتجبد ..! و لكن قدام بسمة تحرج هو و شريفة و بسمة نفسها و البقية ..! تا حرك لها راسوو تنوض تخرج من تما و بالزربة تا هي وقفات تقول كانت جالسة على العافية ..!

خلات ملاك و الشنطة ديالها تا ترجع تكمل و مشات كتعتر و محمد أميين جر حكيم من يديه كيحاول يبرد الجو بيناتهم ..! لكن والوو شعل شعلة وحدة .. الشرف هذا و كن كان ما كيعرفش شريفة و حسام مزيان .. و تيق الهضرة كن طاحت الروح ..! ما سمعش غير من شريفة لي عاوداتلوو تا حسام فاش خلاها فالطبيب جمعهم دقة و حطلهم كلشي فوق الطبلة ..! من طاق طاق للسلام عليكم ..!

صافي ما بقى ما يتخبى و ما بقى فين يصبر منين خرجات داك الهضرة كلها و أولها و فهمها تا هو على طريقتوو .. تا مرض فصحتوو و زادت بشنوو قالت فالطبيب .. كتبرهش و تلعب عليه .. و تا داك الكلام وصلهم بالحرف ..!

تشوهات معاهم و ما رضاوش نهائيا بشنوو كيقول و هو متأكد من الفوق و عارفين حسام ..! زلال و ضحوكي و نشاشطي و نهار توقف عليه فالصح كتلقاه .. معقول ماشي غذار و حاسب حكيم خوه و كثر .. ما غيجيش و يكذب على ملاك و يلبق لها ..!

و بلاصة ما يبرد حكيم عاد ما زاد صعر كثر .. ملاك كتبكي من جهة و شريفة من جهة ثانية .. ما رضاتش ما رضاتش تمنات الأرض تتشق و تبلعها و لا هاذ الوقفة ..! صدرها تزير عليها و كلها كترجف بالأعصاب تا بغات تطيح على وقفتها و شدها بالزربة خليل جلسها و مشى جاب لها كاس د الما مع السكر ..!

حكيم: هاذ شريفة لي واحلة لك .. مراااتي شرفها من شرفي و أم بنتي من الفوق ..! معاندة معاها على الزواج و هانتي وصلتي لهضرتي ..! هي بعدا محافظة على دارها و عارفة معنات وحدة مزوجة ..! يلا طاحت معايا فالحرام ( ضرب فصدرو ) أنا السبااااب و تزوجتها بعززززها و هزات راسها قدام كلشي و يلا كانت سكايرية و كماية .. حيث ما لقاتش العائلة لي تهزها و الخوت لي يدورو بيها بنبهوها يغوتوو على مصلاحتها و يضربوها كيفما كانوو عندك نتي ..! كيفما هي يتيمة حتى نتي يتيمة و كن ما كنا حنا كن ضربوك الحيوط كثر منها .. كن ما أنا هزيتك بسناني و صبرت حبيبة و قنعتها تدخلك على ولادها لي ما لاقيينش حتى خبزة ما ياكلوو كانت حالتك غتكون كفس منها ..! لحم كتافك من خيري باش تجي تطعنيني دابا و تق***، عليا ..! ( زفر النفس بالجهد كيسوط ) باغاني نمن عليك ؟ و لا نعاودلك زبايلك د حياتك كاملة و نقارنهم لك مع شريفة باش ترتاحي و تنفسي حتى نتي ؟

عدنان:( زير على كتافوو و قال ) صافي ا حكيم ( بصوت خافت ) قسحتي معاها ..!

