عرس الذيب الجزء 32 والأخير

ضحك حكيم كيشوف فالبيفي و الزواق لي مزوقينوو و الفرحة ديالهم و د شريفة لي كتهزهزلوو فحجبانها .. جبدات بواطة مشدودة عطاتها لوو و سلمات عليه بالوجه ..!

شريفة: ها الكادو ديالك واخا أنا كاملة كادوو أنا و توتاتي " التوام " ..! ( رمشات عينيها كتفرفر بيهم ) كي جاتك المفاجأة ؟ غزالة بحالي ياك ؟

حكيم:( ضحك و عنقها بيد و استقبل التهاني د خوتوو لعيد ميلادو و للبيبي لي زادت الفرحة فرحتين فاش عرفوو توام ) الله يبارك فيكم .. عذبتوو راسكم ما كاين لاش ..!

نور:( بقات تلوى و تجبد فحكيم تا هزها كتقيس فكرش شريفة باستغراب ما فهماتش شنوو قالو لها ) مامي ؟ بيبي ؟؟

شريفة:( تبسمات ) ااه ا ماما عندي بيبي هنا .. يجيوك جوج خوتك يلعبوو معاك و يونسوك .. صغييورين مساكن و نتي غتهلاي فيهم .. كيبغيوك بزااااف بزاااف و حتى نتي غتبغيهم و تبوسيهم ياك ؟

نور:( رمشات كتمص يديها ) حوويا وين بوسوو ؟ حويا ؟

شريفة:( ضحكات ) ااه خوك و ختك و لا جوج جوج من الحاجة هههه تبوسيهم حتى تشبعي .. بوحدهم لي نبوسوهم حيث خوتنا .. بحال بابا حكيم مع عموو خليل و محمد أميين و عدنان .. ياك ؟

نور: بابا .. لولو .. ميميد .. دنان ؟؟

شريفة: هههه اااه ..!

مشى حكيم مع خوتوو و جات أسية لعندها معنقاها و كتخربق فشعر نور و تجبدها ..!

نور: يايا مني مني طلك مني .. مااااميييي ..!

شريفة: اهيتااا بعدي منها ههههه

أسية:( ضحكات ) ياك ا الفرماشة .. حتى تجي لعندي و نوريك طلك مني مني ههههه مبروووك ا شوشو يترباو فعزكم بالفكاك و الصورة الكاملة ان شاء الله ..!

شريفة: أميييين يا ربي ..!

أسية: شنوو جبتيلوو فالكادو ؟ جبتلوو عطر ما عرفت ما نجيب هههه حشمت ..!

شريفة: أنا اصلا عطيتوو أحسن كادو اليوم .. مي البواطة فيها لي بوطون ديال لي شوميز كيعجبوه .. يبدل بيهم ...!

لمة العائلة ما بحالها لمة .. واخا بقات بلاصة ملاك واخا كاع لي دارت كتبقى منهم و فيهم و فبحال هاذ المناسبات كيضر فالخاطر فاش شي واحد عزيز كتكون مقاطع معاه و كيضر أكثرية الواليدين ..! و تا بلاصة عدنان لي مزال مسافر و لي باغي يبعد و يريح دماغوو باش تا يلا عاود تلاقى أسية من بعد ما يكونوش حساسيات بيناتهم .. ما يوصلوش لدرجة العائلة تفكك و عمرهم يتجمعوو كاملين ..! و بلاصة حسام حتى هو .. لي عاطيه حكيم وقتوو الكافي و غيمشي يهضر معاه فاش تتهدن الأمور من جهتهم بجوج .. مستحيل يخسرو .. واخا ما عرفت شنوو يوقع .. حكيم و حسام د زمان هما د اليوم و غذا و بعد بعدو و نتا غاذي ..!

《 أما الحب فما أندر وجوده ..!

الحب الذي يتسم بانفتاح كامل على العالم .. الحب الذي تكون المرأة فيه دليل الرجل .. و الرجل دليل المرأة فى رحلة الحياة ..!

لا يقف أحدهما ليحيط بعنق الآخر ساعيا إلى امتلاكه .. وإنما كل منهما يطلق الآخر من قيده ساعيا إلى تحريره ..!

حيث يكون موضوع الحب النهائي لكليهما هي الحياة ذاتها .. يجّدان فيها متشاركين بجهدهما ومساهمتهما .. هذا الحب ما أندره ..!

"حكيم شريفة"🐺🐍 》

أيام كتمشي و أيام كتجي بحلوها و مرها ..! المشاكيل ما كيخطاو حتى دار و حتى علاقة و لكن فاش كتكون مبنية على ساس مثين حتى حاجة ما كتزعزع داك الغولاصيون لي من اللول اصحابها داخلينها بوجوهم لحقيقية .. حد ما كيمثل على الثاني و متقبلين بعضياتهم بشخصياتهم كيفما هما و كيحاولوو يصلحوو بعضياتهم و يزيدو براسهم للقدام .. ما يبقاوش غير واقفين فبلايصهم ..!

الفيلا ديال امغار عامرة بالناس ..! كلشي بالبلدي .. قفاطن و قمايص و الشعورات مطلوقين و المكياج كيبري فالوجه ..! جايبين اللعبات كيغنييو و يشطحوو فالوسط كيهزهزو فخيراتهم ..! و شريفة فراس الصالون بلبسة فالاخضر ملكي منبتة بالحجر و مطرزة ..! الشعر كالعادة قصير .. واخا كتبغي تطولوو كيطلع لها فراسها ..! كل مرة بصباغة و تقطيعة فشكل و دابا مع الحبالة راها عاطياه الراحة مخلياه فلونوو الطبيعي .. كحل كي الظلام و زايدالوو لي زيكسطونسيون مطولاه و مقاداها ببروشينغ سامبل و التحت مبوكل و خيط الريح فجبهتها ..!

صباغة حمرة فيديها و عينيها مجبدين بالكحول و الأيلاينير .. ضاربة تمكيجة ديال القلب .. ما حدهم مجموعين غير العيالات ..! تبطزات و غلاضت مع الحبالة ..! كرشها مقنبلة قدامها و الحكة قتلاتها .. لي داز و لا جلس حداها كتعطيه يدير يدو ..!

مادة رجليها للحناية كتنقش لها نقش عصري خفيف و زوين على ذوق شريفة ..! و نوايطاتها و حماتها و خوت حبيبة و بناتها معمرين الدنيا مع ولادهم الصغار ..! عاد معارفها هي و شي بنات من لي خدامين عندها كيسربييو الناس بالدواز د أتاي و المشروبات ..!

تسع شهوور دازت و الحنة لي كانت غتدار فسبع شهور تأجلات لتسع شهور .. بينما جات أسية و سالات امتحاناتها د الباك و بينما حكيم رجع من السفر لي جاه على غفلة مع الخدمة مزير ..! نور جالسة بكسيوة سامبل هابطة تحت من ركابيها فغوز بارد مايل للون اللحم .. شعرها ممشوط و مجموع كرينات ..! مثبثة حدا أسية لي تا هي غير ما غادية و كتزعار ..! دايرة مكياج خفيف و لابسة قفطان فالكحل مطروز بالذهبي لاسق على طايتها راسمها ..! و شعرها مشدود للجنب بمشيطة خفيفة ..!

كلها و فاش دايها و معامن خالقها و نور متبعة بعينيها غير واحد جوج دراري .. واحد عندو عشر سنين و الثاني خمس سنين .. ولاد بنت خالة حكيم ..! طالعين فوق السدادر د الصالون الثاني كيجرييو فوق منهم و يتدافعوو بالغوات تا قال واحد فيهم ..!

....: الحماااار الكلب ما تقييسنييش ..!

شافت شريفة فامهم كترمش بعينيها ما كرهاتش تمشي هي ليهم تلاقي الريوس .. خربولها الصالون و الأثاث ..!

أم: هيهي كيلعبوو مساكن .. هاذو هما الدراري .. دابا تولديهم و تجربي ا شريفة .. الوليدات ماشي بحال البنيتات ..! عندكم جوج توام ولاد ياك ؟

شريفة:( تبسمات بصواب ) اااه اختي الله يخليهم لك ( كملات فنفسها كتندب على دارها ) الله ينجيني تا يكونوو عندي هاذ الجنون تف تف تف فمك لحسوو كلب مجعوور ..!

باقى كتحك تا تسمعات تشااااااخ .. هرسولها فاز ديال الكريستال كيعشق شحال و هي كتقلب عليه عاد لقاتوو كيف بغات ..! و بلاصة يتكمشوو عاد تشادو باليديين و الرجلين كيتضاربوو ..!

أم: جلس ا علي على خوك ما تضربوش أنا غنوض لك ..! هدااا عليه ..!

علي:( رد عليها مخرج عينيه ) أجي نوضيلي كاع ما كنخاف منك ..!

أم:( تحححححرجات و ناضتلوو بالسندالة عطاتوو و فرقاتوو على خوه ) وا قيصوو دابا و تشووف ..!

