عرس الذيب الجزء 31

خليل:( رمى يديه على أسية جرها عندو كيضحك معاها و نور مكمشة فيه ) ايوا ا لالة أسية فين هاذ الغبور ديالك نتي ..! ما بقيتي تسولي ما بقيتي تعرفي حد ..!

عدنان:( هز عينيه فيهم ساكت )

محمد أميين: الناس لكبار دافعين علينا شبابهم غالي ما بقاو يعرفوو حد ..!

أسية:( ضحكات و عنقات خليل و باستوو فحنكوو ) نسيت كاع ما سلمت عليكم .. زربتوو عليا هاذ الصباح ..! ( غمزات محمد أميين كيجيها على الكانة فاش كتكون راشقة لوو ) واش انا هاذ الزين كامل ندفع عليه كبير ..!

محمد أميين:( دار رجل على رجل طانز على الوقت ) قوليها لراسك را حنا غير متواضعين و جالسين كندردشوو معاكم اما واااهلي ..!

عدنان: بلاصتكم فالمريخ ..!

مشات سلمات تا على محمد أميين بالوجه و شافت فعدنان عارفاه ما كيسلمش .. حركاتلوو راسها بالايجاب مع ابتسامة و هو مخنزر فيها بواحد الشوفة غياكلها ..! جمعات حجبانها ما عرفاتش مالوو و بلا مبالاة رجعات حدا خليل و قالت

أسية: عاد هضرت مع ميليسا قبل ما نجي ..!

خليل:( شاف فمحمد أميين شاد فيها ) نقزاتني أنا كااامل و ماشية عند ميليسا .. زعما راني ما ناسياكش كنهضر مع المدام ..! هاذ الناس د العسكر كاملين قوالبين و لا غير نتي شديتي الحرفة من عند الطنايزي د حكيم ..؟

عدنان: نتوما الربح ..!

أسية: هانتا كتشوف ههههه آش خلاتها شريفة .. الشبكة كتعيب على الغربال ..! ( خطفات لخليل الكاسكيط و قالت ) علاش ما جبتيش ميليسا معاك .. غزالة داك البنت .. تعلمات العربية شوية هضرت معاها جلسات كتعاودلي شنوو حفضات ههه شدات فالكوسكوس ما بغات تطلق ..!

محمد أميين: باش تعرفيه مضروب غير على كرشوو .. هاذشي لي معلمها ..! خلي حتى تزوجوو و نزيدولها حنا الدروس لي ينفعوها ..!

خليل: هههه بحال نهار بغيتي تعلم ماري السوسية ..؟ ( لعب بحجبانوو كيشوف فيه ) غير خلي داك الدروس عندك ..!

عدنان:( بتساؤل قال ) ما كتهضرش بالعربية كاع ؟ ياك نصها ألماني و النص الثاني مصري ..؟

خليل:( رد بالايجاب ) ماماها مصرية و باها سويدي غير هي تزادت فألمانيا .. و لا نوو ما كتعرفش للعربية كاع ..! واخا عيات امها تعلمها شدات شي حاجة قليلة و صافي .. ما كتمشيش لمصر فخطرة ..!

عدنان: ماشي مشكل دابا تتعلم ..! و فوقاش العرس ؟

خليل: قرييب قرييب ..! غير هي تقاد امورها و نتزوجوو تما بعدا نصوبوو وراقنا و نجييو نتزوجوو هنا و نديرو شي عراسية نفوجوو بيها ..! غالبا فالربيع الجاي ..!

عدنان: مزيان الله يسخر ..!

خليل: أمييين يا ربي ( لعب برجليه كيهز فنور ) ا عموو مالنا مدابزين ( حيد لها يديها من فمها كتمصها ) زولي هاذي من فمك .. كخا ..!

نور: انننن مني مني ..! ( رداتها و حيدها لها و رجعات قالت مجننة ) انننن لوولوو مني .. وييينة ..!

خليل:( فهم قالت خليل لي كتعيطلوو لولو .. بعد مني راها زوينة ما كتديرش زعما شي حاجة خايبة ) لا ما زويناش خايبة ..! ما تعاوديش تديريها و لا غندابز معاك و ما نعطيكش الحاجة لي جبتلك ..!

شريفة:( طلات عليهم ) أسية أجي واحد الدقيقة ..! ( تبعاتها و قالت ) ما قادرة نصوب والوو للفطور ريحة الماكلة كتغيلفني .. سيري عندهم للمنتجع لداخل لبلاصة البيفي و لا الريسطو ديالي كاع و قولهم .. يجيبولنا الفطور للهنا كامل .. وقفي عليهم حتى يقادو كلشي و اجييو ..! سيفطت فاطمة بحالها و نسيت ما قلتها لها ..!

أسية: واخا أنا نمشي .. بسمة فين هي ؟

شريفة: مع ولدها كترضعوو .. فاق كيبكي مسكين موجع ..!

مزالين كيهضرو وقف عليهم عدنان بتساؤل ..!

عدنان: نعاونوك فشي حاجة ؟ بلا ما تعذبي راسك و نتي عيانة .. بلا تكلفة .. كاينة شي حاجة نقادوها غير حنا و لا نخرج نجيب الفطور من برا ..!

شريفة: لهلا يخطيك .. كلشي كاين ما عندك فين تتعذب .. و تا يلا ما واجدش فالدار لوطيل غير ديكشي باش عامر ..! ها أسية غتعلمهم يتكلفوو ..!

أسية: واخا أنا نمشي نجيب ديكشي ..!

عدنان: تسناي نمشي معاك ..! ( شاف بنص عين فشريفة لي تبسمات بهدوء ما قالت والوو ..! )

خرجوو بجوج و هو مزال بالكيطمة و البارطوفة فرجليه كيجرها ..! شعرو رطب و قوي مرة مرة كيهبط على عينيه تا كيبرزطوو و يبعدو ..! حركة كتضحك أسية لي جامعة يديها قدامها كتشوف فيه بنص عين ..! غتكذب يلا قالت ما كيعجبهاش .. زينوو و شخصيتوو ك كل كتدغدغ لها القلب ..!

واخا كانت كتقول صافي راها نساتوو لي بعيد على العين بعيد على القلب ..! كثر من عاماين ما شافتوو ..! القرايا عندها مزيرة و العطل محسوبين ..! ماشي ديما كتجي فيهم .. بعد المرات حكيم و شريفة لي كيمشيو لعندها يجلسوو فالرياض ديال مراكش ..!

و لكن غير عاود تجمعات بيه فنفس البلاصة ..! القلب بدا كيضرب غيفرفر من بلاصتوو .. باغى تسخف و رجليها ماشي منها ..! اللسان تلوى لها و كلها كتعرق تالفة ما عارفة راسها من رجليها .. فين مشات شخصيتها و علاش كيوقع لها هاكا ديما معاه ..! واخا هكاك ضابطة راسها و ما كتبينش الحرب لي واقعة فلداخل ديالها .. دايرة فبالها ممكن جدا ما يكون كيحس بوالو من جهتها .. ما باغاش تعاود تتعلق بيه ..!

عدنان:( بعد مدة صمت قال ) كي جاتك مراكش ؟ عجبك الجو تما ..!

أسية:( تبسمات مرة مرة كتشوف فيه بعينين كيلمعوو ) زويينة و ناسها ناشطين ما تسخاش بيهم .. مرة مرة فالويكاند كنهبط للمدينة القديمة كنشبع غير ضحك معاهم ..! واخا الصهد عندهم تما بزااف ما موالفاش بيه و لكن صافا ..!

عدنان:( حرك راسوو ) و القرايا كي غادية فيها ؟

أسية:( تنهدات و قالت ) صافا .. الواحد كيدير مجهود و الكمال على الله ..! فاللول كان صعيب الحال ..! كنفيقوو مع الخمسة كنبداو بالرياضة و من بعد القرايا و مزيرين معانا بزاف .. الضوو كيتطفى مع السبعة باش نعسوو ..! ( ضحكات ) نتا لي كتصبن و تدير أي حاجة لراسك ..!

عدنان: مزيان هاكا كيعلموكم تعتامدو على راسكم ..! القرايا بليس الضوابط د العسكر ..!

أسية: واااييه ( قاصت فشعرها ) قطعولنا شعرنا هو لي بقى فيا .. يالاه بدا كيطوال شوية و فاللول د العام غنرجع و يعاودو يقطعوه اععع و كيقرعوو لدراري ..!

عدنان:( شاف فشعرها بخطفة و تبسم باحراج و هي حداه كتهضر بعفوية ) و قررتي شنوو غتديري من بعد ؟

أسية:( هزات كتافها ) غنشد الباك و نكمل معاهم ..! ( بحماس ) عرفتي شنوو هي ل era ?? و لا ما عارفش ..! راه شي حاجة بزاااف ما تقدرش تخيل داك الجو شحال زوين و اباغ هاذشي .. الامتيازات لي عندهم مستحيل تلقاهم فبلاصة اخرى ..! الصاليغ لي سمعت راه واخا نحلم بيه بالألوان فجهة اخرى ما غنلقاهش ..! و كيعطييو امتيازات و تسهيلات كثار ..! عاد كونطرا د عشر سنين فيكس خدام معاهم و من بعد بغيتي تجددها و تكمل من السعدات عليهم ما يقدروش يخسروك ما كانش تقدر تخرج تقلب على راسك .. عندك ديبلومك فيديك ..!

عدنان:( هز راسوو بالايجاب ) مزيان .. إذن مقتانعة تكملي معاهم ..!

أسية:( بفرحة قالت ) خصوصا قبل ما نجييو .. لبروف ديالي هضر مع واحد الجنرال و دخلت مع لي بيلوطاج .. بحال داك العروض لي كيديرو فالتلفزة مرة مرة فشي حذث وااااو ..! هكاك دارو و أنا معاهم و جنرال على قدو مسيرهم و هما لي كيقريوهم غير صحاب لي بوسط الكبار .. ضباط و جنرالات عمري كن كنتوقع نشوفهم فاص شي نهار ..! و تا لي معانا غير ولاد الوزراء و ولد الجنرال الفلان فلاني و ولد كذا و كذا .. كن ما خويا حكيم .. واخا نحلم ندخلها باللوان ما غنقدرش .. واخا النقطة و الحالة ..!

عدنان:( بان حزن فعينيه و مع ذلك تبسم مع فرحتها ) و عارفة فالكونطرا ديال عشر سنين .. ممنوع عليك تديري الفولار و لا تتحجبي و كيفما عندهم امتيازات كاينين شروط قاسحين .. بحال الزواج ..!

أسية:( ردات بعفوية ) أصلا أنا ما كنفكرش نتزوج و باقي تابعاني طريق طويلة .. محيدة الدراري من بالي كاع و تا الفولار ماشي وقتوو دابا .. غيجي نهار نديرو كنبقى مسلمة و لكن مزال الحال ..!

عدنان:( عقد حجبانوو ) مزال الحال ؟ يعني ضامنة راسك مزالة غتعيشي ..!؟

أسية:( حساتوو كيتسهزأ منها و تا هي جمعات حجبانها و قالت ) و نتا ضامن راسك غتدخل للجنة ؟ الضامن الله فأي حاجة ..!

سكت ما جاوبهاش و جات نيت مع وصولهم للمنتجع .. دخلوو للجهة د البيفي فين كيفطرو الناس ..! هضرات مع الجيرون تما بثقة فنفس و راس مهزوز و ملامح مرتاحة ..! عكس كيف كانت شحال هاذي .. خاص ديما شي واحد معاها علامن تتاكل و تخليه هو لي يهضر عليها .. ماشي ما عندهاش ثقة و لكن كتخاف و مولفة الحماية كتجيه من برا ماشي من لداخل ديالها ..!

و من البلان لي وقع مع ايوب تبدلات 360 درجة حتى تفكيرها تبدل .. تحملات مسؤوليتها و تعلمات تصلح أخطائها و ما تهربش منهم ..! شادة باب المصاحبة و الدراري فخطرة ..! خلاتهم كيصوبولهم و بأدب قالت هازة عينيها فيه ..!

أسية: و نتا خدمتك كي ماشي فيها ؟ شفتك فتحتي فرع جديد ..!

عدنان:( تبسم بهدوء ) فين شفتيها ؟

أسية:( تزنكوو حناكها فالبلاصة و قالت ) امم احم غير فالباج ديالك د الفيسبوك .. كيعجبوني الفيديوات لي كتحط ديال القرآن و الندوات لي كتدير ..! علاش ما عارفنيش متبعاك ؟

عدنان: لا ..! ماشي انا لي مكلف بيهم .. داير لي مقابلهم .. مرة مرة كندخل يلا كانت شي حاجة مهمة و صافي .. عندي كونط واحد فالانسطا .. ديال صدقة جارية لا غير ..!

أسية: صدقة جارية ؟

عدنان: سي ..! دايرو ديال الخير فيه تقريبا جوج مليون د لي زابوني .. كل مرة كنختارو واحد كندعييو معاه .. كنحط فيه القرآن و الأدعية .. صدقة جارية ليا و لروح الناس لي توفاو ..!

أسية: ااااه .. مزيانة هكا .. عندك خير كبيير ..! ( سكتات كتفكر و رجعات قالت ) عرفت الكونط ديالك .. فايتة سيفطت لك مسج فيه و جاوبتيني .. يمكن ما عقلتيش عليا و لا ما عرفتينيش ..! شحااال هاذي تكون دابا ثلث سنين و لا ربع سنين ..!

عدنان:( شاف فيها باستغراب و قال ) جاوبتك ؟ ما عمري جاوبت فيه ..! كيفما قلت لك ما كنساليش باش نجاوب شي واحد .. عليها داير لي مكلفين بكاع لي باج .. كيحطوو لي فيديو و يجاوبوو الناس .. الوحيد لي كندخلوو و نحط فيه بيدي هو هذا .. و لكن ما كنجاوبش .. قليل فين كندخل للمسجات .. هما كيعطيوني السميات و المعلومات كاملين و أنا كنتكلف ..!

أسية:( فلتات لها الضحكة بلا ما تحس ..! و واحد الراحة دخلات على قلبها ما بحالها راحة ) هههه اااه وا يمكن لي مكلف هو لي جاوبني ؟ ما تديرش فبالك ..!

عدنان: شنوو كنتي بغيتي بعدا ؟

أسية: امم ؟؟ والوو واقيلة غير سولتك على شي سورة .. ما عقلتش مزيان ..! كان كيسحابلي نتا لي كتشوف كلشي .. شحال من مرة كنبغي نسول فيك و كنقول موحال تشوف مسجي ..! قولي مزيان لي ما درتهاش ههه ..!

عدنان: علاش ما عندكش الكونطاكط ديالي ؟

أسية:( جمعات حجبانها و حركات راسها بالنفي ) لا ما عنديش ..!

عدنان: واخا حتى نرجعوو و نعطيك نمرتي دخليها عندك ..!

وجدولهم جوج شاريوات عامرين بالفطور من كلشي ..! جارينهم لي سيغفوغ و هما موراهم كيتمشاو فصمت .. تا داز عدنان من حدا جردة صغيرة فيها الورد .. قطع وريدة صغيرة حمرة و عطاها لها و بهدوء قال ..!

عدنان: الورد للوريدة ..!

تزنك وجهوو مع بياض لحموو ..! حاط يدو على نيفوو كيقلب فعينيه و يحنحن .. تا بغى يسبقها بخطوة كاع و يبعد من قدامها عاد قالت مغيرة الموضوع و الفرشات فكرشها كيلعبوو ..!

أسية: هههه شكرا عويناتك ..! احم كنتي فشي ندوة ففرنسا الشهر لي فات ؟ شفت السطوريات ديالك ..!

عدنان:( حرك راسوو بالايجاب ) هولاندا .. فرنسا و بلجيكا ..! تانا يالاه رجعت من تما ..! ( هز حاجبوو فيها ) متبعة الأخبار ما عندي ما نسالك ..!