حكيم:( رد بالنفي ) قسحت ؟؟ علاه حنا ما تقسحناش من فعايلها ؟ ( ضرب فصدرو ) تقسحت ضووبل ديالها فاش هضر معايا حسام و فاش وقفات كتعد لي فالضوسي الكحل د مراتي بحال يلا انا جاي من مور الشمش ما عارفوش ..! باغى تديري بحالها ؟ بغيتي تخرجي لتسلكيط ها الطريق قدامك تلاقاي الكوري و لا زبل و شبعي تبزال مع راسك .. غير ديريها و نتي ديال راسك ما تجرجريش معاك ولد الناس لي عيى صابر على هبالك تا وصلات بيك تلبقيها لوو هو و مراتي ..! هه ..! ما تقسحتش أنا فاش جبداتلي شرفي ..! نذبحوهم و نتبع راسي ليهم و نخليش نبشة تقيسوو و ختي كتفصل فيه كي بغات ..! ( شاف فيها بحرقة و عينيه حمارو ) ختي لي كانت الضو د عيني .. نقطع من لحمي و نعطيها .. نمووت أنا و تعيش هيا ..!

ملاك:( وقفات و دموعها سايلين من الحريق و من هضرتوو ) ح حكيم غير سمعني ..!

حكيم: شنوو غنسمع ؟ ( شير لشريفة لي حانية راسها كتبكي فسكات شادة على كرشها ) يلا هي دارت شي ق*** فحياتها .. دارتها و هي ديال راسها و تحرقات هي ماشي نتي ..! حياتك عيشيها بالطول و العرض و لعبي بالعافية حتى تشبعي .. ما كاين لي يهضر معاك و لكن ما تقيسينيش أنا و خوتك و تحرقينا معاك ..! ( هز يديه كيعد ) ما لقيتيها كتفسد مع راجلك .. ما جراتك من يديك و داتك عند الرجال تزهاي معاهم .. ما عطاتك الشراب و الكارو و قاتلك بداي .. ما طاحولك ولادك نتي و خسرتيهم .. كلشي دارتوو هي و تخلصات فيه هي ..! اما تجرينا كااااملين معاك و تشتتي عائلة على قدها برجال قد السخط و تلعبيهم نتي على كانتك .. هي لي عمرها تكون لك من عندي ..!

شاف فخوتوو و ملامحوو متشنجة .. من اللول تافقوو تاكلها و ما يحنوش فيها و لكن ما يلوحوهاش .. خصوصا حسام قالها لهم فاص ..! ما بقيتش غنزيد نصبر و الطلاق هو الحل من جهتي ..! و لكن دابا بانلوو العكس تماما و كاع ديكشي لي كان ناويه قلبوو ..! صعر و مرض فخاطرو بالجهد و غيدير لي يريحوو هو و يلا كان هاذشي غيربيها مرحبا ما كانش زايد ناقص ما غيبقاش يحرق دموو معاها كثر ..!

حكيم: خوتي ما غنخسرهمش فطريقك و دابا غنفضيوها ما حد كلشي مجموع ..!

جبد تيليفونوو عيط على حبيبة تجي عندهم دااابا بوحدها تا قطع كيزرب لعند شريفة لي تحنات على الأرض كترد غير الما و صوت بكاها مسموع مجهد .. كتبكي و ترد و الفولار خانقها باغى غير تنفس و ما قادراش ..! وجهها تزززززنك و العرق فجبهتها غير ما تطراسى كثر .. بغات توقف ما لقاتش الرجلين لي يهزوها ..! فشلات كاملة على حكيم تا هزها تكاها على الفراش و هي كتبكي بأنين .. نيفها كيسيل و دموعها بحال الشلال .. مزيرة بيد على حكيم و يد على صدرها كتطلع راسها تال السما باغى تنفس و ما قادراش حتى كتلقف ..!

تخلعوو كاملين عليها تا مشى اللون من وجههم ..! خليل طار للكوزينة جاب الما كيعطيه لحكيم كيشربولها ..! و محمد أمين هز المراش ديال الزهر لي فالصالون كيفزك لها فيديها و وجهها و عنقها ..! طيرلها حكيم الفولار و خلاها على الله تنفس ..! رجع صفففففر بالخلعة و عينيه خارجين فيها و هي شادة فيه و حالتها حالة ..!

تا دفعهم عدنان و حط يديه على جبهتها مغمض عينيه كيقرا فالقرآن كيجود لها بصوتوو لي ما شاء الله عليه كيفاش كيدخل الهدوء و السكينة على القلوب ..! جهد نص ساعة ديال القرآن و الرقية عاد ارتاحوو ملامحها ..! كتبرد بالتدريج فهاذ المدة و هما كيبردو معاها ..! و واخا هكاك دموعها ما بغاوش يحبسوو .. كتحاول تحبسهم و والوو .. ديكشي لا إرادي ..!