علي:( رد ما راضيش وجهوو و وذنيه حووومر ) اااه غنقيسوو شنوو غتديري ؟

أم: وا قيسوو ..!

بلا عكز عليه نقز للسداري الثاني و مشى عند خوه عطاه بدقة للراس .. كيشمر فنيفوو ..!

علي: و هانا قستوو يالاه ..!

أم:( ضحكات بصفورية محرجة ) واخا حتى نمشييو للدار و نتفاهموو و الله لا بقات فيك ..!

رجعات جلسات حداهم بحال حتى حاجة ما واقعة تا عيطات شريفة على حبيبة تجمعهم قبل ما تنوضلهم هي بحنتها ..! ما هدنوو تا قلبوو لها المجاج ..! تحط كاسكروط فطبلة كبيرة ضايرين عليها و الصوندريات مفرقين لي بغى يهز حداه .. كيحطولوو السربايات البنات ..! و شريفة حاضية غير داك الجوج كي كياكلوو و كي كيتصرفوو ..! الأم كتهضر التيليفون و الولد تالف سمح فالماكلة .. عينيه و وذنيه خارجين فيها كيسمع ..!

علي: ويييلييي وييييلييي لا مزيان تبارك الله .. شووو شنوو دارت .. علاش ما يجييش قولوو يجي ..!

ضحكات بفقصة ما كرهش يمشي هو يجاوب بلاصة موو و يدفعها للجنب يكركبها ..! تا بردات اعصابها مع نور لي جلسات حداها كتقولها شنوو بغات تاكل باش يجيبوه لها و فرحانة بالحنة باغى تدير بحالها و تشطح مع اللعابات تا هي و حشمانة ..!

و فالظهر د الفيلا من الجهة الثانية د الجردة ..! مجموعين الرجال .. حكيم و عدنان و محمد أميين و حسام عاد بقية رجال العائلة ..! جايبين الطلبة كيقراو القرآن صدقة و السربايا رجال كيحطوو لهم حتى هما الدواز و المشروبات .. مقومين العشية من ديكشي ..!

حتى وقفات طونوبيل bm بماتريكيل ديال برا و تبعوها ربعة ديال الطونوبيلات بماتريكيل د المغرب ..! هبط خليل و تبعاتوو ملاك لابسة سالوبيط و جامعة شعرها سفنجة بوجه صافي من المكياج ..! حانية راسها من الرجال و الشيوخ لي جاو معاهم ..! ناس كبار و أغلبيتهم شاديين فالدين و عندهم ما يقولوو ..!

مشى معاهم خليل للجهة د الرجال و بقات هي مجنبة كتسنى مزيرة على يديها ..! جبدات فولار رماتوو على راسها و زادت شادة فخوها فاش جا موراها ..! ما شافت فحتى واحد عينيها فالأرض و وجهها و وذنيها حووومر غيطرطقوو ..! جلسات مزيرة على فخاضها و يديها كتسمع لواحد من الشيوخ ..!

الشيخ: جينا اليوم ندخلوو بخيط بيض و نجمعوو بين القلوب و نصلحوو أحوالهم ..! كيفما كتعرفوو كاملين الخاوة حدها الدنيا و الله سبحانه و تعالى وصى

كل واحد شد مدة و هو كيهضر و يجيب احاذيث و آيات قرآنية .. كيرطبوو فالخوت و حسام قالب وجهوو ما كيشوفش فيها فخطرة .. من نهار طلقها فالمحكمة رسمي ما بقى شافها و لا قلب على خبارها ما باغي يسمع عليها والوو ..!

عيطوو على شريفة تا هي ..! لبسات شربيلها خاشية رجليها فتقاشر بويض رقاق و حازمة يديها حتى هي باش ما تفتتش لها الحنة ..! قادات فولارها و سترات صدرها لي كتبان الشقة ديالوو .. منفوخ و عامر بالحليب و زادت سلهام ديال اللبسة من الفوق عاقداه و دايرة القب على راسها هابط على وجهها .. على ود المكياج ..!

و مشات لاسقة فيها نور تا جرات معاها أسية باش تشد البنت و هي لحقات عليهم جلسات كتسمع .. شافت ملاك حانية راسها كتبكي بحرقة و دموعها كيقطرو على سروالها .. بوجه حممر قاطعة صوتها ..! تا كملوو و وقفات مشات لعند حكيم جراتلوو يديه بزز منوو باستها شادة فيها كتبكي عليها و يديها الثانية فجنب كرشوو معنقاه و صوتها مخنوق بالبكى ..!

ملاك: سسسس مممم ححححلييي عافاااااك ندمت بزاااف على شنوو درت و كرهتكم فيا بقلة عقلي عافاك سمحلي عممممري نعاود ..! ( هزات عينيها فشريفة و قربات منها ) سمحييلي عافاك .. سمحووولي كاااملين ..!

اعتاذرات من خوتها و من شريفة و تا من حسام و بكات بقهرة و زادو تدخلوو الشيوخ مرة اخرى تا عنقها حكيم بتنهيدة من قاع قلبوو و تصالح معاها و تبعوه كلهم من غير حسام لي ما قدرش و خرج من تما زاعف ..! تا داوه رجليه للمنتجع كيكمي فكارو و عينيه متبعين الداخل و الخارج كيحك فكرشوو من الزين لمشتت و أغلبهم كور ما كيفهموهش شنوو كيقول ..!

حسام: اححح واش هادوك نهود ولا **لاوي تاع ليه٠٠٠٠&ود ( حك كرشوو كيطبل عليها ) بشاااااخ ا ليدام .. كلك لوووز و منيين ندووز ..!

أما البقية تفرق عندهم المجمع و مشاو العيالات للداخل بقاو غير الرجال برا ..! دخلات ملاك مع شريفة وجهها حممر و عينيها مزالين دامعين .. جامعة يديها قدامها حشمانة و أسية هازة نور عندها كتهضر معاها حتى لمحات عدنان غادي لبعيد كيهضر فالتيليفون ..! و الخاتم د الخطبة فيديه كيلمع .. ضريب صداقوو ما بقى ليه والوو و فهاذ الأيام غير على ما تولد شريفة .. بزواج تقليدي اختار فيه البنت لي تناسبوو و غيشوف الدنيا شنوو موجدالوو معاها ..! أما هو و تاسانوو طريقهم تفرقات .. هو دخل فالتلاثينات و هذا الجهد باش يدير دارو و ولادو و هي بغات مستقبلها لي مزال طويل و بعيد .. ما هو جهد عام ما جهد عاماين ..! ست سنيين و عاد فاش تبدا الخدمة ..! نهار تكون واجدة هو جهدو غيكون تسالى لا لولاد لا تربية لا للخاطر ليها هي نفسها ..!

تلاقاو شحال من مرة فمناسبات عائلية .. السلام السلام من بعييد و كل واحد كيشد جنبوو باحترام ..! فايتة شافت خطيبتوو فاص و وراتها لها شريفة فالتصاور قبل ..! غزالة و لسانها حلوو و مبشورة من النوع لي تشوفيه و تسهاي فيه لا اراديا .. و ما كتعرفيش علاش ..! مليلحة و باين فيها متدينة تا هي غير من طريقتها فالهضرة و لباسها .. فرحاتلهم و تمانتلوو الخير معاها و ربي ييسرلها حتى هي فمسارها لي اختارتوو ..!

كملات الحفلة و لي مشى لدارو راه مشى و لي بقى راه شد واحد من لي شالي و خوى الدنيا ..! بقات غير ملاك معاهم فالفيلا كتسنى حكيم يهبط عندها باغى تهضر معاه ..! من قبيلة مزال ما جات الفرصة يهضرو بوحدهم ..!

حكيم لي طلع مع نور حكات سنانها و بدلات حوايجها معاونها حتى نعسات كيقرا عليها قصة من القصص المحطوطة فالمجر حداها ..! و من تما ديريكت دخل لبيتوو هو و شريفة ..! لقاها مزالة جالسة باللبسة طالقة شعرها مصوب و كتفرتت فالحنة من يديها و كتبكي ..!

حكيم:( عقد حجبانوو و قرب منها دوز يديه على ظهرها و كتافها معنقها بمعزة كيمسح دموعها ) شششش مالك ؟ شنوو واقع .. علاش هاذ الدموع ..؟

شريفة:( ردات بعينين حومر و صوت منغنغ بالبكى ) عييييت .. ندممممت علاش درت لا حنة و لا بعر هء تفوو ..! ( نفضات يديها كتشهق ) القشرة د الحنة روعاتني و مزال ما بغات تتحيد و رجلي ما قادراش نوصل لهم .. حاساهم منفوخين كيحرقوووني و ظهري كيقطعني ..! ( بتعب كتبكي ) باقي خاصني نحيد الشعر و نمسح المكياج و نزول اللبسة و ندخل ندوش و أنا عييييييت هء

حكيم:( ضحك معاها كيتبسم و قال كيفتح كمام القاميجة و كيزول الساعة ) غير هاذشي و كان ؟

شريفة: و البعالك خربولي الصالون طالقينهم بحال الوحوش كيعفسوو ( زاد تنغنغ صوتها ) فوقاش ديكشي غيرجع يتصبن و يتقاد و انا دخلت فشهري ؟ هرسوووولي الفاز ديال الكريسطال و قالت لك امهم عادي هاذو هما الدراري الصغار .. الولاد و لعبهم ماشي بحال البنات ( جبدات وذنيها ) الله ينجيني حتى نولد بحال هاذ الجنون ..!