أسية:( ضحكات و زادت سابقاه دخلات هي لولة للفيلا كتجري .. وجهها غيطرطق بالدم بكثرة ما تحقن و قلبها شوية ما غيخرج من بلاصتوو ..! ) من لي فان الكبار ديالك ..!

دخلات كتزرب مخلياه موراها كيفكر دماغوو مرون و حاير غير مع حوايجوو ..! لقاهم مجموعين كلهم فصال أمونجي .. معاهم حتى حكيم .. جالس بالكيطمة مزنك و عينيه فيه خطوط حومر معسلين ..! التدكديكة مزالة شاداه و لكن ما بغاش يبقى فالفراش باش ما يلسقش فيه المرض كثر ..!

ما قدرش يشد فنور لي غتحوال و تجي عندو ..! تا بدا كيتحلف عليها خليل بالضحك .. نساتوو و نسات ست شهور د المقابلة ديالوو .. دغيا بدلاتوو بباها ..! ضحكوو عليه تا شبعوو و شد فيه محمد أميين لي هاذشي ما مقابل ..! كيعجبوو يتقبط بخليل و يطنز عليه ..!

ناضوو لبنات قادو الفطور و تجمعوو عليه تا كملوو و خرج خليل للشالي ديالوو .. جاب فاليز كبيرة حطها وسط الصالون و بدا كيجبد فالكادويات و يعطيهم ..!مدة عاد كمل .. بقى غير الشكلاط عطى كل واحد بواطتوو و لعبة كبيرة فكارطونة ديالها شادة النص لكبير فالفاليز ..!

نور: كولاطة مامي .. كولاطة د نور وينة مامي ..!

خليل:( ضحك و قال ) أجي نعطيك شكلاطة أجي ..! شكلاط د عموو ماشي د ماماك .. أجي بوسيني و نعطيك ..!

دورات نور عينيها فراسها و داك الشعر تعيى تجمعلها فيه ما كتمشي حتى تحلوو و تخليه مشعكك مذهب و مرولي بحال الخواتم ..! خشات يديها ففمها كتمصها و غادية عندو بداك القزيبة كتعوج .. مداتلوو يديها الثانية و قالت

نور: نور وينة .. طيني يالي ..! " نور زوينة عطيني نديالك "

خليل:( جرها من جوج يديها وسط رجليه و كروازاهم عليها باش ما تخرجش ) شنوو نعطيك ؟

نور:( زادت وسعات عينيها لكبار ) كولاطة ؟

خليل:( هز آخر بواطة فتحها و قال ) هههه كولاطة ا الشكلاطة د بصح .. هزي لي بغيتي ..!

بقات كتشوووف كتشوووف مرة فالبواطة مرة فيه مرة فشريفة و حكيم .. كتمصمص فيديها تقول عندها فيها العسل .. تا طلقاتها و شدات البواطة بجوج يدين ريوكها هابطين و شنايفها شبعاتهم عصير تا حمارو ..!

نور: كولاطة دالي ..!

طلق لها البواطة باستغراب و فتح رجليه يشوفها شنوو غتدير .. تا جراتها مزيرة عليها و غادية كتجري كتزرب .. حطاتها حدا شريفة فالفراش و مداتلها جوج يدين باش تهزها تجلسها تما ..! تا تقدات فجلستها و حفنات الشكلاط فحجرها .. كتنغز فشريفة ..!

نور: ماما نولوو كحى .. حااايبة ..!

شريفة: نزولوو كخى خايبة .. واخا ا راي نزولوو الكاغيط خايب ..! و لكن غنخاذو وحيدة باركة و لي بقى غترديه للكارطونة و تعطيه لعموو خليل .. بوسيه و قوليلي شكرا ..!

نور:( شافت فشكلاطها و غوبشات مدرقاه بيديها ) داااالي كولاطة دااالي ..! مامي وينة ..!

شريفة:( فتحات لها لي فيديها عينيها دمعوو بالضحكة لي شاداها ) ها ديالك .. هاذوك د عموو ماشي ديالنا ..! ( زهقات لها الضحكة فاش شداتها خشاتها ففمها ديريكت ) و أنا ؟؟ ما تذوقينيش ؟

نور:( رمشات عينيها موسعاهم و جبداتها من فمها تا تبعصات فيديها بريوكها ماداها لشريفة ) كولاطة ..!

شريفة: ههههه صافي غير كوليها بصحتك ..! شي كاغيط معاك ا حكيم عافاك ( قطعولها مدولها و مسحاتلها يديها و ففمها ) يالاه رديه لبلاصتوو و عطي لعمك ..!

نور: نووو مامي نووو دالي ..!

حكيم:( رد بتنبيه ) نوووور ..!

شافت فيه و رجعات حنات راسها .. وجهها تزنك و وذنيها فالبلاصة و الدموع تغرغرو فالعوينات .. رجعات ديكشي بالزربة و هبطات عطات لخليل .. بزز طلقاتهم .. و هو كيشوف فيها بتعجب فردات فعلها تا بانتلوو دميعة هبطات و جرها عندو قال

خليل: أجي يا جي .. الدموع كاع أ كولاطة ؟ ( قادهم فالبواطة و شدها شير بصبعوو لشريفة و كمل ) هاذو ديال نور .. شكلاط ديالها صافي .. عطيه لماماك تخبعولك و تعطيك وحيدة فالنهار باركة ياك ؟

نور:( هزات راسها بااه بالزربة ) وييدة باكاكا ..! ( ضحكات بسعادة و باستوو فحنكوو معنقاه بيديها بجوج ) بيبة زيتويور اففف بغافو ..! ( طلقات منوو كتسفق بيديها بجوج )

شريفة: شنوو هاذ زيتويور تاني ؟

نور:( ضحكات بسعادة معاها ) زيتويور مامي هووف بغافوو نوور ..!

خشات يديها بين وجهها حشمانة و مرة مرة تشوف بنص عين كتلقاهم كيضحكوو معاها و كترجع تتخبى ..! تا جبد خليل آخر كارطونة كانت لعبة ديال " Bayblade " د الدراري ..! بحلبة كبييرة جايا بحال شي بانيوو محفر من الجناب و مقاد ..! و اللعب صغار ديال الحديد و الآلة فاش كيتركبوو باش يطلقوهم بالجهد و يبقاو كيضورو وحدة كتضارب مع الثانية شكون يربح ..!

خواو الطبلة و حطوها الوسط كيعلموو نور تلعب و ليث هذاك مزال صغيور غير كيبكي و يحك فسنانوو مجنن ..! عيات بسمة معاه و هي تهدات و هو ما تهد .. تا ولاو دايرين عليه النوبة .. كل شوية شادو واحد فيهم ..!

خليل:( شاف فأسية و قال ) أجي لهنا تلعبي ..!

شريفة: حيدووو أنا لي غنبدا .. نوريكم اللعب على أصولوو ..! ( هزات راسها فالسما ) الاحترافية نعام آس ..!

مع جبدات مع طاحت فالحفرة الجنب و قصاوها مخليينها مدلية شنايفها و هما كيموتوو عليها بالضحك ..! تا كملات الجولة د خليل و أسية و رجعات معاهم .. هاذ المرة ضرباتها مقادة ..! حاضياها كتشجع ..!

شريفة: سيييير سييييير قتلوووو ..! ( هزات يديها كتسفق بيهم و تشطح فحواجبها ) اييييه بام بام شفتوو الاحترافية .. حكيم نوض تلعب و الله تا واعرة هههه ..!

محمد أميين: نوض نشوفوو هاذشي كي داير ..!

ايوا الحصول اللعبة لي جابها للنور و الدراري صغار شدوها غير هما ..! تا تقسموو لفراقي ناشطين مع راسهم و متلفين الوقت ..! تا تغذاو فالريسطوو ديال شريفة شاعلين لهم الشموع و مقادين الديكور من ديكشي و المذاق خلاص ..!

شدوها جماعة و نور و ليث ضايرين بيهم مصدعينهم ..! تا لسقوو فحكيم يعزف لهم فالغيتار ..! حرجووه و كلشي كيرغب .. فلخر سيفطوو لالة فاطمة جابتوو من الفيلا ..! و بدا كيعزف باحترافية .. حتى نحنحات شريفة كتسرح حلقها و بدات كتغني بإحساس شادة جهة صدرها و عينيها مغمضاهم كترمش بالشوية و مرة مرة تحلهم كتشوف فيهم ..!

شريفة: بغيييييت نقوووليك شحال من كلمة .. بغيييييت نغني ليك .. شحال من نغممممة ..! بغيييت نشهد لك و نقوول .. شحال كنبغيييييك ..! معاك عشت و حلمت و تمنيت و حققت و مزاااال ..! بغيت نطوف و نشوف معاك بلدان و بحور .. عراصي و جبال ..! ( بخامة صوت قوية ) اليووووم هاني واقفة .. فاتحة روحي ليك .. اليوووم ا هاني كل ما فيا هديتوو ليك ..!

سكتات مخلية حكيم كيعزف بتناغم و يحرك راسوو بهدوء غادي معاها فالريتم و كلهم متأثرين بصوتها و بالاغنية كيفاش جات معاها و الأحساسيس لي قدرات توصلهم ليهم ..!

شريفة: دعييت لربي يكمل ليك كل ما تمناه ..! معاك غنيت و شطحت .. ضحكت و بكيت و لعبت و مزاااال ..! بغييييت نحس و نذوق و نحيي الروح و نريح الباااااال ..! اليووووم ا هاني واقفة فاتحة روحي ليك ..! حبييت النور لي ساكنة في عينيك ..! اليوم اليوم اليوم .. بغيت نشهد لك و نقول شحال كنبغييييك ..!

سهات بسمة فمحمد أميين مبتاسمة و هو نفس الشي و خليل فحكيم و شريفة .. كتعجبوو علاقتهم ..! أما أسية تزنكات كترمش مرة مرة كتشوف جهة عدنان و هو نفس الشي .. كينحنح و يحك فنيفوو و يتبعها بنص عين ..! حتى تعانقوو العينين فلخر بنظرات هادئة فيها ألف معنى و معنى ..!

كملات الأغنية و جرها حكيم من عنقها باسها فجبهتها وسط عينيها مخليها مبسمة متكية عليه ..!

عدنان:( رجع شعرو للور و قال ) حكيم واحد الدقيقة نهضر معاك فيك ما يتحرك ..؟

حكيم:( هز راسوو بالايجاب ) الله اودي ..! يالاه نطلق عظامي شوية ( لشريفة ) نتوما مزالين هنا ؟

خليل:( رد بلاصتها ) واحد الشوية على ما تكملوو و نتلاقاو فالباب تا أنا باغيك فشي حاجة ضرورية ..! باغيكم حتى نتوما ( نعت بعينيه لخوتوو )

وقفوو حدا الحديقة د الحيوانات .. متكي حكيم على السياج ديال الخشب ..! كيشوف فالزرافات قبالتوو كيتسنى عدنان يبدا الهضرة ..! عدنان لي نشف و عراق فبلاصتوو و تزنك .. مزييير و عاقد حجبانوو تقول معصب غيطرطق و هو غير حشمان و تالف ..! تا جاه من اللخر بلا تقديمات خاويين ..!

عدنان: باغي نخطب من عندك ..!

حكيم:( بملامح باين فيهم العيى .. ضحك باستهزاء و قال كيطنز ) تديها تربيها على يديك ؟

عدنان: ههه لا ماشي نور ..! كنهضر على أسية ..! من شحال هاذي و هي فبالي .. فكرت بزاف و بانتلي بنت الناس لي غنرتاح معاها و غنتفاهموو بيناتنا ..!

حكيم:( جمع حجبانوو بجدية و قال ) متأكد ؟ ( وسع عينيه فيه بنظرة مفهومة )

عدنان: وي متأكد ..! يمكن المواصفات ديال أسية ماشي هما لي كنت باغي من قبل و لكن دابا هي لي باغي و الزمان غيبين لنا ..! جربت مع زكية و ما صدقاتش كيفما تخيلت و كانت كتبان ..! و أسية يقدر نفس الشي تكون محتاجة غير لي يشد بيديها .. قلبها صافي و تقدر تتبدل مع الوقت ..!

حكيم:( لعب بلسانوو ففموو و تقلب عندو مربع يديه ) و يلا ما تبدلاتش مع الوقت ؟ يلا الزمان بينلك .. بلي حتى أسية ما صدقاتش كيفما متخيل .. شنوو غيطرا داك الساعة ؟ ( هز حاجبوو فيه بثقالة ) غنعاودو نفس الفيلم ديال ملاك و حسام ؟ هما ما تفاهموش حيث بجوجهم داخلين لزواج معميين و واحد ما كيعرف الثاني كيبان لهم غير الكادر د برا ..! حسام من اللول كن عرف يتصرف معاها ما غتململش معاه و غتعطيه حقوو كيفما هو عاطيها ..! ( دوز يدوو على راسوو ) أسية بعقلها و عارفة شنوو باغى .. ماشي أنا لي غنقبل فبلاصتها .. غنفتح معاها الموضوع و نشوف .. غير هو نتا عارف شنوو باغي و متأكد منوو و لا تا نتا غير غتضهصس و تزيد ..؟

عدنان:( حرك راسوو بالايجاب ) عارف شنوو كندير .. المهم ماشي غير على ديكشي لي قلت لك .. أنا .. أنا ..! ( بعد صمت ) كن كنبغييها و ما باغيش نخسرها ..!

تبسم حكيم بهدوء و ضرب على كتفوو .. عارف عدنان ماشي شي واحد خايب لي غيتكرفس عليها ..! بالعكس يحطها فعينيه و يصونها ..! واخا ما مقتانعش بزاف بزواجهم .. خصوصا فارق السن لي بيناتهم ..! عدنان قدو قد شريفة هي كبر منوو بشهراين .. يعني داخل فالثلاتين و هي مزالة يالاه واحد و عشرين عام ..! و لكن ما كاينش ضرر يلا جربوو زواج تقليدي مع مشاعر بريئة صادقة قبل ..! يقدرو يمشييو مركبهم يلا عرفوو يتعاملوو مع بعضياتهم ..!

حكيم: غنهضر معاها أنا و لا شريفة و نرد عليك بشنوو قالت ..!

عنقوو بيد وحدة راجعين معانقين كيتبسموو و يتبادلوو الكلام .. و من وجه عدنان لي مزنك و الضحكة و الحاجب المهزوز د حكيم .. باين مقبط بيه على داك كنبغيها .. شدة العما فالظلمة ..! لقاو خليل و محمد أميين كيتسناوهم و بجدية دخل خليل فالهضرة ..!

خليل: الهضرة خرجات من فم ماري و لي عطى الله عطاه ..! كحلات لك وجهك و ما رضيتيش و ما بغاتش تبلع لك .. عمات لك عينيك كاع بشنوو دارت .. عندك عزيزة و جرحاتك ..! عييتي تدوز لها و دابا وصلاتها معاك للحد .. هاذشي كامل عارفوو ..!

حكيم:( عقد حجبانوو قالب وجهوو للجنب كيسمع ) الصمت

خليل: كيفما عارف و علمتيني و لا نقول علمتينا كاملين .. عمرنا نعطييو بالظهر لبعضياتنا .. نحاسبوو و نغوتوو و نوصلوها فينما بغات توصل و لكن باش نقطعوو الدم فخطرة هي لي عمرها تكون ..! و كن دارها شي واحد فينا كن لاقيتي لينا الريوس ..!