حبيبة: لا حول و لا قوة إلا بالله .. عوييينة و تطرطقات فيكم .. يا ربي تلطف بينا يا ربي ..!

سكتات كتسمع لتجويد عدنان و حكيم و أسية ضايرين بيها خايفين عليها ..! و أكثرية حكيم لي شافها فداك الحالة قداموو قبل ما تجي أسية ..! كان كيشوفها صافي غتمووت بين يديه ما قادراش تتنفس نهائيا .. قلبوو تهز معاها ..! و نساو كلهم ملاك ..!

تا خرج حسام باغي يتنفس فخاطرو ..! شد نور و ليث ولد بسمة و محمد اميين لي صغر من نور .. يالاه عندو عام و شوية ..! خداهم من على بسمة كيتلف معاهم و دخلات هي كتجري للصالون تشوف شنوو واقع .. تأسفات على حالة شريفة لي كلها فازكة و سايخة .. ارتاحت شوية مع القرآن ..!

و مشات هي لعند ملاك عقمات يديها هما اللولين و كملات لها الدوا و الفاصمة و كتبات لها الدوا لي تاخذ على ود الحريق لي عاطيينها و على ود سيكارطيس ..! و غير كملات معاها شكراتها حانية راسها بصوت خافت ..! و ناضت للكوزينة ..! شافت جهة البوطة و الحديدة لي محطوطة تما ..! هضرة حكيم و خوتها لي نفرو و كرهوها العين ما قادرينش يهزوها فيها .. حسام لي فلحظة غضب رمى عليها يمين الطلاق و حبيبة لي ما سولاتش فيها منين دخلات و بالها غير مع شريفة ..!

هزات موس من المجر و دخلات للطواليط لي فالطابق لتحت .. خلات الباب مردودة عليها .. كتشوف فالمرايا عاضة على شنافتها كتبكي بالجهد و كلها كترجف .. حتى غمضات عينيها مزيرة على الموس فيديها كترعد ..! ضربات معصمها مرة فتحاتوو و زادت ضربات ثاني باش تغرق الجرحة .. تا بداو الدمايات كيسيلوو و هي كتبكي و قلبها كيخبط بالجهد ..! عاودات فاليد الثانية و جلسات فوق الزليج فالأرض راخية يديها بجوج كتشوف فنقطة وحدة بملامح ذابلة ..!

مدة و عاد انتابهوو لها غابرة .. كلهم تشطنوو مع شريفة لي واخا تهدنات مزالة الترويعة شاداها تدور تدور و ترجع تتقيى ..! تا طلعها حكيم للبيت و طلعات معاها أسية لاسقة فيها مخلوعة عليها ..! طلق لها القرآن فالتيليفون و خلاها كتبدل لها باش تنعس تحاول ترتاح شوية ..!

أما هو فتح خزنة اوطوماتيك عندو فالماريوو .. جبد منها فلوس محسوبة .. خذا لي بغى و دارو فأونفلوب و رجع الباقي لبلاصتوو شاد عليه ..! شاف فشريفة مرة اخرى قلبوو مزير من جهتها و هبط فالدروج كيدردك تال للتحت .. سمع غوات بسمة لي خلات الدراري كيقلبوو على ملاك فين شداتها و دخلات هي للحمام باغى تغسل يديها من الدوا لي بقى لها شوية فصبعانها ..! تا لقاتها تما عينيها منيمين بدات تسخف غارقة فدماياتها ..!

جا مع الغوتة ديريكت تا دفع الباب شافها كتقلب لها النبض فعنقها و كتشوف باش تحزم لها يديها ..! غمض عينيه عاض على فموو ..! زادت جعراتوو تا تحنى عندها عطاها تسرفيقة سخفاتها ديريكت و هو صاعر عليها ..!