ضحك كيسكت فيها و يحيد لها اللبسة بشوية و الخاطر تا بقات ببودي و سروال تحتي و ضار على شعرها كيشوف كي غيفك ديكشي بلا ما ينتفها ..!

حكيم:( بتركيز ) عندها الحق الدراري ماشي بحال البنات ..! غير حنا شحال درنا د المصائب فاش كنا صغار ..!

شريفة:( شمرات بنيفها و قالت ) بحالاش ؟

حكيم:( ضحك و هو مركز مع شعرها حتى حيد لها الزايد و بقى شعرها طبيعي كيمشطوو لها بالشوية ) أنا و محمد أميين فاش كنا كنطلعوو للبلاد كندخلوو للغابة كنصيدو الحمام و الحجل و اللفاعي .. كاع ديكشي لي يجي فبالك ..!

شريفة: ههههه ايييوا ؟

حكيم:( عيبها بالضحك ) ايوا و واحد النهار جمعنا الحطب و العواد باغيين نديوهم للدار .. و خاصنا نهرسوهم باش نقدرو عليهم ..! مشى عدنان جاب الشاقور بالتخبية و خليل كينقز فرحان .. دافع الجبهة كيضرب فصدرو هو لي غيفكنا ..! ( شد جبهتوو كيضحك ) الهبطة لي هبط بالشاقور جابها فصبع رجليه قسموو فالبلاصة ..!

شريفة: هههههههههههه وييييلييي ويييلييي ( زادت كتضحك من ملامح حكيم لي جاتوو الهيستيرية و وجهوو تزير ) ههههه ايوا ..!

حكيم: هههه امم ( حط يديه بونية على فموو كيسكت من الضحك ) و مرة أخرى جا عمي بالطونوبيل .. داك الساعة كنا ساكنين فراس الجبل معاه ولدو خلاه اللور و دخل للدار غياخذ غير شي حاجة و يرجع يمشي .. مخليها أمارش ..!

سكت كيضحك شحال و شريفة كتضحك حتى هي غير من الهيستيرية ديالوو .. سالاهم لها تا فشلات ..!

حكيم: حتى تسلطت عليه و ركبت القدام بالزعامة و ولد عمي مورايا كيزيدلي فيه ..! يالاه نصوكوو باباها هاذ الطونوبيل حتى هبطنا أنا و ياه هبطة وحدة فالحدورة شداتنا غير شجرة دخلنا فيها .. أما كن زدنا غير شوية غتقلب بينا نجيبوها حبل و بونت ( يموتوو )

شريفة: هههه صدقتي بيييسييل " باسل " حتى نتا و أنا كنقول سي السيد مهدن و أنا صغري كلوو دوزتوو ما كنحركش البيضة على الطاس .. غيخرجولنا ولادنا مهدنين .. قولي يلا غفلنا عليهم مشاو يشعلوو فينا العافية ..! لا لا ا خويا أنا ما عذبت معايا حد فصغري .. تريكتك ربيها لراسك .. تفاهم معاهم و يتفاهموو معاك .. هاي هاي على جون سينا و رباعتوو ..!

ضحك عليها تا شبع و نوضها للحمام .. عاونها حتى حيدات حوايجها و زول عليه تا هو ..! كمل لها التقشار د الحنة و غسل لها شعرها مزيان و لحمها .. عاد جلسات فالجاكوزي و هو موراها الرغوة ضايرة بيهم ..! ماصى لها ظهرها و رجليها حتى ارتاحت على يدييه و قلب وجهها عندو كيبوس فيها و يتلمس بحنان و حركات دافية ..!

ماصى لها ظهرها و رجليها حتى ارتاحت على يديه و قلب وجهها عندو كيبوس فيها و يتلمس بحنان و حركات دافية ..! مشاركة معاه حتى هي بشه٠٠وة ذايبة فيه و موحشاه ..! لكن نفسها ضيق و البانيوو صغير مقارنة بيهم .. تعذبات فيه و ما قضالوو والوو .. ما عندو فين يتحرك بكرشها لي كبرات و مشاتلها للجناب ..!

بعد تفكير ناض لبس بينوار ديالوو و لواها حتى هي فديالها و خرج بيها للناموسية حاطها تما ..! لاح الحوايج للأرض و خذا راحتوو كلها معاها بحنان كبير .. عارفها ولات كتعيى بزاف و ما بقاش عندها الخاطر .. التنفس ثقال لها و رجليها طبزو .. كيتنفخولها كيقطعوها بالحريق و الحرقة د المعدة دايرة لها حالة هي و الحكة ..!

ثقلات بزز كتحرك .. ما بقات تقد تدير والوو و هو لي مكلف بيها بكلشي ..! من مشيط الشعر للدوش حتى منين كتحتاج تحسن هو لي كيتكلف .. ما بقاتش كتوصل لتحتها باش تدير شي حاجة ..! و غير يلا جلسات مدة خاص لي يعاونها و ينوضها و يشد فيها .. الرجلين لي يوقفوها ما كاينينش ..!

سخنات و هو طاب كيحاول معاها بالشوية و هي كتوجع بحال ليباري كيدخلوو فعينيها .. تقول كيوسعها بما عرفت شنوو ..! و هو عاطي الخاطر باش تتعاون معاه كيسمعلها كتسوط و تأنن حتى تسرحات الطريق مزيرة غتطرطق ..!

حكيم:( تبسم معاها كيدوز على حناكها و الكريشة قداموو كيطبطب عليها بجوج صباع .. كيبوس فيها و يهضر مع ولادو ) جوج سيمانات غفلت عليك تشديتي ..!

شريفة: فففف بالشووووية هنهنهنهن كتحرقني .. تخنقت .. ما تكيش عليا غتقتلني هوووف فوقاش نتفك يا ربي احححح اممم ..!

حكيم:( ضحك و تحنى عليها هاز تقلوو .. باسها بنهم و قال بزز مفارق شفايفهم ) سكتي شوية من الهضرة ..!

شريفة:( سكتات شحال مستمتعة معاه تا قرب يتفك و هي تزير عليه بوجه حمممر ) حكيييم خاصني طواليط ..!

حكيم:( شاف فيها وجهوو حممر حتى هو مزير و بصوت متقطع قال ) صبري مزال ..!

شريفة:( ردات كتحرك راسها بالنفي ) غنبوول عليك ا حكيم عارفني ما كنقدرش نشدها .. هبطوو ثقلوو عليا ما بقيتش كنصبر ..!

سكتات عاضة شنايفها جنب فاش خوى فيها و ناض عليها بالشوية و وقفها كيلبس لها البينوار ..! دخل معاها تال للحمام باش ما تزهقش مع الما و تجيب الربحة ..! مزنكة و مزيرة لا من البولة لا من العلاقة .. هو تفك و هي بقات واحلة ..! و قبل ما توصل للاشاص ..!

هبط ديكشي بين رجليها بحال شي شلال .. سطل د الما و تكب على جهدو ..! شادة فحكيم و كترمش و هو كيشوف فيها بخوف ..!

حكيم:( رمش عينيه ) الما د السقية هذا ؟؟

سكتات حاطة يديها على كرشها و كل مرة كيهبط شوية ديكشي بالتدريج حتى تقطع و مشات كتزرب شادة فيه .. دخلات تحت الرشاشة هي و ياه باغى تدوش عاد تتحرك ..! غسل لراسوو و ليها بالطيران و خرجوو ..!

محني على ركابيه كيلبس لها السليب و السروال و هي كتشد السوتيامات و كتقلب على السوفيطمة .. ملامحها هادية مزال ما بداها الحريق ..! وجدات و وجد تا هو هاز الصاك ديالها و ديال التوام .. عيط على الكلينيك فين غتولد علمهم بلي طرطقات لها السقية و راهم جايين و قطع ..!

وصاو ملاك على نور تنتابه لها و خرجوو لقاو حبيبة كتسناهم تا هي مخلوعة عليها ..! ركبات لقدام حداه مزيرة على يديه فوق الفيطاس و اليد الثانية شادة فكرشها كتنفس بصوت مسموع ..!

شريفة: هوووف حكيم يلا مت و أنا كنولد .. سميهم يانيس و ياسر ( زادت زيرات عليه مخرجة عينيها ) و تجيبلهم شي مرات باهم تربيهم نقتتتتتلك ..! ( ضحكات و وجهها صفر مخلوعة ) غنبقى نخرج لك كل ليلة فالمنام عمرك تتهنى مني و الله ما نسمح لك ..!