حكيم:( زفر النفس و دوز يديه على لحيتوو عاد شاف فيه و قال ) خليل

خليل:( قاطعوو ) غير سمعني ..! ماري عارفها شنوو كتعني لك ..! لي درتيه فيها حنا معاك و تا هي كتشوف فيك باها و الراس ما غتهزوش فيك واخا تهرسولها .. كيجي وقت كيتعماو لينا العينين ما كنعرفوش كي درنا زبلناها و كنصلحوو غلط بغلط .. تا كنغرقوها مع كلشي .. و هاذشي لي غيكون واقعلها ..! راه يستحييييل ا حكيم تبغي تضرك و تخرج الهضرة فعرضك و هي عارفة راسها شنوو كتدير ..! ( تنهد ) متأكد حيث تا أنا ما عاقلش على الواليد الله يرحموو و فيك حليت عيني .. هما خوتي و نتا راه با ماشي اللعب ..! و عارف واخا يحطوو السيف على رقبتي عمري نفكر نغذر بيك واخا غير بلساني تدير فيا لي درتي .. بلاصتك عمرك تزحزح منها و حتى هي بحالي ..!

خليل: هضرتك غتكون حرقاتها كثر من الحرقة لي كواتها فيديها ..! من حقك تهز فخاطرك و تتعصب منها و من حقكم حتى نتوما ( لعدنان و محمد أميين ) تقلبوو و تغضبوو عليها ..! و لكن يلا أنا هزيت راسي و زدت و حكيم و نتا و نتا ..! هاذ البنت شكون غيوجهها ؟ راه غتمشي للهاوية و تدير ما كفس و ما كاين لي يحضيها ..! حبيبة شحال قدها ؟ كاملين عارفينها كتغلب عليها تا كتمشي معاها فالخط و تتستر عليها ..!

عدنان:( ميل راسوو جنب .. يعني متافق و ما متافق ) ما غنرميوهاش ..! غتجلس فالدار بحال قراناتها .. الدخلة و الخرجة بالساروت و الزنقة ما تشوفهاش حتى يحن الله ..! راه قذف المحصنات هذا ا خليل ..! خاصها ترجم عليه و شوف تشوف .. بلا الخيانة و يعلم الله فين كانت غتوصل كن جا للمغرب و تلاقات بيه ..!

خليل:( رد عاقد حجبانوو ) واش انا ما عارفش هاذشي ؟ راه كواها و خدات قتلة د الكلاب من عند حسام لحمها كلوو زرق و كلشي سمح فيها و سمعات كلام كي السم ..! بغيتي ترجمها رجمها ..! تحسبها زنات و تعطيها ميات جلدة .. ا سيدي عطيها و ما تحنش فيها و نزيد انا و محمد أمين نكملوو عليها .. و لكن من مور هاذشي ما غنجيوش و نلوحوها و نحكموو عليها بالاعدام ..!

محمد أميين:( تدخل حتى هو بجدية ) باش نتفاهموو على واحد الحاجة ا خليل ..! حسام كن ما كانش ولد الناس .. غيعنفها صباح و عشية على لسانها السليط و العيشة د العفن لي معيشاه فيها ..! و كن ما بعقلوو و دار وجه حكيم بين عينيه .. راه يشوف داك المسجات ما يزيدش يتسنى عليها .. موس واحد يخليها غارقة فدمها .. و لا يهز الفردي و يتيري فيها وسط عينيها ..!

عدنان:( رد بالايجاب متافق معاه ) و تجي من بعد تقلبها على ظهرو هو و مرات خوها ..! راه حكيم حن فيها أما تشوف الويل ..! هاذشي ماشي د اللعب و الهضرة باش هي و لا غيرها يهضرو فيه ..! كن ما حكيم بعقلوو و عارف مراتوو و صاحبوو شنوو كيسواو .. يسمع لقيت مراتك مع راجلي عريان فالبيت و و و و .. بزيادة فيخرات ..! يمشي يقتل مراتوو و صاحبوو و يتبعهم راسوو ..! و ماشي شي حاجة جديدة وقعااات و وقعااات ..!

خليل:( هز راسوو ) هاذشي متافق عليه و لكن .. شنوو الحل فنظركم ؟ ها حنا بعدنا عليها و نفرناها .. عطيناها درس قاسح تعلموو و زدنا حبسناها فالدار .. الزنقة عمرها تولي تشوفها ..! شنوو من بعد ؟ حكيم عندو مراتوو .. بنتوو .. خدمتوو غارق فيها تال وذنين و ماشي غير خدمتوو راه كيخدم علينا .. المشاريع ديالنا كاملين و لايحينهم على ظهرو .. عاد لي ديالوو ..! غيلقى لها وقت من بعد ؟ محمد أمين تا هو خدمتوو و مراتوو .. نتا كل مرة فبلاد و شحال ما بقيتي غتدير دارك و ولادك .. أنا ما كنفكرش نرجع دابا من ألمانيا حتى يلا درنا المشروع د التصدير و نشوف واش غينجح بعدا و يتمشى و من هنا عام يلا طولت غنتزوج بميليسا .. حسام طلقها .. الواليدة ما غتقدرش عليها و صحتها على قد الحال .. غترزم لنا غير بالفقصة ..! شكون غيكون مسالي لها من بعد يربيها و يوعيها ؟ و لا نفيوها و نخليوها صافي .. بحال عمرك نتا قريتي و نتا خرقتي و نتا لعبتي تا طبتي و نتا غوتي و ربيتي و ضربتي و سفرتي و زيد و زيد ..!

حكيم:( دوز جوج صبعان وسط جبهتوو و قال ) واخا ..! و شنوو الحل لي عندك نتا ؟ آتينا بيه ..! حيث جميييع الحلول جربتهم معاها و تا حاجة ما ردعاتها ..!

خليل: و يلا ما تردعاتش دابا عمرها تردع حيث تا أنا ما غنساليلهاش من بعد ..! كنفكر نديها معايا لألمانيا .. نسيفط موراها سياحة و نقادلها الوراق نديها ..! ( وسع بين يديه ) باغيين حل باين .. ما كاينش حل ..! و لكن ما حدي مسالي و ما ملزومش بحالكم .. راه عندي الوقت كوميم ..! بغيتوها غير تربى .. غتربى بلهلا يطريه لها معايا و بطريقتي ..! و نهار نعرفها بصح تأدبات و تصلح لي تعوج .. غنرجعوو معاها للمغرب و غتفتح لها باب دارك و تتصالح معاها ا حكيم و تتصالحوو معاها كاملين ..!

حكيم:( بعد مدة صمت حرك راسوو بالايجاب ) نعرفها ندمات بصح و عرفات راسها شنوو دارت و حاولات تصلح من راسها واخا غير شوية ..! العيب عليا يلا ما قبلتهاش ..!

عدنان و محمد أمين : و حتى حنا معاه ..!

خليل:( تبسم ) يعني متافقين دابا ..! غنمشي عندها للطبيب نهضر معاها ..!

حكيم:( حرك راسوو بالايجاب كيتنهد بقوة ..! ) فجميع الأحوال لا أنا لا هما كنا غنخليوها ..! كن كانت مشكلتها غير مع حسام غنجيبها لعندي تجلس هنا .. غنتفاهم معاها و ما تمشي حتى يتحل كلشي ..! ( دوز على لحيتوو كيحكها ) و لكن دابا عماتها ..! ما منحقيش نبززها على شريفة و نخليها تسمح لها من بعد كاع لي سمعات و وقع و تجلس معاها من الفوق .. يلا أنا بلعتها حيث خوها هي راه ما غتبلعش لها ..! و ملاك دابا فين غتتربى فاش تشوف كلشي بعد من طريقها و تا حد ما بقى صابر لها على هبالها ..!

خليل: عارفك ما تخليهاش ..! و لكن باش نتا و شريفة ما تحرجوش و تدير شي حاجة بزز على مراتك .. نديها معايا حسن .. نتا عندك لي يكفيك أما أنا بوحدي ..! غير الخدمة و لاصال و بعد المرات كنخدم غير من الدار ..! حتى ميليسا راها فالسويد دابا .. مزال ما ترجع و ما معاياش فنفس المدينة ..!

حكيم:( ضرب على كتافوو و زير عليه ) أحسن حاجة غتديرها و زير السمطة شوية .. حسن ما تغلب عليك حتى نتا بحال حبيبة و يتقلب عليك كلشي فلخر ..!

خليل:( ضحك ) هههه هانية خليها تتناتف مع المدام شوية ..!

تفرق المجمع و كل واحد فين شدها ..! أسية مشات ل لابيسين مع نور تا لحقات عليها بسمة و محمد أميين و ليث ..! عدنان دخل يتكى شوية من الفجر ما ذاق النعاس و نفس الشي لحكيم و شريفة لي قتلاتها الدوخة و الترويعة و قلة النعاس .. بزز فاتحة عينيها بحال المحششة ..!

بقى غير خليل شد الطريق للكلينيك عند ملاك ..! طلع ديريكت للبيت لي جالسة فيه لقى حبيبة شاعلة التلفزة حداها كتفرج و كل شوية كتنهد و ملاك ساكتة كتبكي بلا دموع .. عينيها نشفوو منهم .. وجهها تنفخ كي الطبل و عينيها حماااارو بحال شي بركة د الدم .. مبوقين و منفوخين .. ما تقدرش تشوف فيهم و ما يدمعولكش عينيك حتى نتا ..!

خليل:( شاف فحبيبة و مشى عندها سلم عليها و باس لها راسها ) كي بقيتي ؟

حبيبة:( تنهدات بقوة ) وا نقولوو الحمد لله ..! الحمد لله على كل حال ..!

خليل:( حرك راسوو و قال ) نوضي تحركي شوية .. يتحرك فيك الدم و خليني نهضر مع ملاك ( غمزها ) باش نخرجكم من هنا ..!

دارت لي قالها كتشوف فبنتها بكبدة مشوية و خرجات شادة عليهم الباب ..! بقى غير خليل كيشوف فيها .. فلخر قرب للناموسية فين ناعسة .. جلس فالجنب طاوي رجل و رجل مسرحها بملامح جدية .. قابلاتهم بحزن كبير و قهرة .. باغية تعنقوو و تبكي على صدرو و ما قادراش خايفة يدور فيها ..!

خليل: عاجبك الحال دابا ؟ خليتي كلشي ينفر منك و تا حد ما قابل يسمع سيرتك .. ماشي غير يشوفوك ..!

قلب عينيه تا جات فالضربة ديال يديها .. عض على فموو مغذذ .. ما بغاتش تسرطلوو بلي مشات ضربات يديها .. لفين باغى توصل ما عرفت ..! و بلا عكز عليه عطاها بالظهر د يدو لجبهتها عاقد حجبانوو فيها ..!

خليل: شنوو هاذ البهلان و الدراما لي عايشة فيها ؟ زعما غتضربي يديك غيحن فيك حكيم و لا غيرو ؟ غتبقاي فينا و ننساو كاع لي درتي ..؟ كن ما شافك حتى واحد تبقاي تما حتى تموتي .. هاذشي لي بغيتي ا الحما٠رة ؟

عاود عطاها نفس الدقة تا هزات يديها باغى تطاكي و تقسحات من الحرقة و الغراز بالجهد .. غوتات مكمشة .. و جرها لها بالنفضة كيفتح لها الفاصمة ..!

ملاك: خ خلييل كنتقسح لااا خليها .. كتقطعني بالحريق ..!

خليل:( هز راسوو بالايجاب ) مزيان خليها تحرقك و تقطعك .. باش تحسي بشنوو درتي فخوك و راجلك ..! و نهار تنوي تفتحي فمك على شي حد .. تفكري البارح هو اللول و يلا كان لحمك زايد ناقص عندك عاوديها باش نهز تا أنا يدي عليك و نخليك تعومي فبحرك ..!

شاف فالدوا لي دايرينولها .. خاف يكونوو مزعلكين لها شي عجب يزيد يلسق لها كلشي و تزيد تتعذب كثر باش تبرا ..! غير تأكد طلقها لها خلاهم عريانين ..!

ملاك:( ردات بحزن باغى تشد فيه و ما عندها كي تدير ) و الله ما نويييت هء تيقني ا خليل و الله ياخذني عندو يلا نويت نهضر فشريفة ..!

خليل:( عض على فموو و عطاها بظهر يدو للجبهة ثاني حتى حمارت و جرها من وذنيها تا تحقن فيها الدم مزير عليها ) نتي ديما مبلوزة و ما فاهماش ؟ فوقاش غتكبري بالسلامة ؟ ( جمع يديه ضربها لراسها تا غوتات كتبكي مكتفة ) حتى حسام ما نويتيش تغذريه ياك ؟

ملاك:( سكتات كتبكي وجهها حمممر و وذنيها حاساها غتقطع من بلاصتها )

خليل:( زاد جرها منها تا شافت فيه ) كنهضر معاك جاوبيني ..! نساي عليا حكيم و شريفة .. دابا شرحيلي داك العجينة لي عجنتي مع حسام .. فهميلي راسها من رجليها .. أنا بعدا تقاضات لي الفهامة ..!

ملاك:( ردات معصورة ) هء خليل هء وذني وذنييي

خليل:( زاد لواها لها ) هاذ الوذنين نقطعوهم و نتهناو .. ما كيسمعوش الهضرة ما كيسمعوهاش ..! ( شافها صافي ما بقى لها فين تزيد و رخاها لها ) يالاه طلقيني هانا كنسمع ..!

ملاك:( بعدات راسها عليه كتحكز بالشوية تا للحد ) هء غتضربني يلا قلت لك

خليل:( رجع عطاها لجبهتها .. طيبها لها تا كتقول جمع يدييه و كيغفلها ) على أنا ضربت بعدا ؟ بلاتي خلي غير حتى يبرى فيك شي قنت يهز العصا و عاد نشوفوو ..!

سكتات مكمشة خايفة يغفلها ثاني بشي دقة ..! خايفة تهضر و يصعر عليها حتى هو و تخسرو ..! و خايفة تبقى ساكتة و يفهمها على كيفوو و يهز راسوو و يزيد ..! قلباتها بكى تا فشات قلبها و هو ساكت كيشوف فيها تا تكمل على خاطرها ..! و ديكشي لي كان تفشات و هدنات راسها بيديها عاد قالت ..!

ملاك: أنا و حسام كاع ما تفاهمنا هء .. نتا عارفني من اللول كنقولكم ما نديهش مغربي و صاحبكم من الفوق ( رمشات عينيها فازكين بالدموع ) ماشي حيث نتوما خايبين و لكن صعاب و عارفاكم كي دايرين ما كتعاتقوش ..!

خليل: زوينة عندك هاذ صعاب و ما كنتعاتقوش ..! كن كنا بصح صعاب معاك و ما كنحنوش فيك .. كن نص كلمة ما كتقدريش تنطقيها حدانا .. قبل ما تفكري فيه خمسين ألف مرة ..! و منين ما باغاهش علاش واقفة فوجه خوك على ودو ( غفلها و هاذ المرة ضربها لفمها بالظهر .. دلقشها ..! ) و لا الحيرة غير فاللسان السليط ..!