حكيم: كتمثلي ففيلم هندي الله ينعل

زير على لسانوو بزز باش ما يسبش خصوصا قدام بسمة ..! جهلاتوو و مرضاتوو .. تسنى بسمة غير حزمات لها يديها و هزها عندو خارج كيجري بيها و الدراري موراه تا هما ..! بقى غير حسام مع نور و ليث .. أما حتى بسمة مشات معاهم متكية ملاك على رجليها كتقلب فيها و حكيم صايك و محمد أميين قداموو ..! و الطونوبيل الثانية فيها عدنان و خليل و حبيبة لي كبدتها تشوات بغات تحماق بالبكى من المنظر د حكيم مخرجها ..!

المنظر لي شافوو حتى حسام و غطى للدراري عينيهم باش ما يتخلعوش و غير مشاو من تما .. هزهم دخلهم للداخل طالع بيهم كيعيط على شريفة و أسية ..! تا خرجات عندو تاسانوو عطاهم لها ترد لهم البال و هبط كيجري تا هو .. مكسيري فالطريق مدوز لابيل لمحمد أمين .. باش يعرف شمن كلينيك مشاو لوو ..!

مسافة الطريق و كلشي كان تما .. دخلوها و تكلفوو بيها من كلشي .. تا كملوو معاها و خرجوها لبيت فين ترتاح .. مركبينلها السيروم و الدم لي خسراتوو باش تعوضوو و يديها مخيطين و ملويين بالفاصمة ..! دخلوو عندها كاملين و واحد كافر كثر من الثاني ..! سبقهم خليل و عطاها تسرفيقة قلبات لها الوجه .. شادها من ذقنها و مخرج عينيه فيها ..!

خليل: شنوو هاذ البهلان كتديري فيه ؟ باغية غير تمووتي .. نصفييوها لك فخطرة و نتهناو كاملين ..! ( جات تهضر و نهض فيها ) غتزيدي كلمة غنهرس لمك فمك .. طغيييتي حاسبة راسك ما عرفت فين ..! هاكا خليتك قبل ما نسافر ؟ بقى لك غير تنتاحري ..؟

عدنان: تمشي لا دنيا لا آخرة .. ما كفاكش هاذ الروينة كاملة لي دايرة ..!؟

حكيم:( حرك راسوو بالنفي و جبد لونفلوب د الفلوس من جيبوو .. قرب من حبيبة فتحلها يديها و حطولها تما و قال ) حقها فالورث ديال باها الله يرحموو .. ها هو .. ما ناقص حتى درهم ..! و الفلوس لي حاط لها فالكونط .. تعتابرها صدقة من عندي .. مسامح لها فيها دنيا و آخرة ..!

حبيبة:( خرجات عينيها فيه ) حكيم ما تقتلنيش حتى نتا ..! جيبوو شي موس و خشيوه فيا و تهناو ..!

حكيم:( رد هاز يدو باستسلام ) بنتك ماشي غير خشات فيا موس ..! ( سكت شحال كيفزك فشنايفوو عاد كمل ) هنا حديناها أنا و ياها ..! نهار تشوف كمارتي تبزق عليا و تزيد تا السلام لهلا باش تقراه ..! ( حك حاجبوو و خشى يدو فجيبوو ما كيشوفش نهائيا فملاك ) كبرناها و وصلناها .. هذا هو الجهد ..! تبارك الله ها هي بالماستر ديالها فينما بغات تخدم تخدم و تهز راسها و يلا بغيتي تسكني معاها و تريحي قلبك من جهتها .. اختاري الدار لي بغيتي و من غذا تقلب فسميتك ..! ( رمش فيها بعينين حومر ) فوق هاذشي ما بقى عندي ما نزيد .. الله يعرضها للسلامة ..!

قال هضرتوو و خرج مخلي خليل كيعيط عليه ..! شاف حتى عيى و تبعوو كيجري حتى لحق عليه و ركب معاه ..! و موراهم حتى عدنان و محمد أمين ..! ما قدروش يخليوه بوحدو واخا عارفينوو ما غيبغيش يهضر دابا و ما غيقول حتى كلمة ..! و لكن مكانة حكيم عندهم كبييرة بزاااف ..!