حكيم:( ضربها لجبهتها بالشوية ) دابا هاذي هضرة هاذي ا المشاغبة ..!

شريفة: و وايااااااك تدخل معايا للولادة .. أنا كنقولها لك .. شفتي كووولشي .. بقالك تشوفني غير كنخرا فوق البياص و تكمل ..! ( زيرات على ظهرها و كرشها من التحت ) فففف يلا بغيت نكرهك شي نهار غنقنع راسي نتخيلك كتخرا فالطواليط هههه فبلا ما تشوفني هكاك و انا كاملة مفتوحة ..!

حبيبة:( ردات برزانة ) شكون لي قالك غتديريها ؟ ربي يعطيك وقفة ساهلة ان شاء الله و يكون معاك و يجيبهم على خير و بخير بالصورة المكمولة ..!

شريفة:( حركات راسها و دموعها سايلين من الجناب ) يلا بغيت نضرب الشوكة ما تخليونيش واخا نتوجع ما عليش .. ما تخليونيش نضربها واخا نرغبكم .. ما مزياناش ليا و قلبنا عليها و عنداك نحماق و ( غوتات بالجهد ) و زييييييد فالسرعة ما باغاش نولد فالباركينغ ..!

وصلوو للكلينيك على خير و بخير .. دخلوها قلبوها و عطاوها بيت فين غتجلس .. ركبولها سيروم على ود الميكروب ديال السقية ما يطلعش للتوام و خلاوها تما كتمشى .. كيتسناو الوالدة تفتح لها .. لي مزالة يالاه مفتوحة بجوج سونتيم ..!

شاد فيها كيتمشى معاها شادلها السيروم فالعلاقة ديالوو و متكية عليه ..! صوت أنفاسها مسموعين مزيرة على جنابها و تحتها و الدموع هابطين من عينيها .. كتدعي الله و الوجع بدا كيقطع فيها و حبيبة كتدعي معاها و كتحسب لها المدة لي بين كل انقباضة و ختها ..! باش يعرفوو واش قربات و لا مزال ..!

حفات شنايفها بالعضان .. الفولار طار مليوح فالجناب و شعرها مجموع فازك عاطيها شوية د البرودية لعنقها ..! كملات السيروم و حيداتوو و مشات ترعات الباب د البيت على جهدها ..! كتبكي و تغوت و توجع واحد الحالة كتضر فالقلب ..! تا كيمشي الحريق و كترتاااااح و تجلس متكية و ترجع تشدها الوجعة و تقفز شادة فحكيم ينوضها كتبكي و تأنن .. و حبيبة بكثرة ما بقات فيها بكثرة ما شداتها الضحكة من الطريقة لي كتبكي و تهز يديها تال سما بحال كتحفر فالحيط و ففمها " كوووو كووو كووووك " تا شافتها و قالت

شريفة: كتضضضضضضحكي عليااااااا .. كتضضضضحك علياااا أنااا ضحكة هناا اوووووف كوووووك كوووو ككككك وا مااااامااااا ..! عيطووو لساج فااااااام وا ربيييي اننننن ..!

جلسات مسبقة يديها بجوج للور حتى تقادات كتسوط و تبكي و تهضر بوحدها و تشوف فحكيم بعطف و ترجع تحك فكرشها و عنقها مخنوقة و نفسها مسموع ..! غوتات تا قلبات لهم داك الجهة و جات ساج فام كتقلبها ساخطة على الوضعية .. لقاتها تفتحات لها بثلاثة سونتيم و بعصبية عاقدة فيها حجبانها قالت

ساج فام : سكتييينا ا لالة سكتييينا واش غير نتي لي كتولدي .. ما داروهاش حتى لي كيحزموو .. فرعتيلنا راسنا بالغوات ..!

عقد حكيم حجبانوو فيها و حبيبة نفسها يالاه جات تجاوبها طارت شريفة عليها جراتها من يديها و عضاتها واحدة العضة تقول مغزززفة .. سنانها غرساتهم فيها .. مخليها كتصرصر تا هي موجعة و ففمها غير ..!

ساج فام : شنوو درت لك أنا ؟؟ عضي راج٠لك انا مالي ..!

خرجات من تما كتعثر و تا حد ما تسوق لها بالهم كلوو مع شريفة .. لي ما كملاتش خمسة دقائق باش مشان الساج فام .. طلقاتها بغووتة وحدة زعزعاتهم كاملين تا تسمع لعند لي بيرمانونص لي تما و جاو كيجرييو عندها ..! لقاوها مشات بالد٠م يعني دااااباا غتولد ..!

شداتها وحدة من جنب و الثانية من الثاني حاطيين يديهم تحتها و كيزربوو فيها خايفين يهبطوو لها الترابي تما ..! تا جلسوها فشيز غولونط و زادو بيها للبلوك ديال العمليات و حكيم و حبيبة تابعينها و هي شادة فيه كتبكي ..!

شريفة: ما تخلينيييش ما تخليينييش .. دخل معايا حكيييم باغياك معايا ما تديش على شنوو قلت لك اوووف اوووف اوووف ..!

شاف حتى عيى و دخل معاها واخا الفرمليات و لي ساج فام بداو كينحنحوو بلي عكوزتها حسن و ممنوع .. مراتوو مكشوفة تما ما يصلاحش يدخل .. تا الطبيبة ما غتكونش مرتاحة ..! و لكن بزز منهم جلس و شريفة باغياه شافها فجميع حالاتها ماشي شي حاجة لي جديدة دابا ..!

طارو بيها كيزربوو يوجدوها قبل ما توصل الطبيبة و تحيح عليهم منين تلقاها ما واجداش ..! يديها كلها تقباتها و زراقت بالشوكة .. فينما تشدها الزحمة و الوجع كتنترها بالحر و غير يبرد عليها الحال كيتخليهم يردوها لها ..!

كاع داك الغوات رجع سكااااات ما باغاش تضيع طاقتها و بلاصة ما تغوت لربي لي خلقها .. كتدعي فنفسها تتفك .. مزيرة على حكيم و الدموع فعينيها سايلين .. كتسمع للطبيبة و الساج فام لي تعاملات معاها طوب لداخل .. تبعات لي قالوو بالضبط باش تولد دغيا و ما تشركش راسها ..! و حكيم شاد فيها كيشجعها حتى تفكرات كاع لي قالولها دعي معانا و فوسط الزحمة تمتمات بصوت ما مسموعش ..!

شريفة: ياااااا ربي تعوضوو خير و تعطيه على قد نيتوو و تخليه ليا و لولادو و تطول فعمرو و تغفر علينا ( على حكيم ) اممممم ااااااه ياااااا ربي تحقق لها كاع لي كتمنى و تفرحني بيها و توصل لمراتب عالية و تسهل عليها و تيسرلها طريقها ( على أسية ) اوووف اووووف اووووف يااااا ربي لي فقلبوو شي حاجة تحققها لوو و تخلينا ديما مجموعين و يتزادو وليداتي بالصورة الكاملة و تفرحني بيهم و بنور و لهلا يحرق قلبي عليهم ..!

الطبيبة: دفعي دابا دففففعيييي ..!

دفعات بكاع جهدها كلها عروقات و شعرها لاسقة عليها عينيها خارجين و الكحول سايح لها شوية .. حتى تسمع صوت بكية ديال بيبي و تنغنيغة حلووة صغيييرة ..! ضحكوو ملامحهم بجوج بفرحة و الفرملية هزات الصاك ديالهم كتجبدلوو لي برودوي ديالوو تغسلوو و تقلبوو و تلبسوو عاد تجيبولهم ..!

الطبيبة: شريفة يالاه معايا .. واحد جوج .. دفعييي دفعيييي ..! ( تسمع صوت المؤذن كيهلل للفجر )

دفعات كتعصر العروق فراسها خرجوو كيضربوو و كلها فازكة بالعرق تا تفكات أخييرا و دخلات عليها واحد الراحة ما كاين بحالها راحة .. بحال ما عرفتش فين كانت و جبدوها ..! و بعينين خارجين هزات راسها كتشوف ..!

شريفة: واش صافي ؟ صافي ؟؟ واااااا الحمد لله الحمد لله ..!

ضحكوو كاملين من النبرة د صوتها .. بحال شي واحد كان راكب فالطيارة شوية ما تطيح بيه تا هبطوو للأرض و نزلوهم .. كيبوس فالأرض ما متيقش بلي صافي كلشي تسالى ..! مشى حكيم كيشوف فولادو و يلعب معاهم .. عينيه فيهم فرحة ما كتصورش و هما كيدوشوو لهم و يلبسوهم تا جبد تيليفونوو كيصورهم ..!

و شريفة متكية فالباياص د الولادة رجليها مفتوحين و الطبيبة وسطها من بعد ما تنقات و تحيد الخلاص .. ضرباتلها البنج كتخيط لها و شريفة حاضياها .. غلباتها الضحكة .. كتشوفها كي الشادة الخيط و ليبرة كتخيط و تطلع بيها تال للفوق و ترجع تقاد مركزة ..!