ملاك:( تكمشات مبعدة عليه فمها كيضرب باغى غير تقيس فيه و ما عندهاش كيفاش .. يديها كلها دوايات ) هء سحابلي غنعيش معاه مزيان .. كيفما شريفة مع حكيم و عاد حسام كان كيبانلي ضحوكي و ناشط .. قبل ما نتزوجوو و لا يطلبني كان كيهضر مع البنات قدامي و طالقها تسرح .. يعني ماشي معقد بح ( سكتات )

خليل: كمليها ..! ماشي معقد بحالنا ( هز يديه دوزها على لحيتوو و هي يسحابلها غيضربها تا تكمشات غتغوت ) كتخافي ؟ بااااز ..! ( سكت شحال ) كيفاش ماشي معقد ؟ باغى تدخلي عليه الر٠جال و يدخل تا نتي عليك البنات و تعيشوو الحياة ؟ و كيفاش هاذ تعيشي معاه مزيان بحال شريفة مع حكيم ؟ على أساس حكيم نعييوة و ماعرفاهش كي داير ..! و حتى ما تكونيش حضرتي على شريفة شحال من مرة معاه .. و ما شفتيش خوك فاش كيصعر عليها و يضور ليها .. ما كيعقلش عليها فمرة .. ما جاو و ارتاحوو تا دوزو الحرب و دابا نيت تدير شي حاجة ما تسرطلوش يعلقها فالنكاصة د الضوو ..! يمكن هاذشي لي كان خاص حسام يديرلك باش تمشي معاه مقادة فالطريق ياك ..؟

ملاك:( ردات بالزربة ) لاا ..! ( حنات راسها ) أنا عارفة راسي غالطة و ندمت علاش قلت لحكيم باغاه .. كان كيسحابلي بصح كنبغيه ..! ما قدرتش نصبر عليه و نجلس نخدم فيه بحال الخدامة و أنا عندي قرايتي غارقة فيها و فلي بروجي .. كل مرة مدابزين على ود السطاج و الدراري لي كانوو كيوصلوني راكم كتعرفوهم .. نهى و خطيبها و صاحبوو ..! هاذو من الباك و أنا كنعرفهم و هو كاع داك التفتح رجع تعقاد ..! أنا هاكا خداني و هو عارفني كي دايرة .. و واخا هكاك حاولت نهز داري و قرايتي .. و لكن بزاف عليا .. النهار كامل غابر كيجي يعرف غير يلقى الماكلة و الدنيا نقية و أنا واجدة ( قلبات عينيها كتنحنح حشمات منوو ) و ماشي غير هاذشي موو كتبغي تتحكم فكلشي و كتمرضني بفعايلها و فاش كنقولهم ما يجيوش حتى يعيطوو .. نقدر ما نكونش فالدار فلافاك و لا فالسطاج و لا كنوجد لامتحاناتي و الدنيا مرونة و ما عندي دماغ لحد .. كيعمروه و ينفخوه كي الطبل ..!

خليل:( ساكت كيسمع و يستنتج ) و هاذشي علاش ما هضرتيش معاه فيه ..!

ملاك: حيث ما كنعمروش مع بعضياتنا كاع .. كل مرة هو مديبلاصي فالخدمة و كيغبر بالشهورة و ما عندي عليه حتى خبار .. ما كنعرفوو واش خدام نيت و لا عندو دار اخرى كيعمرها فجهة اخرى .. يرتاح من روينتي و صداعي ..!

سكت مدة غير كيسمع ..! ملاك ماشي خايبة و خبيثة .. بحالها بحال أي واحد فهاذ الدنيا ..! عندها نقط كحلة و نقط بيضة فشخصيتها ..! و من بيناتهم مرخية و من النوع لي كتسمح فراسها يلا تضغطات و عندها قرايتها أهم حاجة فحياتها مستحيل تخليها .. يقتلوها و ما يقولولهاش غتجلسي ما بقات قرابا ..! و كلهم كانوو كيلاحظو عليها فوقت الامتحانات تقدر تبقى تا شهر و لا ثلاثة د السيمانات بلا دوش .. حتى كتعطي الريحة و كتولي حالتها ..!

بيتها يترون و ما تسوقش ليه .. تا كرشها ما تفيقش لها من النعاس يلا ما جابتلهاش حبيبة ما تاكل ..! و هاذشي نبهوو عليه مرارا و تكرارا .. ما تهملش حاجة على ود الثانية و تا حبيبة كانت زايدة لهم كاملين ..! باهم كان صعيييب بزاااايد و نهار توفى داك القسوحية لي كانت بغات تعوضها بالحنان ..! ما كتخليهمش يحطوو يديهم فحتى حاجة .. البوطة يلا احتاجاتها كتخرج تعمرها بيديها تا كيتلاقاوها و يغوتوو ..!

و نفس الشي لملاك مخلياها منها لقرايتها تتكافى غير معاها .. كتقولهم داري أنا قادة بيها و نتوما رج٠ال ما تديرو حتى حاجة ..! و هاذشي خلى عند البعض فيهم فاللول داك النزعة ديال أنا راااجل ما نديرش .. حتى تقادو من بعد ..! و ملاك يلا ما نوضوهاش و زيروها تدير الحاجة راه تما بقات ..!

عاد فاش زادت تبلات لهم بالدراما الكورية ..! زاد التفتح ما عرفت فين وصل واخا مجتمعهم من اصعب المجتمعات و ثقافتهم و تقاليدهم و طرق تربيتهم فين يبانوو خوتها قدامهم .. و لكن حالها حال الأغلبية ديال الناس لي كيشوفوو غير الواجهة ..! و واخا هكاك مزيرة من خوتها لا فاللباس لا فالخروج و الدخول بالوقت و يلا ما كانتش قارية ما كاين خروج تا تكون معاهم .. إلا يلا كانوو مشغولين و تسترات عليها حبيبة و واخا هكاك كتوصل خبارها كتوصل ..! ربعة د الخوت راه ما ساهلاش و كل واحد فيهم عندو المعارف د الدنيا و الدين و كاع صحابهم كيعرفوها ..! و يلا شافوها فشي موقف و لا شي بلاصة ماشي هي هاذيك .. راه ما يخليو فيها غير لي نساو و يجيبوها لخوتها يتبراو ليهم ينتابهوو لها ..!

هاذشي كيخليها عمرها تفكر تدير شي حاجة خايبة .. ماشي غير كتخاف راه كتموت منهم ..! و فالاخير كتقلبها غير شاط و هضرة فالمواقع و تفراج ف لي سيغي ..! و حتى داك الشاط شحال من مرة كلاتها عليه و عاقبوها و لكن كتدور تدور و ترجع تطلعها على البشر خالقاها ..!

يمكن شافت فحسام داك الانفتاح لي ما كاينش فخوتها و قالت .. غنعيش معاه الرومانسية د الأفلام و ما غنبقاش حاضية راسي شنوو كندير لا نتفهم غلط .. نلبس لي بغيت و نخرج فوقما بغيت و حتى يلا شاف معايا الدراري ما غيهضرش .. تا هو كان كيضسار قدامي .. بحال بحال .. بجوجنا كنديروها فالوجه .. يلا نتا ما ناويش فيها حتى أنا ما ناوياش فيها ..!

و لكن فاش تحطات تحت الأمر الواقع .. لقات العكس ديال هاذشي كامل ..! لقات دار خاصها تهزها و تكون مسؤولة عليها .. ديما نقية و مجموعة و الماكلة كاينة و هي ماشي موسخة فحالتها و تتهلى فراسها على ودو و تقرا و تدير السطاج و تنجح بمونسيون ..! هاذ الضغط كامل ما قدراتش عليه و ما استحملاتوش و ما كاين لي يهز عليها .. تجيب شي وحدة تعاونها كتشك راجلها لي عينوو زايغة يشوف فيها و يخونها معاها ..! ماماها كل مرة و فين هي .. و ما بقالهاش الجهد لي تهز فيها من أول و جديد ..! خوتها مستحيل يقبلوو على شنوو كتقول ..!

حسام لي ما لقاتوش ديما كيضحك و طالقها .. تا هو بنادم مرة معصب مرة ساخط مرة غير ما راشقالوش ..! خصوصا فاش كيجي عيان مسالي من الخدمة و ما يلقاهاش فالدار عاد جايبينها الرج٠ال موصلينها و بلاصة تقابل دارها كتجلس فالقهاوي معاهم .. كتوجد لقرايتها .. الهضرة لي ما كتدخلوش هو للراس و ما كيتقبلهاش و كيتغاوتوو .. تا كتعطيه بلسانها السليط و كيسكت لها على ود خوتها حيث يلا زاد غيضربها .. و حرو كيخرجوو فالدار عاد كينوض يجمع و ينقي و يشوف شنوو ياكل .. يا يوجد يا يخرج لبرا .. بحال الزوفري حتى حاجة ما تبدلات ..! تا من فراشوو كان ديما معمرو بالبيضة و السمرة و الزعرة .. أما مور زواجوو و من مور السيمانة د الباكور كيفما كنقولوو ..! تا الفراش ما بقاش مرتاح فيه بكثرة لي هي غير عيانة و باغى غير تكمل و تنعس و فالبرد ما قادراش و ما فيها لي يدوش و زيد و زيد ..!

عاد فاش زيرها على الحجاب و قطع عليها الصحاب و القهوة .. تما فين زادت صعرات كثر ..! شادة معاه الضد .. الكاس ما بقات تهزو و يلا قاسها بزز ما قالها حد لحد و كيكملوها بالغوات و المشانقة ..! قلبات على نقطة ضعفوو لي هي موو و ولات ما باغاهاش تجي عندها حتى هي ..! علاش هي تديرلوو الخاطر و هو يمرضها ؟ شادينها معاندة و لهلا يقلب ..!

و وسط هاذشي كامل .. خسرات حكيم و كتشوف حسام كيمشي عندو و يتلاقى معاه و يوصل عندها تال باب الدار و ما كيدخلش ..! خوتها كل واحد مشغول فمشاكيلوو و حياتوو .. ما مسالين لهاش يبقاو تابعينها و حاضيينها ..! كبرات و تزوجات تتحمل مسؤولية دارها و راه معاها راجل هو يعرف يتصرف معاها .. ما غيجيوش يلوحوه للجنب و يقررو بلاصتوو .. فقدو داك الحق فاش ولات تحت جناحوو ..!

ما بقى عندها حد و ما بقات عرفات ما تدير و شكون يوجهها ..! تا حبيبة مقطر لها حسام من عينيها و فينما تبغي تهضر معاها عليه كتشكرو و كتصدق دايرة مناقص ..! حكيم الوحيد لي كان ما غيخليلهاش و غيجبد لها وذنيها و يوجهها .. و لكن عماتها معاه ..! بقات غارقة بوحدها و المرض لي عايشين فيه خلاها ديما شاكة فيه بلي كيخونها ..! كتشمشم و تقلب من موراها و هو ما كيرضاش .. كيجي لبالوو راه ضحكة ليها و لعائلتوو و لموو لي كرهات ملاك و ما يجي منها ..!

و هاذشي كامل خازنوو و ما كيهضرش لا مع حبيبة لا مع خوتها ..! و حتى فنقاشاتهم لي كتقلب غالبا للمعيور .. كيسكت و يجمع يديه بزز باش ما يضربهاش ..! و هي داك السكات كتحسبوو ضعف و كتبغي تزيد تركب عليه .. حتى انعدم الاحترام بيناتهم فخطرة و ما بقاتش كتفكر شنوو كتقول قبل ما تبلز و تلوح لوو الهضرة ..! و هو غير كيديبلاصا باش يبعد عليها و على صداعها ..!

و فهاذ لي ديبلاصمون جاها الحنين للماضي و دخلات الأبليكاسيون ديال تيندر و خلصات على ود كوريا باش تهضر مع الناس لي ساكنين تما ..! هو ما كاينش و هي فدردشة من واحد لواحد .. حتى طاحت فآخر واحد شافوو حسام ..! بداو بالتعارف فتيندر و قلبوها واتساب .. الهضرة كلها بلونغلي هي لي كتعرف اما حتى الكورية ملقطة منها شي حاجة بسيطة من الأفلام و لي سيغي ..!

ارتاحت معاه و عجباتها داك العلاقة لي بيناتهم ..! كلها الهدوء .. عاطيها مساحتها و متفهمها .. كيوريها دارو تما و تصاورو ها هو فالخدمة ها هو فلاصال .. ها هو خارج كيدوي معاها أبيل فيديو و هي كتشوف داك العالم بعينين عامرين بالدهشة .. ما كرهاتش تكون معاهم ..! و بلاصة يساريها و يوريها ماكلتهم و يعاودلها على حياتوو .. تكون هاذيك نفسها حياتها فداك لبلاد مع واحد متفتح ..! بلاصة تفرج معاه فأبليكاسيون للأفلام .. تكون تما فمعارض السينيما الكبار ديالهم .. و تفاهمات معاه هو تبارك الله ما تفاهموش غتفارق معاه و تشوف غيرو ..!

و ماشي غير هي لي عجبها حتى هو ارتاحلها و عجباتوو .. لا من زينها لا من هضرتها و ضحكها و الفشوش لي كيبان فحركاتها لا إراديا ..! واخا هي ما مفششاش و لكن الكاراكطير ديالها هكاك كيبان ..! و كلشي تبدل فاش رجع حسام .. حاضية معاه و الهضرة قلالت على لي كانت .. تا ظن الكوري بلي باغى تتفارق عليه .. حيث العلاقة أ ديسطونص .. و حتى هو عمرو زعم مع شي مغربية و لا شي وحدة فثقافة ثانية و لكن هي بدلاتلوو الفكر ..! و باش يقنعها نوى يجي للمغرب يتلاقاها و يتعرف عليها و على بلادها كثر ..!

شحال واحد من صحابوو جاو سياحة و شكرولوو المغرب و علاش تا هو ما يجربش و منها يشوف ملاك او نقولوو ماري فالواقع و ما يبقاوش غير فالمواقع ..! الهضرة لي غفلها بيها فوقت ما توقعاتوش و الشك كينخر فحسام من تصرفاتها تا خدالها تيلفونها كيقلبوو و جا مع المسجات و التصاور ديالوو ..! و بلاصة تندم قلباتها غوات علاش يقلب لها تيليفونها ..! و غضبات عليه مخلياه بحال البركان .. حطها عند خوها و زاد ..!

ما مشى لفين ..! رجع غير للولاية و دخل لقسم الشرطة الإلكترونية ..! باغي يشوف واش شي واحد فيهم يقدر يجبدلوو السجل ديالها كامل .. من مكالمات و مسجات و أي حاجة ..! صدقات هي ما صدقاتش .. غيقلبها لعند محمد أميين عارفوو يقدر يجبدلوو المسارن ديال تيليفونها يلا بغى ..!

و فهاذ الوقت كانت هي مع شريفة كتشكي لها ..! و كيفما قال خليل فاش كتغرقها و ما كتعرف ما تدير باش تصلح .. كترجع تصلح خطأ بخطأ ..! بلاصة ما تكون هي الخاينة و لي هي ما نواتش فاللول و ما تصوراتش بلي هي لي غتكون الخاينة ..! غتردها لحسام لي معروف عليه كازانوفا و بو بنات ..! هي ما تقدرش تشكي لحكيم لي مزال قالب عليها و هاز فخاطرو .. اللهم لمراتوو لي غتوصل ليه المشكل و غتبغي تتدخل بيناتهم تصالحهم ..! باش حتى يلا هضر حسام يتسمى غير كيكذب عليها و هي ديجا مسحات كلشي .. غير هو خانها و بغى يلبقها لها و العكس صحيح ..!

ما كذباتش فاش بكات على شريفة مقهورة و تالفة و لكن من لي هي دارت .. ماشي من الخيانة ديالوو و زادت ركبات راسها ما سامعاش للنصائح كاملين لي عطاتها مرات خوها .. حيث ما كتقلبش عليهم دابا .. غرقات راسها و لي عطى الله عطاه .. خاصها دابا توصل المعلومة لحكيم بأي طريقة باش يوقف معاها ..! من غير هاذشي غياكلوها حية ..!

و حسام ما بقاش هضر معاها و الشوفة هي اللخرى ما كيهزهاش فيها ..! ما خلاش لها الفرصة واخا غير تفكر فكذبة تقولها لوو تفكها بيها راسها ..! و لقات الوسيلة الوحيدة للدفاع هي الهجوم ..! واخذاها مبدأ فحياتها ككل معاه ..! خافت فاش رجع جبد الهضرة معاها على التيليفون مرة اخرى و خوا لها الدنيا و زاد .. و غير صبح الصباح مشات كتقلب عليه .. واخا تعرف تبكي د٠م عليه المهم ما توصلش لخوتها لي جايين فنفس النهار ..!

حتى شافت المنظر ديالوو و د شريفة ..! و بلاصة تحشم على عراضها و تصلح أخطائها ..! عاد بانلها تهجم فداك اللقطة و تقلبها عليهم ..! ماشي باش تقلل من شريفة و لا من خوها ..! ابدا ..! غير انجارفات و طلقاتها قد راسها تا تفهمات لحسام و لشريفة بطريقة ثانية على لي كانت هي كتفكر .. و رجع تا حكيم داخل فالمعمعة و لا إراديا .. قاست رجو٠لتوو حتى هو ..!