مرتابطين ببعضيتهم لواحد الدرجة ما كتصورش ..! شحال ما كبرو و ووعاو ديما راجعينلوو ..! واخا مشاغل الدنيا ما كتخليهمش يتجمعوو كي كانوو و لكن التيليفون ديما بيناتهم .. كيشوفوو فيه الأب الروحي ديالهم و لي كيفهمهم غير بالشوفة .. يقدر يغوت و ينهض فيهم و يتقاتل معاهم كاع و لكن عمرو يفوتهم و نهار يوقفوو اونبان واحلين ما كيحتاجوش تا يمشييو و يهضرو معاه من ذاثوو لراسوو كيمشي يفكهم و يحفر معاهم ..!

تبعهم حسام من بعد ما تأكد ما بيها والوو ..! غير هو شد طريق دارو ما بقاش قادر يزيد دقيقة اخرى تما و لا حدا خوتها ..! و فالاخير بقات معاها غير حبيبة لي هازة هموم الدنيا فقلبها كل شوية تتنهد بحرقة و هي كتشوف بنتها مكمشة على راسها كتبكي فسكات و دموعها نازلين ..!

عارفة ولادها غيديرو لي فجهدهم باش يردو حكيم و يبردو القلوب .. ما يخليوش العداوة تنوض بين الخوت .. غلطات و تعاقبات و باقي غتعاقب و تندم كثر .. و لكن يشتتو عائلتهم .. مستحيل تكون ..! و هو لي علمهم هاذشي و عمرو سمح فشي واحد فيهم حيث غلط معاه .. يكفي غير يشوفوو تعلم من خطئوو ..!

و لكن السؤال هنا واش ملاك غتعلم من لي فات ؟ واش هو غيقدر ينسى أصلا شنوو وقع و الهضرة لي خرجات و الخيانة ككل .. خصوصا وجهوو لي كحال مع حسام .. ضربات سنين د العشرة فالزيرو و خاصهم مدة عاد يرجعوو كي كانوو .. هاذشي يلا رجعوو مع حساسيات الطلاق .. و هاذشي لي ما كانش باغي يجي شي نهار و يوصلولوو ..! ويلا هو دوزها لختوو واش شريفة غتقدر تقول صافي ماشي مشكل حتى حاجة ما وقعات ..! من بعد ما سمعات و عرفات علاش كان مقاطعها هاذ العامين ..! و كلوو كوم و اتهامها فشرفها كوم ثاني ..!

فرق كبييير ما بين الصراحة و الوقاحة .. و هي ما صرفات فيها غير الخير ..! شريفة واخا هكاك يلا حقدات و كرهات مستحيل ترجع و قلبها كيكحال على بنادم و شحال ما كانت المعزة .. شحال ما الضربة كتجي قاسحة كثر ..! على هاذشي ما هضرش حكيم من قبل .. ما بغاش القلوب تتغير بيناتهم .. داير فبالوو غيجي واحد النهار يتصالح معاها و هي تراجع راسها ..! و لكن ما حدو هضر و حط كلشي فوق الطبلة .. إلا و صافي .. قطع ورقتهم و ما بقات هضرة فوق لي تقالت ..!

و ديكشي لي كان ..! ما بقات هضرة .. واخا تبعوه ما زاد تا حرف فوق لي فات ..! حدو سيفطهم للاستقبال خداو السوارت د لي شالي ديالهم و محمد أمين هبطاتلوو أسية ولدو ليث ناعس .. شكرها و مشات تا هي مع حكيم لشاليها لي عاد قادوه .. لقات لي فاليز ديالها تما ..! شدات عليها كتنهد و رجع هو طرق باب الفيلا عليهم ..! سيق داك الدم و دخل للكوزينة عمر كاس د الما و طلع بيه للبيت ..!

حطوو فوق الكوافوز دار فيه دوليبران .. كيتحرك فالبيت بسكات ..! بدل عليه و شرب الدوا و تخشى حدا شريفة لي فاقت مع حل لباب ..! تنهدات بصوت مسموع و قربات منوو تكات عليه و باستوو فصدرو بدفئ و هدوء ..!