شريفة: كتخيطي السدادر ههههه

الطبيبة:( ضحكات و قالت ) غنديرلك خدمة ديال القلب تشكريني عليها حياتك كاملة ( باعتذار كملات ) هنا فهاذ البلاصة حدا البضر ما كتشدش البنج مزيان غتقسحي شوية غير سمحيلي ..! ( كملات كتلفها بالهضرة ) شنوو غتسميوهم ؟ اختاريتوو السميات و لا مزال ..!

شريفة:( تبسمات بلا حركة باش ما توجعش و بنبرة مرحة باينة فيها واخا عيانة قالت ) اللول غنسميه حلو في السرطة واعر في الهبطة ..! و الثاني ماكلتوو كي الرحمة و صعيب فالزحمة ..!

ضحكوو كاع لي تما و بقاو مقابلينها تا كملوو لها و حكيم مشى بالزربة تبع لي بيبي فين داوهم يقلبوهم .. تا كملو لهم و رجع معاهم جارينهم فالبياص صغيور ديالهم كل واحد فواحد .. تال للبيت عندها ..!

لقاهم لبسوها بيجامة 3 بياس و قادولها حالتها كاملة متكية مسالية مغطية و شعرها عريان .. متكية فشلانة و حبيبة حاضية معاهم كتمشي و تجي و تسول فيها و تقاد الحلوة لي وجدو جابتها معاها فساكها ..!

تبسمات بتعب لحكيم فاش لمحاتوو و مداتلوو يديها باسها بقوة و فجبهتها ..!

حكيم: الحمد لله على سلامتك .. الله يسمحلنا منك ..! ( تبسم كيشوف موراه ) ها المشاغبين جاو يصدعوك ..!

ضحكات و بركات على بوطونة قدامها كتقاد فالجلسة .. حاطينلها كياس د الثلج و الرملة على كرشها ..! هزات الفرملية اللول و مداتولها بالشوية كتوريها كي تدير تشدو ..! و هي مبتاسمة بعينين كيلمعوو ..! كتشوفوو حمييييمر بين يديها صغيييور قد البقة .. شاد عينيه و مخنزر شوية جامع حجبانوو و شنايفوو خارجين بحال البوسة .. حووومر ..! بوييوض و شعرو كحل هو و حجبانوو ..!

باستوو فجبهتوو و يديه خاشية نيفها فعنقوو كتشم رويحتوو بفرحة .. تا مداتوو لحكيم شدو عندو بكل سعادة قلبوو كيرفرف من بلاصتوو و عطاه لحبيبة تا هي هزاتوو و باستوو ..! و البيبي الثاني تا هو شداتوو بنفس الطريقة ..! تا هو ملامحوو سود من شعر و حجبان بويوض و عينيه كبار مجبدين للفوق بحالها تماما " عيون الظباء " ملامحوو هادية .. ما باكي ما مخنزر .. كل شوية كيحرك يديه و يقفز مخلوع و هي كتطبطب عليه بفرحة ..! و صدقوو لي قالوو تشوف عويناتوو تنسى وجيعاتوو ..!

سهات فحكيم لي رداتلوو حبيبة لوليد كترضي عليهم .. شدو بحذر كيأذنلوو فوذنيه الليمنية و يقيم الصلاة فالليسرية ..!

حكيم: الله أكبر الله أكبر .. الله أكبر الله أكبر .. أشهد أن لا إله إلا الله .. أشهد أن لا إله إلا الله .. أشهد أن محمد رسوول الله .. أشهد أن محمدا رسول الله .. حي على الصلاة .. حي على الصلاة .. حي على الفلاح .. حي على الفلاح .. الله أكبر الله أكبر .. لا إله إلا الله .. أنت اسمك ياسر .. أنت اسمك ياسر .. أنت اسمك ياسر .. أنت على دين محمد .. أنت على دين محمد .. أنت على دين محمد .. دينك الاسلام ..!

حط ياسر فبلاصتوو و هز البيبي الثاني عندو حتى هو و عاودلوو نفس العملية ..!

حكيم: أنت اسمك يانيس .. أنت اسمك يانيس .. أنت اسمك يانيس ..!

سهات فحكيم كتشوف التضحيات لي دار على ودها .. غير من حمالتها لهنا و الهزة لي هزها بكلشي ليها و الخاطر الكبير لي عطاها ..! كن كانت امها موحال تنتابه لها هكاك و تهزها بحالوو ..! كتشوف التضحية ديالوو مع خوتوو و شنوو داير عليهم ..! و على نور نفسها و التربية لي كيربيها و متأكدة تا ياسر و يانيس غيربيهم أحسن تربية و يطلعهم رج٠ال ..!

و كتقارن هاذشي كامل مع السيد لي جا واحد النهار و قالها راه باها و رجع غبر ثاني غارق فحياتوو و ولادو ديال بصح ..! نهار على نهار كتأكد أنوو أحسن قرار خداتوو هو ما تدخلوش لحياتها مرة اخرى .. لا هو لا خوتها لي فاش غتدير مقارنة بسيطة بينهم و بين عدنان و محمد امين و خليل و ملاك و حكيم .. غتلقى علاقتهم بعاد السمى على الأرض و بينها و بينهم غير الخير و الاحسان .. لا أخوة لا هم يحزنون ..!

و فغالبا الأحيان متأكدة غير غتحسدهم و تغار منهم و قلبها عمرو يصفى .. اللهم كل واحد يتشغل بحياتوو .. حيث كن كان باها قلبوو عليها و خوتها تا هما غيجييو يبحثوو فيها .. واخا غير لبنات يقلبوو عليها فالفايس و مواقع التواصل ..! و وسط هاذشي تفكرات حتى كريمة ..!

عرفات من حكيم من بعد ما ولات شوية بلي دخلات للمستشفى الأمراض العقلية و من تما غتحاكم .. يا حبس يا طبيب ..! و من داك الوقت ما بقى لا حكيم جبدها لا هي لا حتى حد فالعائلة ..! تا واحد ما قلب فيها و ما عارفينش فين وصلات .. صفحتها تطوات بصفة نهائية من عند عائلة أمغار ..!

تا من واليدين كريمة من مور الطلاق و الوجه لي كحلاتوو لباها معاهم و زاد طلبهم على الفلوس د العملية .. ما بقاتلوش العين لي يهزها فيهم ..فضلوو يسكتوو و يقلبوو عليها بوحدهم ..! من لي هربات حدا المحكمة ما عاودو لقاو لها لأثر ..! ما عرفوش واش رجعات من الحماق لي كيضورو فالزناقي و لا شي طونوبيل ضرباتها عجناتها و لا شنوو وقعلها .. كيتمناو شي نهار يسمعوو عليها شي خبار كيفما كانت غير يريحوو قلبهم و كبدتهم ..!

حبيبة: حكيم خاص الدوا لشريفة ( مداتلوو روشيطة ديالها و ديال لي بيبي ) الله يشافي و يجعلهم من الذرية الصالحة و يحفضهم ..!

شريفة و حكيم: أميين يا ربي ..!

حكيم:( قرب منها باسها فراسها و قال ) بالشفاء و مغفرة الذنوب ( قاسلها حنكها بظهر يديه ) شوية دابا ؟ غنمشي نجيبلك الدوا و نرجع نعسي يلا قدرتي ..!

شريفة: شوية الله اميين .. فففف غير سير ما تعطلش ..!

خرج حكيم و خلاهم فالبيت شادين عليهم و شريفة كتقطع بالوجع و حبيبة كتصبرها .. الوالدة كترجع لبلاصتها ضروري ما تقسح و خصوصا فاش غترضع ياسر و يانيس و لكن الحريق هدها غير يلا قاست لها الناموسية غير شوية و تحركوو الجرارات فالارض كتبغي تموت بحال يلا كتعاود تولد من جديد ..!

صبرات و عضات فالصبر كتهضر و تلف مع حبيبة لي عيطات طمنات ملاك و دوزاتها لشريفة باركات لها و وصاتها توجد الفطور فاش تكون جايا لهنا مع نور و حكيم .. قالت لها شنوو تجيب بالضبط لي يعاون شريفة تبرا و تدير الحليب و قطعات معاها ..!

شرالها الدوا و جابوو و عيطوو للفرمليات بدلولها و قادولها الدوا ..! و بعدها نعسات بتعب مرة كتفيق موجعة مرة كترجع تنعس تا صبح الصباح و جابولها الفرمليات الفطور .. سبقات بيه على ما تجي ملاك بشنوو قالت لها حبيبة .. اما هاذشي لي عطاوها ما يشبعش حتى الدجاج ..!