لي من المستحيل تديرها شي نهار و هي بكامل عقلها و لكن الضغط يولد الانفجار باغى تفك و ما عارفاش كيفاش ..! قالت غنهددهم حتى غيخافوو و حسام غيسكت و ما غيجبدنيش كاع .. يلا هضر تا هي غتهضر ..! و شريفة ما تقدرش تقول لحكيم ها شنوو وقع و ها شنوو وقع ..! و ها قضيتها تفكات بأقل الأضرار ..!

ما عارفاش انوو حسام وصلات معاه للحد و هضضضر مع خوها و لي عطى الله عطاه ..! و سكاتوو لي شافتوو هي ضعف هنا وصل لنهايتوو .. باش تشوف وجه عمرها شافتوو فحياتها منوو ..! و حتى تفكيرها فشريفة مشى غااالط و بزااااف ..! شريفة كتحتارم و تقدر حكيم و حاطاه فمرتبة عالية فحياتها .. جامعاهم مودة و رحمة و احترام و صبر و حوااار و نقاش لي ناقص داك الجوج ..!

و سبقلها قالت لحكيم .. عمري نخاف من شي را٠جل كيفما كان و خصوصا لي كنبغيه و مكملة معاه حياتي ..! اييه كيصدموها ردات فعلوو العصبية و كتخاف تواجهوو فاش كتزبلها معاه .. عارفاه يلا مشاو تا تغمضولوو العينين ما غيرحمهاش ..! و فنفس الوقت تعلمات كيفاش تتصرف معاه و تضبطوو و تخليه يبرد بطريقتها و حتى يلا ما قدرش يبدل ساعة بختها ..!

و اكيد ما غتسكتش على شنوو وقع و تقال عليها .. الإهانة لي تهانتها هي و ياه و قلة الاحترام الكبيرة لي تحطات فيها فداك الموقف ..! واخا تعرفوو يضربها كاااع .. غتعلموو ..! بحال هاذشي ما كيتخباش و الرباط لي جامعهم قوي و ما غيتهرسش ببحال هاذ المواقف .. كن كان غيتهرس كن تهرس شحال هاذي ..! و لكن ملاك العكس كن تحطات فنفس الموقف كانت غتسكت و ما غتقولش ..!

و حسبات حتى شريفة بحالها و تا حسام غيتردع بتهديدها .. تا تقلب عليها قتلها عصا و جمع خوتها و حط لهم الحصيصة كاملة لي جامع فقلبوو من جهتها ..! عام ديال الزواج و تقريبا عام د الخطبة على ما خرجات الموافقة و دارو العرس و كدا ..!

فاش كتقول ما نواتش راه بصح ما نواتش هاذشي كامل غيتقلب عليها .. كانت كتدعي كلشي يمشي كيفما هي خططات و عمرها تعاود غير تنقز هاذ الدرجة و تخرج صدقة كاع ..! و لكن ماشي ديما كلشي كيمشي على كانتنا ....!

طوالت الجلسة بيناتهم حتى حبيبة عيات بسير و أجي ..! الليل قرب يطيح و هو باقي معاها .. و حمد الله لي حكيم ما تدخلش ..! حيث كن هو لي سمع هضرتها ما غيحنش فيها واخا مريضة ..! حيث ماشي كتعتارف راها غالطة .. بالعكس كتبرر لراسها و ترد اللومة للي ضايرين بيها ..!

ااه أنا غالطة و لكن هما .. هاذ الجملة هو و عصباتوو و عطاها عليها فكل مرة .. حتى كتنسى و كيغفلها .. قهرها و من الداخل بصح مقهورة من لي وقع كامل و مزالة ما عارفة كيفاش تصلح هاذشي ..! و من كلامها فهم بلي كتغير حتى من شريفة بواحد النسبة ..!

و كانت قبل مع كريمة و لاحظوها كاملين ..! كتفقصها و تعصبها غير بالفن .. ديما مخشية فيه كتبوس و تفشش عليه طالقة حلاوتها ..! و خلاص فاش عرفوها كتسحر ما خلات لمن قالتها و كرهاتها و لكن كتبقى علاقتها لا علاقة مقارنة دابا بحكيم مع شريفة ..!

هي ماشي كتكرهها .. و لكن قبل كانت هي المحور ديالهم كلهم ..! و خصوصا د حكيم .. راد معاها لبال لواحد الدرجة ما تخيلش و حتى هي مرتاحة فداك العلاقة لي بيناتهم و كتمووت منوو و عليه فنفس الوقت ..! حتى جات شريفة و تبدلات شحال من حاجة ..! ضربها قدامها على البلان ديالها مع شادية و زاد سافر معاها و مع أسية و هي بقات مع حبيبة .. واخا عارفة هو بغاها تمشي و ما كان عندو حتى مشكل و حبيبة لي عكسات موحشة بنتها ..!

كتحس براسها فقدات الاهتمام من عندو و ما بقاتش فداك المرتبة فعينيه و جاوه مسؤوليات ثانيين .. بلاصتها تعمرات بشريفة و أسية .. ديكشي لي كان كيديرو معاها على قرايتها .. رجع كيديرو مع أسية ..! هي لي كانت كتفتاخر براسها و كيعجبها الحال واخا مضغوطة .. شي حاجة مميزة غير ليها .. رجعات كتشاركها ..!

كتلاحظ شي حويجات يمكن حتى واحد ما يديها فيهم و لكن هي كيأثرو فيها .. بحال الشوتينغ مثلا ..! هي حلف لها عليه خلاها كتطير و تنزل و ما قبلش تمشي تديرو .. و شريفة خلاها ..! واخا عارفة نوضوها قبل و ضربها و فاش دارتوو بيتها فالكوميسارية كاع .. و لكن كتطيح تطيح فالمقارنات .. حتى منين ضرباتها من بعد فكرات كن هي لي ضربات شريفة حيث مراتوو دارت فيها العيب .. واش ما كانش غيتدخل بيناتهم و ما يهضرش فخطرة بحال لي دار ..؟

كل واحد كيفسر الصورة على كانتوو .. لو هضرات مع حكيم غيشرحلها علاش ما هضرش و غتقنع ..! عارفاه حقاني و لي ما يرضاهش لراسوو ما يرضاهش لعز الناس و لكن ماشي ديما كنفكرو بعقلنا .. بعد المرات قلوبنا كيديونا لطريق عوجة و الغيرة و الحسد كيعميولنا العينين ..! كيفما تعماو لها فاش قبلات بحسام .. كتشوف ما بقى حد مسوقلها كيف كانوو زمان من غيرو .. على الأقل تلقى واحد هي مركز اهتماموو و على ذوقها كيفما كتبغي ..!

و لكن بدورو ما كانش هكاك و بالوو مشطون ببزاف د الحوايج .. و حاجة خاصها تكون متوقعة عند ملاك .. عاشت مع خوها لسنيين و عارفة المخزن خدمتوو و حياتوو كي دايرة .. يلا هو كيضغط على راسوو و ينساه فخطرة على ود حبابوو و مشاكلهم .. ماشي كلشي بحالوو كل واحد و جهدو ..! و فالأخير لقات راسها هي لي خاسرة كلشي .. باها لي هو حكيم و خوتها كاملين و حبيبة ..!

عاد شريفة لي بصح ما صرفات فيها غير الخير و كانت عندها عزيزة .. و لكن الغيرة خلاتها تهضر عليها .. داك المقارنة لي كتدير بينها و بين نفسها ديما و هي كتعد الخايب فيها و الخايب فشريفة و علاش حكيم كيميل ليها كثر منها .. جات فدقيقة ديال قلة عقل و طلقاتها .. و شحال ما بقات كانت غتهضر فالأخير ..!

بحال ولد صغير تزاد عندو خوه و كيشوف الكفة كتميل للبيبي كثر منوو .. واخا يعياو يشرحولوو بلي هو مسكين صغير و ما قادر يدير والوو بوحدو و خاصهم هما لي يتهلاو فيه و يبغيه و يعاونوو باش يكبر و يلعب معاه و و و ..! كاع هاذ الهضرة و الانتباه لتصرفاتهم .. غتزكل شي حاجة غتزكل و غتجيه داك الدري الغيرة غتجيه ..! و يلا ما بردهاش فالبيبي .. كيبردها فالمشاكيل و الصداع باش يشوفوه و ينتابهوو لوو بلي راه باقي تما .. راه كاين و تا هو خاصوو حقوو ..!

حار معاها خليل و تعصب .. ضابط أعصابوو بزز ..! من جهة بقات فيه و من جهة ثانية عصباتوو هاذ الأنانية لي فيها ..! حكيم راه ما مساليش لها باش يبقى ديما تابعها و حاضيها ..! ايييه كانت عندها بلاصتها عندو و بلاصة تخرب عليه حياتوو و على لي ضايرين بيه .. كانت تستاغل هاذ الطاقة و تدير شي حاجة مزيانة تزيد تتقرب منوو و تنسى عليها الغيرة و الهضرة الخاوية ..! شريفة تديرها كثر من ختها و تنصحها و تعزها ..!

من كلامها و تبريراتها فهم بلي تابعاه طريق طويلة معاها و شوف ت شوف ..! ما حاساش بالكارثة لي كانت ممكن توقع بسباب شنوو دارت ..! باغى ترجع راسها هي المظلومة و ديكشي غير ردود أفعال .. بسباب كذا و كذا و كذا ..! ماشي بسبابها هي ..! برد اعصابوو على الأخير و قال

خليل: من هاذشي كامل .. درتيلي بحال هذاك لي تعطل و جا للمحطة لقى التران مشى .. و بفقصة كيعيط لدارهم مشى عليا التران ..! ماشي يقولهم انا لي غالط و تعطلت حتى مشى عليا ..! ( تنهد بقوة تا تهز صدرو كيحرك راسوو بالنفي ) مزال ما تعلمتي والوو ..! ( وقف كيتكسل و يطرطق عنقوو ) شوفي حداك و فجنابك .. كاين شي واحد معاك ؟

ملاك:( حركات راسها بالنفي ) نتا ..!

خليل: أنا حيث وحلت فيك .. ماشي حيث باغي نجي و نبقى معاك ..! عاد عاد كان كلشي ضاير بيك و عندهم عزيزة مقطرة من عينيهم و اليوم كلشي كرهك و نفرك ..! علاش ؟ حيث هما غلطوو فحقك ؟ ( خنزر فيها ) عدنان غالط و حسام غالط و حكيم غالط و محمد اميين و بسمة و شريفة و أسية .. حنا كاملين غالطين و نتي لي مزيانة عمرك نويتي و لا درتي شي حاجة غالطة .. عليها كلشي مبعد عليك ..!

حبيبة:( دقات تا سمعات صوتوو قالها تدخل عاد دخلت ) ايوا مزال هاذشي راني عييت بغيت غير نتمد بحالي ..!

خليل:( شيرلها بصبعوو لجهة حبيبة ) فاش كنبغييو ندخلوو لشي بلاصة ماشي ديالنا .. كندقوو باحترام و تا كنسمعوو الإذن عاد كنزيدو و كنجلسوو بأدبنا ..! دخلي هاذ الهضرة فبالك غتنفعك بزاف فاش تبغي تتعاملي مع البشر بصفة عامة ..!

ملاك: الصمت

خليل:( هز حاجبوو كيحك فلحيتوو و قرب منها غفلها بضهر يدوو لجبهتها ثاني ) فاش واحد كياخذ من وقتوو و يهضر معانا .. كنسمعولوو و عينينا فيه و كنشكروه ..! تا حد ما بزز عليه يدير شي حاجة .. الجهد لي نخسرو معاك نمشي ندير بيه لي يفيدني .. أنا أنا و نتي نتي .. ما ملزومش بيك ..!

ملاك:( بلعات ريقها و قالت ) فهمت شكرا ا خليل و سمحلي ضيعت لك وقتك و عطلتك ..!

خليل:( رد بهدوء ) عطلتي ما ضيعتهاش .. جيت غير نخرجك من الطبيب غتجلسي فداري د المعاريف و فاش نرجع غنوجد لك وراقك غتطلعي معايا لألمانيا ..! يلا نتي ضيعتي عطلتك حتى حد ما ملزوم يضيع معاك و يخلص معاك على أغلاطك من الفوق .. حتى الواليدة غتمشي معايا تصيف بخاطرها ..! و من هنا لتما تكوني تهدنتي و تمشي معايا و تما غنعرف واش كنضيع وقتي معاك و لا مكنضيعوش ..! نعاودو حنا التربية من اللول ما خاسرين والوو ..!

حبيبة:( تنهدات ) نمشي نعيط عليهم يعاودو لها الدوا و يسوانيو لها .. عاد نمشييو ..!

خليل:( صونا تيليفونوو .. هز صبعوو بالزربة خارج ) غنتسناكم لتحت .. ألوو وي ..!

صدمة كبيرة جات لأسية من بعد ما فاتحاتها شريفة فموضوع زواجها بعدنان ..! يوماين و هي كتفكر .. راسها دايخ و تالفة بالمعقول ..! فالوقت لي خطب زكية .. كانت موجدة راسها و مستعدة تقبل يلا جا لعندها .. حتى تصدمات بالخطبة و تقلبات حياتها راس على رجلين .. و لكن فالاخير رجعات ثقة حكيم و شريفة و وقفات على رجليها محيدة الزواج و الدراري من بالها بصفة نهائية ..!

ااه كتبغيه و لكن كتبغي شريفة كثر منوو .. شافتها شحال تعذبات معاها باش توصلها و شافت شحال ديال الناس ما لاقيينش لقمة ياكلوها .. و هي اللباس غير لي مارك و الماكلة مضخمة .. الطاكسي هو اللخر عمرها تجرجرات فيه .. و الصيف كتدوزو فدي زوطيل سانك ايطوال ..! عندها أي حاجة يتمناها الواحد .. و الأهم عندها عائلة كتبغيها ..!

يلا قبلات دابا .. غيتسنى عليها تاخذ الباك و تخرج من era و تدير مدرسة اخرى و هي لي كتحلم بداك خمس سنين ديال التخصص معاهم كي غتدوز و عاد فاش تبدا الخدمة و كانت واجدة تسني عشر سنين د الكونطرا ..! و حتى هما ما عندهم ربح يلا غيقريوك و يضيعوو فيك الجهد و فلخر تشد الديبلوم ديالك و تخرج تمشي لقنت ثاني ..!

قرار ماشي ساهل .. كفة فيها عدنان و كفة فيها هي و قرايتها و شريفة .. لي من ديما كتقولها خلاصي هو توصلي و نهز راسي بيك و نشوفك فمرتبة حسن مني ..! يلا مشات لمدرسة اخرى ما كتظنش غتعطي بحال تما ..! النيفوو و الأجواء و الطموح ماشي بحال ..!

بعد تفكير طويييل ما هضر معاها حتى واحد باش هي تاخذ القرار لي مسلكها و تشوف شنوو تدير ..! أخيرا خرجات بقرار نهائي و هي مقتانعة بيه تمام الاقتناع .. تقدر تندم من بعد و لكن الحياة فرص .. بعض الفرص ما خاصناش نضيعوهم من بين يدينا و لكن شكون لي ما غيضمنش لنا من بعد مدة .. تجي فرصة حسن من هاذيك بدرجاااات .. تهزنا للسما السابعة ..! هاذشي لي دارت فبالها و هي غادية عند عدنان ديريكت ..!

لبسات كسيوة فالغوز كلها موردة .. دايرة ماط فغوز مجهد باين فشنايفها و طالقة شعرها مرولي و الطالون فرجليها ..! موراها جردة ديال الورد ريحتها كتحمق ..!