شريفة:( بحزن ) كمل عليا دابا .. هانا فكرتك ..!

حكيم:( تنفس بالجهد تا طلع صدرو و نزل بدون رد )

شريفة: شنوو درت لها أنا حتى تهز فقلبها من جهتي لهاذ الدرجة ..! ما فهمتش ؟ ( لا رد من حكيم ) واخا هكاك ما كانش خاصك تحرقها ا حكيم .. أنا لي مجرباه و حاسة بيها و حتى نتا عقلتي داك النهار كي كنت بغيت نموت فيها واخا أنا كنت صغيرة و لكن لدابا ما قدراش ننسى داك اللقطة و باش حسيت ..!

حكيم:( بقى شحال ساكت تا بعدها من فوقوو و تقلب على جنبوو مغمض عينيه ) وجدي راسك غذا غنسافرو .. علمي حتى أسية ..!

قال كلاموو و سكت حتى طفات الفايوز د البيت ..! لا هو بغى يديه النعاس لا هي ..! كل واحد فيهم كيتقلب فجهة و يتنهد ..! تا عيات شريفة و مشات فنعسة حلوة .. فيقها غير الريفاي ديال الخمسة د الصباح باش ينوضوو يصلييو و يجرييو ..! طفاتوو مدكدكة .. عينيها بزز كتحلهم ..!

شافت جهة حكيم شاعلة الضوو لي حداها .. تا بانلها عرقااااان و وجهووو حممممر مزنك ..! عقدات حجبانها بخوف و بالزربة حطات يديها على جبهتوو لقاتوو كيلقف بالسخانة ..!

شريفة:( طبطبات على حناكوو كتفيق فيه ) حكييم .. حكيييم .. كتسمعني ؟ ( بزز حل عينيه فيها .. منفوخين و حومر بحال الجمر و رجع شدهم .. ذاثوو و عظاموو كاملين كيعكروه ) باش كتحس ؟ واش عيان بزاف ..!

ما ردش عليها .. ما قادرش يهضر فخطرة ..! تنهدات بقوة مخلوعة و وقفات كتلبس البينوار عليها ..! دخلات بالزربة للحمام فزكات فوط صغار برداتهم و حطاتهم فوق راسوو و هبطات للكوزينة ..!

قلبات على الدوا د السخانة ما لقاتوش ..! فلخر جبدات اللتشين عصراتوو كتطير باش ما تعطلش عليه ..! دارتوو فالكاسرونة سخناتوو و زادت معاه جوج فصوص ديال الثومة محكوكين .. خلطاتهم مزيان حتى ذابوو و دارتهم فكاس د الزاج ..! مع بانيوو فيه الما و الثلج مربعات من الفريكوو ..!

طلعات حاضية مع الدروج .. جلسات حداه نوضاتوو بزز باش شرب لها داك الكاس لي روعلوو قلبوو بالجهد و لكن عارفاه غينفعوو بزاف و يهبطلوو السخانة ..! و من موراها بدات كتبرد الفوط فالثلج و تديرهم لوو فراسوو و يديه كتماصي و تبردهم لوو هو و رجليه ..!

بقى فيها بزاف و كانت عارفة داك الأعصاب كاملين غيخرجوو فيه و بلي ملاك جرحاتوو بالجهد و كلى دقة قاسحة منها ما قادرش يسرطها ..! خلاتوو هكاك و هزات تيليفونوو جبدات نوامر خوتوو كتعيط عليهم ..! لي شد لها فيهم مزيان يعتقوها يجيبوولها غير الدوا ..!

قبط لها عدنان لي ناض يصلي الفجر .. هضرات معاه مخلوعة كتزرب فيه .. تا ناض فالبلاصة خارج غير بالكيطمة و البانطوفة ..! ديمارا الطونوبيل و زاد فالطريق كيقلب على شي فارماسيان بيرمانونص ياخذ منها الدوايات لي وصاتوو عليهم شريفة ..!