فطرات و هزات يانيس هو اللول عندها كتحاول ترضعوو و حبيبة كتوريها و تعلمها و هو مجنن ما عرفش يشد الراس تا طلقها بزكية كيبكي و كادومتوو كترعد و فاق ياسر حتى هو داير حقوو ..! داخت مسالية و حتى واحد فيهم ما بغى يشدلها البزولة .. عطاوهم غير اللويزة كذبوو عليهم بيها ..!

يالاه سكتوو دخل حكيم مع ملاك و نور .. لي مزنكة حشمانة بزز كتمشى و عينيها كيضورو حشمانة تشوف فشريفة و واحد الاحساس غريب جاها و هي واقفة قدام خوتها موسعة عينيها الخوضر فيهم .. مدات يديها بخوف كتقيس فيدياتهم و ترمش ..!

نور: بيبي حويا ؟؟ حووويا بابا ؟؟

حكيم: اااه ا بابا خوتك .. زوينين بحالك ..!

شريفة:( تبسمات و قالت ) و أنا أ ماما ما تجيش تبوسيني امم ؟؟ ( ضحكات من حشمتها و هزها لها حكيم بحذر حطها حداها باش ما تزعزعهاش تقسحها .. تا جبدات من حداها جوج مونيكات ديال فلة كبار و بصوت حنين قالت ) شوفي شنوو جابولك خوتك .. فرحانين بيك .. قالولي كنبغييو نور بزااااف ..!

نور:( ضحكات و وسعات ملامحها بفرحة و باستها بقوة و بسعادة قالت ) لوووووبيووو حوووتي .. حويا واحد و حويا زوز ..!

و هما مزالين كيهضرو تسمع الدقان فالباب و دخلات ل بيدياطخ " طبيبة د الأطفال " ببشاشة باركات لهم و جرات الباياص د البيبي لول لي تزاد و لي هو " ياسر " حلاتلوو حوايجوو تا عراتوو بقى غير بالكوشة .. قلباتوو كامل و رجعات حلاتلوو ليكوش حتى هما .. كتشرح لهم و توريهم ..! هضرات لهم على العظومة د الراس لي خارجين شوية و لي هذا هو الطبيعي مع الوقت كيرجعوو .. على بيبي فوقاش غيبداو يديرو بيبي و كرشهم و على شي خطوط فلحمهم .. على اللون د رجليهم و باش يعرفوهم فيهم البرد او لا .. خصوصا الجو ماشي سخون ..! بلي خاص كل ساعتين يترضعوو واخا يكونوو ناعسين تفيقيهم ترضعيهم باش كلاويهم ما ينشفوش ..!

و يتسناو ثلث ايام حتى يصفى دمهم من دم شريفة عاد يديرولها التحاليل لي طلباتهم باش يتأكدو من كلشي هو هذاك ..! و وسط هاذشي كامل شريفة مخرجة عينيها و شادة على قلبها كتشوفها كتلعب بيهم لعب .. هازاهم من رجليهم و قالباهم و كتحرك فيهم بالزربة .. معجبة منهم ما كيبكييو ما والوو ..! تا هضرولها على الرضاعة و قالت

ط: ضروري فهاذ اللول غتلقاي صعوبة .. فاش كانوو فكرشك كانوو شبعانين بلا حتى مجهود و دابا خاصهم واحد تمارة عاد باش يرضعوو و هما ما فيهم ما يتمحنوو ..! ألوغ خديتي لهم اللهيات .. عطيني نوريك ..!

مداتولها كتوريها كي تهزهم بالطريقة الصحيحة و كي تدير ترضعهم .. و من تما دازت للهاية كتعطيها و تجبدها مرات متابعين باش تخليهم يخدموو الفك ديالهم و يتعلموو يجبدوو .. طلباتها تدربهم هاكا لمدة و تجرب داك الساعة ترضعهم و تعطيهم الخاطر و خرجات مخلية لهم رقم تيليفونها و من هنا سبع ايام عندهم كونطرول معاها باش يزيدو يتأكدوو من كلشي ..!

خلاتهم مجمعين على وليداتهم .. حكيم هاز ياسر و شريفة يانيس كيجربوو الطريقة د اللهاية و نور لاسقة حداهم فرحانة و ملاك و حبيبة كيغرفولها التشيشة بالحليب و البيض البلدي تاكلوو و عوالة تمشي تطيب لها فروج بلدي تجيبلها مرقتوو تشربها ..! الفكرة لي روعات شريفة غير و هي كتخايلها و رجعات ضحكات مخلياهم كيقادولها شالها فراسها و المباركات و العائلة كيجييو بالتدريج ..!

من أسية لخليل .. البيت عمر عليها و كلشي فرحان معمرين عليها بالضحك و النشاط ..! تا خرجاتهم بسمة باش يخليوها ترضعهم ..! بقاو معاها غير البنات و هي كتحاول معاهم بالخاطر و ربي عالم بيها بالحريق مع كل جرة عروق راسها كيبغييو يخرجوو بالوالدة لي كترجع لبلاصتها ..!

********************************

من بعد الضيق أكيد كاين الفرج .. من بعد ما عاشت أيام قاسية و صعيبة بوحدها .. ربي عوضها بعائلة كبيرة قلبهم عليها و كيبغيوها و كتهمهم و ترزقات بزينة الحياة الدنيا .. البنين و البنات لي كانت مبعدة فكرتهم من بالها ..!

شكون كان يقول ولد الجيران لي بدات معاه القصة هاكا

------->

ما حسات بيه حتى جرها عندو عنقها بالجهد و تا هي استحلات داك التعنيقة .. حاسة معاه بالأمان لي من نهار تزادت ما حساتو حتى مع أقرب الناس ليها ..!

حكيم:( قلب وجهو من جهتها .. مسح دمعة غلباتو و بصوت مقجوج رد ) تهلاي فراسك و صبري ( زير على يديها بلا ما يشوف فيها ) صبري و كوني قوية ..

شريفة:( تابعة وجهو باغى تشوف مالو حتى قالت بتفاجئ ) كتبكي ؟؟ علاش كتبكي ؟ أنا مزيانة و الله .. ما تدير فبالك والوو و شكرا على اي حاجة .. غتبقى ديما فبالي و عمري غننساك

حكيم: ما غنخليكش .. غنرجع موراك ا شريفة و وعد الحر دين عليه

و رجعات تلاقاتوو أول مرة هاكا

---------->

حكيم:( شافها غير مكتعرق كثر و سنانها كيتقرقبوو .. فيها البرد و الكسوة لي لابسة قصيرة و عريانة ما عندها ما ترد عليها .. و هاذشي كوم و النفس لي بزز كطلعوو كوم ثاني .. ضروري ما خاصها ريح مجهد باش متخنقش .. سد الشراجم داللور و نطق باغي يتلفها على الحريق بالهضرة ) نتي من هنا ..!

شريفة:( شافت فيه بابتسامة مهدودة .. بزز كتهضر ) لا أنا سوسية من أكادير و لكن عايشة فاليوسفية من شحال هاذي

حكيم:( حرك راسوو بالإيجاب و قال بلهجة مسرحة و بسرعة فالكلام .. كأنوو متعود يهضر بيها ) صدفة إيفولكين أيا .. تشرفغ سيليس الخير .. تمازيغتنون زغ نواحي نيت ؟ زغ نواحي دو كادير نيت ؟

《 صدفة مخيرة هاذي .. مشرفين ببنت الخير .. بلادكم من النواحي د أكادير نيت ؟ 》

شريفة:( ردات بدهشة ) حتى كيي تكيت أسوسي ؟؟ حتى نكي تشرفاغ سيك والله ( ضحكات ضحكة مهلوكة ) تحوسيت سيليس نتمازيغتنك إخصات ماستيعاون .. نكي زغ تشيرا تسنست؟

《 حتى نتا سوسي ؟؟ الشرف ليا و الله .. معذورهم كيقولوا الدم كيجر ( ضحكات ضحكة عيانة ) حسيتي ببنت بلادك خاصها لي يعاونها .. أنا من تشيرة عرفتيها ؟؟ 》

و هي باقى كتهضر لمحاتوو جبد كاروو من الكارطوشة ديالوو .. شعلوو و دارو ففموو كيسف فالدخان و يسوط لبرا .. قالب وجهوو من جهتها باش ما توصلهاش الريحة .. لكن هيهات زادتها القطعة على الحريق لي شادها .. الريحة د النيكوتين لي كيتحرق طلعات معاها للأعماق حتى تفتحو لها العينين .. متبعاه بلهفة و مع كل جرة كتبلع فريقها بحسرة ..!

حكيم: الله أودي .. ميدن إفولكين أيان ..!

《 الله أودي .. من خيرة الناس ..! 》

شريفة:( غمضات عينيها كتحاول تتحكم فراسها و لكن والو فالأخير قالت ) واخا تشعلي واحد معاك ( ساطت ) تقطعت و ما هازاش معايا ..!

من بعد 12 لسنة عاودات شافتوو و ما قدراتش تقولوو أنا شريفة لي عمري نسيتك فحياتي و بقهرة ودعاتوو ..!