أسية: خويا حكيم و شريفة هضرو معايا على الزواج .. فكرت شحال ( رخات النفس مرعدة من صدرها و عينيها مغرغرين بالدموع شاداهم بضحكة بزز ..! ) نتا عارفني كنبغيك و باينة فيا ( هبطات لها دمعة و مسحاتها بيديها ) فففف .. كن هاذ الهضرة جات فوقت واحد آخور .. كنت غنطير بالفرحة حيث أخيرا بنت لك و حسيتي بيا ..! و لكن دابا ( حركات راسها بالنفي ) سمحلي و لكن ما كنفكرش فالزواج .. ما غنقولكش ما كنفكرش فيه كاع لا دابا لا من بعد .. ممكن من بعد و لكن القليلة واحد ست سنين حتى نتخرج ..!

عدنان:( تحبط من جوابها و حزنوو ملامحوو .. دوز يديه على لحيتوو و قال ) باغية تقراي غتكملي قرايتك .. تاخذي الباك ديالك و اي مدرسة بغيتيها نسجلك فيها .. بريفي و لا بيبليك .. المهم ما تكونش ميليطيغ .. حيث ما عندي كي ندير نشوفك ( زفر النفس بقوة ) أسية انا كنبغيك و ما باغيش نخسرك ..!

أسية:( كمشات عينيها مدمعين و قالت ) نتا أصلا خسرتيني شحال هاذي .. ما تتخيلش شحال تحرقت بسبابك و ما نقدرش نتعذب و نعذب معايا .. ما نقدرش نخسر شي حاجة لي انا فيها حسيت براسي بنادم .. عاد حسيت براسي عايشة و عندي شخصية و كاينة ..! ما نقدرش ا عدنان و انا يالاه بديت كنبني الكاغييغ ديالي ( تبسمات بعينين كيلمعوو ) و انا كنشوف شنوو كيتسناني فهاذ الست سنين الجايا و فين غنوصل ..!

عدنان:( تنهد بحزن و رجع قال متشبث بيها ) بغيتي غير البيلوطاج ..! ماشي ضروري تكون عسكرية تقدري تموتي فيها فالحروب ..! نمشي أنا و ياك لفرنسا تقرايها تما ..! وحدة من أحسن المدارس المعروفة و فنفس النيفوو د era ..! ( بتأكيد بعيون عطوفة ) عاودي فكري و قرايتك عمري نخليك تفرطي فيها و غنعاونك بكاع لي جهدي و ربي يقدرني ما نضيعك لا فراسك لا فيها و العذاب عمرو يلقى لك طريق معايا ..!

أسية:( بلعات ريقها و زيرات على يديها ) فكرت ا عدنان .. فكرت بزاااف و قررت ..! انا عمري فحياتي كنت صاحبة قرار كيفما كنقولوو و حاسة بوجودي ليه هدف و كندير شي حاجة كبيييرة حتى مشيت لمراكش ..! عشقت داك الميدان و لقيت فيه راسي و طموحي و باغى نكمل فيه ..!

عدنان: آخر كلمة عندك هي هاذي ..؟

أسية: الميليتر دومين صعيب .. داير بحال البحر كتشوفوو غارق من البعيد و لكن فاش كتعوم فيه .. داك المواج و البرودة ديالوو كينعشوك و كتحس بواحد الحلاوة ما بحالها حلاوة .. كتعشقوو و ما كتسخاش تخرج منوو ..! أنا فهاذ العامين بنيت راسي و طموحي و رسمت طريقي لي غنمشي عليها .. سبقلي سبقت بزاف د الناس عليا ..! سبقت راحتهم على راحتي و فالاخير أنا لي تضريت .. حيث ما قلتش لا فالوقت لي كان خاصني نقولها .. ما دافعتش على أحلامي و على أهدافي ..! و دابا ما نقدرش نعاود نفس الغلط من جديد ..!

عدنان:( حرك راسوو بالايجاب ) مفهوم .. الله يسهل عليك فالطريق لي اختاريتيها ..!

أسية:( ردات بعينين حومر ) و يسهل عليك حتى نتا و يلاقيك مع بنت الناس لي تستاهلك و تكون مناسباك كثر مني ..! قادرة تدير الحجاب و الخمار و تمشي معاك فحياتك مرتاحة .. تولد لك وليداتك .. أنا هاذشي كامل ما نقدرش نديرو دابا ..! واخا نبغي نسمح ف era و نمشي معاك للفرنسا .. راه ما غنقدرش نوفقك بينك و بين مستقبلي ..!

سمعلها حتى كملات و مشى بحالوو بلا كلمة بلا جوج ..! تبعاتوو تال للفيلا د شريفة هي دخلات و هو ركب فطونوبيلتوو و كسيرا خارج من تما .. تال للباب تلاقى الدراري داخلين و قلل السرعة .. بقى غير حكيم و البقية سبقوه ..!

حكيم: فين شادها ؟ غنتحركوو دابا شوية ما عندك فين تمشي ..!

عدنان:( رد بعينين حوومر ) غير شدوو الطريق نتوما .. أنا خرجاتلي شي خدمة ضرورية ما نقدرش نمشي معاكم ..!

حكيم:( عقد حجبانوو فيه بقلق و قال ) عدنان شنوو كاين ؟

عدنان: من بعد من بعد و نهضرو ..! دابا مشغول و منها نبقى حاضي ماري و الواليدة يلا احتاجت شي حاجة .. ما بغاتش تمشي ياك ؟

حكيم: لا و حسن كاع .. حتى شريفة ما كنبغيش نديها للتكرفيس .. غير دابا دايرها لها مفاجأة .. عارفها غتحماق و تمشي ..!

عدنان: ما فيها باس .. يالاه تهلاو ..!

طلع الشرجم و زاد فالسرعة غادي مع الطريق حتى ما بقاش كيبان ..! حاضيه حكيم و هو خاشي يديه فجيابوو حتى خرجات عندو شريفة لابسة حوايجها د الخروج مقادة راسها و هازة نور تا هي بالكرينات و الحالة ..!

شريفة: مزال ما بغيتي تقولي فين ماشيين ؟

حكيم:( هز حواجبوو بمعنى لا ) تت ..! غتوصلي لتما و تعرفي ..! يلا واجدين نتحركوو .. عيطي على أسية ..!

شريفة: و عدنان ما غنتسناوهش ؟

حكيم: لا ما غيمشيش .. خرجاتلوو شي خدمة ما عندو كي يدير ..!

طاحت هاذ الهضرة فوذنين أسية لي مسحات عينيها و رجعات قادات راسها .. واخا هكاك مزال باين فيها باكية ..! شاف فيها حكيم و بلا ما يحكر حرك راسوو لكلشي باش يركبوو فطونوبيلاتهم يشدو الطريق ..! محمد امين معاه بسمة و ليث .. حكيم معاه شريفة و نور و أسية و خليل بوحدو ..!

خليل:( عنق أسية من كتافها و جرها معاه قبل ما تركب ) شنوو غتخليوني أنا بوحدي الطريق كاملة ما كاين معامن نتحذث ..! دوزي تركبي ( فتحلها الباب ركبات شاف فالطالون و قال ) غتمحني بيه ما لقيتي ما تلبسي ؟

أسية: وا ما بغيتوش تقولو لنا فين غاديين .. ما عرفت ما نلبس بلحاق جبت معايا باش نبدل يلا تعذبت نقلبها سبرديلة ..!

خليل: غير خليك هاكا غيشوفوك الدراري الصغار غيفرحوو .. هههه بحال الكلون بهاذ الكسوة ..!

أسية: سيير سيير قالاك .. فين كتعرف نتا فشي موضة ..!

شدو طريق طويلة .. كل ساعتين كيوقفوو يستارحوو ..! حتى قرات فلافتة جنب الطريق .. اسم المنطقة " جبال تكوكة "

شريفة: لدابا ما عارفاش فين غاديين ؟ طبت بالجلاس و مزال ما وصلنا ..! ربي لما قولي شنوو هي المفاجئة ..!؟

حكيم:( تبسم و قال ) قربنا نوصلوو ..! غاديين لدوار فالراس ديال جبال تكوكة ..! ( شافت فيه باستغراب ما عمرها سمعات بالمنطقة ) نواحي ديال ولاد برحيل .. تابعين للعمالة ديال تارودانت ..!

شريفة: و علاش غنمشييو عندهم ..؟ ( سكتات لثانية تا وسعات عينيها مخرجاهم فيه بصدمة .. تا حرك لها راسوو بالايجاب و فرنسات ) ناااااارييي شحال كنحب والدييييه اععععععع

حكيم:( ضحك من حماسها و قال ) حمقة ..! راك غتمشي غير للتكرفيس ..! سبقاتنا الجمعية لي عندها الماتريال و الدراري لي غيحفرو ..! داك الدواور لي تما حالتهم حالة .. الطريق تشادت عليهم منعازلة ما نقدروش نكملوو بالطونوبيل غنهبطوو نكملوو على رجلينا شي ساعة هكاك ..!

شريفة:( ردات بحزن ) مساااكن .. ماشي مشكل ..!

حكيم:( حرك راسوو بالايجاب ) الضوو مقطوع عندهم و الما فالصيف بحال هاذ الوقت الجفاف .. حدهم كيخزنوه فالبرد من الشتا لي كتطيح ..! فحفاري فالأرض فيهم جراري د الطين و داك الما موسخ كلوو مغيس .. واحد الحالة كتضر فالقلب ..!

شريفة: غنحفرولهم بير تما ؟ وا على الله غير نلقاو الما كاين بعدا .. تحت الأرض ..!

حكيم:( حرك حواجبوو ) نحاولوو و الكمال على الله ..! نجربوو نحفرو فشحال من بلاصة و يلا ما تصابش عندهم يكون عند الدوار لي حداهم ..!

المفاجأة لي كان دايرلها هي يخليها تمشي معاه لواحد من الدواور لي كيحفر فيهم الأبار للناس مساكن لي ما لاقيينش حتى الما ما يشربوو و لي هو أبسط حق .. خاص يكون عند كائن حي فما بالك بإنسان ..! شحال و هو كيفكر فالأرباح د المنتجع فين غيصرفها ؟ يعطيها للسبيطارت و لا يبني بيها جامع .. مدرسة و لا شنوو ..!؟

حتى بانلوو فالأخير .. يبقى يقسم الأرباح كلما يجمع حصيصة يصدقها فالخير و ما لقاش حسن من الناس د الدواوير لي فالجبال معزولين و ما عندهمش أبسط حقوقهم ..! ناس قلبهم صافي بحال الحليب و النية ديالهم سابقاهم ..! عمرو ينسى أول تجربة مولها مع الجمعية لي هي كتكلف تجيب الماطريال .. مرة على مرة حتى شرا الآلات د الحفر و خلاهم ليهم بسميتوو و التمويل كامل ديال كاع الناس لي كيشاركوو و كاع الحوايج لي يقدرو يحتاجوو كيتدفعوو من الفلوس لي كيصفيها ..!

الاختيار ما كانش عشوائي غير هكاك و ماشي غير على الاسباب لي ذكرت قبل و لكن وحدة من أهم الأسباب حكيم كيمووووت فلي تريب .. تسلق الجبال و الأجواء ديال العروبية و فينما كيلقى الوقت كيمشي يصفي دماغوو تما ..! و هاذ المرة معاه حتى شريفة باش ترتاح تا هي .. ماشي غير حيث واعدها .. كان يمكن يدير أي حاجة اخرى تفرحها .. و لكن الطبيعة متنفس ما كاينش بحالوو للنفسية د الواحد باش ينسى المشاكل و يبانولوو ما كيسواو والوو قدام العظمة د الله فهاذ الكون البديع ..!

الرحلة كان مأجلها تال السيمانة الثانية من بعد ما يجييو خوتوو و غيمشي غير هو و ياها و نور .. و لكن مع لي وقع سبق بيها و تا خليل و عدنان و محمد أميين عجباتهم الفكرة و رحبوو بيها .. باغيين حتى هما يشاركوو فيها بحماس ..!

تبدلات الطريق من وطية مقادة واخا محفرة شوية .. لبيسط عامرة تراب و حجر .. كلهم كيتمخضوو و يتزعزعوو ..! حتى داخت شريفة و تكات مغمضة عينيها كتحاول تلف التغليفة لي طالعة معاها .. صبرات حتى عيات و شدات فيديه كتضرب عليها يوقف ..!

حلات الباب قبل ما يحبس و قلعات السمطة من بلاصتها ..! كتستفرغ ..! و تا هو بالزربة وقف تا سكتات الطونوبيل فخطرة من أمارش و تخلعات نور اللور بدات كتبكي بصوت كيثقب فالوذنين ..! شريفة من جهة و نور من الثانية ..! خلى بنتوو كتبكي و مشى لعند مراتوو .. عطاها الما شاد فيها حتى كتقول فاتها الحال و كترجع لها الحالة .. قلبها بغى يسكت كتبكي ما قادراش تصبر و ما كتحملش راسها حاساه غيخرج من بلاصتوو .. تا ارتاحت و ناضت شللات فمها و عنقها حكيم عندو كيطبطب عليها و يهذن فيها .. و هووووب ردات على صدرو .. شاد فيها و مغمض عينيه معوج فموو ..!

شريفة:( رمشات عينيها فيه كتمسح فمها تا ضحكات من حالتوو ) ههههه ما كتعيفش مني ياك ؟

حكيم:( شاف فيها واحد الشوفة ديال ما حاملش راسوو .. اش داني نشد فيك أنا من اللول كاع ..! حرك راسوو و قال باستهزاء ) الله اودي خودي راحتك .. كلشي ديالك ..!

شريفة:( ضحكات بتعب ) يحفففضك ا الزين ..!

خطفاتلوو القرعة كتشلل فمها و تمضمض عايفة و الريحة قالباها ففمها .. كرهاتها كل شوية كتكرعها و كتزيد تتغيلف ..! وقفوو الدراري موراهم و جاب الله لابيسط السرعة قليلة .. أما كن كانوو طايرين بحال والوو يضربوهم .. ما يشوفوهمش مع الظلام لي بدا كيطيح ..!

نزلوو كيسولوو مالهم و بسمة شادة فشريفة ..!

شريفة: غير بععععدي بعدي غنتقيى عليك .. فففف ( غمضات عينيها كتحاول تدخل كمية كبيرة من الهوا يكفيها ) هووووف عطيوني شي حلوة ناكلها و لا شي حاجة حامضة نشمها .. نرتاح عليها ..!

بالزربة شدات فالكابوو و تقلبات للجنب كتبوع و حكيم فاتح الكوفر كيلبس بالزربة كيبدل عليه .. بدل التيشورط لي تقاس و رش العطر تا قلبهم بالريحة و هزات شريفة راسها سخفانة ..!

شريفة: عطيييني عطيييني ..!

بالزربة مدو لها فتحات القرعة فخطرة كتكب بسخاوة فيديها كتشم باش تلف الريحة لي خانقاها .. تا رجعات أسية كتجري بقات لها حلوة وحدة بونبون من لي شراو فالطريق .. كلشي تكال و حتى حاجة ما بقات ..! محمد أميين و بسمة مشاو عند ولدهم لي كيبكي و يغوت قالب الدنيا و خليل هز نور كيسكتها .. وجهها رجع حممممر كتبكي و تعاود .. تا شدها حكيم عندو كيسكتها ..!

حكيم: صافي ا بابا ما وقع والوو .. تخلعتي أ بنتي ( باسها فجبهتها تا تهدنات كتجمع البكية مخشية فيه ) ..! شريفة شوية ؟؟

شريفة:( هزات راسها بالايجاب ) من هنا غنمشييو على رجلينا ؟

حكيم: لا .. مزال واحد نص ساعة هكاك عاد غيتلاقاونا الدراري د الدوار و نمشييو معاهم ساعة ديال طريق ..! ( عقد حجبانوو فيها ) ما كانش خاصني نجيبك و نتي عيانة ..!

شريفة:( سبلات عينيها و قالت ) بالعكس احسن ما درتي .. صافي أنا مزيانة يالاه نتحركوو .. غنصبر حتى نوصلوو عندي ريحتك ..!