بزز لقى وحدة .. شرا منها و رجع دق عليها فتحاتلوو بفولارها و قميصها .. طلعاتوو معاها خلاتوو كيبدلوو هو الفوط و مشات هي بالخف وجداتلوو سوب خفيفة مع تمر عمراتوو بالنافع يعطيه الطاقة شوية ..! نساو راسهم مع الصداع و ما كلى لا هو لا هي و خاص ضروري ياكل شي حاجة باش معدتوو ما تضرش ..!

كانت السخانة نقصاتلوو شوية و التدكديكة خلاص ما كيقدرش يتململ .. بزز تحرك لهم ..! غير باش يفتح فموو يوكلوه و يسرط ما عندوش الجهد ..! حدو كلى شي ثلاثة د المعالق مع نص تمرة و طاح مهدود .. مدولوو الدوا .. مألميين من جهتوو ..! نهار و ليلة لهلا يعيدها على حتى واحد فيهم ..!

و غير صبح الصباح و شرقات الشمش مزيان .. كلشي ساق لوو الخبار و أولهم أسية لي فتحات لها لالة فاطمة الباب و طلعات كتجري باغى تسول فيه ..! فتحات الباب بالجهد تا ضار عندها عدنان .. كيسحابلوو شريفة لي جات من عند نور ..! ساعة صدقات تاسانوو ..! رمش عينيه فيها كيشوف شحال تبدلات .. كبرات و زيانت ..! شي حاجة مبدلة فيها ما عرفهاش شنوو هي و لكن لي عارف مزيان ما خاصوش يشوف فيها هكاك و بالزربة حنا عينيه كيتلف هنا و لهيه ..!

عدنان: شريفة ها هي غير هنا .. غتجي دابا شوية ..!

أسية:( حكات شعرها حشمانة .. من لي جات و هي كتفادى العين تطيح فالعين و لا يتجمعوو فبلاصة وحدة .. و حتى الظروف ما كانوش كيسمحوو ) امم .. ااه .. واخا أنا نتسناها لتحت ..!

عدنان:( غلغل يديه فشعرو القوي مبعدو على عينيه مرجعوو للور ) غير خليك ماشي مشكل .. بعدا مبروك النجاح عقبال للباك ان شاء الله ..!

أسية:( تبسمات بأدب ) شكرا ربي يخليك ..! ( نحنحات ) نتا مزيان بعدا .. أمورك هانية ؟ ( طرطقات صبعانها كتلعب فيهم ) من شحال هاذي ما جات الفرصة باش نتشاوفوو ..!

هز راسوو بالايجاب شاف فحكيم لي يالاه دخل معاه الدوا نيت و ارتاح ناعس و بهدوء شير لها بيديه لبرا ..!

عدنان: يالاه نخرجوو نخليوه ناعس بلا ما نفيقوه بالهضرة .. يرتاح شوية ..!

أسية:( شافت فحكيم بأسف و قالت ) الله يشافيه مسكين .. واخا يالاه ..!

سبقاتوو مشات للبيت ديال نور تشوف شريفة هاربة منوو قبل ما يبقاو الراس فالراس كيبلقوو فعينيهم ..! و هو هبط نيشان للصالون ..! جا مع الدقان فالباب فتحوو .. لقى بسمة هازة ليث مكمش فالغطى و محمد أميين هاز لها الصاكادو ديال ولدوو ..! و موراهم خليل الوحيد فيهم لي ملامحوو زعرة شوية خصوصا لحيتوو غادية للاحمر و لا نقولوو النحاسي ..!

داير كاسكيط مقلوب على راسوو و مخرج شعيرات من القدام ..! كورميط فيد و اليد الثانية فيها ساعتوو و هاز التيليفون كيكتب فيه ..! تيشورط عادي نص كم و شورط مع صبادرين ..! ملامحوو مبشورة و باينة فيه قلبوو حليب ماشي غير بيض ..!