-------->

رمشات عينيها لي فيهم لمعة خفيفة .. و بابتسامة مشرقة كتغطي بيها حزنها .. قالت

شريفة: وصلنا ..!

حكيم:( رخى يديه فوق الفولا و قال بنفس النبرة ) وصلنا

شريفة:( حنات راسها لثواني و رجعات هزات عينيها فيه .. مداتلوو يديها و بصوت مخنوق قالت ) ما سخيتش بيك .. شكرا بزاف على كاع لي درتيه معايا و سمحلي يلا عيقت عليك .. كن ما ارتاحيت لك ما نهضرش معاك هكاك

شد فيها مزير عليها بيد و اليد الثانية حاطها فوق منها .. عينيه فعينيها بنظرات غريبة ما قدراتش تفرزهم .. هي ماشي من النوع لي كتحشم نهائيا و لكن فهاذ اللحظة و بداك الشوفات لي داير فيها و السخونية لي طالعة معاها من يديه .. تزنكوو حناكها و ما قدراتش تخلي عينيها عليه ..!

حكيم:( بعد مدة قال ) بالعكس .. تشرفت بيك أبنت البلاد .. يلا ضربتي لكازا مرحبا بيك ( جبد تيليفونوا )

شريفة:( حركات راسها بالايجاب ) ضروري ما نسول فيك ( قبل ما يقاطعها قالت ) نمرتي هي لي صونيت عليها قبيلة راني قيدتها لك .. نبقاو على اتصال ..!

بقهرة ودعاتوو باش يرجع الزمان يلاقيهم مرة اخرى و يجمعهم فظروف ما متوقعاش .. يدوزو من الطالح و الصالح بجوج .. يضحكوو و يفرحوو .. يتعذبوو و يبكييو .. يكرهها و تكرهوو .. يستنزفوو طاقة بعضياتهم بأم العناد ..!

باش فلخر تذوق معاه فصول الحب الأربعة كاملين ..! الشعور لي هو أحسن و أجمل واحد فيهم ..!

-------->

*** شريفة ..!

غير جات تنزل .. شدها حكيم من يديها و بعينين مبتاسمين قال

حكيم: ما غتسلميش ا الباسلة ؟

ضورات عينيها و مصات شنافتها قالبة وجهها لجنب و هو حاضي حركاتها و مبتاسم بهدوء ..! هز يدو رد لها الشعر مور وذنيها بالشوية و قرسلها حنكها بجوج صباع ..!

حكيم: تهلاي فراسك ..!

شافت فيه حابسة الضحكة تا تزنكوو حناكها و لمعوو عينيها المجبدين بالنعاس ..!

شريفة: حتى نتا ..!

فتحات الباب و هبطات هازة ساكها .. شيرات بيديها لملاك و مشات للطونوبيل كتقلب فساكها على الكونطاكط غير من الجنب بلا ما تحلوو ..! حتى لقات الساروت و ركبوو هي و اسية .. جبدات نظاظرها دالشوف دارتهم و ديمارات ..!

عطاهم الطريق زادت قداموو و هو تابعها اللور ..! حتى قربات تدخل للوطورط و دارلها السينيال باش تقل .. تا تقابل معاها و قال

حكيم: بلا ما نوصل معاك لسلا ؟ كلشي ناضي عندك ؟

شريفة: لا لا كلشي مزيان .. صافي غير سير لشغالك .. كفيتي و وفيتي ..!

حكيم:( حرك راسوو و قال ) واخا .. منين توصلي علميني .. الله يعاون

هز يديه بمعنى بسلامة و زاد قدامها و هي ضارت باش تدخل للوطورط ..!

شريفة: قبيلة فاش كنت كنقلب على الساروت حسيت بشي أونفلوب مخشي تما .. هزي الصاك عندك شوفي شنوو ديكشي ؟

هزاتوو أسية .. حيدات السروال لاحتوو اللور و جبداتلها اونفلوب فالصفر .. حلاتوو لقات فيه غير الزرقات مستفين ..!

شريفة:( ميلات راسها و بتنهيدة طويييلة قالت ) حكيييم يا حكيم ..! ما غيمشي حتى يخليني نطيح فيه طيحة الفريت فالموطارد

*** حكيم ..!

كلامها عنى ليه لدرجة ما تصورش واخا كان عفوي من جهتها ..! جرها بعدها من طريق و تحنى باسلها جبهتها مغمض عينيه و شفايفوو سخان محطوطين على جلدها .. احساس غريب اجتاحها فهاذ اللحظة ..!

الفترة لي عاشرات حكيم عرفات فيها بلي ما عندوش مع الهضرة و ما كيعرفش يعبر فاش كيكون فرحان عكس فاش كيتعصب ..! لكن كيحاول يبين امتنانوو بأفعال ملموسة ..!

حكيم:( بعد عليها شوية و بنبرة صوت خاترة قال ) الملح يبنن الطعام والصح يبنن الكلام ( حط يديه على صدرو ) و باقي الزمان يوريك غلاوتك عندي ..!

و تعيش معاه ثاني فصل من فصول الحب .

" الاعتراف " لي هو ألذ واحد فيهم ..!

--------->

*** شريفة ..!

و هذا آخر مسج من نوارة الحدود ديالك .. و لي عمرها غتكون لشي واحد من غيرك ..! عرفتي علاش ؟ حيث معاك نورات و فاح ريحانها كيفما قلتي لي من قبل ..! و حيث النوارة ما خلاتش قلبها بحال الساقية لي جا يشرب منوو .. بالعكس غرقات لقاع لبحر .. فين كاين غير نتا و ياها .. و يمكن حتى نتا غير كنت كنخايلك و ما قدرتيش تغرق فيا لداك الدرجة .. و لكن أنا غرقت ( هزات عينيها كترمش .. ما بقاتش كتشوف بالضبابة ديال الدموع ..! ) غرقت فالفحل الوحيد لي عرفتوو فحياتي و حتى دابا ما نادماش حيث عرفتك .. على الاقل عشت معاك ذكريات نتفكرهم كل ليلة ..! نتفكرك و نتا جبيرة لي جبراتني انا و قلبي ..! و نتا لي كتفكر فيا قبل من راسك .. و ستار لكاع العيوب لي فيا .. و كتدافع عليا و انا ما كيناش و مكبر بيا و حاطني فوق الراس .. فعينيك و فعينين الناس ..! نتفكرك و نتا العصا لي كنتكى عليها و كتهز معايا همومي و ما كتخويش بيا .. كتقويني و تدعمني باش نفوت الحزة و انا رافعة راسي للسما .. نتفكرك و نتا الهوا لي كنتنفس و انا فاتحة يدي .. طايرة للسما .. غاطسة فقاع البحر .. و مجربة معاك لي عمري عشتوو .. نتفكرك و نتا كتخشيني فصدرك و تزير عليا ( ضحكات بألم ) نتفكرك و انا كنقولك تعنيقتك حنينة و ترد عليا .. حيث ماشي مسموم بحالك ..! ( تنهدات بقوة ) هاذ المسمومة كتقولك تهلى فراسك و خليك ديما فحل كيف البارود ..! يمكن غذا او بعدو نندم على هاذ المسج .. يمكن نكون طيحت من قيمتي .. و لكن بصح بغيتك تسمع هاذ الهضرة من عندي .. واخا كنت باغى نكون كنشوف فعينيك و انا كنقول كنبغيييك كيفما عمر شي وحدة بغات شي واحد فهاذ الدنيا .. و لكن ما كتابش ..!

*** حكيم ..!

حكيم:( ضحكو عينيه و زير على يديها و رخف حتى ضارت براسها شوية لجهتوو و قال بصوت خافت و نبرة قوية ) ها أنا هنا .. ا المشاغبة ..!

شريفة:( تبسموو ملامحها بتعب و من وجهها كتبان عيانة بزاااف .. غير باش تهضر كتضيع طاقة كبييرة ..! ) ب باااا ق يي .. م مااا .. غ ااا د يي .. ت تهههه نى .. م ن .. الا ب ت ل ا ء .. لييي بببب لااااك ب بييييه ا ال الله ..! " باقي ما غادي تتهنى من الابتلاء لي بلاك بيه الله "

كتتهجى حرف بحرف بثقااالة بعينين ذابلين .. و حكيم متبعها بفرحة .. تماما بحال فرحة الواليدين بأول كلمة قالها ولدهم ..! فهم شنوو بغات تقول و بضحكة رد

حكيم: المؤمن مصاب ..! لا كلام فوق كلامك ا مدام ..! ( حط راسوو على ذراعها .. يالاه قايسها شوية و بنظرات حنينة كمل ) يلا قلت لك واحد الحاجة تيقيني ؟

شريفة:( غمضات عينيها و رجعات فتحاتهم .. بمعنى ااه ..! )

حكيم: أركم تّيريخ " كنبغيييك " ( باسها فيديها مغمض عينيه ساكت و البقية كيشوفوو فيهم فصمت ..! )

شريفة:( ضحكات حتى تقسحات و قالت ) ك ن ت .. عاااا ر فة ..! سسسس بببب ع بوووو بببب طططط اااا يييي ننن يييي نننن وو " سبع بو بطاين ينوو = ديالي "

ضحك من هضرتها راجعة فيه الروح و قلبوو كيضرب بالزربة بحال يلا راه فماراطون كيتسابق ..! حتى من ذاتوو سخنات بالدم لي كيجري فعروقوو بالجهد ..!