حكيم:( رد بجدية ) متأكدة ؟ ما حدنا ما زدناش بزاف فالبيسط دابا نرجع بيك لتارودانت تشدي أوطيل تما ترتاحي نتي و نور و البنات يلا بغاو .. حتى نرجعوو موراكم ..!

محمد أميين: غيكون حسن تا ليث ما بغاش يسكت ..!

حكيم: صافي يالاه ترجعوو ..!

شاف بجدية فشريفة تا بانتلوو غتبكي و هي كتشوف الدراري راجعين غيديمارييو .. شحال و هي كتسنى تطلع معاه للجبل و تحضر لهم كيحفرو فلخر يردها .. جمعات البكية تا جمعاتها و طلقاتها مادة يديها باغى تعنقوو و بصوت باكي قالت

شريفة: غغغغ يييير ععععنننن قققني هء ما غنردش عليك ..! ( زيرات عليه و نور وسطهم مبغجة ههه و بحنان قالت ) عفااااك باغى نمشي .. غنصبر ما عندو يوقع لي .. كنرغبك ..!

بسمة:( ردات حتى هي من الطونوبيل لداخل ) ليث أنا غنرضعوو و غيسكت .. صافي ضربنا هاذ المسافة كاملة غير خلينا نكملوو ..!

حكيم:( مسحلها عينيها و قال ) علاش هاذ الدموع دابا ؟ بغيتي تمشي غتمشي .. غير على ود راحتك نتي و صافي ..!

حركات راسها بالايجاب و زادت بالشوية شادة فيه و هي دايخة حتى ركبات و كل واحد شد بلاصتوو و ديمارا حكيم الطونوبيل كيشوف فيها .. كتلف الريحة د المازوط بالعطر و الحلوة ففمها كتمص فيها ..!

حكيم:( هبط لها الكوسان تال للحد ) تكاي و غمضي عينيك حتى نوصلوو ..! ( سكت شوية و عاود كمل ) من فوقاش ما جاتك ليغيكل ؟ صدرك كيحرقك .. الدوخة و الردان و الفشلة .. البكى على أبسط حاجة ..!

شريفة:( شافت فيه بحال كيأكد لها على شنوو فبالها ) معطلة عليا شوية .. حتى أنا شاكة كنت غندير التحاليل فهاذ اليوماين و لكن ما صلاحش ( تبسمات ) شنوو زعما غيجينا بونبيينوو صغير يونس و يهوس لالة نور هههه

حكيم:( تبسم من عينيه و بانت الفرحة على ملامحوو ) نرجعوو و نمشييو تديري التحاليل نتأكدو ..!

تحركوو من تما كيتمخضوو .. كن كانوو لبن كن رجعوو زبدة ..! النص ساعة لي غيديرها فلابيسط صدقات فساعة و نص بكثرة لي كيوقف لشريفة ..! تهلكات و وجهها تسقط منوو الدم .. رجعات صفرة مذبالة و عينيها بوقاتهم بالبكى ما حاملاش ترد .. كتكرهها كرها جما ..! كتفكر غير يلا كانت حاملة و بقات هاكا لثلث شهور و لا كثر خلات عليها ..!

تعصب حكيم من حالتها و راسها القاسح .. دابا حتى يلا بغى يرجع ما عندو كي يدير ..! هي كتبوع من جهة و نور بكثرة التزعزيع قاست وجهها تا جرحاتوو بظفر يديها .. سيلات الدم و تخلعات من داك التحركات .. كتغوت و تبكي على حرها ..! ما عرف يكمل السوكان و لا يشد فشريفة و لا يسكت نور ..!

طلعلوو الدم ديال الدم .. تا ندم على النهار لي فكر يجيبهم .. ما وصلوو لحدا الدراري تا ربي غفرلهم الذنوب ..! هبط نور ناعسة بالبكى .. بقات كتبكي بوحدها تا نعسات .. و شريفة حداه شادها كي الشرويطة ما بقاتش قادرة توقف تا على رجليها فما بالك تتمشى .. ساعة د المكانة ..!

حارو كاملين معاها و عندهم بكاج خفيف خاصهم يهزوه معاهم باش يبدلوو و يريحوو ..! فكر يدير مناقص يسيفطهم هما و يبقى معاها فالطونوبيل حتى ترتاح و ترد النفس شوية و لكن الريحة د المازوط قلباتها .. منين كتشمها الله و علم و لكن مروعاها ..!

حكيم:( زفر النفس معصب و ما باغيش يقول شي كلمة يكمل عليها .. شاف فخليل و قال ) غنعطيك نور تهزها هي و الصاك ديالها ..! و أنا غنهز شريفة .. البكاج نتعاونوو عليه ..!

ردو حتى الدراري لي جايين موراهم : يلا كاينة شي حاجة فاش نعاونوكم .. مرحبا ..!

حكيم:( رد بالايجاب ) الله يكبر بيك ..!

فرقوو كلشي بيناتهم و تحنى لشريفة تا طلعات مور ظهرو .. مكروازية رجليها على كرشوو و مزيرة بيديها على صدرو .. حاطة راسها على كتافوو مرخية ..! ساعة ديال الطريق لي كلها محفرة بحجر كبار و طريق رايبة د التراب و واحد تمارة باش يوصلوو راه لا إله إلا الله .. و حاضي معاها لا تمشي ترد عليه ثاني ..!

شريفة:( ضحكات كتشوف فالدوار لي قربولوو ما بقاش بزااف ) شااااا زييييد هههههه اربي على حالة ..!

حكيم: غير لي يكركب مك من هنا و يوريك شااا و رااا ..! ( نحنح ) شوية دابا ؟

شريفة: شوية شوية ففف عيت بغيت غير نتكى ..!

حكيم:( رد باستهزاء ) حلفي بالله حتى عيتي ؟

شريفة: ههههه وا صافي اويلي ..!

كملوو حتى قربوو يوصلوو للدوار مزال لهم خمسة دقائق لا غير .. هبطات كتقاد حوايجها و راسها .. صحصحات شوية و واخا هكاك مزالة مغلوبة .. شادة فحكيم مزيرة عليه باش ما تمشيش تطيح و تلوى لها رجليها مع شي حجرة ..! تا سمعوو زداااااح فالأرض و أسية منشورة كلها ..! عيى حاضي معاها خليل مع الطالون و تا قربوو و جابت الربحة ..! حتى باش تبدلوو ما صلاحش لها سبقوهم الدراري لي عندهم حوايجها و حشمات توقفهم كاملين باش تبدل ..!

تسلخات لها ركبتها .. كلاتها فيديها و تقسحات فرجليها عينيها مدمعين .. تعصبوو الدراري كاملين و سخطوو على الوضعية .. جاب الله نور و ليث ناعسين أما كن شخضات كثر ..!

حكيم: ناقصنا عقل بالله ..! غتمشييو تتركنوو فوحدة من الديور حتى نكملوو و نرجعوو موراكم ..! نديرو فالخاطر و فلخر تعوق شي وحدة فيكم و نبقاو حنا بلا خاطر ..!

سكتوو كاملين ما عاودوش هضرو .. تا وصلوو للدوار .. الحالة كانت مزرية ديال بصح فين تبان البلاد د حكيم مع هاذو .. الديور بالتراب و لكن ما كيبان والوو تقريبا مع الظلام .. غير الشمع لي هازينوو الدراري صغار مضويين بيه .. و العيالات الكبار بالللباس ديالهم واشمين فجبهتهم و ذقنهم و فولارات و فواطات فاللوانات ضايرين عليهم .. هازين طبوقة ديال التمر و الكركاع و بنات صغار هازين سينيات ديال الحليب فكويسات ..!

رجال بشلاغمهم بترازات فوق راسهم د القش كيرحبوو و فرقة د احيدوس واقفين فالجنب ببنادرهم كيطبلوو و يغنييو فرحانين بيهم و بمجيتهم .. مزوقين الدنيا بحويجات بساط و الفرحة مرسومة على وجوههم ..!

كلاو من عندهم و شطحوو مع أحيدوس و ضحكوو مع الدراري تا فاقت نور من عند خليل و هبطات حتى هي كتسفق بيديها .. دايخة مع الاجواء و تالفة مع باها فين هو ..! كتقلب عليه غادية جهتوو بداك القزيبة كتهز .. حتى وقف فطريقها وليد صغير زعييعر حتى هو و سمممممر بالشمش و العوينات عسليين كيحمقوو .. عامر تراب و مكرفس و لكن كيسطي فنييون ..! بلقات فيه داك العينين موسعاهم و حكيم حاضيها لا يمشي شي حد يقيسها و لا تتلف ..!

تا شافها شدات فالولد كتضحك و جراتوو لعند حكيم كتفرنس و ترمش فداك الرموش الزوعر و شنيفة مسروطة كيف العادة .. ضحكات معاها شريفة باستغراب و هبطات عندها شوية ..!

شريفة: شكون هذا ا ماما ؟ ( هزات عينيها كتقلب ) ولد من ؟ منين جبتيه ؟

نور:( بفرحة قالت ) هاااابي مامي باااابا ا هااابي وييين ..!

شريفة:( ناضت متكية على حكيم كتضحك بالدموع ) ها صاحبها الزوين جابتوو تعرفك عليه .. مرضية باباها .. يالاه لقى هههههه هاذي شدات من عندي التزهونيات ما فيهاش ( هزات حاجبها ) و لا نتا فيك شي عرق منوو و أنا ما فخباريش ..!

نور:( زادت شنقات عليه .. باستوو فحنكوو فرحانة ) بيبووو ويين ..!

حكيم:( خنزر فيها ما عاجبوش الحال ) باركة من الهضرة الخاوية ..!

تحنى فك لنور يديها و هزها عندو و مشى كيهضر معاها لبعيد و نور موسعة عينيها كتباسم و تجاوبوو ..! ضحكاتها ردة فعلوو كتدور فراسها و الولد هرب ماشي عند موو ..!

شريفة: غير جيبولوو صحابك ما حدك باقى صغيرة هههه اربي على هاذ المشة ( جات عندها أسية شدات فيها و قالت ) شوية من الطيحة ؟

أسية: ففف شوية شوية ( دورات عينيها بتفكير و قالت ) رديت على عدنان ..! ( حركات راسها بالنفي ) ما قبلتش باش تكون فبالكم .. هاكا حسن لينا بجوج ..!

شريفة:( بتفاجئ ) بصصصح ؟ و علاش ..؟

حكيم:( وقف عليهم حط نور فالأرض و قال ) غنمشييو دابا باش نحفرو .. خليك مع العيالات هنا دابا يستقبلوكم فشي دار .. حتى نرجعوو و ندوزو موراكم .. ما تطلقيش من نور انتابهي لها و بلا ما تهزيها ..! ( غمز بنتوو بابتسامة خفيفة ) نور ..!

نور:( بفرحة باست يديها سيفطاتهالوو ) لوووبيوو بابي ..!

شدات فيها من جهة و أسية من الثانية كتعاودلها شنوو وقع و علاش اختارت هكاك .. متأكدة من قرارها لي ما خذاتوش غير على ودها بوحدها ..! ما خلاتش العاطفة تتحكم فيها و فكرات بعقلها كثر ..! و متأكدة كن كانوو الأدوار مقلوبين مستحيل شي را٠جل يسمح فمستقبلوو خدمتوو و الكاغييغ ديالوو لي غيوصلوو لمراتب عالية على ود الزواج و الحب ..!

عدنان كتبغيه ااه و لكن داك الاعجاب من بعيد .. من لي وقع مع ملاك تأكدات أن الصورة لي كتشاف غير من الفوق ماشي ديما كتكون صحيحة .. لي كتعرف على عدنان الكادر لا غير و حتى داك الكادر بعيييدا على المشاعر و بعقلانية ما يصلاحش لها و هي عاد باغى تبدا و تعيش حياتها و ما مستاعداش تعيشها من دابا بطريقتوو ..! ممكن يحببها فالدين و ديكشي لي كيبغي .. تلقى راحتها و يكون معلم ليها .. و ممكن ما تقدرش تستحمل و يجيها ديكشي كثير بزاف .. يقيدها و يخنقها ..!

ممكن زواجهم ينجح و مركبهم يسير و ممكن ما ينجحش و يغرق بيهم .. كلهم فرضيات دارتهم فبالها و خرجات فالأخير بقرار واضح .. قرايتي و المسار لي انا غادية فيه باين و واضح ما نقدرش نضيعوو و نخسرو باش نمشي فطريق كلها ضباب و ممكن نطيح فأول حفرة و ما نقدرش ننوض ..! يلا كانوو مكتابين لبعضياتهم يطيرو و ينزلوو بجوج .. آخرتهم يتجمعوو و كيفما كنقولوو مزوجين فالسما ..! ما كانش راه ماشي نهاية العالم .. غتقدر تنساه كيفما نساها هو فالوقت لي كانت محتاجاه .. بعدها من حياتوو مدة و اختار زكية و تعذبات بوحدها باش نقزات داك المرحلة و قوات راسها ..!

كاينين فرص ما كيتعوضوش كيجيونا فالحياة و ممكن عدنان واحد منهم و لكن شكون لي غيضمن لها ما غتلقاش ما حسن منوو بدرجات من بعد ..؟ قريب لها فالعمر و ممكن كاع من نفس الدومين و ما غتحتاجش تختار بين الكاغييغ ديالها و بينوو ..! الزواج ماشي من خططها حاليا على الأقل حتى تسالي قرايتها يعني من هنا ست سنين و تكون ساعتها عندها 26-27 سنة .. ناضجة كثر فتفكيرها و قراراتها ..! و علاش لا تلقى فرص حسن ببزاف من لي فاتوو ..!

استقبلوهم أهل الدوار بكرم كبير و جمعوهم فدار كبيرة مفرشينلهم فالأرض بزرابي تقليديين يدويين و حصاير و هياضر ديال الكباش و المعيز .. أجواء زوينة بالتطبال و الغنى فرحانين بيهم و حاطيين لهم الخيرات قدامهم كيرحبوو بيهم ..! كلاو حتى غلقوو و تجمع كلشي .. كيفرقوو اللغى بيناتهم و شريفة عينيها غير فطبوقة محطوطين فالأرض عامرين فاكية ..!

فمها نشف من الريق كتبلع فيه و تهضر مع لي حداها و تلف مع نور لي دارت ما عليها مع دراري الصغار ما كاين غير الله يعطيك صحيحتك و هي حاضياها لا توقعلها شي حاجة و ريوكها سايلين كتحس بالمذاق د القسطال ففمها كيذوب ..!

هي لي عمرها انتابهات ليه و ما كيعجبهاش بزاف تال دابا .. باغى تقطع حوايجها عليه و حشمات قدام كلشي تتطلب تذوق ..!

حتى انتابهات لها شحال من وحدة و بابتسامة ناضت مولات الدار هزات الطبق سبقات بيها و بفرحة هزات وحدة و قالت بصوت حنين

شريفة: شكرا الله يعطيكم الصحة و سمحولنا عذبناكم معانا ..!

..... نتوما ماليين الخير ا ختي ( كمشات فيديها و عمرات لها فحجرها ) كولي حتى تشبعي و يلا ما قدكش نزيدك ..! ( بتساؤل ) كتوحمي ؟؟

شريفة: ااء ؟؟ ما عرفتش .. يمكن ..!

مصات شنافتها و خدات الموس من عندها كتحل و تاكل و كتسمع للمراة كتعيط " مييي هنية وا ميي هنية "

جات مي هنية سيدة كبيرة فالعمر بقميص واسع فالأورونج و التشمار ديالها و مضمة د السقلي باهثة فكرشها و الوشام فجبهتها و لحيتها .. مكحلة عينيها مزياااان و الكحول سايح من الجناب .. ضعيفة و عضوماتها باينين .. عرفاتها قابلة هي لي كتولدهم فداك الدوار و كاع ولادهم هي لي كتقبلهم ..!