دخلوو كلهم ..! باغيين يشوفوو حكيم كي بقى و فنفس الوقت .. ما جاو و شدو الطريق تال عندو .. إلا و باغيين يتجمعوو معاه ..! لي وقع غيخلي حساسيات و خصوصا عند شريفة ما غترضاش قدامهم و غتبقى حشمانة و مجنباهم .. تا تفوت مدة عاد يرجعوو كي كانوو و الموضوع يتنسى ..! و هاذشي لي ما باغيينوش من اللول غيتعاملوو بحال حتى حاجة ما وقعات .. ما كاين لاش يتسناو مدة ..! و منها حتى هي ترتاح و ما تبقاش هازة همهم فقلبها بحال الجبل ..!

واخا الموضوع كبير و لكن بالنسبة ليهم ما كاين لاش يزيدو يكبروه كثر ..! موالفين بمصائب بعضياتهم .. كتنوض الحرب و من بعد كيصفاو الخواطر و كيتعاملوو عادي بحال عمر داك العيب تجبد ..! كيفما سبق و قال حكيم .. مستحيل يشتتو عائلتهم و علاقات على قدها ..!

هبطات شريفة عيانة من وجهها لي صفر و عينيها داخلين و منفوخين ..! حداها أسية هازة نور كتبوس فيها و تطبطب عليها و هي مكمشة مدلية شنايفها مغوبشة ..!

شريفة:( تفاجئات بيهم و واخا هكاك تبسمات بهدوء .. واخا باين فيها حشمانة و مرتابكة غير من حناكها لي تزنكوو و عينيها لي كتلف بيهم الشوفة ما قادراش تهزهم فيهم ..! ) احم مرحبا بيكم ..! صباح الخير بعدا ..!

خليل:( تبسم و حط تيليفونوو حداه .. ناض عند أسية خذا من عندها نور قفزها فالسما ) عمووو ..! مالنا صابحين مغوبشين ..!

محمد اميين:( ضحك و قال ) غير التغوبيشة د باها ( شافت فيه و قال بصوت طفولي ) اييه عليك كنهضر ا بنت باها ..!

شريفة:( تبسمات و قالت كتشوف فيها ) بعدولي من بنتي ها هي غادي تبونيكم .. وريهم البونية ديالك ..!

بسمة: هههه غير ما تضربليش ولدي و تتتهلى فلخرين ..! سبحان الله ديما الدراري الصغار .. لبنات كيغلبوو الدراري ..!

محمد أميين: ا قلبك عامر ا لالة بسمة ( شاف فخليل ) و ها نتا قالت لك ما تضربلهاش غير ولدها و حنا لهلا يقلب ..!

بسمة: خليني ننتاقم شوية ..! سمحيلنا ا الزين جينا هجمنا عليك على الصباح ..!

شريفة: مرحبا الدار داركم ..! حكيم يالاه نعس نفطرو و نفيقوو ياكل شي حاجة و يلا قدر يهبط يجلس حدانا و لا نطلعوو عندو ..!

نور:( قالت مغوبشة عند خليل ) مامي بابا دوولوو فيكوو باكاكا ؟

شريفة: لا نخليوه ناعس ما نفيقوهش دابا .. ما باراكاش عليه .. هو مريض مسكين .. نبقاو ساكتين بلا صداع حتى يهبط عندنا ..!

نور: واااحااا ..! ( مصات شنافتها ) بابا ديدي ؟

شريفة: ااه عندو ديدي أ ماما .. يالاه خليك مع عموو بعقلك حتى نجي ..! بسمة يلا بغيتي تطلعي ليث للبيت الفوق ينعس مرتاح حسن لوو ..!

بسمة:( حركات راسها ) واخا حسن هنا الضوو غيفيق خاسر ( ناضت هزاتوو ماشية مع شريفة ) خلاني ليل كامل بلا نعاس .. كينوض السنان قتلاتوو مسكين السخانة و الحريق كيبقى يتلوى و يتغذذ معصب .. خاصوو غير فاش يحك لحم فموو و سنانوو .. تا درتلوو قويلب عاد شوية ..!

خليل:( رمى يديه على أسية جرها عندو كيضحك معاها و نور مكمشة فيه ) ايوا ا لالة أسية فين هاذ الغبور ديالك نتي ..! ما بقيتي تسولي ما بقيتي تعرفي حد ..!

عدنان:( هز عينيه فيهم ساكت )

يتبع...

‎