و يجربوو كذلك أصعب فصل لي هو الشوق ..!

*** حكيم ..!

عينيه حومر بالدموع لي هابطين مع حناكوو ... نيفوو تزنك هو و حناكوو ..!

حكيم:( شمر على نيفوو و قال بألم و بنبرة كتقطع فالقلب ) كاع لي بنيناه ضاع ؟ ( سكت شحال عاد قال ) شريفة مشات صافي ؟ و أناااا ؟؟؟؟؟

ضار و خلاه واقف .. ما عرفش باش يجاوبوو .. لا هو لا البقية ..! كيشوفوو فيه غادي عاطيهم بالظهر ..! ظهرو لي تهرس بالخبار لي سمع ..! غادي كيتمايل بحال السكران .. حتى خرج لبرا كاع و بحرقة غوت .. بحر جهدو ..! غوتة خرجات من اعماق قلبوو و جرحات حبالوو الصوتية تا مشالوو الصوت و تبح فخطرة ..!

العافية شعلات فقلبوو .. عافية خااااايبة كتاكل فيه من لداخل شوية بشوية و صوت شريفة فوذنيه كيسمع فيها و هي كتبكي و تضحك فرحانة بولادها و كتوعدهم تكون أحسن ام ليهم ..! و دابا صافي مشات هي و ياهم بحال عمرهم كانووو ؟؟ عقلوو و كل خلية كتنبض فيه ما بغاوش يتقبلوو شنوو سمع ..!

*** شريفة ..!

هو وطن شريفة كتنتامي ليه ..! تراب الوطن عمرو ما كان خاين .. عمرنا كرهناه .. واخا عشنا فوق منوو مآسي كبيرة .. واخا تحكرنا و بكينا حتى عماو عينينا .. واخا كلينا العصا و حنا كنطالبوو غير بحقنا لي تهظم بحال عمرو ما كان ..! الوطن انتماء و روح كتنبض فداخل كل انسان بقوة .. و يلا تقاست غير شعرة فيه كنوقفوو كاملين وقفة وحدة و العافية شاعلة فقلوبنا ..!

يمكن الظروف كتخلينا نهاجرو وطننا لبعييد .. من لي عشنا فيه .. و لكن عمرنا كنكرهوه .. ديما الحنين ليه حاضر و بقوة .. هو دم كيسري مع عروقنا و روح كتطلع و تنزل فينا ..! و هذا هو حكيم عند شريفة ..! شريفة لي كتبكي بقهرة .. بحال مهاجر واقف فسلم ديال الطيارة كيودع تراب بلادو لي ما شاف منوو غير الخير .. و لكن الظروف و الناس لي فوق هاذ الارض ما خلاوهش يرتاح و بزز منوو اختار يبعد على وطنوو و هو فآخر درجات الانهيار النفسي ..!

سيفطات الاوديو حتى وصلوو و طلعات شرطة وحدة و طاحت على ركابيها كتشهق و تبكي بحرقة و كتضرب على صدرها .. كأنها حاضرة فجنازة حكيم و يالاه خرجووه من الدار كيمجدو باسم الله .. و هي واقفة مكتفة اليدين .. روحها غتطلع من قلب صدرها و احساس أنها ما غتقدرش ترجع تشووفوو مرة اخرى كيخنق فيها ..! و الشوق من دابا قتلها ..!

باش يوصلوو لأصدق فصول الحب و لي هو " البقااااء " و يوفي حكيم بكلاموو معاها مرارا و تكرارا و لي بينوو لها و بيناتوو لوو فأفعال قبل من أقوال ..!

------>

ميلات راسها جهتوو و بصوت عالي باش يسمعها قالت

شريفة: ما غيجيش النهار لي نطلع لك فراسك .. أنا و مشاكيلي .. ما غيجيش النهار لي تقلب فيه وجهك ؟

حكيم:( رد بصوت قوي شاد اللجام بيد و اليد الثانية كيمسح وجهوو من الما ) الأرض ما كتقنعش من الشتا و العين ما كتنقعش من شوفتك .. نهار قلت لك نوارة الحدود .. طبعتك بسميتي و ما غتفرقني معاك غير الموت ..!

كيبقى البقاء هو أصدق شعور .. بغاو بعضياتهم فالوقت لي كان كتبان علاقتهم مستحيلة .. بغاتوو بأخطائوو و بغاها بماضيها و حاضرها و قلبها المهرس و كل ما فيها ..! جبرها و جبراتوو و واحد زاد بالثاني للقدام ..! و كيفما بدات قصتهم لسنيييين هاذي .. مزالين مكملين مع بعضياتهم و واحد كيعكز مع الثاني مكابرين مع ولادهم وسط عائلتهم و حبابهم ..!

باش نختموها من بعد كاع لي دوزوه سابقا فحياتهم و لي مزالين غيعيشوه مستقبلا .. هاكا

------->

شعرها طلع فالسما و يدييها فشلوو عليها .. تحت عينيها غادي للكحولية و ضعافت على لي كانت ..! ولادها قدامها وسط الناموسية واحد كيبكي و الثاني كيرد عليه و شريفة كتبكي معاهم تا هي .. تسالات و تهدات .. ما بقى لها جهد شوية ما تغوت لربي لي خلقها .. تا دخلات نور تا هي كتجر فنونوسها كتحك عينيها و تزغنن باغاها تنعسها .. و فين هي الطاقة ؟ حكيم لي يعتقها منين خرج للفارماسيان ما رجع ..!

ساعتين و هي كتسناه عاد دخل هاز ساشي فيديه كيحك عينوو و باحباط قالت

شريفة: فين بقيتي هاذ الوقت كامل حرااام عليك ؟؟

حكيم:( حك عنقوو من لوور ) نعست فالباركينغ ما حسيتش براسي ..!

هرننات عليه تا شبعات و فلخر ضحكات و هزات ولادها كترضع ياسر و حكيم كيبدل ليانيس و نور باقى كتزغنن تا هي ..! تا هزهوهم كاملين خرجوهم يضربوو بيهم دورة بالطونوبيل على الله ينعسوو و يتهدو ..! ديمارا حكيم خارج من المنتجع غير كيضور بيهم محرك الروايض تا قطعوو الحس و بداو يدوخوو بالنعاس ..!

دازو قدام دراري د المخيم كيتمشاو مع القادة ديالهم فجولة استكشافية فالمنطقة ..! ضحكات شريفة و قالت ..!

شريفة: قائدنا نا نا .. نحبه هوو هوو .. لأنه هوو هوو يحبناااا نااا ناااا ..! ( عطاتوو التحية الثلاثية ) كشاااااف دائما مسسسستعد ..!

حكيم:( ضحك و جرها عندو عنقاتوو من كرشوو صايك .. باسها فراسها و قال ) نوارة الحدود ..!

شريفة: ههههه فخبارك انا بغيتك كثر فأيام المخيم أما قبل ..! ( سكتات و رمشات عينيها فيه ) و نتا ..؟

حكيم: همم قبل كنت غير خوك ياك ؟ ( قهقه من ملامح وجهها لي كتعوجهم و كمل ) أنا حب من أول بولة ..! باغدون بغيت نقول قطرة هاواي ..!

شريفة:( ضرباتوو لكتافوو شادة الضحكة بزز و عينيها فاضحينها ) لواااه كوووكا .. هانتا ما غتبقاش وطن و غتولي منفى ..!

حكيم:( رد بهدوء ) نتي بعدا ديما غتبقاي نوارة الحدود ..!

شريفة:( تبسمات بعينين لامعين و بحب و نبرة حنان قالت ) و نتا روح الروح ..! را٠جل فحل كي البارود ديما مخلي الد٠م كيسيل معاه ..!

و هما مزالين كيهضرو .. تقلب الجو لغيام و شمش مجهدة حتى بدات الشتا كتطيح و فنفس الوقت الشمش شارقة تا هي .. و خرج قوس قزح فمنظر هائل ..!

شريفة:الا اونزار تيلي تافوقت ازيسكازَر اوشن تامغرا ..! 《 كاين الشتا و كاينة الشمش و الذيب داير العرس 》

حكيم:( مخرج يديه من الشرجم و الشتا كضرب فيه ) تّريذ أو ووشّن و لا نقولوو تامغرا او ووشّن

شريفة: عقلتي على اول مرة تلاقينا كان عرس الذيب داك النهار بحال اليوم ..!

حكيم:( حرك راسوو بالايجاب كيلعب بلسانوو ففموو ) عقلت أ مدام مها الله اودي ..!

النهااااااااااااية

‎