قنعوها تخليها تقلبها باش تتأكد و منها تنتابه لماكلتها باش ما تضرش راسها بشي حاجة ماشي هي هاذيك ..! حركات راسها بحماس و دخلات معاها لبيت صغير مجنب تكات و خلاتها كتقلبها حاضية معاها .. خايفة تقسحها .. تا كملات و قالت بنبرة ثقيلة

القابلة: حجرك سخون ابنتي .. هازة فيه التيلاد ( بابتسامة ) يتربى فعزكم ..!

شريفة:( ضحكات بفرحة حاطة يديها على كرشها و عينين كيلمعوو ) الله يبارك فيك ..!

خرجات خلاتها باقى حاطة يديها على كرشها و عينيها مدمعين فالسقف .. فرحانة و الضحكة غتخرجلها من الوذنين و الدموع هابطينلها من جناب عينيها .. و شكون كان يقول شريفة تفرح و تبقى تتسنى غير فوقاش تحمل ؟ بقات متكية حتى نعسات تما ما حاساش براسها ..!

دخلات فسابع نومة و حكيم مع خوتوو و الدراري واقفين حدا الآلة ديال الحفر كيوجدوها .. جايبين المولد د الضوو باش غتخدم و دراري صغار و بنات هاوين الحلاوي و الفاكية ضايرين بيهم و الشمع فيديهم .. الفرقة د أحيدوس كيطبلوو و يغنييو تا سكتوو فاش بداو الرجال كيصلييو على النبي و الصوت ديال الحفير كيتسمع مجههههههد ..!

كيهللوو بصوت واحد باسم الله .. متمنيين يلقاو الما و يولي حتى هما عندهم مصدر طبيعي للشرب و ما يبقاوش فداك الحالة المزرية ..! مدة طويلة و هما كيحفرو و مزال ما لقاو الما .. تا بداو كيقطعوو اللياس و الملامح كتذبال فيهم الفرحة .. و هو يطوش الما بالجهد بحال شي شلال طالع تال السما كيهبط عليهم نقاطي د الشتا مجهدين .. ماا صافي ماشي مغيس بحال لي كانوو مولفين بيه ..!

تهز القنت بزغارت د البنات الصغار و غوات الكبار و مباركاتهم واحد كيعنق الثاني و يضرب على ظهرو بحرارة .. و ففمهم غير " الله .. الله .. الحمد لله .. الحمد لله .." عنقوو حكيم و كاع لي عاونوو فالحفر و مزالين خدامين و الدموع شاقة طريقها وسط تجاعدهم لي كتحكي على قهر الزمان ..!

فرحوو معاهم براحة كبيرة داخلة لقلبهم .. كيقولوو السعادة كتعدي بحالها بحال الحزن ..! فاش كتشوفهم هاكا ماشي غير كترتاح على الخير لي كتديرو و لي ما مشاش فالخوى الخاوي و غيبقى لك صدقة جارية لحياتك كاملة .. لا و كثر كتحس بالنعم الكثيرة لي عندك و غيرك ما لاقيهاش ..! كتحس بمشاكلك ما كيسواو والوو و نتا بصحتك و عندك كاع المتطلبات الأساسية لأي انسان .. عندك الامكانيات و شحال من حاجة كيحلموو بيها بزاف ..!

ما خاصش الواحد يفكر غير فشنوو ما عندوش و الصداع و الضغط لي هو عايش فيه .. خاص يشوف حتى المقابل ديال ديكشي ..! خلاو العمال كيكملوو و شيخ القبيلة قام الصلاة بالبقية .. فواحد الأجواء كتبورش و تجيب القشعيرة .. كتهز الأبدان و تدخل معاك حتال للعظم ..! لحظة خشوع لحكيم .. بحال يلا كاين غير هو و سجادتوو .. كيسجد لعظمة الله .. لحموو كلوو مشوك عليه و الدموع مغرغرين فعينيه بلا ما يحس ..! واحد الراحة عمرو حس بيها و بكى و هو ساجد كيدعي بخشوووع .. بحال داك الدموع كيطهروه و قلبوو كيتشرح كثر و كثر ..! و بصوت ثقيل خارج من أعماقوو قال كيدعي و هو ساجد ..!

حكيم: اللهم إني أستغفرك من جميع ذنوبي.. صغيرِها وكبيرِها .. أستغفِرُك عدد ما طاوعتني نفسي على الذنب .. وأستغفِرُك عدد أيام حياتي .. قبل المَوت وبعده .. وأستغفِرُك حتى يملّ القمر .. وحتى تطلع الشمس من مَغربها .. أستغفرك عدد ما استغفرَك المُستغفرون .. وعدد ما سبَّح المُسبِّحون .. وعدد كل صغيرٍ وكبيرٍ في الكَون .. أستغفِرُك حتّى تغفر لي وتُدخلني الجَنَّة ..!

دوزو يوماين معاهم استقبلوهم احسن استقبال فيه تفكرو شريفة و حكيم زواجهم و شهر العسل د العروبية ههه .. أجواء عائلية زوينة معاه و مع خوتوو .. فوجوو على بعضياتهم و نساو الصداع و المشاكل ..!

فضلات شريفة حتى يمشييو للطبيب و تدير التحاليل عاد تأكد لحكيم على الحمالة .. ما تديش على هضرة القابلة و الأعراض ممكن يكونوو أعراض كاذبة ..! و ديكشي لي كان .. رجعوو للمنتجع مجموعين عندو من غير عدنان لي حدو هضر مع حكيم مسافر و حبيبة لي بغات تبقى مع ملاك ما تخليهاش بوحدها كيتسناو يخرجولها الوراق د الفيزا ..!

كل نهار و بروغراموو و شنوو كيديرو فيه .. و اليوم مع الصباح مشاو دارت شريفة التحاليل تسناو نص ساعة و خرجولهم داوهم معاهم لعند طبيبة نسائية لي استقبلاتهم ببشاشة .. قرات التحاليل و تبسمات معاهم ..!

الطبيبة: مبروك عليكم .. بصح مدام شريفة حاملة .. يالاه معايا للبيت لاخور نتأكدوو من البيبي واش بخير و كلشي مزيان عندك ..!

تبسمات معاها شريفة و وقفات مزيرة على يد حكيم حتى دخلوو للغرفة د الفحص .. تكات فوق البياص .. عطاتها ليزار تستر بيه نصها تلويه عليه و تحيد حوايجها التحاتة ..! شعلات التلفزة قدامها دايرة جيل على كرش شريفة كتحرك فوقها الآلة بشكل دائري و كتبرك هابطة لجهة الرحم كتفحصها ..! حتى توضحات الصورة فالشاشة قدامهم ..!

كبراتها لهم كتوريهم و حكيم شاد فشريفة و عينيه مرة مع الصورة مرة معاها لي تغرغرو دموعها ..! كتشوف فجوج نقيطات مفرقين بعاد و الطبيبة كتنعت لهم بالضحك ..!

طبيبة: هاذ جوج توتات هاذو كتشوفوهم ههه هما وليداتكم .. عندكم توام ..!

ضحك حكيم هاز عينيه فالسما تا تحنى باس لشريفة يديها و راسها مزير عليها بقوة و هي شادة فصدرو كتبكي من الفرحة قلبها غيخرج من بلاصتوو .. ما كرهاتش تطير كترفرف تقولها لكلشي ..! مخليين الطبيبة فرحانة معاهم لفرحتهم .. تا طلقات لهم مكبر الصوت كيسمعوو دقات قلبهم .. كيضربوو بالجههههد و بدقات ما منتاظمينش حيث كيتسمعوو د التوام بجوج دقة وحدة ..! صووت كيبوورش " تك تك تك تكتكتكتك " ( ناضت مخلياهم بجوج حتى يلحقوو عليها )

خلى عينين حكيم يلمعوو بالفرحة و دموع شريفة يسيلوو بالجهد كتبكي بصوت مسموع .. لحظة صعيبة فكراتها فخسارتها .. فكراتها فطفولتها فالولاد لي كانت كارهاهم .. ففرحتها بلي بيبي لوالة و وعودها ليهم و ضياعهم فلخر .. اللقطة لي كانت فيها بوحدها و دابا مع حكيم هو مسؤول عليها و على ولادها و حتى واحد ما غيقيسهم بسوء و ما غتكونش بوحدها .. تفكرات نور لي كتحسها قطعة من قلبها و دابا غتشد جوج فيديها يلا كتاب و ترعاهم داخلها .. صغار بحال النقيطة و هي غتسقيهم و توكلهم و تظلل عليهم حتى يكبرو .. شحال كانت كتسنى تحمل من نهار قطعات البيلول و حيدو الاحتياط و أخييييرا الحلم تحقق ..!

ولات حتى هي عندها عائلة كتهمهم و قلبهم عليها .. ما بقاتش بوحدها غير هي و أسية و لي نفسها مسؤولة عليها .. لقات لي يهز عليها الحمل و تبني معاه عشها .. عش دافئ بالتفاهم و المودة و الصبر و بزااااف د الاحترام و الحب ..! حكيم كيعني لها بزااااف و زادو هاذ المشاعر و العواطف تحركوو مع الحمالة و الهرمونات ..!

و هو يمكن فرحتوو من فرحتها و لا كثر كاع ..! هو لي كيمووت على الولاد الصغار عندو الضو د عينيه .. ما يكرهش يولد فرقة د الكرة كاملة ..! كانت حياتوو قبل عملية بزاااف ما فيهاش جديد .. مملة .. كاره الدنيا و ما فيها .. مخيخ من البشر .. حتى تلاقاها و من أول مرة دخلات واحد الفرحة لقلبوو و كمشاتوو باحساس من زمان ما حسوو .. احساس خاص بأميرة طفولتوو ..! ما كانش كيتصور واحد النهار غيكون تا هو فرحان لهاذ الدرجة و عندو حياة زوجية دافئة .. ترجعلوو شريفة لي تسناها لسنيين و سنيين واخا كان مجروح منها و معذب من جهتها ..! يلا هو طبيبها لي داوى جروحها .. هي راه الشميشة لي شرقات فحياتوو و ضواتها و خرجاتوو من البؤس لي كان فيه و بسبابها و بسباب هاذ العائلة الصغيرة هو اختار طريقوو و لقى راحتوو فطريق الله ...!

حكيم:( شدها من حناكها بجوج و باسها فشفايفها بعمق و دموعها مفزكين حناكها .. حتى حط جبهتوو على جبهتها ) أركم تّيريخ " كنبغيييك " مبروك علينا ..!

شريفة:( ضحكات بفرحة ) هههه خاصني حتى ندخل للطبيب و نكون متكية على البياص عاد تقولها لوالديك ..! ( شدات فلحيتوو الخفيفة ) أنا راه ماشي غير كنبغيك كنتوفى على حسك .. راك ضاربني على الشعى ا ولد حبيبة ..! ( قربات باستوو هي بخفة و قالت ) عقلتي على الهضرة لي قلتيهالي أول مرة فأول حمالة ؟ عاودها دابا عفاك ..! محتاجة نسمعها ..!

حكيم:( تبسم بفرحة و قال ) غتكوني احسن ام فالدنيا ..! نوارة غتنور حياة ولادها بظلها عليهم و ما تخلي حد يقرب من حدودهم و يقيسهم لا بالخير لا بالشر ..! ولادنا من صلبي و صلبك .. نتي جنتهم و هما نعايمك ..!

شريفة:( غمضات عينيها شوية كتمسح عينيها ) عندك الصح غنكونوو أحسن واليدين كيفما مع نور كيفما معاهم .. يلا أنا جنتهم نتا غتكون أغلى حاجة عندهم .. المثال و القدوة و السند لي هازهم على كفوف الراحة و ما كيرتاح قلبوو حتى كيشوف كاع لي ضايرين بيه مرتاحين ..!

هل جربت يومًا أن تعشق امرأةً حرة؟!

حرة الفكر، العقل، الروح، والجسد، امرأة بكل ما تحمل الكلمة من معنى؛ امرأة تُسبيك فتملكها، امرأة تعرف كيف يكون التلاحم بالنبض، أن يدق قلبك فتسمع صدى دقاته بصدرها، لا تربطها بك الروابط بل العشق.

امرأة تعتلي معها قمم المتعة والجنون، تأسر جُلَّ خلاياك طواعية، فتملك معها رَغد النساء، تتدلل بدلالك، وتنتفض قوتها بضعفٍ تشتهيه، تُشعل نيرانك بنظرة، وتطفئها بلمسة، وتُبقي لهيبك تحت رماد الشوق مشتعلًا.

إن كنت لم تفعل؛ فجرِّب أن تعشق حقًّا؛ فأنت لم تفعل بعد ..!

~ الجيزاوي

قادات حوايجها معاونها و خرجوو عند الطبيبة مساندين على بعضياتهم .. تبسمات معاهم و قالت بجدية ..!

الطبيبة: مبروك عليكم مرة اخرى .. يترباو فعزكم ان شاء الله ..! هاذو التحاليل لي خاصك تديريهم لي و تجيبيهم .. باش نتأكدو من كلشي و نعرف شنوو ناقص عندك و نتعاونوو مع بعضياتنا باش يتزادو بصحة مزيانة ..!

شريفة:( حركات راسها بالايجاب .. جرات حجابها جبداتوو و قالت ) واخا ان شاء الله غنديرهم دابا نيت و فالكونطرول الجاي نجيبهم معايا ..! مي بغيت شي حاجة قبل تهدن عليا الردة و الدوخة .. قتلوني و خصوصا الردان ما كنقدرش عليه كيسالي معايا ..!

حكيم:( تدخل بجدية ) و الحرقة فالمعدة كتشدها هي و الدوخة تال الثلاثة د العشية هكاك عاد كتقدر تحرك .. عيات بزاف يلا كاين شي فيتامين ديال الطاقة يعاونها و لا شي حاجة نديروها تتحسن عليها ..!

شريفة:( تفكرات ) ااااه و ما كنقدرش ناكل فالصباحات كاع تال للعشية و هاذ الأيام كاملين عاطياها غير للقسطال و النبق .. منين مشينا للعروبية جبناهم معانا و مشهياهم بزاااف .. خفت يضروني ؟

طبيبة:( حركات راسها بالايجاب كتكتب لهم فورقة ديال دوا ) واخا هاذو شريهم يلا ما نفعوك ما يضروك و فاش تديري التحاليل عاد نعطيك لي يوالمك كثر .. فهاذ اللول ضروري من هاذ الاعراض .. غير على حساب كل وحدة .. كاين لي كيجيها ساهل و كاين لي صعيب و كتكرفس و خصوصا مع التوام هاص شوية د الصبر ..! و القسطال و النبق خوديهم و لكن ما تكتريش بزاف .. مهم حيدي شهوتك منهم .. كل نهار بالحساب ديالوو .. حتى يفوتك الحال ..!

شريفة:( تبسمات و مدات لها يديها سلمات عليها ) داكوزغ ميغسي ..!

شكروها و خرجوو من تما للاستقبال .. خلصوو و خداو رونديفوو للكونطرول .. شاديين الطريق للرجعة فرحانين .. حتى وصلوو للمنتجع و جراتوو من يديه لجهة لابيسين ..!

شريفة: يالاه نجلسوو تما شوية .. خاطري مزير عليا بغيت نفوج .. نسيفطوو حتى مور نور يجيبوها ..! و لا مشغول ؟

حكيم: يالاه ماشي مشكل .. ساعة د المكانة ما خاسرين والوو ..!

تمشاو على رجليهم كيضحكوو و شريفة حاطة يديها على كرشها كتخرجها .. كتخيلها كي غتكون منين غتكبر و تتبوق ..! حتى وصلوو للجردة د لابيسين و خرجوو كاملين .. خليل .. أسية .. محمد أميين .. بسمة .. حبيبة .. نور .. ليث .. لالة فاطمة و شي وحدين من الخدامة لي عندهم .. هازين طاغط كبيرة على شكل أرقام " 35 " و بصوت واحد قالوو

الكل: هااااابي بييييرطدااااي بااااابييي " Papi " ..!

يتبع...

‎